འཕགས་པ་འཇམ་དཔལ་གྱི་གཏོར་མའི་ཆོ་ག་ཡིད་བཞིན་དཔལ་སྟེར་ཞེས་བྱ་བ་བཞུགས་སོ། །
༄༅། །འཕགས་པ་འཇམ་དཔལ་གྱི་གཏོར་མའི་ཆོ་ག་ཡིད་བཞིན་དཔལ་སྟེར་ཞེས་བྱ་བ་བཞུགས་སོ། །
དེ་ཡང་གྲུབ་པའི་སློབ་དཔོན་འཇམ་དཔལ་བཤེས་གཉེན་གྱིས་བཞེད་པ་ལྟར་ཡིད་བཞིན་ནོར་བུ་ཆེན་པོ་འཆང་སོགས་ཚིགས་སུ་བཅད་པ་གཅིག་གཙོ་བོར་གྱུར་པའི་མན་ངག་གི་གཏོར་མ་འབུལ་ཚུལ་ཉམས་སུ་བླང་བར་འདོད་པས། རིན་པོ་ཆེ་ལ་སོགས་པའི་སྣོད་དུ་གཏོར་ཟླུམ་པད་འདབ་ཀྱིས་སྤྲས་པ་ཁ་ཟས་བཟང་རྒུས་བསྐོར་བ་གཙང་ཞིང་མཛེས་པར་བཤམས་ལ། བྱིན་གྱིས་བརླབ་པ་ནི། གཏོར་མ་བསང་སྦྱང༌། སྟོང་པའི་ངང་ལས་གཏོར་མའི་ནང་དུ་ཨ་ལས་གྱུར་པའི་ཡིད་བཞིན་གྱི་ནོར་བུ་རིན་པོ་ཆེ་ཟླ་བའི་སྟེང་དུ་གནས་པར་བསམ། དེ་ལས་བདུད་རྩིའི་རྒྱུན་དང་འདོད་པའི་ཡོན་ཏན་ཟད་མི་ཤེས་པ་འཕྲོས་པས་ཆོས་ཀྱི་དབྱིངས་ཀུན་ཏུ་རྒྱས་པར་གཏམས་པར་གྱུར། བདག་གི་སྙིང་གའི་དྷཱིཿཡིག་ལས་དཔག་བསམ་གྱི་ཤིང་ནམ་མཁའི་མཐའ་དང་མཉམ་པ་རིན་པོ་ཆེའི་བུམ་པ་བདུད་རྩིས་གང་བའི་རང་བཞིན་ཅན་གྱི་འབྲས་བུ་སྨིན་པ། དེ་ལས་བདུད་རྩི་འཛག་པས་གཏོར་མའི་རྒྱུན་ཡོངས་སུ་རྒྱས་པར་བསམ། དེ་རྣམས་ལས་འོད་ཟེར་འཕྲོས། ཆོས་ཀྱི་དབྱིངས་རབ་འབྱམས་ནས་རང་བྱུང་ཡེ་ཤེས་ཀྱི་བདུད་རྩི་བཀུག་ཏེ་གཏོར་མ་ལ་ཐིམ་པས་གཉིས་སུ་མེད་པར་གྱུར། ཨོཾ་ཨ་ཨཱ་སརྦ་ཏ་ཐཱ་ག་ཏ་ཧྲི་ད་ཡ་ཧ་ར་ཧ་ར་ཨོཾ་ཧཱུྃ་ཧྲཱི༔ བྷ་ག་བཱཾ་ཛྙཱ་ན་མུརྟི་བ་གཱི་ཤྭ་ར་མ་ཧཱ་བཱ་ཙ་སརྦ་དྷརྨ་ག་ག་ནཱ་མ་ལ་སུ་པ་རི་བུདྡྷ་དྷརྨ་དྷཱ་ཏུ་ཛྙཱ་ན་གརྦྷཱ་ཨཱ༔ ཞེས་པའི་བར་དང༌། ཨོཾ་ཨཱ༔ཧཱུྃ༔ ཞེས་པས་བྱིན་གྱིས་བརླབ། རང་གི་སྙིང་གའི་འོད་ཟེར་གྱིས་ཕྱོགས་བཅུ་དུས་གསུམ་གྱི་སངས་རྒྱས་སྲས་དང་འཁོར་དུ་བཅས་པ་དང་ཁམས་གསུམ་གྱི་སེམས་ཅན་ཐམས་ཅད་མ་ལུས་པ་གཏོར་མའི་མགྲོན་དུ་བཀུག་པར་གྱུར། རྡོ་རྗེ་བསྡུ་བའི་ཕྱག་རྒྱ་བཅས། ཨོཾ་བཛྲ་ས་མཱ་ཛ༔ པདྨ་ཀ་མ་ལཱ་ཡ་སྟཾ། གྱིས་གདན་ཕུལ། མགྲོན་དེ་དག་ཐམས་ཅད་ཀྱི་སྙིང་གར་ཨ་ཡིག་བཀོད་པའི་འོད་ཟེར་གྱིས་སྦྱངས་ཏེ་ཐམས་ཅད་འཇམ་དཔལ་དབྱངས་ཀྱི་རང་བཞིན་དུ་གྱུར། དེ་ཐམས་ཅད་ཀྱི་ལྗགས་འོད་ཟེར་གྱི་སྦུ་གུ་གཏོར་མའི་བདུད་རྩིའི་རྒྱུན་ལ་ཟུག་སྟེ་གསོལ་བས་སྐུ་གསུང་ཐུགས་ཀྱི་རྒྱུད་ཡོངས་སུ་མཉེས་པར་བསམ། ཨོཾ་ཨ་ཨཱ་སོགས། གརྦྷ་ཨཱ༔ ཞེས་པའི་བར་གྱི་ཕྲེང་སྔགས་དང༌། ཨ་ཀཱ་རོ་ཕུལ། རང་ལས་སྤྲུལ་པའི་མཆོད་པའི་ལྷ་མོ་དཔག་ཏུ་མེད་པས་མཆོད་པར་གྱུར། ཨོཾ་ཨཱརྻ་མཉྫུ་ཤྲཱི་ཨརྒྷཾ་སོགས་ཀྱིས་མཆོད། གཞོན་ནུའི་སྐུ་ལུས་སོགས་ཀྱིས་བསྟོད། ཡི་གེ་བརྒྱ་པ་བཟླ། བསྔོ་སྨོན་བྱ་ཞིང༌། ཨོཾ་ཨཱཿཧཱུྃ་མུ༔ ཞེས་པས་གཤེགས་སུ་གསོལ་ལོ། །མཆོད་ཕྲེང་ཚེ་ན། འདས་གཏོར་གྱི་བསྟོད་པ་སོང་རྗེས་བཀའ་ཉན་འཇིག་རྟེན་པའི་གཏོར་མ་སྒེར་དུ་གཏོང་ན། ཟུར་དུ་བཤམས་པའི་གཏོར་མ་བསང་སྦྱང༌། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡོངས་ཤིང་རྒྱ་ཆེ་བའི་ནང་དུ་ཨོཾ་ལས་གཏོར་མ་འདོད་པའི་ཡོན་ཏན་ཐམས་ཅད་ཚང་ཞིང་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ་གྱིས་བརླབ། རང་གི་སྙིང་གའི་འོད་ཟེར་གྱིས་འཇིག་རྟེན་དང་འཇིག་རྟེན་པའི་ཚུལ་འཛིན་པ་འཇམ་དཔལ་རྡོ་རྗེའི་བཀའ་དང་དམ་ཚིག་ལ་གནས་པའི་གཏོར་མའི་མགྲོན་ཐམས་ཅད་ཨོཾ་བཛྲ་ས་མཱ་ཛ༔ ལྗགས་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བས་དགྱེས་ཤིང་ཚིམ་པར་བསམ། ཨ་ཀཱ་རོ་ལན་གསུམ་གྱིས་དབུལ། འཇམ་དཔལ་རྡོ་རྗེའི་བཀའ་ཉན་པ། །ཕྱོགས་དུས་གནས་ཤིང་རྒྱུ་བ་ཡི། །སྣང་སྲིད་དྲེགས་པ་ཐམས་ཅད་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག༴ སོགས་སྦྱར། ཨོཾ་ཨཱཿཧཱུྃ་མུ༔ ཞེས་བརྗོད་པས་རང་གནས་སུ་གཤེགས་པར་བསམ་མོ། །ཞེས་པའང་མི་ཕམ་པས་བྲིས་པ་དགེ་ལེགས་འཕེལ་ལོ།། །།