Ngb-pt-0820-vol-09-text
Front[edit]
Body[edit]
རྒྱ་གར་སྐད་དུ། ཡཀྟ་ཨ་པ་ར་ཙིསྟ་གུ་ཎ་རྒྱུ་ཧ་རྭ་ཛ་ཏནྟྲ་ནཱ་མ། བོད་སྐད་དུ། གནོད་སྤྱིན་ཨ་པ་ར་ཙིསྟ་ཡོན་ཏན་བཀོད་པའི་རྒྱུད་ཀྱི་རྒྱལ་པོ་ཞེས་བྱ་བ། བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་ཉི་ཟླ་གསང་བའི་རྒྱུད་ལས་ཐོས་པའི་དུས་གཅིག་ན། གསང་བའི་བདག་པོས་བཀའ་སྩལ་པ། །ཨེ་མ་ངོ་མཚར་རྨད་དུ་བྱུང་། །རྒྱུད་ཀྱི་ཡོན་ཏན་བསམ་མི་ཁྱབ། །ནོར་ལྷའི་ནུས་པ་བརྗོད་མི་ལང་། །ཐམས་ཅད་དབང་དུ་འདུ་བས་ན། །དབང་ཆེན་དབང་ཕྱུག་འཁོར་ལོས་སྒྱུར། །འདི་གྲུབ་ཡོན་ཏན་བསམ་མི་ཁྱབ། །ལྷ་འདྲེ་མི་གསུམ་དབང་དུ་འདུས། །ཁམས་གསུམ་འཁོར་བའི་འཇིག་རྟེན་ན། །དབང་དུ་མི་འདུ་གང་ཡང་མེད། །དཔེར་ན་ནམ་ལ་དབྱར་གྱི་དུས། ཁྲ་རུས་དག་ལ་སྦྲང་འདུ་བཞིན། །མི་ནོར་ཐམས་ཅད་དབང་དུ་འདུ། །སེམས་ཅན་ཀུན་གྱི་ཡིད་ཀྱང་འཕྲོག །ཐམས་ཅད་དགའ་ཞིང་དད་པ་སྐྱེ། །ཀུན་གྱི་སྙིང་དགའ་ཡིད་དུ་འོང་། །བཟའ་བཏུང་ནོར་དང་ལོངས་སྤྱོད་རྣམས། །རྣལ་འབྱོར་པ་ལ་ཐམས་ཅད་འདུ། །བསོད་ནམ་རི་རྒྱལ་ལྷུན་པོ་འདྲ། །ཚེ་ཡང་བསྐལ་པ་བདུན་དུ་ཐུབ། །གཟི་བརྗིད་ཉི་མའི་འོད་དང་མཉམ། །ལྷ་མོ་ཀླུ་མོ་གནོད་སྤྱིན་མོ། །མི་ལ་སོགས་པའི་བུ་མོ་རྣམས། །བདག་ལ་ཤིན་ཏུ་ཆགས་པར་འགྱུར། །མཁའ་འགྲོ་མ་ཚོགས་ཐམས་ཅད་ཀྱང་། །བུ་གཅིག་པུ་ཡི་མ་བཞིན་བྱམས། །ལྷ་ཀླུ་གནོད་སྤྱིན་འབྱུང་པོ་ཡང་། །གཙུག་གི་ནོར་བུ་རིན་ཆེན་ལྟར། །བདག་ལ་རྟག་ཏུ་སྤྱི་བོས་འཁུར། །བདུད་དང་སྲིན་པོ་ལ་སོགས་པ། །འཇིག་རྟེན་དྲེགས་པའི་ལྷ་འདྲེ་ཡང་། །བྲན་བཞིན་ཅི་བཅོལ་ལས་རྣམས་བྱེད། །དེ་ཕྱིར་རྟག་