Sems nyid ngal gso - Part four

<tib size="30" tibpos="bottom">rdzogs pa chen po sems nyid ngal gso zhes bya ba bzhugs so/</tib>

<tib> /de ltar srid pa'i bde sdug mtho dman rnams/
/sngon bsags las las byung bar thub pas gsungs/
/'khor bar 'du byed las de dkar nag gnyis/
/dge dang mi dge bcu bcu'i rang bzhin no/
/de yi rten gzhi kun gzhi lung ma bstan/
/me long dang 'dra rtog med ngo bo'i steng/
/shes pa gsal la yul du mi rtog cing/
/'char gzhi byed pas me long dvangs dang 'dra/
/de las gzugs sogs yul 'dzin dbang shes lnga/
/rang ngo mi rtog me long gzugs brnyan bzhin/
</tib><tib> /de rjes gzung 'dzin yul 'byed shes pa rnams/
/skad cig rjes mthud de la 'dzin mi 'dzin/
/rtog dang mi rtog nyon yid yid shes te/
/de yang chags rtog rags pa'i dge sdig gis/
/'dod par 'du byed bag chags kun gzhir brten/
/mi rtog gsal snang gzugs su 'du byed la/
/mi rtog rtse gcig gzugs med bag chags brten/
/'khor ba'i rang bzhin glo bur sgrib pa gnyis/
/dus rnams kun tu nye bar brten pa yin/
/shes pa gang du'ang mi rtog yengs thabs tshe/
</tib><tib> /snang yul mi 'dzin rtse gcig kun gzhi'i dus/
/gsal snang gang la'ang der 'dzin mi 'jug pa/
/kun gzhi'i rnam shes dvangs gsal g.yo ba med/
/sgo lnga'i yul dang dgag sgrub gzung 'dzin gyis/
/tshogs bdun yul la rags par rtog pa na/
/rnam shes bdun zhes nye bar btags pa yin/
/'di dag goms pas khams gsum srid pa ru/
/sgo gsum 'khrul zhing sdug bsngal 'du byed yin/
/de yang 'dod par tshogs bdun gtso bo la/
/gzugs su kun gzhi'i rnam shes gzugs med du/
</tib><tib> /mi rtog kun gzhi 'ba' zhig gtso bor ldan/
/gzhan gnyis 'khor gyi tshul du bag la nyal/
/rang rang sa der ldan par shes par bya/
/'di ltar 'dod na mtshan mo nyal ba'i tshe/
/yul lnga'i shes pa rim gyis yid du thim/
/de yang kun gzhir thim pas mi rtog pa/
/rtse gcig snang yul med pa'i ngang de nyid/
/chos dbyings thim pas rang bzhin spros dang bral/
/slar yang mched pas kun gzhi'i rnam shes las/
/yid nyid gcig pu langs pas rmi lam sems/
</tib><tib> /sna tshogs dgag sgrub med bzhin snang ba byed/
/de las mched pas gnyid sad tshogs drug gi
/rnam shes yul la 'jug pas las 'du byed/
/nyin mtshan 'khor yug de ltar snang ba yin/
/gzugs su rang sa'i shes pa bsam gtan bzhi/
/kun gzhi'i shes nyid ngang du gnas pa sa/
/yul rnams 'dzin pa'i shes pa phra mo rnams/
/skabs 'gar nye bar 'byung gis phal cher ni/
/ting 'dzin goms pas nye bar gnas pa yin/
/gzugs med rang sa'i shes pa kun gzhi'i ngang/
</tib><tib> /mkha' sogs rnam bzhi zhi gnas rtse gcig tu/
/nye bar gnas pas shin tu phra ba yi/
/tshor ba 'du shes byed rnam par shes/
/ming bzhi'i phung por sems kyi rgyud brten nas/
/zhi gnas rtse gcig bskal par mi sad de/
/rnam dpyod dge ba'i sa bon 'debs pa'ang med/
/de ltar bsam gtan gzugs med sems de yang/
/snga ma'i 'bras yin zad nas tshe 'pho la/
/ngo bo lung ma bstan yin gti mug phyir/
/'khor ba'i gnas su phyin ci log rgyu 'bras/
