Ngb-pt-0833-vol-09-text

Body

རྒྱ་གར་སྐད་དུ། ནཱ་ཐ་བཛྲ་ཨི་དྷི་ད་ར་ཏན་ཏྲ་ན་མ། བོད་སྐད་དུ། མགོན་པོ་རྡོ་རྗེ་བདུད་འདུལ་གྱི་རྒྱུད་ཅེས་བྱ་བ། ཁ་ཆེའི་སྐད་དུ། གནོད་སྦྱིན་རྡོ་རྗེ་བདུད་འདུལ། །ཨོ་རྒྱན་སྐད་དུ། ཡཀྟ། བལ་པོའི་སྐད་དུ། གནོད་སྤྱིན་གྱི་དྲག་སྔགས་བདུན་པ། བྲམ་ཟེའི་སྐད་དུ། ཁམས་གསུམ་སྲོག་འཕྲོག །བཅོམ་ལྡན་འདས་པདྨ་དབང་ཆེན་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་འཆང་ཆེན་པོ་དེས་སྲོད་ལ་བདུད་གཏུལ། ཐོ་རངས་རྡོ་རྗེ་གདན་གྱི་སྤོ་ལ་རྡོ་རིན་པོ་ཆེ་འབར་བའི་གནས། མཚོན་ཆ་སྣ་ཚོགས་བུ་ཡུག་འ་་པའི་ཡུལ། ཤིན་ཏུ་རྔུབ་པའི་ལྗོངས། གནོད་སྦྱིན་འབར་བའི་གྲོང་ཁྱེར། མ་མོའི་ཚོགས་འདུས་པའི་གྲོང་རྡལ། རིན་པོ་ཆེ་འབར་བའི་གཞལ་ཡས་ཁང་ན་བཞུགས་ཏེ། དེར་འདུས་པའི་འཁོར་ནི། ནག་པོ་བདུད་འདུལ་ཆེན་པོ་དང་། གནོད་སྤྱིན་མོ་ཀུན་དུག་མ་དང་། དེའི་འཁོར་གནོད་སྦྱིན་རྣོན་པོ་དང་། ཉི་མའི་མིག་ནང་གིའོ། །ཕྱིའི་བློན་པོ་ཀུན་གྱི་འཇིགས་བྱེད་དོ། །གཞན་ཡང་འདུས་པའི་ཚོགས་མཁའ་འགྲོ་མ་དང་། མ་མོའི་ཚོགས་དང་། གནོད་སྤྱིན་གྱི་ཚོགས་དང་། བདུད་ཀྱི་ཚོགས་དང་། ནག་པོའི་ཚོགས་ཐམས་ཅད་འདུས་ཏེ། དེ་དག་ཐམས་ཅད་ཀྱིས་བཅོམ་ལྡན་འདས་ལ་བདུད་རྩི་ལྔའི་མཆོད་པ་དང་། མེ་ཏོག་སྣ་ཚོགས་ཀྱིས་གཏོར་ཞིང་ཕྱག་འཚལ་ཞིང་ཀུན་ཏུ་བསྐོར་རོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་ཡང་དེའི་ཚེ་དེ་དག་གི་ནང་ནས། །རི་རབ་ཀྱི་བང་རིམ་ལ་གནས་པའི་མགོན་པོ་རྡོ་རྗེ་བདུད་འདུལ་གྱིས། །རྡོ་རྗེ་འཆང་ལ་འདི་སྐད་ཅེས་གསོལ་ཏོ། །ཀྱེ་ཀྱེ། རྡོ་རྗེ་འཆང་ཆེན་བཀའ་སྩལ་འཚལ། །བདག་ཅག་འདུས་པའི་ཚོགས་རྣམས་ནི། །འཚལ་སྐལ་ཡང་ནི་གང་ལ་བགྱི། །ལས་སུ་ཅི་བགྱི་བཀའ་སྩོལ་ཅིག །རྡོ་རྗེ་འཆང་ལ་བདག་ཉན་འཚལ། །དེ་སྐད་ཅེས་ཞུས་པ་དང་། རྡོ་རྗེ་འཆང་གིས་བཀའ་སྩལ་པ། །ཉོན་ཅིག་མགོན་པོ་འཁོར་དང་བཅས། །ཁྱོད་ཀྱི་ལས་དང་ཟས་དག་ནི། །བསྟན་པ་འབྱུང་དང་དུས་དང་། །གནས་དང་བསྙེན་པ་བསྒྲུབ་པ་དང་། །གསད་པ་མ་གྲུབ་སྤོགས་ཆོག་དང་། །སྔགས་དང་རྫས་དང་ཏིང་འཛིན་དང་། །ཕྱག་རྒྱ་དང་ནི་བསྐུལ་བ་དང་། །ཐུན་དང་ཟོར་དང་བསྲེག་དང་མནན། །དུས་མིན་འཆི་བ་བཟློག་པ་དང་། །ནད་ཞི་དཔལ་བསྐྱེད་རིགས་བརྒྱུད་སྤེལ། །དགུག་དང་ཞི་བ་དབང་དུ་བྱ། །རྟགས་དང་མཚན་མ་བསྟན་གྱིས་འཁོར་ཚོགས་ཉོན། །རྡོ་རྗེ་བདུད་འདུལ་གྱི་རྒྱུད་ལས། ཞུས་པ་དང་གླེང་བསླངས་པའི་ལེའུ་སྟེ་གཉིས་པའོ།། །།རྡོ་རྗེ་འཆང་ཆེན་གྱིས་ཁྱོད་ལ་བསྟན་པ་གཉེར་དུ་གཏད། །སངས་རྒྱས་བསྟན་པ་གནས་པ་ཡི། །རྣམ་བཞི་འཁོར་རྣམས་བསྲུང་བ་དང་། །དཀར་པོའི་ཕྱོགས་ཀྱི་འཁོར་རྣམས་ལ། །བསྲུང་བ་སྐྱབ་པ་ཁྱོད་ཀྱིས་གྱིས། །གནོད་གདུག་རྣམ་གཉིས་བསྒྲལ་བར་གྱིས། །རྡོ་རྗེ་བདུད་འདུལ་གྱི་རྒྱུད་ལས། ལུང་བསྟན་པ་དང་གཉེར་གཏད་པའི་ལེའུ་སྟེ་གསུམ་པའོ།། །།རྡོ་རྗེ་འཆང་ཆེན་བཅོམ་ལྡན་འདས། །བདག་གི་ཟས་སྐལ་གང་ལ་བགྱི། །ཞུས་པ་ལས། རྡོ་རྗེ་འཆང་གིས་བཀའ་སྩལ་པ། །ཁྱོད་ཀྱི་ཟས་ཀྱི་སྐལ་བ་ནི། །སངས་རྒྱས་བསྟན་པ་ལ་གནོད་དང་། །ནག་པའི་ཕྱོགས་སུ་གཏོགས་པ་རྣམས། །མི་ཤ་མི་ཁྲག་ཚིལ་བུར་བཅས། །རྗེན་པ་བཙོས་པ་སྣ་ཚོགས་རྣམས། །ཁྲག་སྣ་ཚོགས་པའི་ཐུན་རྫས་རྣམས། །རབ་ཏུ་མང་བ་བསོག་པར་བྱ། །རྡོ་རྗེ་བདུད་འདུལ་གྱི་རྒྱུད་ལས། ཟས་སྐལ་བསྟན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་འཆང་ཆེན་གྱིས། །བསྟན་པ་འབྱུང་བའི་རིམ་པ་ནི། །གོས་ངན་རེ་བ་གོན་པའི་དུས། །དེའི་ཚེ་ང་ཡི་བསྟན་པ་འབྱུང་། །ཟས་ངན་ལྕི་བ་ཟ་བའི་དུས། །དེ་ཚེ་ང་ཡི་བསྟན་པ་འབྱུང་། །དེ་ལ་སོགས་པ་མཐའ་ཡས་མཆོག །དེ་ཚེ་ང་ཡི་བསྟན་པ་འབྱུང་། །རྡོ་རྗེ་བདུད་འདུལ་གྱི་རྒྱུད་ལས། བསྟན་པ་འབྱུང་བའི་ལེའུ་སྟེ་ལྔ་པའོ།། །།དེ་ནས་རྡོ་རྗེ་འཆང་ཆེན་གྱིས། །དུས་ནི་ཉི་ཟླ་ཤིས་པ་ལའོ། །བསྙེན་བསྒྲུབ་ལས་ལ་སྦྱར་བའོ། །མ་གྲུབ་སྤོགས་པའི་ཆོ་ག་དང་། །བསྲེག་དང་མནན་པའི་ཆོ་ག་འོ། །དུས་ནི་ར་བ་བཞིའི་དཔྱིད་ཟླ་ར་བའོ། །གནས་ན་ལྷ་ཁང་ངམ་དབུ་རྩེའི་བར་ཁང་ངམ། བྲག་དམར་ནག་༄༅ ཆོས་ཟངས་ལྟ་བུ་འམ། རི་གསུམ་འདུས་པའི་རྩེ་འམ། ཡིད་དུ་འོང་བའི་གནས་སམ། བསྙེན་པའི་དུས་ནི་ཡར་ངོའི་ཚེས་གཅིག་གམ། གཉིས་སམ། བརྒྱད་ཀྱི་བར་དུའོ། །བསྒྲུབ་པའི་དུས་ནི་ཚེས་བཅུ་བདུན་ནས། བཅོ་ལྔའི་བར་དུའོ། །ལས་སྦྱོར་གྱི་དུས་ནི་བཅུ་དྲུག་ནས། ཉི་ཤུ་གཉིས་ཀྱི་བར་རོ། །མ་གྲུབ་ན་སྤོགས་པ་ནི་ཉི་ཤུ་གསུམ་ནས། དགུའི་བར་དུའོ། །སྤྱིན་སྲེག་དང་མནན་པ་ནི། ཉི་ཤུ་དགུའི་གནམ་སྟོང་ལ་ཤིས་སོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། བསྙེན་བསྒྲུབ་ལས་སྦྱོར་མ་གྲུབ་སྤོགས་ཆོ་ག་མནན་བསྲེག་གི་ལེའུ་སྟེ་དྲུག་པའོ།། །།དེ་ནས་རྡོ་རྗེ་འཆང་ཆེན་གྱིས། །རྟེན་གྱིས་གང་ཟག་མཚན་ཉིད་བསྟན། །ཞེ་སྡང་ཆེ་ལ་སྒོམ་སྲན་ཆེ། །བློ་བརྟན་སྐྱོ་ངལ་མེད་པ་དང་། །སེམས་ལ་བརྣབ་ཅིང་ལས་སྦྱོར་མཁས། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། བསྒྲུབ་པའི་རྟེན་གྱི་གང་ཟག་མཚན་ཉིད་བསྟན་པའི་ལེའུ་སྟེ་བདུན་པའོ།། །།དེ་ནས་ཡང་རྡོ་རྗེ་འཆང་ཆེན་གྱིས། །སྔགས་ཀྱི་དབྱེ་བ་བཤད་ཀྱིས་ཉོན། །ཨོ་བཛྲ་རཏྣ་ཙིཀྟ་ར་ག་རུ་གེ་ཧུ༷་ཕཊ། ཨོ་བཛྲ་རཏྣ་ཙིཀྟ་ར་ག་ར་ཏི་བདུད་ཏིང་སྐྱོལ་སྐྱོལ་ཏིང་ཏིང་ཛ་ཛ། ཨོ༷་བཛྲ་རཏྣ་བན་དྷ་བདུད་མ་ཏིང་སྐྱོལ་ཏིང་ཛ་ཛ། བཛྲ་མ་ལ་ཡཀྟ་མ་ཀ་ཏྲི་སྐྱོལ་ཛ་ཛ། བཛྲ་ཙྭ་ན་ནཱ་ག་རྭ་ཛ་ཧ་ཧ་རྦད། ས་མ་ཡ་ཛ་ཛ་ཡ་ཀྲ་ཙ་ཀྲ་དུན་དུན་ཛ་ཛ། ཨོ་བཛྲ་རཏྣ་ཙིཉི་ར་ག་ར་ཏི་སྲུ་ཧྭ། ཨོ་བཛྲ་རཏྣ་ཙིཀྟ་ར་ག་རུ་གེ་ཧུ༷། ཨོ་བཛྲ་རཏྣ་ཙིསྟ་ར་ག་ར་ཏི་ཆེ་གེ་མོ་ཙིསྟ་ཤ༷་ལོང་། སྙིང་ལ་སྨྱོ། ཨོ་རཏྣ་ཙིསྟ་ཆེ་གེའི་བཛྲ་སྙིང་མགོ་ཆོད། ཁ་ལ་མུ་ལོ་ཏ་ཁྲི་དགྲ་ལ་རྦད། སྐྲུ་ན་པྲ་ཏི་རྦད། མུགས་རྦད། མ་ལ་ག་ཤི་ལྕེ་ལ་རྦད། བ་རི་ཁ་རི་ཡ་རྦད། ཨོ་རཏྣ་ཙིསྟ་ར་ག་ར་ཏི་ཆེ་གེ་མོ་ཛ་ཛ། སྟ༷་བྷ་ཡ་སྟ༷་བྷ་ཡ་ཧུ༷་ཕཊ། མགོན་པོ་རྡོ་རྗེ་བདུད་འདུལ་གྱི་རྒྱུད་ལས། སྔགས་ཀྱི་ལེའུ་སྟེ་བརྒྱད་པའོ།། །།དེ་ནས་ཡང་རྡོ་རྗེ་འཆང་ཆེན་གྱིས། །ཁྱོད་ཀྱི་སྐུའི་རྟེན་དང་དམ་རྫས་བསྟན། །རྒྱ་ཆེན་ས་ཡི་དཀྱིལ་འཁོར་ནི། །རྒྱ་དང་ཁྱོན་དུ་མདའ་གྲུ་བཞི། །དབུས་སུ་ཨེ་དབྱིབས་གྲུ་གསུམ་པ། །ཟླ་གམ་ཐོད་འཕྲེང་མེ་རི་དང་། ཁྲུ་ཆད་ལྷ་རྣམས་བཅས་པའོ། །སྣ་ཚོགས་མཛེས་པའི་གཞལ་ཡས་ཁང་། །བླ་རེ་གདུགས་དང་བ་དན་དང་། །འཕན་དང་སེང་ལྡེང་སེང་གེར་བཅས། །དཔའ་བོ་གྲིར་ཤིའི་རོ་རས་ལ། །རིན་ཆེན་སྣ་ལྔས་བྲིས་པའི་སྐུ། །ཁྱི་ནག་སྙིང་གི་ཐུགས་དམ་བསྐངས། །སྐྱེས་པ་གྲིར་ཤིའི་ཤ་ཁྲག་དང་། །གཡག་ལ་སོགས་པའི་ཤ་ཁྲག་ལ། །གཏོར་མའི་རྒྱུ་ནི་བྱ་བར་ཤིས། །ཁྱད་པར་བདུད་རྩི་རྣམ་ལྔས་མཆོད། །ཕྱི་ཡི་མཆོད་པ་འདི་ལྟ་སྟེ། །གསང་ཕྱི་རིན་ཆེན་འབར་བ་ལ། །ཞུན་མར་བུ་རམ་བསྲེས་པས་བྱུག །ཞུན་མར་ཕྲོམ་དང་ཞོ་འོ་མ། །ཐུད་དང་འཁུརབསྣཚོགསདང། ཁྲསྣ་རྣམ་པ་སྣ་ཚོགས་དང་། །བུ་ར༷་ཀ་ར་སྦྲང་རྩི་དང་། །ཞལ་ཟས་སྣ་ཚོགས་པ་ཡིས་མཆོད། །གསེར་གཡུ་ཟངས་ལྕགས་ལ་སོགས་པ། །སྣ་ཚོགས་པ་ཡི་རྫས་ཀྱིས་མཆོད། །རྟ་དང་གླང་པོ་ལ་སོགས་པ། །སྣ་ཚོགས་པ་ཡི་མཆོད་པ་བྱ། །དར་དང་ཟ་འོག་ལ་སོགས་པ། །བར་སྣང་ཁེབས་པའི་དར་གྱིས་མཆོད། །རྫ་རྔ་གླིང་བུ་པི་ཝང་དང་། །དུང་ལ་སོགས་པ་སྒྲ་ཡིས་མཆོད། །སྣ་ཚོགས་སྤྱན་གཟིགས་རྟ་གཏོར་རྒྱུན་གཏོར་དང་། །དུས་ཀྱི་མཆོད་པ་མི་གཅད་དབུལ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། མཆོད་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་འཆང་ཆེན་གྱིས། །བསྙེན་བསྒྲུབ་ལས་སྦྱོར་དུས་གསུམ་དུ། །ལིང་ག་དང་ནི་འཁོར་ལོ་བསྟན། །སྤྲ་ཚིལ་ལིང་ག་སོར་བཞིའི་ཚད། །དེ་ཡི་སྙིང་ཁར་བསྒྲུབ་བྱའི་གཟུགས། །རྩང་རིས་བཅས་ཏེ་བྲི་བར་བྱ། །དྲི་མ་མེད་དར་ལེ་བརྒན་ལ། །ཙཀྲ་རྩིབས་དྲུག་མུ་ཁྱུད་བཅས། །དབུས་སུ་དགྲ་ཡི་མིང་རུས་བྲིས། །དེ་ཡི་ཕྱི་རིམ་མུ་ཁྱུད་ལ། །གཉེན་པོ་ལྷ་ཡི་སྔགས་ཀྱང་བྲི། །ཕྱི་རིམ་འཁོར་ལོ་རྩིབས་དྲུག་ལ། །མགོན་པོའི་སྲོག་སྔགས་བྲི་བར་བྱ། །འཁོར་ལོའི་རྩིབས་ལ་མིང་རུས་བྲིས། །དེ་ཡི་ཕྱི་རིམ་མུ་ཁྱུད་ལ། །རྡོ་རྗེ་ར་བ་མེ་རིས་བསྐོར། །དྲི་མ་མ་སོང་དར་ནང་གྲིལ། །ཚོན་སྣ་ལྔ་ཡིས་བཅིངས་བསྡམས་ལ། །མཆུ་གསུམ་སྙིང་འཕྲིག་མེད་པའི་ཐོད་ནང་དུ། །རང་འོག་ཨེ་དབྱིབས་གྲུ་གསུམ་ནང་དུ་བཅུག །དེ་རྗེས་པང་ལ་གནས་པར་བྱ། །དེ་ནས་པདྨའི་མཆན་ཁུང་གདགས། །དེ་ནས་རྡོ་རྗེ་འཆང་ཆེན་གྱིས། །བཀའ་ཉན་གསུང་སྟོད་བྱེད་པ་དང་། །དམ་ལ་མི་འགལ་ཅི་བགྱི་ཉན། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། ལོག་གནོན་རྟེན་གྱི་འཁོར་ལོའི་ལེའུ་སྟེ་བཅུ་པའོ།། །།དེ་ནས་རྡོ་རྗེ་འཆང་ཆེན་གྱིས། །གཉེན་པོ་གོང་དུ་བསྒོམ་པར་བྱའོ། །ལས་མཁན་རྡོ་རྗེ་བདུད་འདུལ་ནི། །སྐུ་མདོག་མཐིང་ནག་འབར་བ་ལ། །རལ་པ་ཁམ་ནག་གྱེན་དུ་ཁྱིལ། །སྨ་ར་སེར་པོ་གྱེན་དུ་འགྲེང་། །ཨག་ཚོམ་ནག་པོ་ཐུར་ལ་འཕྱང་། །སྤྱན་གསུམ་དམར་བ། སྨིན་མ་གློག་ལྟར་འཁྱུག་པ། །མཐའ་བེར་ནག་པོ་སྐུ་ལ་གསོལ། ཐོད་སྐམ་ལྔས་དབུ་བརྒྱན་པ། ཐོད་རློན་ལྔ་བཅུས་དོ་ཤལ་བྱས་པ། རིན་པོ་ཆེའི་དབུ་རྒྱན་དང་རྣ་རྒྱན་བྱས་པ། སྐ་རགས་སུ་བཅིངས་པ། ཕྱག་གཡས་ན་ཁ་ཊ༷་ཁ་གསུམ་ལ་དཔལ་དར་ནག་པོ་འཕྱར་ཐབས་སུ་བསྣམས་པ། གཡོན་གྱི་དུང་དམར་ནང་ན་དམ་ཉམས་བསྒྲལ་བའི་སྙིང་ཁྲག་གིས་བཀང་ནས་གསོལ་བ། དེའི་ཡུམ་གནོད་སྦྱིན་དུག་མོ་ནི་སྐུ་མདོག་མཐིང་ནག་ལ། ཕྱག་གཡས་དུག་གི་རྐྱལ་པ་ཁ་ཕྱེ་ནས་དཀོན་མཆོག་གསུམ་གྱི་སྐུ་དགྲ་རྡུལ་དུ་རློག་པ། གཡོན་ན་ཞལ་ཟས་ཀྱི་བྱེ་བྲག་སྣ་ཚོགས་པ་དང་ཡིད་བཞིན་གྱི་ནོར་བུ་རིན་པོ་ཆེ་བསྣམས་ནས་བསྒྲུབ་པ་པོ་ལ་དགོས་འདོད་རེ་བཡིདབཞིནདུསྐོངབའོ། །གཡས་སུ་གནོད་སྤྱིན་རྣོན་པོ་སྐུ་མདོག་ནག་པོ་ཞལ་གཅིག་ཕྱག་བཞི། ཕྱག་གཡས་དགྲ་སྟ། དེ་འོག་རལ་གྲི། གཡོན་དང་པོ་ནད་རྐྱལ། དེ་འོག་རྡོ་རྗེ་བཅུ་ཞགས།གཡོན་ཕྱོགས་ན་གནོད་སྤྱིན་ཉི་མ་མིག་དམར་སེར་ཞལ་གཅིག་ཕྱག་བཞི། གཡས་དང་པོ་དར་ནག་གཡོབ་པ། དེ་འོག་ཁྲག་རྐྱལ་ལོ། །གཡོན་དང་པོ་རྡོ་རྗེ་ཞགས་པ། དེ་འོག་མདུང་དམར་བསྣམས་པ།དེའི་རྒྱབ་ན་གནོད་སྤྱིན་ཀུན་གྱི་འཇིགས་བྱེད་སྐུ་མདོག་ནག་པོ་ཞལ་གཅིག་ཕྱག་གཉིས་པ། གཡས་གྲི་གུག །གཡོན་བ་དན་ནག་པོ་འཕྱར་བའོ། །ཐམས་ཅད་ལ་ཐོད་པ་སྐམ་པོས་བརྒྱན་པ། རིན་པོ་ཆེ་སྣ་ཚོགས་ཀྱིས་བརྒྱན་པའོ། །དེའི་འཁོར་ནི་གནོད་སྤྱིན་སྟོང་སྡེས་བསྐོར་བའོ། །དེ་རྣམས་ནི་ཤིན་ཏུ་འཇིགས་ཤིང་བཞིན་མི་སྡུག་པ། །ཁ་དོག་ཕྱག་མཚན་འདི་འདྲ་མ་ངེས་ཏེ་སྣ་ཚོགས་སུ་སྣང་བའོ། །དེའི་ཡང་སྤྲུལ་གསུམ་སྤྲུལ་སྣ་ཚོགས་པས་དཀོན་མཆོག་གི་འཁོར་རྣམ་བཞི་ལ་གནོད་པའི་བསྟན་པ་བཤིག་པ་དེ་ལ་གསོད་པ་དང་། འཆིང་བ་དང་། བརྡེག་པ་དང་། འདེད་པ་དང་། མཚོན་ཆ་སྣ་ཚོགས་ཀྱིས་གསོད་ཅིང་བརྡེག་པ་དང་།བསྲེག་ཅིང་འཚོད་བ་དང་། ཤ་ཟ་བ་དང་། ཁྲག་འཐུང་བ་དང་། ཤ་ཟ་ཞིང་སྙིང་བཏོན་ནས་བསྒྲུབ་པ་པོ་ལ་སྟེར་བ་དང་། དེ་དག་འདྲ་བའི་བྲན་དང་། གཡོག་དང་། ཡང་གཡོག་དང་། ཡང་བྲན་ལ་སོགས་བསམ་གྱི་མི་ཁྱབ་པས་བཀའ་ཉན་ཅིང་། གསུང་བསྟོད་པ་གསལ་བར་བསྒོམ། མགོན་པོ་རྡོ་རྗེ་བདུད་འདུལ་གྱི་རྒྱུད་ལས། ཏིང་ངེ་འཛིན་གྱི་ལེའུ་སྟེ་བཅུ་གཅིག་པའོ།། །།དེ་ནས་ཡང་རྡོ་རྗེ་འཆང་ཆེན་གྱིས། པདྨ་དབངགི་ཕྱག་རྒྱ་ཡིས། མགོན་པོ་དགུག་པའི་ཕྱག་རྒྱ་ནི། ལྕགས་ཀྱུས་དགུག་ཅིང་ཟིལ་གྱིས་མནན་པའི་ཕྱག་རྒྱ་པདྨ་དབང་གི་མན་ངག་མཐེ་བོང་གཉིས་གཞིབས། སོར་མོ་ཕྲལ་ལ་བརྐྱང་། བྱིན་བརླབས་དབང་བསྐུར་འབྲེལ་བའི་ཕྱག་རྒྱ་ཡིན། ལག་གཡོན་རྡོ་རྗེ་ཁུ་ཚུར་བཅིངས་པ་ལ། མཐེབ་མཛུབ་བཞི་པོ་ལྕགས་སྒྲོག་ལྟ་བུར་སྦྲེལ། གཏོར་མ་བྱིན་ལ་དབང་དུ་འདུས་པར་བྱས་ལ། གཉིས་སུ་མེད་པར་ལྷ་བའོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། དགུག་པ་དང་དབང་དུ་བྱ་བའི་ལེའུ་སྟེ་བཅུ་གཉིས་པའོ།། །།དེ་ནས་ཡང་རྡོ་རྗེ་འཆང་ཆེན་གྱིས། རྟགས་དང་མཚན་མ་དངོས་ཉམས་རྨི་ལམ་གསུམ་དུ་ལྡན་པ་ནི། རྟགས་སུ་འོད་དམར་ནག་གམ། དར་འཕྱར་བ་འམ། རང་གི་སློབ་དཔོན་དུ་འོང་ན། མགོན་པོ་རྡོ་རྗེ་བདུད་འདུལ་ལོ། །བུད་མེད་ཁྲག་རྐྱལ་ཐོགས་པ་ནི། ཡུམ་ཀུན་དུག་མའོ། །ཨ་ཙ་རྭ་ནི། རྣོན་པོའོ། །སེང་གེ་བརྩད་པོ་བློན་པོ་ཉི་མ་མིག །མི་རེང་དང་བན་བོན་དུ་འོང་བ་དེ། ཀུན་གྱི་འཇིགས་བྱེད་དོ། །དམག་མང་པོ་དང་། ལུང་བ་དར་གྱིས་ཁེངས་པ་དང་། མེ་ཆེན་པོ་འབར་བ་རྨི་བ་ནི། དཔོན་གཡོག་ཡོ་གྲུབ་པའི་རྟགས་སོ། །སྤྲང་པོ་མཛེ་པོ་ཆུ་དང་ནི། །རྟ་དང་བོང་བུ་ཁྱི་དང་ནི། །ནག་མོའི་ལུས་ལ་ཆགས་སྤྱོད་པ། །མེ་དང་བཙུན་པ་སྙིང་མི་དགའ། །ངན་པའི་རྟགས་རྣམས་ཡིན་པར་གསུངས། །བཙས་མ་བརྔ་དང་རྨོས་བྱེད་པ། །ཤ་ཁྱིམ་འདེད་དང་ཤ་ཟ་བ། །སྲོག་གཅོད་སྙིང་ཟ་ཁྲག་འཐུང་དང་། །གཞན་གྱིས་བསད་པ་རྨི་བ་དུས་ཐེབས་སོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། རྟགས་དང་མཚན་མའི་ལེའུ་སྟེ་བཅུ་གསུམ་པའོ།། །།དེ་ནས་ཡང་རྡོ་རྗེ་འཆང་ཆེན་གྱིས། གནོད་སྤྱིན་གྱིས་རྒྱུད་དྲག་སྔགས་བདུན་པ་བསྟན་པ་ནི། གོང་འདྲས་མ་ཐུབ་ལས་འགྱངས་ནས། །མ་གྲུབ་སྤོགས་ཆོག་བྱ་བ་ནི། །དཀྱིལ་འཁོར་གོང་དང་འདྲ་བ་ལས། །གྲུ་གསུམ་སུམ་བརྩེགས་ཁྲག་གིས་བྱུག །ཟླ་གམ་གསུམ་ལ་བ་དན་འཕྱར། །གུར་དབུབ་པ་ནི་དཀྱིལ་འཁོར་རོ། །ལིང་ག་བཅའ་བའི་རྒྱུ་ནི། ཆུ་ཕ་ག་ཚུ་གའི་ས་དང་། དྲི་ཆེན་དྲི་ཆུ་གོས་དུམ་དང་། སྲུབ་མའི་ལོ་མ་དང་། གངས་ཀྱི་དུམ་བུ་དང་། གྲོག་མཁར་གྱི་ས་དང་། བདུན་བརྩེགས་ལ། བག་ཕྱེ་ལ་གཟུགས་བྱའོ། །གྲོ་ག་འམ་ཤིང་ཤུན་ལ་གཟུགས་བྱའོ། །དེ་ཡང་རིད་ཅིང་སྐེམ་པར་བྲི། གསད་པའི་ཐུན་རྫས་ནི། །ཨ་བི་ཤ་ལ་སོགས་པའི་དུག་སྣ་ཚོགས་དང་། གསེར་གྱི་རྟུན་བུ་དང་། ལྕགས་ཀྱི་རྟུན་བུ་དང་། སྐེ་ཚེ་ཤང་ཚེ་དང་། རིམས་ཀྱི་ཁྲག་དང་། རེའུ་ནག་པོའི་ཁྲག་དང་། གྲི་ཁྲག་དང་། ཁྱི་དང་ཕག་པའི་ཁྲག་དང་།ཙཎྜ་ལི་མིའི་མི་ཁྲག་དང་། དེ་རྣམས་བསྲེས་ལ་དྲག་སྔགས་བདུན་པའི་སྔགས་བགྲང་ཞིང་སྔགས་བཟླས་པ་ནི། བཛྲ་ཁྲག་ཐུར་ཐུར་ཐུ༷་ཁྲི་ཤག་ཐུ༷་རྦད། པྲ་མ་ཙིཀྟ་ཤག་ཐུ༷་རྦད། དུམ་པ་རི་མ་ཐུ༷་རྦད། ཙན་ཏི་ཙན་ཏི་མེ་ས་རི་རྦད། པྲ་མ་དུར་མ་ས་དུར་རྦད། མ་ཧྭ་ཐུ༷་རིལ་ཙིསྟ་ཤག་རྦད། ཙིསྟ་མ་དུར་ཧ་ལ་ཧ་དུ་ས་རི་སྨྱོ་སྨྱོ་རྦད། གསང་བ་ཐུན་ནག་དྲག་སྔགས་ལས་སྦྱོར་རོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། དྲག་སྔགས་བདུན་པ་མ་གྲུབ་སྤོགས་ཆོག་བྱ་བའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་འཆང་ཆེན་གྱིས། །ལས་འཇུག་སྦྱིན་སྲེག་རིམ་པ་བསྟན། །གོང་གི་ཨེ་དབྱིབས་ནང་དུ་ནི། །གཏུམ་པའི་རོ་བསྲེགས་མགལ་དུམ་དང་། །མེ་རེག་མ་ལ་མེ་བླངས་ཏེ། །ཞིང་གི་པགས་པས་རླུད་ཡབ་བྱ། ཁེན་ཏུ་དྲག་པར་མེ་སྤར་ལ། །དེར་ནི་སྦྱིན་སྲེག་རིམ་བཞིན་སྦྱར། །ནཱ་ར་ཡ་ཡི་ལིང་ག་དང་། ཁྱི་ནག་སྙིང་དང་ཤ་དང་ཁྲག །བྱ་རོག་སྙིང་དང་ཤ་ཁྲག་བཅས། །ལུག་ནག་སྙིང་དང་ཤ་དང་ཁྲག །གཞན་ཡང་ཤ་ཆེན་ཤ་སྣ་ཚོགས། །ཁྲག་སྣ་རྣམ་པ་སྣ་ཛོགས་དང་། །པྱེ་མ་གསུམ་དང་ཡུངས་དཀར་ཡུངས་ནག་མུ་ཟི་དང་། །ལྕགས་ཕྱེ་སྐེ་ཚེ་ཤངས་ཚེ་དང་། །དེ་རྣམས་ཐུན་དུ་བྲབ་པའི་སྤྱིན་སྲེག་བྱ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། ལས་འཇུག་སྤྱིན་སྲེག་གི་ལེའུ་སྟེ་བཅོ་ལྔ་པའོ།། །།དེ་ནས་རྡོ་རྗེ་འཆང་ཆེན་གྱིས། །མནན་པའི་རིམ་པ་བསྟན་པ་ནི། །གོས་དུམ་གཅིན་རྟུག་རྐང་རྗེས་དང་། །བདུན་བརྩེགས་དང་བག་ཕྱེ་དང་། །མུ་ར་ཡ་ཡི་ལིང་ཀ་བྱ། །སྙིང་ཁར་མིང་རུས་གཞུག་བྱས་ལ། །སྦྱིན་སྲེག རིམབཞིན སྦྱརབ ཡི། །ཁྱུབ་ནག་པོའི་ཐོད་པར་གཞུག །ཐོད་པ་ཐག་པ་ནག་པོས་བསྡམ། །དུར་ཁྲོད་གནས་སམ་ཡི་དགས་ཐམས་ཅད་དུ། །ཡང་ན་རོ་ཁུང་རྙིང་པ་འམ། །ལྷ་ཁང་རྙིང་པའི་ཐེམ་འོག་མནན། །ས་ཀླུ་གནས་པའི་ས་རུ་མནན། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། ལས་གཞུག་མནན་པས་བསྡུ་བའི་ལེའུ་སྟེ་བཅུ་དྲུག་པའོ།། །།དེ་ནས་རྡོ་རྗེ་འཆང་ཆེན་གྱིས། མ་ཧྭ་ཀྭ་ལ་བཛྲ་ལ་བསྟོད་པ་ནི། །མགོན་པོ་རྡོ་རྗེ་བདུད་འདུལ་གྱི། ཐུགས་རྗེ་ཐབས་ཀྱིས་བདུད་བ་་བ། །གཞོན་ནུ་དཔའ་བོ་ཁྲོས་པའི་སྐུ། །ཁྲོ་བོའི་རྒྱལ་པོ་ཁྱོད་ལ་བསྟོད། །མགོན་པོ་གཡུལ་ལས་རྣམ་རྒྱལ་ཏེ། །ཕྱག་ན་ཁ་ཊ༷་ཐོད་ཁྲག་བསྣམས། །མགོན་པོ་རྡོ་རྗེ་འཇིགས་བྱེད་ཁྱོད་ལ་བསྟོད། །མགོན་པོ་རྒྱལ་པོ་ཁྱོད་ནི་ཕ་རོལ་འདུལ་ལ་མཁས། །སྤྱན་དམར་གསུམ་བགྲད་མཆེ་བ་གཙིགས། །ཧུ༷་དང་ཕཊ་ཀྱི་སྒྲ་སྒྲོགས་པ། །མ་རུངས་འཇོམས་བྱེད་ཁྱོད་ལ་བསྟོད། །ཕྱག་ན་མཚོན་ཆ་སྣ་ཚོགས་བསྣམས། །སྦྲུལ་དང་ཐོད་པའི་འབྲེང་བས་བརྒྱན། །སྐུ་ལ་ཐ་བེར་ནག་པོ་གསོལ། །མགོན་པོ་རྡོ་རྗེ་བདུད་འདུལ་ཁྱོད་ལ་ཕྱག་འཚལ་བསྟོད། །མགོན་པོ་ཁྱོད་ནི་འཁོར་ཡང་གནོད་སྤྱིན་སྟོང་སྡེས་བསྐོར། །སྐུ་མདོག་ནག་པོ་བསྐལ་པའི་མེ་ལྟར་འབར། །རྔམ་པའི་སྟོབས་ཀྱིས་བགེགས་རྣམས་འདུལ་མཛད་པ། །མགོན་པོ་བགེགས་འདུལ་ཁྱོད་ལ་ཕྱག་འཚལ་བསྟོད། །བགེགས་དང་ལོག་འདྲེན་འདུལ་མཛད་པ། །ཕྱི་རོལ་བདུད་ཆེན་འདུལ་བའི་སྐུ། །ནང་གི་དགོངས་པ་འཇམ་ལ་ཞི། །ཞི་ཁྲོ་ཁྱོད་ལ་ཕྱག་འཚལ་བསྟོད། །རིག་པ་འཛིན་པ་རྣམས་ཀྱིས་ཁྲོ་ཆེན་ཁྱོད་འཕགས་པས། །མཐུ་རྩལ་མི་ཉམས་མངའ་བས་ན། །སྲིད་པ་གསུམ་པོ་མཐར་ཕྱིན་པས། །བདུད་འདུལ་འཇིགས་བྱེད་ཁྱོད་ལ་བསྟོད། །ཅེས་བཅོམ་ལྡན་འདས་ཀྱིས་བདུད་བཏུལ་བའི་དུས་དེར་བསྟོད་པའོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། བསྟོད་པའི་ལེའུ་སྟེ་བཅུ་བདུན་པའོ།། །།དེ་ནས་ཡང་རྡོ་རྗེ་འཆང་ཆེན་གྱིས་འདི་སྐད་ཅེས་བཀའ་སྩལ་ཏོ། །ཀྱེ། ང་ཡི་འཁོར་དུ་གཏོགས་པ་ཡི། །མགོན་པོ་རྡོ་རྗེ་བདུད་འདུལ་དང་། །གནོད་སྤྱིན་ཕོ་ཡི་ཚོགས་རྣམས་དང་། །གནོད་སྤྱིན་མོ་ཡི་ཚོགས་རྣམས་དང་། །དེ་དག་ལ་སོགས་འཁོར་རྣམས་ལ། །དྲག་སྔགས་བདུན་པའི་རྒྱུད་བཤད་ཟིན་གྱིས། །ཁྱོད་ལ་གཏད་དོ་ཟུང་ཞིག །རྒྱུད་འདི་ནི་ཐུན་མོང་མ་ཡིན་པའི་རང་བཞིན་ཏེ།འདི་ལྟ་བུའི་རྒྱུད་འདི་ཤིན་ཏུ་ཡང་རྙེད་པར་དཀའ་འོ་ཞེས་བཀའ་སྩལ་ཏོ། །རྡོ་རྗེ་བདུད་འདུལ་གྱི་འཁོར་གནོད་སྤྱིན་ཕོ་དང་། །གནོད་སྤྱིན་མོ་དང་། གནོད་སྤྱིན་མང་པོ་ལ་སོགས་པ་རྣམས། བཅོམ་ལྡན་འདས་ལ་མངོན་པར་དགའ་འོ། །དེ་ནས་དེ་དག་ཐམས་ཅད་དགའ་ཞིང་མགུ་བར་གྱུར་ཏེ། བཅོམ་ལྡན་འདས་ལ་མཆོད་པ་སྣ་ཚོགས་པས། གསང་བདག་རྡོ་རྗེ་འཆང་གྱིས་མཆོད་དེ། འཁོར་དེ་དག་བཅོམ་ལྡན་འདས་ལ་རྗེས་སུ་ཡི་རང་ནས་མི་སྣང་བར་གྱུར་ཏོ། །མགོན་པོ་རྡོ་རྗེ་བདུད་འདུལ་གྱི་རྒྱུད་ལས། རྗེས་སུ་ཡི་རང་བའི་ལེའུ་སྟེ་བཅོ་བརྒྱད་པའོ།། །།མགོན་པོ་རྡོ་རྗེ་བདུད་འདུལ་གྱི་རྒྱུད་དྲག་སྔགས་བདུན་པའི་རྒྱུད་ཅེས་བྱ་བ་རྫོགས་སོ།། །།རྡོ་རྗེ་གདན་གྱི་མཆོད་རྟེན་ནག་པོའི་བསྲུངས་མར་བསྐོས་པའོ། །ཌའ་ཀི་མ་རྣམས་ལ་ཕྱག་ན་རྡོ་རྗེས་བཀའ་བསྒོ་གཉེར་གཏད་ནས་ཕྱག་རྒྱས་བཏབ་ནས་གཏད་དེ། ཕྱི་་་ཅེ་་་་་རྗེང་རྟེངངངང་རྩེང་རབས་ལས་འཕྲ་ཅན་དང་ཕྲད་པར་ཤག ། ས་སྨན་ལམ་བཏབ་བ། །སླབ་དཔན་པདྨས་རྡ་ ་གདན་གྱ་མཆད་ ན་གྱ་ནང་ནས་ཕྱུང་ནས་ཕྱ་རབས་ཀྱ་བསྟན་པ་བསྲུང་བའ་དན་དུ་བསམ་ཡས་དབུ་ འ་ཀྭ་ཁལ་དུ་སྦས་པ། བསམ་ཡས་རྒྱ་གར་གླིང་ཆུང་ནས་གྲྭ་པ་བདག་གི་གཏེར་གྱི་ཁ་བྱང་རྙེད། དབུ་རྩེ་བར་ཁང་ཀ་ཁོལ་ནས་རྒྱུད་དང་སྒྲུབ་ཐབས་བཅས་པ་རྙེད། ཕྱི་རབས་ཀུན་ལ་ཕན་ཕྱིར་སྤེལ་བ་ཡིན། །ང་རང་གིས་ཉམས་སུ་ལོང་བའི་ཆོས་སོ། །ཀུན་ལ་མེད་པའི་ཁྱད་ཆོསཤཱ།། ས་མ་ཡུ།། །།