ཏུ་བརྩོན་པར་བྱ། །ཞེས་གསུངས་སོ། །དེ་ནས་ཡང་རིན་པོ་ཆེ་གསང་རྒྱུད་ལས་འདི་སྐད་ཐོས་ཏེ། གསང་བའི་བདག་པོས་བཀའ་སྩལ་པ། །རྒྱུད་འདིའི་ཡོན་ཏན་བསམ་མི་ཁྱབ། །ཐམས་ཅད་འདུ་བར་འགྱུར་བ་ཡིན། །ལྷ་འདྲེ་མི་གསུམ་དབང་དུ་འདུ། །དེས་ན་བསོད་ནམས་སྐྱེད་པ་ཡིན། །གང་ན་འདུག་པའི་ས་ཕྱོགས་དེར། །དགྲ་ཡི་གནོད་པ་མི་འབྱུང་ངོ་། །རྐྱེན་གྱི་སྦྱོར་བ་ཞི་བ་དང་། །ཁྲོས་པས་ཐམས་ཅད་འཆི་བར་འགྱུར། །སུམ་ཅུ་རྩ་གསུམ་ལྷ་དང་མཉམ། །ལྷ་མ་ཡིན་གྱི་ལོངས་སྤྱོད་དང་། །རིན་ཆེན་གཏེར་རྣམས་བདག་ལ་སྟེར། །ཐ་སྐད་དྲི་མེད་ལྷ་མོ་ཡང་། །བདག་ལ་ཆགས་འགྱུར་དངོས་གྲུབ་ཐོབ། །དེ་བས་དེ་མཐོང་ངོ་མཚར་ཆེ། །འདི་གྲུབ་ཡོན་ཏན་བསམ་མི་ཁྱབ། །དེ་ཕྱིར་རྒྱུད་འདི་བཅང་བར་བྱ། །ཞེས་གསུངས་སོ། །དེ་ནས་ཡང་འབྱུང་པོ་འདུལ་བྱེད་ཀྱི་རྒྱུད་ལས་འདི་སྐད་ཐོས་ཏེ། །གསང་བའི་བདག་པོས་བཀའ་སྩལ་པ། །གང་ཞིག་འདི་ལ་སུ་དད་པ། །འཛིན་ནམ་འཆང་ངམ་ཀློག་པ་དང་། །རྗེས་སུ་སྒྲུབ་པར་བྱེད་པ་དེ། །མི་ཟད་གཏེར་ལ་ལོངས་སྤྱོད་དང་། །ནོར་གྱི་བདག་པོར་ཐེ་ཚོམ་མེད། །གང་ཞིག་ཐེ་ཚོམ་མི་ཟ་བར། །འདི་ལ་མངོན་པར་བརྩོན་འགྱུར་ན། །ལྷ་ཡི་དབང་པོའི་རྒྱལ་སྲིད་ཀྱང་། །དངོས་སུ་འགྲུབ་པར་ལུང་བསྟན་ན། །མི་ཡི་རྒྱལ་སྲིད་སྨོས་ཅི་དགོས། །ཚངས་པ་དང་ནི་བརྒྱ་བྱིན་གྱི། །བུ་མོ་ཐ་སྐར་དྲི་མེད་དང་། །སྲོག་དཀར་ལྷ་ཡི་བུ་མོ་ཡང་། །བདག་ལ་ཤིན་ཏུ་ཆགས་གྱུར་ན། །མི་ཡི་བུ་མོ་སྨོས་ཅི་དགོས། །ཉ་ཟླ་ལ་སོགས་གཟའ་བརྒྱད་ཀྱིས། །དེ་ཡི་གཟི་བརྗིད་མི་ཐུབ་ན། །ཁམས་གསུམ་སྐྱེ་བོས་སྨོས་མི་དགོས། །འཆི་བདག་བདུད་ཀྱི་ཚོགས་ཀྱིས་ཀྱང་། །དེ་ལ་བར་ཆོད