Ngb-pt-0519-vol-06-text
Front
Body
རྫོགས་སོ། །སེམས་ཕྱོགས་ཀྱི་སྙན་བརྒྱུད་ཨིཐི།། །།རྒྱ་གར་སྐད་དུ། །ཏྲི་ཀྭ་ཡ་བརྩི་ཙྭ་ནཏནཏྲམསྣྲུ་ཤི་ཙྭ་ན་ཨ་ལ༷་ས་མ་ཏི་ནཱ་མ།། བོད་སྐད་དུ། །སྐུ་གསུམ་ཡེ་ཤེས་ལྔ་ལྡན་གྱི་རྒྱུ་འཇམ་དཔལ་ཡེ་ཤེས་རྒྱན་གྱི་དགོངས་པ་ཞེས་བྱ་བ། །འཇམ་དཔལ་ཡེ་ཤེས་ཀྱི་སྐུ་བདེ་བ་ཆེན་པོ་ལྷུན་གྱིས་གྲུབ་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དེ། །ལྕང་ལོ་ཅན་གྱི་གནས་རི་བོ་ཆེན་པོ་དེ་ན། །རྡོ་རྗེ་རྣམ་འབྱོར་མ་ལྔ་དང་ཐམས་ཅིག་ཏུ་བཞུགས་སོ། །དེའི་ཚེ་སེམས་དཔའ་ཆེན་པོ་གསང་བའི་བདག་པོས་འདི་སྐད་ཅེས་གསོལ་ཏོ། །ཀྱེ་ཀྱེ་བཅོམ་ལྡན་འདས་ཐུགས་རྗེ་དང་ཐབས་སུ་ལྡན་པ། །བདག་ཅག་རྡོ་རྗེ་མཁའ་འགྲོ་མ་དང་བཅས་པ་ལ། །སྐུ་གསུམ་ཡེ་ཤེས་ལྔའི་དོན་བཤད་དུ་གསོལ། །ཞེས་ཞུས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། །གསང་བའི་བདག་པོ་ཉོན་ཅིག །སྐུ་གསུམ་ཡེ་ཤེས་ལྔའི་དགོངས་པ་དོན་ཕྱིན་ཅི་མ་ལོག་པ་འདི། །མཁའ་འགྲོ་མ་ལྔ་ལ་བཤད་པར་བྱའོ། །སྐུ་གསུམ་ཡེ་ཤེས་ལྔའི་རྒྱུད་འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །གླེང་གཞིའི་ལེའུ་སྟེ་དང་པོའོ།། །།དེ་ནས་ཡང་གསང་བའི་བདག་པོས་འདི་སྐད་ཅེས་གསོལ་ཏོ། །ཀྱེ་ཀྱེ་ཐུགས་རྗེ་ཆེན་པོ། །ཆོས་སྐུ་རིན་པོ་ཆེ་ལྟ་བུ་བཤད་དུ་གསོལ་ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། །རིགས་ཀྱི་བུ་གོ་བར་དཀའ་བའི་ཚིག་འདི་ཡིད་ལ་ཟུང་ཞིག །དྷརྨ་ཀྭ་ཡ་རཏྣ་མ་ལ་ཨུ། །སྣང་བ་ཆེན་པོ་གསལ་བ་ཆེ། །དག་པའི་ནམ་མཁའ་མཐའ་དང་བྲལ། །སྤྲོས་བྲལ་ཆོས་ཉིད་འགྱུར་བ་མེད། །མཐའ་དང་དབུས་མེད་ཕྱོགས་ཆ་ཀུན་དང་བྲལ། །རང་སྣང་ཆོས་དབྱིངས་དག་པའི་ཞིང་། །དང་པོའི་སངས་རྒྱས་རྒྱུ་མེད་པས། །སངས་རྒྱས་ཐོག་མ་ཐ་མ་མེད། །སྟོང་པ་ཡེ་ཤེས་སྙིང་པོ་ཅན། །མཐའ་ལ་མི་གནས་རྡོ་རྗེའི་སྐུ། །ཡེ་ཤེས་མིགགཅིག་དྲི་མ་མེད། །ནོར་བུ་ཆེན་པོ་རིན་ཆེན་རྟོག །སྦྲོས་དང་བྲལ་བའི་ཆོས་ཉིད་ལ། །གཟུང་འཛིན་བྲལ་བའི་རིག་པ་གསལ། །ངོ་བོ་རང་བཞིན་ཐུགས་རྗེའི་བདག །ཡེ་ནས་སྐུ་གསུམ་འོད་དུ་གསལ། །རང་བཞིན་ལྷུན་གྱིས་གྲུབ་པའོ། །ཞེས་སྐུ་གསུམ་ཡེ་ཤེས་ལྔའི་རྒྱུད། །འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །ཆོས་སྐུའི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། །ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལོངས་སྐུའི་སྣང་བ་ཇི་ལྷར་ཤར། །བདག་ཅག་རྣམས་ལ་བཤད་དུ་གསོལ། །ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། །ཆོས་སྐུ་རྣམས་དག་དབྱེར་མེད་ཀྱང་། །ཡེ་ཤེས་སྐུ་སྟེ་རང་བྱུང་བ། །སངས་རྒྱས་སྐུ་ལྔའི་བདག་ཉིད་ཅན། །མཚན་ཉིད་སོ་སོའི་ཚུལ་འཛིན་པ། །ཤེས་རབ་སྟོབས་བཅུ་ཡེ་ཤེས་སྐུ། །བཞི་བཅུ་རྩ་གཉིས་མཚན་འཆང་བ། །སྐུ་གཅིག་ཀུན་ཏུ་ཁྱབ་པའི་སྐུ། །འབྱུང་བའི་ཐིག་ལེ་འོད་དུ་གསལ། །ཁ་དོག་ལྔ་ཡི་བདག་ཉིད་ཅན། །རིགས་ལྔའི་སངས་རྒྱས་ཡུམ་དང་བཅས། །མཚན་ཉིདའཛིན་པའི་ཚོམ་བུ་ལྔ། །ཆོས་ཉིད་མཁའ་ལ་འོད་གསལ་བ། །གསལ་འཚེར་ལྷུན་སྡུག་གཟི་བརྗིད་འབར། །གསལ་དང་དྲོ་དང་བསིལ་བ་དང་། །ཡང་དང་ཁྱབ་པའི་བདག་ཉིད་ཅན། །རྣམ་རྟོག་མི་མངའ་ཅིར་ཡང་ས་ལེམཁྱེན། །མངོན་ཤེས་དྲུག་ལྡན་ཆོས་ཀྱི་སྦྱན། །ཡི་གེ་དྲུག་པ་རྡོ་རྗེའི་སྒྲ། །ས་ཡི་སྙིང་པོ་འགྲོ་བ་འཛིན། །མཁའ་ལ་ཉི་ཤར་མུན་པ་སེལ། །བྱ་བཙལ་མེད་པའི་ངང་དུ་སྐྱེལ། །སརྦ་ཏ་ཐུ་ག་ཏ་ཀུ་ལ་པ྅་མཎྜལ་ལ་དྷ་ཏུ། །ཞེས་སྐུ་གསུམ་ཡེ་ཤེསལྔའི་རྒྱུད། །འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །ལོངས་སྐུའི་གྲུབ་ཚུལ་བསྟན་པའི་ལེའུ་སྟེ་གསུམ་པའོ། །དེ་ནས་གསང་པའི་བདག་པོས་ཞུས་པ། །ཀྱེ་ཀྱེ་བཅོམ་ལྡན་ཐུགས་རྗེ་ཅན། །སྦྲུལ་སྐུ་སྣང་བ་ཇི་ལྟར་གྲུབ། །སྦྲུལ་པའི་སྐུ་ཉིད་ཇི་ལྷར་ཤར། །བདག་ཅག་རྣམས་ལ་བཤད་དུ་གསོལ། །ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། །ཡེ་ཤེས་ལྔ་ཡི་མཚན་ཉིད་ལས