Ngb-pt-0909-vol-10-text

Body

རྒྱ་གར་སྐད་དུ། པྲ་ཏི་ཡ་མན་ཏྲ་ས་ཙ་ཏན་ཏྲ་ཀ་ནི་ཀ །བོད་སྐད་དུ། མཆོད་རྟེན་ནག་པོའི་རྒྱུད་ལས། པྲ་ཁྲིད་རྣམ་པ་གསུམ་བསྟན་པ། དཔལ་དྲེགས་བདག་ཆེན་པོ་ལ་ཕྱག་འཚལ་ལོ། །ཤིན་ཏུ་གསང་བའི་གནས་མཆོག་གནས། །དྲེགས་བདག་ལྷ་ཡི་དབང་པོ་ལ། །དྲག་པོ་འདུས་པའི་འཁོར་གྱིས་བསྐོར། །གསང་བའི་ལུང་རྣམས་སྦས་ཏེ་གཏད། །སྐབས་དང་ལྡན་པའི་དུས་དག་ལ། །འཁོར་གཙུག་དགུ་ན་གུས་འདི་སྐད་ཞུས། ཨེ་མ་ཧོ། དྲེགས་པའི་བདག་པོ་ལྷ་བདག་གཙོ། །ཐབས་ལ་མཁས་པའི་ཐུགས་རྗེ་ཅན། །བདག་ཅག་ཐེ་ཚོམ་གྱུར་པ་རྣམས། །ངེས་པ་བསྐྱེད་ཕྱིར་བཤད་པར་འཚལ། །ལྔ་བརྒྱ་དུས་ཀྱི་སྙིགས་མ་ལ། །བསྟན་པ་ཉམས་པའི་དུས་འབྱུང་སྟེ། །གདུག་བྱེད་སྦྱོར་བ་བཟློག་པ་དང་། །དམ་ཚིག་ནང་རྨེའི་རྨེ་ཐབས་ལ། །བསྲུང་དང་བཟློག་དང་གནན་པ་དང་། །གདུལ་ཞིང་བསད་པའི་འཕྲིན་ལས་རྣམས། །མཆོད་རྟེནནག་པོའི་རྒྱུད་དག་ལས། །པྲ་ཁྲིད་མན་ངག་བཤད་དུ་གསོལ། །ཞེས་ཞུས་སོ། །སྟོན་པ་ན་ར་གིར་ཏི་དེས། བསྡམས་པ་གནང་བའི་བརྡ་ཅིག་མཛད་ནས། འདི་སྐད་ཅེས་གསུངས་སོ། །དྲེགས་པའི་ཚོགས་རྣམས་བདག་ལ་ཉོན། །ལྔ་བརྒྱ་ཐ་མའི་དུས་དག་ཏུ། །དམ་ཚིག་ཉམས་པ་མང་པ་ཡིས། །རྡོ་རྗེ་ནང་རྨེ་བྱེད་པའི་ཚེ། །ལྟ་བ་ཟབ་མོའི་གདེང་སྟེངས་སུ། །འདུས་པའི་ལུང་གིས་རྒྱབ་རྟེན་བྱ། །མཆོད་རྟེན་ནག་པོ་གཏན་ལ་དབབ། །གསང་བ་གསུམ་གྱིས་ཉམས་སུ་བླངས། །སྦྱོར་བ་གསུམ་གྱིས་ཁ་ཡང་བསྐང་། །ཐ་མར་གསང་བའི་རྒྱ་ཡིས་གདབ། །ལག་ཏུ་བླང་བའི་པྲ་ཁྲིད་ནི། །བཞི་གཅིག་ལྷ་སྟེ་བཞི་གཉིས་ཕུར། །བཞི་གསུམ་སྒོ་སྟེ་བཞི་བཞི་ཕྱོགས། །བཞི་ལྔ་དུས་ཏེ་བཞི་དྲུག་རྫས། །བཞི་བདུན་གཟུངས་ཐག་བཞི་བརྒྱད་སྔགས། །ཡང་བཞི་ཕྱག་རྒྱ་རྣམ་པ་བཞི། །བསྐྱར་ཏེ་སྤྲུལ་པ་རྣམ་པ་བཞི་ཞེས་པ། །བཞི་བརྒྱད་སུམ་ཅུ་རྩ་གཉིས་དང་། །ཡང་བརྒྱད་བཞི་བཅུ་ཐམ་པ་ཡིས། །མཆོད་རྟེན་ནག་པོ་གཏན་ལ་དབབ། །ཅེས་གསུངས་སོ། །དེ་ནས་ཡང་འཁོར་གྱི་གཙོ་བོ་གཙུག་གུ་ནག་གུས་འདི་སྐད་ཅེས་གསོལ་ལོ། །ཨེ་མ་ཧོ། དྲེགས་པ་བདག་པོ་ཐབས་ལ་མཁས། ལྷ་རྣམ་པ་བཞི་གང་ལགས། ཕུར་པ་རྣམ་པ་བཞི་གང་ལགས། སྒོ་རྣམ་པ་བཞི་གང་ལགས། ཕྱོགས་རྣམ་པ་བཞི་གང་ལགས། དུས་རྣམ་པ་བཞི་གང་ལགས། རྫས་རྣམ་པ་བཞི་གང་ལགས།གཟུངས་ཐག་རྣམ་པ་བཞི་གང་ལགས། སྔགས་རྣམ་པ་བཞི་གང་ལགས། ཕྱག་རྒྱ་རྣམ་པ་བཞི་གང་ལགས། སྤྲུལ་པ་རྣམ་པ་བཞི་གང་ལགས། ཞེས་རྩ་བ་བཞི་བཅུ་ཐམ་པ་ཞུས་སོ། །དྲེགས་པའི་བདག་པོས་བཀའ་སྩལ་བ། །གདུག་བྱེད་ལོག་ལྟ་འདུལ་བའི་ཕྱིར། །རྩ་བ་བཞི་བཅུ་ཉམས་སུ་བླང་། །དང་པོ་གཟི་བྱིན་བསྐྱེད