Ngb-pt-0710-vol-08-text

Body

རྒྱ་གར་སྐད་དུ། ཌའ་ཀི་ནི་རཏྣ་པྲ་ཏི་ཏནྟྲ་ནཱ་མ། བོད་སྐད་དུ། མཁའ་འགྲོ་མ་རིན་པོ་ཆེ་འཕྲེང་བ་ཞེས་བྱ་བའི་རྒྱུད། རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །འདི་སྐད་བདག་གི་ཐོས་པའི་དུས་གཅིག་ནི།བྲམ་ཟེ་མཆོག་སྲེད་ཅེས་བྱ་བ་དེ། ཨུ་རྒྱན་ཡུལ་གྱི་དུར་ཁྲོད་བསིམ་བའི་ཚལ་ཞེས་བྱ་བ་དེ་ན། ཆོས་ཉིད་སྒྱུ་མ་ལ་རྟོག་ཅིང་དུར་ཁྲོད་ཀྱི་རོ་ལ་ལོངས་སྤྱོད་ཅིང་། དགོངས་པ་མཛད་ཅིང་བཞུགས་སོ། །དེའི་ཚེ་ཌའ་ཀི་མ་ཐམས་ཅད་དབང་དུས་ནས། དཔའ་བོ་དང་དཔའ་མོ་རྣམས་ཀྱིས་བསྐོར་ཏེ་མཆོད་པ་བྱེད་ཅིང་བཞུགས་སོ། །དེའི་ཚེ་མཁའ་འགྲོ་མ་རྣམས་ཀྱི་གཙོ་མོ། ཡེ་ཤེས་ཀྱི་ཌའ་ཀི་མ་རྡོ་རྗེ་ཕག་མོ་ཞེས་བྱ་བ་དེ་སྐུ་བཞེངས་ཏེ།སྐྱེ་མེད་རྣམ་དག་ཆོས་ཀྱི་དབྱིངས་ཉིད་ལས། །སྐྱེ་བའི་ཆོ་འཕྲུལ་ཅིར་ཡང་སྤྲུལ་མཛད་མ། །འགྲོ་བའི་དོན་རྣམས་མཛད་པའི་མཁའ་འགྲོ་མ། །སྐྱེ་མེད་ངང་ལས་མ་གཡོས་སྐུ་མདོག་གནག །གཅེར་བུ་ཞལ་བགྲད་མཆེ་གཙིགས་ལོངས་སྤྱོད་རྫོགས་པའི་སྐུ། །ཉོན་མོངས་དུག་འཇོམས་ཕག་པའི་དབུ་བསྟན་ནས། །སྣ་ཚོགས་སྤྲུལ་སྐུས་འགྲོ་བའི་དོན་མཛད་མ། །ཕྱག་གཡས་གྲི་གུག་ཉོན་མོངས་དུག་གསུམ་འཇོམས། །ཕྱག་གཡོན་ཐོད་སྐམ་སྐྱེ་མེད་དབྱིངས་སུ་སྦྱོར། །དབུ་སྐྲ་གྱེན་ཐུར་སྤྲུལ་སྐུ་སྣ་ཚོགས་འགྱེད། །དུར་ཁྲོད་རུས་པའི་རྒྱན་གྱིས་ཌའ་ཀི་དབང་དུ་སྡུད། །ཡེ་ཤེས་མེ་རིས་མ་རིག་མུན་པ་འཇོམས། །གཡས་བརྐྱང་གཡོན་བསྐུམ་ཐབས་དང་ཤེས་རབ་དང་། ཁྲེས་རབ་ཡེ་ཤེས་གོས་མེད་ཉི་ཟླ་པདྨའི་གདན། །མཐོང་དང་དྲན་པ་ཙམ་གྱིས་ཡེ་ཤེས་སྐྱེས། །ཡོན་ཏན་བྱེ་བས་བརྒྱན་པའི་ཌའ་ཀི་སྐུ་བཞེངས་ལ། །བྲམ་ཟེ་མཆོག་སྲེད་ཉིད་ཀྱིས་གསོལ་བ་བཏབ། །བདེ་བའི་རང་བཞིན་གཉིས་མེད་ལ། །འཁོར་འདས་རོ་གཅིག་ཕག་མོའི་སྐུ། །བདེ་ཆེན་གཏུམ་མོ་གར་མཛད་དགེས། །དུར་ཁྲོད་ཕྱོགས་གནས་རྣལ་འབྱོར་མ། །དཔའ་བོས་ཐུགས་བསྐུལ་སེམས་ཅན་སྦྱོང་། །རྣལ་འབྱོར་ཀུན་ལ་དངོས་གྲུབ་སྟེར། །ཌའ་ཀི་ཁྱོད་ལ་ཕྱག་འཚལ་བསྟོད། །མ་རྟོགས་སིདྷི་མ་ཐོབ་པས། །བདག་གཞན་སིརྙི་ཐོབ་བྱའི་ཕྱིར། །མཁའ་འགྲོའི་བསྒྲུབ་ཐབས་བཤད་དུ་གསོལ། །ཞེས་ཞུས་སོ། །གླེང་གཞིའི་ལེའུ་སྟེ་དང་པོའོ།། །།དེ་ནས་མཁའ་འགྲོས་བཀའ་སྩལ་པ། །རྡོ་རྗེ་ཌའ་ཀི་བསྒྲུབ་པ་ནི། །གསང་ཐུབ་དམ་ཚིག་ལྡན་པ་དང་། །བླ་མ་ལ་གུས་སྒྲུབ་ལ་བརྩོན། །བདེན་པར་སྨྲ་ཞིང་བསམ་བ་བརྟན། །ཌའ་ཀི་ལ་མོས་གཙང་སྦྲ་ཆེ། །བརྟུལ་ཞུགས་བཟང་པོར་གནས་པ་ཡིན། ཁེང་གཅིག་དུར་ཁྲོད་མ་མོ་གནས་པའི་ཁྱིམ། །ནགས་ཚལ་འཐུག་པོ་ཆུ་གླིང་དང་། །རི་བོའི་རྩེ་འམ་བས་མཐའ་དང་། །དབེན་པའི་ས་ཕྱོགས་ཡིད་འོང་དང་། །གྲོང་ཁྱེར་སྟོང་པ་རི་ཡི་སྐྱབས། །བྲག་དམར་ལྷོ་ནུབ་མཚམས་བལྟས་པར། །ནན་ཏན་དུ་ནི་འབད་དེ་སྒྲུབས། །བདེ་བའི་སྟན་ལ་འདུག་ནས་ནི། ཁྲེས་པའི་ཕྱོགས་སུ་ཁ་བལྟས་ཏེ། །མཆོད་དང་གཏོར་མ་ཆང་སོགས་རྣམས། །ཡིད་ཀྱིས་ཡན་ལག་བདུན་པ་བྱ། །རྟེན་ནི་རང་ལ་བསྡུ་བྱས་ནས། །རང་ཉིད་སྟོང་པའི་ཏིང་འཛིན་ལས། །ཌའ་ཀི་ཆོས་འབྱུང་གྲུ་གསུམ་ཉིད། །དམར་པོའི་མདོག་ཉིད་ཆགས་པའི་གཟུགས། །དེ་དབུས་པདྨའི་ལྟེ་བ་ལ། །ཕེ་ལས་བསྐྱེད་པའི་ཌའ་ཀི་བཱ། །མདོག་ནག་གཅེར་བུ་ཆེན་མོ་ནི། །ཕྱག་གཉིས་གྲི་དང་ཐོད་པ་འཛིན། །ཁ་ཊ་ཁ་ནི་སྐུ་ལ་རྟེན། །ཞབས་གཉིས་རོ་ཡི་སྟེང་ན་རོལ། །གཡོན་བརྐྱང་བདེ་བར་རབ་ཏུ་འགྱིང་། །ཞལ་ནི་གཏུམ་མོ་ཕག་གི་གཟུགས། །སྤྱན་གསུམ་གྱེན་ལྟ་གདང་མིག་འགྱུ། །ཞལ་ནས་ཕོ་ཕོ་ཧྲི་ཧྲི་སྒྲོགས། །ལྗགས་འདྲིལ་རབ་ཏུ་མྱུར་བར་བཤད། །ཐོད་རློན་འཕྲེང་བས་དོ་ཤལ་བྱས། །གཅེར་བུ་པདྨ་རཀྟ་འཛག །སྐུ་ལ་བསྐལ་པའི་མེ་འོད་འཕྲོ། །དེ་ལྟར་ལྷ་མོ་བདག་བསྐྱེད་ལ། །སྤྱི་བོར་བླ་མ་བསྒོམ་པར་བྱ། །དབྱིབས་ལ་བརྟགས་ལ་སེམས་ཀྱིས་སྒོམ། །དབྱིབས་ལ་ལེགས་པར་གྲུབ་པ་དང་། །སྔགས་ཀྱི་སྒྲ་ལ་བརླབ་པར་བྱ། ཁྲེན་ཏུ་བསྡུ་དང་བསྡུས་དང་རྒྱས། །སྒྲ་ལ་མན་ངག་བཞིན་དུ་བྱ། །སྒྲ་ལ་ལོབས་པར་གྱུར་པ་དང་། །མི་རྟོག་ཐུགས་ལ་བསླབ་པར་བྱ། །འོག་སྒོ་བསྐྱེད་པ་ཙ་ཀྲ་ནི། །རིམ་པ་གཉིས་ཀྱི་རྣམ་འབྱོར་ཏེ། །ཕྱག་རྒྱ་གཉིས་པོ་ཞེས་ཀྱང་གྲགས། །ས་གསུམ་པ་ནི་འགྲུབ་པར་འགྱུར། །སྲིན་པོའི་ཞལ་ནི་རབ་ཏུ་བསྡམ། །ཆོས་ཀྱི་འབྱུང་གནས་མྱུར་དུ་གཡོས། །གཡུང་དྲུང་འཁྱིལ་པ་མཁའ་ལ་ཁྱབ། །མཁས་པས་གྲུབ་པར་གདོན་མི་ཟ། །དེ་ནི་བསྙེན་པའི་རིམ་པ༷་ཡིན། །དེ་ནས་བློ་ལྡན་དེ་ཡིས་སུ། །ཕོ་དང་མོ་ཡི་ཐོད་པ་ལ། །གསང་བའི་རྫས་ཀྱིས་བྲི་བར་བྱ། །པདྨ་འཁོར་ལོ་མུ་ཁྱུད་བཅས། །ཧ་རི་ནི་ས་ཞེས་པ་དང་། །ར་ཙ་ཧྲི་ཡ་ཞེས་པ་བྲི། །གསང་བའི་སྔགས་བྲི། །ཨཱོཾ་ཧུ༷་བཅས་པས། །བཛྲ་ཌའ་ཀི་ནི་ཞེས་པ་དང་། །རཏྣ་པདྨ་ཀརྨ་ཌའ་ཀི་ནི། །མུ་ཁྱུད་དག་ལ་རིམ་པས་བསྐོར། །འཁོར་ལོའི་མཚམས་སུ་ཧུ༷་ཞེས་བྲི། །དེ་ནས་ཐོད་པ་དེ་ཡི་ནང་། །ཕྱག་མཚན་གྲི་གུག་ཁ་ཌའ༷་ཀ །ཐོད་པ་རྡོ་རྗེ་རིན་ཆེན་དང་། །པདྨ་རྒྱ་གྲམ་རལ་གྲི་དང་། །རས་ལ་སོགས་ལ་བྲིས་ལ་གཞུག །གཞན་ཡང་རིན་ཆེན་སྣ་ཚོགས་དང་། ཁ་ཟས་དཀོར་མཛོད་སྣ་ཚོགས་དང་། །ལོངས་སྤྱོད་མཛེས་པ་དག་གིས་དགང་། །ཐོད་པ་ཁ་སྦྱར་དར་གྱིས་གྲིལ། །གྲུ་གསུམ་ནང་དུ་གཞུག་པར་བྱ། །དེ་ནས་བདག་ཉིད་ལྷར་བསྐྱེད་ཅིང་། །མདུན་གྱི་ཐོད་པ་ལྷར་བསྐྱེད་ལ། །འོག་གི་ཐོད་པ་དཔའ་མོར་བསྐྱེད། །སྟེང་གི་ཐོད་པ་དཔའ་བོར་བསྐྱེད། །བདག་ཉིད་མཚན་མོ་དཔའ་མོར་བསྐྱེད། །ཉིན་པར་དཔའ་འབོར་བསྐྱེད་པར་བགྱི། །མཚན་