Ngb-pt-0267-vol-03-text
Front
Body
རྒྱ་གར་སྐད་དུ་ཡ་མ་ཀྭ་ལ་བ་ཏྲ་ནི་ལ་ཏནྟྲ། བོད་སྐད་དུ། གཤིན་རྗེ་ནག་པོ་ཆུ་ཐིག་སྔོན་མོའི་རྒྱུད་ཅེས་བྱ་བ། བཅོམ་ལྡན་འདས་གཤིན་རྗེའི་གཤེད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། སྔོན་གྱི་དུས་ན་བྱང་ཆུབ་སེམས་དཔའི་གནས། ཤིང་དྲུང་རབ་ཏུ་དགའ་བའི་ཚལ་ན། བཅོམ་ལྡན་འདས་མི་གཡོ་བའི་ཏིང་ངེ་འཛིན་ལ་སྙོམས་པར་ཞུགས་པ་ལ། བདུད་དང་ལྷ་བྱིན་གྱིས་མུ་སྟེགས་ལོག་ལྟའི་སྦྱོར་བ་བྱས་པའི་ཚེ། བཅོམ་ལྡན་འདས་ཀྱི་ཐུགས་ཀྱི་འོད་ཟེར་ལས་ལྷོ་ཕྱོགས་རི་བོ་རྩེ་དམར་ནག་འཁྱིལ་བའི་དུར་ཁྲོད་ཀྱི་དབུས་ན། དུར་ཁྲོད་ཀྱི་མ་མོ་དང་། གཤིན་རྗེའི་གནས་ན། གཤིན་རྗེ་ནག་པོ་འཆི་བདག་འཆར་ཀ་ནག་པོ་བྱ་བ་དེ་རབ་ཏུ་ཁྲོ་བར་འབར་བས་བྱེད་པའི་ཏིང་ངེ་འཛིན་ལ་གནས་པ་དེ་ལ་ཏིང་ངེ་འཛིན་གྱིས་བསྐུལ་བ། སྤྱན་གྱི་འོད་ཟེར་དང་། ཐུགས་ཀྱི་སྦྱོར་བ་བཀྱེ་སྟེ་བསྐྱོད་པས། བདུད་ལྷ་བྱིན་རབ་ཏུ་དངངས་སོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། འོད་སྲུངས་དང་། ཅང་ཤེས་ཀོའུ་དི་རྒྱ་ལ་སོགས་པས། བྲམ་ཟེ་མ་མྱ་ངན་ལས་འདས་མ་བྱ་བར་བསྐུལ་བས། བྲམ་ཟེ་མ་དེས། འཆི་བདག་ནག་པོ་འཆར་ཀ་ལ་འདི་སྐད་གསོལ་ཏོ། །ཀྱེ་བཅོམ་ལྡན་འདས་ཀྱིས་བདུད་ལྷ་བྱིན་མ་བཏུལ་བས། དུག་ལྔའི་རང་བཞིན་མུ་སྟེགས་ལོག་པའི་བལྟ་བ་ལ་ཞུགས་ནས། སངས་རྒྱས་ཀྱི་བསྟན་པ་ལ་གནོད་པ་འདི་ལ། བཅོམ་ལྡནའདས་ནི་ཐུགས་རྗེའི་ངང་ལས་མི་གཡོ། འཁོར་ན་གནས་པའི་སྡེ་བརྒྱད་ཀྱི་རང་བཞིན་ཐུགས་རྗེའི་སྤྱོར་བས་མ་ཐུལ་བས། །འདི་འདུལ་བའི་སྦྱོར་བ་མཛད་པར་ཞུ་ཞེས་གསོལ་པས། འཆི་བདག་ཆེན་པོ་དེས། འབར་བ་རྔམ་བྱེད་ཁྲོས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། ཐུགས་ཀ་ནས་འོད་ཟེར་ནག་པོ་བཀྱེ་བས། འཇིགས་པ་དྲག་པོའི་ཐོག་ཕབ་སྟེ། །དགའ་རབ་དབང་ཕྱུག་དང་། འདོད་པའི་རྒྱལ་པོ་དང་།བདུད་ལྷ་བྱིན་དཔུང་དང་གཡོག་ཏུ་བཅས་པ་རྣམས་འདར་ཞིང་སྔངས་ནས། བརྒྱལ་ཞིང་འགྱེལ་བར་གྱུར་ཏོ། །དེ་ནས་བཅོམ་ལྡན་འདས་རབ་ཏུ་དགྱེས་པའི་བརྡའ་མཛད་ནས། འཁོར་ཚེ་དང་ལྡན་པ་ཤཱ་རིའི་བུ་དང་།ཚེ་དང་ལྡན་པ་འོད་སྲུངས་དང་། ཅང་ཤེས་ཀོའུ་དི་རྒྱ་ལ་སོགས་རྗེས་སུ་ཡི་རང་ངོ་། །དེ་ནས་བཅོམ་ལྡན་འདས་ཀྱིས་འཇམ་དཔལ་གཤིན་རྗེ་འཆི་བདག་ནག་པོ་ལ་འདི་སྐད་ཅེས་གསོལ་ཏོ། །ལེགས་སོ་ལེགས་སོ་ཁྱོད་ལེགས་སོ། །བཅོམ་ལྡན་འཇམ་དཔལ་ཁྱོད་ལེགས་སོ། །འཆར་ཀ་ནག་པོ་ཁྱོད་ལེགས་སོ། །བྱང་ཆུབ་སེམས་དཔའ་ཁྱོད་ལེགས་སོ། །ཕྱི་རབས་ཀྱི་རྣལ་འབྱོར་པ་སངས་རྒྱས་ཀྱི་བསྟན་པ་སྲུང་བ་ལ་ཤོད་ཅིག །ཁྱོད་ཀྱིས་རབ་ཏུ་ཤོད་ཅིག །རབ་ཏུ་གནས་པར་གྱིས་ཤིག །ཅེས་བཀའ་སྩལ་ཏོ། །དེ་ནས་འཆིབདག གཤིན རྗེནགཔོ་དེས། དབུ་རི་རབ་ཀྱི་རྩེ་མོར་ཐལ་བས། སྟེང་ལྷའི་འཇིག་རྟེན་དབང་དུ་བསྡུས་སོ། །ཞབས་རྒྱ་མཚོའི་གཏིང་དུ་ཐལ་བས། འོག་ཀླུའི་འཇིག་རྟེན་དབང་དུ་བསྡུས་སོ། །ཕྱག་བར་སྣང་གི་ཁམས་སུ་བརྐྱང་བས། རི་རབ་དང་བར་སྣང་གི་ལྷ་སྲིན་སྡེ་བརྒྱད་དབང་དུ་བསྡུས་སོ། །བ་སྐྲུ་བྱེ་བ་ས་ཡ་ལས། འོད་ཟེར་བྱེ་བ་ས་ཡ་བཀྱེ་བས། བདུད་ཀྱི་དམག་དཔུང་རྡུལ་དུ་བརླག་གོ། །དེ་ནས་སངས་རྒྱས་བཅོམ་ལྡན་འདས་ལ་སྔགས་ཀྱི་རྣམ་པ་མང་པོ་ཕུལ་ལོ། །ཆུ་ཐིག་སྔོན་མོའི་རྒྱུད་ལས། གླེང་གཞིའི་ལེའུ་དང་པོའོ།། །།དེ་ནས་འཆི་བདག་ནག་པོས་བཀའ་སྩལ་པ། ཉོན་ཅིག་ང་ཡིས་བསྟན་པར་བྱ། །བྲམ་ཟེ་མཛེས་ལྡན་མ་ལ་བཤད། །སངས་རྒྱས་བསྟན་པ་བསྲུང་བ་ཡིས། །རྣམ་བཞིའི་འཁོར་བཅས་ཐམས་ཅད་ལ།ལོག་ལྟས་འཚེ་བའི་བདུད་རྣམས་ཀུན། །འདུལ་བའི་ཐབས་ནི་འདི་ལྟ་སྟེ། །བསྒྲུབ་དང་གསད་དང་བསྐང་བ་དང་། །བཟློག་དང་གནན་པའི་ལས་དག་བྱེད། །དང་པོ་བསྒྲུབ་པའི་ལས་དག་ལ། །དྲག་པོ་བསྒྲུབ་པའི་གནས་དག་ཏུ། །དཀྱིལ་འཁོར་བྲི་དང་རྫས་དགྲམ་དང་། །རྟེན་དང་དྲག་པོའི་སྐུ་བཅས་དང་། །བསྐྱེད་དང་དགུག་དང་སྤྲོ་བ་དང་། །བཟླས་དང་མཆོད་དང་ཏིང་འཛིན་དང་། །རྦད་ཅིང་ལས་ལ་སྦྱར་བ་དང་། །ཟོར་དང་ཐུན་དང་མདོས་དང་བཟློག །འཁོར་ལོ་བཅའ་དང་བསྲེག་པ་དང་། །ཁ་ཚར་གསོ་བའི་ལས་དག་དང་། །གནན་པ་དག་ཏུ་ཤེས་པར་བྱ། །དང་པོ་མཎྜལ་བྲི་བ་ནི། །དུར་ཁྲོད་ས་ལ་མཎྜལ་བརྩིག །ཟུར་གསུམ་འཁོར་ལོ་བྲི་བ་ནི། །ནག་པོའི་ཚོན་གྱིས་བྲི་བར་བྱ། །ཨེ་དྲུག་མཐིང་ནག་ཟླ་གམ་ཅན། །མེ་རི་འབར་བའི་ཅོད་པན་ཅན། །མཆོད་བཟློག་བསྲུང་དང་བསད་མནན་གྱི། །དེ་ལ་རྫས་ཀྱི་རྣམ་པ་ནི། །ཚང་བ་དག་ཏུ་དགོད་པར་བྱ། །དེ་དག་རིམ་དུ་དགོད་པ་ནི། །དབུས་སུ་སྐུ་རྟེན་དགོད་པར་བྱ། །དུར་ཁྲོད་ས་ལ་འཆི་བདག་ཉིད། །དྲག་པོའི་ཆས་དང་ལྡན་པར་བྱ། །བསྲུང་ན་བུམ་པ་མཆོད་རྟེན་ཅན། །བཟློག་ན་མཆོད་རྟེན་རབ་གནས་ཅན། །གསོད་ན་སྤུ་གྲི་སྦྲུལ་ཞགས་ཅན། །གནན་ན་མཆོད་རྟེན་དེ་བཞིན་ནོ། །འཁོར་ལོ་བཅས་དང་ལྡན་པ་ནི། །སྲུང་བའི་འཁོར་ལོ་སྤྱི་བོའི་གཙུག །བཟློག་པའི་འཁོར་ལོ་སྙིང་ག་སྟེ། །བསད་པའི་འཁོར་ལོ་ལྟེ་བ་སྲ །མནན་པའི་འཁོར་ལོ་གསང་བ་སྲ །རིགས་བཞི་སྦྲུལ་གྱི་རྒྱན་ཆར་ལྡན། །ས་སྟེང་ས་འོག་གོང་མའི་གནས། །ས་བླའི་ཚོགས་རྣམས་འདུལ་བའི་ཕྱིར། །སྤྱི་གཙུག་རལ་པ་གྱེན་དུ་བརྫེས། །ས་བླ་འདུལ་ཕྱིར་ཡན་ལག་ལ། །གང་ལ་དམིགས་པའི་རྟེན་དང་ལྡན། །ས་འོག་འདུལ་ཕྱིར་མཇུག་མ་སྦྲུལ། །རི་རབ་ཚུལ་འདྲའི་གྲུ་གསུམ་སྟེ། །གྲུ་གསུམ་ནང་དུ་དམིགས་པའི་མིང་། །ཐོད་པ་སྦྲམ་པོར་དུག་ཆུ་བླུག །ནང་དུ་བསད་པའི་འཁོར་ལོ་ནི། །གཡས་བསྐོར་གཡོན་བསྐོར་ཁ་སྦྱོར་ལ། །ཚོན་སྐུད་དག་གིས་རྒྱ་གྲམ་བཅིང་། །དེ་ཡི་སྟེང་དུ་རྟེན་དང་ལྡན། །དེ་ཡི་ཕྱོགས་བཞིར་ཕུར་པ་བཞི། །འཆི་བདག་ནག་པོའི་སྤྲུལ་པ་ནི། །བསྡེ་ནག་པོ་སྤྱི་གཙུག་སྤྲུལ། །བོན་པོ་སྔོན་པོ་ལྐོག་མའི་འོག །ཞང་བློན་ནག་པོ་ལྟེ་བར་སྤྲུལ། །མོན་པ་ནག་པོ་ཐུགས་ཀ་ནས། །སྤྲུལ་པའི་སྲས་བཞི་ཙར་གྱིས་སྤྲུལ། །དེ་ལ་བསྐོར་ཏེ་དེ་ཡི་གནས། །མ་གཤིན་ལྷ་ཚོགས་རྩང་གིས་དྲངས། །གཏོར་མ་ཆེན་པོའི་དབུས་སུ་ནི། །འཆི་བདག་ཞལ་ཕྱུང་དཔལ་བཤོས་དང་། །ཉི་ཤུ་རྩ་གཅིག་གྲངས་དང་བཅས། །དེ་ཡི་སྤྱན་སྔར་དགོད་པར་བྱ། །འབྲུ་ཟན་ནག་པོ་དེ་རྣམས་ལ། །ཀོང་བུ་ཟུར་གསུམ་རྩང་དང་བཅས། །སྡོང་གཅིག་མ་དང་མེ་རེག་མའི། །འཕངས་རྩེ་རྩང་དང་བཅས་པ་ཡི། །དྲག་པོའི་ཀོང་ཟོར་དུས་སུ་བསྟན། །ཟོར་གྱི་རྣམ་པ་གྲངས་སུ་དགོད། །ཆུ་ཐིག་སྔོན་མོའི་རྒྱུད་ལས། བཅའ་གཞི་བསྟན་པའི་ལེའུ་གཉིས་པའོ།། །།འདི་ཡི་ཏིང་འཛིན་བསྟན་པ་ནི། །བདག་བསྐྱེད་པ་དང་གཞན་བསྐྱེད་པ། །འཁོར་བསྐྱེད་པ་དང་གསུམ་དུ་འདོད། །དེ་ལ་དང་པོ་བདག་བསྐྱེད་པ། །མི་དམིགས་པ་དང་གསལ་བ་དང་། །ཧུ༷་གི་རང་བཞིན་གསལ་བ་དང་། །ཡ༷་དང་ར༷་དང་བ༷་དང་ལ༷། །དེ་བྱུང་རླུད་དང་མེ་དང་ཆུ། །ས་དང་རི་རབ་དེ་བཞིན་ཏེ། །རྒྱུ༷་ལས་གཞལ་ཡས་ཁང་དུའོ། །ཐོད་པ་རྩིབས་དང་ཞིང་ཆུང་བརྩིག །ཀ་བ་བཞི་ལ་ལྕམ་གདུང་དང་། །དྲལ་གྲབ་བརྐྱང་པ་ཞིང་ལས་བྱས། །སྦྲུལ་གྱི་འཕན་གདུགས་ཟ་ར་ཚགས། །ཁྲག་གི་ཞམ་ཆུ་འབབ་པ་ལ། །རྨིཐོང་ནས་ཉི་ཟླ་འཆར་བའོ། །དེ་ནས་འཁོར་ལོ་རྩིབས་དྲུག་ལ། །རྩིབས་བརྒྱད་མུ་ཁྱུད་སྒོ་དང་ལྡན། །མ་ཏྲངརོ་དང་གང་དམིགས་དེ། །ཆུ་གླང་སྟེང་དུ་ཉི་ཟླས་མཚན། །དེ་སྟེང་ཧུ༷་ལས་རྡོ་རྗེར་གྱུར། །ཨོ་སྙི༷༷྅༷༷བི་ཀྲི་ཏྭ་ན་ན་ཧུ༷་ཧུ༷་ཕཊ། ཅེས་པའི་སྒྲ་དང་བཅས་པ་ཡི། །ནག་པོ་ཞལ་གཅིག་ཕྱག་གཉིས་པ། །བེ་ཅོན་རལ་གྲི་འཁོར་ལོས་མཚན། །དགྲ་སྟ་སྡིགས་མཛུབ་འཕྱར་དང་གདེངས། །དབུ་སྐྲ་ཁམ་ནག་གྱེན་དུ་འཁྱིལ། །གླང་ཆེན་སྟག་དང་ཞིང་གིས་བརྒྱན། །སྦྲུལ་དང་ཐོད་པ་སྐམ་རློན་བརྒྱན། །བརྐྱང་བསྐུམ་བགྲད་པས་འབྱུང་པོ་གནོན། །ནག་མོ་མི་སྡུག་དགྱེས་པར་འཁྲིལ། །ཐོད་རློན་སྟོབས་དང་འ་ད་པའི་ཚུལ། །དེ་ཡི་མདུན་དུ་བསྐྱེད་པ་ནི། །འཆར་ཀ་ནག་པོ་སྦྲུལ་གྱི་མཇུག །སྤུ་གྲི་གདེངས་པའི་གདེངས་ཀ་ཅན། །གང་གང་རང་རང་ཆས་དང་ལྡན། །ཞལ་ནི་གང་དམིགས་དེ་རང་ངོ་། །རེ་མ་ཏི་དང་ལྡན་པ་ནི། །ནག་མོ་དྲེད་ཞོན་ཁྲམ་དང་རྐྱལ། །དེ་རྒྱབ་མ་མོ་བདུན་དང་ལྡན། །དཀར་མོ་མགྱོགས་བྱེད་ཁྱུང་ལ་ཞོན། །གནམ་གྱི་དཀར་མོ་དང་སྲིད་པའི་རྒྱལ་མོ་དང་། །སྦས་པའི་མ་མོ་གསུམ་དང་རྡོ་རྗེ་ཁྱུང་གཤོག་ཅན། །དཀར་མོ་ལན་ཕྲན་ཅན་དེ་ཁྱུང་ཤོན་བདུན། །མེ་ལོང་གཡོབ་དང་སེར་བ་འདྲིལ། །ལྷ་རྣམས་བཟློག་བྱེད་མ་མོ་བདུན། །གཡས་ན་མི་ནག་རྟ་ནག་བདུན། །གཡས་པ་དར་ནག་གཡོན་པ་ཤོ་རྡེའུ་འཕེན། །ནག་པོ་བཀྲག་མེད་ཡབ་རྗེ་ནག་པོ་དང་། །སོག་པོ་མི་ཟན་ལྕགས་ཀྱི་བེར་ག་ཅན། །ཁ་ལ་རུ་རྩེ་སྲིད་པ་ཁ་ལ་ཉུལ། །ཟངས་ཀྱི་བྱ་རུ་ཅན་དང་བདུན་པོ་ནི། །རེ་ལྡེ་ནག་པོ་བདུད་ཀྱི་བཤན་པ་ཡིན། །སྲིད་པ་ཕོ་རྒྱུད་རྐྱ་བདུན་བཟློག་པ་ཡིན། །གཡོན་གྱི་ཕྱོགས་ན་མ་མོ་བདུན་གནས་པ། །ཨེ་ཀ་ཛ་ཏི་ནག་མོ་བདུན་གནས་པ རེ་མ་ཛ་ལ་སོགས་ཏེ་མཆེད་བཞི་དང་། །ལྟོ་འཕྱངས་མ་དང་བལ་མོ་ནག་མོའི་ཚོགས། །ནད་རྐྱལ་ཁུར་ནས་དར་ནག་ལའུ་གསོལ། །རལ་བའི་གསེབ་ནས་ཁྲག་གི་བུ་ཡུག་འ་ས། །ཀླུ་རྣམས་ཟློག་བྱེད་མ་མོ་བདུན་ཡིན་ནོ། །ཕྱ་སངས་དང་ནི་ཏེལ་བ་དང་། །ཚར་དགུ་དང་ནི་ཡ་བ་ཏི། །འབྱུང་པོ་དམར་ནག་རྨིག་པ་དང་། །ཨ་བ་གླང་མགོ་ཆོས་ཀྱི་རྒྱལ་པོ་བདུན། །ཁྲམ་བམ་ནད་ཀྱི་རྐྱལ་པ་ཐོགས་པ་སྟེ། །རོ་ལངས་ལྟོ་འཕྱེའི་ཚོགས་རྣམས་བཟློག་པ་ཡིན། །བསྡེ་བོན་པོ་ཞང་བློན་མོན་པ་བཞི། །སྤྲུལ་པ་བཞི་ཡང་ཕྱོགས་བཞི་དག་ན་གནས། །རང་བཞིན་གསལ་བར་མོས་པ་བྱས། །ཡིག་འབྲུ་དག་ལས་མི་བསྐྱེད་རང་བཞིན་དྲག་པོའི་ཤུགས། །ཆུ་ཐིག་སྔོན་མོའི་རྒྱུད་ལས་བསྐྱེད་པའི་ལེའུ་སྟེ་གསུམ་པའོ།། །།དེ་ནས་དགུག་པའི་ཏིང་འཛིན་ནི། །བདག་གི་ཧུ༷་ལས་འོད་ཟེར་འཕྲོས། །རང་བཞིན་གནས་ནས་ཡེ་ཤེས་དགུག །བསྟིམས་ལ་མཆོད་པ་འབུལ་བ་ནི། །བདུད་རྩི་རཀྟ་གཏོར་མ་དང་། །གཉིས་སུ་མེད་པའི་གཏོར་མ་བྱ། །བདག་དོན་གཞན་དོན་གང་ལ་དམིགས། །དེ་ལ་གསོལ་བ་གདབ་ལ་མཆོད། །དེབཞིནགནསཔའིཆོ་ག་བྱ། །བསྟོད་པ་་་། །བྱ་ཞིང་དངོས་གྲུབ་བླང་། །ཆུ་ཐིག་སྔོན་མོའི་རྒྱུད་ལས། སྟིམ་བྱེད་སྦྱོར་བའི་ལེའུ་སྟེ་བཞི་པའོ།། །།དེ་ནས་དྲག་སྔགས་ཀྱི་སྦྱོར་བ་བསྟན་པ་ནི། ཨོ་དྷི༷་གི༷བི་ཀྲི་ཏྭན་ན་ཧུ༷་ཕཊ་གྲྭ་ཧྭ། ཨོ་ཨུ༷༷ཧུ༷་ཧེ༷༷། དྷི་ལ་ཨ་མོ་ཀ་དྷི་ཨ་མྲི་ཏ། རཀྟ་བ་ལིརྙ་ཁ་ཁ་ཁུ་ཧི། མཆོད་པ་འབུལ་བའི་སྔགས་སོ། ཁྲ་རི་སྨྱོ༷༷། མ་རི་སྦྱོ༷༷། ཁྲག་མ་མ་སྦྱོ༷༷། ཙི་རི་སྙིང་སྦྱོ༷༷། སྙིང་སྦྱོ༷༷། མ་རི་ཐོད་ཁྲག་ལ་ཛ༷༷། ཁྲག་རི་སྙིང་ལ་ཡ༷༷། སྤོ་ཏྲི་ཆོད༷༷། མུ་ལོ་ཆོད༷༷། ཤ་ལོ་ཆོད༷༷། ཤ་ལ་ཀྱིང་ཀྱིང་སྨྱོ༷༷། ས་མ་ཡ་ཨ་ཏི་པྲ་མ་ནི༷༷། པ་ར་དུ་ན་བཟློག༷༷། འཆར་ཀ་ནག་པོ་རྩ་བའི་དྲག་སྔགས་སོ། །ཨོ་གནམ་ཡེར་སྨྱོ༷༷། ས་ཡར་སྨྱོ༷༷། རྐྱང་ཡེར་སྨྱོ༷༷། རྐྱང་མོ་སྨྱོ༷༷། སེར་རྐྱང་སྨྱོ་སྨྱོ་སྨྱོ༷༷སྨྱོ༷༷། རྐྱང་ཡེར་སོད༷༷། མུ་ཡེར་སོད༷༷། མི་རེང་སོད༷༷། དགྲ་སྙིང་ལ་སྨྱོ་སྨྱོ༷༷། དཀར་མོ་བདུན་གྱི་སྔགས་སོ། །ཨོ་རུ་ལུ་རུ་ལུ་ཧ་ཧ་ཡསྒ་བ༷་རིལ་ཁྲག་ལ་རྦད༷༷། རུས་ལ་ཆེམས༷༷། དགྲ་སྙིང་ལ་སྨྱོ་སྨྱོ༷༷སྦྱོ་སྨྱོ༷༷སྨྱོ་སྨྱོ༷༷སྨྱོ༷༷། ནག་མོ་བདུན་གྱི་དྲག་སྔགས་སོ། །ཨོ་རུ་ལུ་རུ་ལུ་ཙ་པ་ལ་ཨག་ཤུག་མེ་སྨྱོ༷༷། ཛ་ཛ༷༷། ཡག་མོ་ཁ་ལ་ཁ་ཚེ་སྨྱོ༷༷། རག་མོ་ཁ་ལ་ཁ་ཚེ་སྨྱོ༷༷། ཡག་མོ་ཁ་ལ་ཁ་ཚེ་སྦྱོ༷༷། ཁ་ཚེ་ཙི༷༷། སྨྱོ༷༷སྨྱོ༷༷སྦྱོ༷༷སྨྱོ༷༷སྦྱོ༷༷སྨྱོ༷༷སྨྱོ༷༷།རུ་ལུ་རུ་ལུ་ནག་མོ་ཧ་ཧ་ཧུ༷༷༷། སྨྱོ༷༷སྨྱོ༷༷སྨྱོ༷༷སྨྱོ༷༷སྨྱོ༷༷སྤྱོ་སྨྱོ༷༷། མ་མོ་བདུན་དང་རོ་ལངས་བདུན་གྱི་སྔགས་སོ། །ཨོ་ཡ་མ་སྙིང་སྨྱོ༷༷། ཡ་མ་ཁྲག་སྨྱོ༷༷། སརྦ་སྒུ་ཏེ་སྨྱོ༷༷། ཡ་མ་ར་ཙ་སྨྱོ༷༷། ཡ་མ་ཐུ༷་ཐུ༷་སྨྱོ༷༷། དགྲ་སྙིང་ལ་སྨྱོ་སྨྱོ་སྨྱོ༷༷།ན༷། སརྦ་ཧྭ་པྲ་ཏི་ཧ་ཏྭ་བཱསྟི༷༷། དྷརྨ་ཏྭ་བ་སྙི་ནཱ༷༷༷། ཨ་ས་མརྙ་ཏོ་མརྙ༷༷། ཏྭ་བཱསྟི་ཤཱ་ས་ནི། ཧ་ར་ཧ་ར། སྨ་ར་སྨ་ར་ཁི། བི་ག་ཏ་རྭ་ག་བུརྙ་དྷརྨ་ཏྭ། ས་ར་ས་ར་ས་མ་པ་ལྭ། ཧ་ས་ཧ་ས་ཏྲ་ཡ་ཏྲ་ཡ་བྷ་ག་བཱན།མ་ཧྭ་བ་ར། ལཀྟཁེཛ་ལ་ཛ་ལ་ན་སྭ་ག་རེ་གྲྭ་ཧྭ། ཤཱ་རིའི་བུས་བྱིན་གྱིས་བརླབས་པའི་རིང་བསྲེལ་དབུལ་བའི་སྔགས་སོ། །ཨོ་ཡེ་དྷརྨུ་ཏེ་ཏུ་པྲ་རྒྱུ་ཝ། ཧེ་དུརྙེ་ཥ༷་ཏ་ཐུ་ག་ཏོ་རྒྱ་ཝང་ཏུ་ཏེ་ཝ་ད་ཏ་ཥརྩི་ཡོ་ནི་རོ་དྷ་ཨེ་ཝ༷་ལྷུ་དི་མཧྭ་བྲ མཎ༷༷སྲུ་྅༷། རྟེནའབྲེལ་འདི་འོད་སྲུངས་ཀྱིས་བྱིན་གྱིས་བརླབས་པ་རིང་བསྲེལ་དབུལ་བའི་སྔགས་ཏེ་གཡས་པའི་སྔགས་ཛོ། །ན་མ༷༷ཧྲི་དའ་སརྦ་ཏ་ཐུ་ག་ཏ་ཧ་ར་ཧ་ར་྅༷༷།འཅང་ཤེས་ཀོའུ་དི་རྒྱའི་རིང་བསྲེལ་གྱིསྔགས་ཏེ་གཡོན པའི་སྔགས་སོ། །བུརྙ་སྙི༷༷སྨྱོ༷༷། ཡ་བཱརྙ་ཀས་བྱིན་གྱིས་བརླབས་པའི་འཆར་ཀ་ནག་པོ་སྐེམ བྱེད་ཀྱི་ངན་སྔགས་སོ། །ཆུ་ཐིག་སྔོན་མོའི་རྒྱུད་ལས་སྔགས་བསྟན་པའི་ལེའུ་སྟེ་ལྔ་པའོ།། །།འཁོར་ལོ་དག་ལ་སྔགས་དང་ལྡན། །རྟེན་འབྲེལ་བཅུ་གཉིས་འཁོར་ལོ་དང་། །བསྲུང་བཟློག་བསད་དང་མནནཔའོ། །བྲི་བའི་ཐབས་ནི་འདི་ལྟ་སྟེ། །ཕྱི་ཡི་འཁོར་ལོ་འཁོར་ཡུག་གསུམ། །ནང་དུ་དུག་གསུམ་གྲུགསུམ་ལ། །བཱ་ར་ཡ་ཡི་ལིསྐོ་བྲི། །དེ་ལྟར་བསད་སྔགས་མིང་དང་སྤེལ། །དེ་མཐར་འཆར་ཀ་ཉིད་ཀྱི་སྔགས། །འཆར་ཀའི་འོག་ཏུ་རྟེན་འབྲེལ་ནི། །བཅུ་གཉིས་འཁོར་བ་ལུགས་སུ་གཞུག །མཐའ་མ་འཁྱིལ་བྱེད་གཉིས་ཀྱིས་བསྐོར། །དབུས་སུ་མིང་དང་རུས་དང་གཟུགས། །གསད་པའི་སྔགས་ནི་སྨྱུ་ར་ཡ། །གོང་རས་གསད་པའི་སྔགས་ཀྱིས་བསྐོར། །འཆར་ཀ་ནག་པོའི་ལྷོ་བར་རོ། །བཞི་པ་སྲུང་འཁོར་རྩིབས་བརྒྱད་ལ། །རྩིབས་བརྒྱད་དག་ལ་འཆར་ཀ་ཉིད། །བསྲུང་ན་གང་བསྲུང་གོང་རས་ལ། །རཀྟ་ཞེས་ནི་བྲི་བར་བྱ། །དབུས་སུ་གང་བསྲུང་མིང་དང་སྔགས། །སྙི༷༷ལྗོ༷༷ཞེས་པས་མཚན་པའོ། །གོང་རས་ཨུ་ལི་ཀྭ་ལི་དང་། །སྔགས་ནི་རཀྟ་ཅེས་པ་སྦྱར། །བཟློག་ན་བཟློག་ཅེས་བསྒྱུར་བ་དང་། །གོང་རས་བཟློག་པའི་སྔགས་ཀྱིས་བསྐོར། །དབུས་སུ་མིང་དང་རུས་དང་གཟུགས། །གསད་པའི་སྔགས་ནི་བཱ་ར་ཡ། །གོང་རས་གསད་པའི་སྔགས་ཀྱིས་བསྐོར། །མནན་པའི་སྔགས་ཀྱིས་མཐའ་མར་ནན། །སྲུང་བའི་འཁོར་ལོ་དར་ལ་བྲི། །བཟློག་ན་ཞིང་རས་དག་ལའོ། །གསད་པ་དུར་ཁྲོད་རས་ལ་བྲི། །མནན་པ་དུར་ཁྲོད་གཡམ་པ་ལའོ། །བྲི་དུས་སྔ་དྲོ་བསྲུང་བའོ། །བཟློག་པ་ཉི་མ་ཕྱེད་ལའོ། །གསད་པ་ཉི་རྒས་དག་ལའོ། །མནན་པ་ཐོ་རངས་ཁ་ནའོ། །ཆུ་ཐིག་སྔོན་མོའི་རྒྱུད་ལས་འཁོར་ལོ་བྲི་བའི་ལེའུ་སྟེ་དྲུག་པའོ།། །།འདི་ཡི་མདོས་སུ་བྱ་བ་ནི། །ཁོག་དོན་བཞི་རུ་ཤེས་པར་བྱ། །སྲུང་བའི་མདོས་དང་བཟློག་པའི་དང་། །བསད་པའི་མདོས་དང་མནན་པའི་སྟེ། །མ་ཏྲ༷་འབག་ཏུ་བཅའ་བ་དང་། །རཀྟརདམར་པ་བཀངབཡངརྭག །དྲག་དམ་མ་མོའི་བསྐང་བ་དང་། །བཅའ་བ་ལས་ཀྱི་མན་ངག་བྱ། །རི་རབ་བརྩིག་པ་བང་རིམ་ལྡན། །སྲུང་བ་དག་ལ་གླུད་བརྒྱ་དང་། །མ་གཤིན་བཤོས་བུ་བཅའ་བ་དང་། །བྱང་བུ་བདུན་གསུམ་ཉི་ཤུ་གཅིག །རླུད་གི་ཕྱོགས་སུ་གདབ་པ་དང་། །མཆོད་རྟེན་བཅའ་དང་མར་མེ་བཅའ། །འཁོར་ལོ་ལྟོ་བར་གཞུག་པའོ། །བཟློག་པ་འཆར་ཀ་འདྲ་བ་ལ། །ཀོང་ཟོར་བརྒྱའམ་ཉི་ཤུ་གཅིག །བཤོས་བུ་ཟུར་གསུམ་ཁྲག་དུག་ཅན། །མཚེ་དང་ཡུངས་ཀར་རྦབ་རྡོ་མཚོན། །འུར་རྡོ་ཐུན་དང་བཅས་པའོ། །གསང་བ་དྲག་པོ་དགྲ་ཡི་ཕྱོགས། །འཆར་ཀ་དེ་ལ་བསྟན་པ་དང་། །ཀོང་ཟོར་ཉི་ཤུ་རྩ་གཅིག་དང་། །ཁྲག་ཟོར་ཉི་ཤུ་རྩ་གཅིག་དང་། །ལིསྐོ་འོག་ཏུ་མནན་པ་དང་། །མ་མོའི་གཏོར་མ་ཟོར་དུ་བཅའ། །འཕངས་ནས་མནན་པའི་ལས་དག་བྱ། །གདོང་ཟོར་བྱས་ལ་མདོས་ཀྱིས་མནན། །འཆར་ཀའི་ཞལ་ཁ་བསྒྱུར་བར་བྱ། །མནན་པ་སྒོ་དྲུང་དག་ཏུ་བྱ། །མཆོད་རྟེན་བཞི་དང་བཅས་པའོ། །བཟློག་པ་འཆར་ཀ་མ་འགྱུར་བ། །སྲུང་ན་འཇམ་དཔལ་ཞལ་དུ་བྱ། །གསོད་ན་གླང་པོ་ཆེ་ཡི་ཞལ། །གནོད་ན་མ་ཧེའི་ཞལ་དུ་བྱ། །སྲུང་བ་རང་གི་གནས་ཁང་དུ། །མཆོད་པ་བྱ་ཞིང་གསོལ་བ་གདབ། །བཟློག་པ་ཁང་སྟེང་མཐོན་པོར་བྱ། །གསད་པ་གྲུ་གསུམ་ནང་དུའོ། །མནན་པ་ཆུ་མིག་ཤུལ་དུ་བྱ། །དྲག་པོ་མདོས་དེའི་ཕྱོགས་སུ་བཏང་། །རོལ་མོའི་བཅས་དང་ལྡན་བྱས་གཞུག །ཟོར་དང་བཅས་ཏེ་གཏང་བར་བྱ། །ཆུ་ཐིག་སྔོན་མའི་རྒྱུད་ལས། མདོས་ཀྱི་སྐོང་གི་ལེའུ་སྟེ་བདུན་པའོ།། །།དེ་ནས་ཡང་དག་བཤད་བྱ་བ་། །དང་པོ་སྲུང་བའི་ལས་ཀ་ནི། །འཆར་ཀའི་གཟུགས་བརྙན་ཕྱག་ཏུ་ནི། །ཚེ་བུམ་དེ་ཡི་ནང་དུ་ནི། །ཚེ་རྟེན་དཀར་གསུམ་མངར་གསུམ་དང་། །སྲུང་བའི་འཁོར་ལོ་སྔགས་དང་བཅས། །དབུས་སུ་གང་བསྲུང་མིང་དང་བཅས། །བུམ་པར་བཅུག་ལ་བཟླས་པ་དང་། །ནད་པ་ལ་སོགས་སྲུང་བྱེད་ན། །མཎྜལ་དཀར་པོའི་སྟེང་དུའོ། །གཏོར་མ་སྣ་ཚོགས་རིན་ཆེན་དང་། །བལ་ཚོན་སྣ་ལྔའི་སྲུང་སྐུད་བཅས། །ཡུངས་ཀར་སྔགས་ཀྱིས་ནད་པ་བསྐོར། །དེ་ནས་གཏོར་མའི་ནང་དུ་གཞུག །གཏོར་མས་མཆོད་ཅིང་བཟླས་པ་བྱ། །མཐའ་མ་བསྐོར་ཞིང་སྤྱིན་སྲེག་དང་། །ཀོང་ཟོར་འཕང་བ་ཀུན་ཀྱང་བྱ། །སྲེའུ་དག་ལ་གཏོར་མ་གཏང་། །རྟེན་འབྲེལ་སྔགས་ཀྱི་བུམ་པའི་ཆུས། །བཀྲུ་ཞིང་སྔགས་ཀྱི་སྦྱོར་བ་བྱ། །སེང་ལྡེང་ཕུར་པ་ལྷར་བསྐྱེད་ལ། །གྲུང་བའི་འཁོར་ལོ་སྔགས་དང་བཅས། །ཉུང་དཀར་བརྒྱ་དང་རྩ་བརྒྱད་ལ། །འབྲུ་བདུན་རེ་ལ་སྔགས་འབྲུ་བདུན། །རས་དཀར་ནང་དུ་གཏུམས་པ་དང་། །དེ་ལ་མཆོད་ཅིང་བཟླས་པ་དང་། །མདོས་ལོང་སྔགས་ཀྱིས་ཀོང་ཟོར་འཕང་། །མཛེ་བོ་དག་ལ་དཀར་གཏོར་བཅའ། །གྲུང་སྐུད་མདུན་པ་བརྒྱ་དང་ལྡན། །རིན་པོ་ཆེ་ཡི་བུམ་པ་མྲ །ཆུ་སྣ་བརྒྱ་དང་སྨན་སྣ་བརྒྱ། །རྟེན་འབྲེལ་སྔགས་ཀྱིས་བསྔགས་པ་གདགས། །ཕྱིང་དཀར་སྟེང་དུ་ཁྲུས་བྱའོ། །གུ་གུལ་བདུག་ཅིང་སྔགས་ཀྱིས་བྲབ། །སྦལ་སྦྲུལ་མང་པོའི་གཟུགས་བྱས་ལ། །བསྐོར་ཞིང་གཏོར་མའི་ནང་དུ་བྲུབ། །མདོས་ལོང་ཀོང་བུ་ཟོར་དུ་འཕོང་། །སེར་བ་དག་ནི་བསྲུང་བ་ན། །འཆར་ཀའི་སྐུ་དེ་མཆོད་ཁང་སྟེང་། །ཡང་ན་སེར་མཐོའི་རྩར་བཞག་ལ། །བཟློག་པའི་སྔགས་ཀྱི་འཁོར་ལོ་དང་། །ཕུར་པར་བཅས་པའི་མགུལ་དུ་ནི། །ཐལ་བ་དག་དང་ཉུང་དཀར་ལ། །བསྔགས་ལ་དེ་དང་མཐུན་པར་བྱ། །རིམས་ནད་གཅོད་ན་འཆང་ཀའི་སྐུ། །དམར་གཏོར་བལ་ཚོན་དར་ཚོན་དང་། ་་་དཀར་ཉུང་ནག་སྔགས་དང་བཅས། །ཕོ་མོའི་གཟུགས་དང་བཅས་པ་རྣམས། །ཀོང་ཟོར་བཅས་ལ་འཕང་བར་བྱ། །ཚོན་སྐུད་སྣ་ལྔའི་སྲུང་སྐུད་ལ། །སྔགས་ཀྱི་མདུད་པ་བརྒྱ་དང་ལྡན། །དེ་ནི་བསྲུང་བའི་མཆོག་ཏུ་འགྱུར། །ཡུལ་དང་ཁང་ཁྱིམ་ཕྱོགས་རྣམས་ཀུན། །དྲག་པོའི་རྫས་ཀྱིས་ཐུབ་པར་གྱུར། །གཏོར་མ་སྔགས་དང་བསྐུལ་བས་ཀྱང་། །སྡེ་བརྒྱད་ཀུན་གྱིས་མི་ཚུགས་སོ། །ཆུ་ཐིག་སྔོན་མོའི་རྒྱུད་ལས། སྲུང་བའི་ལེའུ་སྟེ་བརྒྱད་པའོ།། །།དེ་ནས་ཡང་དག་བཤད་པར་བྱ། །བཟློག་པ་བྱ་བའི་ལས་ཀ་ལ། །བཅས་ཀྱིས་བཟློག་དང་སྔགས་ཀྱིས་བཟློག །འཁོར་ལོས་བཟློག་དང་གཏོར་མས་བཟློག །མདོས་ཀྱིས་བཟློག་དང་ཟོར་གྱིས་བཟློག །སྤྱིན་སྲེག་དང་ནི་བདུན་དུ་བཤད། །བཅས་ནི་འཆར་ཀའི་འདྲ་འབག་ལ། །དུག་ཆུས་སྦྱངས་ལ་ཞལ་གདངས་པ། །ཕུར་པ་ལག་ཏུ་བསྲུང་བའོ། །ཁོ་ཡི་ཕྱོགས་སུ་ཁ་བསྟན་བྱ། །འཁོར་ལོས་བཟློག་པ་རྩིབས་བརྒྱད་ལ། །མིང་རུས་བཅས་པ་དབུས་སུའོ། །རྩིབས་ལ་རྩ་སྔགས་བཟློག་དང་བཅས། །གོང་རས་མིང་དང་བཟློག་ཅེས་བྲི། །མུ་ཁྱུད་བཟློག་པའི་སྔགས་དང་ལྡན། །བི་བྷ་ས་ཏྭ་རེ་མ་ཏི། །གཡས་སྐོར་བྱས་ཏེ་ཞིང་རས་ལ། །འཆར་ཀའི་ལྷོ་བར་བཅས་པའོ། །གཏོར་མའི་དབུས་སུ་འཆར་ཀའི་སྐུ། །གྲུ་གསུམ་དམར་པོ་དཔལ་བཤོས་དང་། ་་་དཀར་མཚེ་དང་ལྕགས་ཕྱེ་དང་། །དུག་ཁྲག་དག་གིས་བྲབ་པའོ། །མདས་ནི་འཆར་ཀའི་འཁོར་དང་བཅས། །མ་གཤིན་ཉི་ཤུ་རྩ་བརྒྱད་ཚོགས། །དམར་ནག་དར་དང་ཀོང་ཟོར་ཁྲག །གཏོར་མ་བལ་ཚོན་དར་ཚོན་དང་། །ཟོར་ནི་ཀོང་ཟོར་ཁྲག་ཟོར་དང་། །གཏོར་ཟོར་མདའ་ཟོར་འུར་རྡོ་དང་། །སླང་ཟོར་གཏོར་ཟོར་འཕང་བའོ། །སྦྱིན་སྲེག་འཆར་ཀའི་མདུན་དུ་བྱ། །སྔགས་དང་བསྐུལ་དང་རྫས་དང་བཅས། །ཉི་མ་ཕྱོགས་དང་དུས་དང་གྲངས། །ཡང་ནས་ཡང་དུ་བྱ་བའོ། །ཟོར་ཁ་བཟློག་ན་ཡུངས་ཀར་དང་། །ཁྲག་དུག་ཐོད་པའི་ནང་དུའོ། །རྩ་བའི་སྔགས་དང་གཏོར་ཟོར་སྔགས། །སྤེལ་ཞིང་སྤེལ་ལ་ལས་བཅོལ་བསྐུལ། །རྭ་ཧུ་ལ་ཡི་ཕྱོགས་དང་བསྟུན། །བྱལ་བཟློག་བྱེད་ན་གཏོར་མ་དང་། །འུར་རྡོ་རྡོ་ཐོད་འཕང་བར་བྱ། །འཆི་བ་བསླུ་ན་དཀར་གཏོར་དང་། །དམར་གཏོར་བཅུ་གསུམ་སྔགས་དང་བཅས། །ཆོས་སྟོན་བཅུ་གསུམ་སྔགས་དང་བཅས། །གཙུག་ཏོར་དྲི་མ་མེད་པ་དང་། །རྩ་སྔགས་བཟླས་ཤིང་རྩོལ་བ་བྱ། ལགངདམིག་བཟླདངགཛོམིངབཟླ འདྲམིན །རྟེན་འབྲེལ་བཟླས་ཤིང་ཚྭ་ཚྭ་གདབ། །རྨི་ལམ་བཟློག་ན་རྩ་བའི་སྔགས། །བརྒྱ་རྩ་བརྒྱད་དུ་བཟླས་པ་བྱ། །རང་གི་སྔས་ཀྱང་བསྒྱུར་ལ་ཉལ། །མཚན་མ་ངན་པ་བཟློག་པ་ན། །ཟོར་དེ་དྲག་ཏུ་འཕང་བར་བྱ། །ལྟས་ངན་བཟློག་ན་མདོས་ཀྱིས་བཟློག །མདོས་ནི་མཎྜལ་སྟེང་དག་ཏུ། །ཁྲི་འཕང་དག་ཏུ་བརྩིག་པར་བྱ། །རུས་སྦལ་བཞི་དང་གླང་ཆེན་བཞི། །མི་ནོར་ལྟོ་འགྲོ་རི་དྭགས་དང་། །གཅན་གཟན་གཟུགས་ལ་སེང་གེ་བཞི། །འདབ་ཆགས་གཟུགས་ལ་བྱ་ཁྱུང་བཞི། །དེ་ཡི་སྟེང་དུ་འཆར་ཀའི་སྐུ། །ཟུར་གསུམ་ནང་དུ་དམིགས་པའི་མིང་། །དེ་ཡི་ཁ་ལ་བརྩིག་པར་བྱ། །དེ་ཡི་མཐའ་མར་མེ་མར་དང་། །ཀོང་ཟོར་སྤེལ་མ་དགོད་པར་བྱ། །བཅུ་གསུམ་པ་ཡི་ཚོགས་སུ་བྱ། །ཆུ་ཐིག་སྔོན་མོའི་རྒྱུད་ལས།བཟློག་པའི་ལེའུ་སྟེ་དགུ་པའོ།། །།དེ་ནས་ཡང་དག་བཤད་བྱ་བ། །གསད་པའི་ལས་ནི་འདི་ལ་བརྩོན། །གྲུ་གསུམ་ནང་དུ་ལིསྐོ་དང་། །ཐོད་པ་རུ་ནི་བཅའ་བར་བྱ། །སྐྱེར་མདའ་སྐྱེར་གཞུ་སྟོང་པ་དང་། །གདོང་ཟོར་ནག་པོ་དེར་བཅའ་སྟེ། །དེ་ཡི་ཁ་ལ་འཆར་ཀའི་སྐུ། །ཁྲམ་དང་རྒྱུ་ཞགས་བསྐུར་བ་ལ། །གླང་ཆེན་གདོང་ཅན་ཁ་ནང་དུ། །མིང་དང་རུས་བཅས་གཞུག་པར་བྱ། །རབས་ཆད་ཐོད་པར་ར་ཁྲག་དང་། །ཁྲམ་དང་བཅས་ཏེ་བཅའ་བར་བྱ། །དེ་ཡི་ནང་དུ་སོག་པ་ལ། །སྙིང་ག་རུ་ནི་ཤར་རི་སྨྱོ། །མ་ངོམས་སུ་ཙི་རུ་སྙིང་སྨྱོ། །རྐང་མཐིལ་དུ་སྙིང་སྨྱོ༷༷ །དམིགས་པའི་ལིསྐོ་བྲི་བར་བྱ། །ཀོང་ཟོར་ལ་སོགས་ཟོར་གྱི་རྫས། །རྣམ་པ་བཅུ་པོ་བཅུ་་འབར་བྱ། །བསྡེ་བོན་པ་ཞང་བློན་དང་། །མོན་པའི་སྔགས་དང་བཅས་པ་བཟླས། །རྩ་སྔགས་ལས་སྔགས་བསང་བའི་སྔགས། །དེ་ལྟར་སྤེལ་མར་བཟླས་པར་བྱ། །ཚེས་གྲངས་རྩིབས་ལ་ཟོར་ཐུན་བརྡེག །གསད་པའི་འཁོར་ལོ་ཚོན་སྐུད་བཅིང་། །འཆར་ཀའི་ལྟོ་བར་མྱ་ར་ཡ། །ཕུར་པས་བཏབ་ལ་སྤྱིན་སྲེག་བྱ། །ཐ་མར་མོན་པ་དཀྲུགས་ཤིང་བཟླས། །ཀོང་ཟོར་ཁྲག་ཟོར་སྤྲུག་ལ་བརྡེག །གསད་མདོས་གཏོར་མའི་ནང་དུ་བཅའ། །ཁང་ས་ཞིང་ས་དུར་ཁྲོད་ས། །རྭ་ཧུ་ལ་ཡི་གཟུགས་བཅས་ལ། །སྦྲུལ་ནག་འཁྱིལ་བས་བསྐོར་བྱས་ལ། །ལིསྐོ་དག་དང་བཅས་ལ་འཕང་། །ཡན་ཏྲ་མན་ཏྲ་སྤེལ་ཞིང་བཟླས། །སྔགས་ཀྱིས་བསྐུལ་ལ་འཕང་བར་བྱ། །འཆར་ཀ་ཐོད་པ་ཆུ་མིག་མནན། །དེ་ཡིས་ལྷ་བྱིན་མྱ་ར་ཡ། །འཆར་ཀ་ནག་པོའི་ཞལ་ནས་གསུངས། །ཆུ་ཐིག་སྔོན་མོའི་རྒྱུད་ལས། གསད་པའི་ལེའུ་སྟེ་བཅུ་པའོ།། །།དེ་ནས་ཡང་དག་བཤད་པར་བྱ། །མནན་པ་དག་ལ་བསྔགས་པནི། །གདོངགཅིགམདངམེ་རེག་མ། །སད་ཀྱིས་བསད་པའི་པྲསྤྲོ་དང་། །ཁྱད་པར་དྲུག་གི་སྔགས་ཀྱིས་བསྐོར། །ཙཀྲ་ཧྲི་ན་ཧྲི་རི་ནན། ཨ་ཏྲི་ནན། སུ་ཏི་ནན། ཏྲི་དུ་ནན། མྱ་ར་ནན། ནང་དུ་ཁམ་སའི་གཟུགས་དག་ནི། །སྙིང་གར་མནན་པའི་འཁོར་ལོ་གཞུག །ཚོན་སྐུད་དག་གིས་རབ་ཏུ་དཀྲི། ཁུ་གསུམ་ནང་དུ་བཅུག་པ་ལ། །འཆར་ཀའི་སྐུ་ཡིས་མནན་ལ་བཟླ། །རྩ་སྔགས་བསང་སྔགས་སྤེལ་བ་ལ། །ཐ་མར་མིང་དང་མནན་དང་བཅས། །འཁོར་ལོའི་སྔགས་མཐའ་ནན་དང་བཅས། །བཟླས་པ་བྱ་ཞིང་རྡོ་རྗེས་བརྡེག །རྡོ་རྗེ་རྒྱ་གྲམ་གཡམ་པ་ལ། །སྙི༷༷སྐྱིང༷ ཟླས་ཤིང་བརྡེག་པར་བྱ། །གཏོར་མ་གཏང་ཞིང་དམོད་བཅོལ་བྱ། །སྔགས་དང་མ་གཤིན་བསྐུལ་ལ་གདབ། །མྱ་ར་དམིགས་པའི་རྟེན་དེ་མནན། །ཆུ་མིག་བྱང་ལྟའི་གཤམ་དུ་མནན། །ཕོ་རྒྱུད་མནན་ན་བྲག་འོ་ག་མནན། །མོ་རྒྱུད་ཡིན་ན་མཚོ་ནང་དུ། །ཐེ་བྲང་རྐང་གཅིག་ཤིང་གི་དྲུང་། །ཕ་བོང་ནག་པོའི་ཀླུ་ལ་ཤིས། །གད་པའི་འོག་ཏུ་བསེན་མོ་མནན། །ཕོ་སྲི་དུར་ས་དག་ཏུ་མནན། །བཙན་ནི་བྲག་དམར་ཐེབས་ལ་མནན། །རྒྱལ་པོ་མཆོད་རྟེན་འོག་ཏུ་མནན། །མནན་པ་གང་རིགས་དམིགས་དང་སྦྱར། །གནོན་པའི་ས་དེ་གྲུ་གསུམ་འབྲུ། །དེ་ཡི་ནང་དུ་ཐོད་པ་ལ། །དེ་ཡི་སྟེང་དུ་སྐུ་གདུང་རྟེན། །དེ་ནས་རྟེན་དང་ཀུན་འཁོར་ལོ། །རྒྱ་གྲམ་དག་གིས་ཁ་བཅད་དེ། །དགའ་བོ་ཀླུ་ཡང་ལྡང་མི་སྲིད། །དེས་ནི་ཀུན་ལྡན་མ་ཡང་གནན། །བསྐལ་པ་རྫོགས་ཀྱང་ཁར་མི་དབྱུང་། །བཀའ་ལས་འདས་ན་དེ་བཞིན་ནོ། །ཆུ་ཐིག་སྔོན་མོའི་རྒྱུད་ལས། །མནན་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་དག་བཤད་བྱ་བ། །བཅའ་བ་ཟོར་གྱི་མན་ངག་ནི། །བྲ་བོ་ནས་ནག་མི་ཁ་ཅན། །ཡང་ན་དུར་ཁྲོད་ས་དག་ནི། །དུག་དང་ཁྲག་གིས་བརྫིས་པ་ལ། །དྲག་པོའི་ཀོང་བུ་ཟུར་གསུམ་པ། །བྲག་ནག་མཚེ་དང་ཡུངས་ཀར་དང་། །དམེ་ཁྲག་ཐིགས་པ་རེ་རེ་ལ། །ཡུགས་མོའི་འཕང་རྩེ་དྲག་པོའི་རྩང་། །སོར་བཞི་བ་རེ་བཙུག་ལ་བཞག །ཕུར་པ་རེ་དང་ཡུངས་ཀར་རེ། །མར་མེ་རེ་དང་ལྷ་བཤོས་རེ། ཁྲ་སྣ་རེ་དང་ཁྲག་སྣ་རེ། །རབས་ཆད་ཁང་པའི་དུད་པ་དང་། །ཆང་ཉས་པ་ཡི་སྦང་མར་སྦྱར། །གསུམ་དང་བདུན་དང་བཅུ་གསུམ་མམ། །ཉི་ཤུ་རྩ་གཅིག་བརྒྱ་རྩ་གཅིག །ཇི་ཙམ་རན་པའི་ཚོད་དུ་སྦྱར། །ཚོན་སྐུད་སྔོན་དམར་འུར་རྡོ་ལ། །ཞིང་ལྤགས་འུར་རྡོའི་མཐིལ་དུ་བྱ། །ཡུགས་སའི་སྐྲ་ཡི་འཇག་ཀྱང་བྱ། །སྔགས་པ་དམར་ནག་ཆས་སུ་ཞུགས། །དུས་དྲུག་ཁོ་ནར་འཕང་བ་ནི། །རྩ་བའི་སྔགས་དང་ཀོང་ཟོར་སྔགས། །བཅོལ་ཞིང་ལས་ལ་འཕང་བར་བྱ། །དུར་ཁྲོད་རྡོ་ལ་དུག་ཆུས་བྱུག །གདེང་དང་ལྡན་པའི་རྣལ་འབྱོར་པས། །གོང་དང་མཉམ་པར་འཕང་བར་བྱ། །སྐྱེར་པའི་མདའ་ལ་ལྟས་ངན་སྒྲོ། །དམེ་བོའི་ཁྲག་གིས་བྱུག་པར་བྱ། །སྔགས་ནི་དྲག་པོའི་སྔགས་བརྡེག་ལ། །ཉི་མའི་འོད་ཟེར་འཕང་བར་བྱ། །བསྙེན་པ་དྲག་པོ་བཟླས་ལ་འཕང་། །སླ་ངའི་ནང་དུ་ཤོད་རྡོ་བླུག །ར་ཡི་སོག་པ་གཡས་ངོས་ལ། །ལིསྐོ་བྲིས་ཏེ་ནང་དུ་གཞུག །ཉུང་དཀར་ཉུང་ནག་ནང་དུའོ། །དེ་ལ་དམིགས་པར་ལྡན་པ་ལ། །དེ་ལ་མུ་ཏྲེརེ་སྦྱོར་བ་བྱ། །བུད་མེད་གཅིག་གིས་སླང་ང་འཁྱེར། །ས་སྣ་འབྲུབ་ཁུང་ལིདྷ་ཅན། །གང་ནས་འོང་བའི་ཕྱོགས་དང་སྦྱར། །གཡོན་སྐོར་བདུན་དང་གཡབ་མོ་བདུན། །དེ་ནས་དེ་ཡི་ནང་དུ་བླུག །མ་གཤིན་བསྐུལ་ཞིང་བྲོ་ཡང་བརྡུང་། །རོལ་མོའི་སྒྲ་དང་བཅས་པས་བྱ། །གང་ལ་དམིགས་པའི་ཟོར་དང་བཅས། །བ་ལི་ཞལ་དང་ལྡན་པ་ལ། །མར་མེ་ལྷ་བཤོས་རྩང་དང་བཅས། །དར་ནག་ཕྲག་པར་གཟུག་པ་དང་། །ཉུང་དཀར་ཁྲག་དུག་སྔགས་དང་བཅས། །འཕང་ཞིང་བསིལ་ཞིང་འཁྲབ་དང་བཅས། །ཅང་ཏེའུ་བརྡུང་ཞིང་རཀྟ་བརླབ། །ལྷ་ཚོགས་བསྐུལ་ཞིང་དར་ནག་གཡབ། །གང་དམིགས་དེ་ལ་འཕེན་པར་བྱ། །རུ་ཏྲེརེ་གོས་ནི་མགོ་མཇུག་བཟློག །རུ་ཏྲེཛེ་ཤུན་བྲེང་བརྡབ་པར་བྱ། །མུ་ར་ཡ་ཡི་རཀྟ་གཟུག །དམ་ཚིག་ཉམས་པའི་ཆད་པ་རྩི། །ཨོ་པ་ལ་ཡི་སྒྲ་ལུང་བྱ། །མུ་པ་ལ་ཡི་ཉམས་པ་ལ། །དྲག་པོ་གཏོར་མའི་བཟློག་མདོས་འདིས། །གང་ཡང་རུང་བ་རླག་པར་བྱེད། །རང་བསྲུང་བ་ཡི་མཆོག་ཏུ་འགྱུར། །གོད་ཁ་འདུལ་ན་ཤིན་ཏུ་བསྔགས།རདངཤ་ཡང །གང་ཡང་་་རུང་བའི་ཐོད་པར་བྲུབ། །རྒྱ་གྲམ་ལམ་སྣེར་མནན་ལ་བྲུབ། །དེ་ཡི་ཐོག་ཏུ་གཏོར་མ་བྲུབ། །རྒྱ་གྲམ་འབར་བའི་ཐེམ་ལ་གཞག །དེས་ནི་ཐམས་ཅད་དབང་དུ་སྡུད། །དྲག་པོའི་ཟོར་གྱི་ལས་ཁ་འདི། །གང་ལ་ཞུགས་ཀྱང་བརྩོན་པར་བྱེད། །རྭ་ཧུ་ལ་ཡི་ལས་སྦྱོར་བྱ། །གཟའ་བརྩི་བ་དང་ཕྱོགས་བརྩིས་ལ། །དེ་ནས་དམིགས་པས་འཕང་བར་བྱ། ཆུ་ཐིག་སྔོན་མོའི་རྒྱུད་ལས་འཕང་བ་ཟོར་གྱི་ལེའུ་སྟེ་བཅུ་གཉིས་པའོ།། །།གཞན་གྱི་སྔགས་ཟོར་མནན་པ་ནི། །ཧེ་རུ་ཀ་ཡི་ཏིང་འཛིན་ནམ། །ཡང་ན་ཕྱག་ན་རྡོ་རྗེ་བསྒོམ། །ཀརྨ་ཎ་ཡི་ལས་ཀྱང་བྱ། །དགྲ་འམ་ཡང་ན་བགེགས་ཀྱང་རུང་། །ཤོག་བུ་དག་ལ་མིང་རུས་བྲི། །རྩ་བ་བསིལ་བའི་ཐུན་གྱིས་བྲབ། །ཏིང་ངེ་འཛིན་གྱིས་དགུག་གཞུག་བྱ། །གང་ན་ཡོད་པའི་ཕྱོགས་ནས་སུ། །ཕ་རོལ་དམ་ཚིག་ཉམས་རྟགས་སུ། །ཕྱར་བ་ནག་པོ་ཕྱོགས་སུ་བརྡབ། །སྲིད་པའི་ལྷ་འདྲེ་བསླུ་བའི་ཕྱིར། །མིག་བརྒྱ་པ་ཡི་གོས་ཀྱང་གོས། །ཆེ་བའི་ང་རྒྱལ་བསྐྱེད་པའི་ཕྱིར། །ཞིང་ལྤགས་དག་ཀྱང་གོན་པར་བྱ། །ཕྱོགས་སུ་ཐར་ས་མེད་པའི་ཕྱིར། །སྟེང་དུ་རྡོ་རྗེ་རྒྱ་གྲམ་བྲི། །ཕྱིན་ཆད་ལམ་བར་དགག་པའི་ཕྱིར། །ལམ་ཡང་མཐོ་དང་རྒྱ་གྲམ་བཅད། །གཏན་ནས་ཐར་ས་མེད་པའི་ཕྱིར། །རྒྱ་གྲམ་དྲུག་གི་བར་དུ་གཞུག །རྩ་སྔགས་གདོང་ཟོར་སྔགས་བཅས་བརྡེག །སྤེལ་མར་ཞག་གསུམ་གཏོར་མར་གདགས། །དེ་འོག་མནན་པས་ལས་རྣམས་འགྲུབ། །དེས་ནི་དམིགས་པ་གདོན་མི་ཟ། །འཆར་ཀ་ནག་པོའི་གོང་གནོན་ཡིན། །ཆུ་ཐིག་སྔོན་མོའི་རྒྱུད་ལས་སྔགས་ཟོར་མནན་པའི་ལེའུ་སྟེ་བཅུ་གསུམ་པའོ།། །།དེ་ནས་ཡང་དག་བཤད་བྱ་བ། །དེ་ནས་རིག་སྔགས་སྤོ་བ་ནི། །དྲག་པོ་རོ་རས་གྲུ་བཞི་ལ། །བཅུ་དང་གཉིས་སུ་འཁོར་ལོ་བཀོད། །དེ་འོག་བཤན་པ་བཞི་ཡི་སྔགས། །ཕྱོགས་དང་རིམ་པ་དེ་བཞིན་ནོ། །བར་མ་རྩ་བའི་སྔགས་དང་ནི། །བཱ་ར་ཡ་དང་སྤེལ་མ་བྲི། །ཐ་མ་བསད་ཁུང་གྲུ་གསུམ་པར། །མིང་རུས་བྲིས་ལ་མཐའ་མ་བསྐོར། ཁྲ་རི་སྨྱོ་ཡི་སྔགས་མོག་ལ། །མ་རིག་པ་གཉིས་བསྡེབས་ལ་བྲི། །ཡིག་མགོ་གཅིག་གི་ཕྱོགས་མ་ནོར། །གཡས་གཡོན་བསྐོར་ལ་ཚོན་སྐུད་དཀྲི། །འཆར་ཀའི་སྙིང་གར་གཞུག་པར་བྱ། །འཆར་ཁ་ནག་པོའི་སྐུ་ལ་ནི། །དང་པོ་རིན་ཆེན་སྣ་ལྔས་བྱུག །དེ་ནས་ཁྲག་དང་དུག་གིས་བྱུག །མཆོད་རྟེན་གཡས་གཡོན་དམར་པོ་ལ། །དབུས་མའི་མཆོད་རྟེན་མཐིང་ནག་གོ །ལག་པ་ཕུར་པ་འདྲིལ་བ་ལ། །གཡས་སུ་རྒྱ་གྲམ་དེ་འོག་ཏུ། །ཐོད་སྦྲམ་ལིདྷ་གནན་པ་ལ། །རྒྱ་གྲམ་སྟེང་དུ་འཆར་ཀའི་སྐུ། །རྩ་སྔགས་བཟླས་ལ་གནན་པ་བྱ། །ཆུ་ཐིག་སྔོན་མོའི་རྒྱུད་ལས་རིག་སྔགས་ཟོར་སྤོ་བའི་ལེའུ་སྟེ་བཅུ་བཞི་པའོ།། །།དེ་ནས་ཡང་དག་བཤད་བྱ་བ། །བསྲེག་པ་བྱ་བའི་ལས་ལ་འབད། །ཟུར་དྲུག་འཁོར་ལོ་གནམ་སྒོ་ཅན། །ཚེར་མ་ཅན་གྱི་ཤིང་བརྩེགས་ལ། །བྱ་རོག་འུག་པ་ཁུ་ཏ་ཡི། །ཚང་རྩི་བསྒྲུགས་ལ་བུད་ཤིང་བྱ། ཁུ་མའི་ཐག་པའི་སྐུད་པས་དཀྲི། །ཁ་ལ་རྩང་དང་རྒྱུ་ཞགས་བསྣོལ། །མར་ནག་ཁྲག་དང་ཤ་དང་ཚིལ། །རུས་པ་ཞུན་དང་དུག་དང་ཁྲག ་་་དཀར་ཉུང་ནག་དག་དང་ལྡན། །དེ་ཡི་རིམ་པ་དེ་ཤེས་བྱ། །ལིསྐོ་མང་པོ་ག་ས་པ་དང་། །སྦྱིན་སྲེག་ཇི་ཙམ་རན་པ་བྱ། །དེ་ཡི་ནང་དུ་འཆི་བདག་བསྐྱེད། །མདུན་དུ་རྭ་ཧུ་ལ་ཡང་བསྐྱེད། །སྡིག་ཅན་མེ་བླང་ཤན་པས་བསྲེག །འཆི་བདག་བཀུག་ནས་མེ་ལ་བསྟིམ། །དང་པོ་བཅོམ་ལྡན་འདས་ལ་འབུལ། །དེ་ནས་འཆར་ཀ་ཉིད་ལ་འབུལ། །ཕྲིན་ལས་རྣམ་བཞིའི་ལས་དང་སྦྱར། །རྩ་སྔགས་དག་དང་སྤེལ༷་ལ་བཟླས། །ཐ་མ་ཐ་མར་བསྟབ་དང་དབུལ། །ཡང་ནས་ཡང་དུ་དབུལ་བར་བྱ། །འཆར་ག་ཉིད་ཀྱི་མདུན་དུ་བྱ། །དབང་དང་དགུག་པའི་སྦྱོར་བ་བྱ། །བསྐུལ་དང་དྲག་སྔགས་སྦྱོར་བ་བྱ། །བདུན་བདུན་རེ་ལ་བ་ལི་འབུལ། །ཡང་ནས་ཡང་དུ་དབུལ་བར་བྱ། །འདི་ནི་དྲག་པོའི་ལས་དག་གི །སྦྱོར་འདེབས་ཡིན་པས་དབང་དུ་འགྱུར། །འབྱུང་པོ་མ་རུངས་སྟ༷་བྷ་ཡ། །བརྒྱའམ་ལྔ་བཅུའི་སྦྱོར་བ་བྱ། །རྡོ་ནག་བགེགས་ཀྱི་བླ་རྡོ་ལ། །རྩ་བའི་སྔགས་ལ་མྱ་ར་ཡ། །དང་པོ་གཤིན་རྗེ་འཇམ་དཔལ་བསྐུལ། །དེ་ནས་འཆར་ཀ་བསྐུལ་བར་བྱ། །སྤྱིན་སྲེག་རེ་ལ་བསྐུལ་བ་རེ། །བཀུག་ཅིང་བསྟིམས་ལ་བསྲེག་པར་བྱ། །རྩི་སྐྱ་འཇག་མར་ཡི་དྭགས་གཟུགས། །མཁར་ནག་དཀྲིས་ལ་འཆར་ཀར་གཞུག །གུ་གུལ་དུད་པས་བསྐོར་ཞིང་བདུག །གང་གནོན་དེ་ལ་བསྐོར་ཞིང་བསྲེག །རྩ་བའི་སྔགས་ལ་ལས་སྔགས་བཏགས། །ཕུར་པ་བཏབ་ཅིང་དྲག་ཏུ་བསྐུར། །ག་་ལ་སྦྱིན་སྲེག་བྱ་བའང་། །བརྒྱ་འམ་ལྔ་བཅུའི་ཚད་དུ་བྱ། །འདིས་ནི་ཀླུ་རྣམས་གདུག་པ་འདུལ། །དབང་དུ་བྱ་བའི་ལས་ཡིན་ཏེ། །དེ་མ་ཐག་ཏུ་འགྲུབ་པར་འགྱུར། །ཐ་མར་གསོ་བའི་ལས་དག་བྱ། །རྩི་སྐྱ་འཇག་མའི་སྦྱོར་བ་དེ། །ཡང་ན་འཆར་ཀའི་འོག་ཏུ་མནན། །ཆུ་ཐིག་སྔོན་མའི་རྒྱུད་ལས་སྦྱིན་སྲེག་གི་ལེའུ་སྟེ་བཅོ་ལྔ་པའོ།། །།ཡང་ནི་བསད་པའི་ལས་དག་ནི། །གཅན་གཟན་ཐོད་པར་ལིདྷ་བཅུག །རྡོ་ནག་བླ་རྡོར་གཞུག་པར་བྱ། །ཕུར་པས་བཏབ་པའི་སྦྱོར་བ་བྱ། །བསྡེ་བོན་པོ་ཞང་བློན་དང་། །མོན་པ་ནག་པོའི་སྦྱོར་བ་བྱའོ། །དེ་སྔགས་རྩ་སྔགས་བསྡེབ་པ་དང་། །ལས་སྔགས་བསད་དང་ཐུན་སྔགས་བརྡེག །དེ་ཡི་མདོས་དང་བཅས་པ་བྱ། །ཟུར་གསུམ་དབལ་སྔགས་དག་དང་ནི། །ཁྲམ་དང་ཐོད་པ་དེ་བཞིན་ནོ། །ཡང་ན་དེ་ཡི་སྤྱིན་སྲེག་བྱ། །ཁོ་ན་གཅིག་པུ་བསྔགས་པ་སྟེ། །བདུན་བདུན་དག་ཏུ་སྦྱོར་བ་བྱ། །དྲག་པོའི་སྔགས་དང་སྤྱིན་སྲེག་ཀྱང་། །དེ་རུ་དམིགས་ལ་བཟླས་པ་བྱ། །རྟགས་ནི་དུ་མ་གང་བྱུང་ཡང་། །བརྟགས་ལ་དེ་ཡི་ལས་ལ་སྦྱར། །དང་པོ་འཇམ་དཔལ་བསྟོད་པ་བྱ། །འཆར་ཁ་འཁོར་བཅས་བསྟོད་པ་དང་། །སྲོག་གི་ར་ཙ་བཞི་པོ་ནི། །ཐ་མ་མདེའུར་བསྐུལ་བའང་། །དེ་ཡང་འདི་ལ་ཤེས་པར་བྱ། །སྔགས་ཀྱང་དེ་བཞིན་བཟླས་པར་བྱ། །ཟེ་བྷ་སྭ་ཏ་སེང་གེའི་གདོང་། །གསད་དང་སྤྱིན་སྲེག་དུས་དྲུག་ཏུའང་། །དེ་ཡི་ང་རྒྱལ་བྱ་བ་ཡིན། །བསྙེན་དུས་འཇམ་དཔལ་ཞི་བ་ལ། །ལྟོ་བར་འཆར་ཀ་ནག་པོ་ཡིན། །མཇུག་མ་ཁྱབ་མཇུག་རྭ་ཧུ་ལ། །དེ་ལ་ལྷ་སྲིན་སྡེ་བརྒྱད་འཁོར། །མ་མོའི་འཁོར་བཅས་བྲན་དང་གཡོག །ཆུ་ཐིག་སྔོན་མོའི་རྒྱུད་ལས་གསད་པའི་ལེའུ་སྟེ་བརྣུདྲུག་པའོ།། །།ཆུ་ཐིག་སྔོན་མོའི་རྒྱུད་དག་ལས། །མཇུག་མ་ཀླུ་ཡི་སྦྱོར་བ་ནི། །ཁྱབ་འཇུག་རྭ་ཧུ་ལ་དང་སྦྱར། །ཨོ་པ་ཤ་མི་ཀི་རྭ་ཧུ་ལ་དུ་སྲ ཛ་ལ་ཏི་མི་ཀ༷་ཏི་གྲྭ་ཧྭ། ཨོ་པ་ཤ་མི་ཀི་ཀུ་རུ་བཛྲ་ལོ་ཏི་མ་ཀི་སྲུ་ཧྭ། རྭ་ཧུ་ལ་ཧུ༷་ཛ། འཆར་ཀའི་སྔགས་དང་བསྡེབ་ཅིང་བཅོལ། ཁྲ་རུལ་ཉ་རུལ་ཁྲག་དང་བཅས། །བསེ་གབ་ནང་དུ་སྦྱར་ལ་མཆོད། །རྒྱ་མཚོའི་གཏིང་གི་ཀླུ་ཡང་འཁོལ། །རྭ་ཧུ་ལ་ཛ་པ་ནི་ཧུ༷། ཡང་སྙིང་སྔགས་ལ་བརྩོན་པར་བྱ། །དབབ་དང་བཅད་པ་ཐོགས་རྡུག་མེད། །བསད་པའི་ལས་དག་སྨོས་ཅི་དགོས། །བཟློག་པའི་ལས་ལ་ཤིན་ཏུ་བསྔགས། །ཆུ་ཐིག་སྔོན་མོའི་རྒྱུད་ལས་མཇུག་མ་ཀླུའི་ལེའུ་སྟེ་བཅུ་བདུན་པའོ།། །།དེ་ནས་སྐུལ་ཚིག་ཏུ་བསྟན་པ་ནི། །ཧུ༷་མ་འགགས་ལྷུན་རྫོགས་གྲུབ་པའི་གནས། །སྟོང་གསུམ་འཇིག་རྟེན་ཀུན་གྱི་བདག །མཐོ་རིས་ངན་སོང་ཀུན་གྱི་ལམ། །འཆར་ཀ་ནག་པོ་གཤེགས་སུ་གསོལ། །འཇིག་རྟེན་མ་མོ་ཐམས་ཅད་ཀྱང་། །ཁྱོད་ཀྱི་སྐུ་ཡི་ཆ་ལ་བརྟེན། །མ་མོ་འཁོར་བཅས་གཤེགས་སུ་གསོལ། །དྲེགས་པ་བདུད་ཀྱི་ཚོགས་བཅས་ཀྱང་། །ཁྱེད་ཀྱི་ཞེ་སྡང་ཆལབརྟེན། །གཤིནརྗེའཁོར་བཅས་གཤེགས་སུ་གསོལ། །གཤིནརྗེའིལས་མཁན་ཐམས་ཅད་ཀྱང་། །ཁྱོད་ཀྱི་ང་རྒྱལ་ཆ་ལ་བརྟེན། །སྲོག་བདག་འཁོར་བཅས་གཤེགས་སུ་གསོལ། །ཕ་ནི་བདུད་ལ་མ་ནི་ཀླུ། །ཀླུ་བདུད་བསྡེབས་པའི་མཐུ་བོ་ཆེ། །ནག་པོ་ཆེན་པོ་གཤེགས་སུ་གསོལ། །གནམ་ལ་གནས་པའི་མ་མོ་ཀུན། །འཇིག་རྟེན་སྟེང་གི་ཕྱོགས་ནས་ལས་མཛོད་ཅིག །གཡས་ཀྱི་ཕྱོགས་ནས་མ་མོ་བདུན། །གཡས་ཀྱི་ཕྱོགས་ནས་ལས་མཛོད་ཅིག །གཡོན་གྱི་ཕྱོགས་ནས་གཤིན་རྗེ་བདུན། །གཡོན་གྱི་ཕྱོགས་ནས་ལས་མཛོད་ཅིག །དུར་ཁྲོད་རོ་ལངས་ནག་མོ་བདུན། །འཇིག་རྟེན་གནས་པའི་སྲིན་མོ་བདུན། །བཀའ་ཉན་མོན་པ་ནག་པོ་བདུན། །བན་ནག་བོན་ནག་རྫུ་འཕྲུལ་ཅན། །ཞང་བློན་མོན་པ་མཐུ་བོ་ཆེ། །གཟའ་དང་རྒྱུ་སྐར་ཀླུ་ཡི་ཚོགས། །ན་མོ་མཁའ་འགྲོ་བྲན་དང་གཡོག །ཁྱོད་ཀྱི་བཀའ་ཉན་རྫུ་འཕྲུལ་ཅན། །མ་རུངས་དབང་སྡུད་མཐུ་བོ་ཆེ། །དྲེགས་པ་ཕོ་མོ་ཀླུ་ཡི་ཚོགས། །རྫུ་འཕྲུལ་དྲག་པོས་ཉམས་པ་འདུལ། །མ་ཐོགས་མྱུར་བར་གནས་འདིར་གཤེགས། །བཅོལ་བའི་ལས་རྣམས་འགྲུབ་པར་མཛོད། །གང་ལ་མངག་པ་དོན་མ་ཆུང་། །ཉམས་པ་འདུལ་བའི་དུས་ལ་བབ། །ཆུ་ཐིག་སྔོན་མོའི་རྒྱུད་ལས་བཅོལ་བ་ཕོ་ཉའི་ལེའུ་སྟེ་བཅོ་བརྒྱད་པའོ།། །།སངས་རྒྱས་བསྟན་པ་སྲུང་བ་དང་། །བདུད་དང་མུ་སྟེགས་འདུལ་སླད་དུ། །རྒྱུད་བཤད་ཕྱི་རབས་རྣལ་འབྱོར་རྣམས། །ཚིམས་པར་གྱུར་ཅིག་གཞན་མ་སྤེལ། །འཇམ་དཔལ་ནག་པོ་བཟློག་པའི་རྒྱུད་ཅེས་བྱ་བ། །འཆི་བདག་བེ་བ་ས་ཏའི་རྒྱུད་ཅེས་ཀྱང་བྱ། །འཆར་ཀ་ནག་པོ་བཟློག་པའི་རྒྱུད་ཅེས་ཀྱང་བྱ། །རྭ་ཧུ་ལ་ནག་པོ་རྔམ་བྱེད་ཀྱི་རྒྱུད་ཅེས་བྱའོ། །ཆུ་ཐིག་སྔོན་མོ་རྩ་བའི་རྒྱུད་རྫོགས་སོ།། །། རྒྱ་གར་སྐད་དུ། ཡཀྟ་དྲ་ས་ཏྲི་མ་ར་ཨ་ཏི་ཏནྟྲ། བོད་སྐད་དུ། གནོད་སྦྱིན་གདོང་གསུམ་པའི་རྒྱུད། བཅོམ་ལྡན་འདས་འཇམ་དཔལ་གཤིན་རྗེའི་གཤེད་ལ་