ཆོས་དང་ཆོས་ཉིད་རྣམ་པར་འབྱེད་པའི་བསྟན་བཅོས་རྣམ་པར་བཤད་པའི་རྒྱན་ཅེས་བྱ་བ་བཞུགས།

The printable version is no longer supported and may have rendering errors. Please update your browser bookmarks and please use the default browser print function instead.

{{{1}}}

༄༅། །ཆོས་དང་ཆོས་ཉིད་རྣམ་པར་འབྱེད་པའི་བསྟན་བཅོས་རྣམ་པར་བཤད་པའི་རྒྱན་ཅེས་བྱ་བ་བཞུགས། །^[1]

༄༅། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །རྒྱལ་བའི་ཡོན་ཏན་ལུས་རྫོགས་དབང་བསྐུར་ཞིང་། །ཡེ་ཤེས་རྒྱ་མཚོའི་འཁོར་ལོས་བདུད་ལས་རྒྱལ། །རིགས་ལྡན་འགྲོ་ལ་འཕྲིན་ལས་རྒྱ་མཚོ་སྟོན། །རྒྱལ་སྲས་མ་ཕམ་པ་ལ་ཕྱག་འཚལ་ལོ། །ཆོས་ཉིད་དོན་གཟིགས་སྨོན་ལམ་མཐུ་ལྡན་པས། །བསྟན་པ་གསལ་མཛད་འཕགས་པ་ཐོགས་མེད་དང་། །དབྱིག་གཉེན་ལ་སོགས་བླ་མ་བརྒྱུད་པ་ལ། །གུས་པས་རྟག་ཏུ་ཕྱག་འཚལ་ཅི་ནུས་མཆོད། །ཟབ་མོ་སྐྱེ་བོའི་ཡུལ་ལས་རབ་འདས་པ། །ཆོས་དང་ཆོས་ཉིད་རྣམ་པར་འབྱེད་པ་ཡི། །ཚུལ་འདི་རང་གི་བློ་ལ་སྣང་ཕྱིར་དང་། །ཆོས་ལྡན་རྣམས་ཀྱིས་རྟོགས་པར་བྱ་ཕྱིར་འབད། །ཡང་དག་པར་རྫོགས་པའི་སངས་རྒྱས་ཐུགས་རྗེ་ཚད་མེད་པ་དང་ལྡན་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཀའ་སྩལ་ཞིང་། རྒྱལ་བའི་སྲས་རྣམས་ཀྱིས་ཡང་དང་ཡང་དུ་བཀའ་བསྡུ་བ་མཛད་ཀྱང་། མོས་པ་དམན་པར་གྱུར་བ་རྣམས་ལ་ཐེག་པ་ཆེན་པོའི་སྣང་བ་ཅུང་ཟད་འགྲིབ་པར་གཟིགས་ནས། བྱང་ཆུབ་སེམས་དཔའ་ཆེན་པོ་བྱམས་པས་བྱམས་པའི་ཆོས་ལྔ་པོ་འདི་མཛད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་གསལ་བར་བསྟན་པ་ལ་མངོན་པར་རྟོགས་པའི་རྒྱན་དང་། དང་པོ་དང་བར་ལ་སོགས་པ་ཐམས་ཅད་དུ་མདོ་སྡེ་བསྟན་པ་ཐམས་ཅད་ཀྱི་དོན་གསལ་བར་བྱེད་པ་མདོ་སྡེ་རྒྱན་དང་། མཚན་ཉིད་ནས་ཐེག་པ་བླ་ན་མེད་པའི་བར་གྱི་དོན་སྟོན་པ་དབུས་དང་མཐའ་རྣམ་པར་འབྱེད་པ་དང་། འཁོར་བ་དང་མྱ་ངན་ལས་འདས་པའི་དོན་གསལ་བར་བྱེད་པ་ཆོས་དང་ཆོས་ཉིད་རྣམ་པར་འབྱེད་པ་དང་། བཀའ་ཐ་མ་དང་སངས་རྒྱས་ཀྱི་ཐེག་པ་ཉིད་སྟོན་པའི་མདོ་རྣམས་ཀྱི་དོན་བསྡུས་པ་རྒྱུད་བླ་མ་སྟེ། འདི་རྣམས་མཛད་དོ། །དེ་ཡང་མི་ཡུལ་འདིར་བྱོན་པ་ནི་དེ་བཞིན་གཤེགས་པ་མྱ་ངན་ལས་འདས་ནས་ལོ་བརྒྱད་བརྒྱ་འདས་པའི་དུས་ན། སྔོན་གྱི་སྨོན་ལམ་གྱི་མཐུས་འཕགས་པ་ཐོགས་མེད་དང་དབྱིག་གཉེན། བྲམ་ཟེ་མོ་གསལ་བའི་ཚུལ་ཁྲིམས་ཀྱི་སྲས་སུ་འཁྲུངས་ཏེ། འཕགས་པ་ཐོགས་མེད་ཀྱིས་རི་བོ་བྱ་རྐང་དུ་ལོ་བཅུ་གཉིས་བསྒྲུབ་པར་མཛད་དེ་ཞལ་བསྟན་ནས། དགའ་ལྡན་དུ་བྱོན་ཏེ། མི་ལོ་ལྔ་བཅུའི་བར་དུ་རྣལ་འབྱོར་སྤྱོད་པའི་ས་འབུམ་པ་ལ་སོགས་པ་རྣམས་གསན་ནས། སླར་མི་ཡུལ་དུ་བྱོན་པ་བསྟན་པ་གསལ་བར་མཛད་དེ། ས་སྡེ་ལྔ་དང་། མདོ་སྡེ་རྣམ་པ་གཉིས་ལ་སོགས་པ་བསྟན་པ་མཐའ་དག་བསྡུ་བའི་བསྟན་བཅོས་མཛད་དོ། །དེ་ཡང་འཇམ་དཔལ་རྩ་བའི་རྒྱུད་ལས། ཐོགས་མེད་ཞེས་བྱའི་དགེ་སློང་ནི། །བསྟན་བཅོས་དེའི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །བསྟན་པ་ཡུན་རིང་གནས་བྱའི་ཕྱིར། །མདོའི་དེ་ཉིད་དོན་སྡུད་བྱེད། །ཅེས་ལུང་བསྟན་པ་ཡིན་ནོ། །མཁས་པའི་མཆོག་དབྱིག་གཉེན་གྱིས་ཀྱང་བྱམས་ཆོས་ལ་སོགས་པ་རྣམ་པར་འགྲེལ་པ་དང་། པྲ་ཀ་ར་ན་སྡེ་བརྒྱད་ལ་སོགས་པ་མཛད་དེ། རྒྱ་ཆེ་ཡང་། ཁྱད་པར་དུ་ཆོས་དང་ཆོས་ཉིད་རྣམ་པར་འབྱེད་པ་འདི་ནི། བདེན་པ་གཉིས་ཀྱི་ཚུལ་གསལ་བར་བྱེད་པ་ཆོས་ལྔ་དང་རང་བཞིན་གསུམ་དང་། རྣམ་པར་ཤེས་པ་བརྒྱད་ཀྱི་དེ་ཁོ་ན་ཉིད་རྣམ་པར་མི་རྟོག་པའི་ཡེ་ཤེས་གནས་ཡོངས་སུ་གྱུར་པའི་མིང་ཅན། སངས་རྒྱས་ཀྱི་སྙིང་པོ་ཆོས་ཀྱི་སྐུ་ལ་འཇུག་པའི་ཚུལ་ལམ་འབྲས་བུ་དང་བཅས་པ་གསལ་བར་བྱེད་ཅིང་། ཞར་ལ་ཉན་ཐོས་དང་རང་སངས་རྒྱས་ཐམས་ཅད་ཀྱི་རྣམ་པར་གྲོལ་བ་ཡང་སྟོན་པས། བཀའ་དང་བསྟན་ཆོས་ཐ་དག་ལ་འཇུག་པའི་སྒོ་ལྟ་བུ་ཡིན་པས་འདི་གསལ་བར་སྟོན་པ་ལས་འདི་ལ་གཉིས་ཏེ། ལོ་ཙཱ་བས་སྨོས་པའི་མཚན་ཕྱག་འཚལ་བ་དང་བཅས་པ་དང་། བསྟན་ཆོས་དངོས་སོ། །དང་པོ་ནི། རྒྱ་གར་སྐད་དུ། དྷར་མ་དྷར་མཱ་ཏ་བྷི་བཱ་ཀ། བོད་སྐད་དུ། ཆོས་དང་ཆོས་ཉིད་རྣམ་པར་འབྱེད་པ། བཅོམ་ལྡན་འདས་མ་ཕམ་པ་ལ་ཕྱག་འཚལ་ལོ། །ཞེས་འགྱུར་མཛད་པ་པོ་རྣམས་ཀྱི་བསྟན་བཅོས་ཀྱི་ཀླད་དུ་སྨོས་ཏེ། འདི་ལ་ཡང་། རྒྱ་གར་སྐད་ཀླད་དུ་སྨོས་པས་ཆོས་ལ་ཡིད་ཆེས་སྐྱེ་བ་དང་། སམ་ཀྲི་ཏ་སྐད་ཀྱི་མཆོག་ཡིན་པས་བག་ཆགས་འཇོག་པ་དང་། བྱིན་རླབས་ཆེ་བའི་དགོས་པ་གསུམ་དང་། དེ་བོད་སྐད་དུ་བསྒྱུར་བས་མིང་དོན་གྱི་འབྲེལ་བ་ཤེས། མིང་ལས་དོན་རྟོགས། དོན་ལས་མིང་དྲན་པའི་དགོས་པ་ཡོད་ལ། གཉིས་ཀ་སྦྱར་བས་སྒྲ་ཐད་ལོག་ཤེས་པ་དང་། དོན་མཐུན་པར་ཤེས་པ་དང་། དྲིན་ཆེ་བར་དྲན་པའི་དགོས་པ་ཡོད་དོ། །ཞེས་གསུངས་ཡོད་ཀྱི། བཀའ་བཅད་ལས་ཆོས་གང་བསྒྱུར་བའི་མིང་ཐོག་མར་སྨོས་པ་དང་། ཕྱག་འཚལ་བའི་གོ་རིམ་འདི་ལྟར་གྱིས་ཤིག་ཅེས་ཁྲིམས་སུ་བྱས་པ་ཉིད་པས་འདིར་མང་དུ་མི་བརྗོད་དོ། །འདི་བསྒྱུར་ན་དྷར་མ་ནི་ཆོས་དྷར་མ་ཏ་ནི་ཨ་ཏའི་སྒྲ་ལས་ཆོས་གཉིས་སུ་མེད་པ་སྟེ་ཆོས་ཉིད། བྷི་བཱ་ཀ་ནི་རྣམ་པར་འབྱེད་པ་སྟེ་སྤང་བྱ་དང་གཉེན་པོ་རྣམ་པར་འབྱེད་པ་སྟེ་མཚན་དོན་དང་མཐུན་པར་བརྗོད་པས། འདི་རྒྱས་པར་བཤད་པ་འོག་ནས་འབྱུང་བ་ཉིད་དོ། །ཕྱག་འཚལ་བ་ཡང་། འདིར་ལོ་པན་རྣམས་ཀྱིས། བསྟན་བཅོས་མཛད་པ་པོ་འཕགས་པ་བྱམས་པ་ལ་ལུས་ངག་ཡིད་ཀྱི་སྒོ་ནས་འགྱུར་མཐར་ཕྱིན་པ་དང་། དམ་པའི་ཚུལ་དང་མཐུན་པས་ཕྱག་འཚལ་བའོ། །མ་ཕམ་པ་ཞེས་བྱ་བ་ནི། རྒྱལ་བས་ངའི་འོག་ཏུ་ཁྱོད་སངས་རྒྱས་སུ་འགྱུར་རོ། །ཞེས་ལུང་བསྟན་པས། གནས་གཙང་མ་རྣམས་ཀྱིས། ཁྱོད་ནི་མ་ཕམ་པའོ། །ཞེས་བསྒྲགས་ཏེ་མཚན་གྱི་རྣམ་གྲངས་སོ། །བསྟན་བཅོས་དངོས་ལ་གསུམ་སྟེ། ལུས་རྣམ་པར་གཞག་པ་དང་། དོན་དངོས་དང་། དཔེ་དོན་བསྡུ་བའོ། །དང་པོ་ནི། གང་ཕྱིར་ཤེས་ནས་འགའ་ཞིག་སྤང་བྱ་ཞིང་། གཞན་འགའ་ཞིག་ནི་མངོན་སུམ་ཉིད་བྱ་བ། །དེས་ན་དེ་དག་མཚན་ཉིད་སྒོ་ནས་ནི། །རྣམ་དབྱེ་འདོད་པས་བསྟན་བཅོས་འདི་བྱས་སོ། །ཞེས་གསུངས་ཏེ། འདི་ལ་ཡང་ཁ་ཅིག་མཆོད་པར་བརྗོད་པ་མེད་པའི་བཤད་པར་དམ་བཅའ་བ་འབའ་ཞིག་སྨོས་སྙམ་དུ་རྟོག་ན། བསྟན་བཅོས་ལྔ་པོ་འདི་རྩོལ་བ་རྒྱུན་གཅིག་པ་དང་། འདི་ལྔ་ཡང་བསྟན་པ་ཐམས་ཅད་ཀྱི་དོན་དུ་ངེས་པར་བྱ་བའི་ཕྱིར་ཐོག་མར་མངོན་པར་རྟོགས་པའི་རྒྱན་དུ་ནི་མཆོད་པར་རྗོད་ལ། རྒྱུད་བླ་མར་ཡོངས་སུ་རྫོགས་པའི་བྱ་བ་སྨོན་ལམ་བསྟན་པར་མངོན་ནོ། །འདི་རྣམས་ཀྱི་གོ་རིམས་ཀྱང་རྟོགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་འཕགས་པ་བཞི་ཀ་བསྐྱེད་པའི་ཐེག་པ་རྨད་དུ་བྱུང་བ་ཐམས་ཅད་ཀྱི་ལམ་འབྲས་བུ་དང་བཅས་པ་སྟོན་པའི་གཞུང་ཐམས་ཅད་ཀྱི་མ་ལྟ་བུ་ཡིན་པས་ཐོག་མར་མཛད་དོ། །མདོ་སྡེ་རྒྱན་ནི་ཐེག་པ་གསུམ་གྱི་མདོ་སིལ་བུ་རྣམས་ཀྱང་སྔ་མའི་དོན་དང་མཐུན་པ་ཡིན་ནོ། །ཞེས་ཤེས་པར་བྱ་བ་དང་མངོན་པར་རྟོགས་པའི་ཁྲིགས་སུ་ངེས་པར་མཛད་དོ། །དེ་ཡང་བསྡུས་ན་སྤང་གཉེན་གྱི་མཚན་ཉིད་དང་། དེ་ལ་བསྒྲིབ་པ་དང་། དེ་ཁོ་ན་དང་། གཉེན་པོ་བསྒོམ་པའི་ཚུལ་གནས་འབྲས་བུ་དང་བཅས་པ་དང་། ཐེག་པ་བླ་ན་མེད་པར་འཇུག་པ་འདི་ཙམ་མོ་ཞེས་དབུས་མཐའ་ལས་བཤད་པ་ཡིན་ནོ། །དེ་ལྟར་བསྟན་པ་ཐམས་ཅད་ཀྱང་བསྡུས་ན། ཆོས་དང་ཆོས་ཉིད་ལ་འཇུག་པ་འདི་ཉིད་དུ་ཐམས་ཅད་འདུའོ། །ཞེས་བསྟན་ནས། ཆོས་ཉིད་ཀྱི་དོན་སངས་རྒྱས་ཉིད་ཀྱི་གནས་ལུགས་མཐར་ཐུག་པའི་ངེས་པའི་དོན་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་སྤྱོད་ཡུལ་དུ་མ་གྱུར་པ། དྲི་མ་དང་བཅས་པ་དང་། དྲི་མ་མེད་པའི་བྱང་ཆུབ་དང་། དེའི་ཡོན་ཏན་དང་། འཕྲིན་ལས། འཇུག་པའི་ཚུལ་དང་བཅས་པ་ནི་དཀོན་མཆོག་གསུམ་གྱི་ངོ་བོ་ཉིད་ཡིན་ནོ། །ཞེས་རྒྱུད་བླ་མས་བསྟན་ཏེ། བསྟན་པ་ཡི་བཀའ་དང་བསྟན་བཅོས་ཐམས་ཅད་བསྡུས་པར་རིག་པར་བྱའོ། །ཚིགས་བཅད་གཅིག་པོ་འདི་ཡང་དགོས་པ་རྣམ་པ་གཉིས་དང་། སྤང་བླང་རྟོགས་པའི་ཕྱིར་འབྲེལ་བ་དང་། བརྗོད་བྱའི་མཚན་ཉིད་དང་། བརྗོད་བྱེད་ཀྱི་རྣམ་པར་དབྱེ་བ་དང་བཞི་སྟེ། བསྟན་བཅོས་ཀྱི་ཀླད་དུ་དགོས་འབྲེལ་བསྟན་ཏོ། །ཅི་འོ་ན་ཐོག་མར་དགོས་པ་བསྟན་པས་ཅི་ཞིག་བྱེད་ན། དོན་ལ་རྟོན་པ་དག་ནི། ཐོག་མར་དགོས་པ་མཐོང་ནས་འཇུག་པས་གང་ཕྱིར་ཆོས་དང་ཆོས་ཉིད་ཅེས་བྱ་བའི་ངག་འདི་ལ་བརྟེན་ནས་ཆོས་ནི་ཀུན་ནས་ཉོན་མོངས་པ་འཁོར་བས་བསྡུས་པར་ཤེས། ཆོས་ཉིད་ནི་རྣམ་པར་བྱང་བའི་མཚན་ཉིད་ཅན་དུ་ཤེས་པ་ནི་དགོས་པ་དང་། དེ་ལ་བརྟེན་ནས་སྤང་བླང་གི་དོན་ལ་འཇུག་པ་ནི་ཉིང་དགོས་དང་། དེ་ལྟར་བསྟན་བཅོས་ཀྱི་བརྗོད་བྱ་བརྗོད་བྱེད་འདི་ལྟ་བུའོ། །ཞེས་རྟོགས་པའི་འབྲེལ་བ་འབྱུང་བས། དགོས་འབྲེལ་གྱི་ངག་ཀླད་དུ་སྨོས་སོ། །བསྟན་བཅོས་ཀྱི་ལུས་དངོས་ཀྱིས་ནི། གང་དགོས་འབྲེལ་འབྱུང་བའི་གཞི་བརྗོད་པར་བྱ་བ་ཆོས་དང་ཆོས་ཉིད་ཀྱི་དོན་ལ་བརྗོད་པར་བྱེད་པའི་ངག་བསྟན་བཅོས་འདིས་བསྟན་པས་ངག་དང་ངག་ཅན་གྱི་ལྟོས་པའི་འབྲེལ་བ་ཙམ་ལ་བརྟེན་ནས། སྤང་བླང་རྟོགས་པའི་ཤེས་པ་འབྱུང་ཞིང་། རྐྱེན་དེས་ལམ་ལ་འཇུག་པའི་དགོས་པ་དང་། ཞུགས་པས་གནས་ཡོངས་སུ་གྱུར་པའི་ཡེ་ཤེས་རྟོགས་པར་འགྱུར་བ་ནི། དགོས་པའི་དགོས་པའོ། །དེ་ལྟར་དགོས་འབྲེལ་གཉིས་ཀྱི་གྲངས་དང་གོ་རིམ་སྤྱིར་བཤད་ནས། ཤེས་ནས་འགའ་ཞིག་སྤང་བར་བྱ་བ་ནི། ཀུན་ནས་ཉོན་མོངས་པའི་ཆོས་ཟག་པ་དང་བཅས་པ། སྡུག་བསྔལ་ཐམས་ཅད་སྐྱེད་པ། གཏན་དུ་འཁོར་བའི་འཁོར་ལོར་འཁྱམ་པར་བྱེད་པ་ཡང་དག་པ་མ་ཡིན་པའི་ཀུན་རྟོག་པ་ནི་སྤང་བར་བྱ་བའོ། །གཞན་འགའ་ཞིག་མངོན་དུ་བྱ་བ་ནི། དྲི་མ་མེད་པའི་ཆོས་ཉིད་སངས་རྒྱས་ཀྱི་སྙིང་པོ་རྣམ་པར་མི་རྟོག་པའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་སྐུ་སྟེ། དེ་ལ་རྒྱུ་མཐུན་པའི་སངས་རྒྱས་ཀྱི་ཆོས་རྣམ་པར་དཀར་བ་ལ་བརྟེན་ནས་ཡང་དག་པའི་ལྟ་བ་དང་འབྲེལ་བའི་རྟོགས་པས་འཇུག་ཅིང་། ངེས་པ་དང་སྣང་བ་དང་། བསྒོམ་པས་མཐར་ཕྱིན་པར་བྱེད་པའོ། །རྒྱུ་མཚན་དེས་ན་ཆོས་དང་ཆོས་ཉིད་དེ་དག་སྤང་བླང་གི་འབྲེལ་བ་རྟོགས་ནས། བརྗོད་བྱ་ཆོས་དང་ཆོས་དེ་ཉིད་ཀྱི་མཚན་ཉིད་འོག་ནས་བཤད་པའི་མཚན་ཉིད་ཅན་དེ་སྟོན་ཏོ། །དེས་ན་བརྗོད་བྱེད་རྣམ་པར་དབྱེ་བ་ནི། མཚན་ཉིད་སྒོ་ནས་ནི། རྣམ་དབྱེ་འདོད་པ་སྟེ། ཤེས་བྱ་ཐམས་ཅད་ཆོས་དང་ཆོས་ཉིད་དུ་འདུས་པས་མཚན་ཉིད་རྣམ་པར་ཕྱེ་བ་ཡིན་གྱི། ཡུལ་ཐ་དད་ཀྱིས་དབྱེ་བ་ཡང་མ་ཡིན། མང་པོ་ལས་དེ་གཉིས་ལོགས་སུ་དབྱེ་བ་ཡང་མ་ཡིན་ནོ། །ཞེས་འགྲེལ་པར་གསུངས་ལ། འདི་ངོ་བོ་ནི་ངོ་བོ་ཉིད་གསུམ་སྟེ། ཀུན་བརྟགས་དང་། གཞན་གྱི་དབང་གིས་འཁོར་བའོ། །ཡོངས་སུ་གྲུབ་པ་དེ་བཞིན་ཉིད་དང་། ཡང་དག་པའི་ཡེ་ཤེས་ནི་མྱ་ངན་ལས་འདས་པའོ། །དེའི་ཕྱིར་མཚན་ཉིད་ཀྱི་སྒོ་ནས་དབྱེ་བ་སྟེ། ཡུལ་ཐ་དད་པ་ནི་མ་ཡིན་ཏེ། དཔེར་ན་ཐག་པ་ལ་སྦྲུལ་དུ་འཁྲུལ་བ་བཞིན་ཀུན་བརྟགས་ཏེ་མེད་པ་སྣང་བའོ། །གཞན་དབང་ནི་ཐག་པ་སྣང་ཡང་དེ་བཞིན་དུ་ཡང་མི་བདེན་ཏེ། སྤུའི་ཚོགས་འདུས་པ་ཁ་དོག་དང་དབྱིབས་ཙམ་དུ་སྣང་བའོ། །ཡོངས་གྲུབ་ནི་སྦྲུལ་དང་ཐག་པ་ལ་བདེན་པ་མེད་པའི་རང་གི་ངོ་བོ་དང་། སྣང་བ་ལ་འཁྲུལ་པ་མེད་པས་མ་འཁྲུལ་བའི་རང་རིག་པའོ། །དེས་ན་ཡུལ་ཐ་དད་མེད་པའོ། །དེ་སྐད་དུ་འཕགས་པ་ཀླུ་གྲུབ་ཀྱིས། འཁོར་བ་དང་ནི་མྱ་ངན་འདས། །འདི་གཉིས་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །ཞེས་གསུངས་པའང་དོན་འདི་ཉིད་དོ། །གཞན་ཡང་། འཁོར་འདས་ཐམས་ཅད་ཀྱི་ཡུལ་ནི་ཆོས་ཀྱི་དབྱིངས་ཏེ་འདི་ནི་སྤྱིའི་མཚན་ཉིད་དོ། །དེ་ཡང་། ཆོས་ཀྱི་དབྱིངས་ནི་མ་གཏོགས་པར། །འདི་ལྟར་ཆོས་ཡོད་མ་ཡིན་ཏེ། །དེ་ཕྱིར་སྤྱིའི་མཚན་ཉིད་དེར། །དེ་ནི་ཕྱིན་ཅི་མ་ལོག་པའོ། །ཞེས་དབུས་མཐར་གསུངས་སོ། །མང་པོ་ལས་གཉིས་བཀོལ་བ་མ་ཡིན་པའང་། བཅོམ་ལྡན་འདས་ཀྱིས་ཕུང་པོ་དང་ཁམས་དང་སྐྱེ་མཆེད་ལ་སོགས་པ་རྣམ་པར་བཞག་པ་དེ་ཐམས་ཅད་བསྡུས་ནས་རྣམ་པ་གཉིས་ཏེ། ཆོས་དང་ཆོས་ཉིད་དོ། །ཞེས་འགྲེལ་པར་གསུངས་སོ། །བསྟན་བཅོས་འདི་བྱས་སོ་ཞེས་བཅོམ་ལྡན་འདས་བྱམས་པས་ཐམས་ཅད་ལ་འཇུག་པའི་ཚུལ་འདི་མཛད་པ་ཡིན་ནོ། །བསྟན་བཅོས་ཀྱི་ལུས་རྣམ་པར་བཞག་པ་དགོས་འབྲེལ་དང་བཅས་པ་བཤད་ཟིན་ཏེ། རྣམ་རྟོག་གི་དགག་བསྒྲུབ་ལ་སོགས་པ་དོན་ཆུང་བས་བཞག་གོ །དོན་དངོས་ལ་ཡང་མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་ལ་ཡང་བདུན་ཏེ་སྤྱིར་བསྟན་པ་དང་། གཉིས་ཀའི་རྣམ་དབྱེ་དང་། ཆོས་ཀྱི་མཚན་ཉིད་དང་། ཆོས་ཉིད་ཀྱི་མཚན་ཉིད་དང་། འཁྲུལ་པའི་རྒྱུ་མཚན་དང་། གཅིག་མེད་ན་གཉིས་སུ་མི་སྣང་བ་དང་། གཅིག་དང་ཐ་དད་དུ་ཁས་མི་བླང་བའོ། །དང་པོ་ནི་འདི་ཐམས་ཅད་ནི་རྣམ་པ་གཉིས་ཏེ། ཆོས་དང་ཆོས་ཉིད་ཀྱིས་བསྡུས་པའི་ཕྱིར་རོ། །ཞེས་གསུངས་ཏེ། འདི་ཐམས་ཅད་ནི་འཁོར་བ་དང་མྱ་ངན་ལས་འདས་པས་བསྡུས་པ་ཅི་སྙེད་པའོ། །དེ་ཡང་གཉིས་ཏེ། སྤང་བྱ་འཁོར་བའི་ཆོས་དང་། དེ་ལས་གྲོལ་བ་ཆོས་ཉིད་ཐེག་པ་གསུམ་གྱིས་མྱ་ངན་ལས་འདས་མངོན་སུམ་དུ་བྱ་བའོ། །དེ་ལྟར་སྤྱིར་བསྟན་པ་ལ། གང་ཞིག་གང་གིས་བསྡུས་པ་མི་ཤེས་པས་གཉིས་ཀའི་རྣམ་པར་དབྱེ་བ་ནི། ཆོས་ཀྱིས་རབ་ཏུ་ཕྱེ་བ་ནི་འཁོར་བའོ། །ཆོས་ཉིད་ཀྱིས་རབ་ཏུ་ཕྱེ་བ་ནི་ཐེག་པ་གསུམ་གྱིས་མྱ་ངན་ལས་འདས་པའོ། །ཞེས་གསུངས་ཏེ། འདིར་འཁོར་བ་ནི་ཡང་དག་པ་མ་ཡིན་པའི་ཀུན་རྟོག་པས་བསྡུས་པ་དྲི་མ་དང་བཅས་པའི་སེམས་ཀུན་གཞིའི་རྣམ་པར་ཤེས་པར་བཤད་པ། ཁམས་གསུམ་པས་བསྡུས་པའི་ཟག་པ་དང་བཅས་པའི་དགེ་བ་དང་མི་དགེ་བ་དང་ལུང་དུ་མ་བསྟན་པའི་ཆོས་ཐམས་ཅད་དེ། དབུས་མཐའ་ལས་ཀྱང་། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་གསུངས་སོ། །དེ་ལ་ཆོས་ཉིད་ནི་འགྱུར་བ་མེད་པ་དང་། ཕྱིན་ཅི་མ་ལོག་པའི་ཡོངས་སུ་གྲུབ་པ་སྟེ། ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའི་ཐེག་པ་གསུམ་གྱི་མྱ་ངན་ལས་འདས་པ་རང་གི་ངོ་བོ་དང་། གང་ཆགས་པ་དང་བྲལ་བ་འགོག་པའི་བདེན་པ་དང་། གང་གིས་ཆགས་པ་དང་བྲལ་བ་ལམ་གྱི་བདེན་པས་བསྡུས་པའི་ཆོས་ཞེས་ཀྱང་བཤད་ལ། ཆོས་དབྱིངས་དྲི་མ་མེད་པ་དང་། དེའི་རྒྱུ་མཐུན་པ་རབ་ཏུ་ཟབ་པའི་ཆོས་ཀྱི་སྐུ་ཞེས་བྱ་སྟེ། སངས་རྒྱས་དང་ཆོས་ཀྱི་མིང་གིས་བསྟན་པའོ། །དེ་ཡང་། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གིས་ཆགས་བྲལ་བའི། །བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང་། །ལམ་གྱི་བདེན་བ་དག་གིས་བསྡུས། །ཞེས་པ་དང་། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེའི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་བསྟན་པའོ། །ཞེས་རྒྱུད་བླ་མར་གསུངས་སོ། །འདི་ཉིད་ལ་མིང་གི་རྣམ་གྲངས་ཀྱང་། སངས་རྒྱས་དང་། ཆོས་དང་། དབྱེར་མེད་ཀྱི་དོན་དང་། རིགས་དང་། དེ་བཞིན་ཉིད་དང་། འབྲས་བུ་ཐོབ་པ་དང་། མི་བརྫུ་ན་མི་བསླུ་བའི་དོན་དམ་དང་། གདོད་མ་ནས་ཞི་བ་ཞེས་བཤད་དེ། །སངས་རྒྱས་ཆོས་དང་དབྱེར་མེད་དང་། །དེ་རིག་དེ་བཞིན་ཉིད་ཐོབ་དང་། །བརྫུན་མེད་བསླུ་མེད་ཆོས་ཉིད་དང་། །གདོད་ནས་རང་བཞིན་ཞི་ཉིད་དོ། །ཞེས་འབྱུང་བ་སྟེ། འདིར་འགྲོ་བའམ། འདིས་འགྲོ་བས་ཐེག་པ་ཞེས་བྱའོ། །རྒྱུ་མཚན་འདིས་ན་ཐེག་པ་ཆེན་པོར་འཇུག་པ་རྣམས་ཀྱི་ཤེས་བྱ་ཐམས་ཅད་ལ་མཐོང་བ་མངོན་དུ་བྱ་དགོས་པས། ཁྱད་པར་དུ་འཕགས་པའི་མདོ་ལས་བྱུང་བ་ཀུན་གཞིའི་རྣམ་པར་ཤེས་པ་ནི། ཤེས་བྱའི་གནས་དང་། ངོ་བོ་ཉིད་གསུམ་ནི་ཤེས་བྱའི་མཚན་ཉིད་དང་། རྣམ་པར་རིག་པ་ཙམ་ནི་དེ་ལ་འཇུག་པ་དང་། ཕ་རོལ་ཏུ་ཕྱིན་པ་དྲུག་ནི་དེ་ལ་འཇུག་པའི་རྒྱུ་འབྲས་དང་། ས་བཅུ་ནི་བསྒོམ་པར་བྱེད་པ་དང་། བྱང་ཆུབ་སེམས་དཔའི་རྡོ་རྗེ་བ་ནི་ཚུལ་ཁྲིམས་ཀྱི་བསླབ་པ། དཔའ་བར་འགྲོ་བ་ནམ་མཁའ་མཛོད་ལ་སོགས་པ་ནི་ཏིང་ངེ་འཛིན་རྣམ་པར་མི་རྟོག་པའི་ཡེ་ཤེས་ནི་ཤེས་རབ་ཀྱི་བསླབ་པ་སྟེ། བསླབ་པ་གསུམ་དང་། མི་གནས་པའི་མྱ་ངན་ལས་འདས་པ་ནི་སྤངས་པའི་འབྲས་བུ་དང་། སྐུ་གསུམ་ནི་ཐོབ་པའི་འབྲས་བུར་གསུངས་ཏེ། ཤེས་བྱའི་གནས་དང་མཚན་ཉིད་དེར་འཇུག་དང་། །དེའི་རྒྱུ་འབྲས་དེ་རབ་དབྱེ་བ་དང་། །བསླབ་པ་གསུམ་དང་དེ་འབྲས་སྤངས་པ་དང་། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་ཐེག་པ་ཆེན་པོ་བསྡུས་པ་ལས་གསུངས་སོ། །འདིར་ནི་མཚན་ཉིད་ལ་བརྟེན་ནས་ཀུན་བརྟགས་གཞན་དབང་གཉིས་སྒྲིབ་པ་དང་ཆོས་སུ་བཤད་ཅིང་། ཡོངས་སུ་གྲུབ་པ་གནས་ཡོངས་སུ་གྱུར་པ་ནི་ཆོས་ཉིད་དུ་གསུངས་པས་གནས་བཅུ་པོ་ཐམས་ཅད་བསྡུས་པའོ། །འདིའི་རྣམ་གྲངས་གཞན་ཡང་། ལང་ཀར་གཤེགས་པ་ལས། ཆོས་ལྔ་དག་དང་རང་བཞིན་གསུམ། །རྣམ་པར་ཤེས་པ་བརྒྱད་དང་ནི། །བདེན་པ་གཉིས་ཀྱི་རང་བཞིན་དུ། །ཐེག་པ་ཆེན་པོ་ཐམས་ཅད་འདུས། །ཞེས་གསུངས་ཏེ། ཆོས་ལྔ་དང་རང་བཞིན་གསུམ་ཡིན་ཏེ། །མིང་དང་མཚན་མ་ཀུན་རྟོག་ནི། །དངོས་པོ་གཉིས་ཀྱི་མཚན་ཉིད་དོ། །ཡང་དག་ཡེ་ཤེས་དེ་བཞིན་ཉིད། །ཡོངས་སུ་གྲུབ་པའི་མཚན་ཉིད་དོ། །ཞེས་བྱུང་སྟེ། མི་དང་མཚན་མ་གཉིས་ནི་ཀུན་བརྟགས་སོ། །ཀུན་རྟོག་ནི་གཞན་དབང་སྟེ་འདི་གཉིས་ནི་ཆོས་སོ། །ཡང་དག་པའི་ཡེ་ཤེས་ནི་ཟག་པ་མེད་པའི་ཆོས་འགོག་ལམ་གྱིས་བསྡུས་པ་དང་། དེ་བཞིན་ཉིད་ནི་ཤེས་བྱ་ལ་གནས་པའི་བདེན་པ་གཉིས་ཀྱི་རང་བཞིན་ཆོས་ཐམས་ཅད་ངོ་བོ་ཉིད་མེད་པ་སྟེ། འདི་གཉིས་ནི་སྔ་མ་ནི་ཕྱིན་ཅི་མ་ལོག་པའི་ཡོངས་གྲུབ་དང་། ཕྱི་མ་ནི་འགྱུར་བ་མེད་པའི་ཡོངས་གྲུབ་བོ། །འདི་གསུམ་གྱི་སྤྱི་ལ་ནི་ཀུན་གཞི་ཞེས་བྱ། སྔ་མ་གཉིས་ལ་ནི་ཀུན་གཞིའི་རྣམ་ཤེས་ཞེས་བྱ། རྣམ་ཤེས་གཞན་ཉོན་ཡིད་དང་ཚོགས་དྲུག་ཀྱང་ཕན་ཚུན་རྟེན་ཅིང་འབྱུང་བས། རྣམ་ཤེས་བརྒྱད་ནི་སྒྲིབ་པར་བཤད་ལ། ཡེ་ཤེས་བཞི་ནི་རྣམ་པར་ཤེས་པའི་དྲི་མ་མེད་པ་ཡིན་པས་ཡོངས་གྲུབ་སྟེ། ཆོས་ཀྱི་དབྱིངས་ཡེ་ཤེས་ནི་ཐམས་ཅད་ཀྱི་གནས་ལྟ་བུར་གསུངས་པས་སྤང་བྱ་དང་གཉེན་པོར་འགྱུར་རོ། །རྒྱུ་མཚན་འདིས་ཁ་ཅིག་ཀུན་གཞིའི་རྣམ་ཤེས་ཀྱི་སྟེང་དུ། རྒྱས་པའི་རིགས་བཞག་པས་སྐུ་གཉིས་བསྒྲུབ་པའི་རྗེས་ཐོབ་ཀྱི་ཆོས་རྣམས་ཀུན་གཞིའི་རྣམ་ཤེས་ལས་བྱུང་བར་འདོད་པ་ནོར་ཞིང་། དེས་ཀུན་གཞིའི་རྣམ་ཤེས་རྡོ་རྗེ་ལྟ་བུས་བཅོམ་ནས་སྤོང་བ་མདོ་རྒྱུད་རྣམས་སུ་བཤད་པས། སངས་རྒྱས་ལ་ཡེ་ཤེས་མེད་པར་འདོད་པའི་གྲུབ་མཐའ་བྱུང་སྟེ་ནོར་པའོ། །དེ་ཡང་ཐེག་བསྡུས་ལས། ཅིའི་ཕྱིར་ཀུན་གཞིའི་རྣམ་ཤེས་ཞེས་བྱ་ཞེ་ན། སྐྱེ་བ་ཅན་ཀུན་ནས་ཉོན་མོངས་པའི་ཆོས་རྣམས་འབྲས་བུའི་དངོས་པོར་དེར་སྦྱོར་བའམ། དེ་ཡང་རྒྱུའི་དངོས་པོར་དེ་དག་ཏུ་སྦྱོར་བའི་ཕྱིར་ཀུན་གཞིའི་རྣམ་པར་ཤེས་པའོ། །ཞེས་ཉོན་མོངས་ཀྱི་ཆོས་རྣམས་ཀྱི་ངེས་བཟུང་བྱས་ཏེ། རྣམ་བྱང་གི་ཆོས་རྣམས་དེར་མ་བསྡུས་སོ། །གཞན་ཡང་བདག་རྐྱེན་འཆད་པའི་སྐབས་ནས་ཀྱང་། ཅི་ལྟར་ཀུན་གཞིའི་རྣམ་པར་ཤེས་པ་ཀུན་ནས་ཉོན་མོངས་པའི་ཆོས་རྣམས་ཀྱི་རྒྱུ་ཡིན་པ་དེ་ལྟར་ཀུན་ནས་ཉོན་མོངས་པའི་ཆོས་རྣམས་ཀྱང་ཀུན་གཞིའི་རྣམ་པར་ཤེས་པའི་རྒྱུའི་རྐྱེན་དུ་བཞག་སྟེ། རྒྱུའི་རྐྱེན་གཞན་མི་དམིགས་པའི་ཕྱིར་རོ། །ཞེས་གསུངས་སོ། །འདི་ནི་འཁོར་བའི་རྟེན་འབྲེལ་གྱི་གཞི་ངོ་བོ་ཉིད་རྣམ་པར་འབྱེད་པའི་རྟེན་འབྲེལ་ཡིན་ནོ། །འདི་ལ་བརྟེན་ནས་སྡུག་པ་དང་མི་སྡུག་པ་འབྱེད་པའི་རྟེན་འབྲེལ་བཅུ་གཉིས་འབྱུང་ངོ་། །མྱ་ངན་ལས་འདས་པའི་རྟེན་འབྲེལ་ནི། འགྱུར་བ་མེད་པ་དང་། ཕྱིན་ཅི་མ་ལོག་པ་གཉིས་ཤེས་བྱའི་ངོ་བོའི་བདེན་གཉིས་དང་། ཤེས་བྱེད་བློ་རྣམ་པར་དག་པའི་ཐ་སྙད་པའི་བདེན་གཉིས་གཉིས་སུ་ཤེས་པར་བྱ་སྟེ། འདི་ནི་ཆོས་སྐུ་གཉིས་སུ་བཤད་པའོ། །འདི་ནི་ཀུན་གཞིའི་རྣམ་ཤེས་ཀྱི་གཉེན་པོ་ཡིན་ནོ། །དེ་ཡང་ཐིག་བསྡུས་ནས། ས་བོན་ཐམས་ཅད་པ་ཀུན་གཞིའི་རྣམ་ཤེས་ནི་ཉོན་མོངས་པའི་རྒྱུ་ཡིན་ན། དེའི་གཉེན་པོ་འཇིག་རྟེན་ལས་འདས་པའི་སེམས་ཀྱི་ས་བོན་ཅི་ལྟར་རུང་། འཇིག་རྟེན་ལས་འདས་པའི་སེམས་ནི་མ་འདྲེས་པས་དེའི་བག་ཆགས་ནི་མེད་པ་ཉིད་དོ། །བག་ཆགས་དེ་མེད་ན་ས་བོན་གང་ལས་བྱུང་བ་བརྗོད་དགོས་སོ་ཞེ་ན་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པའི་ཐོས་པའི་བག་ཆགས་ཀྱི་ས་བོན་ལས་དེ་བྱུང་ངོ་། །ཞེས་སོ། །འདི་དང་དྲི་མ་གཉིས་ཀྱང་། ད་ལྟར་འདྲེས་ནས་ཡོད་པས་ཡང་སངས་རྒྱས་ཀྱི་བྱང་ཆུབ་ལ་བརྟེན་ནས་ཐོས་པའི་བག་ཆགས་སུ་གྱུར་པ་དེ་གནས་གང་ལ་འཇུག་པ་དེ་ལྷན་ཅིག་འབྱུང་བའི་ཚུལ་གྱིས་རྣམ་པར་སྨིན་པའི་རྣམ་པར་ཤེས་པ་ལ་འཇུག་སྟེ། ཆུ་དང་འོ་མ་བཞིན་ནོ། །དེ་ནི་ཀུན་གཞིའི་རྣམ་པར་ཤེས་པ་མ་ཡིན་ཏེ། དེའི་གཉེན་པོའི་ས་བོན་ཉིད་ཡིན་པའི་ཕྱིར་རོ། །ཞེས་བྱ་བ་ལ་སོགས་པ་གསུངས་པས་འོག་ནས་སྟོན་པ་ལྟར་ཟག་པ་མེད་པའི་ཆོས་ལས་ཆོས་སྐུ་འབྱུང་ལ། དྲི་མ་མེད་པའི་ཆོས་སྐུའི་ཁམས་ད་ལྟར་ཡོད་པས་རྒྱུ་མཐུན་བའི་ཆོས་འབྱུང་ངོ་། །རྒྱས་པར་ཐེག་བསྡུས་དང་། རྣལ་འབྱོར་སྤྱོད་པའི་ས་ལ་ལྟོས་ཤིག །འདིར་ནན་ཏན་དུ་བསྟན་པ་ནི། ཆོས་དབྱིངས་ཆེན་པོའི་ནམ་མཁའ་ལ། །འཁོར་འདས་མཚན་ཉིད་སྒྱུ་མ་ལྟར། །རྒྱུ་མཐུན་ཆོས་དང་ཆོས་སྐུ་ཡི། །ཆོས་ཉིད་རྟེན་འབྲེལ་ཡོངས་གྲུབ་དང་། །མ་རྟོག་རྣམ་རྟོག་ཀུན་རྟོག་དང་། །དེར་བརྟེན་ཀུན་གཞིའི་རྣམ་ཤེས་ཀྱི། །རྒྱུ་འབྲས་རྟེན་འབྲེལ་མེད་བཞིན་སྣང་། །འདི་གཉིས་མ་འཁྲུལ་ཤེས་པ་ན། །འཁོར་འདས་རྣམ་འབྱེད་ཤེས་རབ་སྟེ། །རྒྱས་བས་འདི་ལ་བསྔགས་པ་མཛད། །དིང་སང་མཁས་གྲུབ་ཕལ་ཆེར་གྱིས། །དམུས་ལོང་གླང་ཆེན་བཟུང་སྨྲ་འདྲ། །དེ་ཕྱིར་ཆོས་དང་ཆོས་ཉིད་འདིར། །གསལ་བྱས་འདི་ལ་ནན་ཏན་མཛོད། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལྟར་རྣམ་དབྱེ་བསྟན་ནས། གསུམ་པ་ཆོས་ཀྱི་མཚན་ཉིད་བཤད་པ་ལའང་མཚན་ཉིད་དངོས་དང་། ངེས་ཚིག་དང་། ཀུན་རྟོག་གི་དོན་གསུམ་གྱིས་སྟོན་ཏོ། །གཉིས་དང་ཅི་ལྟར་མངོན་པར་བརྗོད་པར་སྣང་བ་དེ་ནི་ཡང་དག་པ་མ་ཡིན་པའི་ཀུན་ཏུ་རྟོག་པ་སྟེ་ཆོས་ཀྱི་མཚན་ཉིད་དོ། །ཞེས་གསུངས་ཏེ་གཉིས་སུ་སྣང་བ་ནི་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་སུ་སྣང་བའི་ཡུལ་གཟུང་བ་དྲུག་དང་། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་སྟེ་འཛིན་པ་དྲུག་ནི་གཉིས་སུ་སྣང་བའོ། །ཅི་ལྟར་མངོན་པར་བརྗོད་པ་ནི་རྣམ་པར་རྟོག་པ་ལ་བརྟེན་པ་འདི་ནི་གཟུགས་སོ། །དེ་ལས་ཀྱང་ཁ་དོག་དང་དབྱིབས་ཀྱི་ཁྱད་པར་ལ་བརྟེན་ནས། དཔེར་ན་ནམ་མཁའི་དཀར་ཟླུམ་པ་ནི་ཟླ་བའོ་ཞེས་མིང་བཏགས་པ་དང་། བཏགས་པ་ལ་བརྟེན་ནས་དཀར་ཟླུམ་པའི་དོན་ལ་མཚན་མར་འཛིན་པ་ལ་སོགས་པ་ཅི་ལྟར་མངོན་བར་བརྗོད་པར་སྣང་བ་དེ་ནི། ཡང་དག་པ་མ་ཡིན་པའི་ཀུན་རྟོག་པའོ། །དེ་ལྟར་སྐྱེ་མཆེད་བཅུ་གཉིས་ལ་བརྟེན་ནས་གཉིས་དང་ཅི་ལྟར་མངོན་པར་བརྗོད་པ་རྣམས་ཆོས་ཏེ། འདིར་མཚན་ཉིད་རྫོགས་པ་དང་ཕྱིན་ཅི་མ་ལོག་པ་བསྟན་ཏོ། །འདིའི་ངེས་ཚིག་ནི། མེད་པ་སྣང་བའི་ཕྱིར་ཡང་དག་པ་མ་ཡིན་པའོ། །ཞེས་གསུངས་ཏེ། གང་གི་ཕྱིར་ཆོས་འདི་ཡོད་པ་ནི་མ་ཡིན་ལ། སྣང་བ་ནི་ཡིན་ཏེ། དེའི་ཕྱིར་ཡང་ཡང་དག་པ་མ་ཡིན་པའོ། །ཅི་ལྟར་ཡོད་པ་མ་ཡིན་ཞེ་ན། གཟུགས་ལྟ་བུ་གཅིག་ལ་བྱིས་པ་དག་བདེན་པར་ཡོད་པར་རྟོག་ཀྱང་དེ་བདེན་པ་མེད་པ་ནི། འདི་ལྟར་བུམ་པ་ལྟ་བུ་ལ་ཡང་གཅིག་ཏུ་མི་བདེན་ཏེ། རྡུལ་ཕྲ་རབ་དུ་མ་འདུས་པ་ཡིན་ལ། རྡུལ་བདེན་ནོ་ཞེས་ཉན་ཐོས་པ་དག་ཞེན་མོད་ཀྱི། རྡུལ་དེ་ཡང་ཆ་ཤས་ཀྱིས་ཕྱོགས་བཅུའམ་དྲུག་ཏུ་ཕྱེ་ན་མི་བདེན་པར་གྲུབ་བོ། །དེ་ལྟར་ཡུལ་མི་བདེན་ན་བུམ་པའི་རྣམ་པ་འཛིན་པའི་ཤེས་པ་མ་འཁྲུལ་བ་ཅི་ལྟར་རིགས་ཏེ། བཟུང་བ་མེད་ན་དེར་འཛིན་མེད། །དེ་མེད་རྣམ་པར་ཤེས་པའང་མེད། །ཅེས་བདག་ཉིད་ཆེན་པོའི་གསུང་ལས་སོ། །དེའི་ཕྱིར་དོན་བདེན་པ་མེད་པར་གྲུབ་བོ། །སྣང་བ་ཡང་ཡིན་ཏེ། ཡུལ་དབང་ཤེས་པའི་རྟེན་འབྲེལ་ལས་ཁ་དོག་དང་དབྱིབས་ཀྱི་རྣམ་པར་རིག་པ་ཙམ་དུ་བུམ་པའི་རྣམ་པར་སྣང་ངོ་། །སློབ་དཔོན་ཕྱོགས་ཀྱི་གླང་པོས་ཀྱང་། ཕྱི་རོལ་གྱི་དོན་མེད་བཞིན་དུ་ཡང་དེའི་རྣམ་པ་ལྟ་བུར་སྣང་སྟེ། ནང་གི་ཤེས་བྱའི་དངོས་པོ་ནི། ཕྱི་རོལ་ལྟར་སྣང་གང་ཡིན་དེ། དོན་ཡིན་རྣམ་ཤེས་ངོ་བོའི་ཕྱིར། །དེའི་རྐྱེན་ཉིད་ཀྱང་ཡིན་ཕྱིར་རོ། །ཞེས་གསུངས་ཏེ། ནང་གི་ཤེས་བྱ་ནི་རྣམ་པར་རིག་པ་ཙམ་ཉིད་དོ། །དེ་ཉིད་ལ་ཡུལ་དང་དབང་པོ་དང་ཤེས་པའི་རྣམ་པར་སྣང་བས་ཕན་ཚུན། བདག་རྐྱེན་དང་དམིགས་རྐྱེན། དེ་མ་ཐག་རྐྱེན་ལྟར་བྱེད་དོ། །དེས་ན་རྣམ་རིག་འདི་ལ་གཞན་དབང་ཞེས་བྱའོ། །མདོ་སྡེ་རྒྱན་ལས་ཀྱང་། རྣམ་གསུམ་རྣམ་གསུམ་སྣང་བ་ཅན། །གཟུང་དང་འཛིན་པའི་མཚན་ཉིད་དེ། །ཡང་དག་མ་ཡིན་ཀུན་རྟོག་ནི། །གཞན་གྱི་དབང་གི་མཚན་ཉིད་དོ། །ཞེས་གནས་དང་དོན་དང་ལུས་སུ་སྣང་བ་དེའི་བདག་ཉིད་དུ་ཡོངས་སུ་མ་གྲུབ་པའི་ཕྱིར་དང་། རྟོག་པ་ཙམ་ཉིད་ནི་སྣང་བ་འཁྲུལ་པ་ཙམ་ཡོད་པའི་ཕྱིར་ཀུན་ཏུ་རྟོག་པ་ཞེས་བྱ་སྟེ། ཀུན་བརྟགས་ཞེས་བྱའོ། །འདི་ཡང་རྣམ་གྲངས་པའི་ཀུན་བརྟགས་དང་། མཚན་ཉིད་འཆད་པའི་ཀུན་བརྟགས་གཉིས་སྟེ། བསྡུས་ན་མིང་དང་མཚན་མ་གཉིས་སོ། །གཟུང་བ་གསུམ་དང་། ཡིད་ཉོན་མོངས་ཅན་དང་། སྒོ་ལྔའི་འཛིན་པ་དང་། དྲུག་པ་ཡིད་རྣམ་རྟོག་དང་བཅས་པ་གསུམ་ནི་འཛིན་པ་སྟེ། འདི་ལྟར་སྣང་བ་ཡང་མི་བདེན་པས་ཡང་དག་པ་མ་ཡིན་པའི་ཀུན་རྟོག་ཡིན་ནོ། །ཀུན་རྟོག་གི་དོན་གཞན་ཡང་བསྟན་པ་ནི། ཐམས་ཅད་དུ་དོན་མེད་ཅིང་རྟོག་པ་ཙམ་ཡིན་པའི་ཕྱིར་ཀུན་ཏུ་རྟོག་པའོ། །ཞེས་གསུངས་ཏེ་དོན་དུ་བདེན་པ་མེད་ཀྱང་སྣང་བས་དེའི་བདག་ཉིད་དུ་ཡོངས་སུ་མ་གྲུབ་པའི་ཕྱིར་དང་། རྟོག་པ་ཙམ་ཉིད་ནི་སྣང་བ་འཁྲུལ་པ་ཙམ་ཡོད་པའི་ཕྱིར་ཀུན་ཏུ་རྟོག་པ་ཞེས་བྱ་སྟེ། ཀུན་བརྟགས་ཞེས་བྱའོ། །འདི་ཡང་རྣམ་གྲངས་པའི་ཀུན་བརྟགས་དང་། མཚན་ཉིད་འཆད་པའི་ཀུན་བརྟགས་གཉིས་ཏེ། བསྡུས་ན་མིང་དང་མཚན་མ་གཉིས་སོ། །གཟུགས་དང་ཚོར་བ་ལ་སོགས་པའི་ཐོག་མ་མེད་པའི་བག་ཆགས་ཀྱིས་དོན་གྱི་རྒྱུ་མཚན་ད་ལྟར་སྣང་བ་དང་། དོན་ལྟ་བུར་སྣང་བ་དང་། འདུ་ཤེས་པ་རྣམས་ནི་རྣམ་གྲངས་པའི་ཀུན་བརྟགས་ཏེ། ཅི་ལྟར་བརྗོད་དོན་འདུ་ཤེས་ཀྱི། །རྒྱུ་མཚན་དེའི་བག་ཆགས་དང་། །དེ་ལས་ཀྱང་དོན་སྣང་བ་ནི། །ཀུན་བརྟགས་པའི་མཚན་ཉིད་དོ། །ཞེས་སོ། །ནམ་མཁའི་དཀར་ཟླུམ་པ་ལ་ཟླ་བར་བཏགས་པས། དེའི་མིང་བརྗོད་པ་ན་དོན་མེད་ཀྱང་དཀར་ཟླུམ་པའི་རྣམ་པ་དྲན་པ་དང་། ལྟོ་ལྡིར་ལ་སོགས་པའི་དབྱིབས་ཀྱི་རྣམ་པ་འདི་ལྟ་བུའོ་ཞེས་དྲན་པ་དེ་དག་ཀྱང་ཀུན་བརྟགས་ཏེ། །མིང་དང་དོན་ནི་ཅི་ལྟ་བར། དོན་དང་མིང་དུ་སྣང་བ་གང་། །ཡང་དག་མིན་རྟོག་རྒྱུ་མཚན་ནི། །ཀུན་བརྟགས་པའི་མཚན་ཉིད་དོ། །ཞེས་གསུངས་ཏེ། ཀུན་བརྟགས་རྣམ་པ་གཉིས་ཀ་ཡང་རྟོག་པ་དང་རྟོག་པ་ལ་བརྟེན་ནས་བརྗོད་པ་ཙམ་ཡིན་པས་དོན་ཉིད་མེད་པའི་ཕྱིར་ཀུན་ཏུ་རྟོག་པ་ཞེས་བྱ་སྟེ། གང་དག་འདི་ལ་མངོན་པར་ཞེན་པ་ནི་རི་དྭགས་སྨིག་རྒྱུ་བསྙེག་པ་ལྟར། སྡུག་བསྔལ་འབའ་ཞིག་བསྐྱེད་པར་བྱེད་པས་དོན་མེད་པ་ཡིན་ནོ། །ཆོས་ཀྱི་མཚན་ཉིད་བཤད་ཟིན་ཏོ། །ཆོས་ཉིད་ཀྱི་མཚན་ཉིད་ནི། གཟུང་བ་དང་། འཛིན་པ་དང་། བརྗོད་པར་བྱ་བ་དང་། རྗོད་པར་བྱེད་པ་ཁྱད་པར་མེད་པ་ནི་དེ་བཞིན་ཉིད་དེ། ཆོས་ཉིད་ཀྱི་མཚན་ཉིད་དོ། །ཞེས་གསུངས་ཏེ་གཟུང་བ་དང་འཛིན་པ་གཉིས་སུ་སྣང་བ་ནི་བདེན་པ་མ་ཡིན་པས། དོན་ལ་གཉིས་སུ་མེད་པ་ནི། ཆོས་ཉིད་ཀྱི་གནས་ལུགས་ཡིན་ལ། དེ་ལ་བརྗོད་པར་བྱ་བ་དང་། བརྗོད་པར་བྱེད་པ་ཐ་དད་དུ་མེད་པ་ནི་གཉིས་སུ་མེད་པ་བརྗོད་དུ་མི་བཏུབ་སྟེ། དྲི་མ་མེད་པར་གྲགས་པ་ཅང་མི་སྨྲ་བ་ལ། འཇམ་དཔལ་གྱིས་ཡི་རང་བ་མཛད་པ་བཞིན་ནོ། །འདི་ནི་ཡོངས་སུ་གྲུབ་པའི་གནས་ལུགས་ཏེ། ཀུན་བརྟགས་ནི། གཏན་ནས་མེད་པ་ཉིད་དང་། མེད་པ་ལ་མེད་པར་རྟོག་ན་ནི་མ་འཁྲུལ་པས་ཡོད་པ་ཡིན་ལ། ཡོད་མེད་གཉིས་ཀ་ཡང་ཀུན་རྫོབ་བདེན་པ་ལ་རྣམ་རིག་ཙམ་ཉིད་དུ་མཉམ་པ་དང་། དོན་དམ་པར་མ་ཞི་བ་འཁོར་བ་དང་། ཞི་བ་མྱ་ངན་ལས་འདས་པ་གཉིས་ཀ་ཡང་རྣམ་པར་མི་རྟོག་པའི་ཡེ་ཤེས་ལ་ཐ་དད་དུ་གཅད་དུ་མེད་པའི་ཕྱིར་ཡོངས་སུ་གྲུབ་པའོ། །དེ་ཡང་། མེད་དང་ཡོད་པ་གང་ཡིན་དང་། །ཡོད་དང་མེད་པ་མཉམ་ཉིད་དང་། །མ་ཞི་ཞི་དང་རྣམ་མི་རྟོག །ཡོངས་སུ་གྲུབ་པའི་མཚན་ཉིད་དོ། །ཞེས་མདོ་སྡེ་རྒྱན་ལས་གསུངས་སོ། །འདི་ལ་ཡོངས་གྲུབ་གཉིས་སུ་ཅི་ལྟར་ཤེས་པར་བྱ་ཞེ་ན། འགྱུར་བ་མེད་པ་ནི། ཀུན་བརྟགས་དང་། གཞན་དབང་གཉིས་ཀྱི་མཚན་ཉིད་ཀྱིས་སྟོང་པས་སྟོང་པ་ཉིད་ཀྱི་མིང་གིས་བརྗོད་པ་སྟེ། འདི་ནི་གཞན་མ་ཡིན་པས་དེ་བཞིན་ཉིད་དང་རྟོགས་པར་བྱ་བའི་དོན་ཕྱིན་ཅི་མ་ལོག་པ་ཡང་དག་པའི་མཐའ་དང་། མཚན་ཉིད་གཉིས་འགགས་པས་མཚན་མ་མེད་པ་དང་འཕགས་པའི་སྤྱོད་ཡུལ་ཡིན་པས་དོན་དམ་པ་དང་། འཕགས་པའི་ཆོས་རྣམས་ཀྱི་རྒྱུ་ཡིན་པས་ཆོས་ཀྱི་དབྱིངས་ཞེས་བྱ་སྟེ་རྣམ་གྲངས་སོ། །དེ་ལྟར་ཡང་དབུས་མཐའ་ལས། སྟོང་པ་ཉིད་ནི་མདོར་བསྡུས་ན། དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ནི་རྣམ་གྲངས་སོ། །གཞན་མིན་ཕྱིན་ཅི་ལོག་མ་ཡིན། །དེ་འགགས་འཕགས་པའི་སྤྱོད་ཡུལ་དང་། །འཕགས་པའི་ཆོས་ཀྱི་རྒྱུའི་ཕྱིར། །རྣམ་གྲངས་དོན་ཏེ་གོ་རིམས་བཞིན། ཞེས་གསུངས་སོ། །འདི་ལ་ཕྱིན་ཅི་མ་ལོག་པའི་ཡོངས་གྲུབ་ཀྱང་། ཡང་དག་པའི་ཤེས་རབ་ཀྱིས་བསྐྱེད་པ་འཕགས་པ་རྣམས་ཀྱི་ཡེ་ཤེས་ཀྱི་ངོ་བོ་སྟེ། རྣམ་གྲངས་ནི་ཕྱིན་ཅི་མ་ལོག་པ་རྣམ་པ་བཅུ་གསུངས་ཏེ། ཡིག་གེ་དང་དོན་དང་ཡིད་ལ་བྱེད་པ་དང་། མི་འཕྲོ་བ་དང་རང་གི་མཚན་ཉིད་དང་སྤྱིའི་མཚན་ཉིད་དང་མ་དག་པ་དག་པ་དང་། གློ་བུར་བ་དང་། མི་ལྡང་བ་དང་། ཁེངས་པ་མེད་པ་ལ་ཕྱིན་ཅི་མ་ལོག་པ་སྟེ། །ཡི་གེའི་དོན་དང་ཡིད་བྱེད་དང་། །མི་འཕྲོ་བ་དང་མཚན་ཉིད་གཉིས། །མ་དག་དག་དང་གློ་བུར་དང་། །མི་སྡང་བ་དང་ཁེངས་པ་མེད། །ཞེས་བྱ་བ་ལ་སོགས་པ་རྒྱ་ཆེར་གསུངས་ཏེ། མདོར་བསྡུས་ན། སྔ་མ་ནི་ཆོས་དབྱིངས་དྲི་མ་མེད་པའི་ཆོས་སྐུ་དང་། ཕྱི་མས་རྒྱུ་མཐུན་པ་རབ་ཏུ་ཟབ་པའི་ཆོས་སྐུའི་རྣམ་དབྱེར་རྟོགས་པར་བྱའོ། །འདི་རྣམས་ཀྱིས་ཆོས་ཉིད་ཀྱི་མཚན་ཉིད་ཕྱིན་ཅི་མ་ལོག་པ་དང་མ་ལུས་པར་བསྟན་པ་ཡིན་ནོ། །དེ་ལྟར་ཆོས་ཉིད་ལ་ནི་འཁྲུལ་པ་མེད་ལ། འཁྲུལ་པ་རང་ནི་བདེན་པར་མེད་ན་ཅི་ལྟར་འཁྲུལ་ཞེ་ན། ལྔ་པ་འཁྲུལ་བའི་ཚུལ་ནི། མེད་པ་སྣང་བ་དང་། དཔེ་དང་། ཡོད་པ་མི་སྣང་བའི་ཚུལ་གསུམ་གྱིས་གསུངས་ཏེ། དང་པོ་ནི། མེད་པ་སྣང་བ་ནི་འཁྲུལ་པའི་ཕྱིར་ཀུན་ནས་ཉོན་མོངས་པའི་རྒྱུ་ཡིན་ཏེ་ཞེས་པ་མེད་བཞིན་དུ་གཞན་གྱི་དབང་ལ་བརྟེན་པ་ཉོན་མོངས་པ་གསུམ་འབྱུང་བ་ནི་འཁྲུལ་པ་སྟེ། ཅི་ལྟར་འབྱུང་བ་ཡང་མངོན་པར་བརྗོད་པའི་བག་ཆགས་ཀྱི་ས་བོན་ལ་བརྟེན་ནས་ལུས་དང་ལུས་ཅན་དང་ཟ་བ་པོ་དང་། དེས་ཉེ་བར་སྤྱད་པར་བྱ་བ་དང་། ཉེ་བར་སྤྱོད་པ་དང་། དུས་དང་། གྲངས་དང་། ཡུལ་དང་། ཐ་སྙད་ཀྱི་རྣམ་རིག་རྣམས་འབྱུང་ལ། ལྟ་བའི་བག་ཆགས་ཀྱི་ས་བོན་ལས་བདག་གཞན་གྱི་བྱེ་བྲག་གི་རྣམ་རིག་འབྱུང་སྟེ། སྲིད་པའི་ཡན་ལག་གི་ས་བོན་ལས་བདེ་འགྲོ་དང་ངན་འགྲོའི་འཆི་འཕོ་བའི་རྣམ་རིག་འབྱུང་བས། རྣམ་རིག་འདི་རྣམས་ཀྱིས་ཁམས་དང་འགྲོ་བ་དང་སྐྱེ་གནས་ཐམས་ཅད་བསྡུས་པ་གཞན་གྱི་དབང་གི་མཚན་ཉིད་ཀྱི་ཡང་དག་པ་མ་ཡིན་པའི་ཀུན་ཏུ་རྟོག་པའོ། །དེ་ལ་བརྟེན་ནས་དོན་མེད་ཀྱང་རྣམ་པར་རིག་པ་ཙམ་དེ་ཉིད་དོན་དུ་སྣང་སྟེ་ཀུན་བརྟགས་སུ་གྱུར་ནས། །ཉོན་མོངས་པ་དང་ལས་དང་ཚེའི་ཉོན་མོངས་གསུམ་གྱིས་སྡུག་བསྔལ་བར་བྱེད་པས། འདི་རྣམས་རྣམ་པར་རྟོག་པ་ཙམ་ཉིད་པས་དོན་མེད་པ་ཞེས་བྱའོ། །དཔལ་ཆོས་ཀྱི་གྲགས་པས་ཀྱང་། རྣམ་རྟོག་རྗེས་སུ་འབྲེལ་པ་ལ། །དོན་གསལ་སྣང་བ་ཡོད་མ་ཡིན། །ཞེས་གསུངས་པ་འདི་ལ་དགོངས་པར་རིག་པར་བྱའོ། །ཕྱི་དོན་འདོད་པའི་ལྟར་ནི་མི་བྱའོ། །རིགས་པ་དྲུག་བཅུ་པ་ལས་ཀྱང་། མ་རིག་རྐྱེན་གྱིས་འཇིག་རྟེན་ཞེས། །ཅི་ལྟར་རྫོགས་པའི་སངས་རྒྱས་གསུངས། །དེ་ཕྱིར་འཇིག་རྟེན་འདི་དག་ཀྱང་། །རྣམ་པར་རྟོག་པར་ཅིས་མི་འཐད། །མ་རིག་འགག་པར་གྱུར་ན་ནི། །གང་རྣམས་འགག་པར་འགྱུར་བ་རྣམས། དེ་དག་མི་ཤེས་ཀུན་བརྟགས་པར། །ཅིའི་ཕྱིར་ན་གསལ་མི་འགྱུར། །ཞེས་བྱུང་ངོ་། །དཔེ་གསུངས་པ་ནི། སྒྱུ་མའི་གླང་པོ་ཆེ་ལ་སོགས་པ་སྣང་བ་བཞིན་ནོ། །ཞེས་སྒྱུ་མས་སྤྲུལ་པའི་རྟ་གླང་དང་ནོར་ལ་སོགས་པ་ནི་སྣང་ཡང་དེ་ལྟར་ཡོད་པ་མ་ཡིན་པ་ལྟར། ཡང་དག་པ་མ་ཡིན་པའི་ཀུན་རྟོག་པ་ནི་མེད་བཞིན་དུ་ཡང་སྣང་བ་ཡིན་ནོ། །འཕགས་པ་ཀླུ་གྲུབ་ཀྱི་ཉི་ཤུ་པ་ལས་ཀྱང་། སྒྱུ་མ་ཅི་ལྟ་ཅི་ལྟ་བར། དེ་བཞིན་སེམས་ཅན་ཡུལ་ལ་སྤྱོད། །འགྲོ་བ་སྒྱུ་མའི་རང་བཞིན་ཡིན། །དེ་ལྟར་དུ་ནི་བརྟེན་ནས་བྱུང་། །ཞེས་གསུངས་སོ། །ཡོད་པ་མི་སྣང་བ་ནི། གཞན་ཡང་ཡོད་པ་ཡང་མི་སྣང་བའི་ཕྱིར་རོ། །ཞེས་ཐེག་པ་གསུམ་ཀྱིས་རྟོགས་པར་བྱ་བ་བདག་མེད་པ་གཉིས་ཡོད་པ་མི་སྣང་བའི་ཕྱིར་ཡང་འཁྲུལ་བ་ཡིན་ནོ། །མདོ་སྡེ་རྒྱན་ལས་ཀྱང་། གང་ཞིག་ཡོད་པ་མ་མཐོང་མེད་མཐོང་བ། །འདི་འདྲའི་མུན་ནག་རྣམ་པ་འདི་གང་ཞིག། ཞེས་གསུངས་སྟེ། ཡོངས་སུ་འགྲུབ་པ་གཉིས་ཡོད་ཀྱང་མ་མཐོང་བས་འཁྲུལ་པའོ། །རིགས་པ་དྲུག་བཅུ་པ་ལས་ཀྱང་། མྱ་ངན་འདས་པ་བདེན་གཅིག་པུར། །སངས་རྒྱས་རྣམས་ཀྱིས་གང་བསྟན་པ། །དེ་ཚེ་ལྷག་མ་ལོག་པ་ཞེས། །མཁས་པ་སུ་ཞིག་རྟོགས་མི་བྱེད། །ཞེས་བདེན་པ་དེ་མ་རྟོགས་པས་འཁྲུལ་པའོ། །འཇིག་རྟེན་ན་ཡང་ཐོ་ཡོར་ལ་མིར་འཁྲུལ་པ་ཞེས་བྱ་བ་རྟོགས་པ་བཞིན་ནོ། །དེ་ལྟར་འཁྲུལ་པའི་རྒྱུ་མཚན་ཤེས་ནས། དྲུག་པ། གཅིག་མེད་ན་གཉིས་སུ་མི་འཐད་པ་ནི། མེད་པ་སྣང་བ་དག་ལ་གང་ཡང་རུང་བ་ཞིག་མེད་ན་ནི། འཁྲུལ་བ་དང་། མ་འཁྲུལ་བ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་མི་འཐད་དོ། །ཞེས་མེད་པ་དང་སྣང་བའི་རྒྱུ་མཚན་གྱིས་སྣང་བ་ལ་བདེན་པ་དང་། བྱེད་པ་པོ་དང་། བདག་ལ་སོགས་པ་ཡོད་པ་ཉིད་དུ་རྟོག་པ་དང་། སྣང་བ་དེ་ཡང་གྲུབ་བཞིན་དུ་མེད་པར་རྟོགས་པ་ལ་འཁྲུལ་བ་ཞེས་བྱ་སྟེ། མེད་པ་ཁོ་ན་ནི་མེད་པ་ཉིད་ལ་འཁྲུལ་པ་མི་སྲིད་པའི་ཕྱིར་དང་། ཡང་གལ་ཏེ་བདེན་པ་ཅུང་ཟད་ཡོད་ན་ནི་ཡོད་པ་འཁྲུལ་བ་མེད་པའི་ཕྱིར་རོ། །གཞན་ཡང་འཁྲུལ་པའི་ཤེས་པ་མེད་ན་ནི། མ་འཁྲུལ་བའི་ཤེས་པ་ཡང་ཡོད་པར་མི་རིགས་ཏེ། དེ་ལ་ལྟོས་པའི་ཕྱིར་རོ། །དེ་གཉིས་ཀ་མེད་ན་ནི་འཁྲུལ་བའི་འཁོར་བར་ཀུན་ནས་ཉོན་མོངས་པ་དང་། དེ་རྣམ་པར་བྱང་བའི་མྱ་ངན་ལས་འདས་པ་ཡང་འཐད་པར་མི་འགྱུར་ཏེ། དེ་ཡང་མི་འཐད་པ་འདོད་པ་ཡིན་ནོ་ཞེ་ན། ཐམས་ཅད་ཀྱང་དོན་མེད་པ་ཉིད་པས་འཁོར་འདས་ཀྱི་རྣམ་པར་བཞག་པས་ཅི་ཞིག་བྱ་སྟེ། ཡང་ན་ནི་གཏན་དུ་འཁོར་བ་ཉིད་དམ། ཡང་ན་ནི་འབད་བ་མེད་པར་གྲོལ་བར་རིགས་ན། དེ་ཡང་མངོན་སུམ་དང་འགལ་ལོ། །དེ་ལྟར་མེད་པ་དང་སྣང་བ་དག་ལས་འཁྲུལ་པའི་རྒྱུ་མཚན་རྟོགས་པས་རྟེན་ཅིང་འབྲེལ་བར་འབྱུང་བ་ཡང་མཐོང་། སྣང་བ་ཡང་བདེན་བས་སྟོང་པ་སྒྱུ་མ་ལྟ་བུར་རྟོགས་པས་སྐྱེ་འགག་དང་བྲལ་བས་མངོན་སུམ་དུ་རྟོགས་པའི་ཡང་དག་པའི་ཤེས་པ་ལ་བརྟེན་ནས་རྣལ་འབྱོར་མངོན་སུམ་འབྱུང་བས་རྣམ་པར་གྲོལ་བ་འབྱུང་ངོ་། །དོན་འདི་ནི། མེད་པས་རྣམ་པར་མི་གྲོལ་ཏེ། །ཡོད་པས་སྲིད་པ་འདི་ལ་མིན། །དངོས་དང་དངོས་མེད་ཡོངས་ཤེས་པས། །བདག་ཉིད་ཆེན་པོ་རྣམ་པར་གྲོལ། །ཞེས་འཕགས་པ་ཀླུ་གྲུབ་ཀྱིས་གསུངས་པ་དང་མཐུན་བ་ཡིན་ནོ། །བདུན་པ་གཅིག་དང་ཐ་དད་དུ་ཁས་མི་བླང་བ་ཡང་། དེ་ལྟར་ཡིན་ན་ཆོས་དང་ཆོས་ཉིད་དག་གཅིག་པ་ཉིད་དུ་ཁས་བླང་བར་བྱའམ། འོན་ཏེ་ཐ་དད་པ་ཉིད་དུ་བྱ་ཞེ་ན་གཉིས་པོ་དག་ནི་གཅིག་མ་ཡིན་ཞིང་སོ་སོ་བ་ཉིད་མ་ཡིན་ཏེ། ཡོད་པ་དང་མེད་པ་དག་ཁྱད་པར་ཡོད་པ་དང་། ཁྱད་པར་མེད་པའི་ཕྱིར་རོ། །ཞེས་གསུངས་ཏེ་ཆོས་དང་ཆོས་ཉིད་དག་གཅིག་ཏུ་ཁས་བླངས་ན་མི་རུང་སྟེ། ཆོས་ཉིད་ནི་ཡོངས་སུ་གྲུབ་པ་གཏན་དུ་ཡོད་པ་ཡིན་ལ། ཆོས་ནི་སྨིག་རྒྱུ་ལྟར་གཏན་ནས་བདེན་པ་ཡོད་པ་མ་ཡིན་ན། ཅི་ལྟར་གཅིག་ཏུ་ཁས་བླང་བར་བྱ། གཞན་ཡང་ཆོས་ཅན་མཐོང་བ་ཙམ་གྱིས་ཆོས་ཉིད་མཐོང་བར་འགྱུར་ལ་འབད་པ་ཡང་དོན་མེད་པར་འགྱུར་བས། དེ་ལྟར་ཁྱད་པར་ཡོད་པ་གཅིག་ཏུ་ཁས་མི་བླང་ངོ་། །ཅི་ལྟར་ཐ་དད་དུ་ཁས་བླང་དུ་མི་རུང་ཞེ་ན། ཀུན་བརྟགས་དང་གཞན་དབང་རྣམས་པར་རིག་པ་ཙམ་དེ་ཉིད་རྣམ་རིག་གི་མཚན་མ་མེད་པར་སྣང་བ་ནི་ཆོས་ཉིད་མངོན་སུམ་དུ་སྣང་བ་ཡིན་ཞིང་། ཆོས་ཉིད་ནི་ཆོས་མེད་པ་ཙམ་གྱིས་རབ་ཏུ་ཕྱེ་བ་ཡིན་བའི་ཕྱིར་རོ། །དཔེར་ན་ཐག་པ་ལ་སྦྲུལ་དུ་སྣང་ཡང་ཐག་པ་ཉིད་དུ་གནས་པ་ལ་སྦྲུལ་ཡོད་མེད་དུ་ཐ་དད་པ་མ་ཡིན་པ་བཞིན། སྣང་བ་དང་སྟོང་པ་དབྱེར་མེད་པར་གནས་པ་ལ་ཆོས་དང་ཆོས་ཉིད་ཐ་དད་དུ་མ་གྲུབ་པས་གཉིས་སུ་རིགས་པ་མ་ཡིན་ནོ། །འོ་ན་ཅི་ལྟར་ཞེ་ན། དེ་ཉིད་དང་གཞན་ལས་རྣལ་པར་གྲོལ་བ་སྟེ། མདོ་སྡེ་རྒྱན་ལས། སེམས་ནི་གཉིས་སུ་སྣང་བ་སྟེ། །དད་ལ་སོགས་པ་སྣང་བ་དང་། །ཆགས་ལ་སོགས་པའང་སྣང་བར་འདོད། ཉོན་མོངས་དགེ་ཆོས་ཡོད་མ་ཡིན། །ཞེས་གསུངས་སོ། །འདི་ལྟར་ཆོས་དང་ཆོས་ཉིད་ལ་ངོ་བོ་ཉིད་གསུམ་དུ་བསྟན་ཅིང་གཅིག་པ་དང་ཐ་དད་དུ་མི་རུང་བ་མཐོང་བས་ཤེས་བྱ་ཐམས་ཅད་ཀྱི་མཚན་ཉིད་ཕྱིན་ཅི་མ་ལོག་པ་རྟོགས་པར་འགྱུར་བས། དོན་འདི་སུམ་ཅུ་པ་ལས་ཀྱང་། རྣམ་པར་རྟོག་པ་གང་གང་གིས། །དངོས་པོ་གང་གང་རྣམ་བརྟགས་པ། །དེ་ནི་ཀུན་ཏུ་བརྟག་པ་ཡི། །ངོ་བོ་ཉིད་དེ་དེ་མེད་དོ། །ཞེས་ཀུན་བརྟགས་གཏན་མེད་པ་སྣང་བ་དང་། །གཞན་གྱི་དབང་གི་ངོ་བོ་ཉིད། །རྣམ་རྟོག་ཡིན་ཏེ་རྐྱེན་ལས་བྱུང་། །ཞེས་ཡུལ་དབང་ཤེས་པའི་ནུས་པས། གཟུང་འཛིན་གྱི་རྣམ་རིག་ལྟ་བུ་བྱུང་བའོ། །གྲུབ་ནི་དེ་ལ་སྔ་མ་པོ། །རྟག་ཏུ་མེད་པར་གྱུར་པ་གང་། །དེ་ཕྱིར་དེ་ནི་གཞན་དབང་ལས། །གཞན་མིན་གཞན་མ་མིན་པའང་མིན། །མི་རྟག་ལ་སོགས་བཞིན་དུ་བརྗོད། །དེ་མ་མཐོང་བས་དེ་མི་མཐོང་། །ཞེས་ཡོངས་སུ་གྲུབ་པ་ནི་སྔ་མ་གཉིས་ཀྱི་མཚན་མ་མེད་པ་ལ་བརྗོད་པས། སྣང་ཡང་ཡོད་པ་མ་ཡིན་པའི་རྣམ་པར་རིག་པ་ལས་གཞན་དབང་ཞེས་བྱ་སྟེ། དེའི་མཚན་མ་བྲལ་ན་ཡོངས་གྲུབ་དེ་ཡིན་ལ། རྣམ་རིག་འཁྲུལ་པས་མེད་བཞིན་བདེན་པར་རྟོག་པའི་ཀུན་བརྟགས་བྱུང་བས། རྣམ་རིག་དང་གཞན་དབང་གཉིས་གཅིག་དང་ཐ་དད་དུ་ཁས་མི་བླང་ངོ་། །དེས་ན་ཀུན་བརྟགས་བདེན་པ་མེད་པ་དང་། །གཞན་རྣམས་དབང་རིག་ཙམ་ཡོད་ཀྱང་། གཟུང་འཛིན་གཉིས་མེད་པར་མཐོང་བས། །ཡོངས་གྲུབ་མཐོང་བར་འགྱུར་བ་ཡིན་ནོ། །རྒྱས་པར་འོག་ནས་ཀྱང་སྟོན་ཏོ། །འཕགས་པ་ཀླུ་གྲུབ་ཀྱིས་ཀྱང་། ཀུན་བརྟགས་དང་ནི་གཞན་དབང་དང་། །ཡོངས་སུ་གྲུབ་པ་འདི་ཉིད་ནི། །སྟོང་ཉིད་གཅིག་པུ་ཁོ་ན་ཡི། །ངོ་བོ་སེམས་ལ་བཏགས་པ་ཡིན། །ཞེས་བྱང་ཆུབ་སེམས་འགྲེལ་ལས་གསུངས་སོ། །ཤིན་ཏུ་རྒྱས་པར་ནི་ཐེག་བསྡུས་ལས་གསུངས་སོ། །བསྟན་བཅོས་མདོར་བསྟན་པའོ། །རྒྱས་པར་བཤད་པ་ལ་གཉིས་ཏེ། ཆོས་ལ་འཇུག་པ་དང་། ཆོས་ཉིད་ལ་འཇུག་པ་བཤད་པའོ། །དང་པོ་ལ་ཡང་མདོར་བསྟན་པ་དང་། རྒྱས་བཤད་གཉིས་ལས། དང་པོ་ནི། རྣམ་པ་དྲུག་གིས་ཆོས་ལ་འཇུག་པ་བླ་ན་མེད་པ་ཡིན་ཏེ། ཞེས་པ་སྟོན་པ་འདི་དྲུག་སྟེ། མཚན་ཉིད་དང་། གྲུབ་པ་དང་། གཅིག་ཉིད་མ་ཡིན་ཞིང་། སོ་སོ་བ་ཉིད་མ་ཡིན་པ་དང་། གནས་ཐུན་མོང་དང་ཐུན་མོང་མ་ཡིན་པ་དང་། གཟུང་བ་དང་འཛིན་པ་སྣང་བ་མེད་པ་ལ་འཇུག་པས་སོ། །ཞེས་གསུངས་པ་དྲུག་པོ་འདིས་ཆོས་ལ་ལེགས་པར་འཇུག་པ་སྟེ། སྤང་བྱའི་ཚུལ་རྟོགས་པར་བྱེད་པ་ཐམས་ཅད་འདིར་འདུས་པའི་ཕྱིར་བསྟན་ཏོ། །རྒྱས་པར་བཤད་པ་ལ། དང་པོ་གསུམ་མདོར་བསྟན་དང་མཚུངས་པ་དང་། གནས་དང་། གཟུང་བ་དང་། འཛིན་པ་སྣང་བ་མེད་པ་ལ་འཇུག་པ་བཤད་པ་ལས། དང་པོ་ནི། དེ་ལ་མཚན་ཉིད་དང་། གྲུབ་པ་དང་། གཅིག་ཉིད་མ་ཡིན་ཞིང་སོ་སོ་བ་མ་ཡིན་པ་ནི་མདོ་ཅི་ལྟ་བ་བཞིན་ནོ། །ཞེས་པ་ནི་སྔར་མདོར་བསྟན་དུ་བསྟན་པ་ཁོ་ན་བཞིན་ཏེ། གཉིས་དང་ཅི་ལྟར་མངོན་པར་བརྗོད་བ་ནི། ཡང་དག་པ་མ་ཡིན་པའི་ཀུན་རྟོག་པ་ནི་ཆོས་ཀྱི་མཚན་ཉིད་དོ། །ཞེས་ཀུན་བརྟགས་དང་། གཞན་དབང་གི་མཚན་ཉིད་བསྡུས་པ་དེ་ཉིད་ཡིན་ནོ། །གྲུབ་པ་ནི་མེད་པ་དག་ལས་གང་ཡང་རུང་བ་ཞིག་མེད་ན་ནི་འཁྲུལ་པ་དང་མ་འཁྲུལ་བ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་མི་འཐད་པའི་ཉེས་པར་འགྱུར་བས་གནས་སྐབས་སུ་དེ་གཉིས་ཀ་ཁས་བླང་པ་འབྲས་བུ་དང་བཅས་པ་འགྲུབ་བོ། །གཅིག་དང་ཐ་དད་དུ་ཁས་མི་བླང་བ་ནི་ཡོད་པ་དང་མེད་པ་དག་ཁྱད་པར་ཡོད་པ་དང་། ཁྱད་པར་མེད་པའི་ཕྱིར་རོ། །ཞེས་ཆོས་དང་ཆོས་ཉིད་ཐ་དད་ཡོད་མེད་སྔར་མདོར་བསྟན་དུ་བཤད་ཟིན་པ་དེ་ཁོ་ནའོ།། །།ཆོས་ཀྱི་གནས་ལ་ཡང་མདོར་བསྟན་པ་དང་། རྒྱས་བཤད་གཉིས་ལས་དང་པོ་ནི། གང་ཞིག་གང་དུ་འཁོར་བ་དེ་ན་གནས་ཏེ། འཇིག་རྟེན་གྱི་ཁམས་དང་། སེམས་ཅན་གྱི་ཁམས་སོ། །ཞེས་པ་ནི། གང་ཞིག་འཁོར་བ་རྟེན་པའི་སེམས་ཅན་དག །གང་དུ་འཁོར་བ་འཇིག་རྟེན་གྱི་ཁ་མས་ཏེ། །གཉིས་ག་ཡང་ཀུན་གཞིའི་རྣམ་པར་ཤེས་པ་ལ་ཁམས་ཞེས་བསྟན་ཏེ། ས་བོན་ཐམས་ཅད་པའི་དོན་གྱིས་རྟེན་དང་། རྟེན་པའི་ཁམས་གཉིས་ཏེ། རྡོ་རྗེ་རྩེ་མོ་ལས། ས་བོན་ཀུན་ལྡང་ཀུན་གཞི་ནི། །ཕྱི་དང་ནང་གི་བདག་ཉིད་འདོད། །ཅེས་གསུངས་པ་ཡིན་ནོ། །རྒྱས་བཤད་ལ་ཐུན་མོང་དང་། ཐུན་མོང་མ་ཡིན་པ་གཉིས་ལས། དང་པོ་ནི། དེ་ལ་འཇིག་རྟེན་གྱི་ཁམས་ནི་ཐུན་མོང་པ་ལྟ་བུའི་རྣམ་པར་རིག་པ་སྟེ་ཞེས་པ་ནི། གང་ཡང་བདེན་པའི་ཕྱི་རོལ་གྱི་དོན་མུ་སྟེགས་བྱེད་ཁ་ཅིག་དང་། བྱེ་བྲག་ཏུ་སྨྲ་བ་འདོད་པ་ལྟ་བུ་ཕྱི་རོལ་ན་མེད་ཀྱང་། རྒྱུད་སོ་སོར་སེམས་ཅན་ཐམས་ཅད་ལ་དེར་སྣང་པའི་རྣམ་པར་ཤེས་པ་སྐྱེ་བའི་ཕྱིར། ཐུན་མོང་བ་ལྟ་བུའི་རྣམ་རིག་ཅེས་བྱའོ། །དེ་ཡང་དབྱིབས་དང་ཁ་དོག་ལ་སོགས་པ་ཁ་ཅིག་ཐུན་མོང་བ་ལྟར་སྣང་གི་ཐམས་ཅད་ཐུན་མོང་ནི་མ་ཡིན་ཏེ། དངོས་པོ་ཤིང་ལྟ་བུ་གཅིག་ལ་ཡང་། ཁ་ཅིག་གི་ནི་བཟང་བ་དང་། ཁ་ཅིག་ལ་ཡིད་དུ་མི་འོང་བ་དང་། ཐ་དད་དུ་སྣང་སྟེ། དེ་བཞིན་ཆུ་ལ་རྣག་ཁྲག་དང་། རོ་ཉེ་དང་ཆུ་དང་བདུད་རྩི་དང་། ཡི་དྭགས་དང་། དམྱལ་བ་དང་། མི་དང་། ལྷ་རྣམས་ཐ་དད་དུ་མཐོང་བ་འཇུག་པའི་ཕྱིར་རོ། །གཞན་ཡང་འཇིག་རྟེན་གྱི་ཁམས་ཕྱི་ན་དོན་བདེན་པ་ཡོད་ན། ཤེས་པ་དང་། བདག་གཅིག་པ་དང་། དེ་ལས་བྱུང་བའི་འབྲེལ་བ་གཉིས་ཀ་མི་རུང་བས་ཤེས་པ་ལ་སྣང་བར་མི་འགྱུར་ཏེ། དེར་སྣང་བ་ལ་ནི་དེའི་བདག་ཉིད་དམ། དེ་ལས་བྱུང་བ་ཡིན་པས་ཁྱབ་ལ། མ་འབྲེལ་ན་མི་སྣང་བས་ཀྱང་ཁྱབ་སྟེ། རྨི་ལམ་དང་མ་མཐོང་བའི་དངོས་པོ་བཞིན་ནོ། །གཉིས་པ་སེམས་ཅན་གྱི་ཁམས་བཤད་པ་ནི། སེམས་ཅན་གྱི་ཁམས་ཀྱང་ཐུན་མོང་དང་ཐུན་མོང་མ་ཡིན་པའོ་ཞེས་མདོར་བརྗོད་ནས། དེ་ཡང་རྒྱས་པར། དེ་ལ་སྐྱེ་བ་དང་། ཐ་སྙད་དང་། ཕན་པ་དང་། གནོད་པ་དང་། ཡོན་ཏན་དང་། སྐྱོན་ནི་ཕན་ཚུན་བདག་པོ་ཉིད་ཀྱིས་ན་ཕན་ཚུན་རྒྱུ་ཡིན་པའི་ཕྱིར་ཐུན་མོང་པའོ། །ཞེས་པ་ནི། སྐྱེ་བ་ནི་མངལ་ནས་སྐྱེ་བ་དང་། བདག་རྐྱེན་ལས་སྐྱེ་བ་དག་ཕན་ཚུན་ཐུན་མོང་གི་རྒྱུ་ཡིན་པ་དང་། ལྟ་བ་ལ་སོགས་པའི་ཐ་སྙད་དང་། ཕན་པར་བྱེད་པ་དང་། གནོད་པ་དང་། ཚུལ་ཁྲིམས་ལ་སོགས་པའི་ཡོན་ཏན་དང་། མི་དགེ་བའི་སྐྱོན་བསྐྱེད་པ་ནི། ཐུན་མོང་བ་ལྟ་བུ་ཞེས་བྱ་སྟེ། ཕན་ཚུན་རྒྱུ་ཡིན་པའི་ཕྱིར། ཞེས་བྱ་བ་ནི་གྲུབ་བཞིན་དུ་བདག་པོ་སྨོས་པ་ནི་དམིགས་པའི་རྒྱུ་བསལ་བའི་དོན་དུའོ། །དམིགས་པའི་རྒྱུ་མ་བསལ་ན་སྔ་མ་འཇིག་རྟེན་གྱི་ཁམས་ལ་ཁྱབ་ཆེས་པས་སོ། །ཐུན་མོང་མ་ཡིན་བ་བཤད་པ་ནི། གནས་དང་རྣམ་པར་རིག་པ་དང་ལས་དང་བདེ་སྡུག་དང་། འཆི་འཕོ་བ་དང་། སྐྱེ་བ་དང་། བཅིངས་པ་དང་གྲོལ་བ་ནི་ཐུན་མོང་མ་ཡིན་པའོ། །ཞེས་གསུངས་པ། གནས་ནི་ཀུན་གཞིའི་རྣམ་པར་ཤེས་པ་སྟེ། དེར་སྣང་བའི་རྣམ་པར་རིག་པའི་བག་ཆགས་རྣམས་ནི་དེ་ལ་གནས་པའི་ཕྱིར་རོ། །དེ་ནི་དཔེར་ན་རྒྱ་མཚོ་ནི་ཆུའི་གནས་ཡིན་ནོ་ཞེས་ཆར་ཆུ་དང་ཆུ་བོ་ཐམས་ཅད་བསགས་པ་དང་དེ་ལས་ཆར་ཆུ་འབྱུང་བ་བཞིན་ནོ། །རྣམ་པར་རིག་པ་ནི་འཇུག་པའི་རྣམ་པར་ཤེས་པ་དྲུག་པོ་སྟེ། ཡུལ་ལ་རྣམ་པར་རིག་པའི་ཕྱིར་རོ། །ལས་ནི་དགེ་བ་དང་མི་དགེ་བ་དང་། ལུང་དུ་མ་བསྟན་པའི་ལས་གསུམ་རྣམས་སོ། །དེ་བཞིན་དུ་སོ་སོ་བདེ་བ་དང་། སྡུག་བསྔལ་ཉམས་སུ་མྱོང་བ་དང་། འཆི་འཕོ་བ་དང་། སྲིད་པ་གསུམ་དུ་སྐྱེ་བ་དང་། ཉོན་མོངས་པས་རྒྱུད་བཅིངས་པ་དང་། དེ་ལས་གྲོལ་བ་རྣམས་ཐུན་མོང་མ་ཡིན་པའོ། །གནས་ལ་སོགས་པ་འདི་རྣམས་ནི་ལུས་ཅན་མ་ཡིན་པའི་ཕྱིར་དང་། སོ་སོ་རང་རིག་པར་བྱ་བ་ཡིན་པའི་ཕྱིར་ན་རྒྱུད་ཕན་ཚུན་སོ་སོར་སྣང་བའི་རྣམ་པར་རིག་པ་སྐྱེ་བའི་རྒྱུ་མ་ཡིན་པས། སེམས་ཅན་གྱི་ཁམས་ཐུན་མོང་མ་ཡིན་པ་ཞེས་བརྗོད་དོ། །ལུས་ངག་གི་རྣམ་པར་རིག་པ་དག་ཀྱང་། ཕན་ཚུན་དེར་སྣང་བའི་རྣམ་པར་རིག་པ་སྐྱེ་བའི་རྒྱུ་ཡིན་ཡང་། འདིར་ཐ་སྙད་ཀྱིས་མ་བསྡུས་པ་ཅིའི་ཕྱིར་ཞེ་ན། བཤད་པ་ལུས་ངག་གི་རྣམ་པར་རིག་པ་ཐ་སྙད་ཀྱིས་ནི་བསྡུས་མོད་ཀྱི། དེ་ལས་ཀྱི་རྣམ་པར་རིག་པ་མ་ཡིན་ནོ། །འདིར་ནི་དགེ་བ་དང་མི་དགེ་བ་ཉིད་གང་གིས་ལས་ཉིད་དུ་རྟོགས་པར་འགྱུར་བ་དེའི་དབང་དུ་བྱས་ཏེ་བསྟན་པ་ཡིན་ནོ། །དགེ་མི་དགེར་བསྟན་པའི་རྣམ་རིག་དེ་ཡང་། དེར་སྣང་བའི་རྣམ་རིག་སྐྱེ་བའི་རྒྱུ་མ་ཡིན་པས་ལུས་ངག་གི་ལས་ཀྱི་རྣམ་རིག་ཀྱང་ཐུན་མོང་མ་ཡིན་པ་ཉིད་དོ། །སྣང་བ་མེད་པ་ལ་འཇུག་པའི་ཚུལ་གཉིས་ཀྱི། གཟུང་བ་སྣང་བ་མེད་པ་ལ་འཇུག་པ་ནི། ཕྱི་རོལ་གྱི་གཟུང་བ་ཐུན་མོང་བར་སྣང་བ། འཇིག་རྟེན་པའི་རྣམ་རིག་པ་ལ་རྣམ་པར་ཤེས་པ་ལས་ཕྱི་རོལ་གྱི་དོན་མེད་དེ། ཐུན་མོང་བ་ཡིན་པའི་ཕྱིར་རོ། །ཞེས་བྱ་བ་ཕྱི་རོལ་གྱི་གཟུང་བ་དྲུག་ཡོད་ཀྱང་། འདིར་སྣོད་ཀྱི་རྣམ་རིག་བཤད་པས། གཞན་ཤུགས་ལ་གོ་བས། འཇིག་རྟེན་གྱི་ཁམས་ལྟ་བུ་སྣོད་ཀྱི་རྣམ་པར་རིག་པར་སྣང་བ་དེ། །འཛིན་པའི་རྣམ་པར་རིག་པ་ཉིད། རྒྱུད་སོ་སོ་ལ་སྐྱེ་བ་དེའི་ཕྱིར། རྣམ་རིག་དེ་ཉིད་ལས་གཞན་པའི་ཕྱི་དོན་གཞན་མེད་ལ། རྣམ་པར་རིག་པ་དེ་ཡང་། གཞན་གྱི་ཡུལ་དུ་གྱུར་པ་མ་ཡིན་ནོ། །དེ་ཅིའི་ཕྱིར་ཞེ་ན། རྣམ་རིག་སོ་སོ་ལ་སྐྱེ་བ་ཉིད་ཐུན་མོང་མ་ཡིན་ཏེ། རྨི་ལམ་གྱི་ཡུལ་སྣང་བཞིན་ནོ། །འོ་ན་ཅིའི་ཕྱིར་ཐུན་མོང་བ་ལྟ་བུ་ཞེས་བྱ་ཞེ་ན། སྐྱེས་བུ་གཉིས་གཉིད་ཀྱིས་ལོག་པའི་རྨི་ལམ་ན་མཐུན་པར་གསེར་བུམ་རྨིས་ནས། སད་པའི་ཚེ་ཡང་དབྱིབས་དང་ཁ་དོག་མཐུན་པ་དང་། ང་བདག་ཏུ་བྱས་པ་མཐུན་པ་ལྟ་བུ་ནི་ཐུན་མོང་བ་ལྟ་བུ་ཞེས་བྱ་ཏེ། ཡུལ་ཕྱི་དོན་མཐུན་པ་བདེན་པ་མེད་དོ། །ཕྱི་དོན་ཡོད་སྙམ་པ་དང་། ཕག་ན་དོན་ཡོད་སྙམ་པ་ལ་སོགས་པ་ཐམས་ཅད་ཀྱང་འཁྲུལ་པའི་བག་ཆགས་བརྒྱུད་གནས་པ་ལས་བྱུང་སྟེ་དོན་ནི་མེད་དོ། །འཕགས་པ་ལྷས་ཀྱང་། ཆ་ཤས་ཅན་ཞེས་བྱར་མེད་ཅིང་། །ཕྱི་རོལ་དོན་དུ་གྲུབ་པ་མེད། །སོ་སོར་སྣང་བ་དམིགས་སུ་མེད། །ཉམས་སུ་མྱོང་བ་རྨི་ལམ་འདྲ། །ཞེས་ཐག་པ་ལ་སྦྲུལ་མེད་པ་དང་། ཐག་པ་ཉིད་ཀྱང་སྤུ་དུ་མ་རྡུལ་ཕྲན་རྣམ་པར་ཕྱེ་ན་མི་བདེན་ཅིང་། སྣང་བ་ཙམ་ལས་གཞན་པའི་དོན་མི་འགྲུབ་པས། ཉམས་སུ་མྱོང་བ་ཐམས་ཅད་རྨི་ལམ་འདྲ་བར་བཤད་དོ། །ཕྱོགས་ཀྱི་གླང་པོས་ཀྱང་། །དབང་པོ་རྣམ་པར་རིག་པའི་རྒྱུ། ཕྱི་རོལ་རྡུལ་དག་ཡིན་མོད་ཀྱི། །དེར་མི་སྣང་ཕྱིར་དེའི་ཡུལ་ནི། །རྡུལ་ཕྲན་མ་ཡིན་དབང་པོ་བཞིན། །ཡུལ་ཞེས་བྱ་བ་ནི་ཤེས་པ་གང་གིས་རང་གི་ངོ་བོ་ཉེ་བར་འཛིན་པ་ཡིན་ཏེ། དེའི་རྣམ་པར་སྐྱེ་བ་ཡིན་པའི་ཕྱིར་རོ། །རྡུལ་ཕྲ་མོ་དག་དེའི་རྒྱུ་ཡིན་པར་འདོད་དུ་ཟིན་ཀྱང་། དེ་ལྟ་མ་ཡིན་ཏེ། དབང་པོ་བཞིན་ནོ། །དེ་ལྟར་ན་རེ་ཤིག་རྡུལ་ཕྲ་མོ་དག་དམིགས་པ་མ་ཡིན་ནོ། །འདུས་པ་ནི་དེར་སྣང་བ་དག་ཡིན་དུ་ཟིན་ཀྱང་། གང་ལྟར་སྣང་དེ་དེ་ལྟར་ཡིན། དོན་གང་ཞིག་རང་སྣང་བའི་རྣམ་པར་རིག་པ་བསྐྱེད་པ་དེ་ནི། དམིགས་པ་ཡིན་པར་རིགས་ཏེ། འདི་ལྟར་དེ་ནི་སྐྱེ་བའི་རྐྱེན་ཉིད་འཛིན་པ་ཡིན་ཏེ་བཤད་པས་སོ། །འདུས་པ་ནི་དེ་ལྟར་ཡང་མ་ཡིན་ཏེ། རྫས་སུ་མེད་ཕྱིར་ཟླ་གཉིས་བཞིན། དབང་པོ་མ་ཚང་བའི་ཕྱིར་ཟླ་བ་གཉིས་མཐོང་བ་ནི་དེར་སྣང་བ་ཡིན་དུ་ཟིན་ཀྱང་དེའི་ཡུལ་མ་ཡིན་ནོ། །དེ་བཞིན་དུ་རྫས་སུ་ཡོད་པ་མ་ཡིན་པ་ཉིད་ཀྱིས་རྒྱུ་མ་ཡིན་པའི་ཕྱིར་འདུས་པར་དམིགས་པ་མ་ཡིན་ནོ། །དེ་ལྟར་ཕྱིར་རོལ་གཉིས་ཀ་ཡང་། །བློའི་ཡུལ་དུ་མི་རུང་ངོ་། །ཞེས་གསུངས་ཏེ། འདི་ནི་རིགས་པ་ཐམས་ཅད་བསྟན་ཏོ། །འདི་ལྟར་རྟོགས་ན་བཟུང་བ་མེད་པའི་དོན་དུ་མེད་པ་ལ་འཇུག་པ་ཡིན་ནོ། །ཐུན་མོང་བའི་གཟུང་བ་མེད་ནའང་ཐུན་མོང་མ་ཡིན་པའི་དོན་གཟུང་བ་བདེན་པ་ཡོད་དམ། ཞེ་ན་གསུངས་པ། ཐུན་མོང་མ་ཡིན་པའི་གཟུང་བའམ་རྣམ་པར་རིག་པའི་དོན་གང་ཡིན་པ། གཞན་གྱི་སེམས་དང་སེམས་ལས་བྱུང་བ། མཉམ་པར་མ་བཞག་པ་དང་། མཉམ་པར་བཞག་པའི་འཛིན་པའི་རྣམ་པར་རིག་པ་གཉིས་ག་ཡང་ཕན་ཚུན་ཡུལ་དུ་གྱུར་པ་མ་ཡིན་ཏེ། ཞེས་ཐུན་མོང་མ་ཡིན་པའི་རྣམ་རིག་ཐ་དད་གཉིས། གཅིག་གི་ཡུལ་དུ་གཅིག་འགྱུར་རོ། །སྙམ་པ་ཡི་འཁྲུལ་པ་སེལ་བའི་དོན་དུ་བསྟན་ཏེ། དེ་ཅིའི་ཕྱིར་ཞེ་ན། མཉམ་པར་མ་བཞག་པ་ལ་ནི་རང་གི་རྣམ་པར་རྟོག་པ་སྣང་བའི་ཕྱིར་དང་། མཉམ་པར་བཞག་པ་ལ་ཡང་། ཏིང་ངེ་འཛིན་གྱི་སྤྱོད་ཡུལ་དེའི་གཟུགས་བརྙན་སྣང་བའི་ཕྱིར། དེ་ཡི་ཡུལ་གཞན་གྱི་སེམས་ལ་སོགས་པ་མ་ཡིན་ནོ། །ཞེས་གསུངས་ཏེ། མཉམ་པར་མ་བཞག་པ་ལ་རང་གི་རྣམ་པར་རྟོག་པ་ལ་སྣང་བའི་གཟུང་བ་རང་གི་རྣམ་པར་རིག་པ་ཉིད་ཡུལ་དུ་འགྱུར་པ་དེའི་ཕྱིར། གཞན་གྱི་སེམས་ལ་སོགས་པ་དེའི་ཡུལ་མ་ཡིན་ནོ། །འཇིག་རྟེན་པའི་མཉམ་པར་བཞག་པའི་རྣམ་པར་རིག་པ་ལ་ཡང་། ཏིང་ངེ་འཛིན་གྱི་སྤྱོད་ཡུལ་དེའི་གཟུགས་བརྙན་དུ་སྣང་བ་གཟུང་བའི་རྣམ་པར་རིག་པ་ཉིད། ཡུལ་དུ་གྱུར་པ་དེའི་ཕྱིར་དེའི་ཡུལ་ཡང་གཞན་གྱི་སེམས་ལ་སོགས་པ་མ་ཡིན་ནོ། །དེ་ལྟར་གཉིས་ཀ་ལ་གཞན་ཡུལ་མེད་ན་སྣང་བ་དེ་གང་ཡིན་ཞེ་ན། རང་གི་རྣམ་པར་རིག་པ་ཉིད་ཡུལ་ཡིན་པའི་ཕྱིར། རྣམ་པར་ཤེས་པ་ལས་གཞན་པའི་ཕྱི་རོལ་གྱི་དོན་མེད་ལ། དེ་མེད་པའི་ཕྱིར་གཟུང་བར་སྣང་བ་བདེན་པར་མེད་དོ། །ཞེས་འགྲེལ་པར་བྱུང་ངོ་། །འཛིན་པ་སྣང་བ་མེད་པ་ལ་འཇུག་པ་ནི། གཟུང་བར་སྣང་བ་དེ་མེད་པར་གྲུབ་ན་ཡང་། འཛིན་པར་སྣང་བ་མེད་པར་གྲུབ་སྟེ། དེ་ལས་ཀྱང་གཟུང་བ་དང་འཛིན་པ་སྣང་བ་མེད་པ་ལ་འཇུག་གོ །ཞེས་གསུངས་སྟེ། གཟུང་བའི་དོན་མི་བདེན་ན། དེ་འཛིན་པའི་ཤེས་པ་འཁྲུལ་པ་ཡིན་པས་འཛིན་པ་མི་བདེན་བར་གྲུབ་པས་ན། བཟུང་འཛིན་གཉིས་ཀྱི་དོན་བདེན་པ་ཐ་དད་པ་མེད་པར་ཤེས་པས། གཟུང་འཛིན་སྣང་བ་མེད་པ་ལ་འཇུག་སྟེ། གཉིས་སུ་མེད་པ་ལ་ཐ་སྙད་ཀྱི་མཚན་མས་མ་གོས་པའི་ཕྱིར། བརྗོད་དུ་མེད་པར་འགྱུར་རོ། །མངོན་པར་རྟོགས་པའི་རྒྱན་ལས་ཀྱང་། གལ་ཏེ་གཟུང་དོན་དེ་བཞིན་མེད། །དེ་དག་གང་གིས་འཛིན་པར་འདོད། །དེ་ལྟར་དེ་དག་འཛིན་པ་ཡི། །ངོ་བོས་སྟོང་བའི་བདག་ཉིད་དོ། །ཞེས་གསུངས་སོ། །དཔལ་ཆོས་ཀྱི་གྲགས་པས་ཀྱང་། དོན་དངོས་མེད་པར་སྣང་ཅན་དེ། །ཅི་ལྟར་དོན་འཛིན་ཅེ་ན་བདེན། །ངས་ཀྱང་དེ་འདྲ་མི་ཤེས་སོ། །ཞེས་ཕྱི་དོན་མེད་པའི་སྣང་བ་དོན་འཛིན་པ་རང་མི་འཐད་དོ་ཞེ་ན། བདེན་ནོ། །བཟུང་འཛིན་མེད་པར་དོན་སྣང་བ་སོ་སོའི་སྐྱེ་བོས་རྟོགས་མི་ནུས་སོ། །ཞེས་བསྟན་པ་ཡིན་ནོ། །དེ་ལྟ་ན་ཡང་བཟུང་འཛིན་གཉིས་ཀྱི་དོན་བདེན་པ་མེད་བཞིན་དུ་སྣང་བ་འདི་ཅི་ཡིན་ཞེ་ན། ཐོག་མ་མེད་པའི་ཀུན་ནས་ལྡང་བ་རབ་ཏུ་གྲུབ་པའི་ཕྱིར་རོ། །ཞེས་གསུངས་ཏེ། ཐོག་མ་མེད་པ་ནི་གཉིས་ཏེ། དུས་བརྒྱུད་པའི་སྔོན་གྱི་མཐའི་ཐོག་མ་མེད་པ་དང་། བདེན་པའི་རྫས་ཐོག་མར་མེད་པ་སྟེ། འདི་ནི་གཉིས་ག་ཡིན་ཏེ། བག་ཆགས་འཁྲུལ་པ་བརྒྱུད་པ་ཡང་མཐའ་མེད་དེ། འཁོར་བའི་ཐོག་མཐའ་མེད་པའི་ཕྱིར་རོ། །མེད་བཞིན་གཉིས་སྣང་བ་ནི། སྒྱུ་མ་དང་མིག་ཡོར་བཞིན་རྟོག་པ་ཙམ་ཉིད་པས་དོན་བདེན་པར་གྲུབ་མི་སྲིད་དོ། །གལ་ཏེ་འཁོར་བའི་འཁྲུལ་པ་ལ་དོན་བདེན་པ་ཡོད་ན་ནི་སྐྱོན་ཆེན་པོ་སྟེ། མདོ་སྡེ་རྒྱན་ལས། གོམས་པ་ཐོག་མ་མེད་དུས་ཅན། །བདག་ཏུ་ལྟ་བ་བསྐྱེད་མི་དགོས། །གང་ཟག་ཡོད་ན་ཐམས་ཅད་ནི། །འབད་མེད་ཐར་པའམ་ཐར་པ་མེད། །ཅེས་གསུངས་ཏེ། གང་ཟག་དང་བདག་བདེན་ན་ཐར་པ་གཏན་མི་འཐོབ་པ་དང་། དེ་རང་ཐར་པ་ཡིན་ན་ནི་འབད་པ་མེད་པར་གྲོལ་བར་འགྱུར་བས་ལོག་པ་ཡིན་ནོ། །འདི་ལྟར་ཆོས་ལ་ཞུགས་ན་ཆོས་ཀྱི་དོན་ཡིན་ཏེ་གསུངས་པ། གཉིས་ཡོངས་སུ་མ་གྲུབ་པར་རབ་ཏུ་གྲུབ་པའི་ཕྱིར་རོ། །ཞེས་ཀུན་བརྟགས་དང་གཞན་གྱི་དབང་གཉིས་ཡོངས་སུ་བདེན་པར་མ་གྲུབ་པར་ཤེས་པས། ཆོས་རྣམས་ལ་བརྟེན་ནས་ཆོས་ཉིད་ཀྱི་རྟེན་འབྲེལ་མཐོང་བ་ཞེས་བྱའོ། །དབུས་མཐའ་ལས་ཀྱང་། གལ་ཏེ་ཉོན་མོངས་དེ་མ་གྱུར། །ལུས་ཅན་ཐམས་ཅད་གྲོལ་བར་འགྱུར། །གལ་ཏེ་རྣམ་དག་དེ་མ་གྱུར། འབད་པ་འབྲས་བུ་མེད་པར་འགྱུར། །ཉོན་མོངས་ཡིན་མི་མོངས་མིན། །དེ་ནི་དག་དང་མ་དག་མིན། །ཞེས་གསུངས་སོ། །འཕགས་པ་ཀླུ་གྲུབ་ཀྱིས་ཀྱང་། །རྟེན་ཅིང་འབྲེལ་འབྱུང་གང་ཡིན་པ། དེ་ལ་སྔོན་དང་ཐ་མ་ཅི། །སྔོན་སྐྱེས་པ་ནི་ཅི་ལྟ་བུར། །ཕྱི་ནས་རབ་ཏུ་ལྡོག་པར་འགྱུར། །སྔོན་དང་ཕྱི་མའི་མཐའ་སྤངས་པས། །འགྲོ་བ་སྒྱུ་མ་བཞིན་དུ་སྣང་། །ཞེས་གསུངས་ཤིང་། རྒྱས་པར་དགོངས་པ་ངེས་པར་འགྲེལ་པ་དང་ས་སྡེ་ལས་གསུངས་སོ། །ཆོས་ལ་འཇུག་པ་བླ་ན་མེད་པ་བཤད་ཟིན་ཏོ།། །།གཉིས་པ་ཆོས་ཉིད་ལ་འཇུག་པ་ལས། སྤྱིར་བསྟན་པ་དང་། རྒྱས་བཤད་གཉིས་ལས་དང་པོ་ནི། རྣམ་པ་དྲུག་གིས་ཆོས་ཉིད་ལ་འཇུག་པ་བླ་ན་མེད་པ་ཡིན་ཏེ། ཞེས་གསུངས་པ་ནི་འཆད་པར་འགྱུར་བ་འདི་དྲུག་སྟེ། དེ་ཡང་། མཚན་ཉིད་དང་། གནས་དང་། ངེས་པ་རྟོགས་པ་དང་། རེག་པ་དང་། རྗེས་སུ་དྲན་པ་དང་། དེའི་བདག་ཉིད་དུ་ཉེ་བར་སོན་པ་ལ་འཇུག་པས་སོ། །ཞེས་གསུངས་འདི་རྣམས་བསྡུས་ནས་བསྟན་ཏོ། །རྒྱས་པར་བཤད་པ་ལ་བདུན་སྟེ། མཚན་ཉིད་དང་། ཆོས་ཉིད་ཀྱི་གནས་དང་། སྦྱོར་ལམ་དང་། མཐོང་ལམ་དང་། བསྒོམ་པའི་ལམ་རྗེས་སུ་དྲན་པ་དང་། ཉེ་བར་སོན་པ་མཐར་ཐུག་གི་ལམ་དང་། དེ་རྣམས་ཀྱི་གནས་འགྱུར་བཤད་པའོ། །དང་བོ་ནི། མཚན་ཉིད་ནི་མདོའི་ཅི་ལྟ་བ་བཞིན་ནོ་ཞེས་སྔར་གསུངས་པའི་གཟུང་བ་དང་། འཛིན་པ་དང་བརྗོད་པར་བྱ་བ་དང་། བརྗོད་པར་བྱེད་པ་ཁྱད་པར་མེད་པ་ནི་དེ་བཞིན་ཉིད་དེ། ཆོས་ཉིད་ཀྱི་མཚན་ཉིད་དོ། །ཞེས་ཡོངས་སུ་གྲུབ་པའི་ངོ་བོ་སྟེ། འདི་ལ་མདོ་རྒྱུད་ཐམས་ཅད་ནས་མིང་གི་རྣམ་གྲངས་དུ་མ་གསུངས་ཏེ། དཔལ་ནཱ་རོ་པས། སྟོང་པ་དེ་ཉིད་རིག་པ་སེམས། བྱང་ཆུབ་སེམས་ཀྱང་དེ་ཉིད་དོ། །བདེ་གཤེགས་སྙིང་པོའང་དེ་ཉིད་དེ། །བདེ་བ་ཆེན་པོའང་དེ་ཉིད་ཡིན། གསང་སྔགས་ཞེས་བྱ་དེ་ཉིད་ལ། །ཚད་མའི་བདེན་པའང་དེ་ཉིད་ཡིན། །བཞི་པའི་དབང་ཡང་དེ་ཡིན་ཏེ། །ལྷན་ཅིག་སྐྱེས་དགའ་དེ་ཉིད་དོ། །ཕ་རོལ་ཕྱིན་པའང་དེ་ཡིན་ལ། །ཟུང་འཇུག་པའང་དེ་ཉིད་ཡིན། །དབུ་མ་ཆེན་པོའང་དེ་ཁོ་ན། །རྣམ་པར་སྣང་མཛད་དེ་ཡིན་ཏེ། །རྡོ་རྗེ་སེམས་དཔའང་དེ་ཡིན་ནོ། །རིགས་དྲུག་པའང་དེ་ཉིད་དོ། །སངས་རྒྱས་རིགས་ཀྱང་དེ་ཉིད་ཡིན། །དེ་ལ་སོགས་པ་མདོ་རྒྱུད་ལས། །རྣམ་གྲངས་དུ་མ་གསུངས་པ་རྣམས། །ཕལ་ཆེར་འདི་ལ་བརྟེན་པ་ཡིན། །ཞེས་གསུངས་སོ། །འདི་ལ་ཆོས་ཐམས་ཅད་ངོ་བོ་ཉིད་མེད་པ་ཞེས་འཕགས་པ་ཀླུ་གྲུབ་ཀྱིས་གསུངས་པའི་དོན་ནི། ཆོས་ཐམས་ཅད་ཀྱི་རང་བཞིན་ངོ་བོས་མི་སྐྱེ་ངོ་བོས་མི་འགག །རྒྱུ་མཚན་འདིས་རྟག་ཆད་དང་འགྲོ་འོང་དང་། གཅིག་དང་ཐ་དད་དུ་བདེན་པ་མེད་པས་སྤྲོས་པ་དང་བྲལ་བའོ། །དེའི་ཕྱིར་ཆོས་ཐམས་ཅད་ཀྱང་ཡིན་ལ། ངོ་བོ་ཉིད་མེད་པ་ཡང་ཡིན་ནོ། །རྣམ་གྲངས་ཀྱི་མཚན་ཉིད་ངོ་བོ་ཉིད་མེད་པ་དང་། སྐྱེ་བའི་ངོ་བོ་ཉིད་མེད་པ་དང་། རང་བཞིན་ངོ་བོ་ཉིད་མེད་པ་ཞེས་ཀུན་བརྟགས་གཞན་དབང་ཡོངས་གྲུབ་ལ་བརྟེན་ནས་གསུངས་ཤིང་། འདི་ལས་སྟོང་པ་ཉིད་ཐམས་ཅད་ཀྱང་རྣམ་པར་ཕྱེ་བར་རིག་པར་བྱའོ། །གཉིས་པ་གནས་ནི། དེ་ལ་གནས་ནི་ཆོས་ཐམས་ཅད་དང་གསུང་རབ་ཡན་ལག་བཅུ་གཉིས་སུ་གཏོགས་པའི་མདོ་སྡེ་ཐམས་ཅད་དོ་ཞེས་གསུངས་ཏེ། ཆོས་ཐམས་ཅད་ནི་སྔར་བསྟན་པའི་ཆོས་ཐམས་ཅད་ཀྱང་ཆོས་ཉིད་ཀྱི་གནས་ཏེ། ཆོས་དེ་རྣམས་རང་དང་སྤྱིའི་མཚན་ཉིད་ཀྱིས་སྟོང་པ་དེ་ཉིད་ཆོས་ཉིད་ཡིན་པའི་ཕྱི་རོ། །དེ་ཡང་། གཞན་དབང་ལ་ནི་བརྟགས་པ་མེད། །ཡོངས་སུ་གྲུབ་པ་དེ་ན་ཡོད། །དེ་ཕྱིར་དེ་ལ་གཉིས་ཀ་ཡང་། །མི་དམིགས་དམིགས་པ་མཉམ་དུ་བྱུང་། །ཞེས་ཐེག་བསྡུས་ལས་གསུངས་པ། ཀུན་ནས་ཉོན་མོངས་པའི་ཆོས་རྣམས་ལས་རྣམ་པར་གྲོལ་བ་ན། གཞན་དབང་རྣམ་པར་རིག་པ་ཙམ་དེ་ཀུན་བརྟགས་མེད་པར་གྱུར་པས་རྣམ་པར་བྱང་བའི་ཆོས་ཀྱིས་མཁྱུད་པའི་རྣམ་རིག་གནས་གྱུར་ནས་ཡོངས་གྲུབ་ཏུ་འགྱུར་བའི་ཕྱིར། ཀུན་བརྟགས་གཞན་དབང་གཉིས་ཀ་ཡང་མི་དམིགས་པ་དང་། ཆོས་ཉིད་དམིགས་པ་མཉམ་པར་འབྱུང་ངོ་། །དེའི་ཕྱིར་འཁོར་བའི་ཆོས་ཐམས་ཅད་ཀྱང་ཆོས་ཉིད་ཀྱི་གནས་ཡིན་ནོ། །རྣམ་པར་བྱང་བའི་ཆོས་ནི་གསུང་རབ་ཡན་ལག་བཅུ་གཉིས་སྟེ། མདོའི་སྡེ་དང་། དབྱངས་ཀྱིས་བསྙད་པ་དང་། ལུང་དུ་བསྟན་པ་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། གླེང་གཞི་དང་། རྨད་དུ་བྱུང་བ་དང་། ཚིགས་སུ་བཅད་པ་དང་། མཆེད་དུ་བརྗོད་པ་དང་། རྟོགས་པ་བརྗོད་པ་དང་། གཏན་ལ་དབབ་པ་དང་། ཤིན་ཏུ་རྒྱས་པའི་སྡེ་རྣམས་ཏེ། འདི་རྣམས་ནི་སངས་རྒྱས་ཀྱི་ཆོས་རྣམ་པར་དཀར་བ་ཟག་པ་མེད་པའི་ཆོས། ཆོས་ཀྱི་སྐུའི་རྒྱུ་མཐུན་པ་སྟེ། ཆོས་ཉིད་ཀྱི་གནས་ཉིད་དོ། །དེ་ལྟར་གཉིས་ག་ཡང་ཆོས་ཉིད་ཀྱི་གནས་སུ་བཤད་པ་ནི་སོ་སོ་རང་གིས་རིག་པར་བྱ་བ་ལ་བལྟོས་ནས་གསུངས་ཏེ། སྤང་བྱ་དང་གཉེན་པོའི་མིང་ཚིགས་ཡི་གེ་ལྡན་པ་མ་ཡིན་པའི་འདུ་བྱེད་ཀྱི་བྱེ་བྲག་བ་བསམ་གཏན་མཐར་ཐུག་པ་ཐོབ་པས་སྟོང་གཅིག་ཏུ་རྫུ་འཕྲུལ་འབྱིན་པ་དང་། རང་རྒྱལ་སྟོང་གསུམ་གཅིག་གཡོ་བས་བསམ་གཏན་ཐམས་ཅད་ཐོབ་ཅེས་བྱ་བ་བྱིས་པའི་ཚིག་གོ །གླིང་བཞིའི་དབང་བསྒྱུར་བའི་འཁོར་ལོས་སྒྱུར་བའི་འཛམ་གླིང་ལ་མི་དབང་སྟེ། སྟོབས་ཀྱི་འཁོར་ལོས་སྒྱུར་གྱིས་འཛམ་གླིང་དབང་བྱེད་དོ་ཞེས་སྨྲ་བ་བཞིན་ནོ། །འཕྲོས་པ་ཆོག་གོ །ཤེས་བྱའི་སྒྲིབ་པ་ཡང་ས་བཅུ་ལ་རྣམ་པར་མི་རྟོག་པའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་རྫོགས་པར་བྱེད་པའི་སྤང་གཉེན་དུ་གསུངས་ཏེ། དབུས་མཐར། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུ་རྣམས་ཐ་དད་མེད་དོན་དང་། །ཉོན་མོངས་རྣམ་དག་མིན་དོན་དང་། །ཐ་དད་མེད་པའི་དོན་ཉིད་དང་། །འབྲི་མེད་འཕེལ་བ་མེད་དོན་དང་། །དབང་ནི་རྣམ་པ་བཞིའི་གནས། །ཆོས་ཀྱི་དབྱིངས་ལ་མ་རིག་པ། ཉོན་མོངས་ཅན་ཡིན་སྒྲིབ་པ་བཅུ། །ས་བཅུའི་མི་མཐུན་ཕྱོགས་རྣམས་ཀྱི། །གཉེན་པོ་དག་ནི་ས་ཡིན་ནོ། །ཞེས་གསུངས་པའི་འགྲེལ་པར་ཡང་། ཀུན་ཏུ་འགྲོ་བའི་དོན་ལ་སོགས་པ་ཆོས་ཀྱི་དབྱིངས་རྣམ་པ་བཅུ་ལ། ཉོན་མོངས་པ་ཅན་མ་ཡིན་པའི་མི་ཤེས་པ་གང་ཡིན་བ་དེ་ནི་བྱང་ཆུབ་སེམས་དཔའི་ས་བཅུ་ལ་གོ་རིམ་བཞིན་དུ་བསྒྲིབ་སྟེ། དེའི་མི་མཐུན་བའི་ཕྱོགས་སུ་གྱུར་པའི་ཕྱིར་རོ། །འདི་ལྟ་སྟེ། ས་དང་པོ་ལ་ནི་ཆོས་ཀྱི་དབྱིངས་ཀུན་ཏུ་འགྲོ་བའི་དོན་ལ། ཀུན་ཏུ་འགྲོ་བའི་དོན་དུ་རྟོགས་ཏེ། དེས་བདག་དང་གཞན་མཉམ་པ་ཉིད་རབ་ཏུ་འཐོབ་བོ། །གཉིས་པ་ལ་ནི་མཆོག་གི་དོན་དུ་རྟོགས་ཏེ། དེས་འདི་སྙམ་དུ་སེམས་ཏེ། དེ་ལྟ་བས་ན་བསྒྲུབ་ཏུ་མཚུངས་པ་ལ། བདག་གིས་རྣམ་པ་ཐམས་ཅད་དུ་ཡོངས་སུ་སྦྱང་བ་མངོན་པར་བསྒྲུབ་པ་ཉིད་ལ་བརྩོན་པར་བྱའོ། །སྙམ་དུ་བསམ་མོ། །གསུམ་པ་ནི་དེའི་རྒྱུ་མཐུན་པའི་དོན་དུ་མཆོག་ཏུ་རྟོགས་ཏེ། དེ་ཐོས་པ་མཆོག་ཏུ་རིག་ནས། དེས་ལེགས་པར་གསུངས་པའི་ཚིགས་བཞི་ཙམ་གྱི་ཕྱིར་སྟོང་གསུམ་མེས་གང་བར་ཡང་འཕྱོང་ངོ་། །བཞི་པ་ལ་ནི། ཡོངས་སུ་འཛིན་པ་མེད་པར་རྟོགས་ཏེ། དེའི་ཆོས་ཀྱི་དབྱིངས་ཀྱི་རྒྱུ་ཆོས་ལ་སྲེད་པ་ཡང་ལྡོག་གོ །ལྔ་པ་ལ་ནི། རྒྱུ་ཐ་དད་མེད་པའི་དོན་དུ་རྟོགས་ཏེ། རྣམ་པར་དག་པ་ལ་སེམས་ཅན་གྱི་བསམ་པ་རྣམ་པར་དག་པ་མཉམ་པ་ཉིད་བཅུས་རྟོགས་སོ། །དྲུག་པ་ལ་ནི། ཆོས་ཀྱི་དབྱིངས་ཀུན་ནས་ཉོན་མོངས་པ་དང་། རྣམ་པར་དག་པ་མ་ཡིན་པའི་དོན་དུ་རྟོགས་ཏེ། རྟེན་ཅིང་འབྲེལ་བར་འབྱུང་བ་ལ་དེ་གཉིས་ཀ་མེད་པར་རབ་ཏུ་རྟོག་བའི་ཕྱིར་རོ། །བདུན་པ་ལ་ནི་ཐ་དད་མེད་པའི་དོན་དུ་རྟོགས་ཏེ། མཚན་མ་མེད་པས་མདོ་ལ་སོགས་པའི་ཆོས་ཀྱི་མཚན་མ་ཐ་དད་པ་མི་འབྱུང་བའི་ཕྱིར་རོ། །བརྒྱད་པ་ལ་ནི། འབྲི་བ་མེད་ཅིང་འཕེལ་བ་མེད་པའི་དོན་དུ་རྟོགས་ཏེ། མི་སྐྱེ་བའི་ཆོས་ལ་བཟོད་པས། ཉོན་མོངས་དང་རྣམ་བྱང་འཕེལ་འགྲིབ་མེད་པར་རྟོགས་པའི་ཕྱིར་རོ། །ཞེས་གསུངས་སོ། །དབང་རྣམ་པ་བཞི་སྟེ། རྣམ་པར་མི་རྟོག་པ་ལ་དབང་བ་དང་། ཞིང་ཡོངས་སུ་དག་པ་ལ་དབང་བ་དང་། ཡེ་ཤེས་ལ་དབང་བ་མངོན་དུ་བྱེད་པའི་ཆ་དང་མཐུན་པའོ། །དེ་ཡང་། མཚན་མེད་རབ་ཏུ་སྦྱིན་ལ་སོགས། །ཡང་དག་བསྒྲུབ་པ་མཁས་པ་ནི། །རྣམ་པ་ཐམས་ཅད་རྟོགས་འདི་ལ། །ཐར་པའི་ཆ་དང་མཐུན་པར་འདོད། །སངས་རྒྱས་སོགས་མིག་དད་པ་དང་། །སྦྱིན་སོགས་སྤྱོད་ཡུལ་བརྩོན་འགྲུས་དང་། །བསམ་པ་ཕུན་ཚོགས་དྲན་པ་དང་། །རྣམ་པར་མི་རྟོག་ཏིང་འཛིན་དང་། །ཆོས་རྣམས་རྣམ་པ་ཐམས་ཅད་དུ། །ཤེས་པའི་ཤེས་རབ་དང་རྣམ་ལྔ། །ཞེས་དད་སོགས་ཆོས་ལྔ་དང་ལྡན་པ་རྨད་དུ་བྱུང་བ་ཡོད་པས་སངས་རྒྱས་ཐོབ་ལ། མོས་པ་དམན་པ་ཐེག་པ་དམན་པར་ལྷུང་སྟེ། །རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་རཏལ་པོས་རྟོགས་དཀར་བཞེད། །ཅེས་བྱམས་པས་གསུངས་སོ། །འདིར་ངེས་པར་རྟོག་པའི་སྦྱོར་ལམ་ནི། ཐེག་པ་ཆེན་པོ་མདོ་སྡེ་ཤིན་ཏུ་རྒྱས་པའི་མདོ་དང་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་ལ་བརྟེན་ནས་ཚུལ་བཞིན་དུ་ཡིད་ལ་བྱེད་པས་འགྲུབ་པས། ངེས་པར་འབྱེད་པའི་ཡན་ལག་བཞི་ཀ་བསྡུས་པས་སྦྱོར་བའི་ལམ་ཐམས་ཅད་ཅེས་བྱའོ། །ཅི་ལྟར་ཞེ་ན་ཤེས་བྱ་མཚན་ཉིད་དག་པ་ཉིད་དང་། སུས་འཇུག་པ་དང་། གང་དུ་འཇུག་པ་དང་། ཅི་ལྟར་འཇུག་པ་དང་། འཇུག་པའི་རིམ་པ་དང་བཅས་པ་ལྔ་ཤེས་པར་བྱ་སྟེ། དང་པོ་ནི་ཐེག་བསྡུས་ལས། ཤེས་བྱའི་མཚན་ཉིད་ལ་འཇུག་པ་ནི་མང་དུ་ཐོས་པས་བསྒོམ་པའི་གནས། ཀུན་གཞིའི་རྣམ་པར་ཤེས་པས་བསྡུས་པ་མ་ཡིན་པ། ཀུན་གཞིའི་རྣམ་པར་ཤེས་པ་ལྟར་ཚུལ་བཞིན་ཡིད་ལ་བྱེད་པས་བསྡུས་པའི་ཆོས་དང་དོན་སྣང་བ་འབྱུང་བའི་ཚུལ་ཅན། བཟུང་བའི་དངོས་པོའི་གནས་ལྟ་བུ་ལྟ་བ་དང་བཅས་པའི་ཡིད་ཀྱི་བརྗོད་པ་རྣམས་ཀྱི་ཀུན་གཞིའི་རྣམ་པར་ཤེས་པ་ལྟར་ས་བོན་ཡིན་པའོ། །ཞེས་གསུངས་པ་འདི་ནི་རིགས་ཞེས་བྱ་སྟེ། ངོ་བོ་ནི་ཆོས་དབྱིངས་དྲི་མ་མེད་པ་ཡིན་ལ། དེའི་རྒྱུ་མཐུན་པ་ནི་ཟག་མེད་ཀྱི་ཆོས་ཀྱི་ཁྱད་པར་ནི་སྐྱེ་མཆེད་དྲུག་དང་ལྷན་ཅིག་པས་རིགས་སྐྱེ་མཆེད་དྲུག་གི་ཁྱད་པར་ཞེས་ཀྱང་བྱང་ས་ལས་བྱུང་ངོ་། །དེས་ན་མངོན་རྟོགས་རྒྱན་ལས་ཀྱང་། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །རྟེན་པའི་ཆོས་ཀྱི་བྱེ་བྲག་གིས། །དེའི་དབྱེ་བ་ཡོངས་སུ་བརྗོད། །ཅེས་རྟེན་པ་ནི་སངས་རྒྱས་ཀྱི་བྱང་ཆུབ་ལ་བརྟེན་པའི་ཐོས་པའི་བག་ཆགས་སད་པ་ལ་མོས་པ་རབ་འབྲིང་ཐ་མ་སྐྱེ་བ་ལ་བརྗོད་པ་ཡིན་ནོ། །རྒྱུད་བླ་མ་ལས་ཀྱང་། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་གཉིས་ཡིན་ནོ། །རིགས་དེ་གཉིས་ལ་སངས་རྒྱས་ཀྱི། །སྐུ་གསུམ་ཐོབ་པར་བྱེད་པ་སྟེ། དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་རྒྱུ་མཐུན་པ་ཆོས་ཀྱི་སྐུ་ལ་བརྟེན་པའི་ཆོས་དོན་སྣང་བ་འཕེལ་ཞིང་རྒྱལ་པ་ལྟར་སྣང་བས་རྒྱས་པ་ཞེས་བྱ་སྟེ། དེས་ན། །ཆོས་ལ་མོས་པ་ས་བོན་དང་། ཕ་རོལ་ཕྱིན་མཆོག་མ་ལས་སྐྱེས། །ཞེས་རྒྱས་པ་མོས་པའི་ཚུལ་ལས་བྱུང་བ་ཡང་། ཕ་རོལ་ཏུ་ཕྱིན་པ་དང་། རྣམ་པར་མི་རྟོག་པ་དང་། སྙིང་པོའི་ཁམས་རྣམས་དོན་གཅིག་པས་དེ་ལས་སྐྱེས་པ་ཞེས་བྱ་ལ། གང་གིས་རྒྱས་པ་ཡང་། །བསམ་གཏན་ལས་བྱུང་བདེ་བ་མངལ། །སྙིང་རྗེས་བསྐྱེད་པ་མ་མའོ། །བསམ་གཏན་དང་ཏིང་ངེ་འཛིན་ནི་རང་གཞན་ལ་བདེ་བ་སྐྱེད་ལ། སྙིང་རྗེས་ཞི་བར་མི་ལྟུང་བར་སྐྱེད་པས། གང་ཡིན་འདི་དག་ཐུབ་པའི་རྗེས་སུ་སྐྱེས་པའི་སྲས་སོ། །ཞེས་གསུངས་སོ། །འདི་ནི་ཤེས་བྱའི་མཚན་ཉིད་དག་པའོ། །འདི་ལ་སུས་འཇུག་པ་ནི་ཐེག་བསྡུས་ལས། སེམས་ཀྱི་རྒྱུད་ཐེག་པ་ཆེན་པོའི་ཆོས་མང་དུ་ཐོས་པས་བསྒོམ་པ། སངས་རྒྱས་འབྱུང་བ་ཚད་མེད་པ་གཅིག་ཏུ་མཉེས་པར་བྱ་བའི་མོས་པ་ཐོབ་པ་ཅན། དགེ་བའི་རྩ་བ་ཚོགས་གཉིས་ལེགས་པར་བསགས་བའི་བྱང་ཆུབ་སེམས་དཔའོ་ཞེས་སོ། །གང་དུ་འཇུག་པ་ཡང་དེ་ཉིད་ལས། ལྟ་བ་དང་བཅས་པའི་ཆོས་དང་། དོན་སྣང་བའི་ཡིད་ཀྱིས་བརྗོད་པ་ཐེག་པ་ཆེན་པོའི་ཆོས་ཀྱི་རྒྱུ་ལས་བྱུང་བ་དེ་ཉིད་ལ་མོས་པས་སྤྱོད་པའི་ས་དང་། མཐོང་བ་དང་། བསྒོམ་པ་དང་། མཐར་ཕྱིན་པའི་ལམ་ལ་འཇུག་པ་སྟེ། ཆོས་ཐམས་ཅད་རྣམ་པར་རིག་པ་ཙམ་དུ་རྗེས་སུ་སྒྲོག་པ་ལ་མོས་པ། དེ་ཅི་ལྟ་བ་བཞིན་རབ་ཏུ་རྟོགས་པ་སྒྲིབ་པ་ཐམས་ཅད་ཀྱི་གཉེན་པོ་བསྒོམ་པ་དང་། སྒྲིབ་པ་མེད་པའི་ཕྱིར་རོ། །ཞེས་གསུངས་སོ། །ཚུལ་ཅི་ལྟར་འཇུག་ན། དེ་ཡང་དགེ་བའི་རྩ་བའི་སྟོབས་བསྐྱེད་པ་དང་། རྣམ་པ་གསུམ་གྱིས་སེམས་སྦྱོང་བ་དང་། གནས་བཞི་སྤོང་བ་དང་། ཆོས་དང་དོན་ལ་དམིགས་པའི་ཞི་གནས་དང་ལྷག་མཐོང་བསྒོམ་པ་དང་། རྒྱུན་དུ་ཆུད་པ་དང་། གུས་པར་བྱས་ཏེ་སྦྱོར་བ་དང་བག་ཡོད་པས་འཇུག་གོ །ཞེས་གསུངས་ཏེ། སེམས་གསུམ་སྦྱོང་བ་ནི། མིར་གྱུར་པ་ཚད་མེད་པ་དག་བྱང་ཆུབ་ཐོབ་ན་བདག་གིས་ཅི་ལ་མི་ཐོབ་ཅེས་ཞུམ་པ་མེད་པ་དང་། ཕ་རོལ་ཏུ་ཕྱིན་པ་རྫོགས་པར་བྱའོ་སྙམ་བ་དང་། བདེ་འགྲོ་བརྒྱུད་པ་འབད་མེད་དུ་ཐོབ་པའི་སེམས་གསུམ་ཡིན་ནོ། །བཞི་སྤོང་བ་ནི། ཉན་རང་གི་ཡིད་བྱེད་སྤོང་བ་དང་། སོམ་ཉི་དང་ཐེ་ཚོམ་སྤོང་བས་ཆེན་པོར་འཇུག་པ་དང་། ཆོས་ལ་ང་དང་ང་ཡིར་འཛིན་པ་དང་མངོན་ཞེན་སྤོང་བ་དང་། རྣམ་རྟོག་གི་མདུན་ན་གནས་པ་དང་བཞག་པའི་མཚན་མ་ཐམས་ཅད་སྤོང་བ་སྟེ། བཞིའོ་གཞན་རྣམས་འོག་ནས་སྟོན་པར་འགྱུར་རོ། །འཇུག་པའི་རིམ་པ་ནི། ཐེག་བསྡུས་ལས། ཡིད་ཀྱིས་བརྗོད་པ་ཙམ་དུ་དམིགས་ཤིང་། མིང་དང་བཅས་པའི་དོན་དང་། ངོ་བོ་ཉིད་དུ་ཁྱད་པར་དུ་བཏགས་པ་དང་བཅས་ཤིང་། གཉིས་ག་ཡང་མི་དམིགས་པའི་ཡོངས་སུ་ཚོལ་བ་བཞི་ལ་བརྟེན་ནས། བཟོད་པ་ཆུང་ངུའི་ཚེ། སྣང་བ་ཐོས་པའི་ཏིང་ངེ་འཛིན་ཏེ། ངེས་པར་འབྱེད་པའི་དྲོ་བར་འགྱུར་བའི་གནས་སོ། །བཟོད་པ་ཆེན་པོའི་ཚེ་སྣང་བ་མཆེད་པའི་ཏིང་ངེ་འཛིན་ཏེ། རྩེ་མོའི་གནས་སོ། །ཡང་དག་པ་ཅི་ལྟ་བ་བཞིན་དུ་ཡོངས་སུ་ཤེས་པ་བཞི་པོ་དག་ལ་རྣམ་པར་རིག་པ་ཙམ་ཉིད་དུ་ཞུགས་པ་དང་། དོན་མེད་པ་ལ་ངེས་པ་ནི། དེ་ཁོ་ནའི་ཕྱོགས་གཅིག་ལ་ཞུགས་པའི་རྗེས་སུ་སོང་བའི་ཏིང་ངེ་འཛིན་ཏེ། བདེན་པའི་རྗེས་སུ་མཐུན་པའི་བཟོད་པའི་གནས་སོ། །གང་གི་འོག་ཏུ་རྣམ་པར་རིག་པ་ཙམ་གྱི་འདུ་ཤེས་འཇིག་པ་དེ་ནི། དེ་མ་ཐག་པའི་ཏིང་ངེ་འཛིན་ཏེ། འཇིག་རྟེན་པའི་ཆོས་ཀྱི་མཆོག་གི་གནས་ལྟ་བུའོ། །ཏིང་ངེ་འཛིན་འདི་དག་ནི་མངོན་པར་རྟོགས་པ་དང་ཉེ་བ་ཡིན་པར་རིག་པར་བྱའོ། །ཞེས་གསུངས་སོ། །འདི་ལྟར་མདོ་སྡེ་རྒྱན་ལས་ཀྱང་། གདམས་པ་དང་རྗེས་སུ་བསྟན་པའི་སྐབས་ནས་རྒྱས་པར་གསུངས་སོ། །ཐེག་པ་ཐུན་མོང་གི་སྦྱོར་བའི་ལམ་ཡང་། དྲན་པ་ཉེ་བར་གཞན་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་པ་ཚོགས་ལམ་དང་། དབང་པོ་ལྔ་དང་སྟོབས་ལྔས་སྦྱོར་བའི་ལམ་བསྒྲོད་པ། དབུས་མཐའ་དང་མདོ་སྡེ་རྒྱན་ལས་གསུངས་པ་འདིར་ཡི་གེ་མང་གིས་དོགས་པའི་ཕྱིར་མ་བཤད་དོ། །འདི་ནི་ངེས་པར་རྟོགས་པ་ཞེས་བྱ་བ་སངས་རྒྱས་ཀྱི་བྱང་ཆུབ་ཀྱི་རྒྱུ་མཐོང་བའི་ལམ་དུ་འཇུག་པ་ལ་ངེས་པར་ཐོས་བསམ་བསྒོམ་པས་རྟོགས་པ་དང་བཅས་པའི་ཏིང་ངེ་འཛིན་རྣམ་པར་མི་རྟོག་པའི་རྒྱུ་མཐུན་པ་ཡིན་ནོ།། །།བཞི་པ་མཐོང་བའི་ལམ་ནི། དེ་ལ་རེག་པ་ནི་ཡང་དག་པའི་ལྟ་བ་ཐོབ་པའི་ཕྱིར། མཐོང་བའི་ལམ་གྱིས་མངོན་སུམ་གྱི་ཚུལ་དུ་དེ་བཞིན་ཉིད་ཐོབ་ཅིང་ཉམས་སུ་མྱོང་བའོ་ཞེས་གསུངས་ཏེ། འདི་ལ་ཡང་ཐེག་པ་ཐུན་མོང་པར་ནི། བདེན་པ་བཞི་ལ་བརྟེན་ནས་སྡུག་བསྔལ་ནི་ཤེས་པར་བྱ་བ་དང་། དེའི་རྒྱུ་ཀུན་འབྱུང་བ་ནི་སྤང་བར་བྱ་བ་དང་། འགོག་པ་མངོན་སུམ་དུ་བྱ་ཞིང་ལམ་བྱང་ཆུབ་ཀྱི་ཕྱོགས་ནི་བསྒོམ་པར་བྱ་བ་ལ་བརྟེན་ཏེ། འདོད་པའི་ཁམས་ལས་འདའ་བར་བྱེད་པའི་སྦྱོར་བའི་ལམ་ཐོབ་ནས། བདེན་པ་བཞི་ལ་ཤེས་པ་དང་། རྗེས་སུ་ཤེས་པ་དང་། བཟོད་པ་དང་། རྗེས་སུ་བཟོད་པ་ལ་བརྟེན་ཅིང་། སྐད་ཅིག་མ་བཅོ་ལྔའམ་བཅུ་དྲུག་གི་མཐོང་ལམ་བསམ་གཏན་དང་པོའམ། ས་དྲུག་གང་རུང་གི་བསམ་གཏན་དང་ལྷན་ཅིག་པར་ཐོབ་པར་ཉན་ཐོས་ཀྱི་ས་ལས་གསུངས་སོ། །འདིར་ནི་དེ་རྣམས་ལས་ཀྱང་ཆོས་རྨད་དུ་བྱུང་བ། རྣམ་པར་མི་རྟོག་པའི་ཡེ་ཤེས་སྣང་བ་ལ་འཇུག་ཅིང་མངོན་སུམ་དུ་བྱེད་པ་སྟེ། འདི་ལ་ཡང་ངོ་བོ་ཉིད་གསུམ་གྱི་ཚུལ་ལ་འཇུག་སྟེ། ཐེག་བསྡུས་ལས། བྱང་ཆུབ་སེམས་དཔའ་འདི་ཡིད་ཀྱི་བརྗོད་པ་སྣང་བའི་ཕྱིར་གྱི། མཚན་ཉིད་ལ་འཇུག་པས་ཀུན་བརྟགས་པའི་ངོ་བོ་ཉིད་ལ་འཇུག་པ་ཡིན་ནོ། །རྣམ་པར་རིག་པ་ཙམ་ལ་ཞུགས་པས་གཞན་གྱི་དབང་གིས་ངོ་བོ་ཉིད་ལ་ཞུགས་པ་ཡིན་ནོ། །ཡོངས་སུ་གྲུབ་པ་ལ་ནི་རྣམ་པར་རིག་པ་ཙམ་གྱི་འདུ་ཤེས་ཀྱང་བཟློག་ནས་འཇུག་སྟེ། དེའི་ཚེ་བྱང་ཆུབ་སེམས་དཔའ་དོན་གྱི་འདུ་ཤེས་བཤིག་པ་དེ་ལ། ཡིད་ཀྱིས་བརྗོད་པ་ཐོས་པའི་ཆོས་ཀྱི་བག་ཆགས་ཀྱི་རྒྱུ་ལས་བྱུང་བ་དེ་དག་དོན་དུ་སྣང་བ་ཐམས་ཅད་དུ་འབྱུང་བའི་སྐབས་མེད་པ་ཡིན་ནོ། །དེས་ན་རྣམ་པར་རིག་པ་ཙམ་དུ་སྣང་བ་མི་འབྱུང་སྟེ། གང་གི་ཚེ་དོན་ཐམས་ཅད་ལ་རྣམ་པར་མི་རྟོག་པའི་མིང་ལ་གནས་ཤིང་ཆོས་ཀྱི་དབྱིངས་ལ་མངོན་སུམ་གྱི་ཚུལ་གྱིས་གནས་པ་དེའི་ཚེ། བྱང་ཆུབ་སེམས་དཔའ་དེ་ཡི་དམིགས་པར་བྱ་བ་དང་། དམིགས་པར་མེད་པ་མཉམ་པས། མཉམ་པའི་ཡེ་ཤེས་རྣམ་པར་མི་རྟོག་པ་འབྱུང་སྟེ། དེའི་ཕྱིར་འདི་ནི་བྱང་ཆུབ་སེམས་དཔའི་ཡོངས་སུ་གྲུབ་པའི་ངོ་བོ་ཉིད་ལ་ཞུགས་པ་ཡིན་ནོ། །དེར་ཞུགས་པས་ས་རབ་ཏུ་དགའ་བ་ལ་ཞུགས་པ་ཡིན། ཆོས་ཀྱི་དབྱིངས་ལེགས་པར་རྟོགས་པ་དང་། རིགས་སུ་སྐྱེས་པ་དང་། སེམས་ཅན་ལ་སེམས་མཉམ་པ་དང་། བྱང་ཆུབ་སེམས་དཔའ་དང་སངས་རྒྱས་ལ་སེམས་མཉམ་པར་ཐོབ་པ་ཡིན་ཏེ། །དེ་ནི་མཐོང་བའི་ལམ་ཡིན་ནོ། །ཞེས་གསུངས་སོ། །མདོ་སྡེ་རྒྱན་ལས་ཀྱང་། སེམས་ལས་གཞན་མེད་པར་ནི་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པས་གཉིས་པོ་མེད་རིག་ནས། །དེ་མི་ལྡན་པས་ཆོས་ཀྱི་དབྱིངས་ལ་གནས། །ཞེས་པའང་འདི་བསྟན་ཏོ། །འདིར་བྱང་ཆུབ་ཀྱི་ཡན་ལག་ཀྱང་། །སར་ཞུགས་པ་ལ་བྱང་ཆུབ་ཀྱི། །ཡན་ལག་རྣམ་པར་བཞག་པ་བརྗོད། །དེའི་རྒྱུ་མཚན་ནི། ཆོས་རྣམས་དང་ནི་སེམས་ཅན་ཀུན། །མཉམ་པ་ཉིད་དུ་རྟོགས་ཕྱིར་རོ། །ཅི་ལྟ་བ་དང་ཅི་སྙེད་པའི་ཡེ་ཤེས་ཀྱི་ཤེས་བྱ་ལ་འཇུག་ཅིང་རྒྱས་པར་བྱེད་པས། ཡང་དག་པའི་དྲན་པ་ནི་འཁོར་ལོ་ལྟ་བུ་སྟེ། །ཤེས་བྱ་མ་རྒྱལ་རྒྱལ་བའི་ཕྱིར། །དྲན་པ་རྣམ་པ་ཀུན་ཏུ་སྤྱོད། །ཆོས་རབ་ཏུ་རྣམ་པར་འབྱེད་པའི་ཤེས་རབ་ནི་ལོག་པའི་མཚན་མ་ཐམས་ཅད་འཇོམས་པས་གླང་པོ་ཆེ་ལྟ་བུ་སྟེ། འདིའི་རྣམ་འབྱེད་རྟོགས་པའི། མཚན་མ་ཐམས་ཅད་འཇོམས་པར་བྱེད། མཐར་ཕྱིན་པའི་བར་དུ་རྒྱུན་མི་གཅོད་པའི་བརྩོན་འགྲུས་ནི་མྱུར་པའི་ཕྱིར་རྟ་ལྟ་བུ་སྟེ། །འདི་ཡི་བརྩོན་འགྲུས་མ་ལུས་ལ། །མྱུར་དུ་རྟོགས་པར་བྱ་ཕྱིར་འཇུག །ཐེག་པ་ཆེན་པོའི་ཆོས་རྒྱ་མཚོའི་སྣང་བ་འཕེལ་བའི་མདོ་ནི། ཡེ་ཤེས་ཀྱི་འོད་ཀྱི་རྒྱས་པར་བྱེད་པའི་ཕྱིར་ནོར་བུ་ལྟ་བུ་སྟེ། ཆོས་ཀྱི་སྣང་བ་འཕེལ་བའི་ཕྱིར། དགའ་བས་རྟག་ཏུ་རྒྱས་པར་འགྱུར། སྒྲིབ་གཉིས་བག་ཆགས་དང་བཅས་པ་ལས་ཐར་བར་བྱེད་པའི་ཕྱིར་རྒྱུད་ཤིན་ཏུ་སྦྱངས་པ་ནི། གཏན་དུ་བདེ་བ་ཐོབ་པའི་ཕྱིར་བཙུན་མོ་ལྟ་བུ་སྟེ། །སྒྲིབ་པ་ཀུན་ལས་ཐར་བའི་ཕྱིར། །ཤིན་ཏུ་སྦྱངས་པས་བདེ་བ་འཐོབ། །བསམ་གཏན་བཞི་པ་ལ་རྟེན་པའི་ཏིང་ངེ་འཛིན་རྣམས་གནས་དང་བཅས་པ་ནི་བསམ་པའི་དོན་འབྱོར་པ་ནམ་མཁའི་མཛོད་འབྱུང་བས་ཁྱིམ་བདག་ལྟ་བུ་སྟེ། ཏིང་ངེ་འཛིན་ལས་བསམ་པའི་དོན། །འབྱོར་པ་ཉེ་བར་སྐྱེ་བར་འགྱུར། །མཉམ་རྗེས་མཉམ་པ་ཉིད་དུ་འཇུག་པའི་བཏང་སྙོམས་ནི་སྲིད་ཞིའི་རྒོལ་བ་མེད་པར་ཅི་ལྟར་འདོད་པར་གནས་པས་དམག་དཔོན་ལྟ་བུ་སྟེ། བཏང་སྙོམས་ཀྱིས་ནི་ཐམས་ཅད་དུ། འདིས་ནི་ཅི་ལྟར་འདོད་བཞིན་གནས། །དེ་ལྟར་བདུན་ཀ་ཐོབ་པའི་རྒྱུ་མཚན་གྱིས། །རྗེས་ལས་ཐོབ་དང་མི་རྟོག་པའི། །གནས་པ་མཆོག་གིས་རྟག་ཏུ་གནས། །ཞེས་བྱང་ཆུབ་ཀྱི་ཡན་ལག་སྟེ། བདུན་ནི། རིན་པོ་ཆེ་བདུན་དང་མཚུངས་པར་འབྱུང་ངོ་། །མཐོང་ལམ་གྱི་རང་བཞིན་ཆོས་རྣམ་པར་འབྱེད་པ་དེ་དྲན་པ་ལ་གནས་ནས་བརྩོན་འགྲུས་ཀྱིས་ངེས་པར་འབྱུང་ཞིང་། ཏིང་ངེ་འཛིན་གྱིས་ཡོན་ཏན་རྒྱས་པར་བྱེད་དེ། ཤིན་ཏུ་སྦྱངས་པ་དང་དགའ་བ་དང་བཏང་སྙོམས་གསུམ་གྱིས། ཉོན་མོངས་པ་མེད་པའི་ཡན་ལག་ཏུ་འགྱུར་ཏེ། །རང་བཞིན་ཡན་ལག་གནས་ཡན་ལག །གསུམ་པ་ངེས་འབྱུང་ཡན་ལག་སྟེ། །བཞི་པ་གཉེན་པོའི་ཡན་ལག་ཡིན། རྣམ་གསུམ་ཉོན་མོངས་མེད་ཡན་ལག། །ཅེས་ཡན་ལག་ཅི་ལྟར་ཡིན་པ་བཤད་དོ། །དེ་བཞིན་དུ་གདམས་པའི་སྐབས་ནས་ཀྱང་། །དེས་ན་དེ་ནི་འཇིག་རྟེན་ལས། །འདས་པའི་ཡེ་ཤེས་བླ་མེད་པ། །རྣམ་པར་མི་རྟོག་དྲི་མ་མེད། འཛིན་པ་གཉིས་དང་བྲལ་བ་འཐོབ། །དེ་འདི་གནས་ཡོངས་གྱུར་པ་སྟེ། ས་ནི་དང་པོ་ཡིན་པར་འདོད། །ཞེས་བྱ་བ་ལ་སོགས་པ་རྒྱས་པར་གསུངས་ཏེ། མདོར་བསྡུས་ན་ཉོན་མོངས་པ་མཐོང་བས་སྤང་བར་བྱ་བ་སྤངས་ནས། བདག་མེད་རྣམ་པ་གཉིས་མངོན་སུམ་དུ་མཐོང་ཞིང་། སྟོང་པ་ཉིད་གསུམ་དང་། མཚན་མ་མེད་པ་དང་། སྨོན་པ་མེད་པའི་རྣམ་པར་ཐར་པ་ལ་རེག་ཅིང་། རྣམ་པར་མི་རྟོག་པའི་ཡེ་ཤེས་སྣང་བའི་ཏིང་ངེ་འཛིན་ཐོབ་པ་ནི་བྱང་ཆུབ་སེམས་དཔའ་རྣམས་ཀྱི་མཐོང་བའི་ལམ་ས་དང་པོ་སྟེ། ཐུན་མོང་གི་རྣམ་བཞག་ལས་ཁྱད་ཞུགས་པ་ཡིན་ནོ། །ལྔ་པ་བསྒོམ་པའི་ལམ་བཤད་པ་ནི། རྗེས་སུ་དྲན་པ་ནི་དེའི་དྲི་མ་དྲུངས་དབྱུང་པའི་དོན་དུ་ཅི་ལྟར་མཐོང་བ་ཉིད་བསྒོམ་པའི་ལམ་བྱང་ཆུབ་ཀྱི་ཕྱོགས་ཀྱིས་བསྡུས་པ་ཐམས་ཅད་དོ། །ཞེས་གསུངས་ཏེ། མཐོང་བའི་ལམ་གྱི་དེ་མ་ཐག་ཏུ་ཅི་ལྟར་མཐོང་བ་ཉིད་བསྒོམས་པས་དེའི་བདག་ཉིད་དུ་ཉེ་བར་སོན་པར་བྱ་བའི་ཕྱིར་བསྒོམ་པས་བསྒོམ་ལམ་མོ། །རྣམ་པར་མི་རྟོག་པའི་ཡེ་ཤེས་རྗེས་སུ་དྲན་པས་ཉོན་མོངས་པའི་ལྷག་མ་བསྒོམ་པས་སྤང་བར་བྱ་བ་དང་། ཉོན་མོངས་པ་ཅན་མ་ཡིན་པའི་ས་བཅུ་ལ་སྒྲིབ་པའི་ཤེས་བྱའི་སྒྲིབ་པ་བཅུ་དྲུངས་དབྱུང་བའི་དོན་དུ་བསྒོམ་པའོ། །དེ་ཉིད་མཐར་ཕྱིན་པར་བྱེད་པས་ན་ལམ་མོ། །བྱང་ཆུབ་ཀྱི་ཕྱོགས་ཀྱི་ཆོས་ནི། ཐེག་པ་ཐུན་མོང་གི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་སོ་བདུན་དང་། བྱང་ཆུབ་སེམས་དཔའི་སུམ་ཅུ་བཞི་དང་། སངས་རྒྱས་ཀྱི་སུམ་ཅུ་སོ་དགུ་ལ་སོགས་པ་དམིགས་པ་དང་། རྣམ་པ་དང་། དམིགས་པའི་ཆོས་ཀྱིས་བསྡུས་པ་ཐམས་ཅད་བསྒོམ་པས་ཏེ། འདི་ལ་ཅི་ལྟར་སྦྱོར་བ་ཡང་ཐེག་བསྡུས་ལས། དེ་ལྟར་ས་ལ་བཞུགས་ཏེ། མཐོང་བའི་ལམ་ཐོབ་པའི་བྱང་ཆུབ་སེམས་དཔའི་རྣམ་པར་རིག་པ་ཙམ་ཉིད་ལ་ཞུགས་པ་བསྒོམ་པའི་ལམ་ལ་ཅི་ལྟར་སྦྱོར་ཞེ་ན། འདི་ལྟར་རྣམ་པར་གནས་པ་བསྟན་པ། བྱང་ཆུབ་སེམས་དཔའ་ཡི་ས་བཅུ་པ་མདོ་སྡེ་ཐམས་ཅད་བསྡུས་པ་ཉིད་དུ་ཉེ་བར་གནས་པ་རྣམས་ལ་འདྲེས་པ་ལ་དམིགས་པ་འཇིག་རྟེན་ལས་འདས་པ་དང་། དེའི་རྗེས་ལས་ཐོས་པའི་ཞི་གནས་དང་ལྷག་མཐོང་གི་ཤེས་པས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོར་གོམས་པར་བྱས་པའི་ཕྱིར། དེ་དག་གནས་གྱུར་ནས་སངས་རྒྱས་ཀྱི་སྐུ་རྣམ་གསུམ་ཐོབ་པར་བྱ་བའི་ཕྱིར་སྦྱོར་རོ། །དེ་བཞིན་དུ་མདོ་སྡེ་རྒྱན་ལས་ཀྱང་། དེ་ནས་འདི་ནི་ལྷག་མའི། །ས་རྣམས་བསྒོམ་པའི་ལམ་འདི་ལ། །ཡེ་ཤེས་རྣམ་པ་གཉིས་པོ་དག །བསྒོམ་ཕྱིར་རབ་ཏུ་སྦྱོར་བར་བྱེད། །དེ་ལ་ཡེ་ཤེས་གཉིས་ཅི་ལྟར་སྦྱོར་ཞེ་ན། རྣམ་པར་མི་རྟོག་ཡེ་ཤེས་དེ། སངས་རྒྱས་ཆོས་ནི་སྦྱོང་བར་བྱེད། །མཉམ་བཞག་གི་ངོ་བོ་ནི་རྣམ་པར་མི་རྟོག་པའི་ཡེ་ཤེས་ཉིད་ཡིན་པའི་ཕྱིར་ཆོས་སྐུའི་ཡོན་ཏན་རྫོགས་པ་ལ་དབང་བྱེད་པའི་ཕྱིར་རོ། །གཞན་ནི་ཅི་བཞིན་རྣམ་འཇོག་པས། །སེམས་ཅན་རྣམས་ནི་ཡོངས་སྨིན་བྱེད། རྗེས་ལས་ཐོབ་པའི་ཡེ་ཤེས་ནི་སྒྱུ་མ་ལྟ་བུར་སངས་རྒྱས་ཀྱི་ཞིང་དང་སེམས་ཅན་ཡོངས་སུ་སྨིན་པར་བྱེད་པ་སྟེ། རྣམ་པར་མི་རྟོག་པའི་ཡེ་ཤེས་ཉིད་ཡིན་པའི་ཕྱིར། ཆོས་སྐུའི་ཡོན་ཏན་རྫོགས་པ་ལ་དབང་བྱེད་པའི་ཕྱིར་རོ། །གཞན་ནི་ཅི་བཞིན་རྣམ་འཇོག་པས། །སེམས་ཅན་རྣམས་ནི་ཡོངས་སྨིན་བྱེད། །རྗེས་ལས་ཐོག་པའི་ཡེ་ཤེས་ནི་སྒྱུ་མ་ལྟ་བུར་སངས་རྒྱས་ཀྱི་ཞིང་དང་། སེམས་ཅན་ཡོངས་སུ་སྨིན་པར་བྱེད་པ་སྟེ། རྣམ་པར་མི་རྟོག་པའི་ཡེ་ཤེས་ཀྱི་ལས་ཡིན་ནོ། །གྲངས་མེད་གཉིས་ནི་རྫོགས་པ་ཡིས། བསྒོམ་པ་ཡི་ནི་ཚར་ཕྱིན་ཏེ། །ས་དྲུག་ལ་གྲངས་མེད་གཅིག་དང་། །ས་གསུམ་ལ་གཅིག་སྟེ། འདིར་བསླབ་པ་གསུམ་རྫོགས་པའི་ཕྱིར་རོ། །དེ་ཡང་ཅི་ལྟ་བུ་ཡིན་ཞེ་ན། ཆོས་ཉིད་རབ་ཏུ་རྟོགས་ནས་འདིར། །ལྷག་པའི་ཚུལ་ཁྲིམས་ལྷག་སེམས་དང་། །ལྷག་པའི་ཤེས་རབ་ལ་རྗེས་སློབ། །ས་དང་པོར་ཆོས་ཉིད་ཀྱི་དོན་རྟོགས་ནས་སྦྱིན་པའི་ཕ་རོལ་ཏུ་ཕྱིན་པ་རྫོགས་ཤིང་གཉིས་པ་ལ་ཚུལ་ཁྲིམས་རྣམ་པར་དག་གོ །གསུམ་པ་ལ་བཟོད་པ་དང་། བཞི་པ་ལ་བརྩོན་འགྲུས་དང་ལྡན་པས། སེམས་རྣམ་པར་དག་པའི་ཕྱིར་ལྷག་པའི་སེམས་ལ་འཇུག་སྟེ། དེས་ལྔ་པར་བསམ་གཏན་དང་། དྲུག་པར་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་འགྱུར། རྒྱུ་མཚན་ཡང་། ཤེས་རབ་སྤྱོད་ཡུལ་གཉིས་ཡིན་ཏེ། །ཆོས་ཀྱི་དེ་ཉིད་དེའི་ནི། །མི་ཤེས་ཤེས་སོགས་འཇུག་པ་ཉིད། །ཤེས་རབ་སྤྱོད་ཡུལ་དེ་ལྟ་བས། དེ་ས་གཉིས་ལ་རྣམ་པར་གནས། །དེ་ལྟར་ས་དྲུག་ཏུ་བསླབ་པའི་འབྲས་བུ་ནི་རྣམ་པ་བཞི་གསུངས་སྟེ། །བསླབ་པའི་རྣམས་དང་བསྒོམ་བ་ཡི། །འབྲས་བུ་གཞན་ནི་རྣམ་པ་བཞི། །དེ་རྣམས་ཀྱི་དང་པོ་ནི་ས་བདུན་པ་ཐབས་མཁས་པ་རྣམ་པར་དག་པས་མཚན་མ་མེད་ལ་འདུ་བྱེད་དང་བཅས་པ་ཐོབ་པ་སྟེ། མཚན་མེད་འདུ་བྱེད་དང་བཅས་པ། གནས་པ་འབྲས་བུ་དང་པོ་ཡིན། །གཉིས་པར་ནི་འདུ་བྱེད་ལའང་ཉེ་བར་ཞི་ནས་ཆོས་སྐུ་ཉིད་དུ་འགྱུར་ཏེ། རྣམ་པར་མི་རྟོག་པའི་དབྱིངས་ལས་རེག་ཅིང་། ཡིད་དང་འཛིན་པ་དང་རྣམ་པར་རྟོག་པ་མེད་པར་འགྱུར་བས་སངས་རྒྱས་ཀྱི་གསང་བ་ལ་རེག་པ་ན། སྐད་ཅིག་དེ་ལ་སངས་རྒྱས་ཐམས་ཅད་ཀྱིས་སྣང་བ་མེད་པ་དེ་ལས་བསྐུལ་ནས། ཡེ་ཤེས་ཀྱི་སྣང་བ་ཚད་མེད་པ་ཐོབ་པས། ཞིང་རྣམ་པར་དག་པ་ཐོབ་པའོ། །རྒྱུ་མཚན་འདིས་ན། དེ་ཉིད་མངོན་དུ་བྱེད་མེད་དང་། །ཞིང་ནི་རྣམ་པར་དག་པ་དོན། །འབྲས་བུ་གཉིས་པར་འདོད་པ་ཡིན། །འདི་ནི་སྨོན་ལམ་གྱི་ཕ་རོལ་ཏུ་ཕྱིན་པ་སྟེ། སྨོན་པ་ཙམ་གྱིས་ཞིང་རྒྱ་མཚོ་རྣམ་པར་དག་པའི་ཕྱིར་རོ། །གསུམ་པ་ནི། སེམས་ཅན་གྱི་ཁམས་རྒྱ་མཚོ་བརྗོད་དུ་མེད་པ། སྐད་ཅིག་གཅིག་ལ་སྨིན་བར་བྱེད་པས་སྟོབས་ཀྱི་ཕ་རོལ་ཏུ་སོན་པ་སྟེ། སོ་སོ་ཡང་དག་པར་རིག་པ་བཞིའི་མངོན་སུམ་དུ་བྱས་པ་ཆོས་ཐམས་ཅད་ཀྱི་དབང་ཕྱུག་ཏུ་གྱུར་པའི་ཕྱིར་རོ། །སེམས་ཅན་སྨིན་པར་གྲུབ་ཉིད་དང་། །དེ་མ་ཐག་ཏུ་ཏིང་ངེ་འཛིན་རྒྱ་མཚོའི་རྣམ་པར་ཐར་པ་དང་། གཟུངས་ཐམས་ཅད་ཀྱི་མཐར་སོན་བས་སྤྲུལ་པ་རྒྱ་མཚོས་འཇིག་རྟེན་གྱི་ཁམས་ཐམས་ཅད་དུ་འཇུག་ཅིང་། སློབ་མ་དུལ་བ་རྒྱ་མཚོ་བ་སྤུ་གཅིག་ཏུ་སྡུད་པ་ལ་དབང་བསྒྱུར་བས། ཡེ་ཤེས་ཀྱི་ཕ་རོལ་ཏུ་ཕྱིན་པའི་ས་བཅུ་པ་ལེགས་པར་བསྒོམ་བའི་མཐར་ཕྱིན་པ་དང་། གཉིས་དང་ཅི་ལྟར་མངོན་བར་བརྗོད་པའི་ཆོས་དང་མཐུན་བ་དེ་ལ་ཆོས་ཉིད་བདག་གཅིག་པ་དང་། དེ་ལས་བྱུང་པའི་འབྲེལ་པ་ཅན་དུ་གནས་པ་ནི་མ་ཡིན་ནོ། །རྒྱུད་བླ་མ་ལས་ཀྱང་། སེམས་ཅན་ཁམས་ཀྱི་ཉོན་མོངས་སྦུབས། །མ་འབྲེལ་ཐོག་མ་མེད་པ་ནས། །སེམས་ཀྱི་རང་བཞིན་དྲི་མེད་ནི། །ཐོག་མ་མེད་པ་ཡིན་ཞེས་བརྗོད། །ཞེས་གསུངས་སོ། །དེས་ན་འདིར་གནས་ནི་དབྱེ་བ་མེད་པའི་དག་པ་དང་། རྒྱུ་མཐུན་པའི་དོན་གྱིས་སོ་སོ་རང་རིག་པ་ལ་བརྟེན་པའོ། །འདི་ལྟར་ཆོས་དང་ཆོས་ཉིད་ཡོད་པ་དང་མེད་པ་དག་ལ་མེད་ཀྱང་སྣང་བ་སྔར་བསྟན་ལ། ཡོད་པ་ཉིད་ལ་དྲི་མ་མེད་བཞིན་རྣམ་པར་དག་དགོས་པ་མི་འགལ་ཏེ། །ཆོས་མེད་པ་དང་དམིགས་པ་དང་། །ཀུན་ནས་ཉོན་མོངས་མེད་རྣམ་དག །སྒྱུ་མ་ལ་སོགས་འདྲ་བ་དང་། །དེ་བཞིན་ནམ་མཁའ་འདྲར་ཤེས་བྱ། །ཞེས་མདོ་སྡེ་རྒྱན་ལས་གསུངས་པ་བཞིན། །འདི་ནས་རྒྱས་པར་སྟོན་པ་ཤེས་པར་བྱའོ། །གཞི་འདི་ན་བརྟེན་ན་གསུམ་པ་སྦྱོར་ལམ་འབྱུང་བས་ན་དེ་བཤད་པ། དེ་ལ་ངེས་པར་རྟོག་པ་ན་ཐེག་པ་ཆེན་པོའི་མདོ་སྡེ་ལ་བརྟེན་བའི་ཚུལ་བཞིན་དུ་ཡིད་ལ་བྱེད་པས་བསྡུས་པ་སྦྱོར་པའི་ལམ་ཐམས་ཅད་དོ་ཞེས་གསུངས་སོ། །འདིར་ལམ་ལྔའི་ཚོགས་ཀྱི་ལམ་ནི་ངེས་པར་རྟོག་པའི་རྒྱུར་གྱུར་པ། ཆོས་དང་ཆོས་ཉིད་རྣམ་པར་འབྱེད་པ་ལ་འཇུག་པ་ཙམ་ཉིད་ནས་མོས་པ་ཙམ་ལ་བརྟེན་པ་བསོད་ནམས་ཆ་མཐུན་པ་མང་བ་ལ་དུས་ཡུན་རིང་དུ་འཇུག་པས་ཐེག་པ་གསུམ་གྱི་རིགས་རང་བཞིན་ལས་རྒྱས་འགྱུར་འབྱུང་པར་བྱེད་པ་སྟེ། །བསྐལ་པ་གྲངས་མེད་ངེས་འབྱུང་ཞིང་། །མོས་པ་རྣམ་པར་འཕེལ་བྱེད་པ། །ཅི་ལྟར་ཆུ་ཡིས་རྒྱ་མཚོ་བཞིན། །དགེ་ཆོས་རྣམས་ཀྱི་ཡང་དག་རྫོགས། །ཞེས་མདོ་སྡེ་རྒྱན་ལས་བྱུང་བ་ལྟར་ཡིན་ནོ། །འདིར་ཡང་ཐེག་པ་ཆུང་ངུ་དག་མོས་པ་ཕྲ་མོ་ལ་བརྟེན་ནས་ངེས་པར་འབྱུང་བའི་གཞི་འཕགས་པ་ལམ་སྲན་གྱི་སྔོན་གྱི་རྒྱུ་ལྟ་བུ་གསུངས་ཀྱང་། འདིར་ཐེག་པ་བླ་ན་མེད་པ་ནི་སྔར་བཤད་པའི་ཤེས་བྱའི་གནས་དང་། མཚན་ཉིད་ཤེས་ནས་འཇུག་དགོས་པས་ཐོས་བསམ་བསྒོམ་གསུམ་གྱིས་རབ་ཏུ་ཕྱེ་བ་སྟེ། དེས་ན་རྒྱུ་བསམ་གྱིས་མི་ཁྱབ་པ་ལ་འཇུག་གོ །དེས་ན་ཐར་པའི་ཆ་དང་མཐུན་པ་ཡང་སངས་རྒྱས་ཀྱི་རང་བཞིན་དྲི་མ་དང་བཅས་པའི་ཁམས་ལ། བྱང་ཆུབ་པ་དང་། ཡོན་ཏན་འཕྲིན་ལས་དང་བཅས་པ་རང་ལ་ཡོད་ཀྱང་བསྒྲིབ་པ་གཉིས་ཀྱིས་བཅིངས་པ་མཐོང་ནས། དག་པ་གཉིས་ལྡན་གྱི་སངས་རྒྱས་ཐུབ་པ་ལྟ་བུ་དང་། ཆོས་དང་དགེ་འདུན་གྱི་ཚུལ་མཐོང་བས་དད་པ་དང་། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་ལ་རྒྱུ་དང་འབྲས་བུར་ཤེས་ནས་སྦྱོར་བའི་མོས་པའི་བརྩོན་འགྲུས་དང་། །བསམ་པ་ཕུན་གསུམ་ཚོགས་པ་རང་དོན་རྐྱང་པ་མ་ཡིན་པའི་གཞན་དོན་དང་འབྲེལ་བའི་སྨོན་ལམ་ཅན་གྱི་དྲན་པ་དང་། རྟེན་རྣམ་པར་མི་རྟོག་པའི་ཡེ་ཤེས་སུ་ཤེས་པ་ལ་སེམས་པའི་ཏིང་ངེ་འཛིན་དང་། ཆོས་རྣམས་རྟོགས་པའི་ཤེས་རབ་སྔར་བརྗོད་པ་ལྟར་ཤེས་པ་ནི་སངས་རྒྱས་ཀྱི་ཐར་པ་ཆེན་པོ་ཕྱིར་རོ། །ཞེས་པ་དང་། གཞན་ཡང་བློ་གྲོས་རྒྱ་མཚོའི་མདོ་ལས་བྱུང་བ་གསུངས་པ། དེ་དག་གི་འཁོར་བའི་རྒྱུ་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་གང་ཞེ་ན། འདི་ལྟ་སྟེ་བསོད་ནམས་ཀྱི་ཚོགས་ཡོངས་སུ་ཚོལ་བས་མི་ངོམས་པ་དང་། བསམ་བཞིན་དུ་སྲིད་པར་སྐྱེ་པ་ཡོངས་སུ་འཛིན་པ་དང་། སངས་རྒྱས་དང་ཕྲད་པ་དོན་དུ་གཉེར་བ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་མི་སྐྱོ་བ་དང་། དམ་པའི་ཆོས་འཛིན་པ་ལ་བརྩོན་པ་དང་། སེམས་ཅན་གྱི་བྱ་བ་ཅི་ཡོད་པ་ལ་འགྲུས་པ་དང་། ཆོས་ཉིད་ལ་ཆགས་པའི་བསམ་པ་དང་མ་བྲལ་བ་དང་། ཕ་རོལ་ཏུ་ཕྱིན་པའི་ཀུན་ཏུ་སྦྱོར་བ་རྣམས་མི་འདོར་བ་སྟེ། བློ་གྲོས་རྒྱ་མཚོ་གང་གིས་བྱང་ཆུབ་སེམས་དཔའ་ཀུན་ཏུ་སྦྱོར་བར་བྱེད་ཀྱང་། ཉོན་མོངས་པའི་སྐྱོན་གྱིས་མི་གོས་པ། དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་ནི་འདི་དག་གོ །ཡང་གསུངས་པ། བཅོམ་ལྡན་འདས། གང་གི་ཚེ་དགེ་བའི་རྩ་བ་ལགས་ན་རྒྱུ་ཅིའི་སླད་དུ་ཉོན་མོངས་པ་ཞེས་བགྱི། བཀའ་སྩལ་པ་བློ་གྲོས་རྒྱ་མཚོ། འདི་ལ་དེ་ལྟ་བུའི་རང་བཞིན་གྱི་ཉོན་མོངས་པ་འདི་དག་གིས། བྱང་ཆུབ་སེམས་དཔའ་ཁམས་གསུམ་དུ་ཀུན་ཏུ་སྦྱོར་ལ། ཁམས་གསུམ་པ་ཡང་ཉོན་མོངས་པ་ལས་འབྱུང་བ་ཡིན་ནོ། །བྱང་ཆུབ་སེམས་དཔའ་ནི་ཐབས་མཁས་པ་དང་། དགེ་བའི་རྩ་བའི་སྟོབས་བསྐྱེད་པས། བསམ་བཞིན་དུ་ཁམས་གསུམ་ཀུན་ཏུ་སྦྱོར་ཏེ། དེས་ན་ཉོན་མོངས་པ་དང་མཚུངས་པར་ལྡན་བའི་དགེ་བའི་རྩ་བ་ཞེས་བྱའོ། །ཅི་སྲིད་ཁམས་གསུམ་དུ་ཀུན་ཏུ་སྦྱོར་བས་ཡིན་གྱི། སེམས་ཉེ་བར་ཉོན་མོངས་པས་ནི་མ་ཡིན་ནོ། །ཞེས་བྱུང་ངོ་། །གཞན་ཡང་། རྒྱལ་སྲས་འགྱུར་མེད་ཆོས་ཉིད་འདི། །རྟོགས་ནས་མ་རིག་མདོངས་རྣམས་ཀྱིས། །སྐྱེ་བ་ལ་སོགས་དག་ཏུ་ནི། །མཐོང་བ་གང་ཡིན་དེ་རྨད་དོ། །ཞེས་བྱ་བ་ལ་སོགས་པའི་ཚིགས་བཅུས་གསུངས་པ། གཉིས་ཀྱིས་ས་དང་པོ་དང་། གསུམ་པ་དང་བཞི་པས་ས་དྲུག་དང་། ལྔ་པས་བརྒྱད་པ་དང་། གཞན་གསུམ་གྱིས་ས་བཅུ་པའི་ཡོན་ཏན་དང་། དེ་འོག་གཉིས་ཀྱིས་སངས་རྒྱས་དང་ཁྱད་མེད་པ་དང་། ཡོད་པའི་ཚུལ་གྱིས་རྒྱས་པར་གསུངས་སོ། །དེ་བཞིན་དུ་དཔལ་འཕྲེང་གི་མདོ་དང་མྱ་ངན་ལས་འདས་པ་ཆེན་པོར་ཡང་གསུངས་སོ། །རིགས་པ་ཡང་། ལུང་གིས་བསྟན་པ་ནི། བྱང་ཆུབ་སེམས་དཔའ་སྦྱོར་ལམ་དུ་བསམ་གཏན་བཞི་ཀ་ཐོབ་ནས། སངས་རྒྱས་མཆོད་པ་དང་། ཆོས་མཉན་བའི་ཕྱིར་འཇིག་རྟེན་གཞན་དུ་རྫུ་འཕྲུལ་གྱིས་འགྲོ་བ་དེ་མཐོང་ལམ་ས་དང་པོར་བསམ་གཏན་བཞི་པ་མི་འཐོབ་པར་འཇུག་གོ །ཞེས་འགལ་བ་དང་། རྟགས་ཀྱི་ཐད་ཀར། གཟུགས་སོགས་འདུ་ཤེས་ལས་ལྡོག་ཅིང་། །སེམས་བརྟན་ཐེག་པ་དམན་དག་ལས། །རྣམ་ལོག་བསམ་གཏན་ལ་སོགས་པའི། །ཡན་ལག་ཡོངས་སུ་ཟད་པ་དང་། །ཞེས་ཀྱང་བྱུང་ངོ་། །གཞན་ཡང་། མཐོང་ལམ་པ་འདོད་ན། སེམས་ཀྱི་སྐད་ཅིག་ལ་ཏིང་ངེ་འཛིན་བརྒྱ་བསྒོམས་ཏེ། ཞིང་བརྒྱ་གཡོ་བ་ལ་སོགས་པ་བྱེད་པ་ཐོབ་པ་དེས། བསམ་གཏན་བཞི་པ་ཐོབ་པ་དང་། དགྲ་བཅོམ་སྟེ། །ཏིང་ངེ་འཛིན་དང་གཟུངས་རྣམས་ནི། །གྲུབ་པས་འབྲས་བུ་དམ་པ་ཡིན། །འབྲས་བུ་རྣམ་པ་འདི་བཞི་ནི། །ས་བཞི་པོ་ལ་ཡང་དག་བརྟེན། །ཅེས་གསུངས་སོ། །འདི་ལྟར་བསྒོམ་པའི་ལམ་ལ་ཤེས་བྱའི་མཚན་ཉིད་འཇུག་པའི་རྒྱུ་དང་འབྲས་བུར་ཕ་རོལ་ཏུ་ཕྱིན་པ་དྲུག་དང་བཞིར་བསྟན་པ་དང་། དེ་བསྒོམ་པའི་རབ་ཏུ་དབྱེ་བ་ས་བཅུ་རྣམས་སུ་བསྟན་ཏེ། རྒྱས་པར་ནི་ཐེག་པ་ཆེན་པོ་བསྡུས་པ་དང་། མདོ་སྡེ་རྒྱན་གྱི་ཕ་རོལ་ཏུ་ཕྱིན་པའི་སྐབས་དང་། ཡོངས་སུ་སྦྱོང་བ་ནི་མངོན་པར་རྟོགས་པའི་རྒྱན་གྱི་སའི་ཡོངས་སྦྱོང་དང་། བྱང་ཆུབ་སེམས་དཔའི་ས་དང་། ས་བཅུ་པའི་མདོར་གསུངས་སོ། །འདིར་བྱང་ཆུབ་སེམས་དཔའ་དང་། ཉན་ཐོས་ཀྱི་བསྒོམ་པའི་ལམ་གྱི་ཁྱད་པར་ནི། ཉན་ཐོས་རྣམས་ཀྱི་བསམ་གཏན་བཞི་དང་། གཟུགས་མེད་པ་བཞི་ལ་འདོད་ཆགས་དང་། ཁོང་ཁྲོ་ལ་སོགས་པའི་ཉོན་མོངས་པ་བག་ལ་ཉལ་གང་ཡིན་པ་དེའི་ས་དང་། བདེན་བཞིའི་ཤེས་རབ་ཀྱིས་སྤོང་ཞིང་། ཁམས་གསུམ་ལས་འདའ་བ་ཞི་བ་ཁོ་ན་དོན་དུ་གཉེར་པས་བསྒོམ་པ་ཡིན་ལ། དེའི་ཕྱིར་ཉན་ཐོས་ཀྱི་བསྒོམ་ལམ་ལ་ཟག་མེད་ཀྱི་མིང་གིས་བཏགས་པའོ། །བྱང་ཆུབ་སེམས་དཔའ་རྣམས་ནི་མཐོང་བའི་ལམ་ཐོབ་མ་ཐག་ཏུ། ཁམས་གསུམ་ལས་འདས་པའི་ཉོན་མོངས་པ་མེད་པ་དེ་ཐོབ་ཀྱང་སླར་ཐུགས་རྗེ་ཆེན་པོས་འཁོར་བ་ཉིད་ཆེད་དུ་འཛིན་ཅིང་། ནམ་མཁའི་མཐས་གཏུགས་པའི་སེམས་ཅན་ཐམས་ཅད་ཀྱི་ཉོན་མོངས་པ་ཤེས་ནས་སེལ་ཅིང་། ཐབས་མཁས་པ་ཐོབ་པའི་སྤང་གཉེན་གྱི་རྟོག་པ་ཐམས་ཅད་མཁོ་བར་གཟིགས་པས་དང་དུ་ལེན་ཅིང་མངོན་དུ་མཛད་པས་བྱང་ཆུབ་སེམས་དཔའི་བསྒོམ་ལམ་ཟག་བཅས་ཡིན་ཞེས་བཏགས་པ་ཡིན་ཏེ། ངེས་པར་ན་བྱང་ཆུབ་སེམས་དཔའི་བསྒོམ་ལམ་ནི། ཉོན་མོངས་མེད་པ་ཡིན་པར་ཤེས་པར་བྱའོ། །འདི་ལ་རྒྱུ་མཚན་བཤད་པ་ནི། ལུང་དང་རིགས་པ་གཉིས་ཡོད་དེ། དང་པོ་ནི་རྒྱུད་བླ་མ་ལས། འཕགས་པས་འཆི་དང་ན་བ་དང་། །རྒ་བའི་སྡུག་བསྔལ་རྩད་ནས་སྤང་། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །མ་དག་པའི་གནས་སྐབས་ཀྱི་ན་རྒས་འཆི་བའི་མེ་ལྟ་བུ་འདིའི་ཉེར་ལེན་བུད་ཤིང་ལྟ་བུ་ནི། ཚུལ་བཞིན་མ་ཡིན་པའི་ཡིད་ལ་བྱེད་པ་དང་། ལས་དང་ཉོན་མོངས་པ་སྔོན་དུ་འགྲོ་བའི་སྐྱེ་བ་ཡིན་ཏེ། བྱང་ཆུབ་སེམས་དཔའ་ཡིད་ཀྱི་རང་བཞིན་གྱི་ལུས་ཐོབ་པ་རྣམས་ལ། གང་ཞིག་ཤིན་ཏུ་སྣང་བ་མེད་པར་གྱུར་པས་གཅིག་ཤོས་གཏན་འབར་བ་མེད་པར་རྟོགས་པའོ། །དེ་ཡང་། ཅི་བཞིན་ཡང་དག་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཀྱང་། སྙིང་རྗེའི་བདག་ཉིད་སྐྱེ་བ་དང་། །འཆི་དང་རྒ་དང་ན་བར་སྟོན། །བྱང་ཆུབ་སེམས་དཔའ་རྣམས་ནི་དགེ་བའི་རྩ་བ་ཀུན་ཏུ་སྦྱོར་བ་ཅན་ཏེ། བསམས་བཞིན་དུ་སྐྱེ་བ་ལ་དབང་བ་ཉིད་ལ་བརྟེན་ནས། །སྙིང་རྗེས་ཁམས་གསུམ་དུ་ཡང་དག་པར་སྦྱོར་རོ། །སྐྱེ་རྒས་ན་འཆི་ཉེ་བར་སྟོན་ཀྱང་ཆོས་འདི་དག་ཀྱང་མེད་དོ། །ཁམས་དེ་ཉིད་སྐྱེ་བ་མེད་པ་དང་། འགག་པ་མེད་པར་ཡང་དག་པ་ཅི་ལྟ་བ་བཞིན་དུ་མཐོང་བའི་ལས་ལ་དབང་བའོ། །དང་པོ་གཉིས་བརྒྱད་པ་ལ་ཐོབ་བོ། །དགུ་པ་ནི་ཡེ་ཤེས་ལ་དབང་བ་ཉིད་འཐོབ་སྟེ། སོ་སོ་ཡང་དག་པར་རིག་པ་ཐོབ་པའི་ཕྱིར་རོ། །བཅུ་པས་ནི། ལས་ལ་དབང་བ་ཉིད་དུ་རྟོགས་ཏེ། །ཅི་ལྟར་འདོད་པ་བཞིན་དུ་སྤྲུལ་པ་རྣམས་ཀྱིས་སེམས་ཅན་གྱི་དོན་བྱེད་པའི་ཕྱིར་རོ། །ཞེས་གསུངས་སོ། །བསྒོམ་པའི་ལམ་ནི་ཟབ་པ་སྟེ། །ཟབ་མོ་སྟོང་པ་ཉིད་ལ་སོགས། །ཟབ་པ་དེ་འདིར་སྒྲོ་འདོགས་དང་། །སྐུར་པའི་མཐའ་ལས་གྲོལ་བ་ཉིད། །ཁྱབ་དང་ཉི་ཚེ་ལྷག་པ་དང་། །མཉམ་དང་ལེན་དང་སྤོང་བ་ཡི། །སྒྲིབ་པ་ལས་ནི་རྣམ་གྲོལ་བ། །རྣམ་པར་མི་རྟོག་ཡེ་ཤེས་ཀྱིས། །དུག་སྨན་ཆེན་པོས་དུག་སེལ་ལྟར། །མཉམ་པ་ཉིད་དུ་སྦྱོང་པར་བྱེད། །མི་རྟོག་པ་ལ་ཐམས་ཅད་སྣང་། རྣམ་མི་རྟོག་གིས་ཐམས་ཅད་བྱེད། །མི་རྟོག་ནུས་པའི་ཡེ་ཤེས་ཀྱིས། །སྒྲིབ་གཉིས་ཅི་ལྟར་བསལ་བ་བཞིན། །ཐོད་རྒལ་འཇུག་པའི་ཏིང་འཛིན་གྱིས། །མཐུ་ཡང་ཐམས་ཅད་འགྲུབ་པ་དེ། །སེམས་ཀྱི་སྐད་ཅིག་སྐད་ཅིག་ལ། །སངས་རྒྱས་རྣམས་མཆོད་ཆོས་ཀུན་འཛིན། །ཞིང་རྣམས་སྦྱོང་ཞིང་སེམས་ཅན་སྒྲོལ། །ཕ་རོལ་ཕྱིན་རྫོགས་སྦྱོང་བ་ནི། །བསམ་གྱིས་མི་ཁྱབ་བྱེད་པས་ན། །སངས་རྒྱས་ཁོ་ནའི་སྤྱོད་ཡུལ་ལོ། །དང་པོ་ས་ཐོབ་རྒྱལ་སྲས་ཀྱང་། བསེ་རུ་ལྟ་བུ་བརྒྱ་དང་མཉམ། །གང་དག་ཉན་ཐོས་བསྒོམ་ལམ་དང་། །མཐུན་བཤད་རྒྱལ་སྲས་བྱིས་པར་མཚུངས། །སྒྱུ་མ་ལྟར་རྟོགས་འགོག་པ་དང་། །བྲལ་ཟད་འགོག་པ་ཐ་དད་ཏེ། །སྤང་གཉེན་གཉིས་ཀྱི་ངོ་བོ་ཡིན། ཁམས་གསུམ་ཟག་པ་འདུས་བྱས་དང་། །ཟག་མེད་ལས་ཀྱི་ཡེ་ཤེས་ལས། །གཅིག་ཏུ་རྟོགས་པ་འཁྲུལ་པ་ཡིན། །ཉི་མའི་དཀྱིལ་འཁོར་བྱེད་ལས་རྣམས། །མེ་ཁྱེར་འཕོང་ལ་སྦྱར་དང་མཚུངས། །ཚུལ་འདི་དིང་སང་མཁས་གྲུབ་རྣམས། །ལེགས་པར་བརྟགས་ན་དོན་ཆེན་འགྱུར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །རྗེས་སུ་དྲན་བའི་ལམ་བཤད་པའོ། །དྲུག་པ་ཉེ་བར་སོན་པ་མཐར་ཐུག་གི་ལམ་བཤད་པ་ནི། དེའི་བདག་ཉིད་དུ་ཉེ་བར་སོན་པ་ནི། དེ་བཞིན་ཉིད་དྲི་མ་མེད་པར་གྱུར་པ་ན། ཐམས་ཅད་དེ་བཞིན་ཉིད་ཙམ་དུ་སྣང་བ་སྟེ། དེ་ཡང་གནས་ཡོངས་སུ་གྱུར་པས་ཡོངས་སུ་གྲུབ་པ་ཡིན་ནོ། །ཞེས་གསུངས་ཏེ། སངས་རྒྱས་ཀྱི་ཆོས་སྐུ་གཉིས་ཀྱི་ངོ་བོ་རྣམ་པར་མི་རྟོག་པའི་ཡེ་ཤེས་སུ་གསུངས་པ། དེའི་བདག་ཉིད་དུ་མཐར་སོན་པ་ནི་མཐར་ཕྱིན་པ་ཞེས་བྱའོ། །འདི་ཡང་འགྱུར་བ་མེད་པའི་དེ་བཞིན་ཉིད་དང་། གཞན་མ་ཡིན་པའི་དེ་བཞིན་ཉིད་ཕྱིན་ཅི་མ་ལོག་པ་སྟེ། ཡོངས་གྲུབ་གཉིས་ཀྱི་རང་བཞིན་ནི་དེ་བཞིན་ཉིད་དེ། དེ་ལ་ཀུན་བརྟགས་གཞན་དབང་གི་དྲི་མ་མེད་པར་གྱུར་པ་ན། ཤེས་བྱ་ཐམས་ཅད་གཉིས་སུ་མེད་པས། ཡེ་ཤེས་ཟང་མར་གྱུར་ཏེ། དེ་བཞིན་ཉིད་ཙམ་དུ་སྣང་བ་སྟེ། འདི་ནི་སེམས་ཡིད་རྣམ་པར་ཤེས་པ་གནས་གྱུར་ནས་ཡེ་ཤེས་ལྔའི་རང་བཞིན་དུ་ཡོངས་སུ་གྲུབ་པ་ཡིན་ནོ། །འདིར་འགྱུར་བ་ནི་བསྒོམ་པའི་ལམ་མཐར་ཐུག་པར་རོ། །དེ་ནི་སྐད་ཅིག་མ་ཞེས་མངོན་པར་རྟོགས་པའི་རྒྱན་དུ་གསུངས་ཏེ། ཟག་པ་མེད་པའི་ཆོས་གཅིག་གི་རང་བཞིན་དུ་ཆོས་ཐམས་ཅད་བསྡུས་ནས་རྟོགས་པར་འགྱུར་སྟེ། ཟོ་ཆུའི་རྒྱུད་ཐམས་ཅད་རྟོག་པ་ཅིག་གིས་འགུལ་བ་ལྟར་རོ། །དེའི་ཚེ་རྣམ་པར་སྨིན་པའི་སྐད་ཅིག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་དང་། ཆོས་དཀར་པོ་ཐམས་ཅད། དབྱེ་བ་མེད་པར་རང་གི་རང་བཞིན་དུ་གྱུར་པས་སྐད་ཅིག་མའི་ཡེ་ཤེས་ཞེས་བྱའོ། །དེ་ལ་ཀུན་བརྟགས་གཞན་དབང་གི་མཚན་ཉིད་སྣང་ཡང་མི་བདེན་པ་རྨི་ལམ་ལྟར་རྟོགས་པ་མཐར་ཕྱིན་པས། ཕ་རོལ་ཏུ་ཕྱིན་པའི་སྤྱོད་པ་དག་པ་ཕུལ་དུ་ཕྱིན་པ་དང་། ཆོས་ཐམས་ཅད་དམིགས་སུ་མེད་པའི་དོན་སྐྱེས་བུ་གཉིད་ལས་སད་པ་ལྟ་བུར་སྒྲིབ་པ་ཐམས་ཅད་ལས་གྲོལ་བར་གྱུར་པའི་ཕྱིར་རོ། །དེས་ན་འདིར་སྒྲིབ་པ་ཐམས་ཅད་ཟད་པའི་ཤེས་པ་དང་། ཆོས་ཐམས་ཅད་མི་སྐྱེ་བ་མངོན་སུམ་མཐར་ཐུག་པས་ཟད་པ་དང་མི་སྐྱེ་བ་ཤེས་པའོ། །ཐེག་བསྡུས་ལས་ཀྱང་། ཅི་ལྟར་ཆོས་ཀྱི་སྐུ་འདི་རེག་པ་ཐོག་མ་ཉིད་དུ་ཐོབ་ཅེ་ན། ཐེག་པ་ཆེན་པོའི་ཆོས་འདྲེས་པ་ལ་དམིགས་པ་རྣམ་པར་མི་རྟོག་པ་དང་། རྗེས་ལས་ཐོབ་པའི་ཡེ་ཤེས་ལྔ་ལེགས་པར་བསྒོམས་པས་ཐམས་ཅད་དུ་ཚོགས་ལེགས་པར་བསགས་པ་དང་། སྒྲིབ་པ་ཕྲ་མོ་བཤིག་པར་དཀའ་བ་བཤིག་པའི་ཕྱིར། རྡོ་རྗེ་ལྟ་བུའི་ཏིང་ངེ་འཛིན་གྱིས་ཏིང་ངེ་འཛིན་དེའི་འཇུག་ཐོགས་སུ་སྒྲིབ་པ་ཐམས་ཅད་དང་བྲལ་པའི་ཕྱིར་དེའི་གནས་གྱུར་པ་འཐོབ་བོ། །ཞེས་གསུངས་ཏེ། །གང་གནས་གྱུར་པ་ཀུན་གཞིའི་རྣམ་ཤེས་དང་། །གང་གིས་གནས་འགྱུར་པ་རྒྱུ་མཐུན་པའི་ཆོས་སྐུས་དང་། གང་དུ་གནས་གྱུར་པ་དྲི་མ་མེད་པའི་ཆོས་སྐུར་དང་། ཚུལ་ཅི་ལྟར་གནས་གྱུར་པ། མེད་པའི་ཆོས་གཉིས་དག་ཅིང་། ཡོད་པའི་ཆོས་ཉིད་སྣང་བར་གྱུར་པ་དང་། དུས་ནམ་གྱུར་པ་རྣམ་པ་བཞི་པོ་མོས་པ་དང་། རེག་པ་དང་། རྗེས་སུ་དྲན་པ་དང་། སྐད་ཅིག་གིས་དེའི་རང་བཞིན་དུ་གྱུར་པ་དང་། གནས་གྱུར་པ་ཁྱད་པར་དང་བཅས་པ་རྣམ་པ་བཅུས། འཆད་པར་འགྱུར་བ་གོ་རིམ་པ་དང་བཅས་པ་དྲུག་གིས་སངས་རྒྱས་ཉིད་སྟོན་པར་མཛད་པ་ཡིན་ནོ། །མདོ་སྡེ་རྒྱན་ལས་ཀྱང་། བསྒོམ་པ་ཐ་མ་ཐོབ་ནས་ནི། །བྱང་ཆུབ་སེམས་དཔའ་དབང་བསྐུར་བ། །རྡོ་རྗེ་ལྟ་བུའི་ཏིང་ངེ་འཛིན། །རྟོག་པས་མི་ཤིགས་ཐོབ་ནས་ནི། །གནས་གཞན་གྱུར་པ་མཐར་ཐུག་པ། །སྒྲིབ་པ་ཀུན་ཀྱི་དྲི་མེད་པ། གང་ལ་གནས་ནས་སེམས་ཅན་ཀུན། །ཕན་ཕྱིར་རབ་ཏུ་སྒྲུབ་བྱེད་པ། །རྣམ་པ་ཐམས་ཅད་མཁྱེན་པ་ཡི། །གོ་འཕང་བླ་ན་མེད་པ་འཐོབ། །ཞེས་གསུངས་སོ། །རྒྱས་པར་ནི་འོག་ནས་སྟོན་ཏོ། །བདུན་པ་གནས་གྱུར་དེ་ཉིད་བཤད་པ་ལ་གསུམ་སྟེ། འཚམས་སྦྱར་བ་དང་། བསྟན་པ་དང་། བཤད་པའོ། །དང་པོ་ནི། རྣམ་པ་བཅུས་གནས་ཡོངས་སུ་གྱུར་པ་ལ་འཇུག་པ་བླ་ན་མེད་པ་ཡིན་ཏེ། ཞེས་གསུངས་འོག་ནས་སྟོན་པ་འདི་རྣམས་ཀྱི་གནས་གྱུར་ཡོངས་སུ་རྫོགས་པ་སངས་རྒྱས་ཀྱི་གནས་གྱུར་བླ་ན་མེད་པ་སྟོན་ཏོ། །དེ་ཡང་གནས་གང་དག་ཞེ་ན། མདོར་བསྟན་པ་ནི། གནས་འགྱུར་གྱི་རང་བཞིན་གང་ཡིན་པ་དང་། དངོས་པོ་གང་གནས་གྱུར་པ་དང་། གང་ཟག་གང་གནས་གྱུར་པ་དང་། ཉན་རང་དང་ཐེག་ཆེན་པའི་གནས་འགྱུར་གྱི་ཁྱད་པར་རོ། །དགོས་པ་ཅི་ལ་བརྟེན་པ་དང་། གནས་འགྱུར་གྱི་རྟེན་གང་ལས་གྱུར་པ་དང་། གནས་གྱུར་པའི་རྒྱུ་ཡིད་ལ་བྱེད་པ་དང་། དེའི་ལམ་ལ་ཅི་ལྟར་སྦྱོར་བ་དང་། གནས་གྱུར་མེད་ན་ཉེས་དམིགས་བཞི་ཡོད་པ་དང་། ཡོད་པའི་ཕན་ཡོན་བསྟན་པ་སྟེ། རྣམ་པ་འདི་བཅུས་གནས་འགྱུར་ཤེས་པར་བྱའོ། །རྒྱས་པར་བཤད་པ་ནི་བཅུ་སྟེ། དང་པོ་གནས་འགྱུར་གྱི་རང་བཞིན་ནི། དེ་ལ་རང་བཞིན་ལ་འཇུག་པ་ནི། གློ་བུར་གྱི་དྲི་མ་དང་། དེ་བཞིན་ཉིད་མི་སྣང་བ་དང་། སྣང་བའི་དོན་དུ་དེ་བཞིན་ཉིད་དྲི་མ་མེད་པའོ། །ཞེས་པ་སྟེ། གློ་བུར་གྱི་དྲི་མ་ནི་རང་གི་སེམས་ཉིད་དྲི་མ་མེད་པ་རང་བཞིན་གྱིས་འོད་གསལ་བ་ཡིན་ཀྱང་། དེ་ཉིད་རང་གིས་རང་མ་རིག་པ་ལས། རྣམ་པར་རིག་པ་ཡུལ་དང་ཡུལ་ཅན་ལྟར་གཉིས་སུ་སྣང་སྟེ། ཡིད་ཀྱི་རྣམ་པར་རྟོག་པ་སྨིག་རྒྱུ་ལྟ་བུ་ལངས་ཤིང་ཡང་དག་པ་མ་ཡིན་པར་རྟོག་པས་དེ་བཞིན་ཉིད་འོད་གསལ་བ་སྒྲིབ་པར་གྱུར་ཏོ། །སྒྲིབ་པ་འདི་མི་སྣང་ན་དེ་བཞིན་ཉིད་སྣང་བར་འགྱུར་ཏེ། དཔེར་ན་སའི་རྙོག་མ་དག་ན་ཆུ་དྭངས་བར་སྣང་བ་བཞིན་ཏེ། འདི་ནི་གནས་འགྱུར་གྱི་ངོ་བོ་ཡིན་ཏེ། མདོ་སྡེ་རྒྱན་ལས། ཅི་ལྟར་ཆུ་རྙོག་པ་ལས་དྭངས་པ་ནི། །དྭངས་བ་ཉིད་དེ་དེ་ལས་སྐྱེས་མིན་གྱི། །དེ་ནི་དེ་ལ་དྲི་མ་བྲལ་བར་ཟད། །དེ་བཞིན་རང་སེམས་དག་ལ་ཚུལ་དེ་ཉིད། །སེམས་ནི་རྟག་ཏུ་རང་བཞིན་འོད་གསལ་འདོད། །དེ་ནི་གློ་བུར་ཉེས་པས་མ་རུང་བྱས། །ཆོས་ཉིད་སེམས་ལས་གཞན་པའི་སེམས་གཞན་ནི། །འོད་གསལ་མ་ཡིན་རང་བཞིན་ལ་བརྗོད་དོ། །ཞེས་འོད་གསལ་བ་དང་། །རང་བཞིན་སྟོང་པ་ཉིད་ལ་ནི། །རྣམ་རྟོག་གི་རང་བཞིན་གོས་པ་མེད་དེ། རྣམ་རྟོག་ནི་མེད་པ་སྣང་བའི་ཕྱིར་རོ། །ཆོས་དབྱིངས་བསྟོད་པ་ལས་ཀྱང་། ཅི་ལྟར་སོ་གའི་དུས་ན་ཆུ། །དྲོ་འོ་ཞེས་ཀྱང་བརྗོད་པར་བྱ། །དེ་ཉིད་གྲང་པའི་དུས་སུ་ནི། །གྲང་ངོ་ཞེས་ནི་བརྗོད་པར་བྱ། །ཉོན་མོངས་དྲ་བས་གཡོགས་པ་ན། །སེམས་ཞེས་མངོན་བར་བརྗོད་པར་བྱ། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་པ་དང་། རྒྱུད་ལས་ཀྱང་། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་ཉིད་བསལ་ན་སངས་རྒྱས་སོ། །ཞེས་བྱ་བ་ལ་སོགས་པ་མང་དུ་གསུངས་པ་ནི། གནས་གྱུར་གྱི་ངོ་བོ་སྟེ། དེ་ལྟར་ཤེས་པས་འཇུག་པ་ཞེས་བཤད་དོ། །གཉིས་པ་དངོས་པོ་གང་གནས་འགྱུར་བ་ནི། དེ་ལ་དངོས་པོ་ལ་འཇུག་པ་ནི་ཞེས་འཚམས་སྦྱར་ནས། དངོས་པོ་ནི་གསུམ་ཡོད་དེ། གང་ཞེ་ན། ཐུན་མོང་པ་སྣོད་ཀྱི་རྣམ་པར་རིག་པའི་དེ་བཞིན་ཉིད་ཡོངས་སུ་གྱུར་པ་དང་། མདོ་སྡེའི་ཆོས་ཀྱི་དབྱིངས་ཀྱི་དེ་བཞིན་ཉིད་ཡོངས་སུ་གྱུར་པ་དང་། ཐུན་མོང་མ་ཡིན་པའི་སེམས་ཅན་གྱི་ཁམས་ཀྱི་དེ་བཞིན་ཉིད་ཡོངས་སུ་གྱུར་པའོ། །ཞེས་གསུངས་པས་སྣོད་ཀྱི་རྣམ་རིག་ནི། མ་དག་པའི་ཚེ། ཞིང་ཁམས་མ་དག་པའི་འཇིག་རྟེན་དུ་སྣང་ལ། གང་གི་ཚེ་དག་པས་སངས་རྒྱས་ཀྱི་ཞིང་དག་པར་འགྱུར་ཏེ། ཡུལ་དང་དབང་པོ་ལྔའི་ཆ་ཡིན་ནོ། །དེ་ཡང་། སྣོད་ཀྱི་འཇིག་རྟེན་མ་དག་པ། །དེ་ལ་དག་པར་བསྒྲུབས་པ་ཡིས། །སངས་རྒྱས་ཞིང་ནི་དག་པ་ཉིད། །ཅེས་བྱམས་པས་གསུངས་སོ། །མདོ་རྒྱན་ལས་ཀྱང་། དོན་བཅས་འཛིན་པ་གཞན་གྱུར་ནས། །ཅི་ལྟར་འདོད་བཞིན་ལོངས་སྤྱོད་དག །བསྟན་ཕྱིར་ཞིང་ནི་དག་པ་ལ། །འབྱོར་པ་དམ་པ་ཐོབ་པར་འགྱུར། །ཞེས་སོ། །མདོ་སྡེའི་ཆོས་ཀྱི་དབྱིངས་ནི། །བསྟན་པ་ཆོས་སྡེ་སྣོད་རྣམས་ཏེ། །མིང་ཚིག་ཡི་གེ་ལ་སོགས་པའི་མཚན་འཛིན་དག་ཅིང་། དབང་འབྱོར་པ་སྟེ། དྲུག་པ་ཡིད་རྣམ་རྟོག་དང་བཅས་པ་གནས་གྱུར་པའོ། །དེ་ཡང་། རྣམ་རྟོག་གཞན་དུ་གྱུར་པས་ནི། །དུས་རྣམས་ཀུན་ཏུ་ཡེ་ཤེས་དང་། །ལས་རྣམས་ཀུན་ལ་ཐོགས་མེད་པའི། །འབྱོར་པ་དམ་པ་ཐོབ་པར་འགྱུར། །ཞེས་བྱུང་ངོ་། །ཐུན་མོང་མ་ཡིན་པའི་སེམས་ཅན་གྱི་ཁམས་ནི། ཀུན་གཞིའི་རྣམ་པར་ཤེས་པ་སྟེ། རྒྱུད་སོ་སོའི་ལས་འདུ་བྱེད་པ་རྣམ་ཤེས་བདུན་གྱིས་བསྐྱེད་པའི་འབྲས་བུ་ཡིན་པས་ཐུན་མོང་མ་ཡིན་པ་ཞེས་བྱའོ། །དེ་གནས་གྱུར་པ་ནི་ཆ་གཉིས་ཡོད་དེ། །རྟེན་གྱི་ཆ་ཀུན་གཞི་དག་པས་ཆོས་སྐུ་དང་། བྱེད་པའི་ཆ་ཡིད་ཉོན་མོངས་ཅན་གནས་གྱུར་པས་མཉམ་པ་ཉིད་དེ། །ཡིད་ནི་གཞན་དུ་གྱུར་པས་ནི། །འབྱོར་དང་མཐུན་སྤྱོད་མི་རྟོག་པའི། །ཡེ་ཤེས་ཤིན་ཏུ་དྲི་མེད་པ། །འབྱོར་པ་དམ་པ་ཐོབ་པར་འགྱུར། །ཞེས་པ་དང་། རྟེན་ནི་གཞན་དུ་གྱུར་པ་ན། །སངས་རྒྱས་དྲི་མེད་གནས་ལ་ནི། །མི་གནས་མྱ་ངན་འདས་པ་འདི། འབྱོར་པ་དམ་པ་ཐོབ་པར་འགྱུར། །ཞེས་གསུངས་སོ། །མདོར་བསྡུས་ན། སྣང་བ་དང་། འདོམས་པ་དང་། ཀུན་ཏུ་སྟོན་པའི་འབྲས་བུ་ཐ་དད་པའི་ཕྱིར་གསུམ་དུ་བྱས་སོ། །གསུམ་པ་གང་ཟག་གང་གིས་གང་གནས་གྱུར་པ་ནི་གཉིས་ཏེ། ཐུན་མོང་མ་ཡིན་བ་དང་། ཐུན་མོང་གི་གནས་གྱུར་རོ། །དང་པོ་ནི། གང་ཟག་ལ་འཇུག་པ་ནི། དང་པོ་གཉིས་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཉིད་ཀྱི་ཡོངས་སུ་གྱུར་པ་ཡིན་གྱི། ཞེས་གསུངས་ཏེ། ཉན་རང་ལ་ནི་སྣོད་དང་ཆོས་རྣམས་མི་སྦྱོང་བར་ཞི་བ་དོན་དུ་གཉེར་བས་དེ་གཉིས་མི་དགོས་ལ། སངས་རྒྱས་དང་བྱང་ཆུབ་སེམས་དཔའ་རྣམས་ཞིང་དང་། ཆོས་ཐམས་ཅད་ལ་དབང་འབྱོར་བས་སྐུ་དང་ཡེ་ཤེས་འཕྲིན་ལས་སྟོན་པའི་ཕྱིར་དགོས་སོ། །དེའི་ཕྱིར་ཉན་རང་དང་ཐུན་མོང་མ་ཡིན་པ་ཞེས་བྱའོ། །ཐུན་མོང་པ་ནི། ཕྱི་མ་ནི་ཉན་ཐོས་དང་རང་སངས་རྒྱས་རྣམས་ཀྱི་སྤང་ཡིན་ནོ་ཞེས་པ་ནི། ཐུན་མོང་མ་ཡིན་པའི་སེམས་ཅན་གྱི་ཁམས་ཞེས་བསྟན་པ། ཁམས་གསུམ་གྱི་ཉོན་མོངས་ཐམས་ཅད་ཀྱི་རྟེན་བྱེད་པའི་ཀུན་ཞིའི་རྣམ་ཤེས་ཀྱི་ཆ་ཡིན་པས། དེ་ནི་འཕགས་པ་ཐམས་ཅད་ཀྱིས་སྤོང་དགོས་ཏེ། ཉོན་སྒྲིབ་རྟེན་དང་བཅས་པ་གཞོམ་བྱ་ཡིན་བའི་ཕྱི་རོ། །འདི་ལས་རྣམ་པར་གྲོལ་བ་ཐམས་ཅད་མཚུངས་པས་རྣམ་པར་གྲོལ་བའི་ལུས་ཞེས་ཀྱང་བསྟན་ཏོ། །དགོངས་འགྲེལ་ལས་ཀྱང་། གང་གྲོལ་དེ་དག་རྣམས་ཀྱི་ཟག་པ་མེད་པའི་དབྱིངས། །འདི་གཉིས་གཅིག་ཏུ་གདགས་པར་བྱ་བ་འགའ་ཡང་མེད། ཞེས་གསུངས་པའང་འདི་ཉིད་བསྟན་ཏོ། །བཞི་པ་གནས་འགྱུར་གྱི་ཁྱད་པར་བསྟན་པ་ནི། ཞིང་གི་ཁྱད་པར་དང་། །ཐོབ་པའི་ཁྱད་པར་གཉིས་ཏེ། དང་པོ་ནི། ཁྱད་པར་ལ་འཇུག་པ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཞིང་ཡོངས་སུ་དག་པའི་ཁྱད་པར་དང་། ཞེས་པ་ཡུལ་དུ་སྣང་བའི་ཀུན་གཞི་ལ་ཡོད་པའི་མཚན་མ་རྣམ་ཤེས་ཀྱི་ཆ་སྦྱངས་ནས། ཞིང་དག་པ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མངའ་ཞིང་། སྟོན་པའང་ཐོགས་པ་མེད་དོ། །དེའང་ཁམས་རྣམས་བྱེད་པ་པོ་མེད་པར་རང་གི་མཚན་ཉིད་འཛིན་པ་ལ་ཟབ་མོའི་རྟེན་ཅིང་འབྲེལ་བར་འབྱུང་བ་ལ་དབང་འབྱོར་པའི་ཕྱིར་རོ། །ཉན་ཐོས་རྣམས་ནི་འདི་ལྟར་སྣོད་ཀྱི་རྣམ་པ་མི་སྦྱོང་བས་སེམས་ཅན་གཞན་དང་ཐུན་མོང་དུ་སྣང་བ་དང་། རང་རྒྱལ་རྣམས་ཀྱི་ཅུང་ཟད་སྦྱངས་ཀྱང་དེ་དོར་ནས་ཟག་མེད་དུ་འཇུག་པའི་ཕྱིར་དོན་མེད་དོ། །ཐོས་པའི་ཁྱད་པར་ཡང་། ཆོས་ཀྱི་སྐུ་དང་ལོངས་སྤྱོད་རྫོགས་པ་དང་། སྤྲུལ་པའི་སྐུ་ཐོབ་པས་གཟིགས་པ་དང་། འདོམས་པ་དང་། དབང་འབྱོར་པ་ཉིད་ཐོབ་པའི་ཁྱད་པར་ལས་སོ། །ཞེས་པ་སྟེ། ཆོས་ཀྱི་སྐུ་ནི་ཤེས་བྱ་ཅི་ལྟ་ཅི་སྙེད་པ་ཐམས་ཅད་གཟིགས་པ་ལ་དབང་འབྱོར་ལ། ལོངས་སྤྱོད་རྫོགས་པ་ནི་ཟབ་པ་དང་། རྒྱ་ཆེ་བའི་ཆོས་འདོམས་པ་དང་དབང་འབྱོར་ཏེ། ངོ་མཚར་དུ་མའི་སྒོ་སྟོན་པར་མཛད་དོ། །སྤྲུལ་པའི་སྐུ་ནི་སེམས་ཅན་གྱི་བྱ་བ་གྲུབ་པའི་རྟེན་བསམ་གྱིས་མི་ཁྱབ་པའི་ཡོན་ཏན་ཐོབ་ཅིང་སྟོན་པ་འདི་དག་ནི་ཉན་རང་ལ་མེད་པའོ། །རྒྱས་པར་ནི་འོག་ནས་མཐར་ཐུག་པའི་སྦྱོར་བར་འཆད་དོ། །ལྔ་པ་དགོས་པའི་ཁྱད་པར་ལ་འཇུག་པ་བཤད་པ་ནི། དེ་ལ་དགོས་པ་ལ་འཇུག་པ་ནི། སྔོན་གྱི་སྨོན་ལམ་གྱི་ཁྱད་པར་ལས་དང་། ཐེག་པ་ཆེན་པོ་སྟོན་པའི་མི་གནས་པའི་ཁྱད་བར་ལས་དང་། ས་བཅུ་པོ་རྣམས་སུ་སྦྱོར་བའི་ཁྱད་པར་ལས་སོ། །ཞེས་གསུངས་ཏེ། འབྲས་བུ་སྐུ་གསུམ་ཐོབ་པའི་རྒྱུ་དགོས་པ་རྣམ་པ་གསུམ་གྱིས་འཇུག་སྟེ། སྔོན་གྱི་སྨོན་ལམ་ནི་མོས་པ་སྤྱོད་པ་ནས་བཟུང་སྟེ། ལྷག་པའི་བསམ་པ་དག་པའི་ས་ལ་སྨོན་ལམ་ཆེན་པོ་བཅུ་སྒྲུབ་པ་ནས། བརྒྱད་པ་ལ་སྨོན་ལམ་རྫོགས་པར་བསྒྲུབ་པ། ཚད་མེད་པ་ཀུན་ཏུ་བཟང་པོའི་རྣམ་ཐར་ལ་འཇུག་པ་ནི་ངག་དག་པའི་དགོས་པའོ། །དམིགས་པའི་ཁྱད་པར་ནི་ཐེག་པ་ཆེན་པོ་རྣམ་པར་མི་རྟོག་པར་ཐམས་ཅད་གཅིག་ཏུ་འདྲེས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དམིགས་པ་དང་། མ་འདྲེས་པར་སོ་སོར་ཆོས་ཐམས་ཅད་ལ་དམིགས་པས་སྒྱུ་མ་ལྟ་བུར་འཇུག་པ་དང་། དེ་ཐམ་ཅད་ཀྱི་དེ་བཞིན་ཉིད་ལ་དམིགས་ནས། ཐེག་པ་ཆེན་པོའི་ཆོས་རྣམས་སྟོན་པའི་མཐུ་འབྱུང་སྟེ། གཟུངས་དང་། སོ་སོ་ཡང་དག་པར་རིག་པ་ཚད་མེད་པས་འཇུག་པའི་ཕྱིར་རོ། །ས་བཅུ་རྣམས་སུ་སྦྱོང་བའི་ཁྱད་པར་ནི། སྒྲིབ་པ་གཉིས་བག་ཆགས་དང་བཅས་པ་སྤོང་ཞིང་ཡེ་ཤེས་དམ་པ་ཐོབ་པས། འཁོར་བ་ཅི་སྲིད་དུ་ཕ་རོལ་ཏུ་ཕྱིན་པ་བཅུའི་ཡོན་ཏན་གྲུབ་པའི་ལས་ལ་ཐོགས་པ་མེད་པར་མཛད་པའི་ཕྱིར་རོ། །དེ་ལྟར་ན་སྨོན་ལམ་དང་། དམིགས་པ་དང་། སྦྱོར་བ་ལས། ཡེ་ཤེས་འཕྲིན་ལས་དང་བཅས་པ་དག་པར་འགྱུར་པའི་དགོས་པ་བསྟན་པ་ཡིན་ནོ། །དོན་འདི་སེམས་བསྐྱེད་ཀྱི་སྐབས་ནས་ཀྱང་། སྨོན་ལམ་ཆེན་པོ་བཅུ་བསྒྲུབ་ཕྱིར། །རྒྱ་ཆེ་བར་ནི་ཤེས་པར་བྱ། །དཀའ་བས་ཡུན་རིངས་མི་སྐྱོ་ཕྱིར། །སྤྲོ་བ་ཁོང་སུ་ཆུད་པར་བྱ། །བྱང་ཆུབ་ཉེ་བར་རྟོགས་པ་དང་། །དེའི་ཐབས་ཤེས་རྙེད་པའི་ཕྱིར། །བསམ་པ་དག་པར་ཤེས་པར་བྱ། །བདག་གཞན་ཚུལ་ལ་མཁས་པ་ཉིད། །ཅི་ལྟར་རྣམ་བཞག་ཡིད་བྱེད་པ། །དེ་རྟོག་ཉིད་དུ་ཤེས་ཕྱིར་དང་། །དེ་ཉིད་ལ་ཡང་མི་རྟོག་ཕྱིར། །ངེས་པར་འབྱུང་བར་ཤེས་པར་བྱ། །ཞེས་རྒྱ་ཆེ་བ་དང་། སྤྲོ་བ་དང་། བསམ་པ་དག་པ་དང་། ངེས་པར་འབྱུང་པའི་སྦྱོར་བས་སངས་རྒྱས་འགྲུབ་པར་མདོ་སྡེ་རྒྱན་ལས་གསུངས་པ་དང་མཐུན་པ་ཉིད་དོ། །ཉན་རང་ལ་ནི་འདི་རྣམས་དོན་མེད་དེ། རང་གཅིག་པུ་འཁོར་བ་ལས་ཐོན་པར་སྨོན་པ་དང་། རྫིངས་ལྟ་བུར་ཆོས་རེ་ཤིག་པར་འཛིན་པ་དང་། རང་གི་ས་པས་ཁམས་གསུམ་ལས་འདས་པར་བྱེད་པ་ཉི་ཚེ་བའི་སྦྱོར་བ་ཅན་ཡིན་པའི་ཕྱི་རོ། །དེ་ལྟར་རང་བཞིན་དང་། དངོས་པོ་དང་། གང་ཟག་དང་། ཁྱད་པར་དང་། དགོས་པ་ལྔ་པོ་འདི་རྣམས་རྟེན་པའི་རང་བཞིན་སྤང་གཉེན་ལ་བརྟེན་ནས་བསྟན་པ་ཡིན་ནོ། །ད་ནི་དེ་ཐམས་ཅད་ཀྱི་རྟེན་གང་ལ་བརྟེན་ནས་གནས་གྱུར་པ་སྟོན་ཏེ། འདི་ལ་ཡང་། བསྟན་བཤད་གཉིས་ལས། དང་པོ་ནི། རྟེན་ལ་འཇུག་པ་ནི། རྣམ་པར་མི་རྟོག་པའི་ཡེ་ཤེས་ལ་འཇུག་པ་རྣམ་པ་དྲུག་གིས་ཏེ། ཞེས་འཚམས་སྦྱར་ནས། དྲུག་པོ་དེ་མདོར་བསྟན་པ་ནི། དམིགས་པ་དང་། མཚན་མ་སྤངས་པ་དང་། ཡང་དག་པའི་སྦྱོར་བ་དང་། མཚན་ཉིད་དང་། ཕན་ཡོན་དང་། ཡོངས་སུ་ཤེས་པ་ལས་སོ་ཞེས་སངས་རྒྱས་བཅོས་ལྡན་འདས་རྣམས་གྱི། རྣམ་པར་མི་རྟོག་པའི་ཡེ་ཤེས་ལ་འཇུག་ན། །དམིགས་པ་ནི་གང་གིས་འཇུག མཚན་མའི་རྟོག་པ་ནི་གང་སྤང་། དེ་ལ་ཅི་ལྟར་ནི་སྦྱོར་བར་བྱེད། དེའི་མཚན་ཉིད་ནི་ཅི་ལྟ་བུ་ཡིན། འདི་ལ་ཕན་ཡོན་ནི་གང་། གང་ཤེས་པས་རྣམ་པར་མི་རྟོག་པའི་ཡེ་ཤེས་ཤེས་པར་འགྱུར་ཞེས་བརྟགས་ནས་འཇུག་གོ །རྒྱས་པར་བཤད་པ་ལ་དྲུག་སྟེ། སྔ་མ་དྲུག་ཉིད་ལས། དང་པོ་དམིགས་པ་ལ་འཇུག་པ་བཞི་བཤད་པ་ནི། དེ་ལ་དམིགས་པ་ལ་འཇུག་པ་རྣམས་པ་བཞི་སྟེ། ཞེས་མདོར་བསྟན་ནས་བཞི་པོ་ཡང་གང་ཞེ་ན། ཐེག་པ་ཆེན་པོ་སྟོན་པ་དང་། དེ་ལ་མོས་པ་དང་། ངེས་པ་དང་། ཚོགས་ཡོངས་སུ་རྫོགས་པས་སོ། །ཞེས་གསུངས་ཏེ། འདི་ཡང་རྒྱུད་བླ་མར་ནི། ཁམས་ཀྱི་སྒྲས་བསྟན་ལ། འདིར་རྣམ་པར་མི་རྟོག་པའི་ཡེ་ཤེས་ཀྱི་སྒྲས་གསུངས་སོ། །ཤེས་རབ་ཀྱི་ཕ་རོལ་ཏུ་ཕྱིན་པར་ནི། ཤེར་ཕྱིན་གྱི་མིང་གིས་གསུངས་ཏེ། ཐེག་བསྡུས་ནས་རྣམ་པར་མི་རྟོག་པའི་ཡེ་ཤེས་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ནི་ཁྱད་པར་མེད་དོ། །ཞེས་བྱུང་ངོ་། །དེས་ན། རྟོགས་བྱ་རྟོགས་དང་དེ་ཡི་ནི། །ཡན་ལག་རྟོགས་པར་བྱེད་ཕྱིར་ཏེ། གོ་རིམ་ཅི་བཞིན་གནས་གཅིག་སྟེ། །དག་རྒྱུ་གསུམ་ནི་རྐྱེན་ཡིན་ནོ། །དོན་གྱི་གནས་བཞི་པོ་འདི་དག་གིས་ཀྱང་ཤེས་བྱ་ཐམས་ཅད་བསྡུས་པའི་ཕྱིར། དང་པོ་ནི་རྟོགས་པར་བྱ་བའི་གནས་སོ། །གཉིས་པ་ནི་རྟོགས་པ་སྟེ་བྱང་ཆུབ་བོ། །དེའི་ཡན་ལག་ནི་ཡོན་ཏན་ནོ། །ཡོན་ཏན་དེས་རྟོགས་པའི་རྐྱེན་བྱེད་པའི་ཕྱིར་འཕྲིན་ལས་ཏེ། ཁམས་དང་དཀོན་མཆོག་བཤད་པ་ནི། ཁམས་རྒྱུ་དང་། རྐྱེན་དཀོན་མཆོག་གསུམ་དུ་ཤེས་པར་བྱ་སྟེ། རྒྱུ་རྐྱེན་གཉིས་ལ་འབྲས་བུ་བྱང་ཆུབ་ཡོན་ཏན་འཕྲིན་ལས་དང་བཅས་པ་འབྱུང་ངོ་། །ཞེས་གསུངས་པས། ཁམས་རྒྱུའི་ཐ་སྙད་ཅན་ནི། རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་ཡིན་ལ། རྐྱེན་ནི་སངས་རྒྱས་ཀྱི་འཕྲིན་ལས་སུམ་ཅུ་རྩ་གཉིས་མཛད་པ་ན་གཞན་གྱི་སྒྲ་ལ་རྟེན་པའི་དཀོན་མཆོག་འབྱུང་བས་ན། འདིར་ནི་ཐེག་པ་ཆེན་པོའི་ཆོས་ཞེས་གསུངས་སོ། །དེས་ན་ཆོས་སྟོན་པ་ནི་ཕྱི་རོལ་ལྟར་སྣང་བའི་རྐྱེན་ཐོབ་པའོ། །དེ་ལ་བརྟེན་ནས་མོས་པ་འབྱུང་ངོ་། །མོས་ན་ངེས་པར་འཇུག་པས་བརྩོན་པ་འབྱུང་ངོ་། །དེ་ཡོད་ན་ཚོགས་གཉིས་ལ་ཞུགས་པས། ཚོགས་ཡོངས་སུ་རྫོགས་པར་འགྱུར་ཏེ། བཞི་པོ་འདི་གང་རུང་གཅིག་མེད་ན་ཡང་རྣམ་པར་མི་རྟོག་པའི་ཡེ་ཤེས་འབྲས་བུའི་རྣམ་པར་མི་སྐྱེ་བས་དམིགས་པ་བཞི་བསྟན་ཏེ། དེས་ན་བསམ་གྱི་མི་ཁྱབ་པའི་ཡུལ་འདི་ནི། ཡོད་དང་བདག་འདྲས་ཐོས་ནུས་དང་། །ཐོས་པ་འདི་འདྲའི་ཡོན་ཏན་དང་། །ལྡན་ཞེས་དད་པས་མོས་པའི་ཕྱིར། །འདུན་བརྩོན་དྲན་དང་བསམ་གཏན་དང་། །ཤེས་རབ་ལ་སོགས་ཡོན་ཏན་སྣོད། །བྱང་ཆུབ་སེམས་ནི་དེ་དག་ལ། །རྟག་ཏུ་ཉེ་བར་གནས་པར་འགྱུར། །དེ་ནི་རྟག་ཏུ་ཉེར་གནས་པས། །རྒྱལ་བའི་སྲས་པོ་ཕྱིར་མི་ལྡོག །བསོད་ནམས་ཕ་རོལ་ཕྱིན་རྫོགས་དང་། །ཡོངས་སུ་དག་པ་ཉིད་དུ་འགྱུར། ཞེས་གོ་རིམ་དང་བཅས་ཏེ་རྒྱུད་བླ་མར་གསུངས་སོ། །དེ་ལྟར་དམིགས་པ་ལ་བརྟེན་ནས། གང་ལ་དམིགས་པ་ཡོད་པ་ལ་རྣམ་རྟོག་གི་མཚན་མ་འབར་བར་གསུངས་པས། རྣམ་པར་མི་རྟོག་པའི་ཡེ་ཤེས་ཅི་ལྟར་འགྱུར་ཞེ་ན། གཉིས་པ་མཚན་མ་སྤང་བ་ལ་འཇུག་པ་བསྟན་པ་ནི། དེ་ལ་མཚན་མ་སྤང་པ་ལ་འཇུག་པ་ཡང་རྣམ་པ་བཞི་སྟེ། མི་མཐུན་པའི་ཕྱོགས་དང་། གཉེན་པོ་དང་། དེ་བཞིན་ཉིད་དང་། རྟོགས་པའི་ཆོས་ཀྱི་མཚན་མ་སྤངས་པ་ལས་རྟོགས་པར་བྱའོ། །ཞེས་གསུངས་པ་འདི་ལ་མཚན་མ་བཞི་པོའི་རང་བཞིན་དང་། གོ་རིམ་དང་། གང་ལ་བརྟེན་ནས་གང་སེལ་བ་བསྟན་པར་བྱ་སྟེ། མི་མཐུན་པའི་ཕྱོགས་ནི། སེམས་ཅན་རྣམས་མི་རྟག་པ་ལ་རྟག་པར་འཛིན་པ་དང་། སྟོང་པའི་འདུས་བྱས་ལ་དངོས་པོར་འཛིན་པ་དང་། སྲིད་པ་སྡུག་བསྔལ་གསུམ་གྱི་རང་བཞིན་ལ་བདེན་པར་འཛིན་པ་དང་། བདག་མེད་པའི་ཆོས་ལ་བདག་ཏུ་འཛིན་པ་ནི་ཕྱིན་ཅི་ལོག་ནི་མཚན་མ་སྟེ། འཁོར་བར་འཆིང་བར་བྱེད་པའི་ཕྱིར་རོ། །དེ་རྣམས་ནི། ཡང་དག་པའི་ཤེས་པ་དང་མི་མཐུན་པའོ། །གཉེན་པོ་ནི། འདུས་བྱས་མི་རྟག་པར་ཤེས་པ་དང་། བརྟགས་པ་ཐམས་ཅད་སྟོང་པར་ཤེས་པ་དང་། སྲིད་པར་སོང་བ་ཐམས་ཅད་སྡུག་བསྔལ་གསུམ་ལས་མ་འདས་པར་ཤེས་པ་དང་། ཆོས་ཐམས་ཅད་ལ་བདག་དང་བདག་གི་བ་མེད་པས་མྱ་ངན་ལས་འདས་པ་ཞི་བར་ཤེས་པ་ནི་འཁོར་བའི་གཉེན་པོ་ཏེ། གཉེན་པོའི་མཚན་མ་འདིས་སྡིག་པ་ལས་གྲོལ་བར་བྱེད་པས། ཐེག་པ་གསུམ་གྱི་ཐུན་མོང་ངོ་། །དེ་བཞིན་ཉིད་ནི། སྤང་གཉེན་གཉིས་ཀ་རྣམ་པར་རིག་པ་ཙམ་སྟེ། དེ་ལ་མཚན་མར་འཛིན་ན་ཀུན་བརྟགས་དང་། གཞན་དབང་ལས་མི་གྲོལ་སྟེ། སྤང་གཉེན་རྣམ་རྟོག་གིས་བྱས་པ་དེའི་རྣམ་རིག་ཀྱང་སྐྱེ་བ་མེད་ཅིང་། འགག་པ་མེད་པས་རང་བཞིན་གྱིས་འདུས་མ་བྱས་པའོ། །ཞེས་ཡོངས་སུ་གྲུབ་པའི་ཆོས་ཉིད་ནི། སངས་རྒྱས་ཀྱི་སྙིང་པོ་གཙང་བ་དག་པ་བདེ་བ་རྟག་པར་མཐོང་བ་ནི་རྒྱལ་བའི་སྲས་སོ། །རྟོགས་པའི་མཚན་མ་ནི་དེ་ལ་ཡང་དབང་རྣམ་པ་བཞི་ལ་སོགས་པའི་ཡོན་ཏན་འཕྲིན་ལས་དང་བཅས་པ་སྦྱོང་ཞིང་། མཐར་ཕྱིན་བར་བྱེད་པའོ། །གོ་རིམ་ཡང་དེ་ལྟར་ན་འདི་ནི་རིམ་པ་ཅི་ལྟ་བ་བཞིན་དུ། རགས་པ་དང་། འབྲིང་དང་། ཕྲ་བ་དང་། རིང་དུ་རྗེས་སུ་འབྲེལ་པ་རྣམས་བརྗོད་པ་ཡིན་ནོ། །ཞེས་པ། མི་མཐུན་པའི་ཕྱོགས་ཀྱི་མཚན་མ་ནི། གནས་ངན་ལེན་གྱི་རྒྱུ་ཡིན་པའི་ཕྱིར་དང་། རྟོགས་སླ་བ་རགས་པའོ། །དེའི་གཉེན་པོའི་མཚན་མ་ནི་འབྲིང་ཡིན་ནོ། །དེ་བཞིན་ཉིད་ཀྱི་མཚན་མ་ནི་ཕྲ་བ་ཡིན་ཏེ། རྣམ་པར་མི་རྟོག་པའི་ཡེ་ཤེས་སྣང་བ་ལ་དམིགས་པ་ཙམ་དང་། དེ་ལས་གཞན་ཐམས་ཅད་ཀྱི་གཉེན་པོ་ཡིན་པའི་ཕྱིར་རོ། །རྟོགས་པའི་མཚན་མ་ནི་བསྒོམ་བའི་འབྲས་བུ་ཡིན་པའི་ཕྱིར། རིང་དུ་རྗེས་སུ་འབྲེལ་བ་སྟེ། རྒྱུན་ཐར་ཐུག་པའི་ཕྱིར་རོ། །གང་ལ་བརྟེན་གང་སེལ་བ་ཡང་། །རྣམ་པར་མི་རྟོག་པ་ལ་འཇུག་པའི་མདོ་ལས། སྤང་བྱའི་རྟོག་པ་གཉེན་པོས་བསལ་བས་ཉོན་མོངས་སྤོང་སྟེ། སྲིད་པ་སྤང་བྱར་འཛིན་པ་དེ་བཞིན་ཉིད་ཀྱི་མཉམ་པར་འཛིན་ཏེ། འདི་ལས། འབྲས་བུ་སྐུ་གཉིས་བསྒྲུབ་དགོས་པས། མི་མཉམ་པ་དང་མཉམ་པར་བྱེད་པས་ཚོགས་སྦྱོར་དུ་སྤང་གཉེན་གཉིས་སོ། །མ་དག་ས་བདུན་དུ་དེ་བཞིན་ཉིད་དོ། །དག་པའི་ས་གསུམ་དུ་འབྲས་བུ་རྟོགས་པ་སྟེ། མཚན་མ་ཀུན་ཀྱི་ཐ་མ་ནི་རྡོ་རྗེ་ལྟ་བུའི་ཏིང་ངེ་འཛིན་གྱིས་སེལ་བར་བྱེད་དོ། །འདི་རྣམས་ཀྱང་། སའི་འོག་ན་ནོར་བུ་ཡོད་པ་རིམ་པར་ས་རྡོ་དང་། དངུལ་ལྟ་བུ་དང་། གསེར་ལྟ་བུ་དང་། རིན་པོ་ཆེ་སྣ་ཚོགས་ལྟ་བུ་བསལ་ནས། ནོར་བུ་རིན་པོ་ཆེ་བཻ་ཌུརྻ་འབྱུང་བའི་དཔེས་གསུངས་སོ། །དེ་ལྟར་མཚན་མ་སེལ་བ་ལ། དམིགས་པའི་སྦྱོར་བ་སེམས་བཤད་པ་ནི། དེ་ལ་ཡང་དག་པའི་སྦྱོར་བ་ལ་འཇུག་པ་ནི་རྣམ་པ་བཞི་སྟེ། ཞེས་སྤྱིར་བསྟན་ནས་བཞི་པོ་ཡང་གང་ཞེ་ན། དམིགས་པའི་སྦྱོར་བ་དང་། མི་དམིགས་པའི་སྦྱོར་བ་དང་། དམིགས་པ་མི་དམིགས་པའི་སྦྱོར་བ་དང་། མི་དམིགས་པ་དམིགས་པའི་སྦྱོར་བའོ་ཞེས་གསུངས་ཏེ། དང་པོར་སྦྱོར་བའི་ལམ་དུ་ཆོས་དང་དོན་ཐམས་ཅད་རྣམ་པར་རིག་པ་ཙམ་དུ་དམིགས་པའི་སྦྱོར་བས། ཀུན་བརྟགས་ཐམས་ཅད་སྤོང་ཞིང་། རང་གི་རིག་པ་གཟུང་འཛིན་གཉིས་སུ་མེད་དོ། །ཞེས་མཐོང་བར་བྱེད་དེ། སུམ་ཅུ་པ་ལས་ཀྱང་། ཅི་སྲིད་རྣམ་རིག་ཙམ་ཉིད་ལ། །རྣམ་པར་ཤེས་པ་མི་གནས་པ། །འཛིན་པ་གཉིས་ཀྱི་བག་ལ་ཉལ། །དེ་སྲིད་རྣམ་པར་མི་ལྡོག་གོ །ཞེས་གསུངས་སོ། །དེ་ནས་མཐོང་བའི་ལམ་དུ་སེམས་རྣམ་པར་རིག་པ་ཙམ་དེ་ཡང་། མི་དམིགས་པའི་སྦྱོར་བ་བསྒོམ་སྟེ། རྣམ་རིག་ཉིད་ཀྱང་། གཞན་དབང་གི་ངོ་བོ་ཡིན་པའི་ཕྱིར། དེ་ཉིད་འཛིན་པའི་ངོ་བོ་ཉིད་པས། དེ་ལས་མ་འདས་ན་ཡོངས་སུ་གྲུབ་པ་མི་མཐོང་བའི་ཕྱིར་རོ། །དེ་ཡང་། འདི་དག་རྣམ་རིག་ཙམ་ཉིད་ཅེས། །དེ་སྙམ་དུ་ནི་དམིགས་ནས་སུ། །ཅི་ཡང་རུང་སྟེ་མདུན་འཇོག་ན། དེ་ནི་ཙམ་ལ་མི་གནས་སོ། །ཞེས་དོན་མེད་ན་རྣམ་རིག་མི་འཐད་པས། མི་དམིགས་པའི་སྦྱོར་བ་ཞེས་བྱའོ། །དེས་གཟུང་འཛིན་སྤོང་བར་བྱེད་དེ། །ནམ་ཞིག་ཤེས་པས་དམིགས་པ་རྣམས། །མི་དམིགས་དེའི་ཚེ་ན་ནི། །རྣམ་པར་རིག་པ་ཙམ་ལ་གནས། །གཟུང་བ་མེད་པས་དེར་འཛིན་མེད། །ཅེས་སུམ་ཅུ་པ་ལས་སོ། །དེ་ལྟར་རྣམ་རིགས་དམིགས་པའི་སྦྱོར་བ་ལ་བརྟེན་ནས། རྣམ་པར་མི་རྟོག་པའི་ཡེ་ཤེས་དམིགས་ཏེ། གནས་ཡོངས་སུ་གྱུར་པའི་ཐོག་མའོ། །དེ་ནི་སེམས་མེད་མི་དམིགས་པས། །འཇིག་རྟེ་ན་འདས་པའི་ཡེ་ཤེས་དེ། །གནས་ཀྱང་གཞན་དུ་འགྱུར་བ་སྟེ། །གནས་ངན་ལེན་གཉིས་སྤངས་པའོ། །ཞེས་བཟུང་འཛིན་གཉིས་ཀྱི་སེམས་ཉོན་མོངས་པས་བསླད་པ་དེ་མི་དམིགས་པས། འཇིག་རྟེན་ལས་འདས་པའི་ཡེ་ཤེས་དམིགས་པར་འགྱུར་ཏེ། རྣམ་པར་མི་རྟོག་པའི་ཡེ་ཤེས་འདི་ལ་བརྟེན་ནས་མཐོང་བ་དང་། བསྒོམ་བ་ཡིས་སྤང་བ་བྱ་བའི་གནས་ངན་ལེན་གཉིས་སྤོང་བར་འགྱུར་ཏེ། མདོ་སྡེ་རྒྱན་ལས་ཀྱང་། སེམས་ལས་གཞན་མེད་པར་ནི་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པས་གཉིས་པོ་མེད་རིག་ནས། དེ་མི་ལྡན་པས་ཆོས་ཀྱི་དབྱིངས་ལ་གནས། །ཞེས་སྔ་མའི་གོ་རིམ་བསྟན། དེའི་འོག་ཏུ། བློ་དང་ལྡན་པས་མི་རྟོག་ཡེ་ཤེས་སྟོབས། །རྟག་ཏུ་ཀུན་ནས་མཉམ་བར་སོང་བ་ཡིས། །དེ་ལ་བརྟེན་ནས་ཉེས་ཚོགས་ཚང་ཚིང་རྣམས། དུག་སྨན་ཆེན་པོས་དུག་བཞིན་སེལ་བར་བྱེད། །ཅེས་འདི་ལ་བརྟེན་ནས་སྒྲིབ་གཉིས་སེལ་བར་བྱེད་དོ། །འདི་ལྟར་ས་བདུན་གྱི་བར་དུ་དེ་བཞིན་ཉིད་ཀྱི་མཚན་མ་ལ་བརྟེན་ནས། སྲིད་ཞི་མཉམ་པ་ཉིད་ཀྱི་སྦྱོར་བས་འགྲོ་ཞིང་། ས་བརྒྱད་པ་མཐོང་མ་ཐག་ཏུ་རྣམ་པར་རྟོག་པ་དང་། ཡིད་དང་འཛིན་པ་དག་པ་ན། བཞི་པ་མི་དམིགས་པ་དམིགས་པའི་སྦྱོར་བ་འབྱུང་སྟེ། དཔེར་ན་རྨི་ལམ་ན་ཆུ་བོ་ཆེན་པོ་ལ་རྐྱལ་བ་ལ། རྨི་ལམ་དུ་ཤེས་བཞིན་དུ་ཕ་རོལ་དུ་འགྲོ་བ་རྩོལ་བ་དྲག་པོ་ཡོད་པ་ལ། སད་མ་ཐག་ཏུ་ཅི་ཡང་མི་སྣང་རྩོལ་བ་དང་བྲལ་བ་ལྟར་ས་བདུན་དུ་རྣམ་པར་མི་རྟོག་པའི་ཡེ་ཤེས་སྣང་བཞིན་དུ། མཉམ་རྗེས་ཀྱི་ཡེ་ཤེས་སྦྱོང་བ་ལ་རྩོལ་བ་དྲག་པོ་བྱེད་པ་དེ། སངས་རྒྱས་ཐོབ་མ་ཐག་རྩོལ་བ་དང་བྲལ་ཏེ། སྣང་བ་མེད་པར་འགྱུར་རོ། །དེ་མ་ཐག་ཏུ་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱིས་ཞལ་བསྟན་ནས། རྣམ་པར་མི་རྟོག་པའི་དབྱིངས་ལ་གནས་པ་དེ་བསྐུལ་བར་བྱེད་དེ། ཀྱེ་རིགས་ཀྱི་བུ་སྣང་བ་མེད་པའི་དབྱིངས་འདི་ནི་ཉན་རང་དང་ཐུན་མོངས་དུ་གྱུར་པ་ཡིན་གྱི། འདི་ལ་གནས་པར་མ་བྱེད་པར། ངེད་རྣམས་ཀྱི་སྐུ་དང་། ཡེ་ཤེས་དང་། ཞིང་དང་། ཆོས་དང་འཕྲིན་ལས་བསམ་གྱིས་མི་ཁྱབ་པ་ལ་ལྟོས་ཤིག །ཅེས་བསྐུལ་བར་མཛད་དེ། རྒྱུ་དེ་ལ་བརྟེན་ནས། སྨོན་ལམ་དང་། གཟུངས་དང་། སོ་སོ་ཡང་དག་པར་རིག་པ་དང་། ཞིང་དང་། བྱང་ཆུབ་ཀྱི་སྙིང་པོའི་རྒྱན་སྦྱོང་བ་ལ་མི་རྟོག་བཞིན་ཡེ་ཤེས་ཀྱི་སྣང་བ་ཚད་མེད་པ་བསྐྱེད་ནས་འཇུག་པས་ན། མི་དམིགས་པ་དམིགས་པའི་སྦྱོར་བ་ཞེས་བྱ་སྟེ། འབྲས་བུའི་མཚན་མ་ཞེས་ཀྱང་བྱའོ། །འདི་ལྟར་ས་བཅུ་པའི་མདོ་དང་། ལང་ཀར་གཤེགས་པ་ལས་ཀྱང་གསུངས་པའི་དོན་བསྡུས་པ་ཡིན་ནོ། །འདིའི་དོན་བསྡུས་པ་ལས། སེམས་ཙམ་པ་ལ་བརྟེན་ནས་ཀྱང་། །སྐལ་ཆེན་རྣམས་ཀྱིས་དེ་ཡང་སྤངས། །སེམས་ཙམ་ལ་ནི་བརྟེན་ནས་སུ། །སྣང་བ་མེད་ལས་བཟླ་བར་བྱ། །རྣལ་འབྱོར་སྣང་བ་མེད་གནས་ན། །དེ་ཡིས་ཐེག་ཆེན་མི་མཐོང་ངོ་། །ཞེས་འགྱུར་རྙིང་ལས་བྱུང་ངོ་། །དབུ་མ་བསྒོམ་རིམ་དུ། སྣང་མེད་གནས་པའི་རྣལ་འབྱོར་པ། །དེ་ཡིས་ཐེག་པ་ཆེན་པོ་མཐོང་། །ཞེས་འོག་མའི་འགྱུར་བྱས་པ་གོང་གི་རྒྱས་བཤད་མ་བལྟས་པས། མཉམ་བཞག་སྣང་མེད་ཀྱི་ལུང་དུ་བྱས་པ་ནོར་བར་མཐོང་ངོ་། །ད་ནི་རྣམ་པར་མི་རྟོག་པའི་མཚན་ཉིད་བཤད་པ་ནི་གསུམ་ཏེ། ཅི་ལྟར་གནས་པའི་མཚན་ཉིད་དང་། མི་སྣང་བའི་མཚན་ཉིད་དང་། སྣང་བའི་མཚན་ཉིད་དོ། །དང་པོ་ནི། དེ་ལ་མཚན་ཉིད་ལ་འཇུག་པ་ནི་རྣམ་པ་གསུམ་གྱི་སྟེ། ཞེས་འཚམས་སྦྱར་ནས། རྣམ་པར་མི་རྟོག་པའི་ཡེ་ཤེས་འགྱུར་བ་མེད་པའི་ཡོངས་སུ་གྲུབ་པར་ཅི་ལྟར་གནས་ཞེ་ན། ཆོས་ཉིད་གནས་པ་ལས་ནི་གཉིས་སུ་མེད་ཅིང་བརྗོད་དུ་མེད་པའི་ཆོས་ཉིད་གནས་པའི་ཕྱིར་ཏེ། ཞེས་པ། སྔར་ཆོས་ཉིད་ཀྱི་མཚན་ཉིད་བསྟན་པ་བཞིན་དུ་ཡིན་ཏེ། འདི་ལ་དགོངས་ནས། མདོ་ལས་ཀྱང་། སངས་རྒྱས་རྣམས་འཇིག་རྟེན་དུ་བྱོན་ཡང་རུང་། མ་བྱོན་ཡང་རུང་སྟེ། ཆོས་རྣམས་ཀྱི་ཆོས་ཉིད་ནི་གནས་པ་ཉིད་དོ། །ཞེས་གསུངས་སོ། །མི་སྣང་བའི་མཚན་ཉིད་ནི། མི་སྣང་བ་ལ་ནི་གཉིས་དང་། ཅི་ལྟར་མངོན་པར་བརྗོད་པ་དང་། དབང་པོ་དང་། ཡུལ་དང་རྣམ་པར་རིག་པ་དང་། སྣོད་ཀྱི་འཇིག་རྟེན་མི་སྣང་བའི་ཕྱིར་རོ། །ཞེས་བཟུང་འཛིན་གཉིས་སུ་སྣང་བ་དང་། བག་ཆགས་ཀྱིས་མངོན་པར་རྗོད་པའི་མིང་དོན་དུ་རྟོག་པ་དང་། དབང་ཡུལ་རྣམ་རིག་གསུམ་ཕྱི་དང་བར་གསུམ་དུ་སྣང་བ་དང་། སྣོད་ཀྱི་འཇིག་རྟེན་སེམས་ལ་དོན་གཞན་ལྟར་སྣང་བ་ཐམས་ཅད་ནི། ཀུན་བརྟགས་དང་། གཞན་དབང་གི་རྣམ་པར་སྣང་པའི་རྣམ་གྲངས་ཡིན་ནོ། །འདི་ལྟར་སྣང་བ་ནི། རྣམ་པར་མི་རྟོག་པའི་ཡེ་ཤེས་ཀྱི་སྒྲིབ་པ་ཡིན་པའི་ཕྱིར། འདི་རྣམས་སུ་སྣང་བ་ནི་མེད་དོ། །དེས་ན་མདོ་ཉིད་དང་སྦྱར་བ་ནི། དེ་ལྟར་ན་འདིས་ནི་བརྟག་ཏུ་མེད་པ་དང་། བསྟན་དུ་མེད་པ་དང་། མི་གནས་པ་དང་། སྣང་བ་མེད་པ་དང་། རྣམ་པར་རིག་པ་མེད་པ་གནས་པ་མེད་པ། ཞེས་བྱ་བ་རྣམ་པར་མི་རྟོག་པའི་མཚན་ཉིད་མདོ་ཅི་ལྟ་བ་བཞིན་རྗོད་པ་ཡིན་ནོ། །ཞེས་གསུངས་པས་དེས་ན་བཟུང་འཛིན་གཉིས་སུ་བརྟག་ཏུ་མེད་པས་ན་བརྟག་ཏུ་མེད་པ་སྟེ། གཉིས་སུ་མེད་པའི་དོན་ནི་རང་བཞིན་ཡིན་པའི་ཕྱིར་རོ། །བསྟན་དུ་མེད་པ་ནི་མངོན་པར་བརྗོད་པ་ཡི་མིང་ཚིག་གིས་བསྟན་དུ་མེད་པའི་ཕྱིར་རོ། །མིག་ལ་སོགས་པའི་དབང་པོར་མི་གནས་པས་མི་གནས་པ་སྟེ་ཕྱི་ནང་སྟོང་པའི་ཕྱིར་རོ། །གཟུགས་སོགས་ཀྱི་ཡུལ་ཕྱི་རོལ་དུ་མེད་པས་སྣང་བ་མེད་པ་སྟེ་ཕྱི་སྟོང་པ་ཉིད་དོ། །རྣམ་པར་རིག་པ་ནི་གཞན་དབང་སྟེ་དེའི་དོན་མེད་པས་རྣམ་པར་རིག་པ་མེད་པ་སྟེ། རིག་བྱ་རིག་བྱེད་མེད་པའི་ཕྱིར་རོ། །གནས་ཀྱི་དངོས་པོ་མ་ཡིན་པས་གནས་མེད་པ་སྟེ་ཆེན་པོ་སྟོང་པའི་ཕྱིར་རོ། །འདི་ལྟར་མི་སྣང་ན་དོན་སྣང་བར་འགྱུར་བའི་ཕྱིར། མིང་དང་མཚན་མ་དང་ཀུན་རྟོག་སྣང་བ་མེད་པ་ནི་སྒྲིབ་པ་མེད་པའི་དོན་ཡིན་ནོ། །སྣང་བའི་མཚན་ཉིད་ནི། སྣང་བ་ལས་ནི་ཆོས་ཐམས་ཅད་ནམ་མཁའི་དཀྱིལ་དང་མཉམ་པར་སྣང་བའི་ཕྱིར་དང་། འདུ་བྱེད་ཐམས་ཅད་རྒྱུ་མ་ལ་སོགས་པ་བཞིན་དུ་སྣང་བའི་ཕྱིར་རོ། །ཞེས་མཉམ་པར་བཞག་པས་ཆོས་ཐམས་ཅད་ཀྱི་མཚན་མར་འཛིན་པ་ཐམས་ཅད་དང་བྲལ་བའི་ཕྱིར་ནམ་མཁའི་དཀྱིལ་དང་མཉམ་པ་སྟེ། འགྱུར་བ་མེད་པའི་ཡོངས་གྲུབ་མཐོང་བའི་ཕྱིར་རོ། །དེའི་རྗེས་ལས་ཐོབ་པའི་ཤེས་པས་ནི། འདུ་བྱེད་ཐམས་ཅད་སྒྱུ་མ་དང་། སྨིག་རྒྱུ་དང་། བྲག་ཆ་དང་རྨི་ལམ་ལྟར་སྣང་བས་སྣང་བ་ཙམ་སྟེ། འཁོར་བ་རྣམས་ཀྱི་རང་བཞིན་གཟིགས་པའི་ཕྱིར་རོ། །འདི་ཡང་རྒྱས་པར་མདོ་སྡེ་ལས་གསུངས་པ་ལྟར། ནང་གི་ལུས་ནི་སྒྱུ་མ་ལྟ་བུ་དབང་པོ་དྲུག་གིས་སྣང་བའོ། །ཡུལ་རྨི་ལམ་ལྟ་བུར་མེད་བཞིན་སྣང་བ་སྟེ། གཟུགས་བརྙན་དང་མིག་ཡོར་ལྟ་བུ་ཡང་ཡིན་ནོ། །སྒྲ་རྣམས་ནི་བྲག་ཆ་ལྟ་བུ། ཏིང་ངེ་འཛིན་གྱི་སྣང་བ་ནི་ཆུ་ཟླ་ལྟ་བུ། སྲིད་པར་སྣང་བ་ཐམས་ཅད་སྤྲུལ་པ་ལྟ་བུ་སྟེ། སྤང་གཉེན་ཐམས་ཅད་སྒྱུ་མ་ལྟ་བུར་གཟིགས་པ་ནི། སྒྱུ་མའི་རྒྱལ་པོ་སྒྱུ་མ་ཡི། །རྒྱལ་པོ་གཞན་གྱིས་ཕམ་པ་ལྟར། །རང་བཞིན་དུ་ནི་ཆོས་མཐོང་བའི། །རྒྱལ་སྲས་དེ་དག་ང་རྒྱལ་མེད། །ཅེས་པ་དང་། ཐེག་བསྡུས་ལས། བྱང་ཆུབ་སེམས་དཔའ་རྣམས་ཀྱི་ཤེས། །རྣམ་པར་མི་རྟོག་རྣམ་པ་ནི། །ཤེས་བྱ་དམིགས་པ་དེ་ཉིད་ལ། །མཚན་མ་མེད་པ་གང་ཡིན་པའོ། །སྦྱོར་བ་ལས་བྱུང་བའི་རང་བཞིན་ཏེ། རྣམ་བརྟགས་དེ་ལས་གཞན་དུ་མིན། །ཡིག་གེ་ཕན་ཚུན་སྦྱོར་བས་ན། །དོན་སྦྱོར་པ་ལས་བྱུང་བ་ཡིན། །བརྗོད་པ་མེད་པར་ཡེ་ཤེས་ནི། །བརྗོད་པར་བྱ་ལ་འཇུག་པ་མེད། །འགལ་བའི་ཕྱིར་ན་བརྗོད་ལ་མིན། །དེ་ཕྱིར་ཐམས་ཅད་བརྗོད་དུ་མེད། །རྣམ་པར་མི་རྟོག་ཡེ་ཤེས་དེ། །བྱང་ཆུབ་སེམས་དཔའ་རྣམས་ཀྱིས་སྤྱོད། །དེ་རྗེས་ཐོབ་པའི་རྟེན་ཡིན་ཏེ། །དེ་ནི་འཕེལ་བར་འགྱུར་ཕྱིར་རོ། །བྱང་ཆུབ་སེམས་དཔའ་རྣམས་ཀྱི་ཤེས། །རྣམ་པར་རྟོག་པ་མེད་པའི་གྲོགས། །ལམ་གཉིས་སུ་ནི་བརྗོད་པ་སྟེ། །ཕ་རོལ་ཕྱིན་ལྔའི་རང་བཞིན་ནོ། །བྱང་ཆུབ་སེམས་དཔའ་རྣམས་ཀྱི་ཤེས། །རྣམ་རྟོག་མེད་པའི་རྣམ་སྨིན་ནི། །སངས་རྒྱས་དཀྱིལ་འཁོར་གཉིས་སུ་སྟེ། །སྦྱོར་བ་དང་ནི་ཐོབ་པས་སོ། །བྱང་ཆུབ་སེམས་དཔའ་རྣམས་ཀྱི་ཤེས། །རྣམ་རྟོག་མེད་པའི་རྒྱུ་མཐུན་ནི། །ཕྱི་མ་ཕྱི་མའི་ཚེ་རྣམས་སུ། །ཁྱད་པར་དུ་ནི་འགྲོ་བར་འདོད། །བྱང་ཆུབ་སེམས་དཔའ་རྣམས་ཀྱི་ཤེས། །རྣམ་རྟོག་མེད་པའི་ངེས་འབྱུང་ནི། །ས་བཅུ་དག་ཏུ་ཤེས་བྱ་སྟེ། །ཐོབ་པ་དང་ནི་གྲུབ་ཕྱིར་རོ། །བྱང་ཆུབ་སེམས་དཔའ་རྣམས་ཀྱི་ཤེས། རྣམ་རྟོག་མེད་པའི་མཐར་ཐུག་པ། དག་པའི་སྐུ་གསུམ་ཐོབ་ཕྱིར་དང་། །དབང་གི་མཆོག་ནི་ཐོབ་ཕྱིར་རོ། །རྣམ་རྟོག་མེད་པའི་ཤེས་དེ་ནི། །དད་པ་ཙམ་དང་བློས་མོས་པ། །སྡིག་པ་སྣ་ཚོགས་དྲག་རྣམས་ཀྱི། །གོས་པ་མེད་དེ་ནམ་མཁའ་བཞིན། །ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །མདོར་བསྡུས་ན་ཀུན་བརྟགས་དང་། གཞན་དབང་སྣང་བ་མེད་པས། དེ་བཞིན་ཉིད་དང་། དེ་ལ་འཇུག་པའི་ཕྱིན་ཅི་མ་ལོག་པ་སྣང་བ་ནི། རྣམ་པར་མི་རྟོག་པའི་ཡེ་ཤེས་ཞེས་བྱ་སྟེ། ཅི་ཡང་མི་ཤེས་པ་མ་ཡིན་ནོ། །ཕན་ཡོན་ལ་འཇུག་པ་བཞི་བཤད་པ་ནི། དེས་ན་ཕན་ཡོན་ལ་འཇུག་པ་ནི་རྣམ་པ་བཞི་སྟེ། ཞེས་འཚམས་སྦྱར་ནས། དེ་རྣམས་ཀྱང་གང་ཞེ་ན། །ཆོས་ཀྱི་སྐུ་རྫོགས་པར་ཐོབ་པ་དང་། །བདེ་བར་གནས་པ་མཆོག་ཐོབ་པ་དང་། །གཟིགས་པ་ལ་དབང་འབྱོར་པ་དང་། འདོམ་པ་ལ་དབང་འབྱོར་བ་ཉིད་ཐོབ་པའོ། །ཞེས་རྣམ་པར་མི་རྟོག་པའི་ཡེ་ཤེས་ཀྱི་ཕན་ཡོན་ནི། ཆོས་ཀྱི་སྐུ་དེ་ཉིད་ཀྱི་ངོ་བོ་ཉིད་ཡིན་ཀྱང་། རྫོགས་པ་ནི་འཕྲིན་ལས་དང་བཅས་པ་སྟེ། བྱང་ཆུབ་ཕྱོགས་མཐུན་ཚད་མེད་དང་། རྣམ་པར་ཐར་དང་མཐར་གྱིས་ནི། །སྙོམས་འཇུག་དགུའི་བདག་ཉིད་དང་། །ཟད་པར་བཅུའི་བདག་ཉིད་དང་། །ཟིལ་གྱི་གནོན་པའི་སྐྱེ་མཆེད་ནི། །རབ་ཏུ་དབྱེ་བས་རྣམ་བརྒྱད་དང་། །ཉོན་མོངས་མེད་དང་སྨོན་མཁྱེན་དང་། །མངོན་ཤེས་སོ་སོ་ཡང་དག་རིག །རྣམ་པ་ཐམས་ཅད་དག་བཞི་དང་། །དབང་བཅུ་དང་ནི་སྟོབས་བཅུ་དང་། །མི་འཇིགས་པ་ནི་བཞི་དག་དང་། །སྲུང་བ་མེད་པ་རྣམ་གསུམ་དང་། །དྲན་པ་ཉེར་བཞག་རྣམ་གསུམ་དང་། །བསྙེལ་བ་མི་མངའི་ཆོས་ཉིད་དང་། །བག་ཆགས་ཡང་དག་བཅོམ་པ་དང་། །སྐྱེ་ལ་ཐུགས་རྗེ་ཆེན་པོ་དང་། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་དང་། །རྣམ་པ་ཐམས་ཅད་མཁྱེན་ཉིད་དང་། །ཆོས་ཀྱི་སྐུ་ཞེས་བརྗོད་པ་ཡིན། ཞེས་མངོན་པར་རྟོགས་པའི་རྒྱན་ལས་གསུངས་པ་བྱེ་བྲག་བརྒྱ་བཞི་བཅུ་ཞེ་བཞི། སྡེ་ཚན་ཉི་ཤུ་རྩ་གཅིག་ཏུ་བཤད་པ་རྣམས་སོ། །འདི་རྣམས་རྫོགས་པས་ན་གཏན་དུ་ཟག་པ་མེད་པའི་བདེ་བ་དང་ལྡན་པའོ། །གཟིགས་པའི་དོན་ཡང་ཤེས་བྱ་ཅི་ལྟ་བ་དང་། ཅི་སྙེད་པ་ཐམས་ཅད་གཟིགས་པའི་ཕྱིར་རོ། །འདོམས་པའི་དབང་འབྱོར་པ་ནི། མདོ་སྡེ་རྒྱན་ལས། བདེ་གཤེགས་གསུང་ནི་མཐའ་ཡས་ཏེ། །ཡན་ལག་དྲུག་བཅུ་བསམ་མི་ཁྱབ། །ངག་ཚིག་ཤིན་ཏུ་རིགས་པ་དང་། །བསྟན་དང་རྣམ་དབྱེ་ཐེ་ཚོམ་གཅོད། །ལན་མང་བྱེད་དང་ལྡན་པ་ནི། །མགོ་སྨོས་རྣམ་སྤྲོས་གོ་རྣམས་ལ། །སངས་རྒྱས་རྣམས་ཀྱི་སྟོན་པ་འདི། །འཁོར་གསུམ་གྱི་ནི་དག་པ་སྟེ། འདི་ནི་ཉེས་པ་བརྒྱད་དག་དང་། །བྲལ་བ་ཉིད་དུ་ཤེས་པར་བྱ། །ལེ་ལོ་དང་ནི་མི་གོ་བ། །སྐབས་མི་ཕྱེད་དང་མ་ངེས་དང་། །ཐེ་ཚོམ་དག་ནི་མི་བཅོད་དང་། །དེ་དང་བྲལ་བར་གཏམ་མི་བྱེད། །སྐྱོ་བ་དང་ནི་སེར་སྣ་ཉིད། འདི་དག་གཏམ་གྱི་ཉེས་པར་འདོད། །དེ་དག་མེད་ཕྱིར་སངས་རྒྱས་ཀྱིས། །བཤད་པ་བླ་ན་མེད་པར་འགྱུར། །ཞེས་གསུངས་པའི་ཡན་ལག་དྲུག་བཅུས་སྟོན་པའི་གསུང་དང་། རིགས་པ་དང་། རྒྱས་བསྡུས་ཐམས་ཅད་པ། ཡོན་ཏན་ཐམས་ཅད་འབྱུང་ཞིང་། ངག་གི་སྐྱོན་བརྒྱད་དང་བྲལ་བ་ལ་དབང་འབྱོར་པའོ། །དེ་ལྟར་ཕན་ཡོན་བཞི་བཤད་ནས། ཡོངས་སུ་ཤེས་པ་ལ་འཇུག་པ་ལ་ཡང་ལྔ་ལྟེ། བསྟན་པ་དང་། ལྔའི་གཉེན་པོ་དང་། ལྔ་སྤངས་པའི་རང་གི་མཚན་ཉིད་དང་། ཁྱད་པར་ལྔ་དང་། ལས་ལྔ་ལྡན་བཤད་པའོ། །དང་པོ་ནི། དེ་ལ་ཡོངས་སུ་ཤེས་པ་ལ་འཇུག་པ་ནི་རྣམ་པ་བཞི་སྟེ། གཉེན་པོ་ཡོངས་སུ་ཤེས་པ་དང་། མཚན་ཉིད་ཡོངས་སུ་ཤེས་པ་དང་། ཁྱད་པར་ཡོངས་སུ་ཤེས་པ་དང་། ལས་ཡོངས་སུ་ཤེས་པའོ། །ཞེས་གསུངས་ཏེ། རྣམ་པར་མི་རྟོག་པའི་ཡེ་ཤེས་ཅི་ལྟར་ཤེས་པར་བྱ་ན་རྣམ་པ་བཞིས་ཤེས་པར་བྱའོ། །འདི་གང་གི་གཉེན་པོ་ཡིན་ཞེ་ན། དེ་ལ་གཉེན་པོ་ཡོངས་སུ་ཤེས་པ་ནི་རྣམ་པར་མི་རྟོག་པའི་ཡེ་ཤེས་དང་། ཆོས་དང་། གང་ཟག་དང་། ཡོངས་སུ་གྱུར་པ་དང་། ཐ་དད་པ་དང་། སྐུར་བ་འདེབས་པ་སྟེ། མེད་པར་འཛིན་པ་རྣམ་པ་ལྔའི་གཉེན་པོ་ཡིན་པའི་ཕྱིར་རོ་ཞེས་གསུངས་པས་རྣམ་པར་མི་རྟོག་པའི་ཡེ་ཤེས་ཀྱིས་གཞོམ་པར་བྱ་བ་ནི་འདི་ལྔ་སྟེ། མེད་བཞིན་དུ་ཆོས་ལ་བདག་ཏུ་འཛིན་པ་དང་། གང་ཟག་ལ་བདག་ཏུ་འཛིན་པ་དང་། མེད་བཞིན་དུ་འགྱུར་བ་ནི། ཆོས་རྣམས་སྐྱེ་བ་དང་འགག་པར་འཛིན་པ་དང་། ཐ་དད་པར་འཛིན་པ་ནི་ཆོས་དང་ཆོས་ཉིད་ཐ་དད་དུ་མེད་བཞིན་དུ་ཐ་དད་དུ་འཛིན་པ་དང་། སྐུར་བ་འདེབས་པ་ནི་ཆོས་དང་གང་ཟག་བཏགས་པ་ཙམ་དུ་ཡོད་པ་ལ་ཡང་མེད་པར་སྐུར་པ་འདེབས་པ་སྟེ། འདི་ལྔ་པོའི་གཉེན་པོ་ནི་རྣམ་པར་མི་རྟོག་པའི་ཡེ་ཤེས་ཡིན་པར་རིག་པར་བྱའོ། །འདིས་ནི་མཐའ་གཉིས་སྤངས་པ་འཇུག་པའི་དོན་སྟེ། བདག་མེད་གཉིས་དང་། སྐྱེ་བ་མེད་ཅིང་། འགག་པ་མེད་པ་དང་། གཅིག་དང་ཐ་དད་ལས་རྣམ་པར་གྲོལ་བ་དབུས་མཐར་གསུངས་པ་དེ་བསྟན་པའོ། །མཚན་ཉིད་བཤད་པ་ནི། དེ་ལ་མཚན་ཉིད་ཡོངས་སུ་ཤེས་པ་ནི། ཡིད་ལ་མ་བྱེད་པ་དང་། ཡང་དག་པར་འདས་པ་དང་། ཉེ་བར་ཞི་བ་དང་། ངོ་བོ་ཉིད་ཀྱི་དོན་དང་། མངོན་རྟག་དུ་བྱེད་པ་སྟེ། རྣམ་པ་ལྔ་སྤངས་པའི་རང་གི་མཚན་ཉིད་ཀྱིས་སོ། །ཞེས་གསུངས་སྟེ། རྣམ་པར་མི་རྟོག་པའི་ཡེ་ཤེས་ཞེས་བསྟན་པས་ནོར་བ། འདི་རྣམས་སྤངས་པའི་རང་གི་མཚན་ཉིད་ཤེས་པར་བྱའོ། །ཁ་གཅིག་ཡིད་ལ་མི་བྱེད་པ་ཙམ་རྣམ་པར་མི་རྟོག་པའི་ཡེ་ཤེས་སུ་འདོད་པ་དེ་ནི་མ་ཡིན་ཏེ། རྣམ་པ་ལ་རྟོག་པ་མེད་པ་ནི་བུ་ཆུང་ལ་ཡང་ཡོད་དེ། དེས་ཀྱང་རྣམ་པར་མི་གྲོལ་ལོ། །རྟོག་དཔྱོད་ནུབ་པ་ནི་ཡང་དག་པར་འདས་པ་ཞེས་བྱ་སྟེ། དེ་ཡང་མི་རྟོག་ཡེ་ཤེས་མ་ཡིན་ཏེ། བསམ་གཏན་གཉིས་པ་ལ་སོགས་པ་ནི་རྟོག་དཔྱོད་མེད་པ་ཡིན་ཀྱང་། ཡོན་ཏན་དེ་མེད་པའི་ཕྱིར་རོ། །རྣམ་པར་རྟོག་པ་ཉེ་བར་ཞི་བའི་རང་བཞིན་ཡང་ཡིན་པར་མི་རིགས་ཏེ། གཉིད་ལོག་པ་དང་། སྨྱོ་བ་དང་། བརྒྱལ་བ་རྣམས་ཀྱང་དེར་འགྱུར་ཏེ། གནས་སྐབས་དེར་རྣམ་རྟོག་མེད་པའི་ཕྱིར་རོ། །ངོ་བོ་ཉིད་ཀྱི་རྟོག་པར་མི་བྱེད་པ་ཡང་དེ་ཡིན་པར་མི་རིགས་ཏེ། གལ་ཏེ་དེ་ལྟ་ན་ནི་གཟུགས་ལ་སོགས་པའི་ཡུལ་ཡང་དེར་འགྱུར་ཏེ། ངོ་བོས་མི་རྟོག་པའི་ཕྱིར་རོ། །རྣམ་པར་མི་རྟོག་པའོ། །ཞེས་མངོན་རྟགས་སུ་བྱེད་པ་ཡང་དེ་ཡིན་པར་མི་རིགས་སྟེ། འདི་ལྟར་རྣམ་པར་མི་རྟོག་པའོ། །ཞེས་ཡིད་ལ་བྱེད་པ་ན། དེའི་རྣམ་རྟོག་དེ་ནི་རྟོག་པ་ཉིད་ཡིན་པའི་ཕྱིར་རོ། །དེ་ལྟར་ན་རྣམ་པ་ལྔ་པོ་འདི་ལས་གྲོལ་བ་ནི་རྣམ་པར་མི་རྟོག་པའི་ཡེ་ཤེས་ཡིན་ཏེ། མདོར་བསྡུས་ན་བརྡ་ལ་མ་བྱང་བས་བླུན་པ་དང་། རྟོག་པ་དང་དཔྱོད་པ་ནུས་པ་ཙམ་དང་། རེ་ཤིག་བསམ་གཏན་གྱི་རྟོག་པ་ཞི་བ་དང་། དྲན་པ་མེད་པ་དང་། བེམས་པོ་ལྟ་བུ་དང་། ཡིད་ཀྱི་མཚན་མར་འཛིན་པ་དང་བཅས་པ་རྣམས། རྣམ་པར་མི་རྟོག་པའི་ཡེ་ཤེས་ཀྱི་མི་མཐུན་ཕྱོགས་སུ་བསྟན་ཏོ། དེས་ན་འདི་ཡི་ངོ་བོ་ནི། དེ་ལས་མ་ཡིན་གཞན་མས་མིན། །མི་ཤེས་པ་དང་ཤེས་པའང་མིན། །ཤེས་བྱ་དང་ནི་ཁྱད་མེད་པའི། །ཤེས་གང་དེ་ནི་མི་རྟོག་ཉིད། །རྣམ་པར་བརྟགས་བྱ་མེད་པས་ན། །ཆོས་རྣམས་ཐམས་ཅད་རང་བཞིན་གྱིས། །རྣམ་རྟོག་མེད་པར་གང་ཕྱིར་བཞེད། །དེ་ཕྱིར་ཤེས་དེ་མི་རྟོག་ཉིད། །ཅེས། ཐེག་སྡུས་ལས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རྣམ་པར་མི་རྟོག་པའི་ཤེས་རབ་ཀྱི་ངོ་བོ་བསྟན་པ་འདི་ཉིད་ཀྱི་ཚུལ་གཞུང་འདིར། མི་མཐུན་ཕྱོགས་སེལ་བའི་ཚུལ་གྱི་གསུངས་སོ།། །།ཁྱད་པར་རྣམ་པ་ལྔ་བཤད་པ་ནི། དེ་ལ་ཁྱད་པར་ཡོངས་སུ་ཤེས་པ་ནི། རྣམ་པར་མི་རྟོག་པ་དང་། ཉི་ཚེ་བ་མ་ཡིན་བ་ཉིད་དང་། མི་གནས་པ་ཉིད་དང་། གཏན་དུ་བ་ཉིད་དང་། བླ་ན་མེད་པ་ཉིད་དོ། །ཁྱད་པར་རྣམ་པ་ལྔས་སོ། །ཞེས་པ་ཤེས་པ་དེ་ནི། ཁྱད་པར་རྣམ་པ་ལྔས་ཉན་རང་ལས་ཁྱད་པར་དུ་འཕགས་ཏེ། ཅི་ལྟར་འཕགས་ཞེ་ན། ཉན་རང་ནི་འཁོར་བ་ལ་སྐྱོན་དང་། མྱ་ངན་ལས་འདས་པ་ཡོན་ཏན་དུ་ཤེས་པས་རྣམ་པར་རྟོག་པ་དང་བཅས་པ་ཡིན་ནོ། །ཉི་ཚེ་བ་ཡང་ཡིན་ཏེ། འཕགས་པའི་བདེན་པ་བཞིའི་སྤྱིའི་མཚན་ཉིད་ཙམ་ལ་དམིགས་པའི་ཕྱིར་རོ། །གནས་པ་ཡང་ཡིན་ཏེ། མྱ་ངན་ལས་འདས་པ་ལ་གནས་པས་སོ། །གཏན་དུ་བ་ཡང་མ་ཡིན་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པར་ཆད་པའི་ཕྱིར་ཏེ། གཟིངས་ལྟ་བུའི་མདོ་ལས་བཤད་པའི་ཕྱིར་རོ། །བླ་ན་ཡོད་པ་ཡང་ཡིན་ཏེ། སངས་རྒྱས་ཀྱི་ཡེ་ཤེས་བླ་ན་ཡོད་པའི་ཕྱིར་རོ། །འདི་ལས་བཟློག་པ་ནི་ཁྱད་པར་ལྔས་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། རྣམ་པར་མི་རྟོག་པ་ནི་སྲིད་ཞི་གཉིས་ཀྱི་སྐྱོན་དང་ཡོན་ཏན་ལ་མི་རྟོག་པའི་ཕྱིར་རོ། །ཉི་ཚེ་བ་མ་ཡིན་པ་ནི་ཤེས་བྱ་མཐའ་དག་གི་རང་དང་སྤྱིའི་མཚན་ཉིད་ཅི་ལྟ་བ་བཞིན་ཡུལ་དུ་བྱེད་པའི་ཕྱིར་རོ། །མི་གནས་པ་ནི་ཤེས་རབ་ཀྱིས་སྲིད་པ་དང་སྙིང་རྗེས་ཞི་བ་ལ་མི་གནས་པར་བླང་དོར་མེད་པར་སྦྱོར་བའི་ཕྱིར་རོ། །གཏན་དུ་བ་ནི་རྟེན་ཆོས་ཀྱི་སྐུ་རྟག་པས་ན། ཕུང་པོ་ལྷག་མ་མེད་པའི་མྱ་ངན་ལས་འདས་པ་ན་ཡང་རྒྱུན་ཆད་པ་མེད་པའི་ཕྱིར་རོ། །བླ་ན་མེད་པ་ནི་དེ་ལས་གོང་དུ་ཁྱད་པར་དུ་འཕགས་པ་མེད་པའི་ཕྱིར་རོ། །མདོར་བསྡུས་ན། སྲིད་ཞི་དག་པ་དང་། ཡེ་ཤེས་ཀྱི་ཤེས་བྱ་མཁྱེན་པ་དང་སྟོང་པ་དང་སྙིང་རྗེ་ཟུང་དུ་འཇུག་པ་སྟེ། འདུས་མ་བྱས་པའི་ཆོས་སྐུ་དང་། ཕུལ་དུ་བྱུང་བའི་གནས་ཐོབ་པས་རྣམ་པར་མི་རྟོག་པར་བསྟན་ཏོ། །ཡེ་ཤེས་ཀྱི་ལས་ལྔ་བཤད་པ་ནི། དེ་ལ་ལས་ཡོངས་སུ་ཤེས་པ་ནི། རྣམ་པར་རྟོག་པ་རིང་དུ་བྱེད་པ་དང་། བླ་ན་མེད་པའི་བདེ་བ་བསྒྲུབས་པར་བྱེད་པ་དང་། ཉོན་མོངས་པ་དང་ཤེས་བྱའི་སྒྲིབ་པ་དང་འབྲལ་བར་བྱེད་པ་དང་། དེའི་རྗེས་ལས་ཐོབ་པའི་ཡེ་ཤེས་ཀྱིས་ཤེས་བྱའི་རྣམ་པ་ཐམས་ཅད་ལ་འཇུག་པར་བྱེད་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། སེམས་ཅན་ཡོངས་སུ་སྨིན་པར་བྱེད་པ་དང་། རྣམ་པ་ཐམས་ཅད་མཁྱེན་པ་ཉིད་གཏོད་པར་བྱེད་པ་སྟེ། ལས་ཀྱི་ཁྱད་པར་རྣམ་པ་ལྔས་སོ་ཞེས་གསུངས་ཏེ། ཡེ་ཤེས་དེས་ལས་ལྔ་པོ་འདི་རྣམས་བྱེད་དེ། རྣམ་པར་རྟོག་པ་རིང་དུ་བྱེད་པ་ནི། རྣམ་རྟོག་ཀུན་ལྡང་དང་བཅས་པ་འཁྲུལ་པའི་རྩ་བ་སྟེ། གང་ལ་དེ་མེད་པའི་ངོ་བོ་ནི། རྣམ་པ་ཐམས་ཅད་སྐྱེ་བ་མེད་པར་གཟིགས་པའི་དོན་གྱི་འབྱུང་ངོ་། །བླ་ན་མེད་པའི་བདེ་བ་ནི་ཤེས་བྱ་ཐམས་ཅད་མི་མཁྱེན་པ་མེད་པས་ཐབས་མཁས་པ་བསྒྲུབས་ཏེ། སྡུག་བསྔལ་གསུམ་ལས་གྲོལ་བའི་ཕྱིར། ཟག་མེད་ཀྱི་བདེ་བའི་རང་བཞིན་གྲུབ་པ་ལས་བྱུང་ངོ་། །ཉོན་མོངས་པའི་སྒྲིབ་པ་ནི། འདོད་ཆགས་ཁོང་ཁྲོ་ང་རྒྱལ་མ་རིག་པ། ཐེ་ཚོམ་ལྟ་བ་རྣམ་པ་ལྔ་དང་བཅས་པ། ཉེ་བའི་ཉོན་མོངས་པ་ཉི་ཤུ་པོ་ཀུན་ནས་ལྡང་བ་དྲག་པོ་ཡུལ་དང་ཡུལ་ལ་བརྟེན་བའི་རྟོག་པ་ལས་བྱུང་པར་ཤེས་པས་རྣམ་པར་གྲོལ་ལ། ཀུན་གཞིའི་རྣམ་པར་ཤེས་པ་ལ་ཁ་ནང་དུ་བལྟས་ནས་ཉོན་མོངས་པ་སྐྱེ་བའི་རྟེན་བྱེད་པ། ཀུན་གཞི་ལ་གནས་པའི་ཡིད་ནི་བསྒོམ་པས་སྤང་བར་བྱ་བ་བག་ལ་ཉལ་དུ་ཁམས་གསུམ་པ་ཐམས་ཅད་ལ་ཡོད་པ། ཀུན་བརྟགས་དང་ལྷན་གཅིག་སྐྱེས་པ་གཉིས་རྣམ་པར་མི་རྟོག་པ་དང་། སྒྱུ་མ་ལྟ་བུར་ཤེས་པས་བྲལ་བར་བྱེད་པས་ཕྲ་རྒྱས་བག་ཆགས་དང་བཅས་པ་བཅོམ་པ་ཉིད་དོ། །གང་གིས་ན་མ་རིག་པ་ལས་གྲོལ་བའི་ཚེ། མཚན་མ་དང་རྣམ་རྟོག་མེད་པར་ཡང་། དམིགས་པ་ཐམས་ཅད་སྒྱུ་མ་ལྟར་སྣང་བ་ལ། ཤེས་བྱའི་རྣམ་པ་ཐམས་ཅད་ལ་འཇུག་པར་བྱེད་པ་འབྱུང་ཞིང་། སྔར་བསྟན་པ་ལྟར། །ཡིད་དང་། འཛིན་པ་དང་། རྣམ་རྟོག་ཤིན་ཏུ་གནས་གྱུར་པས། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། སེམས་ཅན་ཡོངས་སུ་སྨིན་པ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་གཏོད་པ་སྟེ། ཐོབ་པར་བྱེད་པ་སྟེ་ཡང་ཡེ་ཤེས་འདི་ཉིད་ཀྱི་ལས་ཡིན་ནོ། །ཚུལ་འདི་ནི། བྱ་བ་བསྒྲུབ་ལ་རྟག་ཏུ་བློ། །མེ་བཞིན་དུ་ནི་འབར་བ་དང་། །ཞི་བའི་བསམ་གཏན་སྙོམས་འཇུག་ལ། །རྟག་ཏུ་མཉམ་པར་བཞག་པའང་ཡིན། །ཞེས་པའི་ཚུལ་དུ་སྦྱོང་ངོ་། །ཕྱི་མ་གསུམ་ལ་ལས་གཅིག་ཏུ་མཛད་པ་ནི་དམིགས་གསལ་གསུམ་ཡང་རྣམ་པར་མི་རྟོག་པར་གཅིག་གིས་མཐར་ཕྱིན་པར་འགྱུར་བས་ལས་གཅིག་གོ །འདི་ལྔ་ལ་རྣམ་རྟོག་དང་སྒྲིབ་གཉིས་སྤང་བར་བྱ་བ་ལ་སྟོས་སོ། །གཞན་ནི་ཐོབ་པར་བྱ་བ་ལ་བརྟེན་ཏོ། །འདི་ལྟར་ཤེས་ན་ཡོངས་སུ་ཤེས་པ་ལ་འཇུག་པ་ཞེས་བྱའོ། །འདི་ལྟར་ཡོངས་སུ་ཤེས་པ་ལ་འཇུག་པ་ནི། རྣམ་པར་མི་རྟོག་པ་ལ་འཇུག་པའི་གཟུངས་ཅི་ལྟ་བར་རིག་པར་བྱ་སྟེ། མདོ་དེ་ཉིད་ཀྱི་གླེང་གཞིའི་འོག་ཏུ། ཡང་དག་པར་སྦྱོར་བའི་ཚུལ་དང་། རྣམ་པར་མི་རྟོག་པའི་དབྱིངས་ལ་འཇུག་པ་དང་། དེའི་མཚན་ཉིད་དང་། ཞུགས་པའི་རྟགས་དང་། ལས་དང་། དཔེ་དང་ལྷག་མ་གཞན་གྱིས་ཐབས་བསྟན་པར་རིག་པར་བྱའོ། །མདོ་ཚིགས་རྣམས་ཡི་གེ་མང་དུ་དོགས་པས་མ་བྲིས་སོ། །བདུན་པ་ཡིད་ལ་བྱེད་པ་བཤད་པ་ནི་གཉིས་ཏེ། གང་གིས་ཡིད་ལ་བྱེད་པ་དང་། ཚུལ་ཅི་ལྟར་ཡིད་ལ་བྱེད་པ་གོ་རིམ་དང་བཅས་པའོ། །དང་པོ་ནི། དེ་ལ་ཡིད་ལ་བྱེད་པ་ལ་འཇུག་པ་ནི། ཅི་ནས་ཀྱང་རྣམ་པར་མི་རྟོག་པ་ལ་འཇུག་པར་འདོད་པའི་བྱང་ཆུབ་སེམས་དཔའ་དེ་འདི་སྙམ་དུ་ཡིད་ལ་བྱེད་དོ། །ཞེས་ངེས་པར་རྟེན་རྣམ་པར་མི་རྟོག་པ་ལ་འཇུག་དགོས་པས། ཐེག་པ་མཆོག་ལ་འཇུག་པའི་བློ་ཅན། བྱང་ཆུབ་ཆེན་པོ་ལ་བློ་དཔའ་བ། སེམས་ཅན་གྱི་དོན་ལ་སེམས་པ་དེས་འདི་ལྟར་ཡིད་ལ་བྱའོ། །གཉིས་པ་ལ་གསུམ་སྟེ། ཀུན་གཞི་དང་རྐྱེན་དང་མ་རིག་པ་སྣང་ཡང་མི་བདེན་པས་འཁྲུལ་པའི་ཚུལ་བརྟག་པ་དང་། ཡིད་ལ་བྱེད་པའི་ཚུལ་དང་། རྟོགས་པའི་གོ་རིམ་མོ། །དང་པོ་ནི། ཡང་དག་པ་མ་ཡིན་པའི་ཀུན་ཏུ་རྟོག་པ་ས་བོན་ཐམས་ཅད་པ་མེད་པ་གཉིས་སྣང་བའི་རྒྱུ། དེ་ལ་བརྟེན་པའི་རྒྱུད་གཞན། དེ་བཞིན་ཉིད་མི་ཤེས་པ་ལས་ཡིན་ཏེ། དེའི་ཕྱིར་རྒྱུ་དང་བཅས་པའི་འབྲས་བུ་ནི་སྣང་དུ་ཟིན་ཀྱང་ཡོད་པ་མ་ཡིན་ནོ། །ཞེས་པ་ནི་སྔར་བསྟན་པ་ལྟར་ཡང་དག་པར་མེད་བཞིན་དུ་ཚོགས་བདུན་གྱིས་ལས་འདུས་བྱས་པའི་ཀུན་རྟོག་པ་ལ་བརྟེན་ནས། དེས་བསྐྱེད་ཅིང་བསགས་པས་ཕྱི་མ་སྐྱེ་བའི་ས་བོན་ཐམས་ཅད་པ་ནི། ཀུན་གཞིའི་རྣམ་པར་ཤེས་པའོ། །དེ་ལས་མེད་བཞིན་དུ་གཟུང་བ་དང་འཛིན་པ་གཉིས་སྣང་བའི་རྒྱུ་ནི་གཉིས་སུ་མངོན་པར་ཞེན་པའི་བག་ཆགས་ཀྱིས་ཡོངས་སུ་ཟིན་པའི་ཕྱིར་རོ། །དེ་ལ་བརྟེན་པའི་རྒྱུད་གཞན་ནི་དམིགས་རྐྱེན་ལས་སྐྱེས་པ་ལྟར་སྣང་བའི་འཇུག་པའི་རྣམ་ཤེས་དྲུག་སྟེ། བདུན་པ་ཀུན་གཞི་ལ་གནས་ནས་སྐྱེ་བ་དང་འགག་པའི་ནུས་པ་བྱེད་པ་དྲུག་པོ་འགགས་མ་ཐག་པའི་ཡིད་ཅེས་བཤད་པ། ཡིད་ཀྱི་ཁམས་དང་སྐྱེ་མཆེད་ཅེས་ཀྱང་བྱ་སྟེ། ཁ་ནང་ལྟའི་ཉོན་མོངས་བཞི་དང་ལྷན་གཅིག་པས་ཉོན་མོངས་པ་ཅན་གྱི་རྐྱེན་གྱིས། དེ་བཞིན་ཉིད་ངོ་མ་ཤེས་པ་ལས་འཁྲུལ་པ་ཡིན་ཏེ། ཐོག་མ་མེད་པའི་དུས་ཅན་གྱི་མ་རིག་པའི་བག་ཆགས་ལས་བྱུང་ངོ་། །དེའི་ཕྱིར་མི་ཤེས་པ་ཕྱིན་ཅི་ལོག་གི་རྒྱུ་ནི་དེ་ཡིན་པས་ཕན་ཚུན་རྒྱུ་དང་བཅས་པའི་འབྲས་བུ་ནི་སྣང་དུ་ཟིན་ཀྱང་བདེན་པར་ཡོད་པ་ནི་མ་ཡིན་ནོ། །དཔེར་ན་ཐག་པ་ལ་སྦྲུལ་དུ་འཁྲུལ་བས་སྐྲག་པ་དང་། སྐྲགས་པས་ཀྱང་སླར་འཁྲུལ་པ་བསྐྱེད་ནས་སྡུག་བསྔལ་ཀྱང་རྣམ་པ་ཐམས་ཅད་དུ་ཐག་པ་ལ་སྦྲུལ་མེད་ཀྱང་སྣང་བ་བཞིན་ནོ། །དཔལ་སྒྲ་གཅན་འཛིན་བཟང་པོས་ཀྱང་། །ཐག་པ་ནག་པོའི་དུག་སྤྲུལ་བཞིན། །མཐོང་བ་ཙམ་གྱིས་སྔངས་བར་འགྱུར། །གྲོགས་དག་སྐྱེ་བོ་འཛིན་པ་ཅན། །ཡུལ་གཉིས་སྐྱོན་གྱི་འཆིང་བར་འགྱུར། །ཅེས་གསུངས་སོ། །འདི་ལྟར་རིག་ནས་ཡིད་ལ་བྱེད་པའི་ཚུལ་ནི། དེ་སྣང་བ་ལས་ནི་ཆོས་ཉིད་མི་སྣང་ཞིང་། །དེ་ཡི་སྣང་བ་ལས་ནི་ཆོས་ཉིད་སྣང་བ་ཡིན་ནོ། །ཞེས་དེ་ལྟར་ཡིད་ལ་བྱེད་པའི་བྱང་ཆུབ་སེམས་དཔའ་ནི། རྣམ་པར་མི་རྟོག་པའི་ཡེ་ཤེས་ལ་འཇུག་པ་ཡིན་ནོ། །ཞེས་གསུངས་པ་སྦྱོར་བའི་ལམ་དུ་ཡིད་ལ་བྱེད་པའི་ཚུལ་སྟེ། བཟུང་འཛིན་གྱི་ཀུན་བརྟགས་མེད་བཞིན་སྣང་བས་ནི་གདོད་མ་ནས་གྲུབ་པའི་ཆོས་ཉིད་དང་། དེ་ལ་འཇུག་པའི་ཕྱིན་ཅི་མ་ལོག་པའི་ལམ་འབྲས་བུ་ལ་དམིགས་པ་མི་སྣང་བས་འཁྲུལ་ལ། དེ་སྣང་བ་དང་། བཟུང་འཛིན་མི་སྣང་བ་ལས་ནི། དེ་ཁོ་ན་ལམ་འབྲས་བུ་དང་བཅས་བ་སྣང་བ་ཡིན་ནོ་ཞེས། དེ་ལྟར་ཡིད་ལ་བྱེད་པའི་བྱང་ཆུབ་སེམས་དཔའ་ནི་རྣམ་པར་མི་རྟོག་པའི་ཡེ་ཤེས་ལ་འཇུག་པ་ཞེས་བྱའོ། །འདི་ནི་མདོ་སྡེ་རྒྱན་དང་། ཐེག་བསྡུས་ལས་ཀྱང་། ཟིང་དང་དངོས་གཉིས་ཕན་ཚུན་དུ། །གློ་བུར་ཡིན་པར་ཡོངས་སུ་བཙལ། །བཏགས་པ་རྣམ་པ་གཉིས་པོ་ལ། །དེ་ཙམ་དུ་ནི་བཙལ་བར་བྱ། །ཡང་དག་ཅི་བཞིན་ཡོངས་ཤེས་པས། །དོན་མེད་པར་ནི་རྟོག་གསུམ་དང་། དེ་མེད་ཕྱིར་ཡང་དེ་བྲལ་པའི། །མཐོང་བ་གསུམ་ལ་འཇུག་པ་ཡིན། ཞེས་མིང་དང་མཚན་མ་དང་ཀུན་རྟོག་གི་རྣམ་རིག་མེད་ན། །རང་བཞིན་དང་དྲི་མ་མེད་པ་དང་། ལམ་གསུམ་དམིགས་པར་གསུངས་སོ། །དེའི་གོ་རིམ་བཤད་པ་ལ་ལྔ་སྟེ། རྣམ་པར་རིག་པར་དམིགས་པ་དང་། དོན་ཐམས་ཅད་མི་དམིགས་པ་དང་། རྣམ་རིག་མི་དམིགས་པ་དང་། ཁྱད་པར་མེད་པར་དམིགས་པ་དང་། ངོ་བོ་བཤད་པའོ། །དང་པོ་ནི། དེ་ལྟར་དམིགས་པ་ལས་ནི་རྣམ་པར་རིག་པ་ཙམ་དུ་དམིགས་པ་ལ་འཇུག་གོ །ཞེས་པས་སྦྱོར་བའི་ལམ་དུ་གསལ་སྣང་ཆུང་ངུའི་ཚེ། སྔར་བཤད་པའི་ཚུལ་རྟོགས་ནས་རྣམ་པར་རིག་པ་འཁྲུལ་བ་དང་། མ་འཁྲུལ་བ་གཉིས་ཀ་རྣམ་པར་རིག་པ་ཙམ་ལས་གཞན་དུ་བདེན་པ་མེད་པར་དམིགས་པས་དྲོ་བར་འགྱུར་བ་འབྱུང་ངོ་། །འདི་ཡང་ཚོགས་ལེགས་པར་བསགས་པའི་བྱང་ཆུབ་སེམས་དཔའ་སེམས་གནས་པའི་ཐབས་དགུ་དང་། ཡིད་ལ་བྱེད་པ་བཅུ་གཅིག་གིས་ཞི་ལྷག་གི་རྒྱུ་ཐོབ་པ། བསམ་གཏན་དང་ལྡན་པས་ལྷག་མཐོང་གི་སྒོ་གསུམ་དང་། གཞི་རབ་ཏུ་དབྱེ་བ་དྲུག་ལ་དམིགས་ནས་རྣམ་རིག་ཏུ་ཞུགས་པ་ནི། དེ་ནས་དེ་འདྲར་གྱུར་པ་ཡིས། །བྱང་ཆུབ་སེམས་དཔའ་མཉམ་བཞག་པས། །ཡིད་ཀྱི་བརྗོད་པ་མ་གཏོགས་པར། །དོན་ཀུན་རབ་ཏུ་མི་མཐོང་ངོ་། །ཞེས་རྣམ་རིག་ལ་འཇུག་པའོ། །དོན་ཐམས་ཅད་མི་དམིགས་པ་ནི། རྣམ་པར་རིག་པ་ཙམ་དུ་དམིགས་པ་ལས་ནི་དོན་ཐམས་ཅད་མི་དམིགས་པ་འཇུག་གོ །ཞེས་པ་གསལ་སྣང་འབྲིང་དུ་གྱུར་པའི་ཚེ་རྣམ་རིག་ཙམ་དུ་སྣང་བ་ན་ཕྱི་རོལ་གྱི་དོན་ཐམས་ཅད་མི་དམིགས་ཏེ། ཆོས་ཀྱི་སྣང་བ་བརྟན་པའི་ཕྱིར་རྩེ་མོ་ཡིན་ནོ། །དེ་ཡང་། ཆོས་ཀྱི་སྣང་བ་འཕེལ་བྱའི་ཕྱིར། །བརྩོན་འ གྲུས་བརྟེན་པ་ཀུན་ཏུ་རྩོམ། །ཆོས་ཀྱི་སྣང་བ་འཕེལ་བྱའི་ཕྱིར། །སེམས་ཙམ་ལ་ནི་གནས་པར་འགྱུར། །ཞེས་གསུངས་སོ། །རྣམ་རིགས་མི་དམིགས་པ་ལ་འཇུག་པ་བཤད་པ་ནི། དོན་ཐམས་ཅད་མི་དམིགས་པ་ལས་ནི་རྣམ་པར་རིག་པ་ཙམ་མི་དམིགས་པ་ལ་འཇུག་གོ་ཞེས་པ་དོན་ཐམས་ཅད་མེད་ན། རྣམ་པར་རིག་པ་ཙམ་གྲུབ་པ་མེད་དེ། རྣམ་རིག་དོན་ལ་བརྟེན་པའི་ཕྱིར་རོ། །འདི་ནི་རྗེས་སུ་མཐུན་པའི་བཟོད་པའོ། །འདི་ཡང་དེ་ནས་དོན་དུ་སྣང་བ་ཀུན། །སེམས་སུ་རབ་ཏུ་མཐོང་བར་འགྱུར། །དེ་ཚེ་དེའི་བཟུང་བ་ཡི། །རྣམ་པར་གཡེང་བ་དེ་སྤོང་གྱུར། །རྣམ་རིག་གཉིས་སུ་མི་སྣང་བས། །ཁྱད་པར་མེད་པར་དམིགས་པ་ནི། །དེ་མི་དམིགས་པ་ལས་ནི། གཉིས་པོ་ཁྱད་པར་མེད་པ་ལ་དམིགས་སོ་ཞེས་པས། གང་རྣམས་རིག་མི་དམིགས་པ་ན་གཟུང་བ་དང་འཛིན་པ་གཉིས་མི་དམིགས་ཏེ། དེ་གཉིས་ག་ཡང་རྣམ་པར་རིག་པ་ཙམ་དུ་སྣང་བ་ཡང་མཚུངས་ལ། གཟུང་བ་བདེན་པ་མེད་ན་འཛིན་པ་བདེན་པ་མེད་པ་ཡང་མཚུངས་པའི་ཕྱིར་ཁྱད་པར་མེད་དེ། འདི་ནི་ཆོས་མཆོག་ལ་རེག་པ་ཡིན་ནོ། །དེས་ན་དེ་ལ་འཛིན་པ་ཡི། །རྣམ་པར་གཡེང་བ་འབའ་ཞིག་ལུས། འདི་ལྟར་དེའི་འཇུག་ཐོགས་སུ། འཛིན་པའི་རྣམ་པར་གཡེང་བ་སྤོང་། དེ་ལྟ་ན་གོ་རིམ་པ་འདི་ལྟ་བུ་ལ་བསྒོམ་པ་ནི། ཐེག་པ་ཆེན་པོའི་ཁྱད་པར་དུ་འཕགས་པའི་སྦྱོར་བའི་ལམ་སྟེ། །འདི་དག་གོ་རིམ་བཞིན་དུ་ནི། དྲོ་བར་གྱུར་སོགས་ཡིན་ཞེས་བྱ། ཞེས་གསུངས་པ་ཡིན་ནོ། །རྣམ་པར་མི་རྟོག་པའི་ངོ་བོ་བཤད་པ་ནི། དེ་ལྟར་གཉིས་མི་དམིགས་པ་གང་ཡིན་བ་དེ་ནི་རྣམ་པར་མི་རྟོག་པའི་ཡེ་ཤེས་ཏེ། ཡུལ་མེད་ཅིང་དམིགས་པ་མེད་པ། མཚན་མ་ཐམས་ཅད་མི་དམིགས་པས་རབ་ཏུ་ཕྱེ་བ་ཡིན་པའི་ཕྱིར་རོ། །ཞེས་གསུངས་ཏེ། བཟུང་འཛིན་གཉིས་སྣང་བ་མེད་ཅིང་། ཆོས་ཐམས་ཅད་ནམ་མཁའི་དཀྱིལ་ལྟ་བུ་དང་། ཤེས་བྱ་ཐམས་ཅད་སྒྱུ་མ་ལ་སོགས་པ་བཞིན་སྣང་བ་ནི་མཐོང་བའི་ལམ་སྟེ། དེ་གོམས་པར་བྱེད་པས་དྲི་མ་ཐམས་ཅད་སེལ་ཅིང་། ཡུལ་དྲུག་པོ་ཕྱི་དང་ནང་དུ་དམིགས་པ་མེད་ཅིང་། སྤང་བྱ་དང་། གཉེན་པོའི་མཚན་མ་དེ་བཞིན་ཉིད་དང་འབྲས་བུའི་མཚན་མ་ཐམས་ཅད་མི་དམིགས་པས་མཐར་ཕྱིན་པར་འགྱུར་ཏེ། སྔར་བསྟན་པ་བཞིན་ནོ། །འདི་ལྟར་མཚན་མ་རྒྱས་པར་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསལ་བ་གསུངས་ཏེ། དངོས་པོ་མེད་དང་དངོས་པོ་དང་། །སྒྲོ་འདོགས་པ་དང་སྐུར་པ་འདེབས། གཅིག་དང་ཐ་དད་ངོ་བོ་ཉིད། །ཁྱད་པར་མིང་དང་དོན་ཅི་ལྟ། འདི་བཅུ་ལ་དེ་ལ་དངོས་པོ་མེད་པར་རྣམ་པར་རྟོག་པའི་དོན་དུ་བཀའ་སྩལ་པ། བྱང་ཆུབ་སེམས་དཔའ་ཉིད་དུ་ཡོད་བཞིན་དུ་ཞེས་བྱ་བ་ལ་སོགས་པའོ། །དངོས་པོར་རྣམ་པར་རྟོག་པའི་དོན་དུ་བཀའ་སྩལ་པ། བྱང་ཆུབ་སེམས་དཔའ་ཡང་དག་པར་རྗེས་སུ་མི་མཐོང་ངོ་། །ཞེས་བྱ་བའོ། །སྒྲོ་འདོགས་པའི་རྣམ་པར་རྟོག་པའི་དོན་དུ་བཀའ་སྩལ་པ། བྱང་ཆུབ་སེམས་དཔའི་མིང་ཡང་དག་པར་རྗེས་སུ་མི་མཐོང་ངོ་། །ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་རྗེས་སུ་མི་མཐོང་། སྤྱོད་ཅེས་བྱ་བར་ཡང་དག་པར་རྗེས་སུ་མི་མཐོང་། གཟུགས་ཡང་དག་པར་རྗེས་སུ་མི་མཐོང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། འདི་ལྟར་མིང་ནི་ངོ་བོ་ཉིད་ཀྱིས་སྟོང་ངོ་། །ཞེས་བྱ་བ་ལ་སོགས་པའོ། །སྐུར་པ་འདེབས་པའི་རྣམ་པར་རྟོག་པའི་གཉེན་པོའི་དོན་དུ་བཀའ་སྩལ་པ། སྟོང་པ་ཉིད་ཀྱིས་མ་ཡིན་ནོ། །ཞེས་བྱ་བའོ། །གཅིག་པ་ཉིད་དུ་རྣམ་པར་རྟོག་པའི་གཉེན་པོའི་དོན་དུ་བཀའ་སྩལ་པ། གཟུགས་ཀྱི་སྟོང་པ་ཉིད་གང་ཡིན་བ་དེ་གཟུགས་མ་ཡིན་ནོ། །ཞེས་བྱ་བ་ལ་སོགས་པའོ། །ཐ་དད་པ་ཉིད་དུ་རྣམ་པར་རྟོག་པའི་གཉེན་པོའི་དོན་དུ་བཀའ་སྩལ་པ། སྟོང་པ་ཉིད་ལས་གཟུགས་གཞན་མ་ཡིན་ཏེ། གཟུགས་ཉིད་སྟོང་པ་ཉིད་དེ། སྟོང་པ་ཉིད་གཟུགས་སོ། །ཞེས་བྱ་བའོ། །ངོ་བོ་ཉིད་དུ་རྣམ་པར་རྟོག་པའི་གཉེན་པོའི་དོན་དུ་བཀའ་སྩལ་པ། རབ་འབྱོར་འདི་ལྟ་སྟེ། གཟུགས་ཞེས་བྱ་བ་འདི་ནི་མིང་ཙམ་མོ། །ཞེས་བྱ་བ་ལ་སོགས་པའོ། །ཁྱད་པར་དུ་རྣམ་པར་རྟོག་པའི་གཉེན་པོའི་དོན་དུ་བཀའ་སྩལ་པ། ངོ་བོ་ཉིད་ནི་མི་སྐྱེ་མི་འགག །ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན་ནོ། །ཞེས་བྱ་བའོ། །མིང་ཅི་ལྟ་བ་བཞིན་དུ་དོན་དུ་རྣམ་པར་རྟོག་པའི་གཉེན་པོའི་དོན་དུ་བཀའ་སྩལ་བ། མིང་བཅོས་མ་ལ་ཆོས་དེ་དག་སོ་སོར་བརྟགས་ནས། མིང་གློ་བུར་གྱི་རྗེས་སུ་ཐ་སྙད་འདོག་ཏེ། ཅི་ལྟ་ཅི་ལྟར་རྗེས་སུ་ཐ་སྙད་འདོགས་པ་དེ་ལྟ་དེ་ལྟར་མངོན་པར་ཞེན་ཏོ། །ཞེས་བྱ་བའོ། །དོན་ཅི་ལྟ་བ་བཞིན་དུ་མིང་དུ་རྣམ་པར་རྟོག་པའི་གཉེན་པོ་དོན་དུ་བཀའ་སྩལ་པ། བྱང་ཆུབ་སེམས་དཔའི་མིང་དེ་ཡང་དག་པར་རྗེས་སུ་མི་མཐོང་ངོ་། །ཡང་དག་པར་རྗེས་སུ་མི་མཐོང་བས་མངོན་པར་ཞེན་པ་མེད་དེ། དོན་ཅི་ལྟ་བ་བཞིན་དུ་ཞེས་བྱ་བར་དགོངས་པའོ། །གཟུགས་ཅི་ལྟ་བ་བཞིན་དུ་རྣམ་པར་ཤེས་པའི་བར་དུ་ཡང་སྦྱར་བར་བྱའོ། །རྣམ་པར་གཡེང་པ་བཅུ་པོ་འདི་དག་གི་གཉེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཐམས་ཅད་དུ་རྣམ་པར་མི་རྟོག་པའི་ཡེ་ཤེས་བསྟན་ཏེ། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཐ་དག་ནི་མི་མཐུན་པའི་ཕྱོགས་དང་། གཉེན་པོ་དང་བཅས་པར་རིག་པར་བྱའོ། །གཞན་ཡང་རྣམ་པར་བྱང་བའི་ཆོས་ཐམས་ཅད་བསྡུས་ན་རྣམ་བཞི་སྟེ། རང་བཞིན་གྱིས་རྣམ་པར་བྱང་བ་ནི། དེ་བཞིན་ཉིད་དང་སྟོང་པ་ཉིད་དང་། ཡང་དག་པའི་མཐའ་དང་། དོན་དམ་པ་དང་། མཚན་མ་མེད་པ་སྟེ། ཆོས་ཀྱི་དབྱིངས་ཀྱང་དེ་ཡིན་ནོ། །དྲི་མ་མེད་པས་རྣམ་པར་བྱང་བ་ནི། །སྒྲིབ་པ་ཐམས་ཅད་དང་མི་ལྡན་བའོ། །ཐོབ་པའི་ལམ་རྣམ་པར་བྱང་བ་ནི། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་དང་ཕ་རོལ་ཏུ་ཕྱིན་པ་ལ་སོགས་པའོ། །དེ་བསྐྱེད་པའི་ཕྱིར་དམིགས་པ་རྣམ་པར་བྱང་བ་ནི། ཐེག་པ་ཆེན་པོའི་དམ་པའི་ཆོས་བསྟན་པ་སྟེ། འདི་ལྟར་བཞི་པོ་འདི་ནི་རྣམ་པར་བྱང་བའི་རྒྱུ་ཡིན་པའི་ཕྱིར། ཀུན་ཏུ་བརྟགས་པ་མ་ཡིན་ནོ། །ཆོས་ཀྱི་དབྱིངས་རྣམ་པར་དག་པའི་རྒྱུ་མཐུན་པ་ཡིན་པས། གཞན་གྱི་དབང་མ་ཡིན་ནོ། །རྣམ་པ་བཞི་པོ་འདི་དག་གིས་རྣམ་པར་བྱང་བའི་ཆོས་ཐམས་ཅད་བསྡུས་སོ། །འདིར་ཚིགས་སུ་བཅད་པ། རྟེན་འབྱུང་སྒྱུ་མ་ལ་སོགས་བསྟན། །རྟག་ལ་བརྟེན་པ་མེད་པ་བསྟན། །རྣམ་དག་རྣམ་པ་བཞིར་བསྟེན་ནས། །ཡོངས་སུ་གྲུབ་པ་བསྟན་པ་ཡིན། །དག་པ་དེ་ནི་རང་བཞིན་དང་། །དྲི་མ་མེད་དང་ལམ་དང་དམིགས། །རྣམ་པར་དག་པ་ཆོས་ཀྱི་རྣམས། །རྣམ་པ་བཞི་པོས་བསྡུས་པ་ཡིན། །ཞེས་ཐེག་བསྡུས་ལས་གསུངས་སོ། །ཡིད་ལ་བྱེད་པའི་དམིགས་པ་ཐམས་ཅད་འདིར་བསྡུས་ཏེ་བསྟན་པ་ཡིན་ནོ། །ཡེ་ཤེས་ཀྱི་མཚན་ཉིད་ལ་འཇུག་པ་བཤད་ཟིན་ཏོ།། །།བརྒྱད་པ་སྦྱོར་བ་ལ་འཇུག་པ་ནི། བསྟན་བཤད་གཉིས་ལས། དང་པོ་ནི། སྦྱོར་བ་ལ་འཇུག་པ་དེ་ཡང་རྣམས་པ་བཞི་སྟེ། ཞེས་བྱང་ཆུབ་སེམས་དཔས་ཅི་ལྟར་སྦྱར་ན། ཡེ་ཤེས་དེ་ཐོབ་པ་སྟོན་ཏོ། །བཤད་པ་ལ་བཞི་སྟེ། ཚོགས་སྦྱོར་དང་། མཐོང་བ་དང་། བསྒོམ་བ་དང་། མཐར་ཕྱིན་པའོ། །དང་བོ་ནི། མོས་པའི་སྤྱོད་པ་ནི་མོས་པ་སྤྱོད་པའི་ས་སྟེ། དེ་ནི་སྔར་བསྟན་པའི་ངེས་པར་རྟོག་པའི་གནས་སྐབས་གང་ཡིན་པ་ཉིད་དོ། །ཞེས་གསུངས་ཏེ། ཆོས་ཉིད་ལ་འཇུག་པ་དྲུག་གི་བཤད་པར་ཚོགས་སྦྱོར་བསྟན་པ་ལྟར། རིགས་དང་ལྡན་པའི་བྱང་ཆུབ་སེམས་དཔའ་དེ་ཤེས་བྱའི་གཞི་དང་། ཤེས་བྱེད་ངོ་བོ་ཉིད་གསུམ་དང་། མཚན་ཉིད་ལ་འཇུག་པ་དང་། དེ་ལ་ཚུལ་ཅི་ལྟར་འཇུག་པ་བསླབ་པ་གསུམ་གྱི་གོ་རིམ་དང་བཅས་པས། གང་སྤངས་ཤིང་གང་ཐོབ་པའི་ཚུལ་ཐེག་པ་ཆེན་པོའི་སྡེ་སྣོད་ཆོས་ཀྱི་དབྱིངས་ཀྱི་རྒྱུ་མཐུན་པ་ཐོས་ནས་དད་སོགས་ཆོས་ལྔས་ཐར་པའི་ཆ་དང་མཐུན་པ་བསྐྱེད་ནས། ས་ལྟ་བུའི་སེམས་བསྐྱེད་པ་དང་། ལྷག་བསམ་མི་འགྱུར་བ་གསེར་ལྟ་བུ་དང་། ཡོན་ཏན་ཁྱད་པར་དུ་འགྲོ་བ་ཟླ་བ་ཚེས་པ་ལྟ་བུ་གོང་ནས་གོང་དུ་ཐོབ་སྟེ། གཟུང་འཛིན་སྲེག་པ་མེ་ལྟ་བུ་བསྒོམ་པ་ལས་བྱུང་བ་ཐོབ་པར་བྱེད་པ་ནི་མོས་པའི་སྦྱོར་པ་སྟེ། ཕ་རོལ་ཏུ་ཕྱིན་པ་དྲུག་ལ་གོ་ཆ་དང་འཇུག་པའི་བསྒྲུབ་པས། རྟེན་ཆོས་ཀྱི་སྐུ་རྣམ་པར་མི་རྟོག་པའི་ཡེ་ཤེས་ཀྱི་ཁམས་མོས་པ་ཡུལ་དུ་བྱས་ནས། དེ་ལ་དམིགས་པའི་ཤེས་པས་ཞི་ལྷག་གི་རྒྱུ་ཚོགས་ལ་བརྟེན་ནས་དམིགས་པ་རྣམས་དེས་འཇུག་གོ །ཞུགས་པས་ངེས་པར་འབྱེད་པའི་ལམ་དྲོད་རྩེ་མོ་བཟོད་པ་ཆོས་མཆོག་ལ་སྦྱོར་བས་ན་མོས་པའི་སྦྱོར་པ་ཞེས་བྱའོ། །འདི་ལྟར་སྦྱོར་བ་ན་ཉེས་པ་ལྔ་སྤོང་ཞིང་གཉེན་པོའི་འདུ་བྱེད་བརྒྱད་བསྟེན་པར་བྱ་སྟེ། །ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང་། །འདུ་མི་བྱེད་དང་འདུ་བྱེད་དེ། འདི་དག་ཉེས་པ་ལྔར་འདོད་དོ། །ལེ་ལོའི་གཉེན་པོར་ནི། འདུན་པ་དང་རྩོལ་པ་དང་། དད་པ་དང་། ཤིན་ཏུ་སྦྱངས་པས་བསལ་ལ་འབད་པར་བྱའོ། །གདམ་ངག་བརྗེད་པའི་གཉེན་པོར་ནི་དྲན་པ་བསྐྱེད་ལ་མ་བརྗེད་པར་བྱའོ། །བྱིང་རྒོད་བྱུང་པའི་ཚེ་ཤེས་བཞིན་གྱིས་ཟིན་པས་བསལ་བར་བྱའོ། །རྣམ་རྟོག་ཞི་ནས་འདུ་མི་བྱེད་ན་ནི། སེམས་བས་གཉེན་པོའི་རྟོག་པ་རྒྱ་ཆེར་བྱའོ། །གཉེན་པོའི་རྟོག་པས་གཡེང་ཞིང་འདུ་བྱེད་དྲག་ན་ནི་བཏང་སྙོམས་ཀྱིས་མཉམ་བར་བྱའོ། །འདི་ལྟར་སྦྱོར་པས་དབང་བྱེད་པའི་དབང་པོ་ལྔ་ཁ་བྱུང་ཞིང་། བདུད་དང་ཐེག་དམན་གྱི་མི་ནོན་པས་སྟོབས་ལྔར་འགྱུར་རོ། །ཆོས་ཀྱི་མི་ནི་སྡོམ་པའང་འདི་ཡི། །ཞི་གནས་ལམ་དུ་ཤེས་པར་བྱ། །ལྷག་མཐོང་ལམ་ནི་དེ་དོན་རྣམས། །རྣམ་པར་དཔྱོད་པར་ཤེས་པར་བྱ། ཟུང་དུ་འབྲེལ་པའི་ལམ་ནི་དེ། །སྡོམ་པ་ཡིན་བར་ཤེས་པར་བྱ། །ཞུམ་བའི་སེམས་ནི་རབ་བཟུང་ལ། །རྒོད་པ་ཡང་ནི་ཞི་བར་བྱ། །དེ་ནས་དམིགས་པ་དེ་ལས་ནི། །མཉམ་བར་གྱུར་ནས་བཏང་སྙོམས་བཞག འདི་ལ་བརྟེན་ནས་སྔར་བསྟན་པའི་སྣང་བ་རྣམས་འབྱུང་སྟེ། ངེས་པར་རྟོགས་པའི་སྦྱོར་བའོ། །དེ་ལྟར་དམིགས་པ་དང་། རྣམ་པ་དང་སྦྱོར་བ་སྤྱིར་བསྟན་ཏེ། རྟག་དང་། ཐེག་པ་ཆེ་ཆུང་གི་ཁྱད་པར་དང་། ཡོན་ཏན་ལ་སོགས་པ་ནི་ཕ་རོལ་ཏུ་ཕྱིན་པ་དང་། བྱང་ས་ལས་རྒྱས་པར་གསུངས་པ་བཞིན་ནོ། །མཐོང་བའི་ལམ་བཤད་པ་ནི། རབ་ཏུ་རྟོགས་པའི་སྦྱོར་བ་ནི་ས་དང་པོར་སྟེ། དེ་ཡང་རེག་པའི་གནས་སྐབས་ཉིད་དོ། །ཞེས་གསུངས་ཏེ། རྣམ་པར་མི་རྟོག་པའི་དབྱིངས་ལ་དམིགས་ནས་རྣམ་པར་རིག་པའི་མཚན་མ་བསལ་བ་ན། རྣམ་པར་ནི་ཆོས་ཐམས་ཅད་ནམ་མཁའི་དཀྱིལ་དང་མཚུངས་པར་ཤར་ལ། ནུས་པ་དང་སྒྱུ་མ་ལྟ་བུར་རྗེས་ལས་ཐོབ་པ་ལ་འཇུག་སྟེ། དེ་ནི་མཐོང་བའི་ལམ་དང་ས་དང་པོ་ཡིན་ནོ། །ཉན་རང་དང་བྱང་ཆུབ་སེམས་དཔའ་ལ་བརྟེན་བའི་སྐད་ཅིག་མ་བཅུ་དྲུག་གི་ཁྱད་པར་དང་དམིགས་པ་དང་། རྣམ་པ་ནི་མངོན་པར་རྟོགས་པའི་རྒྱན་ལས་གསུངས་ཏེ། འདིར་ཡི་གེ་མངས་ཀྱིས་དོགས་པས་མ་བྲིས་སོ། །འདི་ནི་རྣམ་པར་མི་རྟོག་བའི་ཡེ་ཤེས་སྣང་བའི་ཏིང་ངེ་འཛིན་ལ་རེག་པ་ཞེས་བྱའོ། །འདིར་ལྷག་པའི་བསམ་པ་རྣམ་པར་དག་པས་གཏེར་ལྟ་བུར་སྦྱིན་བའི་ཕ་རོལ་ཏུ་ཕྱིན་པ་རྫོགས་པའི་སེམས་བསྐྱེད་དང་། ཆོས་ཉིད་ཀྱིས་ཐོབ་པའི་སྐྱབས་འགྲོ་དང་། སྒྱུ་མ་ལྟ་བུ་དང་དཔལ་བར་འགྲོ་བ་ལ་སོགས་པའི་ཏིང་ངེ་འཛིན་ཐོབ་པ་དང་། ཞི་ལྷག་ཟུང་འབྲེལ་དུ་གྱུར་པ་དང་། མི་ཟད་པའི་གཟུངས་ཐོབ་པ་ཞེས་བྱ་བ་ལ་སོགས་པ་མདོ་ཐ་དག་ནས་དཔག་ཏུ་མེད་པའི་རྣམ་གྲངས་གསུངས་སོ། །བསྒོམ་ལམ་བཤད་པ་ནི། བསྒོམ་པའི་སྦྱོར་བ་ནི། ཡོངས་སུ་མ་དག་པའི་ས་དྲུག་དང་། ཡོངས་སུ་དག་པའི་ས་གསུམ་སྟེ། དེ་ཡང་སྔར་བརྟན་པའི་རྗེས་སུ་དྲན་བའི་གནས་སྐབས་ཉིད་དོ། །ཞེས་གསུངས་ཏེ། ས་གཉིས་པ་ལ་སོགས་པ་དྲུག་ནི་རྣམ་རྟོག་གི་མཚན་མ་དང་བཅས་ཏེ། སྤྱོད་པ་མ་དག་པའོ། །བརྒྱད་པ་ལ་སོགས་པ་གསུམ་ནི་མཚན་མ་མེད་ཅིང་། མངོན་བར་འདུ་བྱེད་པ་མེད་པར་རང་གི་ངང་གིས་འཇུག་པས་ཡོངས་སུ་དག་པའོ། །དེ་ཡང་ཐེག་བསྡུས་ལས་སྤངས་པ་བསྟན་པའི་སྐབས་ལས། སར་ཆུད་པའི་བྱང་ཆུབ་སེམས་དཔའ་རྣམས་ཀྱི་ས་དྲུག་གི་བར་དུ་དེ་ཁོ་ན་དང་། དེ་ཁོ་ན་མ་ཡིན་བ་སྣང་བ་ཉེ་བར་གནས་པའི་ཕྱིར་རོ། །བསྒོམ་བ་ལས་གྱུར་པ་ནི་སྒྲིབ་པ་དང་བཅས་པ་རྣམས་ཀྱི་སྟེ། ས་བཅུ་པའི་བར་དུ་མཚན་མ་ཐམས་ཅད་མི་སྣང་བ་དང་། དེ་ཁོ་ན་སྣང་བའི་ཕྱིར་རོ། །འབྲས་བུ་ཡོངས་སུ་རྫོགས་པའི་གྱུར་བ་ནི། སྒྲིབ་པ་མེད་པ་རྣམས་གྱི་སྟེ། མཚན་མ་ཐམས་ཅད་མི་སྣང་བ་དང་། ཤིན་ཏུ་རྣམ་པར་དག་པའི་དེ་ཁོ་ན་སྣང་བ་དང་། མཚན་མ་ཐམས་ཅད་ལ་དབང་འབྱོར་པའི་ཕྱིར་རོ། །ཞེས་གསུངས་ཏེ། རྒྱས་པར་སྔར་བསྟན་པ་ལྟར་ཉོན་མོངས་པ་དང་ཤེས་བྱའི་སྒྲིབ་པ་སྤོང་ངོ་། །དོན་དམ་པའི་སེམས་བསྐྱེད་དེ་ཉིད་མ་དག་པའི་ས་དྲུག་ལ་ཚུལ་ཁྲིམས་རིན་པོ་ཆེའི་འབྱུང་གནས་དང་། བཟོད་པ་མི་འཁྲུག་པའི་རྒྱ་མཚོ་དང་། བརྩོན་འགྲུས་སྒྲིབ་པ་འཇོམ་བའི་རྡོ་རྗེ་དང་། རྣམ་གཡེང་གིས་མི་སྒུལ་བའི་བསམ་གཏན་གྱི་རི་བོ་དང་། བག་ལ་ཉལ་གྱི་ནད་ཞི་བར་བྱེད་པའི་ཤེས་རབ་ཀྱི་སྨན་དང་། ཐབས་མཁས་པས་ཡོངས་སུ་འཛིན་བའི་བཤེས་གཉེན་ལྟ་བུ་རྣམ་པ་འཐོབ་བོ། །དེ་ནས་དག་པའི་ས་གསུམ་ལ་ཅི་ལྟར་སྨོན་པ་བཞིན་དུ་འགྲུབ་པའི་སྨོན་ལམ་གྱི་ནོར་བུ་དང་། སེམས་ཅན་གྱི་བློའི་མུན་པ་སེལ་ཅིང་ཡོན་ཏན་སྨིན་བར་བྱེད་པའི་སྟོབས་ཀྱི་ཉི་མ་དང་། ཆོས་ཀྱི་སྒྲ་དབྱངས་སྙན་པའི་ཡེ་ཤེས་དང་། ས་གསུམ་པོ་དེ་ལ་ཐུན་མོང་དུ་འབྱུང་བའི་མཐུ་ཐོགས་པ་མེད་པའི་རྒྱལ་པོ་དང་། ཚོགས་གཉིས་སྨིན་པའི་མཛོད་དང་། བྱང་ཆུབ་ཀྱི་ལམ་ཆེན་པོ་དང་། སྙིང་རྗེ་དང་སྟོང་པ་རོ་མཉམ་པས་འགྲོ་བའི་ཞེན་པ་དང་། གཟུངས་དང་སྤོབས་པ་རྒྱ་མཚོ་ཟད་མི་ཤེས་པའི་བཀོད་མའི་ཆུ་ལྟ་བུ་མངོན་གསུམ་དུ་བྱེད་དོ། །ས་བཅུ་པ་དེ་ཉིད་ཀྱི་རྒྱུན་ཐ་མར་དབང་བསྐུར་བའི་ས་འབྱུང་སྟེ། སྒྲ་ཐམས་ཅད་དང་མཉམ་པའི་གསུང་གི་སྒྲ་སྙན་དང་། ཐུགས་ཡེ་ཤེས་ཀྱི་ཆུ་རྒྱུན་འཁོར་བ་མཐའ་མེད་དུ་འབབ་པ་དང་། སྐུའི་སྤྲུལ་པ་ཞིང་རྒྱ་མཚོར་སྤྲོ་བའི་སྤྲིན་འབྱུང་སྟེ། འདི་དག་ནི་ཟག་པ་མེད་པའི་ལས་མཐར་ཕྱིན་པའོ། །ས་བཅུ་པོ་འདི་སྔར་བཤད་པ་ལྟར། དང་པོར་ཆོས་ཉིད་རྟོགས་ནས། གཉིས་པར་ལྷག་པའི་ཚུལ་ཁྲིམས་ལ་ཞུགས་ཤིང་། གསུམ་པ་དང་བཞི་པ་དང་ལྔ་པར་སེམས་ཀྱི་སེམས་ཀྱི་བསླབ་པ་རྫོགས་ནས། དྲུག་པ་ལ་ཤེས་རབ་ཀྱི་བསླབ་པ་མཐར་སོན་པས་བདུན་པ་ལ་སོགས་པ་བཞི་ལ་དེ་དག་གི་འབྲས་བུ་གྲུབ་པ་བཞི་འཐོབ་བོ། །ས་དེ་དག་གི་ངེས་པའི་ཚིག་ཀྱང་། འཇིག་རྟེན་ལས་འདས་པའི་དགའ་བ་ཁྱད་པར་ཅན་དང་ལྡན་པས་རབ་ཏུ་དགའ་བ་དང་། ཚུལ་ཁྲིམས་ལ་འཆལ་པའི་དྲི་མ་མེད་པས་ས་གཉིས་པའོ། །ཏིང་ངེ་འཛིན་གྱི་སྣང་བ་ཆེན་པོར་བྱེད་པའི་ཕྱིར་ན་ས་གསུམ་པ་འོད་བྱེད་པའོ། །བྱང་ཆུབ་ཀྱི་ཕྱོགས་དང་མཐུན་པའི་ཆོས་ཀྱིས་སྒྲིབ་གཉིས་ཀྱི་ལྷག་མ་བསྲེག་པས་ས་བཞི་པ་འོད་འཕྲོ་བའོ། །སྲིད་ཞི་སྦྱང་དཀའ་བ་མཉམ་བར་སྦྱང་བས་ས་ལྔ་པ་སྦྱང་དཀའ་བའོ། །ཤེས་རབ་ཀྱིས་འཁོར་འདས་གཉིས་ཀ་ལ་སྦྱང་བས་ས་དྲུག་པ་མངོན་དུ་གྱུར་པའོ། །མཚན་མ་མེད་པའི་སངས་རྒྱས་ཀྱིས་བགྲོད་པ་གཅིག་པའི་ལམ་དང་འབྲེལ་པས་ས་བདུན་པ་རིང་དུ་སོང་བའོ། །མཚན་མ་དང་འདུ་བྱེད་གཉིས་ཀས་མི་གཡོ་བས་ས་བརྒྱད་པ་མི་གཡོ་བའོ། །སོ་སོ་ཡང་དག་པར་རིག་པ་མཐར་སོན་པས་ས་དགུ་པ་ལེགས་པའི་བློ་གྲོས་སོ། །ཏིང་ངེ་འཛིན་དང་གཟུངས་གཉིས་ཀྱིས་ནམ་མཁའ་ཁྱབ་པས་ས་བཅུ་པ་ཆོས་ཀྱི་སྤྲིན་ནོ། །འདིའི་མཐར་སྐུ་གསུམ་གྱི་འཕྲིན་ལས་རྫོགས་པ་ལ་དབང་བས་དབང་བསྐུར་བའི་ས་སྟེ། མོས་པས་སྤྱོད་པ་དང་བཅས་པའི་ས་བཅུ་གཉིས་པོ་འདི་རྫོགས་ནས་མཐར་ཐུག་པའི་སངས་རྒྱས་ཏེ། དེའི་བདག་ཉིད་དུ་ཉེ་བར་སོན་བར་འགྱུར་རོ། །འདི་རྣམས་ཀྱི་ངེས་པའི་ལུང་ནི་མདོ་སྡེ་རྒྱན་དང་བྱང་ཆུབ་སེམས་དཔའི་ས་ལས་གསུངས་སོ། །རྣམ་པར་མི་རྟོག་ཡེ་ཤེས་ནི། །ངོ་བོས་མཉམ་བར་བཞག་པ་སྟེ། །རྗེས་ལས་ཐོབ་པ་དེའི་ལས། །མེ་དང་ཚང་ཚིང་སྲེག་བྱེད་བཞིན། །ཆོས་མོས་ལྷག་སེམས་ཤེས་རབ་དང་། །བསམ་གཏན་སྙིང་རྗེ་ཐབས་ཡིན་ཏེ། །ཐབས་དང་ཤེས་རབ་དབྱེར་མེད་པས་མདུན་བཞག་མཚན་མ་ཀུན་སེལ་པས། །སྒྲིབ་པ་བཅུ་བསལ་ས་བཅུ་རྫོགས། །ཕ་རོལ་ཕྱིན་པ་བཅུ་དག་ཅིང་། །གཟུངས་དང་ཏིང་འཛིན་སྨོན་ལམ་དང་། །ཡེ་ཤེས་སྟོབས་རྣམས་རྒྱ་མཚོ་ལ། །འཇུག་པའི་ཡོན་ཏན་མཐར་སོན་བས། སངས་རྒྱས་སྙིང་པོའི་ཁམས་ཐོབ་སྟེ། །བཅིངས་གྲོལ་མེད་པར་རྣམ་སངས་རྒྱས། །ཐམས་ཅད་མཁྱེན་པ་ཞེས་བརྗོད་དོ། །ཞེས་བྱ་ནི་བསྡུས་པའི་ཚིག་སུ་བཅད་པའོ། །མཐར་ཕྱིན་པའི་ལམ་བཤད་པ་ནི། མཐར་ཐུག་པའི་སྦྱོར་བ་ནི་སངས་རྒྱས་ཀྱིས་སས་ལྷུན་གྱིས་གྲུབ་པར་སངས་རྒྱས་ཀྱི་མཛད་པ་རྒྱུན་མི་འཆད་པའི་ཕྱིར་ཏེ། དེ་ཡང་སྔར་བསྟན་པ་དེ་ཡི་བདག་ཉིད་དུ་ཉེ་བར་སོན་བའི་གནས་སྐབས་ཉིད་དོ། །ཞེས་གསུངས་ཏེ། གང་ལ་དེ་མ་ཐག་ཏུ་སངས་རྒྱས་ཀྱི་མཛད་པ་རྒྱུན་མི་འཆད་པ་ཐོབ་པ་དེ་ལ་མཐར་ཐུག་པའི་སྦྱོར་བ་ཞེས་བྱ་སྟེ། །གང་གིས་དབང་བསྐུར་བའི་ངེས་པར་ཐོབ་མ་ཐག་ཏུ་སངས་རྒྱས་ཀྱི་ཁམས་ཐོབ་ནས་དེའི་བདག་ཉིད་དུ་འགྱུར་ཏེ། སྐུ་གསུམ་ལྷུན་གྱིས་གྲུབ་པའི་ཡེ་ཤེས་མཛད་པ་འཕྲིན་ལས་དང་བཅས་པ་འབྱུང་བའི་ཕྱིར་རོ། །འདི་ནི་རྒྱས་པར་བྱང་ཆུབ་པས་བསྟན་ཏེ། སྡོམ་ནི། ངོ་བོ་རྒྱུ་དང་འབྲས་བུ་དང་། །ལས་དང་ལྡན་བ་འཇུག་པ་དང་། དེ་རྟགས་བསམ་མི་ཁྱབ་ཉིད་ཀྱིས། །སངས་རྒྱས་ས་ནི་རྣམ་པར་གནས། ཞེས་ངོ་བོ་ནི་ཁམས་རྣམ་པར་དག་པའོ། །དག་པ་དེའི་རྒྱུ་ནི་ཐོས་པའི་སྒྲས་བསྟན་ཏེ། རྒྱུ་མཐུན་བའི་ཆོས་དཀར་པོའོ། །དེས་སྒྲིབ་པ་གཉིས་བྲལ་པར་བྱེད་པའོ། །འབྲས་བུ་ནི་ཆོས་སྐུ་དང་གཟུགས་སྐུ་གཉིས་སོ། །ལས་ནི་རྣམ་པར་མི་རྟོག་པར་སྒྲིབ་པ་འཇོམ་ཞིང་ཟག་པ་མེད་པའི་ཡེ་ཤེས་ཀྱི་ལས་ཐོགས་པ་མེད་པའོ། །ལྡན་བ་ནི་རང་དང་གཞན་གྱི་དོན་རྨད་དུ་བྱུང་བའི་འཕྲིན་ལས་ལྡན་བའོ། །འཇུག་པ་ནི་སྐུ་གསུམ་གྱིས་འཁོར་བ་ཅི་སྲིད་དུ་འཇུག་པའི་རྟག་པ་ཉིད་གསུམ་མོ། །རྟག་པ་དེ་ཡང་ངོ་བོ་དང་། རྒྱུན་དང་རྒྱུན་མི་འཆད་པ་རྣམ་པ་གསུམ་དུ་བཤད་པའོ། །དེའི་རྒྱུ་མཚན་ཡང་རྒྱུ་མཐའ་ཡས་དང་སེམས་ཅན་ཟད་མེད་དང་། །བརྩེ་དང་འཕྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུན་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོས་རྟག །ཅེས་གསུངས་པ་ཡིན་ནོ། །འདི་རྣམས་རྒྱས་པར་ནི་རྒྱུད་བླ་མར་གསུངས་སོ། །ཐེག་བསྡུས་ལས་ཀྱང་། ཡེ་ཤེས་ཀྱི་ཁྱད་པར་ཅི་ལྟར་བལྟ་བར་བྱ་ཞེ་ན། སངས་རྒྱས་རྣམས་ཀྱི་སྐུ་གསུམ་མོ་ངོ་བོ་ཉིད་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུའོ། །དེ་ལ་ངོ་བོ་ཉིད་ཀྱི་སྐུ་ནི། དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་སྟེ། །ཆོས་ཐམས་ཅད་ལ་དབང་བསྒྱུར་བའི་གནས་ཡིན་བའི་ཕྱིར་རོ། །ལོངས་སྤྱོད་རྫོགས་པ་ནི། སངས་རྒྱས་རྣམས་ཀྱི་འཁོར་གྱི་དཀྱིལ་འཁོར་སྣ་ཚོགས་ཀྱིས་ཕྱེ་བ་དང་། ཆོས་ཀྱི་སྐུ་ལ་བརྟེན་པ་སྟེ། སངས་རྒྱས་ཀྱི་ཞིང་ཡོངས་སུ་དག་པ་དང་། ཐེག་པ་ཆེན་པོ་ནི་ཆོས་ཀྱི་ལོངས་སྤྱོད་མྱོང་བར་མཛད་པའི་ཕྱིར་རོ། །སྤྲུལ་པའི་སྐུ་ནི་གང་ཆོས་ཀྱི་སྐུ་ལ་བརྟེན་པ་ཉིད་དེ། དགའ་ལྡན་གྱི་གནས་ན་བཞུགས་པ་ནས་བཟུངས་ཏེ། མྱ་ངན་ལས་འདའ་བ་སྟོན་པའི་བར་གྱི་མཛད་པ་སྟོན་པའི་ཕྱིར་རོ། །འདི་ལས་རྣམ་པར་དབྱེ་བའི་སྡོམ་ནི། མཚན་ཉིད་དང་ནི་ཐོབ་པ་དང་། དབང་དང་གནས་དང་ཡོངས་བསྡུས་དང་། །དབྱེ་དང་ཡོན་ཏན་ཟབ་པ་དང་། །དྲན་དང་འཕྲིན་ལས་ཟབ་པ་ཉིད། མཚན་ཉིད་ཀྱང་ལྔ་སྟེ། གནས་གྱུར་པ་ནི་སྒྲིབ་པ་ཐམས་ཅད་དང་། གཞན་དབང་འཁོར་བའི་ཆ་ལས་གྲོལ་ཞིང་། གནས་གྱུར་པ་རྣམ་བྱང་དུ་རྟོགས་པར་གྱུར་པའོ། །དཀར་པོའི་ཆོས་རྫོགས་པས་ཕ་རོལ་ཏུ་ཕྱིན་པ་དྲུག་ལས་དབང་བཅུ་ཐོབ་པའོ། །ཆོས་ཐམས་ཅད་དངོས་པོ་མེད་པའི་ངོ་བོ་ཉིད་སྟོང་པའི་དོན་གྱིས་གཉིས་སུ་མེད་ལ། འདུས་བྱས་འདུས་མ་བྱས་གཉིས་མེད་པས་གཉིས་ག་ལ་དབང་འབྱོར་ཐོབ་ཅིང་སངས་རྒྱས་རྣམས་ཐ་དད་པ་དང་གཅིག་ཏུ་མེད་པའི་མཚན་ཉིད་དོ། །རྟག་པ་ཉིད་གསུམ་དང་། བསམ་གྱིས་མི་ཁྱབ་པ་རྟོག་གེ་ལས་འདས་པ་སྟེ་ལྔའོ། །ཐོབ་པ་ནི་མཉམ་རྗེས་ཀྱི་ཡེ་ཤེས་ཀྱིས་སྒྲིབ་གཉིས་བཤིགས་པས་ཐོབ་པ་ཉིད་དོ། །དབང་འབྱོར་པ་ནི་ལྔ་སྟེ། གཟུགས་ཀྱི་ཕུང་པོ་གནས་གྱུར་པས། ཞི་དང་། ལུས་དང་། མཚན་དཔེ་དང་། དབྱངས་མཐའ་ཡས་པ་དང་། སྤྱི་གཙུག་བལྟར་མི་སྣང་བ་དང་། ཚོར་བའི་ཕུང་པོ་གནས་གྱུར་པས་ཁ་ན་མ་ཐོ་བ་མེད་ཅིང་། ཚད་མེད་ལ་རྒྱ་ཆེ་བའི་བདེ་བ་ལ་དབང་འབྱོར་པ་དང་། འདུ་ཤེས་ཀྱི་ཕུང་པོ་གནས་གྱུར་པའི་ཕྱིར་མིང་ཚིགས་ཡི་གེ་བསྟན་པ་ཐམས་ཅད་ལ་དབང་འབྱོར་པ་དང་། འདུ་བྱེད་ཀྱི་ཕུང་པོ་གནས་གྱུར་པའི་ཕྱིར། སྤྲུལ་པ་དང་། བསྒྱུར་བ་དང་། འཁོར་བསྡུ་བ་དང་། དཀར་པོ་ཡི་ཆོས་སྡུད་པ་ལ་དབང་འབྱོར་པ་དང་། རྣམ་པར་ཤེས་པའི་ཕུང་པོ་གནས་གྱུར་པས། ཀུན་གཞི་མེ་ལོང་ལྟ་བུ་དང་། ཡིད་མཉམ་པ་ཉིད་དང་། དྲུག་པ་སོ་སོར་རྟོག་པ་དང་ལྔ་པོ་བྱ་བ་གྲུབ་པར་གྱུར་པའི་ཕྱིར་རོ། །གནས་པ་ཡང་གསུམ་སྟེ། ཆོས་སྐུ་ནི་མཐུ་དང་བྱ་བ་གྲུབ་པ་དང་། ཆོས་ཀྱི་རོ་དང་། དོན་དང་། ཡོན་ཏན་འབྱོར་པ་དཔག་ཏུ་མེད་པ་དང་རྟག་ཏུ་མི་ཟད་པ་དང་། གཟིགས་པ་བརྙེས་པས་བདེ་བ་ཆེན་པོ་གནས་པ་དང་། ལོངས་སྤྱོད་རྫོགས་པའི་གནས་པ་ནི། བྱང་ཆུབ་སེམས་དཔའ་རྣམས་སྨིན་བར་མཛད་པའོ། །སྤྲུལ་པའི་སྐུ་སྣ་ཚོགས་ཀྱི་གནས་པ་ནི་ཕལ་ཆེར་ཉན་ཐོས་རྣམས་སྨིན་པར་མཛད་པའོ། །གང་གིས་བསྡུས་པ་ནི་དྲུག་སྟེ། སངས་རྒྱས་ཀྱི་ཆོས་རྣམ་དག་ཀུན་གཞི་དག་པ་ཆོས་སྐུས་བསྡུས་པ་དང་། དབང་པོ་གཟུགས་ཅན་གྱུར་པའི་རྣམ་སྨིན་གྱི་ཡེ་ཤེས་དང་། འདོད་པ་གནས་གྱུར་པའི་ཡེ་ཤེས་ཚད་མེད་པ་དང་། འཛིན་པའི་ལས་སྣ་ཚོགས་གྱུར་ནས་ཐམས་ཅད་དུ་ཐོག་པ་མེད་པའི་ཡེ་ཤེས་དང་། ཐ་སྙད་ཀྱིས་བསྟན་པ་ཐམས་ཅད་ཀྱིས་འགྲོ་བ་ཚིམ་བ་དང་། སེལ་བས་ནི་འགྲོ་བའི་ཉེས་པ་ཐམས་ཅད་སེལ་བ་དང་དྲུག་གིས་ཆོས་ཀྱི་སྐུ་བསྡུས་སོ། །དབྱེ་བ་ནི། རྟེན་དང་། དགོངས་པ་དང་། འཕྲིན་ལས་ཀྱིས་ནི་སངས་རྒྱས་ཐམས་ཅད་མཉམ་ཞིང་། སེམས་ཅན་དཔག་ཏུ་མེད་པ་དེར་བྱང་ཆུབ་པས་ནི་ཐ་དད་པའོ། །ལོངས་སྐུ་ཡང་དགོངས་པ་དང་འཕྲིན་ལས་ཐ་དད་མེད་ཅིང་གནས་ཐ་དད་པ་ནི་ཡིན་ནོ། །སྤྲུལ་ཡང་དེ་ཉིད་དང་མཚུངས་སོ། །ཡོན་ཏན་ནི་ཆོས་སྐུའི་སོ་གཉིས་དང་། གཟུགས་སྐུའི་སོ་གཉིས་ཏེ། དྲུག་བཅུ་རྩ་བཞི་ཡར་འདུ་ལ། ཡོངས་དག་བཞི་དང་། ཚད་མེད་པ་བཞི་དང་། རྣམ་པར་ཐར་པ་བརྒྱད་དང་། ཟིལ་ནོན་བརྒྱད་དང་། ཟད་བར་བཅུ་དང་། ཉོན་མོངས་པ་མེད་པ་དང་། སྨོན་ནས་མཁྱེན་པ་དང་། སོ་སོ་ཡང་དག་པར་རིག་པ་བཞི་དང་། མངོན་ཤེས་དྲུག་དང་། མཚན་སུམ་ཅུ་སོ་གཉིས་དང་། དཔེ་བྱད་བརྒྱ་ཅུ་དང་། སྟོབས་བཅུ་དང་། མི་འཇིགས་པ་བཞི་སྲུང་བ་མེད་པ་གསུམ་དང་། དྲན་པ་ཉེ་བར་གཞག་པ་གསུམ་དང་། བག་ཆགས་བཅོམ་བ་དང་། མི་སྙེལ་པའི་ཆོས་ཉིད་དང་། །ཐུགས་རྗེ་ཆེན་པོ་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། ཕ་རོལ་ཏུ་ཕྱིན་པ་དྲུག་རྫོགས་པ་དང་ལྡན་པ་རྣམས་ཏེ། རྒྱ་ཆེན་པོར་ནི་བྱེ་བ་དྲུག་བཅུ་རྩ་བཞིར་ཡང་གསུངས་སོ། །སངས་རྒྱས་ཀྱི་ཆོས་ཀྱི་སྐུ་ཟབ་པའི་རང་བཞིན་བསམ་གྱིས་མི་ཁྱབ་ཀྱང་བསྡུས་ན་བཅུ་གཉིས་ཏེ། དང་པོ་མྱ་ངན་ལས་འདས་པ་དང་། འཕྲིན་ལས་དང་། གནས་པ་ཟབ་པ་ནི། སྐྱེ་མེད་སངས་རྒྱས་སྐྱེ་བ་སྟེ། །མི་གནས་པ་ལ་རབ་ཏུ་བཞུགས། །ལྷུན་གྱིས་གྲུབ་པར་ཐམས་ཅད་མཛད། །ཟས་བཞི་པོ་ནི་གསོལ་པ་ལགས། །ཞེས་སོ། །གཉིས་པ་ཚུལ་ལུགས་དང་། གྲངས་དང་། འཕྲིན་ལས་ཟབ་པ་ནི། ཐ་དད་མེད་ཅིང་དཔག་ཏུ་མེད། །འཕྲིན་ལས་དཔག་ཏུ་མེད་ཅིང་གཅིག །མི་བརྟན་པའི་འཕྲིན་ལས་ཅན། །སངས་རྒྱས་རྣམས་ནི་སྐུ་གསུམ་ལྡན། །ཞེས་སོ། །གསུམ་པ་མངོན་པར་རྫོགས་པར་བྱང་ཆུབ་པ་ཟབ་པ་ནི། གང་ཡང་མངོན་རྫོགས་སངས་རྒྱས་མེད། །ཐམས་ཅད་སངས་རྒྱས་མ་ཡིན་མིན། །སྐད་ཅིག་རེ་ལ་དཔག་ཏུ་མེད། །དངོས་པོ་དངོས་མེད་རབ་ཏུ་ཕྱེ། །ཞེས་སོ། །བཞི་པ་འདོད་ཆགས་དང་བྲལ་བ་ཟབ་པ་ཉིད་ནི། ཆགས་པ་མ་ཡིན་མི་ཆགས་མིན། །འདོད་ཆགས་ཉིད་ཀྱིས་འབྱུང་བ་ཡིན། །འདོད་ཆགས་འདོད་ཆགས་མིན་མཁྱེན་ནས། །འདོད་ཆགས་ཆོས་ཉིད་ལ་ཡང་ཞུགས། །ཞེས་སོ། །ལྔ་པ་ཕུང་པོ་སྤང་པ་ཟབ་པ་ནི། སངས་རྒྱས་ཕུང་པོ་རྣམས་ལས་འདས། །ཕུང་པོ་རྣམས་ལའང་མངོན་པར་ཞུགས། །དེ་ལས་གཞན་མིན་གཞན་མེད་མིན། །དེ་མ་བཏང་བས་ལེག་པར་འདས། །ཞེས་སོ། །དྲུག་པ་སེམས་ཅན་ཡོངས་སུ་སྨིན་བར་མཛད་པའི་ཟབ་པ་ཉིད་ནི། ཀུན་ཀྱང་འདྲེས་པའི་འཕྲིན་ལས་ཅན། །རྒྱ་མཚོར་ཆུ་འདྲ་རྒྱལ་བ་རྣམས། །བྱས་སོ་བྱེད་དོ་བྱའོ་ཞེས། །གཞན་གྱི་དོན་ལ་དགོངས་པ་མེད། །ཞེས་སོ། །བདུན་པ་མཐོང་བ་ཟབ་པ་ཉིད་ནི། སེམས་ཅན་ཉེས་པས་མི་སྣང་སྟེ། །སྣོད་ཆགས་པ་ཡི་ཟླ་བ་བཞིན། །འཇིག་རྟེན་ཀུན་ལ་ཉི་མ་བཞིན། །དེ་དག་ཆོས་འོད་ཁྱབ་པར་མཛད། །ཞེས་སོ། །བརྒྱད་པ་མྱང་ངན་ལས་འདས་པ་ཀུན་ཏུ་བསྟན་པ་ཟབ་པ་ཉིད་ནི། ལ་ལས་རྫོགས་པའི་བྱང་ཆུབ་སྟོན། །ལ་ལར་མེ་བཞིན་མྱ་ངན་འདས། །ནམ་ཡང་མེད་པ་མ་ཡིན་ཏེ། །དེ་བཞིན་གཤེགས་པ་རྟག་པའི་སྐུ། །ཞེས་སོ། །དགུ་པ་བཞུགས་པ་ཟབ་པ་ཉིད་ནི། སངས་རྒྱས་འཕགས་མིན་ཆོས་རྣམས་ཏེ། མི་དང་ངན་སོང་པ་རྣམས་དང་། །ཚངས་སྤྱོད་མ་ཡིན་ཆོས་རྣམས་ལ། །བདག་ཉིད་དང་ནི་བཞུགས་པ་མཆོག །ཞེས་སོ། །བཅུ་པ་ཀུན་ཏུ་སྟོན་པ་ཟབ་པ་ཉིད་ནི། དེ་དག་ཀུན་ཏུ་རྣམ་པ་དཔྱོད། །གང་དུའང་རྣམ་པར་དཔྱོད་མི་མངའ། །གནས་རྣམས་ཀུན་ན་མཐོང་མོད་ཀྱི། །དབང་པོ་དྲུག་ནི་སྤྱོད་ཡུལ་མིན། །ཞེས་སོ། །བཅུ་གཅིག་པ་ཉོན་མོངས་པ་སྤངས་པ་ཟབ་པ་ཉིད་ནི། ཉོན་མོངས་ཐུལ་ལ་སྤངས་པ་མེད། །སྔགས་ཀྱི་བསད་པའི་དུག་དང་འདྲ། །སངས་རྒྱས་རྣམས་ནི་ཉོན་མོངས་ལས། །ཉོན་མོངས་ཟད་པ་ཀུན་མཁྱེན་མཉེས། །ཞེས་སོ། །བཅུ་གཉིས་པ་བསམ་གྱི་མི་ཁྱབ་པ་ཟབ་པ་ཉིད་ནི། ཐབས་ཆེན་རྣམས་དང་ལྡན་བ་ལ། །ཉོན་མོང་བྱང་ཆུབ་ཡན་ལག་འགྱུར། །འཁོར་བའང་ཞི་བའི་བདག་ཉིད་དེ། །དེ་ཕྱིར་དེ་བཞིན་གཤེགས་བསམ་ཡས། །ཞེས་གསུངས་པ་འདི་རྣམས་ཀྱིས་སངས་རྒྱས་ཀྱི་ཟབ་པ་བསམ་གྱིས་མི་ཁྱབ་པ་བསྟན་པར་ཁོང་དུ་ཆུད་པར་བྱའོ། །འདི་ལྟ་བུའི་སངས་རྒྱས་རྗེས་སུ་དྲན་པ་བྱང་ཆུབ་སེམས་དཔའ་རྣམས་ཀྱིས་བསྒོམ་པར་བྱ་སྟེ། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པའི་མངོན་པར་ཤེས་པ་བརྙེས་པ། ཆོས་ཐམས་ཅད་ལ་དབང་བསྒྱུར་བ་ཡི་ཚུལ་ཅན། དྲི་མ་མཐའ་དག་ལས་རྣམ་པར་གྲོལ་བས་རྟག་པའི་སྐུའོ། །ཞེས་བྱ་བར་དྲན་བ་དང་། ཁ་ན་མ་ཐོ་བ་མེད་པ། ལྷུན་གྱི་གྲུབ་པ། ལོངས་སྤྱོད་ཚད་མེད་པ། གོས་པ་མེད་པའི་བྱང་ཆུབ་པས་མ་སྨིན་བ་སྨིན་བ་དང་། སྨིན་པ་རྣམ་པར་གྲོལ་བར་མཛད་པའོ། །ཞེས་དུས་ཐམས་ཅད་དུ་བསྒོམ་པར་བྱའོ། །འདི་ནི་སངས་རྒྱས་རྗེས་སུ་དྲན་པའི་ཏིང་ངེ་འཛིན་རྒྱ་མཚོ་ལས་གསུངས་པ་ལྟར། ལས་དང་པོ་པས་ཀྱང་དཀྱིལ་མོ་ཀྲུང་བཅས་ཏེ། དྲན་པ་མངོན་དུ་བཞག་ནས། སྐུ་གཟུགས་མདུན་དུ་བཤམས་ཏེ། རྩེ་ཅིག་ཏུ་བསྒོམ་ན་ཡང་བསམ་གྱིས་མི་ཁྱབ་པའི་ཡོན་ཏན་ལ་བསམ་སྟེ། དེ་ལྟ་བུའི་ཞི་ལྷག་མངོན་དུ་བྱས་ན། མྱུར་དུ་སངས་རྒྱས་ཀྱི་ཆོས་ཐམས་ཅད་ལ་སྤྱོད་པར་འགྱུར་རོ། །ཡོན་ཏན་ཡང་། ད་ལྟར་གྱི་སངས་རྒྱས་མངོན་དུ་བཞུགས་པའི་ཏིང་ངེ་འཛིན་ལ་ཞག་བདུན། གཞན་གྱིས་བར་མ་ཆོད་པར་བསྒོམས་ན་བདེ་བ་ཅན་དུ་ངེས་པར་འགྲོ་ཞིང་མཐོང་བའི་ལམ་ཐོབ་པར་གསུངས་སོ། །མཐར་ཐུག་པའི་ལམ་བཤད་ཟིན་ཏོ། །དགུ་པ་ཉེས་དམིག་ཤེས་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ལ་ཉེས་དམིགས་ལ་འཇུག་པ་ནི། གནས་ཡོངས་སུ་གྱུར་པ་མེད་པའི་ཉེས་དམིགས་བཞི་སྟེ། ཞེས་རྟེན་དང་རྟེན་པ་ཐ་དད་པ་ཉིད་ལས་གྱུར་པའི་གནས་གྱུར་སྔར་གསུངས་པ་ལྟ་བུ་ཡོད་དགོས་སོ། །དེས་ན་རྒྱས་པར་བཤད་པ་ལ་བཞི་ལས། དང་པོ་ནི། ཉོན་མོངས་པ་མི་འཇུག་པའི་རྟེན་མེད་པའི་ཉེས་པ་དང་ཞེས་པས། གལ་ཏེ། གནས་ཡོངས་སུ་གྱུར་པའི་ངོ་བོ་ཆོས་ཀྱི་སྐུ་རྟག་པ་དེ་མེད་ན་ནི། ཡང་རྟེན་ཀུན་གཞིའི་རྣམ་པར་ཤེས་པ་ལ་ནི་ཉོན་མོངས་འཇུག་པ་ཁོ་ན་ཡིན་ཏེ། ཡང་དག་པ་མ་ཡིན་པའི་རྟོག་པ་ཐམས་ཅད་བསགས་པའི་འབྲས་བུ་ཡིན་པ་དང་། དེས་ཀྱང་རྣམ་ཤེས་བསྐྱེད་པའི་ཕྱིར་རོ། །རྟེན་ཆོས་ཀྱི་སྐུ་ལ་བརྟན་པའི་ཟག་པ་མེད་པའི་ཡེ་ཤེས་སྐྱེ་བ་ཡོད་ན། ཉོན་མོངས་པ་མི་འཇུག་སྟེ། དེའི་གཉེན་པོ་འབར་བའི་ཕྱིར་ཏེ། དཔེར་ན་ཉི་མ་ལ་མུན་པ་མི་འབྱུང་བའི་ཕྱིར་རོ། །གཉིས་པ་ནི། ལམ་འཇུག་པའི་རྟེན་མེན་པའི་ཉེས་པ་དང་ཞེས་པས་ཟག་པ་མེད་པའི་ལམ་ལྔ་རིམ་པས་ངེས་པར་བསྐྱེད་དགོས་ན། བསྒྲུབ་པ་དོན་དམ་པ་ལ་བརྟེན་ནས་ཐོབ་པ་མངོན་གསུམ་དུ་བྱ་བའི་ཕྱིར། རྟེན་རྣམ་པར་མི་རྟོག་པའི་ཡེ་ཤེས་འགྱུར་བ་མེད་པའི་ཡོངས་གྲུབ་ལ་བརྟེན་ཏེ། དེའི་རྒྱུ་མཐུན་བ་ཕྱིན་ཅི་མ་ལོག་པའི་ཐོས་བསམ་བསྒོམ་པ་ནི་གོང་ནས་གོང་དུ་རྣམ་པར་དག་པའི་འབྲས་བུ་བསྐྱེད་པ་ཡིན་གྱི། མ་དག་པའི་རྟེན་ལས་དག་པ་འབྱུང་བ་ནི་མི་རིགས་ཏེ། ཟག་པ་ལས་ཟག་མེད་འབྱུང་བ་མི་འཐད་པའི་ཕྱིར་འགལ་བ་སྟེ། སྣང་མུན་བཞིན་ནོ། །གསུམ་པ་ནི། མྱང་ནས་ལས་འདས་པ་ཡིན་ན། ཟག་པ་དང་བཅས་པའི་གཞི་མེད་པའི་ཉེས་པ་དང་། ཞེས་པ་ཟག་པ་དང་བཅས་པའི་ཁམས་གསུམ་གྱི་འཁོར་བ་འདུ་བྱེད་མ་རིག་པས་བསྐྱེད་པའི་རྒྱུའི་ལས་ཀྱིས་སྲེད་ལེན་ལ་བརྟེན་པའི་སྲིད་པ་གསུམ་འགྲུབ་པ་ལྟར། མྱ་ངན་ལས་འདས་པའི་རྣམ་པར་དཀར་བའི་ཟག་པ་མེད་པའི་ལས་ལ་བརྟེན་ནས་རྣམ་པར་གྲོལ་བའི་ལུས་དགྲ་བཅོམ་པ་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་གདགས་སུ་ཡོད་ཅིང་། མཐར་ཕྱིན་པའི་རྫོགས་པའི་བྱང་ཆུབ་ཆེན་པོ་ཡང་ཡོད་དགོས་སོ། །གལ་ཏེ་འཁོར་བ་དང་མྱང་འདས་དག་རྟེན་གཅིག་ན་ནི་ཉེས་པ་ཆེན་པོར་འགྱུར་ཏེ། མི་མཐུན་བའི་སྤང་གཉེན་རྟེན་གཅིག་ཏུ་འགལ་བ་དང་། སེམས་འགག་པ་ན་འཁྲུལ་པ་འགག་པས། ཡེ་ཤེས་ཀྱི་ཡོངས་གྲུབ་ཀྱང་འགག་པར་འགྱུར་བ་དང་། དེ་ལྟར་ཡོངས་གྲུབ་འགག་ན་འདུས་བྱས་སུ་འགྱུར་བས། འདུས་མ་བྱས་པའི་ཆོས་ཉིད་དང་། ཆོས་སྐུ་གཏན་མེད་པར་འགྱུར་ཏེ། དེ་ལྟར་འདོད་ན་ནི་གཟེག་ཟན་གྱི་ལྟ་བར་འགྱུར་ཏེ། རྣམ་པར་དཀར་པའི་ཆོས་ཀྱིས་དོན་མེད་པར་འགྱུར་པས། འཕགས་པ་བཞི་མེད་པར་བལྟར་མི་རུང་ངོ་། །དེས་ན་མྱ་ངན་ལས་འདས་པའི་གང་ཟག་གདགས་པ་འཐད་པ་ཡིན་ནོ། །བཞི་པ་ནི། བྱང་ཆུབ་གསུམ་གྱི་ཁྱད་པར་གདགས་པའི་གཞི་མེད་པའི་ཉེས་པ་ནི་བཞི་པའོ། །ཞེས་པ་བྱང་ཆུབ་གསུམ་ནི། རྟེན་ཆོས་ཀྱི་དབྱིངས་དེ་ལ་བརྟེན་ནས་རྣམ་པར་གྲོས་པའི་ཁྱད་པར་ཏེ། ཉན་ཐོས་རྣམས་ནི་གང་ཟག་ལ་བདག་ཏུ་འཛིན་པའི་ཉོན་མོངས་པའི་སྒྲིབ་པ་རྟེན་དང་བཅས་པ་སྤངས་པས་རྣམ་པར་གྲོལ་བ་ཡིན་ལ། རང་སངས་རྒྱས་ནི་དེའི་སྟེང་དུ་ཆོས་ཀྱི་བཟུང་རྟོག་སྤངས་པའི་རྣམ་པར་གྲོལ་བ་ཙམ་དང་ལྡན་ཏེ། འདུས་མ་བྱས་པའི་ཟག་པ་མེད་པའི་ཆོས་ལ་བརྟེན་པའི་ནམ་མཁའི་མཛོད་ལ་སོགས་པའི་ཏིང་ངེ་འཛིན་ལ་ཅུང་ཟད་དབང་འབྱོར་པའི་ཕྱིར་རོ། །བྱང་ཆུབ་སེམས་དཔའ་རྣམས་ནི་ཆོས་དང་གང་ཟག་གི་བདག་མཐའ་དག་མཐོང་ལམ་ནས་མེད་པར་རྟོགས་ནས། དེའི་དྲི་མ་དྲུངས་དབྱུང་བའི་ཕྱིར་བསྒོམ་བ་ལ་བརྟེན་ནས་མ་རིག་པ་བག་ཆགས་ཀྱི་ས་ལས་རྣམ་པར་གྲོལ་བས་སངས་རྒྱས་སུ་འགྱུར་བའི་ཕྱིར། རྟེན་ཆོས་ཀྱི་སྐུ་ལ་བརྟེན་ནས་རྣམ་པར་གྲོལ་བའི་ཁྱད་བར་གསུམ་གདགས་སུ་རུང་བས། ཉོན་མོངས་པ་སྤངས་བའི་བྱང་ཆུབ་དང་། གཟུང་བ་སྤངས་པའི་བྱང་ཆུབ་དང་། མཐར་ཕྱིན་བའི་བྱང་ཆུབ་གསུམ་གདགས་སུ་རུང་བ་ཡིན་ལ། འདི་ལྟར་གྱུར་པ་མེད་ན་ཐུན་མོང་མ་ཡིན་བའི་ཀུན་གཞིའི་རྣམ་ཤེས་རྐྱང་པ་ལོག་པ་ལ་ཡང་ཁྱད་པར་མེད་པས་གསུམ་མི་རུང་བ་དང་། དེ་ཉིད་བྱང་ཆུབ་ཀྱི་རྟེན་ཡིན་ན་ནི། རྟེན་བའི་གནས་འགྱུར་རྣམ་པ་ཐམས་ཅད་དུ་འཐད་པ་མ་ཡིན་ཏེ། རྒྱུ་འབྲས་དང་སྤང་གཉེན་ཕྱིན་ཅི་ལོག་ཏུ་གྱུར་པའི་ཕྱིར་རོ། །ཐེག་པ་ཆེ་ཆུང་གི་གནས་འགྱུར་གྱི་ཁྱད་པར་འདི། ཐེག་བསྡུས་ལས་ཀྱང་། གྱུར་བ་དམན་བ་ནི་ཉན་ཐོས་རྣམས་ཀྱི་སྟེ། གང་ཟག་ལ་བདག་མེད་པར་རྟོགས་པ་དང་། འཁོར་བ་ལ་ཤིན་ཏུ་རྒྱབ་ཀྱི་ལྟས་པས་འཁོར་བ་གཏོང་བའི་ཕྱིར་རོ། །གྱུར་པ་རྒྱ་ཆེན་པོ་ནི་བྱང་ཆུབ་སེམས་དཔའ་རྣམས་ཀྱི་སྟེ། ཆོས་ལ་བདག་མེད་རྟོགས་ཤིང་། དེ་ལ་ཉེ་བར་མཐོང་བས་ཀུན་ནས་ཉོན་མོངས་པ་སྤོང་ཞིང་། དེ་ཡོངས་སུ་མི་གཏོང་བའི་ཕྱིར་རོ། །ཞེས་བྱུང་ངོ་། །གནས་གྱུར་མེད་པའི་ཉེས་པ་བསྟན་པའོ། །བཅུ་པ་ཕན་ཡོན་ལ་འཇུག་པ་བཤད་པ་ནི། ཕན་ཡོན་ལ་འཇུག་པ་ནི་གནས་ཡོངས་སུ་གྱུར་པ་ཡོད་ན། དེ་ལས་བཟློག་པས་ཕན་ཡོན་རྣམས་པ་ཉིད་ཡིན་པར་རིག་པར་བྱའོ། །ཞེས་གསུངས་ཏེ། ཕན་ཡོན་བཞི་ནི་རྟེན་ཆོས་ཀྱི་སྐུ་ལ་བརྟེན་པའི་དཀར་པོའི་ཆོས་འཕེལ་ཞིང་རྒྱས་ན། ཉོན་མོངས་པའི་སྒྲིབ་པ་གཏན་མི་འབྱུང་པའི་ཕན་ཡོན་དང་། ལམ་གྱི་བདེན་པ་ཟག་མེད་ཀྱི་ཆོས་དེ། ཆོས་སྐུ་འགྲུབ་པའི་རྒྱུར་འཐད་པའི་ཕན་ཡོན་དང་། སྒྲིབ་པ་ཀུན་བརྟགས་གློ་བུར་བར་མཐོང་བས་གང་གང་སྤངས་པས་དེའི་འབྲས་བུ་འགྲུབ་པ་ཡོད་པས་མྱ་ངན་ལས་འདས་པའི་མཐར་ཐུག་གཅིག་ཀྱང་གནས་སྐབས་གང་ཟག་གསུམ་གྱི་རྣམ་གྲོལ་འཐད་པའི་ཕན་ཡོན་དང་། དེས་ན་བྱང་ཆུབ་པ་གསུམ་ཡང་འཐད་པས་ཐེག་གསུམ་འགལ་བ་མེད་པའི་ཕན་ཡོན་དེ། རྣམ་པ་བཞི་པོ་དེ་རང་བཞིན་པ་ལ་དྲི་མ་གློ་བུར་བ་བསལ་ཏེ་གནས་གྱུར་པ་ཡོད་ན་འཐོབ་ལ། མེད་ན་མི་འབྱུང་བས་གནས་གྱུར་ཡོད་པའི་ཕན་ཡོན་དུ་རིག་པར་བྱའོ། །དེ་ལྟར་གསུངས་པའི་རྣམ་པ་བཅུས་གནས་པ་འདི་ཐམས་ཅད་ཀྱི་དོན་བསྡུས་ན། མདོ་སྡེ་རྒྱན་དང་། རྒྱུད་བླ་མ་དང་། ཐེག་བསྡུས་ལས་གསུངས་པ་ཐམས་ཅད་ཀྱང་འདི་ཙམ་དུ་འདུ་སྟེ། ཡང་དག་མིན་བས་ཡང་དག་སྒྲིབ། བྱིས་པ་རྣམས་ལ་ཀུན་ཏུ་སྣང་། བྱང་ཆུབ་སེམས་དཔའ་དེ་བསལ་ནས། །ཡང་དག་ཉིད་ནི་ཀུན་ཏུ་སྣང་། །དོན་མེད་པ་དང་དོན་ཡོད་དག །མི་སྣང་སྣང་བར་ཤེས་པར་བྱ། །དེ་ནི་གནས་གཞན་གྱུར་པ་སྟེ། །འདོད་དགུར་སྤྱོད་ཕྱིར་ཐར་པ་ཡིན། །ཞེས་བྱ་བ་ནི་ངོ་བོ་བསྟན་པ་ཡིན་ལ། དེ་ལ་ཞུགས་པ་དང་ཐོབ་པས་ཅི་ལྟར་འགྱུར་ཞེ་ན། འཁོར་བ་དང་ནི་མྱ་ངན་འདས། མཚུངས་པར་ཤེས་པ་ནམ་སྐྱེ་བ། །དེ་ཚེ་དེ་ཕྱིར་དེ་ལ་ནི། །འཁོར་ཉིད་མྱ་ངན་འདས་པར་འགྱུར། །དེ་ཡི་ཕྱི་ན་འཁོར་བ་ནི། །གཏོང་བ་མ་ཡིན་མི་གཏོང་མིན། །དེ་ཕྱིར་མྱ་ངན་འདས་པ་ཡང་། །ཐོབ་པ་མ་ཡིན་མི་ཐོབ་མིན། ཞེས་གསུངས་པ་ཡིན་ནོ། །དེ་ལྟར་གནས་ཡོངས་སུ་གྱུར་པ་ཐ་དག་བཤད་ནས། ད་ནི་དཔེས་བཤད་ཅིང་བསྟན་ཆོས་ཀྱི་དོན་བསྡུ་བ་ལ་གསུམ་སྟེ། མེད་པ་སྣང་བའི་དཔེ་དང་། གནས་གྱུར་པའི་ངོ་བོ་མི་འགྱུར་བའི་དཔེ་དང་། རྫོགས་པར་བསྟན་པའོ། །དང་པོ་ནི། མེད་པའི་ཆོས་སྣང་བའི་དཔེ་ནི། སྒྱུ་མ་དང་རྨི་ལམ་ལ་སོགས་པ་ཡིན་ནོ། །ཞེས་གསུངས་ཏེ། ཅི་ལྟར་སྒྱུ་མས་སྤྲུལ་པའི་རྟ་གླང་ལ་སོགས་པ་སྣང་བ་དེ་ཁོ་ན་ལྟར་ནི་ཡོད་པ་མ་ཡིན་ལ་མེད་པར་སྣང་བ་ལྟར་ཀུན་བརྟག་ནི་སྣང་ཡང་མེད་པར་ཤེས་པར་བྱའོ། །ཤིང་དང་རུས་པ་དང་། སྔགས་ལ་སོགས་པའི་རྐྱེན་བཞིན་དུ་གཞན་དབང་གི་རྐྱེན་སྣང་ཡང་དེར་བདེན་པ་ནི་མེད་དེ། རྣམ་པར་རིག་པ་ཙམ་ཉིད་དོ། །དོན་འདི་ནི། མདོ་སྡེ་རྒྱན་ལས་ཀྱང་། ཅི་ལྟར་སྒྱུ་མ་དེ་བཞིན་དུ། །ཡང་དག་མ་ཡིན་ཀུན་རྟོག་བརྗོད། །སྒྱུ་མའི་རྣམ་པ་ཅི་ལྟ་བར། །དེ་བཞིན་གཉིས་སུ་འཁྲུལ་པར་བརྗོད། ཞེས་གསུངས་སོ། །དེ་བཞིན་དུ་རྨི་ལམ་གྱི་ཡུལ་ཡང་། རང་གི་རྣམ་པར་རིགས་པ་ཙམ་ཉིད་ཡིན་པས། བདེན་པ་མི་ལ་སོགས་པ་སྣང་ཡང་གཞན་དུ་མེད་དོ། །དེ་བཞིན་དུ་སྨིག་རྒྱུ་དང་། བྲག་ཆ་དང་། ཆུ་ཟླ་དང་། །འཇའ་ཚོན་དང་། རབ་རིབ་སྤྲུལ་པ་རྣམས་ཀྱང་སྣང་ཡང་དེར་བདེན་པ་མ་ཡིན་པ་ཉིད་དོ། །གནས་གྱུར་པའི་ངོ་བོ་མི་འགྱུར་བ་ནི། གནས་ཡོངས་སུ་གྱུར་པའི་དཔེ་ནི། ནམ་མཁའ་དང་། གསེར་དང་། ཆུ་ལ་སོགས་བ་བཞིན་ནོ། །ཞེས་པ་སྟེ། དཔེར་ན་ནམ་མཁའ་ནི་རང་བཞིན་གྱིས་དག་པ་ཁོ་ན་ཡིན་པས། ཁུག་རླངས་ལ་སོགས་པའི་རྐྱེན་གྱིས་ནམ་མཁའ་མ་དག་གོ །ཞེས་བྱ་བ་དང་། དེ་བྲལ་ཞིང་དྭངས་པ་དག་གོ་ཞེས་འཇིག་རྟེན་ན་དམིགས་ཀྱང་ནམ་མཁའི་རང་བཞིན་འགྱུར་བས་ཁས་བླང་དུ་ཡང་མི་རུང་ལ། རང་གི་ངོ་བོ་དག་ཅིང་སྟོང་པ་འདུས་མ་བྱས་པ་ལ། རང་ལས་རང་དག་པ་དང་། གཞན་ལས་དག་པ་ཡང་མི་རུང་མོད་ཀྱང་། ཐ་སྙད་ཙམ་དེ་འབྲེལ་པའི་བློ་འཁྲུལ་པ་དག་ནམ་མཁའ་དག་པ་དང་མ་དག་པར་འཛིན་པ་ནི་ནོར་བ་ཁོ་ནའོ། །དེ་བཞིན་དུ་ཡོངས་སུ་གྲུབ་པའི་ཆོས་ཉིད་རང་བཞིན་གྱི་དག་པ་ལ། རྣམ་པར་རྟོག་པའི་ཁུག་རླངས་དང་བྲལ་བ་ལྟར་སྣང་ཡང་ཡོངས་གྲུབ་འགྱུར་བར་ཁས་མི་བླང་ཞི་བདག་གཞན་དང་གཉིས་ཡིན་གཉིས་མ་ཡིན་དུ་སྐྱེ་འགག་མེད་པ་ཁོ་ན་ཡིན་ནོ། །དེ་བཞིན་དུ་གསེར་ཡང་བཟང་པ་ཉིད་དུ་གནས་པ་ལ་དྲི་མས་འགྱུར་བ་མ་ཡིན་བ་དང་། ཆུ་ཡང་དང་ཞིང་བརླན་པ་ཉིད་དུ་གནས་པ་ལ་རྙོག་མ་ནི་སའི་རྫབ་དང་འབྲེལ་ཀྱང་ངོ་བོ་འགྱུར་བ་ཡང་མ་ཡིན་བ་ལྟར། ཕྱིན་ཅི་མ་ལོག་པའི་ལམ་དང་དཀར་བའི་ཆོས་ཀྱང་དེ་མི་ཤེས་པའི་རྟོག་པས་དྲི་མ་དང་རྙོག་མ་ཅན་དུ་འགྱུར་བར་ཟད་ཀྱིས། ཟག་པ་མེད་པའི་ཆོས་དེ་དག་འགྱུར་བར་ཁས་མི་བླང་ངོ་། །དེའི་ཕྱིར་རང་བཞིན་གྱིས་འོད་གསལ་བའི་དྲི་མ་མེད་པ་ནི་འདུས་མ་བྱས་ལ་འགྱུར་བ་མེད་པ་ཉིད་དོ། །དེས་ན་གནས་ཡོངས་སུ་གྱུར་པའི་ཐ་སྙད་ཀྱིས་བརྗོད་ཀྱང་ཆོས་ཉིད་ནི་རྟག་པ་ཞེས་ཀྱང་བྱའོ། །སོགས་པའི་སྒྲས་ནི། པད་མའི་སྦུབས་ན་སངས་རྒྱས་ཡོད་པ་དང་། སྦྲང་མའི་ཁྲོད་ན་སྦྲང་རྩི་ཡོད་པ་དང་། སྦུན་མའི་ནང་ན་འབྲུ་དང་། མི་གཙང་པའི་ནང་གི་གསེར་དང་། སའི་ནང་ན་གཏེར་དང་། ཤིང་འབྲས་ལས་ཤིང་དང་། གོས་རུལ་གྱི་ནང་ན་རིན་པོ་ཆེའི་སྐུ་དང་། མི་མོའི་ལྟོ་བ་ན་འཁོར་ལོ་སྒྱུར་བ་དང་། ས་འདམ་གྱི་ནང་ན་གསེར་གྱི་སྐུ་ལྟ་བུ་རྣམས་ཀྱང་ཡིན་ཏེ། འདོད་ཆགས་དང་། ཞེ་སྡང་དང་། གཏི་མུག་བག་ལ་ཉལ་གསུམ་དང་། ཀུན་ནི་ལྡང་བ་དྲག་པོ་དང་བཞི་ནི་འཇིག་རྟེན་གྱི་ལམ་བསྒོམ་པས་སྤང་བྱའོ། །མ་རིག་བག་ཆག་ཀྱིས་ནི་ཤེས་བྱའི་གནས་རྟོགས་པའི་ཤེས་པས་སྤང་བྱའོ། །མཐོང་སྤངས་ནི་མཐོང་བའི་ལམ་གྱིས་སྤོང་བའོ། །བསྒོམ་སྤངས་ནི་བསྒོམ་པས་སྤོང་བའོ། །མ་དག་པའི་སའི་ཤེས་སྒྲིབ་ནི། མཉམ་རྗེས་ཀྱི་ཡེ་ཤེས་གཉིས་ཀྱིས་སྤོང་བའོ། །དག་པའི་ཤེས་སྒྲིབ་ནི་རྡོ་རྗེ་ལྟ་བུས་སྤོངས་ཏེ། སངས་རྒྱས་ཀྱི་སྙིང་པོ་དང་། ཆོས་ཀྱི་རོ་དང་། དོན་གྱི་སྙིང་པོ་དང་། རང་བཞིན་འོད་གསལ་བ་དང་། འགྱུར་བ་མེད་པ་དང་ཡེ་ཤེས་རྒྱས་པ་དང་། ཆོས་སྐུ་དང་། ལོངས་སྐུ་དང་། སྤྲུལ་སྐུ་རྣམས་ནི་རྣམ་པར་དག་པའི་ངོ་བོ་མི་འགྱུར་བ་ལྷུན་གྱིས་གྲུབ་པ་སྟེ། འདི་རྣམས་ནི་རྒྱུད་བླ་མ་དང་། སྙིང་པོའི་མདོ་ལས་བྱུང་ངོ་། །འདི་ལ་བསལ་བྱ་ཅི་ཡང་མེད། བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གི་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་པ་མིན། །ཞེས་སྒྲོ་འདོགས་པ་དང་སྐུར་པའི་མཐའ་ལས་གྲོལ་བའི་རྣམ་པ་ཀུན་ཀྱི་མཆོག་དང་ལྡན་པའི་སྟོང་པ་ཉིད་ཀྱི་མཚན་ཉིད་བསྟན་པ་ཡིན་ནོ། །རྫོགས་པར་བསྟན་པ་ནི། ཆོས་དང་ཆོས་ཉིད་རྣམ་པར་འབྱེད་པ། མགོན་པོ་འཕགས་པ་བྱམས་པས་གསུངས་པ་རྫོགས་སོ།། །།ཞེས་ཆོས་ནི་གཉིས་དང་ཅི་ལྟར་མངོན་བར་སྣང་བ་དང་། ཆོས་ཉིད་ནི་དེ་བཞིན་ཉིད་རྣམ་པར་འབྱེད་པ་བསྟན་པའོ།། །།མ་ཕམ་རྒྱལ་བས་སྙིགས་དུས་འགྲོ་བ་ལ། །ཐུགས་རྗེས་བསྟན་པའི་སྙིང་པོ་གསལ་མཛད་ཕྱིར། ཆོས་དང་ཆོས་ཉིད་རྣམ་པར་འབྱེད་པ་མཛད། །རིག་ཅན་རྣམས་ཀྱིས་དེ་ལ་འཇུག་ཕྱིར་རོ། །བདག་འདྲ་བླུན་པོའི་སྤྱོད་ཡུལ་མ་ཡིན་ཀྱང་། །ཐོགས་མེད་ཀླུ་སྒྲུབ་དགོངས་པའི་ངག་དོན་ལ། །བརྟེན་ནས་ཟབ་མོ་རྣམ་པར་འགྲེལ་པ་བྱས། །དགེ་བས་མཐའ་འབྲལ་དོན་ལ་འཇུག་པར་ཤོག །ཆོས་དང་ཆོས་ཉིད་རྣམ་པར་འབྱེད་པ་རྒྱས་པར་འགྲེལ་པ་རྣམ་པར་བཤད་པའི་རྒྱན་ཅེས་བྱ་བ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རྗེས་སུ་བཟུང་བ། རང་བྱུང་རྡོ་རྗེས། རང་ཉིད་ཀྱིས་སྣང་བར་བྱ་བ་དང་། དགེ་བའི་བཤེས་གཉེན་མཁས་གྲུབ་དུ་མས་བསྐུལ་བ་དང་། ཁྱད་པར་དུ་ཡང་། དགེ་བའི་བཤེས་གཉེན་ཀུན་དགའ་བྱམས་པས་བསྐུལ་བ་ལ་བརྟེན་ནས་གསལ་བར་བྱས་པའོ། །འདི་ནི་པཎ་ཊི་ཏ་མ་ཧ་ཛྙྱ་ན་དང་། བློ་ལྡན་ཤེས་རབ་ཀྱིས་བསྒྱུར་བའོ། །སྤྲེལ་ལོ་ཟླ་བ་དང་པོ་ལ་བདེ་ཆེན་དུ་མཛད་པའོ། །ཱ། ཞུས་སོ།།

Notes[edit]

↑ © Karma Lekshey Ling, Post Box 8435, Sita Paila-9, Swayambhu, Kathmandu, Nepal.
http://www.leksheyling.net
http://www.dharmadownload.net

[1] © Karma Lekshey Ling, Post Box 8435, Sita Paila-9, Swayambhu, Kathmandu, Nepal.
http://www.leksheyling.net
http://www.dharmadownload.net

[1]

ཆོས་དང་ཆོས་ཉིད་རྣམ་པར་འབྱེད་པའི་བསྟན་བཅོས་རྣམ་པར་བཤད་པའི་རྒྱན་ཅེས་བྱ་བ་བཞུགས།

Notes[edit]

Navigation menu

Search