Sems nyid ngal gso - Part twelve

<tib size="30" tibpos="bottom">rdzogs pa chen po sems nyid ngal gso zhes bya ba bzhugs so/</tib>

<tib> /de ltar zung 'jug bsam gtan 'grub pa'i rgyu/
/ting 'dzin mi g.yo yan lag gsum la bslab/
/gang gis bsgrub pa cho ga'i yan lag dang/
/ji ltar bsgrub pa thabs kyi yan lag dang/
/gnyis med bsgrub pa ngo bo'i yan lag go
/gang gis bsgrub pa'i skye bo nges 'byung can/
/lus ni 'du 'dzi'i grong las rgyang bsrings shing/
/sems ni spros pa'i tshogs las ring du bsrings/
/de yis ting 'dzin 'di ni myur du 'grub/
/dad ldan ngo tsha shes shing khrel yod la/
</tib><tib> /bag yod tshul khrims dag cing dge la spro/
/mang thos 'dod pa chung zhing chog shes ldan/
/de yis ting 'dzin 'di ni myur du 'grub/
/lus sems bsdams shing dben par gnas la dga'/
/gnyid dang snyom las smra la dga' ba spongs/
/rgod 'gyod med cing gzhan dang 'dris pa nyung/
/de yis ting 'dzin 'di ni myur du 'grub/
/grong dang grong 'dab skye bo'i 'du 'dzi med/
/gnas dang dgon par mang po'i rten 'dris med/
/don dang byang ba sna tshogs brel ba med/
</tib><tib> /de yis ting 'dzin 'di ni myur du 'grub/
/tshe 'di'i bde dang phyi ma'i bde 'bras dang/
/rang don zhi ba gnyer min 'gro ba'i phyir/
/srid las thar 'dod nges 'byung skyo shas can/
/de yis ting 'dzin mchog 'di myur du 'grub/
/ji ltar bsrub pa thabs kyi yan lag kyang/
/gnyid rmugs rgod 'gyed the tshom sgrib pa lnga/
/spangs te zhi lhag zung 'brel tshul gyis bsgrub/
/gnyid rmugs gnyis kyis ni gnas rab tu sgrib/
/rgod 'gyod gnyis kyis lhag mthong rnam par g.yeng/
</tib><tib> /the tshom gnyis ka'i gnod byed mi mthun phyogs/
/de ltar lnga nyid bying rgod gnyis su 'du/
/bying na gseng zhing rgod na rtse gcig bsgom/
/zhi gnas med pa'i lhag mthong spros la rgod/
/lhag mthong med pa'i zhi gnas lung ma bstan/
/zung 'brel sgrib pa'i gnyen po mchog gi lam/
/zhi gnas lus ngag yid sems dal bas 'grub/
/de yang chos kun rang bzhin mnyam pa'i ngang/
/dmigs pa rab zhi gtso bo'i yan lag yin/
/dmigs pa gcig la sems 'dzin 'khor gyi tshul/
</tib><tib> /de yang snang bcas snang med rnam pa gnyis/
/phyi nang gnyis te bzhi yis zin par 'gyur/
/snang bcas gzugs sogs sgo lnga'i yul rnams la/
/snang med mi rtog rtse gcig ngang la 'jog
/phyi rol rdo shing sku gzugs la sogs dang/
/nang nyid snying gar padma 'thur 'phyang sogs/
/dmigs yul gcig la rtse gcig sems 'jog pa/
/zhi gnas bsgrub pa'i thabs kyi yan lag yin/
/de yis rtse gcig zhi gnas skyes pa'i tshe/
/spel zhing brtan phyir lhag mthong ye shes spro/
</tib><tib> /bgogs 'byin spyod lam kun dang bsre ba gces/
/stengs na lus sems gsengs la sngar bzhin bsgom/
/'dis ni myur du 'grub par 'gyur ba yin/
/lhag mthong 'dod pas sems gsal dvangs pa'i ngang/
/so sor rtog pa gtso bo'i yan lag la/
/mi rtog mnyam par 'jog pa 'khor gyi tshul/
/de yang chos can chos nyid rnam pa gnyis/
/chos can sgyu ma'i dpe brgyad blta bya zhing/
