Ngb-pt-0085-vol-01-text

Body

རྒྱ་གར་སྐད་དུ། བཛྲ་ཟྭ་གྲ་ཏནྟྲ་ནཱ་མ། བོད་སྐད་དུ། རྡོ་རྗེ་ཡང་རྩེའི་རྒྱུད་ཅེས་བྱ་བ། བཅོམ་ལྡན་འདས་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །སྙིང་པོ་རྡོ་རྗེ་འཆང་ཆེན་པོ། །ཆོས་སྐུ་ཀུན་ཏུ་བཟང་པོ་དེ། །རང་བྱུང་འཕྲུལ་གྱི་རྡོ་རྗེའི་སྐུ། །གཉིས་མེད་མཉམ་པར་རང་བྱུང་གནས། །གཉིས་མེད་སྣང་བ་རང་བྱུང་འཁོར། །བརྗོད་གསུང་མེད་པ་རང་བྱུང་ཆོས། །སྔ་ཕྱི་མེད་པ་སྙིང་པོའི་དུས། །མི་ནུབ་རྒྱལ་མཚན་རྡོ་རྗེའི་སྐུ་རུ་གསལ། །ཕྱི་མེད་ནང་མེད་འོག་མིན་ཀུན་ཏུ་ནང་། །སྔ་ཕྱི་དུས་མཉམ་སྙིང་པོ་སྤྲུལ་པའི་འཁོར། །ཞིང་ཁམས་རང་གསལ་རིག་ཆ་ཁ་དོག་གསལ། །གདུལ་བྱ་མེད་པའི་ཆོས་རྣམས་རང་བྱུང་ཆོས་སྐུར་བཞུགས། །དེ་ནས་ཀུན་བྱེད་རྡོ་རྗེ་འཆང་། །རྡོ་རྗེ་སེམས་དཔས་རང་བྱུང་འཕྲུལ་གྱི་མེ་ཏོག་ཕུལ། །སྤྲུལ་པའི་སྤྲུལ་པས་རང་བྱུང་དུ་བསྐོར་ཏེ། །ཀྱེ་ཀྱེ་སྟོན་པ་རྡོ་རྗེ་འཆང་། །འཁོར་བར་ཞབྲུལ་འཁོར་སེམས་ཅན་ལ། །ཐུགས་རྗེ་ཆེན་པོས་མི་གཟིགས་སམ། །ཉིད་ཀྱི་སྔོན་གྱི་ཐུགས་དམ་བཙན། །སེམས་ཅན་སངས་རྒྱས་ཐོབ་བྱའི་ཕྱིར། །སྐུ་གསུང་ཐུགས་དང་ཡོན་ཏན་ལས། །སྙིང་པོ་ངོས་བཟུང་ཆ་རྐྱེན་ལས། །ཉིད་ཀྱིས་རྫོགས་པར་བསྟན་དུ་གསོལ། །དེ་ནས་ཀུན་བཟང་རྡོ་རྗེ་འཆང་། །རང་བྱུང་འཕྲུལ་གྱི་སྐུར་བཞེངས་ནས། །སྤྲུམ་པའི་འཁོར་དང་ཡང་སྤྲུལ་འཁོར། །འདུསཔའིཚོགསལབཀའསྩལ་པ། །རང་བྱུང་སྙིང་པོ་བྱང་ཆུབ་སེམས། །རྒྱལ་བར་གྱུར་པའི་སྙིང་པོ་ཡིན། །སྟོང་པའི་ཆོས་ཉིད་དམ་པ་ཡིན། །སྣང་བ་མ་འགགས་ལྷུན་གྱིས་གྲུབ། །གཉིས་སུ་མེད་པའི་དམ་པ་ཡིན། །འཁོར་བའི་བཅུད་ཕྱུང་བདེ་གཤེགས་རྒྱུད། །སྐུ་དང་གསུང་དང་ཐུགས་དང་ནི། །ཡོན་ཏན་དང་ནི་ཕྲིན་ལས་ཀྱི། །སྙིང་པོ་གསུམ་དུ་བསྡུ་བ་དང་། །དེ་ཡི་ཆ་རྐྱེན་བསྟན་པར་བྱ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ཞུསླ་པ་དང་ལན་གྱི་ལེའུ་སྟེ་དང་པོའོ།། །།རྡོ་རྗེ་འཆང་བས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཁྱོད། །རང་བྱུང་འཕྲུལ་གྱི་སྙིང་པོའི་སྐུ། །རང་བྱུང་སྙིང་པོ་གསུམ་ལས་བྱུང་། །ཕ་དང་མ་དང་རང་དང་གསུམ། །ཕ་ནི་ཐབས་ཆེན་ཀུན་ཏུ་བཟང་། །མ་ནི་ཤེས་རབ་ཀུན་བཟང་ཡུམ། །བུ་ནི་གཉིས་མེད་རང་བྱུང་ཧུ༷། །རྡོ་རྗེ་འཆང་བ་ཉིད་ཀྱི་སྐུ། །ཞེས་གསུངས་སོ། །ཡང་བཀའ་སྩལ་པ། །ཉོན་ཅིག་སེམས་དཔའ་རྡོ་རྗེ་འཆང་། །དཀྱིལ་འཁོར་ཆེན་པོ་ཡངས་པ་ཡིན། །བུམ་པ་བཟང་པོ་ཆེ་བའི་མཆོག །ཡེ་ཤེས་སྐུ་སྟེ་རང་བྱུང་བ། །སྙིང་པོ་སྐུ་བཞིར་རང་བྱུང་བསྒྲགས། །སྐྱེ་མེད་འཕྲུལ་གྱི་རང་བྱུང་སྐུ། །རིན་ཆེན་འཕྲུལ་གྱི་རང་བྱུང་སྐུ། །རྡོ་རྗེ་འཕྲུལ་གྱི་སྙིང་པོའི་སྐུ། །རང་བྱུང་འཕྲུལ་གྱི་སྙིང་པོའི་སྐུ། །རང་བྱུང་ཧུ༷་དུ་ལྷུན་གྲུབ་ཡིན། །སྒོམ་སྤྱོད་རྟོགས་པ་བསྐྱེད་རྫོགས་ལས། །དེ་ནས་ཀུན་གྲོལ་དགོངས་པའི་མཆོག །འགྱུ་དྲན་འཛིན་ཆགས་གདེང་དུ་གྱིས། །འགྱུ་དྲན་འཛིན་ཆགས་གོམས་བྱེད་ན། །རྩ་རླུད་ཐིག་ལེ་གསལ་བར་བྱེད། །ཕ་རྩ་མ་རྩ་རང་རྩ་གསུམ། །ཐབས་དང་ཤེས་རབ་ཡེ་ཤེས་གསུམ། །རོ་མ་རྐྱང་མ་ཀུན་འདར་གསུམ། །ལ་ལ་ར་ས་དྷ་ཏི་གསུམ། །རྩ་དང་རླུད་དང་ཐིག་ལེ་གསུམ། །དཀར་དང་དམར་དང་མཐིང་དང་གསུམ། །ཧུ༷་དང་སྙིང་པོ་རང་བྱུང་རྩལ། །ཐམས་ཅད་འདུས་པ་གཅིག་མེད་སྟོན། །ཨ་ཏི་ཡོ་ག་ཡུལ་མེད་ཁྲོལ། །ཞེས་གསུངས་སོ་། །རྡོ་རྗེ་ཡང་རྩེའི་རྒྱུད་ལས། རང་བྱུང་སྐུའི་མཚོན་པའི་ལེའུ་སྟེ་གཉིས་པའོ།། །།རྡོ་རྗེ་འཆང་བས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཁྱོད། །བརྗོད་པ་ཀུན་གྱི་རྒྱུ་ཡི་མཆོག །ཧུ༷་ཞེས་མ་བསླབས་རང་བྱུང་སྐད། །སངས་རྒྱས་གསུང་ལ་སེམས་ཅན་སྐུ། །ཡེ་ནས་རང་བྱུང་འཕྲུལ་གྱི་སྒྲ། །གཞི་ནས་འབྲས་བུ་ལམ་གྱི་རྒྱུ། །མིང་གི་སྙིང་པོ་འཕྲུལ་གྱི་ཚིག །ངོ་མཚར་ཆེན་པོ་རྨད་དུ་བྱུང་། །ཞེས་བཀའ་སྩལ་པས། །ཀྱེ་ཀྱེ་སྟོན་པ་རྡོ་རྗེ་འཆང་། །སྙིང་པོ་གང་ལགས་ཉེ་སྙིང་གང་། །ཡང་སྙིང་གང་ལགས་བསྟན་ཏུ་གསོལ། །ཀུན་བྱེད་རྡོ་རྗེས་བཀའ་སྩལ་པ། །ཚིག་ཀུན་རབ་ཏུ་གསལ་བར་བྱེད། །འབྲུ་ལྔ་མ་ཧྭ་སྐུ་ལྔའི་སྔགས། །རིགས་ལྔ་ཕྱོགས་དང་དུག་ལྔ་བྱུང་། །ལྔ་ལྡན་དོན་གྱི་སྙིང་པོ་ཡིན། །འབྲུ་གསུམ་ཉེ་བའི་སྙིང་པོ་ཡིན། །གསུམ་སྒྲོལ་ཨ་ནུའི་དགོངས་པ་བསྟན། །སྐུ་གསུམ་དུག་གསུམ་ཕ་མར་རང་། །གསུམ་སྒྲོལ་རིག་སྔགས་གཟུངས་སྔགས་ཡིན། །འབྲུ་གཅིག་ཨ་ཏི་ཡུལ་མེད་སྒྲ། །གཅིག་མེད་ཡུལ་དང་འབྲེལ་བའི་སྔགས། །བླ་ན་མེད་པའི་རང་བྱུང་སྙིང་། །ཡང་སྙིང་འཕྲུལ་གྱི་སྙིང་པོ་ཡིན། །འབྱུང་ལྔ་སྐུ་ལྔ་ཕྱོགས་ལྔ་ཡེ་ཤེས་ལྔ། །འབྲུ་བརྒྱད་སྙིང་པོ་དག་ཏུ་བཟླ། །ཧུ༷་དང་རུ་ལུ་སྦྲེལ་བའི་གླུ། །སྲོད་དང་ཐོ་རངས་དུས་དྲུག་བླངས། །འབྲུ་གསུམ་སྲོག་རྩོལ་གནས་པས་བཟླས། ཨུ་ནན་དབང་བསྐུར་སྤྲོ་བསྡུ་ཨ། །གསང་སྔགས་གཟུངས་སྔགས་རིག་སྔགས་བསྡེབས། །སྔགས་རྣམས་གང་ཡང་མགོ་བོ་གནོན། །འབྲུ་གཅིག་ཡིད་ལ་རང་བྱུང་སྔགས། །འགྱུ་དྲན་འཛིན་ཆགས་ཀུན་དང་འགྲོགས། ཁུ་རྩ་གཞི་ཉིད་འཛིན་པའི་སྔགས། །མ་བཏགས་ཀུན་གྱི་རང་སྒྲ་ཡིན། །ཕྱི་ལྟར་བརྡ་རུ་མིག་ལ་སྟོན། །ནང་ལྟར་རྟག་ཏུ་ལུས་ལ་སྦྱོར། །གསང་བ་ཡིད་ཚོགས་སྒྲ་རུ་སྒྲོགས། །དོན་དུ་ཆོས་ཉིད་སྙིང་པོ་ཧུ༷། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། གསུང་མཚོན་པའི་ལེའུ་སྟེ་གསུམ་པའོ།། །།ཀུན་བྱེད་རྒྱལ་པོས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཁྱོད། །གཉིས་མེད་གཉིས་སུ་མེད་པར་སྟོན། །རྡོ་རྗེ་ཧུ༷་སྟེ་ཧཱུཾ༷་ཞེས་སྒྲོགས། །ངོ་བོ་སྟོང་པ་བལྟ་བ་ཡིན། །ཡུལ་མེད་ཕྱོགས་ལྷུང་མེད་པ་ཡིན། །ཧུ༷་དུ་འཛིན་པ་ཏིང་འཛིན་ཡིན། །འགྱུ་དྲན་འཛིན་ཆགས་ཡེངས་པ་མེད། །ལོགལྟགཅོདཔསའཁོར་ལོ་ཡིན། །རང་བྱུང་ངོས་འཛིན་འཁོར་ལོ་གཉིས། །རང་སེམས་བསྒྲུབ་པས་དམ་རྫས་ཡིན། །དེ་དང་མི་ལྡན་དམ་རྫས་ཡིན། །ཡིད་ལ་སྐྱོབ་པས་སྔགས་ཀྱང་ཡིན། །གསང་སྔགས་རིག་སྔགས་གཟུང་སྔགས་སོ། །དབུགས་ཀྱི་འཕྲོ་འདུ་བཟླ་ལུགས་ཡིན། །འགྲོ་འོང་གནས་པ་ཧུ༷་གི་སྟོབས། །ན་རུ་སོན་ན་ཕྲིན་ལས་ཡིན། ཁུབ་རྟགས་མངོན་དུ་འདི་ཀ་རང་། །སེམས་ལ་དབང་ཐོབ་མངག་པ་ཡིན། །འགྱུས་དྲན་དབང་ཐོབ་དབང་གི་མཆོག །ཧུ༷་དུ་དངོས་ཐོན་མངོན་རྟགས་ཡིན། །སྐུ་དང་གསུང་དང་ཐུགས་སོགས་ཧུ༷། །མ་གྲུབ་ཏིང་འཛིན་སྤོག་པ་ཡིན། །བརྩོན་འགྲུས་བརྩོན་མེད་ཡེངས་པ་མེད། །ཨ་ལ་ཐིམ་པས་གཟིར་བ་ཡིན། །རང་བྱུང་སྐྱེ་བ་མེད་པར་ཤེས། །དགོངས་པར་སྐྱོལ་ན་ཤི་ས་ཡིན། །གཅིག་མེད་གང་ཡང་ཡིན་པའི་ཧུ༷། །ཅི་ཡང་ཡིན་ནོ་གང་ཡང་རུང་། །སུ་ཞིག་ཐུགས་ཀྱི་དཀྱིལ་འཁོར་དུ། །རྟེན་དང་ལྡན་ནོ་ཁྱད་པར་ཆེ། །རང་བྱུང་སྐྱེ་མེད་སྙིང་པོ་ཡིན། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། །ཐུགས་མཚོན་པའི་ལེའུ་སྟེ་བཞི་པའོ།། །།རྡོ་རྗེ་འཆང་བས་བཀའ་སྩལ་པ། །ཉོན་ཅིག་བཛྲ་ས་ཏྭ་ཁྱོད། །ནོར་བུ་རིན་ཆེན་འོད་འབར་བཤད། །ས་ཡི་སྙིང་པོ་འགྲོ་བ་འཛིན། །སངས་རྒྱས་ཀུན་གྱི་སྙིང་པོ་ཆེ། །དཔེར་ན་ནོར་བུ་རིན་ཆེན་གླིང་། །ས་རྡོ་མི་གནས་རིན་པོ་ཆེ། །རང་བྱུང་སྙིང་པོ་སུས་རྟོགས་པ། །འཁྲུལ་སྣང་དགེ་སྡིག་གང་ཡང་མེད། །ཆོས་ཉིད་ཆོས་དབྱིངས་སྙིང་པོའི་ཀློང་། །གང་ལྟར་བྱས་ཀྱང་སྙིང་པོའི་གྲོགས། །དཔེར་ན་མེ་ལ་ཤིང་བསྣན་འདྲ། །གང་ཞིག་རང་བྱུང་ངོ་ཤེས་པ། །ཞི་རྒྱས་དབང་དྲག་ཕྲིན་ལས་འགྲུབ། །ནང་འཇིལ་ལུས་བདེ་འབྱུང་བ་ལྔ། །འདུ་བས་མི་ཚུགས་རྡོ་རྗེ་འདྲ། །སྲོག་སྙིང་རང་བྱུང་ངོ་ཤེས་ན། །ལྷ་དང་ཀླུ་དང་གཟའ་དང་བདུད། །གནོད་སྤྱིན་སྲིན་པོ་དམུ་དང་བཙན། །རྒྱལ་པོ་མ་མོ་ལྷ་སྲིན་ཀུན། །ཁྲིམས་ལ་གནས་ཀྱི་རྒྱལ་པོ་འདྲ། །རང་བྱུང་སྙིང་པོ་སུས་འཆང་བ། །བསོད་ནམས་ལོངས་སྤྱོད་འཁོར་རྫས་འཕེལ། །དགྲ་མེད་སུས་མཐོང་ཕ་དང་མ། །ནོར་བུ་རིན་ཆེན་འཆང་བ་འདྲ། །ལོ་ཟླ་གཟའ་སྐར་དུས་ཚོད་མེད། །སྤྲིན་མེད་མཁའ་དཀྱིལ་ཉི་མ་འདྲ། །གང་ལ་སྣང་སྔགས་རང་བྱུང་སྔགས། །འབྱུང་བ་འཁྲུགས་པའི་གློག་དང་འདྲ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ཐམས་ཅད་ཡོན་ཏན་དུ་མཚོན་པའི་ལེའུ་སྟེ་ལྔ་པའོ།། །།རྡོ་རྗེ་འཆང་གིས་བཀའ་སྩལ་པ། །ཉོན་ཅིག་བཛྲ་སཏྭ་ཁྱོད། །ལས་རྣམས་ལྡན་པར་ཚོགས་པ་ནི། །སྙིང་པོ་སྒྱུ་མའི་རྫས་དང་འདྲ། །གཅིག་ལ་མཐོང་སྣང་འཆར་ལུགས་ཡང་། །དཔེར་ན་ནོར་བུ་རིན་པོ་ཆེ། །འཆང་བས་ཡོན་ཏན་འབྱུང་བ་འདྲ། །དཔའ་བོ་གཅིག་པ་རིན་པོ་ཆེ། །ཞི་དང་རྒྱས་པ་དྲག་པོའི་ལས། །གང་ལ་བྱ་བ་དེ་ཉིད་སྣང་། །ཐོགས་པ་མེད་པར་འགྲུབ་པར་འགྱུར། །རྣམ་སྨིན་འབྱུང་བ་འཁྲུགས་པའི་གདོན། །དེ་ཡི་ཡོན་ཏན་མངོན་དུ་སྣང་། །དཔེར་ན་ཉི་མས་ཁྱབ་པ་འདྲ། །རྣམ་སྨིན་སྒྲིབ་པའི་ནད་དང་གདོན། །སྙིང་པོ་རྟོགས་པའི་གང་ཟག་ལ། །དེ་ཡི་དོན་རྟགས་བསྟན་པ་ནི། །དཔེར་ན་རྨི་ལམ་སད་པ་འདྲ། །གོམས་རྟགས་བརྟན་པར་འབྱུང་བ་ཡིན། །སྒྲིབ་པ་སྦྱོང་བ་དྲག་ཞན་ཡིན། །དགེ་སྡིག་གཉིས་པོ་མཉམ་ཉིད་ན། །རྣམ་པར་སྨིན་པའི་འབུན་པ་དེངས། །ནམ་མཁར་ཁུ་རླངས་དེངས་པ་འདྲ། །ནད་ནི་འབྱུང་བའི་རང