Ngb-pt-0158-vol-02-text

Body

རྒྱ་གར་སྐད་དུ། གུ་རྒྱ་སྭ་མྱ་མྱ་ཏན་ཏྲ་ནཱ་མ། བོད་སྐད་དུ། གསང་བ་སྤྱི་རྒྱུད་ཅེས་བྱ། གསན་ཡིག་ཏུ་སེམས་ལུང་ཆེད་མོའི་མདོ་གསང་བ་སྤྱིའི་རྒྱུད་ཅེས་པ་དེ་ཡིན། བཅོམ་ལྡན་འདས་གསང་བདག་ཆེ་ལ་ཕྱག་འཚལ་ལོ། །འདི་སྐད་ཐོས་པའི་དུས་ན་རང་བཞིན་རང་སྣང་བའི་གནས་ན། རང་བྱུང་གི་སྟོན་པ་གསང་བདག་ཆེན་པོ་ལ་འཁོར་གསུམ་གྱིས་བསྐོར་ཏེ། བསྟན་པ་གསུམ་གྱི་དོན་ལ་བཀོད་དོ། །དེ་ནས་སྟོན་པ་གསང་བདག་ཆེན་པོས། །ཆེད་དུ་བརྗོད་པ་འདི་ཆེད་དུ་བརྗོད་དོ། །གང་ཡང་གྲུབ་པ་མེད་པའི་ངང་། །མིང་གི་ཐ་སྙད་གྲུབ་པ་མེད། །སྣང་བ་གསུམ་གྱི་རང་བཞིན་ལས། །སྟོན་པ་གསུམ་ཀྱི་ངོ་བོར་ཤར། །གདུལ་བྱའི་ཞིང་ལ་སོ་སོར་སྣང་། །སྐུ་དང་གསུང་ཐུགས་རིམ་པ་ཡིས རང་རང་མོས་པ་སོ་སོར་ཤར། །ཡི་གེ་མེད་སྣང་གསུང་ཚིག་གིས། །གང་འདོད་འབྲས་བུ་སོ་སོར་སྣང་། །ཁམས་གསུམ་གནས་པའི་སེམས་ཅན་རྣམས། །རྒྱུ་དང་ལོག་གཅོད་ཐབས་བྲལ་བས། །རྒྱུད་དྲུག་འཁོར་བའི་ནང་དུ་འཁྱམས། །མ་རེག་མ་རྟོགས་མ་ཤེས་པས། །ཡུན་རིང་སྡུག་བསྔལ་སོ་སོར་སྤྱོད། །ཅེས་གསུངས་སོ། །དེ་སྐད་བརྗོད་པའི་མཐུས་འཁོར་གྱི་ནང་ནས་སེམས་དཔའ་རྡོ་རྗེ་དེས་སྟོན་པ་ལ་ཞུ་བའི་དོན་ཞུས་པ། བདག་ལ་སོགས་པའི་འཁོར་རྣམས་ཀྱིས། །སྟོན་པའི་རང་བཞིན་ཇི་ལྟར་རྟོགས། །རྒྱུད་དྲུག་སེམས་ཅན་ཐམས་ཅད་ཀྱིས། །དང་པོ་མ་རྟོགས་ཇི་ལྟར་འཁྲུལ། །དེ་ལས་གྲོལ་ཐབས་ཡོད་དམ་མེད། །ཞུས་པས། གསང་བདག་ཆེན་པོས་ལན་གསུངས་པ། མཉམ་ཉིད་རང་བཞིན་ལྷུན་གྲུབ་ལུས། །ཡེ་ཤེས་མཁའ་ལ་འདེགས་པའི་རླུད་། །རང་གསལ་རིན་པོ་ཆེ་ཡི་སྦུབས། །ཟེར་རྩལ་མ་འགགས་སོ་སོར་ཤར། །རྟོགས་ལུགས་སྣང་བ་བདུན་དུ་སྣང་། །རང་བཞིན་སྣང་དང་གདུལ་བྱ་ཡི། །མཐར་ཐུག་འབྲས་བུ་གསུམ་གྱིས་སུ། །ཐུགས་ལས་འབྱུང་བ་བཅུད་ཀྱིས་སུ། །དྲན་སེམས་འགྱུ་བ་ཀུན་དང་བྲལ། །བདེ་བ་རང་སྣང་འཛིན་སེམས་མེད། །ཐེག་པ་ཀུན་གྱི་བླ་མེད་མཆོག །དབང་པོ་ཀུན་རྐྱེན་མི་སྣང་ན། །མི་འཛིན་མི་སྣང་རྐྱེན་དང་བྲལ། །གཙོ་མ་བཞིན་ཏེ་བཅོས་བསླད་མེད། །སྙིང་པོ་འདོད་པ་མེད་ན་གསལ། །དྲི་མ་འཁྲུལ་རྙོག་ངང་གིས་མེད། །ཡེ་ཤེས་རང་ལུགས་ངང་གིས་བདེ། །སྟོན་པ་གསུམ་གྱི་ངོ་བོ་དང་། །དུས་གསུམ་སངས་རྒྱས་ཐམས་ཅད་ལ། །དགོངས་པ་དེ་ལས་ཡོངས་མི་མངའ། །ཡང་ཞུས་པ། སྟོན་པའི་དགོངས་པ་དེ་ལྟ་ན། །འགྲོ་དྲུག་མོས་པ་དྲང་བའི་ཐབས། །ཀུན་མཁྱེན་ཁྱོད་ཀྱིས་གསུང་དུ་གསོལ། །ཞེས་གསོལ་པས། །གསང་བདག་ཆེན་པོས་གསུངས་པ། འགྲོ་དྲུག་སེམས་ཅན་ཐམས་ཅད་ཀྱིས། །ཐོགས་མེད་དུས་ནས་དོན་མ་གསལ། །འགྱུ་བ་རིག་པ་སོ་སོར་ཤར། །དེ་ལ་བརྟསཤིང་ཞེན་པའི་སེམས། །ཀུན་འཚོལ་ངེས་འཇོག་གཏན་ལ་འབེབས། །ཞེན་བརྟས་སྡུག་བསྔལ་སོ་སོར་མྱོང་། །སྡུག་བསྔལ་དེ་ལས་ཐར་པའི་ཐབས། །སྣོད་བཅུད་གཉིས་འཇོམ་མན་ངག་གིས། །དེ་དོན་གྲོལ་བའི་ཐབས་སུ་བསྟན། །འཁྲུལ་པ་རྩད་ནས་གཅད་པ་དང་། །མན་ངག་གནད་ལ་དབབ་པ་དང་། །མཚོན་བྱ་དཔེ་ཡིས་ངོ་བསྟན་དང་། །དབྱེ་བ་གཉིས་སུ་བསྟན་པ་དང་། སྐུ་ལྔ་ངོ་ཡིས་བཟུང་བ་དང་། །བརྡའ་དོན་ཁྱད་པར་བསྟན་པ་དང་། །རང་རྒྱུད་བསྟན་པའི་རིམ་པ་ཡིས། །རྒོལ་རྩོད་རིམ་པའི་དབྱེ་བ་དང་། །མན་ངག་དོན་དང་སྦྱར་བ་དང་། །བཤད་ཐབས་རིམ་པར་བསྟན་པ་དང་། །རྣ་བརྒྱུད་བསྟན་པའི་རིམ་པ་ཡིས། །དེ་ཉིད་ཐོབ་པའི་ཐབས་སུ་བསྟན། །དགོས་འབྲེལ་གཉིས་ཀྱི་ཁྱད་པར་དང་། །ཡོན་ཏན་རྒྱུད་ཀྱི་ཆེ་བ་དང་། །ཁྱད་པར་མཚན་གྱི་ཆེ་ཚུལ་ལོ། །ཞེ་འདོད་མེད་པའི་རྟོགས་པ་དང་། །དངོས་པོ་ཅི་ཡང་མ་ཡིན་པས། །ཡེ་ཤེས་རང་ལུས་གསལ་འགྲིབ་མེད། །རྐྱེན་ལ་ལྟོས་པའི་འཁྲུལ་སེམས་བྲལ། །ལུས་ངག་འཁྲུལ་པ་རང་བཞིན་ཞིག །རྒྱུ་ཡི་ཆོས་ལ་བློ་མི་སྐྱེ། །ཐེག་པ་ཆེ་ལས་བློ་མི་འགྱུར། །རྟོགས་པས་བྱ་བ་ངང་གིས་གཏང་། །དགེ་སྡིག་སེམས་དང་བྲལ་བའོ། །ངོ་བོ་གྲུབ་པ་ཅི་ཡང་མེད། །སྟོང་པ་ཡེ་ཤེས་སྙིང་པོ་ཉིད། །བཅོས་བསླད་མེད་པའིརངབཞིནཉིད། །འགྱུ་མེད་འཛིན་མེད་རྟོག་པ་བྲལ། །སྣང་སྟོང་མཐའ་གཉིས་བྲལ་བ་ཉིད། །འཁྲུལ་པའི་མྱོང་རིག་གང་ཡང་མེད། །འགྱུར་མེད་རྐྱེན་དང་བྲལ་བའོ། །སངས་རྒྱས་སེམས་ཅན་མཉམ་པ་ཉིད། །མཐའ་དང་དབུས་མེད་ཀློང་ཆེན་པོ། །མཚན་ཉིད་རིག་པ་བསམ་མི་ཁྱབ། །ལུས་ཀྱང་དེ་བཞིན་གནས་པ་སྟེ། །རང་རང་འདོད་པ་བཞིན་དུ་འཁྲུལ། །ཟོ་ཆུའི་རྒྱུན་བཞིན་གནས་པ་བཞིན། །དེ་རྩད་གཅད་ཅིང་གཏན་ལ་དབབ། །ཀུན་གྱི་གཞི་མ་མཉམ་པ་ཉིད། །རྒྱུད་གཅིག་ལྡོག་དང་བཅས་པའོ། །སྔ་ཕྱི་མེད་པར་དབྱིངས་སུ་གཅིག །མ་བཅོས་སྙིང་པོ་ཀུན་གྱི་གཞི། །རིན་ཆེན་གཏེར་གྱི་མཛོད་ཆེན་པོ། །རྒྱུ་ལས་མ་བྱུང་རྐྱེན་དང་བྲལ། །འདི་འདྲར་བསྟན་མེད་བྱང་ཆུབ་སེམས། །འགྱུ་བ་མེད་ན་དྲན་མི་སྐྱེ། །སྟོང་པའི་ངང་ལ་རྩིས་གདབ་མེད། །ནམ་མཁའ་བཞིན་དུ་མཐའ་དབུས་མེད། །སྙིང་པོ་ཉིད་ལ་སོར་གནས་པ། །ཉི་ཟླ་བཞིན་དུ་གསལ་འགྲིབ་མེད། །ཕྱོགས་བྲལ་ཐེག་པ་ཀུན་གྱི་རྩེ། །ཐམས་ཅད་འབྱུང་བའི་གནས་ཆེན་པོ། །རྒྱུད་རྣམས་མ་ལུས་བདག་པོ་ཡིན། །འདོད་དགུ་འབྱུང་བའི་རིན་པོ་ཆེ། །སྟོན་པ་རྣམ་གསུམ་ཐུགས་ཀྱི་བཅུད། །མཁྱེན་པའི་ཡེ་ཤེས་བསམ་མི་ཁྱབ། །དུས་གསུམ་སངས་རྒྱས་དགོངས་པའི་མཆོག །དབང་པོའི་བསམ་པ་འདི་ཉིད་ནི། །འགྱུ་བ་མེད་ན་དེ་ཉིད་ཡིན། །རིག་པ་བརྗེད་མེད་བསྒོམ་མི་དགོས། །དྲན་པའི་ཕྱོགས་ལ་རྗེས་མི་གཅོད། །མཁའ་དང་འཇའ་ཚོན་དཀྱིལ་འཁོརལ། །ཞེན མེདཚུལ འཇུག་ངང་གིས་བདེ། །རང་དབང་རྒྱལ་པོ་རྟོགས་པ་ཆེ། །དོན་ལས་མི་འདའ་མཉམ་པ་མེད། །སངས་རྒྱས་ཐུགས་ཉིད་བསྒྲུབ་པའི་མཆོག །འདོད་བྲལ་རྟོགས་པའི་དོན་ཆེན་པོ། །མ་བཅོས་བྱ་གཏང་དོན་དང་མཐུན། །འཛིན་བྲལ་འདི་ལ་གནས་པ་ནི། །རྣལ་འབྱོར་ཆེན་པོ་སྐལ་བ་བཟང་། །ལུས་ངག་འཁྲུལ་པ་ངང་གིས་ཞི། །རྐྱེན་སྣང་འཁྲུལ་པའི་མཐའ་མི་འཛིན། །མི་བྱེད་མ་ཕྱེད་མཉམ་པ་ཉིད། །རང་གནས་རང་ལུགས་དོན་ཆེན་པོ། །དངོས་གཞི་མེད་པས་མྱོང་དང་བྲལ། །དེ་བཞིན་ལྕེ་ཡི་དབང་པོས་ཀྱང་། །ཡང་དག་དོན་ལ་བརྗོད་དུ་མེད། །སྣང་བའི་ངོ་བོ་མེད་པ་ནི། །མ་བཙལ་བཞག་པ་ཉིད་དུ་བདེ། །སྣང་དང་སྟོང་པའི་ཕྱོགས་ཆ་བྲལ། །རྟག་དང་ཆད་པའི་མཐའ་མི་གནས། །འགྲོ་དྲུག་འཁྲུལ་པའི་རང་བཞིན་དང་། །རྒྱལ་བའི་དགོངས་པ་ཡང་དག་གཉིས། །མཉམ་ཉིད་དུས་ན་བཟང་ངན་མེད། །ཐ་མལ་སེམས་ཀྱི་སྣང་བ་དང་། །རྟོགས་ལྡན་རང་སྣང་ཤེས་པ་གཉིས། །གཅིག་སྒྲིབ་གཅིག་སྐྱེ་གཉིས་མི་མངའ། །གསེར་དང་སེར་པོའི་དཔེ་བཞིན་ནོ། །མི་སྐྱེ་རྟོག་མེད་བྱ་བ་བྲལ། །འགྱུར་མེད་འགྲོ་འོང་མེད་པའི་མཆོག །ཅེས་གསུངས་སོ། །གསང་བ་སྤྱི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་སེམས་དཔའ་རྡོ་རྗེས།གསང་བདག་ཆེན་པོ་ལ་གསོལ་པ། སྟོན་པའི་གླེང་གཞི་དེ་ལྟར་གསུངས་པ་ལ། སྒྲ་དང་ཡི་གེ་གང་ལས་བྱུང་བ་ལགས་གསོལ་པས། སྟོན་པ་གསངབདགཆེནཔོསགསུངས་པ། ཡི་གེའི་གཙོ་བོ་སྐྱེ་བ་མེད། །དེ་ནས་ཡན་ལག་རྒྱུ་ཡི་ཡི་གེ་བྱུང་། དེ་ལས་གཙོ་བོའི་ཡི་གེ་བྱུང་། །དེ་ལས་གྲོགས་ཀྱི་ཡི་གེ་བྱུང་། །ཡི་གེ་འབྲུ་གཅིག་ལུས་པོ་ལ། །དགོས་པའི་ཡན་ལག་བདུན་ཚང་སྟེ། །མགོ་ནི་མངོན་པར་ལམ་འདྲེན་ལ། །ཚག་མིག་རྟ་བཞི་འོག་ཏུ་ལྟ་བཝ་ཡང་བྱུང་ཤད་ལྟ་ཞོན། །ཡན་ལག་ཤུགས་ཀྱིས་འགྲོ་བར་བྱེད། །ཡན་ལག་ཤུགས་ཀྱིས་འགྲོས་བསླང་ནས། །མགོ་ནི་དོན་གྱི་ལམ་དུ་ཞུགས། །ཚིག་ནི་ཤེས་རབ་མིང་དུ་སྨྲས། ཁྲད་ཀྱི་སྡེ་པ་ཚེགས་སུ་གཅོད། །ཡི་གེའི་དོན་དང་རང་བཞིན་སྟོན། །ཚེག་པར་འབྲུ་ཡི་ཚིག་དོན་ནི། །སྟོན་པའི་གསུང་དུ་ངེས་པར་གསུངས། །ལྷུག་པར་ཤར་བ་སིལ་བུར་རྣམས། །འདྲེས་པ་གང་ཟག་མི་ཡི་ཚིག །ང་ཡིས་གསུངས་པའི་དོན་ལ་སྨྲ། །ཞེས་གསུངས་སོ། །གསང་བ་སྤྱི་རྒྱུད་ལས། སྒྲ་དང་ཡི་གེའི་བྱུང་ཚུལ་བསྟན་པའི་ལེའུ་སྟེ་གཉིས་པའོ།། །།དེ་ནས་སེམས་དཔའ་རྡོ་རྗེས། སྟོན་པ་གསང་བདག་ཆེན་པོ་ལ་ཞུསླ་པ། །ཡི་གེའི་རང་བཞིན་དེ་ལྟར་བྱུང་བ་ལ། །འགྲེལ་དང་བཤད་ཐབས་ཇི་ལྟར་ལགས། །སྟོན་པ་གསང་བདག་ཆེན་པོས་གསུངས་པ། །ཇི་ལྟར་གནས་པའི་གནས་ལུགས་ཏེ། །ཚིག་གིས་མཚོན་དུ་མེད་པ་ལ། །རྗེས་འཇུག་ལ་སོགས་ཕྱི་རབས་ལ། །ཤེས་ཤིང་རྟོགས་པར་བྱ་བའི་ཕྱིར། །དོན་གྱི་འགྲེལ་པ་ལྔ་འདི་བཤད། །ཁྱེད་ལ་སོགས་པའི་འཁོར་རྣམས་ཉོན། །དུས་གསུམ་སངས་རྒྱས་རྣམས་ཀྱིས་ཀྱང་། །དོན་གྱི་འགྲེལ་པ་ལྔ་པོ་འདི། །རྟོགས་ནས་སྐྱེ་མེད་ས་ལ་གཤེགས། །དོན་གྱི་འགྲེལ་པ་ལྔ་པོ་འདིས། །ང་ཡི་སྤྱི་རྒྱུད་འདི་རྟོགས་ནས། །དགོངས་པ་འདི་ལ་གནས་པར་བྱེད། །འགྲེལ་ལྔ་གང་དང་གང་ཞེ་ན། །ཚེག་བར་འབྲུ་ཡི་འགྲེལ་པ་དང་། །དཔེ་དོན་རྒྱུ་འབྲས་འགྲེལ་པ་དང་། །གཏན་ཚིགས་དོན་གྱི་འགྲེལ་པ་དང་། །འབྱེད་པར་བྱེད་པའི་འགྲེལ་པ་དང་། །སྡུད་པར་བྱེད་པའི་འགྲེལ་བའོ། །ཚེག་བར་འབྲུ་ཡི་འགྲེལ་པ་ནི། །ཡི་གེའི་དོན་དང་རང་བཞིན་དང་། །ཚེག་དང་ཡིག་ཤུགས་ཡན་ལག་བརྟག །དེ་ཡང་ཇི་ལྟ་བུ་ཞེ་ན། །ཡི་གེ་འབྲུ་གཅིག་ལུས་པོ་ལ། །དགོས་པའི་ཡན་ལག་བདུན་ཚང་སྟེ། །མགོ་དང་ཡན་ལག་ཚེག་ཤད་བདུན། །མགོ་ནི་མ་ནོར་ལམ་ཡིན་ལ། །ཚེག་མིག་གོངདུརྟབཞིཝངལྟ་བཞིན་ཤད་རྟ་ཤོན། །ཡན་ལག་ཤུགས་ཀྱིས་འགྲོ་བར་བྱེད། །ཡན་ལག་ཤུགས་ཀྱིས་འགྲོས་བསླང་ནས། །མགོ་ནི་མ་ནོར་ལམ་དུ་ཞུགས། །ཚེག་ནི་ཤེས་རབ་མིང་དུ་སྨྲ། ཁྲད་ཀྱིས་སྡེ་པ་ཚིག་སུ་གཅོད། །ཚེག་བར་འབྲུ་ཡི་འགྲེལ་པ་ནི། །སྟོན་པའི་གསུང་དུ་ངེས་པར་གསུངས། །ཚེག་བར་འབྲུ་ཡི་འགྲེལ་པར་བཤད། །དཔེ་དོན་རྒྱུ་འབྲས་འགྲེལ་པ་ནི། །དོན་གྱི་ཚིག་དང་ཡི་གེའི་ཚིག །རྒྱུ་ཡི་ཚིག་དང་འབྲས་བུའི་ཚིག །གང་ཡིན་འབྲུ་ལ་བརྟག་བྱ་སྟེ། །གང་ཡིན་ཚིག་གིས་སྟོན་པར་བྱེད། །དེ་འདྲ་དེ་བཞིན་དེ་ལྟར་གསུམ། །དཔེ་རུ་བསྟན་པའི་འགྲེལ་པ་ཡིན། །དེ་བས་དེ་ཕྱིར་དེ་ན་གསུམ། །གཏན་ཚིགས་བསྟན་པའི་འགྲེལ་པ་ཡིན། །དེ་ནས་དེ་ཡང་དེ་ལ་གསུམ། ཁུ་བསྟན་པ་ཡི་འགྲེལ་པ་ཡིན། །དེ་ཡིན་དེ་མིན་ཡིད་ཆེས་ནས། །དོན་གྱི་འགྲེལ་པ་ཡིན་པར་བཤད། །འབྲུ་དང་ཡན་ལག་གཅིག་ལ་ཡང་། །དེ་དོན་དེ་ལྟར་ཡོད་པས་ན། །དེ་བཞིན་ཡན་ལག་ཀུན་ལ་བརྟག །དཔེ་དོན་རྒྱུ་འབྲས་འགྲེལ་པར་བཤད། །གཏན་ཚིགས་དོན་གྱི་འགྲེལ་པ་ནི། །ཡན་ལག་དག་གིས་དོན་དབྱུང་བ། །ཚིག་འབྲུ་ལས་ནི་དོན་དབྱུང་བྱ། ཁུ་ཡི་ཚིག་གམ་འབྲས་བུའི་ཚིག །དཔེ་ཡི་ཚིག་གམ་དོན་གྱི་ཚིག །རྟགས་སམ་གཏན་ཚིགས་གང་ཡིན་ཚིག །བརྟགས་ཏེ་དོན་དེ་དབྱུང་བར་བྱ། །གཏན་ཚིགས་དག་གི་འགྲེལ་པར་བཤད། །འབྱེད་པར་བྱེད་པའི་འགྲེལ་པ་ནི། །སོ་སོ་དག་གི་ངོ་བསྟན་ནས། །སྡེ་དང་ཚན་དང་རིས་སུ་ཕྱེ། །འབྱེད་པར་བྱེད་པའི་འགྲེལ་པ་ཡིན། །ཆོས་ཀུན་རྩ་བ་གཅིག་བསྡུས་ནས། །སྤྲོས་པ་མེད་པའི་དོན་བསྟན་ན། །སྡུད་པར་བྱེད་པའི་འགྲེལ་པ་ཡིན། །ཚེག་དང་འབྲུ་ཡི་དོན་འདི་ནི། །ཚེག་པར་འབྲུ་ཡི་འགྲེལ་པར་བཤད། །འདྲ་དང་ཡིན་མིན་དོན་འདི་ནི། །དཔེ་དོན་རྒྱུ་འབྲས་འགྲེལ་པར་བཤད། །བརྟགས་ཏེ་གཏན་ཚིག་འབྱིན་པ་ན། །གཏན་ཚིགས་དག་གི་འགྲེལ་བར་བཤད། །སོ་སོའི་སྡེ་ཚན་རིས་འབྱེད་ན། །ས་གཅོད་པ་ཡི་འགྲེལ་པར་བཤད། །རྩ་བ་གཅིག་ཏུ་དོན་སྟོན་ན། །སྡུད་པར་བྱེད་པའི་འགྲེལ་པར་བཤད། །ཚེག་བར་འབྲུ་ཡི་འགྲེལ་པ་ཡིས། །ཚིག་དང་འབྲུ་ཡང་གཅིག་མི་ལས། །འབྲུ་ལ་ལྷག་མ་མི་ལྔས་ཏེ། །འབྲུ་འཇོམས་པ་ཡི་འགྲེལ་པར་བཤད། །དཔེ་དོན་རྒྱུ་འབྲས་འགྲེལ་པ་འདིས། །འདྲ་དང་ཡིན་མིན་དོན་བསྟན་ནས། །ཆོས་དེ་ལ་ནི་མིང་དུ་འདོགས། །ངོ་བསྟན་པ་ཡི་འགྲེལ་པར་བཤད། །གཏན་ཚིགས་དོན་གྱི་འགྲེལ་པ་ནི། །མ་ནོར་པ་ཡི་སྙིང་པོ་འབྱིན། །དོན་འབྱིན་པ་ཡི་འགྲེལ་པར་བཤད། །དོན་གྱི་འབྲེལ་པ་ལྔ་པོ་ལ། །མ་བཤད་སྐྱོན་ཡང་ཡོད་པ་སྟེ། །ཚེག་བར་འབྲུ་ཡི་འགྲེལ་མེད་ན། །ཚེག་བར་འབྲུ་ཡི་ཚིག་མི་སྡེབས། །འབྲུ་མི་ཆོམས་པའི་སྐྱོན་དུ་འགྱུར། །དཔེ་དོན་རྒྱུ་འབྲས་འགྲེལ་མེད་ན། །ཆོས་ལ་མིང་གིས་མི་ཐོགས་ཏེ། །མཚོན་དུ་མེད་པའི་སྐྱོན་དུ་འགྱུར། །གཏན་ཚིགས་དག་གི་འགྲེལ་མེད་ན། །དོན་གྱི་རྩ་བ་མི་རྙེད་དེ། །དོན་མི་རྟོགས་པའི་སྐྱོན་དུ་འགྱུར། །འབྱེད་པར་བྱེད་པའི་འགྲེལ་མེད་ན། །སོ་སོའི་བྱེ་བྲག་མི་ཕྱེད་དེ། །ས་མི་ཆོད་པའི་སྐྱོན་དུ་འགྱུར། །སྡུད་པར་བྱེད་པའི་འགྲེལ་མེད་ན། །རྩ་བ་གཅིག་ཏུ་མ་གྱུར་ཏེ། །མཐའ་ཡས་པ་ཡི་སྐྱོན་དུ་འགྱུར། །དེས་ན་འགྲེལ་པ་ལྔ་པོ་འདི། །དུས་གསུམ་སངས་རྒྱས་ཐམས་ཅད་ཀྱི། །གསུང་གི་ཚིག་ཏུ་ངས་སྨྲས་པ། །འཁོར་གསུམ་ཁྱེད་ལ་སོགས་པ་ཀུན། །གསང་བདག་ཆེན་པོ་ང་ཡི་ལུང་། །བྱང་ཆུབ་སེམས་ཀྱི་རང་བཞིན་འདི། །རྟོགས་པར་བྱ་ཕྱིར་འགྲེལ་ལྔ་འདི། །ང་ཡིས་ཁྱེད་ལ་བསྟན་པ་ཡིན། །ཞེས་གསུངས་སོ། །གསང་བ་སྤྱི་རྒྱུད་ལས། ཡི་གེའི་དོན་བཤད་པའི་ལེའུ་སྟེ་གསུམ་པའོ།། །།དེ་ནས་གསང་བདག་ཆེན་པོ་ལ། སེམས་དཔའ་རྡོ་རྗེས་ཞུས་པ། །ཡི་གེའི་བྱེ་བྲག་དེ་དག་ལ། །རྒྱུད་དུ་འགྲོ་བ་ཇི་ལྷར་ལགས། །གསང་བདག་ཆེན་པོས་གསུངས་པ། །སྒྲ་དང་ཚིག་དང་གླེགས་བམ་དང་། །ངོ་བོ་ངེས་ཚིག་དབྱེ་བ་དང་། །དགོངས་གཞི་མཐུན་དཔེ་ལྡང་ཚད་དང་། །མཚན་དང་ཆེ་ཚུལ་ཁྱད་པར་རོ། །སྣང་བ་གསུམ་ལ་རྒྱུད་གསུམ་དང་། །དཀར་ཤད་དག་དང་རང་བཞིན་དག །ཡེ་ཤེས་དག་ལ་སྐུ་གསུམ་མོ། །ཀུན་ཀྱང་རྒྱུད་ཀྱི་རང་བཞིན་ཏེ། །རྒྱུད་མ་ཡིན་པ་གཅིག་ཀྱང་མེད། །བདུན་དང་དགུ་དང་བཅུ་གཅིག་ནི། །དེ་ལྟར་རྒྱུད་ལས་འབྱུང་བའོ། །ཞེས་གསུངས་སོ། །གསང་བ་སྤྱི་རྒྱུད་ལས། རྒྱུད་ཀྱི་བྱུང་ཚུལ་བསྟན་པའི་ལེའུ་སྟེ་བཞི་པའོ།། །།དེ་ནས་སེམས་དཔའ་རྡོ་རྗེས། གསང་བདག་ཆེན་པོ་ལ་གསོལ་བ། །རྒྱུད་ཀྱི་བྱུང་ཚུལ་དེ་ལྟར་བྱུང་བ་ལ། །དེ་ཡི་བཤད་ཐབས་ཇི་ལྟར་ལགས། །གསང་བདག་ཆེན་པོས་གསུངས་པ། །བཤད་པ་ཉེས་པའི་སྐྱོན་དང་ནི། །བཤད་ཐབས་བཅུ་ཡི་ཡོན་ཏན་ནི། །རིམ་པར་ཕྱེ་སྟེ་སོ་སོར་བཤད། །མདོ་སྔགས་ཁྱད་པར་མ་ཕྱེ་ན། །ཆུ་དང་འོ་མ་འདྲེས་པ་འདྲ། །གསང་སྔགས་ཕྱི་ནང་མ་ཕྱེད་ན། །མང་པོ་ཁྲོམ་དུ་འཆོལ་བ་འདྲ། །དགོངས་པའི་གོ་རིམ་མ་ཕྱེད་ན། །མར་དང་སྤྱིན་གཉིས་བསྲེས་པ་འདྲ། །རྒྱུད་ཀྱི་འཁྲུགས་བསྡེབ་མ་ཤེས་ན། །ལུང་པ་གསུམ་གྱི་མདོར་ཕྱིན་འདྲ། །འབྲེལ་ཚུལ་ངོ་སྤྲོད་མ་ཤེས་ན། །སྨྱོན་པ་མུ་ཅོར་སྨྲ་བ་འདྲ། །བསྟན་པའི་དགོས་ཆེད་མ་ཤེས་ན། །དོན་མེད་བརྫུན་ཚིག་སྨྲ་བ་འདྲ། །མི་མཐུན་འགལ་བསྡེབས་མ་ཤེས་ན། །ངལ་བ་དོན་མེད་ལམ་ཞུགས་འདྲ། །རྒོལ་རྩོད་གགས་སེལ་མ་ཤེས་ན། །རྐུན་མོ་གཏང་ཁུང་བཙུད་པ་འདྲ། །ཡོན་ཏན་བཤད་ཐབས་རྣམ་པ་བཅུ། །ཁྱུང་ཆེན་ནམ་མཁར་ལྡིང་བའི་བློས། །དོན་གྱི་སྤྱི་ཁོག་ཕུབ་སྟེ་བཤད། །སེང་གེ་གངས་ལ་མཆོངས་འདྲ་ཡིས། །ཐེག་དམན་ཟིལ་གྱིས་མནན་ལ་བཤད། །སྟག་མོ་མཆོངས་པ་ལྟ་བུ་ཡིས། །དཀྱིས་ཀྱི་ས་བཅད་བྱས་ཏེ་བཤད། །རུས་སྦལ་ནུར་འགྲོས་ལྟ་བུ་ཡིས། །ཚིག་གི་འབྲུ་རྣམས་གཉེར་ཏེ་བཤད། །ངང་པ་གཤིབས་འགྲོས་ལྟ་བུ་ཡིས། །སྔ་ཚིག་ཕྱི་ཚིག་དོན་འགྲེལ་བཤད། །སེང་ཕྲུག་རྩལ་སྦྱོང་ལྟ་བུ་ཡིས། །ཚིག་གི་བསྣོལ་མཚམས་ཕྱེ་ལ་བཤད། །རིག་པ་སྒུམ་ཐུན་ལྟ་བུ་ཡིས། །གང་ཡིན་དམིག་ནས་བཟུང་ལ་བཤད། །ཚད་མ་གསུམ་གྱི་གཏན་ཚིགས་ཀྱིས། །དུས་ཀྱི་འབྲུག་དང་སྦྱར་ལ་བཤད། །གླག་མོ་གཟན་ལ་་འཇུམས་འདྲ་ཡིས། །གོལ་སྒྲིབ་གདར་ཤ་བཅད་ལ་བཤད། །ཅེས་གསུངས་སོ། །གསང་བ་སྤྱི་རྒྱུད་ལས། བཤད་ཐབས་ཀྱི་ལེའུ་སྟེ་ལྔ་པའོ།། །།དེ་ནས་སེམས་དཔའ་རྡོ་རྗེ་གསང་བདག་ཆེན་པོ་ལ་གསོལ་པ། །ཇི་ལྟར་གནས་ལུགས་ཇི་ལྟར་ལགས། །གསང་བདག་ཆེན་པོས་གསུངས་པ། །སྟོན་པ་སེམས་ཉིད་རྫོགས་ཆེན་ལ། །ཡེ་ནས་གཉིས་མེད་མཉམ་པའི་ཕྱིར། །གཅིག་ལ་གཉིས་སུ་དབྱེ་རུ་མེད། །དབྱེ་རུ་མེད་པའི་གཏན་ཚིགས་ནི། །གཅིག་མེད་སྤྲོས་ལ་མེད་པ་ཡིན། །སྤང་འགེག་སྦྱོང་ཞིང་བགྲོད་པ་དང་། །གཟུང་འཛིན་བླང་དོར་བྱ་བ་དང་། །ལྟ་སྤྱོད་རྩོལ་བསྒྲུབ་བྱར་མེད་དེ། །ལམ་དང་གཉེན་པོས་བཅོས་མེད་པར། །བྱང་སེམས་མཉམ་པའི་རང་བཞིན་དུ། །ང་ཡིས་བསྟན་པའི་དོན་འདི་ནི། །བྱང་ཆུབ་སེམས་དཔའི་ལུང་ཆེན་ཡིན། །མ་གཡོས་ཐིག་ལེ་མཉམ་པ་ཉིད། །མིང་དང་དོན་དང་དཔེ་དང་ནི། །རང་བཞིན་མཚན་ཉིད་སེལ་ལུགས་སོ། །སངས་རྒྱས་སེམས་ཅན་གཉིས་མེད་པས། །སེམས་ལ་བླང་དོར་བྱ་རུ་མེད། །སེམས་ཉིད་རྫོགས་པ་ཆེན་པོ་ལ། །ཐམས་ཅད་ལྷུན་གྱིས་གྲུབ་པའི་ཕྱིར། །བདེ་དང་སྡུག་བསྔལ་རྒྱུ་གཅིག་ཕྱིར། །སྙིང་པོ་བྱང་ཆུབ་སེམས་རྟོགས་ན། །དུས་ལ་སྔ་ཕྱི་མེད་པར་གཅིག །འདི་ཡིན་འདི་མིན་ངང་གིས་མེད། །སེམས་ལ་གཟུང་རྐྱེན་མེད་པས་ན། །དོན་ལ་བསྒོམ་དུ་མ་མཆིས་ཏེ། །དེས་ན་འདི་མེད་ངེས་པ་མེད། །སྙིང་པོ་བྱང་ཆུབ་སེམས་འདི་ལ། །ཏིང་འཛིན་བསམ་པའི་དོན་ལས་འདས། །བརྗོད་དུ་མེད་པའི་ངང་ལ་གནས། །དེ་ལྟའི་སྙིང་པོ་བྱང་ཆུབ་སེམས། །བསྟན་པའི་སྙིང་པོར་གྱུར་པས་ན། །སངས་རྒྱས་ཀུན་གྱིས་རབ་ཏུ་བསྔགས། །བྱ་བྱེད་རྩོལ་བསྒྲུབ་མི་མངའ་བས། །བདེ་ཆེན་ཀློང་དུ་ཇང་བཞིན་གནས། །ཡང་དག་འདི་འདྲ་ཞེ་འདོད་བྱེད། །སེམས་དཔའ་རྡོ་རྗེ་ཁྱོད་ཉིད་འཁྲུལ། །ད་ལྟ་འདི་འདྲར་བསྒོམ་འདོད་པས། །བསྒོམ་ཆགས་ལམ་གྱི་ནད་ཀྱིས་ཟིན། །སྟོན་པའི་ལུང་གི་ཚིག་རྣམས་ལ། །ལམ་དུ་དེ་མཐོང་འཇུག་པ་ནི། །ཞབྲུལ་པའི་ལམ་ཞུགས་སྨིག་རྒྱུར་བསྙེག །ཡང་དག་ལམ་ནི་འདི་ཡིན་ཏེ། །ཚིག་དང་ཡི་གེས་མཚོན་དུ་མེད། །ངང་གིས་མི་གཡོ་འགྱུ་བ་བྲལ། །རང་བཞིན་ཆོས་ཀྱི་གཞལ་ཡས་ན། །སྲོག་མེད་སྟོན་པའི་ངོ་བོར་བཞུགས། །རང་བཞིན་འཁོར་གྱི་ངོ་བོས་བསྐོར། །གསུང་མེད་བསྟན་པ་རྒྱ་མཚོ་སྒྲོགས། །བྱ་བྲལ་ཆོས་ལ་རང་བཞིན་བཀོད། །མཉམ་པའིརྒྱལ་པོ་རང་བཞིན་ཐོབ། །ཡེ་ནས་རྩོལ་བསྒྲུབ་ནད་བྲལ་ལ། །བྱས་ཟིན་རྩོལ་བའི་ནད་དང་བྲལ། །རང་གནས་ལྷུན་ལ་ངང་གིས་གནས། །མ་བཅོས་མ་བྱས་རང་ལུགས་གནས། །མཉམ་ཉིད་སྙིང་པོ་ཀུན་གྱི་གཞི། །ངོ་བོ་དངོས་པོ་དང་བྲལ་ལ། །ཕྱོགས་གཅིག་འདི་འདྲར་བཟུང་དུ་མེད། །ཇི་བཞིན་མཉམ་པའི་སྙིང་པོ་ལ། །ཁ་དོག་འོད་ལྔ་སོ་སོར་གསལ། །ཟེར་རྩལ་ཡན་ལག་ལྔ་འབྱུང་བས། །སྣང་བའི་ཚུལ་ལ་རིམ་གྱིས་འབྱུང་། །དེ་ལས་འཆར་སྒོ་སོ་སོར་ཤར། །སུས་ཀྱང་མ་བྱས་ཤུགས་ལས་བྱུང་། །བག་ཆགས་རྟོག་འཁྲུལ་སྣ་ཚོགས་སྐྱེས། །ཡེ་ཤེས་རང་སྣང་འདི་ཉིད་ལ། །མ་བཙལ་མ་བསྒོམས་ངང་གིས་ཤར། །ཞེས་གསུངས་སོ། །གསང་བ་སྤྱི་རྒྱུད་ལས།གནས་ལུགས་བསྟན་པའི་ལེའུ་སྟེ་དྲུག་པའོ།། །།དེ་ནས་སེམས་དཔའ་རྡོ་རྗེས། གསངབདག་ཆེན་པོ་ལ་ཞུས་པ། །གནས་ལུགས་དེ་ལྟར་གནས་པ་ན། །གསང་བདག་ཆེན་པོས་ཇི་ལྟར་རྟོགས། །ང་ལ་སོགས་པས་རྟོགས་ཐབས་ཡོད་དམ་མེད། །ཅེས་གསོལ་པས། གསང་བདག་ཆེན་པོས་གསུངས་པ། །ཡེ་ནས་རང་བཞིན་ལྷུན་གྲུབ་ལས། །འོད་ལྔའི་སྣང་བ་རང་ཤར་བས། ་ས་རབ་མཁའ་ལ་འདེགས་པའི་རླུད་། །འོད་གསལ་སེམས་ཉིད་ངོ་བོར་ཤར། །གཞན་ལ་མ་ལྟོས་ཤུགས་ལས་བྱུང་། །རང་དབང་ཡེ་ཤེས་རྒྱལ་པོ་ཤར། །ཞིང་ཁམས་མ་ལུས་བདེ་བར་སྤྱོད། །མཁྱེན་པའི་ཡེ་ཤེས་རང་བཞིན་ཤར། །མོས་པའི་བསམ་པ་མཁྱེན་མཆོག་གི །འདོད་པའི་འབྲས་བུ་སོ་སོར་སྟོན །ཡོན་ཏན་སྒོ་མོ་བསམ་མི་ཁྱབ། །རང་རང་གང་འདུལ་ཐབས་སུ་བསྟན། །དབང་པོའི་བྱེ་བྲག་སོ་སོ་ལ། །ཐེག་པའི་སྒོ་ཡང་སོ་སོར་བསྟན། །སྐུ་ལྔ་འབྲས་བུ་སོ་སོར་ཐོབ། །དུས་གསུམ་སངས་རྒྱས་ཆོས་ཆེན་པོ། །མཚོན་དུ་མེད་པས་དམིགས་དང་བྲལ། །ངོས་གཟུང་མེད་པས་འཛིན་སེམས་མེད། །འཛིན་བྲལ་སྟོང་པའི་ཡེ་ཤེས་ཉིད། །འདོད་པའི་འབྲས་བུ་ཤུགས་ལས་འཆར། །བརྒྱད་ཁྲིའི་སྒོ་ཡང་སོ་སོར་ཕྱེ། །མ་བཅོས་སེམས་ཀྱི་ངོ་བོར་འདུས། །བྱང་ཆུབ་སེམས་ཀྱི་ཀུན་གྱི་གཞི། །སངས་རྒྱས་ཉིད་ལས་གཞན་མ་ཡིན། །ཕྱོགས་སུ་མ་བཟུང་རིས་མེད་པ། །འདོད་པའི་ཕྱོགས་ལ་འཛིན་པ་མེད། །གསལ་འགྲིབ་མེད་པའི་ཡེ་ཤེས་ནི། །ཉི་མའི་དཀྱིལ་འཁོར་བཞིན་དུ་གསལ། །ཕྱི་ནང་མི་མངའ་མན་ཤེལ་གཟུགས། །དེ་ལས་དེ་བྱུང་ངོ་མཚར་རྒྱན། །ཕྱོགས་རིས་མེད་པའི་འོད་ཀྱི་སྐུ། །མདུན་རྒྱབ་མེད་པར་ཐལ་ལེ་བ། །གསལ་བའི་ངང་ལས་རིན་པོ་ཆེ། །འདོད་པའི་འབྲས་བུ་འབྱུང་བའི་མཆོག །དཔག་བསམ་ཤིང་བཞིན་ལྷུན་གྱིས་གྲུབ། །གཞན་ལས་འབྱུང་བའི་ཆོས་མ་ཡིན། །སྣང་བ་ལྔ་ཡི་དཀྱིལ་འཁོར་ནས། །སྐུ་ལྔ་འབྲས་བུ་ངང་ལས་བྱུང་། །ཞེས་གསུངས་སོ། །གསང་བ་སྤྱི་རྒྱུད་ལས། ཡར་གྱི་རྟོགས་ཚུལ་བསྟན་པའི་ལེའུ་སྟེ་བདུན་པའོ།། །།དེ་ནས་སེསམ་དཔའ་རྡོ་རྗེས་གསང་བདག་ཆེན་པོ་ལ་ཞུས་པ། ཡར་གྱི་རྟོགས་ཚུལ་དེ་ལྟར་རྟོགས་པ་ལ། །འགྲོ་དྲུག་སེམས་ཅན་མ་རྟོགས་ཇི་ལྟར་ཞབྲུལ། །གསང་བདག་ཆེན་པོས་གསུངས་པ།ཐོག་མེད་དུས་ན་དོན་མི་གསལ། །རྒྱུ་དང་ལོག་གཅོད་ཐབས་དང་བྲལ། །སྤྲིན་དང་མུན་པའི་ལིང་ཏོག་གིས། །རྫས་གང་མི་མཐོང་བསྒྲིབས་པ་བཞིན། །རྒྱུ་རྐྱེན་ངོ་བོ་ཚུལ་དུས་ཀྱིས། །བལྟ་བྱའི་སྙིང་པོ་མཐོང་བ་མེད། །མཁའ་འགྲོ་འདོད་དབང་རྒྱུ་བ་ཡིས། །ས་ཁུང་སྙི་བྲུས་ཟིན་པ་བཞིན། །གང་ཞིག་འདོད་པའི་སྙིས་ཟིན་ནོ། །མེད་སྣང་ལོག་པར་མཐོང་བ་ཡིས། །མཁའ་ལ་སྐྲ་ཤད་འཁོར་ལོ་དང་། །གངས་ལ་སེར་པོར་མཐོང་དག་འདྲ། །དངས་མའི་འོད་ལས་ཟེར་ལྔ་ཤར། །མེད་ལས་ཡོད་གཟུང་ལྔ་པོ་ལས། །བརྐམ་ཆགས་རྒྱུད་ལྔ་སོ་སོར་འཁྲུལ། །ཕྱི་འཁྲུལ་ནང་འཁྲུལ་གསང་འཁྲུལ་གྱིས། །ཡུན་རིང་འཁོར་བའི་ནང་དུ་འཁྱམས། །དབུལ་མོའི་གཏེར་དང་གྱང་ནོར་འདྲ། །བླ་མེད་བྱང་ཆུབ་ངོ་མ་ཤེས །ཐོག་མེད་དུས་ན་དོན་མི་གསལ། །སྡུག་བསྔལ་གསུམ་ལ་ཡུན་རིང་སྤྱོད། །འཁྲུལ་འཁོར་མུན་པས་དེ་མི་མཐོང་། །འདོད་པ་དྲུག་གིས་དེ་མི་མཐོང་། །ལོག་རྟོག་འཁྲུལ་པས་དེ་མི་མཐོང་། །བག་ཆགས་གསར་རྙིང་འཁྲུལ་པས་བསྒྲིབས། །སྐྱེས་བུའི་ལུས་དང་བྱད་འགྲོགས་འདྲ། །ཞེས་གསུངས་སོ། །གསང་པ་སྤྱི་རྒྱུད་ལས། འཁྲུལ་པའི་ལེའུ་སྟེ་བརྒྱད་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་ཞུས་པ། །འགྲོ་དྲུག་སེམས་ཅན་ཐམས་ཅད་ཀྱིས། །ཐོག་མེད་དུས་ནས་དོན་མ་རྟོགས། །ཡུན་རིང་འཁོར་བའི་ནང་ན་སྡུག །དུས་འདིར་སྟོན་པས་ཐུགས་རྗེས་གཟིགས། །ཞུས་པས། དེ་ནས་གསང་བདག་ཆེན་པོ་ཐུགས་རྗེ་སྐྱེས། །འགྲོ་བའི་དོན་དུ་ཐུགས་རྗེས་དོན་མཛད་པ། །འགྲོ་བ་མོས་པ་ཐ་དད་ལ། །དང་པོ་སྐུ་ཡིས་འདུལ་བ་ཡིན། །བར་དུ་གསུང་གིས་འདུལ་བ་ཡིན། །ཐ་མ་ཐུགས་ཀྱིས་འདུལ་བ་ཡིན། །ཐུགས་ཀྱིས་འདུལ་བ་རྣམ་པ་གསུམ། །བྱིན་རླབས་ཐུགས་ཀྱིས་འདུལ་བ་དང་། །རིག་པ་ཐུགས་ཀྱིས་འདུལ་བ་དང་། །ཡང་སྤྲུལ་ཐུགས་ཀྱིས་འདུལ་བའོ། །དེ་ཡི་དུས་ཀྱི་གང་ཟག་རྣམས། །སྐལ་ལྡན་རིགས་ཅན་འབྱུང་བར་འགྱུར། །དགོངས་པ་དོན་གྱི་བཅུད་འཛིན་ཞིང་། །རྣ་བརྒྱུད་གདམས་ངག་ནོད་པར་བྱ། །འོད་གསལ་འཛིན་བྲལ་བདེ་བའི་མཆོག །གལ་ཏེ་རྣམ་པར་རྟོག་པ་མེད། །རིག་པ་རྗེས་མེད་བྱ་ལམ་འདྲ། །འཛིན་མེད་ནམ་མཁའ་བཞིན་དུ་གནས། །སྒྲིབ་མེད་ཉི་མའི་སྙིང་པོ་ཉིད། །གཏིང་ཟབ་རྒྱ་མཚོའི་འཇིང་དང་འདྲ། །ཀུན་འབྱུང་ས་གཞིའི་རིན་ཆེན་གཏེར། །དགོས་འདོད་འབྱུང་བས་རིན་པོ་ཆེ། །ཞེས་གསུངས་སོ། །གསང་བ་སྤྱི་རྒྱུད་ལས། ཐུགས་རྗེ་མཛད་པའི་ལེའུ་སྟེ་དགུ་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་ཞུས་པ། ཡང་དག་པའི་དོན་ཇི་ལྟ་བུ། གསང་བདག་ཆེན་པོས་གསུངས་པ།དམིགས་མེད་ཁ་དོག་ཡུལ་དང་བྲལ། །སྤྲོས་བྲལ་ངབསམ་དུ་མེད་པའོ། །བྱང་ཆུབ་སེམས་ལ་མཚོན་དུ་མེད། །གཟུང་འཛིན་བྲལ་བས་འཁྲུལ་བ་མེད། །བསམ་མེད་བློ་ཡི་ཡུལ་དང་བྲལ། །མཐའ་དབུས་མེད་པར་སྙིང་པོ་གསལ། །གསལ་བའི་ངང་ལ་རྩིས་གདབ་མེད། །སྐྱོན་དང་བྲལ་བའི་ཆོས་ཉིད་དེ། །ཐོགས་པ་མེད་པའི་བྱང་ཆུབ་སེམས། །གསལ་འགྲིབ་མེད་པའི་ཡེ་ཤེས་ཏེ། །འགག་པ་མེད་པའི་ཆོས་ཉིད་དོ། །མ་ནོར་པ་ཡི་ཆོས་ཉིད་དེ། །རང་ལས་བྱུང་བ་མངོན་སངས་རྒྱས། །སྐྱེ་འགག་མེད་པའི་བྱང་ཆུབ་སེམས། །མ་ནོར་མ་བཅོས་དབྱིངས་ན་མེད། །སྐྱེ་བ་མེད་པའི་རང་བཞིན་ནི། །ཚོགས་དྲུག་མཚན་མའི་ཡུལ་དང་བྲལ། །ཆོས་སྐུ་གཅིག་པའི་རང་བཞིན་གྱིས། །དུས་གསུམ་རིམ་པར་ཕྱེ་བ་མེད། །ཆོས་ཉིད་ལྷུན་གྲུབ་བདེ་བ་ཆེ། །མི་བསྐྱོད་མི་གཡོ་རང་བཞིན་བདེ། །མཉམ་པའི་བདེ་བ་རང་བྱུང་ཉིད། །གཞན་ནས་བཙལ་བའི་འདོད་པ་མེད། །མ་སྐྱེས་རང་བྱུང་རང་བཞིན་ནི། །རྨད་དུ་བྱུང་བའི་ཆོས་ཉིད་དོ། །མངོན་དུ་གྱུར་པའི་མཐུ་རིག་པ། །བདེ་ཆེན་ཆོས་ཀྱི་གཞལ་ཡས་སུ། །སེམས་དཔའ་རྡོ་རྗེ་རིག་པའི་མཆོག །སྤྲུལ་པ་ཐ་མའི་དོན་དུ་འབྱུང་། །ཨ་ཏིའི་སྙིང་པོ་དོན་འདི་འབྱུང་། །ཞེས་གསུངས་སོ། །གསང་བ་སྤྱི་རྒྱུད་ལས། ཡང་དག་པའི་་དོན་བསྟན་པའི་ལེའུ་སྟེ་བཅུ་པའོ།། །།དེ་ནས་གསང་བདག་ཆེན་པོ་ལ་རྡོ་རྗེ་སེམས་དཔས་ཞུས་པ། །འགྲོ་བ་སེམས་ཅན་ཐམས་ཅད་ཀྱིས། །ཡང་དག་དོན་ཉིད་མ་རྟོགས་པ། །དེ་ཡི་ཉེས་སྐྱོན་གང་གིས་བྱས། །ཞེས་ཞུས་པས། གསང་བདག་ཆེན་པོས་གསུངས་པ། །སྲིད་གསུམ་ལས་ལྔ་ཞབྲུལ་པ་ཡིས ལམ་སྒོ་ལྔ་རུ་ཞུགས་ཕྱིན་ན། །མི་བདེ་སྡུག་བསྔལ་ལ་ཡང་སྤྱོད། །ཞེ་སྡང་ལམ་གྱི་སྒོར་ཞུགས་པས། །དམྱལ་བའི་གནས་དང་ཚ་གྲང་སྤྱོད། །སྔ་ཕྱི་དྲན་པའི་ཆོས་སྦྱོད་ཀྱང་། །ཚ་དང་གྲང་བའི་ཉམས་མྱོང་གིས། །ཡང་དག་དོན་དང་ཕྲད་པར་དཀའ། །འདོད་ཆགས་ལམ་གྱི་སྒོར་ཞུགས་པས། །ཡི་དྭགས་གནས་སུ་བཀྲེས་སྐོམ་སྤྱོད། །བསྔོས་པས་ཚིམ་པའི་ཆོས་སྤྱོད་ཀྱང་། །སྔ་ཕྱིའི་ལས་ཀྱི་རྣམ་སྨིན་གྱིས། །བཀྲེས་དང་སྐོམ་པའི་ཉམས་མྱངས་ཏེ། །ཡང་དག་དོན་དང་ཕྲད་པར་དཀའ། །གཏི་མུག་ལམ་གྱི་སྒོར་ཞུགས་པས། །བྱོལ་སོང་གནས་སུ་བླུན་ལྐུགས་སྤྱོད། །རིག་པ་ཕྲ་མོའི་ཆོས་ལ་སྤྱོད། །སྔ་མའི་ལས་ཀྱི་རྣམ་སྨིན་གྱིས། །བླུན་ཞིང་ལྐུགས་པའི་ཉམས་མྱངས་ཏེ། །ཡང་དག་དོན་དང་ཕྲད་པར་དཀའ། །ཕྲག་དོག་ལམ་གྱི་སྒོར་ཞུགས་པས། །མི་ཡི་གནས་སུ་དགེ་སྡིག་སྤྱོད། །དགེ་སྡིག་ལས་ཀྱི་ཆོས་སྤྱོད་ཀྱང་། །འདིར་དགེ་ཤས་ཆུང་རྣམ་སྨིན་གྱིས། །མི་རྟག་འགྱུར་བའི་ཆོས་ལ་སྦྱོད། །ཡང་དག་དོན་དང་ཕྲད་པར་དཀའ། །ང་རྒྱལ་ལམ་གྱི་སྒོར་ཞུགས་པས། །ལྷ་ཡི་གནས་དང་ལོངས་སྤྱོད་ཀྱིས། །མ་རིག་ལྟུང་བའི་སྡུག་བསྔལ་སྒྲོད། །བསམ་པས་གྲུབ་པའི་ཆོས་ལ་སྤྱོད། །མ་རིག་ལེ་ལོའི་རྣམ་སྨིན་གྱིས། །ལྟུང་བའི་སྡུག་བསྔལ་ཉམས་མྱངས་ཏེ། །ཡང་དག་དོན་དང་ཕྲད་པར་དཀའ། །ཁམས་གསུམ་གནས་ཀྱང་དེ་འདྲ་སྟེ། །འདོད་པའི་ཁམས་ནི་མ་རིག་པ། །གཟུགས་ཀྱི་ཁམས་ནི་ཆགས་པ་སྟེ། །གཟུགས་མེད་ཁམས་ནི་དངོས་མ་གྲུབ། །ཡིད་ཡུལ་ཆོས་ལ་མུ་བཞིར་བལྟ། །རང་རང་མྱོང་བའི་ཤེས་པ་སྟེ། །ཡང་དག་མ་མཐོང་ཞབྲུལ་པ་ཡིན། །ཐོག་མ་མེད་པའི་བག་ཆགས་དང་། །བླ་མའི་གདམས་ངག་རྐྱེན་མེད་པས། །རྟོག་མེད་སྙིང་པོའི་སེམས་མ་ཤེས། །སྐྱེས་བུའི་ལུས་དང་བྱད་འགྲོགས་འདྲ །ཞེས་གསུངས་སོ། །གསང་བ་སྤྱི་རྒྱུད་ལས། ཁམས་གསུམ་སེམས་ཅན་གྱི་ཞབྲུལ་པའི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་ཞུས་པ། ཁམས་གསུམ་སེམས་ཅན་མཚན་ཉིད་དེ་འདྲ་བས། །དེ་ནས་ཐོན་པའི་ཐབས་ནི་གང་གིས་བགྱི། །ཞུས་པས། གསང་བདག་ཆེན་པོས་གསུངས་པ། འགྲོ་བ་མོས་པ་ཐ་དད་པས། །ཐེག་པའི་སྒོ་མང་སོ་སོར་བསྟན། །གཉིས་ནི་རྣམ་པའི་བྱེ་བྲག་སྟེ། །ཐེག་པ་རྣམ་པ་གཉིས་སུ་བསྟན། །འཇིག་རྟེན་པ་ཡི་ཐེག་པ་དང་། །འཇིག་རྟེན་འདས་པའི་ཐེག་པའོ། །འཇིག་རྟེན་པ་ཡི་ཐེག་པ་ནི། །རྒྱུད་དྲུག་གནས་པའི་སེམས་ཅན་ཀུན། །ཁམས་གསུམ་འཁོར་བའི་གནས་བཟུང་ནས། །བརྐམ་ཆགས་ལྔ་ཡི་ཞེན་པ་ཡིས། །ཁམས་གསུམ་འཁོར་བའི་ཚོགས་སོགས་ཏེ། །བདེ་བའི་དོན་མེད་སྟོང་པར་འགྱུར། །དེ་ལ་དོན་འདི་བསྟན་པར་བྱ། །མུ་སྟེགས་རྟག་དང་ཆད་རྣམ་གཉིས། །དགེ་སྡིག་ལས་ཀྱི་ཆོས་རྣམས་ལ། །འབྲས་བུ་ཡོད་པར་མ་རྟོགས་ཏེ། །ཆད་པའི་མཐའ་རུ་ལྟུང་བའོ། །རྟག་པར་ལྟ་བའི་སེམས་ཅན་གྱིས། །ཡོད་པ་རྣམ་པ་བཞི་མཐོང་སྟེ། །ང་གཙང་སྐྱིད་རྟག་བཞི་མཐོང་ནས། །བླང་དོར་མེད་པའི་ཆོས་མ་ཤེས། །སྐྱེ་བ་མེད་པའི་དོན་མ་མཐོང་། །རྟག་པའི་མཐའ་རུ་ལྟུང་བའོ། །ཞེས་གསུངས་སོ། །གསང་བ་སྤྱི་རྒྱུད་ལས། འཇིག་རྟེན་པའི་ཐེག་པའི་ལེའུ་སྟེ་བཅུ་གཉིས་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་འཇིག་རྟེན་ལས་འདས་པའི་ཐེག་པ་ཞུས་པ། གསང་བདག་ཆེན་པོས་གསུངས་པ། འཇིག་རྟེན་འདས་པའི་ཐེག་པ་ལ། །རྣམ་པ་གཉིས་སུ་ཕྱེ་ནས་བསྟན། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །མཚན་ཉིད་རྒྱུ་ལ་རྣམ་པ་གསུམ། །སྡུག་བསྔལ་སྤོང་བའི་ཉན་ཐོས་དང་། ཁྲེས་པ་འགེག་པའི་རང་རྒྱལ་དང་། །རྣམ་རྟོག་སྦྱོང་་བའི་མདོ་སྡེ་གསུམ། །སྡུག་བསྔལ་སྤོང་བའི་ཉན་ཐོས་ནི། །བརྟུལ་ཞུགས་དག་གིས་སྤོང་བར་བྱེད། ་ས་པ་འགེག་པའི་རང་རྒྱལ་ནི། །མ་རིག་རྟེན་འབྲེལ་བཅུ་གཉིས་འགེག །རྣམ་རྟོག་སྦྱོང་བའི་སྡེ་པ་ནི། །ཆོས་ཉིད་སྟོང་པ་ནམ་མཁའ་སྟེ། །ཇི་ལྟར་དམིགས་པ་བཞིན་གྲུབ་པ། །སྒྱུ་མའི་དཔེ་བརྒྱད་ལྟ་བུར་འདོད། །འབྲས་བུའི་ཐེག་པ་ལ་ཡང་གསུམ། །བྱ་བའི་སྡེ་དང་གཉི་ག་དང་། །རྣལ་འབྱོར་རྒྱུད་དང་རྣམ་པ་གསུམ། །བྱ་བ་བྱེད་པ་ཀྲི་ཡ་ནི། །ཡན་ལག་བཅུ་གཅིག་ཆོ་ག་ཡིས། །རྒྱལ་་བའི་སྐུ་གསུང་ཡེ་ཤེས་འདོད། །གཉིས་ཀ་སྤྱོད་པའི་ཨུ་པ་ཡ། །ཀྲི་ཡར་སྤྱོད་ཅིང་ཡོ་གར་བསྒྲུབ། །འབྲེལ་མེད་སྒོ་ནས་བསྒྲུབ་པར་འདོད། །རྣལ་འབྱོར་པ་ལ་རྣམ་པ་གཉིས། །ཕྱི་པ་ཐུབ་པའི་ཡོ་ག་ནི། །བྱང་ཆུབ་ལྔ་དག་ཆོ་འཕྲུལ་བཞི། །ཆུཟླབཞིནདུའགྲུབཔར་འདོད། །ནང་པའི་རྣལ་འབྱོར་རྣམ་པ་གསུམ། །བསྐྱེད་དང་རྫོགས་དང་རྫོགས་ཆེན་གསུམ། །བསྐྱེད་པ་མ་ཧྭ་ཡོ་ག་ནི། །རྣམ་པ་གསུམ་ནི་རིམ་བསྐྱེད་དེ། །ཡོ་བྱད་མ་ཉམས་འཇུག་བརྩོན་ན། །རྒྱལ་བའི་སྐུ་གསུམ་ཡེ་ཤེས་འདོད། །རྫོགས་པ་ཨ་ནུ་ཡོ་ག་ནི། །རྒྱུ་རྐྱེན་དག་པའི་རང་བཞིན་གྱིས། །སྙིང་པོ་ཙམ་ལ་རག་ལས་པ། །བརྗོད་པས་ཡེ་ཤེས་དཀྱིལ་འཁོར་རྫོགས། །རྫོགས་ཆེན་ཨ་ཏི་ཡོ་ག་ནི། །རྒྱུ་རྐྱེན་དག་ལ་རག་མ་ལུས། །རྩོལ་བ་དག་གིས་བསྒྲུབ་མི་བྱེད། །རྫོགས་ཆེན་གང་ལའང་མ་བརྟེན་འདིས། །རྣམ་པར་བགྲང་བའི་ཆོས་རྣམས་ཀུན། །ཡོངས་སུ་བྱིན་གྱིས་རློབ་པར་བྱེད། །ཀུན་གྱིས་བདེ་བ་སྤོང་བྱེད་པས། །ཡོངས་སུ་བྱིན་གྱིས་རློབ་པར་བྱེད། །ཅེས་གསུངས་སོ། །གསང་བ་སྤྱི་རྒྱུད་ལས། འཇིག་རྟེན་ལས་འདས་པའི་ཐེག་པ་སྟེ་ལེའུ་བཅུ་གསུམ་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་ཞུས་པ། ཆོས་ཉིད་མ་ཡི་རང་བཞིན་ཇི་ལྟ་བུ། ཞུས་པས། གསང་བདག་ཆེན་པོས་གསུངས་པ། །མཉམ་ཉིད་མ་ཡི་རང་བཞིན་ནི། །མཐའ་ཡས་འགྲོ་བ་ཀུན་ལ་གནས། །གང་ཡང་མ་ཡིན་དངོས་གཞི་མེད། ཁྲེས་པ་རང་ལུགས་སོ་མ་ཉིད། །དུས་གསུམ་གཡོ་བ་མེད་པར་གནས། །རང་བཞིན་སེམས་ནི་བརྗོད་པ་མེད། །མི་གཡོ་མ་བཅོས་མཉམ་པ་ཉིད། །རང་གནས་ཡེ་ཤེས་འོད་གསལ་བ། །ཡིད་ལ་འགྱུ་མེད་ཡེ་ཤེས་གསལ། །མཁའ་འདྲ་ཡེ་ཤེས་ལྷུན་གྱིས་གྲུབ། །གྲུབ་མེད་ཡེ་ནསརངབཞིནགནས། །མཉམ་ཉིད་གསལ་བ་རིན་པོ་ཆེ། །ནམ་མཁའབཞིནདུམཐའདབུས་མེད། །དབྱིབས་དང་ཁ་དོག་གང་སྣང་བ། །དབྱེ་བསལ་མེད་ན་བདེ་བའི་མཆོག །བརྗོད་མེད་བསམ་མེད་དོན་པོ་ཆེ། །དེ་བཞིན་འགྱུར་མེད་དེ་བཞིན་ཉིད། །མ་བཅོས་རང་བྱུང་སྙིང་པོ་ཉིད། །ཆོས་སྐུ་རང་བྱུང་སྟོན་པའི་མཆོག །ཡི་གེ་བརྗོད་བྱ་ཀུན་དང་བྲལ། །མ་བཅོས་སོ་མ་བརྗོད་བྱ་མེད། །ཞེ་འདོད་རྣམ་པ་གང་ཡང་མེད། །མ་བཅོས་རང་བྱུང་ཉིད་དུ་བདེ། །ཕྱི་རོལ་གང་སྣང་རང་བཞིན་མེད། །མ་བཏགས་མ་བཟུང་དབྱེ་བསལ་མེད། །སྟོང་ཉིད་མ་བཅོས་ཉིད་དུ་བདེ། །ལྟ་བའི་ངོ་བོ་འདོད་པ་བྲལ། །བློ་ཡིས་བྱས་པ་མ་ཡིན་པ། །ཆགས་དང་བྲལ་བས་ཞེན་པ་མེད། །འཛིན་དང་བྲལ་བས་སྟོང་ཆེན་པོ། །དང་པོའི་དུས་སུ་ཤེས་པའོ། །མ་བྱུང་མ་སྐྱེས་མཉམ་པའི་ངང་། །ཡེ་དག་ཡེ་གྲོལ་ཡེ་གནས་སོ། །རིན་ཆེན་གླིང་བཞིན་ཡེ་གནས་སོ། །སེམས་ཀྱི་ཡེ་ཤེས་གཏེར་ཁ་ཕྱེ། །འདོད་པའི་ལོངས་སྤྱོད་ཟད་མཐའ་མེད། །ངོ་བོ་ཉིད་གནས་སྐྱེ་མེད་པ། །ནམ་ཡང་སྐྱེ་བར་མི་འགྱུར་རོ། །ཞེས་གསུངས་སོ། །གསང་བ་སྤྱི་རྒྱུད་ལས། ཆོས་ཉིད་མའི་རང་བཞིན་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་སེམས་དཔའ་རྡོ་རྗེས་གསང་བདག་ཆེན་པོ་ལ་ཞུས་པ། ཡན་ལག་བུ་ཡི་རང་བཞིན་ཇི་ལྟ་བུ།གསང་བདག་ཆེན་པོས་གསུངས་པ། །སྟོང་པ་ལས་སྐྱེས་རིག་པ་ནི། །སྣ་ཚོགས་སྣང་བ་ཉིད་དུ་འཆར། །རང་རིག་གསལ་བ་ཉིད་དུ་ཤར། །རིག་པ་དོན་གྱི་ངོ་བོ་ནི། །སོ་སོ་མ་ཡིན་བརྗོད་བྱ་གཅིག །ཐ་སྙད་མ་ལུས་སྒྲོན་མའི་མཆོག །རིག་པ་དགོངས་པ་གཏན་ལ་འབེབས། །སྣང་བ་མ་ལུས་སེམས་ལ་གསལ། །རིག་པ་མཆོག་ལྡན་སངས་རྒྱས་བཀའ། །རིག་པ་རྫས་མེད་བསལ་དང་བྲལ། །དབང་པོའི་ངོ་ལ་གང་གནས་པ། །རང་བཞིན་མི་རྟོག་སེམས་སུ་གསལ། ཁྲེས་རིག་ཡེ་ཤེས་ཉིད་དུ་འཆར། །བདེ་ཆེན་རང་རིག་ཉིད་དུ་གསལ། །འཛིན་མེད་ནམ་མཁའི་ངང་ལ་གཞག །རང་རིག་རྟོག་པ་ཤུགས་ལས་འཆར། །བློ་ཡི་རྩོལ་བས་བསྒྲུབ་ཏུ་མེད། །ཏིང་འཛིན་ཕྱོགས་ལ་བློ་མི་གཏོད། །འདོད་པའི་རེ་བ་ཀུན་དང་བྲལ། །ཐ་སྙད་ཕྱོགས་ལ་བློ་མི་གནས། །བརྗོད་པའི་ཐ་སྙད་གདགས་གཞི་བྲལ། །རང་བཞིན་གསལ་བའི་དོན་ལ་འཇུག །འོད་གསལ་སེམས་ལ་སྒྲིབ་ཕྱོགས་བྲལ། །མ་བཅོས་བྱ་བ་ངང་གིས་བཏང་། །དལ་བར་བཞག་ནས་ངང་གིས་བདེ། །རྒྱུད་འཇམ་ཁྲོ་གཏུམ་ཀུན་དང་བྲལ། །ཉོན་མོངས་སྐྱེ་བའི་རྒྱུ་མི་གནས། །བདག་ཡོད་མཐའ་རུ་ལྟུང་མི་འགྱུར། །མེད་པ་མ་ཡིན་ངང་གིས་གསལ། །མེད་པ་བདེ་བའི་ཡུལ་མ་མཐོང་། །མཐའ་གཉིས་མ་གོས་སྐྱོན་དང་བྲལ། །ཐམས་ཅད་གྲོལ་བའི་བྱང་ཆུབ་སེམས། །ལུས་ཀྱང་བྱང་ཆུབ་སེམས་སུ་འདུས། །སེམས་ལ་རིག་པ་བརྩི་གདབ་མེད། །ཅེས་གསུངས་སོ། །གསང་བ་སྤྱི་རྒྱུད་ལས། བུའི་མཚན་ཉིད་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་གསངབདགཆེནཔོལསེསམདཔའ་རྡོ་རྗེས་ཞུས་པ། །དབྱེར་མེདརངབཞིནཇིལྟ༄༅ བུ། །འབྲས་བུ་ཡེ་ཤེས་དཀྱིལ་འཁོར་ཇི་ལྟ་བུ། །གསང་བདག་ཆེན་པོས་གསུངས་པ། །སྣང་བའི་ཆོས་ཀྱང་དེ་ལས་བྱུང་། །དངོས་དང་དངོས་མེད་གཉིས་སུ་མེད། །གསལ་དང་སྟོང་པའི་མཐའ་མི་འཛིན། །གཉིས་མེད་སེམས་ཀྱི་ངང་དུ་བདེ། །དེས་ན་གཉིས་མེད་བྱང་ཆུབ་སེམས། །ཆོས་རྣམས་ཡེ་ནས་གཉིས་སུ་མེད། །ཆོས་ཀུན་དེ་ལ་གང་མི་འགྲུབ། །རྟོག་དཔྱོད་འདས་པའི་བྱང་ཆུབ་སེམས། །མ་ཕྱེ་མ་བཀོལ་མི་གནས་པ། །རྩོལ་བྲལ་བསྒྲུབ་མེད་དོན་པོ་ཆེ། །རིན་ཆེན་ནོར་བུའི་དགོངས་པ་བཞིན། །བལྟ་བ་བསྒོམ་དུ་མེད་པ་ཡིན། །དམ་ཚིག་བསྲུང་དུ་མེད་པ་ཡིན། །ཕྲིན་ལས་བཙལ་དུ་མེད་པ་ཡིན། ཁྲེས་རབ་རང་བྱུང་སྒྲིབ་མེད་ཡིན། །ས་ལ་སྦྱང་དུ་མེད་པ་ཡིན། །ལམ་ལ་བགྲོད་དུ་མེད་པ་ཡིན། ཕྲ་བ་གཟུང་འཛིན་མེད་པ་ཡིན། །རྒྱུད་ཀྱི་རང་བཞིན་འབྲེལ་པ་ཡིན། །ལུང་ཆེན་ཐོག་ཏུ་འབེབས་པ་ཡིན། །མན་ངག་དག་གི་ལ་ཡང་ཟློ། །རྒྱུ་ནི་དག་པའི་དབྱིངས་སུ་བལྟ། །འབྲས་བུ་ཡེ་ཤེས་དཀྱིལ་འཁོར་བལྟ། །མེད་པ་ཕྱལ་པ་གཅིག་ཏུ་ལྷུན་གྲུབ་བོ། །གང་འཐད་དབང་པོའི་ཡུལ་དང་བསྟུན། །གཉིས་སུ་མེད་པའི་རང་བཞིན་ཡིན། །རིམ་མེད་ཅིག་ཆར་འཇུག་པའོ། །མ་བུ་གཉིས་སུ་མེད་པའི་ལམ། །ཟབ་ལ་གཏིང་དཔག་དཀའ་བའོ། །མ་དང་བུ་གཉིས་གཉིས་མེད་འབྲེལ། །མ་ནི་གཞི་ཡི་ལུང་གིས་སོ། །བུ་ནི་ཡེ་ཤེས་ལུང་དུ་བསྟན། །མ་ནི་དབྱིངས་སུ་དག་པར་བཟླའ། །བུ་ནི་ཡེ་ཤེས་ལ་ཡང་བཟླ། ཞེས་གསུངས་སོ། །གསང་བ་སྤྱི་རྒྱུད་ལས། དབྱེར་མེད་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་བལྟ་བའི་རང་བཞིན་ཇི་ལྟ་བུ་ཞུས་པར། གསང་བདག་ཆེན་པོས་གསུངས་པ། །དྲི་མེད་རང་བྱུང་བལྟ་བའི་མཆོག །སྐྱོན་མེད་པདྨའི་རང་བཞིན་ཏེ། །གང་གི་རྣམ་པའི་འདོད་པ་བྲལ། །འཛིན་པ་ཐམས་ཅད་ངང་གིས་མེད། །ནམ་མཁའི་མཐོངས་ལྟར་ཅི་ཡང་མེད། །རང་བྱུང་བདེ་ཆེན་ཆོས་ཉིད་དོ། །བྱ་བཏང་འཛིན་སེམས་མེད་པས་བདེ། །འཛིན་དང་བྲལ་བའི་རང་བཞིན་ནི། །ཆགས་དང་བྲལ་བའི་བདེ་བ་མཆོག །འོད་གསལ་སྒྲིབ་ཕྱོགས་ཀུན་དང་བྲལ། །སྒྲིབ་པ་མེད་པའི་ཡེ་ཤེས་གསལ། །ཐེག་གཅིག་སྙིང་པོའི་བལྟ་བ་ལ། །བཟང་ངན་བླང་དོར་མ་མཆིས་པས། །བདེ་དང་སྡུག་བསྔལ་གཉིས་མི་མངའ། །དགག་དང་བསྒྲུབ་པ་བྱ་མི་དགོས། །ཐམས་ཅད་འདི་ལས་འབྱུང་བའི་ཕྱིར། །ཡིད་བཞིན་ནོར་བུའི་རང་བཞིན་ནོ། །ཡེ་ནས་ཡིན་པས་བྱ་མི་དགོས། །འབད་དང་རྩོལ་བས་མཐར་ཕྱུང་མེད། །ཐག་ཆོད་ཉམ་ང་མེད་པའི་མཆོག །བྱང་ཆུབ་སེམས་ཀྱི་རང་བཞིན་ནི། །གཞན་དུ་བལྟ་བའི་ཡུལ་མ་མཆིས། །བལྟ་བ་བློ་ཡིས་བྱས་པ་མིན། །སྤྱི་བླུགས་ཚངས་པའི་དབང་གིས་སུ། །བག་ཆགས་མཚན་མ་ཟིལ་གནོན་པ། །གསང་བའི་དོན་མྱོང་འོད་གསལ་སེམས། །དོན་ལ་བརྡའ་མཇལ་ཚིག་དང་བྲལ། །ཕྱོགས་མེད་པ་ནི་ལྟ་བའི་ཀློང་། །འཇུག་པའི་སྒོ་ཡངས་ལམ་གྱི་མཆོག །སྡུག་བསྔལ་འཁྲུལ་པ་རང་གྲོལ་འགྱུར། །རང་བལྟ་ཡུལ་མེད་རྟོགས་པས་ན། །མཚན་མའི་དངོས་པོའི་ཡུལ་མ་མཆིས། །སྣང་མེད་མ་འགགས་གཉིས་སུ་མེད། །སེམས་ལ་བལྟ་མེད་དོན་པོ་ཆེ། །བྱ་བ་བྲལ་བ་དོན་གྱི་མཆོག །རེ་འདོད་ཀུན་བྲལ་སྤང་ཐོབ་མེད། །བདེ་བ་རང་བྱུང་བལྟ་བ་ནི། །སྣང་བའི་ཡུལ་དུ་གྲུབ་པ་མེད། །འོད་གསལ་བདེ་ཆེན་མཚོ་ལྟར་ཟབ། །རིན་ཆེན་འོད་ལྟར་རང་ལས་བྱུང་། །གདེང་ལྡན་སོམ་ཉི་བྲལ་བ་སྟེ། །རང་རིག་ཚད་མ་མངོན་སུམ་གསལ། །ཚད་མ་གསུམ་གྱི་གཏན་ཚིགས་ཀྱིས། །དེ་ཉིད་རྟོགས་པའི་ཐབས་སུ་བཤད། །ཅེས་གསུངས་སོ། །གསང་བ་སྤྱི་རྒྱུད་ལས། །བལྟ་བ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་གསང་བདག་ཆེན་པོ་ལ། སེམས་དཔའ་རྡོ་རྗེས་ཏིང་ངེ་འཛིན་སྒོམ་ཐབས་ཇི་ལྟ་བུ་ཞུས་པས། གསང་བདག་ཆེན་པོས་གསུངས་པ། །བསྒོམ་དུ་མེད་པའི་ཆོས་ཉིད་ནི། །ཡིད་ཀྱིས་བཞག་པ་དང་བྲལ་བས། །འཛིན་སེམས་མེད་པར་ངང་གིས་བདེ། །ཚོགས་དང་བྲལ་བས་ཞེན་མེད་སེམས། །འགྱུ་བ་སངས་བས་གཞག་ཏུ་མེད། །མཚན་མ་མེད་པས་གཟུང་དུ་མེད། །ཁ་དོག་བྲལ་བས་དབྱིབས་དང་བྲལ། །བསྒོམ་མེད་ཡེངས་མེད་ངང་གིས་བདེ། །མི་བསྒོམ་རང་ལུགས་བཅོས་སུ་མེད། །བྱིང་དང་རྨུགས་མེད་སྐྱོན་དང་བྲལ། །མི་འཕྲོ་ཡུལ་ལ་འཛིན་པ་མེད། །རྩོལ་སེམས་མེད་པས་བྱ་མི་དགོས། །གང་སྣང་རང་ལུགས་སོ་མ་ཉིད། །མི་བསྒོམ་མི་འཛིན་འདོད་པ་བྲལ། །ཡུལ་ལ་མི་འཇུག་ངང་གིས་གནས། །གསལ་བ་སྒྲིབ་ཕྱོགས་ཀུན་དང་བྲལ། །ཞབྲུལ་པའི་སྐྱེ་བ་ངང་གིས་མེད། །མཚན་མའི་ཕྱོགས་སུ་འཛིན་པ་མེད། །སྣ་མེད་ངོས་གཟུང་བྲལ་བར་གནས། །གང་ལ་མི་འགྱུ་མི་འཛིན་ཏེ། །སྨག་གི་མུན་རུམ་སེམས་ལྟ་བུ། །མི་རྟོག་རང་བཞིན་ངང་གིས་གསལ། །བདེ་བ་རྟོག་མེད་ངང་ལ་གནས། །འཛིན་སེམས་མེད་པའི་དོན་གྱི་མཆོག །མཚན་མའི་ཡུལ་དུ་དམིགས་པ་མེད། །མ་བསྒྲུབས་ཡེ་ཤེས་རང་ལ་གསལ། །ཞེན་པའི་རྟོག་པ་ངང་གིས་དག །མི་འགྱུ་མི་འཛིན་དགོངས་པའི་མཆོག །མ་བཅོས་རང་གསལ་བདེ་བའི་མཆོག །འགྲོ་ཉལ་འདུག་སྡོད་ཐམས་ཅད་དུ། ཁུན་ཆད་མེད་པར་རྩོལ་སེམས་བྲལ། །འཁྲུལ་པའི་སྙིང་པོ་བསྟེན་མི་དགོས། །གང་སྣང་རྣམ་པ་ཅིར་ཤར་ཀྱང་། །དེ་ཡི་རྗེས་སུ་འགྲོ་མི་འགྱུར། །འཛིན་པའི་སྐབས་མེད་གང་འགྱུར་ཚེ། །དུས་གསུམ་རྒྱུན་ཆད་མེད་པར་གནས། །མི་བསྒོམ་དོན་ལ་བྱ་བ་གཏང་། །བསྒོམ་མེད་དོན་ལ་བློས་བཞག་མེད། །རང་གི་སེམས་ལས་མ་གཡོས་པས། །སྙིང་པོའི་ཕྱོགས་ལ་བརྟེན་མི་དགོས། །ཡེ་ཤེས་གསལ་བའི་དགོངས་པ་ལ། །ཚིག་གི་དོན་བྲལ་བྱ་ལམ་འདྲ། །རིག་པ་གང་གི་རྗེས་མི་གཅོད། །སྒྲོན་མའིདཔེབཞིནམུནཔསངས། དེ་ཉིད་ཡིན་ཏེ་བཙལ་མི་དགོས། །རང་བྱུང་བདེ་བ་ཤུགས་ལས་འཆར། །འོད་གསལ་སེམས་ལ་སྒྲིབ་པ་མེད། །འབར་བའི་ཡེ་ཤེས་རོལ་པའི་རྒྱན། །ཇི་བཞིན་མ་བཅོས་ངང་ལ་གནས། །ལུས་ལ་བཙལ་མེད་འདོད་པ་མེད། །སེམས་ལ་རང་དབང་མ་ཐོབ་ན། །རིགས་དྲུག་འཁོར་བའི་གནས་མི་ཆོད། །རང་དབང་རྒྱལ་པོ་མངོན་གྱུར་ན། །བདེ་བའི་དངོས་གྲུབ་རང་ལས་འབྱུང་། །མི་འགྱུར་འཛིན་པའི་སེམས་དང་བྲལ། །ལས་སྟོབས་དྲགས་པས་བདག་མི་བསླུ། །རྣམ་རྟོག་གཡོ་བ་ཅི་ཡང་མེད། །རང་རྐྱེན་ལོག་པའི་སེམས་མི་སྐྱེ། །ངང་གིས་བརྗོད་མེད་ཚིག་དང་བྲལ། །འདི་ཡིན་འདི་མིན་སེམས་མི་སྐྱེ། །དུས་གསུམ་གང་དུ་འདའ་བ་མེད། །དགོངས་པ་གཅིག་ལ་གཙོར་གནས་ན། །གང་འདོད་འབྲས་བུ་འབྱུང་བའོ། །བསམ་གཏན་རང་གནས་གཡོ་བ་མེད། །མ་བཅོས་མ་བཟུང་སོ་མ་ཉིད། །རང་བཞིན་བཅོས་མེད་སྙིང་པོ་བྲལ། །གང་ལ་རག་ལས་མེད་པས་བདེ། །ཞེས་གསུངས་སོ། །གསང་བ་སྤྱི་རྒྱུད་ལས། ཏིང་ངེ་འཛིན་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེ་སྤྱོད་པའི་དོན་ཇི་ལྟར་བུ་ཞུས་པས། གསང་བདག་ཆེན་པོས་གསུངས་པ། །མ་བཅོས་རྣལ་མ་དོན་གྱི་མཆོག །བྱ་བཏང་དགོངས་པ་བཅོས་བསླད་མེད། །བྱས་པ་མ་ཡིན་ཤུགས་བྱུང་་བ། །བླ་མེད་དོན་ལ་སྤྱོད་པའོ། །ནམ་མཁའ་ལྟ་བུའིརངབཞིན་ནི། །མ་བཅོས་རྣལ་མའི་སྤྱོད་པའོ། །ཉི་མ་ལྷ་བུའི་རང་བཞིན་ནི། །མ་ཆགས་མ་ཞེན་སྤྱོད་པའོ། །རྒྱ་མཚོ་ལྟ་བུའི་རང་བཞིན་ནི། །ཟབ་ལ་རྒྱ་ཆེའི་སྤྱོད་པའོ། །ས་གཞི་ལྟ་བུའི་རང་བཞིན་ནི། །ཐམས་ཅད་ཀུན་འབྱུང་སྤྱོད་པའོ། །རིན་ཆེན་ལྟ་བུའི་རང་བཞིན་ནི། །དགོས་འདོད་འབྱུང་བའི་སྦྱོད་པའོ། །སེང་གེ་ལྟ་བུའི་རང་བཞིན་ནི། །ཉམ་ང་མེད་པའི་སྤྱོད་པའོ། །གདེང་དང་ལྡན་པའི་རང་བཞིན་ནི། །རེ་དོགས་མེད་པའི་སྤྱོད་པའོ། །པདྨ་ལྟ་བུའི་རང་བཞིན་ནི། །གོས་པ་མེད་པའི་སྤྱོད་པའོ། །ཏི་བྱ་ལྟ་བུའི་རང་བཞིན་ནི། །བརྩི་གདབ་མེད་པའི་སྦྱོད་པའོ། །གླང་ཆེན་ལྟ་བུའི་རང་བཞིན་ནི། །བདུད་དཔུང་འཇོམས་པའི་སྤྱོད་པའོ། །སོ་མ་གཡའ་དག་རང་བཞིན་ནི། །འགྱུར་བ་མེད་པའི་སྤྱོད་པའོ། །ཡེ་ནས་ཡང་དག་རང་བཞིན་ནི། །གཉིས་མེད་དོན་ལ་རང་བཞིན་གནས། །ཡེ་ནས་གཉིས་སུ་མེད་པས་ན། །ལུས་ངག་སྤྱོད་ལ་རག་མ་ལས། །སེམས་ཉིད་ཡེ་ནས་དག་པ་ལ། །སྙིང་པོ་ཉིད་ཀྱི་དོན་ལ་སྤྱོད། །ཚུལ་ཁྲིམས་སྡོམ་པ་དམ་ཚིག་རྣམས། །སྤྱད་ཀྱང་འཆིང་བར་མི་འགྱུར་ཏེ། །མ་སྤྱད་ན་ཡང་ཉེས་པ་མེད། །རྫོགས་པ་ཆེན་པོའི་སྤྱོད་པ་ནི། །རང་བྱུང་བཀག་པ་མ་ཡིན་ཏེ། །རང་བྱུང་རྩོལ་བས་བསྒྲུབ་པ་མིན། །རང་སྣང་མ་བཅོས་སེམས་ཀྱི་རྒྱན། །ཞེས་གསུངས་སོ། །གསང་བ་སྤྱི་རྒྱུད་ལས། །སྤྱོད་པ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་གསང་བདག་ཆེན་པོ་ལ། །སེམས་དཔའ་རྡོ་རྗེས་རིག་པ་རང་དབང་། །ཇི་ལྟ་བུ་ཞུས་པས། གསང་བདག་ཆེན་པོས་གསུངས་པ། །རང་དབང་སེམས་ལ་ཐོབ་པ་ནི། །དབང་རྣམས་ཀུན་གྱི་མཆོག་ཡིན་ཏེ། །གཞི་ནས་དབང་ཐོབ་བསྐུར་མི་དགོས། ཁོ།ས་རིག་རྒྱལ་པོ་དབང་གི་མཆོག །དབང་རྣམས་ཀུན་གྱི་སྙིང་པོ་ཡིན། །བྱ་བྲལ་དམ་པའི་སེམས་ལ་གནས། །ཚིག་གིས་རྟོག་པའི་ཡུལ་ལས་འདས། །རང་དབང་དམ་པ་སེམས་ལ་གནས། །ཡོ་བྱད་དག་ལ་རག་མ་ལས། །རིག་པ་སྤྱི་བླུགས་ཚངས་པའི་དབང་། །རྒྱལ་ཐབས་སྤྱི་བླུགས་བསྐུར་ཐབས་སོ། །གཉིས་ཀྱི་མཐའ་རུ་མ་ལྷུང་བ། །དབྱེར་མེད་རིག་པ་ཚིག་རྫོགས་སོ། །མ་ཡི་དབང་ལ་བུ་ཡི་ཉམས། །དབྱེར་མེད་དབང་བསྐུར་ཐོབ་པའོ། །བྱ་བཏང་འཛིན་མེད་ངང་དུ་བདེ། །དབང་མཆོག་འོད་གསལ་རྒྱལ་བའི་དབང་། །གང་ཟག་གཅིག་ལ་ལྟོས་པ་མེད། །ཀློང་ཆེན་འོད་གསལ་བདེ་བའི་མཆོག །དབྱིངས་ཉིད་རྣམ་དག་ཐིག་ལེ་ཆེ། །མ་བཅོས་པ་ཡི་རང་བཞིན་ནི། །ཡེ་ནས་གནས་པས་ཐིག་ལེ་ཆེ། །ཡང་དག་དོན་ལ་ནོར་བ་མེད། །དེས་ན་རིག་པ་རང་གི་དབང་། །དེ་འདྲའི་དོན་ནི་མི་ཤེས་ན། །ཐུན་མོང་གཞན་ལ་མོས་པ་མེད། །རིམ་གྱིས་ནོད་པ་ཐབས་ཡིན་ནོ། །གསང་སྔགས་བརྡའ་སྒོ་དབང་གིས་དབྱེ། །གང་ཡང་མེད་པའི་གང་ཟག་ནི། །རིགས་ལས་འགལ་བས་བསྟན་མི་བྱ། །བསྟན་ན་བདག་གཞན་གནས་སུ་བསྲེག །ཅེས་གསུངས་སོ། །གསང་བ་སྤྱི་རྒྱུད་ལས། དབང་གི་ལེའུ་སྟེ་ཉི་ཤུ་པའོ།། །།དེ་ནས་གསང་བདག་ཆེན་པོ་ལ། སེམས་དཔའ་རྡོ་རྗེས་དཀྱིལ་འཁོར་ཇི་ལྟ་བུ་ཞུས་པས། གསང་བདག་ཆེན་པོས་གསུངས་པ། དཀྱིལ་འཁོར་དཀྱིལ་འཁོར་ཞེས་བྱ་བ། །སེམས་ཀྱི་དཀྱིལ་འཁོར་ལ་གནས་པ། །དཀྱིལ་འཁོར་དམ་པ་དེ་ཡིན་པས། །མ་ནི་དཀྱིལ་ལ་བུ་ཡི་འཁོར། །རིག་པ་དཀྱིལ་ལ་སྣང་ཚུལ་འཁོར། །མཉམ་ཉིད་དཀྱིལ་ལ་དངས་མ་འཁོར། །བསམ་དུ་མེད་པའི་དཀྱིལ་འཁོར་ནི། །མཚོན་དུ་མེད་པའི་རང་བཞིན་ནོ། །གཟུང་འཛིན་བྲལ་བའི་དཀྱིལ་འཁོར་ནི། །བསམ་རྟོག་འདས་པའི་རང་བཞིན་ནོ། །རང་བྱུང་མཉམ་པའི་དཀྱིལ་འཁོར་ནི། །མ་བཅོས་རིག་པའི་རིན་པོ་ཆེ། །མཐའ་དང་དབུས་མེད་གཞལ་ཡས་ནི། །རང་བཞིན་རྫོགས་པའི་སངས་རྒྱས་ཆེ། །རང་བཞིན་དཀྱིལ་འཁོར་མུ་མཐའ་མེད། །ཡེ་ནས་ལྷུན་གྲུབ་ཕོ་བྲང་ཆེ། །སྤྱན་དྲང་བཞུགས་ཕྱག་མི་མངའ་ཡང་། །རང་བྱུང་སྟོན་པ་མངོན་སངས་རྒྱས། །ཡེ་ཤེས་རང་གསལ་སྔགས་ལྡན་པས། །སྙིང་པོ་མཆོད་པ་དབུལ་མི་དགོས། །བདེ་ཆེན་གསལ་བ་རྒྱུད་ལྡན་པས། །གསང་བའི་དཀྱིལ་འཁོར་ལྷ་མཉེས་པ། །དུས་གསུམ་མི་འདའ་ཐུགས་དམ་མཆོག །རང་བྱུང་ཡོངས་རྫོགས་ལྷ་ཡི་རྗེ། །སྐྱོན་གྱི་དྲི་མ་དང་བྲལ་བས། ཁྲེས་མེད་རིག་པའི་དོན་མཐོང་ངོ་། །འཛིན་བྲལ་ཡེ་ཤེས་ངངགིས་གསལ། །འགྱུར་མེད་གསང་བའི་དཀྱིལ་འཁོར་ནི། །ཉེས་པའི་སྐྱོན་གྱི་དྲི་མ་མེད། །ཡེ་ཤེས་རང་སྣང་སྒྲིབ་གཡོགས་མེད། །རང་བྱུང་དག་པའི་དཀྱིལ་འཁོར་གསུམ། །མཉམ་ཉིད་ངང་དུ་ལྷུན་གྱིས་གྲུབ། །ཅེས་གསུངས་སོ། །གསང་བ་སྤྱི་རྒྱུད་ལས། དཀྱིལ་འཁོར་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་གསང་བདག་ཆེན་པོ་ལ། སེམས་དཔའ་རྡོ་རྗེས་དམ་ཚིག་རང་བཞིན་ཇི་ལྟ་བུ་ཞུས་པས། གསང་བདག་ཆེན་པོས་གསུངས་པ། །དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་སྟེ། །དེ་ལས་མི་འདའ་དམ་ཚིག་ཆེ། །མི་རྟོག་མཉམ་པའི་དམ་ཚིག་ཡིན། །ཡེ་ཤེས་དམ་ཚིག་ཆེན་པོ་ལ། །རྩ་བ་ཡན་ལག་ཕྱོགས་མཚམས་བྲལ། །མེད་པ་ཕྱལ་པ་གཅིག་པུ་ལྷུན་གྲུབ་ནི། །རྫོགས་པ་ཆེན་པོའི་དམ་