/chos nyid mkha' ltar stong pa'i rtsal sbyang bya/
/ji bzhin ngang la bzhag pas ye shes 'char/
</tib><tib> /stengs na sna tshogs chos la rtsal sbyang ste/
/sgyu ma stong pa gnyis med dag par blta/
/'phro na zhi gnas ngang la mnyam par gzhag
/de tshe nam mkha' lta bu'i 'od gsal ni/
/stong gsal spros dang bral ba'i ngo bo mthong/
/de yis sgrib gnyis sprin las grol ba 'grub/
/res 'ga' rgya mtsho lta bu'i 'od gsal 'char/
/shar grol ngang dvangs rtog med lhun gyi grub/
/bogs 'byin spyod lam kun dang de nyid bsre/
/'dis ni lhag mthong myur du 'grub par 'gyur/
</tib><tib> /zung 'jug shes pa 'phrog nas mnyam pa'i ngang/
/gnyis kar mi rtog ye shes gtso bo la/
/yeng med spros dang bral ba 'khor gyi tshul/
/ji ltar shar gnas de yi ngang bzhag pas/
/shar pas grol la gnas pas mnyam pa nyid/
/zhi lhag zung 'brel bde gsal mi rtog 'char/
/snang stong thabs shes bskyed rdzogs lhun gyis grub/
/steng na zhi lhag so sor rtsal sbyang zhing/
/bying rgod tshe na ldog pa bsgom par bya/
/bogs 'byin nam mkha' dvangs shing sprin med tshe/
</tib><tib> /nyi mar rgyab phyogs mkha' la rab bltas pas/
/stong gsal shes pa spros dang bral ba 'char/
/phyi rol dpe yi nam mkha' dag pa las/
/nang gi chos nyid don gyi nam mkha' che/
/gsang ba 'od gsal snying po'i nam mkha' ste/
/nam mkha' sum sprugs dgongs pa shes par bya/
/gnyis med bsgrub pa ngo bo'i yan lag ni/
/thams cad ro mnyam rdzogs pa chen po'i ngang
/spang blang mi bya dmigs gtad zhen pa dor/
/'dzin zhen thams cad srid pa'i 'du byed la/
</tib><tib> /dmigs gtad med na mkha' bzhin bcings grol med/
/ji ltar gzugs brnyan sna tshogs me long dang/
/de ltar chos rnams sna tshogs stong pa'i ngang/
/ji ltar sprin rnams sna tshogs nam mkha'i ngang/
/de bzhin dgag sgrub sna tshogs sems nyid ngang/
/ji ltar chu bo sna tshogs rgya mtsho'i ngang/
/de bzhin nyams rtogs sna tshogs sgom pa'i ngang/
/ji ltar sgyu ma sna tshogs sprul pa'i ngang/
/de bzhin 'khor 'das sna tshogs chos nyid ngang/
/de bzhin ye grol chos rnams lta ba'i ngang/
</tib><tib> /ji ltar chu la chu bzhag gnyis med ngang/
/de bzhin sems dang sems nyid dbyer med ngang/
/ji ltar sna tshogs rmi lam gnyid kyi ngang/
/de bzhin blang dor gnyis med spyod pa'i ngang/
/ji ltar mtsho dang dpa' rlabs chu bo'i ngang/
/de bzhin rtog dang mi rtog mnyam pa'i ngang/
/ji ltar tshong pa don grub bde ba'i ngang/
/de bzhin re dogs gnyis med 'bras bu'i ngang/
/thams cad phyam gcig rdzogs pa chen po'i ngang/
/khyab gdal dbyings kyi chos nyid shes par bya/
</tib><tib> /de ltar sna tshogs gnyis med ro gcig gis/
/'gro kun bdag gzhan gzung 'dzin las grol te/
/'di zhes dmigs pas 'khrul pa'i srid pa 'dir/
/dub pa'i sems nyid de ring ngal sos shig
</tib><tib> /rdzogs pa chen po sems nyid ngal gso las/
/ting nge 'dzin bsgrub pa'i yan lag
/thabs la mkhas pa'i le'u ste bcu gnyis pa'o/
</tib>