Property:CyzVerseText
Jump to navigation
Jump to search
This property stores the Tibetan text of a verse.
C
།གཉེན་པོ་ཡེ་གྲོལ་སྤང་བྱ་མེད་པར་གྲོལ།།སྤང་བླང་གཉིས་མེད་མཁའ་མཉམ་ཡངས་པར་གྲོལ།།གྲོལ་བ་ཡེ་གྲོལ་བཅིངས་པ་མེད་པར་གྲོལ།།མ་གྲོལ་ཡེ་གྲོལ་བཅིང་གྲོལ་མེད་པར་གྲོལ།།གློད་པ་ཡེ་གྲོལ་གློད་རྒྱུ་མེད་པར་གྲོལ།།ཅོག་གཞག་ཡེ་གྲོལ་འཇོག་རྒྱུ་མེད་པར་གྲོལ། +
།མདོར་ན་སྣང་ཞིང་སྲིད་པའི་ཆོས་རྣམས་དང༌།།མི་སྣང་མི་སྲིད་ཆོས་ལས་འདས་སོ་ཅོག།ཐམས་ཅད་ཡེ་ནས་དབྱིངས་སུ་གྲོལ་ཟིན་པས།།ད་གཟོད་འབད་པས་སུས་ཀྱང་གྲོལ་མི་དགོས། +
།དེ་ལ་འབད་རྩོལ་བྱས་ཀྱང་དོན་མེད་པས།།མ་བྱེད་མ་བྱེད་རྩོལ་ཞིང་སྒྲུབ་མ་བྱེད།།མ་ལྟ་མ་ལྟ་ཡིད་ཀྱི་ཆོས་མ་ལྟ།།མ་བསྒོམས་མ་བསྒོམས་བློ་ཡི་ཆོས་མ་བསྒོམས།།མ་དཔྱད་མ་དཔྱད་ཡུལ་སེམས་རྗེས་མ་དཔྱད།།མ་བསྒྲུབས་མ་བསྒྲུབས་རེ་དོགས་འབྲལ་མ་བསྒྲུབ།།མ་སྤངས་མ་སྤངས་ཉོན་མོངས་ལས་མ་སྤངས།།མ་ལེན་མ་ལེན་ཡང་དག་ཆོས་མ་ལེན།།མ་འཆིངས་མ་འཆིངས་རང་གི་རྒྱུད་མ་འཆིངས། +
།ཐམས་ཅད་ཕྱམ་ལོག་གང་ལའང་ཡུལ་མེད་པས།ཁྲིགས་དང་ཆོས་མེད་དམིགས་གཏད་ངོས་གཟུང་མེན།།གཞི་ལོག་ལམ་ལོག་འབྲས་བུའི་ཆོས་ལོག་པས།།ལེགས་ཉེས་ཤོར་གོང་རྡུལ་ཙམ་དམིགས་སུ་མེད།།ཕྱམ་ཕྱམ་ཕྱང་ཆད་ཡེ་ཆད་སྣང་སྲིད་ཆད།།འཁོར་འདས་རུ་ལོག་དབྱིངས་ཀྱི་སོ་ན་མེད།།གང་ཡིན་ཅི་ཡིན་འདི་ཡིན་གཏད་སོ་མེད།ཁྱེད་ཅག་ཅི་བྱ་ང་ནི་གང་ན་འདུག།སྔར་ཤུལ་ད་མེད་འདི་ལས་སུས་ཅི་བྱ།།ཧ་ཧ་འདི་འདྲ་མཚར་ཆེ་དགོད་རེ་བྲོ། +
།ཆོས་རྣམས་ལྷུན་གྲུབ་བྱང་ཆུབ་སྙིང་པོ་ལ།།འབད་རྩོལ་མེད་པའི་གནད་ཀྱིས་གོམས་བྱས་ན།།ཡེ་སངས་རྒྱས་ལ་ཡང་སངས་རྒྱས་འབྱུང་སྟེ།།འདི་ནི་བླ་མེད་རྡོ་རྗེ་སྙིང་པོའི་དོན།།རིམ་དགུའི་སྙིང་པོ་བྱང་ཆུབ་ཀློང་ཆེན་ཡིན། +
།ཆོས་སྐུའི་ངོ་བོ་རང་བྱུང་ཡེ་ཤེས་ཏེ།།རོལ་པར་ཐམས་ཅད་མཁྱེན་པའི་ཡེ་ཤེས་མཚོ།།གདོད་མའི་དབྱིངས་ན་ཐིག་ལེ་གཅིག་ཏུ་བཞུགས +
