Klong chen rab byams gsung 'bum/volume 011 351

From Rangjung Yeshe Wiki Texts
Jump to navigationJump to search


༄༅། །སྙིང་པོ་དོན་བསྡུས་ཞེས་བྱ་བ་བཞུགས་སོ།« »།

« སྙིང་པོ་དོན་བསྡུས་ཞེས་བྱ་བ།» «དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གཞི་དབྱིངས་འོད་གསལ་དྲི་མེད་རྣམ་དག་ལ། །རྟོགས་པ་མངོན་གྱུར་རྒྱལ་བ་དགོངས་བརྒྱུད་དང༌། །རིག་འཛིན་བརྡ་བརྒྱུད་གང་ཟག་སྙན་ཁུང་བརྒྱུད། །དཔལ་མགོན་བླ་མའི་ཚོགས་ལ་ཕྱག་འཚལ་ལོ། །གདོད་ནས་ལྷུན་གྲུབ་འོད་གསལ་སྙིང་པོའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །ཐོག་མའི་འོད་གསལ་ཀ་དག་ལྷུན་གྲུབ་ཉིད། །ངོ་བོ་རང་བཞིན་ཐུགས་རྗེའི་སྙིང་པོ་ཅན། །རྒྱ་ཆད་ཕྱོགས་ལྷུང་མེད་པའི་རང་བཞིན་ཏེ། །གང་དུ་མ་གྲུབ་འཆར་གཞིའི་དབྱིངས་སུ་གནས། །ཤེལ་ལ་འོད་བཞིན་ལྷུན་གྲུབ་མདངས་ཤར་བས། །གཞིར་སྣང་སྤྱི་གཞི་མ་ངེས་ལྷུན་གྲུབ་ལས། །ཐུགས་རྗཻའི་རྩལ་གྱིས་རང་སྣང་རང་ངོ་ཤེས། །ཡུལ་ཕྱིར་མ་འབྲངས་འགྱུ་བ་རང་ཐོག་ ཆོད། །གཞི་ལས་མ་གཡོས་ཤེལ་འོད་བསྡུས་པ་བཞིན། །ཀུན་ཏུ་བཟང་པོ་གཞི་ཐོག་གྲོལ་བ་ཡིན། །དེ་ཉིད་མ་རིག་གསུམ་གྱི་རང་བཞིན་ལས། །འོད་ལས་་ཡུལ་དང་ལུས་ཀྱི་འཁྲུལ་གཞིར་གྱུར། །ཐུགས་རྗེའི་རིག་རྩལ་རྟོག་པའི་སེམས་སུ་འཁྲུལ།» «ཁམས་གསུམ་རིགས་དྲུག་སོ་སོའི་སྣང་བ་ཤར། །འཁྲུལ་དུས་འགྲོ་ལ་བདེ་གཤེགས་སྙིང་པོས་ཁྱབ། །ལུས་ངག་ཡིད་གསུམ་བག་ཆགས་སྦུབས་ཀྱིས་བསྒྲིབས། །འོད་ཀྱང་སྙིང་དབུས་གཞོན་ནུ་བུམ་པའི་ སྐུ། །ངོ་བོ་རང་བཞིན་ཐུགས་རྗེ་གསུམ་དུ་གནས། །ངོ་བོ་སྐུར་གནས་ཆོས་སྐུ་སྟོང་པའི་དང༌། །རང་བཞིན་འོད་གསལ་ལྷུན་གྲུབ་མདངས་་དང་བཅས། ། ཐུགས་རྗེའི་རིག་པ་སྤྲུལ་སྐུར་འཆར་བྱེད་ཚུལ། །སྐུ་དང་་ཡེ་ཤེས་འདུ་འབྲལ་མེད་པའི་དོན། །གང་གིས་ཉམས་སུ་ལེན་པ་སུས་འདོད་པ། །ལྟ་སྟངས་གཟིགས་སྟངས་གནད་དུ་བཅུན་པ་ཡིས། །དབྱིངས་རིག་རང་སྣང་འོད་གསལ་དོན་ལ་གནས། །མངོན་སུམ་གོང་འཕེལ་ཚད་ཕེབས་ཟད་པ་ཡིས། །རླུང་སེམས་སྟོངས་ཏེ་ཤེལ་འོད་བསྡུས་པ་བཞིན། །ཀ་དག་ངང་དུ་གཟིགས་སྣང་མྱ་ངན་འདས། །གཞི་ཉིད་འབྲས་བུར་སྨིན་པས་ཡེ་ཤེས་གསུམ། །ཆོས་སྐུ་ལོངས་སྐུ་སྤྲུལ་སྐུར་རྣམ་པར་དག །ཆོས་སྐུར་གཅིག་པས་ལོངས་སྤྲུལ་འཆར་གཞིའི་ཆ། །ལྷུན་གྲུབ་ཐུགས་རྗེ་གཏིང་གསལ་ཕྲ་མོའི་ཚུལ། །ཤེལ་གོང་རང་སོ་དྲི་མ་མེད་པ་བཞིན། །དེ་ལས་གཞི་སྣང་འབྲས་སྣང་གནས་འགྱུར་ལས། །ལོངས་སྤྲུལ་ཕྱིར་སྣང་གདུལ་བྱའི་ཞིང་ཁམས་སུ། །སངས་རྒྱས་མཛད་པ་མཐའ་ཡས་ལྷུན་གྱིས་གྲུབ། །འདི་ནི་མཐར་ཐུག་དོན་གྱི་དགོངས་པ་ཡིན། །དགེ་བས་འགྲོ་ཀུན་མངོན་པར་བྱང་ཆུབ་ཤོག» «།སྙིང་པོ་དོན་བསྡུས་ཞེས་བྱ་བ། །རྣལ་་འབྱོར་པ་སྣ་ཚོགས་རང་གྲོལ་གྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།«མེས་པོའི་ཤུལ་བཞག་ལས། ཟབ་མོ་ཡང་ཏིག«སྙིང་པོ་དོན་བསྡུས།

»-PAGE 196-- PAGE 197 -

-PAGE 196-