ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ་བཞུགས་སོ།

From Rangjung Yeshe Wiki Texts
Jump to navigationJump to search

༄༅། །ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ་བཞུགས་སོ། །[1]

༄༅། །དངོས་གྲུབ་རྩ་བ་དཔལ་ལྡན་བླ་མ་དང༌། །ཧེ་རུ་ཀ་དཔལ་ཞབས་ལ་ཕྱག་འཚལ་ཏེ། །གསང་སྔགས་ཀུན་གྱི་མཐར་ཐུག་སྙིང་པོའི་དོན། །ཉམས་ལེན་གནད་རྣམས་དྲིལ་ནས་འདིར་བརྗོད་བྱ། །ཟབ་དོན་རྡོ་རྗེ་སྙིང་པོའི་དོན་ཁྲིད་འདི་ལ་གསུམ་སྟེ། སྔོན་འགྲོ་རྒྱུད་སྦྱང་བ། དངོས་གཞི་ཉམས་སུ་བླང་བ། རྗེས་ཀྱི་གེགས་བསལ་བའོ། །དང་པོ་ལ་གསུམ་ལས། བྱིན་རླབས་བླ་མའི་རིམ་པ་བསྒོམ་པར་བྱ་སྟེ། དཀྱིལ་འཁོར་ཐམས་ཅད་ཀྱི་རྩ་བ་དང༌། ཐར་ལམ་ཐམས་ཅད་ཀྱི་དེད་དཔོན་ཡིན་པའི་ཕྱིར་ཏེ། རྡོ་རྗེ་གུར་ལས། གང་ཕྱིར་རྡོ་རྗེ་སེམས་ཞེས་བྱ། །སློབ་དཔོན་གཟུགས་ནི་དེ་བཞིན་འཛིན། །ཅེས་པ་དང༌། རྣལ་འབྱོར་མ་ལས། བླ་མ་མཁས་ཤིང་དམ་ཚིག་ལྡན། །བརྩེ་དང་བསམ་གཏན་བྱིན་རླབས་ཅན། །དམན་སྤངས་ཐར་པའི་ལམ་ལ་འདྲེན། །འདི་ནི་རྡོ་རྗེ་འཛིན་པ་དངོས། །སྤྱི་གཙུག་འཁོར་ལོའི་རྒྱན་དུ་བསྒོམ། །ཞེས་གསུངས་པས། དང་པོ་སྟན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་ནས། སྐད་ཅིག་གིས་སྟོང་པ་ཉིད་དུ་བསམས་པའི་ངང་ལས་རང་གི་སྤྱི་བོར་པདྨ་དང་ཉི་ཟླ་སེང་གེས་བཏེགས་པའི་ཁྲི་གནམ་འཕང་དང་རྒྱར་ཡངས་པ། དར་ཟ་འོག་གི་སྟན་གྲངས་མེད་པས་བརྒྱན་པའི་དབུས་སུ། རང་གི་རྩ་བའི་བླ་མ་དེ་གཅེར་བུ་རུས་པའི་རྒྱན་དྲུག་དང་ལྡན་པ། སྐུ་མདོག་མཐིང་ག་སྤྱན་གསུམ་པ་བཞད་པའི་ཞལ་རྒྱས་པ། ཞབས་སྐྱིལ་ཀྲུང༌། ཕྱག་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་རྡོ་རྗེ་ཕག་མོ་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། ཡབ་ཀྱི་ཐུགས་ཀར་པདྨ་ཉི་ཟླའི་དབུས་ན་ཧཱུཾ་སྔོན་པོ། ཡུམ་ལ་ཧྲཱིཿདམར་པོས་མཚན་པའོ། །དེ་ནས། ན་མོ་གུ་རུ་བྷྱཿས་མཱ་ཛ། ཞེས་ལན་གསུམ་བརྗོད་པས། རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ནམ་མཁར་བྱོན། ཡང་རང་གི་ཆོས་འབྲེལ་ཡོད་པའི་བླ་མ་ཐམས་ཅད་ཀྱང་བྱོན་པ་ལ་ཡིད་ཀྱིས་མཆོད་མ་ཐག་སྤྱི་བོའི་དེ་དང་གཉིས་སུ་མེད་པར་འདྲེས་པས་བླ་མ་ཀུན་འདུས་རྡོ་རྗེ་འཆང་གཅིག་ཏུ་གྱུར་པར་མོས་པ་བྱའོ །དེ་ནས། ན་མོ་བུདྡྷཱ་ཡ། དྷརྨཱ་ཡ། སཾ་གྷཱ་ཡ་ལན་གསུམ་བརྗོད་པས། ཕྱོགས་བཅུའི་སངས་རྒྱས་སྲས་དང་བཅས་པ་ནམ་མཁའི་དབྱིངས་ཁྱབ་པར་བྱོན་ཏེ་བླ་མ་དེའི་སྟེང་དང་མཐའ་སྐོར་ཐམས་ཅད་དུ་བཞུགས། མཁའ་འགྲོ་དམ་ཅན་རྒྱ་མཚོ་རྣམས་ཀྱང་བཞུགས་པར་མོས་པ་བྱའོ། །དེ་ནས་དངོས་དང་ཡིད་ཀྱིས་ཕྱི་ནང་གི་མཆོད་པས་མཆོད་ལ། ཡིད་ཀྱིས་ཕྱག་འཚལ་བ་དང༌། སྡིག་པ་བཤགས་པ་དང༌། གསོལ་བ་གདབ་པ་རྣམས་བྱ་སྟེ། དཀོན་མཆོག་གསུམ་གྱི་ངོ་བོ་ཉིད། །དཔལ་ལྡན་ཡོན་ཏན་རྫོགས་པའི་གཙོ། །བླ་མ་རྣམས་དང་ཡི་དམ་ལྷ། །མཁའ་འགྲོ་རྒྱ་མཚོའི་ཚོགས་ལ་འདུད། །ཕྱི་ནང་གསང་བ་དེ་ཁོ་ན། །དགྱེས་ཉམས་བྱང་ཆུབ་སེམས་ཀྱིས་མཆོད། །ལས་དང་ཉོན་མོངས་སྒྲིབ་ཀུན་དང༌། །རྩ་བ་ཡན་ལག་ཉམས་ཆགས་བཤགས། །མཆོག་དང་ཐུན་མོང་དངོས་གྲུབ་སྩོལ། །ཀུན་གྱིས་བྱང་ཆུབ་འགྲུབ་པར་ཤོག །ཅེས་བརྗོད་པས་དེ་ཐམས་ཅད་ཀྱི་སྐུ་གསུང་ཐུགས་ལས་འོད་ཟེར་བྱུང༌། །བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། །སྦྱོར་མཚམས་ལས་བདུད་རྩི་བབས་པས་རང་གི་སྤྱི་གཙུག་ནས་རྐང་མཐིལ་གྱི་བར་དུ་ཁེངས་ནས་བདེ་གསལ་མི་རྟོག་པའི་ཉམས་སྤྲོས་བྲལ་ལྷན་ཅིག་སྐྱེས་པའི་དོན་རྒྱུད་ལ་སྐྱེས་པར་བསམས་ལ། ཡུན་རིང་དུ་མཉམ་པར་གཞག་གོ །རྗེས་ལ་དེ་དག་རང་གི་སྙིང་ནང་དུ་བྱོན་ནས་བཞུགས་པར་བསྒོམས་ལ། སྒྱུ་མའི་ངང་ལས་བསྔོ་བ་བྱའོ། །དེས་ནི་མྱུར་དུ་དངོས་གྲུབ་ཐོབ་ཅིང་ཏིང་ངེ་འཛིན་རྒྱུད་ལ་སྐྱེའོ། །རང་ལ་ཅི་ཡོད་པས་བླ་མ་མཉེས་པར་བྱའོ། །དེས་ནི་གནས་སྐབས་མཐར་ཐུག་གི་འདོད་པ་ཐམས་ཅད་འགྲུབ་སྟེ། རིགས་ལྔ་བདེ་མཆོག་འབྱུང་བའི་རྒྱུད་ལས། མཆོད་པ་ཐམས་ཅད་ཡོངས་སྤངས་ནས། །བླ་མའི་མཆོད་པ་ཡང་དག་བརྩམ། །དེ་མཉེས་པ་ལས་ཀུན་མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །སློབ་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོ་ཆེ་ལས་ཕ་རོལ་སྒྲོལ། །ཅེས་སོ། །གཉིས་པ་དད་བརྩོན་ངེས་འབྱུང་གི་རིམ་པ་ལ་དྲུག་ལས། དང་པོ་དལ་འབྱོར་རྙེད་དཀའ་བསམ་པ་ནི། སེམས་ཅན་ཙམ་གྱི་ལུས་ལ་བལྟས་ཏེ་རྙེད་དཀའ་བ། དེ་བས་ཆོས་ལ་སྤྱོད་པའི་ལུས་རྙེད་དཀའ་བ། ཆོས་མ་བྱས་ན་སྟོང་ལོག་ཏུ་འགྱུར་བས་དལ་བ་ཆུད་མི་གསོན་པར་བསྒོམ་པར་བྱའོ། །གཉིས་པ་ཚེ་མི་རྟག་པ་བསམ་པ་ནི། ཕྱི་སྣང་བ་འགྱུར་བ། ནང་ཕུང་པོ་འགྱུར་བ། ཉིན་མཚན་སྐད་ཅིག་འགྱུར་བ། ཡུལ་མི་ཁྱིམ་མཚེས་ཤི་བ་ལ་བསམ་ལ་རང་ལ་སྦྱར་བར་བྱའོ། །གསུམ་པ་དད་པ་བསམ་པ་ནི། དཀོན་མཆོག་གསུམ་དང་བླ་མ་དང་ཆོས་དང་ཆོས་མཛད་རྣམས་ཀྱི་ཡོན་ཏན་བསམ་ལ་དད་པ་བསྐྱེད་པར་བྱའོ། །བཞི་པ་ལས་རྒྱུ་འབྲས་བསམ་པ་ནི། ད་ལྟའི་བདེ་སྡུག་དགེ་སྡིག་ལས་གྱུར་པ་ལ་སོགས་པ་བསམ་ལ། དགེ་བ་བཅུ་སྒྲུབ། མི་དགེ་བ་བཅུ་འདོར། སྡིག་པ་བཤགས་པའི་ཆོ་ག་ཡི་གེ་བརྒྱ་པ་བཟླས་པའི་ལུང་དབོག་པར་བྱའོ། །ལྔ་པ་འཁོར་བའི་ཉེས་དམིགས་བསམ་པ་ནི། ད་ལྟའི་མིའི་སྡུག་བསྔལ་གྱིས་མཚོན་པ་རིགས་དྲུག་གི་སྡུག་བསྔལ་བསམས་ལ་ཅིས་ཀྱང་འཁོར་བ་འདི་ལས་ཐར་བར་བྱའོ་སྙམ་པའི་བློ་གཏིང་ནས་བསྐྱེད་པར་བྱའོ། །དྲུག་པ་ཐེག་པ་ཆེན་པོ་བྱང་ཆུབ་སེམས་ཀྱིས་བློ་སྦྱོང་བ་ནི། ཆོས་ཀུན་ལས་བྱང་ཆུབ་ཀྱི་སེམས་མཆོག་ཏུ་གསུངས་པས། བདག་གིས་རང་གཞན་གྱི་དོན་གཉིས་བསྒྲུབ་པར་བྱ །དེའི་ཆེད་དུ་བྱང་ཆུབ་ཏུ་སེམས་བསྐྱེད་སྙམ་དུ་བསམ་ལ་དེའི་ཉིན་པར་བྱང་ཆུབ་ཏུ་སེམས་བསྐྱེད་པར་བྱའོ། །དེ་དག་ལ་དམིགས་ཐུན་རེ་རེ་རེའོ། །གསུམ་པ་སྲོག་རྩོལ་ལུས་ཀྱི་སྔོན་འགྲོ་ནི། ཉིན་འགར་ལུས་སྦྱོང་ཉི་ཤུ་པ་ལ་བསླབ་པར་བྱའོ། །དེས་ནི་ཁམས་དང་རླུང་གནད་དུ་ཆུན་ནས་ཡེ་ཤེས་མ་སྐྱེས་པ་སྐྱེ། སྐྱེས་པ་གོང་འཕེལ་བའི་དགོས་པ་ཡོད་དོ། །བཅའ་ལུགས་ནི་འོག་ནས་འབྱུང་ངོ༌། །དོན་གཉིས་པ་དངོས་གཞི་ཉམས་སུ་ལེན་པ་ལ་ལྔ་སྟེ། སྲོག་གི་རྣལ་འབྱོར། རྩོལ་བའི་རྣམ་འབྱོར། འོད་གསལ་ཕྱག་རྒྱ་ཆེན་པོའི་རྣལ་འབྱོར། འཕོ་བའི་རྣལ་འབྱོར། བར་དོའི་རྣལ་འབྱོར་རོ། །དང་པོ་ལ་གསུམ་ལས། སྔོན་དུ་དམིགས་པ་ལ་བསླབ་པ་ནི། ལུས་སྐྱིལ་ཀྲུང་གི་པུས་མོ་གཉིས་ཐལ་མོས་བཀབ་ལ་མཇིང་བ་དགྱེ་བར་བྱས་ཏེ། རླུང་རོ་གསུམ་ཕྱིར་བུས་ལ། དེ་ནས་དལ་བུས་བཟུང་སྟེ། རླུང་གནད་ལ་ཕར་ལ་མདའ་ལྟར་འཕང༌། ཚུར་ལ་གཞུ་ལྟར་དགུག་པ། ནང་དུ་རྫིང་ལྟར་བསྐྱིལ་བ་གསུམ་མོ། །དམིགས་པའི་གནད་དབུས་སུ་དབུ་མ་མཐིང་སྐྱའི། གཡས་རོ་མ་དཀར། གཡོན་རྐྱང་མ་དམར། འཁོར་ལོ་བཞིའི་བདེ་ཆེན་དཀར། ལོངས་སྤྱོད་དམར། སྙིང་ག་མཐིང༌། ལྟེ་བ་དམར་བའི་དུ་བས་ན། བཾ། ལཾ། ཨེ། རཾ་རྣམས་སོ་སོའི་ཁ་དོག་བཞིན་བསམ་ལ། རོ་རྐྱང་གི་ཡར་སྣ་སྣ་བུག་གཉིས་ནས་རླུང་ཞུགས་པ། མར་སྣ་སྤུ་ནག་གུའི་ཐད་ནས་དབུ་མའི་ནང་འཇུག་པ་ལས་རླུང་ཞུགས་ཏེ། དབུ་མའི་དབུས་དང་འཁོར་ལོ་བཞི་ཁེངས། དེའང་དབུ་མར་རླུང་ཁ་དོག་ལྔ་ལྡན་འཇའ་ཚོན་འདྲ་བས་གང༌། འཁོར་ལོ་བཞི་དེ་དག་གི་ཁ་དོག་སོ་སོས་གང་བར་སྒོམ། བསྐྱིལ་དུས་ཡུན་ཇེ་རིང་བྱ། འཕང་དུས་ལྷག་གཟུང༌། དགུག་དུས་རབ་ཏུ་དལ་བར་བྱའོ། །འདིར་དུས་བཞི་འབྱུང་བའི་རླུང་བཤད་ཀྱང་འདི་ལས་ཟབ་པ་མེད་དོ། །གནད་འདིས་སྔོན་དུ་མ་སྦྱངས་ན་རླུང་གགས་ཡོང་བས་འདི་ལ་འབྱོང་བར་བྱའོ། །ཚད་ནི་ད་ལྟའི་རླུང་གཅིག་ནས་བཅུའི་བར་ཁུག་པ་གཅིག་གིས་འདའ་ནུས་པའོ། །དེ་ནས་གཉིས་པ་དངོས་གཞི་དབང་དུ་བསྡུ་བ་ལ། ལུས་གནད་སྐྱིལ་ཀྲུང་བཅའ། ལག་པ་འཁྱུད་པའི་ཚུལ་ལས་ཐལ་མོ་པུས་མོ་ལའོ། །དམིགས་གནད་ཅི་ཡང་ཡིད་ལ་མི་བྱེད་པའོ། །རླུང་གནད་རང་དབང་མེད་པར་དགག་པ་སྟེ། འོག་སྒོ་ཤིན་ཏུ་གློད་ལ་གསང་གནས་སུ་བུམ་པ་ཅན་དུ་གཟུང་ངོ༌། །གནས་དེར་སྟེང་རླུང་དྲག་ཏུ་མནན། ཕོ་བ་འདིར་བྱའོ། །རང་བཞིན་དུ་བུམ་པ་ཅན་ནི་གང་འཛིན་ས་དེ་ཉིད་དུ་རླུང་དེས་གང་བར་བྱེད་པ་ལ་ཟེར་རོ། །དེ་ནས་རླུང་ཟིན་པའི་རྟགས་སུ། གཞན་གྱི་ཉི་ཤུ་རྩ་བཞིའི་རིང་དབུགས་གཅིག་ལས་མི་རྒྱུ་ཞིང༌། སེམས་ཏིང་ངེ་འཛིན་མི་རྟོག་པར་རང་ལུགས་སུ་སྐྱེ་བའོ། །དེ་ནས་མཉམ་གནས་ཀྱི་རླུང་དབང་དུ་བྱ་བ་ནི། འོག་སྒོ་བསྡམས་ལ་ལྟེ་བར་བུམ་པ་ཅན་དུ་བཟུང་ལ་ལན་གསུམ་བྱས་ན། དབུགས་གཉིས་བརྒྱ་ལྔ་བཅུ་རྩ་བརྒྱད་ཀྱི་རིང་གཅིག་ལས་མི་རྒྱུའོ། །དེ་ལྟར་སྒོམ་དུས་གཡས་རླུང་དབུ་མར་ཚུད་པའི་རྟགས་སུ་མདུན་གྱི་ནམ་མཁར་དུ་བ་ལྟ་བུ་དང༌། སྤྲིན་ལྟ་བུ་ལང་ལོང་དུ་འབྱུང་ངོ༌། །ས་དང་ཆུ་དང་མེ་དང་རླུང་གི་རྣམས་དབུ་མར་ཚུད་པའི་རྟགས་སུ། སྨིག་རྒྱུ་དང༌། སྲིན་བུ་མེ་ཁྱེར་དང༌། མར་མེ་དང༌། འོད་ཀྱི་སྣང་བ་སྣ་ཚོགས་འབྱུང་ངོ༌། །ནམ་མཁའི་རླུང་ནི་མི་རྟོག་པའི་ཡེ་ཤེས་དངས་གསལ་ཕྱེད་དུས་ཚུད་ལ། ཕྱིར་སྣང་ཐིག་ལེ་ཕྲ་མོ་དང་འོད་མཐིང་གར་སྣང་བའོ། །རླུང་འཛིན་དུས་རིགས་རླུང་གཡས་ནས་བཟུང་ན་རྟོག་པ་འགག་པ་མྱུར་རོ། །འཇམ་རླུང་གཡོན་ནས་བཟུང་ན་བདེ་བ་ཤས་ཆེའོ། །མ་ནིང་གི་རླུང་མཉམ་དུས་བཟུང་ན་འོད་གསལ་ཟིན་པར་སླ་བ་ལས། སྐབས་འདིར་གཡས་ནས་རྒྱུ་དུས་གཟུང་ངོ༌། །འཕག་སྐོར་རིམ་ལྔ་ལས། རླུང་ཞེས་བྱ་བས་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །ལྔ་ཡི་བདག་ཉིད་བཅུ་ཡང་ཡིན། །ཅེས་སོ། །སྲོག་རླུང༌། ཁྱབ་བྱེད། མེ་མཉམ། གྱེན་རྒྱུ། ཐུར་སེལ། མིག སྣ་བ། སྣ། ལྕེ། ལུས་ཀྱི་དབང་པོ་ལ་རྒྱུ་བའི་རླུང་སྟེ་བཅུའོ། །གསུམ་པ་རྗེས་མཉམ་གནས་མ་ནིང་གི་རླུང་གིས་བོགས་དབྱུང་བ་ནི། ལུས་གནད་སྐྱིལ་ཀྲུང༌། ལག་པ་མཉམ་གཞག མིག་ཧར་པོར་ཐད་དྲངས་དུ་བལྟས་ལ། སེམས་གནད་གང་ཡང་ཡིད་ལ་མི་བྱེད་པས། །རླུང་གནད་ཕྱིར་འགྲོ་དུས་རབ་ཏུ་དལ་བས་ཡུན་ཇི་ཙམ་བསྲིང་ཐུབ་ཏུ་བཟུང་ལ་བཞག ནང་དུའང་རིང་བས་འོད་དུ་གཞུག ནང་དུ་གནས་དུས་ཡོན་བསྲིངས་ལ་བཞག