</tib><tib> /yang yang bskyed phyir de las thar dgos so/
/'dod pa'i sems de goms tshul ji bzhin nyid/
/yin phyir mtho dman thar pa'i rgyu yang byed/
/nyin dus phal cher tshogs bdun shes pa gtso/
/gzhan gnyis ngo bo gcig pa'i 'khor du yod/
/de yang gzugs 'dzin mig gi rnam shes te/
/der gsal rtog bral cha ni kun gzhi'i 3 shes/
/de yi mi rtog cha nyid kun gzhi'o/
/lhag ma drug kyang de bzhin shes par bya/
/gnyid du rtse gcig rmi lam sad dus na/
</tib><tib> /kun gzhi kun gzhi'i rnam shes yid dang ni/
/tshogs drug rim bzhin gcig dang gnyis gcig dang/
/thams cad ngo bo gcig pa'i dus shes bya/
/rten chos las kyi rtsa ba ma rig pa/
/ngo bo 'dod chags zhe sdang gti mug gsum/
/des bskyed srid par 'du byed dkar nag gnyis/
/'khor bar mtho dman ltung phyir mi dge ba/
/dbye na bcu nyid so sor snang ba yin/
/mi dge'i las bcu lus gsum ngag gi bzhi/
/yid gsum rim bzhin so sor dbye ba ni/
</tib><tib> /srog gcod bsams bzhin ma nor gzhan bsad la/
/phyogs mthun rdeg 'tshog la sogs srog la 'tshe/
/ma byin len pa gzhan nor brku ba ste/
/phyogs mthun g.yo sgyus pha rol nor la len/
/'dod log gzhan gyis bdag bzung nyid la spyod/
/phyogs mthun bgrod min rtsol sogs 'khrig pa'i chos/
/brdzun tshig 'du shes gzhan bsgyur tshig don go
/phyogs mthun drang sogs gzhan sems slu ba nyid/
/phra ma pha rol 'byed tshig smra ba ste/
/phyogs mthun gzhan tshig gzhan zlos mi mthun byed/
</tib><tib> /ngag 'khyal bstan bcos ngan dang bre mo'i gtam/
/phyogs mdun 'brel med brjod sogs chos min gtam/
/tshig rtsub pha rol zher 'debs rtsub mo'i tshig
/phyogs mthun 'joms sogs zhan yid mi bde'i gtam/
/brnab sems gzhan 'byor mi bzod bdag gir byed/
/phyogs mthun thos sogs pha rol dpal la brkam/
/gnod sems gzhan la gnod 'tshes zhe sdang zhing/
/phyogs mthun phan par mi 'dod khro ba'i sems/
/log lta rtag chad rgyu 'bras med par blta
/phyogs mthun sgro skur 'debs sogs phyin ci log
</tib><tib> /yul dang kun slong bsam sbyor ngan pa yis/
/mi dge'i las bcu spyad pa'i 'bras bu ni/
/rnam smin rgyu mthun dbang dang byed pa bzhi/
/las bcu chung ngus dud 'gro 'bring yi dvags/
/chen pos dmyal bar sdug bsngal rnam smin 'bras/
/rgyu mthun gnyis las gang byed der skye ba/
/byed pa rgyu mthun 'bras bu legs par gsungs/
/mtho ris thob na'ang tshe thung nad mang zhing/
/yo byad mi 'byor dgra dang thun mong 'gyur/
/khyim thab mi mdzes dgra zlar 'gyur ba dang/
</tib><tib> /skur ba mang la gzhan gyis slu ba dang/
/g.yog 'khor mi 'dum 'khor g.yog ngan pa dang/
/mi snyan thos dang 'thab mo'i tshig tu 'gyur/
/tshig gzung mi 'os ma nges spobs pa dang/
/cho ga mi shes dang 'dod pa che bar 'gyur/
/phan pa mi tshol gzhan gyis gnod pa'i gnas/
/lta ba ngan dang g.yo sgyu che ba ste/
/mi dge bcu la rim bzhin gnyis gnyis ldan/
/myong ba rgyu mthun 'bras bu legs par gsungs/
/dbang gi 'bras bu phyi rol yul la smin/
