Ngb-pt-0400-vol-05-text

Body

རྒྱ་གར་སྐད་དུ། སེརྙི་མ་ཧྭ་ས་མརྙ་བྷ་དྲ་ཙྭ་ན་པ་ཏི་གུ་རྒྱ་ནཱ་མ་ཏནྟྲ། བོད་སྐད་དུ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མའི་ཕྱི་མ་ཞེས་བྱ་བ། བཅོམ་ལྡན་འདས་རྡོ་རྗེ་འཆང་སངས་རྒྱས་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་དཔལ་ཀུན་ཏུ་བཟང་པོས་རིགས་ལྔའི་སངས་རྒྱས་ལ་བཀའ་སྩལ་པ། རིག་པ་སྟོང་གསལ་གྱི་དོན་ཉམས་སུ་ལེན་པ་ནི། དང་པོ་སེམས་གཟུང་དགོས་པས། སེམས་གཟུང་བ་ལ་འདི་ལྟ་སྟེ། ཉོན་ཅིག་རྡོ་རྗེ་སེམས་དཔའ་སོགས། ཐོ་ལ་གཟུང་བ་དང་། རི་མོ་ལ་གཟུང་བ་དང་། འཇམ་པོའི་རླུ་་ལ་གཟུང་བ་དང་། ཐིག་ལེ་ལ་གཟུང་བ་དང་། གདུགས་ལ་གཟུང་བ་དང་། འཁོར་ལོ་ལ་གཟུང་བ་དང་། ཡིག་འབྲུ་ལ་གཟུང་བ་དང་། འགྲོ་བ་བཟང་མོ་ཤེས་རབ་མ་ལ་གཟུང་བ་དང་། རྡོ་རྗེ་སློབ་དཔོན་ལ་གཟུང་བ་དང་། དྲག་རླུད་ལ་གཟུང་བ་དང་། ནམ་མཁའ་ལ་གཟུང་བའོ། །དེ་ལ་ཐོ་ལ་གཟུང་བ་ནི། ཐོ་བཙུགས་ལ་དེ་ལ་མིག་ཕྱིར་འཕྲེང་ལ། དེ་ལ་ཤེས་པ་གཏད་ལ་ཐུན་གསུམ་མམ་ལྔའམ་བདུན་ལ་སོགས་པ་བསྒོམ་མོ། །རི་མོ་ལ་སེམས་གཟུང་བ་ནི། རི་མོའི་ནང་དུ་ཤེས་པ་བསྐྱིལ་ལ་བཟུང་ངོ་། །འཇམ་རླུད་ལ་གཟུང་བ་ནི། སྟེང་རླུད་མནན། འོག་རླུད་བསྡམས་བར་རླུད་རང་སར་བཞག་ལ་དབུགས་ཕར་འགྲོ་ཚུར་འགྲོ་ཨ་ཧ༷་ལ་གཏད་ལ་གཟུང་བའོ། །ཐིག་ལེ་ལ་གཟུང་བ་ནི། སྨིན་ཕྲག་ཏུ་ཐིག་ལེ་སེར་ཡེར་རེ་བའམ། སྣ་རྩེར་བསམས་པ་ལ་གཟུང་བའོ། །གདུགས་ལ་གཟུང་བ་ནི། འོག་ཏུ་རྒྱ་གདུགས་བསམ། སྟེང་དུ་རང་ཉིད་བསམས་ལ། གདུགས་དེ་འཁོར་བ་ལ་ཤེས་པ་གཟུང་ངོ་།འཁོར་ལོ་ལ་གཟུང་བ་ནི། ནན་ཏན་མ་ཟིན་ན་བླ་མས་ཤོག་བུའི་གདུགས་བྱས་ལ་དེ་བསྐོར་སྣ་རུ་སྤོས་དུད་གཏང་། རྣ་བར་དྲིལ་བུ་གསིལ་ལ་གཟུང་ངོ་། །ཡིག་འབྲུ་ལ་གཟུང་བ་ནི། སེམས་ཀྱི་གནས་གཞི་སྲ ཧུ༷་ངམ་ཨ་ལྟ་བུའི་ཡི་གེ་ལ་མ་ཡེངས་པར་གཏད་ལ་གཟུང་ངོ་། །འགྲོ་བ་བཟང་མོ་ཤེས་རབ་མ་ལ་གཟུང་བ་ནི། ཡབ་ཡུམ་མཁའ་གསང་བརླབ་པར་བྱས་ལ། དབང་པོ་གཉིས་སྤྲད་དེ་བྱང་ཆུབ་སེམས་རྡོ་རྗེའི་སྐེད་པར་གླེབ་པ་ལ་གཟུང་བའོ། །རྡོ་རྗེ་སློབ་དཔོན་ལ་གཟུང་བ་ནི། སྤྱི་བོར་བླ་མ་བསམ་ལ་དེ་ལ་གཟུང་ངོ་། །དྲག་རླུད་ལ་གཟུང་བ་ནི། ཤེས་པ་འགྲང་ལྡོག་བྱས་ལ་གཟུང་ངོ་། །ནམ་མཁའ་ལ་གཟུང་བ་ནི། མདུན་གྱི་ནམ་མཁའ་ལ་ཤེས་པ་གཏད་ལ་ཁབ་མིག་ཏུ་སྐུད་པ་འཛུད་པའམ། གཞུ་བདུངས་པ་ལྟ་བུ་དྲན་པ་ཧུར་བྱས་ལ་གཟུང་བའོ། །དེ་རྣམས་མ་ཡེངས་པར་བྱས་ལ་གཟུང་བར་བྱེད་པའོ། །ཞེས་གསུངས་སོ། ཁུད་ཕྱི་མའི་ཕྱི་མ་ལས་ལེའུ་སྟེ་དང་པོའོ།། །།དེ་ནས་ཡང་བཀའ་སྩལ་པ། དེ་ནས་ལོག་ནོན་བསྟན་པ་ནི། སེམས་གཟུང་བ་ལ་རླུད་སྐྱེས་ན། ཤེས་པ་རྒོད་སྐྲ་ཟིང་པོར་འོང་། གཉིད་མི་ཕེབས་སོ། །དེ་ལ་བསྐུ་མཉེ་བྱ། ཟས་བཅུད་ཅན་བསྟེན་ནོ། །མཁྲིས་པ་སྐྱེས་ནས་སེར་པོར་མཐོང་བ་ལ་སོགས་བྱུང་ན་བསིལ་གཏང་ངོ་། །བད་ཀན་སྐྱེས་ནས་སྦེ་བ་དང་། འཁྲོག་པ་དང་། དང་ག་མི་བདེ་བ་བྱུང་ན། བཅག་ཁམས་བསང་ངོ་། །ཞེས་གསུངས་སོ། །རྒྱུད་ཕྱི་མའི་ཕྱི་མ་ལས་ལེའུ་སྟེ་གཉིས་པའོ།། །།དེ་ནས་ཡང་བཀའ་སྩལ་པ་ནི། དེ་ལྟར་སེམས་ཟིན་ནས་རིག་པ་སྟོང་གསལ་དུ་ཤེས་པ་ལྟ་བའོ། །དེའི་ངང་དུ་གསལ་བ་སྒོམ་པའོ། །དེ་ལས་མ་ཡེངས་པར་སྤྱོད་པའོ། །དེ་འཆི་བའི་དུས་སུ་དྲན་པ་དང་སྐྱེ་བ་བསྐྱེད་དེ་གདམས་ངག་གིས་འཕོ་བར་བྱའོ། །དེ་ལས་འབྲས་བུ་སྐུ་གསུམ་ཡེ་ཤེས་ལྔའོ། །ཞེས་གསུངས་སོ། །རྒྱུད་ཕྱི་མའི་ཕྱི་མ་ལས་ལེའུ་སྟེ་གསུམ་པའོ།། །།དེ་ནས་ཡང་བཀའ་སྩལ་པ། རྒྱུད་འདི་ནི་རྒྱུད་སྔ་མའི་ཁ་སྐོང་བ་ཞེས་བྱ་བ་ཡིན་པས། རྡོ་རྗེ་སེམས་དཔས་གཅེས་སྤྲས་ཀྱིས་གཟུང་ཞིག་བཅང་བར་བྱའོ། །ཞེས་བཀའ་སྩལ་ཏེ་ཆོས་ཉིད་ཀྱི་ངང་དུ་གྱུར་