མོར་ཧ་རི་ནི་ས་བཟླས། །ཉིན་མོ་ར་ཙ་ཧྲི་ཡ་བཟླས། །ནང་ནུབ་ཐུན་འཚམས་དུག་ཏུ་བཟླས། །ཕོ་དང་མོ་གཉིས་སྦྲེལ་བར་བྱ། །ཕོ་རྩུབ་མོ་ཡིས་མགོ་ཡང་མནན། །མོ་རྩུབ་ཕོ་ཡིས་མགོ་ཡང་མནན། །དེ་ནི་སྒྲུབ་པའི་རིམ་པའོ། །དེ་ནས་ལས་ལ་སྦྱར་བ་ནི། །སྒྲུབ་པ་རྫོགས་པའི་ཐོ་རངས་ཁ། །ཐོད་པའི་ཁ་ཟས་བཟའ་བར་བྱ། །རིན་ཆེན་རྣམས་ནི་ལུས་ལ་གདགས། །ཕྱག་མཚན་ཐོད་པར་བཅས་པ་ཉིད། །སྒྲུབ་པའི་གནས་ཁང་ཡིན་པར་སྦ། །ཡང་ན་གངས་དང་གཡའ་དག་དང་། །ཌའ་ཀི་གནས་པའི་ས་རུ་སྦ། །བདག་ཉིད་གཅེར་བུ་ཐལ་བས་བྱུག །རུས་པའི་རྒྱན་གྱིས་ལུས་བརྒྱན་ཏེ། ཁ་ཊ་ཐོད་པ་ལག་ཏུ་ཐོགས། །ཅང་ཏེའུ་ཐོད་རྔའི་སྒྲ་བསྒྲག་ཅིང་། །དུར་ཁྲོད་ལ་སོགས་འཇིགས་པའི་གནས། །སྣ་ཚོགས་དག་ཏུ་གཅེར་བུ་རྒྱུ། །གལ་ཏེ་བྱ་བའི་དོན་ཡོད་ན། །ཞི་རྒྱས་དབང་དང་གསད་པར་བྱ། །ཅི་འདོད་བསམས་པ་ཙམ་གྱིས་འགྲུབ། །ཐུགས་ཀྱི་མཁའ་འགྲོ་མ་འཁོར་བཅས་བསྒྲུབ་པའི་ལེའུ་སྟེ་གཉིས་པའོ།། །།འཇིག་རྟེན་གསུམ་གྱིས་གཙོ་མཛད་འགྲན་ཟླ་མེད་པའི་སྐུ། །མཁའ་འགྲོ་དཀར་མོར་བསྟན་ལ་ཕྱག་འཚལ་ལོ། །བྱིན་རླབས་ལྡན་པའི་རྣལ་འབྱོར་པས། །བྱིན་རླབས་བརྟན་པར་བྱ་བའི་ཕྱིར། །ཕག་མོ་དཀར་མོ་བསྒྲུབ་པར་བྱ། །འཁོར་བ་བློ་ཡིས་གཏང་བར་བྱ། །མཆོད་དང་བྲལ་བའི་ལྷ་ཁང་ངམ། །གངས་དང་གཡའ་ཡི་ཕུག་པ་སྲ །གསང་ཐུབ་དམ་ཚིག་གཅིག་པའི་གྲོགས། །དབང་ལྡན་ཕྱོགས་ནས་ས་བསླངས་ལ། །མཎྜལ་ཟླུམ་པོ་དཀར་པོ་བྱ། །དཀར་མོ་ར་དང་བ་དམར་མོ། །འོ་མ་མ་ཀི་ཏ་དང་སྦྱར། །རླུད་ལྷའི་ཕྱོགས་ནས་ཆག་ཆག་གདབ། །རྒྱལ་སྲིད་རིན་ཆེན་སྣ་བདུན་གྱི། །ཙ་ཀ་ལི་ཡང་གཟུགས་པར་བྱ། །བྱང་སེམས་དཀར་དམར་གླ་རྩི་དང་། །རྒུན་འབྲུམ་སྦྲང་རྩི་བདུད་རྩི་ལྔ། །གནམ་ཞལ་དཀར་པོ་སྲུབས་མེད་ལ། །སྐྱེས་བུ་བདུད་ཀྱིས་ཟིན་པའི་ཁྲག །རྒྱབ་ཏུ་འཁོར་ལོ་རྩིབརྒྱད་བྲི། །ཧ་རི་ནི་ས་བཞི་པོ་དང་། །ར་ཙ་ཧྲི་ཡ་བཞི་པོ་དགོད་དོ། །མཆོག་དང་ཐུན་མོང་དངོས་གྲུབ་རྫས། །ནང་དུ་བླུག་ལ་རྣལ་འབྱོར་པས། །མི་གཙང་ངོ་ཚ་སྤང་པར་བྱ། །པདྨའི་ཁོག་པས་ཁ་ཡང་བཅད། །དེ་བཞིན་གཤེགས་པའི་རིང་བསྲེལ་ལ། །གསོལ་བཏབ་བསྔགས་ལ་གཙུག་ཏུ་གདགས། །བདག་ཉིད་མཁའ་འགྲོ་ཕག་མོ༷་ནི། །སྐུ་མདོག་དཀར་མོ་ཕག་ཞལ་གཡས། །གྲི་གུག་གཡོན་པ་ཁ་ཊ༷་ཁ། །བརྐྱང་བསྐུམ་ཞབས་ཀྱིས་བཞུགས་པར་བསྒོམ། །དང་པོ་འབྲུ་བཇུ་ལ་ ་སྔགས་དང་ནི། །མཁའ་འགྲོ་སྡེ་བཞིའི་སྔགས་ཀྱིས་བསྒྲུབས། །ཨཱོཾ་ཨུ༷༷ ཧུ༷་ཧ་རི་ནི་ས། ཁུབ་ཚད་འབུམ་ཚོ་གསུམ་གྱིས་ནི། །དུད་པ་བྱུང་ན་རྐང་མགྱོགས་འགྲུབ། །དྲི་ལ་སའོག་འགྲུབ་པ་སྟེ། །ལྷ་མོའི་གཟུགས་ཀྱིས་རབ་གྲི་འགྲུབ། །འོད་ཀྱིས་མཁའ་སྦྱོད་འགྲུབ་པར་འགྱུར། ཁུ་སྐར་རྒྱལ་ལ་བབ་པའི་ཚེ ཕ་མ་ཚངས་པའི་ཁྱེའུ་དང་། །མཚན་དང་ལྡན་པའི་བུ་མོ་ལ། །དཔའ་བོའི་ཆས་སུ་བཅུག་ལ་བརྟག །མཐའ་ནས་རྨ་བྱའི་མདོངས་ཀྱིས་ཕྱག །རྒུན་འབྲུམ་སྦྲང་རྩི་དེ་རྣམས་ཀྱིས། །ཆུ་ལྷའི་ཕྱོགས་སུ་བསྡུ་བར་བྱ། །ཆེ་ཆུང་རྒྱ་ཤུག་འབྲས་བུ་ཙམ། །ལེ་བརྒན་དར་གྱིས་ཁ་བཅད་དེ། །ནག་པོའི་ཚེས་གཅིག་ནས་བཟུང་སྟེ། །མི་སྨྲ་ཟླ་བ་གཅིག་གི་བར། །གཟུངས་ཐག་བཏགས་ལ་སྔགས་འདིས་སྒྲུབས། །ཨཱོཾ་ཨུ༷༷ ཧུ༷་ཧྲི་ཏྲ༷། མིག་གི་འཁོར་ལོ་རྣམ་པ་བཞི། །གདུལ་བྱ་ཡུལ་བཞི་ཟིལ་གྱིས་མནན། །སྤྱི་མདོ་ལྟུང་བ་བཅུ་བཞི་འབྱང་། །ལྕེ་ཡི་འོག་ཏུ་བཅུག་བྱས་ན། །དངོས་གྲུབ་མ་ལུས་རྫོགས་པར་འགྱུར། །རྫས་གཅིག་གིས་ནི་དམ་བསྐོངས་པ། །ཨེ་མ། མཁའ་འགྲོ་གསང་བའི་གནད། །ལོག་ལྟ་ཅན་གྱི་སྤྱོད་ཡུལ་མིན། །མཁའ་འགྲོ་ཕག་མོ་དཀར་མོའི་བསྒྲུབ་པ། །བྱིན་བརླབས་མི་ཡལ་བའི་རྒྱས་བཏབ་པ། །རྟེན་འབྲེལ་རྫས་ཀྱི་མན་ངག །སྐུའི་ཕག་མོ་དཀར་མོ་འཁོར་མཁའ་འགྲོ་སྡེ་བཞི་དང་བཅས་པ་བསྒྲུབ་པའི་ལེའུ་སྟེ་གསུམ་པའོ།། །།དེ་ནས་ཡང་དག་བཤད་བྱ་བ། རང་བཞིན་སྤྲོས་བྲལ་ཟག་མེད་བདེ་བ་རྒྱས། །ཡུམ་མཆོག་མཁའ་འགྲོ་དེ་ལ་ཕྱག་འཚལ་ལོ། །དབང་བཞི་རྫོགས་པའི་རྣལ་འབྱོར་པས། །སིརྙི་རྣམ་གཉིས་ཐོབ་བྱའི་ཕྱིར། །རང་བྱུང་རྒྱལ་མོ་བསྒྲུབ་བར་བྱ། །གཟུང་འཛིན་ཆགས་ཞེན་རྣམ་པར་སྤངས། ཁེང་གཅིག་འགྲམ་མམ་སྒོ་དཔག་སར། །མཚན་ལྡན་ལས་ཀྱི་ཕྱག་རྒྱ་རྟེན། །རླུད་དང་མེ་གཅིག་བདེ་བའི་ཁམས། །བསྐྱིལ་དང་བཟློག་དང་དགྲམ་ཞིང་བསྟིམ། །བླ་མས་བསྟན་པའི་ཏིང་འཛིན་ངོ་སྤྲད་ཅིང་། །དགའ་བཞིའི་ཏིང་འཛིན་ངོས་སུ་གཟུང་། །རྟོག་མེད་རོ་ཡི་གདན་ལ་བཞུགས། །ལེ་བརྒན་དར་ལ་འཁོར་ལོ་བྲི། །རྩིབས་ལ་ཡི་གེ་བཞི་པ་བྲི། །རབ་གནས་བྱས་ལ་མགུལ་དུ་གདགས། །མན་ངག་སྣོད་ཀྱི་སྒྲུབ་པ་ནི། །མཚན་ལྡན་དུམ་བུ་གཅིག་པ་སྲ །བྱང་སེམས་དཀར་པོས་པདྨ་བྲི། །རྩ་བའི་སྙིང་པོ་འབྲུ་བཞི་ཡང་། །ཁྱི་མོ་ནག་མོའི་འོ་མ་དང་། །སིན་རྙུ་ར་བླུག་སྲིན་ལག་མཉེས། །བྱ་རོག་འུག་པའི་དང་རུས་བླང་། །ལིང་ག་སྨྱུག་གུས་བྲི་བར་བྱ། །རིགས་ཀྱི་ལྷ་མོ་བཞི་པོ་བསྐྱེད། །དབུས་སུ་རང་ཉིད་བསྒོམ་པར་བྱ། །སྐུ་མདོག་དམར་མོ་འབར་བ་ལ། །གཡས་པ་རྟོག་མེད་ཕག་མོའི་ཞལ། །གཡོན་པ་ཆགས་ཚུ༷ལ་ཁྲོ་མོའི་ཞལ། །ཕྱག་གཉིས་གྲི་གུག་ཐོད་པ་འཛིན། །ཞབས་གཉིས་བརྐྱང་བསྐུམ་རོ་སྟེངས་མནན། །དེ་ལྟ་བུ་རུ་བདག་བསྒོམས་ལ། །ཙན་དྷན་ཆུ་དག་མེ་ལོང་བཅད། །གསང་བའི་སྙིང་པོ་འབྲུ་བདུན་བཟླས། །ཨཱོཾ་ཨུ༷༷ཧུ༷ ། ཧ་རི་ནི་ས། འབུམ་ཚོ་བཞི་ཐོན་ནང་པར་ལ། དཔའ་བོས་གཟི་མདངས་བསྐྱེད་ལ་བཏུང་། །ལྷག་མ་མིག་ལ་བྱུགས་གྱུར་ན། །ས་འོག་ས་བླ་ས་སྟེངས་གསུམ། །དེ་གསུམ་རྣལ་འབྱོར་པ་ཡིས་མཐོང་། །འདི་ནི་མཁའ་འགྲོ་བསྟན་པ་འམ། །དང་པོ་རྟགས་ཀྱི་ཡེ་ཤེས་ཡིན། །སྤྱི་གཙུག་བདེ་བའི་འཁོར་ལེའི་དབུས། །གཡུང་དྲུང་འཁྱིལ་བའི་དབུས་སུ་ནི། །ཨ་ནུ་ཏ་ར་བཞི་བསྒོམས་ནས། །ངག་ཏུ་བྱེ་བ་བཞི་ཐོན་ནས། །སྐྱེས་བུ་རིག་པ་འབྱོངས་པར་འགྱུར། །རང་འབྱུང་ཡེ་ཤེས་ཡི་གེ་བཞི། །དབྱིངས་ནས་ཤར་ནས་དབྱིངས་སུ་གྲོལ། །གཟུང་བྱའི་ཡུལ་དང་འཛིན་བྱེད་སེམས། །ཡང་དག་དོན་ལ་གྲུབ་པ་མེད། །ཨེ་བ༷་མ་ཡ་ལས་བྱུང་བའི། །སྔགས་གཅིག་གིས་ནི་སངས་རྒྱ་བ། །ཨེ་བ༷་མཁའ་འགྲོ་གསང་བའི་གནད། །བློ་དམན་རྣམས་ཀྱི་སྤྱོད་ཡུལ་མེན། །རིག་པ་ཡེ་ཤེས་ཀྱི་མན་ངག །གསུང་གི་ཕག་མོ་དམར་མོ། འཁོར་མཁའ་འགྲོ་སྡེ་བཞི་དང་བཅས་པའི་ལེའུ་སྟེ་བཞི་པའོ།། །།དེ་ནས་ཡང་དག་བཤད་བྱ་བ། །ག་་མ་སྤྲོས་བྲལ་འོད་གསལ་འདུས་མ་བྱས། །ཡེ་ཤེས་མཁའ་འགྲོ་དེ་ལ་ཕྱག་འཚལ་ལོ། །གདེངས་དང་ལྡན་པའི་རྣལ་འབྱོར་པས། །ཚོགས་གཉིས་རྫོགས་པར་བྱ་བའི་ཕྱིར། །དུར་ཁྲོད་བདག་མོ་བསྒྲུབ་པར་བྱ། །འཇིག་རྟེན་བྱ་བ་བློས་བཏང་སྟེ། །དུར་ཁྲོད་གནས་སམ་ཆུ་གླིང་དུ། །གྲོགས་བཟངས་བཙལ་ལ་བསྙེན་པ་བརྩམ། །ཞིང་གི་སྟན་ལ་འདུག་ནས་ནི། །མཁའ་འགྲོ་སྡེ་བཞིའི་སྙིང་པོ་བཟླས། །ཧ་རི་ནི་ས། རིས་སུ་མ་ཆད་ཐོད་པའི་ནང་། །ཤེས་རབ་མ་ཡི་མཚལ་ཐིགས་ཀྱིས། །ཆོས་འབྱུང་བསྣོལ་མར་བྲི་བར་བྱ། །ས་དང་ཆུ་དང་མེ་དང་རླུད་། །སྐྱེད་པར་བྱེད་པའི་ས་བོན་ལས། །འདོད་ཆགས་བྱ་དང་ཞེ་སྡང་སྦྲུལ། །གཏི་མུག་ཕག་གི་གདན་སྟེངས་སུ་། །བདུད་བཞི་ལས་རྒྱལ་ཁྲོ་མོ་ནི། །སྐུ་མདོག་སེར་མོ་གསེར་བཙོ་འདྲ། །གྲི་གུག་ཐོད་པ་ཁ་ཌ༷འ་འཛིན། །བརྐྱང་བསྐུམ་ཞབས་ཀྱིས་གདན་ལ་བཞུགས། །ཡུལ་གསུམ་གསལ་བར་གྱུར་པ་དང་། །ཡིག་འབྲུ་གསུམ་གྱིས་རང་ལ་བསྡུ། །ཨཱོཾ༷་ཨུ༷༷ཧུ༷༔ བདེ་བ་ལོངས་སྤྱོད་རྣམ་གཉིས་ཏེ། །ཆོས་དང་སྤྲུལ་པའི་གནས་རྣམས་སུ། །འཁོར་ལོ་རིམ་པ་བཞི་བསྐྱེད་ནས། །ཧ་རི་ནི་ས་ཞེས་བྱ་བ། །རིགས་ལྔ་རྒྱལ་པོ་འབྲུ་བཞི་བསྐུལ། །ལྷི་ཧང་དག་གི་འཁོར་ལོ་རྩིབས། །སྨིན་མའི་མཚམས་སུ་བྱུག་གྱུར་ན། །དེ་མཐོང་འཇིག་རྟེན་གསུམ་ལ་དབང་། །ཕག་པ་ནག་པོའི་རྩིསྟ་ལ། ཁྲ་བའི་ཁྲག་དང་གཅིན་རྣམས་བྱུག །རིགས་བཞི་ལྷ་ཡི་ཕྱག་མཚན་དང་། །རྩ་བའི་སྙིང་པོ་གསེར་གྱིས་བྲི། །སྟག་གི་སྦར་བའི་ནང་བཙུད་ནས། །སྒྲུབ་པ་པོ་ཡི་ལུས་ལ་བཅང་། །རྟེན་འབྲེལ་འདི་ཡི་བྱིན་བརླབས་ནི། །མཁའ་སྡིང་གཙུག་གི་ནོར་བུ་འདྲ། །གྲངས་ཀྱི་བསྙེན་པ་འབུམ་ཚོ་བཞི། །ཐ་མལ་ཤེས་པ་ཟློག་པར་བྱེད། །ཟླ་དྲུག་ཉམས་ཀྱི་སྦྱོར་པ་ཡིས། །སྐྱེས་བུ་རྟོག་པ་ཟད་པར་བྱེད། །རྣལ་འབྱོར་མིང་ཡང་དེ་དུས་ཐོབ། །ཨུ་ལི་ཀྭ་ལི་ལས་བྱུང་བའི། །སྔགས་གཅིག་གིས་ནི་དོན་ཀུན་འགྲུབ། །ཨེ་མ་མཁའ་འགྲོ་གསང་བའི་གནད། །རྟོག་གེ་བ་ཡི་སྤྱོད་ཡུལ་མེན། །དུར་ཁྲོད་བདག་མོ་བསྒྲུབ་པ་ཡི། །ཚོགས་གཉིས་ཡོངས་སུ་རྫོགས་པའི་ཐབས། །ནུས་པ་སྔགས་ཀྱི་མན་ངག་གོ །ཡོན་ཏན་གྱི་ཕག་མོ་སེར་མོ་འཁོར་མཁའ་འགྲོ་སྡེ་བཞི་དང་བཅས་པ་བསྒྲུབ་པའི་ལེའུ་སྟེ་ལྔ་པའོ།། །།དེ་ནས་ཡང་དག་བཤད་བྱ་བ། །འཕྲིན་ལས་རྒྱ་མཚོ་ལས་ཀུན་རྫོགས་པ་ཡི། །རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །ཉམས་སུ་དགའ་བའི་གནས་དག་ཏུ། །འབོལ་བའི་གདན་ལ་འདུག་ནས་ནི། །བྱང་ཆུབ་མཆོག་ཏུ་སེམས་བསྐྱེད་དེ། །སྟོང་པ་ཉིད་དུ་གསལ་བྱས་ནས། །འབྱུང་བ་བཞི་ཡི་ཡི་གེ་ལས། །རྡོ་རྗེ་རྣལ་འབྱོར་མ་རུ་སྒོམ། །ཧ་རི་ནི་ས། སྐུ་མདོག་སྔོན་མོ་གཅེར་བུ་ལ། །མཆེ་གཙིགས་རུས་པའི་རྒྱན་ཆས་ཅན། །གཡས་གཡོན་ཁ་ཊ༷་ཐོད་པ་བསྣམས། །ཞབས་ནི་གཡས་བརྐྱང་གཡོན་པ་བསྐུམ། །དབུ་སྐྲ་གྱེན་བརྗེས་ཐུར་ལ་འཕྱང་། །གཤོན་ཤ་ཅན་དེ་ཧ་ལས་བསྐྱེད། །སྙིང་ཁར་པདྨ་དཀར་པོ་ལ། །ཧ་རི་ནི་ས་བཞི་པོ་བསམ། །དེ་ལས་འོད་ཟེར་འཕྲོས་པ་ལས། །བླ་མ་བདེ་གཤེགས་ཌའ་ཀི་དགུག །དེ་ལ་མཆོད་བསྟོད་ཚུལ་བཞིན་བྱ། །ཡི་གེ་གསུམ་གྱིས་བྱིན་གྱིས་བརླབས། །གནས་བཞིར་ཡ་གེ་ཌའ་ཀ་བཞི། །ལུས་ལ་མཁའ་འགྲོས་གང་བ་ཡི། །ཌའ་ཀིའི་འཁོར་ནི་མང་པོ་ཡིས། །ལོངས་སྦྱོད་འདོད་ཡོན་མང་པོ་འབྱུང་། །སྟེང་རླུད་མནན་ཅིང་འོག་རླུད་བསྡམ། །ལུས་ལ་བདེ་བ་འབར་བ་དང་། །ངག་ལ་བྱིན་རླབས་འབར་བ་དང་། །སེམས་ལ་ཡེ་ཤེས་འབར་བ་འོ། །འཁོར་ལོ་བཞི་ལ་གནས་པ་ཡི། །ཡི་གེ་བཞི་ཡི་སྤྲོ་བསྡུ་ཡིས། །དྲོད་དང་ཡེ་ཤེས་སྐྱེད་པར་བྱེད། །བདེ་བ་ཡེ་ཤེས་མི་རྟོག་པ། །འདོད་ཡོན་ལྔ་སོགས་ཡེ་ཤེས་གྲོགས། །བརྟུལ་ཞུགས་ཅི་བྱས་ཡེ་ཤེས་གྲོགས། །ཌའ་ཀི་མ་རྟེན་ཡེ་ཤེས་གྲོགས། །ནུས་པ་བྱུང་བས་བར་ཆོད་སོལ། །བྱང་ཆུབ་ལམ་དུ་གྱུར་པ་ཡིན། །གང་ཞིག་འདི་ལ་སུས་སྤྱོད་པ། །ཚེ་དང་འབྲས་བུ་ཐོབ་པར་ངེས། །འཕྲིན་ལས་གསང་བའི་མན་ངག་གོ །འཕྲིན་ལས་ཀྱི་ཕག་མོ་སྔོན་མོ་འཁོར་ཌའ་ཀི་མ་སྡེ་བཞི་དང་བཅས་པ་བསྒྲུབ་པའི་ལེའུ་སྟེ་དྲུག་པའོ།། །།དེ་ནས་ཡང་དག་བཤད་བྱ་བ། །ལེགས་བྱིན་སློབ་པའི་ཌའ་ཀི་མ། །མཁའ་འགྲོ་མ་ལ་ཕྱག་འཚལ་ལོ། །ཤར་དུ་ཁ་བལྟས་ཟངས་ཀྱི་མདོག །སྐད་ཀྱིས་མི་ཐོས་བྲག་སྐྱིབས་སུ། །ད༷པའ་་བོ༷་བརྟུལ་ཞུགས་ལྡན་པ་ཡིས། །རྟོག་པ་ལེ་ལོ་ཐེ་ཚོམ་སྤང་། །ནན་ཏན་སྙིང་རུས་མོས་པས་སྒྲུབ། །རྡོ་རྗེ་རིན་ཆེན་པདྨ་ལས། །སྐུ་གསུང་ཐུགས་དང་ཡོན་ཏན་དང་། །འཕྲིན་ལས་རྣམས་ཀྱི་སྒྲུབ་པའི་ཐབས། །ཨཱོཾ་ཨུ༷༷ ཧུ་མ་ཧ་རི་ནི་ས།ཡི་གེ་འབྲུ་བརྒྱད་མཁའ་འགྲོའི་གནད། །མ་ལ་བུ་འབོང།་ཅེ་ས་བྱ་ཡིན། །སྐྲུ་གྲི་ལྟ་བུའི་གསང་སྔགས་འདི། །སྲེད་བྱེད་རྒྱུན་ལྡོག་དཔའ་མིན་གྲུབ། །ནམ་དུ་ཡང་ནི་བརྗོད་མི་བྱ། །སྐྱོ་བར་གྱུར་ན་ཡིད་བཟླས་སོ། །གནད་ཀྱི་སྙིང་པོ་འབྲུ་བཞི་དང་། །རྩ་བའི་ཡི་གེ་འབྲུ་བཞི་ཡིས། །ལ་སོགས་གོང་འོག་སྤེལ་བས་འགྲུབ། །ཡི་གེ་སྤྱན་གྱི་ཙ་ཀྲ་ཡིས། །མ་རུངས་རྣམ་བཞི་ཟིལ་གྱིས་གནོན། །སྔགས་དྲུག་མེ་ཡི་འཁོར་ལོ་ཡིས། །བར་དུ་གཅོད་པ་རྣམ་བཞི་བཟློག །རྣམ་པར་ཤེས་པའི་ཡི་གེ་ནི། །ཟླ་དྲུག་ཉམས་ཀྱི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་རྣལ་འབྱོར་བློ་ལྡན་གྱིས། །སྐྱེ་བོ་ལས་འཕགས་རི་བོ་ནི། །སོག་པོ་ཁྲོས་པའི་སྨིན་ཕྲག་ཏུ། །བདེ་བའི་གདན་ལ་འདུག་བྱས་ཏེ། །ཡིད་ཀྱི་ཚེར་མ་དབྱུང་བྱའི་ཕྱིར། །འདོད་ཡོན་སྤངས་ལ་འཁྲི་བ་བཅད། །འཁོར་བའི་སྐྱོན་ཀུན་ཤེས་པར་བྱ། །མཛེས་པའི་མཎྜལ་ཟླུམ་པོ་ཡིས། །པདྨ་འདབ་བརྒྱད་ལེགས་བྲིས་ཏེ། །ཁ་དོག་མཛེས་པའི་ཚོན་རྩིས་བསྒྱུར། །དེ་དབུས་ལྟེ་བ་ལ་ནི༷་ཞི་རྒྱས་དང་། །དབང་དང་མངོན་སྤྱོད་གང་བྱེད་པའི། ཤེས་པའི་ཤིང་རྣམས་གྲུ་བཞིར་བརྩིག །བྲམ་ཟེའི་ཁྱིམནས་མེ་བླངས་ལ། །སྨན་དང་རིན་ཆེན་འབྲུ་ལྔའི་ཕྱེ། །གསང་སྔགས་འདི་ཡིས་དབུལ་བར་བྱ། །ཨཱོཾ་ཨུ༷༷ཧུ༷། ཧ་རི་ནི་ས། རྣམ་བཞི་གང་བུ་གང་གང་གིས་ནི། །གཟུང་འཛིན་རྣམ་གཉིས་རང་སར་དག །ཡུལ་འཁོར་སྲུང་གི་བུ་ཡིས་ནི། །དངོས་གྲུབ་རྣམ་གཉིས་རྫོགས་པར་འགྱུར། །གྲོ་ག་རས་སམ་ཤིང་ཤུན་ལ། །གུར་ཀུམ་ཆུ་ཡིས་འཁོར་ལོ་ནི། །རྩིབས་དྲུག་མཐའ་མ་མུ་ཁྱུད་ལྡན། །ནང་དུ་ཡི་གེ་འབྲུ་གསུམ་དགོད། །རྣལ་འབྱོར་མགུལ་དུ་བཏགས་གྱུར་ན། །བར་ཆོད་རྣམ་བཞིས་ཚུགས་མི་འགྱུར། །སྐྱེ་གནས་དུད་འགྲོར་སྐད་བཞི་ཡིས། །འདུ་བ་རྣམ་བཞི་འཇོམས་པར་བྱེད། །འཁོར་ལོ་བཞི་ལ་གནས་པ་ཡི། །ཡིགེ་བཞི་ཡི་སྤྲོ་བསྡུ་ཡིས། །ཐ་མལ་ཤེས་པ་འགྱུར་བར་ནུས། །ཡི་གེ་གཅིག་ནས་བརྒྱད་ཀྱི་བར། །ལས་ཚོགས་ཐམས་ཅད་འགྲུབ་པར་འགྱུར། །མཁའ་འགྲོ་མ་ལ་བུ་འབོད་འོང་། །སྐུ་གསུང་ཐུགས་ཡོན་ཏན་འཕྲིན་ལས་ལྔ་གཅིག་ཏུ་གྲོལ་བའི་ལེའུ་སྟེ་བདུན་པའོ།། །།དེ་ནས་ཡང་དག་བཤད་བྱ་བ། །མཁའ་འགྲོ་སྤྱི་རུ་སྒྲུབ་པའི་ཐབས། །དུར་ཁྲོད་ཌའ་ཀི་འདུག་གནས་སུ། ཁེས་པའི་ས་ལ་མཎྜལ་བྱ། །བདུད་རྩི་ལྔ་ཡིས་ཆག་ཆག་གདབ། །ཚོན་སྣ་ལྔ་ཡི་སྲད་བུ་ཡིས། །དཀྱིལ་འཁོར་ལེགས་པར་ཐིག་བཏབ་ལ། །ཡེ་ཤེས་ལྔ་ལྡན་ས་ཚོན་གྱིས། །པདྨ་འདབ་བཞི་མུ་ཁྱུད་དང་། ཁྲུ་ཆད་སྒོ་དང་སྒོ་རྒྱན་དང་། །འཁོར་ཡུག་བཅས་པ་བྲི་བར་བྱ། །དེ་ལ་བསྒྲུབ་པའི་དམ་རྫས་ནི། །ཐོད་པ་མཁའ་འགྲོ་བྲིས་པ་དང་། །གཏོར་མ་རཀྟ་བདུད་རྩི་དང་། །ལྟག་སྤྲོད་རྔ་དང་རྐང་གི་དུང་། །ཚིལ་ཆེན་གསུར་གྱི་སྦོས་དུད་བཏང་། །མཚན་ལྡན་དུམ་བུ་གཅིག་པ་ལ། །འཁོར་ལོ་སྔགས་དང་བཅས་པ་བྲི། །དངོས་གྲུབ་སྣ་ཚོགས་རྫས་ཀྱིས་དགང་། །