འཇམ་དཔལ་རྒྱུད་ལུགས་གསོལ་འདེབས་བྱིན་རླབས་ཆར་འབེབས་ཞེས་བྱ་བ་བཞུགས།
༄༅། །འཇམ་དཔལ་རྒྱུད་ལུགས་གསོལ་འདེབས་བྱིན་རླབས་ཆར་འབེབས་ཞེས་བྱ་བ་བཞུགས།
ཁྱབ་བདག་དང་པོའི་སྟོན་པ་ཀུན་ཏུ་བཟང༌། །ངེས་པ་ལྔ་ལྡན་རིགས་ལྔ་གང་ཆེན་མཚོ། །སྒྱུ་འཕྲུལ་རོལ་མོ་རིགས་གསུམ་སེམས་དཔའ་ལ། །གསོལ་བ་འདེབས་སོ་རྒྱལ་བ་དགོངས་པའི་བརྒྱུད། །སེམས་ཉིད་སྤྲོས་བྲལ་འཇམ་དཔལ་ཡེ་ཤེས་སེམས། །གཟུང་འཛིན་གཉིས་མེད་དོན་དམ་ཇི་ལྟ་དང༌། །ཐ་སྙད་ཀུན་རྫོབ་མ་འདྲེས་ཇི་སྙེད་པའི། །མཁྱེན་གཉིས་ཡེ་ཤེས་འཆར་བར་བྱིན་གྱིས་རློབས། །རྒྱལ་བའི་གདུང་འཚོབ་རིགས་ཅན་དྲ་མ་ལྔ༌། །དགའ་རབ་ཤྲཱི་སེངྷ་རྒྱལ་པོ་ཛཿ རིག་འཛིན་རྣམ་བརྒྱད་པདྨ་ཐོད་ཕྲེང་རྩལ། །གསོལ་བ་འདེབས་སོ་རིག་འཛིན་བརྡ་ཡི་བརྒྱུད། །སེམས་ཉིད༴ སོགས། ཚངས་པའི་མེ་ཏོག་རྗེ་འབང་ཉི་ཤུ་ལྔ༌། །གྲུབ་པའི་དབང་ཕྱུག་གཏེར་སྟོན་བརྒྱ་རྩ་བརྒྱད། །འཇམ་དཔལ་གྲུབ་པ་མི་ཕམ་ཆོས་ཀྱི་རྗེ། །གསོལ་བ་འདེབས་སོ་གང་ཟག་སྙན་ཁུང་བརྒྱུད། །སེམས་ཉིད༴ རིག་སྟོང་གདོད་མའི་མགོན་པོ་འཇམ་དཔལ་དབྱངས། །རྣམ་ཀུན་མཆོག་ལྡན་ལྷ་མོ་དབྱངས་ཅན་མ། །མཁའ་ཁྱབ་ཞིང་གི་རྒྱལ་དང་དེ་སྲས་ཀྱི། །སྤྲོ་དང་བསྡུ་བའི་བྱེད་པོ་ཡེ་ཤེས་སེམས། །གསོལ་བ་འདེབས་སོ་ལྷག་པའི་ལྷ་མཆོག་དགོངས། །སེམས་ཉིད་སྤྲོས་བྲལ་འཇམ་དཔལ་ཡེ་ཤེས་སེམས། །གཟུང་འཛིན་གཉིས་མེད་དོན་དམ་ཇི་ལྟ་དང༌། །ཐ་སྙད་ཀུན་རྫོབ་མ་འདྲེས་ཇི་སྙེད་པའི། །མཁྱེན་གཉིས་ཡེ་ཤེས་འཆར་བར་བྱིན་གྱིས་རློབས། །གནས་ཡུལ་ཞིང་གི་བདག་པོ་མཁའ་འགྲོ་མ། །རྒྱལ་བའི་བསྟན་པ་སྲུང་བའི་དྲེགས་པ་ཅན། །ཁྱད་པར་འཇིགས་བྱེད་ལས་ཀྱི་གཤིན་རྗེ་ལ། །གསོལ་བ་འདེབས་སོ་མ་སྲིང་དམ་ཚིག་ཅན། །སེམས་ཉིད་སྤྲོས་བྲལ་འཇམ་དཔལ་ཡེ་ཤེས་སེམས། །གཟུང་འཛིན་གཉིས་མེད་དོན་དམ་ཇི་ལྟ་དང༌། །ཐ་སྙད་ཀུན་རྫོབ་མ་འདྲེས་ཇི་སྙེད་པའི། །མཁྱེན་གཉིས་ཡེ་ཤེས་འཆར་བར་བྱིན་གྱིས་རློབས། །ཅེས་པའང་ཤཱཀྱའི་དགེ་ཚུལ་སྤོབས་པ་བརྩེགས་པས་བསྐུལ་ངོར་སྔགས་བཙུན་ཟིལ་གནོན་དགྱེས་པ་རྩལ་ཞེས་འབོད་པས་བྲིས་པ་དགེའོ།། །།ཙིནྟཱམཎིཔཱུ་ཛ་མཱ་ལ་སཾ་གྲཧྶསྟི།།