་མི་ནུས་ན། །ལོག་འདྲེན་བགེགས་ཀྱིས་སྨོས་ཅི་དགོས། །འཇིག་རྟེན་གསུམ་ན་གནས་པ་ཡི། །སྐྱེ་འགྲོ་ཐམས་ཅད་དབང་འདུས་ན། །ནོར་དང་ལོངས་སྤྱོད་སྨོས་ཅི་དགོས། །འདོད་ཡོན་ལྔ་ལ་ལོངས་སྤྱོད་དང་། །ཅི་བསམ་ལྷུན་གྱིས་གྲུབ་པ་ཡི། །དངོས་གྲུབ་ཆེན་པོ་ཐོབ་འགྱུར་ན། །བཟའ་བཏུང་ཡོ་ལང་སྨོས་ཅི་དགོས། །དེས་ན་འདི་ལ་ནན་ཏན་བྱ། །ཞེས་གསུངས་སོ། །དེ་ནས་ཡང་སྲོག་རྩ་མངོན་ཆུང་གི་རྒྱུད་ལས་འདི་སྐད་ཐོས་ཏེ། གསང་བའི་བདག་པོས་བཀའ་སྩལ་པ། ཨེ་མ་ཧོ། །རྒྱུད་ཆེན་རྒྱལ་པོ་འདི་ལྟ་བུ། །འདས་པའི་སངས་རྒྱས་རྣམས་ཀྱིས་ཀྱང་། །འཇིག་རྟེན་འདི་རུ་སྔར་མ་གསུངས། །མ་འོངས་སངས་རྒྱས་ཐམས་ཅད་ཀྱང་། །ཕྱིན་ཅད་གསུང་བར་ཡོངས་མི་འགྱུར། །དེ་ལྟར་སངས་རྒྱས་ཐམས་ཅད་ལ། །ང་ཡིས་བཤད་པ་མ་གཏོགས་པ། །གཞན་གྱིས་གསུངས་པ་ཡོད་མ་ཡིན། །བསམ་འཕེལ་ནོར་བུ་རིན་ཆེན་ལྟར། །འཇིག་རྟེན་ཁམས་ན་ཤིན་ཏུ་དཀོན། །འདི་ཡི་ཡོན་ཏན་བསམ་མི་ཁྱབ། །རྒྱུད་འདི་ཕྱོགས་བཅུ་གར་གནས་པས། །ནོར་ལྷའི་ཚོགས་ཀྱང་དེ་ན་གནས། །ནོར་ལྷ་གང་ན་གནས་པ་ན། །མི་ཟད་གཏེར་ཡང་དེ་ན་ཡོད། ཁུད་འདི་འཛིན་ནམ་འཆང་བ་དང་། །ཀློག་དང་ཁ་དོན་བྱེད་པ་དང་། །བསྒྲུབ་ཅིང་མཆོད་པར་བྱེད་པ་དེ། །མི་ཟད་གཏེར་ལ་ལོངས་སྤྱོད་ཅིང་། །དུས་གསུམ་སངས་རྒྱས་བྱིན་གྱིས་རློབ། །ལྷ་སྲིན་སྡེ་བརྒྱད་སྲུང་ཞིང་སྐྱོབ། །ནོར་ལྷའི་ཚོགས་ཀྱང་དངོས་གྲུབ་སྟེར། །ཐམས་ཅད་མོས་ཤིང་གུས་པར་འགྱུར། །ལྷ་འདྲེ་མི་གསུམ་དབང་དུ་འདུ། །འདོད་ཡོན་ལྔ་ལ་ལོངས་སྤྱོད་དང་། །ཅི་བསམ་ཐམས་ཅད་འགྲུབ་པར་འགྱུར། །ལྷ་མ་ཡིན་གྱི་ལོ་ཐོག་དང་། །རིན་ཆེན་གཏེར་རྣམས་བདག་ལ་སྟེར། །ཐ་སྐར་དྲི