Property:CyzVerseText
Jump to navigation
Jump to search
This property stores the Tibetan text of a verse.
C
།དངོས་དང་དངོས་མེད་དབྱིངས་སུ་མཉམ་པ་དང༌།།སངས་རྒྱས་སེམས་ཅན་དབྱིངས་སུ་མཉམ་པ་དང༌།།ཀུན་རྫོབ་དོན་དམ་དབྱིངས་སུ་མཉམ་པ་དང༌།སྐྱོན་དང་ཡོན་ཏན་དབྱིངས་སུ་མཉམ་པ་དང༌།།མཐོ་དམན་ཕྱོགས་མཚམས་དབྱིངས་སུ་མཉམ་པའི་ཕྱིར།།རང་བྱུང་ངང་ལས་རོལ་པ་ཅི་ཤར་ཡང༌།།ཤར་བའི་དུས་ན་མཉམ་ཤར་བཟང་ངན་མེད།།དེ་ལ་བླང་དོར་གཉེན་པོས་བཅོས་ཅི་དགོས།།གནས་པའི་ཚེ་ན་མཉམ་གནས་བཟང་ངན་མེད།།ད་ལྟ་སེམས་ལས་གང་བྱུང་རང་ཞིར་གློད། +
།ཐམས་ཅད་གཞི་ཀློང་བྱང་ཆུབ་སེམས་ཉིད་ལས།།རྩལ་དང་རོལ་པའི་འཆར་ཚུལ་མ་ངེས་པས།།མཉམ་པར་ཤར་ཡང་གདོད་མའི་ཀློང་ནས་ཤར།།མི་མཉམ་ཤར་ཡང་མཉམ་པའི་དབྱིངས་ནས་ཤར།།མཉམ་པར་གནས་ཀྱང་རང་གཞག་ཆོས་ཉིད་ངང༌།།མི་མཉམ་གནས་ཀྱང་མཉམ་པའི་དབྱིངས་ན་གནས།།མཉམ་པར་གྲོལ་ཡང་རང་བྱུང་ཡེ་ཤེས་ཀློང༌།།མི་མཉམ་གྲོལ་ཡང་མཉམ་པའི་དབྱིངས་སུ་གྲོལ། +
།ཐམས་ཅད་ཡེ་མཉམ་རང་བྱུང་རིག་པ་ལ།།ཤར་དང་མ་ཤར་དབྱིངས་ལ་ཡེ་ནས་མེད།།གནས་དང་མི་གནས་དབྱིངས་ལ་ཡེ་ནས་མེད།།གྲོལ་དང་མ་གྲོལ་དབྱིངས་ལ་ཡེ་ནས་མེད།།གྲོལ་དང་མ་གྲོལ་དབྱིངས་ལ་ཡེ་ནས་མེད། +
།མི་གཡོ་མཉམ་པ་ཆེན་པོའི་རིག་པ་ལ།།ཤར་བའི་དུས་ན་རང་ཤར་རང་ས་ཟིན།།གནས་པའི་དུས་ན་རང་གནས་རང་ས་ཟིན།།གྲོལ་བའི་དུས་ན་རང་གྲོལ་རང་ས་ཟིན། +
།མི་འགྱུར་སྤྲོས་དང་བྲལ་བའི་རིག་པ་ལ།།ཤར་བ་ཡེ་ཤར་གནས་པ་ཡེ་གནས་ལ།།གྲོལ་བ་ཡེ་གྲོལ་ནམ་མཁའི་རང་བཞིན་ནོ། +
།ཤར་གནས་གྲོལ་གསུམ་ཤར་གྲོལ་རྒྱུན་ཆད་མེད།།རྒྱུན་ཆད་མེད་པས་རྒྱུ་འབྲས་བར་མ་ཆོད།།རྒྱུ་འབྲས་མེད་པས་འཁོར་བའི་གཡང་ས་ཆོད།།གཡང་ས་མེད་པས་གོལ་ས་ག་ལ་ཡོད། +
