volume 010 301
༄༅། །རྟེན་པ་སྒོའི་གེགས་སེལ་སྒྲོན་མ་« »སྣང་བྱེད་བཞུགས་སོ།« །
» «སྐྱེ་མེད་མཁའ་ལ་ཐུགས་རྗེའི་སྤྲིན་འཁྲིགས་པས། །འགྲོ་བའི་ནད་གསོ་སྨན་པའི་རྒྱལ་ལ་འདུད། །སྒོ་ཡི་གནད་ལས་ཡེ་ཤེས་འཆར་བས་ན། །དེ་ཡི་གེགས་སེལ་སྒྲོན་མ་གསལ་བྱེད་བྲི། །ཆོས་ཉིད་འོད་གསལ་གྱི་དགོངས་པ་ནི། ཐུགས་ཀ་དཔལ་གྱི་བེའུའི་བུམ་པ་ན་གནས་པ་ལས་རྩ་ལམ་དར་དཀར་གྱི་སྐུད་པ་ནས། རྒྱང་ཞགས་ཆུའི་སྒྲོན་མ་གསལ་བའི་ཕྱིར། སྒོའི་གནད་མིག་ཡིན་པས་དེ་བཅོམ་པའི་ཐབས་ལ་འབད་པར་བྱ་བ་ལ་གཉིས་ལས། དང་པོ་ནང་གི་སྨན་སྦྱར་བ་ནི། ཟླ་བ་ཕྱེད་པའི་མིག་སྨན་བསྟན་པ་སྟེ། རྩ་ཨ་ཝ། སྔོ་རྟག་ཏུ་ངུ༌། གོ་སྙོད་པ་ལྕ་བ། ར་མོ་ཤག་གི་རྩ་བ་རྣམས་ཞིབ་པར་བརྡུངས་ཏེ། བ་གསར་གྱི་འོ་མ་ཕུལ་བཅུ་དྲུག་གི་ནང་དུ་ཐིམ་པར་གདུས་ལ་ཚ་ཤས་ཆེ་ན་བཟང་དྲུག་དང༌། གྲང་ཤས་ཆེ་ན་བུར་དཀར་དང༌། སྙོམས་ན་སེང་ལྡེང་དང་ཙནྡན་དཀར་དམར་དྲུག་ཁྱོར་གང་ཙམ་བཏབ་ནས་མཛོ་མོའམ་བ་གསར་གྱི་ཞུན་མར་གྱི་སྲང་ལོ་གྲངས་ཙམ་དུ། བྱ་མོ་ནག་མོའི་སེར་སྒོང་སྦྱར་བའི་སྨན་མར་ཐུར་མགོ་རེ་ཚེས་བཅུ་དྲུག་གི་ཐོ་རངས་བཞིན་ཟོས་པས། མིག་གསལ་ཞིང་འགྲིབས་པའང་ཕྱེད་པ་ཡིན་ནོ། །ཕྱིས་མིག་ལ་ནད་གང་ཡང་མི་འབྱུང་ ངོ༌། །ཡང་རྩ་ཨ་ཝ། རྟག་ཏུ་ངུ༌། ཅོང་ཞི། བྲག་ཞུན། སྦྲུལ་སྔོ་ཁྲའི་ཤ། འབྲས་བུ་གསུམ། དོམ་འཁྲིས། དྲེའུའི་མཁྲིས་པ། མིའི་མཁྲིས་པ། འུག་པའི་མཁྲིས་པ། ཁྱི་ནག་གི་མཁྲིས་པ། རྟ་ནག་གི་མཁྲིས་པ་རྣམས་སྨན་སྦྲང་དང་སྦྱར་ཏེ་རིལ་བུའམ། སྨན་མར་ཤ་རིལ་ཙམ་རེ་ལྟོ་སྟོང་ལ་ཟོས་ན་ཤའི་སྤྱན་དང་ལྡན་ཞིང་རི་བྲག་ལ་སོགས་པ་ཟང་ཐལ་དུ་མཐོང་ཞིང༌། རྡོ་རྗེ་ལུ་གུ་རྒྱུད་གསལ་བར་འགྱུར་རོ། ། གཉིས་པ་ནི་ཕྱིའི་སྨན་བྱུག་ཅིང༌། སྔགས་དང་རྟེན་འབྲེལ་གྱིས་བཅོས་པའི་ཐབས་ལ། ཤ་འཛེར་ལ་ལྟོ་སྟོང་ལ་ཟན་དྲོན་མར་ཅན་གྱི་རླང་པས་མིག་ལ་བདུགས་ལ། ཨཱོཾ་སྲིན་ལོང༌། ཞེས་ཉེར་གཅིག་བཟླས་ཏེ་ཁར་བཅུག་པས་སེལ་ལོ། །ལིང་ཐོག་ལ། གླ་རྩི། ཀ་ར། ཅུ་གང༌། ཞུན་ཐིག་ལེ་རྣམས་རྩི་བཞིན་བཏགས་ལ། ཁ་མིག་རེ་ཙམ་གདབ་ཅིང༌། ཨཱོཾ་ལྷིང་ལྷིང་ཐོག་ཐོག་ཨ་ཙ་ལི་སྭཱ་ཧཱ། ཞེས་བརྒྱ་རྩ་བརྒྱད་བཟླས་པའི་མཆིལ་མ་ལྕེ་རྩེ་ན་ཕུག་རོན་གྱི་དང་རུས་བླངས་ལ་ལིང་ཐོག་གི་སྟེང་དུ་བྱུགས་པས། དཀར་ཉིལ་སྤྲིས་བཞིན་བྱུང་བ་ཕུག་རོན་དང་རུས་འཕྱག་གོ །མིག་ཏུ་རྡུལ་དང་གྲམ་སོང་ན། ཨཱོཾ་ཡ་མ་དན་ཏིང་སྭཱ་ཧཱ། ཞེས་ཉེར་གཅིག་གདབ་པས་ཕྱིན་ནོ། །སྐམ་ཚག་དང༌། དམར་ཚག་དང༌། སྐྱ་རིབ་ལ། རག་ཐལ་དང༌། ཐོད་ལེ་ཀོར་ཞིབ་མོར་བྱས་པ་འོ་སྤྲིས་དང་སྦྱར་ཏེ་བྱུགས་པས་སེལ་ལོ། །དགོང་མོ་ཉལ་དུས་ལྟེ་ཁུང་དུ་མར་གྱིས་མཉེས་ན་སྐམ་ཚག་དང་མཆུ་རེངས་པ་སེལ་ལོ། །གོ་སྙོད་དང་གླ་རྩི་ཆུས་དགོང་མོ་ལྟེ་ཁུང་དུ་བྱུགས་ན་མིག་གསལ་ཞིང༌། གངས་ལ་ཕྱིན་ཀྱང་མིག་ཕྱེད་པར་མི་འགྱུར་རོ། །རྒྱུན་དུ་ནམ་ཞོགས་ལག་མཐིལ་གཉིས་ཀྱིས་མིག་འཕུར་ནས་ཆུ་གཙང་མར་མིག་ལ་འདེབས་ཐབས་སུ་ཁྲུས་བྱས་ན། མིག་གི་སྒྲིབ་ཤ་བཅད་ཅིང་བཀྲུས་པ་ཞེས་བྱ་སྟེ། སྐྱ་རིབ་མི་འབྱུང་ཞིང་གསལ་ལོ། །འོ་མ་དང་སྐྱེར་བའི་ཁན་དྷ་དང༌། གཟི་རྙིང་ནག་ཁྲའི་ཕྱེ་མ་དང༌། བྱ་མོ་ནག་མོའི་སེར་སྒོང་བཞི་སྦྱར་ཏེ། ཚེས་གཅིག་དང༌། གནམ་གང་དང༌། ཉའི་ཐོ་རངས་བཞིན་དང་པོར་ཆུ་གྲང་གིས་མིག་དང༌། གདོང་བཀྲུས་ནས་སྨན་བྱུགས་ཏེ། འོ་སྐོལ་དུ་ཤིང་མངར་བཏབ་ལ་འཐུང་ན། མིག་མི་འགྲིབ་ཅིང་འོད་སྣང་གསལ་བར་འཆར་རོ། །རྡོ་སྤུར་ལན་དང༌། སྦྲང་དཀར་སྦྱར་ཏེ་བྱུགས་ན། སྐྱ་རིབ་དང་འགྲིབས་པ་ཀུན་སེལ་ལོ། །ཤེལ་དང༌། ཐོད་ལེ་ཀོར་དང༌། ག་པུར་དང༌། གླ་རྩི་རྣམས་ཀྱི་ཕྱེ་མ་ཁྱེའུ་ནུ་འཐུང་གི་འོ་མ་དང་སྦྱར་ཏེ་བྱུགས་པས། འོད་སྣང་མཆེད་པ་རྒྱ་ཆེར་འགྱུར་རོ། །རྡོ་སྨུག་པོ་སྦལ་རྒྱབ་དང༌། རམས་པའི་རྩ་བ་དང༌། པུ་ཤེལ་རྩེ་དང༌། ཞུན་ཐིག་ལེ་དང༌། ས་རམ་རྩི་དང༌། ལྕགས་ཕྱེ་དང༌། ག་བུར་རྣམས་ཆ་མཉམ་པ་རྩི་བཞིན་བྱས་ཏེ། བུ་ཁྱེའུ་ནུ་འཐུང་གི་འོ་མ་དང་སྦྱར་བ་ཐིགས་པ་རེ་བླུགས་ན། ཞག་བདུན་གྱི་མིག་འགྲྀབས་པ་ཀུན་ཕྱེད་ དོ། །བ་ནག་མོའི་ཆུ་བྲེ་གསུམ་གདུས་པ་ཕུལ་གང་དུ་སོང་བར། གླ་རྩི། ལྕགས་ཕྱཻ་དོམ་མཁྲིས། ཀ་ར་རྣམས་སྦྱར་ཏེ་ཁན་དྷ་བྱས་ཏེ་ཐིགས་པ་རེ་བླུགས་ན་འགྲིབ་པ་དང༌། སྐྱ་རིབ་ཐམས་ཅད་སེལ་བར་བྱེད་དོ། །སྤྱོད་ལམ་ཐམས་ཅད་དུ་དྲག་ཤུལ་དང༌། མི་ཐེག་པ་འདེགས་པ་དང༌། ཁམས་ཉམས་པ་རྣམས་སྤང་ལ། དགོང་མོ་སྐབས་སུ་ལྟག་ཁུང་དུ་མར་གྱིས་བྱུགས་ནས་མཉེ་བ་དང༌། འོ་མ་སྐོལ་བ་ལྟོ་སྟོང་ལ་གཏང་པ་དང་ཨ་རུ་ར་རྒྱ་གར་མ། གོ་སྙོད། རྩ་ཨ་ཝ། རྟག་ཏུ་ངུ༌། སྦྲུལ་ཤ་རྣམས་སྦྲང་དཀར་ཆུ་བཅད་དུ་སྦྱར་ལ། ཤ་རིལ་ཙམ་རེ་ལྟོ་སྟོང་ལ་ཟོས་ནས་ཁྲུས་བྱས་ན། མིག་བྱིས་པ་ལོ་བརྒྱད་པ་ལྟར་གསལ་ཞིང་ཤེད་སྐྱེ་བ་ཡིན་ནོ། །སྲིན་བུ་མེ་ཁྱེར་དང༌། ལྷང་མ་ལྷང་ཚེར་དང༌། བྱ་མོ་ནག་མོའི་སེར་སྒོང་བསྲེས་པ་མིག་གི་སྟེང་དུ་བྱུགས་ལ། ཨཱོཾ་ཆེན་ཀོང་ཆེན་བྷཧ་ན་ཞུ་ཆེན་ཞུ། ཧ་ནགྷ་མེ་སྟོན་ཡཾ། ཞེས་འབུམ་བཟླས་པ་ན་ཡེ་ཤེས་ཀྱི་སྤྱན་གསལ་བས། འོད་སྣང་སྣ་ཚོགས་སུ་འཆར་ཞིང༌། འོད་སྐོང་ཕོར་བ་ཙམ་འཆར་བར་འགྱུར་རོ། རྫས་མེད་ཀྱང་ཞལ་རེ་བཞིན་བརྒྱ་རྩ་རེ་བཟླས་ན་སྣང་བ་གོང་འཕེལ་དུ་འཆར་རོ། །དེ་ལྟར་སྣ་ཚོགས་ཟབ་མོའི་ཐབས་མང་པོས། །སྒྲོན་མ་གསལ་བྱེད་ཡེ་ཤེས་གོང་འཕེལ་བ། །ཕྱི་རབས་དོན་དུ་ཡི་གེར་བཀོད་པ་ དེས། །འགྲོ་ཀུན་ཡེ་ཤེས་སྤྱན་དང་ལྡན་པར་ཤོག» «།བླ་མ་ལས་རྙེད་རང་གིས་མྱོང་བའི་གནད། །འཕྱུགས་མེད་ལག་ཁྲིད་རབ་ཏུ་གསལ་བ་འདི། །མངོན་སུམ་དོན་ལ་བལྟ་བའི་གྲོགས་ཡིན་པས། །མེད་དུ་མི་རུང་གུས་པས་གཅེས་སྤྲས་གྱིས། །རང་གཞན་སྒྲོན་མ་འདི་ཡིས་གསལ་བྱེད་ཅིང༌། །མྱུར་དུ་འོད་གསལ་དགོངས་པ་མཐར་ཕྱིན་འགྱུར། །དེ་བས་ཐབས་འདི་སྙིང་བཞིན་གཅེས་པར་ཟུང༌། །དེ་ལྟར་བཀོད་པས་འོད་གསལ་ཆེས་གསལ་ཤོག» «།གསང་བ་སྙིང་ཏིག་གི་གནད་ལས། །རྟེན་པ་སྒོའི་གེགས་སེལ། སྒྲོན་མ་གསལ་བྱེད་ཅེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ། །དགེའོ། དགེའོ། དགེའོ།། །།«མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༡༠༽རྟེན་པ་སྒོའི་གེགས་སེལ་སྒྲོན་མ་སྣང་བྱེད།»- PAGE 148 -
- PAGE 149 -- PAGE 146 -