</tib><tib> /de yang ma dag gzhan dbang gnas skabs 'dir/
/srog bcad pas ni sa phyogs gzi brjid chung/
/sman shing lo 'bras me tog bza' btung sogs/
/mthu chung 'ju dka' tshe la bar du gcod/
/ma byin len pas lo thog 'bras mi smin/
/sad ser mu ges 'jigs pa'i yul du skye/
/log par g.yem pas bshang gci 'dam rdzab khrod/
/ljan ljin mi gtsang dri nga skye ba'i yul/
/dog cing nyam nga nyams mi dga' bar skye/
/brdzun gyis yul rnams mi mthun 'jigs dang bcas/
</tib><tib> /'byor pa g.yo zhing gzhan gyis slu bar skye/
/phra mas sa phyogs bgrod dka' mtho dman can/
/ngam grog g.yang sa gcong rong la sogs pa/
/reg na mi bde sna tshogs yul du skye/
/rtsub mos sdong dum rdo gseg tsher ma dang/
/rdul dang nyal nyil 'bras ngan rtsub pa dang/
/tshva sgo la sogs mi dge'i yul du skye/
/bkyal bas lo 'bras mi smin dus tshigs log
/ring du mi brtan mi gnas yul du skye/
/brnab sems 'bras sogs nyung zhing spun pa mang/
</tib><tib> /bzang po'i dus tshigs 'gyur ba mthong bar skye/
/gnod sems lo thog 'bras bu tsha zhing kha/
/rgyal po chom rkun mi rgod sbrul la sogs/
/rang bzhin gnod pa mang ba'i yul du skye/
/log ltas rin chen 'byung khungs mi ldan zhing/
/sman shing me tog 'bras bu bung ba dang/
/skyabs dang skyob pa dpung gnyen med par skye/
/skyes bu byed pa'i 'bras bu mi dge ba/
/gang byas de nyid 'phel bas sdug bsngal bskyed/
/mdor na rang bzhin mi dge bcu po rnams
</tib><tib> /dug dang 'dra ste gang gis longs spyod pa/
/tshe 'bring chung ngus sdug bsngal cher bskyed pas/
/dgra bzhin rab tu spang la 'bad 'tshal lo/
/mtho ris 'phen pa dge ba'i las bcu yang/
/mi dge bcu spong sems pa dge ba ste/
/srog mi gcod dang ma byin len pa spangs/
/log par ma g.yem brdzun dang phra ma spong/
/ngag 'khyal tshig rtsub mi smra brnab sems med/
/gnod sems log lta ring du spangs pa ste/
/chung ngus mi dang 'bring gis 'dod pa'i lha/
</tib><tib> /chen pos bsam gtan gzugs med ting 'dzin 'brel/
/gong ma'i khams gnyis bde ba 'dzin par byed/
/'bras bu bzhi ste sngar gyi ldog pa'i dpes/
/dge bcu'i 'bras bu mtho ris shes par bya/
/de ltar dge ba bsod nams cha mthun bcus/
/bde 'gror 'phen zhing rang bzhin mi dge bcus/
/ngan 'gror ltung ba'i rgyu 'bras dkar nag las/
/blang dor byed pa 'jig rten dge ba'i lam/
/lha mi'i theg pa legs par thub pa gsungs/
/'dis ni phyi mar bde 'gro bsgrub pas na/
</tib><tib> /thar pa'i rten du yang dag gzhag par mdzad/
/legs ldan 'gro ba rnams kyis bsten par mdzod/
/thar pa'i dge mchog 'khor ba ring du byed/
/de yang srid par 'du byed mtho dman las/
/dkar nag gnyis ka las 'das zhi la gzhol/
/thar pa'i cha mthun la sogs zag med rgyu/
/dge ba bcu dang bsam gtan gzugs med dang/
/pha rol phyin drug la sogs lam lngas bsdus/
/de yang gang zag chos bdag med rtogs nas/
/thabs ngad shes rab zung 'brel dge ba yis/
</tib><tib> /srid zhir mi gnas 'gro ba'i don byed cing/
/rgyal ba'i go 'phang mtha' yas bsgrub pas na/
/rnal 'byor dge ba 'jig rten kun las 'das/
/de yang dmigs bcas bsod nams tshogs yin la/
/dmigs med ye shes tshogs te zung 'brel gyis/
/sgrib gnyis sbyangs nas sku gnyis mngon du byed/
/de yang so so skye bo'i zag bcas te/
/'phags pa'i zag med mnyam rjes spyod yul can/
/rim bzhin spyad pas thar pa thob pa yin/
/thar pa dge ba'i rten ni rigs yin la/
</tib><tib> /de yang sems kyi rang bzhin 'od gsal ba/
/dri med khams te rang bzhin gnas pa'i rigs/
/de yi snang cha sku gnyis dpe rnam dgu/
/snying rje'i rang bzhin ye nas gnas pa ni/
/rgyas 'gyur rigs zhes bde bar gshegs pas gsungs/
/rtsa ba rig pa'i ye shes 'od gsal la/
/ngo bo dug gsum med pas dge ba yin/
/rigs de sad las sems gnyis rab bskyed dus/
/snying rje mngon bsgrubs kun rdzob bsod nams tshogs/
/bum sogs gsum dbang bskyed rim dag pa ste/
</tib><tib> /stong pa rang bzhin don dam ye shes tshogs/
/bzhi pa tshig dbang rdzogs rim phyag rgya che/
/legs par bsgoms shing rim gnyis spel ba yis/
/nyon mongs ye shes gnas gyur dge ba rnams/
/ches cher 'phel bas khams kyi sgrib sbyangs te/
/chos gzugs dri med nyi ma mthong bar 'gyur/
/'jig rten chos rab dge ba rnam pa bcu/
/bsam gtan gzugs med la sogs snang bcas tshogs/
/'jig rten 'das gang shin tu spros pa med/
/don dam ye shes tshogs te mnyam rjes yul/
</tib><tib> /zung du 'brel bar spyad las legs dgu 'grub/
/de yang srid par 'du byed dge ba ltar/
/zhi bar 'du byed tshul gyis las su bshad/
/srid las 'da' phyir las las thar pa lags/
/lam zhugs dge ba bcu yi 'bras bu yang/
/rnam smin rgyu mthun dbang dang byed las te/
/de dag chung 'bring chen por spyad pa yis/
/gnas skabs lha mi mthar thug nges legs 'gyur/
/rgyu mthun byed pas ngang gis dge la gzhol/
/myong bas tshe ring ba dang longs spyod che/
</tib><tib> /mthun pa'i khyim thab dgra zla med pa dang/
/skur pa mi 'byung phan tshun mdza' bshes bzhin/
/tshig gzung 'os dang kun gyi rna bar stan/
/chog shes byams ldan lta ba bzang por 'gyur/
/dbang gis yul bzang gzi brjid phun sum tshogs/
/bza' btung sman sogs 'ju sla mthu che zhing/
/phyogs gtsang sman sogs dri zhim ngad dang ldan/
/gzhan gyis mi slu 'jigs bral gnod 'tshe med/
/skye dgu mthun dang reg na mchog tu bde/
/dus kyi rjes 'gro legs smin 'bras bus phyug
</tib><tib> /sa phyogs mnyam la mtsho bsil rdzing bus brgyan/
/me tog 'bras mang bzang dgu 'phel ba mthong/
/lo 'bras smin sogs ro mchog bda' ba dang/
/'byung khungs bzang zhing dpung gnyen ldan par skye/
/skyes bu byed pa dge las dge 'phel bas/
/legs dgu'i bsam pa yid bzhin 'grub pa yin/
/gzhan yang sbyin pas longs spyod khrims kyis bde/
/bzod pas gzugs bzang brtson 'grus yon tan brjid/
/bsam gtan sems zhi blo yis grol ba 'thob/
/byams pas yid 'ong snying rjes phan pa 'grub/
</tib><tib> /dga' bas phun tshogs btang snyoms rnyog pa med/
/mdor na bsod nams ye shes tshogs rab 'bras/
/gnas skabs mngon mtho mthar thug nges legs 'grub/
