Ngb-pt-0502-vol-06-text

Body

རྒྱ་གར་སྐད་དུ། ཨ་རུ་མ་ཧྭ་གུ་རྒྱ་པྲ་སྭ་ར་ནཱ་མ་སྐྲུ་ཏྲ། བོད་སྐད་དུ། འཕགས་པ་གསང་སྔགས་ཆེན་པོ་བསམ་གྱིས་མི་ཁྱབ་པའི་མདོ་ཞེས་བྱ་བ། བཅོམ་ལྡན་འདས་ཏིང་ངེ་འཛིན་གྱི་རྒྱལ་པོ་ལ་ཕྱག་འཚལ་ལོ འདི་སྐད་བདག་གིས་ཐོས་པའི་དུས་གཅིག་ན། །ཀུ་ཤའི་འདུ་ཁང་ན། །བཅོམ་ལྡན་འདས་བསྐྱེད་པ་སེང་གེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། འཁོར་རྣམས་ལ་འདི་སྐད་ཅེས་གསུངས་སོ། །ཀྱེ་མ་བྱང་ཆུབ་འདོད་ན་སྡིག་པའི་ལས་རྣམས་ཆེར་སྤྱོད་དེ་དོན་བློ་ལ་བཞག །གང་ཡང་སྙིང་རྗེར་མི་གཟུང་སུ་ཡང་སྙིང་མནོ་དེ་ནི་གང་ཡང་མེད། ཅེས་ཏེ་སྲོག་མེད་སྲོག་བཅད་སྡིག་ཏུ་འགྲོ་ན་ཡེ་ནས་ཆད་པ་སུ་ལ་སྡིག སྙིང་་་་་་་་་་་་་རྗེས་བྱང་ཆུབ་རླན་དུ་མི་གཏེར་སྙིང་རྗེས་སུ་ལ་གཟུང་། གང་ལ་འཛིན་པ་ཡོད་པ་དེ་ལ་ལྷག་པའི་བསམ་པ་ཡོད་ཀྱང་སྡིག །འཛིན་རྟོག་ཁང་འགྲམ་གཏིང་ནས་ཚུགས་པ་མེད་པ་བྱང་ཆུབ་བདེ་བའི་ཤུགས། །རྒྱལ་བ་མི་མཆོད་སངས་རྒྱས་མི་འགྲུབ་པར། །ཐར་པའི་ལམ་མི་འདོད་པ་དེ། །ཁབ་ལེན་རྡོ་ལ་ལྕགས་འདུ་བཞིན། །ཚོགས་གཉིས་བསགས་མི་དགོས་པར་འདུ། །མཆོད་རྟེན་ལྷ་ཁང་ལ་སོགས་འདུས་བྱས་དགེ་རྩ་མང་བྱ་མཉམ་སྙོམས་བཞག །བྱས་ལ་སོགས་པའི་ལས་ནི་བྱས་པ་མི་ཟིན་བྱས་ཤིང་རྟོགས་པའི་རྒྱུ། །ཡུལ་དང་དབང་པོ་གང་རྩོགས་ཆེད་དུ་མི་བྱ་དེ་བཞིན་གཞག་པར་བྱ། །རྡོ་རྗེ་མི་འཆང་སྔགས་རྫས་མི་འཆང་དབེན་པར་འདུག་མི་བྱ། །མཆོད་གཏོར་སྦྱིན་པའི་ཕྱོགས་ནི་གང་ཡང་མི་བཏང་མི་བསྔོ་སུ་ལ་བསྔོ། །ཆོ་ག་ལ་སོགས་འཁྲུལ་པའི་ལས་རྣམས་སྤྱོད་མི་བྱ། །རྫོགས་པ་ཆེན་པོའི་རང་བཞིན་ཀུན་གྱི་སྙིང་པོ་ཡིན་ཏེ་འདི་ལ་ཅི་ཡང་མེད། །ཕག་ཏུ་འདུག་ལ་སྒོམ་པ་མི་བྱ་མི་བྱ་རྡོ་རྗེ་ལྟ་བུལིཆོས་ཉིད་དེ་ལ་བསྒོམ་དུ་མེད། །དཔེར་ན་རི་རབ་རྩེ་ལ་ཉི་མ་སྟོང་ཤར་བས། །ཡེ་ཤེས་ཐུགས་ལ་ཉི་མ་གཅིག་ཤར་དྲོ། །རྡོ་རྗེ་ལྟ་བུའི་ཡེ་ཤེས་ནི། །ནམ་མཁའ་ལྟ་བུར་དངོས་པོ་