Ngb-pt-0043-vol-01-text

BASIC METADATA
Title of Text
Title on Cover
Cover Title San
Cover Title San in Tib
Cover Title San in Lanydza
Title on Spine
Margin Title
Author of Text
Name of Collection (if applicable)
PUBLISHING
Publisher Name
Publisher Place
Publisher Date
IDs
ISBN (if applicable)
Library Call-number (if applicable)
Other ID number (if applicable)
Volume Letter (if applicable)
Volume Number (if applicable)
Pagination of Text
Pages Represented in this file
CREATION
Name of Agent Creating Etext
Date Process Begun
Date Process Finished
Place of Process
Method of Process (OCR, input)
PROOFING
Name of Proofreader
Date Proof Began
Date Proof Finished
Place of Proof
MARKUP
Name of Markup-er
Date Markup Began
Date Markup Finished
Place of Markup
CONVERSION
Name of Converter
Date Conversion Began
Date Conversion Finished
Place of Conversion
PROBLEMS

Body

[511][511.3]དང་། ལོསྣྲོ་བ་སྐ་བ་དཔལ་བརྩེགས་ཀྱིས་བསྒྱུར་ནས་རྒྱལ་པོ་ཁྲི་སྲོང་ལྡེའུ་བཙན་ལ་གདམས་པ། གཏེར་རྒྱ། སྦས་རྒྱ། གཏད་རྒྱ།། །། རྒྱ་གར་སྐད་དུ། ཨ་མྲི་ཏ་ར་ས་བིརྗུ་དི་པ་ཀུ་ཊ་[511.4]ཏནྟྲ། བོད་སྐད་དུ། བདུད་རྩི་བཅུད་ཐིགས་སྒྲོན་མ་བརྩེགས་པའི་རྒྱུད། ཐོག་མའི་སངས་རྒྱས་འོད་མི་འགྱུར་བ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། རིན་པོ་ཆེའི་གནས་ཀྱི་ཀློང་། ཆོས་[511.5]ཉིད་ཀྱི་དབྱིངས། འོད་གསལ་གྱི་མཁའ། རང་བྱུང་གི་གནས། ཀུན་གཞིའི་ཕོ་བྲང་། འོད་གསལ་རྣམ་དག །བསམ་གྱིས་མི་ཁྱབ་པའི་དཀྱིལ་འཁོར། སྒྲིབ་པ་མེད་པར་རང་བཞིན་གྱིས་འོད་གསལ་བ། རྒྱ་གར་ཡང་[511.6]མ་ཆད་པ། ཕྱོགས་གང་དུ་ཡང་མ་ལྟུང་བ། མཐའ་གང་ཡང་མ་རེག་པ། རིན་པོ་ཆེ་རྣམ་དག་འོད་གསལ། ངང་དངས་རང་གསལ་གྱི་ལྷ་ཁང་ན། དམ་པ་དང་པོའི་སངས་རྒྱས་དབྱེར་མེད་སྔོན་ཐོག་ཡེའི་སངས་རྒྱས།[512][512.1]རང་བཞིན་ཀུན་ཏུ་བཟང་པོ་བཞུགས་སོ། །དེའི་ཚེ་སྨིན་པ་ཆེན་པོའི་འཁོར་ཡང་འདི་ལྟ་སྟེ། རང་རྩལ་འོད་གསལ་གྱི་འཁོར་དང་། རང་དངས་རྣམ་དག་གི་འཁོར་དང་། རང་དངས་རང་གསལ་གྱི་འཁོར་དང་། རང་[512.2]བྱུང་རང་བརླག་དབྱེར་མེད་པའི་འཁོར་རོ། །གཞན་ཡང་རྩལ་སྣང་ཟེར་གྱི་འཁོར་དང་། འོད་གསལ་ཀུན་ཁྱབ་ཀྱི་འཁོར་དང་། ཡན་ལག་བུའི་འཁོར་དང་། མཚན་ཉིད་རིག་པའི་འཁོར་དང་། འགྱུ་བ་ཡིད་ཀྱི་འཁོར་[512.3]དང་། གསལ་བ་སེམས་ཀྱི་འཁོར་དང་། ཉིད་ཀྱི་རང་བཞིན་གྱི་འཁོར་དང་། རང་བྱུང་སྤྲོས་གཅོད་ཀྱི་འཁོར་དང་། རང་སངས་རྣམ་དག་རང་བཞིན་རྟོགས་པའི་འཁོར་རོ། །འཁོར་ཕུན་སུམ་ཚོགས་པའོ། །འདས་དང་[512.4]མ་འོངས་ད་ལྟར་གྱི། །དུས་གསུམ་གཅིག་སྟེ་ཁྱད་པར་མེད། །དུས་ཕུན་སུམ་ཚོགས་པའོ། །བསྟན་པའི་རྒྱལ་པོ་དགུ་རྩེ་བློ་འདས་གསུངས། །བྱར་མེད་ལྷུན་རྫོགས་བསྒྲུབ་མེད་འབྲས་བུའོ། །བསྟན་པ་ཕུན་སུམ་[512.5]ཚོགས་པའོ། །དེའི་ཚེ་འཁོར་གྱི་ནང་ནས། ངང་དངས་ཁྱེའུ་ཆུང་སྟན་ལས་ལངས་ཏེ། ཕྱག་འཚལ་ནས་གུས་པས་འདི་སྐད་ཞུས་སོ། །དམ་པ་དང་པོའི་སངས་རྒྱས་ཀུན་བཟང་ཁྱེད་ལ། བཤད་མེད་བྱར་མེད་བློ་[512.6]འདས་དོན། །བསྒྲུབ་ཏུ་མེད་པས་ཆོས་ཤིག་ཞུ། །ཞེས་ཞུས་པ་དང་། དེ་ནས་དམ་པ་མ་དང་པོའི་སངས་རྒྱས་དེ། རང་བཞིན་ཡོངས་རྫོགས་དབྱེར་མེད་བློ་འདས་སྤྲོསབྲལམཚོནམེདཀྱིཏིངངེ་འཛིན་ལ་བཞུགས་[513][513.1]སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །བྱར་མེད་བློ་འདས་ཆོས་ཤིག་བཤད། །འཁོར་རྣམས་མ་ཡེངས་གུས་པས་ཉོན། །སྙིང་པོའི་རང་བཞིན་སྐྱེ་འགག་གཉིས་མེད་ཀྱང་། །རང་བྱུང་[513.2]རྩལ་གྱི་ཤེས་པ་བུ་ལ་བཤད། །ཆོས་ཉིད་བཅུད་འདུས་མཚོན་དུ་མེད་པ་ལ། །བདུད་རྩིའི་མན་ངག་སྒྲོན་མ་བརྩེགས་པ་བཤད། །བཤད་པའི་ཆོས་ནི་ཐ་སྙད་ཡིན། །མཚོན་དུ་མེད་པའི་ཆོས་ཤིག་བཤད། །བྱས་པའི་[513.3]ཆོས་ནི་འདུས་བྱས་ཡིན། །མ་བྱས་རང་བྱུང་ཆོས་ཤིག་བཤད། །བྱ་རྩོལ་ཆོས་ནི་རྩོལ་བསྒྲུབ་ཡིན། །བྱར་མེད་རྩོལ་བསྒྲུབ་བྲལ་བས་ཆོས་ཤིག་དགོས། །བློས་བཏགས་ཆོས་ལ་མཐར་ཐུག་མེད། །བློ་འདས་[513.4]མཐར་ཐུག་ཆོས་ཤིག་བཤད། །བསྒྲུབ་པའི་ཆོས་ནི་རེ་དོགས་ཡིད་སྨོན་ཡིན། །ཡེ་ཡིན་རང་སར་གནས་པའི་ཆོས་ཤིག་བཤད། །ཟད་སར་ཟད་ལ་ཐུག་པའི་ཐུག་པར་བཤད། །གཅིག་ཤེས་ཀུན་གྲོལ་ཆོས་ཤིག་ང་[513.5]ཡིས་བཤད། །བརྡའ་གཅིག་བརྡའ་ཀུན་གྲོལ་བའི་ཆོས་ཤིག་བཤད། །གནད་གཅིག་གནད་ཀུན་གྲོལ་བའི་ཆོས་ཤིག་བཤད། །བློ་ཟད་ཐོག་མའི་སར་སྒྲིབས་ཆོས་ཤིག་བཤད། །བྱ་བྲལ་ཡེ་བཞག་སྙིང་པོའི་ཆོས་ཤིག་[513.6]བཤད། །ཅེས་གསུངས་སོ། །བདུད་རྩི་བཅུད་བསྡུས་སྒྲོན་མ་བརྩེགས་པའི་རྒྱུད་ལས། ཕུན་སུམ་ཚོགས་པ་དང་གླེང་གཞིའི་ལེའུ་སྟེ་དང་པོའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་སངས་རྒྱས་ལ་[514][514.1]ཞུས་པ། །དངོས་པོ་གཤིས་ཀྱི་འདུག་ཚུལ་ཇི་ལྟར་ལགས། །འདུག་ཚུལ་མ་རྟོགས་འགྲོ་དྲུག་ཇི་ལྟར་ལགས། །འཁོར་བ་རྩད་ནས་ཇི་ལྟར་བཅད། །རྟོགས་ཐབས་གང་གིས་ཇི་ལྟར་རྟོགས། །རྟོགས་ན་འབྲས་བུ་ཇི་[514.2]ལྟར་ཐོབ་པར་འགྱུར། །ཐོབ་ནས་མི་འགྱུར་བརྟན་པ་ཇི་ལྟར་ཐོབ། །འོག་མ་རྣམས་ལ་སྐྱོན་ནི་ཅི་ཞིག་མཆིས། །རིམ་པ་དགུ་ལས་སྤྱི་ཏི་གང་གིས་འཕགས། །མ་བསྐུར་དབང་དང་ཕྱོགས་བྲལ་དཀྱིལ་འཁོར་[514.3]གང་། །ཕྲིན་ལས་སྤྱན་དྲངས་ལྷ་ཚོགས་མཆོད་བསྟོད་གང་། །དངོས་གྲུབ་དམ་ཚིག་སྨོན་ལམ་ཇི་ལྟར་ལགས། །ཐམས་ཅད་མ་འདྲེས་ཡོངས་སུ་ཇི་ལྟར་རྫོགས། །མ་བྱས་རང་བྱུང་བྱར་མེད་བཤད་མེད་གང་། །མཚོན་[514.4]མེད་བློ་འདས་ཐེག་པ་ཇི་ལྟར་གསུངས། །གཅིག་ཤེས་ཀུན་གྲོལ་ཆོས་ཤིག་ཇི་ལྟར་ལགས། །གནད་གཅིག་ཤེས་པས་གནད་ཀུན་ཇི་ལྟར་ཁྲོལ། །གཅིག་བརྡའ་ཀུན་བརྡའ་ཇི་ལྟར་ཤེས་པར་བྱ། །བདག་ཅག་རྣམས་[514.5]ལ་ཟབ་པར་བཀའ་སྩོལ་ཅིག །ཅེས་ཞུས་སོ། །སྒྲོན་མ་བརྩེགས་པའི་རྒྱུད་ལས། འཁོར་གྱིས་གླེང་སློང་བའི་ལེའུ་སྟེ་གཉིས་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་[514.6]ལ། །དངོསཔོགཤིསཀྱིགནས་ལུགས་གང་། །ཞེས་ཞུས་པ་དང་། དེ་ནས་དམ་པ་དང་པོའི་སངས་རྒྱས་དེ། །སྣ་ཚོགས་ཀློང་འོད་གསལ་འབར་བའི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ལས་བཞེངས་ནས་[515][515.1]བཀའ་སྩལ་པ། །འཁོར་ནས་ངང་དངས་ཁྱེའུ་ཆུང་ཉོན། །དངོས་པོ་གཤིས་ཀྱི་འདུག་ཚུལ་དེ། །མཚོན་བརྗོད་ཚིག་གིས་མི་ཕེབས་ཀྱང་། །དཔལ་གྱི་མགུར་གྱི་སྒྲོན་མ་ཡིས། །འཁོར་རྣམས་ཀུན་ལ་[515.2]གསལ་བར་བཤད། །གནས་ལུགས་གཤིས་ཀྱི་འདུག་ཚུལ་ནི། །ཡོད་མེད་སྟོང་དང་མི་སྟོང་དང་། །མཚོན་བརྗོད་ཚིག་གིས་མཚོན་ལས་འདས། །སྐྱེ་འགག་གཉིས་མེད་ཐ་སྙད་གྲོལ། །སངས་མེད་རྒྱས་མེད་སྐུ་དངོས་[515.3]མེད། །བྱང་ཆུབ་སེམས་མེད་རིགས་ལྔ་མེད། །བདེ་སྡུག་འཁོར་དང་མྱང་འདས་མེད། །རིག་འགྱུ་སེམས་མེད་དྲན་རྟོག་མེད། །ང་གཞན་ཕྱོགས་མེད་དགྲར་གཉེན་མེད། །ཡུལ་སེམས་བཟང་ངན་སྤང་ལེན་མེད། །ཡིན་[515.4]མིན་དབྱེ་བསལ་ཕྱོགས་མཚམས་མེད། ཁྲེས་འཁྲུལ་སྒོ་གཉིས་རང་བཞིན་མེད། །གཞི་ཡི་རང་བཞིན་ཡོད་མེད་མཉམ། །ཚོགས་བརྒྱད་ཡུལ་དུ་མ་གྱུར་པས། །རྒྱ་ཆད་ཕྱོགས་ལྷུང་ཀུན་ལས་གྲོལ། །གཉིས་འཛིན་[515.5]འཁོར་འདས་ཀ་ནས་དག །འཁོར་འདས་ཕྱོགས་མེད་ལྷུན་གྱིས་གྲུབ། །གང་ཡང་མ་འགགས་འདི་ཡིན་མེད། །ཐོག་མ་རྒྱུ་ཡིས་མ་བསྐྱེད་པས། །མཐའ་བྲལ་དབྱིངས་ཀྱི་ནམ་མཁའ་འདྲ། །བར་དུ་རྫས་མེད་འདུས་མ་[515.6]བྱས། །ཉི་མར་འོད་འཕྲོའི་འོད་ཟེར་འདྲ། །ཐ་མར་རྐྱེན་གྱིས་འཇིག་བྲལ་མེད། །གཉིས་མེད་མཁའ་ལྟར་མཉམ་ཉིད་གནས། །ངོ་བོ་སྟོང་པའི་རྩལ་དང་བྲལ། །འདི་ཞེས་ཅིས་ཀྱང་བསྟན་དུ་མེད། །མ་བསྒྲིབས་མཚོན་[516][516.1]མེད་གསལ་དག་ངང་། །རྟོག་མེད་ཀུན་འབྱུང་ཟད་མི་ཤེས། །གང་ཡང་ཕྱོགས་མེད་མཐའ་བཞི་གྲོལ། །ཡུལ་སྣང་བག་དག་སངས་རྒྱས་ཉིད། །འགྱུ་མེད་དྲང་པོར་རྒྱུན་སར་གྲོལ། །བཅོས་མེད་བློ་འདས་ངོ་བོ་[516.2]ཉིད། །བསླད་པས་མི་བསྒྲིབ་ཡང་དག་ངང་། །ཐམས་ཅད་གཞི་འཛིན་བྱང་ཆུབ་སེམས། །གཞན་ནས་མ་བཙལ་ཀ་ནས་དག །གང་ཡང་མ་བསྒྲུབས་ཕྱོགས་རིས་མེད། །དགག་བསྒྲུབ་གཅིག་འཛིན་རྒྱ་ཆད་[516.3]མེད། །འཁོར་འདས་ལ་སོགས་གཉིས་དབྱེར་མེད། །རྩོལ་བསྒྲུབ་ལམ་གྱི་བཅོས་དང་བྲལ། །ལྟ་བྱེད་མིང་དང་རང་སངས་རྒྱས། །གཉིས་འཛིན་བློས་བཏགས་གྲུབ་མཐའ་སྟོངས། །སྒོམ་བྱེད་གཡོ་རྩོལ་ཡེ་གྲོལ་[516.4]བས། །འབྱུང་འཇུག་བཏང་བཞག་དབྱིངས་སུ་དངས། །སྐྱོན་ཡོན་དཔྱོད་བྱེད་མིང་མེད་པས། །གཉིས་འཛིན་བླང་དོར་ལས་རྣམས་ཟིན། །དགེ་སྡིག་མཚན་མའི་ཆོས་འདས་པས། །དམ་ཚིག་སྡོམ་པའི་དགག་སྒྲུབ་[516.5]སངས། །ཀ་དག་ཡེ་ཤེས་སྣང་མེད་པས། །དངོས་མེད་ཡུལ་གྱི་སྒྲིབ་བྱེད་སངས། །ཆོས་ཉིད་རྣམ་པ་ཡུལ་མེད་པས། །སྟོང་ཉིད་ངང་ལ་གནས་པ་སྟོང་། །གཉིས་འཛིན་མཚན་མ་དངོས་དག་པས། །གཟུང་འཛིན་དབྱེ་[516.6]བསལ་ཆོས་ལས་འདས། །ཤེས་མེད་རྣལ་མ་གཏིང་ཡངས་པས། །མདོ་རྒྱུད་ཆོས་རྣམས་ཀློང་དུ་སངས། །མདོར་ན་གཉིས་འཛིན་ཆོས་རྣམས་ཀུན། །ཕྱོགས་སུ་ལྷུང་དང་མ་ལྷུང་དང་། །དེ་ལྟར་གཉིས་དང་གཉིས་མེད་[517][517.1]ཀྱི། །མུ་མཐའི་ཚོགས་ལས་གཏན་གྲོལ་བས། །ཡེ་གྲོལ་ཆོས་ལས་འདས་ང་ལས། །རྒྱ་ཆད་མེད་པའི་ངོ་བོར་གནས། །ས་གསེར་བང་མཛོད་རྒྱ་མཚོ་བཞིན། །དངོས་པོ་གཤིས་ཀྱི་མཐུན་དཔེའོ། །ཞེས་[517.2]གསུངས་སོ། །སྒྲོན་མ་བརྩེགས་པའི་རྒྱུད་ལས། དངོས་པོ་གཤིས་ཀྱི་འདུག་ཚུལ་བསྟན་པའི་ལེའུ་སྟེ་གསུམ་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་རང་བཞིན་ཀུན་བཟང་ལ། །འདུག་ཚུལ་མ་[517.3]རྟོགས་ཇི་ལྟར་འཁྲུལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གནས་ལུགས་མ་རྟོགས་འཁོར་བ་བཤད། །འཁོར་རྣམས་མ་ཡེངས་གུས་པར་ཉོན། །མཁའ་ཀློང་རྣམ་དག་ཕོ་བྲང་ན། །གཞི་ཡི་རང་[517.4]བཞིན་མཉམ་པའི་ངང་། །དེ་ནས་ཀུན་འབྱུང་མཛོད་པོ་ཆེ། །ཐོག་མར་ཡེ་ཤེས་འཆར་སྒོ་ནི། །མཁའ་ལས་བྱུང་བའི་ཆོ་འཕྲུལ་ལྟར། །དབྱིངས་ནས་རང་བྱུང་དབྱིངས་ལ་གནས། །ནམ་མཁའི་ངང་ནས་སྟོང་ཉིད་[517.5]སྒྲ། །མཚུངས་མེད་རྒྱ་ཆེ་ཟབ་དོན་སྒྲོགས། །བརྒྱད་ཁྲི་བཞི་སྟོང་ལ་སོགས་པ། །ཚིག་ཏུ་བརྗོད་པ་མ་ལུས་པ། །དབྱིངས་ལས་གྲག་སྟོང་དབྱིངས་སུ་དངས། །ཚིག་ཏུ་བརྗོད་པའི་མཐའ་ལས་འདས། །བརྗོད་དང་མ་[517.6]བརྗོད་གཉིས་ཀ་དང་། །གཉིས་མེད་འཛིན་པའི་རྒྱ་མ་ཆད། །ཁམས་གསུམ་ལ་སོགས་མ་ལུས་པའི། །མཚན་མའི་ཡུལ་ལས་རྣམ་གྲོལ་བས། །སྣང་སྟོང་གཟུང་འཛིན་ཕྱོགས་མ་ཆད། །ཕྱི་གྲོལ་ནང་དག་འཛིན་པ་[518][518.1]བརླག །ལུས་དང་སྐུ་ཡི་མུ་མཐའ་སངས། །སྣང་དང་སྟོང་པ་གཉིས་ཀ་དངས། །གཉིས་མེད་འཛིན་པའི་རྒྱ་མ་ཆད། །འཁོར་འདས་བདག་གཞན་ལ་སོགས་པའི། །གཉིས་འཛིན་རྟོག་པ་མ་ལུས་ཀུན། །དབྱེར་མེད་[518.2]ཤེས་རབ་ཡེ་ཤེས་མེ། །རྒྱུ་རྐྱེན་མེད་པར་རང་འབར་བས། །སྤང་ཐོབ་དགག་བསྒྲུབ་ཀུན་ལས་འདས། །རྣམ་རྟོག་ཆོས་ཉིད་གཉིས་ཀ་དངས། །གཉིས་མེད་འཛིན་པའི་རྒྱར་མ་ཆད། །དེ་ལྟར་གཅིག་གིས་གཅིག་[518.3]བཀྲོལ་བས། །མུ་མཐའ་མ་ལུས་རང་སར་གྲོལ། །གྲོལ་དང་མ་གྲོལ་གཉིས་ལས་འདས། །དམ་པ་དང་པོར་ཡེ་སངས་རྒྱས། །ངོ་བོ་རང་བཞིན་ཐུགས་རྗེ་ལས། །ཀ་དག་ལྷུན་གྲུབ་ཀུན་ཁྱབ་གསུམ། །དང་པོར་སྐུ་[518.4]གསུམ་མཆོག་གི་ས། །གསལ་དག་ཡེ་ཤེས་འཆར་སྒོ་ཡིན། །འདུག་ཚུལ་མ་རྟོགས་འཁྲུལ་པ་ཡང་། །གཞི་ཡི་རྩལ་ལས་ཟེར་གཡོས་པས། །མཁའ་ལ་མཇའ་ལྟར་ཡུལ་དུ་ཆད། །རང་བཞིན་རང་ངོར་མ་ཐིམ་[518.5]པས། །འོད་ལས་ཟེར་ཤར་ཤེས་པར་རིག །ཡེ་དོན་མ་ཤེས་གཉིས་འཛིན་ཞུགས། །གནས་ལུགས་མ་རྟོགས་ས་མ་ཟིན། །རིག་པའི་སྙིང་པོ་མ་རྟོགས་རྒྱུ། །རིག་པ་ཡིད་དང་སེམས་གསུམ་ལ། །རང་ས་མ་ཟིན་འཁོར་[518.6]ལོ་གསུམ། །འགྱུ་བ་རླུད་གིས་རྒྱུ་བྱས་ནས། །སྒྲིབ་གཡོགས་མུན་པས་བར་བཅད་དེ། །འབྲས་བུ་མུན་པའི་འཁོར་སྒོར་ཆུད། །སྣ་ཚོགས་གཟུགས་ཅན་སེམས་ཅན་རྣམས། །གཅིག་འཛིན་འགྱུ་བའི་ཡིད་ལས་སྐྱེས། སྣ་[519][519.1]ཚོགས་རྣམ་རིག་གཟུགས་དོན་ཅན། །དངོས་པོའི་དོན་རྣམས་ཀུན་ལ་ཆགས། །སེམས་ཅན་ཀུན་གྱི་ཡིད་མགྱོགས་པས། །ཁམས་གསུམ་ཀུན་གྱི་ཡིད་ལ་འཇུག །ཕུང་པོ་ལྔ་པོ་ཀུན་ལ་རྟོག །སྲིད་པའི་དྲ་[519.2]བར་འཐུམས་པ་ཡིས། །མ་རིག་སྒོ་ལྔའི་སྦུབས་སུ་ཆུད། །གཉིས་འཛིན་གཟུགས་བརྙན་མ་ལུས་འཆར། །དངོས་པོ་ཀུན་ལ་གཟུང་འཛིན་པས། །སྲིད་རྩའི་ཡན་ལག་བཅུ་གཉིས་སྟོན། །རྣམ་ཤེས་ཚོགས་བརྒྱད་ཆགས་[519.3]སྡང་བས། །ཉོན་མོངས་ཉེ་བའི་ཉོན་མོངས་དྲུག །ཁམས་གསུམ་འཁོར་བའི་གནས་སུ་འ་ས། །མ་གྲུབ་བཞིན་དུ་འཁྲུལ་སྣང་བའི། །སྡུག་བསྔལ་བརྒྱད་ཁྲི་བཞི་སྟོང་མྱོང་། །ཞེས་གསུངས་སོ། །བདུད་བརྩི་བ་་[519.4]འདུས་སྒྲོན་མ་བརྩེགས་པའི་རྒྱུད་ལས། གནས་ལུགས་མ་རྟོགས་འཁྲུལ་པར་བསྟན་པའི་ལེའུ་སྟེ་བཞི་པའོ།། །།དེ་ནས་ངང་དངས་ཁྱེའུ་ཆུང་གིས། །ཀུན་བཟང་ཉིད་ལ་འདི་སྐད་ཞུས། །འདུག་ཚུལ་མ་རྟོགས་[519.5]འཁྲུལ་པ་དེའི། །འཁྲུལ་གཞི་རྩད་ནས་ཇི་ལྟར་གཅད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་པོ་གཤིས་ཀྱི་གནས་ལུགས་ལ། །འཁྲུལ་དང་མ་འཁྲུལ་མིང་མེད་དེ། །གཉིས་འཛིན་བློ་ལ་[519.6]འཁྲུལ་པ་བྱུང་། །མ་རྟོགས་རིགས་དྲུག་འཁྲུལ་བཅས་པ། །རབ་འབྲིང་ཐ་མ་གསུམ་དུ་བཤད། །སྐལ་ལྡན་རབ་ཀྱི་ཡང་རབ་ལ། །འཁྲུལ་པ་རྩད་གཅོད་མི་དགོས་ཏེ། །འཁྲུལ་པར་ཤེས་པས་སྣང་བ་ལྡོག །ཀ་དག་[520][520.1]རྣལ་མ་ཟང་ཀ་ལ། །སྒྲོ་སྐུར་ཆོས་རྣམས་ག་ལ་ཡོད། །སེམས་ཉིད་མུ་མེད་གཏིང་ཡངས་འདི། །ཤེས་ཤིང་རིག་པའི་ཡུལ་ལས་འདས། །སུས་ཀྱང་སྨྲ་བསམ་བསྟན་ཏུ་མེད། །རེ་ཞིག་ཙམ་དུ་མཚོན་པ་ན། །རྒྱལ་པའ་ཕོ་[520.2]བྲང་རྨ་ཡིས་བསྲེག །གླིང་གཞིའི་གྲོང་ཁྱེར་དམག་གིས་གཞོམ། །སེམས་ཅན་ཀུན་སྲོག་དུས་གཅིག་གཅད། །རི་བོ་ཆེན་པོ་ཁྱུར་མིད་བྱ། །གསལ་བའི་ཉི་ཟླ་གོས་སུ་གྱོན། །འབད་རྩོལ་ཆོས་ཀུན་ཆུ་ལ་འབོ། །ཕྱི་ནང་[520.3]གྲུབ་མཐའ་ཀུན་གོ་ལྡོག །སྐུ་གསུམ་འབྲས་བུ་དུར་དུ་བསྐྱལ། །རྒྱ་ཆད་ཆོས་ཀུན་མཐའ་ལས་གྲོལ། །ཕོ་བྲང་ཕྱི་ནང་གསང་བ་གསུམ། །ཕྱི་ལྟར་ཡུལ་གྱི་སྣང་བ་འདི། །གཉིས་འཛིན་རྒྱལ་པོའི་ཕོ་བྲང་སྟེ། །མཚན་མ་[520.4]རང་གྲོལ་མེ་ཡིས་བསྲེག །གཟུང་འཛིན་འབྱེད་མེད་ཡེ་ནས་གྲོལ། །ནང་ལྟར་ཟག་མེད་ཕུང་པོ་འདི། །རང་སེམས་རྒྱལ་པོའི་ཕོ་བྲང་སྟེ། །དངོས་མེད་ཟང་ཀའི་མེ་ཡིས་བསྲེག །ལུས་སེམས་དངོས་མེད་གདོད་ནས་[520.5]དག །གསང་བར་རྩལ་གྱི་འཁོར་ལོ་གསུམ། །འགྱུ་བ་རྒྱལ་པོའི་ཕོ་བྲང་སྟེ། །འགྱུ་མེད་བློ་འདས་མེ་ཡིས་བསྲེག །བཏགས་ཆགས་ཞེན་གསུམ་མིང་ཡང་མེད། །གླིང་གཞིའི་གྲོང་ཁྱེར་ལ་ཡང་གསུམ། །སྤྱི་ཡི་གྲོང་ཁྱེར་[520.6]འབྱུང་བ་ལྔ། །དམྱལ་བའི་གནས་སོགས་རིགས་དྲུག་གནས། །རང་སྣང་རང་དག་དམག་གིས་གཞོམ། །གདོད་ནས་རྣམ་དག་ཆོས་་དབྱིངས་ངང་། །ནང་གི་གྲོང་ཁྱེར་འགྲོ་དྲུག་ལུས། །གསུམ་དང་བརྒྱད་སོགས་སྡུག་[521][521.1]བསྔལ་རྣམས། །སྐྱེ་མེད་བདེ་ཆེན་དམག་གིས་གཞོམ། །ཡེ་ནས་སྤང་མེད་ཡེ་ཤེས་ཀློང་། །གསང་བའི་གྲོང་ཁྱེར་འཁོར་ལོ་གསུམ། །བཏགས་ཆགས་ཞེན་གསུམ་གྲུབ་མཐའ་རྣམས། །མུ་མེད་ཆོས་[521.2]འདས་དམག་གིས་གཞོམ། །བསམ་བརྗོད་རྟོག་ཚོགས་མཐའ་ལས་གྲོལ། །ཀུན་སྲོག་དུས་གཅིག་གཅད་ལ་གསུམ། །ཕྱི་ཡི་ཚོགས་དྲུག་ངར་འཛིན་ཡུལ། །རང་སངས་དབྱེར་མེད་རབ་རྟོགས་པས། །གཞན་མིན་ངས་[521.3]རྟོགས་ང་རྒྱལ་ཏེ། །བདག་མེད་ཕྱོགས་བྲལ་མཚོན་གྱིས་བཅད། །ནང་གི་ངར་འཛིན་སེམས་རིག་ཡིད། །འགྱུ་མེད་ངང་ཐིམ་དོན་བསྒོམས་པས། །གཞན་མིན་ངས་བསྒོམ་ང་རྒྱལ་ཏེ། །བསམ་འདས་རིས་མེད་མཚོན་[521.4]གྱིས་བཅད། །གསང་བའི་ངར་འཛིན་རང་ནས་དོན། །ཡེ་ཡིན་རེ་མེད་ངང་གྲོལ་བས། །གཞན་མིན་ངས་ཐོབ་ང་རྒྱལ་ཏེ། །ཆོས་ཟད་མུ་མེད་མཚོན་གྱིས་བཅད། །རི་བོ་ཁྱུར་མིད་བྱ་ལ་གསུམ། །ཇི་ལྟར་རི་བོ་སྣོད་[521.5]འཇིག་རྟེན། །མི་འགྱུར་རྟག་ལྟའི་མངོན་ཞེན་ཏེ། །མཐའ་མེད་ནམ་མཁའི་ཀློང་དུ་མིན། །རྟག་ལྟའི་མངོན་ཞེན་རང་སར་དག །ནང་ལྟར་རི་བོ་འཇིག་ཚོགས་ལྟ། །མ་རྟོགས་ལོག་ལྟའི་བདེན་འཛིན་ཏེ། །གནས་[521.6]ལུགས་ཀ་དག་ཀློང་དུ་མིན། །ལོག་ལྟ་མིང་མེད་རང་ངོར་སྟོར། །གསང་བའི་རི་བོ་ཆོས་ཉིད་དོན། །ལྷུན་གྲུབ་ཀ་དག་ངེས་མེད་འཛིན། །མཐའ་བཞི་རྒྱ་གྲོལ་ཀློང་དུ་མིད། །བླ་མེད་བློ་འདས་དགུ་རྩེར་ཕྱིན། །ཉི་ཟླ་[522][522.1]གོས་སུ་གྱོན་ལ་གསུམ། །ཕྱི་ཡི་ཉི་ཟླ་བསྟན་པ་ནི། །སྣང་གསལ་འོད་ཀྱི་དཀྱིལ་འཁོར་དུ། །སེམས་ཉིད་གསལ་དངས་ཉི་ཟླ་ཤར། །དགག་བསྒྲུབ་རིས་མེད་གོས་སུ་གྱོན། །ནང་གི་ཉི་ཟླ་བསྟན་པ་ནི། །འགག་མེད་[522.2]རང་རྩལ་དཀྱིལ་འཁོར་དུ། །མུ་མེད་ངང་དངས་ཉི་ཟླ་ཤར། །བླང་དོར་འཛིན་མེད་གོས་སུ་གྱོན། །གསང་བའི་ཉི་ཟླ་བསྟན་པ་ནི། །སྙིང་པོ་ཀ་དག་དཀྱིལ་འཁོར་དུ། །བླ་མེད་སྤྱི་ཏིའི་ཉི་ཟླ་ཤར། །ཕྱོགས་ལྷུང་མེད་[522.3]པར་གོས་སུ་གྱོན། །འབད་རྩོལ་ཆོས་ཀུན་ཆུར་འབོ་བ། །ཕྱི་ཡི་ཡུལ་ལ་འབད་རྩོལ་ནི། །རྒྱུ་ཡི་ཐེགས་པའི་སྒོར་ཞུགས་ནས། །ས་ལམ་སྦྱངས་བགྲོད་བྱེད་པ་ནི། །བགྲོད་མེད་རྣམ་གྲོལ་དབྱིངས་སུ་འབོ། །ནང་[522.4]ལྟར་ལུས་ངག་ཡིད་རྩོལ་ནི། །གསང་སྔགས་ཐེག་པའི་དཀྱིལ་འཁོར་དང་། །ལྟ་སྤྱོད་དབང་དང་་བསྙེན་བསྒྲུབ་སོགས། །ཡེ་ཡིན་བསྒྲུབ་མེད་ཀློང་དུ་འབོ། །གསང་བ་སེམས་ལ་འབད་རྩོལ་ནི། །བློས་བྱས་ལྟ་[522.5]སྒོམ་སྤྱོད་འབྲས་ཏེ། །མིང་མེད་ཆོས་འདས་ངང་དུ་འབོ། །ཕྱི་ནང་གྲུབ་མཐའ་གོ་ལྡོག་པ། །གང་ཡང་བཟང་ངན་འབྱེད་མེད་པས། །བླ་མེད་དཀོན་མཆོག་གསུམ་པོ་བཀུར། །དགེ་སྡིག་གང་ལ་མ་སྤྱད་[522.6]པས། །ཆོས་སྤྱོད་དགེ་སྦྱོར་མ་ལུས་རྫོགས། །མཇུག་སྒོ་གར་ཡང་མ་ཞུགས་པས། །དབང་རྣམས་མ་ལུས་དུས་གཅིག་ཐོབ། །མཚོན་པ་ཅིར་ཡང་མ་བརྗོད་པས། ཁུ།བ་མཐའི་ཐོས་པ་མ་ལུས་རྫོགས། །བྱ་བ་གང་ཡང་[523][523.1]མ་བྱས་པས། །འཁོར་འདས་བྱ་བ་ཐམས་ཅད་རྫོགས། །ཚོགས་བརྒྱད་ཅི་ཡང་མ་བསམ་པས། །སྤྲོས་པ་མ་ལུས་དབྱིངས་སུ་ཆོད། །འཁོར་བ་གང་ཡང་མ་བགྲོད་པས། །ཡང་དག་ཆོས་ཉིད་བྱང་ཆུབ་[523.2]ས། །མཐའ་བཞི་གང་ཡང་མ་བལྟས་པས། །བླ་མེད་སྤྱི་ཏིའི་ལྟ་བ་རྫོགས། །ཆོས་ཀུན་གང་ཡང་མ་བསྒོམས་པས། །ཆོས་ཉིད་རྣལ་མ་ཟང་ཀའི་ངང་། །དུས་ཕྱོགས་གང་ནས་མ་བཙལ་བས། །ཡོན་ཏན་མ་ལུས་ལྷུན་[523.3]གྱིས་གྲུབ། །སྨྲ་བརྗོད་ཅི་ཡང་མ་བཟླས་པས། །རྒྱལ་བ་མ་ལུས་ཀུན་སྲོག་ཐོན། །གཉིས་འཛིན་གང་ཡང་མ་བསྒྲུབས་པས། །བསྒྲུབ་བྱའི་ཆོས་ཀུན་མ་ལུས་རྫོགས། །བླ་མེད་ཨ་ཏིའི་དོན་རྟོགས་པས། །རེ་མེད་རང་[523.4]གནས་འབྲས་བུར་གྲོལ། །སྐུ་གསུམ་དུར་དུ་བསྐྱལ་བ་ནི། །ཕྱི་ལྟར་འཁོར་འདས་ཆོས་རྣམས་ཀུན། །སྟོང་དང་སྣང་དང་གཉིས་མེད་གསུམ། །དབྱེར་མེད་དབྱིངས་ཀྱི་དུར་དུ་བསྐྱལ། །ནང་ལྟར་སངས་རྒྱས་འབྲས་བུ་[523.5]ནི། །ཆོས་སྐུ་ལོངས་སྐུ་སྤྲུལ་སྐུ་གསུམ། །རེ་མེད་རང་གནས་དུར་དུ་བསྐྱལ། །གསང་བ་བླ་མེད་སྐུ་གསུམ་ནི། །སྙིང་པོ་འོད་གསལ་རང་དངས་གསུམ། །ཆོས་མེད་གཏིང་ཡངས་དུར་དུ་བསྐྱལ། །རྒྱ་ཆད་ཆོས་ཀུན་[523.6]མཐའ་གྲོལ་བ། །དེ་ལྟར་བསྟན་པ་མ་ལུས་ཀུན། །ང་ཡི་བླ་མེད་སྤྱི་ཏི་འདིར། །སྣང་དང་སྟོང་པ་གཉིས་ཀ་དང་། །གཉིས་མེད་ཕྱོགས་སུ་རྒྱ་མ་ཆད། །དེ་ཡང་གཅིག་གིས་གཅིག་བཀྲོལ་བས། །བདེན་པ་མཐའ་མཉམ་[524][524.1]ཕྱོགས་ལས་གྲོལ། །གདོད་ནས་རྣམ་དག་ཆོས་ཀྱི་སྐུ། །བསྒོམ་དུ་མེད་དེ་ཡེ་སངས་རྒྱས། །བྱུང་ཚོར་རྒྱུ་མེད་བསམ་དང་བྲལ། །བདེ་ཆེན་ཀློང་བརྡལ་འཛིན་པ་བརླག །ཡིད་ལ་མི་བྱེད་སྣང་བ་དག །མ་བཙལ་མ་[524.2]བཅོས་རང་བྱུང་བས། །ངང་དངས་བསམ་བྲལ་བློ་ལས་འདས། །སྣ་ཚོགས་བློ་བྲལ་རྒྱལ་བའི་ཐུགས། །རང་བྱུང་རང་དངས་སྤྲོས་གཅོད་ལ། །བྱ་བཙལ་རྩོལ་བསྒྲུབ་མཐའ་ལས་འདས། །དཔེར་ན་ཧ་ལ་ནག་པོའི་[524.3]དུག །དུག་ཏུ་ངོ་ཤེས་ཟ་མི་སྲིད། །སྔགས་ལྡན་ཟོས་ཀྱང་སྨན་དུ་འགྱུར། །དེ་བཞིན་འཁྲུལ་སྣང་འཁོར་བ་ཡང་། །རྟོགས་ལྡན་མི་འཆིང་གྲོགས་སུ་འགྱུར། །དབང་པོ་ཡང་རབ་གཅོད་ལུགས་སོ། །དབང་པོ་འབྲིང་གི་[524.4]གང་ཟག་ལ། །དུས་གསུམ་དག་ཏུ་ངོས་བཟུང་ལ། །འཔྲང་གསུམ་ནང་དུ་ནན་བོར་ཏེ། །མཚན་ཉིད་གསུམ་གྱིས་རྒྱས་གདབ་པ། །བཅོ་བརྒྱད་དོན་གྱི་མན་ངག་ཡིན། །ཐེ་ཚོམ་མེད་པས་དོན་གསུམ་བློས། །དུས་[524.5]གསུམ་ཀུན་ཏུ་ ཕུང་ པོ་ ལྔ། །དོན་ ཀུན་ ཡེ་ ནས་ དག་ཤེས་ པས། །དངོས་ པོ་ ཀུན་ གྱི་དོན་ སངས་ཤིང་ ། །འདས་ དང་ མ་འོངས་ ད་ལྟའི་ དུས། །སེམས་ དང་ སེམས་བྱུང་ཆོས་ སྐུར་ཤེས། །དེ་ ཡིས་[524.6]བདེ་སྡུག་མཐའ་སེལ་བས། །ཆགས་བྲལ་ཕྱི་ནང་ཡུལ་སེམས་མེད། །སྡུག་བསྔལ་གསུམ་པོ་མ་ལུས་ཞི། །ཉོན་མོངས་མ་ལུས་རང་སར་དངས། །སྣང་བ་གསུམ་སེལ་གྲོལ་གསུམ་རྟོགས། །ང་བདག་འཛིན་པའི་རྩ་བ་[525][525.1]ཆོད། །གཉིས་མེད་ངང་ལས་མུ་མེད་སྟོན། །ཡང་དག་ཆོས་འདས་མཐའ་ལ་གནས། །མ་བཙལ་དངོས་མེད་ཡེ་ཤེས་འཆར། །རྟོག་བྲལ་ཟང་ཀ་ལྷུན་གྱིས་གྲུབ། །གྲོལ་སྒྲིབ་འཁྲུལ་པ་ཀུན་ལས་[525.2]གྲོལ། །བདག་ཉིད་དེ་བཞིན་ཉིད་དུ་དག །མཉམ་ཉིད་ཕྱོགས་བྲལ་མཁའ་ལྟར་དངས། །དུས་གསུམ་མཚོན་བརྗོད་མེད་པར་རྟོགས། །འཕྲང་གསུམ་ནང་དུ་ནན་བོར་བས། །སྒོ་ལྔ་ཡུལ་ལྔ་གསལ་བ་ལ། །མ་[525.3]བཀག་སྒྲིབ་བྲལ་ཟང་ཐལ་ཤེས། །སྣང་སྲིད་དགག་བསྒྲུབ་དབྱེ་བསལ་མེད། །ཡུལ་ལྔ་མ་བཀག་རང་སྣང་ལ། །ཤེས་རབ་ཆེན་པོ་སྐད་ཅིག་གིས། །སྣང་ཞེན་འཛིན་མེད་རང་སར་དངས། །འགྱུ་བ་དྲན་རྟོག་ཡིད་[525.4]གཉིས་ལ། །འབྱེད་མེད་སྙིང་རྗེའི་གོ་ཆ་གོན། །སྤྲོས་གཅོད་ཤེས་རབ་རལ་གྲི་དང་། །ཐབས་རྒྱལ་བྱར་མེད་མདའ་གཞུ་ཡིས། །མ་རིག་ཉོན་མོངས་གཡུལ་ངོ་བཟློག །ཡིད་གཉིས་དྲན་རྟོག་རྩད་ནས་བཅད། །སེམས་[525.5]ཅན་ཀུན་གྱི་ཆགས་སྡང་གཅོད། །མཁའ་ལྟར་གཉིས་འཛིན་ཡུལ་ལས་འདས། །བླ་མེད་ཐེག་ཆེན་སྡུག་བསྔལ་གཅོད། །འགྱུ་བ་དྲན་རྟོག་འཕྲང་བཅད་པའོ། །ཀུན་གྱི་ཆོས་ཉིད་འཕྲང་དུ་ནི། །དེ་བཞིན་མ་ནོར་ཆོས་[525.6]ཉིད་དང་། །རྩིས་གདབ་ཡོད་མེད་མཐའ་ལས་འདས། །སྙིང་པོ་བཅུད་འདུས་བསྟན་དུ་མེད། །རྩིས་གདབ་གཉིས་མེད་བརྗོད་མཐའ་འདས། །སོ་སོ་རང་རིག་མི་གཡོ་བས། །ཕྱི་གྲོལ་ནང་དངས་གཉིས་འཛིན་[526][526.1]བརླག །མཁས་པས་རྣམ་གྲོལ་གསུམ་དུ་ཆོད། །མཚན་ཉིད་གསུམ་དུ་གཏན་ལ་དབབ། །སྣང་བའི་མཚན་ཉིད་རང་སྣང་ཡིན། །གནས་ལུགས་མཚན་ཉིད་སྐྱེ་བ་མེད། །རིག་པ་ཡིད་གཉིས་འཛིན་པ་ནི། །འཁྲུལ་པའི་[526.2]མཚན་ཉིད་ཤེས་པར་བྱ། །སྣང་བ་མ་བཀག་རང་སོར་བཞག །གནས་ལུགས་སྐྱེ་འགག་གཉིས་སུ་མེད། །རིག་འགྱུ་སེམས་མེད་སྤྲོས་པ་ཆོད། །དཀྱིལ་འཁོར་གསུམ་དུ་ངོ་སྤྲོད་པ། །སྣང་བ་ཆོས་ཀྱི་དཀྱིལ་འཁོར་[526.3]དུ། །རང་གྲོལ་རང་སངས་རང་ངོ་སྤྲོད། །འགྱུ་བ་རིག་པ་དྲན་སེམས་རྣམས། །ཐོལ་བྱུང་ངང་དངས་འཛིན་པ་མེད། །རིས་མེད་གསལ་དག་དལ་དུ་སྤྲད། །ཀུན་གཞི་འོད་གསལ་ཆོས་ཉིད་འདི། །རྣམ་དག་བསམ་གྱིས་[526.4]མི་ཁྱབ་པས། །དཀྱིལ་འཁོར་ཆེན་པོར་རང་ངོ་སྤྲད། །དུས་གསུམ་དུས་ལས་བཟློག་པ་ནི། །འདས་པའི་དུས་ལས་བཟློག་པ་ཡིས། །སྔར་ཞེན་བག་ཆགས་གནས་པ་མེད། །ད་ལྟའི་ཡིད་ལས་བཟློག་པ་ཡིས། །དེ་ལ་[526.5]དེར་འཛིན་དམིགས་པ་མེད། །མ་འོངས་ཆ་ལས་བཟློག་པ་ཡིས། །ཐ་མལ་བཏང་སྙོམས་མུན་པ་མེད། །བཟློག་ཐབས་གསུམ་གྱིས་ཉམས་བླངས་པའོ། །མེད་པ་གསུམ་གྱིས་རྒྱས་གདབ་པ། །གཞི་ནི་སྐྱེ་བ་མེད་པ་[526.6]ཡིན། །ཡིད་རིག་དྲན་སེམས་འགྱུ་བ་མེད། །སྣང་སྲིད་ཆོས་རྣམས་དབྱེ་བསལ་མེད། །ཆོས་རྣམས་ཀུན་ལ་དེ་རྒྱས་གདབ། །ཀ་དག་ཡེ་ཤེས་སྣང་གསལ་ཆེ། །སངས་རྒྱས་ཀུན་གྱི་མངོན་གསུམ་པ། །འགྲོ་བའི་མ་རིག་[527][527.1]མུན་པ་སེལ། །ཡང་དག་ཡེ་ཤེས་ངང་དངས་པས། །བླ་མེད་ཡེ་ཤེས་ཆེན་པོ་གསལ། །མ་རིག་སྒོ་ལྔའི་སྦུབས་ནས་འཐོན། །སྲིད་པའི་དྲ་བ་གཏན་བཅོམ་པས། །རྣམ་གྲོལ་ཞི་བ་མཆོག་གི་ས། །འཁོར་[527.2]བའི་མཐའ་ལས་ཕ་རོལ་ཕྱིན། །བྱ་བ་ཀུན་རྫོགས་ཟད་སར་སྐྱོལ། །གཟུགས་སོགས་དབྱེར་མེད་ཆོས་ཀྱི་སྐུ། །སྣང་ཡང་དངོས་མེད་མེ་ལོང་བཞིན། །ཡུལ་སེམས་གཉིས་མེད་རང་སོར་བཞག །དེ་ལྟར་སུས་རྟོགས་མྱ་[527.3]ངན་འདས། །རེ་མེད་རང་གནས་བླ་མེད་པ། །དབང་པོ་ཐ་མའི་གང་ཟག་ལ། །ཐམས་ཅད་འཁྲུལ་ཞིང་བསླུ་བའི་ཆོས། །མི་བདེན་ངང་གིས་སྟོང་པས་ན། །ཆགས་སྡང་གཉིས་འཛིན་མ་བྱེད་ཅིག །ཅེས་བསྟན་ཐ་མས་[527.4]ཉམས་བླངས་པས། །ཞབྲུལ་སྣང་འགགས་ནས་ཡེ་ཤེས་སྐྱེ། །སྲིད་པ་བར་དོར་རྟོགས་ཐབས་རྫོགས། །སྒྲོན་མ་བརྩེགས་པའི་རྒྱུད་ལས། འཁྲུལ་པ་རྩད་ནས་བཅད་པའི་ལེའུ་སྟེ་ལྔ་པའོ།། །།དེ་ནས་ངང་[527.5]དངས་ཁྱེའུ་ཆུང་གིས། །ཡེ་ཐོག་ཀུན་བཟང་ལ་ཞུས་པ། །བླ་མེད་སྤྱི་ཏིའི་རང་ངོ་འདི། །རྟོགས་ཐབས་གང་གིས་ཇི་ལྟར་རྟོགས། །ཞེས་ཞུས་པ་དང་།སྟོན་པས་འཁོར་ལ་བཀའ་སྩལ་པ། །རྟོགས་དང་མ་རྟོགས་གཉིས་[527.6]མེད་ཀྱང་། །བློ་དམན་རྟོགས་ཐབས་མན་ངག་བཤད། །ཐེག་པ་དགུ་རྩེའི་མན་ངག་འདི། །གཞན་ནས་མི་འབྱུང་འབྱུང་མི་སྲིད། །བྱ་བྲལ་བསམ་བྲལ་ངང་བཞག་སྟེ། །ཅི་ཡང་མི་བསམ་མི་འདའ་བས། །གང་ཡང་མི་[528][528.1]དམིགས་མི་རྟོག་ལ། །ཅི་བྱུང་རང་བྱུང་ངང་དངས་བདེ། །ཅི་སྐྱེས་ཞེན་མེད་རང་སར་ཀློད། །ཅི་ཡང་དགག་བསྒྲུབ་དབྱེ་བསལ་མེད། །རིག་པ་ཐོལ་བྱུང་བྱུང་སར་ཐིམ། །བདེ་ཆེན་མི་རྟོག་འགྱུ་བ་མེད། །རིག་པ་མ་[528.2]འགགས་ཟང་ཐལ་ལ། །ཡིད་ལ་མི་བྱེད་སྣང་བ་དག །དབང་པོ་རང་སྣང་རྒྱལ་བའི་ཐུགས། །མཐོང་བ་ལོག་པའི་འཁྲུལ་པ་ཡང་། །འཁྲུལ་པ་སངས་པས་མྱ་ངན་འདས། །རྟོགས་པས་སངས་རྒྱས་ཁོ་ན་སྟེ། །མ་རྟོགས་[528.3]པ་ནི་སེམས་ཅན་ནོ། །ཡེ་ཡིན་ཀ་དག་རྣལ་མའི་སྐུ། །དངོས་མེད་ཡེ་ཤེས་ཟང་ཀ་མ། །བྱ་བྲལ་བསམ་མེད་དགོངས་པ་ཤེས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། རྟོགས་ཐབས་མན་ངག་བསྟན་[528.4]པའི་ལེའུ་སྟེ་དྲུག་པའོ།། །།དེ་ནས་ངང་དངས་ཁྱེའུ་ཆུང་གིས། །ཡེ་ཐོག་རང་བཞིན་ཀུན་བཟང་ལ། །རྟོགས་ན་འབྲས་བུ་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འབྲས་བུ་ཐོབ་[528.5]མ་ཐོབ་མེད་ཀྱང་། །བློ་དམན་བྲོད་པ་བསྐྱེད་ཕྱིར་བཤད། །འཁོར་རྣམས་མ་ཡེངས་གུས་པར་ཉོན། །སྙིང་པོ་བཅུད་འདུས་མ་ཡི་དབྱིངས། །མཁའ་གསལ་འོད་གསལ་བུ་ཡི་དངས། །སྙིང་པོའི་ཀློང་དུ་རང་བྱུང་[528.6]བུ། །རྩལ་ཟེར་མ་འཕྲོས་མ་ལ་ཐིམ། །མ་བུ་ངོ་འཕྲོད་ཡེ་སངས་རྒྱས། །རང་བཞིན་སྐྱེ་མེད་ཆོས་ཀྱི་སྐུ། །ངོ་བོ་འགགས་མེད་ལོངས་སྤྱོད་སྐུ། །ཐུགས་རྗེ་གཉིས་མེད་སྤྲུལ་པའི་སྐུ། །ཡོན་ཏན་དབྱེར་མེད་ངོ་བོའི་[529][529.1]སྐུ། །ཕྲིན་ལས་རང་གྲོལ་ཡོངས་རྫོགས་སྐུ། །ཡེ་ཡིན་ངོ་ཤེས་ཐོབ་ཅེས་བཤད། །ཡེ་ནས་ཡོད་པར་མ་ཤེས་པར། །ཡེ་ནས་ཐོབ་ཅེས་རེ་དོགས་ཡིན། །གཞི་ཤེས་ཐོག་མའི་སར་སླེབ་ཆོག །རང་བཞིན་ངོ་[529.2]བོ་ཐུགས་རྗེ་ལས། །རྩོལ་མེད་ལྷུན་གྲུབ་ཐུགས་རྗེ་འབྱུང་། །ལས་ཀྱི་ཁམས་རྣམས་ཟད་པར་བྱས། །ཉོན་མོངས་མ་བསལ་རྣམ་པར་དག །འཁོར་བའི་རྒྱ་མཚོ་ཆེ་ལས་བརྒལ། །སྲིད་པའི་དྲ་བ་རང་སར་ཆོད། །ཁམས་[529.3]གསུམ་རང་དག་སྐྱེ་གནས་མེད། །སྐྱེ་འགགས་ལས་གྲོལ་རྡོ་རྗེའི་བདག །བླ་མེད་ཤེས་རབ་སྐད་ཅིག་གིས། ཆོས་ཀུན་མ་འདྲེས་ཡོངས་རྗོགས་རྟོགས། །སྐད་ཅིག་ཉིད་ལ་རྗོགས་སངས་རྒྱས། །མི་གནས་མྱ་ངན་[529.4]འདས་དོན་གྲུབ། །ཅེས་གསུངས་སོ། །སྒྲོན་མ་བརྩེགས་པའི་རྒྱུད་ལས། འབྲས་བུ་ཐོབ་ཚུལ་བསྟན་པའི་ལེའུ་སྟེ་བདུན་པའོ།། །།དེ་ནས་ངང་དངས་ཁྱེའུ་ཆུང་གིས། །ཐོག་མའི་སངས་རྒྱས་ཀུན་བཟང་[529.5]ལ། །འབྲས་བུ་དེ་ལྟར་ཐོབ་ན་ཡང་། །མི་འགྱུར་བརྟན་པ་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བསམ་བརྗོད་བློ་ཡི་ཡུལ་མིན་ཐོབ། །དངོས་མེད་ཆོས་སྐུ་ཟང་ཀ་མ། །རྒྱུ་རྐྱེན་སྐྱེ་[529.6]འཇིག་མེད་པ་ཡི། །འཕོ་འགྱུར་མེད་པར་བརྟན་པ་ཐོབ། །རྩལ་ཟེར་ཡན་ལག་འོད་གསལ་ངང་། །ངང་དངས་རང་གྲོལ་བརྟན་པ་ཐོབ། །སྣ་ཚོགས་སྣང་ལ་ངོས་བཟུང་མེད། །དྲན་མེད་ཡིད་ལ་བྱར་མེད་པས། །དབྱེར་[530][530.1]མེད་ངོ་བོ་ཉིད་ཀྱི་སྐུ། །མ་ཕྱེ་མ་བཀོལ་བརྟན་པ་ཐོབ། །དོན་དམ་བདེ་བ་ཆེན་པོའི་སྐུ། །རྩིས་གདབ་ཤུགས་གྲོལ་བརྟན་པ་ཐོབ། །ཆོས་ཟབ་མཐར་ཕྱིན་འཁྲུལ་པ་མེད། །ནོར་པའི་གཉིས་འཛིན་ཀ་ནས་དག །ཡེ་ཐོག་[530.2]སངས་རྒྱས་དགོངས་པ་རིག།བདག་མེད་རྣམ་དག་ཕྱོགས་བྲལ་ཆོས། །མ་བྱས་རང་བྱུང་བློ་འདས་སྟོན།།རྒྱ་ཆད་མེད་པར་བརྟན་པ་ཐོབ། ཅེས་གསུངས་སོ། །སྒྲོན་མ་བརྩེགས་པའི་རྒྱུད་ལས། །འབྲས་བུ་མི་འགྱུར་[530.3]བརྟན་པ་ཐོབ་པའི་ལེའུ་སྟེ་བརྒྱད་པའོ།། །།དེ་ནས་ངང་དངས་ཁྱེའུ་ཆུང་གིས། །རང་བཞིན་ཀུན་ཏུ་བཟང་པོ་ལ། །འོག་མ་རྣམས་ལ་སྐྱོན་ཅི་མཆིས། །ཞེས་ཞུས་པས། སྟོན་པས་འཁོར་ལ་བཀའ་[530.4]སྩལ་པ། །སྤྱི་ཏི་སྙིང་པོའི་ངང་ཉིད་ལ། །སྐྱོན་དང་ཡོན་ཏན་གཉིས་མེད་ཀྱང་། །མ་རྟོགས་བློ་ལ་སྐྱོན་དུ་བྱུང་། །གང་ཟག་དབང་པོའི་ཁྱད་པར་ལས སེམས་འཐད་ཐེག་པ་རིམ་པ་དགུ། །མི་མཐུན་འཇུག་སྒོ་ལྟ་[530.5]བསྒོམ་འབྲས། །དེ་ཡི་སྐྱོན་ལ་ཐུག་པ་མེད། །མདོར་བསྡུས་སྐྱོན་བཤད་འཁོར་ལ་བཤད། །ཨ་ཏི་ཁ་འབྱམས་ཕྱོགས་ལྷུང་སྐྱོན། །ཨ་ནུ་དབྱིངས་དང་ཡེ་ཤེས་སྐྱོན། །མ་ཧྭ་སྣང་སྟོང་གཉིས་ཀྱི་སྐྱོན། །ཡོ་ག་སྐྱེ་འགག་[530.6]གཉིས་ཀྱི་སྐྱོན། །ཨུ་པ་ཡར་བལྟ་མར་སྤྱོད་སྐྱོན། །ཀྲི་ཡ་དག་པ་རྣམ་གསུམ་སྐྱོན། །དབུ་མ་བདེན་པ་གཉིས་ཀྱི་སྐྱོན། །སེམས་ཙམ་རང་རིག་རང་གསལ་སྐྱོན། །རང་རྒྱལ་རྟེན་འབྲེལ་རིག་བྱེད་སྐྱོན། །ཉན་ཐོས་ཡུལ་[531][531.1]སེམས་བདག་མེད་སྐྱོན། །བྱ་རུ་བཞིན་དུ་གཉིས་བཟུང་བས། །ཀིམ་པ་ཀ་ཡི་འབྲས་བུ་བཞིན། །སྨིན་ཡང་འབྲས་བུ་མི་འབྱུང་ངོ་། །བལྟ་བསྒོམ་སྤྱོད་འབྲས་ས་ལམ་ངམ། །ང་རྣམས་སྐྱོན་བརྗོད་ཟད་[531.2]མཐའ་ཡས། །ལྡོང་པ་ནམ་མཁར་སྙེགས་པ་འདྲ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། ཐེག་པ་འོག་མ་པའི་སྐྱོན་བསྟན་པའི་ལེའུ་སྟེ་དགུ་པའོ།། །།དེ་ནས་ངང་དངས་ཁྱེའུ་ཆུང་གིས། །ཐོག་[531.3]མའི་སངས་རྒྱས་ཀུན་བཟང་ལ། །ཐེག་པ་རིམ་པ་དགུ་པོ་ལས། །སྤྱི་ཏི་ཁྱད་པར་གང་གིས་སྤགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ང་ཡི་བླ་མེད་སྤྱི་ཏི་ལ། །སྤགས་དང་མ་སྤགས་གཉིས་[531.4]མེད་ཀྱང་། །རྩལ་གྱི་རིག་པས་ཚིག་ཕྱེ་བས། །ཐེག་པ་དགུ་རྩེའི་སྤྱི་ཏི་འདི། །གདོད་ནས་དག་པའི་ཆོས་སྐུ་ལ། །བྱ་བཙལ་རྩོལ་བསྒྲུབ་མི་འཐད་དེ། །མཚོན་འདས་བློ་འདས་བསྒྲུབ་མེད་འདི། །བདེན་པ་གཉིས་སུ་མི་[531.5]བལྟ་སྟེ། །གཉིས་བཟུང་ཆོས་རྣམས་སྤྲོས་པ་གཅོད། །དེས་ན་རྩེ་རྒྱལ་སྤྱི་ཏི་སྤགས། །དྲན་པའི་འཁོར་ལོ་ལས་འདས་པས། །འཛིན་རྟོགས་བློ་ལས་ཁྱད་པར་འཕགས། །དྲན་མེད་བསམ་པ་ལས་འདས་པས། །བེམ་པོ་[531.6]རིག་མེད་རྣམས་ལས་སྤགས། །སྐྱེ་མེད་ཙམ་དུའང་མ་གྲུབ་པས། །སྐྱེ་བའི་འཁོར་ལོ་རྣམས་ལས་སྤགས། །ཡིད་ཀྱི་འགྱུ་བ་རང་དག་པས། །སེམས་ཀྱི་བརྟགས་ཞེན་རྣམས་ལས་སྤགས། །ཉོན་མོངས་མ་ལུས་ཀུན་[532][532.1]འདས་པས། །མངོན་ཞེན་ཐ་དད་ཡུལ་ལས་སྤགས། །ཚིག་གིས་མཚོན་བརྗོད་ཡུལ་འདས་པས། །ཐེག་པའི་གྲུབ་མཐའ་རྣམས་ལས་སྤགས། ཁོགོས་རྟོགས་སྤྱད་ཡུལ་མ་ཡན་པས། །ཡད་དཔྱད་བྱས་བཅས་ཆས་ལས་[532.2]སྤགས། །སྣང་སྟོང་ཕྱོགས་འཛིན་མཐའ་འདས་པས། །རྟག་ཆད་ལོག་ལྟའི་ཡུལ་ལས་སྤགས། །ཉོན་མོངས་མཐའ་ལས་རང་གྲོལ་བས། །བླང་དོར་དཀའ་སྤྱད་རྣམས་ལས་སྤགས། །ལས་དང་བག་ཆགས་མཐའ་[532.3]སྤངས་པས། །རྒྱུ་རྐྱེན་རྣམ་སྨིན་ཆོས་ལས་སྤགས། །གཅོད་པའི་ཤེས་རབ་ལས་འདས་པས། །རང་རིག་རང་གསལ་སེམས་ལས་སྤགས། །ས་ལམ་བདེན་གཉིས་དངོས་དག་པས། །སྤང་ཐོབ་རྒྱུ་ཡི་ཆོས་ལས་[532.4]སྤགས། །སྐུ་དང་ཡེ་ཤེས་ལས་གྲོལ་བས། །བཟང་ངན་རེ་དོགས་ཆོས་ལས་སྤགས། །མ་བྱས་མ་བཅོས་དེ་ཁོ་ན། །མི་འཇུག་མི་བལྟ་བསྒོམ་མི་བྱེད། །མི་བཙལ་མི་སྦྱད་བསྲུང་སྡོམ་མེད། །དཀྱིལ་འཁོར་ལྷ་བོད་[532.5]མཆོད་བསྟོད་མེད། །དབང་དང་དངོས་གྲུབ་སྨོན་འབྲས་མེད། །རྩོལ་སྒྲུབ་བྱ་བྱེད་ལས་འདས་པའི། །ཕྱི་ནང་འབྲས་བུའི་ཆོས་ལས་འདས། །ཀ་དག་ལྷུན་གྲུབ་ངེས་མེད་ཀྱི། །གཞི་ཡི་ཕྱོགས་ཆ་མིང་མེད་པས། །ཨ་ཏི་[532.6]ཁ་འབྱམས་ཆོས་ལས་སྤགས། །རང་བྱུང་ཡེ་ཤེས་དངོས་སྟོང་པས། །སེམས་སྡེ་དགོངས་པའི་ཆོས་ལས་སྤགས། །ཀུན་བཟང་ཀློང་ཆེན་མུ་མེད་པས། །ཀློང་སྡེ་རབ་འབྱམས་དོན་ལས་སྤགས། །ལུས་ངག་གནད་ལ་མི་[533][533.1]ལྟོས་པས། །མན་ངག་སྡེ་ཡི་ཐབས་ལས་སྤགས། །དེ་ལྷར་ཅིར་ཡང་སྣང་དུས་ན། །དེ་དག་གང་ལའང་མ་བཀག་ལ། །གྲངས་ཅན་དུམ་བུ་བསྒྲུབས་པས་ནི། །ཀུན་གྱི་མུ་མཐའ་རང་སར་[533.2]གྲོལ། །རང་གྲོལ་ཕྱོགས་སུ་རྒྱ་མ་ཆད། །གཉིས་ཀའི་ཕྱོགས་སུ་རྒྱ་མ་ཆད། །གཉིས་མེད་ཕྱོགས་སུ་རྒྱ་མ་ཆད། །མ་གྲོལ་བ་ནི་གྲོལ་བས་བཀྲོལ། །གྲོལ་བ་མ་གྲོལ་བ་ཡིས་བཀྲོལ། །གཉིས་ཀ་གཉིས་སུ་མེད་པར་[533.3]བཀྲོལ། །གཉིས་ཀ་མེད་པར་གཉིས་ཀ་བཀྲོལ། །དེ་ལྟར་གཅིག་གིས་གཅིག་བཀྲོལ་བས། །རང་གྲོལ་ཡེ་གྲོལ་ཡོངས་གྲོལ་དང་། །གཅེར་གྲོལ་མཐའ་གྲོལ་བླ་མེད་པས། །དགུ་རྩེ་སྤྱི་ཏི་ཡང་ཏི་སྤགས། །ཞེས་[533.4]གསུངས་སོ། །སྒྲོན་བརྩེགས་པའི་རྒྱུད་ལས། སྤྱི་ཏི་ཆོས་ཐམས་ཅད་ལས་སྤགས་པར་བསྟན་པའི་ལེའུ་སྟེ་བཅུ་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །སྤྱི་ཏིའི་དཀྱིལ་[533.5]འཁོར་ཇི་ལྟར་སྤགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་བྲིས་ཁྱབ་བརྡལ་དཀྱིལ་འཁོར་ནས། །མཁའ་དབྱིངས་རྣམ་དག་ཕྱོགས་བྲལ་དེར། །བརྡལ་ཁྱབ་རྟག་ཆད་ས་གཞི་ལ། །མི་འགྱུར་[533.6]དྲང་པོའི་ཐིག་བཏབ་ནས། །དཀར་སེར་དམར་ལྗང་ཡེ་ནས་བཀོད། །ཕྱོགས་བཞི་མཚམས་བཞི་ཡེ་ནས་དག །སྐྱེ་ཤི་རྩད་གཅོད་སྒོ་བཞི་ལ། །བྱམས་དང་སྙིང་རྗེའི་དཀྱིལ་འཁོར་ཏེ། །ཚད་ལས་འདས་པའི་ཡངས་པ་[534][534.1]ཆེ། །སྣང་སྟོང་སྐུ་ཡི་དཀྱིལ་འཁོར་ཏེ། །གྲག་སྟོང་གསུང་གི་དཀྱིལ་འཁོར་ཡིན། །དྲན་སྟོང་ཐུགས་ཀྱི་དཀྱིལ་འཁོར་ཡིན། །སྐུ་ཡི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །གསུང་གི་དཀྱིལ་[534.2]འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །ཐུགས་ཀྱི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །རང་བཞིན་ངོ་བོ་ཐུགས་རྗེ་གསུམ། །གདོད་ནས་མ་བཅོས་དཀྱིལ་འཁོར་[534.3]ཡིན། །དཀྱིལ་འཁོར་དཀྱིལ་འཁོར་ཞེས་བྱ་བ། །དཀྱིལ་ནི་སྔོན་ཐོག་ཡེ་གནས་ཡིན། །འཁོར་ནི་རྒྱ་ཆད་ཕྱོགས་ལྷུང་མེད། །དཀྱིལ་ནི་སྙིང་པོའི་གཤིས་ཡིན་ཏེ། །རྩལ་ཟེར་ཡན་ལག་འཁོར་ཡིན་ནོ། །དཀྱིལ་ནི་ཀུན་[534.4]གཞིའི་ཀློང་ཡིན་ཏེ། །འོད་ཟེར་ཤེས་རིག་འཁོར་ཡིན་ནོ། །རང་བཞིན་ངོ་བོ་ཐུགས་ཀྱི་དཀྱིལ། །སྒོ་གསུམ་སྒོ་གཉིས་འཁོར་ཡིན་ནོ། །འཁྲུལ་ལུགས་རྣམ་གསུམ་དཀྱིལ་ཡིན་ཏེ། །གཅོད་ལུགས་རྣམ་གསུམ་འཁོར་[534.5]ཡིན་ནོ། །རིག་ཡིད་སེམས་གསུམ་དཀྱིལ་ཡིན་ཏེ། །ངང་དངས་རྩད་གཅོད་འཁོར་ཡིན་ནོ། །སྙིང་པོ་ཆོས་ཉིད་དཀྱིལ་ཡིན་ཏེ། །ཐག་ཆོད་གདེངས་ལྡན་འཁོར་ཡིན་ནོ། །ཡེ་ནས་རང་གནས་དཀྱིལ་ཡིན་ཏེ། །སྐྱེ་མེད་[534.6]དོན་རྟོགས་འཁོར་ཡིན་ནོ། །ཕྱི་ནང་སྣང་སྲིད་དཀྱིལ་ཡིན་ཏེ། །ཕྱོགས་མེད་དབྱེར་མེད་འཁོར་ཡིན་ནོ། །ཡོད་མེད་སྐྱེ་འགུལ་དཀྱིལ་ཡིན་ཏེ། །སོར་བཞག་རྩིས་གདབ་མེད་པ་འཁོར། །བླ་མེད་སྤྱི་ཏིའི་དཀྱིལ་འཁོར་[535][535.1]ཏེ། །དཀྱིལ་འཁོར་གཞན་ལས་ཁྱད་པར་འཕགས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། སྤྱི་ཏིའི་དཀྱིལ་འཁོར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ངང་དངས་[535.2]ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །ལྷ་ཚོགས་སྤྱན་འདྲེན་མཆོད་བསྟོད་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ལྷ་ཡི་དབང་པོ་ལྷ་ཡི་ལྷ། །ལྷ་དང་ལྷ་མིན་ཀུན་གྱི་[535.3]བདག །གནས་ལུགས་སྐྱེ་མེད་ཀ་དག་སྟེ། །ཇི་བཞིན་མ་བཅོས་སྙིང་པོའི་ལྷ། །གདོད་ནས་དངོས་མེད་ཟང་ཀ་སྟེ། །མ་བསྒྲུབས་ཡེ་ནས་ལྷ་ཚོགས་ལ། །སྤྱན་དྲངས་མིང་མེད་ཡེ་ནས་གནས། །བཅོས་བསླད་སྒྲིབ་མེད་[535.4]རང་སར་བསྟན། །སྐྱེ་མེད་མཚོན་བྲལ་ཆོས་འདས་ལ། །གཉིས་བྲལ་འགྱུར་མེད་མཆོད་བསྟོད་མེད། །ཕུང་པོ་ལྔ་ཉིད་ཡེ་དག་པས། །འཁྲུལ་པའི་དུས་ཉིད་ཡེ་སངས་རྒྱས། །འབྱུང་ལྔ་ཡེ་ནས་རང་དངས་པས། །ཡུལ་[535.5]སྣང་གསལ་དག་ངང་དུ་གྲོལ། །དབང་པོ་ལྔ་ཉིད་གཅེར་གྲོལ་བས། །དུག་ལྔ་གདོད་ནས་ཡེ་ཤེས་པས། །གནས་བསྒྱུར་མི་དགོས་རྣལ་མའི་ངང་། །རེ་མེད་རང་ལ་ཡེ་གནས་པས། །སྤྱན་དྲངས་མཆོད་བསྟོད་ཡུལ་ལས་[535.6]འདས། །གང་ནས་མ་བསྐྲུབས་རང་ཉིད་པས། །ཆེ་བའི་ཡོན་ཏན་བཙལ་དང་བྲལ། །ཚོགས་གཉིས་མ་བསགས་ཡོངས་རྫོགས་པས། །ཁམས་གྱིས་བཙལ་ཞིང་བསྒྲུབ་ལས་གྲོལ། །དྲི་མེད་ངང་དངས་ཡེ་གསལ་[536][536.1]ལ། །སྒྲིབ་གཉིས་མ་སྦྱངས་ཀ་ནས་དག །སྐྱེ་མེད་རྡོ་རྗེ་རང་འཁྲུངས་པས། །ལྷ་དང་མཆོད་བསྟོད་མུ་མཐའ་སངས། །རྩོལ་བསྒྲུབ་བློ་ལས་ཁྱད་པར་འཕགས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས།[536.2]ལྷ་ཚོགས་མཆོད་བསྟོད་ཀྱི་ལེའུ་སྟེ་བཅུ་གཉིས་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །མ་བསྐུར་དབང་ནི་ཇི་ལྟར་ཐོབ། །ཅེས་ཞུས་པས། སྟོན་པས་འཁོར་ལ་[536.3]བཀའ་སྩལ་པ། །ཐེག་པ་གཞན་ལས་འཕགས་པ་ཡི། །དགུ་རྩེ་དབང་གི་རྒྱལ་པོ་བཤད། །མཁའ་ཀློང་ཆོས་དབྱིངས་ཡངས་པའི་དབང་། །མ་ཕྱེ་མ་བཀོལ་སྙིང་པོར་བསྐུར། །ཆོས་ཉིད་སྐྱེ་འགག་གཉིས་མེད་[536.4]དབང་། །རྩལ་ཟེར་ཐིག་ལེའི་ཀློང་འདུས་བསྐུར། །སྣང་སྲིད་མ་བཀག་རོལ་པའི་དབང་། །དགག་བསྒྲུབ་འབྱེད་པ་མེད་པར་བསྐུར། །གཉིས་མེད་རང་སོར་བཞག་པའི་དབང་། །ཆོས་ཉིད་གསལ་དག་ངང་དུ་[536.5]བསྐུར། །རྒྱལ་ཐབས་སྤྱི་བླུགས་ཚངས་པའི་དབང་། །བྱ་བཙལ་གཡོ་རྩོལ་མེད་པར་བསྐུར། བུམ་པའི་རྒྱལ་པོ་སྙིང་པོའི་བ་། །ཐིག་ལེ་བཅུད་འདུས་བུམ་པས་བསྐུར། །རྡོ་རྗེ་རྒྱལ་པོ་བཀའ་ཡི་དབང་། །དུས་[536.6]གསུམ་འཕོ་འགྱུར་མེད་པར་བསྐུར། །དབུ་རྒྱན་བླ་མེད་རིགས་ལྔའི་དབང་། །གདོད་ནས་སྤྱི་བླུགས་ཀློང་དུ་བསྐུར། །ཅོད་པན་ཐེག་དགུ་ལས་རྒྱལ་དབང་། །གྲུབ་མཐའ་འཛིན་ཞེན་མེད་པར་བསྐུར། ཤེས་བརྗོད་[537][537.1]ལས་འདས་གསང་བའི་དབང་། །ཅི་ཡང་བསྟན་དུ་མེད་པར་བསྐུར། །རང་སྣང་རང་གདངས་ཐབས་ཤེས་དབང་། །རྣམ་རྟོག་ཡེ་ཤེས་ཆེན་པོར་བསྐུར། །རང་བལྟ་རང་སྟོར་ཆོས་འདས་དབང་། །ཚིག་[537.2]དབང་མཚོན་དུ་མེད་པར་བསྐུར། །སྙིང་པོ་ཀ་དག་རྣལ་མའི་དབང་། །གཡོ་རྩོལ་འཇིག་བྲལ་མེད་པར་བསྐུར། །རྩིས་གདབ་ཕྱོགས་ལྷུང་མེད་པར་ཐོབ། །སྣང་སྲིད་སེམས་ཉིད་ངང་དག་དབང་། །གཉིས་འཛིན་[537.3]དགག་བསྒྲུབ་མེད་པར་བསྐུར། །དབྱེ་བསལ་རྒྱ་ཆད་མེད་པར་ཐོབ། །རང་བྱུང་དྲི་མེད་རིག་པའི་དབང་། །རང་བརླག་རང་ཐིམ་ངང་དུ་བསྐུར། །རྩད་གཅོད་འཁྲུལ་སངས་གཏིང་ཡངས་ཐོབ། །ཡིད་བཞིན་དགོངས་པ་[537.4]ཡེ་རྫོགས་དབང་། །རྩལ་མེད་ཡོངས་རྗོགས་ཀློང་དུ་བསྐུར། །བསྒྲུབ་མེད་སྨོན་པ་མེད་པར་བསྐུར། །བསྐྱོད་མེད་ས་ལམ་ཆིག་ཆོད་དབང་། །བགྲོད་མེད་རྣམ་གྲོལ་དབྱིངས་སུ་བསྐུར། །ཆོས་ཟད་མུ་མེད་མཐའ་སྟོངས་[537.5]དབང་། །ཡེ་ཐོབ་མཁའ་ཀློང་དབྱིངས་སུ་བསྐུར། །བསྐུར་ཐོབ་མཚན་མ་མཐའ་སྟོངས་པའི། །ཡེ་རྫོགས་དབང་གི་སྤྱི་རྒྱལ་འདི། །ཐོབ་བྱ་ཐོན་བྱེད་གཉིས་འཛིན་པའི། །བློས་བཏགས་གཟུང་འཛིན་དབང་ལས་[537.6]སྤགས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། ཡོངས་རྫོགས་སྤྱི་ཏིའི་དབང་བསྐུར་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་ངང་དངས་ཁྱེའུ་ཆུང་གིས། །རང་བཞིན་ཀུན་ཏུ་བཟང་[538][538.1]པོ་ལ། །དངོས་གྲུབ་དམ་ཚིག་སྨོན་ལམ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དངོས་གྲུབ་དངོས་གྲུབ་ཅེས་བྱ་བ། །གཞན་ནས་བླང་བའི་ཡུལ་མེད་དེ། །རང་ལ་ཡེ་གནས་གདོད་ནས་[538.2]གྲུབ། ཁུབ་ཟིན་དོན་ལས་མ་འདས་ན། །ཐུན་མོང་བསྒྲུབ་པ་བྱ་མི་དགོས། །དངོས་ནི་ཆོས་ཉིད་སྐྱེ་མེད་དེ། །གྲུབ་པ་རྟོགས་པའི་ཡེ་ཤེས་ཏེ། །ཐོབ་ནི་ཆོས་སྐུ་སྐྱེ་མེད་ཐོབ། །དངོས་ནི་