་པའི་ལྷ། །གཉིས་པ་རྩ་བའི་དཀྱིལ་འཁོར་ལ། །གསུམ་པ་འདུ་བྱེད་ལས་ཀྱི་ལྷ། །བཞི་པ་གཟུ་དང་དཔང་གི་ལྷ། །ཕུར་པ་བཞི་ཞེས་བྱ་བ་ནི། །བསྲང་འིང་བཟློག་པའི་ཕུར་པ་དང་། འཛིན་པ་སྲོག་གི་ཕུར་པ་དང་། །བདུད་དུ་དབབ་པའི་ཕུར་པ་དང་། །བསད་པ་ལས་ཀྱི་ཕུར་པའོ། །སྒོ་བཞི་ཞེས་པ་ཕྱོགས་བཞིར་རོ། །ཕྱོགས་ནི་ཤར་དང་ནུབ་དང་ལྷོ། །དུས་ནི་སྲོད་དང་ནམ་གུང་དང་། །ཐོ་རངས་ཉི་མ་གུང་དུས་སུ། །རྫས་ནི་བསྲུང་བཟློག་གནན་བསད་བཞི། །གཟུངས་ཐག་དཀར་སྔོ་དམར་ནག་གོ །སྔགས་ནི་བསྙེན་པ་ཉེ་བསྙེན་དང་། །བསྒྲུབ་དང་བསྒྲུབ་པ་ཆེན་པོའོ། །ཕྱག་རྒྱ་བཞི་དང་སྤྲུལ་པ་ནི། །བསྲུང་བཟློག་གནན་བསད་རྣམ་བཞིའོ། །སྦྱོར་བ་ཆེན་པོ་ཚང་བས་ནི། །ཇི་ལྟར་བསམས་པའི་དོན་རྣམས་འགྲུབ། །ཅེས་གསུངས་སོ། །མཆོད་རྟེན་ནག་པོའི་རྒྱུད་ལས། རྩ་བ་བཞི་བཅུ་ཐམ་པ་བསྟན་པ་སྟེ། པྲ་ཁྲིད་དང་པོའོ།། །།དྲེགས་པའི་བདག་པོ་ན་ར་གི་རྟི་ལ། །ཙུ་གུ་ན་གུས་ཡང་ཞུསླ་པ། །དྲེགས་པའི་བདག་པོ་ལྷ་བདག་གཙོ། །ལྷ་བཞིའིསྒོམ་ཐབས་ཇི་ལྟར་སྒོམ། །ཕུར་པ་བཞི་པོ་གང་ལ་བགྱིད། །སྒོ་བཞིའི་གདོད་ཐབས་ཇི་ལྟརགདོད། །དུས་བཞིའི་ལས་རྣམས་ཇི་ལྟར་བྱ། །རྫས་བཞི་ཇི་ལྟར་དགོད་ཅིང་བསག །གཟུངས་ཐག་བཞི་པོ་ཇི་ལྟར་བསྒྲིལ། །སྔགས་བཞི་བཟླས་ཐབས་ཇི་ལྟར་བཟླས། །ཕྱག་རྒྱ་བཞི་པོ་ཇི་ལྟར་བསྒྱུར། །སྤྲུལ་པ་བཞི་པོ་ཇི་ལྟར་བགྱེད། །དྲེགས་བདག་ཆེན་པོས་བཀའ་སྩལ་འཚལ། །ཞེས་ལན་གཉིས་སུ་བསྐོར་ཏེ་ཞུསླ་སོ། །དྲེགས་བདག་ཆེན་པོས་བཀའ་སྩལ་པ། །ལྷ་བཞིའི་སྒོམ་ཐབས་འདི་ལྟར་སྒོམ། །གཟི་བྱིན་བསྐྱེད་པའི་ལྷ་ཞེས་པ། །བྱིན་གྱིས་རློབ་པའི་ལྷ་གསུམ་ནི། །མཆོད་རྟེན་རྟོག་ལ་བསྒོམ་པར་བྱ། །བཙོ་མ་གསེར་གྱི་ཁ་དོག་ལ། །དར་དང་རིན་ཆེན་སྣ་ཚོགས་བརྒྱན། །རལ་གྲི་ཨུཏཱའ་་བསྣམས་པ་ནི། །ཨོ་ལས་བསྐྱེད་པ་སྐུ་ཡི་ལྷ། །དཀར་འཚེར་རྒྱན་དང་ན་བཟར་ལྡན། །པདྨ་མཆོད་སྒྱིན་བསྣམས་པ་ནི། །ཨུ༷༷ལས་བསྐྱེད་པ་གསུང་གི་ལྷ། །ལྗང་སྔོན་ནི་ལའི་མདོག་འདྲ་བ། །རྒྱན་དང་ན་བཟའ་སྣ་ཚོགས་ལྡན། །རྡོ་རྗེ་དྲིལ་བུ་བསྣམས་པ་ནི། །ཧུ༷་ལས་བསྐྱེད་པ་ཐུགས་ཀྱི་ལྷ། །དབང་བསྐུར་བ་ཡི་ལྷ་ལྔ་ནི། །གསེར་བཅོའི་མདོག་འདྲ་བྱང་ཆུབ་བརྒྱ། །འཁོར་ལོ་དང་ལྡན་སྤྱན་དང་བཅས། །ཨོ་ལས་བསྐྱེད་པ་ཆོས་དབྱིངས་སོ། །དཀར་བའི་མདོགས་ལས་ས་ནོན་ཅན། །རྡོ་རྗེ་ལྡན་པ་མ་ཀྱིར་བཅས། །ཧུ༷་ལས་བསྐྱེད་པ་མེ་ལོང་ངོས། །སྔོན་པོ་མཆོད་སྦྱིན་རྒྱན་དང་ལྡན། །རིན་ཆེན་སངས་རྒྱས་སྤྱན་དང་བཅས། །ཏྲ༷་ལས་བསྐྱེད་པ་མཉམ་ཉིད་དོ། །དམར་བ་མཉམ་གཞག་རྒྱ་ཅན་ཏེ། །པདྨར་ལྡན་པ་ན་བཟའ་ཅན། །ཧྲི་ལས་བསྐྱེད་པ་སོ་སོར་རྟོག །ལྗང་བུ་སྐྱབས་སྤྱིན་རྒྱ་ཅན་ཏེ། །རྒྱ་གྲམ་ལན་པ་སྒྲོལ་མར་བཅས། །ཨ་ལས་བསྐྱེད་པ་བྱ་གྲུབ་བོ། །ཡུམ་ལྔ་ཕྱག་ན་བུམ་པ་བསྣམས་དང་བཅས་སྒོམ། །གཉིས་པ་རྩ་བའི་ལྷ་ཞེས་པ། །ཡསྒ་ཆེ་མཆོག་སྤྱི་ཡི་ལྷ། །བུམ་པ་གཞལ་ཡས་ཁང་དུ་སྒོམ། །སྤྲུལ་པ་ལས་ཀྱི་ལྷ་གསུམ་ནི། །གཤིན་རྗེ་ནག་པོ་ཁྲོས་པ་ལ། །ཞིང་དབྱུག་དང་ནི་ཐོད་པ་འཆང་། །སྦྲུལ་དང་ཐོད་པ་དུར་ཁྲོད་བརྒྱན། །མ་ཧེའི་གདན་ལ་བརྐྱང་བསྐུམ་ཚུལ། །འཁོར་དུ་ཡི་དྭགས་བྱེ་བ་འབུམ། །སྔགས་བསྲུང་ནག་མོ་ཁྲོས་པ་ལ། །ཙིསྟེ་དང་ནི་སྤྲུལ་པ་རྣམས། །ཐོད་པ་ཞིང་དང་གླང་ཆེན་བརྒྱན། །རོ་ཡི་གདན་ལ་བརྐྱང་བསྐུམ་ཚུལ། །འཁོར་དུ་མ་མོ་བྱེ་བ་འབུམ། ཁྱུང་ཆེན་ནག་པོ་གནམ་ལྕགས་ལས། །རིན་ཆེན་འབར་བ་གཙུག་ན་བརྒྱན། །ཕྱག་གིས་རྡོ་རྗེ་འབར་བ་གདུག་པ་འཛིན། །ཞབས་ཀྱིས་གདུག་པ་མནན་ཞིང་ཟ། །འཁོར་དུ་ཀླུ་གཉན་བྱེ་བ་འབུམ། །ཕུར་པ་གསུམ་ལ་བསྒོམ་པར་བྱ། །གཟུ་དང་དཔང་གི་ལྷ་ཞེས་པ། །ཕྱོགས་བཅུ་དུས་གསུམ་སངས་རྒྱས་རྣམས། །ཨ་ལས་བསྐྱེད་པ་དང་པོར་རོ། །དེ་ཡི་ཕྱི་རིམ་བྱང་ཆུབ་སེམས། ཁུ་དང་འབྲས་བུར་བཅས་པ་རྣམས། །འདི་ལས་བསྐྱེད་པ་དྲངས་མེད་པའོ། །དེ་ཡི་ཕྱི་རིམ་རང་སངས་རྒྱས། །ཡི་གེ་པྲ་ལས་བསྐྱེད་པར་བྱ། །ཕྱི་རིམ་ཉན་ཐོས་ཚོགས་བཅས་པ། །ཐུབ་དྲུག་ཉིད་ཀྱང་བ་ལས་སྒོམ། །དེ་ཡི་ཕྱི་རིམ་རྒྱལ་པོ་དང་། །ཕྱོགས་སྐྱོང་ལ་སོགས་ལྷ་སྲིན་ཚོགས། །ལེགས་ཉེས་བཏང་འབྱེད་སྣ་ཚོགས་སྒོམ། །དེ་ནི་གཞལ་ཡས་ནང་དུའོ། །ཕུར་པ་བཞི་པོ་འདི་ལྟར་བྱ། །བསྲུང་ཞིང་བཟློག་པའི་ཕུར་པ་ནི། ཁྲེད་ཤིང་སེང་ལྡེང་སྐྱེར་པའི་རྒྱུ། །སོར་བརྒྱད་གསུམ་ལ་རང་རང་བསྔགས། །བྲིས་ཏེ་དབང་བསྐུར་བྱས་ལ་གཟུགས། །འཛིན་པ་སྲོག་གི་ཕུར་པ་ནི། །ཚེར་ཅན་ཤིང་ལ་ཁྲུ་གང་ཚད། །དབུ་ལ་ཁྲོ་བོའི་ཞལ་གསུམ་དབྱུང་། །ཆུ་སྲིན་ཁ་ནས་དབལ་སྟན་པས། །ཉམས་པ་སྤྱིར་གཟིར་རང་སྲོག་འཛིན། །བདུད་དུ་དབབ་པའི་ཕུར་པ་ནི། །གདུག་པའི་ཕུར་བུ་སོར་བཞི་ལ། །སྔགས་བྲིས་ཁོ་ཡི་སྙིང་ཁར་གདབ། །བསད་པ་ལས་ཀྱི་ཕུར་པ་ནི། །སེང་ལྡེང་རྒྱུ་ལས་སོར་བཞི་པ། །ལྷོ་ཕྱོགས་སྒོ་རུ་འབྲུབ་ཁུང་གཟུགས། །སྒོ་བཞི་གདོད་ཐབས་འདི་ལྟར་གདོད། །མཆོད་རྟེན་རི་རབ་ཕྱོགས་བཞི་སྲ ཁྲར་སྒོ་དཀར་ལ་ཟླུམ་པར་བྱ། །བྱང་སྒོ་ལྗང་ལ་གྲུ་བཞིར་བྱ། །ནུབ་སྒོ་དམར་པོ་ཟླ་གམ་བྱ། །ལྷོར་ནི་སྔོན་པོ་གྲུ་གསུམ་མོ། །རེ་བཞིའི་ཚུལ་དུ་འབུར་དུ་གཏོད། །སྒོ་ལ་བཟློག་སྔགས་ཐམས་ཅད་བྲི། །དུས་བཞིའི་ལས་རྣམས་འདི་ལྟར་བྱ། །སྲོད་ལརངབཞིནབསྲུངབརབྱ། །ནམ་གུང་ཁོ་ཡི་རྦོད་གཏོང་བཟློག །གཏོར་དེ་བཟློག་དང་དྲིལ་ཏེ་བཟློག །གཏོར་བ་རང་གཤེད་ངོ་ཤེས་གཅེས། །དྲིལ་བ་ལྷ་སྲིན་ཐམས་ཅད་བཟློག །བཟློག་རྫས་རྣམས་ལ་སྔགས་ཤིང་བརྡེག །སྔགས་ཀྱིས་སྔགས་བཟློག་པ་ཞེས་བྱ། །ཐོ་རངས་ཁོ་ཉིད་གནན་པར་བྱ། །བླ་ཚེ་ལྷ་བསྲུངས་ཁོ་ཉིད་གནན། །དག་གནན་རང་གི་སྐབས་དང་སྦྱར། །ཉིན་གུང་ཁོ་ཉིད་གསད་པར་བྱ། །ཉུངས་ཀར་ལ་སོགས་ཐུན་བརྡེག་ཅིང་། །ཕུར་པ་གདབ་ཅིང་མཚོན་གྱིས་གདབ། །དྲག་པོར་བསྲེག་ཅིང་གནན་པར་བྱ། །ཕྱོགས་བཞིའི་སྐོར་ཐབས་འདི་ལྟར་བྱ། །ཕྱོགས་བཞིའི་ཤར་ནས་བྱང་དུ་བསྐོར་བར་བྱ། །བྱང་ནས་ནུབ་བསྐོར་ནུབ་ནས་ལྷོ། །བསྐོར་ཞི་ལས་བཞིའི་སྦྱོར་པ་བྱ། །དེ་ནི་ཕྱོགས་ཀྱི་ཕྱོགས་བཟློག་པའོ། །རྫས་བཞི་འདི་ལྟར་དགོད་ཅིང་བསག །བསྲུང་རྫས་སྐུ་དང་འཁོར་ཆོས་བཅས། །བུམ་པའི་ནང་དུ་དགོད་པར་བྱ། །ཕུར་པ་གསུམ་ནི་མགུལ་དུ་དགོད། །བཟློག་རྫས་ཕོ་རོག་འུག་པའི་མདའ། །སྣ་ཚོགས་ཁྲག་དང་ཉུངས་ཀར་དང་། ་་ས་ནག་གུ་གུལ་ལ་སོགས་པ། །སྒོ་བཞིའི་ཕྱི་རོལ་དགོད་པར་བྱ། །དེ་ནི་རྫས་ཀྱི་རྫས་བཟློག་པའོ། །གནམ་རྫས་ལ་ཆའི་སྦལ་པ་དང་། ཁོ་ཡི་ལིང་ག་བཅས་པ་རྣམས། །འབྲུབ་ཁུང་ནང་དུ་གཞུག་པར་བྱ། །བསད་རྫས་ཉུངས་ཀར་ཉུངས་ནག་ལ། །སྐེ་ཚེ་བྲ་བོ་ཚ་བའི་རྫས། །ཏིལ་དང་ཚེར་མདའ་གཞུ་དང་ཕུར། །རང་གི་གཡས་སུ་དགོད་ཅིང་བདག །གཟུངས་ཐག་བཞི་པོ་འདི་ལྟར་སྒྲིལ། །བསྲུང་བའི་གཟུངས་ཐག་དཀར་པོ་ལ། །མ་ལོག་མ་འཆུས་སྙོམས་པར་བསྒྲིལ། །སྐུ་ཡི་ཐུགས་ཁར་རང་གི་ལག །བདག་ཉིད་དམ་ཚིག་སེམས་དཔའ་དང་། །ལྷ་ཉིད་ཡེ་ཤེས་སེམས་དཔའ་གཉིས། །གཉིས་སུ་མེད་པར་བྱ་བའི་ཕྱིར། །འོད་ཟེར་འཕྲེང་བའི་འཕྲོ་འདུ་བྱ། །བཟློག་པའི་གཟུངས་ཐག་སྔོན་པོ་ལས། །ལོག་པར་བསྒྲིལ་ཏེ་འཁོར་ལོ་ལ། །བཏག་པ་རང་གི་ལག་གིས་བཟུང་། །གནན་པའི་གཟུངས་ཐག་དམར་པོ་ལ། །ལོག་དང་མ་ལོག་གཉིས་སུ་བསྒྲིལ། །ལིང་ཁའི་ལྕེ་ལ་བཏགས་ཏེ་བཟུང་། །བསད་པའི་གཟུངས་ཐག་ནག་པོ་ལ། །ལིང་གའི་སྙིང་གར་བཏགས་ཏེ་བཟུང་། །བུམ་པའི་འོག་ཏུ་ཕྱོགས་བཞིར་བཏགས། །སྔགས་བཞིའི་བཟླས་ཐབས་འདི་ལྟར་བཟླས། །དང་པོ་ཡི་དམ་ལྷ་བསྙེན་བྱ། །ཉེ་བསྙེན་འདུས་པ་གསུམ་གྱིས་བྱ། །སྒྲུབ་པ་སྲོག་འདུས་གསུམ་པོས་བྱ། །དེས་ནི་རྟགས་དང་བསྟུན་ཏེ་བྱ། །དེ་ནས་རྫས་ཀྱི་བཟློག་ཐབས་བཅའ། །སྒྲུབ་པ་ཆེན་པོ་སྔགས་དག་ནི། །སྲོད་ལ་བསྲུང་སྔགས་བཟླས་དུས་སུ། །དགེ་འདུན་གྲོ་ལ་འདུས་པ་ལྟར། །དལ་ཞིང་ལྷ་ཚོགས་འདུ་བར་བཟླས། །ནམ་གུང་བཟློག་སྔགས་བཟླས་དུས་སུ། །མཁའ་ཡི་རླུད་ནག་འཚུབ་པར་ལྟར། །དྲག་ཅིང་གདེངས་དང་བཅས་པས་བཟླས། །ཐོ་རངས་གནན