དེ་དག་གི་དུས་སུ་རྩོལ་བས་བཙན་ཐབས་མ་ཡིན་པར་ཆ་ལ་རང་བབས་ཀྱི་ཁོག་ནས་དལ་ལ་ཡུན་བསྲིངས་པས་རྣམ་པར་མི་རྟོག་པའི་ངང་ལ་རྒྱུན་དུ་གནས་པ་དང༌། རླུང་དྲུག་པོ་འདུས་པའི་གེགས་སེལ་བ་དང༌། ཟས་སྐོམ་ཡིད་ལ་མི་འདོད་པ་ལ་སོགས་པ་འབྱུང་ངོ༌། །འདི་ནི་ཤིན་ཏུ་ཟབ་པས་ཉམས་སུ་ལེན་པ་ལ་བརྩོན་པར་བྱའོ། །དོན་གཉིས་པ་རྩོལ་བའི་རྣལ་འབྱོར་གསུམ་སྟེ། སྔོན་དུ་གཏུམ་མོ། །དངོས་གཞི་རྣལ་འབྱོར། རྗེས་འོད་གསལ་གྱི་ངང་དུ་ལ་འདའ་བའོ། །དང་པོ་ནི། ལུས་གནད་སྐྱིལ་ཀྲུང༌། དམིགས་གནད་དབུ་མའི་ནང་ལྟེ་བའི་ཐད་དུ་ཨ་ཐུང༌། ངོ་བོ་མེ། རྣམ་པ་ཨ། རེག་བྱ་ཤིན་ཏུ་ཚ་བ་ནས་ཙམ་ལས་མེ་འབར་བས་སྤྱི་བོའི་ཧཾ་ཞུ་བའི་དངས་མས་མེའི་གསོས་བྱས། ཆེར་འབར་བས་འཁོར་ལོ་བཞི་ཁྱབ་པར་མེའི་དྲོད་སྤྲོས་པའི་ངང་ལ་བཞག་པས་ཁྲག་དང་ཁམས་དྲོས་ཏེ་བདེ་བ་སྐྱེ་བའོ། །ལུས་ལ་གོས་མི་དགོས་པ་དང༌། གང་བལྟས་དྲོ་བར་སྣང་བ་འཆར་རོ། །དངོས་གཞི་ནི། རྩ་གསུམ་འཁོར་ལོ་བཞི་གསལ་བའི་རོ་རྐྱང་ནས་དངས་མ་དཀར་དམར་དབུ་མར་ཞུགས་པས་དར་ཅིག་བདེ་བ་ལ། མར་སྣའི་ཨ་ལ་དངས་མ་དམར་པོ་འདུས། ཡར་སྣའི་ཧཾ་ལ་དཀར་པོ་འདུས་པ་སྙིང་གར་འདྲེས་ཏེ། གོང་བུ་གཅིག་ཏུ་གྱུར་པ་ལ། སླར་ཡང་འཁོར་ལོ་བཞིར་དེ་ལས་བབས་པའི་དངས་མ་འདྲེས་པས་ཁྱབ་པར་སྒོམ་ཞིང༌། བདེ་བ་ཉིད་ཀྱི་ངང་ལ་བཞག་གོ །སྐབས་སུ་ཡས་བརྟན་རིམ་པས་འབབ་པ་དང༌། མས་བརྟན་བཟློག་པ་དང༌། རྩ་རྣམས་སུ་དགྲམ་པའང་བྱའོ །འདིས་ནི་བདེ་བ་མི་བཟོད་པ་སྐྱེའོ། །རྗེས་ནི་སྙིང་གར་ཨ་ཧཾ་གཅིག་ཏུ་འདྲེས་པ་ལ་ཡང་བསྡུས་ཏེ། ཨེ་མཐིང་གར་གྱུར་ལ། དེ་ཡང་ཇེ་ཕྲར་གྱུར་ནས་ཡིད་ལ་མི་བྱེད་པའི་ངང་ལ་གཞག་གོ །འདིའི་ཚེ་ཐིག་ལེ་རྩའི་ནང་དུ་སྦ་བ། རྣམ་རྟོག་ཆོས་ཉིད་ཀྱི་ངང་དུ་སྦ་བ། བདེ་བ་འོད་གསལ་ཀྱི་ངང་དུ་སྦ་བ། འོད་གསལ་འཛིན་མེད་ཀྱི་ངང་དུ་སྦ་བ་ཞེས་བྱ་བ་ཡིན་ནོ། །ཐིག་ལེའི་བདེ་བ་ཇི་ལྟར་ཉམས་སུ་ལེན་ཡང་གནད་འདི་གཅེས་སོ། །འདི་མེད་ན་ཐར་ལམ་བྱང་ཆུབ་ལ་རེག་དུས་མེད་དོ། །དེས་ན་གང་ཡང་བྱ་རྩོལ་མེད་པས་འོད་གསལ་གྱི་ངང་ལས་མི་འདའ་བར་བསླབ་བོ། །ཐབས་ལམ་གཞན་ལས་ཡུམ་གྱི་བདེ་བ་ལ་བརྟེན་ཏེ་ཐིག་ལེ་དབབ་པ་ཡས་བརྟན་གྱི་དགའ་བ་བཞི་དང༌། རྡོ་རྗེའི་བུམ་པར་བཟུང་ཞིང་བསྐྱིལ་བ་དང༌། ཡུམ་གྱིས་དྲང་བ་དང༌། དེ་གཉིས་བསྲེས་ཏེ་གཅིག་ཏུ་འགྱུར་བ་གྱེན་དུ་བཟློག་པ་མས་བརྟན་གྱི་དགའ་བ་བཞི་དང༌། རྩ་རྣམས་སུ་དགྲམ་པ་དང༌། ཡེ་ཤེས་ཆེན་པོར་ལ་འདའ་བ་རྣམས་ཀྱང་ཐབས་འདིར་འདུས་པ་ལས། ཐ་མ་འོད་གསལ་དུ་སྒོམ་པ་ནི་འདི་ཆེས་ཟབ་པ་ཡིན་ནོ། །དོན་གསུམ་པ་འོད་གསལ་ཕྱག་རྒྱ་ཆེན་པོའི་རྣལ་འབྱོར་ནི། སྲོག་རྩོལ་གཉིས་ཀྱི་ཐབས་ལས་སྐྱེས་པ་སྟེ། སྲོག་གི་དུས་སུ་སེམས་གསལ་ལ་མི་རྟོག་གམ། རྩོལ་བའི་དུས་སུ་བདེ་ལ་མི་རྟོག་པ་གང་ཡིན་ཡང་འདྲ་སྟེ། དེ་དུས་ཀྱི་རིག་པ་བདེ་བ། གསལ་བ༌། མི་རྟོག་པ་ནི་ཉམས་ཡིན་ལ། ངོ་བོ་སྟོང་པ། གསལ་བ། གང་དུ་ཡང་གྲུབ་པ། རང་བྱུང་བཅོས་བསླད་མེད་པ། དང་སང་ངེ། ཡངས་ཕྱལ་ལེ། གསལ་སང་ངེ། བདེ་ལ་རྟོག་པ་མེད་པ། གསལ་ལ་ངོས་གཟུང་མེད་པ། རིག་པ་རྗེས་མཐུད་མེད་པ། ཡུམ་ལ་མ་ཡེངས། སེམས་སུ་མི་འཛིན། བསྒོམ་བྱ་སྒོམ་བྱེད་ཀྱི་ཆོས་ལས་འདས་པ་དེ་ངོས་བཟུང་ལ་མ་ཡེངས་པར་རྟག་ཏུ་བསྒོམ་མོ། དོ་ཧ་ལས། ཆུ་དང་མར་མེ་རང་གསལ་གཅིག་པུར་ཞོག །ཅེས་པ་དང༌། ཏོག་རྩེ་པས༌། བསྒོམ་བྱ་སྒོམ་བྱེད་ལས་གྲོལ་བ། །ཡིད་ལ་མེད་དོ་ཕྱག་རྒྱ་ཆེ། །ཞེས་པ་དང༌། བིར་ཝ་པས། སེམས་ཀྱིས་བསྒོམས་པ་སྒོམ་པ་མིན། །མི་སྒོམ་པ་ཡང་སྒོམ་པ་མིན། བསྒོམ་དང་མི་སྒོམ་ལས་འདས་པ། །ཡི་ལ་མེད་དོ་ཕྱག་རྒྱ་ཆེ། །ཞེས་པ་དང༌། རྣམ་ངེས་ལས། ཐམས་ཅད་ལས་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པར། །གནས་ནའང་མིག་གིས་གཟུགས་དག་ནི། །མཐོང་བའི་བློ་དེ་དབང་སྐྱེས་ཡིན། །ཅེས་པ་དང༌། ཡེ་ཤེས་སྣང་བ་རྒྱན་ལས། ཀུན་ཏུ་རྟོག་པས་མ་བརྟགས་ན། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་འདུད། །ཅེས་པ་དང༌། ཡུམ་ལས། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་དྲན་པ་མེད་ཅིང་ཡིད་ལ་བྱར་མེད་པའི་ཕྱིར་ནམ་མཁའ་ལྟ་བུའོ་ཞེས་པ་དང༌། སྡུད་པ་ལས། གནས་མེད་གནས་ཡིན་འདི་ནི་རྒྱལ་བས་གནས་པར་གསུངས། །ནམ་མཁའ་གང་ལ་གནས་ཡིན་དོན་འདི་ཤེས་པར་གྱིས། ཞེས་སོ། །དེ་ལྟ་བུ་དེ་སྒོམ་དུས་རྒྱ་ཆེར་སྣང་བའི་རི་རྩེ་ལ་སོགས་པར་སོང་ནས་ཀྱང་བསྒོམས་ལ། སེམས་རྩེ་གཅིག་ཏུ་མི་སྡུད་པར་རྒྱ་བསྐྱེད་དེ་ལྟ་སྟངས་གློད་པའི་ངང་ནས་ཡངས་པ་ཁྲོལ་ལེར་བསྒོམ་པ་ཡིན་ནོ། །དེ་ལྟར་བསྒོམས་པ་ལས་བདེ་གསལ་མི་རྟོག་པ་ལ་སོགས་པའི་དྲོད་རྟགས་འབྱུང་སྟེ། མདོ་ལས། བསམ་དུ་མེད་པའི་ཆོས་ཉིད་ལ། །བསམ་དུ་མེད་པའི་བློ་བཞག་ན། །བསམ་དུ་མེད་པའི་ཉམས་མྱོང་འབྱུང༌། །ཞེས་པ་དང༌། སྒྱུ་འཕྲུལ་ལས། ཡོངས་སུ་བསྒོམ་བྱ་བླ་མེད་པ། །གོམས་པས་དྲོད་ནི་དཔག་ཏུ་མེད། །ཅེས་པ་དང༌། རྣམ་འགྲེལ་ལས། གང་གིས་ཤིན་ཏུ་བསྒོམས་གྱུར་པའི། །སྒོམ་པ་ཡོངས་སུ་རྫོགས་པ་ན། །བདེ་གསལ་མི་རྟོག་བློ་འབྲས་བུ། །ཞེས་སོ། །དེ་ཡང་དང་པོ་སེམས་གནས་པའི་རྟགས་སུ་བྱ་བ་རྣམས་ལ་འཇུག་སྙིང་མི་འདོད་པར་སྔར་བས་ལེ་ལོ་ཆེར་སོང་བས་ལུས་སེམས་ལ་ལྷོད་ཆགས་པ་འོང༌། །སྤྱོད་ལམ་ཡང་མ་བཅོས་སྨྱོན་པ་འདྲ་བ་འབྱུང༌། ཚེ་འདི་ལ་དགོས་མེད་སྐྱེ། ལུས་ལ་ནད་མེད་ཅིང་ཟོ་མདོག་བདེ། ཁ་ཟས་ལ་སྲེད་པ་ཆུང་བས་མ་ཟོས་ཀྱང་མདངས་བཀྲག་རྒྱས། གཉིད་འོད་གསལ་དུ་ཐིམ་པས་རྨི་ལམ་གྱི་འཁྲུལ་སྣང་འགགས། མངོན་ཤེས་ཕྲ་མོ་ཐོབ་པས་རང་གཞན་གྱི་ལེགས་ཉེས་ཤེས། གང་ལའང་བདེན་ཞེན་མེད་པས་འཇིག་རྟེན་ཆོས་བརྒྱད་ཞིག་པའོ། །ཡང་ཏིང་ངེ་འཛིན་སྐྱེས་པ་བརྟན་པའི་དྲོད་རྟགས་བཅུ་གསུམ་ལས། ཕྱིའི་དྲུག་ནི། སེམས་ཀྱིས་བལྟས་དུས་ཡེ་མེད་པ་སྙམ་པ་དང༌། བདེ་འབོལ་ལེ་བ་དང༌། གསལ་ལྷག་གེ་བ་དང༌། སྟོང་སང་ངེ་བ་དང༌། དགའ་ཞིང་གཅིག་དགོད་འཆོར་བ་དང༌། མཐའ་དབུས་བྲལ་བ་ནམ་མཁའ་དང་དབྱེར་མེད་སོང་བ་སྙམ་བྱེད་པའོ། །ནང་གི་དྲོད་རྟགས་གསུམ་ནི། ལུས་མེད་པ་སྙམ་བྱེད་པ་དང༌། སེམས་མེད་པ་སྙམ་བྱེད་པ་དང༌། དབུགས་ཕྱི་ནང་དུ་རྒྱུ་བ་མི་ཚོར་བའོ། །གསང་བའི་དྲོད་རྟགས་བཞི་ནི། ལུས་ཤིང་བལ་ལྟར་ཡང་ཕྱད་ཕྱད་པ་དང༌། ལུས་ནམ་མཁའ་ལ་འཕགས་པ་སྙམ་བྱེད་པ་དང༌། ཉི་མ་ཤར་བ་སྙམ་བྱེད་པ་དང༌། ཟླ་བ་ཤར་བ་སྙམ་བྱེད་པའོ། །དེ་ཡང་ཕྱིའི་རྟགས་དྲུག་ལ་ཞེན་ན་འདོད་ཁམས་སུ་གོལ། ནང་གི་རྟགས་གསུམ་ལ་ཞེན་གཟུགས་ཁམས་སུ་གོལ། གསང་བའི་རྟགས་བཞི་ལ་ཞེན་ན་གཟུགས་མེད་མུ་བཞིར་གོལ་ཏེ། ལྟ་བས་ཐག་མཆོད་པར་སྟོང་སང་ངེ་བ་ཙམ་དུ་ཞེན་ནས་བསྒོམས་ན་ནམ་མཁའ་མཐའ་ཡས་སུ་གོལ། སྣང་སེམས་ཐམས་ཅད་རང་སེམས་ཙམ་དུ་ཤེས་ནས་སེམས་གསལ་བར་བསྒོམས་ན་རྣམ་ཤེས་མཐའ་ཡས་སུ་གོལ། སྣང་བ་ལ་བློས་མ་རེག་པའི་སྟོང་པར་བསྒོམས་ན་ཅི་ཡང་མེད་པའི་སྐྱེ་མཆེད་དུ་གོལ། སྣང་བ་བློས་མ་རེག་པར་ཡོད་མེད་གཉིས་ཀ་མ་ཡིན་པ་ཙམ་དུ་བསྒོམས་ན་སྲིད་རྩེར་གོལ་ལོ། །ཅི་ཡང་མེད་པར་རྟོག་པས་འགགས་པའི་ངང་དུ་བསྒོམས་ན་འདུ་ཤེས་མེད་པའི་ལྷ་ཚེ་རིང་པོར་གོལ་ལོ། །གོལ་བ་ཐམས་ཅད་ཏིང་ངེ་འཛིན་དེ་དག་གི་ཉམས་རེ་བྱུང་བ་ལ་ཞེན་ནས་མཆོག་ཏུ་བཟུང་བས་བརྟུལ་བཞུགས་མཆོག་འཛིན་གྱི་ལྟ་བར་སོང་སྟེ་གོལ་བ་ཡིན་ནོ། །དེས་ན་གང་ལའང་ཞེན་འཛིན་མེད་པས་བསྒོམ་པ་གཅེས་སོ། །དོ་ཧ་ལས། གང་ལ་ཞེན་པ་ཡོད་ན་དེ་དེ་ཡང་ཐོབ། །རྟོགས་པར་འགྱུར་ན་ཐམས་ཅད་དེ་ཡིན་ཏེ། །དེ་ལ་གཞན་ཞིག་སུས་ཀྱང་ཤེས་མི་འགྱུར། །ཅེས་སོ། །དེ་ལྟར་གོམས་པ་ལས་དོན་དམ་པའི་བདེན་པ་རྟོགས་ནས་མྱུར་དུ་ཆོས་ཀྱི་སྐུ་འགྲུབ་ལ། སྔོན་འགྲོར་བླ་མའི་རྣལ་འབྱོར་ལ་སོགས་པས་བསོད་ནམས་ཀྱི་ཚོགས་ཀུན་རྫོབ་པའི་རྣམ་པ་རྫོགས་ནས་གཟུགས་སྐུ་འགྲུབ་པས་ན་ལམ་འདི་ཆོས་ཟབ་ལ་གོལ་ས་མེད་དེ། རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་བྱུང༌། །ཞེས་པ་དང༌། ཐོད་གླུ་ལས། སྟོང་ཉིད་རྒྱུ་ལ་སོགས་པ་ཡིས། །ཆོས་ཀྱི་སྐུ་ཡི་རྩེ་མོར་བྱུང༌། །བསོད་ནམས་བསགས་པའི་རྣམ་སྨིན་གྱིས། །ལོངས་སྤྱོད་རྫོགས་པའི་རྩེ་མོར་འགྱུར། །སྨོན་ལམ་བཏབ་པའི་རྣམ་སྨིན་གྱིས། །སྤྲུལ་པའི་སྐུ་ཡི་རྩེ་མོར་བྱུང༌། །ཞེས་སོ། །དེ་ལྟར་འོད་གསལ་ཕྱག་རྒྱ་ཆེན་པོའི་རྣལ་འབྱོར་ནི་རྣལ་འབྱོར་རྣམས་ཀྱི་ནང་ནས་མཆོག་ཡིན་པས་སྒོམ་པ་ལ་བརྩོན་པར་བྱའོ། །བཞི་པ་འཕོ་བའི་རྣམ་འབྱོར་ལ་གསུམ་སྟེ། སྔོན་དུ་སྦྱང་བ་དང༌། འཆི་ལྟས་བརྟག་པ་དང༌། དུས་སུ་འཕོ་བའི། དང་པོ་ནི། བླ་མའི་རྣལ་འབྱོར་བསྒོམས་ནས་སྐྱིལ་ཀྲུང་གིས་འདུག་སྟེ། རྩ་དབུ་མ་མདའ་སྨྱུག་ཙམ་གྱི་ནང་ན་གསེར་གྱི་རྡོ་རྗེ་རྩེ་ལྔ་པ་ནས་ཙམ་ཅིག་སྒལ་ཚིགས་ཉི་ཤུ་རྩ་གཅིག་གི་རིམ་པ་ལྟར་གྱེན་དུ་འཕར་བས་ཚངས་བུག་བཏོལ་བར་བསམས་ལ། ཀ་ཧིག་ཉི་ཤུ་རྩ་གཅིག་ནས་བཞི་བཅུའི་བར་དབུགས་ཐེབ་རེ་རེ་ལ་རྒྱངས་རྒྱངས་གདོན་ནོ། །ཉི་མ་གཅིག་གམ་གསུམ་མམ་བདུན་ན་ཚངས་བུག་ཏུ་ཚ་ཞིང༌། འཕང་ལོ་ཙམ་གྱི་ཤ་འཕར་བའི་དབུས་ན་བུག་པ་འཇག་མ་ཚུགས་པ་དངོས་སུ་འབྱུང་ངོ༌། །དེས་ནི་འཕོ་བའི་ལམ་བྱང་ནས་ནམ་འཕོ་ཡང་ཚེགས་མེད་པ་ཡིན་ནོ། །གཉིས་པ་འཆི་ལྟས་བརྟག་པ་ནི། ནམ་མཁའ་ལ་ཚེའི་གཟུགས་མེད་པ་དང༌། ཉིན་བྱེད་མཚན་ཕྱེད་ན་རླུང་གཡས་སུ་རྒྱུ་བ་དང༌། ཐིག་ལེ་ནག་པོར་འབབ་པ་དང༌། བཤང་གཅི་དུས་གཅིག་ལ་འབྱུང་བ་དང༌། རྣ་བའི་སྒྲ་མེད་པ་དང༌། མིག་གི་འོད་མེད་པ་དང༌། གཅི་བ་གཉིས་་གྱེས་པ་དང༌། སྣ་གོང་དུ་རྡུལ་ཆགས་པ་དང༌། ལག་པ་སྨིན་མཚམས་སུ་བསྒྲེངས་པའི་རྒྱུན་ཆད་པ་དང༌། རྨི་ལམ་དུ་བོང་བུ་ཞོན་ནས་ལྷོར་འགྲོ་འཕྲོར་གཉིད་སད་པ་ལ་སོགས་པའོ། །དེ་ཡང་རྒྱས་པའམ་འཕོ་བའི་དུས་སུ་རླུང་གཡས་ནས་རྒྱུ་བ་དང༌། ཚེ་གཟུགས་མེད་པ་དང༌། མིག་གི་འོད་མེད་པ་ལ་སོགས་པ་རྟགས་མང་དུ་འཛོམ་ན་ངེས་པར་འཆི་ལ། གཞན་རེ་རེ་ཙམ་གློ་བུར་དུ་འོང་བས་ངེས་པ་མེད་དོ། །ནག་པོ་ཞབས་ཀྱི་འཆི་བསླུ་ལས། །དང་པོ་གསུམ་དང་གཉིས་པ་གསུམ། །དེ་བཞིན་ཐ་མའི་བར་དག་གསུམ། །ཚན་རེ་གསུམ་རྫོགས་ཐམས་ཅད་རྫོགས། །དེ་ནི་ཉེ་བར་འཆི་བའི་ལྟས། །ཐད་ཀར་གསུམ་བྱུང་བསླུ་རུ་མེད། །ཚན་གསུམ་རྫོགས་ནས་བསླུ་རུ་མེད། །ཐམས་ཅད་རྫོགས་ན་བསླུ་རུ་མེད། །བསག་དང་འཆོས་པས་བསླུ་བ་ཡིན། །ཅེས་སོ། །འདི་ནི་རླུང་གཡས་གཡོན་མཉམ་རྒྱུ་གསུམ་ལ་བརྟག་པ་སྟེ། ཉི་ཟླའི་རླུང་སྒྲ་གཅན་གྱིས་གཟུང་བ་ལ་སོགས་པའི་དུས་སུའོ། །བསླུ་བའི་ཆོ་ག་ནི། རྩ་བའི་བླ་མ་ལ་འཁོར་གསུམ་ཡོངས་དག་དང༌། ཚོགས་བརྒྱ་རྩ་དང༌། དཀྱིལ་འཁོར་གྱི་མཆོད་པ་ལོ་གྲངས་དང༌། མདོ་བཀླག་པ་དང༌། མཆོད་རྟེན་གསོ་བ་དང༌། གྲུ་ཟམ་འཆོས་པ་དང༌། དགེ་འདུན་གྱི་སྟོན་མོ་བྱ་བ་དང༌། དམ་ཚིག་བསྲུང་བ་དང༌། སྟོང་པ་ཉིད་བསྒོམ་པ་དང༌། བཅུད་ཀྱིས་ལེན་པ་དང༌། ཚེ་བསྒྲུབ་པ་ལ་སོགས་པ་བྱའོ། །དེ་ནས་སྔར་གྱི་ལྟས་ལོག་ནས། དང་པོ་སྐྱོན་མེད་དུས་ལྟར་སོང་ན་བསླུས་པ་ཡིན་ནོ། །གསུམ་པ་དུས་སུ་འཕོ་བ་ནི། ཐབས་གང་གིས་ཀྱང་འཆི་ལྟས་མ་འགྱུར་ན་འཕོ་བ་ཡིན་ཏེ། ཡོ་བྱད་ཐམས་ཅད་སྤང་དག་བྱས་ལ་དབེན་པའི་སར་མཆོད་གཏོར་ཡོད་ན་བཤམ། །མེད་ན་ཡིད་ཀྱིས་བླ་མ་དཀོན་མཆོག་དང་མཁའ་འགྲོ་ཆོས་སྐྱོང་མཆོད་ལ། ཚེ་འདི་ལ་མ་ཆགས་པའི་བསམ་པ་བྱ་སྟེ། འདའ་ཀ་ཡེ་ཤེས་ལས་བཤད་པ་ལྟར། དངོས་པོ་ཅི་ལ་ཡང་མ་ཆགས་པའི་འདུ་ཤེས་དང༌། སྙིང་རྗེ་ཆེན་པོའི་འདུ་ཤེས་དང༌། ཆོས་ཐམས་ཅད་སྟོང་ཞིང་བདག་མེད་པའི་འདུ་ཤེས་དང༌། མི་དམིགས་ཤིང་འོད་གསལ་བའི་འདུ་ཤེས་ལ་སོགས་པ་བཅུ་བསྒོམས་པའི་མཐར། འཆི་བ་རྨི་ལམ་སྒྱུ་མ་ངེས་པའི་དོན་ལ་འཆི་རྒྱུ་མེད་པ། རིག་པ་རང་གི་ངོ་བོ་ལ་བལྟ་བ་རྣམས་ཀྱིས་ཉམ་ང་དང་བག་ཚ་མེད་པར་བྱས་ཏེ། སེང་གེའི་ཉལ་ལུགས་སམ། སྐྱིལ་ཀྲུང་གིས་འདུག་སྟེ། མདུན་གྱི་ནམ་མཁར་བླ་མ་དང་ཡི་དམ་དཀྱིལ་འཁོར་གྱི་ལྷ་ཚོགས་བསམས་ལ། རང་གི་རྩ་དབུ་མའི་ནང་སྙིང་ག་ན་རང་གི་རིག་པ་འོད་ལྔའི་གོང་བུ་དབུས་སུ་ཧཱུྃ་མཐིང་གས་མཚན་པ་ཅིག་སྔར་གྱི་རྡོ་རྗེ་དེས་མདའ་འཕངས་པ་ལྟར་བསྐྱོད་པ་བླ་མའི་ཐུགས་ཀར་ཐིམ་ནས་ཇེ་མཐོ་ཇེ་མཐོ་ལས། མཐར་ཡིད་ལ་མི་བྱེད་པ་ཕྱག་རྒྱ་ཆེན་པོའི་ངང་དུ་འཕོ་བར་བྱའོ། །དེ་ལྟ་བུ་རླུང་ཀ་ཧིག་དང་བསྡོངས་པ་བདུན་གྱིས་མི་འཕོ་མི་སྲིད་དོ། །བཙན་ཐབས་སུ་འཕོ་ན། དམིགས་པ་དེ་དང་རྩེ་ཆུང་གནོན་པ་ལྷན་ཅིག་བྱས་པས་ངེས་པར་གྲུབ་བོ། །རྡོ་རྗེ་གདན་བཞི་ལས། བུ་ག་དགུ་ཡི་སྟེང་ཕྱོགས་ནས། །ཕྲལ་དུ་ཡིད་ཀྱིས་འཕོ་བྱེད་ན། །ཉིན་བཞིན་བྲམ་ཟེ་གསོད་པ་དང༌། །མཚམས་མེད་ལྔ་ནི་བྱེད་པ་དང༌། །ཆོམ་རྐུན་ལས་ཀྱི་ལོངས་སྤྱོད་པ། །འདི་ཡིས་ལམ་གྱི་གྲོལ་འགྱུར་ཏེ། །སྡིག་པས་གོས་པར་མི་འགྱུར་ཏེ། །ཞེས་སོ། །དོན་ལྔ་པ་བར་དོའི་རྣལ་འབྱོར་ལ་གསུམ། བར་དོ་སྦྱང་བ། ངོས་གཟུང་བ། ལས་ཀྱི་འཕྲོ་མཐུད་པའོ། །དང་པོ་ནི། ད་ལྟ་བར་དོ་ཡིན་པའི་དུ་ཤེས་དང་མ་བྲལ་བས་འོད་གསལ་ངོས་བཟུང་ལ། ཉིན་མོ་དང་མཚན་མོ་བསྒོམ་པར་བྱའོ །ཉིན་མོ་ནི་སྟན་ལ་འདུག་ནས་བླ་མིའི་རྣལ་འབྱོར་བསྒོམས་ཏེ། བར་དོ་འབྱོངས་པར་གསོལ་བ་བཏབ་ནས་སྣང་བ་འདི་བར་དོའི་སྣང་བ། འགྲོ་བ་ཐམས་ཅད་བར་དོའི་སྐྱེ་འགྲོ། ཟས་ཟ་བ་དང་འགྲོ་འཆག་ཉལ་འདུག་བར་དོའི་སྣང་བ། དྲན་རིག་བར་དོའི་ཤེས་པར་ངོས་བཟུང་ལ་མ་ཤི་བའི་འདུ་ཤེས་སྐད་ཅིག་ཀྱང་མི་བྱ་བར། ང་ཤི་འདུག བར་དོ་ན་འདུག་སྙམ་ནས། སྔར་ངོ་སྤྲད་པ་བཞིན་འོད་གསལ་ཕྱག་རྒྱ་ཆེན་པོ་བསྒོམ་མོ། །སྔར་གྱི་རིག་པ་དང་བར་དོའི་རིག་པ་གཉིས་གཅིག་ཡིན་པས་འབྱུང་བསྡུད་པ་ཙམ་མིན་པ་ཁྱད་མེད་པའི་ཕྱིར་ད་ལྟ་གོམས་པས་བར་དོར་ངོས་ཟིན་པ་ཡིན་ནོ། །དེ་ལྟར་གོམས་པས་རྨི་ལམ་གཉིད་གུང་དུའང་དེ་བྱུང་ན་བར་དོར་ཕན་ཐོགས་པ་ཡིན་ནོ། །མཚན་མོ་ནི་རྨི་ལམ་འདུན་པའི་གནད་ཀྱིས་སྦྱང་བར་བྱ་སྟེ། །ཉལ་ཁར་བླ་མའི་རྣལ་འབྱོར་བསྒོམས་ལ། རྨི་ལམ་འབྱོངས་པར་གསོལ་བ་བཏབ་བོ། །གཟུང་བ། སྦྱང་བ། བར་དོའི་འོད་གསལ་དུ་བསྒོམ་པ་གསུམ་ལས། དང་པོ་རྨི་ལམ་གཟུང་བ་ནི། དས་ཀྱི་གནད་སྲོད། ལུས་གནད་སེང་གེའི་ཉལ་ལུགས་དམིགས་པའི་གནད་དང་པོ་སྨིན་ཕྲག་ཏུ་སེམས་གཟུང༌། གཉིད་དུ་འགྲོ་ཁར་མགྲིན་པ་ན་པདྨ་དམར་པོ་འདབ་བཞིའི་ལྟེ་བར་ཨ་དམར་པོ་ནས་ཙམ་ལ་ཤེས་པ་གཏད་ཅིང༌། རྨི་ལམ་ལ་རྨི་ལམ་དུ་ཤེས་ནས་ཟིན་པར་བྱ་སྙམ་དུ་བསམས་ལ་ཉལ་ལོ། །སད་རེས་ལ་དེ་ལྟར་དྲན་པར་བྱས་པས་རྨི་ལམ་ཟིན་ནོ། །མ་ཟིན་ན་བླ་མ་ལ་གསོལ་བ་གདབ། བསོད་ནམས་ཀྱི་ཚོགས་བསག །ཉིན་དུས་ཀྱི་འདུན་པ་དྲག་པོ་བྱའོ། །དེས་ཟིན་ངེས་ཏེ། དང་པོ་རྦབ་ཏུ་ཤོར་བ་སོགས་སྔངས་པ་རྩུབ་མོ་ཅིག་གིས་རྐྱེན་བྱས་ནས་ཟིན་ནོ། །ཟིན་དུས་ལྷའི་སྐུ་དང་ཡུལ་སྣ་ཚོགས་དང༌། རྫུ་འཕྲུལ་དུ་མར་སྤྲུལ་པ་དང༌། གཅིག་གཅིག་ཏུ་བསྒྱུར་བ་ལ་སོགས་པ་བྱ། །སྦྱང་བ་ནི། རྨི་ལམ་གྱི་སྣང་བ་དེ་ཉིད་བདེན་མེད་སྒྱུ་མར་རྩལ་སྦྱང་ཞིང༌། །ཆུ་དང་མེ་ལ་སོགས་པ་ལ་རྨི་ལམ་གྱི་མེ་ཆུས་སུ་ལ་གནོད་སྒྱུ་མ་ཡིན། རྨི་ལམ་ཡིན་སྙམ་དུ་སྐད་ཅིག་སྐད་ཅིག་ལ་བདེན་མེད་ཞེན་མེད་དུ་བྱེད་པའོ། །བར་དོའི་འོད་གསལ་ལ་བསྒོམ་པ་ནི། རྨི་ལ་མེད་ཉིད་བར་དོ་ཡིན་པར་ཐག་བཅད་ལ། བདེན་མེད་ཞེན་མེད་ཀྱི་རྩལ་སྦྱངས་རྗེས་ངོ་སྤྲད་པའི་འོད་གསལ་གྱི་ངང་ལ་བསྒོམ་པའོ། །དེ་ལྟར་བྱས་པས་ཉིན་མཚན་ཁྱད་མེད་པར་བར་དོའི་སྣང་བ་དང་འོད་གསལ་དུ་འབྱོངས་པ་ཡིན་ནོ། །གཉིས་པ་བར་དོ་ངོས་གཟུང་བ་ནི། འཆི་ཁའི་ཚེ། ས་ཆུ་ལ་ཐིམ་པས་ལུས་ལྕི། ཆུ་མེ་ལ་ཐིམ་པས་ཁ་སྣའི་ཆུ་སྐམས། མེ་རླུང་ལ་ཐིམ་པས་དྲོད་སྡུད། རླུང་རྣམ་ཤེས་ལ་ཐིམ་པས་ཕྱི་དབུགས་བརྩེགས་མ་ལས་རྒྱུ་བ་ཆད། རྣམ་ཤེས་ནམ་མཁར་ཐིམ་དུས་གྱེན་རྒྱུ་ཐུར་སེལ་གྱི་རླུང་གཉིས་ཀྱི་དབུ་མའི་ཡར་སྣ་མར