Sems nyid ngal gso - Part ten

<tib size="30" tibpos="bottom">rdzogs pa chen po sems nyid ngal gso zhes bya ba bzhugs so/</tib>

<tib> /de ltar bskyed rdzogs zung 'brel rnal 'byor pas/
/chos rnams la skyes stong pa'i tshul la 'jug
/de yang snang srid 'khor 'das chos rnams kun/
/ye nas bdag med spros dang bral ba la/
/ma rig 'dzin pas srid pa 'dir 'khyams te/
/'khor 'das bde sdug sna tshogs snang mod kyang/
/snang dus nyid nas rang bzhin stong pa'i ngang/
/sgyu ma rmi lam 'dra bar mkhyen par mdzod/
/'di ltar phyi rol snang ba'i dngos po kun/
/sems la snang yang sems su grub pa med/
</tib><tib> /sems las gzhan du'ang grub pa 'ga' med de/
/bag chags dbang gis gzung 'dzin gnyis snang yang/
/snang dus nyid nas gzung 'dzin gnyis med pa/
/bzhin dang me long nang gi gzugs bzhin no/
/der ni byad nyid snang yang ma grub pa/
/byad las gzhan gyi rnam pa btod byed med/
/med bzhin gnyis su snang ba mngon sum ltar/
/sna tshogs chos rnams de bzhin shes par bya/
/ma brtags nyams dga' brtags na ngos gzung med/
/shin tu brtags na smra bsam brjod las 'das/
</tib><tib> /yod med mi dmigs mtha' bral ma bral med/
/sgyu ma'i tshul du skye sogs snang na yang/
/snang dus nyid nas skye sogs rang bzhin med/
/smig rgyu'i chu dang rdzing bu'i zla gzugs bzhin/
/khyad par ma dag 'gro drug snang ba 'di/
/med bzhin snang ba bag chags 'khrul pa'i gzugs/
/rab rib can la skra shad snang ba bzhin/
/de bsal 'dod pas bad kan sbyong ba ltar/
/'khrul snang dag 'dod ma rig ling tog bsal/
/de yi gnyen por rig pa'i ye shes kyis/
</tib><tib> /'khor ba'i bag chags stong pa la bzla zhing/
/stong pa'i rang bzhin snang bar thag bcad de/
/snang stong gnyis med bden pa gnyis don shes/
/mtha' gnyis gnas bsal dbu mar bslabs pa yis/
/srid zhir mi gnas nam mkha'i ngang du grol/
/'di ni nges don snying po'i dam pa ste/
/rang bzhin rdzogs pa chen po'i gnas lugs yin/
/snang ba'i dngos kyis phan gnod gnyis su med/
/der 'dzin zhen pas srid par 'ching bas na/
/sna tshogs snang la brtag dpyad mi dgos kyi/
</tib><tib> /'dzin pa'i sems kyi rtsa ba bcad par mdzod/
/sems ni snang la rang bzhin 'ga' med de/
/btsal bas mi rnyed bltas pas mthong ba med/
/kha dog dbyibs med ngo bo ngos gzung med/
/phyi dang nang med dus gsum skye 'gag med/
/phyogs dang ris med gzhi rtsa dngos po med/
/'di zhes mi mtshon bsam yul 'das pa'i sems/
/'gags pa mi dmigs ma skyes phyogs na med/
/da ltar mi gnas rang bzhin mnyam pa'i ngang/
/sems kyis sems ma tshol bar dal du chug
</tib><tib> /dgag sgrub dran rig skad cig yid kyi yul/
/snang tsam nyid nas phyi dang nang na'ang med/
/btsal bya'i don gyis tshol mkhan byas pas bslad/
/rang gis rang btsal nam yang rnyed mi 'gyur/
/ye nas skye med rang bzhin gnyug ma'i don/
/mi gnas 'gag pa med pa'i sems nyid ni/
/dus gsum gzhi rtsa med pas stong pa'i ngang/
/sna tshogs 'char gzhi ma 'gags snang ba la/
/dngos po mtshan ma med pas rtag pa med/