ཚིག་སྟེ། །དེ་ལས་འདས་ན་ཉམས་པར་འགྱུར། །དུས་གསུམ་འདའ་བ་མེད་པ་ཡི། །གསང་བ་ཆོས་སྐུའི་དམ་ཚིག་ནི། །རྣམ་རྟོག་འཕྲུལ་པ་གང་སྐྱེས་ཀྱང་། །དྲན་པ་དུས་མཚུངས་གདམས་པས་གཅོད། །ཆོས་ཅན་ཆོས་ཉིད་གང་རྟོགས་པ། །རང་བྱུང་གསང་བའི་སེམས་མ་མཐོང་། །སྟོང་ཉིད་རིག་པའི་དོན་མ་རྙེད། །གསལ་སྟོང་དབྱེར་མེད་དོན་མ་རྟོགས། །བསྲུང་སྡོམ་རྩ་བ་ཡན་ལག་རྣམས། །ཐེག་པ་གཞན་གྱི་བསྲུང་མཚམས་ཡིན། །རྣམ་རྟོག་གཡོ་བ་མེད་པ་ནི། །རང་བྱུང་དམ་ཚིག་ཆེན་པོ་ཡིན། །སྒྲོ་སྐུར་གཉིས་དང་བྲལ་བའོ། །རིག་པ་སྒྲོན་མའི་སེམས་ཀྱིས་ནི། །ཡེ་ཤེས་ངོ་བོ་སྟོན་པར་བྱེད། །གྲངས་དང་རྣམ་པ་ཡོངས་ཀྱིས་མེད། །མ་བཅོས་མ་བསླད་དམ་ཚིག་ཡིན། །མ་སྐྱེས་པ་ཡི་ཆོས་ཉིད་ནི། །མི་འགག་མི་སྐྱེ་དམ་ཚིག་ཡིན། །འཁོར་བའི་འབྲས་བུ་ཟད་པར་འགྱུར། །ཞེས་གསུངས་སོ། །གསང་བ་སྤྱི་རྒྱུད་ལས། དམ་ཚིག་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་གསང་བདག་ཆེན་པོ་ལ་སེམས་དཔའ་རྡོ་རྗེས་ཞུས་པ། །མཐར་ཐུག་འབྲས་བུ་ཐོབ་ལུགས་གང་། ཞུས་པས། གསང་བདག་ཆེན་པོས་གསུངས་པ། །རྩོལ་བསྒྲུབ་རེ་དོགས་གང་དང་བྲལ། །ལྷུན་གྱིས་གྲུབ་པའི་འབྲས་བུ་ཡིན། །ཆོས་སྐུར་བྲལ་བའི་སེམས་ཉིད་ནི། །སངས་རྒྱས་ཀུན་གྱི་སྙིང་པོ་སྟེ། །མ་བསྒྲིབས་ཡེ་ཤེས་ཆོས་ཀྱི་སྐུ། །འགག་མེད་དབྱིངས་ཀྱི་བྱང་ཆུབ་གསུངས། །མི་སྐྱེ་མི་འགག་ཡེ་ཤེས་ཐུགས། །རྒྱུ་དང་འབྲས་བུ་གཉིས་མ་མཆིས། །རྩ་བ་གཅིག་པའི་བྱང་ཆུབ་སེམས། ཁུ་ཉིད་རང་བྱུང་སྐྱེ་མེད་པས མིང་ཙམ་མཚོན་པའི་འབྲས་བུར་གཅིག །འབྲས་བུ་ཞེས་ནི་བཏགས་པ་མེད། །བཏགས་པ་དེ་ནི་མཚོན་པ་སྟེ། །མཚོན་པའི་དོན་གྱིས་བཏགས་པ་མཚོན། །མ་སྐྱེས་པ་ཡི་ཆོས་ཉིད་ནི། །སྐྱེ་འགག་མེད་པའི་འབྲས་བུ་ཡི། །སྐུ་གསུམ་བྱིན་རླབས་ཐེག་པ་དགུ། །སེམས་ཉིད་སྐུ་གསུང་ཐུགས་ཡིན་པས། །སྐུ་གཅིག་སྐུ་གསུང་ཐུགས་ཡིན་པས། །སྤྲུལ་པ་སྐུ་ཡིརངབཞིནདང། །སྤྲུལ་པ་གསུང་གིརངབཞིནདང། །སྤྲུལ་པ་ཐུགས་ཀྱི་རང་བཞིན་ནོ། །ལོངས་སྤྱོད་སྐུ་ཡི་རང་བཞིན་དང་། །ལོངས་སྤྱོད་གསུང་གི་རང་བཞིན་དང་། །ལོངས་སྤྱོད་ཐུགས་ཀྱི་རང་བཞིན་ནོ། །ཆོས་ཉིད་སྐུ་ཡི་རང་བཞིན་དང་། །ཆོས་ཉིད་གསུང་གི་རང་བཞིན་དང་། །ཆོས་ཉིད་ཐུགས་ཀྱི་རང་བཞིན་ནོ། །སྒྲོ་སྐུར་བྲལ་བ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་པའི་སྐུ། །གདུལ་བྱ་དྲུག་ལ་སྟོན་པ་དྲུག །འདུལ་མཛད་སྟོན་པ་སྤྲུལ་པའི་སྐུ། །རང་བྱུང་བདེ་བ་ཆེན་པོའི་སྐུ། །དབྱེར་མེད་ངོ་བོ་ཉིད་ཀྱི་སྐུ། །ཞེས་གསུངས་སོ། །གསང་བ་སྤྱི་རྒྱུད་ལས། འབྲས་བུ་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་གསང་བདག་ཆེན་པོ་ལ། སེམས་དཔའ་རྡོ་རྗེས་ཞུས་པ། །རྒྱུད་ཀྱི་རྒྱལ་པོ་སྤྱི་རྒྱུད་འདི། །གཞན་ལས་ཁྱད་པར་དུ་ཡིས་ཆེ། །གསང་བདག་ཆེན་པོས་གསུངས་པ། །ཐེག་པའི་ཡང་རྩེ་ཡིན་པས་འཕགས། །བསྟན་པའི་སྙིང་པོ་ཡིན་པས་འཕགས། །དགོངས་པའི་ཞེ་ཕུགས་ཡིན་པས་འཕགས། །ཐེག་པའི་འབྱུང་གནས་ཡིན་པས་འཕགས། །འབྲས་བུའི་མཐར་ཐུག་ཡིན་པས་འཕགས། །སྟོན་པ་གསང་བདག་ཆེན་པོ་ནི། །སངས་རྒྱས་ཀུན་གྱི་མེས་ཆེན་པོ། །བླང་དོར་མེད་པའི་རང་བཞིནགྱིས། །སྟོན་པ་ཀུན་ལས་ཁྱད་པར་འཕགས། །སྟོན་པ་མངོན་པར་ཆེ་བར་བཤད། །སྡུད་པ་སེམས་དཔའ་རྡོ་རྗེ་ཁྱོད། །སངས་རྒྱས་སེམས་ཅན་འཁོར་རྣམས་ལ། །སྐྱེ་འཇིག་མེད་པའི་བྱང་ཆུབ་སེམས། །སྡུད་པ་ཀུན་ལས་ཁྱད་པར་འཕགས། །འཁོར་དེ་མངོན་པར་ཆེ་བར་བཤད། །སྟོན་པའི་ལྟ་བ་རྫོགས་ཆེན་འདི། །ཆོས་རྣམས་ཀུན་གྱི་སྙིང་པོ་སྟེ། །ཐམས་ཅད་འབྱུང་བའི་རང་བཞིན་གྱིས། །ཐེག་པ་ཀུན་ལས་ཁྱད་པར་འཕགས། །བསྟན་པ་མངོན་པར་ཆེ་བར་བཤད། །དུས་ནི་དུས་གསུམ་གཅིག་པའི་ངང་། །དུས་ནི་སྔ་ཕྱི་མེད་པས་ན། །གཅིག་ཏུ་གནས་པའི་རང་བཞིན་གྱིས། །སྔ་ཕྱི་ཀུན་ལས་ཁྱད་པར་འཕགས། །དུས་དེ་མངོན་པར་ཆེ་བར་བཤད། །ཡངས་པ་ཆོས་དབྱིངས་གསང་བདག་གནས། །ཐམས་ཅད་འདུས་པའི་གནས་ཆེན་འདི། །མཐའ་དབུས་མེད་པའི་རང་བཞིན་གྱིས། །བཞུགས་གནས་ཀུན་ལས་ཁྱད་པར་འཕགས། །གནས་དེ་མངོན་པར་ཆེ་བར་བཤད། །རྒྱུད་ཀུན་གྱི་ནི་བདག་པོ་སྟེ། །སྤྱི་རྒྱུད་ཆེན་པོའི་རང་བཞིན་ཏེ། །ཀུན་ལས་ཁྱད་པར་འཕགས་པའོ། །ཞེས་གསུངས་སོ། །གསང་བ་སྤྱི་རྒྱུད་ལས། ཁྱད་པར་འཕགས་པའི་ལེའུ་སྟེ་ཉེར་བཞི་པའོ།། །།དེ་ནས་གསང་བདག་ཆེན་པོ་ལ། སེམས་དཔའ་རྡོ་རྗེས་ཞུས་པ། རྒྱུད་ཀྱི་རྒྱལ་པོ་འདི་ཉིད་ཀྱི། །མཚན་གྱི་གཟུང་ཐབས་ཇི་ལྟར་གཟུང་། ཞུས་པས། གསང་བདག་ཆེན་པོས་སེམས་དཔའ་རྡོ་རྗེ་ལ་རྒྱུད་ཀྱི་མཚན་གྱི་གཟུང་ཐབས་དང་། གཏད་པའི་ཐབས་འདི་གསུངས་སོ། །ཡངས་པ་ནམ་མཁའ་ལྟ་བུའི་རྒྱུད། །གསལ་བ་ཉི་ཟླ་ལྟ་བུའི་རྒྱུད། །ཟབ་པ་རྒྱ་མཚོ་ལྟ་བུའི་རྒྱུད། །ཐམས་ཅད་འབྱུང་བ་ས་གཞི་ལྟ་བུའི་རྒྱུད། །ཡོན་ཏན་འབྱུང་བ་རིན་ཆེན་ལྟ་བུའི་རྒྱུད། །ཚིག་དོན་ཡངས་པ་ཆེན་པོ་འདི། །གསལ་ཞིང་སྒྲིབ་ཕྱོགས་མེད་པ་དང་། །ཆ་ཕྲ་གཏིང་དཔག་མེད་པ་དང་། །འབྱུང་ཞིང་ཕྱོགས་ཆ་མེད་པ་དང་། །དགོས་འདོད་འབྱུང་ཞིང་རེ་བ་མེད། །ང་ཡིས་ཁྱེད་ལ་བསྟན་ཅིང་གཏད། །སྤང་འགེག་སྦྱང་བ་བགྲོད་པ་དང་། །གཟུང་འཛིན་བླང་དོར་མེད་པ་དང་། །ལྟ་སྤྱོད་རྩོལ་བསྒྲུབ་བྱར་མེད་དེ། །ལམ་དང་གཉེན་པོས་བཅོས་པ་མེད། །བྱང་སེམས་གསང་བདག་རང་བཞིན་དུ། །ང་ཡིས་བསྟན་པའི་དོན་འདི་ནི། །བྱང་ཆུབ་སེམས་དཔའི་ལུང་ཆེན་ཡིན། ཁུད་དང་མདོ་ཡི་ཡང་རྩེ་ཡིན། །མན་ངག་ཀུན་གྱི་རྩ་བ་ཡིན། །བསྟན་པ་ཀུན་གྱི་སྙིང་པོ་ཡིན། །ཐེག་པ་ཀུན་གྱི་ཉིང་ཁུ་ཡིན། །མ་རིག་འཁྲུལ་པའི་མུན་སེལ་ཡིན། །འཁྲུལ་རྟོག་དྲ་བ་འདི་ཡིས་སེལ། །ཉོན་མོངས་ཐག་པ་འདི་ཡིས་གཅོད། །འདི་ཉིད་བསྟན་པའི་མི་རྣམས་ལ། །གསང་བ་སྤྱི་རྒྱུད་འདི་གཏད་དོ། །ནམ་ཞིག་དུས་ཀྱི་ཐ་མ་ལ། །སྣང་གསལ་སྒྲོན་མ་འདི་ཡིས་བྱེད། །ཅེས་གསུངས་སོ། །གསང་བ་སྤྱི་རྒྱུད་ལས། མཚན་གྱི་གཟུང་ཐབས་དང་། གཏད་པའི་ལེའུ་སྟེ་ཉེར་ལྔ་པའོ།། །།གསང་བ་སྤྱི་རྒྱུད་རྫོགས་སོ།། །།པརྙི་ཏ་དྲི་མེད་བཤེས་གཉེན་དང་། ཞུ་ཆེན་གྱི་ལོ་སྣྲོ་བ་གཉགས་ཙྭ་ན་ཀུ་མ་རས་རྒྱལ་པོ་ཡོན་མཆོད་ཀྱི་དོན་དུ་དབུ་ཚལ་གསེར་ཁང་དུ་ཞུས་ཤིང་གཏན་ལ་ཕབ་པའོ།། །། རྒྱ་གར་སྐད་དུ། རཏྣ་པུཛི་མ་ཧྭ་ཏནྟྲ། བོད་སྐད་དུ། རིན་པོ་ཆེ་རྒྱས་པ་ཆེན་པོའི་རྒྱུད། བཅོམ་ལྡན་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་རྣམ་པར་བཤད་