Ngb-pt-0402-vol-05-text
Front
Body
གྱིས་བསྒྱུརབའོ།། །།རྒྱ་གརསྐད་དུ། མ་ཧྭ་སརྦ་དྷརྨ་སརྦཙྭ་ད་ཡ། བུརྙ་ན་མ་མ་ཧྭ་ཀྭ་ལ་ཏནྟྲ་ནཱ་མ། བོད་སྐད་དུ། བསྟན་པ་ཐམས་ཅད་ཀྱི་སྙིང་པོསེམས་ཅན་ཐམས་ཅད་ལ་སངས་རྒྱས་རང་ཆས་ཆེནཔོརབཞུགས་པའི་རྒྱུདཅེས་བྱ་བ། སངས་རྒྱས་འོད་མི་འགྱུར་བ་ལ་ཕྱག་འཚལ་ལོ། །འདིསྐད་བདག་གིས་ཐོས་པའི་དུས་གཅིག་ན། ཆོས་ཀྱི་དབྱིངས་སྤྲོས་པ་དང་བྲལ་བའི་ངང་ན། རང་བྱུང་རིག་པའི་རྒྱལ་པོ་སངས་རྒྱསའོད་ཀྱི་ཕུང་པོ་ཆེན་པོ།རྒྱལབ་རིགས་ལྔ་དང་འདུའབྲལ་མེད་པར་བཞུགས་སོ། །འདི་སྐད་བདག་གིས་ཐོས་པའི་དུས་གཅིག་ན། མཚནརྫོགས་རྡོ་རྗེ་འཆང་གི་ཞིང་ཁམས་ན། འོད་མཐའ་མེད་ཀྱི་ཡུལ་ཅན་ན། རྣམ་པར་གྲོལ་བའི་སངས་རྒྱསའོད་ཀྱི་ཕུང་པོ་བརྒྱན་མ་བཀོད་པར་སྣང་བ་ཞེས་བྱ་བ་བཞུགས་སོ། །དེའི་ཚེ་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་ཀྱེ་སངས་རྒྱས་འོད་ཀྱི་ཕུང་པོ་ཆེན་པོ། སངས་རྒྱས་ཀྱི་གནས་གསུམ་གསུང་དུགསོལ། ཞེས་ཞུགས་སོ། །དེ་ནས་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོས་བཀའ་སྩལ་པ། ཀྱེ་གསང་བའི་བདག་པོ་ཁྱོད་ཉོན་ཅིག །སངས་རྒྱས་ཆོས་ཀྱི་སྐུརང་གིསྙིང་གའི་དཀྱིལ་ནབཞུགས་སོ། །ཡེ་ཤེས་༄༅ ཟང་ཐལ་རང་གི་མིག་གི་དཀྱིལ་ན་བཞུགས་སོ། །སངས་རྒྱས་ཁྲོ་བོའི་སྐུ་རང་གི་ཀླད་པའི་དཀྱིལ་ན་བཞུགས་སོ། །ཞེས་གསུངས་སོ། །དེ་ནས་སངས་རྒྱས་འོད་ཀྱི་ཕུང་པོས་འདི་སྐད་ཅེས་གསུངས་སོ། །ཀྱེ་གསང་བའི་བདག་པོ་རང་གི་སྙིང་གི་དཀྱིལ་ན་སངས་རྒྱས་འོད་ཀྱི་ཕུང་པོ་ཆེན་པོར་བཞུགས་སོ། །སངས་རྒྱས་བརྟེན་པ་རང་གི་ལུས་ལ་བརྟེན་ནོ། །བཞུགས་པ་རང་གི་སྙིང་གི་དཀྱིལ་ན་བཞུགས་སོ། །གསལ་བ་རང་གི་མིག་ན་ཕར་གསལ་་།། །རང་གི་ཀླད་པའི་དཀྱིལ་ན་སངས་རྒྱས་ཁྲོ་བོའི་ལྷ་ཐམས་ཅད་བཞུགས་སོ། །དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ་ཆེན་པོ། སངས་རྒྱས་ཀྱི་རང་ལུས་གསུང་དུ་གསོལ། ཞེས་ཞུས་སོ། །དེ་ནས་འོད་ཀྱི་ཕུང་པོ་ཆེན་པོས་བཀའ་སྩལ་པ། ཀྱེ་གསང་བའི་བདག་པོ་སངས་རྒྱས་ཀྱི་ལུས་འོད་ལྔའི་ཕུང་པོར་ཡོད་དོ། །འོད་ཁ་དོག་ལྔ་ཕྲ་ལ་དངས་པ་གསལ་ལ་འཚེར་བ་རང་བཞིན་བཀྲག་ལ་ཉམ་ང་བ། མེ་རེ་རེ་ཡོད་དོ། །རང་གི་རིག་པ་འོད་ཀྱི་ཕུང་པོར་བཞུགས་པ་འདི་སངས་རྒྱས་ཡིན་ནོ། །སངས་རྒྱས་ཀྱི་ལུས་འོད་ཀྱི་ཕུང་པོར་ཤེས་པར་བྱའོ། །སངས་རྒྱས་ཀྱི་ལུས་འོད་ཀྱི་ཕུང་པོར་མེད་ན། སྣང་གསལ་གྱི་མཐའ་འགགས། མུ་སྟེགས་ཆོད་པའི་ལྟ་བ་དང་ཁྱད་མེད། དེ་ནས་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ་ཆེན་པོ། སངས་རྒྱས་ཀྱི་ལྟ་བ་གསུང་དུ་གསོལ། ཞེས་ཞུས་སོ། །དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། སངས་རྒྱས་ཀྱི་ལྟ་བ་ནི་འོད་ཀྱི་ཕུང་པོ་ལ་བལྟའོ། །སངས་རྒྱས་ལྟ་བ་རྣམ་གསུམ་ནི། ཆོས་སྐུ་ལ་ལྟ་བའི་ལྟ་བ་དང་། ཡེ་ཤེས་ལ་ལྟ་བའི་ལྟ་བ་དང་། དག་སྣང་ལ་བལྟ་བའི་ལྟ་བ་དང་གསུམ་མོ། །ཆོས་སྐུ་ལ་བལྟ་བའི་ལྟ་བ་ནི། རང་གི་ཤེས་པ་རང་སོ་ལ་གནས་པའི་དུས་ན་ཆོས་སྐུ་ཡིན་ནོ། །རྡོ་རྗེ་སེམས་དཔའི་མེ་ལོང་ལ་རང་གི་མིག་འཇུག་ནས་བལྟས་པས། སངས་རྒྱས་ཀྱི་ཞིང་ཁམས་འོད་ཁ་དོག་ཕྲ་ལ་དྭངས་པ་གསལ་ལ་འཚེར་བ། རང་བཞིན་བཀྲག་པ། ཉམ་ང་བ་མེད་པར་འཚེ་བར་མདོག་གསུམ་དུ་འཆར་བ་དེ། སངས་རྒྱས་ཀྱི་ཞིང་ཁམས་ལ་བལྟ་བའི་ལྟ་བ་ཡིན་ནོ། །ཞེས་གསུངས་སོ། །དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ། སངས་རྒྱས་ཀྱི་ཡོན་ཏན་གསུམ་གསུང་དུ་གསོལ།ཅེས་ཞུས་སོ། །དེ་ནས་སངས་རྒྱས་འོད་ཀྱི་ཕུང་པོ་ཆེན་པོས་བཀའ་སྩལ་པ། སངས་རྒྱས་མིག་ནས་འཐོན་ནས། འཁོར་བ་རུ་ལོག་ནས་ཡུལ་ཡེ་ཤེས་སུ་འཆར་བ་དེ། རང་གི་རིག་པ་འོད་ཀྱི་ཕུང་པོར་བཞུགས་པའི་ཡོན་ཏན་ཡིན་ནོ། །རང་འོད་ངོ་ཤེས་ན་སྒོམ་སྒྲུབ་མི་དགོས་པར་སངས་རྒྱ་བ་དེ། སངས་རྒྱས་ཀྱི་ཆོས་སྐུ་འདུས་མ་བྱས་སུ་བཞུགས་པའི་ཡོན་ཏན་ཡིན་ནོ། །རང་གི་རིག་པ་རང་ངོ་ཤེས་ན་ལས་དགེ་སྡིག་གིས་མི་སྒྲིབ་༄༅ པར་སངས་རྒྱ་བ་དེ། རང་བྱུང་གི་ཡེ་ཤེས་རྒྱུ་དང་རྐྱེན་གྱིས་མ་བསྐྱེད་པའི་ཡོན་ཏན་ཡིན་ནོ། །ཞེས་གསུངས་སོ། །དེ་ནས་སངས་རྒྱས་འོད་ཀྱི་ཕུང་པོས་འདི་སྐད་ཅེས་བཀའ་སྩལ་པ། ཀྱེ་གསང་བའི་བདག་པོ། རང་གི་རིག་པ་ཆོས་ཀྱི་སྐུ་ལ་སྐྱེ་འཆི་མེད་པ་ཡིན་ནོ། །སངས་རྒྱས་ཀྱི་དགོངས་པ་ལ་སྒོམ་དུ་མེད་པ་ཡིན་ནོ། །སངས་རྒྱས་ཀྱི་དགོངས་པ་ངོ་ཤེས་ན་ལས་དགེ་སྡིག་ཐམས་ཅད་དག་ནས་སངས་རྒྱ་བ་ཡིན་ནོ། །ཞེས་གསུངས་སོ། །དེ་ནས་ཡང་གསང་བའི་བདག་པོས་ཞུས་པ། ཀྱེ་སངས་རྒྱས་འོད་ཀྱི་ཕུང་པོ་ཆེན་པོ། སངས་རྒྱས་ཀྱི་གནས་ལུགས་གསུམ་གསུང་དུ་གསོལ་ཞེས་ཞུས་སོ། །དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། ཀྱེ་གསང་བའི་བདག་པོ་ཁྱོད་ཉོན་ཅིག །སེམས་ཅན་ཐམས་ཅད་ལ་རང་གི་སྙིང་གི་དཀྱིལ་ནས་སྟོང་པ་རིག་པ་སྙིང་པོ་ཅན་དུ་གནས་སོ། །རིག་པ་འོད་ཀྱི་ཁང་པ་ན་འོད་མཐའ་མེད་པའི་ཡུལཅན་དུ་གནས་སོ། །ཞེས་གསུངས་སོ། །དེ་ནས་ཡང་གསུངས་པ་གསང་བའི་བདག་པོ་སངས་རྒྱས་ཀྱི་འཆར་ལུགས་གསུམ་ཉོན་ཅིག །སངས་རྒྱས་ཀྱི་མེ་ལོང་ལ་བལྟས་པས། སངས་རྒྱས་ཀྱི་ཞིང་ཁམས་འཆར་རོ། །རང་གི་རིག་པ་ལ་བལྟས་པས། རྟགས་འཕྲལ་ལ་འཆར་རོ། །རང་གི་རིག་པ་ལམ་ཡངས་པ་རང་ལུས་འོད་ལྔ་ལས། ཉམས་སུ་བླངས་པས་དག་སྣང་ལྷུག་པར་འཆར་རོ། །ཞེས་བཀའ་སྩལ་ཏོ། །དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ་སངས་རྒྱས་ཀྱི་གྲོལ་བ་གསུམ་དུ་གསུང་དུ་གསོལ། ཅེས་ཞུས་སོ། །སངས་རྒྱས་འོད་ཀྱི་ཕུང་པོས་བཀའ་སྩལ་པ། རང་འཆི་བའི་དུས་སུ་དག་སྣང་ངོ་ཤེས་པས་འཁྲུལ་སྣང་དག་སྣང་དུ་གྲོལ་ཏེ། ཤ་ཁྲག་གི་ལུས་རིན་པོ་ཆེ་འོད་འབར་བའི་སྐུར་གྲོལ་ལོ། །སེམས་རྟོགས་བཅས་ཡེ་ཤེས་མི་རྟོག་པར་གྲོལ་ལོ། །དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ་སངས་རྒྱས་ཀྱི་དགོངས་པ་གསུམ་གསུང་དུ་གསོལ། ཞེས་ཞུས་སོ། །དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། ཀྱེ་གསང་བའི་བདག་པོ་ཁྱོད་ཉོན་ཅིག །སྣང་བ་རང་ལོག་འོང་བས་བག་ཆགས་སྦྱང་མི་དགོས། ཡེ་ཤེས་ཚང་ཁབ་ཏུ་འོང་བས་ཆེད་དུ་བསྒོམ་མི་དགོས་སོ། །རང་གི་རིག་པ་ལ་སྐྱེ་ཤི་མེད་པས་འཁོར་བའི་སྡུག་བསྔལ་མི་དགོས། ཞེས་བཀའ་སྩལ་ཏོ། །མ་སངས་རྒྱས་རང་ཆས་ཀྱི་རྒྱུད་ལས། སངས་རྒྱས་དངོས་སུ་བསྟན་པའི་ལེའུ་སྟེ་དང་པོའོ།། །།དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་ཀྱང་། ཆོས་ཐམས་ཅད་ཀྱི་རྩ་བ་གདམས་ངག་ལ་འདུས། གདམས་ངག་ཐམས་ཅད་ཀྱི་དམར་ཐག་གཅད་ཅེས་ཞུས་སོ། །དེ་ནས་ཡང་སངས་རྒྱས་འོད་ཀྱི་ཕུང་པོས་བཀའ་སྩལ་པ། རང་འཆི་བའི་ཚེདྲོད་རྐང་པའི་མཐིལ་ནས་ཡལ། སྤྱི་བོ་ཚངས་པའི་བུ་ག་ནས་ཡར་འཐོན། སེམས་གློ་བའི་ནང་ནས་འཐོན་ནས་དབུགས་སྣ་སྒོར་ཆད། སངས་རྒྱས་སྙིང་གི་ནང་ནས་བྱོན་ནས་མིག་ནས་ཕར་ལ་དོན་པའི་དུས་སུ། སྣང་བ་ཐམས་ཅད་འོད་དུ་འཆར་ཏེ། ཤར་བ་དེ་རང་གིས་སངས་རྒྱས་སུ་ངོ་ཤེས་པས་རང་འོད་དང་སྐུ་ལ་ཐིམ་ནས་སངས་རྒྱ་བས། གདམས་ངག་ཐམས་ཅད་དམར་ཐག་སྣང་སྲིད་ཐམས་ཅད་སྐུ་དང་འོད་དུ་ཤར་བའི་དུས་བཅད་དོ། །ཞེས་གསུངས་སོ། །དེ་ནས་གསང་བའི་བདག་པོས་འདི་སྐད་ཅེས་ཞུས་སོ། །ཨེ་མ་སངས་རྒྱས་འོད་ཀྱི་ཕུང་པོ་ཆེན་པོ། གདམས་ངག་དེ་ནམ་དགོས་ན་ཞེས་ཞུས་པས། གདམས་ངག་འཆི་བའི་དུས་སུ་དགོས། འཆི་བའི་དུས་ཀྱི་དམར་ཐག་གར་བཅད་ཅེས་ཞུས་པས། སངས་རྒྱས་འོད་ཀྱི་ཕུང་པོས་བཀའ་སྩལ་པ། གསང་བའི་བདག་པོ་རང་འཆི་བའི་དུས་སུ། འཆི་ལུགས་གཉིས་ཡིན་ཏེ། ཀུན་ཏུ་བཟང་པོའི་ངང་དུ་འཆི་བ་དང་། ཀུན་ཏུ་བཟང་མོའི་ངང་དུ་འཆི་བའོ། །ཀུན་ཏུ་བཟང་མོའི་ངང་དུ་འཆི་ན་ནད་ཐམས་ཅད་སྲེག་པ་རྩ་ལ་ཞུགས་ནས། འཆི་བས་ན་ཚ་ཟུག་གཟེར་ཆུང་བར་ཉལ་དེར་འཆི་བས་སོ། །ཀུན་ཏུ་བཟང་པོའི་ནང་དུ་འཆི་ན། ནད་སྙིང་ལ་འདུས་ནས། ན་ཚ་ཟུག་གཟེར་ཤིན་ཏུ་ཆེ་བར་འཆི་བ་ཡིན་ཏེ། ན་ཚ་ཟུག་གཟེར་ལྷག་པ་རེ་ལ། རྟོགས་པའི་ཤེས་རབ་ལྷག་པ་རེ་སྐྱེ་བས། བདག་འཆི་བའི་དུས་ཀྱི་དམར་ཐག་ཀུན་ཏུ་བཟང་པོའི་ངང་དུ་འཆི་ བ་ལ་བཅད་དོ། །དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ། གདམས་ངག་བྱས་པ་གཅིག་སངས་རྒྱས་པས། སངས་རྒྱས་པའི་དུས་ཀྱིས་དམར་ཐག་གར་གཅད་ཅེས་ཞུས་སོ། །དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། ཀྱེ་གསང་བའི་བདག་པོ། སངས་རྒྱ་བ་ལ་གཉིས་ཡིན་ནོ། །ཆོས་ཉིད་མ་དང་ཕྲད་པ་དང་། ཡེ་ཤེས་རང་ས་ཟིན་པའོ། །ཆོས་ཉིད་མ་དང་འཕྲད་པ་ནི། འབྲུལ་སྣང་འགགས་ནས་དག་སྣང་འཆར་བ་ཡིན་ནོ། །ཡེ་ཤེས་རང་ས་ཟིན་པ་ནི། འོད་ལྔ་ངོ་ཤེས་པས་རང་གི་སྣང་བ་ལ་ཐིམ་ནས་སངས་རྒྱ་བས། བདག་སངས་རྒྱ་བའི་དུས་ཀྱིས་དམར་ཐག་ཆོས་ཉིད་མ་དང་འཕྲད་པའི་དུས་སུ་བཅད་དོ། །ཞེས་གསུངས་སོ། །མ་སངས་རྒྱས་རང་ཆས་ཀྱི་རྒྱུད་ལས། དམར་ཐག་གསུམ་བསྟན་པའི་ལེའུ་སྟེ་གཉིས་པའོ།། །།དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །ཀྱེ་སངས་རྒྱས་འོད་ཀྱི་ཕུང་པོ་ཆེན་པོས། སངས་རྒྱས་ཀྱི་མཚན་ལྔ་གསུང་དུ་གསོལ། ཅེས་ཞུས་སོ། དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། ཀྱེ་གསང་བའི་བདག་པོ་ཁྱོད་ཉོན་ཅིག །སངས་རྒྱས་ཀྱི་མཚན་རྣམ་པ་ལྔ་ནི། ཡང་དག་པར་རྫོགས་པའི་སངས་རྒྱས་ཉག་གཅིག་དང་། ཐོག་མའི་སངས་རྒྱས་འོད་མི་འགྱུར་བ་དང་། རིག་པ་ཀུན་ཏུ་བཟང་པོ་དང་། སངས་རྒྱས་གཞོན་ནུ་བུམ་པའི་སྐུ་དང་། རང་བཞིན་ལྷུན་གྲུབ་ཀྱི་སངས་རྒྱས་དང་ལྔ་ཡིན་ནོ། །ཀྱེ་ཉོན་ཅིག །རང་གི་རིག་པ་ངོ་བོ་སྟོང་པ་ཀུན་ཏུ་བཟང་མོའོ། །རིག་པ་གསལ་བ་ཀུན་ཏུ་བཟང་པོའོ། །ཀུན་ཏུ་བཟང་པོ་དང་། བཟང་མོ་དབྱེར་མེད་པས་སངས་རྒྱས་ཉག་གཅིག་ཡིན་པས། རང་གི་སྙིང་གི་དཀྱིལ་ནས། སངས་རྒྱས་འོད་ཀྱི་ཕུང་པོ་ལ་སྐྱེ་འཆི་མེད་པས་གཞོན་ནུ་བུམ་པའི་སྐུའོ། །རིག་པ་རང་གི་ངོ་བོ་མ་འགགས་པར་གསལ་བ་ཀུན་ཏུ་བཟང་པོའོ སེམས་ཅན་ཐམས་ཅད་རང་གི་སྙིང་གི་དཀྱིལ་ན་སངས་རྒྱས་བཞུགས་པས་རང་བཞིན་ལྷུན་གྱི་གྲུབ་པའི་སངས་རྒྱས་ཡིན་ནོ། །སངས་རྒྱས་ཆོས་ཀྱི་སྐུ་རྟེན་པ་རང་གི་ལུས་ལ་བསྟན་ནོ། །བཞུགས་པ་རང་གི་སྙིང་གི་དཀྱིལ་ན་བཞུགས་སོ། །གསལ་བ་རང་གི་མིག་ན་ཕར་གསལ་ལོ། །སངས་རྒྱས་རང་ཆས་ཀྱི་རྒྱུད་ལས། སངས་རྒྱས་ཀྱི་མཚན་བསྟན་པའི་ལེའུ་སྟེ་གསུམ་པའོ།། །།དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། །དེ་ནས་ཡང་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོས་བཀའ་སྩལ་པ། ཀྱེ་གསང་བའི་བདག་པོ་རང་གི་ཡེ་ཤེས་རང་ངོ་ཤེས་པ་དེ་སངས་རྒྱས་ལ་གསུམ་མོ། །འཇུག་པ་དང་གྲོལ་བ་དང་མཐར་ཕྱིན་པའོ། །འཇུག་པ་གཉིས་ཡིན་ནོ། །དག་སྣང་རང་ལ་ཚུར་འཇུག་པ་ནི། རང་འཆི་བའི་ཚེ་རང་གི་སངས་རྒྱས་རང་ལ་འཆར་བ་དེ་ཡིན་ནོ། །རང་ཕར་ལ་འཇུག་པ་ནི། རང་གི་སངས་རྒྱས་འཆར་བའི་ཚེ་རང་ངོ་ཤེས་པས་སངས་རྒྱ་བའོ། །རང་གི་རང་བཞིན་གྱིས་འོད་གསལ་ལ་དུས་རྟག་ཏུ་བལྟ་བའོ། །གྲོལ་བ་ལ་གསུམ་ཡིན་ནོ། །རིག་པ་སྐྲུབས་ནས་འཐོན་པས་ཕྱི་ནང་གི་ཆོས་ཐམས་ཅད་གྲོལ་ལོ། །རིག་པ་སེམས་དང་དྲལ་བས་གཟུང་འཛིན་གྱི་རྣམ་པར་རྟོག་པ་ལས་གྲོལ་ལོ། །རིག་པ་རང་ལུས་ཐོབ་ནས། རང་གི་ཡེ་ཤེས་རང་ས་འཛིན་ནས། མ་རིག་པ་རིག་པའི་ཡེ་ཤེས་སུ་གྲོལ་ལོ། །མཐར་ཕྱིན་པ་སངས་རྒྱས་ནས་སེམས་ཅན་དུ་མི་ལྡོག་པའོ། །སངས་རྒྱས་རང་ཆས་ཀྱི་རྒྱུད་ལས་གྲོལ་ཚུལ་བསྟན་པའི་ལེའུ་སྟེ་བཞི་པའོ།། །།དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་པ། ཨེ་མ་ཧོ། །བདེ་གཤེགས་འོད་ཀྱི་ཕུང་པོ་ཆེན་པོ། སངས་རྒྱས་ཀྱི་མིན་པ་གསུམ་གསུང་དུ་གསོལ། ཅེས་ཞུས་སོ། དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། གསང་བའི་བདག་པོ་བྱས་པའི་