་སྣ་གཉིས་ནས་སྙིང་གར་ཨ་ཧཾ་ཕྲད་དེ་དར་ཅིག་བརྒྱལ། ནམ་མཁའ་འོད་གསལ་ལ་ཞུགས་དུས་ཡེ་ཤེས་བཞི་ལས་དང་པོ་སྣང་བའི་ཡེ་ཤེས་སྐད་ཅིག་མ་འཆར་ཏེ། སྔར་ཐིག་ལེ་རྩོལ་བས་སྒོམ་པའི་འོད་གསལ་ཟིན་པ་ལས། དེ་ལས་བརྒྱ་འགྱུར་གྱིས་བདེ་ལ་གསལ་བ། འདོད་ཆགས་ཀྱི་རྟོག་པ་མེད་པ་སྐད་ཅིག་མ་གཅིག་འཆར་བ་ངོས་བཟུང་ལ་བསྒོམ་མོ། །དེ་ནས་སྣང་བ་མཆེད་པ་ལ་ཐིམ་པས་སྔོན་པས་ཀྱང་གསལ་བའི་ཡེ་ཤེས་མཆེད་པ་ཞེས་བྱ་བ་སྐད་ཅིག་གཉིས་སུ་འཆར་རོ། །དེ་ནི་སྔར་སྲོག་ལ་གོམས་པ་དེ་དང་གཅིག་ཀྱང༌། འདིར་གསལ་ལ་མི་རྟོག་པ་བརྒྱ་སྟོང་གིས་ལྷག་པས་ཞེ་སྡང་གི་རྟོག་པ་ཞི་སྟེ། འོད་གསལ་དེ་ཉིད་ངོས་བཟུང་ལ་བསྒོམ་མོ། །དེ་ནས་མཆེད་པ་ཐོབ་པ་ལ་ཐིམ་པས་མི་རྟོག་པའི་ཡེ་ཤེས་སྔར་ཡིད་ལ་མི་བྱེད་པ་སྒོམ་པ་དེ་ཡིན་ཡང༌། དེ་བས་བྱེ་བ་འགྱུར་གྱི་མི་རྟོག་ལ་གསལ་བ་དེ་སྤྲོས་པ་མེད་པ་སྐད་ཅིག་གསུམ་འབྱུང་བ་དེ་ངོས་བཟུང་ལ་བསྒོམ་མོ། །དེས་ནི་གཏི་མུག་གི་རྟོག་པ་ཞི་བའི་དུས་སོ། །ཐོབ་པ་ཉེ་བར་ཐོབ་པའི་ཡེ་ཤེས་ལ་ཐིམ་དུས་ན། སྔོན་པས་ལྷག་པའི་བདེ་གསལ་སྤྲོས་བྲལ་རང་བྱུང་གི་ཡེ་ཤེས་སྐད་ཅིག་བཞི་འབྱུང་སྟེ། ཉོན་མོངས་པ་ཕྲ་བ་དང་རགས་པ་ཀུན་སྤྲིན་ནམ་མཁར་ཞི་བ་ལྟར་དབྱིངས་སུ་དར་ཅིག་ནུབ་ནས། སྔོན་འོད་གསལ་ཕྱག་རྒྱ་ཆེན་པོ་དུས་ཐམས་ཅད་ལ་རང་བཞིན་རྣམ་དག་ཆེན་པོར་ངོ་སྤྲད་པ་དེ་འདིར་ཤར་སྙམ་དུ་ངོ་ཤེས་པར་བྱས་ལ། དེའི་ངང་དུ་སྒོམ་པའི་སྐད་ཅིག་ལ་སངས་རྒྱས་ཐོབ་སྟེ། མཚན་བརྗོད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། ཞེས་སོ། །དེ་དག་གི་ཚེ་འབྱུང་བ་ལྔའི་རླུང་དབྱིངས་སུ་དག་པ་འོད་གསལ་ལྷན་ཅིག་སྐྱེས་པས་བདག་བྱས་པའི་སྣང་བའང༌། དུ་བ་ལ་སོགས་པའི་རྟགས་བཅུ་རྫོགས་པར་འཆར་ཏེ། འདིར་སྤྲོས་པས་ཆོག་གོ །གསུམ་པ་ལས་ཀྱི་འཕྲོ་མཐུད་པ་ནི། དེར་ངོས་མ་ཟིན་པ་རྣམས་ལ། དེ་ནས་རྣམ་ཤེས་ལུས་ཀྱི་ཕྱིར་ཐོན་ནས་སྲིད་པའི་བར་དོ་རྨི་ལམ་ལྟ་བུ་བདེ་སྡུག་སྣ་ཚོགས་པ་ཅན། དབང་པོ་ཚང་བ། རྫུ་འཕྲུལ་ཡོད་པ། གང་དུའང་འགྲོ་ཞིང་གཅིག་ཏུ་མི་ཚུགས་པ་ཀུན་དུ་འཕྱོ་ཞིང་ལུས་དང་འདུག་ས་ཚོལ་ལོ། །དེའི་དུས་སུ་བར་དོ་ངོས་ཟིན་ནས། ཕྱོགས་བཅུའི་ཞིང་དག་པ་ཡིད་ལ་བྱས་ཏེ་འཕོ་བ་ལྟར་རྣམ་ཤེས་དེར་ཞུགས་པས་ཁ་ཅིག་རྫུས་ཏེ་སྐྱེའོ། །སྒྱུ་མ་ལྟ་བུའི་བསྐྱེད་རྫོགས་བསྒོམས་པས་ཁ་ཅིག་གྲོལ་ལོ། །ཕ་མའི་མངལ་དག་པ་མི་ལུས་རིན་པོ་ཆེ་སྦྱོར་བར་བྱེད་པ། མའི་མངལ་དུ་པདྨ་ལ་ཨོཾ་ཨཱཿཧཱུྃ་ངམ་ལྷའི་སྐུ་བསམས་པ་ལ་རྣམ་ཤེས་ཞུགས་ནས་མི་ལུས་རིན་པོ་ཆེ་ཐོབ་ནས་གསང་སྔགས་ཀྱི་ཆོས་དང་ཕྲད་དེ་སྐྱེ་བ་དེ་ཉིད་དམ། བར་དོར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་བོ། །འཇམ་དཔལ་ཞལ་ལུང་ལས། གཟུགས་བཅས་ཕུང་པོ་རང་ལུས་ནི། །ཚེ་འདི་ཉིད་ལ་མ་གྲུབ་ཀྱང༌། །ཡིད་ནི་རྡོ་རྗེའི་སྐུར་གྲུབ་ནས། །བར་དོར་ཡང་དག་འགྲུབ་པར་འགྱུར། །ཅེས་སོ། །དོན་གསུམ་པ་རྗེས་གེགས་སེལ་བ་ལ་གསུམ་སྟེ། སྤྱོད་ལམ་རྒྱུན་གྱི་རིམ་པས་གེགས་རྣམས་མི་འབྱུང་བར་བྱ་བ། ཏིང་ངེ་འཛིན་བརྟན་པའི་གེགས་བྱིང་རྒོད་བསལ་བ། སྲོག་རྩོལ་ལོག་པའི་གེགས་སོ་སོར་བཅོས་པའོ། །དང་པོ་ནི་ཐུན་མགོར་ལྷ་དང་བླ་མའི་རྣལ་འབྱོར་བསྒོམ་པ་དང༌། ལུས་སྦྱོང་ལ་བསླབས་པས་ནད་གདོན་གྱི་གེགས་མི་འབྱུང་བ་ཡིན་ནོ། །ལུས་སྦྱོང་ནི། རྣམ་པ་ཉི་ཤུར་འདུས་པའི་དང་པོ་ནི་སྐྱིལ་ཀྲུང་བཅས་ཏེ་ལག་པ་འཁྱུད་པའི་ཚུལ་ལོ། །དེས་ཡན་ལག་གི་ནད་སེལ་ལོ། །གཉིས་པ་ནི་བསྐུ་མཉེའི་ཚུལ་དུ་འཕུར་རོ། །དེས་ལུས་ལ་དྲོད་སྐྱེའོ། །གསུམ་པ་ནི་སོར་མོ་བསྣོལ་ལ་བྲང་ལ་གཏད་དེ་ཕྱིར་འཐེན་པས་བྲང་གི་ནད་སེལ་ལོ། །བཞི་པ་ནི་དཔུང་པ་གཅུས་ལ་ལག་པ་གཡས་དང་གཡོན་དུ་སྤྲུགས་པས་དཔུང་པའི་ནད་སེལ་ལོ། །ལྔ་པ་ནི་ལག་པ་གཉིས་བྲང་ནས་ཁུ་ཚུར་བཅས་པ་ཕྱིར་འཕངས་པས། ཤ་ལྤགས་ཆུ་སེར་གྱི་ནད་སེལ་ལོ། །དྲུག་པ་ནི། ལག་པ་གཉིས་དཔུང་པ་གཉིས་ལ་བསྣོལ་ནས་བསྡམས་ཏེ་ལུས་ཀུན་གཅུད་པས་རྐེད་པའི་ནད་སེལ་ལོ། །བདུན་པ་ནི་རྐང་པ་གཉིས་བརྐྱངས་པའི་བྲང་བ་གཉིས་ནས་ལག་པ་གཉིས་ཀྱིས་འཐེན་པས་ཆུ་རྒྱུས་ཀྱི་ནད་སེལ་ལོ། །བརྒྱད་པ་ནི་ལག་པ་གཡས་གཡོན་གཞུ་འགེངས་པ་ལྟར་བྱས་པས་ལག་པའི་ཚིགས་དང་སྲོག་ཕྲག་གི་ནད་སེལ་ལོ། །དགུ་པ་ནི་ལག་པའི་ཁུ་ཚུར་གཉིས་མདུན་རི་འཕུལ་བའི་ཚུལ་དུ་བྱས་པས་རོ་སྟོད་ཀྱི་ཤ་རྒྱས་པ་དང་ལག་པའི་སྤེ་ཤའི་ནད་སེལ་ལོ། །བཅུ་པ་ནི་ལུས་རྒྱབ་དང་མདུན་དུ་དགུག་པས་མཁལ་ནད་མཚེར་ནད་སེལ་ལོ། །བཅུ་གཅིག་པ་ནི་ལག་པའི་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་ཏེ་མཛུབ་མོ་གཉིས་ཀྱིས་སྤྱི་གཙུག་དྲང་པོར་བཞག་པས་རྩིབ་ལོགས་ཀྱི་ནད་སེལ་ལོ། །བཅུ་གཉིས་པ་ནི་ལྟེ་བ་ནང་དུ་འཐེན་པས་མ་ཞུ་བ་དང་ཕོ་བའི་ནད་སེལ་ལོ། །བཅུ་གསུམ་པ་ནི་རྐང་ལག་བཞི་ས་ལ་བཙུགས་ལ་མགོ་ཅོག་ཅོག་བྱས་པས་ཡན་ལག་དང་ཉིང་ལག་གི་ནད་སེལ་ལོ། །བཅུ་བཞི་པ་ནི་རྐང་ལག་བཞི་ས་ལ་བཙུགས་ལ་གཡས་དང་གཡོན་དུ་བལྟས་པས་རྩེའུ་ཆུང་གི་ནད་སེལ་ལོ། །བཅོ་ལྔ་པ་ནི་ཁ་སྦུབ། རྐང་པ་བརྐྱང༌། ལག་མཐིལ་ས་ལ་གཅུགས་ཏེ་གྲུ་མོ་བྲང་ལ་གཏད་པས་སྟོད་ཀྱི་ཕྱི་ནང་གི་ནད་སེལ་ལོ། །བཅུ་དྲུག་པ་ནི་མགོ་ཅོག་གཡས་དང་གཡོན་དུ་བསྐོར་བས་སྐེ་དང་མཇིང་བའི་ནད་སེལ་ལོ། །བཅུ་བདུན་པ་ནི་ལག་པ་གཉིས་བསྣོལ་ལ་སྤྱི་བོར་བཞག་པས་རོ་སྟོད་ཀྱི་ནད་སེལ་ལོ། །བཅོ་བརྒྱད་པ་ནི་པུས་མོ་གནམ་དུ་རེང་ངེ་གན་རྐྱལ་དུ་ཉལ་བའི་སྤྱི་བོར་ཐལ་མོ་ཐད་དྲང་དུ་སྦྱར་བས་རྐང་པའི་ཚིགས་དང་ལག་པའི་ནད་སེལ་ལོ། །བཅུ་དགུ་པ་ནི་རྐང་པ་གཉིས་རེ་མོས་སུ་ལག་པའི་གྲུ་མོའི་ཁུང་དུ་བླངས་ཏེ་བརྐྱང་བསྐུམ་བསྐུམ་བྱུགས་པས་རྐང་པའི་ཉྭ་ཤའི་ནད་སེལ་ལོ། །ཉི་ཤུ་པ་ནི་རྐང་པ་གཉིས་ཀྱི་མགོ་པུས་མོ་གཉིས་ཀྱི་སྟེང་དུ་རེ་མོས་སུ་བཞག་ཅིང་ཡ་གཅིག་ས་ལ་བཙུགས་ཐལ་མོ་སྦྱར་བས་སྟོད་སྨད་ཐམས་ཅད་ཀྱི་ནད་སེལ་ལོ། །གཉིས་པ་བྱིང་རྒོད་བསལ་བ་ནི། སྤྱོད་ལམ། ཁ་ཟས། རླུང༌། དམིགས་གནད་བཞིས་བསྟན་པ་ལས། སྤྱོད་ལམ་ནི་ཐུན་སྟོད་ལ་བྱིང་ན་སྟན་མཐོན་པོ་ལ་བསྡད། རི་དང་ནམ་མཁའི་མཚམས་སུ་བལྟ། ཁུ་ཚུར་དཔྲལ་བར་བཅིངས་ལ་མིག་བགྲད་དོ། །རྒོད་ན་དམའ་སར་ཨོལ་ཀོས་བྲང་ནོན་པར་བྱས་པའི་མགོ་ཐོག་ཏུ་ཞྭ་གྱོན་པའམ། ཤིང་ལེབ་ཀྱི་བུག་པ་ལ་སེམས་གཏད་དོ། །ཐུན་སྨད་ལ་བྱིང་རྒོད་བྱུང་ན་ཁམས་ཀྱི་སྐྱོན་ཡིན་པས་ཐུན་ཆུང་ལ་གྲངས་མང་བའམ། སྐབས་སུ་དར་རེ་བསྒོམ་པར་བྱའོ །ཁ་ཟས་ཀྱིས་བྱིང་ན་བཅུད་ཅན་སྤང་ཞིང་བསིལ་བ་བསྟེན་ནོ། །རྒོད་ན་ཆང་ཕུལ་རེ་ལ་སོགས་པ་ཁམས་དང་སྦྱར་ནས་འཐུང་ཞིང༌། གོམ་པ་ལྔ་བཅུ་ཙམ་དུ་འཆག་ཅིང་བསྒོམ་མོ། །རླུང་གིས་བྱིང་ན་འོག་སྒོམ་བསྡམས་ལ་ལྟེ་བར་བུམ་པ་ཅན་ཡང་ཡང་བྱའོ། །རྒོད་ན་གཟུང་ཞིང་རང་ཉིད་ལྷར་བསྒོམས་པའི་སྙིང་གའི་ས་བོན་ལས་བརྟན་གཡོ་ཐམས་ཅད་འོད་ཟེར་ཕོག་པས་འོད་དུ་ཞུ་བ་ཐམས་ཅད་བདག་ལ་བསྡུ་སྟེ། འདོད་ཁམས་ལུས་ཀྱི་སྨད། གཟུགས་ཁམས་བར། གཟུགས་མེད་སྟོད་ལ་བསྡུ་བའོ། །བདག་ཉིད་སྙིང་གའི་ས་བོན་ལ་བསྡུ། དེ་ཇེ་ཆུང་ཇེ་ཕྲ་ལས་མཐར་སྟོན་པའི་ངང་ལ་གཞག་གོ །དམིགས་གནད་ནི། སྤྱི་གཙུག་བདེ་ཆེན་འཁོར་ལོར་སེམས་བཟུང་བས་བྱིང་བ་སེལ་ལོ། །རྐང་མཐིལ་ལམ་སྤྲུལ་པའི་འཁོར་ལོར་སེམས་བཟུང་བས་རྒོད་པ་སེལ་ལོ། །ཡང་རྒོད་པ་དེ་ཉིད་གྲངས་བྱ་ཞིང་སེམས་དེའི་ངོ་བོ་ལ་བལྟས་པས་ཞིའོ། །གསུམ་པ་སྲོག་རྩོལ་གྱི་གེགས་སེལ་ལ། རླུང་ཁོག་པར་སེམས་དང་ལྷན་ཅིག་མི་རྟ་ལྷར་གནས་པ་དེ་ཉིད་ཀྱི་རླུང་ལོག་པས་ནད་ཟུག་དྲག་ཏུ་འབྱུང་ལ། ཁམས་སྣུམ་དང་སེམས་མར་མེ་ལྟ་བུ་འདྲེས་པའི་ཁམས་ལོག་པས་ཟུག་བདེ་མི་བདེ་འདྲེས་མར་འབྱུང་ངོ༌། །རྩ་བུག་ནི། ཕྲེང་འདར་ལ་སོགས་པ་དྲག་ལ་རྒྱུན་ཐུང་བ་ཁང་བ་ལྟ་བུའོ། །སེམས་གནས་དུས་ཁམས་ལ་བརྟེན། འཕྲོ་དུས་རླུང་ལ་ཞོན་པའི་ཕྱིར། །དེ་གཉིས་ལས་སུ་རུང་ན་སེམས་ལས་སུ་རུང་བའི་གནད་དེ་ཡི་ནོ། །དེ་ལ་ཁམས་ཀྱི་བཅོས་ཐབས་ནི། ལུས་སྦྱངས་ཀྱིས་དགྲམ་པ་དང༌། ཆང་དང་མི་ཞུན་དང༌། བདུད་རྩི་གཉིས་ཀྱི་ཁྲུས་དང༌། བྱུག་པས་ཟུག་རང་བཞིན་འགྲོ་ཞིང་གང་ཡང་ཡིད་ལ་མི་བྱེད་པ་ཉིད་ཁམས་དངས་ས་སྙོམས་པའི་མཆོག་ཡིན་ཏེ། སེམས་གནས་པ་ཉིད་ཀྱི་སྐྱོན་རྩེ་གཅིག་ཏུ་དམིགས་རྟེན་གཅིག་ལ་གཟུང་བ་ལ་སོགས་པས་འབྱུང་ལ། དེ་ཡིད་ལ་མི་བྱེད་པས་བསལ་བའི་ཕྱིར་རོ། །རླུང་བཅོས་པས་ཀྱང་ཞི་བར་ངེས་པ་ཡིན་ནོ། །རླུང་བཅོས་པ་ལ་གསུམ་སྟེ། རྩ་བའི་རླུང་ལྔའི་བཅོས་ཐབས་དང༌། ཡན་ལག་གི་རླུང་ལྔའི་བཅོས་ཐབས་དང༌། སྤྱིའི་ལོག་གནོན་ནོ། །དང་པོ་ལྔའི་སྲོག་འཛིན་པའི་རླུང་ཟིན་ན། སྙིང་འཆུ་ཞིང་རོ་སྟོད་དང་སྙིག་ག་གཟེར་བ་འོང་ངོ༌། །རེངས་ན་སྙིང་རླུང་དང་སྨྱོ་འབོག་ཏུ་འགྲོ་བས་བཅོས་ཐབས་ནི་བསྐུ་མཉེ་བྱ། ལུས་ཀྱི་སྙིང་ག་ཆུའི་རྦ་ལ་གཟེད། སེམས་རྡོ་རྗེ་ནོར་བུར་གཏད། ཧ་དྲག་པོ་གདོན། མེ་མཉམ་ལོག་པར་ཟིན་ན་ཕོ་བ་དང་མཁལ་སྐེད་ན་ཞིང་གཟེར་ན་ཀུང་ཀུང་བ་འབྱུང་ངོ༌། །རེངས་ན་ཕོ་གཟེར་དང་དམུ་ཆུར་འགྲོ་བས་བཅོས་ཐབས་ནི་ཆང་གི་ཕྲུན་སར་གདབ་ཅིང་དུགས་བྱ། སྐྱིགས་བུ་འདོན། ཤེས་པ་མགྲིན་པར་གཏད་ལ་བསྒོམ་མོ། །ཐུར་སེལ་གྱི་རླུང་ཟིན་ན་དཔྱི་མིག་ན། རྐང་པ་འཁྲིལ་ཞིང་རོ་སྨད་བཤལ་ནས་ན། དྲི་ཆེན་སྐམ་པོའམ། ཡང་ན་བཤལ་དུ་འབྱུང༌། རེངས་ན་དྲི་ཆེན་གྱི་སྒོ་བསྡམས་པས་བཅོས་ཐབས་ནི་བཤང་གཅིའི་བར་དུ་མཉེ། ཤེས་པས་རླུང་ཚངས་བུག་ཏུ་དྲངས་ལ་བཤང་སྒོར་ཕྱིར་ལ་རྒྱངས་ཀྱིས་འཕང་ངོ༌། །གྱེན་རྒྱུའི་རླུང་ཟིན་ན་མགྲིན་པ་སྐྲང༌། །མཇིང་པའམ་རྩེ་ཆུང་ན། རིངས་ན་ལྐོག་འབྲས་སུ་འགྱུར་རོ། །བཅོས་ཐབས་ནི་གྱེན་དུ་མི་དྲང་བར་ཐུར་དུ་མནན་ནོ། །ཁྱབ་བྱེད་ཟིན་ན་མགོ་བོ་ན། ཡན་ལག་ཚིགས་ཁོལ་ཞིང་བེར་བ་འོང་ངོ༌། །རེངས་ན་འཁུམས་ཏེ་སྒུར་པོར་འགྲོའོ། །བཅོས་ཐབས་ཅན་བསྐུ་མཉེ་དང་མཆོང་རྒྱུག་བྱ། ལུས་སྟོང་པར་བསྒོམ་མོ། །ཡན་ལག་གི་རླུང་ལྔའི་བཅོས་ཐབས་ནི། །མིག་ཏུ་རྒྱུ་བའི་རླུང་ཟིན་ན་མིག་ན། རེངས་ན་ལོང་ངོ༌། །བཅོས་ཐབས་ནི་བསིལ་སྨན་གྱི་ཆུ་ལྕགས་བརྡེག་གོ །དེས་དམར་ཚག་སེལ་ལོ། །སྐྱ་བོ་མི་གསལ་བ་ལ་རྐང་ལག་གི་མཐིལ་བཞིར་བྱུག་པ་བྱ། མིག་ཡོན་པར་བསམ་མོ། །རྣ་བའི་རླུང་ཟིན་ན་གཟེར་ཞིང་ན། འུར་སྒྲ་འོང༌། རེངས་ན་འོན་ནོ། །བཅོས་ཐབས་ནི་རྣ་བ་མིན་པའི་ངོས་བཀག་སྟེ་རླུང་མནན་ལ་ནས་ངོས་ལ་གདོན་ནོ། །སྣའི་རླུང་ཟིན་ན་སྣ་རུས་དང་གདོང་པ་ན། སྣ་ཞོམ། དྲི་མི་ཚོར། དབུགས་ཁ་ནས་ཕལ་ཆེར་འགྲོའོ། །བཅོས་ཐབས་ནི་རླུང་འཐེན་ནས་དྲག་པོར་བཏང༌། ལྒའམ། གཡེར་མའམ། སུག་ཕྱེས་སྦྲིད་པ་འབྱུང་ངོ༌། །ལྕེ་རྒྱུ་བའི་རླུང་ཟིན་ན་ལྕེ་དང༌། ལྕེ་ཆུང་དང༌། སྙིང་སྐྲང༌། སོ་ན། ཁ་འཐམ། ལྕེ་ཆུང་འབབ། ལྕེ་བསྒྱུར་ལྡོག་དཀའོ། །རེངས་ན་ལྐུགས་པར་འགྲོའོ། །བཅོས་ཐབས་ནི་རླུང་སིང་སྒྲ་དང་བཅས་ཏེ་ནང་དུ་དྲག་པོར་འཐེན་ལ། མི་ཐུབ་དུས་ཁ་ནས་ཕར་སིང་སྒྲ་དང་བཅས་པ་དྲག་ཏུ་འཕང་ངོ༌། །ལུས་ཀྱི་པགས་པར་རྒྱུ་བའི་རླུང་ཟིན་ན་ལུས་ཀྱི་པགས་པ་ཀུན་འཁོལ་ཞིང་ན་བེར་བ་ལྡང་ཞིང་ཚའོ། །ཟ་ཕྲུག་དང༌། ཤུ་བ་དང་མཛེར་འགྱུར། །པགས་པ་འགོག་གོ །བཅོས་ཐབས་ནི་རླུང་དྲག་ཏུ་རྔུབས་ལ་རྐང་པའི་སོར་མོར་བསྡུས་ཏེ་ལག་པ་གཡབ་ཅིང་བྲོ་བརྡུང་ངོ༌། །ཤེས་པས་རླུང་རྣམས་བ་སྤུའི་བུག་ནས་ཐོན་པར་བསམ་མོ། །སྤྱིའི་ལོག་གནོན་ནི། ལུས་ཚ་ན་སྤྱི་བོའི་ཧཾ་ལས་ཐིག་ལེ་དྷཱུ་ཏཱི་ན་མར་གྲང་སིབ་སིབ་བབས་པར་བསམ། གྲང་ཤས་ཆེས་ན་ལྟེ་བའི་མེ་ཟུར་གསུམ་ལས་འབར་བས་ལུས་ཁེངས་པར་བསམ། འོག་སྒོ་ན་ཡར་ཡཾ་ལས་རླུང་གི་དཀྱིལ་འཁོར་གཡོ་བར་བསམ་མོ། །བྱིང་ན་ཤེས་པ་ལུས་ཀྱི་ཕྱིར་གདོན། རྒོད་ན་ནང་དུ་ཐིག་ལེ་ལ་ཤེས་པ་གཏད། འགགས་ན་སྲིན་པོའི་སྒོ་ཕྱེ་ལ་སྟེང་རླུང་མནན། འཁྱམས་ན་ཚངས་བུག་ཕྱེ་ལ་ན་བུན་གནམ་དུ་འཕང༌། གཟེར་ན་དེ་དེའི་སྟེང་དུ་ལཾ་ལས་སའི་དཀྱིལ་འཁོར་གྲུ་བཞིའི་ཟུར་བཞིར་རྡོ་རྗེ་བསམ་མོ། །ཡང་ཁམས་ལོག་སྟེ་མཐོང་སྣང་དམར་པོའམ་སེར་པོར་སོང་ན་མཁྲིས་པ་ཡིན་པས་གྲིབ་མར་བསྡད། ཆུ་རླུང་གྲང་མོས་ལུས་ཁེངས་པར་བསམས་ལ་རླུང་གཟུང་ངོ༌། །སྐྱུག་ན་བད་ཀན་ཏེ་ལུས་སྦྱང་བྱ། རླུང་གི་རླུང་ལྗང་གུས་ལུས་གཏོར་བས་བསམ་ཞིང་དྲག་རླུང་གཟུང་ངོ༌། །འདར་ཞིང་སྐྱུགས་ལ་མགོ་འཁོར་ན་རླུང་སྟེ་རླུང་གསེང་བརྡུང༌། མེ་རླུང་གིས་ཧཾ་ཞུ་བས་ལུས་ཁེངས། རྐང་མཐིལ་དུ་སེམས་གཏད་དོ། །ཡང་ན་ལོག་ནོན་ལྔ་སྟེ་འཁོར་ལོ་ལྟར་བསྐོར་བ། དྲུ་བུ་ལྟར་འདྲིལ་བ། བུ་ག་མང་པོའི་སྦྱོར་བ། སྟེང་འོག་གི་འཁོར་ལོ་མེད། པ་ལ་བསླབ་པ། རབ་ཏུ་དམའ་བའི་སྦྱོར་བ་ལ་བསླབ་པའོ། །དང་པོ་ནི། ལུས་ཁེངས་པ་སྙམ་ཞིང་ན་ཚ་བདེ་བ་དག་བྱུང་ན་ལྟེ་བའི་གནས་སུ་འཁོར་ལོ་རྩིབས་བརྒྱད་པ་བསམས་ལ་གཡས་སུ་འཁོར་བར་བསྒོམ། དེས་མ་བདེ་ན་གཡོན་དུ་འཁོར་བར་བསྒོམ་མོ། །དེ་ལྟར་འཁོར་བས་ལུས་དང་འཁོར་ལོ་ཇེ་ཆེར་སོང་བས་ནམ་མཁའ་གང་བར་བསྒོམ། རྗེས་ལ་ནང་སྟོང་པ་དང་ཕྱི་སྟོང་པའི་ནམ་མཁའ་གཉིས་པར་མེད་གཅིག་ཏུ་འདྲེས་ཏེ་ལུས་དང་འཁོར་ལོ་མི་དམིགས་པར་བསམ་མོ། །གཉིས་པ་ནི་སྙིང་ལ་སོགས་པ་ཀོལ་ཙེར་ན་བ་ལ། གང་ན་སར་བུག་གཅིག་བསམས་པ་ན་ཕར་དབུགས་ཕྱིར་སོང་བར་བསམ་ཞིང་རླུང་དྲག་པོ་འཕང༌། ཡེ་ཤེས་ཀྱི་རླུང་རྟ་རྔ་ཙམ་གཅིག་ནང་ནས་ཕྱིར་དྲུ་བུ་ལྟར་སོང་ནས་ནམ་མཁའི་མཐར་བསམ་དེ་ནས་རིམ་གྱིས་བུག་པ་དང་དྲུ་བུ་གཉིས་ཀ་ཇེ་ཆེར་སོང་སྟེ་བུག་པ་སྐར་ཁུང་དང༌། མཐོང་ས་ཁུང་ཙམ་དང༌། དྲུ་བུ་སྐུད་པ་དང༌། ཐག་པ་ཙམ་དུ་ཕྱིར་འདྲིལ་བར་བསམ་མོ། །གསུམ་པ་ནི་ལུས་ཐམས་ཅད་ཁྱབ་པར་ན་ན་ལུས་ཐམས་ཅད་ལྕགས་སྲེག་གི་མིག་ལྟར་བུ་ག་མང་པོ་ཡོད་པར་བསམས་ལ། དེ་ཐམས་ཅད་ཕར་རླུང་དང་ནད་དོན་པར་བསམ་ཞིང་རླུང་དྲག་ཏུ་འཕང་ངོ༌། །བཞི་པ་ནི་ལུས་སྟོད་ན་ན་སྐེད་པ་ཡན་ཆད། མགྲིན་པ་མན་ཆད་སྟོང་པར་བསམས་ལ། དེ་ན་ཕར་ལ་རླུང་སྔོ་བུན་བུན་སོང་བར་བསམ་མོ། །གལ་ཏེ་ཐུར་དུ་འཁྲུ་ན་འོག་རླུང་དྲག་ཏུ་བསྡམས་པས་ཆད་དོ། །ལྔ་པ་ནི་རླུང་གིས་བརྒྱལ་འབོག་དང་མཆོང་རྒྱུག་བྱུང་ན་རང་གི་འོག་ཏུ་དོང་ཟབ་ཤིན་ཏུ་རིང་བ་བསྒོམས་པ་ན་མར་ལ་རང་གི་ལུས་ཏིབ་ཏིབ་བྱིང་བའམ། སའི་འོག་ཏུ་བྱིང་བར་བསམ་མོ། །རླུང་ཤ་ལྤགས་མཚམས་སུ་ཞུགས་ན་སྐྱ་རྦབ་ལ་འགྲོ། ཕྱིས་མཛེར་འགྲོ་བས་དེ་བཅོས་པ་ནི་དྲི་ཆུས་བཀྲུ། ཆང་དྲོན་མོས་བཀྲུ། མར་ནག་གམ་ལོ་མར་རྙིང་བས་བསྐུ་མཉེ་ལན་མང་དུ་བྱའོ། །དེས་སེལ་ངེས་སོ། །བཅོས་ཐབས་འདི་དག་ནི་ཉམས་སུ་མྱོང་བའི་གནད་ཤིན་ཏུ་ཟབ་པས་གསང་ཞིང་གཅེས་སྤྲས་ཀྱིས་ཉམས་སུ་བླང་བར་བྱའོ། །དེ་ལྟར་ཉམས་སུ་བླངས་པས་གནས་སྐབས་སུ་ཏིང་ངེ་འཛིན་དང༌། སྤྱན་དང༌། མངོན་ཤེས་དང༌། རྫུ་འཕྲུལ་དང༌། གྲུབ་པ་བརྒྱད་ལ་སོགས་པ་འགྲུབ་ལ་མཐར་ཐུག་བྱང་ཆུབ་འགྲུབ་པ་ཡིན་ནོ། །དེ་ལྟར་ཡང་ཟབ་སྙིང་པོའི་གནད་རྣམས་ཀུན། །ཕྱི་རབས་དོན་དུ་གསལ་བར་བཀོད་པ་ལས། །བྱུང་བའི་དགེ་བ་གངས་རི་ལྟར་དཀར་དེས། །འགྲོ་ཀུན་ཚེ་འདིར་བདེ་ཆེན་མཁའ་སྤྱོད་ཤོག །ཡིད་བཞིན་མཛོད་ཀྱི་དོན་ཁྲིད་ཟབ་དོན་རྡོ་རྗེ་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་དྲི་མེད་འོད་ཟེར་གྱིས་གྲྭ་རི་མེ་ཏོག་བརྩེགས་པའི་འདབས་སུ་བཀོད་པ་རྫོགས་སོ། །དགེའོ། །དགེའོ། །དགེའོ།། །།མངྒ་ལཾ།། །།

Notes

  1. © Karma Lekshey Ling, Post Box 8435, Sita Paila-9, Swayambhu, Kathmandu, Nepal.
    http://www.leksheyling.net
    http://www.dharmadownload.net