volume 013 408
༄༅། །བསྡུ་སྒྲིག་གསལ་བཤད། ཕན་བདེའི་འབྱུང་གནས་རྒྱལ་བསྟན་རིན་པོ་ཆེ་སྤྱི་དང༌། ཁྱད་པར་སྔ་འགྱུར་འོད་གསལ་རྡོ་རྗེ་སྙིང་པོའི་རིང་ལུགས་ཡོངས་སུ་གསལ་བར་མཛད་པའི། ཀུན་མཁྱེན་ཀློང་ཆེན་པ་ཆེན་པོའི་ཞལ་སྐྱིན་ནམ། མཁྱེན་རྟོགས་དགོངས«་»སྤྱོད་ཀྱི་ འདྲ་འབག །ཕྱི་དང༌། ནང་དང༌། དེ་ཁོ་ན་ཉིད་གནས་གསུམ་དུ་རྣམ་པར་གཞག་པའི་གསུང་རབ། མཛོད་ཆེན་བདུན། སྙིང་ཐིག་ཡ་བཞི། ངལ་གསོ་སྐོར་གསུམ། མུན་སེལ་སྐོར་གསུམ་སོགས་གསར་རྙིང་གི་ཆོས་བཀའ་དྲི་མ་མེད་པ་རྣམས་ཚུལ་བཞིན་བསྡུ་བསྒྲིག་འགྲེམས་སྤེལ་ཞུ་བ་སྟེ། དེ་ཡང་མཛོད་བདུན་དང་མུན་སེལ་སྐོར་གསུམ་སོགས་ནི་བླ་རུང་ནང་བསྟན་སློབ་གླིང་ནས་གསར་བསྐྲུན་ཇི་བཞིན་སོར་བཞག་དང༌། སྙིང་ཐིག་ཡ་བཞི་དང༌། ངལ་གསོ་སྐོར་གསུམ་སོགས་ནི་སྡེ་དགེའི་པར་མ་མ་ཕྱིའི་གཙོ་བོ་ལ། མི་གསལ་བ་དང་དོགས་གནས་མཆིས་པ་རྣམས། ཨ་འཛོམས་པར་མར་དག་བསྡུར་ཞུས་ཏེ་ཅུང་ཟད་མི་མཚུངས་པ་དག «(<»ཨ«>»མི་འདྲ་བའི་ཡིག་འབྲུ«)»གུག་རྟགས་འདིའི་ནང་བཅུག་ཡོད། འགྲེལ་མཆན་ཡོད་རིགས་རྣམས་ཤིང་པར་ཇི་བཞིན་གློག་ཀླད་འདིར་འཁྲིད་སྟབས་མ་བདེ་བས་དཀྱུས་ཚིག་དང་ཕྲེང་གྲལ་གཅིག་ཏུ་བཀོད་དེ་འགྲེལ་བྱེད་དུ་གང་འགྲོ་འགྲོའི་སྔ་བསྣུར་ཕྱིར་འཐེན་ཅུང་ཟད་རེས་དཀྱུས་མཆན་རྩིང་ཞིབ་སོ་སོར་ཕྱེས་ཡོད། ལྡེབ་བཟོ་དང་དཔེ་དེབ་ཀྱི་དུམ་མཚམས་ཀྱང་གཙོ་བོ་སྡེ་དགེ་དང་ཨ་འཛོམས་པར་མ་གཉིས་ལས་ཆེ་ཆུང་འཚམས་པ་ཕྱི་མ་ལ་གཞིར་བྱས། བི་མ་སྙིང་ཐིག་དང་མཁའ་འགྲོ་སྙིང་ཐིག་ལྟ་བུའི་སྡེ་ཚན་རང་རང་གི་ནང་ཕན་ཚུན་གྱི་ལེ་ཚན་འགའ་རེ། མ་ཕྱིའི་པོད་དུམ་ལས་ཡར་བསྣན་མར་དབྲིས་པོད་དུམ་ཆེ་ཆུང་སྙོམས་ཐབས་བྱས་ཡོད། དཔེ་དེབ་ཐམས་ཅད་ཀྱི་མགོར་ཆོས་ཚན་སོ་སོར་གཟིགས་པ་སྟབས་བདེའི་དཀར་ཆག་ལྡེབ་གྲངས་ད་ལྟའི་དཔེ་དེབ་སྤྱི་འགྲོས་ཙམ་ལས་གཞུང་ངོ་མར་མ་དཔེ་སོར་འཇོག་ལས་དཔེ་གསར་འགའ་ཞིག་ལྟར་གྱི་ལྷད་འཛུད་གསར་པ་གང་ཡང་བྱས་མེད། དེ་དག་ལས་གཞན་དུས་རྐྱེན་འཕོ་འགྱུར་ཅི་རིགས་པས། གང་ཐོད་ཐོད་དུ་འཐོར་གྱར་སོང་ནས་མ་ཕྱི་རེ་རེ་ཙམ་རྙེད་པའི་དཔེ་དཀོན་དང༌། དོ་དམ་དཔེ་མང་གི་མཛོད་དུ་བསྐྱིལ་བའི་རྙེད་འཚོལ་དཀའ་བ་རྣམས་ཀྱང་གང་ནུས་ཅི་ལྕོག་གིས། འགྲོ་སོང་དང་ངལ་བ་ལ་མ་འཛེམས་པར་བཙལ་འཚོལ་བགྱིས་ཁུལ་དུ། རྒྱ་ཆེའི་ཆོས་ལུགས་ལས་རིགས་མི་སྣ་དང༌། གཞོན་སྐྱེས་རིག་གནས་ལྷུར་ལེན་པ་ཚོའི་བསམ་བློའི་དཔལ་ཡོན་དང༌། ཐམས་ཅད་ཞི་བདེ་འཆམ་མཐུན་གྱི་གྲོགས་སུ་འགྲོ་བ་སོགས་མདོར་ན་ད་ལྟའི་སྤྱི་ཚོགས་འདི་ལ་ཕན་དུ་རེ་བ་དང༌། རིན་ཐང་ཆེ་བའི་དཔེ་རྒྱུན་འདི་ཉིད་ཚང་ལ་མ་འཐོར་བ། མ་འོངས་མི་རབས་ཕྱི་མར་ཡུན་དུ་གནས་པའི་རྐྱེན་གྲོགས་སུ་འགྱུར་ན་སྙམ་པའི་རེ་འདུན་གྱིས། རྩིས་འཕྲུལ་གྱི་པར་གཞིར་བཅུག་སྟེ་འགྲེམས་སྤེལ་ཞུས་པ་ལགས་ན། རྒྱ་ཆེའི་གཟིགས་པ་པོ། བློ་དཀར་གཞུང་དྲང་གི་གཟུར་གནས་དཔྱོད་ལྡན་རྣམས་ཀྱིས་ལེགས་སྤེལ་ཉེས་འགོག་གི་རོག་འདེགས་ཅི་ལྕོག་གང་འོས་གནང་བ་ཐུགས་རྗེ་ཆེ་ཞུ། བོད་ལྗོངས་དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་ནས་འགྲོ་འདུལ་རྡོ་རྗེས་ཟླ་༡༠པའི་ཚེས་བཟང་པོར་ཕུལ་བ་དགེ། །།«བསྡུ་སྒྲིག་གསལ་བཤད།«བསྡུ་སྒྲིག་གསལ་བཤད།»- PAGE 2 -- PAGE 3 -- PAGE 1 -