་མེད་ལྷ་མོ་ཡང་། །བདག་ལ་ཤིན་ཏུ་ཆགས་པར་འགྱུར། །སྒྲུབ་པ་པོ་ནི་གང་གནས་ཀྱང་། །དགྲ་ཡི་གནོད་པ་མི་འབྱུང་ངོ་། །ཁྲོས་པས་ཐམས་ཅད་འཆི་བར་འགྱུར། །འདི་ནི་བཟླས་པ་ཙམ་གྱིས་ཀྱང་། །གླིང་བཞིའི་འཇིག་རྟེན་མི་སེམས་སྒུལ། །ནོར་དང་ལོངས་སྤྱོད་ཆར་བཞིན་འབབ། །བཟའ་བཏུང་བར་སྣང་སྤྲིན་ལྟར་འདུ། །སུམ་ཅུ་རྩ་གསུམ་གནས་སུ་སྐྱེས། །ལྷ་ཡི་རྒྱལ་པོས་དབང་བསྐུར་ཞིང་། །ཚེ་ཡང་བསྐལ་པ་དྲུག་ཏུ་ཐུབ། །ཡི་དྭགས་གནས་སུ་ཡོངས་མི་སྐྱེ། །དེ་ཕྱིར་བསྒྲུབ་ལ་བརྩོན་པར་བྱ། །ཞེས་གསུངས་སོ། །དེ་སྐད་ཅེས་བཀའ་སྩལ་པ་དང་། །འཇིག་རྟེན་གྱི་ཁམས་ཀྱང་རྣམ་པ་དྲུག་ཏུ་གཡོས་ཤིང་། ནམ་མཁའ་ལས་རིན་པོ་ཆེའི་ཆར་ཆེན་པོ་ཡང་བབས་སོ། །འཇིག་རྟེན་གྱི་ཁམས་ན་སེམས་ཅན་དམུས་ལོང་ཇི་སྙེད་ཅིག་ཡོད་པ་དེ་དག་ཐམས་ཅད་ནི་མིག་དང་ལྡན་པར་གྱུར་ཏོ། །འོན་པ་རྣམས་ཀྱང་སྒྲ་ཐོས་པར་གྱུར་ཏོ། །ཞ་བོ་རྣམས་ཀྱང་འགྲོ་ཤེས་པར་གྱུར་ཏོ། །ལྐུག་པ་རྣམས་ཀྱང་སྨྲ་ཤེས་པར་གྱུར་ཏོ། །སེམས་ཅན་དབུལ་ཞིང་ལོངས་སྤྱོད་ཆུང་བ་རྣམས་ཀྱང་འབྱོར་པ་དང་ལྡན་པར་གྱུར་ཏོ། །དེ་ནས་འཁོར་ཐམས་ཅད་རྗེས་སུ་ཡི་རང་ནས། །བཅོམ་ལྡན་འདས་གསང་བའི་བདག་པོ་ལ་བསྟོད་པ། །བཅོམ་ལྡན་དཔའ་བོ་རྡོ་རྗེ་འཆང་། །རྟོག་མེད་སྤྲོས་བྲལ་ཆོས་སྐུ་ལ། །ལོངས་སྤྱོད་རྫོགས་པའི་སྐུར་བསྟན་ནས། །བདུད་འདུལ་དོན་མཛད་ཁྱོད་ལ་འདུད། །སེམས་ཅན་བདེ་ལ་དགོད་པའི་ཕྱིར། །བདག་ཅག་འདུས་པའི་འཁོར་རྣམས་ལ། །རྒྱུད་ཆེན་གསུངས་པ་ཡི་རང་ངོ་། །ཞེས་རྗེས་སུ་ཡི་རང་བར་གྱུར་ཏོ། །གནོད་སྤྱིན་ཡོན་ཏན་བཀོད་པའི་རྒྱུད་ཀྱི་རྒྱལ་པོ་ཞེས་བྱ་བ་རྫོགས་སོ། །རྒྱ་རྒྱ་རྒྱ།། །།