volume 022 489

༄༅། །རྫོགས་པ་ཆེན་ངལ་གསོ་སྐོར་གསུམ་གྱི་དཀར་ཆག་པདྨ་« »སྟོང་ལྡན་ཞེས་བྱ་བ་བཞུགས་སོ།« »།

«རྫོགས་པ་ཆེན་པོ་ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་བཀྲ་ཤིས་ཡོན་ཏན་མཚོ་ཆེན་ལྡན། །བྱང་ཆུབ་ཡིད་བཞིན་ཀླུ་དབང་སྙིངཔོའི་ གནས། ། ཟབ་ཅིང་རྒྱ་ཆེ་ཆོས་ཀྱིས་ཡོངས་གང་བ། །ཀུན་བཟང་ཆོས་རྗེ་བླ་མའི་ཞབས་ལ་འདུད། །རྒྱལ་བས་གསུངས་པའི་ཆོས་ཚུལ་དཔག་མེད་ལས། ། སྙིང་པོའི་དོན་ཀུན་ཡང་ནས་ཡོངས་བསྡུས་པས། །ངལ་གསོ་སྐོར་གསུམ་རིན་ཆེན་ཆོས་ཀྱི་མཛོད། །དེ་ཡི་དཀར་ཆག་ངེས་པ་འདིར་གསལ་བྱ། །ངལ་གསོ་སྐོར་གསུམ་ཤིང་རྟ་སྐོར་གསུམ་དང། ཕྲེང་བ་སྐོར་གསུམ་ཁྲིད་ཡིག་སྐོར་གསུམ་དང༌། །ལེགས་བཤད་རྒྱ་མཚོ་པདྨ་དཀར་པོ་དང། །དཀར་ཆག་ཉིད་དང་རྣམས་གྲངས་བཅོ་ལྔ་གནས། །དེ་དག་སོ་སོའི་དགོས་ཆེད་བསྟན་པ་ནི། ། ལེགས་བཤད་རྒྱ་མཚོས་ཆོས་སྤྱིའི་དོན་རྣམས་བསྟན། །ཐེག་པའི་བབས་དང་ཆོས་ཀྱི་བྱུང་ཚུལ་དང། །ཇི་ལྟར་བཤད་ཚུལ་མ་རིག་མུན་པ་སེལ། །བཤད་པའི་སྒྲོམ་བུ་འདི་ཀུན་མཆོག་ཏུ་གཅེས། །སྡེ་ཚན་དང་པོ་སེམས་ཉིད་ངལ་གསོ་ལ། ལུས་དང་ཡན་ལག་བྱེ་བྲག་བསྟན་པ་ནི། །ངལ་གསོ་ལུས་ཏེ་འབྱེད་འབྲེལ་ཡན་ལག་གོ །སེམས་ཉིད་ངལ་གསོ་ཐེག་ཆེན་སྙིང་པོའི་གཞི། །ངོ་བོ་རང་བཞིན་གནས་ཚུལ་རྒྱས་པར་བསྟན། །ཐོག་མ་བར་དང་ཐ་མའི་ལམ་རིམ་རྣམས། །ཚང་ལ་མ་ནོར་ངེས་དོན་སྙིང་པོ་ཡིན། །ལེའུ་བཅུ་གསུམ་གཞུང་གི་རང་ལུས་རྫོགས། །དེ་ཡི་བསྡུ་དོན་ཀུནྡའི་ཕྲེང་བ་ཡིས། །སྡེ་ཚན་འབྱེད་འབྲེལ་ཤིན་ཏུ་གསལ་བར་བྱས། །མཐོང་བ་ཙམ་གྱིས་གནས་རྣམས་རྟོགས་པས་ན། ། འབྱེད་འབྲེལ་ལྡེ་མིག་མཆོག་ཏུ་བཟང་པོ་ཡིན། །ཤིང་རྟ་ཆེན་པོ་་སེམས་ཉིད་ངལ་གསོའི་གནས། །རྒྱ་ཆེར་འགྲེལ་པས་ཀུན་ཏུ་མཐའ་ཡས་ཉིད། །ཚིག་དོན་འབྱམས་ཀླས་རླབས་ཆེན་གནས་སྟོན་པས། །ཟབ་ཅིང་རྒྱ་ཆེ་འཇུག་ངོགས་ཆེན་པོ་ཡིན། །དེ་ཡི་བསྡུས་དོན་པདྨ་དཀར་པོ་ཡིས། །སྔ་ཕྱིའི་གནས་དང་དོན་གྱི་ངོ་བོ་རྣམས། །སོ་སོར་འབྱེད་འབྲེལ་དོན་ཀུན་གསལ་བྱེད་ཡིན། །འབྲེལ་བཤད་གནས་སུ་འདི་ཀུན་གཅེས་པས་ཟུང། །ངལ་གསོའི་དོན་ཁྲིད་བྱང་ཆུབ་ལམ་བཟང་གིས། །སྐལ་བཟང་རིགས་གསུམ་ཐར་པའི་ལམ་ལ་འདྲེན། །དགེ་བ་གསུམ་གྱི་གནད་གསུམ་སྙིང་པོ་ཅན། །མེད་ཐབས་མེད་པས་དད་བརྒྱའི་གཙུག་གིས་གཟུང། །དེ་དག་་ཀུན་གྱིས་སེམས་ཉིད་ངལ་གསོའི་སྐོར། །ལུས་དང་ཡན་ལག་བྱེ་བྲག་རྫོགས་པར་བསྟན། །སྡེ་ཚན་གཉིས་པ་བསམ་གཏན་ངལ་གསོ་ལ། །ལུས་དང་ཡན་ལག་བྱེ་བྲག་བསྟན་པ་ནི། །ངལ་གསོ་ལུས་ཞེས་གཞན་རྣམས་ཡན་ལག་གོ །བསམ་གཏན་ངལ་གསོ་ཏིང་འཛིན་འོད་གསལ་ལམ། །ཇི་ལྟར་བསྒོམ་ཚུལ་ཡང་ཟབ་གནད་རྣམས་བསྟན། །རྡོ་རྗེའི་གནས་གསུམ་་དེ་ཡི་གཞུང་ཚད་རྫོགས། །གསང་ཆེན་གནས་འདི་ཤིན་ཏུ་ཟབ་པས་ ན། །སྐལ་བཟང་རྣམས་ཀྱིས་རྟག་ཏུ་གཅེས་སྤྲས་མཛོད། དེ་ཡི་བསྡུས་དོན་པུནྜ་རཱི་ཀ་ཡིས། །སོ་སོའི་ཚིག་དོན་ཤིན་ཏུ་གསལ་བར་བྱེད། །ཚིག་ཉུང་་དོན་འགྲེལ་གོ་ཞིང་རྟོགས་པ་སླ། །དེ་ཕྱིར་དེ་ཡི་གནས་ལ་ཤིན་ཏུ་གཅེས། །ཤིང་རྟ་རྣམ་དག་བསམ་གཏན་ངལ་གསོའི་གནས །རྒྱ་ཆེར་འགྲེལ་པས་ཚིག་དོན་གསལ་བར་བྱས། །ཡང་ཟབ་གནད་དང་ལུང་གི་གནས་གསལ་བས། །ངེས་ཤེས་སྐྱེ་ཞིང་གཞན་ལས་མཆོག་ཏུ་འཕགས། །དེ་དག་དོན་ཁྲིད་སྙིང་པོ་བཅུད་བསྡུས ཀྱིས། །ཡང་ཟབ་བསྒོམ་པ་འོད་གསལ་སྙིང་པོ་བསྟན། །གནད་ལས་ཏིང་འཛིན་མངོན་དུ་བྱེད་པའི་ཕྱིར། མེད་ཐབས་མེད་དོ་རྟག་ཏུ་གུས་པས་གཟུང༌། །དེ་དག་ཀུན་གྱིས་བསམ་གཏན་ངལ་གསོའི་སྐོར། །ལུས་དངཡན་ལག་བྱེ་བྲག་རྫོགས་པར་བསྟན། །སྡེ་ཚན་གསུམ་པ་སྒྱུ་མ་ངལ་གསོ་ལ། །ལུས་དངཡན་ལག་བྱེ་བྲག་བསྟན་པ་ནི། །ངལ་གསོ་ལུས་ཡིན་འབྱེད་འབྲེལ་དོན་ཁྲིད་བཅས། །དེ་ཡི་ཡན་ལག་ཕྲན་བུ་འཕྲོས་ཏེ་བསྟན། །སྒྱུ་མ་ངལ་གསོས་སྤྱོད་པ་རྣམས་སྦྱོང་སྟེ། །གཉིས་་འཛིན་བདེན་ཞེན་འཆིང་བ་གཅོད་པར་ བསྟན། །ལེའུ་བརྒྱད་ཀྱིས་དེ་ཡི་གཞུང་ཚད་རྫོགས། །ཐར་ལམ་བགྲོད་ལ་འདི་ཉིད་མེད་ཐབས་མེད། །དེ་ཡི་བསྡུ་ས་དོན་མནྡཱར་བ་ཡིས། །རིག་པའི་གནས་རྣམས་རབ་ཏུ་གསལ་བར་བྱེད། སྐྱེས་བུའི་བཞིན་ལ་མེ་ལོང་བསྟན་པ་ བཞིན། །དེ་ཉིད་རྟོགས་པའི་གནས་སུ་གཅེས་པས་གཟུང༌། །ཤིང་རྟ་བཟང་པོས་སྒྱུ་མ་ངལ་གསོའི་གནས། །མ་ལུས་རང་བཞིན་རྒྱ་ཆེར་འགྲེལ་པས་ ན། །བློ་གྲོས་སྣང་བ་རབ་ཏུ་རྒྱས་བྱེད་ཡིན། །དེ་དག་དོན་ཁྲིད་ཡིད་བཞིན་ནོར་བུ་ཡིན། །བླང་དོར་གཉིས་མེད་སྒྱུ་མ་མངོན་སུམ་ལམ། །བདེན་མེད་རྟོགས་པས་འཁོར་བའི་འཕྲུལ་སྣང་འཇིག» «།ཡང་དག་སྒྱུ་མ་འོད་གསལ་དོན་སྟོན་པས། །ཟབ་མོའི་གནས་འདི་གུས་པས་གཅེས་སྤྲས་མཛོད། །དེ་དག་ཀུན་གྱིས་སྒྱུ་མ་ངལ་གསོའི་སྐོར། །ལུས་དང་ཡན་ལག་བྱེ་བྲག་རྫོགས་པར་བསྟན། ། རྒྱལ་བས་ཆོས་ཚུལ་རིན་ཆེན་སྙིང་པོའི་དོན། །མ་ལུས་གཅིག་བསྡུས་ངལ་གསོ་སྐོར་གསུམ་གྱི། །ལུས་དང་ཡན་ལག་དཀར་ཆག་བསྟན་པ་ཡིས། །མ་ལུས་འགྲོ་ཀུན་མངོན་པར་སངས་རྒྱས་ཤོག» «།ཚུལ་འདི་ཐེག་མཆོག་སྙིང་པོའི་རྣལ་འབྱོར་པ། །དྲི་མེད་འོད་སྟོང་ཉིན་མོར་བྱེད་པ་དེས། །གངས་རི་ཐོད་དཀར་མགུལ་དུ་ལེགས་པར་བཀོད། །དད་ལྡན་སྐྱེ་བོའི་ཚོགས་རྣམས་དགའ་བར་མཛོད། །རྫོགས་པ་ཆེན་པོ་ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན་ཞེས་བྱ་བ། མང་དུ་ཐོས་པའི་རྣལ་འབྱོར་པ་དྲེ་མེད་འོད་ཟེར་གྱིས་ཀུན་དུ་བཟང་པོའི་ཁང་བཟངས་སུ་བཀོད་པ་རྫོགས་སོ།། །།དགེའོ༌། །དགེའོ༌། དགེའོ། ། ༈ ཨོཾ་སྭ་སྟི། རྨད་བྱུང་མཁྱེན་རབ་སྤྱན་གྱིས་ཆོས་ཀུན་གཟིགས། །གསང་ཆེན་རྒྱུད་དོན་རྒྱ་མཚོའི་མཛོད་་འཆང་བའི། །ཀུན་མཁྱེན་གཉིས་པ་ཀློང་ཆེན་རབ་འབྱམས་ཀྱི། །བཀའ་དྲིན་བསྟན་འགྲོའི་བླ་རུ་གསལ་འདི་རྨད། །གང་གི་མདོ་སྔགས་ཆོས་ཚུལ་བྱེ་བའི་བཅུད། །རྒྱུ་འབྲས་ཐེག་པ་རྒྱ་མཚོའི་ཟབ་གནད་ཀུན། །འགལ་མེད་ལམ་རིམ་གཅིག་ཏུ་ཡོངས་དྲིལ་ཏེ། །རང་སེམས་འོད་གསལ་སྔགས་ཀྱི་དེ་ཁོ་ན། །ཇི་བཞིན་སྟོན་པའི་ཐབས་ཚུལ་བླ་ན་མེད། ། སེམས་ཉིད་གནས་ལུགས་ངང་དུ་ངལ་གསོའི་གཞུང༌། །གཉུག་མ་རང་གནས་ཟབ་མོའི་ཏིང་ངེ་་འཛིན། །ཇི་བཞིན་སྒོམས་པའི་ལམ་གནད་ནོར་མེད་དུ། ། སྟོན་པ་བསམ་གཏན་ངལ་གསོའི་ལེགས་བཤད་ཕུལ། །ཆོས་ཀུན་བདེན་ཞེན་འཆིང་བ་བཅད་པའི་ཐབས། །སྒྱུ་མའི་དཔེ་བརྒྱད་ལྟ་བུར་སྟོན་པ་ཡི། །སྙིང་པོའི་ནོར་མཆོག་སྒྱུ་མ་ངལ་གསོ་སྟེ། །གཞུང་བཟང་ངལ་གསོ་སྐོར་གསུམ་ཞེས་གྲགས་པ། །ཡན་ལག་བཅས་ཀུན་མི་ཟད་སྤར་གྱི་འཕྲུལ། །སྐུ་གསུང་ཐུགས་ཀྱི་སྣང་བསྙན་གཞི་འདི་ཉིད། །གཅིག་ལས་དུ་མ་འཆར་བར་བྱེད་པའི་ དཔྱིད། །རིག་འཛིན་གར་གྱི་དབང་ཕྱུག་བཞད་པ་རྩལ། །ཐུགས་བསྐྱེད་ཤིན་ཏུ་དཀར་པོས་ཉེ་བར་བསྒྲུབས། །དགེ་དེས་ཡིད་ཅན་སྲིད་པའི་འགྲོ་ཚོགས་ཀྱིས། །རང་གནས་ཆོས་སྐུའི་གནས་ལུགས་མངོན་་སུམ་དུ། །རྟོགས་ཏེ་གདོད་མ་སྐུ་བཞིའི་སར་ཕྱིན་ནས། །ཕྱམ་གཅིག་བྱང་ཆུབ་ཆེན་པོ་བརྙེས་གྱུར་ཅིག» «། ཅེས་ཆོས་རྗེ་བླ་མའི་བཀས་བསྐུལ་ངོར་གུས་འབངས་ཐུབ་བསྟན་སྙན་གྲགས་སམ་རིག་འཛིན་གཞན་ཕན་རྡོ་རྗེས་སྦྱར་བའོ།། །།«མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༢༢༽ ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན།« »- PAGE 364 -

- PAGE 363 -- PAGE 360 -