Ngb-pt-0644-vol-07-text

Body

པའོ། །རྒྱ་རྒྱ་རྒྱ། རྒྱ་གར་སྐད་དུ། ཨུརུ་མཉུ་ཤི་ཡ་མ་རྭ་ཛ་ཡསྒེ །གུ་ཡ་ཏནྟྲ། བོད་སྐད་དུ། འཕགས་པ་འཇམ་དཔལ་ཁྲོ་བོ་གཤིན་རྗེ་གཤེད་རྒྱལ་པོ་གསང་བའི་རྒྱུད། འཇམ་དཔལ་གཤིན་རྗེ་གཤེད་པོ་ལ་ཕྱག་འཚལ་ལོ། །འདི་སྐད་བདག་ག་་་ང་་ས་ཐོས་པའི་དུས་གཅིག་ན། ཆོས་ཀྱི་དབྱིངས་རང་བཞིན་རྣམ་པར་དག་པའི་གནས། གདུག་པ་མ་ལུས་རང་བཞིན་ལྷུན་གྱིས་སྒྲོལ་བའི། དུར་ཁྲོད་འབར་བས་བརྒྱན་པའི་གཞི་ཡོན་ཏན་འབར་བའི་གནས་ན། བཅོམ་ལྡན་འདས་གཤིན་རྗེ་གཤེད་པོ་ཞེས་བྱ་བ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་བདག་ཉིད་ཐམས་ཅད་འདུས་པའི་རང་བཞིན་ཏེ། །ཡུམ་ཟ་བྱེད་པེ་ཏ་ལི་ཞེས་བྱ་བའི་སྲིན་མོ་དང་ཐབས་ཅིག་ཏུ་འཁྲིལ་ནས་བཞུགས་སོ། །གཞན་ཡང་གདུག་པ་མི་བཟད་པའི་འཁོར། །བདུདའདུལབགཤིནརྗེགདུག་པ་ཅན་སུམ་ཅུ་རྩ་གཉིས་དང་། མྱོས་བྱེད་བདུན་དང་། དུར་ཁྲོད་ཀྱི་བདག་པོ་ལ་སོགས་པ་དེ་དག་ཀྱང་། རང་རང་གི་འཁོར་གདུག་པ་ཅན་རྣམས་བསམ་གྱིས་མི་ཁྱབ་པ་ཀུན་ཏུ་ཏིལ་གྱི་གང་བུ་ལྟ་བུར་བཞུགས་ཏེ། དེའི་ཚེ་དེའི་དུས་ནས་ཡང་རབ་ཏུ་གཡོས་ཏེ། ཕྱོགས་བཅུ་ཡང་རབ་ཏུ་འཁྲུགས་པར་འགྱུར་རོ། །འཁོར་གྱི་སྤྲུལ་པ་དེ་དག་གི་ནང་ནས། གསང་བའི་བདག་པོ་ཕྱག་ན་རྡོ་རྗེ་ཞེས་བྱ་བ། མཐུ་དང་སྟོབས་སུ་ལྡན་པ་ཞིག་སྟན་ལས་ལངས་ཏེ། གདུག་པ་དེ་དག་འདུལ་བའི་ཕྱིར། འཇམ་དཔལ་གཤིན་རྗེ་གཤེད་པོ་ལ་འདི་སྐད་ཅེས་གསོལ་ཏོ། །རྐྱུ་རྒྱུ་འཇམ་དཔལ་གཤིན་རྗེ་གཤེད། །གཤིན་རྗེ་གནོད་སྦྱིན་མ་ལུས་ཀྱི། །ལྷ་མིའི་འཇིག་རྟེན་ཕུང་ལ་ཁང། །ལོག་པའི་ལམ་དུ་འ་ས་པ་རྣམས། །ཞི་བས་འདུལ་བར་མི་འགྱུར་བས། །དྲག་པོ་ཁྲོ་བོ་སྤྲོ་རུ་གསོལ། །ཅེས་གསོལ་བས། དེ་ནས་འཇམ་དཔལ་གཤིན་རྗེ་གཤེད་པོས་ཁྲོ་བོ་རྣམ་པར་སྤྲུལ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། ཡུམ་ཟ་བྱེད་ཆེན་མོ་བེ་ཏ་ལི་དང་དགྱེས་པའི་རོལ་པས་ཐབས་དང་ཤེས་རབ་ཏུ་འཁྲིལ་ཏེ། བྱང་ཆུབ་སེམས་དཔའ་སྤྲུལ་ནས། ཨོ་ཨ་ཀྲོ་ཏེ་ཀ་ཡ་མརྙ་ཀ་ཐྲེ་མཉུ་ཧཱུཾ༷་ཛ། ཞེས་ཐོན་པ་ལས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་འཇིགསབྱེདགཤིནརྗེསྐུརགྱུར་ཏེ། དེའི་ཚེ་དེའི་དུས་ན་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། རི་རབ་ཀྱང་འགུལ། རབ་ཏུ་འགུལ། ཀུན་ཏུ་འགུལ་ལོ། །ལྡེག རབ་ཏུ་ལྡེག ཀུན་ཏུ་ལྡེག་གོ །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་དུ་གྱུར་ཏེ། ཡེ་ཤེ་ཀྱི་སྐུ་དེ་དག་ལས་ཀྱང་རང་རང་གིས་སྤྲུལ་པ་བསམ་གྱིས་མི་ཁྱབ་པ་འཕྲོས་ཏེ། གདུག་པའི་གཤིན་རྗེ་དང་། མ་མོ་དང་། སྲིན་པོ་དང་། སྲིན་མོ་དང་། གནོད་སྤྱིན་དང་། སྒྲོལ་གི་ཕོ་མོ་ལ་སོགས་པ་སྟེ། གདུག་པ་ཅན་དེ་དག་ཀུན་སྐྲག་ཅིང་སྔངས་ཏེ་བརྒྱལ་བར་གྱུར་ཏེ་གན་བུབ་ཏུ་འགྱེལ་ཏེ། གདན་དུ་བཏིང་ནས་ཁྲག་ཏུ་སྒྱུག་ཅིང་།སྨྲེ་སྔགས་འདོན་ཅིང་ལག་ཆ་ཡང་ཕྲོགས། མདངས་ཀྱང་རང་རང་ལ་བསྡུས་སོ། །དེ་ནས་ཡང་འཇམ་དཔལ་འཇིགས་བྱེད་ཆེན་པོས། ཐུགས་རྗེས་དབུགས་འབྱིན་པ་ཞེས་བྱ་བའི་ཏིང་ངེ་འཛིན་པ་སྙོམས་པར་བཞུགས་ཏེ། །ཡ་མ་རྭ་ཛ་དྲི་ཛ་ཧཱུཾ༷། ཞེས་བརྗོད་པས། གདུག་པ་མི་བཟད་པ་དེ་དག་ཐམས་ཅད་སླར་ཡང་རང་རང་གི་ངོ་བོར་ལངས་ནས། མཐུ་དང་། རྫུ་འཕྲུལ་དང་། རྩལ་བྱང་ཞིང་། དཔལ་འཇིགས་བྱེད་ཡ་མན་ཏ་ཀ་ལ་མགྲིན་གཅིག་ཏུ་འདི་སྐད་བསྒྲགས་སོ། །ཁྲོ་རྒྱལ་འཇིགས་བྱེད་ཆེན་པོ་ལགས། །སྔར་བྱས་ཐམས་ཅད་གནོང་ཞིང་འགྱོད། །སངས་རྒྱས་བསྟན་པ་འཕེལ་བྱ་དང་། །ལས་དང་བསྒོ་བ་ཅི་མཆིས་པ། །ལས་ཀྱི་བྱ་བ་བསྒོ་རུ་གསོལ། །བཟའ་དང་བཏུང་བ་གང་ལ་བགྱི། །ཞེས་དུས་གཅིག་ཏུ་གསོལ་པ་དང་། འཇིགས་བྱེད་ཆེན་པོས་བྱང་ཆུབ་སེམས་ཀྱི་དབང་བསྐུར་བས། ལས་ཀྱི་གཤིན་རྗེར་མངའ་གསོལ་ལོ། །བྲས་སུ་དམར་གཏོར་གདུག་པ་དང་། །སངས་རྒྱས་བསྟན་པ་འཇིག་པ་ཟོ། །ལས་སྐལ་སངས་རྒྱས་བསྟན་པ་སྲུངས། །ཞེས་བསྒོའོ། །འཇམ་དཔལ་གསང་བའི་རྒྱུད་ལས། གཤིན་རྗེ་དྲེགས་པ་ཅན་ལས་ལ་གཟུད་པ་དང་། གླེང་གཞིའི་ལེའུ་སྟེ་དང་པའོ།། །།དེ་ནས་དཔལ་འཇིགས་བྱེད་ཀྱི་རྒྱལ་པོས། རང་བཞིན་མི་འགྱུར་བ་ཞེས་བྱ་བ་ལ་སྙོམས་བར་ཞུགས་ཏེ། གསང་བའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །ཆོས་རྣམས་ཡེ་ནས་དག་བྱ་དང་། །སྤྲུལ་པས་འགྲོ་བའི་རྒྱུད་འདུལ་བ། །དེ་དག་གང་ལ་གནས་པར་བགྱིའོ། །ཞེས་གསོལ་ཏོ། །ཡེ་ནས་རྣམ་དག་བྱང་ཆུབ་སེམས། །ཕྱི་ནང་སྣོད་བཅུད་ལ་སོགས་ཀུན། །བདག་དང་གཞན་དུ་དབྱེར་མེད་དེ། །རྣམ་དག་ངང་དུ་ཚུལ་གཅིག་པས། །ཆོས་རྣམས་མ་ལུས་ཡེ་སངས་རྒྱས། །སངས་རྒྱས་ཉིད་ལས་མ་གཡོས་པས། །ཐེག་པ་གཅིག་ཏུ་ངེས་འབྱུང་བ། །བླ་མེད་གསང་བ་སྐུ་ཡི་རྒྱུད། །ཐུགས་རྗེ་ཆོ་འཕྲུལ་འཕྲིན་ལས་ཟབ། །རང་བཞིན་ཅིར་ཡང་མི་དམིགས་པས། །ཁྲོ་བོའི་དངོས་གྲུབ་ཅིར་ཡང་འགྲུབ། །སངས་རྒྱས་ཀུན་གྱི་སྐུ་འཆང་བ། །བྱང་ཆུབ་སེམས་ཀྱི་ཐིག་ལེར་གསལ། །གཉེན་པོ་ཅིས་ཀྱང་མི་ཤིག་པས། །ཐབས་ཀྱི་ཕྱག་རྒྱ་སྐུ་སྤྲུལ་པ། །སངས་རྒྱས་ཀུན་གྱི་སྐུ་ཡི་བདག །བྱང་ཆུབ་ངོ་བོ་དག་པ་ལས། །དཔལཆེནགཤིནརྗེ་གཤེད་པོ་ནི། །སྐུ་ནི་མཐིང་ནག་འབར་བ་ལ། །དབུ་སྐྲ་ཁམ་ནག་གྱེན་དུ་འཁྱིལ། །དབུས་གསུམ་ཕྱག་ཀྱང་རྣམ་པ་དྲུག །གཡས་པ་གསུམ་ན་བསྣམས་པ་ནི། །གཤིན་རྗེའི་དབྱུག་དང་དགྲ་སྟ་གྲི །གཡོན་ན་རྒྱུ་ཞགས་འབིགས་པའི་མདུང་། །དུང་ཆེན་དམར་གྱིས་རབ་ཏུ་བཀང་། །བརྐྱང་བསྐུམ་ཞབས་ཀྱིས་གདུག་པ་བརྫིས། །སྐུལ་དུར་ཁྲོད་ཆས་ཀྱིས་བརྒྱན། །རྡོ་རྗེ་རྣོན་པོ་རལ་གྲི་འཛིན། །སྲིན་མོ་མོ་ནི་ལྕགས་ཀྱུ་འཛིན། །སྟང་ཞལ་དེ་དག་འཁོར་དང་བཅས། །རང་རང་སྟན་དང་ལག་ཆར་གན༷ས། །སྣ་ཚོགས་ཁྲོས་པའི་བདག་ཉིད་དེ། །ཁྲོ་བོའི་དཀྱིལ་འཁོར་བདག་ཉིད་སྤྲོ། །འཇིགས་པའི་ཚོགས་ཆེན་བདུད་འདུལ་བ། །བདུད་འདུལ་འཕྲིན་ལས་བཤད་དུ་གསོལ། །ཨ་ལ་ལ་ཧོ། ས་མ་ཡ་ཧཱུཾ༷། ས་མ་ཡ་སྟོ། འཇམ་དཔལ་གསང་བའི་རྒྱུད་ལས། །ཆོས་སྐུ་མི་འགྱུར་བར་བསྟན་པའི་ལེའུ་སྟེ་གཉིས་པའོ།། །།དེ་ནས་དཔལ་འཇིགས་བྱེད་ཀྱི་རྒྱལ་པོས། རབ་ཏུ་ལུང་གནས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ། གསང་བའི་བདག་པོས་འདི་སྐད་ཅེས་གསོལ་ཏོ། །སྐུ་ཡི་རིག་པ་འཛིན་པ་དེ། །འགུ་རུ་བསླབ་བྱ་སྣོད་དམ་ཚིག །ལུང་དང་ལྡན་དང་མི་ལྡན་དང་། །གནས་དང་སྒྱུ་དང་རྫས་ལ་སོགས། །ངོ་བོ་མ་ལུས་གང་ཡང་རུང་། ཁུད་དང་གནས་པ་བཤད་དུ་གསོལ། །གང་དང་གང་དུ་གར་གནས་པར། །དེ་དང་དེ་རུ་བསྟན་པར་འགྱུར། །དུར་ཁྲོད་དང་ནི་ལྷ་ཁང་དང་། །རི་ཡི་རྩེ་དང་ཆུ་ཡི་འགྲམ། །མ་མོ་མཁའ་འགྲོ་འདུ་བ་དང་། །གདུག་པ་གནས་པར་ངེས་པར་གཏད། །མ་ལུས་པ་ཡི་ལས་རྣམས་བྱ། །ལྟ་སྤྱོད་སྒྲུབ་པར་ལྡན་པ་ལ། །བརྡ་དང་ཕྱག་རྒྱ་ཀུན་ལ་མཁས། །ངེས་པར་སྡུག་དང་དམ་མ་གནས། །དཔའ་ལ་སེམས་ཀྱི་སྟོབས་ཀྱང་ཆེ། །སྐུ་དང་སྒྲུབ་ལ་རབ་ཏུ་བརྩོན། །དེ་དང་རབ་ཏུ་དང་བར་གནས། །བར་དུ་གནས་པའི་དུས་དང་ནི། །ཕུར་བུས་ཚེས་དང་གཟའ་དུས་འཛིན། །ཉི་ཤུ་བདུན་ནམ་ཚེས་གཅིག་ཏུ། །བདུད་ཀྱི་ཉི་མ་བརྡམ་པ་ལ། །གཟའ་དང་དུས་དང་བྲ་བཟང་བ། བསྙེན་དང་བསྒྲུབ་པའི་དུས་སུ་བསྟན། །སྐུ་ཡི་རྣལ་འབྱོར་དམ་པ་དེས། །ཚོགས་ཀྱི་འབྱོར་པ་ལྡན་བྱས་ལ། །མཆོད་དང་བསྒྲུབ་དང་འཁོར་ལོའི་རྫས། ཁྲ་ཁྲག་བདུད་རྩི་སྙིང་སྣ་དང་། །དུར་ཁྲོད་རྫས་དང་ལུམ་བུ་དང་། །མི་ཁྲག་སྐྲུ་བོ་ཆེ་དང་ཆུང་། ཁ་ཁ་ཤུང་དང་དུར་ཁྲོད་སྐུད། །དཔལ་དང་བདུད་ཆས་དགུ་དང་ཡང་། །དེ་ནས་རབ་ཏུ་གནས་པར་བྱ། །ཆོས་ཀྱི་སྐུ་ལ་རབ་གནས་པའི། ཁམས་གསུམ་འཁོར་བ་མ་ལུས་པ། །སྒྱུ་མ་མིག་ཡོར་ཚུལ་དུ་གནས། །སྟོང་གསུམ་སྐུ་རུ་གནས་བཅས་པའི། །ཐེག་དམན་བློ་ཆུང་ཤེས་རབ་ཞན། །བསྒྲུབ་པར་བྱ་བ་མིང་ཡང་མེད། །གཉིས་ཀ་རབ་ཏུ་སྲེག་པར་སྣང་། །དེ་ན་རབ་ཏུ་གསང་བར་བྱ། །སངས་རྒྱས་བདག་ཉིད་ངོ་བོ་ཉིད། །ཡེ་ཤེས་སང་ངེ་ས་ལེར་གནས། །རྟོགས་པའི་བླ་མ་དམ་པ་དེས། །བླ་མེད་ངེས་པར་བསྒྲུབ་པར་བྱ། །སྲོག་ལ་མི་ལྟ་རྫས་མི་ཆགས། །བླ་མ་དམ་པ་རབ་ཏུ་མཆོད། །གསང་ཐུབ་བསྐལ་པར་རབ་ཏུ་གནས། །སོམ་ཉི་དང་ནི་ཐེ་ཙོམ་མེད། །སྲན་ཐུབ་གསང་བའི་མན་ངག་ལ། །སྣོད་ངན་དག་ལ་མི་སྦྱིན་ཅིང་། །དམ་དང་བཀའ་ལས་གནས་པ་ཡི། །འཇམ་དཔལ་ལས་དང་རྒྱུད་ལས་གྲོལ། །བརྩོན་འགྲུས་ཆེ་ལ་སྐྱོ་ངས་མེད། །གནས་འཁོར་དུས་དང་བདག་ཉིད་གནས། །རིགས་འཛིན་དངོས་གྲུབ་དམ་པ་གྲུབ། །སོ་སོའི་ལས་དང་རྒྱུད་འདི་དག །མི་གཡོ་རབ་ཏུ་བརྟན་པར་འགྱུར། །དུར་ཁྲོད་ལ་སོགས་མང་པོ་ཀུན། །དངོས་མེད་ནམ་མཁའི་འཇའ་ཚོན་འདྲ། །དག་པས་དག་པས་སེམས་ཅན་གྲོལ། །འཇམ་དཔལ་གསང་བའི་རྒྱུད་ལས། ཕུན་སུམ་ཚོགས་པ་ལུང་རྫོགས་པའི་ལེའུ་སྟེ་གསུམ་པའོ།། །།དེ་ནས་འཇམ་དཔལ་འཇིགས་བྱེད་རྒྱལ་པོས། གསང་བའི་དཀྱིལ་འཁོར་མི་འགྱུར་བར་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། གསང་བའི་བདག་པོས་འདི་སྐད་ཅེས་གསོལ་ཏོ། །ཀྱེ་མ་ཧོ་འཇམ་དཔལ་གཤིན་རྗེ་གཤེད། །དངོས་པོ་ཡེ་ནས་སངས་རྒྱས་པའི། །ངོ་བོ་དག་པ་གང་ལ་བགྱིས། །དེ་ལས་འགྲོ་དོན་ཇི་ལྟར་སྤྲུལ། །ཅེས་གསོལ་པ་དང་། །ཇི་ལྟར་སྣང་བ་ཐམས་ཅད་ཀུན། །རང་བཞིན་ཡོད་པ་མ་ཡིན་ཏེ། །རང་སེམས་སྣ་ཚོགས་དག་ཏུ་སྣང་། །སེམས་ཉིད་ལས་ནི་གཞན་མེད་ཕྱིར། །ཕྱི་ནང་ཆོས་སུ་སྣང་བ་ཀུན། །སྣང་བ་ཉིད་ན་ངོ་བོ་མེད། །དཔེར་ན་མཁའ་ལ་འཇའ་སྣང་ཚུལ། །སེམས་ཉིད་ཅི་ལའང་མི་རྟོག་ཅིང་། །ཅི་ལ་མི་དམིགས་མི་སེམས་པ། །སེམས་ཉིད་རང་བཞིན་མེད་པ་དེ། །དེ་བཞིན་ཉིད་དེ་ཆོས་སྐུར་གནས། །དེ་ཉིད་མ་དག་ངོ་བོ་ལས། །ཆུ་ཟླ་དང་ནི་འཇའ་ལྟར་སྣང་། །སྣང་བ་ཉིད་ན་རང་བཞིན་མེད། །ཀུན་ལ་ཁྱབ་ཀྱང་མ་རྟོགས་པ། །དེས་ན་འཁྲུལ་བ་སྙིང་རེ་རྗེ། །སྣང་བ་ཆོས་སྐུར་དག་པ་ཡིན། །རང་བཞིན་ཅི་ཡང་མ་ཡིན་པས། །ཇི་ལྟར་བསམས་པ་བཞིན་དུ་འགྲུབ། །སྟོང་པ་ཉིད་དང་སྙིང་རྗེ་དང་། །སྐུ་ཉིད་ཅིར་ཡང་སྣང་བ་དང་། །གཉིས་མེད་སྤྲོ་དང་བསྡུ་བ་འབྱུང་། །ཞེས་གསུངས་སོ། །ཉིད་ཀྱི་བྱང་ཆུབ་སེམས་དག་ལས། །འབྱུང་བ་རྣམས་ནི་རང་ལས་སྤྲུལ། །སྤྲོ་དང་བསྡུ་བ་རང་རྒྱུད་སྨིན། །རྒྱུ་ཡི་ངོ་བོ་གཞལ་ཡས་ཁང་། །ཕྱི་དང་ནང་ཀུན་གྲུ་གསུམ་ལ། །ལྕགས་མཁར་མེ་འོད་དུར་ཁྲོད་བརྒྱན། །དབུས་སུ་རུ་ཏྲ་ཕོ་མོ་བསྣོལ། །མ་ཧེའི་སྟེང་དུ་འདུག་པ་ཡི། །སྟེང་ཞལ་ཡབ་ཡུམ་འཁོར་ལོ་བསྒོམ། །ཆོ་ག་གསུམ་མམ་ལྔ་རུ་བསྐྱེད། །དེ་དག་མདུན་ནམ་སྤྱན་དྲུང་དུ། །གཤིན་རྗེ་གཤེད་པོ་བསྒོམ་དང་བསྐྱེད། །ཧཱུཾ༷་དང་ཡ་དང་མ་མ་ལས། །རང་རང་སྔགས་ཀྱིས་བསྐུལ་ཞིང་དམིགས། །ལས་ཀྱི་ཁྲོ་བོར་དབང་ཡང་བསྐུར། །ཏིང་འཛིན་དེ་ལ་དབང་ཐོབ་ནས། །ཞི་རྒྱས་དབང་དང་དྲག་པོ་དང་། །ཅི་འདོད་ལས་རྣམས་གདོན་མི་ཟ། །སེམས་ཀྱི་དངོས་༄༅ པོ་ཅིར་ཡང་བཏུབ། །དེས་ན་སྣ་ཚོགས་ཅིར་ཡང་སྤྲུལ། །གདུག་པ་ཚར་གཅོད་དོན་དུ་སྣང་། །དངོས་གྲུབ་རབ་འབྲིང་ཐ་མ་ཡང་། །དུས་དང་རྣམ་པར་འཕེལ་བར་འཀྱུར། །སྐུ་ཡི་ཕྱག་རྒྱ་ལུང་དུ་བསྟན། །འཇམ་དཔལ་གསང་བའི་རྒྱུད་ལས། །དཀྱིལ་འཁོར་འབྱུང་འཇུག་གི་ལེའུ་སྟེ་བཞི་པའོ།། །།དེ་ནས་འཇམ་དཔལ་འཇིགས་བྱེད་ཀྱི་རྒྱལ་པོས། སྐུ་གསུམ་མངོན་དུ་ཕྱུང་བ་ཞེས་བྱ་བ་ལ་སྙོམས་པར་ཞུགས་ཏེ། མཐུ་སྟོབས་ཀྱི་བདག་པོ་ཉིད་ཀྱིས་འདི་སྐད་ཅེས་གསོལ་ཏོ། །ཐབས་ཀྱི་འགྲོ་དོན་བྱ་བ་ཡི། །བཞི་དང་བསྐུལ་བའི་ལས་ནི་བྱ། །སྐུ་དང་སྦྱོར་བའི་གནས་སྐབས་དང་། །ཆོ་འཕྲུལ་ངོ་བོ་གང་ལས་བྱུང་། །སྐུ་དང་སྔགས་དང་སྦྱོར་བྱས་ནས། །ཧཱུཾ༷་ནི་མ་ལུས་བསྐྱེད་དང་སྡུད། །ཧ་ནི་ཐམས་ཅད་སྡུད་པ་སྟེ། །ང་ནི་མ་ལུས་དེ་ལ་གནས། །ཞ་་བསྐྱེད་མ་ལུས་འདུས་བའི་སྐུ། །སྐུ་ནི་སྤྲུལ་པ་ལྔ་ཡིས་སྐྱེད། །འགོ་དེ་དང་ཡང་འཚམས་སུ་སྦྱར། །ཧཱུཾ༷་ཨེ་ཡ༷་ར༷་ཁ༷་སུ་ལ༷། །གཉིས་ཀྱི་ཆོ་འཕྲུལ་ལྔ་རུ་འགྱུར། །ཐམས་ཅད་མ་ལུས་འདུས་པ་བསྒོམས། །བྲུ༷་ལས་རང་བཞིན་གནས་པར་བྱ། །ལས་ནི་རང་ར༷ང་སོ་སོར་བྱེད། །ཨོ་ནི་ཡེ་ཤེས་ལྔ་དང་ལྡན། །ཨོ་ཨུ་ཀྲོ་ཏེ་ཀ་ཡ་མན་ཏ་ཀ་ཧ་ན་མ་ཐ་བན་ཛ་ཧཱུཾ༷་ཕཊ། འབྲུ་རྣམས་གསང་སྔགས་དོན་དང་ལྡན། །ངོ་བོ་ས་བོན་དེ་ལ་གནས། །ཚིག་ཏུ་བརྗོད་པས་སྐུར་ཡང་འགྱུར། །ཨཱོཾསམཡམཉུཤིམུཏྲཡམན་ཏ་ཀ་བན་ཙ་ཏེ་རོ་ནི་ཧཱུཾ༷་ཛ། ཡེ་ཤེས་སྐུ་དང་དམ་ཚིག་དང་། ཁྲོ་བོ་མ་ལུས་སྤྲུལ་ཞིང་འགུག །ཡོན་ཏན་ལྷུན་གྲུབ་དམ་པའི་གསུང་། །ལས་རྣམས་གང་ཡང་སྙེས་བར་བྱེད། །གང་དག་སྔགས་འདི་གང་འཛིན་པ། །ཅི་འདོད་ལས་རྣམས་གྲུབ་པ་བསྙེམས། །གཤིན་རྗེའི་ལྷ་ཚོགས་མང་པོ་དང་། །རྡོ་རྗེ་གཡོན་དང་སྲིན་མོའི་སྔགས། །མ་མ་མ་དང་ཡ་འཁྲིལ་བས། །གདུག་པའི་སྦྱོར་ཡུམ་པ་ཏ་ལི། །མ་མ་རག་ཤ་ཡ་ག་ཤ་ཧཱུཾ༷་ཛུ་ཧཱུཾ༷། ཡ་མ་རྭ་ཛ་དྲི་ཛུ།མ་མ་རུ་ལུ་མ་ཧེ་སྨྱོ་ཧཱུཾ༷་ཕཊ། བདུད་འདུལ་ཁྲོ་བོ་ཁྲོ་མོ་རྣམས། །མ་ལུས་དེ་དག་རྣམ་པར་སྤྲོ། །ལྷ་ཚོགས་མ་ལུས་ངོར་བསྟན་ཏེ། །ཨོ་ཧྲིཁྱི་བི་ཀྲི་ཏ་ན་ན་ཧཱུཾ༷་ཕཊ། བཅུ་བདུན་སྔགས་དང་ཉི་ཤུ་དང་། །རང་རང་སྔགས་དང་འབྲུ་རྣམས་ཀྱིས། །བསྒོམ་བརྒྱུད་གསལ་བར་རབ་ཏུ་བརྟགས། །འཇིགས་བྱེད་འཁོར་བཅས་ཐུགས་ཀ་མྲ སྔགས་ཀྱི་འོད་ཟེར་སྐུར་སྤྲོས་ཀྱང་། །སྤྲོས་པས་སྟོང་གསུམ་སྐུ་ཡིས་གང་། །བསྟན་དང་གནས་དང་ང་རྒྱལ་ལས། །མ་ལུས་ཆོས་སུ་དེ་འདུས་སོ། །འཇམ་དཔལ་གསང་བའི་རྒྱུད་ལས། བསྐྱེད་པ་གསུང་གིས་འདུལ་བའི་ལེའུ་སྟེ་ལྔ་པའོ།། །།དེ་ནས་འཇམ་དཔལ་འཇིགས་བྱེད་རྒྱལ་པོ་དེས། །གསང་བའི་དཀྱིལ་འཁོར་བཞིར་འདེབས་ཞེས་བྱ་བ་དང་། དྲང་ཞིང་བསྐུལ་པ་ལ་སྙོམས་པར་ཞུགས་ཏེ། གསང་བའི་བདག་པོས་གསོལ་པ། ཡེ་ནས་དཀྱིལ་འཁོར་དག་པ་ལ། །གང་ནས་ཆོས་སྐུ་ཡེ་ཤེས་དང་། །བཅོམ་ལྡན་དཔལ་ཆེན་ཁྲོ་རྒྱལ་ནི། །བཞེངས་ཤིག་ཆོས་སྐུའི་ངང་ལས་བཞེངས། །ཡབ་ཡུམ་དེ་ཡི་ངང་ལ་གནས། །ཆོས་སྐུ་ཡེ་ནས་འཁྲུལ་ལ་སྣང་། །རང་བཞིན་ཡེ་ནས་དག་པ་ལ། །བཞེངས་དང་སྤྱན་དྲངས་མི་འགྱུར་ཡང་། །འགྲོ་དོན་སྤྲུལ་པས་ཆོས་ཀྱི་སྐུ་ལས་བཞེངས། །ཆོས་སྐུ་སྤྲུལ་པས་འགྲོ་དོན་སྤྱན་འདྲེན་ན། །དད་པ་དང་ནི་དམ་ཚིག་གིས། ཁུ་གསུམ་མཐིང་ནག་འབར་བའི་གཞལ་ཡས་སུ། །གདུག་པ་མ་ལུས་འདུལ་ཞིང་གཤེགས་པར་བྱའོ། །ཉོན་མོངས་ཞེ་སྡང་གདུག་པའི་གནས་ནས་ཀྱང་། །ཁྲོ་རྒྱལ་གདུག་པ་འདུལ་ཕྱིར་གཤེགས་སུ་གསོལ། །སྤྲུལ་པ་ཅིར་ཡང་གནས་པ་ལས། །མ་ལུས་ཀུན་ཏུ་གྲུབ་པར་ཤོག །འཇམ་དཔལ་གཤིན་རྗེ་གཤེད་པོ་ནི། །ཆོས་ཉིད་ཡེ་ནས་དག་པ་ལ། །ཁྲོ་བོ་འབར་བའི་སྐུ་རུ་བྱུང་། །དུར་ཁྲོད་འབར་བའི་རབ་ཏུ་བརྒྱན། །གདུག་པའི་སྐུ་ལ་ཁྲོ་བོའི་ང་རོ་སྒྲོགས། །སྐུ་ཡི་ཆ་ལུགས་སྐུ་མདོག་ཁྲོ་ལ་ནག །ཡི་དམ་རྒྱལ་པོ་དགོངས་པ་བསྐོངས་མཛད་པ། །འཇིགས་བྱེད་སྐུ་ལ་དད་པས་རབ་ཏུ་འདུད། ཁེན་ཏུ་ཡིག་འབྲུ་ཁྲོ་འདུས་ལས། །མཆོད་རྫས་མ་ལུས་གསང་བ་ཡི། །འབྲུ་དབྱངས་སེམས་ཀྱིས་རབ་སྤྲུལ་པ། །ཕྱོགས་བཅུ་ཐམས་ཅད་ཀུན་ཏུ་གང་། །ནམ་མཁའ་མཛོད་ཀྱི་རིག་པས་སྤྲུལ། །གཟའ་གཏད་ལོངས་སྤྱོད་བདུད་རྩིས་གང་། །ཕྱོགས་བཅུའི་འཇམ་དཔལ་འཁོར་བཅས་ལ། །དུག་གསུམ་གདུག་པས་མཉེས་པར་བྱ། །རང་གི་རིག་པ་སྐུར་དག་ཏུ་སྣང་། །དབུས་གསུམ་པ་ལ་ཕྱག་དྲུག་པོ། །སྤྱན་དགུ་ཞལ་བགྲད་མཆེ་བ་གཙིགས། །འབར་བའི་སྡང་མིག་གློག་ལྟར་འཁྱུག །ཕྱག་དྲུག་འགྲོ་དྲུག་གདུ༷ག་པ་འདུལ། །ཞབས་དྲུག་དོར་ཐབས་བརྐྱང་བསྐུམ་བཞུགས། །འཁོར་བ་སྟོང་མཛད་དུར་ཁྲོད་འབར་བའི་ཆས། །རྩེ་གཅིག་གདུག་པ་འདུལ་ཕྱིར་སྐུ་རུ་བཞེངས། །ཨོ་ཨུ་ཀྲོ་ཏེ་ཀ་ཡ་མན་ཏ་ཀ་ཡ་མ་རྭ་ཛ་སྭ་བཱ་ཡ་སྟོ། ཨེ་རྒྱ་ཧི། རུ་ལུ་རུ་ལུ་ཧཱུཾ༷་སྨྱོ་ཧཱུཾ༷། ཛ་ཧཱུཾ༷་བ༷་ཧོ། ཨོ་ས་མ་ཡ་མན་འཛུ་ཐྲེ་མུ་ཏྲ། ཡ་མན་ཏ་ཀ་པན་ཙ་ཏེ་རོ་ནི་ཧཱུཾ༷་ཛ། ཡ་མན་སྒ་ཡུ། ཛུ་ཛུ། འགུ་ཡ་ཨུ་ཀྲམ་ཛུ་ཛུ། ས་མ་ཡུ་ཛུ་ཧཱུཾ༷། ཧྲི་སྟི་ཨ་ན་ཡ་ཧཱུཾ༷་ཕཊ། ཁྱེད་ཀྱི་གསུང་ནི་ཁྲོ་མཆོག་སྟེ། །གདུག་པ་ཐབས་འདུལ་མ་ལུས་གཤེགས་སུ་གསོལ། །ཨོ་ཡ་མན་ཏ་ཀ་ཛུ། ཡུ་མ་ར་ཛ་ཧཱུཾ༷། འསྙུ་ཡ་ཙྭ་ན་མུ༷། མན་འཛུ་ཐྲེ་བྱིན་ཙྭ་ན། ཡ་མ་ཛ་ཡ་ནན། མུ་ཁ་ལེ་ཁ་ཐུན་མུག་ནན། ཨོ་ཡ་མ་རྭ་ཛུ་ཁ་ཐུན། ཡ་མ་རྭ་ཛུ་ཧཱུཾ༷། ཨོ་ཐྲེ་ཨ་ཀྲོ་བྱ་ཙིར་ཛ་ཧཱུཾ༷། ཧ༷་ཧེ་རོ་དེ་བག་ཛུ། ཛུ་ཧཱུཾ༷་བ༷་ཧོ་ཛུ་ཛུ། ཨོ་ཐྲི་མན་འཛུ་ཡ་མན་ཏ་ཀ །ཀ་མ་རུ་པ་ཧཱུཾ༷་ཛུ། གདུག་བྱེད་ས་མ་ཡ་སྨྱོ། གདུག་བྱེད་རག་ཤ་ཧེ། ཨ་ལ་ལ་སྨྱོ་ཧཱུཾ༷། ཡ་མ་ར་ཛ་ས་ཏོ། མེ་ཡ་རྦད་ཐུ༷་རི་ལི་ལི། ཕྱག་རྒྱ་གསལ་བའི་སྙིང་པོ་འདིས། །མ་ལུས་ཡེ་ཤེས་སྐུ་རུ་སྣང་། །རྒྱུན་དུ་བརྩལ་བ་བཅུ་གཉིས་སོ། །ལས་སུ་སོ་སོའི་རང་བདག་སྔགས། །སྔགས་དང་ཕྱག་རྒྱ་དམ་པ་འདིས། །ཐམས་ཅད་མ་ལུས་འདར་ཅིང་སྐྲག །འཇམ་དཔལ་གསང་བའི་རྒྱུད་ལས། སྔགས་དང་ཕྱག་རྒྱ་འཛིན་པའི་ལེའུ་སྟེ་བདུན་པའོ།། །།དེ་ནས་འཇིགས་བྱེད་ཀྱི་རྒྱལ་པོས། །དཀྱིལ་འཁོར་དུ་ཐམས་ཅད་འདུས་པར་མཆོད་པ་ལ་སྙོམས་པར་ཞུགས་ཏེ། གསང་བའི་བདག་པོས་གསོལ་བ། དཀྱིལ་འཁོར་གདོན་དང་མཉེས་དང་སྤྲོ། །གདུག་པ་འདུལ་ཕྱིར་གཤེགས་སུ་གསོལ། །གསང་བའི་བདག་པོས་གསང་བར་བྱོས། །མཆོག་ཏུ་གསང་བའི་ཡེ་ཤེས་སྐུ། །ཁྲོ་མོ་མ་ལུས་སྐུ་རུ་འདུས། །བདག་ཉིད་དཔལ་ཆེན་གསང་བའི་བདག །འཁོར་དང་བཅས་པ་བསམ་པར་བྱ། །ཐུགས་ཀར་ཉི་ཟླ་ཁ་སྦྱོར་སྦྱར། །འོད་དང་བཅས་པ་ཧཱུཾ༷་དུ་བསྒོམས། །རྩ་བའི་སྔགས་དང་འབྲུས་སུ་སྐོར། །སྔགས་ཀྱི་འབྲུས་བརྡས་འབྲུ་རུ་འཕྲོ། ཁམས་གསུམ་མ་ལུས་སྐུ་རུ་གང་། །ཁྲོ་བོ་མི་བཟད་དེ་དག་ཀྱང་། །རང་རང་སྐུ་དང་གསུང་དུ་གནས། །འོད་ཟེར་འབར་ནས་སྐུ་ལ་བསྟིམ། །འདུས་ཤིང་འཕྲོས་པས་སྐུ་རུ་སྣང་། །བསྐྱེད་དང་འདུས་པ་མ་ལུས་བྱ། །དམ་ཚིག་རོ་དང་ཚོགས་ལ་གནས། །ཨོ་དང་ཨ༷༷༷ཧཱུཾ༷་དག་ལས། །འཇིག་རྟེན་འཁོར་ཡུག་དཀྱིལ་འཁོར་དུ། །དངོས་པོ་མ་ལུས་ལོངས་སྤྱོད་ཀྱི། །ཡ༷་དང་ར༷་དང་བ༷་ལས་སུ། །སྟོང་གསུམ་འབྲས་བུ་བྱིན་གྱིས་བརླབས། །འདུས་པསགཏོརཚོགསམཆོདསྦྱིན་བྱ། ཁ་ཁ་ཁུ་ཧི་ཁུ་ཧི་བྷན་དྷ་ལྭ་བྷན་དྷ་ཡུ། ཏོ་ཤ་ཡུ་ཏོ་ཤ་ཡུ། སརྦ་ཨུ་ན་ཡ་ཧཱུཾ༷། འབུན་ཛུ་ཧོ། བི་བ་ཏོ། བྷ་ལིན་ཏ། ཁ་ཁ་ཧཱུཾ༷། རང་རང་སྔགས་ཀྱིས་སྦྱིན་དང་མཆོད། །ཚོགས་གཉིས་རབ་ཏུ་རྣམ་པར་དག །མ་ལུས་མཉེས་དང་དམ་པ་བསྐོང་། །རྣམ་དག་མཆོད་པ་རྒྱ་མཚོ་སྟེ། །ནམ་མཁའི་དབྱིངས་ན་གང་བར་བསྒོམས། །མ་ལུས་མཆོད་པ་དམ་པ་འགྲུབ། །ཏིང་འཛིན་ངེས་པར་རྒྱས་པར་བྱ། །མ་ལུས་དག་ཏུ་རབ་ཏུ་ངེས། །འཕགས་པ་འཇམ་དཔལ་གསང་བའི་རྒྱུད་ལས། སྐུ་སྤྲོ་མཆོད་པའི་ལེའུ་སྟེ་བརྒྱད་པའོ།། །།དེ་ནས་འཇིགས་བྱེད་རྒྱལ་པོས། སྔོན་འགྲོ་རྒྱུན་དུ་གནས་པ་ཞེས་བྱ་བ་ལ་སྙོམས་པར་ཞུགས་ཏེ། གསང་བའི་བདག་པོས་གསོལ་པ། སྐུ་གསུང་ཐུགས་དང་ཡོན་ཏན་དང་། །འཕྲིན་ལས་གསང་བའི་ལས་རྣམས་ནི། །ཐུགས་རྗེ་ཅན་གྱིས་བཤད་དུ་གསོལ། །དཔལ་དང་འགུ་རུ་སྐྲུན་ལ་བྱམས། །སྔགས་དང་ཕྱག་རྒྱ་རྒྱུན་དུ་གནས། །གནས་དང་གཞན་ལ་སྤྲོ་བ་མེན། །ཆ་ལུགས་དག་ལ་རབ་ཏུ་བསྟོད། །བསྙེན་བསྒྲུབ་དུས་ལ་རབ་ཏུ་འབད། །དུར་ཁྲོད་རྫས་ལ་དུས་སུ་འདུན། །བསྒྲུབ་དང་འགུ་རུ་དག་ལ་ནི། །ལས་རྣམས་མ་ལུས་རབ་འབྱམ་སོགས། །གསང་བའི་སྔགས་དང་ས་མ་ཏི། །དུས་གསུམ་དག་ཏུ་རྒྱུན་དུ་གནས། །སྐུ་ཡི་དམ་པ་གསུང་མཐུན་ལ། ཁུན་ནམ་ཡང་ན་དམ་དུ་གནས། །དཔའ་བརྟུལ་ཚང་ངམ་སྤྱོད་པ་བྱ། །སྡིག་མཛུབ་ཕྱར་ཞིང་གདུག་པ་འདུལ། །དུས་གསུམ་དག་གིས་ཕྱིར་ཡབ་ལ། །རྟག་ཏུ་དད་པས་རབ་ཏུ་བྱ། །དེ་ལ་གནས་ན་ལས་རྣམས་འགྲུག །སྙིང་རྗེ་བྱང་ཆུབ་ཐོབ་པ་མེད། །བསྒྲལ་བའི་ལུང་དང་བྱང་སེམས་རྟོགས། །སྐུ་གསུམ་སྤྱོད་ལམ་གྱི་གནས་ན། །སྡོམ་པ་མ་ལུས་སྤྱོད་པ་ཡིན། །མ་མཉམ་གཞུང་དང་གསོ་དང་བསྐངས། །ལས་རྣམས་ཀུན་ལ་རབ་བརྩོན་ན། །རྣལ་འབྱོར་ཞེས་ཀྱང་དེ་རུ་གྲགས། །དུས་གསུམ་རྣམ་པར་མཆོད་པས་མཆོད། །འདུ་འཛི་སྤང་ལ་དགོན་པར་གནས། །གསང་སྔགས་སྒྲ་དང་སྤྱོད་པ་རྣམས། །གཞན་གྱིས་མི་མཐོང་ཐོས་མི་བྱ། །ཚོགས་རྒྱུ་ཤ་དང་ཁྲག་ལ་རོལ། །དུར་ཁྲོད་རས་ནི་གདུག་པ་ལ། །གཤིན་རྗེ་གཤེད་པོ་བྲི་ཞིང་ལྡན། །མཆོད་དང་མ་ས་ཟས་སུ་ཟ། ཁུན་དང་རྟག་ཏུ་གནས་པ་ན། །ཅི་འདོད་ལས་རྣམས་འགྲུབ་པར་ངེས། །སྐུ་ཡི་བཞིན་དང་ངོ་བོ་ནི། །རྟོགས་དང་སྣང་དང་དངོས་པོ་ཀུན། །རྟོག་པ་ལོག་པ་མ་ཡིན་ཏེ། །དེ་ཉིད་སྐུ་དང་སྐུ་རུ་སྣང་། །རང་ཉིད་དག་པར་མ་རྟོག་པར། །འཁྲུལ་སེམས་ངན་པ་གདུག་པ་སྟེ། །འཁོར་བར་གནས་ནས་ཐར་མི་སྲིད། །ཞེ་སྡང་རྒྱུ་རུ་བྱས་ནས་སུ། །བསད་དང་བསྒྲལ་བའི་ཞེ་གཞག་ནས། །གཞི་ལ་སངས་རྒྱས་འཁོར་བའི་རྒྱུད། །དུས་དང་རྣམ་པ་ཐམས་ཅད་དུ། །བདག་ཉིད་དཔལ་ཆེན་གཤིན་རྗེའི་སྐུ། །གཡས་དང་གཡོན་ནི་སྦྱོར་དང་སྒྲོལ། །མདུནནསགཤིནརྗེའིསྤྲུལ་པ་འཕྲོ། །ཐམས་ཅད་ཁྲོ་བོའི་ཚོགས་དང་རོལ། །སྤྲུལ་པ་མ་ལུས་ཚོགས་སུ་སྣང་། །གཞི་ནི་དུར་ཁྲོད་འབར་བའི་གནས། །དང་པོ་གནས་བདག་བྱའི་ཕྱིར། །སྐུ་ལྔ་འཁོར་ལོའི་ཚུལ་དུ་བསྒོམ། །རང་རང་གནས་སུ་གསལ་བ་དང་། །བསྒྲུབ་དང་བཟླས་པས་གསང་གནས་སྤྱིན། །འཇམ་དཔལ་གསང་བའི་རྒྱུད་ལས། དམ་ཚིག་སྤྱོད་པ་རྒྱུན་གྱི་ལེའུ་སྟེ་དགུ་པའོ།། །།དེ་ནས་འཇིགས་བྱེད་གདུག་པ་དེས། །མི་བཟད་སྲིན་པོ་རོལ་པ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་ཅེས་གསོལ་ཏོ། །ཕྱག་མཚན་རྡོ་རྗེ་སྐུ་འཆང་བ། །གསང་བའི་བདག་པོ་སྐུ་འཆང་བ། །མ་ལུས་གདུག་པ་མི་བཟད་པའི། །སྲིན་མོ་གཏུམ་མོ་དམ་པ་དེ། །ཆོ་འཕྲུལ་གསུམ་རྣམས་བཤད་དུ་གསོལ། །ཅེས་པས། གཤིན་རྗེ་ཕོ་མོ་གདུག་པ་ཀུན། །རང་རང་ལས་དང་བྱ་བ་ཀུན། །གཉིས་དང་གསུམ་དུ་བྱ་བར་གསུངས། །བརྗོད་མེད་གདུལ་བྱ་འདི་གསུངས་པས། །འཇིག་རྟེན་ཁམས་རྣམས་རབ་ཏུ་འཁྲུགས། །གསང་སྔགས་དོན་གྱིངོ་བོ་ལས། །གཤིན་རྗེ་གདུག་པ་མི་བཟད་པ། །ཕོ་མོས་འཇིགས་རྟེན་མ་ལུས་བསྐང་། །དབུ་གསུམ་ཕྱག་ནི་དྲུག་པའམ། །ཞལ་གཅིག་ཕྱག་གཉིས་བཞིན་མི་སྡུག །དབུ་དང་ཞབས་ནི་ཁྲོས་པའི་ཚུལ། །དབུ་སྐྲ་སྤྱི་བཅིངས་རལ་གྲི་ཐོགས། །སྐུ་ཆེ་ཡན་ལག་རག་པར་སྣང་། །གཤིན་རྗེའི་སྲིན་མོ་གཏུམ་པ་མོ། །བརྡ་ནི་མིཕྲདབཞིནམིསྡུག །ཁྲགདང་ཞག་གིས་མངའ་བདག་བྱེད། །སེམས་ཅན་མ་ལུས་དབང་དུ་སྡུད། ཁེན་ཏུ་གཏུམ་པ་མ་མོའི་ཚོགས། །ཨེ་ཀ་ནག་པོ་ག་་པ་དང་། །བདུད་མོ་དཔོན་དང་གཡོག་ཏུ་བཅས། །གཅེར་བུ་མ་བགྲུངས་བདུད་ཀྱི་བུ། །གདུག་པའི་ཞལ་གདངས་མཆེ་བ་བཙིགས། །ལག་ན་ཏྲི་ཤུལ་ལྕགས་ཀྱུ་དང་། །ཐོད་ཁྲག་ཙི་ཏ་སྟོབ་པ་མོ། །དུར་ཁྲོད་རྒྱན་གྱིས་སྐུ་ལ་བརྒྱན། །སྦས་པ་མ་བཞི་འཁོར་དང་བཅས། །རང་རང་སྤྲུལ་པ་ཡང་སྤྲུལ་བདག །དེ་དག་སྔགས་ཀྱིས་བསྙེས་དང་གཟིར། །ཨོ་སྭ་མ་ཡ་མན་འཛུ་གྲི །ཡ་མན་ཏ་ཀ །ཡ་མར་ཛ། རབ་ཏུ་ཁྲོས་པས་འཇིག་རྟེན་དག །གདུག་ཅིང་རྩུབ་པའི་སྒྲ་དང་བཅས། །མ་ལུས་གདུག་པ་དབང་དུ་བསྡུས། །ཐམས་ཅད་ཀུན་གྱིས་ཡང་སྙིང་ཕུལ། །མ་མ་ཨེ་ཀ་ཛུ་ཏི་ཛུ་ཛུ། ཏྲག་རག་ཤ་མུ་ཏྲ་སྙིང་ཁ་རག་མ་སྨྱོ་སྨྱོ། རག་མོ་ཏེ་ཀུ་མ་ཛུ་ཛུ། ཁ་ཁ་མ་ཧི་སྨྱོ་སྨྱོ། ཡ་ཡ་ལོན། ཙིན་དན་མ་ལ་སྨྱོ་ཛུ། སྙིང་ཁ་རག་སྲོག་ལ་སྨྱོ་སྨྱོ། སྔགས་འཆང་དངོས་གྲུབ་ཅི་འདོད་པ། །ཐབས་དང་ཤེས་རབ་འོད་ཟེར་གྱིས། །འཇམ་དཔལ་ཡབ་ཡུམ་འཁོར་དང་བཅས། །སྒྱུ་འཕྲུལ་དྲ་བས་མངོན་རྫོགས་འགྲུབ། །རྩ་བ་འབོད་དང་སྐྱེད་བ་དང་། །སྲོག་སྔགས་བས་དང་བསྒྲུབ་པ་གནད། །ཐུགས་དམ་བསྐུལ་དང་རང་རང་སྔགས། །མ་ལུས་འདུས་པའི་ཐིག་ལེ་ཆེ། །གསུང་གི་ཆོ་འཕྲུལ་སྒྲར་གྲགས་ནས། །གཡོ་སྒྱུ་མེད་པར་མ་ལུས་བདུས། །ཐུགས་དམ་ཆེན་པོ་ས་མ་ཡུ། །འཇམ་དཔལ་གསང་བའི་རྒྱུད་ལས། རྩ་སྔགས་ཀྱི་ལེའུ་སྟེ་བཅུ་པའོ།། །།དེ་ནས་འཇམ་དཔལ་འཇིགས་བྱེད་ཀྱི་རྒྱལ་པོས་གཉིས་མེད་ཀྱི་བརྡས་བསྐུལ་ནས། དཀྱིལ་འཁོར་དབང་བསྐུར་གནས་པ་ལ་སྙོམས་པར་ཞུགས་ཏེ། གསང་བའི་བདག་པོས་ཞུས་པ། མ་ལུས་ཐབས་དང་རོལ་པས་སྤྲུལ། །ངོ་བོ་མི་འགྱུར་ཅིར་སྤྲུལ་པ། །དེ་དག་མ་ལུས་བསྟན་དུ་གསོལ། །བསམ་ཡས་དཀྱིལ་འཁོར་བསམ་ཡས་པ། །རིགས་གསུམ་སྔགས་ཀྱི་ངང་ལ་བཞག །གཞལ་ཡས་དག་པར་གདན་རྣམས་རྫོགས། །ལས་དང་བསྐུལ་བ་རང་རང་རྒྱུད། །རྩ་སྔགས་ཐུགས་མཆོག་ཕྱག་རྒྱར་གསལ། །རང་རང་གནས་སུ་རྫོགས་པ་དང་། །འབྱུང་འཇུག་སྐུ་དང་ངོ་བོར་སྣང་། །བསྐུལ་བ་ཡེ་ཤེས་བརྡ་དང་ཚིག །རོལ་པས་གཉིས་མེད་དགྱེས་པའི་ཚུལ། །འཕྲོས་པས་འདུས་ནས་གདན་སྟེངས་གནས། །རང་རང་སྔགས་ཀྱི་གདན་སྟེངས་གསལ། །སྤྱན་དྲངས་དགྱེས་དང་མཆོད་བསྟོད་དང་། །བཟླས་པ་རྒྱུན་དུ་དུས་གསུམ་བརྟགས། །སྟོང་གསུམ་མ་ལུས་སྤྲུལ་སྐུར་སྤྲོ། །འཇིག་རྟེན་གསུམ་པོ་རབ་ཏུ་གཡོས། །དཀྱིལ་འཁོར་ལྔ་དང་བདུན་ཡང་རུང་། །རང་རང་འཁོར་བཅས་འཁོར་ལོར་བཤད། །ཚུལ་དུ་ཡེ་ནས་གནས་པར་བཤད། །སྐུ་ཡི་འཁོར་བཅས་དེ་དག་ལ། །ཞག་གྲངས་དུས་དང་མཚན་མ་ཡང་། །རབ་ཏུ་རྒྱུན་དུ་གནས་པ་དང་། །འཇིགས་བྱེད་རབ་ཏུ་གདུག་པ་ཙམ། །བསྒྲུབ་ལ་མཉེས་པས་དབང་ཡང་གནས། །ཕན་དང་གནོད་པའི་ལས་ཀུན་གནས། །འཇམ་དཔལ་རྣོན་པོ་རྣམས་ཀྱི་སྐུ། །སྣང་ནི་ཅི་ཡང་སྣང་མོད་ཀྱི། །བཞིའམ་ངོ་བོ་ལྔ་བསྒོམས་པས། །གང་ཕྱིར་ཅི་དང་ཅི་ལ་གནས། །ང་ཡི་དུས་ནི་གང་ཡིན་པ། །དེ་ཚེ་ང་ཡི་བསྟན་པ་འབྱུང་། །ང་ཡི་འགྲོ་བ་ཅིས་འདུལ་བ། ཁྲེས་རབ་ཟུང་གིས་དབུ་ལྔ་སྲ །ཁྲག་འཐུང་ལྔ་ཡི་འཕྲེང་བ་བསྒོམས། །རྡོ་རྗེ་རྣོན་པོའི་སྐུ་དང་ནི། །ཅོད་པན་འཕྲེང་བ་རྒྱ་གྲམ་དང་། །རལ་གྲི་བུམ་པ་བསྙེན་བྱས་པ། །མ་ལུས་རང་གི་ཚིག་དོན་སྒྲགས། །བསྒོམ་པ་དང་ནི་བསྒྲུབ་པ་དང་། །རང་དང་རྒྱུད་དང་ལས་སུ་བྱིན། །སྲིད་པ་གསུམ་ལ་དབང་སྒྱུར་བའི། །དངོས་གྲུབ་རབ་འབྲིང་ཐ་མ་འགྲུབ། །མ་ལུས་ཡབ་ཡུམ་ས་མ་ཡ་སྟོམ། །ས་མ་ཡ་ཧོ། ཨ་ལ་ལ་ཧོ། ར་ཧོ་ཧ༷། ར་ག་ཡ་མ༷། རླུད་དང་མེ་དང་སྨིན་པས་འགྲུབ། །རོལ་པས་མ་ལུས་རྣམ་པར་སྤྲོ། །ཧཱུཾ༷་ལས་རྡོ་རྗེ་པ༷་ལས་པད། །ཡབ་ཡུམ་མཁའ་གསང་འབྲུ་རུ་བསྒོམས། །གསང་བའི་སྐུ་རྣམས་འབྱུང་བའི་རྒྱུ། །སྤྲོ་བསྡུ་གང་འདོད་དམིགས་བསྒྲུབ། །འཇམ་དཔལ་གསང་བའི་རྒྱུད་ལས།བསྒྲུབ་པ་པོ་ལ་དབང་བསྐུར་བའི་ལེའུ་སྟེ་བཅུ་གཅིག་པའོ།། །།དེ་ནས་འཇིགས་བྱེད་རྒྱལ་པོས། འཇིགས་བྱེད་ལས་ཀྱི་གདུག་པ་ཚར་གཅད་པ་ཞེས་བྱ་བ་ལ་སྙོམས་པར་ཞུགས་ཏེ། གསང་བདག་ཕྱག་ན་རྡོ་རྗེ་ཁྱོད། །འཇམ་དཔལ་རྒྱུད་ཀྱི་གསང་བ་འདི། །འཇིགས་བྱེད་སྒྱུ་འཕྲུལ་ལྡན་པ་སྟེ། །ཨེ་མ་གདུག་པ་འདུལ་བྱ་བ། །མ་ལུས་ངོ་བོ་བསྟན་དུ་གསོལ། །བསད་པའི་ངོ་བོའི་གནས་བསྟན་པ། །བསད་པ་མ་ལུས་ཡང་དག་འགྲུབ། །སྙིང་རྗེས་ཡང་དག་གདུག་པ་བསད། །སྔོན་དུ་གནས་པ་རྫོགས་བྱས་ལ། །དེ་ལ་རྒྱུ་རྣམས་གནས་པ་ནི། །དུར་ཁྲོད་དག་དང་འབུར་ཆོས་གོས། །རུ་རུ་ར་དང་ཀ་ན་ཀ །ཐལ་ཆེན་དག་དང་རུ་ག་ཙ། །རྨེ་བོའི་ཁྲག་དང་གདུག་པའི་དུག །མིང་བྱང་ཁྲོ་བོའི་སྣག་ཚ་བྱ། །དུར་ཁྲོད་རོ་སྐྲ་བླང་བ་དང་། ཁ་ཁ་རོག་པོ་བཤས་པའི་རྩ། །འཁོར་ལོ་བྲི་དང་གནས་པར་བྱ། །རིམ་པ་གསུམ་དུ་བསྐོར་བ་ཡང་། །དབུས་ལ་མི་འགྱུར་གདབ་པར་བྱ། །འཁོར་ལོ་རིམ་པ་གཉིས་སུ་བསྐོར། །བཅུ་བདུན་སྔགས་ཀྱི་འཕྲེང་བས་སྤྲས། །འཁོར་ལོའི་རིམ་པ་དེ་རུ་གདབ། །གདུག་པ་ཟ་བྱེད་འཆི་བདག་བྲི། །ལྷོ་རུ་སྲིད་པའི་འཁོར་ལོ་བཞུགས། །ལྷོ་ཕྱོགས་དུར་ཁྲོད་འཆི་བདག་ནི། །གནས་ནས་བཀུག་ལ་དབྱེར་མེད་བསྟིམ། །མཆོད་དེ་འཕྲིན་ལས་བཅོལ་བར་བྱ། །བྱིན་བརླབས་ལས་ནི་གཤེད་དུ་བསྒོམས། །ལུས་ཀྱི་ཐལ་བའི་མདོག་འདྲ་བའི། །དབྱུག་པ་ཐོགས་ཤིང་ཞགས་པས་འཆིང་། །སྲིད་པ་གསུམ་དུ་རྣམ་པར་འཁྲུགས། །བཅུ་བདུན་སྔགས་དང་ལས་སྔགས་སྤེལ། །བདུན་དང་བདུད་དུ་ལས་རྣམས་བསྐོར། །གདུག་པ་མྱོས་བྱེད་ཐུན་རྣམས་ནི། །རང་རང་དུས་དང་བཤམས་ལ་བརྡེག །འཇིག་རྟེན་དག་དང་ལྷར་སྦྱར་བ། །གདུག་པ་དེ་འདུལ་ནག་པོ་ལ། །གྲུ་གསུམ་དག་ཏུ་འཁོར་ལོ་བྲི། །དུས་གསུམ་རྒྱུན་དུ་བསྒྲུབ་པ་བྱ། །བཅུ་དང་བདུན་གྱིས་ལས་ཀྱི་སྔགས། །གདུག་དང་བསྲེག་དང་བྱུག་པ་བྱ། །ལས་ཀྱི་རྣམ་པ་མྱུར་བྱས་ལ། །རང་རིག་དཔལ་གྱི་སྐུར་གནས་པས། །བསྡུ་དང་སྤེལ་བའི་གསང་སྔགས་བཟླས། །ཡ་དང་མ་དང་ར་དང་ཙ། །ས་དོ་མེ་ཡང་གཞིབ་དང་བཏབས། །དབུས་ནས་མགོ་བོ་སྣང་བར་བྱ། །ཡ་དང་ཡོན་རི་ལསྒེ་ཡ། །དང་པོ་དུས་སུ་བཞི་རུ་བཤད། །དེ་ནི་རུ་སྤྲད་དུས་ལྟར་བྱ། །ཡ་མེ་དོ་རུ་ན་ཡོ་ད་ཡ། །དང་པོའི་འོག་མ་མཐའ་རུ་བཤད། །ཡསྒེ་ཡ་ཛ་ནི་ར་མ་ཡ། །རུ་སྦྲད་བརྒྱད་དུ་ཡ་ཡིས་བཤད། །མགོ་ལ་ཡ་དང་མེ་རུ་མཚོན། །རབ་ཏུ་བར་དག་རྒྱན་གྱིས་བརྒྱན། །ཐ་མ་རང་སྔགས་གང་འདོད་གཞུང་། །ཡ་མར་ཛ་གཤིན་རྗེ་གཤེད། །འཁོར་ལོ་བསྐོར་བ་ཉིན་བཞིའི་ལས། ཁ་ཐུན་ཁ་ལ་ཐུན་དུ་འབུད། །ཨོ་ཡ་མར་ཛ་ས་ཏོ་མེ་ཡུ་སྨྱོ། རུ་ལུ་རུ་ལུ་བ༷་རི་ལི་ལི་རྦད་ནན། ཨོ་དུབ་ནུར་དུབ་ནུར། ཚལ་པ་ཚལ་པ་ནན། ཨོ་སྙིང་གཤོགས། མེ་ཁ་ལ་མུ་ལོ་རྩ་ཐུན་ནན། མ་ར་ཡ་ནན། ཨོ་སུསྟི་རུ་རུ་ཙ་གོང་ཀྲ་ར་ཙ་ནན།མ་ར་ཡ་ནན། ཨོ་ཨ་ཀྲོ་ཏེ་ཀ་མན་འཛུ་ཕྲི། ཀ་ལ་རུ་པསྒ་ཡ་ནན། བ༷་རིལ་རྦད་རུ་ལུ་ཧཱུཾ༷་ཛུ། རུ་ལུ་ཚལ་པ་ཡིན་ནོ། ཁྲ་རུ་ནི་ནན། མ་ར་ཡ་ནན། ཨོ་ཞེས་དང་པོ་ཐ་མ་སྒྲོལ། །ག་་དང་བསྲེག་པ་ཐུན་དུ་དབབ། །ལས་ཀྱི་གནས་སུ་མ་ལུས་རང་། །མ་ར་ཡ་དང་མིང་དུ་སྤེལ། །གདུག་པའི་རྫས་ལ་རབ་ཏུ་སྔགས། །གནས་ནས་དགུག་དང་ལས་རྣམས་བྱ། །འཇམ་དཔལ་གསང་བའི་རྒྱུད་ལས། །འཕྲིན་ལས་གནས་ཀྱི་ལེའུ་སྟེ་བཅུ་གཉིས་པའོ།། །།དེ་ནས་དཔལ་འཇིགས་བྱེད་གསང་བས་ཏིང་ངེ་འཛིན་རོལ་པ་ཞེས་བྱ་བ་ལ་གནས་ནས། གསང་བའི་བདག་པོས་འདི་སྐད་གསོལ་ཏོ། །གཤིན་རྗེ་རོལ་པ་དེ་དག་རྣམས། །འཇིག་རྟེན་གདུག་པ་མི་བཟད་འདུལ། །ལས་རྣམས་མ་ལུས་རོལ་མཛད་པ། །བྱང་ཆུབ་རོལ་པས་ང་ལ་ཐུད། །ཆོས་སྐུ་ནམ་མཁའ་མཚན་མ་ལ། །ནམ་མཁའི་ངོ་བོ་ཅི་ཡང་མེད། །སྣང་བ་འཇིག་རྟེན་གཤིན་རྗེའི་སྐུ། །ཚོགས་ཆེན་གཉིས་རྫོགས་གཤིན་རྗེའི་སྐུ། །ཚོགས་ཆེན་གཉིས་རྫོགས་སྐུ་གསུང་ཐུགས། ཁུ་ཡི་སྐུ་ཡིས་འགྲོ་དོན་མཛད། །བསྒོམ་དང་གཉེན་པོ་ཅི་སྤྱད་ཀྱང་། །བྱང་ཆུབ་ལ་ནི་གཡོས་པ་མེད། །གདུལ་བྱ་སྣ་ཚོགས་མ་ལུས་པ། །ཅི་ལ་མོས་དང་ཅིས་འདུལ་སྟོན། །ཨ་ནི་བྱང་ཆུབ་སེམས་ཉིད་ལས། །སངས་རྒྱས་ཀུན་གྱི་སྐུ་སྤྲུལ་པ། །སྣ་ཚོགས་འབྱུང་བ་ཁྱོད་ལ་འདུད། །གསང་བའི་རྒྱུད་མཆོག་དམ་པ་ཡི། །སྔགས་དང་ཕྱག་རྒྱས་བྱིན་བརླབས་ནས། །བཅོམ་ལྡན་གཤིན་རྗེའི་སྐུ་རུ་སྣང་། །ཅིས་འདུག་ཅི་དང་གང་ཡང་རུང་། །བསད་པ་ལ་སོགས་སྨོས་ཅི་དགོས། །འཕྲིན་ལས་འབྱུང་བ་ཁྱོད་ལ་འདུད། །གསང་བའི་རྒྱུད་མཆོག་དམ་པ་འདི། །མི་བཟད་དེ་དང་དེ་རྣམས་ཀྱང་། །རང་གི་ངོ་བོ་དེ་ལྟར་དམིགས། །སངས་རྒྱས་ཀུན་གྱི་ཐུགས་ཀྱི་སྲས། །མཐུ་ཆེན་མ་ལུས་དབང་དུ་སྡུད། །སྐུ་ཡི་ཆོས་རྣམས་མ་ལུས་པ། །རེའི་ཡོན་ཏན་བརྗོད་མི་ལང་། །ངེས་པའི་བླ་མ་དམ་པ་དེས། །ངེས་པའི་བཞི་དང་ངོ་བོར་གྱུར། །ཁྲག་འཐུང་འཇམ་དཔལ་སྐུ་ལ་འདུད། །ཚོགས་ཀྱི་དཀྱིལ་འཁོར་གནས་པར་བྱ། །ཡིད་བཞིན་གཙུག་གི་ནོར་བུར་འགྱུར། །བདག་གིས་བསམ་པ་བརྟན་པ་ཡིས བསམ་པའི་ཡེ་ཤེས་བློ་གྲོས་ལྡན། །མཐའ་རྣམས་གཉིས་ལ་མི་ལྟ་ཞིང་། །ཉོན་མོངས་གདུག་པ་བྲལ་བར་བྱེད། །མ་ལུས་སྐུ་དང་ཐུགས་སུ་བསྟན། །འཇམ་དཔལ་གསང་བའི་རྒྱུད་ལས། འཕྲིན་ལས་སྒྲོལ་བཞིའི་ལེའུ་སྟེ་བཅུ་གསུམ་པའོ།། །།དེ་ནས་འཇམ་དཔལ་ཡུ་བཱ་རྭ་ཛུས། ཐམས་ཅད་ལ་ལས་བྱ་བ་དང་། །འཁོར་ལོ་མི་འགྱུར་སྣང་བ་སྟེ། །འགྱུར་ཞེས་བྱ་བ་འདི་གསུངས་སོ། །ལག་ན་རྡོ་རྗེར་གསང་བ་གྱིས། །བདུད་བཞི་གདུག་པ་འདི་ཡིས་ཆོམས། །དེ་བཞིན་གཤེགས་པའི་ཆོས་སྐུ་དེ། །དེ་ལ་མི་གནས་རྒྱུ་འདྲར་བྱས། །གནས་དང་སློབ་མ་རྫས་རྣམས་དང་། ཁུ་ཡི་ངོ་བོ་མ་ལུས་པ། །རྟགས་དེ་ངེས་པར་གཟུང་བར་བྱ། །རབ་ཏུ་རིམ་གསུམ་དཀྱིལ་འཁོར་ལ། །ཐིག་བཞི་བཏབ་པས་ལེ་ཚེ་དགུ། །བཅུ་གཉིས་དང་ནི་བཅུ་དྲུག་དང་། །གྲུ་ཆད་བར་ཁྱམས་སྒོ་རུ་བཅས། །ཕྱི་དང་ནང་དང་གསང་བ་གསུམ། །དབུས་སུ་འཇིགས་བྱེད་ཆེན་པོ་ལ། །གཡས་གཡོན་ལུས་དང་གྲིབམརསྣང། །གཤིན རྗེམཧེགདན་དུ་བཅས། །རྣམ་པ་མཆོག་ཏུ་རྫོགས་པར་གསལ། །ཞལ་དང་ཕྱག་ཞབས་སྐུ་མདོག་མཐིང་། །ཕྱོགས་བཞི་ལས་ཀྱི་གཤེད་བཞིར་སྣང་། །གཟུགས་རྣམས་སྣ་ཚོགས་ཅི་འདུལ་སྟོན། །རང་བཞིན་ངོ་བོ་ཐུགས་རྗེར་བཤད། །ལྷུན་གྱིས་གྲུབ་པའི་དཀྱིལ་འཁོར་དེ། །གནས་ནས་ཉེ་བར་བསྒྲུབ་པའི་ཕྱིར། །དབྱིངས་ནས་བཞེངས་དང་སྤྱན་དྲངས་མཆོད། །བསྟོད་དང་མཆོད་པའི་གནས་སུ་བྱ། །ཡི་གེ་གསུངས་ཀྱི་ཡན་ལག་བསྒྲགས། །དབུས་ཀྱི་གཤེད་པོ་འཁོར་དང་བཅས། །རང་སྔགས་ཡི་གེ་སྔགས་ཚིག་དང་། །ཇི་ལྟར་བསྒྲུབ་ན་ལས་སྨིན་འགྱུར། །ཕོ་དང་མོ་རུ་ཁ་སྦྱོར་བ། །ཐོད་པ་རས་དང་གདུག་པ་ཡི། །མི་བཟད་འཆི་བདག་གསང་བ་བྲི། །རྩ་བ་བཅུ་བདུན་སྔགས་དང་ལྡན། །སྐུ་གསུང་ཐུགས་དང་ཡོན་ཏན་དང་། །འཕྲིན་ལས་ལྔ་ཡི་བསྙེན་པ་འདིའོ། །ཨོ་ཨུ་ཀྲོ་ཏེ་ཀ་ཡ་མན་ཏ་ཀ་ཧ་ན་མ་ཐ་བན་ཛ་ཧཱུཾ༷་ཕཊ། ཨོ་ཀ་ལ་རུ་པ་ཧཱུཾ༷་ཕཊ། ཨོ་་ཧྲེཁྱི་བི་ཀྲི་ཏ་ན་ན་ཧཱུཾ༷་ཕཊ། ཨོ་ས་བཱ་ཡ་ཨུརུ་མན་འཛུ་ཐྲི་མུ་ཏྲ་ཡ་མན་ཏ་ཀ །པན་ཙ་ཏེ་རོ་ནི་ཧཱུཾ༷་ཛ། ཡ་མ་ར་ཛ་ས་ཏོ་མེ་ཡ།ཡ་མེ་དོ་རུ་ན་ཡོད་ཡ། ཡ་ཏ་ཡོ་ནིར་ཡ་སྒེ་ཡ། ཡསྒེ་ཡ་ཙ་ནི་ར་མ་ར་ཡ། དབུས་སུ་ཡ་དང་ལྷོ་རུ་མ། ཁྲར་དུ་སྒེ་ནི་ནུབ་ཏུ་མེ། །བྱང་དུ་རྟ་ཞེས་བྲི་བར་བྱ། །ར་ཛ་ས་ཏོ་རུ་ན་ཡོ་ནི། ར་ཡ་ཛ་ནི་འབྲུ་བཅུ་གཉིས། །ཕྱི་རིམ་དག་ལ་དགོད་པར་བྱ། །འཁོར་ལོ་བྲི་དང་བཏུན་ནས་བསྐོར། །ཐོད་པ་ལ་སོགས་རང་རང་རྫས། །མ་ལུས་གསང་བ་བཅུ་བདུན་བྲི། །གམས་སུ་གྲངས་དང་གཡོན་དུ་དྲང་། །བསྒྲུབ་དང་བསྒྲུབ་པ་ཆེན་པོ་བྱ། །འཁྲུལ་དང་འཁོར་དང་བསྡུ་བ་དང་། །དམ་པའི་གསང་བ་དེ་དག་ཀུན། །འདོད་ཆགས་ཞེ་སྡང་གཏི་མུག་ལ། །གཏོར་དང་གྲིལ་དང་རུ་ཁུག་བྱ། །འཇིགས་བྱེད་འབར་བའི་ཞལ་དུ་གདངས། །རྔམ་པའི་བརྡ་དང་ཚིག་ཏུ་བསྐུལ། །འཇིག་རྟེན་སྒྲོལ་བྱེད་ཡིག་འབྲུ་ཉི་མའི་ཟེར། །ཏིང་འཛིན་གྲང་ལྡན་གདུག་པ་མ་ལུས་འབྱེད། ཁྲེས་རབ་ཐབས་ལྡན་འཇིགས་པའི་སྐུ་རུ་སྤྲུལ། །མ་ལུས་སྒྲོལ་བའི་གསུང་བཀོད་འཁོར་ལོའིགསུང་། །རྡོ་རྗེ་འཇིགས་པའི་འཕྲིན་ལས་ཡེ་ནས་འགྲུབ། །འཇམ་དཔལ་གསང་བའི་རྒྱུད་ལས། འཁོར་ལོ་དང་འབྱུང་གནས་སྔགས་ཀྱི་ལེའུ་སྟེ་བཅུ་བཞི་པའོ།། །།དེ་ནས་དཔལ་གཤིན་རྗེའི་རྒྱལ་པོས། འབྱུང་པོ་མ་ལུས་དགུག་པ་དང་། །ལས་ཀྱི་མཐའ་ལ་གཉེར་གཏད་བྱ། །ཞེས་གསུངས་ཏེ། །སྟོབས་ཅན་རྡོ་རྗེ་འཛིན་པ་ཉོན། །དངོས་གྲུབ་སྤྱིན་དང་སྤེལ་བྱ་དང་། །འཇིགས་བྱེད་དཔལ་གྱི་སྐུར་གནས་ན། །བྱེ་བྲག་དག་ཏུ་གསོལ་བར་བྱ། །དུས་གསུམ་ཆོ་འཕྲུལ་རབ་ཏུ་གནས། །ཉམས་སུ་རང་རང་འགྲུབ་པ་ཙམ། །ཨོ་ཨ་ཀྲོ་ཏེ་ཀ་ཡ་མན་ཏ་ཀ །མན་ཛུ་གྲི་ཀ་ལ་རུ་པ་ཤ །མུ་ཁྱུད་སྔགས་དང་རང་གིས་མཐུ། །ཅི་ཕྱིར་གདུག་པའི་ལས་སུ་རྩམ། །མ་ལུས་འདུས་པའི་གསང་བ་སྟེ། །འབྱུང་པོའི་གཏོར་མ་རབ་ཏུ་བརྒྱན། །ཨོ༷་ཨ་ཧཱུཾ༷། ཛ་ཧཱུཾ༷་བ༷་ཧོ། ཨརུ་མན་འཛུ་ཐྲི། ཡ་མན་ཏ་ཀ་མ་མ་རག་ཤ་ནི་སྨྱོ། །ཨོ་བྷ་ལིང་ཏ། བ་ལིན་ཏི། ཏི་བྱ་ནི། ཏ་ཀི་ནི་འདའ་༄༅། ཁྲ ཁེ་ཏ་འབའ་ཏེ་བེ་ཁྲ། ས་མ་ཡེ། ལོ་ག་པ་སར། མེ་ཏ་ལི། སུ་ཏྲི་ཀྲོ་ཏ་སི་ཧ་བ་རི། ཁ་རག་ཧཱུཾ༷། ཡ་མ་ར་ཛ་ས་ཏོ་མེ་ཡ། ཡ་མེ་དོ་རུ་ན་ཡོ་ད་ཡེ། ཡ་ཏ་ཡོ་ནི་ར་ཡ་སྒེ་ཡ། ཡསྒེ་ཡ་ཙ་ནི་ར་མ་ར་ཡ། ཙ་ཏུར་སུར་རྒྱ། ཡ་མ་བོ་ཏི་སྲུཧྭ། ཡག་ཤ་སརྦ་བུརྙ་པྲེ་ཏ་ཡག་ཤ་ཡ་སྒེ་ཁྲོ་ཏི། སརྦ་བི་ཏ་ཁར། ཨི་ད༷་བྷ་ལིང་ལྷི་ཧ་ན། བྷན་ཛ་ཧོ། སི་པ་ཏོ། ས་མ་ཡ། མ་ཏྲི་ཤ༷ །མ་ཏ་ཧཱུཾ༷། ཨརུ་མན་འཛུ་ཕྲི། ཡ་མན་ཏ་ཀ་སརྦ་ཨ་ཙྭ་པ་ཡ་ཏི། མཧྭ་ཡ་མ་ར་ཛ་ཡེ། སརྦ་དུས་བསྟན་བསྒ་ཡ་བསྒ་ཡ། སརྦ་ཀརྨུ་ཧཱུཾ༷། ཏུ་རུ་ཏུ་མྲ ལ༷་ཧཱུཾ༷་ལ༷་ཧཱུཾ༷། ཀུ་རུ་ཀུ་རུ་ཧཱུཾ༷་ཕཊ། ཀི་རི་ཀི་རི་ཧཱུཾ༷་ཕཊ། སརྦ་ཤ་ཧྲུ༷་ན་ཤ་བཱ། སྟ༷་པ་ཡ་ཧཱུཾ༷་ཕཊ་གྲྭཧྭ། ཕྱག་རྒྱ་བསྒོམ་དང་རྒྱུན་དུ་གནས། །དགོངས་པ་མ་ལུས་ཐམས་ཅད་མཉེས། །སྣ་ཚོགས་མ་ལུས་ཅིག་བསྒོ་ཉན། །ནམ་མཁའི་ངང་ལ་སྐར་ཚོགས་འབྱུང་། །བྱུང་དང་མ་བྱུང་ད་ལྟར་གྱི། །བུ་ཙ་རབ་ཏུ་དད་པས་སྣང་། །འཇམ་དཔལ་གསང་བའི་རྒྱུད་ལས། ཐམས་ཅད་རེག་ཆོད་ཀྱི་ལེའུ་སྟེ་བཅོ་ལྔ་པའོ།། །།དེ་ནས་དཔལ་གཤིན་རྗེས་ཐམས་ཅད་ཚོགས་སུ་གཞོམ་པ་དང་བསྒྲལ་བ་ལ་གནས་ཏེ། གསང་བའི་བདག་པོས་གསོལ་པ། གདུག་པ་མ་ལུས་སྒྲལ་སྔགས་དང་། །ཅི་ཕྱིར་གཞི་དང་ལས་སུ་བསྟན། །མ་ལུས་སྣང་བ་བསྒྲལ་བྱས་ན། །ཅི་ཡང་འདུལ་བྱེད་ཁྱོད་ལ་འདུད། །ཡ་མ་ར་ཛས་ཏོ་མེ་ཡ། སྙིང་རྩ་ལ་ཁྲག་སྒྱུག །རུས་དང་རྩ་ལ་བྲེང་ཡསྒ་ཏེ་ཀུམ། བྲམ་བྲམ་སྙིང་ཁྱོད། །དཀྱིལ་འཁོར་དཀྱིལ་འཁོར་ཞེས་བྱ་བ། །རྣམ་པ་གསུམ་དུ་གསུངས་པ་ཡིན། །ཐུན་མོང་དཀྱིལ་འཁོར་འོག་མིན་གནས། །རྒྱལ་བ་སྲས་ཀྱིས་བསྐོར་བའོ། ཁྱད་པར་རང་ལུས་དཀྱིལ་འཁོར་ལ། །རྒྱལ་བ་སྲས་ཀྱིས་བསྐོར་བའོ། །རྟགས་ཀྱི་དཀྱིལ་འཁོར་མིག་ལའོ །བརྡའ་ཡི་དཀྱིལ་འཁོར་མན་ཤེལ་ལའོ། །དོན་གྱི་དཀྱིལ་འཁོར་ཙིསྟ་ལའོ། །རང་བྱུང་རྒྱལ་སྲས་མ་བསྐྱེད་རྫོགས། །རྫོགས་ཆེན་རྟོགས་པའི་རྣལ་འབྱོར་པ། །ཀུན་སྣང་དཀྱིལ་འཁོར་ཆེན་པོར་ཤར། །སྣང་སྲིད་རྣམ་དག་རྒྱལ་བའི་དཀྱིལ་འཁོར་དུ། །སངས་མ་རྒྱས་པ་གཅིག་ཀྱང་མེད། །སངས་རྒྱས་མ་ལུས་ཐམས་ཅད་ཀུན་ལ་ཁྱབ། །རང་བྱུང་སངས་རྒྱས་དཀྱིལ་འཁོར་སྐུ། །སྤྱན་དྲང་མཆོད་སྩོགས་བྱ་མི་དགོས། །ཡེ་མཉམ་ཐུགས་ཀྱི་དཀྱིལ་འཁོར་དང་། །འགྲོ་བ་རིགས་དྲུག་རང་སངས་རྒྱས། །མཁའ་དབྱིངས་རྣམ་དག་དཀྱིལ་འཁོར་དུ། །སྲིད་གསུམ་ཐམས་ཅད་རང་སངས་རྒྱས། །རང་བྱུང་ཡེ་ཤེས་དཀྱིལ་འཁོར་དེ། ཁམས་གསུམ་སེམས་ཅན་རང་སངས་རྒྱས། །མཉམ་པའི་རྒྱལ་པོ་ཐུགས་ཀྱི་དཀྱིལ་འཁོར་དུ། །ཕྱི་ནང་སྣོད་བཅུད་རང་སངས་རྒྱས། །དཀྱིལ་འཁོར་ཆེན་པོ་མཁའ་ལྟརཁྱབ། །མཉམ་པར་ཤེས་པས་བསྐྱེད་དུ་མེད། །མེད་པར་ཤེས་པས་ཐམས་ཅད་རྫོགས། །རྫོགས་པ་རང་བྱུང་དཀྱིལ་འཁོར་ཡིན། །ཞེས་གསུངས་སོ། །ལྷ་མ་ཡིན་གཡུལ་ཟློག་གི་རྒྱུད་ལས། དཀྱིལ་འཁོར་གཏན་ལ་ཤ་ཀ་རི་ཀ །ཞེས་སྐུ་དང་ལས་མངོན་དུ་ཕྱུང་ངོ་། །འཕགས་པ་འཇམ་དཔལ་གསང་བའི་རྒྱུད་ལས། གདུག་པ་སྔགས་ཀྱི་ལེའུ་སྟེ་བཅུ་དྲུག་པའོ།། །།དེ་ནས་དཔལ་འཇིགས་བྱེད་ཀྱི་རྒྱལ་པོས། ལས་རྣམ་པར་སྦྱང་བ་ཞེས་བྱ་བ་འདི་གསུངས་སོ། །གསང་བདག་རྡོ་རྗེ་འཛིན་པ་ཁྱོད། །ཤིན་ཏུ་འཕྲིན་ལས་རྣམ་པ་བཞི། །ལས་སུ་བྱ་དང་གདུལ་བྱའི་ཕྱིར། །མ་ལུས་ངེས་དོན་ལས་རྫོགས་བྱ། །ཀུན་ཏུ་འཇམ་དཔལ་ཏིང་འཛིན་བྱ། །སྣ་ཚོགས་རང་གི་ཏིང་འཛིན་འཇུག །མ་ལུས་ཞི་དང་རྒྱས་པའི་ཕྱིར། །སྔོན་དུ་བསྙེན་པའི་ཚོགས་ལྡན་པས། །རང་གི་ལས་སུ་བྱ་བ་དང་། །གནས་དང་དུས་དང་བདག་ཉིད་ཀྱིས། །རྫས་དང་བྱ་བ་རྣམ་ཕྱེ་བ། །མི་འདུལ་ཁ་ལོ་རྣམས་བསྒྱུར་བ། །བདག་ཉིད་གཤེད་པོའི་ཆ་ལུགས་སུ། །ལྔ་དང་གསུམ་གྱི་རིམ་བྱས་ལ། །ལས་ཀྱི་བྱ་བ་མ་ལུས་པར། ཁ་དོག་སོ་སོའི་སྐུ་རུ་གནས། །མ་ལུས་སྒྱུ་ཡི་ཕྱག་མཚན་ལས། །ངག་གིས་རབ་ཏུ་བརྡམས་ནས་སུ། །གདུག་པའི་མྱོས་བྱེད་རྫས་རྣམས་དང་། །རང་གི་རིག་པའི་འཁོར་ལོ་བྲི། །རིམ་པ་གསུམ་དུ་གནས་པ་དེ། །དགུ་དང་བཅུ་གཉིས་བཅུ་དྲུག་བྲི། །བཅུ་བདུན་སྔགས་ཀྱི་འོད་ཟེར་སྐུ། །འདོག་སྔགས་རང་རང་མིང་དང་སྤེལ། །འཁོར་ལོ་ཡབ་དང་ཡུམ་དང་བཅས། །གདུག་པའི་ལས་སུ་འདི་ཡིས་བྱ། །ཙ་ཏྲ་དང་ནི་སྟོབས་དག་དང་། །ཙན་ཏྲ་མ་ནི་ཡ་མ་ཁྲོས། །སྔགས་དང་མིང་དུ་སྤེལ་ལ་གཞུག །དེ་ནས་སྟོབས་དག་མ་ལུས་དང་། །བསྙེན་པའི་རྩ་སྔགས་འཇུག་མ་ཡང་། །མ་ནོར་ལས་སུ་སྤེལ་བར་བྱ། །ཞི་བ་ཤན་ཏི་ཀུ་རུ་དང་། །པུས་ཏིང་པ་ཤ༷་ཀུ་རུ་དང་། །མ་ར་ཡ་དང་མིང་དུ་བཅས། །རེ་དང་བདུད་དང་བྲལ་བ་དང་། །གང་དུ་ཅི་བྱ་དབང་དུ་བྱ། །བསྙེན་བསྒྲུབ་གཞུང་བཞིན་འབད་དེ་བྱ། །གྲངས་དང་དུས་དང་མཚན་མ་ནི། །བསྟན་དང་གནས་དང་ལས་གྲུབ་བྱ། །ཆོས་དབྱིངས་ཡེ་ནས་ཁྱད་པར་གནས། །གཤིན་རྗེ་གཤེད་པོའི་སྐུ་དང་ཡང་། །འཁོར་དང་མ་ཚོགས་སྐར་ལྟར་འཁྲུགས། །གང་ལ་བྱ་བ་དེ་དང་དེར། །འོད་ཟེར་རང་རེའི་ལུང་དུ་སྤྲོ། །སྤྱན་དྲངས་བཞུགས་དང་བསྟན་པར་བྱ། །མི་གཡོ་ཁྲོས་པའི་ཚུལ་ཅན་དེ། །དགའ་དང་བསྟོད་མཉེས་ཅི་རུང་བསྟན། །དེ་དག་ཐུགས་དང་འཁོར་ལོ་སྲ །གང་གི་འབྲུ་རྣམས་བསམ་བྱས་ལ། །བསྒྲུབ་བྱ་མདུན་དུ་བཞུགས་པར་བསམ། །བདག་གི་འབྲུ་དང་འོད་ཟེར་ལས། །སྤྲུལ་པ་གང་བྱ་དེ་ལ་འདུད། །བསད་དང་གཡོ་དང་ལུས་དང་ཕན། །ཅི་དང་ཅི་རུ་རབ་ཏུ་བསྒོམས། །མ་ལུས་ཕྱེ་བའི་ཕྱག་རྒྱ་འདུས། །ཕྱི་མ་ཡང་ནི་ཐོག་པ་མེད། །ཅེས་གསུངས་སོ། །འཇམ་དཔལ་གསང་བའི་རྒྱུད་ལས། ལས་རྣམ་བཞིའི་ཝེའུ་སྟེ་བཅུ་བདུན་པའོ།། །།དེ་ནས་དཔལ་ཁྲག་འཐུང་རྒྱལ་པོས། ལས་ཀྱི་མཆོད་པ་དང་མནན་པ་བསྲེག་པ་ཞེས་བྱ་བ་འདི་གསུངས་སོ། །གསང་་བའི་བདག་པོ་རྡོ་རྗེ་འཛིན། །ལས་རྣམས་མ་ལུས་རྫོགས་བྱས་ནས། །སྟོང་གསུང་དཔལ་གྱི་ཕྱག་རྒྱར་གསལ། །སྣ་ཚོགས་མེ་ཡི་ཏིང་ངེ་འཛིན། །ཞི་རྒྱས་དབང་དང་མངོན་སྤྱོད་ཀྱི། །མེ་ཐབ་ལས་ཀྱི་གཞུད་དུ་གནས། ཁ་དོག་རྫས་ནི་རྣམ་པ་བཞི། །དཀར་དང་སེར་དང་དམར་དང་ནག །དེ་དག་དུ་མ་ཡོ་བྱད་ལྡན། །བསྐྱེད་དང་སྤྱན་དྲངས་མཆོད་ལས་བསྒོ། །ལས་སུ་བྱ་བ་རྫོགས་པ་དང་། །མེ་ཡི་བདག་པོའི་ལས་རྣམས་བྱ། །གདུག་པའི་ཤིང་ལས་མེ་སྤར་ཏེ། །མེ་ལས་རྒྱུ་ཡི་ལས་བྱ་སྟེ། ་།་གསུམ་འབར་བའི་དཀྱིལ་འཁོར་དུ། །ཞེ་སྡང་གདུག་པ་བསྒྲལ་བའི་ཕྱིར། །ཐམས་ཅད་མ་ལུས་མཆོད་པར་བཞེས། །འགྲོ་བའི་ས་རུ་རྫོགས་བྱས་ན། །རྣམ་བཞིའི་ལས་ལ་རབ་ཏུ་གནས། །གསང་བའི་གསང་གཏོར་རབ་ཏུ་བྱ། །བྲམ་ཟེ་ཙན་དྷ་ལི་དང་ནི། །ཡེ་ཤེས་གདུག་པ་མེས་སུ་སྦྱར། །བཅུ་དང་བདུན་དང་རང་སྔགས་རྣམས། །བརྒྱ་རྩ་བརྒྱད་དུ་རྣམ་པར་མཆོད། །གདོད་ནས་གདུག་པ་མ་ལུས་པ། །མ་ལུས་ཞི་ཞིང་བསྒྲལ་ལུང་བསྟན། །རྫས་དང་བརྒྱད་བཅས་མ་ལུས་དང་། །རང་དང་གནས་སུ་སྟོབས་བཅས་ལ། །མེ་ལྷ་རང་བདག་གཞུད་དུ་སྦྱར། །གང་གི་གནས་སུ་རབ་ཏུ་རྟགས། །ལས་ནི་མ་ལུས་གནས་བཅས་སོ། །ཨོ་ཧྲིསྒྱི་བི་ཀྲི་ཏྭན་ན་ཧཱུཾ༷་ཕཊ། བར་དུ་རང་དང་འདོད་པ་ཡང་། །གང་དང་གང་དུ་བྱ་བ་དེར། །དེ་དང་དེ་རུ་བྱ་བར་གཞུག ཁྲརྙི་ཀུ་སྲ པུསིཊ་པ་ཤང་མ་ར་ཡ་ཧཱུཾ༷་ཕཊ། ཛ་ཧཱུཾ༷་བ༷་ཧོ། སརྦ་ཨུ་ན་ཡ་ཧོ། མ་དྷ་ལ་མ་ཧེ། ཨ་གད་ཛ་ཡ་སོ་བཱ་ཛུ་ཛུ། ཤིན་ཏུ་་བྲུག་པ་མ་ལུས་པ། །སྔོན་དང་ད་ལྟ་ལས་ཀྱི་བཞིན། །བསྒྲིབ་པ་མེད་པ་ས་ཡ་དང་། །མ་ལུས་དེ་དག་རབ་ཏུ་འཇོམས། །འཇམ་དཔལ་རྣམས་ཀྱི་སྣང་བར་མཛོད། །མ་ལུས་བཤད་ཅིང་དམ་ཚིག་བསྒྲག །ཨུ་ལ་ལ་ཧོ། ས་མ་ཡ་ཧཱུཾ༷། འཇམ་དཔལ་གསང་བའི་རྒྱུད་ལས། མཆོད་སྒྲོལ་སྤྱིན་སྲེག་གི་ལེའུ་སྟེ་བཅོ་བརྒྱད་པའོ།། །།དེ་ནས་ཡང་དཔལ་འཇིགས་བྱེད་ཀྱི་རྒྱལ་པོས། ཕྱི་ནང་རྒྱུད་དུ་རོལ་པ་ལ་སྙོམས་པར་ཞུགས་ཏེ། གསང་བ་པོས་ཞུས་པ། མི་དམིགས་སྟོང་པ་ཡེ་ནས་གནས། །དེ་ཡི་ངོ་བོ་གང་དུ་འགྱུར། །ཞེས་པས། འཇམ་དཔལ་ཁྲོ་བོ་རྣམས་ཀྱི་སྐུ། །ཆོ་འཕྲུལ་སྣ་ཚོགས་ཅིར་ཡང་སྣང་། །ཀུན་ཏུ་རིན་པོ་ཆེ་ལྟ་བུ། །བསྒོམས་པས་ལས་རྣམས་མ་ལུས་འགྲུབ། །དེ་ལས་རྡོ་རྗེ་རབ་འཕྲོས་འགྱུར། །སྲིད་པའི་རླུད་ཡང་མི་ཤོར་གནས། ཁྲེས་བྱ་གནས་མེད་མི་རྟོགས་པ། །རིམ་པ་ལྔ་དང་གཞལ་ཡས་བསམ། །བྱང་ཆུབ་ལྔ་ལས་རྡོ་རྗེའི་སྐུ། །ཞལ་གསུམ་ཕྱག་དྲུག་སྐུ་མདོག་མཐིང་། །ངོ་བོ་སྟོབས་དག་རྡོ་རྗེའི་སྐུ། །སྟེང་ཞལ་ཡབ་དང་ཡུམ་དུ་གསལ། །ཞེ་སྡང་ང་རྒྱལ་འདོད་ཆགས་དང་། །ཕྲག་དོག་སྐུ་བཞི་ཁྲོ་རྒྱལ་བཞི། །རང་བཞིན་ལུས་དང་ཕྱག་རྒྱ་དགོད། །ལུས་ཀྱི་ཕྱག་ལ་འཁོར་ལོ་བྲི། །དྲག་སྔགས་བཅུ་བདུན་གནས་སུ་དགོད། །མི་གཡོ་བརྟན་ནས་སྤྱན་དྲངས་མཆོད། །བསྟན་དང་འཕྲིན་ལས་འཕྲོ་འདུ་བྱ། །བདུད་བཞི་འཇོམས་བྱེད་གཤེད་པོ་ཡིས། །བཅུ་བདུན་སྔགས་ཀྱི་ངོ་བོ་ཡིས། །མོ་གཤེད་ཐུན་སྔགས་སྤེལ་བྱས་ལ། །གཟས་པ་འཁོར་ལོའི་བར་དུ་གྲིལ། །རྩ་བའི་སྔགས་དང་ཐུན་མོང་དྲིལ། །བདུད་རྩི་ལྔ་དང་ཚོགས་ཀྱིས་མཆོད། །ཐུགས་ཀྱི་རྟགས་ལས་ལྷ་མོས་མཆོད། །དུས་གསུམ་སངས་རྒྱས་རྣམས་ཀྱི་སྐུ། །བ་ལ་བ་ཡི་སྒྲ་བྱུང་བས། །འཇམ་དཔལ་ཡེ་ཤེས་སེམས་དཔར་སྣང་། །འགྲོ་དོན་བྱེད་པས་དུས་གསུམ་མཆོད། །སངས་རྒྱས་འཕྲིན་ལས་སྐུ་ལ་རྫོགས་ཡེ་ཤེས་སྐུ་སྟེ་སྐུ་ཡི་མཆོག །སྣང་བ་ཆེན་པོ་སྐུ་ཡི་རྒྱལ། །དེ་ཡི་གསང་སྔགས་རིག་སྔགས་མཆོད། །ས་མ་ཡ་ཙྭ་ན། ཨོ་ལྷུ་གི་ཤྭ་རི་མུ༷། གསང་བའི་དོན་དེ་རབ་འཛིན་པ། །འགྲོ་བའི་དོན་ནི་མ་ལུས་བྱེད། །འཇིག་རྟེན་བདག་པོ་གཙོ་བོར་མཐོང་། །ཚོགས་རྫོགས་མ་ལུས་ཐམས་ཅད་འགྲུབ། །གཟུགས་རྣམས་མ་ལུས་ཀུན་ཏུ་སྤྲུལ། །འཇམ་དཔལ་ཞི་དང་ཁྲོ་བོར་སྣང་། །སྲིད་པ་གསུམ་ལ་སྦྱོར་དང་སྒྲོལ། །ས་བོན་བསྐྱེད་དང་རྒྱུན་སྔགས་དང་། །བསྐུལ་དང་མ་ལུས་རང་གནས་བརྗོད། །དགའ་བ་མཆོད་དང་སྤྲོ་བསྡུ་བཟླས། །ཨོ་ས་མྱ་ཡུ་མན་འཛུ་ཕྲི་མུ་ཏ་ཡ་མན་ཏ་ཀ །ཀ་ཏ་རི་བཛྲ་ཏིག་སྣ།ས་མ་ཡ་ཕཊ། སུམ་པ་ནི་ཧཱུཾ༷་ཕཊ། ཡ་སུམ་བྷ་ནི་ཧཱུཾ༷་ཕཊ། གསང་བ་པོས་ནི་བཟློག་པ་བྱ། །རྣལ་འབྱོར་རྩ་བ་ཉི་ཤུ་བརྗོད། །སྐུ་མདོག་འོད་ཟེར་སྒྲིབ་པ་གྲོལ། །སྐུ་མཆོག་སྐུ་རུ་རབ་ཏུ་གནས། །སངས་རྒྱས་འཕྲིན་ལས་མ་ལུས་བྱེད། །ཕྱག་ན་རྡོ་རྗེ་ཡང་དག་འདུད། །འཇམ་དཔལ་གསང་བའི་རྒྱུད་ལས། ཕྱི་ནང་རོལ་པའི་ལེའུ་སྟེ་བཅུ་དགུ་པའོ།། །།དེ་ནས་དཔལ་འཇིགས་བྱེད་གསང་བས། མི་འདུལ་ལས་ཀྱི་མཐའ་རུ་སྐྱེ་བྱ་བ་གསུངས་སོ། །གསང་བ་པོས་ནི་ལས་ཀྱི་བསྐོངས། །ཅི་ཡང་ཡིན་པས་བསྒྲུབ་བྱ་དང་། །མཐའ་རུ་མི་འདུལ་ལས་ཀྱི་དོན། །བདག་དོན་མ་ལུས་རབ་རྟགས་བྱ། །དེས་སུ་ལས་གཞུང་རབ་རྙེད་པ། །སྟོང་གསུམ་འོག་གི་ཁམས་དག་ན། །མི་བཟད་གདུག་པའི་གྲོང་ཁྱེར་གནས། །བདག་དང་འཁོར་བཅས་འཁོར་ལོར་གནས། །རི་རབ་ལམ་དང་བྲུམ་དུ་སྦྱར། །འཁོར་ལོ་གདུག་པའི་ཚོགས་ལ་གཏད། །གདུག་པའི་གནས་དང་གནོད་སྤྱིན་གནས། ཤེན་ཏུ་འདུ་བར་སྦ་བྱས་ཏེ། ཁྲུ་གསུམ་དངོས་དང་དབྱིབས་སུ་བྱ། །དེ་རུ་ལས་ཀྱི་རྒྱུ་གནས་པས། །ཁྲག་ཏུ་སྒྱུག་དང་མཛེ་ནད་འོང་། །མ་ལུས་དེ་ལ་འདུས་པར་བྱ། །ཏིང་འཛིན་སྔགས་དང་ཕྱག་རྒྱས་གདབ། །ལག་པ་བསྣོལ་ལ་སོར་མོ་དགུག །རབ་ཏུ་ཕྱེ་ཞིང་དངོས་སུ་གདབ། །གདུག་པ་འདུལ་བྱེད་རྗོམ་པའི་གཟུགས། །སྲིན་མོ་མི་བགྲུངས་འཁོར་དང་བཅས། །འཇིག་རྟེན་ཁམས་ནི་རབ་འབྱམ་ན། །སེམས་ཅན་ལས་ངན་གདུག་པ་རྣམས། །བྱང་ཆུབ་ངང་དུ་མི་གནས་ན། །རྒྱ་མཚོ་གཏིང་གི་གྲོངཁྱེརདང། །གཤིན བུརྗེཡི ལག་ཏུ་གཏད། །འཆི་བདག་གདུག་པའི་ཟས་སུ་བྱས། །འཁོར་ལོ་འབར་བའི་རྩིབས་ལ་བསྐྱོན། །ལས་ཀྱི་འཁོར་བཅས་མ་ལུས་ཀྱིས། །ལས་ངན་གདུལ་བྱ་གཤེད་དུས་གྱིས། །བཛྲ་ལམ་སུཆུ་༷། ས་མ་ཡ་སྟོ༷། ས་མུ་ཡ་ཧཱུཾ༷་ནན། ཡ་མ་ར་ཛ་ནན། འཁོར་དང་བཅས་པའི་འཁོར་ལོ་དང་། །དེ་ཡི་མདའ་བཞུགས་འཆི་བདག་ལ། །མ་ལུས་ལས་ངན་གཉེར་གཏད་དོ། །ཨོ་ལ༷་ཧཱུཾ༷་ལ༷། ཡ་མན་ཏ་ཀ །ཨརུ་ཨུ་ཙ་ལ། མ་མོ་ཨེ་ཀ་ཛ་ཏི། རག་ཤ་ནག་པོ་ས་མ་ཡ་ལས་ལ་སྨྱོ། ཧཱུཾ༷། རི་རབ་ལྷུན་པོ་ཧཱུཾ༷་དང་ལ༷། །སྣ་ཚོགས་རྒྱ་གྲམ་ཟུར་བརྒྱད་བྱ། །གཤིན་རྗེ་གཤེད་པོ་ནག་པོ་བསམ། །རྡོ་རྗེ་རྒྱ་གྲམ་འོག་ཏུ་ནི། །གཙོ་བོ་བསྟོད་ལ་རང་སྔགས་བསྐུལ། །གཟས་བ་རི་རབ་ཆེན་པོར་གནན། །འཁོར་ལོ་གསང་བའི་ལས་སྔགས་བསྐུལ། །ཞི་དང་རྒྱས་དང་དབང་དྲག་རྣམས། །རིམས་ཀྱི་རི་རབ་ས་དང་སྦྱར། །བརྟུལ་ཞུགས་ཅན་གྱི་མཉེས་བྱས་ལ། །གདུག་པའི་ལས་སྔགས་ཤམ་བུ་ཅན། །ཚ་བའི་རྫས་ལ་སྔགས་ལ་བྲག །ཆོས་རྣམས་མ་ལུས་རྒྱས་བྱའི་ཕྱིར། །གཏུམ་པ་ཚོགས་ཀྱི་བསམ་གཏན་གྱིས། །ཡང་དང་ཡང་དུ་ལྟུག་ཅིང་གནན། །སངས་རྒྱས་བསྟན་པ་འཕེལ་བར་འགྱུར། །འཇམ་དཔལ་གསང་བའི་རྒྱུད་ལས། མན་ངག་གཤེད་གཏད་ཀྱི་ལེའུ་སྟེ་ཉི་ཤུ་པའོ།། །།དེ་ནས་དཔལ་འཇིགས་བྱེད་རྒྱལ་པོས། མ་ལུས་སྤོགས་དང་ལས་ཀྱི་མཐའ། །འདི་ལ་དོན་ནི་བརྒྱད་ཀྱིས་བསྟན། །གསང་བ་པོ་ལ་གསང་བར་བྱོས། །བྱང་ཆུབ་སེམས་དང་དབང་ཕྱུག་ལ། །བདག་ཉིད་འཁོར་བཅས་བསམ་པར་བྱ། །ས་དང་བཀའ་གཉན་གདུག་པ་འདུལ། །གང་བསྒོ་ལས་སུ་བྱེད་པར་འགྱུར། །དེ་ནི་མི་བཟད་སྟེང་དག་ཏུ། །གདན་དང་རང་རིགས་དུར་ཁྲོད་རྫས། །དངོས་པོ་རང་གི་མཚན་ཉིད་བྱ། །རྒྱ་གྲམ་ལས་བཞི་གདུག་པ་བཅིང་། །འཇམ་དཔལ་ཁྲོས་པས་ཕུར་པའི་སྐུ། །སྟོད་ནི་ཡ་མན་ཏ་ཀ་ལ། །སྨད་ནི་གདུག་པའི་ཕུར་པར་བསྒོམས། །ཡ་མ་ར་ཛ་ཡབ་ཡུམ་ཀྱང་། །སྐུ་ནི་ཕུར་པས་རབ་ཏུ་གདག །ཡང་ན་བླ་མེད་འཁོར་ལོ་བྱ། །དེ་ཉིད་བྱིན་དང་ལྡན་པའི་ཕྱིར། །ཡབ་ཡུམ་གཉིས་མེད་རོལ་པ་ལས། །ཕུར་པའི་སྐུ་དང་ངོ་བོར་བསྐྱེད། །སྤྱན་དྲངས་ལས་ལ་རབ་ཏུ་གཟུད། །གྲངས་སུ་བྱས་ལ་བསྒྲུབ་བསྙེན་བཀུར། །ཁྲོ་འཕྲེང་སྙིང་གར་བསྐུལ་བྱས་ལ། །དུས་གསུམ་འབྱུང་གནས་ལས་སུ་བྱ། །གདུག་པ་མི་བཟད་ཐོད་པ་སྲ ཁྲག་དུག་མྱོས་བྱེད་རྫས་རྣམས་ལ། །མ་མོ་ནག་མོ་རྦད་བྱ་སྟེ། ཁྲག་དང་ཉུངས་ཀར་ཕུར་པས་གདབ། །ཨོ་ཡ་མན་ཏ་ཀ་སྒམ། ཨབྱ་ཨུ་ཙ་ལེ་སྒམ། མ་དུག་རྩ་རྩ། ཚལ་པ་ཚལ་པ་རྦད་རྦད། མ་དུག་གཤམས་ཡ་ནན་སྒམ། སྲོག་རྩ་མུག་ཏི་རྦད། རྩ་རྩ་ར་རྩ་རྦད། མ་མོ་ཁྲག་ལ་དུན་ཏིང་སྟུབས། སྲིན་པོའི་རུས་ལཆོ༷ ཆོཚལ། གཤིནརྗེའིཁྲམ་ལ་ལྷན་ལྷན་ཐོབ། དྲ་ཛི་ཁྲམ་རི་ ལི་ལི་རྦད། རག་མོ་ཤན་པ་མར་ཡ་ཛུ་ཛུ། མགོ་འཕྱངས་མ་ཛུ་ཛུ། དུན་རྨུགས་བླ་རྩལ་ཛུ་ཛུ། རྩ་བོ་ཆེ་ལ་དུན་རྨུགས། ནང་ཁྲོལ་རྨད་ལྔ་ལ་རྩ་ཐུན་བ༷། ཐུམ་རི་ལི་ལི་བ༷་རྦད་རྦད་དྲི་ཁྲག་ཐུན་ཐུན་རྨུག །ཨོ་མུག་ཏི་རྔུབས་ཡ་ཆོ་ཆོ། ཡ་བལ་ཧུབ་ཡ་བལ་ཧུབ། སྙིང་གོང་ཆོད་ཆོད། རྩ་ཐུན་ནན། མ་ཐུན་ནན། ཁྲག་ཐུན་ཁོང་ཁྲག་ལ་ཡ་རྦད། མ་ལུས་གནས་པ་གཟིར་ཞིང་སྒྲོལ། །ཀྱི་མ་རུ་ཏི་སྒྲ་དང་བཀྲག །གདུག་པ་མ་ལུས་གནོད་དུ་སྔགས། །ལས་ཀྱི་དུས་སུ་ཐུན་དབབ་འཕང་། །སྐུ་ཡི་ཆོ་འཕྲུལ་རབ་ཏུ་དགྱེད། །འབར་བ་འཇིགས་བྱེད་ག་་སྒྲ་སྒྲོག །འཇམ་དཔལ་གསང་བའི་རྒྱུད་ལས། ཐུན་སྔགས་ཀྱི་ལེའུ་སྟེ་ཉེར་གཅིག་པའོ།། །།དེ་ནས་འཇིགས་བྱེད་རྒྱལ་པོས། དགྱེས་པ་ཡོངས་སུ་སྐོང་བ་དང་། །གཤིན་རྗེ་སྐུའི་ཆ་ལུགས་མ་ལུས་རྟགས་པ་ཞེས་བྱ་བ་ལ་སྙོམས་པར་ཞུགས་ཏེ། རྡོ་རྗེ་འཛིན་པ་རབ་ཏུ་བྱོས། །ཡབ་གཅིག་འཇམ་དཔལ་གཤིན་རྗེ་གཤེད་མཛད་ལྷ། །གཤིན་རྗེའི་ཆ་ལུགས་ཤིན་ཏུ་འཇིགས་པར་སྟོན། །གཤིན་རྗེའི་སྐུ་ནི་འབར་བའི་རྒྱལ་པོ་སྟེ། ཁྲེན་ཏུ་འཇིགས་ཤིང་ག་་རྔམ་དྲག་ཤུལ་ཆེ། ཁྱོད་ལ་བདག་གི་དད་པས་བསྟོད་ཅིང་མཆོད་འབུལ་ན། །བདག་ལ་ཁྱོད་ཀྱི་ཡུན་དུ་གྲོགས་མཛོད་ཅིག ཁྱོད་ཀྱི་ཐུགས་རྗེ་བྲེང་བྲེང་རྒྱུན་མ་དགུམ། །ཐུགས་རྗེ་དད་པའི་ཤུགས་ཀྱིས་མ་ལུས་གཤེགས། །བཅོམ་ལྡན་ཡ་མན་ཏ་ཀ་སྐུ་ཡི་ཆ་ལུགས་ནི། ཁེན་ཏུངོམཚརགཤིནརྗེདཔལ་ལ་བརྗིད། ཁྲོ་རྒྱལ་དཔའ་བརྗིད་འབར་བས་དགྲ་བགེགས་འདུལ། །འཇམདཔལགཤིནརྗེགཤེད་ནི་གྲགས་པའི་བརྗིད་དང་ལྡན། །མ་མོ་གིང་ལ་འཇམ་དཔལ་དབང་སྒྱུར་ཞིང་། །རྟག་ཏུ་ལྷ་མཆོག་བདག་ལ་གྲོགས་མཛོད་ཅིག །སྲིན་མོ་ཤ་ཟ་སྟོང་ནི་བྲན་དུ་འཁོལ། །གིང་ཆེན་ཕོ་མོ་རྣམས་ནི་བྲན་དང་གཡོག་ཏུ་འཁོལ། །ཀླུ་རྒྱལ་ཕོ་མོ་རྣམས་ནི་སྐུ་ལ་རྒྱན་དུ་བྱས། ཁྲ་ཟ་གདུག་བྱེད་རྣམས་ཀྱིས་ཆས་རྣམས་དག་པར་བསྟོད། །དཔལ་ཆེན་གསུང་གི་གདུག་པའི་ང་རོ་བསྒྲོགས། །འཇམ་དཔལ་སྐུ་ཡི་ཐུགས་རྗེས་བདག་ལ་དགོངས། །བཅོམ་ལྡན་འཇིགས་བྱེད་རྒྱལ་པོའི་སྐུ་སྟོད་ཅིག ཁྲོ་མོ་ཡུམ་དང་ཆས་ཏེ་སྐུ་སྟོན་ལ། །གཡས་ནས་ཡུམ་བསྐྱེད་ཨེ་ཀེ་ཛ་ཏི་མ། །གཡོན་ནས་ཡུམ་བསྐྱེད་བཛྲ་པེ་ཏ་ལི། །ཡུམ་ཆེན་ཆ་ལུགས་ཁྲོ་རྒྱལ་སྐུ་དང་མཐུན། །སྐུ་མདོག་མཐིང་ནག་དབུ་གསུམ་གདུག་པའི་དབུ། །སྤྱན་དགུ་སྨིན་མ་གློག་སྟོང་འོད་དུ་འཕྲོ། ་ངས་དང་ཞལ་ནས་མི་ཁྲག་རྟ་ཁྲག་འཛག །རྣོ་དབལ་མཆེ་བ་དུག་གསུམ་རྩ་བ་གཅོད། །ཕྱག་དྲུག་མི་བཟད་གདུག་པའི་ཕྱག་མཚན་བསྣམས། །ཞབས་དྲུག་བརྐྱང་བསྐུམ་མ་ཧེའི་སྟེང་དུ་བགྲད། །སྐུ་ལ་འཕྲིན་ལས་རྫོགས་མཛད་དུར་ཁྲོད་ཆས་ཀྱིས་བརྒྱན། །བསྐལ་པ་མེ་དཔུང་འབར་བའི་དཀྱིལ་འཁོར་ནས། །འཇིགས་པའི་ང་རོའི་སྒྲ་ནི་འབྲུག་སྟོང་ལྡིར། །སྒྲོལབྱེདགཤིནརྗེགཤེད་ལ་ཕྱག་འཚལ་ལོ། །ག་་ཆེན་དྲེགས་པ་ཐམས་ཅད་འཇོམས་པའི་ལྷ། །དབང་བྱེད་བདུད་འདུལ་དུར་ཁྲོད་ཆས་ཀྱིས་བརྒྱན། ཁྲོ་རྔམ་གདུག་པས་སྲིད་གསུམ་ཐལ་བར་རློགས། །ག་་ཆེན་རབ་འབར་གཤིན་རྗེ་འཇོམས་མཛད་ལྷ། །འཇིགས་བྱེད་ཡ་མ་ར་ཛའི་སྐུ་ལ་ཕྱག་འཚལ་ལོ། །ཉི་མ་འབུམ་གྱི་འོད་ཟེར་ཕྱོགས་བཅུར་འགྱེད། །གདུག་བྱེད་མཚོན་ཆ་མང་པོ་མེ་དཔུང་འབར། །རབ་འཇིགས་གཤིན་རྗེ་འཇོམས་ལ་ཕྱག་འཚལ་ལོ། །རྡོ་རྗེའི་སྐུ་ལ་ཀླུ་དབང་རབ་བརྒྱན་ནས། །དུར་ཁྲོད་ཤ་ཟའི་པགས་རློན་ན་བཟར་གསོལ། །སྡེར་ཆགས་ཤ་ཟའི་ཚོམ་བུས་ཐོད་དུ་བཅིངས།ཁྲོ་བོའི་རྒྱལ་པོ་འཇིགས་བྱེད་ཧཱུཾ༷་སྒྲ་ཅན། །ཞལ་ནས་ཕཊ་བསྒྲགས་ཁམས་གསུམ་སྟོང་མཛད་པ། །ཞབས་དྲུག་བརྐྱང་བསྐུམ་བརྗིད་པས་གཤིན་རྗེ་མནན། །ལྗགས་འདྲིལ་ཚེམས་ཀྱི་གསེབ་ནས་རྡོ་རྗེ་ཐོག་ཆེན་འབེབས། །འཁོར་གྱི་མ་མོ་མི་བཟད་བྲན་དུ་འཁོལ། །ཚམ་རྔམ་དྲག་པོ་ཁྲོ་བོ་དཀན་གཉིས་བརྡབས་པ་ཡིས། །གདུག་པའི་འཁོར་རྣམས་འདར་ལྕུག་ལྕུག །ཚངས་པ་འཁོར་བཅས་རྔུལ་ཐིགས་ཕྱོགས་བཅུར་འཕྲོ། །ལྷ་ཆེན་ཁྱབ་འཇུག་མ་ཧྭ་དེ་བ་གནོན། །ཕྱག་ན་བྷན་དྷ་རློན་པ་རབ་བསྣམས་ཤིང་། །དངོས་གྲུབ་འཁྲུག་ཅིང་ཀླད་ཁྲག་ཞལ་དུ་གསོལ། ཁྱུང་དང་འུག་པ་ལྟ་བུའི་ཁྲ་བསྣམས་ཤིང་། །མ་ལུས་གདུག་པ་དག་ལ་སྟོང་པརམཛད། །གཤིནརྗེནགཔོ་ཡ་མ་ར་ཛ་ཁྲོ་བོ་འབུམ་གྱི་རྗེ། །གཏན་གྱི་ལྷར་ཡང་ཁྱོད་ལ་གསོལ་འདེབས་ན། ཁྱོད་ཀྱི་ཐུགས་རྗེས་རྒྱུན་དུ་དགོངས་པར་མཛོད། ཁྱུང་ཆེན་སྔོན་པོ་མཁའ་ལ་ལྡིང་བ་བཞིན།ཁྱོད་ཀྱི་སྤྲུལ་པ་ཁྱེ་ཆུང་སྔོན་པོ་ཡིས། །ནད་གཏོང་སྲིན་མོའི་ཚོགས་རྣམས་དབང་བསྡུས་ལ། །སངས་རྒྱས་བསྟན་པ་འཇིག་པ་རྡུལ་དུ་ལྷོགས། །འཇིགས་བྱེད་དེ་ཡི་ཐུགས་དམ་རྒྱུད་བསྐུལ་བ། །ཨེ་ཀ་ཛ་ཏི་གསང་བ་རལ་གཅིག་མ། །མི་འཕམ་ཁྲོ་གཉེར་གཡུ་ཡི་རལ་པ་ཅན། །རལ་པ་སྤྲུག་པའི་སྐྲ་གསེབ་རེ་རེ་ནས། ཁྲོ་ཆུང་ཞལ་གསུམ་ཕྱག་དྲུག་སྟོང་ཁམས་འགེངས། །སྐུ་ལས་སྤྲུལ་པའི་ཕོ་ཉས་སྟོང་གསུམ་གང་། །ཀུན་ཀྱང་མི་བཟད་རལ་གྲི་ལྕགས་ཀྱུ་ཅན། །ལྕགས་ཀྱུས་དྲངས་ནས་དམ་ཉམས་སྲོག་རྩ་གཅོད། །བསྟན་པ་འཇིག་པ་མ་ལུས་དབང་དུ་བསྡུས། །རྣལ་འབྱོར་མི་བཟད་བསྟན་ལ་གནས། །རྡོ་རྗེ་བེ་ཅོན་རབ་གནས་ཏེ། །རྒྱ་མཚོ་གཏིང་དུ་འབྲུ་བ་དང་། །རི་རབ་རྩེ་ལ་བསྙག་པར་བྱ། །འཇིག་རྟེན་ཁམས་སུ་གཡབ་ཅིང་འཁྲུག །འཁོར་ལོའི་གཟུགས་བྲི་ཟོར་ཞིང་འཕང་། །སྐུ་ནི་ཏིང་འཛིན་ཟས་ཀྱི་མཆོག །འགུ་རུ་བླ་མ་རབ་ཏུ་འདུད། །ལོངས་སྤྱོད་ཟས་དང་འདུ་ཤེས་སྒྲོལ། །བསྒྲུབ་དང་རྟགས་ནི་ཕྲད་མི་བྱ། །མ་ལུས་གནས་ནས་ལས་སུ་འགྲུབ། །འཇིག་རྟེན་ཁམས་ནི་གཞལ་ཡས་ལ། །མ་ཧེའི་གདན་བསམ་ཁྲོ་རྒྱལ་བསྐྱེད། །བཞེངས་དང་སྤྱན་དྲངས་མཆོད་ཅིང་བསྟོད། །དེ་ནས་བསྙེན་བསྒྲུབ་ནན་ཏུར་བྱ། །འཇམ་དཔལ་གསང་བའི་རྒྱུད་ལས། ཐུགས་རྗེ་བསྟོད་པའི་ལེའུ་སྟེ་ཉི་ཤུ་གཉིས་པའོ།། །།དེ་ནས་དཔལ་ཁྲོ་མཆོག་གསང་བས་ཆོས་རྣམས་ལུང་དུ་འདུས་ཏེ། གསང་བ་པོ་ལ་བསྒྲག་པ། སྟོང་གསུམ་འཁོར་ལོ་བསྐོར་བྱས་ནས། །འཁོར་བའི་གཞི་དང་ལས་ཀྱི་དོན། །སངས་རྒྱས་རྒྱུད་ལ་འདུས་པར་འབྱུང་། །གསང་བའི་རྒྱུད་མཆོག་དམ་པ་འདི། །སྨིག་སྒྱུ་ལྟ་བུར་མིང་དུ་བཏགས། །མདོ་དོན་རྟོགས་ནས་རྣལ་འབྱོར་པས། །སྟོང་པ་ཉིད་དང་སྙིང་རྗེ་དང་། །རྒྱུ་དང་གཞལ་ཡས་གདན་ཁྲི་དང་། །སྐུ་ཉིད་ཡོངས་སུ་རྫོགས་པ་ལ། །ཕྲག་ནི་བཅུ་གསུམ་གཉིས་དང་གསུམ། །ལྔ་དང་བདུན་དང་གང་ཡང་རུང་། །ཤེས་རབ་ཐབས་སུ་སྣང་བར་བཤད། །གཉིས་མེད་སྐྱེད་དང་བ་ག་ཡང་། །གསང་བའི་གནས་དང་འབྲུ་རུ་འཕྲོ། །གསལ་བྱེད་སྔགས་སུ་རབ་ཏུ་སྔགས། །ཏིང་ངེ་འཛིན་དང་སྐུ་རུ་རྫོགས། །ཞེ་སྡང་ང་རྒྱལ་ཕྲག་དོག་འཔྲ། །གཏི་མུག་དུག་ལྔ་སྐུ་རུ་བྱུར། ཁྲག་འཐུང་ལྔ་ཡི་ངོ་བོར་བཤད། །རྒྱལ་བ་སངས་རྒྱས་མ་ལུས་དང་། །བདེ་གཤེགས་གུད་ན་མེད་པར་བཤད། །འགྲོ་དང་སྲིད་པ་སྐུ་རུ་སྣང་། །སྐུ་ཡི་འཁོར་ལོ་དེ་དང་ཡང་། །འགྲོ་བ་མ་ལུས་ཐ་མི་དད། །དེ་དང་ལྡན་པའི་རྣལ་འབྱོར་ལ། །ཆོ་ག་ལྷག་གམ་མ་ཚང་ཡང་། །མི་འགྲུབ་མི་སྲིད་གདོན་མི་ཟ། །གྲངས་སུ་རྫོགས་ན་ཤིན་ཏུ་རྫོགས། །སེམས་ཉིད་དག་པའི་ངང་ཉིད་ལས། །སྤྲུལ་པ་སྣ་ཚོགས་ཟད་མི་ཤེས། །འགྲོ་བ་མ་ལུས་རང་ལ་སྣང་། །སྐུ་རུ་སྣང་བ་མ་ལུས་ཀུན། །ལས་འཕྲོ་དག་ཏུ་སྣང་དུ་ཟད། །དེབཞིན ཉིདལ འགྱུར་བ་མེད། །སེམས་ཅན་ལྟ་སྤྱོད་མི་མཐུན་པས། །ཞི་བས་འདུལ་བའི་སྐལ་མེད་ན། ཁྲོ་བོ་དག་ཏུ་སྤྲུལ་པ་མཛད། །རྣམ་རྒྱལ་གསང་བའི་འཕྲིན་ལས་ལུང་། །འཕྲོས་པས་ཐུགས་རྗེས་རྒྱུད་འདི་བསྒྲགས། །ཀུན་རྫོབ་ཙམ་དུ་བསྟན་པ་མཚར། །གསོ་དང་བདུད་རྩིའི་བསྒྲུབ་པ་སྔགས། །སྲིད་པའི་རྩེ་ལ་རྒྱས་པར་བྱ། །སྟབ་ནས་བྱུང་ན་སྐུ་ལ་བརྒྱན། །སེམས་ཅན་ལས་དང་སྦྱིན་ཞིང་སྟེན། །དྲེགས་པ་གདུལ་བྱ་རྟན་པའི་རྒྱུད། ཁྲོ་བྱ་ཞི་བའི་ངང་དུ་བསྡུ། །སྐུ་ཡི་འཕྲིན་ལས་འཛམ་གླིང་གྲགས། །ལྔ་བརྒྱའི་དུས་སུ་འཕེལ་བར་འགྱུར། །མ་ལུས་འདུས་པའི་སངས་རྒྱས་ལ། །རབ་ཏུ་འདུས་སོ་ཐིག་ལེ་ཆེ། །འཕྲིན་ལས་གང་བསྒྲུབ་གསང་བ་རྒྱ། །གསང་བ་ལས་ཀྱི་མཐར་གནས་གང་། །རང་གི་བསམ་པ་བརྟན་པོར་གནས། །འཇམ་དཔལ་གསང་བའི་རྒྱུད་ལས། །གསང་བ་འདུས་པའི་ལེའུ་སྟེ་ཉེར་གསུམ་པའོ།། །།དེ་ནས་ཡང་དཔལ་འཇིགས་བྱེད་ཀྱི་རྒྱལ་པོས། ཕྱག་ན་རྡོ་རྗེ་ལ་སོགས་པ་ལ། མི་ནུབ་ཚམ་རྔམ་རྒྱུད་བཤད་དེ། །སངས་རྒྱས་ཀུན་གྱི་གསང་བ་བཤད། །རྣལ་འབྱོར་དབང་ཕྱུག་དམ་པ་ཁྱེད། །གསང་བའི་རྒྱུད་དོན་དམ་པ་འདི། །ལྔ་བརྒྱའི་དུསསུ་གནས་པའི་ཕྱིར། །གསུང་མཆོག་ཡི་གེར་སྣང་ནས་ཀྱང་། །ཙིཏི་གསང་བའི་ཀློང་དུ་ཆུད། །སྐུ་དང་ཐེག་པ་ཀུན་ལ་གནས། །འཇམ་དཔལ་སྐུ་དང་རྒྱུད་དུ་འཛིན། །དེ་ནས་རབ་ཏུ་རྟོགས་དམ་འགྲུབ། །དམ་ལ་གནས་ན་ཕན་དུ་ཐོགས། །དེ་ནས་ཕྱག་ན་རྡོ་རྗེ་ལ་སོགས་པས་མགྲིན་གཅིག་ཏུ་བསྟོད་པ། །ང་ནི་ཨེ་མ་གཤིན་རྗེ་གཤེད། །འཇིགས་བྱེད་འབར་བའི་ཆ་ལུགས་ཅན། །རབ་ཏུ་ཁྲོས་ཏེ་འཇིགས་བྱེད་པ། །མ་ལུས་འདུལ་ལ་ཕྱག་འཚལ་བསྟོད། །ཨེ་མ་འཇིགས་བྱེད་གསང་བའི་གསུང་། །སྟོང་གསུམ་རི་རབ་འབུམ་སྙིལ་སྐད། །གདུག་པ་འདུལ་བྱེད་གསུང་སྒྲ་ཅན། །མ་ལུས་དགྲ་འདུལ་ཁྱོད་ལ་ཕྱག་འཚལ་བསྟོད། །ཨེ་མ་བྱང་སེམས་རབ་ཏུ་གསང་། །རྣམ་རྟོག་རིག་པ་ཆོས་ཉིད་ཀློང་། །སྟོང་གསུམ་སྤྲུལ་པ་ཁྱོད་ལས་སྤྲུལ། །ཐུགས་ཀྱི་ཐུགས་ལ་ཕྱག་འཚལ་བསྟོད། །ཅེས་བསྟོད་ནས། འཁོར་རང་གི་སྟན་ལས་ལངས་ཏེ། ཕྱག་ན་རྡོ་རྗེའི་རྒྱུད་དོན་མ་ལུས་འདི། །ཕྱི་རབས་དོན་དུ་རྒྱུད་དུ་བཅངས། །སྐལ་ལྡན་དབང་ཕྱུག་དག་ལ་གཏད། །ཡིད་བཞིན་ནོར་བུ་ལྟ་བུར་བཅངས། །འོག་མིན་གནས་སུ་རབ་ཏུ་བསྒྲགས། །རྒྱུད་དང་འབྲས་བུ་རབ་བསྟན་པའི། །གདུལ་བྱ་རྒྱུད་དུ་རབ་བཏུལ་ནས། །སྐུ་གསུང་ཐུགས་ཀྱི་ངང་དུ་སྤྲོས་ཟབ་མོ་གསང་བའི་རྒྱུད་མཆོག་སྟེ། །ཆོས་ཉིད་རིག་པའི་ཀློང་ནས་ཕྱུང་། །འཁོར་ལོ་བསྐོར་ནས་ཐུགས་སུ་བརྒྱུད། །ཁྲོསཔའིགཤིན རྗེརྒྱུདདུ་གནས། །སྣ་ཚོགས་འབྱུང་བའི་ཐིག་ལེ་ཆེ། །མ་ཧྭ་སུ་ཀ་ཕྲི་ཧཱུཾ༷། འཇམ་དཔལ་གསང་བའི་རྒྱུད་ལས། རྩ་བའི་རྒྱུད་གཏད་པ་དང་། རྗེས་སུ་ཡི་རངས་པའི་ལེའུ་སྟེ་ཉེར་བཞི་པའོ།། །།འཇམ་དཔལ་རོལ་པ་རྣལ་འབྱོར་རྒྱལ་བའི་ལེའུ་སྟོང་ཕྲག་ལྔ་བཅུ་རྩ་ལྔ་པ་ལ། ཏིང་ངེ་འཛིན་གསང་བའི་རྒྱུད་ལས་ཕྱུང་བ། བདག་དོན་རྣམ་པར་རོལ་བྱེད། གཤིན་རྗེ་ནག་པོ་ཁྲོས་པ་རྩ་བའི་རྒྱུད་ཆེན་པོ་རྫོགས་སོ།། །།འཇམ་དཔལ་བཤེས་གཉེན་ཐུགས་ཀྱི་གསང་མཛོད་ནས། །པདྨ་ཐོད་འཕྲེང་གསང་བའི་ཐུགས་བརྒྱུད་ནས། །ནམ་མཁའི་སྙིང་པོ་ཐུགས་ཀྱི་མཛོད་བརྟོལ་ནས། །དྲི་མེད་ཟླ་ཤར་ཐུགས་ཀྱི་དཀྱིལ་དུ་བསྟིམ། །བུརྙ་རཏྣས་གསང་བའི་མཇོད་བརྟོན་ནས། །ཡོན་ཏན་རྒྱ་མཚོ་གསང་བའི་གཏེར་དུ་བཞག ། ་༑། གཏད་རྒྱ། གསང་རྒྱ། གཏེར་རྒྱ། རྒྱ་རྒྱ་རྒྱ།། །།རྒྱ་གར་སྐད་དུ། ཨརུ་མན་འཛུ་ཤི་ཡ་མན་ཏ་ཀ་གུ་རྒྱ་མན་ཏྲ་ཏནྟྲ། བོད་སྐད་དུ། འཇམ་དཔལ་གཤིན་རྗེ་གཤེད་གསང་རྒྱུད། །ཆོས་དབྱིངས་རྣམ་དག་སྐྱེ་མེད་ལས། །སྐྱེ་བའི་ཚུལ་བསྟན་སྤྲུལ་པའི་