རང་གསལ་རིན་པོ་ཆེ། ཁུབ་[538.3]པ་དེ་རྟོགས་ཤེས་རབ་ཡིན། །དངོས་ནི་དངོས་མེད་ཆོས་ཀྱི་སྐུ། །སྐྱེ་ཤི་འཕོ་འགྱུར་མེད་པར་གྲུབ། །དངོས་ནི་སྙིང་པོ་དོན་གྱི་ཀློང་། །གནས་གཞི་གཏན་ལ་ཕེབས་པ་ཡིས། །འཁྲུལ་པ་རྩད་ནས་ཆོད་པས་[538.4]གྲུབ། །དངོས་ནི་སྤྱི་ཏིའི་གནས་ལུགས་ཏེ། །གྲུབ་མཐའི་རྒྱ་ལས་གྲོལ་བས་གྲུབ། །ཡང་དག་དོན་གྱི་དམ་ཚིག་ནི། །དབྱེར་མེད་གདེང་ལས་མི་འདའ་དང་། །སྙིང་པོའི་དོན་ལས་མི་འདའ་དང་། །རྟོགས་པའི་དོན་ལས་[538.5]མི་འདའ་དང་། །མ་བུ་ངོ་སྤྲོད་ཉམས་ལེན་ལས། །རྟག་ཏུ་མི་འདའ་དམ་ཚིག་ཡིན། །བླ་མེད་མཆོག་གི་སྨོན་ལམ་ནི། །མ་བགྲོད་ཐོག་མའི་གཞིར་ཕྱིན་དང་། །རང་གནས་སྨོན་པའི་སར་སྐྱོལ་དང་། །ཆོས་དབྱིངས་བླ་[538.6]མེད་ཀློང་དཀྱིལ་དུ། །རྩལ་ཟེར་རིག་པ་རང་སར་ཐིམ། །ཐིམ་དང་མ་ཐིམ་མུ་མཐའ་སྟོང་། །སྨོན་པའི་སངས་རྒྱས་རང་ལས་རྙེད། །སྨོན་ལམ་ཞེས་བྱ་ཐ་སྙད་བཏགས། །བསམ་མེད་བྱ་བྲལ་མཐའ་གྲོལ་ཏེ། །མ་[539][539.1]༄༅ བཙལ་རང་གནས་རྟོགས་པ་ལ། །སྨོན་ལམ་ཞེས་བྱར་བཏགས་པ་ཡིན། །ཚེ་འདིར་བཏབ་ནས་ཕྱི་མ་ལ། །ཐོབ་ཏུ་རེ་བ་ལྟོས་མེད་པར། །སྙིང་པོ་ཆོས་སྐུ་རང་ལས་རྙེད། །རྙེད་དང་མ་རྙེད་གཉིས་ཀ་[539.2]དང་། །གཉིས་མེད་མུ་མཐའ་རང་སར་གྲོལ། །ཡང་རྩེ་སྤྱི་ཏིའི་སྨོན་ལམ་ཡིན། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། དངོས་གྲུབ་དམ་ཚིག་སྨོན་ལམ་བསྟན་པའི་ལེའུ་སྟེ་བཅུ་བཞི་[539.3]པའོ།། །།དེ་ནས་ངང་དངས་ཁྱེའུ་ཆུང་གིས། །རང་བཞིན་ཀུན་བཟང་ལ་ཞུས་པ། །དགུ་རྩེ་སེམས་ཉིད་སྤྱི་ཏི་འདི། །མ་འདྲེས་ཡོངས་སུ་ཇི་ལྟར་རྫོགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་[539.4]པ། །མཁའ་ཀློང་རྣམ་དག་ཀློང་ཆེན་དུ། །སྣང་སྲིད་འུབ་བསྡུས་ཆེན་པོར་རྫོགས། །རྩེ་རྒྱལ་རྫོགས་ཆེན་སྤྱི་ཏི་སྲ །ཐེག་པ་བརྒྱད་ཁྲི་བཞི་སྟོང་རྫོགས། །མ་བུ་གཉིས་མེད་གནས་གཉིས་སུ། །གདམས་ངག་ཐམས་ཅད་[539.5]འུབྲ་བསྡུས་རྫོགས། །རང་སངས་རང་རྒྱལ་རང་གྲོལ་དུ། །རྟོགས་ལུགས་བརྒྱད་ཁྲི་བཞི་སྟོང་རྫོགས། །ནམ་མཁར་འབྱུང་ལྔ་མ་འདྲེས་རྫོགས། །བར་སྣང་ཉི་ཟླ་གཟའ་སྐར་རྫོགས། །གནམ་སའི་ཀློང་དུ་སྐྱེ་འགྲོ་[539.6]རྫོགས། །དཀྱིལ་འཁོར་ཀློང་དུ་ཚོན་ལྔ་རྫོགས། །ཟ་འོག་སྣམ་བུར་དར་སྣ་རྫོགས། །ཡིད་བཞིན་ནོར་བུ་རིན་ཆེན་རྫོགས། །དེ་བཞིན་སེམས་ཉིད་སྤྱི་ཏི་འདིར། །ཕྱི་ནང་ཐེག་པ་མ་ལུས་རྫོགས། །ཡེ་དག་བྱ་བྲལ་ཆོས་[540][540.1]ཀྱི་བསྐུར། །རྫོགས་ཆེན་ལྟ་བ་མ་ལུས་རྫོགས། །དབྱིངས་དང་ཡེ་ཤེས་གཉིས་མེད་པས། །ཨ་ནུའི་ལྟ་བ་མ་འདྲེས་རྫོགས། །སྣང་སྟོང་ཐབས་དང་ཤེས་རབ་མེད། །མ་ཧྭའི་ལྟ་བ་མ་འདྲེས་རྫོགས། །སུམ་ཅུ་རྩ་བདུན་སྐྱེ་[540.2]འགག་མེད། །ཡོ་གའི་ལྟ་བ་མ་འདྲེས་རྫོགས། །མར་སྤྱོད་ཡར་ལྟའི་རྩེ་གཉིས་མེད། །ཨུ་པའི་ལྟ་བ་མ་འདྲེས་རྫོགས། །དག་གསུམ་རིགས་གསུམ་མགོན་མེད་པས། །ཀྲི་ཡའི་ལྟ་བ་མ་འདྲེས་རྫོགས། །བདེན་པ་[540.3]གཉིས་སུ་མི་བལྟ་པས། །དབུ་མའི་ལྟ་བ་མ་འདྲེས་རྫོགས། །ཡུལ་སེམས་གཉིས་སུ་མི་བལྟ་བས། །སེམས་ཙམ་ལྟ་བ་མ་འདྲེས་རྫོགས། །རྟེན་འབྲེལ་བཅུ་གཉིས་མི་བལྟ་བས། །རང་རྒྱལ་ལྟ་བ་མ་འདྲེས་[540.4]རྫོགས། །བདག་མེད་ཕྱོགས་ཆ་མི་འདོད་པས། །ཉན་ཐོས་ལྟ་བ་མ་འདྲེས་རྫོགས། །རྟག་ཆད་གཉིས་སུ་མ་ལྷུང་བས། །མུ་སྟེགས་ལྟ་བ་མ་འདྲེས་རྫོགས། །དེ་ལྟར་གང་དུའང་མི་བལྟ་ལ། །གང་ཡང་མ་འདྲེས་འདིར་[540.5]རྫོགས་ཤིང་། །འདྲེས་དང་མ་འདྲེས་རྫོགས་མ་རྫོགས། །གཉིས་ཀ་གཉིས་མེད་རང་གྲོལ་བས། །ཆོས་རྣམས་མ་འདྲེས་སྤྱི་ཏི་རྫོགས། །འཇུག་སྒོ་ཕྲིན་ལས་ལྷ་དབང་རྫོགས། །དམ་ཚིག་མཆོད་བསྟོད་གཏོར་མ་[540.6]རྫོགས། །མཎྜལ་ཚ་ཚ་བཤགས་པ་དང་། །དགེ་རྩ་སྨོན་ལམ་རྒྱས་འདེབས་རྫོགས། །གཅིག་རྫོགས་གཉིས་རྫོགས་སེམས་སུ་རྫོགས། །ཡོད་མེད་མ་ལུས་སྣང་སྟོང་རྫོགས། །ཡོངས་རྫོགས་སྐད་ཅིག་བྱེ་བྲག་ཕྱེད། །[541][541.1]སྐད་ཅིག་ཉིད་ལ་མངོན་སངས་རྒྱས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། མ་འདྲེས་པ་ཡོངས་སུ་རྫོགས་པའི་ལེའུ་སྟེ་བཅོ་ལྔ་པའོ།། །།དེ་ནས་ངང་དངས་ཁྱེའུ་ཆུང་[541.2]གིས། །དམ་པ་དང་པོ་ཀུན་བཟང་ལ། །མ་བྱས་རང་བྱུང་མཚོན་མེད་པས། །བྱར་མེད་བློ་འདས་ཐེག་པ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་བྱས་རང་བྱུང་རྩོལ་མེད་སེམས། །གངོང[541.3]ནས་དག་པའི་ཆོས་སྐུ་ཉིད། །ཁོང་ནས་འབྱུང་བ་སྐྱེ་བ་མེད། །ངག་ཏུ་བརྗོད་པ་ཀུན་ལས་གྲོལ། །མཚོན་དུ་མེད་པའི་བརྗོད་པའི་མཆོག །མ་སྐྱེས་ཆོས་ཉིད་སེམས་ལས་འདས། །དངོས་མེད་འདོད་བྲལ་བློ་འདས་[541.4]ཡིན། །རང་བྱུང་ངང་དངས་བློ་ལས་འདས། །སྙིང་པོ་ཆོས་ཉིད་བློ་ལས་འདས། །བྱར་མེད་བཤད་མེད་མཚོན་དུ་མེད། །རྩོལ་མེད་བསམ་བྲལ་ཀ་ནས་དག །དེས་ན་མཚོན་མེད་བློ་ལས་འདས། །བྱས་པའི་ཆོས་ནི་[541.5]འདུས་བྱས་ཡིན། །འདུས་བྱས་ཆོས་ཀྱི་སངས་མི་རྒྱ། །བཤད་པའི་ཆོས་ནི་ཐ་སྙད་ཡིན། །བླ་དགས་ཚིག་གིས་སངས་མི་རྒྱ། །བློ་བཏགས་ཆོས་ནི་འཁྲུལ་པ་ཡིན། །ཞབྲུལ་པའི་ཆོས་ཀྱིས་སངས་མི་རྒྱ། །བསྒྲུབ་ཆོས་[541.6]རྩོལ་བསྒྲུབ་ཡིད་སྨོན་ཡིན། །ཡིད་སྨོན་ཆོས་ཀྱིས་སངས་མི་རྒྱ། །རྩོལ་བསྒྲུབ་མེད་པའི་ཆོས་ཤིག་དགོས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། བྱར་མེད་མཚོན་མེད་བློ་ལས་འདས་པའི་ལེའུ་སྟེ་བཅུ་[542][542.1]དྲུག་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །གཅིག་ཤེས་ཀུན་གྲོལ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཆོས་གཅིག་དེ་བཞིན་[542.2]ཉིད་ཤེས་ན། །ཆོས་རྣམས་ཐམས་ཅད་གྲོལ་བར་འགྱུར། །ཞེས་བཀའ་སྩལ་པ་དང་། །དེ་ནས་རང་དངས་ཁྱེའུ་ཆུང་གིས། །ཆོས་གཅིག་དེ་ནི་ཇི་ལྟར་ལགས། །གཅིག་ལ་དངོས་པོ་ཡོད་ལགས་སམ། །ཞེས་ཞུས་པ་[542.3]དང་། སྟོན་པས་འཁོར་ལ་བཀའ་སྩལ་པ། །ཆོས་གཅིག་བྱ་བའི་རང་བཞིན་ནི། །གཞི་ཡི་ཀློང་ལས་མཚོན་མེད་ཀྱང་། །རྩལ་ཟེར་ཤེས་རིག་གཅིག་ཅེས་བརྗོད། །རིན་ཆེན་གསལ་དངས་ངང་དངས་དེ། །ཡོད་པ་མ་[542.4]ཡིན་དངོས་པོ་མེད། །མེད་པ་མ་ཡིན་གསལ་ཞིང་རིག །དངོས་མེད་ཡེ་ཤེས་ཟང་ཀ་མ། །མི་སྣང་གསལ་བའི་རང་བཞིན་ཅན། །དེ་ཀ་ཉིད་ལས་གྲོལ་ཞེས་བཤད། །དེས་ན་གཅིག་ཤེས་ཀུན་གྲོལ་ལོ། །ཞེས་གསུངས་[542.5]སོ། །སྒྲོན་མ་བརྩེགས་པའི་རྒྱུད་ལས། །གཅིག་ཤེས་ཀུན་གྲོལ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །གནད་རྣམས་ཁྲོལ་བ་གཅིག་[542.6]ཀུན་ནི། །ཇི་ལྟར་རང་སར་གྲོལ་བར་འགྱུར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །མིང་མེད་ཕྱོགས་བྲལ་ཀུན་ཁྱབ་ཐོག་མའི་གནད། །ཡན་ལག་རྩལ་ཟེར་མིང་འདོགས་ཐ་མའི་གནད། །རྩལ་[543][543.1]༄༅། ཁྲེས་ཟེར་ཐོག་མའི་ཀློང་འདུས་གཉིས་མེད་གནད། །སྔོན་རོལ་ཅང་མེད་ཐོག་མའི་གནད། །གཡོ་བ་གསལ་ཁྱབ་ཐ་མའི་གནད། །སྔོན་རོལ་གསལ་ཐེབས་གཉིས་མེད་གནད། །སྙིང་པོ་ཆོས་ཀྱི་ཐོག་[543.2]མའི་གནད། །འདིར་ནི་རྩལ་ལག་ཐ་མའི་གནད། །སྙིང་པོ་རྩལ་ཐིམ་གཉིས་མེད་གནད། །ཀུན་གཞི་མཁའ་ཀློང་ཐོག་མའི་གནད། །རིག་ཤེས་ཡིད་སེམས་ཐ་མའི་གནད། །དེ་དག་ཀློང་ཐིམ་གཉིས་མེད་གནད། །མ་[543.3]བུ་གཉིས་མེད་དབྱེར་མི་ཤེས། །གནད་རྣམས་མ་ལུས་ཁྲོལ་བར་བཤད། །བྱ་གནད་ནམ་མཁའ་ཉ་གནད་ཆུ། །སྲོག་གནད་སྙིང་ལ་མེ་གནད་རྩེ། །སྣང་གསལ་ཉི་ཟླ་སེམས་གནད་དོན། །རིན་ཆེན་དངོས་མེད་ཀུན་གྱི་[543.4]གཞི། །མི་སྣང་གསལ་བའི་བདག་ཉིད་ཅན། །དོན་གཅིག་ཅང་མེད་ཅིར་ཡང་གསལ། །མི་སྣང་རང་བཞིན་ཡོད་པའོ། །དེས་ན་དངོས་མེད་ཀུན་གྱི་གནད། །གནད་རྣམས་ཐམས་ཅད་དེ་ཡིས་ཁྲོལ། །ཞེས་གསུངས་[543.5]སོ། །སྒྲོན་མ་བརྩེགས་པའི་རྒྱུད་ལས། གནད་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་ཀུན་བཟང་ལ། །བརྡའ་གཅིག་ཤེས་པས་བརྡའ་ཀུན་[543.6]ཁྲོལ། །བརྡའ་ཡི་གནད་དེ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མིང་མ་ཐོགས་པའི་སྔོན་རོལ་ན། །ཅང་མེད་ཐ་སྙད་གང་གིས་ཀྱང་། །མ་གོས་པ་ཡི་བརྡའ་གཅིག་ཡོད། །ཀུན་[544][544.1]གཞ་རྩལ་ཟེར་བར་ཤེད་ན། །ཐམས་ཅད་བསྐྱེད་བསྡུས་བརྡའ་གཅིག་ཡོད། །འོད་རླུད་ཤེས་རིག་བར་ཤེད་ན། །གྱུར་མ་གྱུར་གྱི་བརྡའ་གཅིག་ཡོད། །འཆར་སྒོ་འཁྲུལ་སྒོའི་བར་ཤེད་ན། །ལྡོག་ཐབས་གཉས་ཀྱ་[544.2]བརྡའ་གཅིག་ཡོད། །སངས་རྒྱས་སེམས་ཅན་བར་ཤེད་ན། །བར་ཆད་མེད་པའི་བརྡའ་གཅིག་ཡོད། །མ་རིག་ཡེ་ཤེས་བར་ཤེད་ན། །བར་པར་བྱེད་པའི་བརྡའ་གཅིག་ཡོད། །དབྱིངས་དང་ཡེ་ཤེས་བར་ཤེད་ན། །བར་[544.3]པར་བྱེད་པའི་བརྡའ་གཅིག་ཡོད། །འཁོར་བ་མྱང་འདས་བར་ཤེད་ན། །བར་པར་བྱེད་པའི་བརྡའ་གཅིག་ཡོད། །ཨ་སང་ས་ཀ་རི། ཀུན་འབྱུང་བསམ་ཡས་ཀྱི་ལྷ་ཁང་ན། །བར་རླག་དངོས་མེད་འདོད་མེད་བྱ་བྲལ་[544.4]ལས་ཟིན་ནོ། །ཨ་དྷ་ཐིམ། སིརྙི་ཨ། བརྡའ་དེ་ཤེས་ན་བརྡའ་ཀུན་ཤེས་པར་འགྱུར། །རྣམ་དག་འོད་གསལ་ཆེན་པོའི་ལྷ་ཁང་ན། །བྱ་བྲལ་འདོད་མེད་རླག་པའོ། །བརྡའ་དེ་ཤེས་ན་བརྡའ་ཀུན་ཤེས་པར་[544.5]འགྱུར། །དངོས་མེད་ཟང་ཀ་ཀུན་མཁྱེན་ལྷ་ཁང་ན། །ཅིར་ཡང་མི་སྣང་གསལ་བའི་མེ་ལོང་ཅན། །བརྡའ་དེ་ཤེས་པས་བརྡའ་ཀུན་ཤེས་པར་འགྱུར། །མཁའ་ཀློང་སྒྱི་ཁྱབ་རིན་པོ་ཆེ་ཡི་འོད་ཁང་ན། །རྩོལ་བྲལ་མེ་ལོང་[544.6]ཕྱོགས་མུ་མཐའ་རང་རླག་པོ། །བརྡའ་དེ་ཤེས་ན་བརྡའ་ཀུན་ཤེས་པར་འགྱུར། །འཕེལ་འགྲིབ་མེད་པའི་རྣམ་དག་ལྷ་ཁང་ན། །དངོས་མེད་ཀུན་གསལ་ཉི་ཟླའི་མེ་ལོང་ཅན། །མ་ལུས་རླག་བྱེད་ཀུན་གྱི་སྤྱི་མེས་[545][545.1]པོ། །མུན་སེལ་མེ་གསོད་མཚོ་སྐེམ་རྫ་བར་ལ། །རང་གཅིག་མདུད་ཁྲོལ་ཕྱོགས་འདེབས་ཀུན་སྡུད་ལུབ་ཆུབ་བོ། །དངོས་མེད་ཟང་ཀ་གསལ་དངས་སྤྱི་ཡི་རྗེ། །བརྡའ་དེ་ཤེས་ན་བརྡའ་ཀུན་ཤེས་པར་[545.2]འགྱུར། །འཁྲུལ་ཆོད་མདོ་མེད་ཅོལ་ཆུང་མདོ་བོ་ཆེ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། བརྡའ་གཅིག་ཤེས་ན་བརྡའ་ཀུན་གྲོལ་བར་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ངང་[545.3]དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །རྒྱུད་འདིའི་མཚན་ནི་ཇི་ལྟར་གཟུང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འདི་ལ་མཚོན་མེད་བརྗོད་མེད་ཀྱང་། །འཁོར་གྱིས་མཚན་[545.4]འདི་གཟུང་ཕྱིར་བཤད། །བྱ་བརྩལ་ཆགས་སྡང་བློ་ཆོས་འདུད། །བྱར་མེད་བློ་འདས་ཞེན་གཅོད་རྩི། །དེས་ན་བདུད་རྩིའི་རྒྱུད་དུ་ཟུང་། །སངས་རྒྱས་ཀུན་གྱི་ཐུགས་ཀྱི་བཅུད། །བཀའ་བརྒྱུད་ཀུན་གྱི་བཅུད་འདུས་[545.5]པས། །བཅུད་འདུས་ཆེན་པོའི་རྒྱུད་དུ་བཟུང་། །མ་རིག་འཁོར་བའི་མུན་རུམ་དེར། །སྒྲོན་མ་བརྩེགས་པས་སེལ་བར་བྱེད། །སྒྲོན་མ་བརྩེགས་པའི་རྒྱུད་དུ་ཟུང་། །ཐེག་པ་མ་ལུས་གཉའ་གཅོག་ཕྱིར། །གཉའ་[545.6]གཅོག་སྤྱི་ཏི་བྱ་བར་ཟུང་། །ཐེག་པ་ཀུན་ལས་ལ་ཟླེའི་ཕྱིར། །ལ་ཟློ་ཆེན་པོའི་རྒྱུད་དུ་ཟུང་། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། མཚན་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་[546][546.1]ངང་དངས་ཁྱེའུ་ཆུང་གིས། །རྒྱུད་འདི་གཏད་པའི་གང་ཟག་གང་། །ཞུས་པས། སྟོན་པས་འཁོར་ལ་བཀའ་སྩལ་པ། །དད་དང་དམ་ཚིག་ཤེས་རབ་དང་། །བརྩོན་འགྲུས་བརྩེ་གདུང་གཏོང་ཕོད་ཆེ། ཁུད་བཟང་བརྩོན་[546.2]ལྡན་བློ་ཆེ་མྱུར། །བླ་མ་སྙིང་ལ་སེམས་པ་དང་། །མན་ངག་སྲོག་བཞིན་འཚོ་བ་ལ། །དགུ་རྩེ་སྤྱི་ཏིའི་རྒྱུད་འདི་གཏད། །ཉོན་མོངས་མ་རིག་སེར་སྣ་དང་། །ལེ་ལོ་ལོག་ལྟ་ང་རྒྱལ་ཆེ། །དམ་མེད་རྒྱུད་ངན་གྲོགས་མཆེད་[546.3]བསླུ། །ཆེ་ངག་དགེ་སྨོད་གཡོ་སྒྱུ་ཅན། །དེ་ལྟ་བུ་ལ་བྱིན་གྱུར་ན། །བེའུ་སྦྲེལ་གཡང་ལ་བསྒྱུར་བ་བཞིན། །གཉིས་ཀ་རྡོ་རྗེ་དམྱལ་བར་འགྲོ། །དེ་བས་སྣོད་ལྡན་གདམས་པའི་རྒྱ། །ཞེས་གསུངས་སོ། །སྒྲོན་མ་[546.4]བརྩེགས་པའི་རྒྱུད་ལས། སྣོད་བཟང་ངན་གྱི་ཁྱད་པར་བསྟན་པའི་རྒྱུད་གཏད་པའི་གནད་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་ངང་དངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་[546.5]ལ། །རྒྱུད་འདི་འབྱུང་དུས་གང་གི་ཚེ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྒྱུད་འདི་འབྱུང་བའི་དུས་སུ་ནི། །དུས་ངན་ཡུལ་དབུས་བསྟན་པ་དམའ། །བདུད་དང་ལོག་ལྟ་མུ་སྟེགས་དར། །སྡེ་[546.6]ཞབྲུགགནས་གཞི་འཐབ་རས་བསྐོར། །ནང་རྒྱས་ཆེ་བཙུན་དུག་ལ་སྦྱོར། །བཙུན་ཆེན་ཆུང་མ་ལེན་པ་དང་། །བཙུན་མས་བུ་ཆུང་གསོ་བ་དང་། །དགེ་སློང་ཚོང་ཁེ་བྱེད་པ་དང་། །མི་ཐུབ་རྣམ་གསུམ་བྱུང་དུས་ན། །དེ་[547][547.1]དུས་ང་ཡི་རྒྱུད་འདི་འབྱུང་། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། བསྟན་པ་འབྱུང་དུས་བསྟན་པའི་ལེའུ་སྟེ་ཉེར་གཉིས་པའོ།། །།རྒྱུད་ཐམས་ཅད་ཀྱི་རྩེ་རྒྱལ་བདུད་རྩི་[547.2]བཅུད་ཐིགས་སྒྲོན་མ་བརྩེགས་པའི་རྒྱུད་རྫོགས་སོ།། །།ཨུ་རྒྱན་པདྨས་བཤད་ལོསྣྲོ་བ་སྐ་བ་དཔལ་བརྩེགས་ཀྱིས་བསྒྱུར་རྒྱལ་པོ་ཁྲི་སྲོང་ལྡེའུ་བཙན་ལ་གདམས་སོ། །གཏེར་རྒྱ། ཟབ་རྒྱ། སྦས་རྒྱ། ཊ་ཊ་[547.3]རྒྱ།། །། རྒྱ་གར་སྐད་དུ། ཧྲི་ད་ཡ་སུ་ར་རྭ་ཤི་ག་ག་ནཱ྅་བརྟ་བིསྟུ་ར་ཏནྟྲ། བོད་སྐད་དུ། སྙིང་པོ་བཅུད་སྤུངས་ནམ་མཁའ་ཀློང་ཡངས་ཀྱི་རྒྱུད། སྔོན་གནས་ཡེ་ཐོག་མའི་སངས་རྒྱས་ལ་