། །འབྱུང་བའི་དྭངས་མ་འོད་དུ་གསལ། །དེ་ཡི་སྣང་བ་སྣོད་དུ་གྲུབ། །སྙིགས་མའི་འབྱུང་བ་ཞེས་སུ་གྲགས། །མཁའ་ལ་རླུད་བརྟེན་དེ་ལ་ཆུ་ཡི་ཕུང་པོའི་བརྟེན། །དེ་ལས་ས་ཆེན་པོ་འདི་བརྟེན་སྲིད་པའི་སྒོ་ང་གྲུབ། །རྐྱེན་རྣམས་ཚོགས་ནས་ལས་ཀྱི་འཁྲུལ་འཁོར་རབ་ཏུ་འབྱུང་། །སྣ་ཚོགས་གཟུགས་ཅན་ཡིད་ལས་སྐྱེས། །སྤྲུལ་སྐུའི་ཞིང་ཁམས་སོ་སོར་གསལ། །མ་རིགས་འཁྲུལ་འཁོར་འདི་ལ་ཟང་ཅིང་འབྲི་བ་མེད། །སངས་རྒྱས་འགྲོ་བའི་ཚུལ་འཛིན་པ། །དཔལ་ལྡན་སངས་རྒྱས་པདྨ་སྐྱེས། །སྤྲུལ་པའི་འཁོར་ལོ་སྣ་ཚོགས་འཆད། །བསོད་ནམས་ཚོགས་དང་ཡེ་ཤེས་ལྔ་ལྡན་དྲུག །འདུལ་བའི་ཕྱག་མཚན་སོ་སོར་ཐ་དད་སྣང་། །ཀུན་ཏུ་བཟང་པོ་བློ་གྲོས་བཟང་། །དངོས་པོ་ཀུན་གྱི་རང་བཞིན་འཛིན། །རྣམ་གྲོལ་གསུམ་ལ་མཁས་པའོ། །སྐྱེ་མེད་ཆོས་ཏེ་སྣ་ཚོགས་སྟོན། །མགོན་པོ་སེམས་ཅན་ཀུན་གྱི་མཆོག །སེམས་ཅན་ཐམས་ཅད་རབ་སྒྲོལ་བྱེད། །རྒྱ་མཚོར་ཆུ་བྲན་འདུ་བ་བཞིན། །ཐམས་ཅད་རང་སར་དབྱེར་མེད་ཐིམ། །ཨ་ཧྲོ་མ་ཡང་དྷ་དུ་མ་ལ་ཨ་སེང་། །ཞེས་སྐུ་གསུམ་ཡེ་ཤེས་སྔའི་རྒྱུ་འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །སྤྲུལ་སྐུའི་སྣང་བ་ཤར་ཚུལ་བསྟན་པའི་ལེའུ་སྟེ་བཞི་པའོ།། །།དེ་ནས་ཡང་གསང་བའི་བདག་པོས་མཁྱེན་བཞིན་དུ་ཞུས་པ། །ཀྱེ་བཅོམ་ལྡན་འདས་ཐུགས་རྗེ་དང་ཐབས་སུ་ལྡན་པ། །སྐུ་གསུམ་སྣང་བ་བཤད་པ་ལེགས། །ཡེ་ཤེས་ལྔ་རྣམས་བཤད་དུ་གསོལ། །ཅེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། །ཡེ་ཡིས་ཤེས་པ་གཅིག་ཡིན་ཀྱང་། །མཚན་ཉིད་རྣམ་པ་ལྔ་དང་ལྡན། །ང་ལ་རང་བཞིན་མེད་པས་ན། །ཆོས་དབྱིངས་ཡེ་ཤེས་ལྷུན་གྱིས་གྲུབ། །ང་ལ་ཡོན་ཏན་མི་འགག་བས། །མེ་ལོང་ཡེ་ཤེས་ལྷུན་གྱིས་གྲུབ། །ང་ལ་སྐྱེ་འགག་མེད་བས་ན། མཉམ་ཉིད་ཡེ་ཤེས་ལྷུན་གྱིས་གྲུབ། །ང་ཡི་ཤེས་རབ་སྦྱོད་པས་ན། །སོ་སོར་རྟོགས་པའི་ཡེ་ཤེས་ཡིན། །ང་ལ་ཐོག་པ་མེད་པས་ན། །བྱ་བ་གྲུབ་པའི་ཡེ་ཤེས་ཡིན། །སྟོང་པ་ཡེ་ཤེས་རྩལ་སྣང་བ། །མཚན་ཉིད་འཛིན་པའི་ཡེ་ཤེས་ལྔ། །རིག་པའི་ཀློང་ནས་འོད་གསལ་པ། །དཀར་དང་དམར་དང་སེར་དང་ལྗང་། །མཐིང་ཁ་རྣམ་པར་ཡེ་ནས་གྲུབ། །སྣང་ལ་དངོས་མེད་མེ་ལོང་བཟུགས་བརྙན་འདྲ། །ནམ་མཁའ་མེ་ལོང་ཆུ་བོ་དང་། །སྐྲུ་གྲི་སོ་དང་རླུ་་བཞིན་ནོ། །སརྦ་རྙོ་པ྅་ཀ་ལ་དྷ་ཏུ་ཨ། །ཞེས་སྐུ་གསུམ་ཡེ་ཤེས་ལྔའི་རྒྱུད། །འཇམ་དཔལ་ཡེ་ཤེསརྒྱན་གྱི་དགོངས་པ་ལས། །ཡེ་ཤེས་ལྔའི་འདུག་ཚུལ་བསྟན་པའི་ལེའུ་སྟེ་ལྔ་པའོ།། །།དེ་ནས་ཡང་གསང་བའི་བདག་པོས་མཁྱེན་བཞིན་དུ་ཞུས་པ། །ཀྱེ་བཅོམ་ལྡན་འདས་ཀུན་ཏུ་བཟང་། །སྐུ་གསུམ་ཡེ་ཤེས་ལྔཡི་བདག་པོ་དེ། །བག་ཆགས་སྦུབས་ཇི་ཇི་ལྟར་གནས། །བདག་ཅག་རྣམས་ལ་ལེགས་པར་གསུངས། །ཞེས་ཞུས་སོ། །དེ་ནས་བཅོམ་ལྡན་བདས་ཀྱིས་བཀའ་སྩལ་པ། །གསང་བའི་བདག་པོས་ཞུས་པ་ལེགས། །ཐུགས་རྗེ་རྩལ་གྱི་འཆར་ལུགས་དང་། །སྲིད་པ་བཞི་ཡི་འཛིན་ལུགས་དང་། །སྡུང་བྱེད་ལུས་ཀྱི་འཆག་ལུགས་དང་། །གསོ་བྱེད་བཅུད་ཀྱི་འཆག་ལུགས་བཞིས། །དངོས་པོ་གདོས་པ་ཅན་འདི་གྲུབ། །སྤྲུལ་པའི་སྐུ་རུ་སྣང་རུ་སྣང་བའོ། །དེ་ལ་ཇི་ལྟར་གནས་ཤེ་ན། །ཟླ་བའི་གདན་ལ་ཉི་མའི་དབུ་རྒྱན་ཅན། །རིན་ཆེན་གུར་ཕུབ་ཟུར་གསུམ་རེ་ཐག་བཞི། །རྟོག་མེད་རིག་པ་ཆོས་ཀྱི་སྐུ། །ཡེ་ཤེས་ལྔ་ཡི་གཞལ་ཡས་ན། །ལོངས་སྤྱོད་རྫོགས་པའི་སྐུ་རུ་བཞུགས། །ཐུགས་རྗེ་འོད་ཀྱི་ཀུན་ཏུ་ཁྱབ། །རྟགས་ཀྱི་སྒྲོན་མ་སྦྲུལ་པའི་སྐུ། །མཆོག་གི་དང་པོ་སྐུ་གསུམ་འཆང་། །རྣམ་པར་རྟོག་མེད་ལྷུན་གྱིས་གྲུབ། །བསམ་གཏན་ཆེན་པོའི་ཏིང་འཛིན་གནས། །ཡེ་ཤེས་བཞི་ཡིས་བདག་གཉིད་ཅན། །ཁྱུང་ཕྲུག་སྒོ་ངའི་ཚུལ་དུ་གནས། །མ་རིག་སྒོ་ལྔའི་སྦུབས་འབྱེད་པ། །ངོ་བོ་གནས་དང་ལམ་དང་སྒོ། །སྐྱོན་དང་ཡོན་ཏན་རྣམས་ཀྱིས་དབྱེ། །དོན་གསུམ་ཐེ་ཚོམ་མེད་པའི་བློ་ས། །རང་གི་མཚན་ཉིད་ཉམས་ལ་སྦྱར། །དུས་བཞི་མཉམ་སྦྱོར་དགོངས་པ་ནི། །ངང་དང་རང་བཞིན་བདག་ཉིད་ཆེན་པའི་དོན་ལ་བཞག །ཅེས་སྐུ་གསུམ་ཡེ་ཤེས་ལྔའི་རྒྱུད། །འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །བག་ཆགས་སྦུབས་བསྟན་པའི་ལེའུ་སྟེ་དྲུག་པའོ། །དེ་ནས་ཡང་གསང་བའི་བདག་པོའི་ཞུས་པ། །ཀྱེ་ཀྱེ་བཅོམ་ལྡན་མཁྱེན་གསལ་རིག །སྤྲུལ་པའི་སྐུ་ཡི་ཞིང་ཁམས་ནས། །ལོངས་སྐུའི་ཞིང་དུ་ཇི་ལྟར་གྲོལ།བདག་རྣམས་ལ་གསུང་དུ་གསོལ། །ཞེས་ཞུས་སོ། །དེ་ནས་ཡང་གསུང་པས་སྲིད་པའི་སྒོམ་པ་ལས་རྒལ་བ། །སྐད་ཅིག་ཐམས་ཅད་བྱེ་བྲག་ཕྱེད། །གྲོལ་བ་ཐར་པ་རྣམ་གྲོལ་ལུས། །འཇུག་དང་སྣང་དང་ཤེས་རབ་གྲོལ། །དོན་གྱི་ངོ་ལ་གནས་པ་དང་། །འགག་དང་སྐྱེ་དང་གནས་དང་ཤེས། །ཐུགས་རྗེ་འབྱུང་དང་རང་སར་གཤེགས། །ཡུལ་གྱི་མཚན་མ་རྣམ་ཤེས་ཉིད་ལས་གྲོལ། ཁྲེས་པལྔ་ནི་འོད་ཟེར་ལྔ་ལ་འདུ། །འོད་ཟེར་ལྔ་པོ་རིག་ཀྱི་སྐུ་ལ་འདུ། །སྐུ་ལྔ་ཡེ་ཤེས་ལྔ་ཡི་ངང་དུ་གྲོལ། །ཡེ་ཤེས་ལྔ་ཉིད་མཚོན་གྱི་དྲུག་བུ་བཞིན། །བཞི་པོ་རིམ་བཞི་གཅིག་གིས་སྐྱོད་པ་ཡིས། །གནས་དང་ལམ་དུ་བྱུང་སྟེ་སྒོ་རུ་འཐོན། །དེ་ཡི་སྣང་བ་རིམ་མིན་ཅིག་ཅར་འཆར། །སྐྱེ་བ་རིམ་སྐྱེ་ཤེས་པ་ཐད་ཀར་ཆོད། །ལོངས་སྐུ་འོད་གསལ་ཐུགས་རྗེ་སྤྲུལ་སྐུ་འབྱུང་། །སྐུ་ཡི་འོད་དང་གསུང་གི་ཟེར། །རྣམ་གྲོལ་ཞི་བ་ཞི་བ་ཉིད། །ཅེས་སྐུ་གསུམ་ཡེ་ཤེས་ལྔའི་རྒྱུད། །འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །གྲོལ་ཚུལ་བསྟན་པའི་ལེའུ་སྟེ་བདུན་པའོ།། །།དེ་ནས་ཡང་ཞུས་པ། །ཀྱེ་ཀྱེ་བཅོམ་ལྡན་འདས་མཐའ་ལས་འདས། །ལོངས་སྐུའི་ཞིང་ནས་ཆོས་སྐུར་ཇི་ལྟར་གྲོལ། །བདག་ཅག་རྣམས་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ནམ་མཁའ་ལས་བྱུང་རང་བྱུང་བ། ཁྲེས་རབ་ཡེ་ཤེས་མི་བོ་ཆེ། །གཟི་བརྗིད་ཕུང་པོ་ལྟ་ན་སྡུག །ལོངས་སྤྱོད་རྫོགས་སྐུ་ཀུན་གྱིས་རྒྱལ། །མྱ་ངན་འདས་པ་མྱ་ངན་འདས། །ལེགས་པར་མྱ་ངན་འདས་དང་ཉེ། །བདེ་སྡུག་གསལ་ནས་མཐར་གྱུར་བ། །མི་མངོན་མི་སྣང་གསལ་བྱེད་མིན། །མི་འགྱུར་ཀུན་འགྲོ་ཁྱབ་པ་པོ། །ཀྱེ་སེམས་དཔའ་ཆེན་པོ། །ཡེ་ཤེས་རླུ་་གི་ཤེས་རབ་མཁའ་ལ་འདེགས། །སྙིགས་མ་ལྔ་པོ་དྭངས་མའི་ངང་དུ་གྲོལ་དྭངས་མ་ལྔ་པོ་རང་རང་མ་ལ་གནས། ཁྲེས་རབ་སྤྱན་གསུམ་རྣམ་པར་དག །མ་རྨུགས་གསལ་བའི་རྟོགས་མཐའ་བྲལ། །རང་རིག་ཡེ་ཤེས་ཡིན་པ་ལ། །བག་ཆགས་ལུས་ཀྱི་རྟོག་པ་མེད། །རྡོ་རྗེ་ཟླ་བ་དྲི་མེད་འོད། །འབྱེད་པ་མེད་པའི་ཤེས་རབ་གསལ། །རྣམ་པར་དག་པ་བདག་མེད་ཆོས། །སྡུག་བསྔལ་གསུམ་གྱི་སྡུག་སྔལ་ཞི། །ཡང་དག་མཐའ་ལ་རྣམ་པར་གནས། །ཆོས་སྐུ་ཆོས་ཉིད་དབྱེར་མེད་པ། །ཡེ་ཤེས་སྦྱན་ནི་ལོངས་སྐུར་གསལ། །སྲོག་མེད་སྐུ་ལྔ་སྤྲུལ་སྐུར་གནས། །དབྱེར་མེད་ཤེས་རབ་ངང་ལ་གསལ། །ཅེས་སྐུ་གསུམ་ཡེ་ཤེས་ལྔའི་རྒྱུད། །འཇལ་དཔལ་ཡེ་ཤེས་རྒྱན་གྱི་དགོངས་པ་ལས། །ཆོས་སྐུའི་ངང་དུ་གཟུགས་སྐུ་གཉིས་གྲོལ་བའི་ལེའུ་སྟེ་བརྒྱད་པའོ།། །།གསང་བའི་བདག་པོས་ཡང་ཞུས་པ། །བཅོམ་ལྡན་མགོན་པོ་འདུ་འབྲལ་མེད། །ཡུལ་སྦུབས་གཟགས་ཅན་གྲོལ་བ་བཞི། །གཅིགལསགཅིགརྫོགསབདག་ཅག་རྣམས་ལ་ཤོད། །ཅེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། །མ་རྟོགས་འཁྲུལ་བའི་སྣང་བ་ཡིན། །རྙིགས་མ་འབྱུང་བ་ལྔ་ཡི་ངོ་བོས་སྟོང་། །དྭངས་མ་ལྔ་པོ་འོད་གསལ་པ། །ཆོས་ཉིད་སྣང་བ་དེ་ལས་མེད། །རང་ལས་སྣང་ཞིང་རང་བཞིན་མེད། །རང་སྣང་རྣམ་པར་དག་པ་ཡིན། །ཉོན་མོངས་ལས་གྲུབ་གདོས་པ་ཅན། །མ་རྟོགས་བག་ཆགས་སྦུབས་སུ་བཤད། །དེ་ཉིད་སྟོང་ཞིང་ཡེ་ཤེས་གསལ། །བཞི་བཅུ་རྩ་གཉིས་ལྷུན་གྱིས་གྲུབ། །བུམ་པ་ནང་གི་མར་མེ་བཞིན། །འོད་ཀྱིས་སྦུབས་སུ་ང་ཡིས་བཤད། །བྱུང་ཡང་རིག་པ་རང་ལས་བྱུང་། །ཐིམ་ཡང་རིག་པའི་ངང་དུ་ཐིམ། །གནས་ཀྱང་རིག་པའི་ངང་དུ་གནས། །ཆོས་སྐུ་ཕྱིན་ནང་མདུན་རྒྱབ་མེད། །རིན་ཆེན་སྦུབས་སུ་ང་ཡིས་བཤད། །སོ་སོར་རྟོགས་པའི་ཤེས་རབ་ཀྱིས། །གཅོད་པས་ཤེས་རབ་སྦྱན་ཞེས་བྱ། །ཕྱི་ནང་ཆོས་ཀྱི་དོན་རྟོགས་པ། །ཆོས་ཀྱི་སྤྱན་ན་སོ་སོར་གསལ། །དེ་དག་སྟོང་ཞིང་ཡེ་ཤེས་གསལ། །འགྱུར་བ་མེད་པའི་ངང་གནས། །ཡེ་ཤེས་སྤྱན་དུ་ང་ཡིས་བཤད། །སེམས་ཀྱི་རྟོགས་པ་ཆོད་པ་ནི། །བློ་ཡིས་མཐའ་ལས་གྲོལ་བ་ཡིས། །འཁྲུལ་པའི་སྣང་བ་ངོ་བོས་སྟོང་། །མ་གྲུབ་མི་གནས་དག་པས་ན། །འཁོར་བའི་མཐའ་ལས་གྲོལ་བ་ཡིན། །གཟུང་འཛིན་མི་གནས་གཉེས་མེད་མྱ་ངན་འདས། །ཆོས་ཀྱི་མཐའ་ལས་གྲོལ་བ་ཡིན། །ཞེས་སྐུ་གསུམ་ཡེ་ཤེས་ལྔའི་རྒྱུད། །འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །ཡུལ་སྦུབས་གཟིགས་ཅན་གྲོལབབཞིནཉིདདུབསྟན་པའི་ལེའུ་སྟེ་དགུ་པའོ།། །།དེ་ནས་མཁའ་འགྲོ་མ་ཞེ་སྡང་རྡོ་རྗེ་མ་དང་། །ང་རྒྱལ་རྡོ་རྗེ་མ་དང་། །འདོད་ཆགས་རྡོ་རྗེ་མ་དང་། །ཕྲག་དོག་རྡོ་རྗེ་མ་དང་། །གཏི་མུག་རྡོ་རྗེ་མ་དང་ལྔ་དགྱེས་ནས་འདི་སྐད་ཅེས་བརྗོད་དོ། །ཨེ་མ་ཧོ་བདེ་གཤེགས་བཅོམ་ལྡན་འདས། །སྙིང་པོ་དོན་གྱི་རྒྱུད་གསུངས། །སྣོད་ཀྱི་འཇིག་རྟེན་དབྱིངས་སུ་གྲོལ། །སེམས་ཀྱི་རྟོགས་པ་ཆོས་སྐུར་གྲོལ། །དུག་གསུམ་སྐུ་གསུམ་ངང་དུ་གྲོལ། །དུག་ལྔའི་ངོ་བོ་ཡེ་ཤེས་ལྔ་རུ་གྲོལ། །བདག་ཅག་མཁའ་འགྲོ་རྣམས་ཀྱང་། །མི་གནས་པའི་ཡེ་ཤེས་ཀྱི་ངང་དུ་མཆིའོ། །ཨེ་མ་ཧོ་གསང་བ་རྨད་དུ་བྱུང་བའི་ཆོས། །མ་སྤངས་མ་སྦྱངས་མ་བསྒྱུར་བར། །བདེ་ཆེན་ངང་ལ་གནས་པ་ངོ་མཚར་ཆེ། །ཐབས་མཁས་ཐུགས་རྗེའི་བདག་པོ་ཁྱོད་ལ་འདུད། །ཅེས་བརྗོད་ནས། །མཁའ་འགྲོ་མ་མི་རྟོགས་པའི་ངང་དུ་གཤེགས་སོ། །སྟོན་པ་རྡོ་རྗེ་སེམས་དཔས་བསྟན། །ཞུ་བ་པོ་ཕྱག་ན་རྡོ་རྗེ་ཞུས། །ཉན་པ་པོ་མཁའ་འགྲ་་མ་ལྔས་མཉན། །སྦས་པ་པོ་མེ་རི་འབར་བའི་ཁ་ལ་སྦས་སོ། །དེ་བཞིན་གཤེགས་པ་གསེར་འོད་དམ་པས། །རོ་ལངས་བདེ་བ་ལ་ལུང་བསྟན་ཏེ་མཇུག་བསྡུས་སོ། །སྐུ་གསུམ་ཡེ་ཤེས་ལྔའི་རྒྱུད། །འཇམ་དཔལ་ཡེ་ཤེས་རྒྱན་གྱི་དགོངས་པ་ལས། །རྗེས་སུ་ཡི་རང་བའི་ལེའུ་སྟེ་བཅུ་པའོ།། །།སྐུ་གསུལ་ཡེ་ཤེས་ལྔ་ལྡན་གྱི་རྒྱུད་འཇམ་དཔལ་ཡེ་ཤེས་རྒྱན་གྱི་དགོངས་པ་ཞེས་བྱ་བ་རྫོགས་སོ།། །། རྒྱ་གར་སྐད་དུ། །མ་ཁི་རརྙ་ཏན་ཏྲ། །བོད་སྐད་དུ། །ནོར་བུ་རིན་པོ་ཆེའི་རྒྱུད། །དཔལ་ཡིད་བཞིན་ལྷུན་གྲུབ་ཀྱི་རྒྱལ་པོ་ལ་ཕྱག་འཚལ་ལོ། །སྟོན་པ་རྡོ་རྗེ་སེམས་དཔའ་