Ngb-pt-0583-vol-06-text
Front
Body
རྒྱ་གར་སྐད་དུ། བུད་དྷ་ཀ་ར་ཡ། བོད་སྐད་དུ། སངས་རྒྱས་ཀྱི་ཞལ་ཆེམས། །སྟོན་པ་རྡོ་རྗེ་འཆང་ཆེན་ང་། །སྟག་སྤྱད་རི་ལ་ཏིང་ངེ་འཛིན། །ལོ་ལྔ་འབྲུག་གམ་གཉིས་བཞུགས་སོ། །དེ་ནས་འགྲོ་བའི་དོན་ལ་བཞེངས། །ཚེ་ལོ་ལྔ་སྟོང་ཐུབ་པའི་དུས། །ལྷོ་ཕྱོགས་བྱ་རྒོད་ཕུང་པོའི་རི། །ཉན་ཐོས་རྣམས་དང་ཡིད་འདྲེས་ཕྱིར། །རྒྱལ་པོ་ཛུ་ཞེས་བྱ་བའི་ཁབ། །ལྷོ་ཕྱོགས་རྒྱང་གྲག་གཅིག་གི་ས། །ཕ་ནི་རྒྱལ་པོ་སེང་གེ་བཟང་། །མ་ནི་མཛས་མ་འོད་ལྡན་འབུམ། །ཏིང་ངེ་འཛིན་ལས་སྐུ་འཁྲུངས་པ། །གསེར་འོད་དམ་པ་བྱ་བར་གྲགས། །ཉན་ཐོས་རྣམ་པའི་གདུང་བ་གཅད། །གླེགས་བམ་ཞུ་མ་འདི་གཏད་དོ། །ཨེ་མ་ཧོ། །སྐད་ཅིག་རྫོགས་སངས་རྒྱས་འདོད་ན། །ལུས་ངག་ཡིད་གསུམ་བྱ་བ་བཏང་། །ཤེས་པ་རྩེ་གཅིག་དྲང་ལུས་གཅུན། །འཕྲོ་འདུ་བྱུང་ན་དེ་ཉིད་ལྟ། །བྱུང་གནས་འགྲོ་གསུམ་བརྟགས་པས་ཤེས། །འདུག་སྟངས་གསུམ་དང་ལྡན་པ་ན། །དབྱིངས་ཀྱིས་ནང་ན་འོད་ཀྱིས་ཁྱིམ། །འགྱུར་དེ་ཡེ་མཉམ་ཆེན་པོ་ནི། །སངས་རྒྱས་སེམས་ཅན་ཐམས་ཅད་ལ། །བྱས་པ་མེད་པར་ཡེ་མཉམ་གནས། །འདི་ཉིད་སུ་ཡི་རྟོགས་པའི་མི། །རང་རིག་ངོ་བོ་རྟོགས་པའོ། ཁོ༑་ལོ་ཀ་ན་བདུན་པ་འདི། །ཐུགས་རྗེ་དྲན་སངས་རྒྱས་པ་སྟེ། །སྐལ་ལྡན་བུ་ལ་རིམས་ཀྱིས་གཏོད། །སྐལ་མེད་རྣམས་ལ་མ་ཉེ་ཞིག །སྔགས་ཀྱི་སྲུངས་མས་ཐུབ་པར་སྲུངས། །ས་མ་ཡ། རྒྱ་རྒྱ་རྒྱ། གཏེར་རྒྱ།སྦས་རྒྱ། དམ་རྒྱའོ།། །། རྒྱ་གར་སྐད་དུ། བུརྙ་དྷརྨ། བོད་སྐད་དུ། སངས་རྒྱས་ཀྱི་ཆོས་ཚིག །དེ་ནས་ཚེ་ལོ་སྟོང་ཚོའི་དུས། །སོག་པོ་གཡུ་ཡི་གནས་མཆོག་ཏུ། །བྱང་ཆུབ་