Ngb-pt-0894-vol-09-text
Front[edit]
Body[edit]
ཅེས་བྱ་བ་རྫོགས་སོ།། །། རྒྱ་གར་སྐད་དུ། བཱ་ར་ན་ཀྲོ་་དྷ་ཀ་བཱ་ལ་གུ་རྒྱ་ཏནྟྲ་ནཱ་མ། བོད་སྐད་དུ། བདུད་ཁྲོས་པ་ཐོད་པའི་འཕྲེང་བ་ཅན་གསང་བའི་རྒྱུད་ཅེས་བྱ་བ། །དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དཔལ་ཆེན་པོ་ཉིད་འོག་མིན་གྱི་གནས་རྡོ་རྗེ་བཙུན་མོའི་བྷ་ག་ལ་དགེས་པ་ཆེན་པོའི་ཚུལ་དུ་བཞུགས་སོ། །དེའི་ཚེ་དེའི་དུས་ནས་ཞེ་སྡང་གདུག་པའི་པའི་འབྲས་བུ་མངོན་དུ་གྱུར་པ་ནི། བར་དུ་གཅོད་པས་ན་བདུད། རབ་ཏུ་གཏུམ་པའི་ཆ་བྱད་ཅན་གྱི་བདུད་དེ་ནི། སེམས་ཅན་རྣམས་ཀྱི་ཤ་དང་ཁྲག་རློན་པ་ཟ་ཞིང་འཐུང་ལ། འཁོར་ཕོ་ཉ་དང་ཕྱག་བརྙན་གྱི་བདུད་བཅུ་ནི། རབ་ཏུ་མི་སྲུན་ཅིང་སྐྱེ་འགྲོ་རྣམས་ཀྱི་དབུགས་རྔུབ་སྟེ་ཤ་རུས་ཟ་ལ། དོན་སྙིང་རྣམས་ནི་གཙོ་བོ་སྟོབས་པའི་ཚུལ་གྱིས་རབ་ཏུ་རྒྱུག་གོ །དེའི་ཚེ་དཔལ་ཆེན་པོ་ཉིད་སེམས་ཅད་རྣམས་ལ་ཐུགས་བརྩེ་བས་ཐུགས་རྗེ་ཆེན་པོའི་ཆོ་འཕྲུལ་གྱིས། བདུད་དེ་ཉིད་ཀྱི་སེམས་ཀྱི་རྣམ་པར་ལ་དཔལ་ཆེན་པོ་ཉིད་དུ་རང་སྣང་སྟེ། གདུལ་བྱ་དུས་ལ་བབ་པས་ན་དེའོ། །དེའི་ཚེ་བདུད་དེ་ལ། དཔལ་ཆེན་པོས་བཀའ་སྩལ་པ། སེམས་ཅན་ལ་གནོད་པ་མ་བྱེད། སྲོག་གཅད་པས་ནི་མཐར་དམྱལ་བར་འགྲོ་བར་འགྱུར་རོ། །ཞེས་གསུངས་སོ། །བདུད་ཀྱིས་གསོལ་པ། སེམས་ཅན་ལ་གནོད་པ་མི་བྱེད་ན། ཕ་དང་མ་ལ་གནོད་པ་བྱེད་དགོས་ལ། སྲོག་མི་གཅད་དུ་ཟས་ཤ་ཁྲག་འཐུང་བ་ལགས་སོ། །དམྱལ་བ་བགྱི་བ་ནི་གང་ལགས། བདག་ཆ་མ་མཆིས་སོ། །ཞེས་གསོལ་ཏོ། །བདུད་ཁྲོས་པའི་རྒྱུད་ལས། གླེང་གཞི་དྲིས་ལན་དང་བཅས་པའི་ལེའུ་སྟེ་དང་པོའོ།། །།ཡང་དཔལ་ཆེན་པོས་བཀའ་སྩལ་པ། །སེམས་ཅན་ལ་གནོད་པ་བྱས་པས་ནི་མི་བདེ་བ་འབྱུང་བ་ཡིན་ལ། སྲོག་གཅད་པས་ནི་ཚེ་ཐུང་ངོ་། །དམྱལ་པ་བྱ་བ་ནི་ན་པ་དང་། ཚ་བ་དང་། གྲང་བ་དང་། འཇིགས་ཤིང་སྐྱི་གཡའ་བའི་སྡུག་བསྔལ་མང་པོ་ཉམས་སུ་མྱོང་བར་འགྱུར་རོ། །ཞེས་བཀའ་སྩལ་པ་དང་། བདུད་འཇིགས་སྐྲག་སྟེ། ཀྱེ་དཔལ་ཆེན་པོ་ལགས། ནོངས་པ་མི་བཟད་པ་དེ་ལྟ་ན་གནོད་པ་གང་ལ་བགྱིད། སྲོག་མི་གཅོད་ཅིང་ཤ་ཁྲག་གི་འཚལ་མ་སྤངས་ན། འཚལ་བའི་ཟས་གང་ལ་བགྱི་ཞེས་གསོལ་ཏོ། །དཔལ་ཆེན་པོས་བཀའ་སྩལ་པ། གནོད་པ་བྱེད་པར་འདོད་ན་ཡང་། ནག་པོའི་ཕྱོགས་རྣམས་ལ་བྱོས་ཤིག་སྲོག་གཅོད་ན་ཡང་མཚམས་མེད་པ་ལྔ་བྱེད་པ་དང་། དཀོན་མཆོག་གསུམ་གྱི་སྐུ་དགྲ་རྣམས་ཀྱི་གཅོད་པར་བྱ་བ་ཡིན་པས་ན་ཆོད་ཅིག །ཟས་སུ་མི་ས་བཏབ་པའི་གཏོར་མ་དང་། ཉམས་པ་སྡིག་ཅན་དེ་དག་གི་ཤ་ཁྲག་ལ་ཟོ་ཞིག །ཅེས་བཀའ་སྩལ་པས། བདུད་དེ་རབ་ཏུ་དགའ་ཆེ་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་མ་སྔོན་ཆད་མ་རིག་མ་རྟོགས་ནས། ཁྲ་ཟོས་ཁྲག་འཐུང་ལས་ངན་བགྱིས། །བག་ཆགས་སྒྲིབ་པ་བྱང་གྱུར་ཅིག །སླད་ནས་མི་བགྱིད་དམ་ཆ་ཡིས། །དཔའ་བོ་ཆེན་པོས་དབང་རྟགས་གསོལ། །ཞེས་གསོལ་ཏེ། དཔལ་ཆེན་པོའི་ཞབས་ལ་གཏུགས་ན་དེ་ཉིད་དུ་འདུག་གོ །དེའི་ཚེ་དཔལ་ཆེན་པོ་ཉིད་ཀྱིས། བཛྲ་ཀ་ཏ་རི་ཨ་སྟི་ཁི྅་མ༷། ཞེས་བརྗོད་ནས། དགྲ་བགེགས་ཀྱི་ལུས་བཏུལ་བའི་ཕྱིར་ལག་པ་གཡས་པར་ཤེལ་དཀར་གྱི་གྲི་བྱིན་ནོ། །ཀ་བཱ་ལི་མྱ་ལ་ཨ་སྟི་ཁི྅་མི། ཞེས་བརྗོད་ནས།དཔལ་ཆེན་པོའི་འཁོར་གྱི་བསྒྲུབ་མཆོག་རྣམས་ལ་གཏོང་དང་གྲོགས་མི་ཟད་པར་བྱ་བའི་ཕྱིར་ཐོད་པའི་འཕྲེང་བ་དབང་རྟགས་སུ་བྱིན་ནོ། །བདུད་ཁྲོས་པའི་རྒྱུད་ལས། བདུད་བསྟན་པ་ལ་བཞག་ནས་དབང་བསྐུར་དེ་དམ་ཕོག་པའི་ལེའུ་སྟེ་གཉིས་པའོ།། །།ཡང་དཔལ་ཆེན་པོས་བཀའ་སྩལ་པ། ཕྱི་རབས་ཀྱི་རྣལ་འབྱོར་པས་བསྟན་པ་བསྲུང་བའི་ཕྱིར་བདུད་ཉིད་བསྒྲུབ་པའི་ཐབས་བཤད་ཀྱིས། ལེགས་པར་ཉོན་ཅིག །ཨེ་མ་ཧོ། མ་འོངས་དུས་སུ་རྣལ་འབྱོར་པས། །དབེན་པའི་གནས་འདུག་ནས་སུ། །མདའ་གང་ལྡན་པའི་མཎྜལ་ལ། །དུར་ཁྲོད་ཐལ་བས་སྤར་ཁབ་གཏང་། །གདུག་པའི་རྗེས་ན་ལྟ་ཕྱིར་རོ། །དེ་ཡི་དབུས་སུ་གྲུ་གསུམ་སྟེ།རྩེ་མོ་ལྷོ་འམ་དགྲ་ཕྱོགས་བསྟན། །ནང་དུ་རོ་སོལ་དུག་གིས་བྱུག །མཉེས་པའི་རྫས་སུ་འདི་དག་བསག །ལུག་ནག་གསོབ་ནི་ལེགས་རྒྱངས་ལ། །རྭ་ལ་དར་སྣས་བརྒྱན་པ་དང་། །སྐྱེ་རུ་མིང་རུས་བྲིས་ལ་གདགས། །བཤོས་བུ་ནག་པོ་ཁྲུ་གང་ལ། །མདའ་ནག་དར་ནག་བཏགས་པ་གཟུགས། །མདའ་ལ་ལིང་ཀ་མིང་བྱང་གདགས། །གཏོར་མ་བདུད་རྩི་རག་ཏ་སྟེ། །རང་ཉིད་བདུད་ཆས་ལྡན་པར་བྱའོ། །བསྒྲུབ་པའི་རྫས་ནི་འདི་དག་གོ །དམ་རྫས་ནི་འདི་དག་གོ །དམ་རྫས་བསྙེན་པའི་ཚུལ་དང་འདྲ། །བསྙེན་པའི་དུས་ཀྱི་བཤོས་བུ་བཏང་། །བཤོས་ནག་བསམ་པ་བྱས་ལ་བཞག །ཁྱད་པར་དུ་ནི་འདི་རྣམས་བསག །གཟས་པའི་རྫས་བསྡུས་ལིང་ག་བྱ། །མགོ་དང་སྙིང་ཀ་ལྟེ་བ་སྲ །རུས་དང་མིང་དང་བླ་གདགས་གསུམ། །གླིང་མའི་བྱང་བུ་མཚོན་གང་ལ། །རྨེ་བའི་ཁྲག་གིས་བྲིས་ལ་གཞུག །སྐྱེ་ནས་མཁར་ནག་དག་གིས་གདགས། །ལྕགས་ཕུར་བདུད་དུ་སྐྱེས་པ་ཅིག །འབྲུབ་ཁུང་ལྷོ་ཡི་ཟུར་ལ་གཟུགས། །ལིང་ག་འབྲུབ་ཁུང་ནང་བསྡུ་སྟེ། །འཁར་ནག་ཕུར་པ་དེ་ལ་གདགས། །ཉུངས་ཀར་ལ་སོགས་ཐུན་རྫས་ལ། །ཐུན་དུ་བསྔགས་ཏེ་བརྡེག་པར་བྱ། །མཁའ་ལྡིང་ཉི་མས་འཇིགས་པའི་གསོབ། །བྲང་འགྲོའི་གསོབ་དང་ལྦས་གསོབ་གསུམ། །ནང་དུ་ལིང་ག་གཞུག་པ་སྟེ། །རི་རྩེ་རི་ཟུར་ཆུ་ལ་བསྐུར། །ལས་མཐའ་གནན་པའི་རྫས་སུ་བསྔགས། །ལི་རི་སུ་ཏྲོརེ་ཁྲག་ལ་ནི། །ཧ་ལའི་དུག་རྣམས་སྦྱར་ལ་མངག །ཉེ་རིང་ཁང་ཁྱིམ་ཕྱོགས་སུ་འཕང་། །བདུད་ཁྲོས་པའི་རྒྱུད་ལས། །བསྙེན་བསྒྲུབ་ཀྱི་རྫས་དང་། བཅའ་གཞི་གནན་པ་དང་། ཟོར་བསྟན་པའི་ལེའུ་སྟེ་གསུམ་པའོ།། །།ཡང་དཔལ་ཆེན་པོས་བཀའ་སྩལ་པ། དེ་ལྟར་རྫས་རྣམས་ཚོགས་གྱུར་ནས། །ཕྱི་རབས་རྣལ་འབྱོར་པ་དེ་ནི། །བདག་ཉིད་བདུད་དུ་བསྒོམ་པ་དེས། །སྐུ་མདོག་ནག་པོ་ཆེན་པོ་ལ། །ཞལ་གཅིག་ཕྱག་ཀྱང་གཉིས་པ་སྟེ། །གཡས་པ་ཤེལ་གྱི་གྲི་ཁུག་འཛིན། །གཡོན་པ་སྤར་པ་གདེངས་པ་སྟེ། །དགྲ་བོའི་སྲོག་སྙིང་གཅོད་པར་བསམ། །འཁོར་ཡང་དེ་འདྲ་གྲངས་མེད་པས། །དམ་ཉམས་ཡུད་ཙམ་གྱིས་བཀུག་ནས། །བདག་ཉིད་མདུན་དུ་སྒྲོལ་བ་སྟེ། །དོན་སྙིང་བདག་ལ་སྟོབས་པར་བསམ། །དེ་ལ་སྔགས་ནི་འདི་ཡིན་ཏེ། །མ་ར་ན་ཐུམ་ཤིག་སོད། །མ་ར་ན་ཨ་མུ་ཀ་བ༷་སོད། །མ་ར་ན་སྙིང་ཏུལ་པྲི་ཤ་སྟ༷་བྷ་ཡ་སོད་སོད། དེ་སྐད་ཅེས་ནི་བཟླས་པ་ཡི། །རྟགས་ཀྱི་རྣམ་པ་འདི་རྣམས་སོ། །མི་ནག་རྟ་ནག་བཞོན་པ་འམ། །རྟ་ནག་ཁྱི་ནག་མི་ནག་དང་། །བདུད་པོ་དངོས་སུ་འོང་ཡང་སྲིད། ཁང་པ་འཚེག་པ་འམ་སྒོ་ནི་འཚིག་དང་འཁྲོག །བྱ་རོག་ཚོགས་ཆེན་འདུ་བའོ། །བདུད་ཁྲོས་པའི་རྒྱུད་ལས། ཏིང་ངེ་འཛིན་དང་། སྔགས་དང། རྟགས་བསྟན་པའི་ལེའུ་སྟེ་བཞི་པའོ།། །།ཡང་དཔལ་ཆེན་པོས་བཀའ་སྩལ་པ། དེ་ལྟར་རྟགས་རྣམས་མཐོང་གྱུར་ནས། །ལིང་ག་གསོལ་ཏུ་བཅུག་ནས་ནི། །འབྲུ་ཁུང་གཏིང་དུ་གཞུག་པར་བྱ། །དེ་ལ་ཐུན་རྣམས་བྲབ་ཅིང་གསོབ། །ར་ལུག་འབྲི་གཡག་རི་དགས་སམ། །བྱ་བྱིའུ་ལ་སོགས་བསད་པའམ། །དངོས་སུ་བསད་ཅིང་རྨི་བའམ། །བདག་ལ་དོན་སྙིང་སྟོབས་པའོ། །དེ་ལྟར་བྱུང་ན་ལས་གཞུག་བསྡུ། ཅི་འདོད་འགྲུབ་པར་གདོན་མི་ཟ། །བདུད་ཁྲོས་པའི་རྒྱུད་ལས། སྒྲུབ་པ་རྟགས་དང་དྲོད་གཟུང་བའི་ལེའུ་སྟེ་ལྔ་པའོ།། །།ཡང་དཔལ་ཆེན་པོས་བཀའ་སྩལ་པ། སྤྱན་དྲངས་ནས་ནི་མཆོད་པ་དབུལ། །ལས་ལ་མངག་ཅིང་འཕྲིན་ལས་བཅོལ། ཧཱུཾ༷། གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །བདུད་ཀྱི་རྒྱལ་པོ་གཤེགས་སུ་གསོལ། །ཡག་ཤ་འབར་བ་གཤེགས་སུ་གསོལ། །བདུད་ཀྱི་བདུད་ཅིག་ཁྱོད་ལས་ལྷག་པ་མེད། །འགྲོ་བ་མི་ཡི་བདུད་དུ་ཁྱོད་བསྐོར་ཏེ། །དགྲ་བོའི་བདུད་དུ་ཁྱོད་ལས་ལྷག་པ་མེད། །མི་ཟད་ཡུན་གྱི་མཐའ་ཡང་མི་གཏོང་ལ། །རྒྱབ་རྟེན་དཔུང་གཉེན་དུ་ཡང་ཁྱོད་ལས་མི་ཚོལ་དུ། །མཐུན་པའི་དམ་རྫས་མཆོད་པ་དམ་པ་དང་། །དགྲ་བོའི་ཤ་ཁྲག་མཆོད་པར་བཞེས་སུ་གསོལ། །མཆོད་པ་བཞེས་ནས་འཕྲིན་ལས་གྲུབ་པར་མཛོད། ས་མ་ཡ་ཨི་མ༷་བྷ་ལིང་ཏ་དགྲ་བགེགས་ལ་ཁ་ར༷་ཁུ་ཧི། རཀྟ་ཁུ་ཧི། པརྩི་ཨ་མྲི་ཏ་ཁ་ར༷་ཁུ་ཧི། དེ་ནས་འཕྲིན་ལས་བཅོལ་བ་ནི། ཧཱུཾ༷། དམ་ཚིག་ཆེན་པོའི་དུས་ལ་བབ། །སྲོག་གི་གཤེད་དུ་བསྐུལ་བ་ནི། །བདུད་རྒྱལ་ཐོད་པའི་འཕྲེང་བ་ཅན། །སྐུ་ནི་མཐིང་ནག་ཆེན་པོ་ལ། །ཆིབས་སུ་བདུད་རྟ་ནག་པོ་ཆིབས། །ལྕགས་མདུང་ནག་པོ་གཡས་ན་ཐོགས། །གཡོན་ན་ཐོད་པའི་འཕྲེང་བ་བགྲང་། །ཐོད་པ་སྐམ་པོའི་དབུ་རྒྱན་ཅན། །མི་ལྤགས་རློན་པ་སྐུ་ལ་གསོལ། །རྒྱུ་མ་སྦྲུལ་གྱིས་ལུས་བརྒྱན་ཅིང་། ཁྲག་དང་ཞག་གི་ཐིག་ལེ་ཅན། །མཆེ་བ་གཙིགས་ཤིང་གསུསཔོཆེ། །ཙིསྟའིཁྲག་ལ་ལོངས་སྤྱོད་པས། ཁྱོད་ནི་སྲོག་བདག་ཆེན་པོ་སྟེ། །སྲིང་ཅིག་རྡོ་རྗེ་རེ་མ་ཏི། །མིང་སྲིང་གཉིས་ཀྱི་དམ་བཅས་པ། །དམ་བཅས་བཞིན་དུ་ཕྲིན་ལས་མཛོད། །སྔོན་ཚེ་དཔལ་ཆེན་ཧེ་རུ་ཀས། །དབང་རྟགས་ཐོད་པ་བྱིན་ནས་ནི། །བཀའ་སྩལ་དམ་ཕོག་མཛད་པའི་ཚེ། །དེ་ཚེ་ཁས་བླངས་དམ་བཅས་པ། །བསྒྲུབ་མཆོག་བསྐྱང་བར་དམ་བཅས་ཤིང་། །དགྲ་བོ་བསྒྲལ་བར་ཁས་བླངས་པས། །དམ་ཉམས་བསྒྲལ་པའི་དུས་ལ་བབ། ཁྱོད་ནི་སྲོག་བདག་ཆེན་པོ་སྟེ། །དགྲ་བོའི་སྲོག་ལ་མངའ་ཐང་མཛོད། །སྲོག་དབུག་ལོང་ཞིག་ས་མ་ཡ། །སྲོག་རྩ་ཆོད་ཅིག་ས་མ་ཡ། ཁྱོད་ཀྱི་ཟས་སྐལ་ཁམས་གསུམ་ཤ་ཡིན་ཏེ། །དམ་ཉམས་ཤ་ནི་ཟན་དུ་གསོལ། །དགྲ་བོའི་ཤ་ལ་ཁ་ར༷་ཁུ་ཧི། །ཟོ་ཞིག་ཆོ་ཞིག་ཐོད་འཕྲེང་ཅན། ཁྱོད་ཀྱི་སྐོམ་ནི་སྐྱེ་འགྲོའི་ཁྲག་ཡིན་ཏེ། །དགྲ་བོའི་ཁྲག་ནི་སྐོམ་དུ་གསོལ། །དགྲ་བོའི་ཁྲག་ལ་པི་པ་ཏོ། །འཐུང་ཞིག་འཐུང་ཞིག་ཐོད་འཕྲེང་ཅན། ཁྱོད་ནི་དམག་དཔོན་ཆེན་པོ་སྟེ། །ས་ཞི་ཐམས་ཅད་དམག་གིས་ཁེངས། །དགྲ་བོའི་ཡུལ་དུ་དམག་འདྲེན་གྱིས། དམག་སྣ་དྲོངས་ཤིག་ཐོད་འཕྲེང་ཅན། །དམག་གཞུག་རྟུལ་ཅིག་ཐོད་འཕྲེང་ཅན། །གོ་མཚོན་སྟོར་ཅིག་ཐོད་འཕྲེང་ཅན། །དམག་དཔུང་སྐྱེད་ལ་རུ་མཚོན་ཕྱོར། །དགྲ་བོའི་ཡུལ་དུ་དམག་དྲོངས་ལ། །དམ་ཉམས་དགྲ་པོའི་བླ་མཁར་ཤིག །བླ་ཤིང་ཆོད་ལ་བླ་རྡོ་རྐུས། །བླ་ཆུ་ཧུབ་ཀྱི་ཐོབ་ལ་ཤོག །ཁྱོད་ཀྱི་དམ་ཚིག་དུས་ལ་བབ། །དུས་ལ་བབ་བོ་ས་མ་། །མ་གཡེལ་བཅོལ་བའི་འཕྲིན་ལས་མཛོད། །དེ་སྐད་ཅེས་ནི་བསྐུལ་བྱ་བ། །དེ་ནས་ཕོ་ཉ་རབ་བཀྱེ་བ། ཁྲེས་པ་ལིང་ག་དག་ལ་བསྟིམ། །ཧཱུཾ༷། དེ་ཡི་ཐུགས་ཀྱི་སྤྲུལ་པ་ལས། །བཀའ་ཉན་ཕོ་ཉའི་ཚོགས་ཆེན་། །སྟེང་གི་ཕྱོགས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་ཁྲོ་བདག་འབར་བ་རྗེ། །ཕྱག་ན་བདུད་ཀྱི་སྤར་ཤད་འབར་བ་བསྣམས། །སྟེང་གི་ཕྱོགས་ནས་དགྲ་བོ་ཁུག་ལ་ཤོག །བཱ་ར་ཡ་ཛ༷༷ཛ༷༷ ཆེ་གེ་མོ་ནཱ་་ན་སྒ་བུ་ནན་ཛ༷༷ཛ༷༷ །ཏཱ༷། ཤར་གྱི་ཕྱོགས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་མ་ཧྭ་ཁྲོ་བདག་རྗེ། །ཕྱག་ན་བདུད་ཞགས་ནག་པོ་བསྣམས། །ཤར་གྱི་ཕྱོགས་ནས་དགྲ་བོ་ཁུག་ལ་ཤོག །ཧཱུཾ༷། ཤར་ལྷོ་མཚམས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་ཏི་ཏི་ཏི་མྱག་རྗེ། །ཕྱག་ན་བདུད་ཀྱི་གསོད་བྱེད་སྤུ་གྲི་རྣོན་པོ་བསྣམས། ཤར་ལྷོ་མཚམས་ནས་དགྲ་བོ་ཁུག་ལ་ཤོག །ཧཱུཾ༷། ལྷོ་ཡི་ཕྱོགས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་ཁྲོ་བདག་ཐོད་པ་རྗེ། །ཕྱག་ན་བདུད་ཁྲམ་སྟག་གི་མགོ་ཅན་བསྣམས། །ལྷོ་ཡི་ཕྱོགས་ནས་དགྲ་བོ་ཁུག་ལ་ཤོག །ཧཱུཾ༷། ལྷོ་ནུབ་མཚམས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་དམུ་བདུད་བྲང་དཀར་རྗེ། །ཕྱག་ན་ཤོད་ཀྱི་སྒྲོ་བ་མི་འགྲོ་ཅན། ཁལ་དུ་བོང་བུ་གྭ་པ་ལྕགས་མཐུར་ཅན་ལ་བསྐྱིལ། །ལྷོ་ནུབ་མཚམས་ནས་དགྲ་བོ་ཁུག་ལ་ཤོག །ཧཱུཾ༷། ནུབ་ཀྱི་ཕྱོགས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་ཚངས་པ་བདུད་ཁྲོ་རྗེ། །ཕྱག་ན་བདུད་ཀྱི་དྲིལ་ཞགས་འབར་བ་བརྣམས། །ནུབ་བྱང་ཕྱོགས་ནས་དགྲ་བོ་ཁུག་ལ་ཤོག །ཧུ༷། ནུབ་བྱང་མཚམས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་ཏིང་རི་མགོ་སྟོན་རྗེ། །ཕྱག་ན་བདུད་ཤ་ནག་པོའི་ཐོད་པ་བསྣམས། །ནུབ་བྱང་མཚམས་ནས་དགྲ་བོ་ཁུག་ལ་ཤོག ཧཱུཾ༷། བྱང་གི་ཕྱོགས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་ཁྲོ་རྗེ་རུ་རྒྱལ་རྗེ། །ཕྱག་ན་བདུད་རྟ་ནག་པོ་མགོ་གཅོད་བསྣམས། །བྱང་གི་ཕྱོགས་ནས་དགྲ་བོ་ཁུག་ལ་ཤོག །ཧཱུཾ༷། བྱང་ཤར་མཚམས་ནས་དགྲ་བོ་འགུགས་བྱེད་པ། །བདུད་ཀྱི་རྒྱལ་པོ་སྤྱི་བདུད་ཡམ་པ་ཁྲོ་རྗེ་ནག་པོ་ཉིད་ཀྱང་བསྟན་པ་བསྲུང་བའི་དོན་དུ་ཉེ་བར་འཁོད་དེ། ལེགས་ཉེས་ཀྱི་གཟུ་བོ་མཛད་དོ། །འཁོར་རྣམས་ཀྱང་གཙོ་བོ་ལ་འདུད་པའི་ཚུལ་གྱིས་གནས་པར་གྱུར་ཏོ། ། བདུད་ཁྲོས་པ་ཐོད་པའི་འཕྲེང་བ་ཅན་གསང་བའི་རྒྱུད་ཅེས་བྱ་བ་རྫོགས་སོ།། །། རྒྱ་གར་སྐད་དུ། ཙིལྟི་ཐུན་ཀྭ་ལ་ནཱ་མ་ཏནྟྲ། བོད་སྐད་དུ། སྙིང་ཟོར་ནག་པོའི་རྒྱུད་ཅེས་བྱ་བ། དཔལ་ལྡན་རྡོ་རྗེ་འཛིན་པ་ལ། །སྒོ་