volume 009 280
༄༅། ཁྲེགས་ཆོད་ཀྱི་ཡང་ཡིག་ནམ་མཁའ་« »ཀློང་ཡངས་བཞུགས་སོ། །
«ནམ་མཁའ་ཀློང་ཡངས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་བྱང་ཆུབ་ལྷུན་འབྱམས་རིག་པའི་ཀློང༌། །གཞི་མེད་རྩ་བྲལ་ཡེ་གྲོལ་འཕོ་འགྱུར་མེད། །གཉུག་མའི་རང་བཞིན་ཅོག་གཞག་རང་གྲོལ་ལ། །མ་བཅོས་འདུ་འབྲལ་མེད་པས་ཕྱག་འཚལ་ལོ། །གནས་ལུགས་རྒྱལ་པོ་ཆོས་ཉིད་རིག་པའི་རྫོང༌། །སྲིད་དང་ཞི་བ་གཉིས་མེད་ཕྱམ་གདལ་བ། །སྤང་བླང་དགག་སྒྲུབ་རེ་དོགས་མེད་པའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། ། ཡངས་དོག་མཐོ་དམན་མེད་པའི་རིག་པ་ལ། །འདི་ཞེས་ངོས་གཟུང་མ་བྱེད་ནམ་མཁའི་ངང༌། །མ་སྐྱེས་རྣམ་པར་དག་པའི་ཆོས་ཉིད་དེ། །ཡིན་མིན་བློ་ལས་འདས་པའི་རང་བཞིན་ལ། །དུས་གསུམ་ཡིད་ཀྱིས་ཚོལ་སྤྲོ་མ་བྱེད་ ཞོག» «།ཇི་སྲིད་ཕྱོགས་རིས་ཞེན་པའི་སེམས་ཡོད་པར། །བདག་འཛིན་ཉིད་དེ་མ་རིག་མུན་པའི་ཀློང༌། །གནས་ལུགས་རྟོགས་པའི་ནུས་མེད་འཆིང་བྱེད་ ཉིད། །དེ་བས་ཆེད་དུ་དམིགས་པ་ཡོད་ན་ཐོང༌། །གང་ལ་དམིགས་པ་འཆིང་བའི་གཟེབ་ཡིན་ཏེ། །གཉིས་སུ་འཛིན་པས་རྣལ་མའི་དོན་མི་མཐོང༌། །ཡིན་མིན་བློ་ཡིན་དགག་སྒྲུབ་ཞེན་པ་ཡིན། །དེ་ལ་དོན་དུ་འཛིན་པས་མ་འཆིང་ ཀྱེ། །གང་ཡང་མ་སྤང་ཀུན་ལས་འདས་པའི་དོན། །ཕྱོགས་བྲལ་རིག་པ་གཏད་མེད་རང་ཡན་ཏེ། །འདི་ཞེས་མི་མཚོན་བསམ་པ་ཀུན་དང་བྲལ། །གཉིས་མེད་ཡངས་པ་ཆེན་པོ་ཕྱམ་གཅིག་གོ» «།ཇི་ལྟར་ནམ་མཁའ་གུད་དུ་གཅོད་པ་ བཞིན། །རང་བྱུང་ཡེ་ཤེས་རྒྱ་ཡན་ཕྱོགས་བྲལ་ལ། །འགྲོ་རྣམས་ཡིད་ཀྱིས་རང་རང་འདོད་གཞུང་འཛིན། །གཉུག་མའི་རང་བཞིན་མ་རྟོགས་སྐལ་བ་དམན། །གང་ཚེ་འདི་ཞེས་རང་གི་ཕྱོགས་འདོད་པ། །དེ་ཚེ་གཞན་ཞེས་དོར་བྱའི་ཆོས་ཡོད་དོ། །གཉིས་མེད་རྟོགས་པའི་སྐལ་མེད་གཟུང་འཛིན་ཉིད། ། དངོས་པོ་མཚན་མར་འཛིན་པ་སྙིང་རེ་རྗེ། །ནུས་མེད་བློ་ཡི་གཟེབ་ཏུ་འཆིང་གྱུར་བ། །གང་གི་རང་བཞིན་ཉེ་བར་བསླད་པའི་ཆོས། །སྲིད་པར་འཁྲུལ་བ་དེས་ཀོ་ཅི་ཞིག་བྱ། །མཁའ་འདྲ་དཔེ་བྲལ་ཕྱོགས་བྲལ་ཤེས་པར་གྱིས། །མི་གཡོ་གདོད་ནས་དག་པའི་བྱང་ཆུབ་སེམས། །མི་དམིགས་སྤྲོས་དང་བྲལ་བའི་རང་བཞིན་ཏེ། །ནམ་ཡང་བཅོས་སུ་མེད་ཀྱི་ཇི་བཞིན་ཉིད། །དེ་བཞིན་ཉིད་ཅེས་སེམས་པ་དེ་ཡང་ཐོང༌། །ངེས་པའི་དོན་ལ་འདི་ཞེས་མཚོན་དུ་མེད། །སྤང་བླང་དགག་སྒྲུབ་རེ་དོགས་ཀུན་ལས་འདས། །གཞི་བྲལ་ལམ་འགགས་འབྲས་བུའི་ཞེན་ཡུལ་མེད། །ཡིན་མིན་གཉིས་མེད་ལྷུན་མཉམ་མི་གཡོ་བ། །བྱར་མེད་རྒྱལ་པོ་རང་བཞིན་རྫོགས་པ་ཆེ། །མི་དམིགས་བསམ་ཡུལ་འདས་པའི་ཀློང་ཉིད་དོ། །ཇི་ལྟར་ནམ་མཁའ་ཡངས་པའི་དབྱིངས་རུམ་འདིར། །འབྱུང་བཞི་འཕོ་འགྱུར་སྣ་ཚོགས་སྣང་ན་ཡང༌། །ནམ་མཁའ་མི་འགྱུར་སྔོན་དེ་ཕྱིས་དེ་བཞིན། །རང་བཞིན་ཀློང་ཡངས་དག་པའི་ངང་ཉིད་ལ། །ཕུང་པོ་སྒྱུ་མ་ཁམས་དང་སྐྱེ་མཆེད་དང༌། །ལས་དང་ཉོན་མོངས་སྣང་སྲིད་སྣོད་བཅུད་ཀུན། །སྣ་ཚོགས་ལས་ཀྱིས་མངོན་སྤྲུལ་ཅིར་སྣང་ཡང༌། །རང་བྱུང་ཡེ་ཤེས་མི་གཡོ་འཕོ་འགྱུར་མེད། །རང་རིག་དོན་དམ་འཁྲུལ་སྣང་ཀུན་རྫོབ་ཅེས། །བཏགས་པའང་དོན་ལ་མེད་དེ་གཟུགས་བརྙན་འདྲ། །མ་སྐྱེས་ཆོས་ཉིད་དག་པའི་རང་བཞིན་ནོ། །འདི་ལྟར་སྣང་སྲིད་འགྲོ་སེམས་འཁྲུལ་པའི་ངོར། །སྣང་དུས་ཉིད་ནས་རང་བཞིན་འགགས་མེད་དེ། །སྒྱུ་མ་དང་འདྲ་རྨི་ལམ་མིག་ཡོར་བཞིན། །རྟེན་འབྲེལ་ཉིད་ཕྱིར་བདེན་པས་སྟོང་པའི་ཕྱིར། །ངོ་བོ་མེད་ཕྱིར་གདོད་ནས་ཡོད་མ་མྱོང༌། །རགས་པར་སྣང་བ་བརྟགས་ན་རྡུལ་ཕྲན་ཏེ། །དེ་ཡང་དཔྱད་ན་ཕྱོགས་ཆ་ཀུན་དང་བྲལ། །མཁའ་བཞིན་དངོས་མེད་རང་བཞིན་སྟོང་པའི་གཟུགས། །སྒྲ་དང་དྲི་རོ་རེག་ཀྱང་སྟོང་པའི་ངང༌། །རྟེན་འབྱུང་རྐྱེན་ལས་སྐྱེས་ཕྱིར་ངོ་བོ་མེད། །སེམས་ཀྱང་དངོས་མེད་ཁ་དོག་མཐོང་ཡུལ་འདས། །ཤིན་ཏུ་དཔྱད་ན་གཟུང་དང་འཛིན་མེད་དེ། །གདོད་ནས་རྣམ་དག་རང་རིག་སྟོང་པའི་དབྱྀངས། །འཁོར་འདས་གཉིས་མེད་གཉིས་སུ་འཛིན་པ་ཉིད། །གཞི་མེད་ལས་བྱུང་རྟེན་འབྲེལ་ཤེས་པར་བྱ། །དེ་ལྟར་ཆོས་ཀུན་གདོད་ནས་མ་སྐྱེས་ཤིང༌། །མཚོན་མེད་ཕྱོགས་ལྷུང་ཀུན་ལས་འདས་པ་ལས། །མི་མཁས་བདེན་པར་ཞེན་པས་སྲིད་པར་འཁྲུལ། །ང་དང་བདག་ཅེས་གཉིས་སུ་འཛིན་པའི་བློས། །འཁྲུལ་པའི་དབང་གྱུར་ཤིང་རྟའི་འཕང་ལོ་འདྲ། །དོན་མེད་འཛིན་པས་འཁྲུལ་བའི་འཁོར་བ་ལ། །གང་རྣམས་རང་བཞིན་མེད་ལ་སོ་སོར་རྟོགས། ། མེད་སྣང་སྟོང་པའི་གཟུགས་ལ་ཞེན་ཅིང་ཆགས། །བདེ་སྡུག་སྣ་ཚོགས་དབང་གྱུར་ཉོན་རེ་མོངས། །སྔ་ཕྱིས་ཀུན་རྟོག་ལས་དང་ཉོན་མོངས་ཆུས། །རང་དབང་མེད་པའི་སྡུག་བསྔལ་བཟོད་རེ་དཀའ། །མེད་ལ་གསལ་བར་སྣང་བའི་ཆོས་རྣམས་ལ། །དངོས་པོ་མཚན་མར་འཛིན་པས་ཞེན་ཅིང་ཆགས། །རྒྱུན་རིང་འཁོར་ཡང་ད་དུང་ཐར་མི་ཤེས། །ཐོག་མཐའ་དུས་མེད་སེམས་ཅན་སྙིང་རེ་ རྗེ། །དེ་ལྟར་མེད་སྣང་འཁྲུལ་བའི་འགྲོ་བ་ཀུན། །ཡེ་ནས་མ་སྐྱེས་རང་བཞིན་རྣམ་དག་ལ། །གློ་བུར་དྲི་མ་སྤྱོད་ཕྱིར་རྒྱལ་བའི་ཆོས། །རང་དང་བློ་དང་འཚམས་པ་དེ་གསུངས་ཏེ། །རྩེ་མོར་གྱུར་པར་འགྱུར་མེད་སྙིང་པོའི་དོན། ། ཡོད་དང་མེད་དང་སྟོང་དང་མི་སྟོང་གནས། །ཕྱོགས་བྲལ་ནམ་མཁའ་ལྟ་བུའི་དགོངས་དོན་ནི། །སུས་ཀྱང་མ་རྙོག་དཔེ་ཟླ་མེད་པ་སྟེ། །བདེན་མིན་རྫུན་མིན་རང་བཞིན་མཐའ་ལས་འདས། །བཅོས་ཤིང་བསྒྱུར་མེད་རང་བབ་རིག་པའི་གནད། །ཇི་བཞིན་སྤྲོས་དང་བྲལ་བའི་ངང་ཉིད་དོ། །རྨོངས་པ་གང་གིས་རང་གི་ཕྱོགས་ཞེན་ནས། །རྩེ་གཅིག་མི་གཡོ་གཟུགས་མེད་བསམ་གཏན་དང༌། ། རྟོག་ལ་རྟོག་མཐུད་རང་འགྲོགས་ཉིད་དང་ནི། །དུས་གསུམ་འབྲལ་མེད་ཟད་ཀའི་ཤེས་པ་ཞེས། །ནམ་མཁའ་གུང་གཅོད་འཛིན་པའི་གཟེབ་ཏུ་འཆིང༌། ། གང་ཚེ་མི་རྟོག་རྩེ་གཅིག་ཉིད་ཡིན་ན། །བསམ་གཏན་གཟུགས་མེད་ལྷ་རྣམས་ཅིས་མི་གྲོལ། །སྔ་ཕྱིས་རྣམ་རྟོག་མ་ཡེངས་ངོས་ཟིན་པ། །དེ་ཉིད་ཀུན་རྟོག་གཡོ་བས་འདུ་བྱེད་དེ། །འདོད་པའི་སེམས་ཡིན་ཐར་པའི་ལམ་འགྱུར་རམ། ། མ་ཡེངས་རབ་བཅས་འཇུག་བུའི་སེམས་དེ་ཡང༌། །རྩོལ་བཅས་བློ་ཡི་དྲི་མས་དོན་མཐོང་མེད། །དེ་ཕྱིར་ཕྱོགས་རིས་གཟེབ་ཀྱིས་ཅི་བྱར་ཡོད། །གཏི་མུག་ཅན་རྣམས་མངོན་པའི་ང་རྒྱལ་འཛིན། །གང་ཚེ་སྣང་བ་རང་གི་སེམས་ཡིན་ ན། །སྣ་ཚོགས་ཉིད་ཕྱིར་མཐོང་ཐོས་རེག་ཡོད་ཕྱིར། །སེམས་ཀྱང་དེར་འགྱུར་ཡང་ན་སེམས་བཞིན་དུ། །སྣང་བའང་བལྟར་མེད་མཐོང་ཐོས་མེད་པར་ འགྱུར། །རང་བས་སྣང་བ་སྔ་རོལ་ཡོད་པའི་ཕྱིར། །རང་ཉིད་མ་སྐྱེས་སྔོན་ནས་སེམས་དེ་ཉིད། །ཡུལ་དུས་ལ་སོགས་གཞན་ན་ཡོད་པར་འགྱུར། །རང་ཉིད་ཕྱིན་ཚེ་ཡུལ་ཀྱང་འགྲོ་བའམ། །ཡང་ན་ཡུལ་བཞིན་སེམས་ཀྱང་ལུས་པར་འགྱུར། །དེ་སོགས་ཉེས་པར་བརྗོད་ཀྱིས་ཡང་མི་ལང༌། །གཅིག་ཉིད་གྲོལ་ན་ཀུན་ཀྱང་གྲོལ་བའམ། །གཅིག་ཉིད་འཁྲུལ་བས་ཀུན་ཀྱང་འཁྲུལ་ལ་སོགས། ། མི་རིག་ནོར་པའི་རང་བཞིན་དེ་ཡོད་པས། །ལམ་ངན་དེ་འདྲ་ནམ་ཡང་མ་བརྟེན་ཅིག །འདི་ལྟར་སྣང་བ་བག་ཆགས་འཁྲུལ་པའི་གཟུགས། །སེམས་ལས་སྣང་ཡང་སེམས་སུ་མ་གྲུབ་ལ། །སེམས་ལས་གཞན་དུའང་ཅུང་ཟད་མེད་པ་སྟེ། །ཇི་ལྟར་དྷ་དུ་ར་ཡི་སྣང་བའམ། །བད་ཀན་དབང་གིས་ཉ་ལྕིབས་སྐྲ་ཤད་བཞིན། །གང་ནའང་མེད་ལ་སྣང་བར་ཤེས་པར་མཛོད། །འཁྲུལ་སྣང་འཁྲུལ་འཛིན་འཁྲུལ་པའི་སེམས་ལས་བྱུང༌། །སེམས་ནི་དངོས་མེད་ནམ་མཁའི་རང་བཞིན་དུ། །གཞི་རྩ་རྟེན་མེད་འབྱུང་བའི་ས་མེད་པར། །ཡེ་སྟོང་སྤྲོས་དང་བྲལ་བར་མཁྱེན་འཚལ་ལོ། །བཙལ་བས་ཡུལ་མེད་སྟོང་ལ་དངོས་པོ་མེད། །ཚོལ་བའི་སེམས་མེད་མ་སྐྱེས་རྣམ་པར་དག» «།གཟུང་འཛིན་གཉིས་མེད་བདག་མེད་ཡངས་པའི་ཀློང༌། །མཁའ་མཉམ་བསམ་བརྗོད་འདས་པའི་རང་བཞིན་དུ། །སྣ་ཚོགས་འཁོར་འདས་ཆོས་རྣམས་ཕྱམ་གདལ་བས། །ཡེ་བབས་རང་བཞིན་གཉུག་མའི་ཡེ་ཤེས་ནི། །མཁའ་འདྲ་འཕོ་འགྱུར་ཕྱོགས་རིས་མེད་པའི་དོན། །ད་ལྟའི་དུས་ནས་གནས་པར་མཁྱེན་འཚལ་ལོ། །གང་ཚེ་སྣོད་རྣམས་ནམ་མཁའ་ཐ་དད་ལྟར། །སྣང་སྲིད་འཁོར་འདས་ཡེ་སྟོང་ཅིར་སྣང་ཡང༌། །བཟང་ངན་གཉིས་མེད་རང་བཞིན་དག་པའི་ངང༌། །དེ་ཚེ་སྣོད་རྣམས་སོ་སོར་གྱེས་ན་ཡང༌། །ནམ་མཁའ་རིས་མེད་དེ་བཞིན་དབྱྀངས་སུ་གཅིག» «། འཕོ་མེད་འགྱུར་མེད་སྔ་ཕྱི་བཟང་ངན་མེད། །དེ་བཞིན་ཆོས་ཀུན་རང་བཞིན་རིག་པའི་ངང༌། །སྔ་ཕྱིའི་རིས་མེད་གཞི་བྲལ་ཡངས་པ་ཆེ། །དེ་ལྟར་ཤེས་དེ་རང་བཞིན་མཁས་པ་ཡིན། །ད་ལྟའི་རང་རིག་དྲི་མས་མ་བསླད་པ། །གསལ་སྟོང་འཛིན་མེད་རྒྱ་ཡན་ཕྱོགས་བྲལ་ཉིད། །ཆོས་སྐུའི་དོན་དེ་སྐད་ཅིག་འཆར་བ་ནི། །དམ་པའི་བླ་མས་བྱིན་རླབས་མངོན་པ་ཡིན། །རྟོགས་ན་ཀུན་ཡིན་ཆོས་ཉིད་རོལ་པ་ཡིན། །ཡེ་ཡིན་བབས་ཡིན་རང་བྱུང་ཡེ་ཤེས་ཡིན། །མ་རྟོགས་མཁའ་འདྲ་སྟོང་པ་སྤྲོས་བྲལ་ཡང༌། །རྟོག་པའི་རིས་ཡིན་རང་སེམས་འཆིང་བྱེད་ཉིད། །དེ་བས་ཡིན་མིན་ཕྱོགས་འདས་ཤེས་པ་གཅེས། །མ་ལུས་རང་བཞིན་དག་པའི་སངས་རྒྱས་ནི། །རང་བྱུང་རིག་པ་བཅོས་བསླད་བྲལ་བ་སྟེ། ། ཐ་མལ་གྱིན་འདའ་བློ་ལས་འདས་པ་ཉིད། །རང་གིས་རིག་སྟེ་མཚོན་པའི་ཡུལ་ལས་འདས། །དེ་ལྟར་གནས་ལུགས་དོན་གྱི་མཆོག་རིག་ན། །མ་བསྒོམ་རང་བཞག་བསྒོམ་པའི་རྒྱལ་པོ་ཉིད། །གཏང་གཞག་སྤྲོ་བསྡུ་མེད་པ་མཁྱེན་འཚལ་ལོ། །ཇི་བཞིན་སྤྲོས་དང་བྲལ་བའི་རང་བཞིན་ཉིད། །ཡེ་བབས་བཅོས་བསླད་མེད་པའི་ངང་དེར་གློད། །གཟེབ་བྲལ་ཁོང་ཡངས་ངང་གི་བློ་བདེ་བ། །རེ་དོགས་གཉིས་སུ་མེད་པའི་ཡེ་ཤེས་འཆར། །ལུས་ངག་མ་གཅོས་སེམས་ཀྱང་གཟུང་དུ་མེད། །གང་སྣང་ཐོག་དེར་བཅོས་བསླད་བྲལ་བ་ན། །དེར་འཛིན་ཤེས་པ་མ་སྤངས་དབྱིངས་སུ་གྲོལ། །རང་བཞག་ལྟོས་བྲལ་སྒོམ་པའི་རྒྱལ་པོ་མཆོག» «།ཕྱམ་གདལ་རིག་པ་ནམ་མཁའ་ལྟ་བུར་འཆར། །རྒྱ་ཡན་ཕྱོགས་བྲལ་ཁོལ་བུར་མ་བཅིང་པའི། །རང་རིག་ཡེ་ཤེས་རྒྱ་བསྐྱེད་དཔངས་བསྟོད་ལ། ། གསལ་ལ་དྭངས་ཕྱིན་སྤྲོ་བསྡུ་བྲལ་བར་གློད། །ཤར་དང་མ་ཤར་རིས་མེད་ཆེན་པོར་གྲོལ། །འཆར་བ་མི་དགག་གནས་པ་མི་བསྒྲུབ་པར། །གང་ཡིན་ངང་དེར་རེ་དོགས་མེད་པར་གློད། །ཀུན་ཡིན་སྣང་སེམས་གཏད་མེད་ཆེན་པོར་གྲོལ། །རང་བྱུང་མ་བཅོས་སོ་གཉུག་གཅིག་ཏུ་འཆར། །རེ་དང་དོགས་མེད་ལས་ཟིན་ལྟ་བུའི་ངང༌། །འབྱུང་འཇུག་བྲལ་བ་གླེན་པ་ལྟ་བུར་གློད། །ཚོགས་དྲུག་ལྷུག་པ་བུ་ཆུང་ལྟ་བུའི་སེམས། །རང་གསལ་མི་གཡོ་ཡེ་ཤེས་ཆེན་པོར་འཆར། །རང་བཞིན་བསམ་ཡུལ་འདས་པའི་ནམ་མཁའ་ལ། །མ་ཡེངས་ཆེད་འཛིན་ཞིག་པའི་རང་རིག་ཉིད། །སྤྲོས་བྲལ་དྲན་བསམ་བྲལ་བར་ལྷན་ནེར་ཞོག» «།དམིགས་བསམ་བློ་ལས་འདས་པའི་ཡེ་ཤེས་འཆར། །བདེ་གསལ་རྟོག་པ་མེད་པའི་ཉམས་མྱོང་འབྱུང༌། །དྭངས་གསལ་གཡོ་བ་མེད་པའི་རྒྱ་མཚོ་ལ། ། རང་གསལ་སྒོ་ལྔ་མ་འགགས་ལྷུག་གི་ཞོག» «།དཔའ་རླབས་རྙོག་པ་མེད་པའི་འོད་གསལ་མཆོག །བྱིང་རྒོད་སྤྲོས་དང་བྲལ་བ་ངང་གིས་འཆར། །སྟོང་གསལ་འགགས་པ་མེད་པའི་ཉམས་མྱོང་འབྱུང༌། །གདོད་ནས་འཕོ་འགྱུར་མེད་པའི་རི་རྒྱལ་ལ། །རེ་དོགས་བཅོས་བསླད་མེད་ཀྱིས་རི་བཞིན་ཞོག» «།མི་དམིགས་བསམ་བརྗོད་འདས་པའི་ཡེ་ཤེས་འཆར། །འཕྲོ་གནས་སྤྱོད་པ་མེད་པའི་ཉམས་མྱོང་འབྱུང༌། །སྣ་ཚོགས་སྣང་བས་སྟོང་པའི་ཡུལ་རྣམས་ལ། །རྟོག་དཔྱོད་ཚོལ་ཕྲོ་མ་བྱེད་ལྷན་གྱིས་ཞོག» «།གང་ཡིན་ཀུན་ཡིན་གཟའ་གཏད་མེད་པར་གྲོལ། །སྣང་སེམས་འཛིན་པ་མེད་པའི་ཡེ་ཤེས་འཆར། །རྐྱེན་སྣང་གྲོགས་སུ་འཆར་བའི་ཉམས་མྱོང་འབྱུང༌། །རི་བོ་རྒྱ་མཚོ་རིག་པ་ཅོག་གཞག་དང༌། ། མི་གནས་མི་དམིགས་བཞི་རྩ་བྱང་ཆུབ་དང༌། །ངང་ལས་མི་གཡོ་གཟུང་འཛིན་སྤྲོས་དང་བྲལ། །དེ་ཙམ་ཉིད་ནས་རང་རིག་ཆོས་ཀྱི་སྐུ། །དུས་གསུམ་འཕོ་འགྱུར་མེད་པའི་དགོངས་པར་ཕྱིན། །དུས་གསུམ་སེམས་ཀྱི་འཇུག་པ་ཞི་བའི་ཚེ། །འཁོར་བའི་རང་བཞིན་ཚོགས་བརྒྱད་ཀུན་གཞིར་བཅས། །རང་དག་ཡེ་ཤེས་མཆོག་གི་དོན་མཐོང་ནས། །རང་བྱུང་རིག་པའི་ཀློད་དུ་མྱ་ངན་འདའ། ། འདི་ནི་རྡོ་རྗེ་ཐེག་པ་ཀུན་གྱི་རྩེ། །ཟབ་ཞི་སྤྲོས་དང་བྲལ་བའི་འོད་གསལ་ ཉིད། །ད་ལྟ་ཉིད་དུ་བླ་མའི་དྲིན་གྱིས་མཐོང༌། །གང་དུ་མི་རྟོག་རྩེ་གཅིག་ལུང་མ་བསྟན། །གསལ་ཞིང་རིག་ཙམ་རྟོག་པ་མེད་པ་དང༌། །གཡོ་བའི་ཀུན་རྟོག་སྣ་ཚོགས་རྣམ་པ་གསུམ། །གཟུགས་མེད་གཟུགས་དང་འདོད་པའི་སེམས་ཉིད་དེ། །ཏིང་འཛིན་དེ་ལས་ཁམས་གསུམ་ཉེ་བར་སྐྱེ། །འཁོར་བ་ཉིད་ལས་གྲོལ་བའི་སྐབས་མེད་དོ། །འདི་ནི་ཐར་པའི་ལམ་གྱུར་བསམ་གཏན་མཆོག» «།རང་རིག་མི་གཡོ་གཟུང་འཛིན་ཀུན་དང་བྲལ། །དམིགས་གཏད་སེམས་མེད་བློ་ཡི་འཇུག་པ་ཞི། །སེམས་དང་ཡིད་དང་རྣམ་ཤེས་ཀུན་དང་བྲལ། །ཐུགས་ཀྱི་གསང་བ་འོད་གསལ་སྙིང་པོ་སྟེ། །བྱར་མེད་དྲན་བསམ་འདས་པའི་ཀློང་ཉིད་དོ། །མ་བཅོས་ལྷུག་པ་ཡེ་གྲོལ་ཟང་ཀ་མ། །ཅོག་གཞག་ཅེར་མཐོང་བསམ་ཡུལ་འདས་པ་ནི། །སོ་མ་གཉུག་མ་ཇི་བཞིན་ཆོས་སྐུའི་ངང༌། །ཡེ་བཞིན་རྣམ་དག་ཕྱོགས་ལྷུང་ཀུན་དང་བྲལ། །དུས་གཞི་འཕོ་འགྱུར་མེད་པའི་ངང་ལ་ ཞོག །རེ་དོགས་ཆེད་འཛིན་ཞིག་པ་རྣལ་མའི་དོན། །སུས་ཀྱང་བཅོས་སུ་མེད་པའི་གཞི་བྲལ་དང༌། །དམིགས་བསམ་གདོད་ནས་དག་པར་ཤེས་པར་བྱ། ། གནས་ལུགས་ཡེ་གཞི་ལྷུན་གྲུབ་བཅོས་བསླད་མེད། །མཁའ་ལྟར་རྣམ་དག་ཕྱོགས་ལྷུང་ཀུན་དང་བྲལ། །དེ་ཉིད་རྟོགས་པ་རྣལ་འབྱོར་ལམ་གྱི་གཞི། ། ཕྱོགས་བྲལ་ནམ་མཁའ་འདྲ་བས་གུད་མ་གཅད། །མ་རྟོགས་རྐྱེན་རྣམས་སོ་སོར་གཟུང་ལས་བྱུང༌། །དེ་བས་བསམ་འདས་ཕྱམ་གདལ་མཁྱེན་པར་ མཛོད། །གཞི་ཉིད་ངང་ལས་གློད་པ་སྒོམ་པའི་མཆོག» «།མི་སྤྲོ་མི་བསྡུ་གཉེན་པོས་མ་བཅོས་ཤིང༌། །སྤངས་བྱས་མ་བསྒྱུར་རང་བབ་ཇི་བཞིན་གཞག» «།མ་བྱིང་མ་རྨུགས་ཕྱལ་བ་ལྷུག་པ་ཉིད། །རང་གསལ་ངང་དྭངས་བཅོས་བསླད་བྲལ་བ་ནི། །ནམ་མཁའི་དཀྱིལ་ལྟར་རྒྱ་བསྐྱེད་དཔངས་བསྟོད་ལ། །སྒོ་ལྔ་རང་ཡན་རིག་པ་ཕྱོགས་ཡན་ཐོང༌། །དམིགས་གཏད་མེད་པའི་ཉམས་མྱོང་ཕྱོགས་མེད་འཆར། །བདེ་གསལ་མི་རྟོག་འཁོར་ལོས་ཉིན་མཚན་འདའ། །ཉམས་ཡིན་མ་ཞེན་རྟོགས་པའི་རྩལ་སྦྱོང་མཛོད། །ངང་དེར་སྤྱོད་པས་སྤྱོད་པའི་རྒྱལ་པོ་མཆོག» «།བླང་དང་དོར་བ་མེད་པའི་ཆོས་ཉིད་དེ། །མཉམ་གཞག་སྤྱོད་པ་མ་སྐྱེས་ནམ་མཁའ་འདྲ། །སྒོ་ལྔ་རང་གསལ་བུ་ཆུང་སྣང་བ་འདྲ། །གཉིས་འཛིན་རིས་མེད་ངང་དེར་སྤྱོད་པ་ན། །སྣང་བ་སོ་སོར་རྟོགས་པའི་ཞེན་པ་ཐོང༌། ། རྗེས་སྣང་སྤྱོད་པ་སྒྱུ་མའི་དཔེ་བརྒྱད་དེ། །གང་སྣང་བདེན་པས་སྟོངས་ཕྱིར་བདེན་ཞེན་ཐོང༌། །བདེན་མེད་ཆེད་དུ་མ་འཛིན་གཏད་མེད་ཐོང༌། །མཉམ་རྗེས་གཉིས་མེད་བཅོས་བསླད་བྲལ་བ་ནི། །གང་སྣང་གང་ཤར་ཆོས་སྐུའི་རོལ་པ་ཞེས། །བཟང་རྟོག་གཟེབ་ཀྱང་དོན་ལ་མི་གནས་ཕྱིར། །ཆེད་དུ་འཛིན་ཞེན་བླང་དོར་མེད་པའི་ངང༌། །མ་སྤངས་རང་སར་གྲོལ་བའི་ཚུལ་གྱིས་སྤྱད། །འདི་ལྟར་གནས་ལུགས་ལྟ་བའི་རྣལ་འབྱོར་པས། །རིག་པའི་གཤིས་ལ་གང་ཡང་མི་གནས་ཕྱིར། །བརྡ་དང་ཐ་སྙད་འདས་པར་ཤེས་པ་དང༌། །བརྡ་དང་ཐ་སྙད་འདོགས་པར་མི་འགལ་བ། །ཤེས་པ་དེ་ཉིད་དགོངས་ཀླཽང་ཡངས་པ་ཡིན། ། དེས་ན་རང་གསལ་ཀློང་གྱུར་འབྲས་བུའི་མཆོག» «།རེ་དང་དོགས་པ་ཀུན་ལས་འདས་པ་ཡིན། །རང་རིག་གནས་ལུགས་རྟོགས་པ་ལྟ་བ་སྟེ། །དེ་ཡི་ངང་ལ་འཇོག་པ་སྒོམ་པའི་གནད། །སྣང་སེམས་འཛིན་པ་རང་གྲོལ་སྤྱོད་པ་སྟེ། །རེ་དོགས་བཅོས་བསླད་མེད་པ་འབྲས་བུའི་མཆོག» «།དེ་ལྟར་ཤེས་ཏེ་རྣལ་འབྱོར་རྒྱལ་པོ་ཆེ། །ཆོས་རྣམས་ཀུན་གྱི་དབྱིངས་སམ་གནས་ལུགས་ནི། །སྐྱེ་མེད་སྤྲོས་བྲལ་རང་རིག་ཡེ་ཤེས་ཏེ། །དེ་ཉིད་ངང་དུ་ཆོས་རྣམས་ལ་བཟླ་འོ། ། གཉུག་མའི་སེམས་ལ་སྒྲིན་པོའི་གཟེབ་བསྐུར་ཏེ། །བཅོས་ཤིང་བཅོས་ཤིང་སྙིང་པོའི་དོན་ལ་སྒྲིབ། །དེ་བས་གཟེབ་བྲལ་གླེན་སྣང་ལྷོད་ཡོད་པས། །མི་རྟོག་ཆོས་ཉིད་ཡངས་པའི་ངང་དེར་ཞོག །སྒྲ་ཚིག་ཐ་སྙད་ནེ་ཙོའི་འདོན་པ་ འདྲ། །གཉུག་མའི་ཡེ་ཤེས་བསམ་པ་ཀུན་བྲལ་བས། །དྲན་བསམ་བློ་འདས་ཆོས་སྐུའི་ངང་དེར་ཀློད། །རང་བྱུང་ཡེ་ཤེས་བཅོས་བསླད་བྲལ་བའི་དོན། །ཇི་བཞིན་བཞག་པས་དེ་བཞིན་མཐོང་བ་ཡིན། །ཆུ་དང་མར་མེ་རང་གསལ་ངང་དེར་ཞོག» «།རེ་དོགས་རྩ་བ་ཆོད་པས་བློ་བདེ་རྙེད། །གནས་ལུགས་རང་བཞིན་ཤེས་པས་ཞི་བདེ་རྙེད། །ཡིན་མིན་སྤྲོས་པ་བྲལ་བས་དོན་བདེ་རྙེད། །ཆོས་ཉིད་ངང་ལ་གནས་པས་བབས་བདེ་རྙེད། །གང་ལའང་ཆེད་འཛིན་ཞིག་པས་རང་བདེ་རྙེད། །སྐུ་གསུམ་ཡེ་ནས་རྫོགས་པས་ཡེ་བདེ་རྙེད། །དེ་ལྟར་ཆོས་ཀུན་ཡེ་ནས་གྲོལ་བའི་དོན། །དེ་བཞིན་མངོན་དུ་སྟོན་པའི་ཚུལ་འདི་ནི། །རང་བཞིན་རྫོགས་པ་ཆེན་པོའི་རྣལ་འབྱོར་པ། །ཀློང་ཆེན་རབ་འབྱམས་བཟང་པོས་ལེགས་པར་བཀོད། །དེང་སང་འགྲོ་བ་ཕལ་ཆེར་བསོད་ནམས་དམན། །ཡང་དག་དོན་མཐོང་ཟབ་མོའི་ཚུལ་དང་རིང༌། །རང་གིས་ངན་རྟོག་ཕྱོགས་རེའི་བློ་མིག་ཅན། །གནས་ལུགས་ཉི་མ་དྲི་མེད་མཐོང་བ་དཀོན། །དེ་ཕྱི»ར་«བྱིས་པའི་བློ་ཅན་གྱིས་རྨ»ོ«ངས་པའི། །འགྲོ་ཀུན་ཡང་དག་ཟབ་མོའི་མཁའ་དབྱིངས་སུ། ། ནུས་ལྡན་རྣམས་ཀྱི་ཐུགས་རྗེའི་འོད་བཀྱེ་སྟེ། །དགེ་བ་འདི་ཡིས་ཕྱམ་ཅིག་ཡོངས་གྲོལ་ཤོག» «།ཡང་དག་ཇི་བཞིན་ཡོངས་བཤད་བསོད་ནམས་དེས། ། འགྲོ་ཀུན་གདོད་ནས་དག་པའི་མཁའ་དབྱིངས་སུ། །མ་འབད་བཞིན་དུ་ངང་གིས་ཡོངས་གྲོལ་ཏེ། །སྐུ་གསུམ་ལྷུན་གྲུབ་ཆོས་ཀྱི་རྒྱལ་པོར་ཤོག» «ཁྲེགས་ཆོད་ཀྱི་ཡང་ཡིག་ནམ་མཁའ་ཀློང་ཡངས་ཞེས་བྱ་བ་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ། །སྔགས་ཀྱི་བདག་མོས་སྲུངས་ཤིག» «།ས་མ་ཡ། དགེའོ། དགེའོ། དགེའོ།། །།«མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༩༽ཁྲེགས་ཆོད་ཀྱི་ཡང་ཡིག་ནམ་མཁའ་ཀློང་ཡངས།
»- PAGE 318 -- PAGE 327 -- PAGE 317 -