མཆོག་དང་ཐུན་མོང་བསྒྲུབ་པར་བྱ། །དེ་ནས་ཏིང་འཛིན་རིམ་པ་ནི། །དང་པོ་སྟོང་པ་ཉིད་ཀྱི་ངང་། ཁྱབ་པ་སྙིང་རྗེ་ཆེན་པོ་དང་། །རང་སེམས་ཧྲི་ཡི་བྱིན་རླབས་ལས། །འབྱུང་བ་དབང་ཆེན་གཞལ་ཡས་ཁང་། །རོ་དང་ཉི་ཟླ་པདྨའི་སྟེང་། །ཧྲི་ལས་སྤྲོས་དང་བསྡུས་བ་ཡིས། །བདག་ཉིད་དཔའ་བོ་རྟ་མགྲིན་སྐུ། །དམར་ནག་ཞལ་གཅིག་ཕྱག་གཉིས་པ། །གཡས་པ་གྲི་གུག་གཡོན་པ་ཐོད་ཁྲག་བསྣམས། །ཞབས་གཉིས་རོ་དང་ཉི་མའི་སྟེང་། །དབུ་གཙུག་རྟ་མགོ་རྟ་སྐད་འཚེར། །དཔའ་བོ་རུས་པའི་རྒྱན་གྱིས་བརྒྱན། །དཔའ་མོ་རྡོ་རྗེ་ཕག་མོར་འཁྲིལ། །གཡས་པ་གྲི་གུག་ཡབ་ལ་འཁྱུད། །གཡོན་པ་ཐོད་ཁྲག་ཡབ་ལ་སྟོབ། །སྤྱི་གཙུག་ཕག་གདོང་ངུར་སྒྲ་འདོན། །སྐུ་མདོག་དམར་མོ་རུས་པས་བརྒྱན། །ཞབས་གཉིས་གཙོ་ལ་འཁྲིལ་ནས་སྤྱོར། །ཡབ་ཡུམ་ཐུགས་ཀྱི་སྤྲུལ་པ་ལས། །ཧ་རི་ནི་ས་ར་ཙ་ཧྲི་ཡ། །ཡིག་འབྲུ་བརྒྱད་པ་པདྨའི་སྟེང༷་། །སྤྲོས་བསྡུས་མཁའ་འགྲོ་ཡབ་ཡུམ་བཞི། །ཀུན་ཀྱང་སྐུ་མདོག་དམར་མོ་ལ། །ཕྱག་མཚན་རྒྱན་དང་ཆ་བྱད་ཡབ་ཡུམ་ཀུན་དང་འདྲ། །སྐད་ཅིག་རྫོགས་པའི་ཚུལ་དུ་ནི། །དམ་ཚིག་ཡེ་ཤེས་གཉིས་མེད་བསྒོམ། །ཨཱོཾ་ཨུ༷༷ཧུ༷ ། ཧྲི་མ་ཧ་རི་ནི་ས་ར་ཙ་ཧྲི་ཡ་ཧུ༷་ཛ། ཡིག་འབྲུ་བཅོ་ལྔ་ཌའ་ཀིའི་སྲོག །དབང་སྡུད་ཟིལ་གནོན་འགུགས་པ་ཡིན། །རང་སྔགས་སྒྲ་རུ་སྒྲོགས་པར་བསྒོམ། །མཁའ་འགྲོ་མ་ལ་བུ་འབོད་ཀྱིས། །རབ་ནི་མཁའ་འགྲོ་དངོས་སུ་ཡོང་། །འབྲིང་ནི་ཉམས་སྣང་འོང་བ་ཡིན། །ཐ་མ་རྨི་ལམ་གྲུབ་རྟགས་སྟོན། །རབ་ཀྱིས་ཕྱག་རྒྱ་ཆེན་པོ་ཐོབ། །འབྲིང་གིས་མཁའ་སྤྱོད་གནས་སུ་འགྲོ། །ཐ་མ་བར་དོར་ལུང་སྟོན་བྱེད། །ཐུན་མོང་ཟས་ནོར་མི་གསུམ་འདུ། །མཁའ་འགྲོ་སྤྱིའི་གསང་བསྒྲུབ་ཀྱི་ལེའུ་སྟེ་བརྒྱད་པའོ།། །།མཁའ་འགྲོ་རྡོ་རྗེ་ཕག་མོ་ཡིས། །ཆོས་སྐུ་རྣམ་པར་མི་རྟོག་ལས། །མ་འགགས་ལོངས་སྤྱོད་རྫོགས་སྐུར་བཞེངས། །སྤྲུལ་སྐུ་སྐུ་གསུང་ཐུགས་དང་ནི། །ཡོན་ཏན་འཕྲིན་ལས་ལྔར་བསྟན་ནས། །མཁའ་འགྲོ་རྒྱུད་ཀྱི་རྒྱལ་པོར་བཤད། །བྲམ་ཟེ་མཆོག་སྲེད་ཡི་རངས་ནས། །ཨེ་མ་མཁའ་འགྲོ་གསངབའི་གནས། །སྤྲུལ་སྐུ་འགྲོ་བའི་དོན་མཛད་མ། །སྣ་ཚོགས་གཅིག་ལ་ཐ་དད་སྣང་། །ཆོས་དབྱིངས་སྐྱེ་མེད་མ་ལ་བསྟོད། །ཅེས་ཡུམ་ཆོས་ཉིད་ལ་གནས་སོ། །མཁའ་འགྲོ་རིན་པོ་ཆེ་འཕྲེང་བ་ཞེས་བྱ་བའི་རྒྱུད་ཡོངས་སུ་གཏད་པའི་ལེའུ་སྟེ་དགུ་པའོ།། །།མཁའ་འགྲོ་མ་རིན་པོ་ཆེ་འཕྲེང་བའི་རྒྱུད་རྫོག་སཧོ།། །།རྒྱ་རྒྱ་རྒྱ། འགུ་རུ་བློ་ལྡན་མཆོག་སྲེད་ཀྱིས། ཇོ་མོ་མཁར་ཆེན་བཟའ་ལ་ཐུགས་དམ་དུ་གཏད་པའོ།། །།རྫོགས་སོ། །མཁའ་འགྲོའི་རྒྱུད་བཞུགས་པ་ཙམ་གྱིས་མཁའ་འགྲོ་འདུ་བར་འགྱུར་གསུངས་སཧོ།། །། རྒྱ་གར་སྐད་དུ། །ཌའ་ཀི་ནི་ཙ་ཀྲུ་ཏན་མ་ཏན་ཏྲ་ནཱ་