དུག་ནད་སྦྱོར་ངན་བཅོས་པའི་ཡི་གེ་ཕ་ལམ་རྡོ་རྗེའི་མཚོན་ཆ་ཞེས་བྱ་བ་ཨཱ་སཱི་ནཾ།
༄༅། །དུག་ནད་སྦྱོར་ངན་བཅོས་པའི་ཡི་གེ་ཕ་ལམ་རྡོ་རྗེའི་མཚོན་ཆ་ཞེས་བྱ་བ་ཨཱ་སཱི་ནཾ། །[1]
གཏི་མུག་འདོད་ཆགས་ཞེ་སྡང་དུག་བཅོམ་ནས། །གཞན་གྱི་དུག་རྣམས་ཞི་མཛད་དྲང་སྲོང་ཆེ། །སྔོན་མེད་སྨན་པའི་མཆོག་གྱུར་འཇམ་དབྱངས་ལ། །མཆོད་ནས་སྦྱོར་ངན་བཅོས་ཐབས་འདིར་བཤད་དོ། །དང་པོ་ཆམ་པ་འདྲ་འོང་སྟོད་འཚངས་སྡང་། །རོ་རྒྱབ་གཟེར་ཞིང་གྲང་དྲོ་གཉིས་མི་བཟོད། །ཆང་འཐུང་པ་ལ་ན་ཟུག་ཚུགས་པ་མེད། །སོ་རྩེ་མཆིན་གསང་སྐྲངས་དང་རྩིབ་མ་འཕར། །མདོག་འགྱུར་སོག་གཞུག་འབྲུམ་ནག་སྟོན་ན་ཞེལ། །མཆིན་བབས་མིག་ན་གློ་བའི་སྣ་སྐམ་ཞིང་། །མཆེར་པའི་མཆུ་འགས་སྙིང་ལྕེ་ནག་ལ་ཐུང་། །སྣོད་ཀྱི་རྣ་བ་བརྒྱངས་འདྲ་མགོ་སྒྱུར་དཀའ། །གདོང་སྤོས་འབྲུམ་བུས་བཏབ་དང་འཁོལ་བུར་བསྐྲངས། །བརྡོལ་ཞིང་མཐའ་མ་ཟ་བ་རེག་པའི་དུག །འགའ་ཞིག་སྟོད་ཚ་སྨད་གྲང་འཁོལ་བུར་འཕྲིག །སྐྱ་རྦབ་རྨུ་རྫིང་མཛེ་དང་ཆ་ཤས་འདྲ། །རིམ་གྱིས་ཤེད་ཆུང་ཤ་མདོག་ནག་པོར་འགྱུར། །ཟུག་རྔུ་ཆུང་དང་དྲན་པ་ཉམས་པ་དང་། །སྨྱོ་དང་འབོགས་པ་ལ་སོགས་ཅིར་ཡང་སྟོན། །རྩ་ནི་མ་ངེས་འགྱུར་ཞིང་སྨུག་པོ་འདྲ། །ཁྱད་པར་འཕྲིག་ཅིང་འདར་བ་འདི་ལ་ཡོད། །ཆུ་ཡང་འགྱུར་མང་ཕལ་ཆེར་དམར་བ་དང་། །ནད་ཆུ་ལི་སྡེར་ཁ་སྤྱད་ནང་བཏང་རླངས་མ་ཡལ། །སས་ལྕིབས་ཞག་ལོན་འཇའ་འོད་གཞི་ལ་སྣང་། །ཡང་ན་ནད་ཆུར་བྱ་ཕོའི་ཟེ་ཁྲག་དང་། །བོང་ང་དཀར་པོ་བཏབ་ན་རྣག་མདོག་སྟོན། །ཡང་ན་ཆུ་གཙང་ནད་དུ་ཆུ་མ་འགུལ་བར་ཉི་མའི་ཟེར་ལ་ཁྱེར། །ནད་པའི་མཆིལ་གཉིད་སད་འདྲོག་བཏབ་མདུང་ཚུགས་ཟུག་ན་ཡིན། །གཞན་ཡང་དྲི་ཆུ་དཀར་གོང་བསྲེགས་དང་སྤྲད། །ལྕགས་གཡའ་ཆགས་འདྲ་ངོས་བཟུང་འདི་ལ་ནི། །དུག་རིགས་སྨན་མང་བཏང་ན་འཁྲུལ་བ་སྲིད། །བྱེར་ཡུན་རིང་བ་རླུང་བཅོས་རྩ་ཆུ་བརྟག །ནད་གཞན་ཁ་འཐོར་བཅོས་ནས་གཞི་མ་སྤྱད། །ཀུན་གྱིས་མ་རྟོགས་བསྡུ་སྨན་ཐོ་རངས་གཏོང་། །བཙན་དུག་དཀར་པོ་ཆིག་ཐུབ་དབང་ལག་དང་། །ཡུངས་ཀར་ཕག་ནག་པོའི་ཁྲག་བཟང་དུག་སྣ་དང་། །རིལ་བུ་བསྡུ་སྨན་མཆོག་ཡིན་ཆང་གིས་འཕུལ། །ཁོང་པར་བཏང་ན་སྦོས་འཁྲོག་ཕོ་བར་འདྲིལ། །བཤལ་ལམ་སྐྱུག་ན་ཡིན་པར་འཁྲུལ་མི་སྲིད། །ཧ་ཅང་བུངས་ཆེ་བཟོད་མིན་ཕྲལ་ལ་སྦྱངས། །གཞན་དུ་རིང་དུ་བསྡུ་སྟེ་ཟས་སྤྱོད་སོགས། །གང་གནོད་དེ་དུས་བསྟེན་འཇུག་སློང་བ་ཡིན། །བསྡུས་རྟགས་སྔར་བཤད་ཉིད་ཕྱིར་འདིར་མ་བཟླས། །ཕག་པའི་ཁྲག་ལ་རིན་ཆེན་རིལ་བུ་སྦྱར། །གྲང་ཤས་ཆེ་ན་ཁྲག་ཆབ་སེ་འབྲུ་ལྔ། །སེ་འབྲུ་སུཀྨེལ་པི་པི་ལིང་ཤིང་ཚྭ། །གུར་ཀུམ་ཆ་མཉམ་སྦྱར་བ་འདི་ལ་བསྔགས། །གུང་གཉིས་སྟེན་ཅིང་རིན་ཆེན་རྙེད་དཀའ་ན། །ཀོ་ཊ་སུཀྨེལ་སྨན་སྨུག་བོང་ང་དམར། །བྱང་བུལ་གསེར་མདོག་སྲན་ནག་སྦྱར་བས་བསད། །དེ་དུས་སྡུད་པའི་དུས་སུ་སྨན་ཡང་གཏོང་། །དེ་ནས་ནད་རོ་སྦྱང་བ་ཀོ་ཊ་འམ། །སུ་མི་སྨན་ཉུང་མ་འདྲ་བ་མོན་དུག་གཏོང་བའི་གླིང་དུ་སྐྱེ་ལས་འཆོང་འདྲའི་ཚིག་བཤལ་ལམ། །བསེ་རུ་དཀར་དང་སུཀྨེལ་སྨན་སྨུག་པོ། །གླ་རྩི་གསེར་མདོག་དུག་དབྱུང་དངུལ་ཆུ་དང་། །རྒྱ་ཚ་ཨ་རུ་མཆུ་སྙུང་རྩེ་མོ་གསུམ། །དོང་ཁའི་ཐོག་བཞིའི་རུས་དོར་བཤུས་པའི་རྩི། །དུར་བྱིད་མཐེབ་ཕྱི་ལྤགས་ནག་པོའི་རྩི་ཕུད། ཡོས་སུན་གཅིག་དང་མཉམ་དུ་བརྔོས། དེ་ནས་སྙིང་པོ་ཕུང་པའི་བར་ཤུན་གཏོང་ཚིགས་ཙམ་གྱི་ལྤགས་ཕྲལ་ལམ། །ཡང་ན་ཡོས་ཀྱི་ཁྲོད་དུ་བཏུལ་ན་ཡིན། །འདི་མེད་བདུད་རྩི་ཟར་བུའི་ཐར་ནུ་ཁཎྜྻ་དང་། །དན་རོག་བདུན་གྱི་ལྕེ་ཕྱུང་རྩ་སྦྱོང་ན། །བྱང་ནག་བདུན་དང་པི་པི་ལིང་ཡོད་ཙམ། །ལྷན་དུ་བསྣུར་བ་བསྣན་རྣམས་རིལ་བུ་སྦྱར། །མཁན་ཆུས་ལུས་བཀྲུ་མར་ཕྱིའི་དྲིལ་ཕྱིས་བྱ། །ལྕམ་པ་ཟྭ་ཚོད