Ngb-pt-0144-vol-02-text

Body

དུ་གཏོགས་པ་རྣམས་ཀྱིས་ངའི་བསྟན་པའི་རྒྱུད་འདི་ནི་མ་བཏང་བར་ཟུང་ཞིག །ཆོས་ཐམས་ཅད་ཀྱི་སྙིང་པོ་ཡིན་ནོ། །བསྟན་པ་ཐམས་ཅད་ཀྱི་རྒྱལ་པོ་ཡིན་ནོ། །གསུང་རབ་ཐམས་ཅད་ཀྱི་ཉིང་ཁུ་ཡིན་ནོ། །སྣང་སྲིད་འཁོར་འདས་ཀྱི་ཆོས་ཐམས་ཅད་ཀྱི་དམ་པ་རིན་པོ་ཆེ་སེམས་ཉིད་ནོར་བུའི་རྟོགས་པ་ལ་འདུས་སོ། །ཞེས་གསུངས་པས་འཁོར་ཐམས་ཅད་རྗེས་སུ་ཡི་རང་སྟེ་མགུ་བར་གྱུར་ཏོ། །རིན་པོ་ཆེ་འཁོར་ལོ་བརྩེགས་པའི་རྒྱུད་ལས། རྒྱུད་གཏད་པ་དང་རྗེས་སུ་ཡི་རང་བའི་ལེའུ་སྟེ་བཅུ་གསུམ་པའོ།། །།རིན་པོ་ཆེ་འཁོར་ལོ་བརྩེགས་པའི་རྒྱུད་ཅེས་བྱ་བ། ཐུན་མོང་མ་ཡིན་པའི་རྒྱུད་ཆེན་པོ་རྫོགས་སོ།། །།བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །བྱང་ཆུབ་ཀྱི་སེམས་ཉ་མོ་བག་ལ་ཉལ་བཅོམ་ལྡན་འདས་ཀྱི་ཐུགས་ཀྱི་སྙིང་པོའོ། །ཆོས་དབྱིངས་དག་པ་མཚན་མེད་ཀུན་ཏུ་བཟང་། །དུས་དང་མཉམ་མེད་དུས་ཆེན་མཉམ་པ་མེད། །མ་བཅོས་དེ་བཞིན་ཉིད་ན་དེ་བཞིན་ཀུན་ཏུ་བཟང་། །དེ་ཉིད་ཉིད་ལ་དེ་ཉིད་དེ་བཞིན་པ། །དེ་ལ་དེ་སྟོན་དེ་ཉིད་དེ་བཞིན་དེ། །དེ་དུས་དེ་ཐོབ་དེ་ཉིད་དེ་ཚེའོ། །ཀུན་གྱིརངབཞིནཉམོབགལཉལ་ལ་ཕྱག་འཚལ་ལོ། །དེ་ལ་འདུན་པ་མཛད་པ་ཆེ་བ་ཡང་དགཀླུངཆེནཡིན། །གངགིས་བསྙད་པ་མ་ཡིན་དཔེ་བྲལ་དྲི་མེད་ལམ། །གང་ཡང་མི་གནས་ཅིར་ཡང་མ་ངེས་འཇའ་ཚོན་རི་མོའི་ཚུལ། བདེ་དང་སྡུག་བསྔལ་རྒྱུ་མཐུན་བྱང་ཆུབ་སྙིང་པོ་ཉིད། །ཆོས་ཀྱི་ཉམས་བག་ལོན་པའི་ཆོས་རྣམས་མ་ལུས་སྙིང་པོར་གནས། །རྣལ་འབྱོར་མཆོག་གི་ལམ་འདི་ཀུན་གྱི་ལམ་གྲོལ་ལམ། །ཕྱག་བྱར་འོས་པ་བླ་མའི་མཆོག་ལ་ཕྱག་ཀྱང་འཚལ། །དེ་ཕྱིར་རྣམ་གྲོལ་མཆོག་གི་ལམ་འདི་ཀུན་ཀྱང་བཙལ། །བླང་དོར་མེད་པ་རྒྱལ་བའི་ལམ་འདི་ཁྱད་པར་ལམ་ཆེན་ཏེ། །མི་འབྱེད་མི་སྤང་གང་ཡང་མི་ལེན་པ་ཉིད་སྨན་པའི་རྒྱལ་པོ་ཉིད། །སྦྱང་ཞིང་བགྲོད་མི་དགོས་པས་ལམ་མཆོག་དམ་པར་བསྔགས །དེ་བཞིན་ཉིད་དུ་ཡེ་ཤེས་འབྱུང་འཇུག་འུབྲ་པས་དབྱེར་མེད་པས། །ཆོས་གཅིག་ཐིག་ལེས་ཐམས་ཅད་བསྡུས་པས་རྣམ་པ་ཆད། །རྣམ་པའི་བསམ་པས་དབེན་པས་གསང་བ་བྱང་ཆུབ་སེམས། །ཡེ་ཤེས་དབྱིངས་སྒྲོལ་ཞི་བས་བདེ་བ་ཆེན་པོའི་ཀློང་། །སྐྱེད་པའི་ས་གཞིར་གྱུར་པས་རྒྱལ་དང་ཆགས་པའི་ཡུམ། །སྲིད་རྩེའི་ས་བོན་བསྲེགས་པའི་ཡེ་ཤེས་མེ་ཆེན་པོ། །སེམས་དང་སེམས་ལས་བྱུང་བ་མ་ལུས་ཀུན་རྫོགས་སོ། །བསླབ་པའི་གནས་མིན་ཅིར་ཡང་བྱ་བའི་ལས་དང་བྲལ་བའི་ཆོས། །དགོན་པ་གསང་བའི་གསང་ཆེན་ཉིད་ན་དེ་བཞིན་གསལ། ་༑ས་བྱ་ཤེས་བྱེད་དམ་པ་མ་ཡིན་གཉིས་མེད་དང་། །རྡོ་རྗེ་རྡོ་རྗེ་འདུ་འབྲལ་མེད་པ་བདེ་མཆོག་བདེ་ལ་གནས། །ཡུལ་མེད་ཡེ་ཤེས་དམ་པའི་ཡུལ་ལས་བྱ་བྱེད་ཡེ་ཤེས་དག །ཡེ་ཤེས་སྙིང་པོ་སྙིང་པོ་ཅན་རྣམས་ཀུན། །སུས་ཀྱང་མ་བྱས་རང་བྱུང་བཙལ་མེད་བདེ་བ་དམ་པའི་དོན། །ཀུན་ལ་རང་ཆས་གནས་ཀྱང་སུས་ཀྱང་མ་མཐོང་ཕྱིར། །རྣམ་ཤེས་རི་མོ་རྣམ་ཤེས་ཉིད་ལ་ཕྲི། །སྒོ་ཀུན་ཕྱག་རྒྱས་བསྡུས་ནས་རང་བཞིན་ཉིད་ལ་རི་མོས་བལྟ། །རི་མོའི་རྒྱུ་ལ་རི་མོ་བྲིས་ནས་རི་མོར་གསལ། །འཁོར་ལོ་བསྐོར་ལྟར་བྲིས་བཞིན་གསལ་ཞིང་དྲིལ། །སྒོ་ཀུན་འཇུག་པའི་སྨིག་རྒྱུའི་ཚུལ་དུ་བྱ་བྱེད་མཁན། །མུན་ནག་སྐར་ཁུང་ཁྲུ་རུ་མེ་སྒྲོན་གཅིག་གསལ་ཚུལ། །ཀུན་ཏུ་སྣང་བའི་སར་ཁུང་ཉིད་དེ་མེ་གཅིག་སོ་སོར་འཛིན །དེ་བཞིན་རྣམ་ཤེས་གཅིག་པོས་སྒོ་རྣམས་སོ་སོར་འཛིན། །ཉིད་ལ་ཉིད་ཀྱིས་རྒྱས་བཏབ་ཉིད་ཀྱང་རྒྱ་ཡིས་བཏབ། །རྒྱ་ཉིད་རྒྱར་གྱུར་རྒྱ་དེ་མ་ཉམས་རྒྱ། །མི་འགྱུར་བཏབ་བཞིན་སྣང་བའི་ངན་པའི་རྒྱ། །འཐོབ་སླ་འཐོབ་དཀའ་ཁྱད་པར་འཐོབ་དཀའ་རྣམས། །ཕྱག་རྒྱ་ཆེན་པོའི་རྒྱ་ཡིས་བཙན་པར་བྱས། །འཐོབ་དཀའ་འཐོབ་པས་འབྲས་སྦྱངས་འཁྲུལ་ནད་ཆེ། །ཀིམ་པའི་འབྲས་ལྟར་དེ་ཡིས་དེ་ཉིད་ཟ། །དེ་ཕྱིར་སངས་རྒྱས་ཡང་དག་བྱང་ཆུབ་ལམ་ལ་སྦྱང་མི་བྱ། །བྱང་ཆུབ་ཀྱི་སེམས་ཉ་མོ་བག་ལ་ཉལ་ལས། ཉིད་དང་ཉིད་ལྡན་པའི་དོན་དམ་པའི་གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས། འཁོར་བ་དང་ནི་མྱ་ངན་ལས་འདས་པ་གཉིས་མེད་པ་ཉིད་ལ་ཉིད་ཀྱིས་བརྗོད་པ། ཤེས་བྱ་དམ་པ་ཀུན་དང་འཕྱོས་པའི་དུག་ལྔ་བྱས་ཤིང་ཟོས་པས་ཟོ་ཆུའི་རྒྱུད་ལྟར་འཁོར། གནས་ལྔ་ནས་ནི་སྡུག་ཅིང་སྙན་པ་ལ་སོགས་བླངས་ཏེ་ཐོས་པས་དེ་བཞིན་འཁོར། །དེ་བཞིན་སྡུག་བསྔལ་སོ་སོར་ཐོས་པའི་དེ་དབང་མཐུས། །དེ་སྨིན་དེ་འཇོམས་སྤོང་བྱེད་དེ་ཡང་ཤིན་ཏུ་འཁོར། །འཁོར་བར་བལྟ་བའི་འཁོར་བའི་ཡུལ་འཇོམས་དེ་ནི་ཁྱད་པར་འཁོར། །གཟུགས་སྒྲ་ལ་སོགས་དེ་ཡི་རིགས་པས་བརྟགས་པས་ནི། །ཕུང་པོ་ལ་སོགས་འཁོར་དང་བཅས་པ་མེད་བཞིན་བརྟགས་ཤིང་འཁོར། །དེ་ཕྱིར་འཁོར་བ་འཁོར་བ་ཞེས་ནི་སྔ་ཕྱི་མེད་པའི་འཁོར་བ་ལས་ནི་བཏགས། །དེ་ལ་འཁོར་བ་ཞེས་ནི་ཀུན་གྱིས་བོས་པའོ། །དེ་བཞིན་ཉིད་དང་དབྱིངས་དང་མྱ་ངན་འདས་པ་སུས་མཐོང་བ་ཉིད་འཁོར་བ་སྟེ། །སེམས་དང་སེམས་ལས་བྱུང་བའི་ཆོས་མཐོང་བ་ནི་སྨོས་ཅི་དགོས་ཏེ་འཁོར་བ་ཆེན་པོ་ཡིས། །མ་བཅོས་ཐིག་ལེའི་ཆོས་གཅིག་ཅིར་ཡང་མི་སྣང་བས། །སྣངཞིང་བརྟག་པའི་ཆོས་ནི་གང་ནས་ཀྱང་ནི་བཙལ་དུ་མེད། །དེ་མེད་པ་ལ་འཁོར་བ་མི་གནས་མྱ་ངན་འདས་བྲལ་མེད། །དཔྱད་དུ་མེད་པའི་ས་ལ་སུས་ཀྱང་སྦྱང་དུ་མེད་དེ་ཀུན་བཟང་ཉིད་ཀྱིས་བརྟགས་པར་རབ་ཏུ་དཀའ། །ཡེ་ནས་བྱ་མ་དགོས་པའི་ཆོས་ལ་ཅིར་ཡང་མཐོང་དུ་མེད་པས་ཅང་ཡང་བསམ་མི་བྱ། །འཁོར་བ་ཡུད་ཙམ་གྲུབ་མ་མྱོང་བས་མྱ་ངན་འདས་པའང་མེད། །མྱ་ངན་འདས་མེད་པ་ཉིད་མི་རྟོག་རྣལ་འབྱོར་ལམ་ཆེནཔོ། །དེཉིད་གཡོ་བ་མེད་པས་ཡེ་ཤེས་གསལ་རིག་དག་ཅིང་རྣམ་པའི་འབྱུང་འཇུག་ཞི། །མི་རྟོག་མི་གཡོ་བ་དེ་ཡང་དག་སངས་རྒྱས་ཉིད། །དེ་ནི་ཐིག་ལེ་གཅིག་གིས་བསྡུས་པའི་ཆོས་ཉིད་ཀུན་ཏུ་བཟང་པོའི་ཆོས་འདི་ཉིད་ལས་ཆོས་རྣམས་གང་ཡང་མེད། །འཁོར་བའི་ཀླུང་ཆེན་རྒྱ་མཚོ་ནམ་མཁའ་ལྟ་བུར་ཆེ་བའང་། །མི་རྟོག་མི་གཡོའི་ངང་དུ་བཅོམ་སྟེ་གཉིས་མེད་ཐིག་ལེ་བྱང་ཆུབ་བདེ་བའི་ལམ་ཆེན་འདི་ལ་ལ་འཕྲང་མེད། །དེ་ཕྱིར་བྱང་ཆུབ་སྙིང་པོའི་ཆོས་འདི་ཉིད་ལས་ཆོས་རྣམས་གང་ཡང་མེད། །དམིགས་སུ་ཡོད་པའི་ཆོས་དང་དམིགས་སུ་མེད་པའི་ཆོས་རྣམས་མ་ལུས་པ། །དམིགས་པ་ཉིད་དང་མི་དམིགས་པ་ཡང་མཉམ་ཉིད་དོ། །ཕྱི་རོལ་གྱི་ནི་ཡུལ་རྣམས་སྒྱུ་མར་ཡིད་ཆེས་པས་ན་ནང་གི་སེམས་ཀྱང་མ་གྲུབ་པས་ན་རྣམ་པར་མི་རྟོག་པའོ། །སྒྱུ་མ་གཉིས་ཀར་དབྱེར་མེད་པས་ན་གཉིས་མེད་མཉམ་པའི་ངང་། །ཡིད་ཀྱི་རྒྱུ་བ་སྒོ་ལྔར་འབྱུང་བ་རྒྱུན་མི་ཆད་པ་དེ་བཞིན་དུ། །ཆོས་འདི་ཐམས་ཅད་ཀྱིས་ནི་ངོ་བོ་མེད་པས་གྲུབ་པ་མེད་པའི་སྒོ་རྣམས་མི་ཚོལ་བས ཅི་ལའང་མི་སེམས་མ་རྟོག་མི་དམིགས་གང་ལའང་མི་གནས་པར་བསྒོམ་མོ། །དེ་ལ་དམིགས་པ་བྱར་མེད་པས་ནི་མཉམ་ཉིད་ཡིན་ཏེ་ཆོས་རྣམས་ངོ་བོ་ཉིད་ཀྱི་སྐུའོ། །བྱང་ཆུབ་ཀྱི་སེམས་ཉ་མོ་བག་ལ་ཉལ་ལས་འཁོར་བ་དང་མྱ་ངན་ལས་འདས་པ་གཉིས་སུ་མེད་པའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཆེན་པོས་ཉིད་ཀྱི་བྱ་བྱེད་ཀྱི་ཆོས་ཐམས་ཅད་བརྗོད་པ། མཉམ་པའི་རྒྱལ་པོ་བྱ་བྱེད་མེད་པའི་ཀློང་དེ་ཉིད། །སུས་ཀྱང་མི་བཅིང་བཅིང་བར་བྱ་བ་ཡེ་ནས་ཡོད་མ་ཡིན། །ཐམས་ཅད་མཁྱེན་པའི་དབང་བསྒྱུར་དེ་ཡི་མ་བཟུང་མེད། །གཟུང་མེད་ཐམས་ཅད་དེ་ཡིས་བྱས་པ་མེད་པར་རིགས། །ཞི་བའི་སྙིང་པོ་དེ་ལ་གཡོ་བ་གང་ཡང་མེད། །དེ་བཞིན་འཕོ་འགྱུར་མེད་པའི་ཆོས་དེ་ཀུན་གྱི་འབྲས། །སྙིང་པོའི་སྙིང་པོ་ཡིན་པས་སྙིང་པོ་ཀུན་གྱི་མཆོག །འདུས་བྱས་རྣམ་པར་དག་པའི་ལམ་གྱི་ཕུགས་ཆེན་ཡིན། །སོ་སོར་རྟོགས་པའི་ཤེས་རབ་ཀྱིས་ཀྱང་དེ་ལ་བརྟག་ཏུ་ག་ན་ཡོད། །ཆོས་དང་ཆོས་རྣམས་འཁྲུལ་པ་རྣམས་ཀྱིས་དེ་ལས་གཟུང་བ་དབེན། །སུས་ཀྱང་མ་མཐོང་མཐོང་བ་མེད་དེ་རྣམ་པར་དག །ཆོས་སོ་ཅོག་པ་འཁྲུལ་པ་རྣམས་ནི་དེ་ལ་ལམ་དུ་འདོད། །ལམ་འདོད་དེ་ལ་ལམ་མི་གནས་ཏེ་ལམ་མཐའ་རིང་། །རྣམ་གྲོལ་ལམ་ནི་སུས་ཀྱང་བཙལ་དུ་མེད་པའི་ལམ་ཆེན་ཡིན། །དེ་ལ་མི་གནས་པ་ལ་གནས་པའི་ཆོས་དེ་ཡེ་ནས་ཡོད། །རྒྱལ་ལོ་རྒྱས་སོ་དེ་རྒྱས་ཐམས་ཅད་རྒྱས། །ཐ་དད་མེད་པར་ཀུན་ལྡན་དེ་དང་ལྡན། །དེ་ནི་ཡོངས་ཀྱི་ལམ་སྟེ་དེ་ལ་བགྲོད་དུ་མེད། །མ་བསལ་དྲི་མ་རྣམ་པར་དག་པ་རང་བཞིན་ཆོས། །གཡོ་བའི་འབྱུང་འཇུག་རྣམ་པར་སྤངས་པས་འདུ་ཤེས་ཟད། །ཡང་དག་སངས་རྒྱས་དམིགས་པ་མེད་པ་ནི། །ཡེ་ཤེས་ཡོངས་ཀྱི་ཡེ་ཤེས་སྙིང་པོ་ཡིན། །མ་གཡོས་ལྷུན་གྱིགུ་གྲུབ་པས་ཐིག་ལེ་ཆེན་པོ་ཉིད། །སྤྲོས་མེད་སྤྲོས་དང་བྲལ་བས་བྱང་ཆུབ་སྙིང་པོའི་སྐུ། །བདེ་ཆེན་ཡོངས་ཀྱི་ལམ་དེ་སངས་རྒྱས་དང་། །སྒྱུ་མའི་སྒྱུ་མར་གནས་ཏེ་སྒྱུ་མའང་མེད། །སྒྱུ་མ་རྫུན་ཕྱིར་ཆོས་རྣམས་སྒྱུ་མ་འདྲ། །སྒྱུ་མས་སྒྱུ་མར་བརྟགས་ཏེ་སྒྱུ་མའང་མེད། །སྐད་ཅིག་ཙམ་ཡང་སྒྱུ་མས་སྒྱུ་མ་མ་མཐོང་ཕྱིར། །ཆོས་རྣམས་མ་ལུས་དེ་འདྲར་མཐོང་བ་མེད། །འདུ་ཤེས་ཟད་པས་བྱང་ཆུབ་སྙིང་པོ་མཐོང་། །རྣམ་པར་མི་སེམས་རང་རིག་ཉིད་ཀྱི་དབང་། །ཅི་ཡང་མི་བསྒོམ་པ་ནི་བསྒོམ་པའི་མཆོག་ཅེས་བྱ། །ཅི་ཡང་མི་དྲན་པ་ནི་ཡང་དག་སངས་རྒྱས་དྲན། །རྟག་ཏུ་སངས་རྒྱས་དྲན་ཞིང་དམིགས་པ་མི་འབྱུང་ན། །མཉམ་སྙོམས་ཡང་དག་དེ་བཞིན་ཉིད་ཅེས་བརྗོད། །ཅི་ཙམ་དམིགས་པའི་ཡུལ་མེད་ཆོས་སུ་བརྟགས་དང་བྲལ། །ཡུལ་ལ་མི་དམིགས་ཡུལ་ཉིད་དེ་བཞིན་རྫུན། །རྫུན་ཕྱིར་ཤེས་པའང་རྫུན་ཏེ་སངས་རྒྱས་ཉིད་ཀྱང་རྫུན། །རྫུན་ཞེས་གདགས་པའང་རྫུན་ཏེ་རྫུན་ཉིད་ཡོད་མ་ཡིན། །སྨིག་རྒྱུ་ཆུར་འཁྲུལ་པའང་དེ་འདྲ་མོད། །འཁྲུལ་ཕྱིར་ཡང་དག་ཉིད་ཀྱང་སྐད་ཅིག་མཐོང་མི་སྲིད། །སྣང་སྟོང་ངོ་བོས་དབེན་ཕྱིར་དེ་བཞིན་དེ་བཞིན་ཉིད། །ཐིག་ལེ་གཅིག་གིས་བསྡུས་ཕྱིར་དེ་བཞིན་ཡོད་མ་མྱོང་། །ཡང་དག་ཉིད་ལ་ཡང་དག་ཡང་དག་མེད། །ཡང་དག་མེད་ཕྱིར་ཆོས་རྣམས་ཐམས་ཅད་མེད། །དེ་མེད་པ་ལ་སངས་རྒྱས་གནས་དེ་སངས་རྒྱས་ཉིད་ཀྱིས་ཀྱང་། །སངས་རྒྱས་ཉིད་ཀྱང་རྣམ་པར་དག་པའི་དབྱིངས་ཏེ་དབྱིངས་ཀྱི་རྒྱུ། །ཡོད་མེད་རྟག་ཆད་གཉིས་སུ་མེད་པའི་ལམ། །འཁོར་བ་མྱ་ངན་འདས་པ་གཉིས་མེད་ཅིག་ཆར་རེ། །གཅིག་མེད་གཅིག་ཏུ་འཛིན་པ་རྣམ་རྟོག་རྒྱུན། །འཛིན་མེད་དེ་ལ་རྟོག་པ་འདུལ་ཕྱིར་ཡང་དག་མིན། །ཡང་དག་མེད་པར་ཤེས་པ་དེ་ཉིད་འདུ་ཤེས་མེད་པའི་ལམ། །དེ་ཡིས་སངས་རྒྱས་ཀུན་བསྡུས་ཕོ་བྲང་ཆེན་པོར་གནས། །ལམ་གྱི་ཕུལ་ཏེ་ལམ་ནད་ཐམས་ཅད་སེལ། །སྤྲོས་བྲལ་ཐིག་ལེ་ཐིག་ཕྲན་ཀུན་གྱི་མཆོག །མིང་ཙམ་ཉིད་དུ་བདག་མེད་མཚོན་པའི་མིང་དང་བྲལ། །མི་སྐྱེ་མི་འགག་ཅིར་མི་དགོངས་པ་རྣམ་དག་ལམ་ཆེན་ཡིན། །མི་གཡོ་གཡོ་རྡུལ་མེད་པས་རྣམ་མི་རྟོག །མི་རྟོག་ཉིད་ལ་གང་མི་གནས་པ་དེ་ནི་ཐམས་ཅད་མཁྱེན། །ཡེ་ཤེས་སྤྱན་ཆེན་སྤྱན་གྱི་ནང་ན་མཆོག་ཏུ་གྱུར་པའི་སྤྱན། །མཐའ་དབུས་ཁྱབ་པར་འཛིན་པའི་སངས་རྒྱས་སྤྱན་ཞེས་དེ་ལ་གདགས། །རྒྱལ་བའི་རྒྱལ་བ་མ་རྒྱལ་བ་ཀུན་ཉིད་ལས་རྒྱལ། །བྱང་ཆུབ་ཆེན་པོའི་ཚུལ་མཆོག་རྣམ་པར་དག་པ་ཉིད། །རྒྱལ་བའི་རྒྱལ་བར་གྱུར་པ་རྒྱལ་བའི་རྒྱལ་མཆོག་གོ། །སྟོང་ཉིད་རང་བཞིན་ཡེ་ཤེས་ཆེན་པོའི་ངང་ཉིད་ལས། །སྐུ་གསུང་ཐུགས་ཕྱུང་དེ་ལ་རབ་གནས་པའི། །དེ་ལས་སྙིང་པོ་མཆོག་ཕྱུང་དཀྱིལ་འཁོར་གསང་བའི་ལྷ། །བྱེད་པོས་བྱེད་པར་འདོད་པའི་རྟོག་པའི་སྐུ་ཕྱག་རྒྱ། །སྐུ་གསུང་ཐུགས་རྟགས་མཚན་མའི་དབུ་ཕྱག་ཅན། །མཚན་ཅན་རྟོག་པ་དཀར་དམར་ནག་ལྗང་སེར། །མི་བརྟག་མི་དམིགས་མཉམ་སྦྱོར་དོན་འཚོལ་བས། །སྨིག་རྒྱུ་ཆུ་རུ་བསྙེག་པ་ལྟ་བུར་འགྲུབ་མི་སྲིད། །བྱང་ཆུབ་ཆེན་པོ་རྣམ་ཐར་ཀུན་གྱི་ལམ་ལ་གནས། །དེར་འགྲོ་ཡེ་ཤེས་བརྩེགས་པའི་རིན་ཆེན་རྒྱན་ཕྲེང་ཅན །སྲིད་གསུམ་མ་ལུས་ལུས་པ་མེད་པའི་རྒྱས་བཏབ་པས། །ཐིག་ལེ་ཆེན་པོར་སྙོམས་འཇུག་ཆེན་པོས་ཆེ་བ་ལྔ། །ཕྱག་རྒྱ་ཉི་ཤུ་རྩ་ལྔས་ལུས་བཅིངས་བྱ་བྱེད་མེད། །འཇིག་རྟེན་གསུམ་གདུལ་མེད་དེ་དེ་བཞིན་ཉིད་དུ་འདུལ། །ཆུང་ཆེ་ཕྱག་རྒྱའི་སྙིང་པོས་བཙན་པར་བཏབ་པའི་རྒྱ། །དེ་ཡིས་མ་ཕྱུང་དེ་ལས་ཐམས་ཅད་དེ་བཞིན་ཕྱུང་མེད་ཕྱུང་། །ཐམས་ཅད་ཕྱག་རྒྱས་བཏབ་ཀྱང་ཆེ་བ་གཅིག་གི་ངང་། །ཆེ་བ་ལྔ་ལྡན་སྙིང་པོ་མེད་པའི་དོན་ཉིད་ནི། །སྤྱི་མཐུན་ལས་ཀྱིས་མི་བསྒྲིབ་གཡོ་མེད་རང་བཞིན་གནས། །ཡེ་ཤེས་རྣམ་གྲངས་བསམ་ཡས་དཔག་མི་ལངས ཡེ་ཤེས་ཉིད་ལས་་གཞན་དུ་གཡོས་པ་མེད། །ནོར་བུ་རིན་ཆེན་ཚུལ་དུ་འབྱིན་པའི་རྒྱུ། །གང་ཡང་མི་སྐོར་མི་ལེན་ཐིག་ལེ་ཡོངས་ཀྱི་ལམ། །ཟླ་བ་ལྟ་བུར་རྣམ་གྲོལ་དམ་པའི་སྐུ། །ཕྱག་རྒྱ་ཆེན་པོའི་ངང་དུ་ཐམས་ཅད་བརྩོན་པར་གནས། །ཡེ་ཤེས་འོད་གསལ་སྟོང་སྨོན་མཚན་མེད་གསལ། །སུས་ཀྱང་མ་བཅོས་ཐིག་ལེ་ཉིད་ལས་ཉམས་པ་ཡང་མེད། །གང་ཡང་དེ་ཡོད་པ་ལ་འཛིན་པའི་རྟོག་པ་ཡོད་ཕྱིར་བྱང་ཆུབ་མེད། །དེ་ཡིས་དེ་དབང་། །རྟོགས་པའི་དབང་ལས་མི་རྟོག་ཡེ་ཤེས་སྐྱེ། །རྣམ་མི་རྟོག་པའི་དབང་དུ་ཐམས་ཅད་མ་ལུས་འདུན། །མཚན་མ་མ་ལུས་འདུད་ཕྱིར་ཆེན་པོ་ཉིད་ཀྱི་དབང་། །ཇི་ལྟར་མཚན་མ་དེ་དག་ཡོངས་སུ་རྣམ་པར་དག་གྱུར་པ། །སྣང་བ་ཉིད་ནི་ཡིད་ལ་མི་ཕྱེད་པའོ། །མཚན་མ་དེ་བཞིན་དེ་ལས་ཡེ་ཤེས་རྩ་བ་བྱུང་། །དེ་ཉིད་མཚན་མར་འདུས་ཏེ་མཚན་ཉིད་སྙིང་པོ་ཉིད། །མི་རྟོག་པ་ཡི་སེམས་ཀྱི་ཆོས་ཉིད་དེ་ཉིད་དབང་། །ཅིས་ཀྱང་བསླད་པས་མི་བསླད་རིན་ཆེན་གསེར། །གྱོ་མོ་ཤིང་བུ་གསེག་མར་མི་གནས་པས། ཁེང་བུ་རྩོལ་བས་ཀུན་ཏུ་ཞིབ་བརྟགས་ན། །འཁྲུལ་པ་གྲུར་ཞུགས་སྨྱོན་པ་རླུད་ཆེན་དང་། །ར་རོ་ཚུལ་ཙམ་རྣམས་ལ་མི་སྣང་སྲིད་འགྱུར་ཀྱང་། །བརྟགས་པ་དེ་ལ་སྦྱང་བ་གསེར་དུ་སྣང་། །དེ་བཞིན་ཀུན་གཞིའི་རྣམ་ཤེས་ཉིད་བདུན་བཅས་པའང་། །ཏིང་ངེ་འཛིན་གྱིས་ཡོངས་སུ་སྦྱངས་པ་ཡིས། །རྣམ་འབྱོར་ཅན་གྱིས་རྟག་ཏུ་དེ་མཐོང་འགྱུར། །མི་རྟོག་པ་ཉིད་ཡེ་ཤེས་ཀུན་གྱི་ཡེ་ཤེས་སྙིང་། །སྐྱེ་ཞིང་འཇིགས་པ་སྤྲེའུ་འདྲའི་རྣམ་ཤེས་དེ། །མི་སྐྱེ་མི་འཇིག་དེ་བཞིན་པ་ནི་ཡེ་ཤེས་སྐྱོད། །ཡེ་ཤེས་ཉིད་འཁྲུལ་རྣམས་ལ་ སྣང་ཕྱིར་ཡེ་ཤེས་མེད། །ཡེ་ཤེས་མེད་ཕྱིར་དེ་བཞིན་ཉིད་ཀྱང་ཡོད་མི་འགྱུར། །མི་རྟོག་པ་ཉིད་ཚུལ་ཁྲིམས་ཉིད་དེ་ཁྲིམས་འཆལ་མིན། །ཚུལ་ཁྲིམས་ཉིད་དུ་ཚུལ་ཁྲིམས་དེ་གནས་སོ། །ཡོངས་ཀྱི་སྙིང་པོ་དེ་ལ་དེ་མེད་འཁྲུལ་པར་སྣང་། །འཆལ་བའི་ཚུལ་ཁྲིམས་མེད་པར་གང་རྟོགས་པས། །གཉིས་ཀ་ཚུལ་ཁྲིམས་ལོག་པས་ཡེ་ཤེས་ཆེན་པོ་ཡིན། །གཉིས་མེད་ཡེ་ཤེས་སྙིང་པོ་སངས་རྒྱས་ཀུན་གྱི་ལམ། །ཚུལ་བཞིན་ཐིག་ལེ་ཡིད་ལ་བྱེད་པ་སྐད་ཅིག་གིས། །ལས་དང་ལས་ཀྱི་རྣམ་སྨིན་མ་ལུས་རྣམས། །བྱང་ཆུབ་ཆེན་པོར་མཚུངས་ཤིང་ཁྱད་པར་མེད། །མི་རྟོག་པ་ཉིད་ཆོས་རྣམས་ཐམས་ཅད་ཉིད་དུ་ངེས། །ཐམས་ཅད་དམིགས་སུ་མེད་པ་མི་རྟོག་ཐིག་ལེ་ཉིད། །དེ་ཉིད་མཉམ་པར་གནས་པས་མཉམ་པ་ཆེན་པོའི་ངང་། །དེ་ཉིད་གང་ཡིན་མི་གནས་དེ་ཉིད་གང་མི་གནས། །མི་གནས་མི་འཆལ་དེ་ཕྱིར་མི་གཡོ་བར་ཡང་མཚུངས། །དེ་ཡང་མི་གནས་ཕྱིར་མི་ལྡོག་པ་སྙིང་པོ་ཡིན། །དེ་ནི་ཐིག་ལེའི་སྙིང་པོ་ཡིན་ཏེ་ཐིག་ལེ་ཉིད་དུ་བཤད། །ཐམས་ཅད་མ་ལུས་མཉམ་པ་ཆེན་པོའི་ངང་ཞེས་དེ་ལ་རྫོགས། །ནམ་མཁའི་ཁམས་དང་མཚུངས་ཏེ་དབྱེར་མེད་མཆོག་ཏུ་བཤད། །རྣམ་པར་མི་རྟོག་དེ་ལ་མི་རྟོག་སྙིང་པོའི་སྙིང་པོ་ཡོད། །འཛིན་པའི་འཛིན་པ་མེད་པའི་ཏིང་འཛིན་སྙིང་པོའི་ས། །དེ་ཉིད་མི་རྟོག་ལམ་ལ་གནས་ཏེ་མི་རྟོག་ཡེ་ཤེས་སྐུ། །ཞི་ལ་ཕྲ་སྟེ་ཆ་ཤས་ཟབ་པ་མེད་ཕྱིར་བལྟ་དཀའ་བ། །མཚན་མར་འཛིན་པའི་འདུ་ཤེས་ཐམས་ཅད་བཅོམ་པས་ན། །ལྷུན་གྲུབ་ཡེ་ཤེས་ཆེན་པོའི་ཏིང་ངེ་འཛིན། །མི་རྟོག་པ་ཉིད་ཐམས་ཅད་མཁྱེན་པའི་སངས་རྒྱས་ཉིད། །གང་ལ་དམིགས་པ་མེད་པ་དམ་པས་དབང་བསྒྱུར་བ། །ཞི་བ་རྣམ་ལྡན་མཚན་ཉིད་མེད་པའི་མཚན་ཉིད་ནི། །རྣམ་པ་ཐམས་ཅད་མཁྱེན་པའི་ཡེ་ཤེས་ཉིད་ཡིན་ཏེ། །ཡེ་ཤེས་སྙིང་པོར་སངས་རྒྱས་ས་རྣམས་མ་ལུས་བསྡུས། །ཆེ་བའི་ཆེ་བ་ཡང་དག་དོན་གྱི་སྒོ་ཉིད་ནི། །རྣམ་པའི་གྲངས་དང་དམིགས་པ་གཉིས་པོ་སྤངས། །སྣང་མེད་ཆོས་ལ་སྣང་བ་མེད་པར་ཡེ་གནས་པས། །མཚན་མའི་རྣམ་རྟོག་ཐེག་པ་རྣམས་ལ་ག་ལ་འཇོག །སེམས་ཅན་སེམས་ཅན་ཙམ་ཡང་མི་སྣང་ན། །སངས་རྒྱས་སངས་རྒྱས་ཀུན་གྱི་ས་ལ་དེ་བཞིན་གནས། །མི་རྟོག་བྱང་ཆུབ་སྙིང་པོ་མི་རྟོག་མྱ་ངན་འདས། །སྣ་ཚོགས་མཚན་མ་འཛིན་པའི་འདུ་ཤེས་དང་བྲལ་བ། །རྒྱལ་བའི་བཅོམ་ལྡན་འདས་ཏེ་བཅོམ་ལྡན་འདས། །ཐེག་ཆེན་སྙིང་པོ་རྣམ་མི་རྟོག་པའི་མཆོག །གང་ལ་མི་གནས་མི་རྟོག་བྱང་ཆུབ་པོ། །བྱང་བ་དང་ནི་མཚན་ཉིད་ཐམས་ཅད་མ་ལུས་ཀུན། །དངོས་པོར་མྱ་ངན་འདའ་བར་གྱུར་པ་ཡོངས་མི་སྲིད། །རྣམ་རྟོག་མཚན་འཛིན་རྣམ་པར་ཤེས་པ་ལ། །ཡེ་བཟློག་མྱ་ངན་འདའ་བའི་ཐིག་ལེ་བྱང་ཆུབ་པོ། །དེ་བཞིན་རྣམ་པར་མི་རྟོག་སྙིང་པོས་དོན་མཛད་པ། །དེ་བཞིན་གཤེགས་པའི་དགོངས་པ་རྣམ་མི་རྟོག །རྟོག་པའི་དྲི་མ་ཟད་ཕྱིར་ཅིར་ཡང་སྟོན། །སེམས་ཅན་རྣམ་རྟོག་དེ་ཡིས་བསྐང་བས་ན། །དེ་བཞིན་ཉིད་ནི་དོན་མཛད་སེམས་ཅན་མགོན། །བདག་དང་གཞན་གྱི་དབང་ལ་གནས་པའི་རིགས་དྲུག་མ། །མི་རྟོག་བྱིན་རླབས་རྒྱུན་མི་འཆད་པར་རྟག་ཏུ་སྟོན། །ཇི་ལྟར་ཡིད་བཞིན་སྒྲུབ་པའི་ནོར་བུའི་རྒྱལ་པོ་ཆེན་པོ་ནི། །ཡིད་བཞིན་འདོད་པའི་རེ་བ་རྫོགས་པར་བྱེད། །དེ་བཞིན་རྣམ་པར་མི་རྟོག་པ་ཡི་ཆོས་ཉིད་ཀྱང་། །རྟོག་མཐའ་ཟད་པའི་སྨོན་ལམ་མ་ལུས་རྫོགས་པར་གནས། །མཐའ་དང་དབུས་མེད་གང་ལའང་མི་སྤྱོད་མཉམ་གནས་པ། །མཉམ་པའི་རྒྱལ་པོ་སངས་རྒྱས་ཉིད། །ཚོར་བ་དེ་བཞིན་གཤེགས་པ་ནི། །ཡང་དག་དོན་དམ་འདི་ལ་བསམ་བྱ་གང་ཡང་མེད། །གཞག་པར་བྱ་བའང་ཡེ་ནས་ཅི་ཡང་མེད། །ཡང་དག་ཉིད་ལ་ཡང་དག་ཉིད་གནས་ཕྱིར། །དོན་དམ་ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་ཐམས་ཅད་རྣམ་པར་གྲོལ། །ཡང་དག་དོན་ཆེན་རྣམ་པར་དབྱེ་བ་ལ། །གཡོ་བར་བྱ་བའི་ཡིད་ཀྱང་མི་གཡོ་མེད་པ་སྟེ། །ཉོན་མོངས་རྣམ་ཤེས་སྤྲུལ་དེས་སྒོ་ལྔར་འགྱུས། །ཀུན་ཏུ་ངེས་པར་བཟང་བའི་གནས་ངན་ལེན། །མི་བཟད་སྲིད་པའི་རྒྱ་མཚོ་འཁོར་བའི་འོབས་ན་གནས། །དེར་བརྟགས་གནས་ལས་དབེན་པས་ཡེ་ཤེས་སྙིང་། །དེ་ལྟའི་མི་རྟོག་བྱང་ཆུབ་སྙིང་པོའི་ལམ། །ཡིན་གྱིས་རྣམ་ཤེས་གང་གི་རྗེས་མི་འབྲང་། །རྣམ་པར་མི་རྟོག་ཉམས་སུ་དེས་མྱོང་ཀློང་། །དེ་ཉིད་ཚོར་བ་ཉིད་དེ་ཚོར་བའི་རྒྱལ་པོ་ཡིན། །དངོས་པོ་གང་དུའང་མི་གནས་མི་དམིགས་ཤིང་། །ཇི་ལྟར་བསམ་པ་བསམ་རྟོགས་ཉིད་ཡིན་ཏེ། །ཆོས་རྣམས་མ་ལུས་སྣང་རྟོག་གང་བྲལ་བྱེད། །དེ་ནི་སངས་རྒྱས་ཉིད་མཉེས་ས་ཆེན་ལྷུན་གྱིས་གྲུབ། །བདག་མེད་པ་ནི་བདག་མེད་ཀུན་བདག་མེད། །མི་རྟོག་མི་རྟོག་པ་ལ་མི་རྟོག་རྟོགས། །སྡུག་བསྔལ་པ་ལ་སྡུག་བསྔལ་མ་ཡིན་བལྟ། །གཙང་དང་མི་གཙང་གཉིས་ཀར་མི་ཚོར་བ། །ཐམས་ཅད་མ་ལུས་ཆོས་རྣམས་ཉམས་སུ་ལེན། །འཁྲུལ་པའི་སྡུག་བསྔལ་མེད་ཕྱིར་ཚོར་བ་དམ་པར་བསྔགས། །བྱང་ཆུབ་ཆེན་པོའི་ལམ་དེར་གནས་འདྲལ་མི་ཕོད་དོ། །བྱང་ཆུབ་ཀྱི་སེམས་ཉ་མོ་བག་ལ་ཉལ་ལས། བྱང་ཆུབ་སེམས་དཔའི་དགོངས་པ་བག་ལ་ཉལ་བ་དང་། ཀུན་ཏུ་བཟང་པོའི་དགོངས་པ་བག་ལ་ཉལ་གཉིས་ལྟག་སྤྲོད་དུ་བསྟན་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས། མི་གཡོ་བ་འདོད་ཆགས་པའི་ཏིང་ངེ་འཛིན་ལ་སྙོམས་པར་ཞུགས་ནས། ཉིད་ཀྱིས་ཉིད་ལ་བཤད་པ། འདུ་ཤེས་ཐམས་ཅད་འདུ་མི་ཤེས་པར་ཡང་རྟོག་པ། །མཚན་མ་ཟད་ཕྱིར་གཡོ་བའི་འབྱུང་འཇུག་དག །རང་རིག་ཡེ་ཤེས་གང་དུའང་མི་གསལ་བས། །མི་གཡོ་ཐིག་ལེ་དཀྱིལ་འཁོར་ལྡན་པའི་མཆོག །མི་གནས་མི་སེམས་ཚུལ་ཁྲིམས་ཕ་རོལ་ཕྱིན། །མི་དྲན་མི་གཡོ་བ་ནི་ཏིང་འཛིན་དམ་པའི་བསམ་པའོ། །སྒྱུ་མ་སྒྱུ་འདྲའི་སེམས་མི་འབྱུང་བ་ཤེས་རབ་ཡིན། །སེམས་ནི་ཡིད་ཀྱི་རྟེན་ཏེ་འབྱུང་འཇུག་མེད་སྣང་ན། །ཡང་དག་ཡང་དག་ཉིད་དེ་ཆོས་སྐུ་མི་གཡོའི་རྒྱ། །དེ་ལྟར་དེ་བཞིན་མཉམ་པ་དཀྱིལ་འཁོར་ཆེན་པོའི་ལམ། །གཡོ་བ་རྗེས་དྲན་བསམ་ལས་ཡུལ་གཞན་དམིགས་པ་ལ། །བརྟུལ་བ་ཇི་ལྟར་བྱས་ཀྱང་མི་གཡོ་བ་ཡི་འབྱུང་འཇུག་གསལ། །ཇི་ལྟར་གསལ་བ་དེ་ཉིད་འཁྲུལ་པའི་འཁྲུལ་པ་ཡིན། །རྣལ་འབྱོར་ལམ་བྱེད་ལམ་རྣམས་མཉམ་པར་ནི། །དུས་གསུམ་སངས་རྒྱས་རྣམས་ཀྱིས་ཁྱད་པར་གསུངས། །རྩ་བ་མེད་པའི་དངོས་མེད་སེམས་ཉིད་ནི། །ཕྲ་བར་སྦྱངས་པས་ཀུན་གྱི་སྤྱོད་ཡུལ་ལས་འདས་ཏེ། །འཕགས་པའི་སྦྱན་གྱི་གཟིགས་ཤིང་ཤེས་སུ་རུང་མ་ཡིན། །ཅིར་ཡང་མཐོང་བ་མེད་པས་སེམས་ཀྱི་ངོ་བོ་མཐོང་ མི་མཐོང་མཐོང་ཕྱིར་རྣམ་པར་མི་རྟོག་མཐོང་། །མིང་དུ་གདགས་སུ་ཚོར་བའི་ངོ་བོར་གསལ། །ཡེ་ཤེས་སྒྱུ་མའི་ཐིག་ལེ་ཆེར་གྲགས་པས། །ཁམས་གསུམ་དུས་གསུམ་ཀུན་བཟང་ཉིད་ཀྱི་རོལ། །ཆོས་རྣམས་ཟག་མེད་ཐམས་ཅད་མ་ལུས་ཀུན། །དངོས་པོ་ཉིད་མེད་དངོས་པོས་བསྡུས་པའི་དེ་བཞིན་ཉིད་རིག་ན། །ཡེ་ཤེས་དག་པའི་ཚོགས་ཆེན་བསྒོམ་པ་དེ་ཡིན་ཏེ། །ལམ་མཆོག་འབྲས་བུ་ཆོས་སྐུ་དེ་མཐོང་བས། །ངོ་བོ་ཉིད་ཀྱི་ངོ་བོ་ཉིད་རོལ་རྣམ་དག་ནས། །དེ་དང་དུས་གསུམ་མི་འབྲལ་དེ་ལ་དེ་བཞིན་གནས། །ཉེ་ལམ་ཉིད་རྫོགས་ཕ་རོལ་ཕྱིན་འཚང་རྒྱ། །ངོ་བོ་ཉིད་ཀྱིས་ཆོས་རྣམས་གནས་པའི་ངོ་བོ་ཉིད། །ངོ་བོ་ཉིད་མེད་དེ་ཡང་མེད་རིག་པས། །ཆོས་རྣམས་ཐམས་ཅད་གྲགས་པ་མེད་པ་ཡིན། །གྲགས་ཀུན་སྤངས་པ་ཆོས་ཀྱི་རྒྱལ་པོ་དེ་བཞིན་ཉིད། །ཆོས་སྐུའི་ཏིང་འཛིན་རིན་ཆེན་ལ་བརྟེན་ནས། །སངས་རྒྱས་ཆོས་སྐུ་དཔག་ཏུ་མེད་པ་འབྱུང་བར་འགྱུར། །ཆོས་སྐུའི་རྣམ་པར་མི་རྟོག་རྟག་ཆད་མ་ཡིན་པས། །ཡང་དག་དབུ་མའི་ལམ་དུ་ཁྱད་པར་བསྟན་པ་ནི། །བླ་མེད་བྱང་ཆུབ་ལྷུན་གྱིས་གྲུབ་པའི་ཡེ་ཤེས་སྐུ། །མཚན་མ་རྣམས་དང་ཡེ་ཤེས་དེ་བཞིན་ཉིད་དེ་འདྲེས་མ་ཡིན། །མངོན་པར་འདུ་བྱེད་མཚན་རྣམས་ཐམས་ཅད་ཀྱིས། །སངས་རྒྱས་ལྷུན་གྲུབ་མཚན་ལྡན་མ་ཡིན་ནོ། །དེ་དག་མ་ལུས་འཁོར་ལོས་སྒྱུར་ཡོན་ཏན། །དེས་ནི་སངས་རྒྱས་མི་མཐོང་དེ་བཞིན་ཉིད་དང་ལྡན། །ཉེ་ལམ་བདེར་རྫོགས་ཡོན་ཏན་དཔག་མེད་དེ། །ཆོས་རྣམས་མ་ལུས་ངོ་བོ་གཅིག་གི་ངང་དུ་གནས་པ་ལ། །ངོ་བོ་དེ་ཉིད་དེ་བཞིན་རྣམ་རིག་ན། །ཡེ་ཤེས་ཆེན་པོའི་ཚོགས་ཆེན་རྣམ་པར་དག །ལམ་གྱི་ལམ་མཆོག་མངོན་དུ་རྙེད་པའོ། །ངོ་བོ་ཉིད་ཀྱིས་རྣམ་པར་དག་ལ་བྱང་ཆུབ་ཀློང་། །བསོད་ནམས་ཀློང་ཆེན་བཙུག་པ་ཡེ་ཤེས་དག་པའི་རྒྱུ། །སྤྱིན་པ་ཚུལ་ཁྲིམས་བསླབ་པའི་གནས་འཛིན་པ། །ཡེ་ཤེས་ཆེན་པོ་ཚོགས་ཆེན་སྐྱེད་པའི་རྒྱུ་ཡིན་ནོ། །འཁོར་གསུམ་ཡོངས་སུ་དག་པའི་ཚུལ་གྱིས་གང་སྤྱོད་པ། །འཇིག་རྟེན་ལས་འདས་ཕ་རོལ་ཕྱིན་པའི་རྒྱུ་མཆོག་གོ །གང་ཡང་གཏོང་བ་མངོན་དུ་གྱུར་ནས་བསགས་པ་མཐར་ཕྱིན་པ། །ཡེ་ཤེས་ཀྱི་ཚོགས་རྫོགས་པར་བྱེད་པའི་ལམ་མཆོག་གོ །གང་གཏོང་བ་ལ་ལེ་ལོ་སྙོམས་པ་གཡེངས་བ་མེད་གྱུར་ན། །ངོ་བོ་ཉིད་ཀྱི་ཆོས་གཅིག་དེ་བཞིན་ཉིད་ཀྱང་༄༅ འབྲས་བུར་འགྱུར། །འདུས་བྱས་བསོད་ནམས་ཚོགས་ལ་བརྟུལ་ཕོད་ན། །འཁོར་ལོས་སྒྱུར་རྒྱལ་ལམ་དེ་ནས་ནི་འབྲས་བུར་འབྱུང་། །ཡེ་ཤེས་ཚོགས་ཆེན་འབྲས་བུའི་ལམ་གྱུར་ངེས་བྱེད་འགྱུར། །གཏོང་ལ་སོགས་པ་བསོད་ནམས་དོན་དུ་བསྒྲུབ་བདེ་བ། །དེ་བཞིན་གཤེགས་པ་ཐམས་ཅད་དོན་དུ་གཉེར་བའི་བྱ་བྱད་བྱེད། །བུད་མེད་སྦྲུམ་མ་བུ་བཙས་ཉེ་བ་བཞིན་དུ་ཉེ་བར་འགྱུར། །སྤྱིན་དང་ཚུལ་ཁྲིམས་བཟོད་དང་བརྩོན་འགྲུས་བསམ་གཏན་ཤེས་རབ་ལྡན། །ལྔ་པོ་ཤེས་རབ་ཉིད་ཀྱིས་དབང་བསྒྱུར་ཆོས་ཀྱི་སྐུ་ལ་སྦྱོར། །མར་མེ་དགོངས་ནས་མུན་ཁོང་འཇུག་ཆ་འདྲ་བར་འགྱུར་བ་ཡིན། །བསོད་ནམས་ཚོགས་ཀྱི་དོན་དེ་ཆུ་སྐོམ་འཐུང་བའི་ཚུལ་དུ་སྦྱོར་བྱེད་པ། ཁེང་གཉིས་གཙུབ་པའི་མེ་ཡིས་ཀུན་བསྲེགས་བཞིན། །ཉོན་མོངས་མ་ལུས་ལུས་པ་མེད་པར་ཀུན་བསྲེགས་ནས། །ཡེ་ཤེས་ཆེན་པོའི་ལམ་ན་དེ་གནས་དེ་འགྲེས་བྱེད། །བྱང་ཆུབ་ཀྱི་སེམས་ཉ་མོ་བག་ལ་ཉལ་ལས། རྫོགས་པ་ཆེན་པོ་མི་གཡོ་བའི་དོན་བསྟན་པས། མདོ་སྡེའི་གཡོ་བ་གོལ་སར་བསྟན་པ་དང་། ཡེ་ཤེས་ཀྱི་ཚོགས་རྫོགས་པ་དང་མི་གཡོ་བ་མཐོང་དུ་རུང་བར་བསྟན་པ་དང་། བསོད་ནམས་ཀྱི་ཚོགས་ཀྱིས་ཡེ་ཤེས་ཀྱི་ཚོགས་བསགས་ནས་དེ་བཞིན་ཉིད་ཐོབ་ཏུ་རུང་བའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས ཆོས་ཐམས་ཅད་བདེན་པ་གཉིས་སུ་འདུས་པའི་དོན་དམ་པའི་བདེན་པ་ནི་རྒྱུ། ཀུན་རྫོབ་ནི་འབྲས་བུར་སྟོན་པ་ཉིད་ཀྱིས་ཉིད་ལ་བཤད་པ། ཆོས་གཅིག་ལ་ནི་རིམ་གྱིས་བདེན་པ་གཉིས་རྟོག་པ། །མུ་སྟེགས་བྱེད་ཀྱིས་ཀུན་རྗེས་འཁྲུལ་པའི་བདེན་པར་རབ་བརྟགས་པ། །ཐམས་ཅད་བདགདང་གཙོ་བོརརྟོག་པ་བསྟན་པ་ངེས་པ་ཉིད། །དམ་པའི་དོན་ནིཐམས་ཅད་མཐའ་བརྒྱད་སྤྲོས་དང་བྲལ་བ་ཉིད་བལྟ་བ། །དེ་ཡང་རྟག་གོ་སྙམ་པའི་རྟོག་དང་མ་བྲལ་བ་ནི་དེ་ལྟར་བྱེད། །ཕྱི་རོལ་པ་ནི་བརྟགས་པས་རྣམ་པར་བདེན་པ་གཉིས་སུ་རྟོགས། །སོ་སོར་སྨྲ་བས་འཁྲུལ་པ་ཉིད་དུ་རྣམ་པར་བརྟགས་པ་ཉིད། །བརྟགས་པས་དོན་གཉིས་འགྲུབ་པར་འདོད་དེ་མིན། །དམ་པར་ཕུང་པོ་ཁམས་དང་སྐྱེ་མཆེད་ཐམས་ཅད་ཀུན། །དུས་གསུམ་རྫས་སུ་འདོད་དེ་སོ་སོརསྨྲ་བའི་དོན་དམ་རང་བྱུང་ངོ་། །སྡེ་པའི་འཁྲུལཔ་རྟག་པའི་དོན་ཉིད་སྟེང་དུ་འདུས་མ་བྱས་དང་རིག་བྱེད་མ་ཡིན་པ། །སེམས་དང་མི་ལྡན་འདུབྱེད་བཅུ་བཞི་འདོད་པ་རྣམས་ནི་འཁྲུལ་པའོ། །དམ་པར་ཕུང་པོ་ཁམས་དང་སྐྱེ་མཆེདཙམཞིག་རྫས་སུ་འདོད་པ་དོན་དུ་བལྟ། །རྣམ་ཤེས་ཙམ་དུ་སྨྲ་བས་ཐམས་ཅད་བདེན་པ་གཉིས་སུ་འདོད་དེ་འཁྲུལ་པ་ནི། །ཕྱི་རོལ་ཕུང་པོ་ཁམས་དང་སྐྱེ་མཆེདསེམས་དང་མི་ལྡན་རིག་བྱེད་མ་ཡིན་པ། །དེ་རྣམས་རྫས་སུ་འདོད་པ་རྣམས་ནི་འཁྲུལ་པ་ཡིན་ཏེ་དོན་དམ་ངེས་པ་མིན། །དམ་པར་མཚན་ཉིད་གསུམ་གྱི་ཀུན་བརྟགས་པ་ནི་འཁྲུལ་པ་ཉིད་ཡིན་ལ། །གཞན་དབང་གྲུབ་པ་གཉིས་ནི་དོན་དམ་པ་སྟེ་འཁྲུལ་པ་ཡེ་ནས་མིན། །དེ་ལ་ངོ་བོ་ཉིད་གསུམ་རྫོགས་ཏེ་བདེན་པ་བཞི་ཡང་ཚད་མར་གནས། །དོན་དམ་པ་ལ་སྐུ་གསུམ་ཡེ་ཤེས་བཞི་ཡང་ཚད་མར་གནས། །མཐའ་གཉིས་སྤངས་པས་ཐམས་ཅད་བདེན་པ་གཉིས་སུ་འདོད་དེ་འཁྲུལ་པ་ནི། །རྣམ་བཞིར་འདོད་དེ་ངེས་ཚིག་མཚན་ཉིད་དབྱེ་བ་དང་། །འཇོག་པའི་ཡུལ་དང་རྣམ་བཞིར་འཁྲུལ་པར་འདོད་པ་དེ་ནི་དམ་པ་ཡིན། །དམ་པའི་རང་བཞིན་རྣམ་པ་བཞི་སྟེ་ངེས་པ་དང་ནི་མི་བསླུ་བ། །བཅོས་མ་མ་ཡིན་པ་དང་བརྟགས་པའི་དོན་མིན་གང་ཡིན་པ། །དམ་པར་འདོད་དེ་འཁྲུལ་པ་མིན་ལ་སྐྱེ་མེད་རྟག་པ་མེད། །གཞིག་ནས་རང་བཞིན་མེད་པར་གྱུར་པ་འཁྲུལ་པ་ཡིན་ཕྱིར་དོན་དམ་མིན། །དམ་པར་སྒྱུ་མ་ཙམ་དུ་ཡིན་ཏེ་དེ་ལ་དངོས་པོར་སྣང་བ་གང་ཡང་མིན། །ཚིག་ཏུ་དངོས་པོར་མི་བལྟ་རིག་པ་རིམ་གྱིས་སྐྱེ་བར་འདོད་དེ་སྒྱུ་མ་ཙམ། །ཨ་ཏི་ངེས་མེད་ཐེག་པའི་སྙིང་པོའི་རང་བཞིན་འདི། །སུས་ཀྱང་དཔག་པར་ནུས་པ་མ་ཡིན་བདེན་གཉིས་ཡེ་ནས་མེད། །བདེན་པ་གཉིས་འདོད་པ་ནི་འདི་ན་ག་ན་ཡོད་དེ་ཡེ་ནས་མེད་པ་ཡིན། །བདེན་དང་མཚན་མར་གཏན་ཚིགས་རྗེས་སུ་དཔག་པ་ཡིས། །ཡ་མཚན་རྨད་ཀྱི་ཆོས་འདི་རྟོགས་པར་ནུས་པ་ག་ལ་ཡོད། །འཁོར་བ་མྱ་ངན་འདས་མེད་ཐིག་ལེ་ཆེན་པོའི་ཀློང་། །བྱར་མེད་ཀློང་ལས་འདས་པས་བྱ་བཙལ་རྫོགས་པའི་སྐུ། །ཐིག་ལེ་ཆེན་པོར་ཐམས་ཅད་ཆུབ་པས་རྒྱ་མཚོའི་ཚུལ། །མ་སྐྱེས་དབྱིངས་སུ་རྫོགས་པས་ཡུམ་གྱི་མཁའ། །སྟོང་པ་བཙལ་ཀྱང་རྙེད་པར་གྱུར་པ་མེད་པས་མཁའ་ལྟར་དག །རྡོ་རྗེ་འདུ་འབྲལ་མེད་དེ་བདེ་ལ་གནས་པས་སྡུག་བསྔལ་ཡེ་ནས་ཞི། །ཕྱག་རྒྱའི་འབྱུང་འཇུག་ཉིད་ལ་འཆར་བས་སྙིང་པོར་གནས། །ཡོན་ཏན་སྐུ་ལས་འབྱུང་བས་གང་ལའང་བསྔགས་སུ་མེད། ཁྲེས་རབ་ཚོགས་ཀྱི་སྙིང་རྗེའི་རླན་དང་མ་བྲལ་ཐམས་ཅད་སྤངས། །ཐམས་ཅད་ཀུན་གྱི་རྒྱུད་སྡེ་འབྲས་བུར་གནས་པས་ལྟ་བའི་མིག །ཐམས་ཅད་མ་ལུས་བསྡུས་ཀྱང་དོག་འཛེར་མེད་པས་ཆོས་རྣམས་ཀུན་གྱི་གཞི། །ཐམས་ཅད་མ་ལུས་བསྡུས་ཤིང་བརྟན་པར་གནས་པས་ཕ་རོལ་ཕྱིན་བཅུ་རྫོགས། །སྤང་ལེན་མེད་པའི་ཆོས་འདི་སྒྱུ་མར་གནས་པས་མིང་དུ་བཏགས་པ་རྫུན། །ཡང་དག་ཐིག་ལེར་ཐམས་ཅད་བསྡུས་པས་བྱ་བཙལ་བྱ་མི་དགོས། །ཡེ་བསྲུངས་ཕྱག་རྒྱས་ཀུན་ལ་བཏབ་པས་ཕྱག་རྒྱར་བསྒོམ་པ་གོལ། །གཞན་དང་མ་འདྲེས་རྒྱལ་པོ་བཞིན་པས་ས་ལ་སྦྱང་མི་དགོས། །འདི་འདྲའི་དོན་དེ་རབ་ཏུ་ཤེས་པར་གྱུར་པ་མང་དུ་ཐོས་པའི་མཆོག །སྨྲ་བ་རྣམས་ནི་ཉམས་པའི་སྨྲས་པ་དག་ལ་དེ་བཞིན་ཡོངས་མི་གནས། །བཤད་དུ་ཡེ་ནས་མེད་པས་བཤད་པ་འཁྲུལ་པ་སྟེ། །ཡང་དག་ཉིད་ལ་བཤདདུམཚོནཔའིཡིགེམེད། །འཕུང་བར་རྒྱུ་བྱེད་རྣམས་ནི་བཤད་ལ་མོས་ཤིང་དགའ་བར་འགྱུར། །ཡང་དག་བྱང་ཆུབ་ཐོབ་པར་ཡོངས་མི་འགྱུར། །རྣམ་དག་ཐིག་ལེ་ཀུན་ལ་ཁྱབ་པའི་ཡབ་ཆེན་པོ། །ཚིག་ཏུ་ཐོས་པས་དེ་ཉིད་རྙེད་པར་ག་ལ་འཀྱུར། །ཡེ་ནས་བྱ་མེད་བྱ་མི་དགོས་པའི་ལམ་མཆོག་འདི། །རྒྱུ་རྐྱེན་ཟད་པའི་བྱང་ཆུབ་རྩ་བ་རྣམ་པར་དག །མཐོང་བས་དོན་ལ་མཁས་པ་ཐོས་པའི་མཆོག་ཡིན་ནོ། །རྣམ་པར་མི་རྟོག་ཚིག་གི་རྗེས་སུ་མི་འབྲང་ཆོས་གཅིག་དབང་བསྒྱུར་ན། །ཆོས་རྣམས་ཐམས་ཅད་ཐོས་ཤིང་ཤེས་པའི་རབ་ཏུ་གསུངས། །ཁྲུས་ཆུས་ལུས་ལ་རེག་ཏུ་ཚ་བ་ཇི་བཞིན་གནས། །མི་སྐྱེ་མི་འགག་དངོས་པོར་ཅིར་ཡང་དགོངས་སུ་མེད། །དྲང་སྲོང་ཐིག་ལེའི་ལམ་དུ་ཞུགས་པའི་རྣལ་འབྱོར་པས། །ཡིད་ཀྱི་དཀྱིལ་འཁོར་ཉིད་ཀྱི་ཐིག་ལེར་ཐིམ། །ཐིག་ལེའི་དཀྱིལ་འཁོར་ཉམས་སུ་ལེན་པ་ཐོས་པའི་མཆོག །ཡིད་ཀྱི་ཐིག་ལེ་མ་ཉམས་ཆོས་ཉིད་ཐིག་ལེར་གསལ། །ཡིད་ཀྱི་དཀྱིལ་འཁོར་ཉིད་ཀྱི་ཐིག་ལེ་ཐིག་ལེར་ཐིམ། །ཐིག་ལེའི་དཀྱིལ་འཁོར་ཉམས་སུ་ལོན་པ་ཐོབ་པའི་མཆོག །ཡིད་ཀྱི་མ་ཉམས་ཐིག་ལེའི་ཆོས་ཉིད་ཐིག་ལེར་གསལ། །ཟབ་མོ་གཏིང་མཐའ་མེད་པའི་དེ་བཞིན་དེ་ལ་བསྐོར། །དེ་ལས་འགྱུར་མེད་དེ་བཞིན་དེ་གནས་པ། །ཆོས་རྣམས་མ་ལུས་ཚོར་བས་ཐོས་པའི་མཆོག་ཏུ་ཁྱད་པར་གྱུར། །མང་དུ་ཐོས་པའི་མཆོག་ནི་དེ་བཞིན་ཐུགས་ཀྱི་དཀྱིལ་འཁོར་དུ་འུབ་པའོ། །ཚིག་ཏུ་ཐོས་པ་དོན་ལས་ཉམས་སུ་མྱངས་ཤིང་ཐེ་ཚོམ་གནས། །སྙིང་པོ་ཉིད་དུ་སེམས་མི་གཡོ་བ་ལམ་གྱི་གཏེར། །དེ་ལྷའི་ལམ་ལ་གནས་པས་ཕ་རོལ་ཕྱིན་དྲུག་འདུས། །གང་དུའང་སེམས་མི་གཡོ་བ་སྦྱིན་པའི་མཆོག །གང་ལའང་ཡིད་མི་གནས་པ་ཚུལ་ཁྲིམས་དག་པ་ཡིན། །སྣ་ཚོགས་བྱེ་བྲལ་མི་མཇེད་བཟོད་པ་དཔའ། །བཟང་ངན་བླང་དོར་མི་འབྱེད་བརྩོན་འགྲུས་མྱུར། །ཡང་དག་ཡང་དག་དག་ལ་མ་ཆགས་བསམ་གཏན་ལྡན། །གང་རྗེས་མི་འགྲོ་མི་གཡོ་བ་ནི་ཤེས་རབ་གསལ། །མི་གཡོ་བརྟན་པ་ཆེ་ཐོབ་བདེ་བའི་ཀློང་ཆེན་ཡིན། །ལམ་གྱི་ནང་ན་ལམ་རྒན་ལམ་པོ་ཆེ། །ཡེ་ཤེས་ལམ་ཡང་ཡིན་ཏེ་ཚུལ་ཁྲིམས་ལམ་དུ་བཤད། །བཟོད་པ་ཆེན་པོའི་ལམ་ཞེས་ཀྱང་ནི་དེ་ལ་གདགས། །མི་གཡོ་ལམ་གྱི་གཏེར་ཆེན་འདིར་ནི་མ་ལུས་ཆོས་རྣམས་མེད། །རྣམ་དག་ལམ་ཆེན་འདི་ཡིས་མ་བསྒྲལ་གང་ཡང་མེད། །དེ་ཕྱིར་ཡེ་ཤེས་ལམ་ཆེན་དེ་བཞིན་ཉིད་ཀྱི་ངང་། །ཆོས་དབྱིངས་མི་གཡོ་མངོན་དུ་གྱུར་ནས་གཞན་ལ་མི་བརྟེན་པ། །ཅིག་ཆར་ཞུགས་ཤིང་མངོན་དུ་ཞུགས་པ་ཡིན་ཞེས་བསྒྲགས། །བཟང་ངན་བླང་དོར་དངས་སྙིགས་མི་འབྱེད་པ་ཉིད་ཆོས་ཀྱི་དབྱིངས། །དེར་ཞུགས་དེར་ཤེས་པ་ན་ཅིག་ཆར་ཞུགས་ཏེ་ཕ་རོལ་ཕྱིན། །དེ་ལ་དེ་བཞིན་དེ་ཞུགས་མཉམ་ཉིད་མྱ་ངན་འདས་འཁོར་མེད། །མྱ་ངན་འདས་པ་བརྗོད་པ་ཙམ་སྟེ་ཁམས་གསུམ་པ་ཡང་བརྗོད་པ་ཙམ། །དམིགས་སུ་མེད་པའི་དབྱིངས་སུ་ཐམས་ཅད་མཉམ་པར་ཐ་མི་དད། །རྣམ་པར་དག་དབྱིངས་མྱ་ངན་འདས་པ་དང་དུ་ལེན་མི་བྱེད། །འཁོར་བ་སྒྱུར་བྱེད་མི་གཙང་བ་ཡང་སྤང་བར་བྱེད་མི་འགྱུར། །རྣལ་འབྱོར་ལམ་འདོད་ཞུགས་པ་དེ་ལྟར་ཤེས་པས་ཚོར་བའི་ཚོར་བ་ཆེ ཅིར་ཡང་ཚོར་མེད་ཚོར་བའི་མཆོག་ཡིན་དེ་བཞིན་ཉིད། །དེ་བཞིན་ཉིད་དབྱིངས་ཡེ་ཤེས་དག་པའི་སྤྱོད་ཡུལ་གྱུར་པའང་མཚོན་བྱ་བྱེད་ཅེ་ན། །སངས་རྒྱས་མཚན་དཔེས་བརྒྱན་དང་ཕྱག་རྒྱར་གང་གསལ་ཚོར་བ་མེད། །དེ་ལ་གཉིས་མེད་དཀྱིལ་འཁོར་མི་ལྡན་མི་གཡོ་བ་ལས་ཉམས། །དེ་ལྟར་ཅིག་ཆར་གོ་བ་གོ་བ་མེད་པ་ཡིན་ཏེ་གཉིས་སུ་མེད་པར་གོ །འདུ་ཤེས་མ་སྤངས་གོ་བའི་མཚན་ཉིད་མཚན་མ་མི་རྟོག་པ་དེ་ཅིག་ཆར་ཆུད། །གང་དུ་མི་འཇོག་ཕྱག་རྒྱར་མི་འཛིན་ཡིད་ལ་ཆོས། །རྣམ་པ་འཛིན་པ་མེད་ན་ཡེ་ནས་ཞུགས། །བསམ་པས་མི་གཡོ་མི་སེམས་པ་ནི་ཤེས་རབ་ཀློང་། །རྟོག་པས་བརྟགས་པའི་སྤྱོད་ཡུལ་ཉིད་དུ་འདི་ནི་གྱུར་པ་མེད། །བསྒོམ་པས་དོན་འདི་བརྡའ་ཕྲད་མ་ཡིན་ཉིད་དུ་འགྱུར། །འཇུག་ལྟ་རྩོལ་སྤྱོད་བྱེད་པས་ཐིག་ལེའི་ལམ་མི་རྙེད། །ཡེ་ཤེས་རང་བྱུང་ཡུལ་ལ་ཆགས་པས་གྲོལ་མི་འགྱུར། །མཐོང་ཐོས་སྒོ་ལྔའི་བྱ་བྱེད་འཁོར་བའི་ཀློང་ཆེན་ཡིན། །སེམས་དང་སེམས་ལས་བྱུང་བ་འཁྲུལ་པའི་འཁྲུལ་པ་ཡིན། །དམིགས་པའི་ཡུལ་འཛིན་བྱེད་པ་ཡུལ་ཉིད་ཡེ་ནས་མཉམ། །གསང་སྔགས་རིག་སྔགས་ཕྱག་རྒྱར་བྱས་པས་ཕྱག་རྒྱ་ཆེན་པོར་གྲགས། །སྤྲོ་བསྡུ་ཕྱག་རྒྱར་བྱས་པས་མ་བཅོས་ཐིག་ལེ་བསླད། །རིགས་དང་ཡེ་ཤེས་བརྟགས་པས་ཡང་དག་གྲོང་ཆེན་ཞི། །ས་དང་ལམ་ལ་བརྟགས་པས་ཕ་རོལ་ཕྱིན་པ་ཁྱད་པར་ཉམས། །རྩོལ་སྦྱོང་འཕྲོ་འདུའི་ཕྱག་རྒྱར་བྱས་པས་སྒྱུ་མཆོག་འཕགས། །ཆེ་བ་ལྔ་ལྡན་ཕྱག་རྒྱར་བསྒོམས་པས་སྡུག་བསྔལ་ཟད། །བདེ་བ་ཟད་ཕྱིར་སྡུག་བསྔལ་རྒྱ་མཚོ་ཉིད་ལ་གནས། །ཐིག་ལེའི་སྒོ་སྤངས་པས་ནི་བདེ་བ་ཆེན་པོ་བསྒོམ། །ཏིང་འཛིན་རོ་ལ་ཆགས་པས་རོ་མེད་རོ་དང་བྲལ། །སྐུ་ཡི་ཕྱག་རྒྱར་བརྟགས་པས་སྡུག་བསྔལ་སྐུ་མེད་སྐུ་དང་བྲལ། །བཙལ་མེད་བཙལ་བར་བྱས་པས་བྱང་ཆུབ་ཆེན་པོ་སྐམ། །བདེ་བའི་ཕྱག་རྒྱས་བཏབ་པས་བདེ་མཆོག་གཏིང་ནས་འགགས། །དཀྱིལ་འཁོར་སྤྱོད་ཡུལ་བརྟགས་པས་སྤྱོད་ཡུལ་རྒྱུན་མི་ཆད། །འདོད་ཡོན་ཆོས་སུ་བརྟགས་པས་བྱང་ཆུབ་ཆེན་པོ་མེད། །སྣོད་བཅུད་ལྷ་རུ་བརྟགས་པས་དམིགས་མེད་ཐིག་ལེ་བརྟུལ། །སྣང་སྟོང་ཞི་ཁྲེའི་ཕྱག་རྒྱས་བརྩོན་པའི་ཕྱག་རྒྱ་བཅག །སྦྱོར་སྒྲོལ་གནས་སུ་མ་ཆུད་ལོག་སྤྱོད་བསྒྲལ། །རྩ་བ་ཡན་ལག་བསྲུངས་པས་དམ་ཚིག་ཆེན་པོ་འདས། །ཐམས་ཅད་ཆོས་སུ་བརྟགས་པས་ཆོས་མཆོག་གཏིང་མཐའ་སྟོང་། །སྔགས་བཟླས་ཕྱག་རྒྱ་བཅས་པས་རྒྱལ་མཆོག་ཕྱག་རྒྱ་བཤིག །མཆོད་བསྟོད་སྤྱན་དྲངས་བྱས་པས་མཚོན་ཆེན་ཉིད་ལས་ཉམས། །སྤྱན་དྲངས་གཉིས་མེད་བསྟིམ་པས་གཉིས་མེད་ཆོས་གཅིག་བསད། །གནས་དང་གནས་མིན་བརྟགས་པས་གནས་མཆོག་དམ་པ་སྤངས། །ཁ་ཟས་གཙང་སྨེར་བཏགས་པས་གྲོལ་བ་རང་བྱུང་ཞིག །མ་དང་སྲིང་མོར་བརྟགས་པས་བྷ་གའི་གཏིང་ཆེན་འགགས། །ཡེ་ཤེས་དབྱིངས་སུ་མཐོང་བས་བདེ་བའི་རྟོགས་མཐའ་རྒྱ་མཚོ་འདྲ། །གྲུབ་པའི་མཐའ་ལས་བྱང་ཆུབ་ཀློང་ཆེན་ཉིད་ལ་གནས། །བརྟགས་པས་ཡེ་ཤེས་སྐྱེ་བ་འཁྲུལ་གནད་སེལ་བ་ཡིན། །རྣལ་འབྱོར་ཞི་ལ་གནས་ནས་བྱང་ཆུབ་ཆེན་པོར་མི་མཚུངས་མཚུངས་མེད་གནས། །བདེན་གཉིས་མཐོང་ཞིང་བྱང་ཆུབ་མཆོག་ཏུ་བརྟན་པར་དེ་གནས་པ། །བདེ་ཆེན་ཚུལ་མཆོག་བརྟན་པར་གནས་པ་བྱང་ཆུབ་ལམ། །མི་གཡོ་སྙིང་པོའི་དྲི་བྲལ་དྲི་མེད་དག་པའི་སྐུ་ནི་དག །སངས་རྒྱས་པ་མེད་བྱ་བྲལ་ལམ་ལ་མི་གནས་གཉེན་པོ་ཉིད་དུ་གནས། །ཆོས་སྐུ་བདག་མེད་གཞན་ལ་ལྟོས་པའི་ཆོས་མིན་གང་ལའང་ལྟོས་པ་མིན། །རང་སེམས་རྣམ་དག་དབྱིངས་མེད་བྱང་ཆུབ་ལམ་ཆེན་པོ། །གང་ནས་མ་འོངས་གང་ན་མེད་དེ་ཕྱི་རོལ་ནང་རོལ་གཉིས་ཀ་མིན། །ཡོན་ཏན་ཚོགས་ཀྱིས་བརྒྱན་པའི་བློ་གྲོས་ཐབས་ཆེན་སྐུ། །སྙིང་རྗེ་ཆེན་པོའི་སྙིང་རྗེ་རླན་དང་མ་བྲལ་ཐམས་ཅད་བསྣུམས། ཤེས་རབ་དག་པ་སེམས་ཀྱི་ངང་ཉིད་ཀུན་ལ་ཁྱབ་པར་གནས། །ལོག་རྟོག་མཚན་མའི་འདུ་ཤེས་ཐམས་ཅད་དེ་ལས་བྱུང་། །སྦྱིན་པ་ལ་སོགས་ཕ་རོལ་ཕྱིན་པ་བཅུར་ཡངརངབཞིནཡེནས་རྫོགས། །ལམ་བསྡུས་རིམ་པ་པ་དང་འཇུག་བལྷ་ཐམས་ཅད་ཁྱད་པར་འགྲུབ་པ་ནི། །སྤང་ལེན་མེད་པའི་ཆོས་འདི་སྒྱུ་མར་གནས་པས་ན། །ཆོས་རྣམས་མ་ལུས་དེ་བཞིན་དེ་བཞིན་དེ་ཡང་གནས། །སྒྱུ་མའི་རང་བཞིན་གང་དུའང་གྲུབ་པ་མེད་པར་ཡིན་པའི་ཕྱིར། །སྒྱུ་མས་སྒྱུ་མ་བསླུ་ཕྱིར་སྒྱུ་མར་གནས། །མེད་པའི་སྒྱུ་མས་ཡོད་པའི་དངོས་གསལ་འཚལ། །འཇའ་ཚོན་འདི་བཞིན་གང་དུའང་གྲུབ་མི་འགྱུར། །སངས་རྒྱས་སངས་རྒྱས་ཞེས་བྱ་སྒྱུ་འདྲ་སྒྱུ་གནས་པས། །ཆོས་རྣམས་མ་ལུས་དེ་འདྲ་དེ་བཞིན་གནས། །སངས་རྒྱས་ཆོས་ལ་གུས་ཤིང་རྙེད་འདོད་ཤེས་རབ་འཆལ། །གཏོང་བ་སེམས་དཔའ་ཤེས་རབ་འཁྲུལ་པ་བྱིང་བ་མེད། །ཚུལ་ཁྲིམས་དེ་ནི་ཚུལ་ཁྲིམས་འཆལ་པ་ལམ་རིང་འགྱུར། །བཟོད་པ་བསྒོམ་པ་བཟོད་པ་ལ་མི་གནས་ཏེ་བཟོད་པ་མིན། །གཏོང་དང་ཚུལ་ཁྲིམས་ཆོས་སེམས་ཕྱིན་བཅུ་དེ་བཞིན་བསྒྲུབ་ལ་ཕྱིན་བཅུ་མེད། །ཡིད་ལ་ཆོས་སེམས་དཔའ་ལ་དེ་མེད་སྤྱིན་བྱ་མེད། །དཔྱད་པས་ཡང་དག་དོན་མི་རྙེད་དེ་བྱང་ཆུབ་ལམ། །བསྒྲུབ་པའི་འབྲས་བུ་དེ་བས་བརྩོན་འགྲུས་སྙིང་པོ་བསལ། །སྦྱངས་པས་སྦྱངས་པར་བལྟས་པས་བྱར་མེད་བལྟ་བ་བརྟུལ། །རྟོགས་པའི་ཡེ་ཤེས་སྐྱེས་པས་རྟོག་མཐའ་སྤང་མི་སྲིད། །གྲུབ་མཐའི་འབྲས་བུ་བཙལ་བས་ཡང་དག་ལམ་མི་རྙེད། །བྱང་ཆུབ་ཀྱི་སེམས་ཉ་མོ་བག་ལ་ཉལ་ལས། ཐེག་པ་རྣམས་ཀྱི་ངེས་པའི་ཚིག་དང་བལྟ་བ་མདོར་བསྟན་པའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས། སོམ་ཉི་སྤངས་པའི་ཏིང་ངེ་འཛིན་ལ་སྙོམས་པར་ཞུགས་ནས་ཉིད་ཀྱིས་ཉིད་ལ་ཆེད་དུ་བརྗོད་པ་འདི་བརྗོད་དོ། །གཡོ་བའི་འབྱུང་འཇུག་ཡིད་ཆེས་དངོས་མེད་དེ་བཞིན་ཉིད་དུ་བཞག །སུས་ཀྱང་མ་བཅོས་ཚོགས་བརྒྱད་བརྟེན་པ་འཇའ་ཚོན་ཚུལ། །དེ་ལ་མི་དམིགས་ཚོགས་བརྒྱད་ལ་རྟེན་དེ་ཉིད་མེད། །སེམས་ཅན་མིང་ནི་སེམས་ཅན་སེམས་ཅན་མེད། །སངས་རྒྱས་སངས་རྒྱས་སེམས་ཅན་ཡོངས་ཀྱི་ངང་། །གཏི་མུག་རྣམ་པར་དག་པ་ཡེ་ཡིན་རྣམ་སྣང་མཛད། །འདོད་ཆགས་འདོད་ཆགས་ཡེ་ཡིན་ཆགས་མཆོག་ཡས། །ཞེ་སྡང་རྣམ་པར་དག་པས་མ་སྤངས་དེ་བཞིན་སྡང་བ་མི་འཁྲུགས་པ། །ང་རྒྱལ་ཁྱད་པར་ང་རྒྱལ་ཡོན་ཏན་ཅན་དེ་འབྱུང་ལྡན་ཉིད། །ཕྲག་དོག་མི་འདའི་དམ་ཚིག་དོན་ཡོད་གྲུབ། །ཐམས་ཅད་མ་ལུས་ལུས་པ་མེད་པར་དབང་དུ་འདུས་ཕྱིར་སྣང་མཐའི་དམ། །འདོད་པ་ཐེ་ཚོམ་མེད་ན་དམ་ཚིག་དམ་པ་གཙོ། །མ་རིག་དོར་མིན་རིག་པ་བླང་མེད་རོ་གཅིག་ཕྱིར་ན་རྣམ་སྣང་སོམ་ཉི་མེད། །འདའ་ཀའི་དེ་འདའ་མི་བྱེད་དེ་ལ་གནས། །ཆོས་ཀྱི་དབྱིངས་ལས་མ་གཡོས་ཐམས་ཅད་འདུས་པའི་ཕྱིར་ན་རྒྱ། །དམ་ཚིག་དམ་པ་དེ་ལ་མི་འདའ་བ་ནི་མི་འཁྲུགས་བླ། །དགེ་དང་མི་དགེ་མཉམ་པ་ཉིད་དུ་གནས་པས་རིག་པ་ཕྲག་དོག་དམ། །ལྔ་པོ་ཡིན་གཞན་བདེ་བ་དེ་མིན་སྤོང་ཞིང་ཞི་བྱེད་འཁྲུལ་པའི་ལམ། །གང་ལ་སོམ་ཉི་མེད་པ་དེ་ལ་ཚུལ་ཁྲིམས་ལྡན། །ཐེ་ཚོམ་ཟད་པས་བཅོམ་ལྡན་འདས་ཀྱི་བཅོམ་ལྡན་འདས། །དགེ་སྡིག་ཐེ་ཚོམ་ཟད་པ་བྱང་ཆུབ་ཆེན་པོ་ཉིད། །རྟོག་མཐའ་རྟོག་མཐའ་སྤང་མེད་ཟད་པ་ཡང་དག་མཐའ། །ཆགས་མེད་ཆགས་པའི་ལམ་ལ་མི་གནས་མཉམ་པ་ཉིད། །མི་དམིགས་དབྱིངས་ཀྱི་མ་མཐོང་མཐོང་མིན་ཟིན་པ་དེ་མི་གཏོང་བ་བསྒོམ་པའི་མཆོག །བསམ་འདས་བརྗོད་མེད་ངང་ལ་ཕྱག་འཚལ་ལོ། །སྟོན་པའི་མཆོག་ལ་ཕྱག་འཚལ་ལོ། །ཀུན་གྱིས་རབ་བསྔགས་དཔེ་མེད་ལམ་ལ་ཕྱག་འཚལ་ལོ། །ཆོས་ཀྱི་སྙིང་པོར་གྱུར་པའི་ཇི་བཞིན་ཉིད་ལ་ཕྱག་འཚལ་ལོ། །བྱ་བྲལ་མཁྱེན་ལྡན་ཀློང་ལ་ཕྱག་འཚལ་ལོ། །ཇི་བཞིན་ཡེ་་ནས་མཁྱེན་ལྡན་སྐུ་ལ་ཕྱག་འཚལ་ལོ། །ས་ལས་ཚུལ་ཁྲིམས་ལ་སོགས་ཀུན། །སྤྱོད་པ་མཆོག་གྱུར་བདེ་གཤེགས་རྣམས་ཀྱི་ཡུམ། །ཀུན་མཚུངས་རྣམ་གྲོལ་མཆོག་གི་ལམ་དེ་སངས་རྒྱས་ཉིད། །ཕྲ་ཞིང་ཤེས་དཀའ་ཀུན་གྱི་ལམ་དེ་མི་རྟོག་རྟོག་ལས་འདས། །དེ་མེད་མི་འབྱུང་དེ་ཕྱིར་དེ་ནི་རྣམ་གྲོལ་མཆོག་གི་ལམ། །མི་དམིགས་མི་གནས་བསམ་པ་ཀུན་དང་བྲལ། །ཚིག་གིས་མི་ཁེབས་དབྱིངས་དང་ཁ་དོག་བཟང་པོའི་སྤྱོད་ཡུལ་མིན། །བསྟན་ཅིང་བརྟགས་པར་དཀའ་ལ་བརྗོད་དུ་རྡུལ་ཙམ་མེད། །འདི་ཞེས་བསྟན་པའི་ལམ་མེད་གཅིག་མེད་དུ་མ་མེད། །ཚད་ལ་གཞིག་ནས་དོན་གྱིས་གྲུབ་པར་བྱ་བ་ཉིད། །ཁྱད་པར་གྲོལ་ཞིང་དེ་མིན་དེ་མེད་དེ་ལ་རྩོལ་བྲལ་ན། །སྔོན་གྱི་དྲང་སྲོང་བསྒོམ་མཁན་བསྒོམ་པ་ཉིད་དུ་གང་འདོད་པ། །བསྒོམ་ཆགས་ལམ་གྱི་ནད་ཀྱིས་ཟིན་པ་ཡིན། །དཔྱོད་པའི་མཐའ་ལ་དོན་གྱི་ལུང་མེད་འཁྲུལ་པ་ཡིན། །ཚིག་གི་མཐའ་དཔྱོད་ལམ་དུ་འདོད་ཅིང་རེ་མཐོང་བ། །དེ་ཉིད་རྟོག་པའི་རྒྱུ་འབྲས་སྨིག་རྒྱུ་བསྙེག་པ་འདྲ། ་།ས་རབ་ཟབ་མོས་བླ་མེད་སངས་རྒྱས་ཚོལ་བར་རབ་ཏུ་སླ། །གཞན་ནས་མ་ཡིན་དེ་ཉིད་ཡིན་ཏེ་མཆོག་ཏུ་འདོད། །ཡང་དག་ལམ་ནི་ཚིག་གིས་མཚོན་དུ་མེད། །ཡང་དག་ཉིད་དུ་མཐོང་ན་འཁྲུལ་པ་སྟེ། །དག་དང་མ་དག་མཐོང་མེད་མཚུངས་པའི་ལམ། །རྣམ་པར་ཅི་ཡང་མི་འབྱེད་ཡེ་ཤེས་གཏི་མུག་དང་། །རང་གིས་མི་གཡོ་མི་བསྐྱོད་ཏིང་འཛིན་རྒྱལ་པོར་གནས། །འདི་ལྟར་མཐོང་ཞེས་མཐོང་བའི་དམིགས་མེད་མངོན་སུམ་མཐོང་བའི་ལམ། །དེ་ཕྱིར་ཐམས་ཅད་མཁྱེན་པའི་སྤྱན་ཞེས་དེ་ལ་བྱ། །མཐའ་དང་དབུས་མེད་ཡངས་པའི་རང་བཞིན་ཞེས། །མི་ལེན་མི་སྤང་མཉམ་པའི་རྒྱལ་པོ་འཐོབ། །སེམས་དང་བག་ཆགས་གཉིས་མེད་འདྲེས་ཤིང་མཚུངས། །འཛིན་པས་སྣང་ཞིང་བརྟགས་པའི་ཆོས་རྣམས་ཀུན་ལ་ནི། །མི་འདོར་མི་སྤང་རང་བྱུང་དེ་ཉིད་དེ། །རྣམ་པ་ཅིར་ཡང་མི་དགོངས་ཐབས་ཀྱིས་དེ་ལ་རོལ། །ཀུན་དང་མི་མཐུན་ཡོངས་ཀྱིས་སྤངས་པའི་ཆོས། །ཉོན་མོངས་ལྔ་དང་མཚམས་མེད་ལྔ་པོ་ཡི། །རྣམ་དག་ལམ་དེར་ཞུགས་པས་མཉམ་པའི་རྒྱལ་པོས་འཐོབ། །བུད་མེད་ལ་སོགས་ཀུན་ཀྱང་སྤང་མི་བྱེད། །ལོ་རྒྱུས་དོན་ཉིད་ཚང་མར་བློ་བཞག་ནས། །ཏིང་འཛིན་གསུམ་པོ་བཏགས་ཤིང་གྲུབ་པའི་མཐའ་དཔྱོད་པ། །རྩོལ་བསྒྲུབ་ལུང་ལས་གྲོལ་ཏེ་ཞབྲུལ་པ་ཡིན། །བྱ་བྲལ་ལྷུན་རྫོགས་བདེ་བའི་ཡུལ་ལ་གནས། །ཡེ་ཤེས་རང་བྱུང་ཆེན་པོའི་སྙིང་པོ་ཉིད། །མི་དམིགས་མི་གཡོ་བསྙད་པ་ཀུན་དང་བྲལ། །བྱ་བྲལ་ཟིན་པའི་ཡུལ་ལ་ཀུན་ཏུ་ཇི་བཞིན་གནས། །མ་སྐྱེས་མི་འགག་ནམ་མཁའ་ལྟ་བུའི་ངང་། །འདི་ཞེས་བསྟན་དུ་མེད་དེ་ཐིག་ལེ་གཅིག་གི་སྐུ། །སྤྲོ་ཞིང་བསྡུ་བ་མེད་དེ་ཐར་ལམ་དམ་པ་ཡིན། །མ་རྟོགས་རྟོགས་པ་མེད་དེ་ཤེས་རབ་ཐབས་བྲལ་བས། །མཐའ་མེད་དབུས་མེད་སྙིང་པོར་གདགས་པའང་མེད། །མཁའ་བཞིན་མ་བཅོས་སྨྲ་བསམ་ཡུལ་ལས་འདས། །ཚད་མས་དོན་གཞིག་དཔེ་བྲལ་རྒྱལ་བའི་ཐུགས། །ཡང་དག་བྱང་ཆུབ་ཀློང་ནི་འདི་ཞེས་བསྟན་པར་དཀའ། །ཆོས་ཀྱི་སྙིང་པོ་རང་རིག་བྱང་ཆུབ་སེམས་ཉིད་ཆེ། །བྱང་ཆུབ་སེམས་ནི་འདི་ཞེས་རབ་ཏུ་རྙེད་པར་དཀའོ། །ཕོ་མོ་མ་ནིང་ཁ་དོག་དབྱིབས་མེད་ཕྱིར། །ཆོས་རྣམས་ཀུན་གྱི་རང་བཞིན་དེ་ཁོ་ནར་གསུངས་པས། །དངོས་པོ་མཚན་འཛིན་དེ་ཡི་རང་བཞིན་དེ་ལ་མི་གནས་པས། །མེད་དེ་མེད་ནས་སྟོབས་སོགས་ཅི་ཡང་མེད་པ་མ་ཡིན་གནས་ཏེ་གསལ་བ་དེ་མིན་ནོ། །རྩོལ་བྲལ་རྒྱལ་བའི་བཀའ་འདི་གཞན་དུ་དད་མོས་མིན། །འཇུག་ཀྱང་མཚན་མ་དབྱིངས་སྟོང་རང་བཞིན་ཉིད་དེ་འཇུག །སེམས་ཀྱང་དེར་བསྐྱེད་འབྲས་བུ་དེར་ཐོབ་པས། །དཔྱོད་མཐའ་ཐམས་ཅད་འཁོར་བ་དེ་ཉིད་ཁོ་ནར་ཟད། །བྱང་ཆུབ་ཀྱི་སེམས་ཉ་མོ་བག་ཉལ་ལས། དོན་དགོངས་པར་བསྟན་པའི་ལེའུ་སྟེ་དྲུག་པའོ།། །།གསང་བའི་དོན་མེད། བི་རོའི་འགྱུར་ཡིན་ནོ།། །།རྒྱ་གར་སྐད་དུ། རཏྣ་དྷ་སྐ་ར་ཏནྟྲ་ནཱ་མ། བོད་སྐད་དུ། རིན་པོ་ཆེ་སྣང་བྱེད་ཀྱི་རྒྱུད་ཅེས་བྱ་བ། བཅོམ་ལྡན་འདས་བྱ་བྲལ་ངང་ལ་ཕྱག་འཚལ་ལོ། །ཀྱེ་ཀྱེ་ཆོས་ཀྱི་སྐུ་འདི་གང་ནས་བྱུང་། །ལོངས་སྤྱོད་སྐུ་འདི་