/rang shar 'gag pa med pas chad pa med/
</tib><tib> /gnyis dang gnyis med med pas brjod du med/
/'di zhes grub pa med pas ngos gzung med/
/rang bzhin gdod nas dag par shes par bya/
/brtags pas med ltar ma brtags dus na'ang med/
/rang bzhin gnyis med gdod ma'i ngo bo la/
/bzang ngan blang dor re dogs mi dmigs pas/
/brtag dang dpyad pas 'di la ci byar yod/
/dus gsum yid kyis tshol khro ma byed zhog
/rtog ge spros pa'i spun pas bskyod pa'i sems/
/rnam g.yeng rlung ltar g.yo bas mi rtogs kyi/
</tib><tib> /bsal gzhag 'gro 'ong med pa'i byang chub sems/
/kun byed ye shes dri med ngo bo nyid/
/ji bzhin bzhag pas de bzhin mthong ba yin/
/'dir ni sna tshogs grub mtha' mang po dang
/bsam brjod rtog pa du mas ci zhig bya/
/nges pa'i don la grub dang ma grub med/
/mtha' dang dbus med theg pa'i rnam dbye med/
/mkha' bzhin rnam dag rgya chad phyogs lhung med/
/de la yod med blos brtags 'khrul pas na/
/brjod du med gang ji ltar bshad du yod/
</tib><tib> /don med gnas la rab tu ngal bar zad/
/ji ltar mkha' dbus dvangs pa'i skyed mes tshal/
/me tog 'bras mang 'bab chus brgyan pa zhig
/mngon du bsams nas de yi rnam dbye dang/
/mthun phyogs mi mthun phyogs gang rtsod pa bzhin/
/gang yang dri med sems nyid dag pa la/
/bcos bsgyur dri mas nam yang mthong ba med/
/de la bskyed dang rdzogs pas ci zhig bya/
/dang ba'i bsam gtan bsgoms pas bslad par zad/
/gdod nas rang bzhin dag pa'i sems nyid la/
</tib><tib> /spang gnyen bral thob med kyis dmigs gtad shol/
/phyi nang gzung 'dzin med kyis ched 'dzin thong/
/'di zhes ngos gzung med kyis zhen pa chod/
/thob dang ma thob med kyis re dogs spongs/
/gzhi nas 'pho 'gyur med pa'i rig pa la/
/sna tshogs rkyen gyi rnam pa ci shar yang/
/shar ba de nyid rang gi thog tu grol/
/chu dang rlabs bzhin chos skur phyam gcig go
/gang du bltas tshe blta mkhan ngo bo stor/
/btsal bas ma rnyed yul dang phyogs na med/
</tib><tib> /'tshol mkhan nyid kyang mi dmigs spros dang bral/
/byed po mi gnas bya ba'i yul gyis stong/
/mkha' bzhin dri med gdod ma'i ngang du phyin/
/ldog pa'i gnas med da ni gang du 'gro/
/zad par thug ste 'ong ba 'ga' yang med/
/sus kyang mi mthong kho bo gang na 'dug
/de nyid shes na gzhan zhig dgos mi 'gyur/
/grol ba rnams ni nga bzhin 'khrul pa chad/
/da ni mi 'dri sems kyi gzhi rtsa stor/
/gtad med 'dzin med nges med 'di yin med/
</tib><tib> /phyal ba lhug pa yengs pa phyam gcig pa/
/'di ltar rtogs nas da ni glu len te/
/dri med 'od zer shar bas bstan nas song/
/kye ho grogs dag snang ba'i yul la ltos/
/thams cad ma skyes stong par mnyam pa nyid/
/me long gzugs brnyan sna tshogs ci shar yang/
/me long ngos yin dvangs par gcig pa bzhin/
/de nyid 'byed pa'i yid la tshur ltos dang/
/sems ni mkha' 'dra dgag sgrub kun dang bral/
/mkha' la sprin rnams byung nas zhig na yang/
</tib><tib> /nam mkha'i cho 'phrul gnyis med dag pa bzhin/