།ཡུལ་ཀྱང་མི་དགག་སེམས་ཀྱང་མི་གཟུང་བར།།རང་བཞིན་ལྷུན་གྲུབ་ངང་ལས་མི་གཡོ་ན།།ཀུན་བཟང་ཡངས་པ་ཆེན་པོའི་དགོངས་པའི་ཕྱིན། +
།ཡེ་ནས་མི་འགྱུར་ཀུན་ཏུ་བཟང་པོའི་ཀློང༌།།འཕོ་འགྱུར་མེད་པ་རྡོ་རྗེ་སེམས་དཔའི་ཀློང༌།།གནས་ལུགས་རང་ངོ་ཤེས་པ་ཙམ་ཉིད་ལ།།སངས་རྒྱས་ཞེས་སུ་མིང་འདི་བཏགས་པར་ཟད། +
།འདི་ཉིད་རྟོགས་ནས་བླང་དོར་ཆོས་མེད་པས།།ཐམས་ཅད་ཆོས་ཉིད་གཅིག་ཏུ་ཕྱམ་གདལ་བ།།གསེར་གླིང་ལྟ་བུར་དབྱེ་བསལ་མེད་པ་ཡིན།།མཐའ་ཡིས་མ་རེག་གོལ་སྒྲིབ་གདར་ཤ་ཆོད།།གཡང་ས་མེད་པའི་བྱང་ཆུབ་སེམས་ཉིད་ལ།།འབད་རྩོལ་མེད་པའི་སྐུ་གསུམ་ལྷུན་རྫོགས་ཀྱང༌།།བསམ་བརྗོད་འདས་ཤེས་མིང་ཙམ་བརྗོད་པར་ཟད། +
།སྣང་བ་རྒྱ་ཡན་རིག་པ་རང་བྱུང་གསལ།།མ་བསྒྲིབས་ཕྱི་ནང་མེད་པར་ཟང་ཐལ་བས།།མ་བཅོས་རྣལ་གཞག་ཆོས་ཉིད་ཆེན་པོར་གསལ།།བློ་བདེའི་མལ་ན་ལུས་སེམས་ཁོང་གློད་དེ།།ཤེས་པ་བག་ཡངས་བྱར་མེད་སྐྱེས་བུ་བཞིན།།སྒྲིམས་གློད་མེད་པར་ལུས་སེམས་གང་བདེར་གཞག +
།ཇི་ལྟར་འདུག་ཀྱང་རང་གི་ངང་ལས་འདུག།ཇི་ལྟར་གནས་ཀྱང་རང་གི་ངང་ལ་གནས།།ཇི་ལྟར་འགྲོ་ཡང་རང་གི་ངང་ལ་འགྲོ།།བྱང་ཆུབ་དབྱིངས་ལ་འགྲོ་འོང་ངང་གིས་མེད།།འགྲོ་འོང་མེད་པ་རྒྱལ་བ་རྣམས་ཀྱི་སྐུ། +
།ཇི་ལྟར་སྨྲས་ཀྱང་རང་གི་ངང་ལ་སྨྲ།།ཇི་ལྟར་བརྗོད་ཀྱང་རང་གི་ངང་ལ་བརྗོད།།བྱང་ཆུབ་སེམས་ལ་སྨྲ་བརྗོད་ངང་གིས་མེད།།སྨྲ་བརྗོད་མེད་པ་དུས་གསུམ་རྒྱལ་བའི་གསུང༌། +
།ཇི་ལྟར་བསམས་ཀྱང་རང་གི་ངང་ལ་བསམ།།ཇི་ལྟར་རྟོག་ཀྱང་རང་གི་ངང་ལ་རྟོག།བྱང་ཆུབ་སེམས་ལ་བསམ་རྟོག་ཡེ་ནས་མེད།།བསམ་རྟོག་བྲལ་བ་དུས་གསུམ་རྒྱལ་བའི་ཐུགས། +
།མེད་ལ་ཅིར་ཡང་འབྱུང་བ་སྤྲུལ་པའི་སྐུ།།ཉིད་ལ་ཉིད་ལོངས་སྤྱོད་པ་ལོངས་སྤྱོད་རྫོགས།།དེ་ལ་དངོས་གཞི་མེད་པས་ཆོས་སྐུ་སྟེ།།འབྲས་བུ་སྐུ་གསུམ་ལྷུན་གྱིས་གྲུབ་པའི་ཀློང༌། +