ཆོས་ཀྱི་མ་བྱས་པའི་སངས་རྒྱས་ཐོབ་པ་མིན་ནོ། །སངས་རྒྱས་འདུས་མ་བྱས་པ་ཡིན་པས་བྱས་པའི་ཆོས་ཀྱི་སངས་རྒྱས་ཐོབ་པ་མིན་ནོ། །དེ་ནས་གསང་བའི་བདག་པོས་ཞུས་པ། རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོ། སངས་རྒྱས་ཀྱི་ཡིན་པ་གསུམ་གསུང་དུ་གསོལ། ཅེས་ཞུས་སོ། །རང་གི་རིག་པ་འོད་ཕུང་ཆེན་པོར་བཞུགས་པ་འདི་སངས་རྒྱས་ཀྱི་བརྡའོ། །སངས་རྒྱས་ཀྱི་སྐུ་ལ་སྐུ་དང་ཡེ་ཤེས་རྒྱུན་ཆད་མེད་པ་བཞུགས་པ་ཡིན་ནོ། །རང་གི་རིག་པ་ལ་སྐྱེ་འཆི་མེད་པར་དུས་གསུམ་མཉམ་པ་ཉིད་དུ་གསལ་བར་བཞུགས་པ་ཡིན་ནོ། །རིག་པ་ངོས་བཟུང་དང་བྲལ་བས་ཆོས་ཀྱི་སྐུའོ། །རིག་པ་ཤེས་རབ་ཀྱི་མཁྱེན་པ་མ་འགགས་པས་ལོངས་སྐུའོ། །རིག་པ་ཅིར་་་ང་འཆར་བས་སྤྲུལ་པའི་སྐུའོ། །རིག་པ་མིག་ནས་འཐོན་པས་ལོངས་སྐུ་ཁ་མིག་རྣ་བ་ཅན་གྱིས་སྣང་སྲིད་ཐམས་ཅད་ཁོངས་ནས་འཆར་རོ། །སངས་རྒྱས་ལོངས་སྐུ་དཔངས་སུ་ཁྲུ་བཅུ་དྲུག་པ་ཞེང་དུ་ཁྲུ་བརྒྱད་པ་འཆར་རོ། །དེ་ངོ་ཤེས་པས་སངས་རྒྱའོ། །མ་སངས་རྒྱས་རང་ཆས་ཀྱི་རྒྱུད་ལས། སྐུ་དང་ཡེ་ཤེས་ཀྱི་ལེའུ་སྟེ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཨེ་མ་ཧོ། རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོ། སངས་རྒྱས་ཀྱི་ཆོག་པ་གསུམ་གསུང་དུ་གསོལ། ཅེས་ཞུས་སོ། །སངས་རྒྱས་འོད་ཀྱི་ཕུང་པོ་ཆེན་པོས་བཀའ་སྩལ་པ། ཀྱེ་ཀྱེ་གསང་བའི་བདག་པོ། སངས་རྒྱས་ཀྱི་ཆོས་ཐམས་ཅད་འདས་པ་ཡིན་པས་སྒོམ་པ་དང་བཟླས་པ་དང་འབད་རྩོལ་ཐམས་ཅད་དང་བྲལ་ནས་རང་ངོ་ཤེས་པས་ཆོག་གོ །སངས་རྒྱས་ཀྱི་སྐུ་རྡུལ་དང་བྲལ་བས་ཅི་དགའ་བྱས་པས་ཆོག་གོ །རིག་པ་འོད་ཀྱི་ཕུང་པོར་བཞུགས་པས་ཡེ་ཤེས་སུ་འཆར་ཏེ་ཆོག་གོ །དེ་ནས་གསང་བའི་བདག་པོས་ཞུས་པ། སངས་རྒྱས་ཀྱི་འོང་བ་གསུམ་གསུང་དུ་གསོལ། ཅེས་ཞུས་སོ། །སངས་རྒྱས་ཀྱིས་བཀའ་སྩལ་པ། རང་འཆི་བའི་དུས་སུ་སངས་རྒྱས་ཀྱི་སུན་མ་གསུམ་འོང་