volume 026 600
༄༅། །རྨི་ལམ་ཉི་ཟླ་སྒོ་འབྱེད་བཞུགས་སོ། །
« རྨི་ལམ་ནམ་མཁའ་སྒོ་འབྱེད་ནི། བསགས་སྦྱང་ལས་དང་བག་ཆགས་འདུན་པས་རྨི་ལམ་བཟུང༌། །ཞེས་པས། དེ་ལ་གསུམ་སྟེ། སྔོན་དུ་བསགས་སྦྱངས་ལ་འབད་པ། ཉིན་མོ་བག་ཆགས་གོམས་སུ་གཞུགས་པ། གཉིད་ལ་འགྲོ་ཁར་འདུན་པ་བཏང་བའོ། །དང་པོ་རྨི་ལམ་འཛིན་པའི་དུས་སུ། ཞག་བདུན་གྱི་གོང་ནས་ཚོགས་དང་མཆོད་པ་དང༌། གཏོར་མ་བཤམས་ལ། བླ་མ་ལ་རྨི་ལམ་ཟིན་པའི་གསོལ་བ་དྲག་ཏུ་གདབ། དཀོན་མཆོག་ལ་མཆོད་པ་ཕུལ། ཆོས་སྐྱོང་ལ་གཏོར་མ་བཏང༌། མཁའ་འགྲོ་ལ་ཚོགས་འཁོར་བསྐོར་ལ་རྨི་ལམ་ཟིན་པར་གསོལ་བ་འདེབས། ཡི་གེ་བརྒྱ་པ་བཟླ། ཉིན་མོར་བག་ཆགས་གོམས་སུ་གཞུག་པ་ནི། ཉིན་མོའི་དུས་སུ་འགྲོ་འདུག་སྤྱོད་ལམ་ལ་སོགས་པ་གང་བྱེད་ཀྱང༌། རྨི་ལམ་ཡིན། བདེན་པ་ཡང་དག་པ་མ་ཡིན་སྙམ་པར་བྱ། ཉིན་མོའི་བྱ་བ་ཐམས་ཅད་རྨི་ལམ་དུ་ཤེས་ན། མཚན་མོའི་རྨི་ལམ་ཟིན་པ་ལ་ཚེགས་མི་འབྱུང་ངོ༌། ། གཉིད་དུ་འགྲོ་ཁར་འདུན་པ་བཏང་བ་ནི། མཚན་མོའི་དུས་སུ་རང་ཡི་དམ་དུ་སྒོམ་པའི་མགྲིན་པར་པདྨ་དམར་པོ་འདབ་མ་བཞི་པ་ཞིག་བསྒོམ། དེའི་ལྟེ་བར་བླ་མའི་སྐུ་ཚོན་གང་བ་ཞིག་བསྒོམ། དེའི་ཐུགས་ཀའི་ཧཱུཾ་ལ་དམིགས་པ་གཏད་ལ། དུས་དོ་ནུབ་རྨི་ལམ་ཟིན་པར་བྱའོ་སྙམ་པའི་འདུན་པ་དྲག་པོ་ཡང་དང་ཡང་དུ་གཉིད་ལ་མ་སོང་གི་བར་དུ་བྱའོ། །དེ་ནས་གཉིད་དུ་སོང་བ་དང༌། ཡུད་ཅིག་བརྒྱལ་འགྲོ །བརྒྱལ་སངས་པ་དང་རྨི་ལམ་ཟི་ལོངས་སེར་འགྲོ །དེ་ཤར་བ་དང༌། སྔར་གྱི་ཉམས་ལེན་གྱི་རྟེན་འབྲེལ་གྱིས། རྨི་ལམ་ཟིན་པར་འབྱུང་སྟེ། ང་གཉིད་དུ་སོང་འདུག་རྨི་ལམ་ཡིན་པར་འདུག་སྙམ་པ་འབྱུང༌། དེ་ཙ་ན་འོད་གསལ་གཟུང་བར་བྱ་སྟེ། འོད་གསལ་ནི་རིག་པ་སྟོང་གསལ་འཛིན་མེད། བདེ་སྟོང་ཟུང་འཇུག་གི་ངང་དུ་ཙེན་གྱིས་བཞག་པས། དེ་རིང་ཉིན་མོའི་བསྒོམ་དེ་དོ་ནུབ་གཉིད་ཁུང་དུ་འོང་སྟེ། རིག་པ་གསལ་སྟོང་མཐའ་དབུས་མེད་པ་དེའི་ངང་ལ་བཞག་པས། ཉིན་མོའི་སྒོམ་དེ་དོ་ནུབ་གཉིད་དུ་སོང་བའི་དུས་སུ་འབྱུང་སྟེ། དེ་ནི་འོད་གསལ་གྱི་ངོ་བོ་ཡིན་པས། གཉིད་ལྷངས་ཀྱིས་སད་པ་དང༌། ཤེས་པ་སྒོམ་ཐོག་ཏུ་ཙེན་གྱིས་གནས་པ་འབྱུང༌། གལ་ཏེ་ནུབ་དང་པོ་ལ་མ་བྱུང་ན། གཉིས་པ་དང་གསུམ་པ་ལ་སོགས་པ་ཞག་བདུན་ནམ། བཞི་བཅུ་ཞེ་དགུའི་བར་དུ་ཡང་ཉམས་སུ་བླང་བར་བྱའོ། །ཆང་དང་སྒོག་པ་མི་ཟ། གོས་སྐྱི་ཆགས་མི་བགོ །གྲོགས་སྡིག་ཅན་དང་མི་འགྲོགས་སོ། །རྨི་ལམ་ཉི་ཟླ་སྒོ་འབྱེད་རྫོགས་སོ།། །།«ཀུན་མཁྱེན་དྲི་མེད་པས་མཛད་པའོ། །དགེའོ། «མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༢༦༽»- PAGE 44 -- PAGE 43 -