།བྱང་ཆུབ་སེམས་ཀྱི་ཀློང་ཆེན་ངང་ཉིད་ལས།།དྲན་པའི་རྣམ་པར་རྟོག་པ་མི་འབྱུང་སྟེ།།ཤེས་པའི་མཚན་མ་ཡིད་ལ་མི་གཡོ་ན།།དེ་ཉིད་སངས་རྒྱས་ཉག་ཅིག་དགོངས་པ་ཡིན། +
།བྱང་ཆུབ་རང་བཞིན་ནམ་མཁའི་དཀྱིལ་ཡངས་འདྲ།།དྲན་དང་རྟོག་པ་མེད་པ་སྒོམ་པའི་མཆོག།རང་གི་རང་བཞིན་མ་གཡོས་བཅོས་པ་མེད།།མི་བསམ་ཡིད་ལ་བྱེད་པ་རྣམ་བྲལ་བ།།རང་བབས་ཆོས་ཉིད་དུས་གསུམ་འཕོ་འགྱུར་མེད།།འགྱུ་འཕྲོའི་ཀུན་རྟོག་མེད་པ་སྒོམ་པའི་མཆོག +
།དེ་བཞིན་ཉིད་དེར་གང་གནས་དམ་པའི་སེམས།།སངས་རྒྱས་ཉག་ཅིག་མཚོན་པ་ཀུན་དང་བྲལ།།མ་གཡོ་ཆོས་དབྱིངས་འཛིན་རྟོག་ཕྱམ་འདས་པ།།རྒྱལ་བའི་དགོངས་ཀློང་རང་བཞིན་ཡངས་པའི་ཆོས།།ལུས་སེམས་བཅོས་པའི་འཆིང་བ་རྣམས་སྤངས་ཤིང༌།།གྱིན་འདར་ལྷོད་ཆགས་དྲན་བསམ་ཅི་འགྱུས་ཀྱང༌།།གཞི་གཞག་ཆོས་ཉིད་ངང་ལས་མི་གཡོ་ན།།ཐམས་ཅད་ཀུན་བཟང་དགོངས་ཀློང་ཡངས་པ་ཡིན། +
།མི་སྤྲོ་མི་བསྡུ་རང་དྭངས་སང་ངེ་བ།།དྭངས་པའི་རྒྱ་མཚོ་མི་གཡོ་མཉམ་པ་བཞིན།།ཆོས་ཉིད་གཏིང་གསལ་རང་བྱུང་ཡེ་ཤེས་དང༌།།འབྱུང་འཇུག་རེ་དགོས་བྲལ་བར་གནས་པ་ཡིན། +
།མ་བཟུང་མ་བཏང་འཇུར་བུའི་སྒྲིམས་གློད་མེད།།ཇི་བཞིན་རང་བབས་རྒྱ་ཡན་ངང་གིས་ཟིན།།མི་གཡོ་ཕྱམ་གདལ་ཡངས་དོག་མེད་པའི་ཀློང༌།།དྲན་བསམ་ཐམས་ཅད་རང་བྱུང་རང་ཞི་ན།།རྡོ་རྗེ་སེམས་དཔའ་ནམ་མཁའི་དགོངས་པ་ཡིན། +
།མ་བཅོས་ཀློང་དུ་མ་ཡེངས་ངང་ལྡན་ན།།དྲན་རྟོག་ཡུལ་ལ་འཇུག་པའང་ཆོས་ཉིད་ངང༌།།ཆེད་དུ་འཇུར་བུས་བཅོས་ན་ཆོས་ཉིད་ཀྱང༌།།མི་རྟོག་མཁའ་ལྟར་ཡངས་ཀྱང་མཚན་མའི་གཟེབ།།ཉིན་མཚན་སྒོམ་པས་འདའ་ཡང་འཆིང་ཞེན་ཉིད།།བསམ་གཏན་ལྷ་དང་མཚུངས་པར་རྒྱལ་བས་གསུངས།།དེ་བས་མ་ཡེངས་འབད་རྩོལ་ཞིག་པའི་སེམས།།རང་བབས་འཛིན་རྩོལ་འདས་པ་ཤིན་ཏུ་གཅེས། +