།ལོངས་སྐུའི་ངོ་བོ་རང་བཞིན་ལྷུན་གྲུབ་སྟེ།།རོལ་པར་རིགས་ལྔ་ཡེ་ཤེས་རྣམ་པ་ལྔ།།ནམ་མཁའི་དབྱིངས་ཀུན་གང་བར་སྣང་བ་ཡིན། +
།སྤྲུལ་སྐུའི་ངོ་བོ་ཐུགས་རྗེའི་འཆར་གཞི་སྟེ།།རོལ་པར་གང་ལ་གང་འདུལ་དེར་སྣང་ཞིང༌།།འཕྲིན་ལས་ཆེན་པོས་མངའ་དབང་འབྱོར་པ་ཡིན། +
།འདི་དག་རྒྱུ་འབྲས་རྩོལ་བས་མ་བསྒྲུབས་ཏེ།།ཡེ་ནས་ལྷུན་གྲུབ་ཅོག་གཞག་ངང་ལ་སྣང༌།།མཆོག་གསང་རབ་ལ་ཚེ་འདིར་སྣང་བ་སྟེ།།དེ་ལས་གཞན་དུ་བར་དོར་མི་བསླུ་བས།།རྡོ་རྗེ་སྙིང་པོ་རྩེ་མོའི་ཐེག་པ་ནི།།རྒྱུ་འབྲས་ཐེག་པ་ཀུན་ལས་ཁྱད་པར་འཕགས། +
།ཆོས་དབྱིངས་རིན་པོ་ཆེའི་མཛོད་ལས།།ཆོས་ཐམས་ཅད་བྱང་ཆུབ་ཀྱི་སེམས་སུ་ཡེ་སངས་རྒྱས་པ་ལ་རྩོལ་བ་དང་སྒྲུབ་པ་མེད་པར་ཡང་སངས་རྒྱས་པར་བསྟན་པའི་ལེའུ་སྟེ་བཅུ་གསུམ་པའོ།། +
།མཁའ་དཀྱིལ་ཉི་ཟླའི་དཀྱིལ་འཁོར་འོད་གསལ་ཡང༌།།མ་རྟོགས་སྤྲིན་ཆེན་སྙིང་པོས་ཡོངས་བསྒྲིབས་པས།།མི་སྣང་བྱང་ཆུབ་རང་ལ་ཡོད་པའི་ཚུལ། +
།སྤྲིན་ཆེན་དབྱིངས་སུ་བཞག་པས་རང་དེངས་ལྟར།།འབད་རྩོལ་མེད་པས་རྒྱུ་འབྲས་སྤྲིན་བྲལ་ནས།།མཁའ་དཀྱིལ་བྱང་ཆུབ་སྙིང་པོ་རང་ལས་འཆར།།དབང་པོའི་རིམ་པས་ཐེག་པ་ཐ་དད་ལ། +
།ངོ་བོ་ཉི་བཞིན་ཆོས་དབྱིངས་ཀློང་ན་གསལ།།རྩལ་ལས་ཟེར་བཞིན་ཀུན་ཤར་རིས་མེད་པས།།ས་དང་ཆུ་མཚོར་དྲོད་ཀྱིས་ཁྱབ་པ་ན།།རླངས་ལས་སྤྲིན་གྱི་རོལ་པར་ཤར་བ་ཡིས།།ངོ་བོ་ཉིད་དང་རྩལ་ཡང་བསྒྲིབས་པ་བཞིན།།ངོ་བོ་ཉིད་ལས་རང་རྩལ་མ་དག་པའི།།རོལ་པས་སྙིང་པོའི་དེ་ཉིད་རང་ངོར་སྒྲིབ།།སྣང་སྲིད་སྣོད་བཅུད་འཁྲུལ་སྣང་བསམ་མི་ཁྱབ། +
།ཉི་ཟེར་རྩལ་ལས་རླུང་བསྐྱོད་སྤྲིན་དེངས་ལྟར།།རང་ངོ་རྟོགས་ལས་རོལ་པ་རྒྱན་དུ་ཤར།།འཁྲུལ་པ་ཡེ་གྲོལ་རང་སར་ད་གྲོལ་བས།།འཁྲུལ་སྣང་འཁྲུལ་འཛིན་མ་སྤངས་དབྱིངས་སུ་ཞི།།གར་སོང་ཆ་མེད་དྭངས་པའི་ནམ་མཁའ་ལ།།སྐུ་དང་ཡེ་ཤེས་ལྷུན་གྲུབ་ཉི་མ་ཤར།།གཞན་ནས་མ་འོངས་རང་སྣང་དག་པ་ཙམ། +
།གཉིས་སྐྱེས་སྒོ་ངའི་ནང་ནས་འདབ་རྒྱས་པ།།སྒོང་རྒྱས་འཐུམས་ལྟར་ད་ལྟར་མི་སྣང་ཡང༌།།སྒོང་རྒྱ་རལ་བས་མཁའ་དཀྱིལ་ལྡིང་བ་ལྟར།།གཟུང་འཛིན་འཁྲུལ་རྟོག་ཟག་པ་སྔར་ཟད་ཀྱང༌།།ཟག་འབྲས་ལྷག་བཅས་སྒོང་རྒྱ་རལ་མ་ཐག།ལྷུན་གྲུབ་རིག་པ་རང་གསལ་རང་ལ་འཆར།།སྐུ་དང་ཡེ་ཤེས་སྣང་བས་མཁའ་དབྱིངས་ཁྱབ།།རང་ངོ་ཤེས་པས་ཀུན་བཟང་ཀློང་དུ་གྲོལ། +
།ཕྱོགས་བཅུར་ཐུགས་རྗེའི་རོལ་པ་ཚད་མེད་ལས།།སྤྲུལ་པ་འཕྲོ་པས་འགྲོ་བའི་དོན་ཀུན་བྱེད།།འཁོར་བ་ཇི་སྲིད་མཛད་པ་ཉེ་བར་སྟོན།།འདི་ནི་རང་བཞིན་བབས་ཀྱི་ངོ་བོ་ལས།།རྩལ་གྱི་ཐུགས་རྗེ་ཕྱོགས་མེད་ཤར་བ་སྟེ།།རོལ་པས་གཞན་དོན་ཕུན་སུམ་ཚོགས་པ་ཡིན། +
།མ་དག་ཆ་བཅས་རོལ་པ་ཉེར་ཞི་ཡང༌།།མ་དག་འགྲོ་ལ་སྤྲུལ་པ་སྣང་བ་ནི།།སྟོན་པའི་ཇི་བཞིན་ཤུགས་ཀྱི་ཐུགས་རྗེ་དང༌།།འགྲོ་སེམས་གཙང་མའི་ལས་སྨོན་དག་པས་འཆར། +
།དེ་ཚེ་ཞིང་ཀུན་སྤྲུལ་པ་ཚད་མེད་ཅིང༌།།མཐའ་ཡས་འགྲོ་བ་བྱང་ཆུབ་འདྲེན་མཛད་ཀྱང༌།།སྟོན་པའི་ཆོས་སྐུ་དབྱིངས་ལས་མི་གཡོ་སྟེ།།རང་བྱུང་ཡེ་ཤེས་རྟག་ཆད་ཕྱོགས་ལྷུང་མེད།།དབྱིངས་ལས་རང་ཤར་སྟུག་པོ་བཀོད་པར་ནི།།རིག་འཛིན་མཁའ་འགྲོ་ས་བཅུའི་སེམས་དཔའ་ལ།།ལོངས་སྤྱོད་རྫོགས་པའི་བཀོད་པ་བསམ་ཡས་སྣང༌།།དེ་ཡང་དབྱིངས་ལས་སྟོན་པའི་ཐུགས་རྗེ་དང༌།།གདུལ་བྱའི་མོས་དགེས་ལྷུན་གྲུབ་རང་ངོར་སྣང༌། +
།དབྱིངས་ཀྱི་རང་བཞིན་གདོད་ནས་ལྷུན་གྲུབ་ལ།།ཕྱི་དང་ནང་མེད་ཀུན་ཏུ་ཁྱབ་པར་གདལ།།མཐའ་ཡི་མུ་མེད་སྟེང་འོག་ཕྱོགས་མཚམས་འདས།།ཡངས་དོག་གཉིས་མེད་རིག་པ་མཁའ་ལྟར་དག།དམིགས་བསམ་སྤྲོ་བསྡུ་བྲལ་བའི་ཀློང་ཉིད་དུ། +
།ཡུལ་དེར་གནས་ན་ཐམས་ཅད་ཆོས་ཀྱི་སྐུ།།རང་བྱུང་ཡེ་ཤེས་གཅིག་ལས་མ་གཡོས་པར།།མ་བྱས་ཡེ་ཟིན་རྩོལ་སྒྲུབ་འདས་པ་ཉིད།།གྲྭ་ཟུར་མེད་པའི་ཐིག་ལེ་ཟླུམ་པས་ན།།ཇི་བཞིན་དབྱེ་བསལ་མེད་པའི་ཀློང་དུ་འཁྱིལ། +