/'di ni lam bzang shing rta chen po'i srol/
/dus gsum rgyal ba'i phun tshogs sgrub byed yin/
/de ltar srid zhir 'du byed las rnams ni/
/sems la rton zhing sems nyid 'od gsal la/
/mkha' bzhin byed po mi dmigs spros dang bral/
/bden pa gnyis don rten cing 'brel bar 'byung/
/gdod nas rnam dag med bzhin snang ba yi/
</tib><tib> /las ni kun byed ri mo mkhan 'dra zhing/
/rtag tu rjes 'gro lus kyi grib ma 'dra/
/gzhan du mi 'pho lus kyi bde sdug bzhin/
/rang bzhin bzlog dka' chu klung 'bab 'dra zhing/
/mtho dman ltung byed 'gro kun dbang po dra/
/shin tu rgya che nam mkha'i dbyings 'dra zhing/
/dkar nag mi 'gyur kUnda Utpa la 'dra/
/las rnams brtags na ngo bo 'ga' med kyang/
/rmi lam bzhin du bde sdug sna tshogs byed/
/blos btags las rnams dngos po mtshan ma med/
</tib><tib> /rgyu 'bras mi slu rten 'brel zab mo nyid/
/yod min med min rang bzhin gnyis su med/
/ji ltar spyad pa de ltar rnam par smin/
/'di ni ji snyed zhi bzhin gzigs pa'i yul/
/rnam kun mkhyen pa de yis legs par gsungs/
/gang zhig las 'bras khyad du gsod pa dag
/mu stegs chad par lta ba'i slob ma ste/
/stong pa'i lta ba gdeng tsam du 'cha' ba/
/chad pa'i mthar lhung 'og nas 'og tu 'gro/
/lam ngan zhugs pa de dag gnas ngan las/
</tib><tib> /nam yang mi thar bde 'gro ring du byed/
/rgyu 'bras snying rje bsod nams tshogs 'di dag
/drang dron byis pa'i chos te sangs mi rgya/
/nges don byar med nam mkha' lta bu'i don/
/rnal 'byor chen po rnams kyis sgoms shig lo/
/chad pa las kyang chad pa'i lta ba can/
/dman pa las kyang dman pa'i lam zhugs dag
/rgyu nyid bkag nas 'bras bu bsgrub pa mtshar/
/nam mkha' yin na bsgom yang ci zhig dgos/
/min na bsgoms kyang ngal ba don med do/
</tib><tib> /cang med bsgoms pas thar pa thob 'gyur na/
/nam mkha'i yid can rnams kyang sangs rgyas 'gyur/
/bsgom par khas blangs nas kyang rgyu 'bras 'grub/
/de phyir lam ngan de 'dra rgyang srings shig
/yang dag lam ni rgyu 'bras rten 'brel te/
/thabs dang shes rab mnyam sbyor lhun gyis grub/
/snang la rang bzhin med pa'i las 'bras kyis/
/snang la rang bzhin med pa'i lam bsgoms te/
/snang la rang bzhin med pa'i 'bras bu 'thob/
/snang la rang bzhin med pa'i sems can don/
</tib><tib> /snang la rang bzhin med pa'i mdzad pa ni/
/dag pa'i rgyu 'bras zab mo'i rten 'brel yin/
/de bas nges don mdo rgyud snying po'i don/
/tshogs gnyis zung 'jug rim gnyis bskyod rdzogs kyis/
/myur du rdzogs pa'i sangs rgyas sgrub byed yin/
/'dir ni srid par 'du byed rgyu 'bras kun/
/cha dang bcas pa ma lus rab spangs nas/
/thar pa'i rgyu 'bras nan tan snying por bya/
/myur du mngon mtho nges legs byang chub 'grub/
/de ltar bde chen chos kyi char bsil bas/
</tib><tib> /'gro sems sa gzhir tshogs gnyis rab rgyas te/
/las dang nyon mongs yongs gang srid pa 'dir/
/dub pa'i sems nyid di ring ngal sos shig
/rdzogs pa chen po sems nyid ngal gso las/
/las rgyu 'bras kyi le'u ste bzhi pa'o/
</tib>