/rang bzhin dri med gdod ma'i sangs rgyas te/
/ma byas lhun gyis grub pa'i chos nyid do/
/yul sems gnyis med ye nas dag pa la/
/spang blang gnyis med phyogs ris dgag sgrub med/
/gang snang bden med gang shar stong pa nyid/
/thams cad mnyam nyid gza' gtad kun dang bral/
/yul la nges med snang ba sna tshogs ltar/
/blo la gtad med phyogs bral chen po nyid/
/rang bzhin rdzogs pa chen por shes par bya/
</tib><tib> /'di ltar snang srid 'khor 'das chos rnams la/
/'das pa'i chos rnams mi dmigs mnyam pa nyid/
/ma 'ongs chos rnams ma skyes mnyam pa nyid/
/da lta'i chos rnams mi gnas mnyam pa nyid/
/dus gsum dus med gzhi bral mnyam pa nyid/
/thams cad ye nas rdzogs pa'i ngang nyid do/
/snang srid 'khor 'das sems kyi gzugs brnyan te/
/sems kyi rang bzhin chos dbyings nam mkha' che/
/nam mkha'i rang bzhin dus gsum 'pho 'gyur med/
/'gyur med rang bzhin gzod nas mya ngan 'das/
</tib><tib> /gzhi nas byang chub kun tu bzang po yin/
/snang dang stong pa dbyer med gdod ma'i ngang/
/gcig dang du mar mi dmigs spros dang bral/
/phyogs dang ris med thams cad mnyam pa nyid/
/snang mnyam stong mnyam bden mnyam brdzun par mnyam/
/yod mnyam med mnyam mtha' las 'das par mnyam/
/dbyings gcig gdod nas dag pa'i ngang nyid do/
/blo yis brtags pa thams cad ngo bos stong/
/ming rnams glo bur rang mtshan sgro btags nyid/
/bden brdzun gnyis med yul sems 'brel pa med/
</tib><tib> /gcig gis gcig la ma gos gzung 'dzin med/
/ji ltar me long gzugs bzhin snang ba ni/
/yul gyi rnam pa dbang po'i shes la shar/
/de nyid bzung bas chags sdang srid par 'khrul/
/nan tar gtugs ni sems ni ma 'phos shing/
/yul gyi rnam pa'ang sems la shar ba med/
/ngo bo med phyir gnyis su ma grub bo/
/yul rnams thams cad rang bzhin med par gcig
/blo rnams thams cad ngos gzung med par gcig
/snang sems gnyis med gdod nas dag par gcig
</tib><tib> /brtag dpyad mi dgos gzhi nas grol bar gcig
/'khor 'das gnyis med sems kyi ngang du gcig
/chu bo sna tshogs rgya mtsho'i ngang du gcig
/thams cad ro mnyam lhan cig skyes par gcig
/'byung bzhi'i 'pho 'gyur nam mkha'i ngang du gcig
/sems kyi dgag sgrub stong pa'i ngang du gcig
/gang shar rang grol gnyis med dag par gcig
/dba' rlabs rol pa chu bo'i ngang du gcig
/de ltar rtogs na skyes bu mkhas pa yin/
/sna tshogs ngogs zung med pa'i chos rnams kun/
</tib><tib> /rang bzhin gnyis su med pa'i gzugs brnyas te/
/bzang ngan blang dor med pa'i rol pa la/
/blo yis gnyis su ma 'dzin gang bder zhog
/gtad med yul la nges med snang ba shar/
/'dzin med rig pa rnam yin chen pa ni/
/rang bzhin rdzogs pa chen po'i gnas lugs yin/
/de ltar chos kun mnyam pa'i rang bzhin gyis/
/blo bral ngang du 'dzin med la bzlas nas/
/phyogs bral rig pa khol bur bcings pa yis/
/dub pa'i sems nyid di ring ngal sos shig
</tib><tib> /rdzogs pa chen po sems nyid ngal gso las/
/gzhi rtogs pa'i shes rab mtha' gnyis/
/la mi gnas pa'i le'u ste bcu pa'o/
</tib>