་བཞིན་འགྱུར། །ལུས་ཀུན་ཐིག་ལེ་རྒྱས་པ་འདྲ། །གདོན་ཀུན་རྒྱལ་པོ་ཟིན་པ་ཡིན། །དམངས་དང་མེ་ལམ་རྩི་སྐྲུར་འདྲ། །སྙིང་པོ་རང་བྱུང་སུས་རྟོགས་པ། །རིན་ཆེན་གསེར་གླིང་ཕྱིན་པ་འདྲ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ཕྲིན་ལས་མདོར་བསྟན་པའི་ལེའུ་སྟེ་དྲུག་པའོ།། །།རྡོ་རྗེ་འཆང་བས་བཀའ་སྩལ་པ། །ཉོན་ཅིག་བཛྲ་ས་ཏྭ་ཁྱོད། །མ་བུ་གཉིས་ཀྱི་སྦྱོར་སྒྲོལ་གྱིས། །སྙིང་པོ་ཆོས་ཀྱི་སྐུ་རུ་སྒྲོལ། །ཕྱིར་མི་ལྡོག་པ་ཕྱིར་མི་འོང་། །འདྲེན་པའི་ཐུགས་རྗེ་རྒྱུན་མི་ཆད། །འགྱུ་དྲན་ཆོས་ཀྱི་དབྱིངས་སུ་སྦྱོར། །ཆགས་པ་རང་བྱུང་ཀློང་དུ་གྲོལ། །གཉིས་སུ་མེད་པའི་མཆོད་པ་ཡིན། །འགྱུ་དྲན་འཛིན་ཆགས་དབང་དུ་གྱིས། །རིག་པ་རྩལ་གྱི་དབང་བསྐུར་ཡིན། །ལྷ་དང་བུམ་པ་རིག་མ་དང་། །གཞན་ལ་ལྟོས་འགྱུར་ཆོས་མ་ཡིན། །རང་བྱུང་ངོས་ཟིན་འཁྲུལ་པ་མེད། །འགྱུ་དྲན་རང་སྦྱང་རང་སྒྲོལ་དབང་། །འཛིན་ཆགས་དོ་ཆད་སྙིང་པོའི་ཡུལ། །འཛིན་མེད་འགྱུ་བ་རང་བྱུང་དབང་། །བདག་མེད་ཡུལ་གྲོལ་ཡེ་ཤེས་དབང་། །དབང་གི་རྒྱལ་པོ་རང་བྱུང་དབང་། །སངས་རྒྱས་རེ་མེད་དབང་མཆོག་ཡིན། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། དབང་སྦྱོར་སྒྲོལ་རྩ་བ་མཚོན་པའི་ལེའུ་སྟེ་བདུན་པའོ།། །།རྡོ་རྗེ་འཆང་བས་བཀའ་སྩལ་པ། །ཉོན་ཅིག་བཛྲ་ས་ཏྭ་ཁྱོད། །ཅི་ཡང་ཡིན་ནི་གང་ཡང་རུང་། །མདུན་དང་རྒྱབ་དང་ཕྱོགས་བཅུ་སྲ །གང་ལྟར་སྣང་ཡང་སྙིང་པོ་ཉིད། །སྙིང་པོ་སྣང་བ་རང་བྱུང་ཡིན། །ཅི་ཡང་མེད་དོ་གང་ཡང་སྣང་། །མེད་བཏགས་འཁྲུལ་པ་རྫུན་པའི་ཆོས མིང་ཙམ་འདི་ཞེས་མཚོན་ན་ནི། །རྡོ་རྗེ་སེམས་དཔའ་མཚོན་དུ་མེད། །གཅིག་ནི་ཀུན་གྱི་རང་བཞིན་ཡིན། །གཅིག་པོ་རང་ཡང་གང་དུ་འདུག །མིང་མེད་ཡུལ་དང་བྲལ་བར་གྱིས། །ཡུལ་སྣང་གཟུགས་ནི་སྲོག་གི་གཞི། །ཡུལ་དུ་བདེན་པ་གང་ན་འདུག །རྡུལ་ཙམ་འདུག་ན་སྲོག་ལ་ཤོར། །སྲོག་གི་ལ་ཤན་ཕྱེད་པར་གྱིས། །མིང་བཏགས་ཆོས་ཀུན་སྙིང་པོའི་གཞི། །མིང་ཡིག་སྒྲ་བསྒྲགས་གང་ལ་བདེན། །གཅིག་ཙམ་བདེན་ན་མིང་ལ་འཁོར། །ཚིག་གི་སྒྲོ་འདོགས་ཆོད་པར་གྱིས། །གཉིས་མེད་གཉིས་སུ་མེད་པར་སྟོན། །བསྟན་པས་ཡུལ་མེད་མཚོན་ཚིག་གང་། །བདེན་པར་སུས་སྨྲ་འཁྲུལ་པས་ཆོག །དངོས་པོ་དངོས་མེད་གཉིས་ཀ་གཅིག །སྟོངཉིད་སྨྲ་བའི་ཁྱུ་མཆོག་ཡིན། །རང་བྱུང་འཕྲུལ་གྱི་སྙིང་པོའི་སྐུ། །གང་ལྟར་སྣང་བ་སྙིང་པོའི་བརྡའ། །འདྲེན་པའི་ཐུགས་རྗེ་འགག་པ་མེད། །ཡེ་ཤེས་སྐུ་སྟེ་རང་བྱུང་ཡིན། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ལྟ་བ་ལ་བཟླ་བའི་ལེའུ་སྟེ་བརྒྱད་པའོ།། །།དེ་ནས་རྡོ་རྗེ་འཆང་ཀུན་ཏུ་བཟང་པོ་ཉིད། །མཚོན་པའི་ལམ་གྱི་ཏིང་ངེ་འཛིན་ལ་སྙོམས་པར་ཞུགས་ནས། །རྡོ་རྗེ་སེམས་དཔའ་ལ་བཀའ་སྩལ་པ། །གཅིག་ནི་ཀུན་གྱི་རང་བཞིན་ཏེ། །བྱེད་པ་སེམས་ཅན་ཀུན་དོན་བྱེད། །ཕན་འདོད་སེམས་ཅན་གཉེས་གཤིན་པ། །རང་བྱུང་འབྲུལ་གྱི་སྙིང་པོའི་སྐུ། །ཏིང་འཛིན་གསུམ་གྱི་སྒོ་ནས་བསྐྱེད། །སྐུ་གསལ་གདུལ་བྱ་ལ་དམིགས་ལ། །མཆོད་སྤྱིན་ཚོགས་སོགས་རྒྱུན་དུ་བྱ། །ཚོགས་གཉིས་ཚོགས་ནི་བསག་པར་བྱ། །མཆོད་རྟེན་སྐུ་གདུང་གདབ་པར་བྱ། །རང་བྱུང་སྙིང་པོའི་ཚ་ཚྭ་དང་། །རྒྱུ་རྐྱེན་འབྱུང་ལྔའི་ཚ་ཚྭ་གདབ། །གཏོར་མ་ཕྱི་ནང་གཉིས་ཀ་བྱ། །ཆུ་གཏོར་ཀླུ་གཏོར་དམར་གཏོར་དང་། །རྡོ་རྗེ་ཚོགས་ཀྱི་འཁོར་ལོ་བསྐོར། །འབྱོར་བཤམས་དངོས་པོ་བསམ་པ་ཚོགས། །འགྱུ་དྲན་འཛིན་ཆགས་ཟ་ཚོགས་བྱ། །གཙང་མ་ཁྲུས་ཀྱི་ལས་བྱེད་ན། །རིན་ཆེན་གང་ལྡན་བུམ་པ་དེར། །སྲོད་དང་ཐོ་རངས་ཆུ་བླངས་ལ། །སྙིང་པོས་བྱིན་བརླབ་དག་པར་བཀྲུ། །མེ་དང་རླུ་་དང་ས་དང་བདུད་རྩི་ཀུན། །ཁྲུས་སུ་རྣལ་འབྱོར་གང་བདེ་བྱ། །བསྲུང་བ་གསང་བའི་རྫས་དང་སྔགས། །དཔའ་བོ་གཅིག་པའི་ལས་རིམ་བྱ། །མཛེ་ནད་གདུག་པའི་ལས་གསོ་ན། །ཞི་དྲག་གཉིས་ཀྱི་ལས་ལ་འཇུག །ཀླུ་རིགས་ནད་རིགས་མཆོད་གསད་དགྲོལ། །ནད་ཀྱི་གནོད་ལུགས་བཅོས་ཀ་བྱ། །བསྒྲུབ་ལ་བར་ཆོད་དགྲ་བྱུང་ན། །ལན་གསུམ་འཕམ་བླང་འགྱོད་མེད་བྱ། །དེ་ནས་དཀོན་མཆོག་དཔང་བཙུགས་ལ། །རླུང་ལྡོག་པ་ཡི་དུས་སུ་བསྒྲལ། །རང་གིས་མ་ངེས་རྦོད་གཏོང་ན། །སྙིང་པོ་འཕྲུལ་གྱི་སྐུ་བསྒོམ་ལ། །ཧུ༷་ལ་སྨྱོ་བཟློག་རྦད་བཏགས་ན། །སྐྱེ་ཀ་སྡོམ་སྡིག་ཇི་བཞིན་འགྱུར། །འབྱུང་བ་འཁྲུགས་པའི་ནད་འདོན་ན། །ཡི་གེ་དྲུག་པའི་གནད་ཀྱིས་གདོན། །སྟོད་སྨད་བར་གྱི་གདོན་ལུགས་ཡིན། །ཚ་གྲང་སྤྱོད་པ་བསམས་པས་སྦྱངས། །འཁོར་ལོ་ལྔ་ཡི་རྩ་སྒོ་ལ། །དྲོད་གདོན་གྲང་བ་ཕོ་མོའི་ནད། །བཅ་ལེན་ཟས་ནི་གྲོགས་ཡིན་ནོ། །རྣམ་སྨིན་ལས་ཀྱང་སྦྱངས་པར་ངེས། །འབྱུང་འཁྲུགས་གདོན་ལ་ཐེ་མི་ཚོམ། །བར་ཆོད་གདོན་གྱི་ནད་བྱུང་སེམས་འཁྲུགས་ན། །གདོན་ངོས་བཟུང་བ་ཤིན་ཏུ་གཅེས། །སྲོག་སྙིང་གསལ་བ་རབ་ཏུ་གཅེས། །གང་ཡིན་དེ་ལ་གཏད་པ་གཅེས། །ལུས་ཉམས་མཚན་མ་འབྱུང་བར་འགྱུར། །འཁོར་ལོ་སྲོག་གནད་སྙིང་པོས་གཏེམས། །རྗེས་མེད་མཆོད་པའི་བྱེ་བྲག་བྱ། །བྱང་ཆུབ་ཆེན་པོའི་གྲོགས་སུ་འགྱུར། །ཁོ་ཡི་ཆོ་འཕྲུལ་ང་རུ་ཁྲོལ། །ང་ནི་ཅིར་སྣང་ཅིར་འདུག་ལྟོས། འགྱུ་དྲན་འཛིན་ཆགས་ཡུལ་དང་བྲལ། །མིང་མེད་ཚིག་གི་རྟོག་པ་ཟད། །རྟོགས་ཤིག་རྟོགས་ཤིག་སྐལ་ལྡན་བུ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ལས་ཐམས་ཅད་པའི་སྐབས་ཀྱི་ལེའུ་སྟེ་དགུ་པའོ།། །།རྡོ་རྗེ་འཆང་བས་བཀའ་སྩལ་པ། །ཉོན་ཅིག་བཛྲ་ས་ཏྭ་ཁྱོད། །དུས་གསུམ་བདེ་གཤེགས་གསང་ཆེན་ནི། །འབུམ་ལས་འགའ་ཡིས་རྟོགས་པར་དཀའ། །འགྱུར་མེད་རང་བྱུང་སྙིང་པོ་འདི། །གང་དུ་གྱུར་ཀྱང་རང་བྱུང་ཉིད། །གཅིག་ནི་ཀུན་གྱི་རང་བཞིན་ཏེ། །སྤྲུལ་པའི་འཁོར་ལོ་སྣ་ཚོགས་འཆང་། །མི་འགྱུར་བ་ཡི་སྙིང་པོ་དང་། །སྐུ་གསུང་ཐུགས་དང་རྒྱས་པ་ལྔ། །རེ་རེ་ལ་ཡང་གསུམ་གསུམ་སྟེ། །ཏིང་འཛིན་འཕྲོ་འདུ་རྫས་དང་གསུམ། །སྤྲུལ་པ་ཡིན་པས་ཅིར་ཡང་འགྱུར། །རང་བྱུང་གདེང་དང་ལྡན་པར་གྱིས། །རང་བྱུང་སྙིང་པོ་སྲོག་དང་མིང་། །ཟུང་དུ་གཞུག་པས་རང་གཤེད་བྱའོ། །ཐབས་དང་ཤེས་རབ་གཉིས་མེད་དོ། །དཔའ་བོ་གཅིག་པའི་འཁོར་ལོ་ནི། །ཡུལ་མེད་མིང་དང་བྲལ་བ་ལས། །རང་བྱུང་སྙིང་པོ་གཅིག་པུར་རྟོགས། །གཅིག་པུ་རང་ཡང་ཕྱོགས་དང་བྲལ། །གང་ཡང་ཡིན་ནོ་ཅི་ཡང་རུང་། །རང་བྱུང་སྙིང་པོའི་འཁོར་བ་ལོ། གདེང་ཆེན་རྟོགས་པའི་འཁོར་ལོ་ཡིན། །སྐུ་གསུང་ཐུགས་ཀྱི་འཁོར་ལོ་ནི། །སྐུ་སྲོག་འཁོར་ལོ་ཡུལ་ལ་བསྐོར། །གསུང་མིང་འཁོར་ལོ་ཚིག་ལ་བསྐོར། །ཐུགས་ཀྱི་འཁོར་ལོ་རྟོགས་པས་བསྐོར། །གསུམ་ཚན་སྐུ་གསུང་ཐུགས་ཤེས་བྱ། །ཐབས་དང་ཤེས་རབ་ཡེ་ཤེས་གསུམ། །དེ་ལ་ཡོན་ཏན་ནོར་བུ་འདྲ། །སྣ་ཚོགས་ཐུགས་རྗེ་ལས་སུ་མཛད། །ཡོན་ཏན་ཕྲིན་ལས་འཁོར་ལོ་ཡིན། །རེ་རེ་ལ་ཡང་གསུམ་གསུམ་དུ། །ཆ་ལྡན་ཕྲིན་ལས་སྒོ་ནས་བསྟན། །འཇིག་རྟེན་དྲེགས་པ་གཤོམ་པ་དང་། །འབྱུང་བ་ལུབྲུགས་པ་གཞོམ་པའོ། །འདི་ནི་ཕྱག་ན་རྡོ་རྗེ་དང་། །ཁྲོ་བོ་ལ་སོགས་གཤིན་རྗེ་ལས། །དཔའ་བོ་གཅིག་པ་རང་བྱུང་ཐུགས། ཁུ་དང་སྣག་ཚ་སྨྱུ་གུར་ལྡན། །ཐིག་བསྐོར་རིམ་པ་ལྔ་རུ་བསྐོར། །འཁོར་ལོ་རྩིབས་བཞི་བརྒྱད་ཅུ་དྲུག །སུམ་ཅུ་རྩ་གཉིས་དྲུག་ཅུ་བཞི། །དཔའ་བོ་གཅིག་པ་སུམ་བསྒྲིལ་བྲི། །གཡས་དང་གཡོན་དང་རང་བྱུང་གཟེར། །ལྷ་དང་ཡིག་འབྲུ་མཚོན་ཆ་མེ། །དུག་ལྔ་འབྱུང་བ་སྐབས་དང་སྦྱར། །བསམ་པ་སྤྲོ་འབར་རྫས་གསུམ་བྱ། །དཔའ་བོ་གཅིག་པའི་འཁོར་ལོ་ཡིན། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ཐུགས་ཀྱི་འཁོར་ལོའི་ལེའུ་སྟེ་བཅུ་པའོ།། །།དེ་ནས་ཡང་ནི་བཤད་བྱ་བ། །ཉོན་ཅིག་བཛྲ་ས་ཏྭ་ཁྱོད། །རྫས་ནི་རྒྱ་ཤོག་རོ་རས་དང་། །གྲོ་ག་ས་ལྔ་ལས་དང་སྦྱར། །བསམ་པ་ཏིང་ངེ་འཛིན་གྱི་ལས། །རིན་ཆེན་འཕྲུལ་གྱི་སྙིང་པོ་བསྒོམ། །སེམས་དཔའ་གསུམ་ནི་གསལ་བར་བྱ། །ཏིང་འཛིན་རྣམ་གསུམ་སེམས་དཔའི་མཁར། །ཡི་དམ་ཞི་ཁྲོ་དུས་དང་སྦྱར། །དེ་ནས་སྤྲོ་བསྡུ་དབུགས་ལ་བསྐྱོན། །བ་སྐྲུ་ལ་སོགས་ཀུན་ནས་སྤྲོ། །རེ་རེའི་སྒོ་ནས་གྲངས་མེད་སྤྲོ། །སྤྲོ་བསྡུ་དབུགས་ཀྱི་འཁོར་ལོར་འདོད། །འཁོར་ལོའི་རྣམ་པ་གྲངས་མང་ཡང་། །གཡས་བསྐོར་གཡོན་བསྐོར་ཆོ་ལུ་གསུམ། །སྟེངགཅོདའོགགཅོདཕྱོགསགཅོདགསུམ། །དཀྲུག་དང་བཟློག་དང་རྣལ་མ་དགུ །རྐྱང་པ་དང་ནི་བཅུ་རུ་བཤད། །འཁོར་ལོ་བསྐོར་བའི་མན་ངག་ཡིན། །ཕ་བསྐོར་མ་བསྐོར་རང་བསྐོར་གསུམ། །འཁོར་ལོ་མདོ་ཡིས་བསྡུ་བར་བྱ། །རང་བྱུང་དམིགས་པ་སྙིང་པོའི་ཀློང་། །ཡུལ་མེད་མིང་དང་བྲལ་ཙ་ན། །འགྱུ་དྲན་འཛིན་ཆགས་འཁོར་བ་ལ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། འཁོར་ལོའི་གདམས་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་དག་བཤད་བྱ་བ། །ཉོན་ཅིག་བཛྲ་ས་ཏྭ་ཁྱོད། །སྐུ་གསུམ་འཁོར་ལོ་བསྟན་པ་ནི། །མི་སྐྱེ་ཆོས་ཅན་ཨ་ཡི་བསྐོར། །རྫས་ཚོགས་རྒྱུ་ནི་ལྡན་པ་ལ། །ཐིག་སྐོར་རིམ་པ་ལྔའམ་དྲུག །ལྟེ་བ་རྩིབས་བཞི་བརྒྱད་བཅུ་དྲུག །སུམ་ཅུ་རྩ་གཉིས་དྲུག་ཅུ་བཞི །ཨ་ནི་སྐྱེ་མེད་ཨ་སྦྱོར་བཀོད། ཁྲེ་ས་བསྟན་པའི་འཁོར་ལོར་བཤད། །དབྱངས་ཡིག་དྲུག་ཅུ་བརྒྱད་པ་ལ། །བཅུ་དྲུག་འཇམ་དཔལ་ཡི་དམ་སྔགས། །བཅུ་གཉིས་ཤང་ས་བསྟན་པ་དངོས། །དྲུག་པ་འཁོར་ལོ་ལྔ་རྫོགས་ཉིད། །སྐྱེ་མེད་འགག་པ་མེད་པའི་ཆོས། །ཨ་ནི་ཆོས་ཀྱི་དབྱིངས་སུ་གནས། །ས་ནི་ཆོས་ཉིད་འགྱུར་བ་མེད། །ཧ་ནི་འགག་མེད་ཨ་ཧ་ཆས། །ཨ་ནི་སྐྱེ་མེད་གནས་སུ་ལྡོག །སྐྱེ་འབྱུང་མེད་པ་ཨ་ཧ་མ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། གསུང་གི་འཁོར་ལོའི་ལེའུ་སྟེ་བཅུ་གཉིས་པའོ།། །།དེ་ནས་ཡང་དག་བཤད་བྱ་བ། །སྐུ་ཡི་འཁོར་ལོ་བསྟན་པ་ནི། །རྫས་དངསྣགཚཚོགསཔལ། །ཐིགལེ་སྐོར་རིམ་གོང་དང་འདྲ། །ལྟེ་བ་རྩིབས་བཞི་དཔའ་བོ་ལྔ། །བརྒྱད་པ་ཚོགས་བརྒྱད་སེམས་དཔའ་བརྒྱད། །གང་བསྒྲུབ་འཁོར་གྱི་ལྷ་ཚོགས་སོ། །བཅུ་དྲུག་ཁྲོ་བཅུ་ཐུབ་པ་དྲུག །སུམ་ཅུ་གཉིས་ལ་དབང་མོ་མཁའ་འགྲོ་བཞི། །སྐུ་ཡི་འཁོར་ལོ་ཡིན་པར་འདོད། །འབྲུ་ལྔ་གཙོ་བྱས་འཁོར་ལོ་ལྔ། །ཡོན་ཏན་ཕྲིན་ལས་དེ་བཞིན་ཤེས། །རིན་ཆེན་ལྟ་བུར་ཡོན་ཏན་འབྱུང་། །ས་ཚོན་གང་བསྒྲུབ་ཡི་དམ་སྔགས། །འཁོར་ལོ་གང་འདྲ་དེ་ལ་དགོད། །ཡོན་ཏན་འཁོར་ལོ་ཡིན་པར་འཆད། །ཐུགས་རྗེའི་བྱིན་རླབས་ཅིར་ཡང་སྟོན། །གང་བརྩམ་ལས་དེ་འགྲུབ་པར་འགྱུར། །ཧས་མཚོན་གང་བསྒྲུབ་གསང་བའི་གནས། །ཕྲིན་ལས་འཁོར་ལོ་ཡིན་པར་འདོད། །ཐིག་བསྐོར་ལྔ་རུ་རྫོགས་པར་བྲིས། །ལྟེ་བ་ཧུ༷་ལ་བཞི་བརྒྱད་ཧུ༷། །བཅུ་དྲུག་ཧ་ལ་སོ་གཉིས་ཧི། །ནད་གདོན་ཐུགས་ཀྱི་འཁོར་ལོ་ཡིན། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། འཁོར་ལོ་རྫོགས་པའི་ལེའུ་སྟེ་བཅུ་གསུམ་པའོ།། །།དེ་ནས་སྟོན་པས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཁྱོད། །ཐུགས་རྗེས་འགྲོ་བ་འཛིན་པ་ན། །དམ་ཚིག་ཅན་གྱི་སློབ་བུ་ལ། །ཐུགས་རྗེ་ཅན་གྱི་སློབ་དཔོན་གྱིས། །དམ་བསྲེ་གནང་བ་སེམས་བསྐྱེད་བྱ། །དད་ལྡན་བུས་ཀྱང་ཡིད་འཐད་ནོར་གྱིས་བསླུ། །བླ་མ་མཆོད་དང་ཆོས་སྐྱོང་བསྐང་། །སྤྱིན་པ་དགེ་བ་ཚོགས་གསོག་བྱ། །སྡིག་སྦྱངས་ཆོས་ནི་ཆགས་པའི་རྟེན། །དེ་ལྟར་ཚུལ་དང་ལྡན་པར་བྱ། །བླ་མ་ཐུགས་རྗེ་བྱམས་ལྡན་དེས། །བརྡ་དང་ངག་གིས་སློབ་བུ་བསྲལ། །བརྡ་བསྟན་ཡུལ་དུ་དམིགས་པ་བསྟན། །ངག་བརྗོད་ལྕེ་རྩེས་རྣ་བར་དཀྲུགས། །ཤེས་རབ་ཅན་གྱིས་བུ་ལ་བསྟིམ། །ཕྱི་ལྟར་སྙིང་པོ་བརྡ་རུ་སྟོན། །ནང་ལྟར་ལུས་དང་རྩ་རླུ་་སྤྲོད། །གསང་བར་ཡི་གེ་སྙིང་པོ་ཁྲོལ། །དོན་དུ་ཆོས་ཉིད་སྙིང་པོར་འདུས། །ལྔ་བསྐོར་གསུམ་སྒྲོམ་འཔྲང་དུ་ཆུག །རང་ཐོག་ཟངས་ཀྱི་ཝ་ནས་དྲོངས། །འཐོར་བ་ཐམས་ཅད་དེ་ལ་སྡུས། །སྐུ་དང་བུམ་པ་དཀྱིལ་འཁོར་དང་། །དབྱིབས་དང་ཕྱག་མཚན་སྣ་ཚོགས་གཟུགས། །པདྨ་དང་ནི་རྡོ་རྗེ་དང་། །རིན་ཆེན་རྒྱ་གྲམ་རལ་གྲི་མདའ། །ཁ་ཊ༷་ཕུར་པ་ཞིང་དབྱུག་དང་། །གཞུ་དང་དྲིལ་བུ་ཞགས་པ་དང་། །ལྕགས་ཀྱུ་ཞགས་པ་དགྲ་སྟུ་དང་། །ཟླུམ་པོ་གྲུ་བཞི་ཟླ་གམ་དང་། ཁུ་གསུམ་ལ་སོགས་སྣ་ཚོགས་པ། །ཁ་དོག་ལ་སོགས་དེ་དང་མཚུངས། །སྣང་བ་སྣ་ཚོགས་སྙིང་པོ་ཉིད། །སྣང་བ་ཡོད་མེད་དེ་ལ་བརྟགས། །གཅིག་པོ་ཀུན་ཏུ་སྣང་བས་ཆོག །ཅེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། སྣང་བ་སྙིང་པོར་བསྟན་པའི་ལེའུ་སྟེ་བཅུ་བཞི་པའོ།། །།ཀུན་བྱེད་རྒྱལ་པོ་ཀུན་བཟང་གིས། །སེམས་དཔའི་འཁོར་ལ་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཁྱོད། །སྲིད་པ་ལུས་ཀྱི་གྲུབ་ཚུལ་ནི། །རང་བྱུང་རྒྱུ་རྐྱེན་སྙིང་པོ་འདི། །རང་བྱུང་རྒྱུ་བ་སྣ་ཚོལ་ཚེ། །ཞབྲུལ་པའི་ལུས་རྟེན་འོད་ལས་ལེན། །འགྱུ་བ་རྒྱུ་ལ་དཀར་དམར་རྐྱེན། ཁུ་བ་བར་དོར་རྐྱེན་དང་འཛོམ། །ཕོ་མོའི་འདུ་འཕྲོད་གཞལ་ཡས་འོད། །བར་དོ་དེ་ལ་སྣང་ལོག་འཛིན། །བདུན་ཕྲག་ཟླ་དགུ་ངོ་བཅུ་ནི། །ལུས་སུ་རྫོགས་ཏེ་མ་ལས་ཕྲུལ། །ནང་ནས་ཤེས་པ་ཕྱིར་མི་གསལ། །ཞག་དང་ཟླ་བ་ལོ་ཡིས་འགྲིབ། །གཟུང་འཛིན་ཤེས་པ་ཇེ་རགས་སོང་། །དུག་ལྔ་ཆགས་ལྡང་གཟུང་འཛིན་སྤྱོད། ཁེས་རབ་རྟོག་དཔྱོད་དགེ་སྡིག་གོ །དེ་ལྟར་སྙིང་པོ་ལུས་ཀྱི་རྒྱུ། །ཧ་གཉིས་ཁ་སྤྲད་ལུས་ཀྱི་རྒྱུ། །བྱང་ཁོག་སྟོད་དུ་བརྡ་སྤྲད་གསལ། །འ་དང་ཞབས་སྐྱེད་རོ་སྨད་རྐང་། །གུ་གུ་ཐིག་ལེ་ཟླ་ཚེས་མགོ །འགྲེང་བུ་ན་རོ་རྩ་དང་སྐྲ། །དེ་ལྟར་སྙིང་པོ་ཉིད་ལས་གྲུབ། །བརྡ་རུ་སྙིང་གི་བུ་ལ་སྟོན། །ཕ་རྩ་མ་་རྩ་རང་རྩ་གསུམ། །ལུས་དང་སེམས་ཀྱི་གཞི་མ་ཡིན། ཁུ་བ་རླུད་གི་རྩལ་རྫོགས་ཚད། །ཐ་མ་ཐིག་ལེ་རང་གི་སེམས། །དང་པོ་རྒྱུ་ལས་འབྲས་བུ་སྨིན། །ཕ་རྩ་ཤེལ་གྱི་ཆུ་འབབ་འདྲ། །ཚད་དུ་སྨིན་པས་སྨིན་དུས་ཡིན། །ཐོད་པ་དབང་མོ་སྒལ་ཚིགས་སྦུབས། །རུས་པའི་རྩལ་རྫོགས་སེན་མོ་ཡིན། །རྐང་དང་རྐང་མར་ཀླད་གཞུང་ནས། །ཐིག་ལེ་ཉ་མིག་བབ་ཀྱི་མཆོག །ལ་ལ་རྩ་སྟེ་སྒལ་ཚིགས་སྦུབས། །རོ་མ་དཀར་མོ་ཐབས་རྩ་བ། །བདེ་བ་གསལ་བ་རགས་པ་གཡས། །མ་རྩ་བཙོད་ཀྱི་ཐག་པ་འདྲ། །ཚད་དུ་སྨིན་པ་མཛོད་སྤུ་ཡིན། །དོན་སྙིང་ནང་རོལ་ཤ་ཡི་སྦུབས། །དངས་སྙིགས་རླུད་རྒྱུ་རྒྱུས་མང་བསྒྲགས། །རྩལ་རྫོགས་པགས་པ་བ་སྐྲུ་སྐྲ། ཁྲ་དང་དོན་སྙིང་རྩ་ལས་ཁྲག །ཐིག་ལེ་དམར་པོ་ཟླ་ཚིགས་འཛིན། །ར་ས་རྐྱང་མ་དམར་སེར་སྲོག་པ་རྩ། །དོན་སྙིང་འཁོར་ལོ་ལྔ་དང་འབྲེལ། །འགག་མེད་རླུ་་བཟུང་ཤེས་རབ་མཆོག །སྟོང་པ་མ་རྩ་རགས་པ་གཡོན། །དེ་ཉིད་ཟུང་འབྲེལ་སྒྲོག་རུས་ལྤགས། །དེ་ལྟར་ལུས་པོ་འབྱུང་བ་ལྔ་ལས་གྲུབ། །སྙིང་པོ་ཧུ༷་གི་སྒྲ་འདི་རྟགས། །སེམས་ཅན་ཀུན་གྱི་སྒྲ་རུ་ཧུ༷། །སངས་རྒྱས་ཀུན་གྱི་ཐུགས་སུ་ཧུ༷། །སྟོང་པ་གསལ་བ་འགག་མེད་ཧུ༷། །ཆོས་མིན་སྙིང་པོ་རང་འབྱུང་ཧུ༷། །རང་བྱུང་རྟོགས་ན་གྲོལ་བར་འགྱུར། །མི་འགྱུར་མཐིང་ག་རང་གི་རྩ། །ཨ་ཝ་དྷ་ཏི་ཀུན་འདར་མ། །ཡེ་ཤེས་ལྔ་རྒྱུ་ཚོན་གྱི་སྐུ། །འོད་ལྔ་འཇའ་ཚོན་ཉི་ཟེར་འདྲ། །ཕ་མ་གཉིས་ཀྱི་པར་ན་རྒྱུ། །རྡོ་རྗེ་པདྨ་ཚངས་བུག་སྒོ། །འཁོར་ལོ་ལྔ་དང་འབྲེལ་བའི་རྩ། །བཞི་བརྒྱད་བཅུ་དྲུག་སུམ་ཅུ་གཉིས་། །དྲུག་ཅུ་རྩ་བཞི་ལྟེ་བའོ། །ཉི་ཁྲི་ཆིག་སྟོང་རྒྱས་པའི་རྩ། །བྱང་སེམས་ཐིག་ལེ་རྒྱུ་བ་རླུད་། །རྡོ་རྗེ་ཧུ༷་གི་རྩལ་དུ་བཤད། །ཅེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། སྙིང་པོ་ལུས་ཀྱི་གྲུབ་ཚུལ་གྱི་ལེའུ་སྟེ་བཅོ་ལྔ་པའོ།། །།ཀུན་བྱེད་ཀུན་ཏུ་བཟང་པོས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཁྱོད། །སངས་རྒྱས་གསུང་ལ་སེམས་ཅན་སྒྲ། །སྙིང་པོ་སྒྲ་ཡི་གདམས་པ་འདི། །སྙིང་པོ་ཡིན་པར་གཞི་རུ་བཅས། །གང་སྣང་མིང་དུ་བཏགས་པ་ཀུན། །སྙིང་པོའི་ཆོས་སུ་བསྒྲུབ་པར་བྱ། །ཚིག་ཏུ་ཡི་གེ་མིང་དུ་བཏགས། །བཏགས་སྒྲ་གང་བརྗོད་སྙིང་པོའི་སྒྲ། །གཞི་དང་སྒྲུབ་བྱེད་གཞན་འཕྲང་བསྡམ། །ཡི་གེའི་ཚོགས་སོགས་གྲོགས་སུ་འགྱུར། །ཀ་ཁ་ག་ཀྟ་ང་། ཙ་ཚ་ཛ་རྙོ་ཉ།ཊ་ཋ་ཌ་རྟེ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྟ། ཨ་ཨུ། ཨི་སྙི། ཨུ་སྐྲུ། ཨེ་ཞི། ཨོ་ཨཱོཾ། རི་རྡི། ལི་སྙི། ཨ༷་ཨུ༷༷། དེ་དག་སྙིང་པོ་ཧུ༷་གི་གྲོགས། །སྐུ་གསུམ་ཁྱབ་བྱེད་རྒྱ་མ་ཆད། ང་ནི་རང་བྱུང་སྙིང་པོའི་ཆོས། །གཅོད་བྱེད་ཆ་ལྡན་འཇོམས་པར་བྱེད། །འཁོར་བ་མྱ་ངན་འདས་པ་ཉ། །གཏན་འབེབས་ཐིག་ལེ་དུས་ལ་བབས། །ཡོད་མེད་གཉིས་ལ་འཇུག་པ་ན། །རིག་པ་གནས་ལུགས་འཁོར་བའི་རྒྱུ། །སྐྱེད་པར་བྱེད་པ་ཆོས་ཉིད་མ། །རྩ་བ་ཉམས་མྱོང་འཛིན་པ་ཡིན། །གནས་ལུགས་སྙིང་པོ་ཝ་ནས་དྲོངས། །ཞ་འ་ཟ་བྱེད་སྟོང་པའི་དབྱིངས། །སྐུ་གསུམ་མྱ་ངན་འདས་པ་ཉ། །ཐུགས་རྗེ་གནས་ལུགས་ཤེས་རབ་ཤུགས། །ས་ནི་འགྱུར་བ་མེད་པར་བརྟན། །ཧ་ནི་འགག་མེད་སྙིང་པོའི་དབྱིངས། །སྐྱེ་བ་མེད་པས་སྙིང་པོ་ཨ༷༷། །མགོ་འདྲེན་བོད་བདེ་སྐབས་སུ་འབྱེད། །འཛིན་པ་མཁྱེན་བྱེད་གཅོད་པ་དང་། །འབྲེལ་ཁྱབ་སྡུད་པ་སྙིང་པོའི་གྲོགས། །སྙིང་པོ་མེད་པ་གང་ཞིག་བརྗོད། །ཡི་གེ་མེད་པ་སྲོག་སྙིང་གང་། །ཡིག་འབྲུ་མེད་པ་གཟུགས་སྣང་ཅི། །སྲོག་དང་སྙིང་པོའི་གདམས་པ་ཡིན། །སྲོག་ནི་གཟུགས་ལ་སྙིང་པོ་མིང་། །གཟུགས་ནས་གཟུང་ན་སྙིང་པོས་བོད། །ཅེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། གསང་བ་སྒྲ་དང་སྲོག་གི་ལེའུ་སྟེ་བཅུ་དྲུག་པའོ།། །།དེ་ནས་སྟོན་པས་བཀའ་སྩལ་པ། །ཉོན་ཅིག་སེམས་དཔའ་རྔོ་རྗེ་ཆེ། །རྡོ་རྗེ་ཧུ༷་སྟེ་ཧུ༷་ཞེས་སྒྲོགས། །ཐིག་ལེ་ཉག་གཅིག་མན་ངག་ནི། །བསྒོམ་དུ་ཅི་ཡང་མེད་པ་ལ། །ཡེངས་པ་མེད་པའི་མན་ངག་བསྟན། །རྡོ་རྗེ་འཕྲུལ་གྱི་སྙིང་པོའི་སྐུ། །རྡོ་རྗེ་སྐྱེ་མེད་འགག་མེད་ཐུགས། །རྣོ་རྗེ་བཞི་བསྐོར་མ་ཡེངས་བཟླས། །རྡོ་རྗེ་རྡོ་རྗེ་ཤུབ་བུ་དང་། །གནོད་པ་འགོག་བྱེད་ཨ་ཏིར་བཟླས། །སེམས་དཔའི་སྐུ་གསལ་བླ་མ་དྲན། །རྡོ་རྗེའི་བཟླས་པ་རང་སོར་བཟླས། །རྡོ་རྗེ་ཤུབ་བུའི་བཟླས་པ་ནི། །སོ་དང་མཆུ་ནི་མཉམ་སྦྱར་ལ། །ལྕེ་ཡི་རྩེ་མོས་ཅུང་ཟད་བསྐུལ། །ཚིག་གི་སྒྲ་ནི་བསྒྱུང་པའི་གླུ། །རྡོ་རྗེ་ཤུབ་བུའི་བཟླས་པའོ། །འགོག་པ་དག་གི་བཟླས་པ་ནི། །ནད་དང་གདོན་ངོས་བཟུང་བ་ལས། །སྟོད་འཕང་སྨད་བསྐྱུར་བར་ནས་གདོན། །བསྲེག་གསད་ཆར་དབབ་མཆོད་པར་དབུལ། །འགྱུ་དྲན་འཛིན་ཆགས་རྣམ་རྟོག་འགོག །འགྱུ་དྲན་འཛིན་ཆགས་གང་སྣང་ལ། །ཡོད་མེད་གང་འདུག་ཅི་འདུག་བརྟགས། །ང་དང་སྙིང་པོ་རང་རྒྱུང་ཆོས། །གཟུགས་མེདསྲོགཆོདསྣངབམེད། །ཚིག་མེད་མིང་བྲལ་སྙིང་པོ་རིག །ཨ་ནི་སྐྱེ་མེད་བཟླས་པའོ། །གསང་སྔགས་རིག་སྔགས་གཟུངས་སྔགས་ཀུན། །གང་བཟླས་སྙིང་པོ་ཧུ༷་གི་རྟ། །ཡི་གེ་འབྲུ་ཡི་སྒྲ་ལྟ་ར་རོ། །ཆེན་པོ་འཐུག་པོ་རིང་པོ་ཐུང་། །དྲང་པོ་བཟློག་པ་རྣལ་མ་རྣམས། །ཀུན་ཀྱང་སྙིང་པོ་ཧུ༷་གི་སྒྲ། །གསང་བར་བཟླས་དང་འབྲུག་ལྟར་སྒྲོགས། །རང་སོར་ཚིག་གསལ་ཆོད་པ་བཟླ། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། བཟླ་ལུགས་ཀྱི་ལེའུ་སྟེ་བཅུ་བདུན་པའོ།། །།དེ་ནས་སྟོན་པས་བཀའ་སྩལ་པ། །ཉོན་ཅིག་བཛྲ་ས་ཏྭ་ཁྱོད། །ངོ་བོའི་རྒྱུད་དང་ཚིག་གི་རྒྱུད། ཁུད་ཀུན་གྱི་ནི་བདག་པོ་དང་། །ལྟ་བ་ཕྱོགས་དང་བྲལ་བའི་ཆོས། །མ་བྲིས་དཀྱིལ་འཁོར་སྣང་བའི་མཆོག །དབང་མཆོག་སྙིང་པོ་རང་བྱུང་དབང་། །འགྱུ་དྲན་འཛིན་ཆགས་ཡེངས་མེད་སྒྲོགས། །དམ་ཚིག་འཁུ་འཕྲིགས་སྤངས་པའི་གདེང་། །སྤྱོད་པ་ཤུགས་འབྱུང་ཚུལ་འཆོས་མེད། །ཕྲིན་ལས་འགྲོ་དོན་རྫོགས་པ་ཡི། །གསང་སྔགས་སྙིང་པོ་ཧུ༷་གི་རྒྱུད། །འབྲེལ་དང་མ་ཚང་མེད་པ་ཡིན། །ཡོངས་སུ་རྫོགས་པས་མ་ཚང་མེད། །བསྙེན་པ་ཉེ་བསྙེན་བསྒྲུབ་པ་ལས། །བསྐྱེད་དང་རྫོགས་དང་རྫོགས་པ་ཆེ། །འདི་ནི་ཨ་ཏི་སྙིང་པོའི་རྒྱུད། །གསང་སྔགས་བསྟན་པ་དར་བའི་དུས། །དུས་ཀྱི་སྙིགས་མ་ལས་ངན་བྱེད། །རྒྱལ་པོ་མངའ་བྲི་དམངས་ཀུན་རང་དགར་སྤྱོད། །དེ་དུས་ང་ཡི་རྒྱུད་འདི་དར་བར་འགྱུར། །མ་ཉམས་གསང་ཐུབ་རེ་དོགས་བྲལ། །གྲོལ་བར་འགྱུར་ཏེ་ཐེ་ཚོམ་མེད། །ཆོས་ཀྱི་ཟོང་བྱེད་སློབ་དཔོན་འཕྲག་ཚོང་བྱེད། །སྡིག་ལ་མི་འཛེམ་ཚུལ་འཆོས་དགེ་བ་བྱེད། །མཆེད་ཀྱི་ཁྲེལ་མེད་སློབ་དཔོན་མཉེས་མི་བྱེད། །དངོས་གསུམ་རྗེས་འབྲེལ་ངན་སོང་དམྱལ་བའི་གནས། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། རྒྱུད་ཀྱི་དོན་བསྡུས་པ་དང་དར་དུས་ཀྱི་ལེའུ་སྟེ་བཅོ་བརྒྱད་པའོ།། །།ཀུན་བྱེད་སྟོན་པས་བཀའ་སྩལ་པ། །འཁོར་ཚོགས་བཛྲ་ས་ཏྭ་ཁྱོད་ཉོན་ཅིག །སྙིང་པོ་གང་དུ་གྱུར་པས་སངས་རྒྱས་ཐུགས། །རྩ་བ་འདུས་པས་སེམས་ཅན་གཞི། །མྱང་འདས་ཐུགས་ལ་འཁོར་བའི་དབུགས། །གོང་དུ་གྱུར་དང་གོང་ན་མེད། །རྩེ་མོ་ཟང་ཐལ་རིན་ཆེན་ཏོག །སངས་རྒྱས་ཐམས་ཅད་དགོངས་པ་གཅིག །སེམས་ཅན་ཀུན་གྱི་ཡིད་དུ་གནས། །འཁོར་བའི་གཤམ་དུ་འདུས་པ་ཡིན། །འགྲོ་དྲུག་ཁམས་གསུམ་ཧུ༷་གི་སྐད། །མི་མཐུན་པ་དང་ག་ལ་སྲིད། །སྟོང་པ་སེམས་ཀྱི་རང་རྩལ་ཡིན། །རྩེ་མོ་གར་འགྱུར་རྩ་བ་གཤམ་དུ་འདུས། །དུས་ཀྱི་ཐ་མར་སྙིང་པོ་དར་བར་ངེས། །གཅེས་པའི་མན་ངག་བླ་མེད་སྙིང་པོའི་རྒྱུད། །སྙིགས་མའི་དུས་སུ་ཆོས་འདི་འབྱུང་བར་འགྱུར། །ཞེས་གསུངས་སོ། །རྡོ་རྗེ་སེམས་དཔས་འདི་སྐད་ཞུས། །དེ་ལྟར་ཆོས་འདི་འབྱུང་བ་ནི། །བྱིན་གྱིས་རླབས་ཀྱིས་འབྱུང་མི་འབྱུང་། །གང་གང་ས་ཕྱོགས་དར་བར་འགྱུར། །གང་ཟག་གང་གིས་འཛིན་པ་ལགས། །ཞེས་ཞུས་པས། །རྡོ་རྗེ་འཆང་བས་འདི་སྐད་གསུངས། །བྱིན་གྱིས་རླབས་ཀྱིས་འབྱུང་བར་འགྱུར། །ང་ཉིད་སྤྲུལ་པ་རྡོ་རྗེ་སེམས། །རྡོ་རྗེ་འཆང་བ་བར་མ་ཁྱོད། །ཁྱོད་ཉིད་སྤྲུལ་པ་རྡོ་རྗེའི་རིགས། །པདྨའི་མིང་ལ་རྡོ་རྗེའི་སྐུ། །རྒྱལ་རིགས་ཨོ་རྒྱན་རྡོ་རྗེ་འཆང་། །རྡོ་རྗེ་འཆང་བ་ཐ་མ་དེས། །ས་འདུལ་བོད་ཡུལ་རྒྱལ་པོ་དང་། །བློན་པོ་སྤྲུལ་སྐུ་གཅིག་ལ་གཏོད། །དེ་ནས་སྐལ་ལྡན་རིམ་བརྒྱུད་ནས། །གསང་སྔགས་བཀའ་འཆོལ་དུས་སུ་དར། །ཞེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། ཆོས་ཀྱི་དར་ས་འབྱུང་དུས་ཀྱི་ལེའུ་སྟེ་བཅུ་དགུ་པའོ།། །།ཡང་སྟོན་པས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའི་ཚོགས། །སྙིང་པོ་ཆོས་མིན་རང་བྱུང་འདི། །དཔེར་ན་ནོར་བུ་རིན་ཆེན་འདྲ། །ཐམས་ཅད་མི་འབྱུང་གང་ཡང་མེད། །འགྱུར་བ་མེད་པས་གསེར་དང་འདྲ། །གང་ལྟར་དཔྱད་ཀྱང་སྙིང་པོ་ཉིད། །རང་བྱུང་རང་བཞིན་ནམ་མཁའ་འདྲ། །སྟོང་པ་དངོས་པོར་སྣང་བར་བྱེད། །སྒྱུ་མ་མཁན་གྱི་དཔེ་དང་འདྲ། །གཅིག་ལས་ཐམས་ཅད་སྤྲུལ་པར་སྣང་། །རྒྱ་མཚོར་གཟའ་སྐར་ཤར་བ་འདྲ། །ཟབ་ལ་མ་འདྲེས་ཀུན་གསལ་ཆོས། །ནམ་མཁར་སྤྲིན་འདུས་ཐོག་དང་འདྲ། །དངོས་པོའི་རྫས་ཀུན་རླག་པར་བྱེད། །སྨན་གྱི་རྒྱལ་པོ་ཛེ་ཏ་འདྲ། །གང་ལ་རེག་པ་སྨན་དུ་འགྱུར། །འཁོར་ལོས་སྒྱུར་བའི་རྒྱལ་པོ་འདྲ། །ལོག་ལྟ་དགྲ་བགེགས་འདུལ་བར་བྱེད། །ནམ་མཁར་ཉི་མ་ཤར་བ་འདྲ། །མ་རིག་སྡིག་སྒྲིབ་སྦྱོང་བའོ། །སྨན་གྱི་རྒྱལ་པོ་ག་བུར་འདྲ། །རྟོགས་དང་མ་རྟོགས་ཁྱད་པར་ཆེ། །ཐང་ཁད་མཉམ་པོའི་ཆུ་དང་འདྲ། །གང་དང་གང་ཡང་གདུལ་བྱའི་ཆོས། །སྙིང་པོ་འདི་ནི་ཀུན་གྱི་ལས། །ཞི་རྒྱས་དབང་དང་མངོན་སྤྱོད་སྟོན། །འདི་ནི་སྲུང་བ་བླ་ན་མེད། །ཧུ༷་བརྗོད་དཔའ་བོ་གཞན་གྱིས་མིན། །ཧུ༷་བསྒོམ་རྡོ་རྗེ་འཇིག་འདྲལ་མེད། །ཧུ༷་རྟོགས་ནམ་མཁའ་གཅད་དུ་མེད། །དྲི་ཆེན་དྲི་ཆུ་བྱང་སེམས་བཟང་། །གླ་བ་ཚིལ་ཆེན་གུ་གུལ་དང་། །རྟ་བོན་མུ་ཟི་བསྐུ་ཞིང་བརྟག །སྨན་དྲུག་བུ་རམ་ཀ་ར་ནི། །ཚ་གྲང་གཉིས་ལ་སྦྱར་ཞིང་བཏང་། །རྩ་ཆུ་གཉིས་ཀྱིས་ནད་ངོས་བཟུང་། །སྲིན་བྱ་འུག་པ་ཕོ་རོག་མིག །མིག་མཐོང་གདོན་ངོས་བཟུང་བའི་རྫས། །གུ་གུལ་རྟ་བོན་ཚིལ་ཆེན་ནི། །གདོན་བསྲེག་ཡི་དྭགས་ཁ་ཆིངས་རྫས། །འོ་མ་ཅན་དང་ཚེར་མ་ཅན། །སྤྱིན་བསྲེག་ཞི་དྲག་གཉིས་ཀྱི་རྫས། །རོ་གཡམ་ཐོད་པ་མིང་དང་གཟུགས། །རྒྱ་གྲམ་དཔའ་བོ་བཅོ་ལྔས་བྲིས། །མནན་པ་རྡོ་རྗེ་ཁ་གནོན་རྫས། །ཁྲག་དང་དུག་སྣ་སྔོ་དང་ཆུ། །ལོ་ཐོག་རླུད་ལ་བསྐུར་པའི་རྫས། ་་་དཀར་ཉུང་ནག་མདའ་ཕུར་ཁྲག །སྲོག་ལ་ཟོར་ཐུན་གསད་པའི་རྫས། །ཧུ༷་བསྒོམ་ཧུ༷་བརྗོད་མེ་དཔུང་མཚོན། །ཐོག་རིས་སྡིགས་མཛུབ་སེར་བ་བཟློག །ཅེས་གསུངས་སོ། །རྡོ་རྗེ་སེམས་དཔས་འདི་སྐད་ཞུས། །སྟོན་པས་གསུངས་པའི་རྒྱུད་འདི་ལ། །མཚན་དུ་ཇི་སྐད་གཟུང་བར་བགྱི། །འཁོར་ཚོགས་འདི་ལ་ངེས་པར་གསུང་། །ཞེས་ཞུས་པས། །ཀུན་ཏུ་བཟང་པོས་བཀའ་སྩལ་པ། །ངས་བཤད་སྙིང་པོ་དོན་གྱི་རྒྱུད། །སངས་རྒྱས་དགོངས་པ་འདུས་པའི་ཆོས། །དགོངས་པ་འདུས་པའི་རྒྱུད་དུ་ཟུང་། །གསང་བའི་སྙིང་པོ་ཆོས་མིན་སྟོན། །གསང་བ་སྙིང་པོའི་རྒྱུད་དུ་ཟུང་། །རང་བྱུང་སྙིང་པོ་རྡོ་རྗེ་སྟོན། །རང་བྱུང་སྙིང་པོའི་རྒྱུད་དུ་ཟུང་། །འོག་མིན་གནས་ཀྱི་དང་པོར་གསུངས། །རྡོ་རྗེ་ཡང་རྩེའི་རྒྱུད་དུ་ཟུང་། །ཞེས་གསུངས་ནས་བཀའ་སྩལ་པ། །གསང་སྔགས་འདི་བབ་ཆོལ་ལ་སྤྱོད། །དམ་ཚིག་ཉམས་པའི་ཆོས་བྱེད་ཀུན། །ན་རག་ཡི་དྭགས་དཀྲུགས་པར་ཤོག །མི་བཟད་སྲིན་པོ་བདུད་མོ་ཡིས། །གྲོགས་དང་བུ་ཚ་འཁོར་དུ་ཤོག །ཡིད་འོང་གྲོགས་དང་བྲལ་བར་ཤོག །མིང་བཏགས་ལྷ་སྲིན་སྡེ་བརྒྱད་ཀྱིས། །རྟག་ཏུ་འཚེ་ཞིང་སྙིང་འབྱིན་ཤོག །བྱམས་པའི་གཉེན་མེད་མི་རྣམས་ཀུན། །རྟག་ཏུ་དགྲ་ཡི་ལས་བྱེད་ཤོག །བུ་དང་སློབ་བུ་བསླབས་འགྱིང་སྟེ། །སྲིན་བྱའི་སྐད་བཞིན་སྙན་མེད་ཤོག །འབྱུང་བ་ཞབྲུགས་པས་འདུ་བའི་ནད། །རྟག་ཏུ་ལུས་ལ་འབྱུང་བར་ཤོག །གདུག་པ་ཀླུ་དང་དགྲས་ཡར་དང་། །རྟག་ཏུ་ལུས་སེམས་བདེ་མེད་ཤོག །བླ་མ་མཉེས་བྱེད་ལུས་སྲོག་ནོར། །རིག་པ་དམ་ཚིག་གཙང་མར་བསྲུང་། །འཁོར་དྲུག་ཡང་ཕྱིར་མི་ལྡོག་པར། །དགེ་སྤྱོད་གྲོགས་རྙེད་འཁོར་རྙེད་ཤོག །ལྷ་སྲིན་འཁོར་བྱེད་བར་ཆད་སེལ་བར་ཤོག །མགོ་ནག་བྱམས་ནས་རྒྱལ་པོའི་བཀའབཞིནཤོག །ནདམེད་ལུས་བདེ་ཉམས་མྱོང་རང་འབར་ཤོག །ཀླུ་འགོ་བསོད་ནམས་དགེ་རྒྱས་ཤོག །ཅེས་གསུངས་སོ། །རྡོ་རྗེ་ཡང་རྩེའི་རྒྱུད་ལས། དཔེ་དང་སྲུང་རྫས་རྒྱུད་མཚན་སྨོན་ལམ་གྱི་ལེའུ་སྟེ་ཉི་ཤུ་པའོ།། །།དེ་ནས་སྟོན་པ་ཀུན་བྱེད་རྡོ་རྗེ་འཆང་། །འོད་གསལ་ཁ་དོག་སྙིང་པོའི་འོད། །ཧྭ༷་ལས་ཁ་དོག་ལྔར་བསྟན་ནས། །རྡོ་རྗེ་འཆང་བ་དང་པོའི་སྐུ་རུ་བཞུགས། །ཧུ༷་ལས་ཧ་འབྱུང་ཨ་རུ་རྟོགས། །ཞེས་གསུངས་སོ། །རྡོ་རྗེ་སེམས་དཔའ་འཁོར་དང་། མཁའ་འགྲོ་མ་རྡོ་རྗེ་དྲག་མོ་ལ་སོགས་པ་རིགས་ལྔའི་མཁའ་འགྲོ་མ་དང་། རྡོ་རྗེ་རིགས་ཀྱི་ལྷ་བརྒྱ་སྟོང་གིས། མེ་ཏོག་དང་མཆོད་པའི་ཚོགས་ཀྱིས་མཆོད་ཅིང་མངོན་པར་བསྟོད་པ། སྟོན་པའི་སྟོན་པ་རྡོ་རྗེ་འཆང་། །ཀུན་ཏུ་བཟང་པོ་ཀུན་བྱེད་སྐུ། །སྙིང་པོའི་ཆོས་འཆང་རྡོ་རྗེའི་ཐུགས། །སྙིང་པོ་སྐྱེ་མེད་སྐུ་ལ་བསྟོད། །འདུས་པའི་འཁོར་ལ་རྒྱུད་བཤད་ངོ་མཚར་ཆེ། །རང་བྱུང་སྙིང་པོ་ཧུ༷་དེ་རྡོ་རྗེའི་རྒྱུད། །གསང་བ་མངོན་དུ་སྟོན་པ་མན་ངག་ཆོས། །འཁོར་ཚོགས་འདི་ལ་གནང་བ་ཡི་རང་ངོ། །ཞེས་གསུངས་སོ། །སྟོན་པ་ཉིད་མྱ་ངན་ལས་འདས་སོ། །དེ་ནས་རྡོ་རྗེ་སེམས་དཔས། །ཀྱེ་མ་ཀྱི་ཧུད་ཀྱི་ཧུད་ཅེས་གསུངས་ཤིང་། །མི་སྣང་མི་འཁོར་རྡོ་རྗེ་འཆང་། །ཕྱིར་མི་ལྡོག་པ་ཀུན་ཏུ་བཟང་། །སྙིང་པོ་ཆོས་དབྱིངས་རྡོ་རྗེའི་སྐུ། །བྱིན་གྱིས་རླབས་ཀྱིས་གཟུང་བར་ཞུ། །ཞེས་གསུངས་ནས་རྒྱུད་འདི་བསྡུས་ནས་སྤྲུལ་པའི་སྐུ་པདྨ་འབྱུང་གནས་ལ་གསུངས་སོ། །རྡོ་རྗེ་ཡང་རྩེའི་རྒྱུད་ལས། རྗེས་སུ་ཡི་རང་བའི་ལེའུ་སྟེ་ཉེར་གཅིག་པའོ།། །།རྡོ་རྗེ་ཡང་རྩེའི་རྒྱུད་རྫོགས་སོ།། །། རྒྱ་གར་སྐད་དུ། །བཛྲ་པྲ་ཀེ་ཏུ་ཏནྟྲ་ནཱ་མ། །བོད་སྐད་དུ། །རྡོ་རྗེ་ཡང་ཏོག་གི་རྒྱུད་ཅེས་བྱ་བ། དཔལ་རྡོ་རྗེ་འཆང་ཆེན་པོ་