་གཡེར་བཏབ་ཐུག་པ་ནི། །ཞག་གསུམ་པར་བཏང་དེ་ནས་ཟླ་སྨད་ལ། །ཧོར་ཟླ་དགུ་པའི་ཉེར་དགུའི་ཉིན་བརྐོ་དུས། །མི་དང་མ་ཕྲད་གནམ་མ་མཐོང་བ་དང་། །མཚོན་གྱིས་མ་རེག་རྩ་བ་མ་ལུས་ཕྱུངས། །གྲིབ་བསྐམས་བུད་མེད་རེག་མིན་ཀོ་ཊ་དེ། །གཏུན་ནང་གཏུན་བུ་ཕྱིར་བསྟན་འབྲས་ཉག་བཅས། །བརྡུངས་བ་ཆང་དང་བཅས་པ་ལྕག་ཏུ་བཞག །དེ་ནས་གོས་དྲོ་རིལ་བུ་སྲན་མ་ཙམ། །བཅོ་ལྔ་ལྟོ་བ་བསྲ་སྙིས་བསྣོན་འབྲིང་དང་། །ནད་པ་འཚོ་བྱེད་ངག་བསྡམ་ཕྱི་མས་སྔགས། །ཀོ་ཊ་ཞེས་པ་མར་གསར་ཟ་ཞིང་བཟླས། །ལྟོ་འཕིགས་ཀོ་ཊ་ལྕགས་ནི་ཟུངས་དང་སྦྱར། །གཅོད་འདོད་ལྕག་བཞག་མར་གསར་ཐུག་པ་བཏང་། །སྨན་མ་ཞུ་ན་རྒྱ་ཚྭའི་ཐང་གིས་བཞུ། །འགྱིངས་ན་རྒྱ་ཚྭའི་ཐང་ལ་དུང་ཐལ་བཏབ། །སྲིན་ལྡང་གོ་བྱེ་མར་དྲིལ་གཏོང་བ་བསྔགས། །བཤལ་དག་རླུང་ཡིན་དེ་མནན་འདིར་འབད་བྱ། །དུག་རིགས་ཀུན་ལ་སྦྱོང་བྱེད་འདི་ཉིད་མཆོག ཡང་ན་ཀོ་ཊ་སུ་མི་སྨན་སྨུག་པོ། །ལྷན་དུ་སྦྱར་བའི་ཐང་གིས་ལྕག་ཏུ་བྱ། །འཇམ་འདོད་དེ་གཉིས་ཚབ་ཏུ་ལྕུམ་རྩ་ཤིས། །བཤལ་རྗེས་མར་གསར་ཐུག་པ་བཙོས་པའི་ཟན། །ཤིན་ཏུ་སླ་བ་སྟར་ཁའི་སྙིང་པོ་ཙམ། །དང་པོ་ཉིན་གསུམ་ཕྱི་ནས་གར་བཏང་སྤར། །ཟླ་བའི་བར་བསྟེན་སྤྱོད་ལམ་ཤིན་ཏུ་གཟབ། །བཤལ་འཁྲུས་སངས་ནས་ཕོ་བའི་ཁ་འཛིན་བསྟེན། །ནད་པ་ཟུངས་ངན་དེ་ལ་སྡུད་གསད་མཚམས། །སྦྱོངས་དགོས་ན་ཡང་ཟུངས་གསོས་དེ་ནས་བྱ། །སོ་དང་སེན་རྒྱབ་ནག་ཅིང་ན་ཞིང་དམུན། །ལོང་ན་ཀོ་ཊ་སུ་མི་ཐེན་པ་གནད། །གུར་ཀུམ་ལི་ཤི་གི་ཝཾ་བསེ་རུ་དཀར། །ཚལ་དང་ཙན་དན་དཀར་པོ་གླ་རྩི་དང་། །འཇམ་འབྲས་གསེར་མདོག་རུ་རྟ་བ་རུ་ར། །བོང་ང་དཀར་དང་སྐྱུ་རུ་ར་རྣམས་ནི། །ཕག་པའི་ཁྲག་དང་སྦྱར་བས་ཕྱི་རྗེས་གཅོད། །གི་ཝཾ་གུར་ཀུམ་ཨུཏྤལ་བ་ལེ་ཀ །ཏིག་ཏ་བྲག་ཞུན་རུ་རྟ་བ་ཤ་ཀ །གསེར་གྱི་མེ་ཏོག་འབྲས་བུ་གསུམ་ཁྲག་ཕག་དང་སྦྱར། །ཕྱི་རྗེས་གཅོད་འདི་མཁྲིས་པ་ཅན་ལ་མཆོག །རེག་དུག་ཚ་ཤོས་བྱུང་ན་ར་ཚིལ་དང་། །ག་བུར་སྦྱར་བ་ཕྱིར་བྱུག་ར་ཁྲག་དང་། །གུར་ཀུམ་བཅུ་གསུམ་སྦྱར་བ་ནང་དུ་བཏང་། །ཡང་ན་ར་ཁྲག་ག་པུར་སྦྱར་བའང་རུང་། །གྲང་ཤོས་བྲག་ཞུན་བེ་བེ་ཤིང་སྡོང་པོའི་ཁྲག་ཁྲག་གླ་རྩི་དང་། །སྙེ་མའི་ཁཎྜྻ་གུ་གུལ་ཤིང་ཀུན་དང་། །སྐོག་གཅིག་ཛ་ཏི་ར་ཁྲག་སྦྱར་བ་ནི། །ཕྱིར་བྱུག་ནང་ལ་ཆང་གིས་འཕུལ་གྱིན་བཏང་། །བཙན་དུག་ཤ་དུག་ཤ་ནད་རིགས་ཀུན་ལ། །བྱང་བུལ་ལྷད་མེད་བོངས་ཆེན་ཐང་གི་གཞོམ། །སྦྲང་སྨྱོན་བྱུང་ན་གཡར་མའི་ཐང་གིས་སེལ། །ད་ནི་བསྲུང་བའི་བྱ་ར་ལྕེ་རྒྱ་སྟོན། །ལྕེ་སྟེང་ལུག་ཤ་གསར་པ་ཟ་ཡུན་སྦྱར། །དམར་བར་གྱུར་ནས་རྒྱ་ཚྭའི་སྲན་མ་ཙམ་ཕྱེ་མས་མནན། །བརྟོལ་བ་ཙམ་ཚད་བཙན་དུག་ཕྱེ་མ་བཏབ། །དེ་ཁ་གསེར་མདོག་ ཨ་རུ་ར་འབིགས་བྱེད་ཕྱེ་མས་བཀུས། །རྩི་གུ་བཀབ་སྟེ་ཡུན་རིང་བཞག་ནས་བཀྲུ། །དུག་ཅན་ཟས་ཕྲད་ལྕེ་སྦིད་ཚ་དབལ་འབྱུང་། །ལ་ཕུག་གཡེར་མ་ཟ་བ་སྤང་བྱ་ཡིན། །ཉི་ནུབ་དུས་སུ་གཡེར་ཆུ་ཁོང་དུ་བཏང་། །ནམ་ཕྱེད་རིན་ཆེན་རིལ་བུ་མིད་ནས་སུ། །སྐྱ་རེངས་དུས་སུ་དོམ་མཁྲིས་མར་ཁུར་སྦྱར། །འཐུངས་བས་རྩ་ཁ་བསྡམས་ཏེ་ཉལ་པོ་དང་། །རྩ་ཁ་འབྱེད་པའི་རིགས་གྱུར་ཀུན་སྤངས་ན། །ཟས་ངན་ཁོང་དུ་སོང་ཚེ་བཤལ་སྐྱུག་གམ། །མིན་ཀྱང་སྒྲེགས་པར་གླ་རྩིའི་དྲི་བྲོ་འབྱུང་། །དེ་ཚེ་བཅོས་ཐབས་ཀུན་ལ་ནན་ཏན་བྱོས། །དེ་སྐད་རེས་འགའ་སྨན་པའི་དྲང་སྲོང་ཁྲོད། །ཁེངས་པའི་རི་བོ་བསྙིལ་ལ་ཤེས་པའི་ཚུལ། །གནམ་ལྕགས་འབར་བ་འདྲ་བར་འབེབས་བྱེད་པའི། །བློ་གསལ་དབང་པོ་པདྨ་དཀར་པོས་སྦྱར།། །།སརྦ་མངྒ་ལཾ།། །།
Notes
- ↑ © Karma Lekshey Ling, Post Box 8435, Sita Paila-9, Swayambhu, Kathmandu, Nepal.
http://www.leksheyling.net
http://www.dharmadownload.net