་སྔགས་བཟླས་པའི་དུས། ཁྲ་སྤྱང་གཅན་ལ་བཅུམ་པ་ལྟར། །གདངས་ཆུང་མྱུར་བར་བྱ། །གུང་ལ་བསད་སྔགས་བཟླས་དུས་སུ། །མགར་གྱི་ཚ་ཚ་འཕྲོ་བ་ལྟར། གཙུབ་ཅིང་ཐུང་བར་བཟླས་པར་བྱ། །ཕྱག་རྒྱ་བཞི་པོ་འདི་ལྟར་བསྒྱུར། །བསྲུང་བ་རང་ལྷའི་ཕྱག་རྒྱ་འདི། །ཀ་ནིའི་ཕྱོགས་སུ་བསྟན་ཅིང་བསྒྱུར། །བཟློག་པ་རླུང་ཚུབ་ཕྱག་རྒྱ་ནི། །དམིགས་པའི་ཕྱོགས་སུ་བསྟན་ཅིང་བསྒྱུར། །གནན་པའི་རྒྱ་གྲམ་ཕྱག་རྒྱ་ནི། །རི་རབ་རྨད་དུ་བསྟན་ཏེ་བསྒྱུར། །བསད་པ་མཚོན་པའི་ཕྱག་རྒྱ་ནི། །འབྲུབ་ཁུང་ནང་དུ་བསྟན་ཏེ་བསྒྱུར། །སྤྲུལ་པ་བཞི་ནི་འདི་ལྟར་དགེ །བསྲུང་བའི་སྤྲུལ་པ་གསུམ་པོ་ནི། །བྱིན་རློན་ལྷ་དང་སྤྲུལ་པ་དངོས། །དེ་ལ་གྲངས་མེད་སྤྲུལ་ཞིང་བསྲུང་། །བཟློག་པའི་སྤྲུལ་པ་རང་རང་བཟློག །དྲིལ་བ་གཟུངས་སྣ་ཚོགས་པ་ལ། །མཚོན་ཆ་སྣ་ཚོགས་ཐོགས་པར་སྤྲུལ། །གནན་པའི་སྤྲུལ་པ་རི་རབ་དང་། །དུམ་རི་ལ་སོགས་སྤྲུལ་ཞིང་གནན། །བསད་པའི་སྤྲུལ་པ་མཚོན་དུག་ནད། །ཕོ་ཉའི་ཚོགས་ནི་བྱེ་བ་འབུམ། །སྤྲུལ་ཏེ་གསད་པའི་ལས་ལ་སྦྱར། །ཐབས་ཀྱིས་ཐབས་བཟློག་བསྟན་པ་ནི། །སྦྱོར་བ་ནག་པོ་བཅས་པས་སོ། ཁོ་ཡི་ཏིང་འཛིན་གྱིས་བྱས་པ་ནི། །བདག་གི་ཏིང་འཛིན་གྱིས་བཟློག་པ། །ཆོས་སྐུ་ནག་པོ་འོད་འབར་བའོ། །སྦྱོར་བ་འདི་དང་ལྡན་པ་ནི། །ལྷ་དབང་ཉིད་ཀྱང་བརླག་པར་འགྱུར། །ཅེས་གསུངས་སོ། །མཆོད་རྟེན་ནག་པོའི་རྒྱུད་ལས། ཐབས་བཞི་བཅུ་བསྟན་པ་སྟེ། པྲ་ཁྲིད་དབུ་མའོ།། །།སྟོན་པ་ན་ར་གིར་ཏི་ལ། སྤྲུལ་པ་ཙུ་གུ་ན་གུ་ཡིས། །སྔ་མ་ལ་ཡང་ལན་གསུམ་དུ་བསྐྱར་ཏེ་ཞུས་པ་འདི་ལྟར་རོ། །ཨེ་མ་ཧོ། །དྲེགས་པའི་བདག་པོ་ལྷ་བདག་གཙོ། །ཀ་ནི་ནག་པོ་ཆེན་པོ་འདི། །ཕྱི་ནང་དམིགས་པ་ཇི་ལྟར་བཅའ། །ལྷ་བཞི་དགོས་ཆེད་ཇི་ལྟར་ལགས། །ཕུར་པ་བཞི་ཡི་དགོས་ཆེད་ཇི་ལྟར་ལགས། །སྒོ་བཞིའི་དགོས་ཆེད་ཇི་ལྟར་ལགས། །ཕྱོགས་བཞིའི་དགོས་ཆེད་ཇི་ལྟར་ལགས། །དུས་བཞིའི་དགོས་ཆེད་ཇི་ལྟར་ལགས། །རྫས་བཞིའི་དགོས་ཆེད་ཇི་ལྟར་ལགས། །གཟུངས་ཐག་བཞི་ཡི་དགོས་ཆེད་ཇི་ལྟར་ལགས། །སྔགས་བཞིའི་དགོས་ཆེད་ཇི་ལྟར་ལགས། །ཕྱག་རྒྱ་བཞི་ཡི་དགོས་ཆེད་ཇི་ལྟར་ལགས། །སྤྲུལ་པ་བཞི་ཡི་དགོས་ཆེད་ཇི་ལྟར་ལགས། །ཞེས་ལན་གསུམ་བསྐྱར་ཏེ་ཞུས་སོ། །དྲེགས་བདག་ཆེན་པོས་བཀའ་སྩལ་བ། །ཀ་ཁེ་ནག་པོའི་མཆོད་རྟེན་ནག་པོ་འདི། །ཕྱི་ནང་དམིགས་པ་འདི་ལྟར་བཅའ། །ཕྱི་ཡི་བང་རིམ་བཞི་པ་ལ། །རིན་ཆེན་སྣ་བཞི་ལས་གྲུབ་པ། ཁྲར་ཕྱོགས་གངས་ག་དཀར་པོ། །ལྷོ་ནི་བི་སྐྲུརླ་སྔོན་པོ། །ནུབ་ཕྱོགས་པདྨ་ར་ག་དམར། །བྱང་ཕྱོགས་ཨིནྟྲ་ནི་ལ་ལྗང་། །ནང་གི་གཞལ་ཡས་ཁང་དུ་དམིགས། །འོག་ནི་མུན་དོང་ནག་པོ་ལ། །འཁོར་ལོ་མཚོན་ཆའི་འཁོར་ལོའོ། ཁོ་ནི་དངོས་སུ་བྱད་ཀྱིས་བཅིངས། །རང་ནི་སྐུ་དང་ཡེ་ཤེས་ལྡན། །ཡེ་ཤེས་མེ་དཔུང་ཀློང་དཀྱིལ་ན། །འཁོར་དུ་དྲག་པོ་འདུས་པས་བསྐོར། །བསྲུང་བ་གོ་ཆ་སྣ་ཚོགས་སོ། །ལྷ་བཞིའི་དགོས་ཆེན་འདི་ལྟར་ཡིན། །སྐུ་གསུང་ཐུགས་དང་ཡེ་ཤེས་ལྔ། །བྱིན་གྱིས་བརླབས་དང་དབང་བསྐུར་བྱ། །གཟི་བྱིན་བསྐྱེད་པའི་དགོས་ཆེད་དོ། །བདག་ཉིད་བསྲུང་བར་བྱ་བའི་ཕྱིར། །རང་གི་འདོད་ལྷའི་ཏིང་འཛིན་ནོ། །ལས་ཀྱི་ལྷ་གསུམ་དགོས་ཆེད་ནི། །གཤིན་རྗེ་ཕོ་རྒྱུད་བསྲུང་ཞིང་བཟློག །མ་མོ་མོ་རྒྱུད་བསྲུང་ཞིང་བཟློག ཁྱུང་ཆེན་ཀླུ་དང་ས་བདག་གོ །ལས་རྣམས་མྱུར་དུ་བསྒྲུབ་བྱའི་ཕྱིར། །གཟུ་དཔའ་ལྷ་རྣམས་བསྒོམ་བར་བྱ། །ཕུར་བ་བཞི་ཡིས་དགོས་ཆེད་དོ། །རང་འིང་བསྲུང་ཞིང་སྦོད་གཏོང་བཟློག །དེ་ཕྱིར་ཕུར་པ་གསུམ་པོ་དགོས། །ཉམས་པ་གཟིར་ཅིང་རང་སྲོག་འཛིན། །དེ་ཕྱིར་ཡི་དམ་ཕུར་པ་དགོས། ཁོ་ཉིད་ལྕེབས་ཏེ་གསད་པའི་ཕྱིར། །བདུད་དུ་དབབ་པའི་ཕུར་པ་དགོས། །ལས་ལ་ཐེ་ཚོམ་མེད་པའི་ཕྱིར། །ལས་ཀྱི་ཕུར་པ་དགོས་ཆེད་ཆེ། །སྒོ་བཞི་པོ་ལ་བརྟེན་ནས་ནི། །བསྲུང་བཟློག་གནན་བསད་དགོས་ཆེད་ཆེ། ཁྲར་ནས་རང་ཉིད་བསྲུང་བ་དང་། །བྱང་ནས་ཁོ་ཡི་སྦོད་གཏོང་བཟློག །ནུབ་ནས་ཁོ་ཡིས་བླ་ཚེ་གནན། །ལྷོ་ནས་གསད་ཕྱིར་ཕྱོགས་བཞིར་དགོས། །དུས་བཞིའི་དགོས་ཆེད་འདི་ལྟར་ཡིན། །སྲོད་ནི་ཞི་བའི་དུས་ཡིན་པས། །བདག་ཉིད་བགྲུང་བའི་དགོས་ཆེད་དང་། །གུང་ལ་ལྷ་སྲིན་རྒྱུ་དུས་ཏེ། །རྦོད་གཏོང་བཟློག་པའི་དགོས་ཆེད་དང་། །ཐོ་རངས་བླ་མོ་འ་་དུས་སུ། །བླ་ཚེ་ནུས་པ་སྤྲུལ་བྱས་གནན། །ཉིན་གུང་ཚེ་སྲོག་ཉམས་དུས་སུ། ཁོ་ཉིད་བསད་པའི་དགོས་ཆེད་ཆེ། །རྫས་བཞི་པོ་ཡི་དགོས་ཆེད་ནི། །བསྲུང་བའི་རྫས་ལ་རྟེན་ཏེ་བསྲུང་། །བཟློག་པའི་རྫས་ལ་རྟེན་ཏེ་བཟློག །གནན་པའི་རྫས་ལ་རྟེན་ཏེ་གནན། །བསད་པའི་རྫས་ལ་རྟེན་ཏེ་བསད། །གཟུངས་ཐག་བཞི་ཡི་དགོས་ཆེད་ནི། །ལས་བཞིའི་སྤྲུལ་པ་ཏིང་འཛིན་རྣམས། །མི་ཡེངས་ཕྱིར་ན་གཟུངས་ཐག་གདགས། །སྔགས་བཞིའི་དགོས་པའི་འདི་ལྟར་ཡིན། །རང་གི་དམ་ཚིག་གསོ་ཕྱིར་བསྙེན། །ལྷ་གསུམ་ནུས་པ་བསྐྱེད་པའི་ཕྱིར། །ཉེ་བའི་བསྙེན་པ་བྱ་བའི་ཕྱིར། །ལས་རྣམ་་་མི་འགྲུབ་མེད་པའི་ཕྱིར། །སྒྲུབ་པའི་སྔགས་ཀྱི་ལྷ་རྣམས་འགྲུབ། །སྒྲུབ་པ་ཆེན་པོའི་སྔགས་རྣམས་ནི། །བསྲུང་བཟློག་གནན་བསད་རྣམ་བཞི་སྟེ། །བསྲུང་བའི་སྔགས་ཀྱིས་བདབ་འིད་དོ། །བཟློག་པའི་སྔགས་ཀྱིས་སྦོད་གཏོང་བཟློག །གནན་པའི་སྔགས་ཀྱིས་ཁོ་ཉིད་གནན། །བསད་པའི་སྔགས་ཀྱིས་ཁོ་ཉིད་བསད། །བསྲུང་བཟློག་གནན་བསད་བསྒྲུབ་བྱའི་ཕྱིར། །ཕྱག་རྒྱ་བསྒྱུར་ཞིང་སྤྲུལ་པ་དགེ །ཕོ་ཉ་བཏང་ཞིང་བསྲུང་མ་བསྐུལ། །མ་ཉེས་གསོལ་ཞིང་ཉེས་པ་བགྲང་། །དེ་ལ་དམ་བརྡར་གསེར་སྐྱེམས་རྟག །མཐུན་པའི་རྫས་སྦྱིན་དམ་ཚིག་བསྟན། །ཅེས་གསུངས་སོ། །དེ་ནས་ཡང་བཟློག་སྔགས་བཅུ་དགུ་པ་འདི་གསུངས་སོ། །ཨོ་ཀ་རུ་ན་ཙ་ལེ་ཙ་ལེ་བཟློག །ནཱ་ག་དུན་བཟློག །ས་ག་དུན་བཟློག །ཛ་དུར་ཏིང་ན་བཟློག །མ་མོ་རྭ་ཛ་ཡ༷་བཟློག །ཀྟན་ཏྲག་རསྒ་མ་བཟློག །རསྒ་རེ་མ་ཏི་བཟློག ཁྲ་ན་མུ་རུ་ས་མ་ཡ་བཟློག །ཨེ་ཀ་དུ་ན་བཟློག །སུམ་ཏྲི་རྭ་ཛ་ཡ་བཟློག །རག་མོ་གླད་ཏྲི་ཙ་པ་ལ། རྭ་ཛ་ཡ་བཟློག །ཨོ་ཨ་ཀྲོ་ཏེ་ཀ་ཤི་མཉུ་ས་མ་ཏ་ཀ་ཡ་བཟློག །ཡ༷་ཏ་སྒྱུར། ཐེད་ཁྲེལ། བ་ལ་དི་ལི་བཟློག །ར་ཛ་དུར་ན་བཟློག །མ་ཤ་དུར་ན་བཟློག །རསྒ་ཏྲི་བོར་དུར་ན་བཟློག །སི་ངང་ཙ་དུར་ཙ་ཡ་བཟློག །སརྦ་དུ་་པ་ཙ་ནི། ཏ་ཀ་ར་ཙ་ཐེད། ཁྲོས་པ་ལ་ཐི་ལི་བཟློག །བཟློག་ཅིང་བསད་པ་འདི་གསུངས་སོ། །ཏོ་མ་རི་ཤ་ཤ་སྒག་ཐུན་སྦྱོ། ཨེ་ཀ་པ་ར་ན་ཧྲིད་ཧྲིད། དུག་ཁ་ཚེ་དུག་ཁ་ཚེ་སྨྱོ། ཨོ་ཨ་ཀྲོ་ཏེ་ཀ་ཤི་མསྨུ ཡ་མན་ཏ་ཀ་ཧ་ན་ཧ་ན་ཧུ༷། ཡ་ཡ་བྲ་བྲ་མ་ར་ཏི་ཀ་ལ་རྭ་པ་ཤ་རྦད་ཕྱེ་ནི་སྨྱོ། ཞེས་པ་བཟློག་སྔགས་སོ། །དེ་ནས་བསད་པའི་སྔགས་འདི་གསུངས་སོ། །ཉུངས་ཀར་དང་ཉུངས་ནག་གིས་བརྡེག་གོ །ཨ་ཀྲོ་རྭ་ཛ་དུར་ན་ས་དུར་སྙིང་ལ་ཕྲིལ་ཕྲིལ། ཨ་ཏོ་རྭ་ཛ་ཙིསྟ་སྙི་ཤ་ཤ་ལ་རྦད་རྦད། ཡ་ཡ་རྣམ་མ་ཏྲི་ཛ་སྙིང་ལ་ཁ་ཐུན་མ་ར་ཡ་རྦད། རག་མོ་ནི་རག་མོ་ནི་ཁ་ལོང་ཙིརྟི་རྦད་རྦད། དུག་ནི་དུག་ནི་རྣི་ཁ་ལོང་ཙིསྟ་རྦད་རྦད། ཁྱི་ཁ་ལོང་ཁྱི་ཁ་ལོང་ཙིསྟ་རྦད་རྦད། རྩ་ཏི་ཙ་ཏི་ཙིསྟ་རྦད་རྦད། ནིར་ཏི་ནིར་ཏི། ཙ་ཏི་མུགས་མུགས། ཐུམས་ཐུམས་སུབས་ཏི་ཏ་ཙིསྟ་རྦད་རྦད། སྙིང་ཁ་འདར་ཡེང་ཡེད་ཐུམས་ཐུམས་རྦད་རྦད། སེ་ཁ་ལོ། མུ་ཁ་ལོང་རྦད་རྦད། གྲྭཧྭ། བསད་པའི་རྗེས་ཀྱིས་བརྡེག་པར་བྱ། དེ་ནས་བགྲུང་པ་ནི།མཐུ་སྟོབས་ཀྱི་བདག་པོ་དཔལ་ཕྱག་ན་རྡོ་རྗེ་བྱ་ཁྱུང་དུ་སྤྲུལ་པའི་སྔགས་དང་། མཁྱེན་རབས་ཀྱི་བདག་པོ་འཕགས་པ་འཇམ་དཔལ་གཤིན་རྗེར་སྤྲུལ་པའི་སྔགས་དང་ཐུགས་རྗེའི་བདག་པོ་འཕགས་པ་སྤྱན་རས་གཟིགས་དབང་ཕྱུག་མ་མོར་སྤྲུལ་པའི་སྔགས་དང་གསུམ་མོ། །ཨོ་ཀ་རུ་ན་ཙ་ལེ་ཙ་ལེ་ཧུ༷་ཕཊ། ཏ་ཀི་ཙི་ཏི་བྱི་ཙ་ཏེ་ཧུ་ཡ་ཧུ་ཡ་ཧུ་ལུ་སུ་རུ་སྟེ་སུ་རུ་སྟེ་གྲྭཧྭ། ཨོ་ཡ་མན་ཏ་ཀ་ཨེ་ཀ་པ་ར་ཧུ༷་ཕཊ། ཨེ་ཏེ་བྲེ་ཏ་ཡ་རས་ནན།བྲ་ཏོ་ད་རསྒ་ནན། ཨོ་ཡ་སྟེ་ཤེ །རུ་བེ་ཤ་ཀ་ཐུན་སྨྱོ། ཏ་ལ་ཏ་པ་ལི། མུ་ལིང་དུ་རུ་དུ་རུ་ཧུ༷་ཕཊ། ཀར་མ་ཙནྟྲ་མུ་ཏི་མུ་རུ་ཏི་དུ་རུ་དུ་རུ་ཧུ༷་ཕཊ། རསྒ་མུ་རུ་མུ་རུ་ཧུ༷་སྨྱོ་ཧུ༷། ཨེ་ཀ་ཛུ་ཞི་ཙ་པ་ལ་མི་ཤ་དགྲ་བོ་ལ་ཕཊ། ནག་མོ་རེ་མ་ཏི། པདྨ་རེ་མ་ཏི། ར་ཏི་རུ་ཏི་རེ་མ་ཏི། ཧ་བད་སྨྱོ། དེ་ནས་གནན་པའི་སྔགས་འདི་གསུངས་སོ། །དུ་ན་ནན། ས་དུ་ནན། སྙིང་དུ་ནན། ཧྲི་དུ་ནན། ཁ་ཤ་ཐུན་རྦད། ཙིསྟ་ནི་ཤ་ཀུ་ལུ་རྦད། མོ་ཧ་ནི་ཤ་ལ་དུན་དུན། ཁྲག་ལ་ཧུབ་ཧུབ། དུན་ཁྱེར་སྨྱོ་བྲི་ཛ་ཛ། ཨོ་ཧུ༷་ཨ་ཏྲི་མ་རི་ཤ་ཤ་ཏྲག་ཐུན། ཙིསྟ་མྱ་ར་ཡ་ཐུན་ཤོ་མ་རི་རསྒ་ཁ་ཧུ༷་ནན། ཙ་དྷ་རི་ཤ་མ་བ་རི་ཁྲག་ལ་དུན་དུན་དྲི་ཤ་མ་ར་རྦད། གནན་ཅིང་བསད་པའི་སྔགས་སོ། །མཆོད་རྟེན་ནག་པོའི་རྒྱུད་ལས། དགོས་ཆེད་བཞི་བཅུ་ཐམ་པ་སྔགས་དང་བཅས་པ་བསྟན་པ་སྟེ་པྲ་ཁྲིད་ཐ་མའོ།། །།དེ་ནས་འཁོར་རྣམས་ལ་གདམས་པ། དྲག་པོ་གདུག་པ་འདུལ་བ་ཡི། །མན་ངག་གསང་བའི་རྒྱུད་གསུངས་པ། །དཀྱིལ་འཁོར་བཅའ་དང་གསད་པའི་ཐབས། །ལག་ཏུ་བླང་བའི་སྙིང་གཟེར་གསང་། །མཆོད་རྟེན་བཅའ་བའི་རྩེ་མོ་གསང་། །ལག་ཏུ་བླང་བའི་པྲ་ཁྲིད་གསང་། །གཞན་ལ་བསྟན་པར་མི་བྱ་སྟེ། །ལྕགས་སྒྲོག་བུའི་སེམས་ཀྱིས་བསྡམ། །ཞེས་གསུངས་ཏེ། འཁོར་རྣམས་ཀྱང་རྗེས་སུ་ཡི་རང་ངོ་། །ལག་ཏུ་བླང་བའི་མན་ངག །པྲ་ཁྲིད་རྣམ་པ་གསུམ་དུ་མཐར་ག་ས་པའོ། །རྫོགས་སོ།། །།བདག་འདྲ་བན་ཆུང་སངས་རྒྱས་ཀྱིས། །གུ་རུ་བ་སུ་དྷ་ར་ཡི། །རིན་ཆེན་ཐུགས་ཀྱི་ཀློང་བརྟོལ་ནས། །དུས་ངན་ཐ་མ་འབྱུང་བའི་དུས། །རྡོ་རྗེ་ནང་རྨེ་བྱུང་དོགས་ཏེ། །མན་ངག་སྙིང་པོ་དམ་པ་འདི། །ལས་ཀྱིས་འཚམས་སྦྱར་བདག་ལ་གནང་། །དེ་ཡང་བུ་པེ་དཀར་པོ་ཚད་དང་དེ་ལྡན་པར། །བདུད་རྩི་དམ་པ་བླུགས་ནས་ཀྱང་། །མགོ་ལ་བཞག་ནས་གསང་བའི་དབང་བསྐུར་ཏེ། །དམ་ཚིག་མནའ་བསྒགས་སྙིང་གི་དཀྱིལ་དུ་གཏད། །ལས་ཀྱིས་འཇལ་བའི་བུརྙ་ཙྭ་ན་ཁྱོད། །འཛམ་གླིང་བོད་ན་བསོད་ནམས་ཁྱད་པར་ཆེ། །དྲག་སྔགས་ཁྱད་འཕགས་རྡོ་རྗེ་ནང་རྨེ་འདི། །བུརྙ་ཙྭ་ན་ཐུགས་ཀྱི་འཀྱིལ་དུ་སྤོས། གཞན་ལ་བསྟན་ན་བུརྙ་ཙྭ་ན་དམ་ཚིག་ཉམས། །རྡོ་རྗེ་དམྱལ་བའི་གནས་སུ་གཤེགས་པར་མཆིའོ། །གསང་བའི་མཚན་གསོལ་རྡོ་རྗེ་ཡ༷་དབང་གཏེར། །རྒྱལ་པོ་བཀའ་ཁྲིམས་ཉམས་ཤིང་བོད་ཁམས་སིལ་བུར་གྱུར། །བསྟན་པ་དམ་པ་བཞག་པའི་གནས་མེད་ཀྱིས། །དམ་ཚིག་གཙོ་རུ་བཟུང་ཕྱིར་གཞན་ལ་སྤེལ་མི་བྱ། །གུ་རུ་བ་སུ་དྷ་རས་གདམས་པའི་དྲག་སྔགས་ཁྱད་པར་འདི། །འཛམ་གླིང་བོད་དུ་སྤེལ་ན་བན་ཆུང་རང་ཁ་སྡིག །དེ་སྐད་གསུངས་ནས་བཀའ་ཡི་རྒྱས་བཏབ་པས། །སྒྱུ་མའི་ཕུང་པོ་འདི་དང་འགྲོགས་ནས་ས་ཡི་གཏེར་དུ་འཆི། །རྫོགས་སོ།། །། རྒྱ་གར་སྐད་དུ། གྲི་ཙནྟྲ་གུརྒྱ་ཀསྨི་ས་མུནྟྲ་ཧ་ལ་ཙ་མ་རི་