Ngb-pt-0045-vol-01-text

BASIC METADATA
Title of Text
Title on Cover
Cover Title San
Cover Title San in Tib
Cover Title San in Lanydza
Title on Spine
Margin Title
Author of Text
Name of Collection (if applicable)
PUBLISHING
Publisher Name
Publisher Place
Publisher Date
IDs
ISBN (if applicable)
Library Call-number (if applicable)
Other ID number (if applicable)
Volume Letter (if applicable)
Volume Number (if applicable)
Pagination of Text
Pages Represented in this file
CREATION
Name of Agent Creating Etext
Date Process Begun
Date Process Finished
Place of Process
Method of Process (OCR, input)
PROOFING
Name of Proofreader
Date Proof Began
Date Proof Finished
Place of Proof
MARKUP
Name of Markup-er
Date Markup Began
Date Markup Finished
Place of Markup
CONVERSION
Name of Converter
Date Conversion Began
Date Conversion Finished
Place of Conversion
PROBLEMS

Body

[570][570.1]རྒྱ་གར་སྐད་དུ། ཙིལྟི་པྲརྟ་ད་ཡུ་ཤཱ་ཡ་སུ་ར་སུ་མུ་དྭ་ཡ་ཤུརྙ་གུ་རྒྱུརྦ་སུ་ར་ས༷་ཧྭ་རྭ་པབྱུ་ཏ་མ༷༷ཁྲིསྣུ་སྒུརུ་ཙནྟྲ་ཛ་ལ་ཏནྟྲ། བོད་སྐད་དུ། ཐུགས་ཀྱི་ཡང་སྙིང་དགོངས་པའི་བཅུད་འདུས་པ། བཀའ་རྒྱུད་རྣམས་ཀྱི་[570.2]གསང་དོན་བཅུད་དྲིལ་བ་མ་རིག་མུན་སེལ་ཉི་ཟླ་འབར་བའི་རྒྱུད། ཡེ་གནས་ཐོག་མའི་སངས་རྒྱས་འོད་གསལ་ངང་དངས་ལ་ཕྱག་འཚལ་ལོ། །འདི་སྐད་བདག་གིས་གོ་ཞིང་རྟོགས་པའི་དུས་གཅིག་ན། ཆོས་ཉིད་ཀྱི་[570.3]ཀློང་དབྱིངས་ཀྱི་སྟོང་ར་ན། མཁའ་ཀློང་རྣམ་པར་དག་པའི་གནས། །འོད་སྣ་ཚོགས་གཅིག་ཏུ་འདུས་པ། རིན་པོ་ཆེ་སྤུངས་པ་རྣམ་པར་དག་པ་བསམ་གྱིས་མི་ཁྱབ་པའི་དཀྱིལ་འཁོར་རྒྱ་ཡོངས་སུ་མ་ཆད། ཕྱོགས་[570.4]གང་དུ་ཡང་མ་ལྷུང་། སྒྲིབ་པ་མེད་པར་རང་བཞིན་གྱིས་འོད་གསལ་བ། དབྱིངས་རྣམ་པར་དག་པའི་མཁའ། སྣང་སྲིད་སྐྱེ་འགྲོ་ཐམས་ཅད་བསྡུས་པའི་གནས་དེ་ན། ཡེ་ཐོག་མའི་སངས་རྒྱས་འོད་མི་འགྱུར་བའི་རང་[570.5]བཞིན། ཀུན་ཏུ་བཟང་པོ་ཞེས་བྱ་བ་བཞུགས་སོ། །དེའི་ཚེ་རང་བྱུང་གི་སྟོན་པའི་འཁོར་འདི་ལྟ་སྟེ། རྣམ་པར་དག་པ་བདེ་གསལ་འོད་ཁང་ན། རང་གསལ་སེམས་དཔའ་རྡོ་རྗེ་ལ། རང་བྱུང་གི་འཁོར་དང་། རང་[570.6]གསལ་སེམས་ཀྱི་འཁོར་དང་། དྲན་རྟོག་བློའི་འཁོར་དང་། རྩལ་ཟེར་བུའི་འཁོར་འདི་ལྟ་སྟེ། འོད་གསལ་རིན་པོ་ཆེའི་དཀྱིལ་འཁོར་ན། དབྱེར་མེད་གཏི་མུག་དག་པའི་སྟོན་པ་ལ། ཞེ་སྡང་རང་བྱུང་གི་འཁོར་དང་།[571][571.1]ང་རྒྱལ་རྣམ་དག་གི་འཁོར་དང་། འདོད་ཆགས་ཞེན་གཅོད་ཀྱི་འཁོར་དང་། ཕྲག་དོག་གསལ་དག་གི་འཁོར་རོ། །འདས་དང་མ་འོངས་ད་ལྟར་གྱིས། །ཐ་སྙད་མིང་ལ་མི་གནས་ཏེ། །དུས་གསུམ་གཅིག་[571.2]སྟེ་ཁྱད་པར་མེད། དུས་ཕུན་སུམ་ཚོགས་པའོ། །མ་ཧྭ་ས་ས་མེ་རྦ་དུར་ཙ་ཙ། དྷརྨ་སང་ཀ་རི། ཐེག་པ་དགུ་རྩེ་སྤྱི་ཏི་ཡོ་ག་འདི། །བྱ་བཙལ་རྩོལ་བསྒྲུབ་མ་བྱས་པར། །ཀ་དག་ཡེ་སངས་རྒྱས་པར་བསྟན། །མ་བྱུང་མ་[571.3]སྐྱེ་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །མི་སྐྱེ་མི་འགག་ལྷཁོ་པོའི་ཀློང་། །མ་ཕྱེ་མི་ཕྱེ་སྙིང་པོའི་བཅུད། །མ་མཚོན་མི་སྨྲ་ཐ་སྙད་མེད། །དམིགས་པའི་རྣམ་པ་ཀུན་དང་བྲལ། །སངས་རྒྱས་མེད་པས་ཡིད་[571.4]སྨོན་མེད། །གདོད་ནས་དག་པ་ཆོས་ཀྱི་སྐུ། །བདེ་ཆེན་མི་རྟོག་འགྱུ་བ་བྲལ། །སྤྲོས་པ་ཐག་ཆོད་སྣང་བ་དག །རིག་པ་མི་དམིགས་ཡེ་ཤེས་གསལ། །དབང་པོ་རང་སྣང་རྒྱལ་བའི་ཐུགས། །འགྲོ་བ་ཀུན་ལ་རང་བཞིན་[571.5]གནས། །མཐོང་བ་ལོག་པས་འཁྲུལ་མོད་ཀྱང་། །སངས་རྒྱས་ངང་དངས་རང་སངས་རྒྱས། །ཞེས་གསུངས་སོ། །གླེང་གཞིའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་[571.6]སྐད་ཞུས། །དངོས་པོ་ཇི་ལྟར་གནས་ལུགས་དང་། །མ་རྟོགས་རིགས་དྲུག་ཇི་ལྟར་འཁྲུལ་པ་དང་། །འཁྲུལ་པ་རྩད་ནས་ཇི་ལྟར་གཅད་པ་དང་། །རྟོགས་ནས་འབྲས་བུ་ཇི་ལྟར་འཐོབ་པ་དང་། །གསང་སྔགས་ངོ་བོ་ཇི་[572][572.1]ལྟར་ཡིན་པ་དང་། །ཐེག་པའི་རྒྱལ་པོ་ཇི་ལྟར་བཤད་པ་དང་། །ཡང་རབ་རྣམས་ལ་ཇི་ལྷར་བཤད་པ་དང་། །དེ་ཉིད་རྟོགས་ཐབས་ཇི་ལྟར་བསྟན་པ་དང་། །དེ་རྣམས་སྟོན་པས་འཁོར་ལ་བཀའ་སྩོལ་འཚལ། །ཞེས་[572.2]ཞུས་པ་དང་། དེ་ནས་སྟོན་པ་ཀུན་བཟང་གིས། བྱར་མེད་སྤྲོས་བྲལ་གྱི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །དངོས་པོ་གཤིས་ཀྱི་གནས་ལུགས་ནི། །ཚིག་གི་ཡུལ་དུ་མ་གྱུར་[572.3]ཀྱང་། །མ་རྟོགས་བློ་ལ་མཚོན་པའི་ཕྱིར། །གསུང་གི་སྒྲོན་མ་གསལ་བ་ཡིས། །ཡང་གསང་བཅུད་ཀྱི་སྙིང་པོ་བཤད། །ཡེ་གནས་ཐོག་མ་མེད་པའི་བར་དོ་ན། །མ་ཕྱེད་མི་ཕྱེད་སྙིང་པོ་མཉམ་པ་ཉིད། །གཞི་ཡི་རང་[572.4]བཞིན་ཡོད་མེད་མཉམ་པའི་ངང་། །མཉམ་པའི་ངང་ལས་ཀུན་འབྱུང་མཛོད་པོ་ཆེ། །རྣམ་དག་བསམ་གྱིས་མི་ཁྱབ་ལྷ་ཁང་ན། །སྟོང་གསལ་ངང་དངས་རིན་ཆེན་བཞུགས། །རིན་ཆེན་ངང་གསལ་འཁོར་གྱིས་[572.5]བསྐོར། །དགོས་འདོད་ཀུན་འབྱུང་རིན་ཆེན་འཆང་། །གཞི་ཉིད་རྡོ་རྗེ་རྐྱེན་དང་བྲལ། །མ་སྐྱེས་པས་ན་འཇིག་པ་མེད། །གདོད་ནས་སྙིང་པོ་བྱང་ཆུབ་དེ། །རྩོལ་བའི་བསམ་པས་དབྱིངས་མི་བསྐྱོད། །ཆོས་སྐུའི་ཁྱབ་[572.6]པས་གཅིག་པའི་ཕྱིར། །གཞི་ཡི་རང་བཞིན་མཉམ་པར་གནས། །ཆོས་དབྱིངས་དམ་པ་ཟད་མི་ཤེས། །ཡང་དག་བདག་མེདདེབཞིནཉིད། །ཡང་དག་མཐའ་ལ་ཡི་གེ་མེད། །བཅུ་དྲུག་པྱེད་ཕྱེད་ཐིག་ལེ་ཅན། །ལུས་[573][573.1]མེད་ལུས་ཏེ་ལུས་ཀྱི་མཆོག །དང་པོའི་སངས་རྒྱས་རྒྱུ་མེད་པ། །ཡེ་ཤེས་མིག་གཅིག་དྲི་མ་མེད། །ཡེ་ཤེས་ལྡན་པ་ཡོད་མེད་ཤེས། །རྣམ་པ་ཀུན་ལྡན་རྣམ་པ་མེད། །མི་མངོན་མི་གནས་གསལ་བྱ་[573.2]མིན། །མི་འགྱུར་ཀུན་འགྲོ་ཁྱབ་པ་པོ། །ནམ་མཁའི་མཐའ་ལ་ལོངས་སྤྱོད་པ། །ཐམས་ཅད་བསྐྱེད་པའི་གཞི་མ་ཡིན། །ཀུན་གཞི་མཉམ་ཉིད་ཡིན་པ་ལ། །ཕྱོགས་སུ་བལྟས་པས་གྲུབ་པ་མེད། །སངས་རྒྱས་ཐོག་མ་ཐ་[573.3]མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཆོས་དབྱིངས་ངམ་པ་རྩང་མི་ཤེས། །སངས་རྒྱས་མེད་པས་མིང་ཡང་མེད། །སངས་རྒྱས་སྟོན་པས་མིང་བཏགས་ནོར། །རྣམ་པར་དག་པའི་ཆོས་ཉིད་དེ། །དཔེར་བྱ་[573.4]ཀུན་ལས་འདས་པ་པོ། །དངོས་པོའི་གནས་ལུགས་དེ་ལྟར་རོ། །ཞེས་གསུངས་སོ། །དངོས་པོའི་གཤིས་ཀྱི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ[573.5]བཟང་པོ་ལ། །མ་རྟོགས་སེམས་ཅན་ཇི་ལྟར་འཁྲུལ། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་འོད་འཕྲོ་འདུ་དང་འཕེལ་འགྲིབ་མེད་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་[573.6]ནས་འཁོར་ལ་འདི་སྐད་གསུངས་སོ། །མ་རྟོགས་སེམས་ཅན་འཁྲུལ་ལུགས་ནི། །སྔོན་མེད་ཕྱིས་མེད་གདོད་ནས་དག །ནམ་མཁའི་བདག་པོས་སྣ་ཚོགས་སྟོན། །ནམ་མཁའི་མཐའ་ལས་རང་བྱུང་བ། །སྣ་ཚོགས་[574][574.1]གཟུགས་ཅན་ཡིད་ལས་སྐྱེས། །རྣམ་རིག་སྣ་ཚོགས་གཟུགས་དོན་ཅན། །གཟུགས་རྣམས་ཐམས་ཅད་སྣང་བའི་དཔལ། །གཟུགས་རྣམས་མ་ལུས་འཆང་བ་པོ། །རྣམ་ཤེས་སྣ་ཚོགས་རྒྱུད་དོན་ལྡན། །བདག་རིག་[574.2]གཞན་རིག་ཐམས་ཅད་པ། །སྣ་ཚོགས་གཟུགས་ཅན་བྱེད་པ་པོ། །ཉོན་མོངས་པས་ནི་སེམས་འཁྲུགས་པས། །ཡེ་ཤེས་འཁོར་བའི་འདམ་དུ་བྱིང་། །མ་རིག་སྒོ་ངའི་སྦུབས་ཆུད་པས། །འགྱུ་བ་རླུད་གིས་རྒྱུ་བྱས་[574.3]ས། །སྒྲིབ་གཡོགས་མུན་པས་བར་བཅད་དེ། །མུན་པའི་འཁོར་ལོ་རྐྱེན་དུ་བྱུང་་། །ཡེ་དོན་མ་ཤེས་དོན་མ་རིག །ངོ་བོ་རང་བཞིན་ཐུགས་རྗེ་ལས། །རིག་པ་ཡིད་འགྱུས་སེམས་སུ་འཁྲུལ། །ཡིད་འཁོར་གསུམ་གྱིས་[574.4]དྲ་བར་འཐུམམུ། །མ་ངེས་ཁ་དོག་འཇའ་ཚོན་ལས། །རིགས་ཀྱི་ཁྱད་པར་མངོན་པར་སྣང་། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ཚུལ་དུ་འཁྲུལ། །འགྲོ་བའི་སྡུག་བསྔལ་ཟད་མེད་[574.5]མྱོང་། །སྨིག་ཐག་ཐོག་ཞི་དེ་ལས་སུ། །ཆུ་སྦྲུལ་མི་འཁྲུལ་དཔེ་ཡིས་མ་ཚོན། །སྣ་ཚོགས་ལུས་དང་གནས་ལ་སོགས། །བདག་དང་བདག་གིར་སོ་སོར་བཟུང་། །རྨི་ལམ་ཚུལ་དུ་སྡུག་བསྔལ་མྱོང་། །སྣང་སྲིད་སྐྱེ་འགུལ་[574.6]དེ་ལྟར་འཁྲུལ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། མ་རྟོགས་འཁྲུལ་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམསདཔའ་ཡིས། །ཀུན་བཟང་ཉིད་ལ་སླར་ཞུས་པ། །འཁྲུལ་པ་རྩད་ནས་ཇི་[575][575.1]ལྟར་བཅད། །ཅེས་ཞུས་པ་དང་། དེ་ནས་སྟོན་པ་ཀུན་བཟང་དེ་འོད་སྣ་ཚོགས་རང་ལ་ཐིམ་པའི་ཏིང་ངེ་འཛིན་ལ་ཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ནམ་མཁའ་ལས་བྱུང་[575.2]རང་བྱུང་བ། །ཤེས་རབ་ཡེ་ཤེས་མེ་བོ་ཆེ། །འགྲོ་བའི་མར་མེ་ཡེ་ཤེས་སྒྲོན། །གཟི་བརྗིད་ཕུང་པོ་འོད་གསལ་འབར། །ཤེས་རབ་རལ་གྲིས་འཁྲུལ་སྣང་གཅོད། །དུས་ཤེས་སེམས་ཅན་དབང་པོ་ཤེས། །ཕུང་པོ་ལྔ་དོན་[575.3]དུས་གསུམ་དུ། །སྐད་ཅིག་ཐམས་ཅད་བྱེ་བྲག་ཕྱེད། །སྡུག་བསྔལ་གསུམ་གྱི་སྡུག་བསྔལ་ཞི། །སྒྲིབ་པ་ཀུན་ལས་ངེས་པར་གྲོལ། །དུས་གསུམ་དུས་མེད་རྟོགས་པ་པོ། །རྣམ་གྲོལ་གསུམ་ལ་མཁས་པ་པོ། །གསུམ་[575.4]སེལ་མཐའ་ཡས་གྲོལ་གསུམ་ཐོབ། །བདག་གིར་མི་འཛིན་ངར་མི་འཛིན། །རྣམ་པར་དག་པ་བདག་མེད་ཆོས། །ཡང་དག་བདག་མེད་དེ་བཞིན་ཉིད། །རྣམ་པར་རྟོག་མེད་ལྷུན་གྱིས་གྲུབ། །བག་ཆགས་བཅས་པ་[575.5]གཏན་སྤངས་པ། །ཉོན་མོངས་དྲི་མ་ཀུན་ལས་འདས། །ལུས་ཀུན་ལས་ནི་རྣམ་པར་གྲོལ། །ནམ་མཁའི་ལམ་ལ་རབ་གནས་པ། །ཡིད་བཞིན་ནོར་བུ་ཆེན་པོ་འཆང་། །དུས་གསུམ་དུས་མེད་རྟོག་པ་པོ། །དོན་རྣམས་[575.6]ཇི་བཞིན་མི་བསྐྱེད་དེ། །བྱ་བ་བྱེད་པ་གྲོལ་བ་གྲོལ། །རང་བྱུང་ཡེ་ཤེས་བཙལ་མེད་པས། །གྲོལ་ནས་གྲོལ་བའི་ལམ་ཡང་སྟོན། །སྣང་བ་མེད་པའི་ཆོས་ཉིད་འདི། །མ་བཙལ་བཞག་པས་གྲུབ་པ་ཡིན། །འགྲོ་བའི་[576][576.1]སྡུག་བསྔལ་བྱང་ཆུབ་སེམས། །མ་བརྟགས་བཞག་པས་རྣམ་པར་གྲོལ། །དེ་ལས་བསྐྱོད་པ་མེད་བཞིན་དུ། །ནམ་མཁའི་མཐའ་ལྟར་མཉམ་པར་གནས། །དེ་བཞིན་རྟོགས་པའི་ཤེས་རབ་ཀྱིས། །མངོན་སུམ་མེད་པ་[576.2]རང་ལས་བྱུང་། །ཕྱི་ནང་གཉིས་ཀ་ཕྱི་ཉིད་དང་། །ཟབ་མོ་ཆ་ཤས་རྟོགས་ཡུལ་མེད། །སྣང་སྲིད་མིང་ཙམ་ལོག་པའི་སྟོངས། །དེ་བས་ཏིང་འཛིན་མཉམ་དང་བྲལ། །དེ་ལ་ཐ་ཚིག་ཕྱི་དང་ནང་། །རང་བཞིན་ཕུང་པོ་[576.3]ཁམས་ལྟར་གནས། །དུས་གསུམ་འདི་དང་མི་འབྲལ་བས། །ཐ་ཚིག་མིང་དུ་བཏགས་པ་མེད། །མི་ལེན་པས་ན་བདག་མེད་ཅིང་། །མི་འདོར་ཚིག་བྲལ་མཉམ་ཉིད་དོ། །ངོ་མཚར་རྨད་བྱུང་རོལ་པ་འདི། །གནས་པར་[576.4]བྱ་བའི་མིང་མེད་དེ། །བྱ་བྲལ་ནམ་མཁའ་ཇི་བཞིན་པས། །ཅི་ཡང་མི་དམིགས་གཏི་མུག་པས། །དེ་མ་ཐག་ཏུ་རང་ལས་བྱུང་། །འདི་ནི་ཐམས་ཅད་མཚུངས་པའི་ལམ། །འགྲོ་བ་ཀུན་ལ་རང་བཞིན་གནས། །ཡེ་ཤེས་[576.5]ཆེན་པོ་སྐད་ཅིག་གིས། །ཆོས་ཀུན་ཁོང་དུ་ཆུད་པ་པོ། །གདོད་ནས་དག་པ་ཆོས་ཀྱི་སྐུ། །ཡེ་ནས་གྲུབ་པས་བཙལ་མི་བྱ། །བསམ་དུ་མེད་དེ་ཡེ་སངས་རྒྱས། །བསྒོམ་དུ་མེད་དེ་དམིགས་དང་བྲལ། །རིག་ཡིད་སེམས་[576.6]མེད་དྲན་རྟོག་སངས། །ངང་དངས་ཡེ་ཤེས་ཉི་ཤར་བས། །མ་རིག་སྒོ་ངའི་སྦུབས་ནས་ཐོན། །མ་རིག་འཁོར་བའི་མུན་སངས་ནས། །སྲིད་པའི་དྲ་བ་འཇོམས་པ་ཡིན། །འཁྲུལ་སྣང་མ་ལུས་རྩད་ནས་གཅོད། །གཅིག[577][577.1]༄༅། ཁེས་ཀུན་གྲོལ་དགོངས་པ་ཤར། །རང་བཞིན་ངོ་བོ་ཐུགས་རྗེ་ལས། །སྐུ་གསུང་ཐུགས་ཀྱི་ངོ་བོར་རྟོགས། །དུག་གསུམ་ཉོན་མོངས་རྩད་ནས་བཅད། །ཕྱི་རོལ་ནང་དག་འཛིན་པ་བརླག །ངང་དངས་[577.2]གསལ་དག་དགོངས་པར་གནས། །བསམ་དུག་དངོས་མེད་ལྷ་ཁང་དུ་ཕྱིན་པས། །བསམ་འཕེལ་གྱི་ནོར་བུ་རིན་པོ་ཆེ་རྙེད་ནས། དགོས་འདོད་ཐམས་ཅད་དེ་ལས་བྱུང་བས། སྣ་ཚོགས་བསམ་བྲལ་གྱི་ཐུགས་རང་ལ་[577.3]ཤར་རོ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། འཁྲུལ་སྣང་རྩད་ནས་གཅོད་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་དེ་ལ་འདི་སྐད་ཞུས། །འཁྲུལ་ཆོད་རྟོགས་པའི་[577.4]འབྲས་བུ་གང་། །ཞེས་ཞུས་པ་དང་། དེ་ནས་སྟོན་པ་ཀུན་བཟང་དེ། འོད་ཟེར་སྤྲོས་པ་ཡོངས་སུ་གཅོད་པའི་ཏིང་ངེ་འཛིན་ལ་བཞུགས་སོ། །བཞེངས་ནས་འཁོར་ལ་བཀའ་སྩལ་པ། །འཁྲུལ་པ་ལོག་ཐོབ་འབྲས་བུ་[577.5]ནི། །ངེས་འབྱུང་གསུམ་པོ་སྐུ་གསུམ་ཐོབ། །མཆོག་གི་དང་པོ་སྐུ་གསུམ་འཆང་། །རང་བཞིན་ངོ་བོ་ཐུགས་རྗེ་ལས། །སངས་རྒྱས་སྐུ་ལྔའི་བདག་ཉིད་ཅན། །དོན་གསུམ་ཐེ་ཚོམ་མེད་པའི་བློ། །ཀུན་དོན་ཡོན་ཏན་[577.6]གསུམ་གྱི་བདག །ཡང་དག་ངེས་པའི་ལུང་དུ་ཟུང་། །གཟུགས་མེད་གཟུགས་བཟང་དམ་པ་སྟེ། །ལུས་མེད་ལུས་ཏེ་ལུས་ཀྱི་མཆོག །ཡེ་ནས་སྐྱེ་མེད་ཆོས་ཀྱི་སྐུ། །རྩལ་ཟེར་འགག་མེད་ལོངས་སྤྱོད་སྐུ། །ཐུགས་རྗེ་[578][578.1]སྤྲུལ་པའི་སྐུ་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །སྤྲུལ་པའི་སྐུ་སྟེ་སྐུ་ཡི་མཆོག །ལུས་ཀུན་ལས་ནི་རྣམ་པར་གྲོལ། །གྲོལ་པ་ཐར་པ་རྣམ་གྲོལ་ལུས། །རྣམ་གྲོལ་ཞི་བ་ཞི་བ་ཉིད། །མྱ་ངན་འདས་པ་མྱ་[578.2]ངན་འདས། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཐེག་པ་དགུ་ཡི་ངེས་འབྱུང་ལ། །སངས་རྒྱས་སྐུ་ཡི་བསྟན་པ་གཅིག །ཐེག་པ་དགུ་རྩེ་སྤྱི་ཏི་ཡིན། །དོན་གཅིག་གཉིས་མེད་ཆོས་ཀྱི་[578.3]དོན། །དམ་པའི་དོན་དེ་འཇིག་པ་མེད། །མི་གཡོ་རབ་ཏུ་དངས་པའི་བདག །རྣམ་པར་དག་པ་བདག་མེད་ཆོས། །ཡང་དག་ཡེ་ཤེས་ངང་དངས་གསལ། །ཆོས་ཉིད་རྣམ་ཤེས་ཡུལ་ལས་འདས། །སྐྱེ་འགག་དམིགས་[578.4]པའི་མཐའ་ལས་གྲོལ། ཁེས་རབ་ཆེན་པོས་སྐད་ཅིག་ལ། །ཆོས་ཀུན་མངོན་པར་རྟོགས་པ་པོ། །སྐྱེ་མེད་ཆོས་ཏེ་སྣ་ཚོགས་དོན། །ཐེག་པ་གཅིག་གི་འབྲས་བུར་གནས། །ཉོན་མོངས་ཁམས་རྣམས་དག་པའི་[578.5]བདག །ལས་ཀྱི་ཁམས་རྣམས་ཟད་པར་བྱེད། །ཆུ་བོ་རྒྱ་མཚོ་ཀུན་ལས་བརྒལ། །ཐུབ་པ་བློ་མཆོག་འབྱུང་པོ་སེལ། །ནོར་བ་ཐམས་ཅད་རྣམ་པར་སྤངས། །གསུམ་རིག་གཙང་མ་དག་པ་ཡིན། ཁུ།བ་མཐའ་མཐར་[578.6]ཕྱིན་འཁྲུལ་པ་མེད། །བྱ་བ་བྱས་པ་སྐམ་སར་གནས། །ཐུབ་པ་མེད་པ་དཔེ་མེད་པ། །ཆགས་བྲལ་ལུས་ལས་འདས་པཔོ། །རིནཆེནལྔཡིདཀྱིལའཁོར་དུ། །འོདཟེརསྣཚོགསའཐིམཔའི་ཐབས། །སྟོང་ཉིད་[579][579.1]ཀློང་ཡངས་མ་ཡི་དབྱིངས། །རྩལ་ཟེར་ཡན་ལག་བུ་རྣམས་དང་། ཁེས་རབ་མཁའ་ལ་འདེགས་པ་དང་། །འབྱུང་བ་མ་ལ་ཞ་བ་དང་། ཁེས་རབ་དབྱིངས་སུ་ཐིམ་པ་དང་། །ཡིན་ལ་མིན་པ་མེད་པ་[579.2]དང་། ཤེས་པ་མ་ཁའ་ལ་འཁྱིལ་བ་དང་། །རིག་པ་རང་སར་གནས་པའོ། །ཐིམ་པ་ལ་ནི་མ་རྨུགས་དང་། །གསལ་ལ་རྟོག་པ་མེད་པ་དང་། །སོ་སོར་མ་འདྲེས་པ་ལ་མ་འབྱེད་པའོ། །དོན་གྲུབ་བསམ་པ་ཡོངས་སུ་[579.3]གྲུབ། །ཐོལ་བྱུང་ཞབྲུལ་ཆོད་ལོག་རྟོག་ཡིན། །ནམ་མཁར་རྟོག་པ་སྐྱེ་མེད་ཅིང་། །རྟོགས་པ་དེ་ཉིད་ནམ་མཁའ་འདྲ། །མི་ཆགས་ནམ་མཁའ་ལྟ་བུ་ལ། །རང་དོན་ཆེན་པོ་ནམ་མཁའ་འབྱུང་། །མཉམ་པས་རིམ་པས་[579.4]བཀོད་པ་མེད། །གཅིག་པས་ཕྱོགས་བཅུ་དངོས་དང་བྲལ། །རང་བཞིན་གནས་པས་ལྷུན་གྱིས་གྲུབ། །གདོད་ནས་དག་པའི་སྙིང་པོ་ཡིན། །ལྷག་པའི་བསམ་པ་བཟུང་བ་མེད། །ཅེས་གསུངས་སོ། །ཉི་ཟླ་འབར་བའི་[579.5]རྒྱུད་ལས། འཁྲུལ་པ་རྩད་བཅད་རྟོགས་ཐབས་འབྲས་བུ་བསྟན་པའི་ལེའུ་སྟེ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུསླ། །གསང་སྔགས་དོན་གྱི་ངོ་བོ་[579.6]གང་། །ཞེས་ཞུས་པ་དང་། དེ་ནས་སྟོན་པ་ཀུན་བཟང་དེ། འོད་བཀ་ལ་བ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འདི་སྐད་གསུངས། །གསང་སྔགས་དོན་གྱི་ངོ་བོ་ནི། །གཟུང་འཛིན་[580][580.1]སྐྱོབ་པའི་གསང་སྔགས་ཡིན། །སྐྱེ་མེད་སྙིང་པོ་བཅུད་འདུས་ཀློང་། །བྱར་མེད་ཐ་སྙད་ཀུན་ལས་གྲོལ། །སྙིང་པོ་ཆོས་ཉིད་ཀློང་དཀྱིལ་ན། །ཀ་དག་རང་བྱུང་ངང་དངས་བཞུགས། །ཕྱི་གྲོལ་ནང་དག་ཡིད་གཉིས་[580.2]བརླག །རྣམ་དག་སྙིང་པོ་མ་ཡི་ཀློང་། །དངོས་འཛིན་རྟོག་པའི་མཐའ་རྣམས་གཅོད། །མ་འགགས་འོད་གསལ་རང་སངས་པས། །གཏི་མུག་ཆད་མཐའ་རྣམས་སྤྲོས་གཅོད། །དེ་ཡིས་གཟུང་བྱའི་ཆོས་ལས་སྐྱོབ། །ཀུན་[580.3]གཞི་སྟོང་གསལ་ཆོས་ཉིད་ཀློང་། །རྩིས་གདབ་དྲན་རྟོག་ཡིད་ལས་འདས། །དེ་ཡིས་འཛིན་པའི་སྐྱོན་ལས་སྐྱོབ། །ཡིད་གཉིས་རྩད་ཆོད་གཟུང་འཛིན་མེད། །གཟུང་འཛིན་ལས་སྐྱོབ་གསང་སྔགས་ཡིན། །རིག་གསུམ་[580.4]འཆང་བ་གསང་སྔགས་འཆང་། །གསང་སྔགས་ལས་བྱུང་ཡི་གེ་མེད། །མིང་ཙམ་འདི་ཞེས་བསྟན་པ་ནི། །ཀུན་ཏུ་བཟང་པོས་མཚོན་དུ་མེད། །ངོས་བཟུང་མེད་པས་གསང་བ་ཡིན། །གསལ་ཞིང་ཁྱབ་པས་སྔགས་པ་[580.5]ཡིན། །དངོས་པོ་ཡེ་མེད་གསང་བ་ཡིན། །མཚན་མ་སྣ་ཚོགས་སྔགས་པ་ཡིན། །གསལ་བའི་སྙིང་པོ་བཅུད་འདུས་ཡིན། །སྔགས་པ་རང་གསལ་འོད་གསལ་ཡིན། །དོན་ནི་གཉིས་འཛིན་སྤྲོས་པ་ཆོད། །གསང་སྔགས་[580.6]ངོ་བོ་དེ་ལྟར་ཡིན། །ངོ་བོ་རང་འབར་ཀུན་གསལ་གདངས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། གསང་སྔགས་དོན་གྱི་ངོ་བོ་བསྟན་པའི་ལེའུ་སྟེ་དྲུག་པའོ།། །།དེ་ནས་རྡོ་རྗེ་སེམས་དཔའ་[581][581.1]ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པའི་རྒྱལ་པོ་ཇི་ལྟར་བཤད། །ཅེས་ཞུས་པ་དང་། སྟོན་པས་འཁོར་ལ་བསྟན་པའི་ཕྱིར། མཚོན་བརྗོད་དང་བྲལ་བའི་ཏིང་ངེ་འཛིན་ལ་སྙོམས་པར་[581.2]ཞུགས་སོ། །དེ་ལས་བཞེངས་ནས་འདི་སྐད་གསུངས། །ཐེག་རྒྱལ་རྫོགས་ཆེན་སྤྱི་ཏི་འདི། །ནམ་མཁའ་སྟོང་པའི་དཔེས་མཚོན་ནས། །མཐའ་དབུས་ཕྱོགས་རིས་མེད་པར་བཤད། །ཉི་མ་ཟླ་བའི་དཔེས་མཚོན་[581.3]ནས། །སྣང་སྲིད་ཐམས་ཅད་གསལ་བར་བཤད། །བྱ་རྒྱལ་ཁྱུང་གི་དཔེས་མཚོན་ནས། །ཐེག་དམན་ཟིལ་གྱིས་གནོན་ཏེ་བཤད། །ཚངས་པའི་འབྲུག་སྒྲའི་དཔེས་མཚོན་ནས། །ཀུན་བསྒྲགས་གོ་ཞིང་གསལ་བར་[581.4]བཤད། །མཚོན་ཆའི་འཁོར་ལོའི་དཔེས་མཚོན་ནས། །འཁྲུལ་སྣང་སྤྲོས་པ་བཅད་དེ་བཤད། །མུན་ཁུང་སྒྲོན་མེའི་དཔེས་མཚོན་ནས། །དོན་གྱི་གསེར་དང་སྤྲད་དེ་བཤད། །ཉི་མའི་སྙིང་པོའི་དཔེས་མཚོན་ནས། །ཡང་[581.5]གསང་བཅུད་ཀྱི་སྙིང་པོ་བསྟན། །གསེར་འགྱུར་རྩི་ཡི་དཔེས་མཚོན་ནས། །མ་སྤངས་རང་སར་གྲོལ་བར་བཤད། །སྟག་མོའི་རྔམ་སྟབས་དཔེས་མཚོན་ནས། །དཀྱུས་ཀྱི་ས་རྣམས་གཅད་པར་བྱ། །རུས་སྦལ་ནུར་[581.6]འགྲོས་དཔེས་མཚོན་ནས། །ཚིག་གིས་འབྲུ་རྣམས་ཞིབ་ཏུ་གཉེར། །བཤད་པའི་ཆོས་རྣམས་ཐ་སྙད་ཡིན། །མ་བཤད་གོ་བའི་ཆོས་ཤིག་དགོས། །བློས་བཏགས་ཆོས་ནི་རྟོག་ཚོགས་ཡིན། །བློ་ལས་འདས་པའི་ཆོས་[582][582.1]ཤིག་དགོས། །བྱས་པའི་ཆོས་ནི་འདུས་བྱས་ཡིན། །མ་བྱས་རང་བྱུང་ཆོས་ཤིག་དགོས། །བསྒྲུབ་པའི་ཆོས་རྣམས་རྩོལ་བསྒྲུབ་ཡིན། །རྩོལ་བསྒྲུབ་ཆོས་ནི་ཡིད་སྨོན་ཡིན། །དམིགས་མེད་བསམ་འདས་ཆོས་ཤིག་[582.2]དགོས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། ཐེག་པའི་རྩེ་རྒྱལ་སྤྱི་ཏི་བཤད་པ་འི་ལེའུ་སྟེ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཡང་རབ་[582.3]རྣམས་ལ་ཇི་ལྟར་བཤད། །ཅེས་ཞུས་པ་དང་། སྟོན་པས་འཁོར་ལ་འདི་སྐད་གསུངས། །སྙིང་པོ་ཀ་དག་རང་བཞིན་ལ། །སྐྱེ་དང་འགག་པ་གཉིས་མེད་ཀྱང་། །གསུང་གི་སྒྲོན་མ་རབ་གསལ་བ། །ཡང་རབ་རྣམས་ལ་[582.4]བསྟན་པ་ནི། །གླེང་བྲལ་འདི་ལ་གནས་པ་ནི། །རྣལ་འབྱོར་ཡང་རབ་སྐལ་བ་བཟང་། །བདག་དང་གཞན་དོན་མི་འབྱེད་ཅིང་། །སྒྱུ་མ་ལྷུན་གྲུབ་ཡུལ་ལ་རོལ། །རཏྣ་དྷརྨ་སརྦ་སྒྲི་ཏུ་ཨ་སི་ཐིམ། རིན་ཆེན་ཆོས་[582.5]རྣམས་ཐམས་ཅད་ཀུན། །དབྱིངས་སུ་འདུས་པའི་ལྟ་ཁང་ན། །འགྱུ་བ་སེམས་ཀྱི་རྟ་ཕོ་ལ། །རང་བྱུང་ངང་དངས་མི་ཞོན་ནས། །སྒོ་ལྔ་རྣམ་དག་ལམ་དུ་བྱུང་། །སྣང་སྲིད་རང་གྲོལ་ཐང་ལ་རྒྱུག །དབྱེ་བསལ་མེད་པའི་[582.6]དགོངས་པར་གནས། །ཀུན་འབྱུང་ཀློང་ཡངས་ལྷ་ཁང་དུ། །སེམས་ཅན་སྤྱི་མེས་རིག་པའི་རྒྱལ། །སྣང་སྲིད་བསྐྱེད་ཀྱང་འཕེལ་འགྲིབ་མེད། །ནམ་མཁའ་འདི་ལས་ཆོ་འཕྲུལ་རྣམས། །ནམ་མཁའི་ངང་ལས་གཡོས་པ་[583][583.1]མེད། །སྙིང་པོའི་ཀློང་ནས་རྩལ་བུ་རྣམས། །བྱུང་ཡང་སྣ་ཚོགས་མ་ལ་ཐིམ། །མ་བུ་ངོ་སྤྲོད་ཡེ་སངས་རྒྱས། །འཁྲུལ་དང་མ་འཁྲུལ་ཡེ་ནས་མེད། །རྟོགས་དང་མ་རྟོགས་བློ་ཡི་ཡུལ། །ལྟ་སྒོམ་སྦྱོད་འབྲས་[583.2]བློ་ཡིན་པས། །བློ་ཉིད་མ་ཟད་བར་དུ་ནི། །ཇི་ལྟར་བསྒྲུབ་ཀྱང་རྩོལ་བའི་གནད། །རྩོལ་བའི་སེམས་ལ་བྱང་ཆུབ་མེད། །ཅེས་གསུངས་སོ། །ཉི་ཟླ་འབར་བའི་རྒྱུད་ལས། ཡང་རབ་རྣམས་ལ་བསྟན་པའི་ལེའུ་སྟེ་[583.3]བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྩོལ་བའི་བསྒྲུབ་ཆོས་མ་ཡིན་པའི། །བྱར་མེད་རྩོལ་བྲལ་བཀའ་སྩོལ་ཅིག །ཅེས་ཞུས་པ་དང་། སྟོན་པས་འཁོར་[583.4]ལ་བཀའ་སྩལ་པ། །བྱར་མེད་རྩོལ་བྲལ་ངས་བསྟན་གྱིས། །རྡོ་རྗེ་སེམས་དཔས་ཡིད་ལ་ཟུང་། །བསྒྲུབ་མེད་རྩོལ་བསྒྲུབ་སྨོན་པ་མེད་པ་ཡི། །བྱར་མེད་ལྷུན་རྫོགས་སྔ་མ་དེ་ཉིད་དོན། །བྱ་བྲལ་ནམ་མཁའ་ཇི་བཞིན་[583.5]ཏེ། །རྩོལ་བསྒྲུབ་བྱ་བཙལ་ག་ལ་ཡོད། །གསལ་དག་ཡེ་ཤེས་དགོངས་པ་འདི། །རང་བྱུང་ངང་དངས་འོད་གསལ་ཡིན། །བཏང་ངོ་བཞག་གོ་རང་བཞིན་དེ། །བླང་དོར་བྲོད་པ་བསྐྱེད་མི་བྱ། །མངོན་སུམ་མི་སྣང་རྒྱབ་[583.6]ནས་འབྱུང་། །ཕྲ་ཞིང་ཤེས་དཀའི་ཆོས་འདི་ནི། །རྣམ་པར་མི་རྟོག་རྟོག་ལས་འདས། །སྐུ་གཅིག་ཀུན་ཏུ་ཁྱབ་པས་བསྣན་པའི་ཆོས་མེད་དེ། །སེམས་དང་ཆོས་ནི་ཅི་ཡང་མ་ཡིན་པས། །གཞན་ལ་འདི་འདྲ་ཞེས་ནི་[584][584.1]བསྟན་དུ་མེད། །ཀུན་གཞི་ཀློང་ཡངས་ཆོས་དབྱིངས་ནས། །རིག་ཡིད་སེམས་བློ་ཅི་བྱུང་ཡང་། །ཐོལ་བྱུང་ངང་དངས་བྱུང་སར་ཐིམ། །དཔེར་ན་རྒྱ་མཚོར་རྡོ་བསྒྱུར་བཞིན། །སྐྱེ་བ་མེད་པའི་ཀློང་དུ་ཐིམ། །འགྱུར་བ་[584.2]མེད་པའི་རྒྱ་ཡིས་ཐོབ། །སེམས་ཀྱི་རང་བཞིན་ཅི་ཡང་མ་ཡིན་པས། །བསྒོམ་པའི་ཚེ་ན་ཅི་ཡང་མི་བསྒོམ་མོ། །མ་བསམ་མ་བསྒོམས་ཆོས་གཞན་དུ། །ཡོན་ཏན་ཆེ་བའི་བསམ་གཏན་ནི། །མ་བསྟན་ཉིད་དུ་བསམ་དུ་[584.3]མེད། །ཡང་དག་ཡེ་ཤེས་གཉིས་མེད་འཆང་། །རྣམ་པར་དག་པ་བདག་མེད་ཆོས། །ཡང་དག་བདག་མེད་ཡེ་ཤེས་གསལ། །ཆོས་ཉིད་རྣམ་ཤེས་ཡུལ་ལས་འདས། །བརྡའ་ནི་མཁའ་འགྲོ་ཆོས་ཉིད་བརྡའ། །རིན་[584.4]ཆེན་སྤུངས་པའི་དཀྱིལ་འཁོར་ན། །རང་བྱུང་ངང་དངས་སྣང་གསལ་བཞུགས། །ཆགས་སྡང་སྤྲོས་གཅོད་སྣང་སྲིད་གྲོལ། །མི་གནས་པ་ཡི་ཡུལ་མེད་དེ། །རྣམ་པར་མི་རྟོག་སྙིང་པོའི་ཀློང་། །ཡེ་ཤེས་ལུས་ཏེ་རང་དངས་[584.5]སྐུ། །ཆགས་བྲལ་ལུས་ལ་འདས་པ་པོ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། བྱར་མེད་སྤྲོས་བྲལ་བསྟ་་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་[584.6]ལ་འདི་སྐད་ཞུས། །གསང་སྔགས་བརྡའ་ཡིས་ཇི་ལྟར་བཤད། །ཅེས་གསོལ་པ་དང་སྟོན་པས་འཁོར་ལ་བཀའ་སྩལ་པ། །ཨ་ཀ་ད་ཏི་ས་ཏིས་ཧྲི་ཏི་སྙོ་ཡ་ཧྲི་ཏྭ། ཐུ་ལ་ཡ་ཨ་ཨ། །གསང་སྔགས་ངོ་བོ་བརྡའ་ཡིས་[585][585.1]བཤད། །སྔོན་ཐོག་སྐྱེ་མེད་གཏན་གཞིའི་གནས། །རྒྱལ་ཡུལ་ཆོས་ཉིད་ཡངས་པ་ན། །ཁྲི་རྗེ་ཡང་གསལ་སྤྱི་ཕུད་བཞུགས། །བློན་འཁོར་བསམ་མི་ཁྱབ་ཀྱིས་བསྐོར། །རྒྱལ་སྲིད་ཡོངས་ལ་མངའ་ཡང་[585.2]མཛད། །འདོད་པའི་ལོངས་སྤྱོད་བསམ་མི་ཁྱབ། །རིན་ཆེན་ཀུན་འབྱུང་ལྷ་ཁང་ན། །རང་བྱུང་ངང་དངས་ཡེ་གསལ་བཞུགས། །གསལ་དག་སྤྲོས་གཅོད་འཁོར་གྱིས་བསྐོར། །ཞིང་ཁམས་ཡོངས་ལ་མངའ་ཡང་[585.3]མཛད། །ཆོས་ཉིད་ལོངས་སྤྱོད་ཟད་མི་སྲིད། །སྣང་མེད་མུན་པའི་སྨག་རུམ་ན། །རྒན་མོ་རྨོངས་པ་གསལ་མེད་གནས། །མུན་པའི་ཐོ་ཡོར་འཁོར་གྱིས་བསྐོར། །དམུས་ལོང་ཤེས་མེད་མངའ་ཡང་མཛད། །སྣང་གསུམ་[585.4]ཆུ་བཞིའི་འཁོར་བར་འ་ས། །བརྒྱད་ཁྲི་བཞི་སྟོང་འཁོར་ལོངས་སྤྱོད། །ཀུན་འབྱུང་སྤྱི་སའི་ལྡུམ་ར་ན། །བསམ་འཕེལ་ནོར་བུ་རིན་ཆེན་ཡོད། །ཅི་འདོད་ལོངས་སྤྱོད་དེ་ལས་འབྱུང་། །ནོར་དེ་ཐོབ་ན་ཅི་བསམ་[585.5]འགྲུབ། །ནོར་དེ་ཐོབ་པར་འདོད་པ་ལ། །རང་བྱུང་ཡེ་ཤེས་ངང་དངས་ཀྱིས། །ཁྱུང་ལ་ཞོན་ནས་རལ་གྲི་ཐོགས། །སྲ་བའི་གོ་ཆ་ལུས་ལ་གོན། །མི་འཇིགས་པ་ཡི་མིག་ཕྱེ་ལ། །མི་ཡི་ནོར་བུ་རིན་ཆེན་ལ། །རང་བྱུང་[585.6]རིག་ཡིད་དྲན་སེམས་བློ། །ཐོལ་བྱུང་ངང་དངས་རིན་དུ་བཅོལ། །བསམ་འཕེལ་ནོར་བུ་ཐོབ་པར་གྱིས། །སྤྲོས་གཅོད་རང་གྲོལ་རྒྱ་ཡིས་ཐོབ། །ཡང་སྙིང་བདུད་རྩིའི་བཅུད་ཅིག་འཐུང་། །བཅུད་འཐུང་ཡང་སྙིང་ཐུགས་[586][586.1]ལ་ཆོངས། །སྐྱེ་འགག་འགྱུར་མེད་ཀློང་དཀྱིལ་དུ། །བྱར་མེད་བདེ་ཆེན་དབྱིངས་སུ་ཉོལ། །གཡོ་རྩོལ་འཕོ་འགྱུར་མེད་པར་མནལ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། གསང་སྔགས་བརྡའི་ལེའུ་སྟེ་བཅུ་[586.2]པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པའི་སྤྱི་ཕུད་སྤྱི་ཏི་སྲ །ཐེག་དགུ་སྣང་སྲིད་ཇི་ལྟར་རྫོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྡོ་[586.3]རྗེ་སེམས་དཔའ་ནམ་མཁའ་ཆེ། །ཀུན་བཟང་ཡངས་པ་རྣམ་དག་སྙིང་པོའི་ཀློང་། །མི་སྐྱེ་མི་འགག་སྙིང་པོ་རང་སར་གྲོལ། །རྫོགས་དང་མ་རྫོགས་གཞི་ལ་གཉིས་མེད་ཀྱང་། །རྩལ་ཟེར་ཡན་ལག་ཆོས་རྣམས་རྫོགས་[586.4]ལུགས་ནི། །འཇིག་རྟེན་པ་དང་འཇིག་རྟེན་འདས། །འཇིག་རྟེན་ས་ལ་གཉིས་ཏེ་སྐྱེ་བོ་དང་། ཁུ།བ་མཐའ་ལོག་པའི་ཕྱི་རོལ་མུ་སྟེགས་པའོ། །འདས་པའི་ཐེག་པ་རིམ་པ་དགུ། །མཁའ་ཀློང་རྣམ་དག་སྙིང་པོ་བ་་[586.5]སྐྲུངས་སུ། །རྩལ་ཟེར་འགག་མེད་ཆོས་རྣམས་ཡོངས་རྫོགས་ཏེ། །གཞི་གནས་རང་དངས་རང་སངས་སོ། །བདེ་ཆེན་མི་རྟོག་རང་སངས་པས། །གཟུང་འཛིན་དྲི་མེད་དགག་བསྒྲུབ་མེད། །གསལ་དག་མ་གཡོས་ག[586.6]དེང་དང་ལྡན། །སྣང་བ་ཆེན་པོ་གསལ་བ་ཡིན། །མུ་སྟེགས་ཆད་པའི་ལྷ་བ་རྫོགས། །དུས་གསུམ་འཕོ་འགྱུར་མེད་པར་གནས། །རྟག་པའི་ལྟ་བ་མ་ལུས་རྫོགས། །འདས་པའི་ཐེག་པ་དགུ་ཡི་རྫོགས་ལུགས་ནི། །ཡུལ་[587][587.1]སེམས་གཉིས་སུ་མ་གྲུབ་པས། །ཉན་ཐོས་ལྟ་བ་མ་ལུས་རྫོགས། །རྟེན་འབྲེལ་རྣམ་པར་རིག་བྱེད་མེད། །རང་རྒྱལ་ལྟ་བ་མ་ལུས་རྫོགས། །ཕྱི་ནང་གཟུང་འཛིན་གཉིས་མེད་པས། །སེམས་ཙམ་ལྟ་བ་མ་[587.2]ལུས་རྫོགས། །བདེན་གཉིས་ཁ་ཚོན་བཅད་དུ་མེད། །དབུ་མའི་ལྟ་བ་མ་ལུས་རྫོགས། །ཕྱི་རྒྱུད་སྡེ་གསུམ་རྫོགས་ལུགས་ནི། །ཕྱི་ལྟར་སྣང་བའི་རྣམ་པ་ལ། །ཕྱི་དག་ནང་དག་རྫས་དག་ལས། །ཀྲི་ཡའི་ལྟ་བ་མ་ལུས་[587.3]རྫོགས། །མར་སྤྱོད་ཡར་བལྟའི་རྩིས་གདབ་མེད། །ཨུ་པ་ཡ་ཡི་ལྟ་བ་རྫོགས། །འདི་ལྟར་སྣང་བའི་ཡུལ་རྣམས་ལ། །ཆོས་འཕྲུལ་ལྔ་དང་རིགས་གསུམ་མགོན། །ཆོ་འཕྲུལ་རྩིས་གདབ་བྱ་རྩོལ་མེད། །ཡོ་གའི་ལྷ་བ་མ་[587.4]ལུས་རྫོགསས། །འདི་ལྟར་ཕྱི་ནང་སྣོད་བཅུད་ཀྱང་། །ཏིང་འཛིན་རྣམ་གསུམ་སྒོར་ཞུགས་ནས། །ཡོ་བྱད་ལྔ་དང་ཆོ་འཕྲུལ་བཞི། །ཡོངས་སུ་བརྟགས་ནས་ལྷ་རུ་བསྒོམ། །སྣོད་ཀྱི་འཇིག་རྟེན་སྣང་བ་ལ། །ཕུང་པོ་རྒྱལ་[587.5]བ་རིགས་ལྔའི་སྐུ། །འབྱུང་བ་ལྔ་ནི་རིགས་ཡུམ་ལྔ། །ཚོགས་བརྒྱད་སེམས་དཔའ་སེམས་མར་སྣང་། །ཁམས་དང་སྐྱེ་མཆེད་ལྷ་ལྷ་མོ། །སྐྱེ་མཆེད་མུ་བཞི་སྒོ་བ་སྒོ་མ་བཞི། །སྣང་ལ་མི་འགོག་ཐབས་ཡིན་ཏེ། །རང་[587.6]བཞིན་མེད་པ་ཤེས་རབ་ཡིན། །གཉིས་མེད་ཐད་དུ་འབྲེལ པསན། །མ ཧྭའིལྟབ ཡོངས་སུ་རྫོགས། །རྒྱུ་ནི་དག་པའི་དབྱིངས་སུ་བལྟ། །འབྲས་བུ་ཡེ་ཤེས་དཀྱིལ་འཁོར་ལྷ། །དབྱིངས་དང་ཡེ་ཤེས་གཉིས་མེད་[588][588.1]པས། །ཨ་ནུའི་ལྷ་བ་ཡོངས་སུ་རྫོགས། །སྣང་བ་སྐུ་ཡི་དཀྱིལ་འཁོར་རྫོགས། །གྲག་པ་གསུང་གི་དཀྱིལ་འཁོར་རྫོགས། །དྲན་རྟོག་ཐུགས་ཀྱི་དཀྱིལ་འཁོར་རྫོགས། །འཁོར་འདས་སྐུ་གསུང་ཐུགས་སུ་[588.2]རྫོགས། །ཐམས་ཅད་ཡོངས་རྫོགས་རྫོགས་པ་ཆེ། །འཇུག་སྒོ་ཕྲིན་ལས་དཀྱིལ་འཁོར་དབང་དམ་རྫོགས། །ལྷ་བསྐྱེད་སྤྱན་འདྲེན་འཛབ་དང་གཏོར་མ་རྫོགས། །གཤེགས་གསོལ་སྨོན་ལམ་རྒྱས་འདེབས་ཐམས་ཅད་[588.3]རྫོགས། །ལྟ་སྒོམ་སྤྱོད་འབྲས་སྐུ་དང་ཡེ་ཤེས་རྫོགས། །ས་ལམ་ཡེ་ཤེས་ཕྲ་རགས་མན་ངག་རྫོགས། །རྒྱུད་ལུང་མན་ངག་དམ་ཚིག་སྡོམ་པ་རྫོགས། །ལམ་ལྔ་ས་བཅུ་ཕ་རོལ་ཕྱིན་བཅུ་རྫོགས། །ཐམས་ཅད་རྫོགས་[588.4]པའི་སྤྱི་ཏི་ཡོ་ག་ཡིན། །ལྷག་མ་མེད་པར་ཡོངས་སུ་རྫོགས། །འགྱུ་བ་མ་ཡིན་དྲང་པོར་རྫོགས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། རྫོགས་ལུགས་བསྟན་པའི་ལེའུ་སྟེ་བཅུ་གཅིག་པའོ།། །།སྭ་ཏི་[588.5]ཨ་ཏི་སརྦ་རྭ་ཙ་ཧྲི་ཏི་སྙོ་ཡ། དེ་ནས་རྡོ་རྗེ་སེམས་དཔའ་ཡིས། །དགུ་རྩེ་སྤྱི་རྒྱལ་སྤྱི་ཏི་མྲ །ཐམས་ཅད་ཡོངས་རྫོགས་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཨ་ས་སོ་ཏ་ཏི། ཁྲེ་ད་ཡ།[588.6]ཞེས་བྱ་སྟེ། མཁའ་དབྱིངས་རྣམ་དག་ཀུན་འབྱུང་ཀློང་ཡངས་ནས། །དགག་བསྒྲུབ་གཉིས་མེད་རང་གྲོལ་ཟང་ཐལ་བས། །སྣང་སྲིད་འཁོར་འདས་བཏགས་ཆགས་ཆོས་རྣམས་རྫོགས། །དངོས་མེད་མཚོན་དང་བྲལ་[589][589.1]ཞིང་མིང་མེད་པས། །ཐ་སྙད་བརྒྱད་ཁྲི་བཞི་སྟོང་མ་ལུས་རྫོགས། །སྤང་ལེན་ཆགས་སྡང་དབྱེ་བསལ་གཉིས་མེད་པས། །ཡོད་མེད་རྟག་ཆད་འགྲོ་བ་རིགས་དྲུག་རྫོགས། །ལྟ་བ་ཚིག་བྲལ་ཕྱོགས་རིས་[589.2]མེད། །བློས་བཏགས་ལྟ་བ་མ་ལུས་རྫོགས། །ཡེ་དག་མ་བཅོས་ངང་དག་པས། །ཐ་མལ་དྲན་བསམ་འགྱུ་བ་བྲལ། །ཡིད་བཟུང་སྒོམ་པ་མ་ལུས་རྫོགས། །རང་བྱུང་རྣམ་དག་མ་བཅོས་པར། །ལུས་ངག་ཡིད་གསུམ་[589.3]རྩོལ་མེད་དེ། །མ་ཆགས་མ་བཙལ་ཀློང་ཡངས་སུ། །ཆེད་བྱས་སྤྱོད་པ་མ་ལུས་རྫོགས། །ཡེ་སངས་སྙིང་པོའི་བཅུད་འདུས་པས། །སྤང་ཐོབ་མེད་པའི་ཐིག་ལེ་སྲ །ཡིད་སྨོན་འབྲས་བུ་མ་ལུས་རྫོགས། །ལྟ་བ་སྟོང་[589.4]གསལ་འགྱུར་བ་མེད། །སྒོམ་པ་འོད་གསལ་དམིགས་པ་མེད། །སྤྱོད་པ་བྱར་མེད་ཆགས་སྡང་མེད། །འབྲས་བུ་ཀ་དག་ཡིད་སྨོན་མེད། །གནད་གཅིག་གིས་ནི་གནད་རྣམས་ཐམས་ཅད་གྲོལ། །དོན་གཅིག་གིས་ནི་[589.5]དོན་རྣམས་ཐམས་ཅད་གཏན་ལ་འབེབས། །བརྡའ་གཅིག་གིས་ནི་བརྡའ་རྣམས་ཐམས་ཅད་གྲོལ། །ཚིག་གཅིག་ཤེས་པས་ཐ་སྙད་མ་ལུས་ཤེས། །ཐེག་པ་གཅིག་གི་སྒོར་ཞུགས་རྟོགས་པ་ཡིས། །བརྒྱད་ཁྲི་བཞི་སྟོང་[589.6]རྟོགས་པའི་མན་ངག་ཡིན། །ཨེ་མའོ་སངས་རྒྱས་སྤྱོད་ཡུལ་འདི། །བཙལ་བས་རྙེད་པའི་གནས་མེད་དོ། །རྟོག་མེད་མཉམ་ཉིད་ཆོས་ཀྱི་སྐུ། །བཟུང་བས་མི་ཟིན་ཆུ་ཟླ་འདྲ། །བྱ་བྲལ་ནམ་མཁའ་ཇི་བཞིན་ཏེ། །གཅིག་[590][590.1]གི་རྣམ་པ་ཡོངས་ཀྱི་མེད། །རྣལ་འབྱོར་བྱ་བྲལ་ནམ་མཁར་གནས། །མ་བྱུང་མ་སྐྱེས་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །ཅི་སྟེ་ལམ་ལ་བགྲོད་གྱུར་ན། །ནམ་མཁའི་མཐའ་བཞིན་ཐུག་པ་མེད། །ཅེས་[590.2]གསུངས་སོ། །ཉི་ཟླ་འབར་བའི་རྒྱུད་ལས། སྤྱི་ཏི་ཡོ་ག་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མཚན་དང་གཏད་རྒྱ་ཇི་ལྟར་[590.3]ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་མིང་མེད་མིང་དང་བྲལ། །ཡན་ལག་རྩལ་གྱི་རིག་པས་མིང་བཏགས་པ། །དུས་གསུམ་སངས་རྒྱས་གསང་བའི་བཅུད་ཕྱུང་བས། །སྙིང་པོ་[590.4]བཅུད་སྤུངས་ཐིག་ལེ་འདུས་པའི་རྒྱུད། །ཐུགས་ཀྱི་ཡང་སྙིང་དགོངས་པའི་བཅུད་འདུས་པས། །སངས་རྒྱས་ཀུན་གྱི་དགོངས་པ་འདུས་པའི་རྒྱུད། །བཀའ་རྒྱུད་ཀུན་གྱི་ཡང་སྙིང་བཅུད་དྲིལ་བ། །དོན་གྱི་བཅུད་[590.5]དྲེལ་ཐིག་ལེ་གསང་བའི་རྒྱུད། །བསྐལ་པ་སྟོང་དུ་བསགས་པའི་མུན་པ་རྣམས། །རིན་ཆེན་ཉི་ཟླས་སེལ་བས་ཉི་ཟླ་འབར། །ཐེག་པ་སྤྱི་འགྲེལ་སྤྱི་ཏི་ཡོ་གའི་རྒྱུད། །ཆོས་སྒོ་བརྒྱད་ཁྲི་བཞི་སྟོང་གཉའ་གཅོག་[590.6]པས། །རྫོགས་ཆེན་རྒྱལ་པོ་སྤྱི་ཏི་ཡོ་གར་ཟུང་། །ཐེག་པ་རྣམས་ཀྱི་དགུ་རྩེ་སྤྱི་རྒྱལ་འདི། །བློ་ཆེ་བློ་ཡངས་བློ་ཟབ་བློ་རྣོ་བ། །དད་མོས་བརྩོན་ལྡན་མ་ཆགས་སེར་སྣ་མེད། །ཉོན་མོངས་ཆུང་ཞིང་བྱང་ཆུབ་སྒྲུབ་ལ་[591][591.1]གཏད། །དྲེགས་ཤིང་མཁས་འདོད་མུ་ཅོར་སྨྲ་བ་དང་། །དོན་ལ་མི་བསྒོམ་ཚིག་ཟོལ་ཟོང་དུ་འཚོང་། །དེ་ལ་བསྟན་ན་གཉིས་ཀ་དམྱལ་བར་ལྟུང་། །དེ་བས་མན་ངག་ཤིན་ཏུ་གསང་བ་གཅེས། །ཞེས་[591.2]གསུངས་སོ། །ཉི་ཟླ་འབར་བའི་རྒྱུད་ལས། དུས་དང་མཚན་དང་གཏད་རྒྱ་བསྟན་པའི་ལེའུ་སྟེ་བཅུ་གསུམ་པའོ།། །།དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་འདུས་པ། ཀ་དག་རྣམས་ཀྱི་[591.3]གསང་དོན་བཅུད་དྲིལ་བ། མ་རིག་མུན་སེལ་ཉི་ཟླ་འབར་བའི་རྒྱུད་རྫོགས་སོ།། །།ཨུ་རྒྱན་པདྨ་འབྱུང་གནས་དང་། ལོསྣྲོ་བ་སྐ་བ་དཔལ་བརྩེགས་ཀྱིས་བསྒྱུར་ཞིང་གཏན་ལ་ཕབ་པའོ། །གཏེར་[591.4]རྒྱ།། །། རྒྱ་གར་སྐད་དུ། སརྦ་བྲརྙ྅ཤཱ་ཡ་སུ་ར་ས༷་གྲ་ཧ་གི་རི་ཀུ་ཊ་ཏནྟྲ། བོད་སྐད་དུ། སངས་རྒྱས་ཀུན་གྱི་དགོངས་པའི་བཅུད་བསྡུས་རི་བོ་བརྩེགས་པའི་རྒྱུད། དམ་པ་དང་པོའི་