མེད། །གོ་ལ་སྒྲིབ་རྟག་ཆད་མཚན་མའི་ཡུལ་ལ་གནས། །གཉེན་པོས་མི་ཤིགས་རྐྱེན་གྱིས་དབང་སྒྱུར་མིན། །དགེ་དང་སྡིག་པ་དེ་ཡི་སྤྱོད་ཡུལ་མིན། །རབ་དབང་ཐབས་ཀྱིས་རྫོགས་པས་རྩལ་གསུམ་ལུས་ལ་རྫོགས། །མཐོ་དམན་ཀློང་དུ་མཉམ་པས་ཡེ་ཤེས་བདག་མེད་སྐུ། །ས་ལམ་མི་བགྲོད་ཡེ་ཤེས་མིག་གཅིག་དྲི་མ་མེད། །རྩོལ་སྒྲུབ་ཟིལ་གནོན་བདེ་འབྱམ་ཡེ་ཤེས་སྐུ། །འཕགས་པ་གསང་སྔགས་ཆེན་པོ་བསམ་གྱིས་མི་ཁྱབ་པའི་མདོ་ལས། །བཅོམ་ལྡན་འདས་སེང་གེ་ལྟ་བུའི་དགོངས་པ་མཐར་ཕྱིན་པའི་ལེའུ་སྟེ་དང་པོའོ། །བཅོམ་ལྡན་འདས་ཁྱུང་ཆེན་གཤོག་རྫོགས་ཞེས་བྱ་བའི་ཏིང་ངེ་འཛིན་ལ་མཉམ་པར་གཞག་ནས། ཆོས་ཐམས་ཅད་ནམ་མཁའ་དང་མཉམ་པར་ཟླས་ཏེ། བཀའ་སྩལ་བ། ལ་བཟླ་རྫོགས་པ་ཆེན་པོའ་ཆོས། །སྟོན་མིན་ཅིག་ཆར་འཇུག་པའི་ཁམ་པོ་ཆེ། །ལ་རྣམས་ཡེབས་ཀྱིས་གཅོད་པའི་འཆོངས་པོ་ཆེ། །སྣང་སྲིད་གསལ་བར་བྱེད་པའི་ཤེས་རབ་ཆེ། །དོན་དམ་བསྐལ་པར་མི་གཏོང་བརྩོན་འགྲུས་ཆེ། །སྟོང་པའི་མུ་ལ་གནས་པས་བཟོད་པ་ཆེ། །ཀུན་གཞི་རྩད་ནས་གཅོད་པའི་ཏིང་འཛིན་ཆེ། །གང་གི་འགྲན་ཟླ་མེད་པས་ཟིལ་གནོན་ཆེ། །འགྲོ་བ་ཐབས་ཀྱིས་སྒྲོལ་བའི་སྟོབས་པོ་ཆེ། ཁྲེས་རབ་ཐབས་ཀྱི་ཕ་རོལ་རླབས་པོ་ཆེ། །ཆེ་བ་དགུ་ལྡན་སྟོན་མེད་ལྟ་བ་ནི། །ཐེག་པ་ཀུན་གྱི་ནང་ན་མཆོག་ཏུ་བསྔགས། །གཉིས་སུ་མེད་པའི་ཆོས་ཉིད་བྱང་ཆུབ་སེམས། །བརྗོད་ལས་འདས་པས་ཀུན་ཏུ་བཟང་པོའི་སྐུ། །འགྱུར་བ་མེད་པའི་བདེ་ཆེན་ལྷུན་གྱིས་རྫོགས། །མཐའ་དབུས་མེད་པའི་མཁའ་ལྟར་ཀུན་ལ་སྙོམས། །རང་བྱུང་དབྱིངས་ལ་རིག་པ་གསལ་ཤར་བ། །མཐའ་དབུས་མེད་པར་ཀུན་ལ་ཁྱབ་པ་ལ། །འཇུག་དང་མི་འཇུག་གཉིས་སུ་བཅད་པས་གོལ། །ཡེ་ཤེས་རྒྱལ་པོའི་ཚིག་ལས་འདས་པ་དེ། །རང་བཞིནམ་བཅོས་ལྷུན་གྱིས་རྫོགས་པ་ལ། །སྣང་སྲིད་ཐད་དུ་ཁྱོད་ཀྱིས་མཐོང་བས་གོལ། །སྲིད་གསུམ་མ་ལུས་ཀུན་ཏུ་བཟང་པོ་ལ། །རིག་པའི་མཛད་སྤྱོད་མཁའ་ལྟར་སྣོམས་པ་ཡིན། །གསལ་དང་མི་གསལ་གཉིས་མེད་མཉམ་པ་ལ། །གསལ་དང་མི་གསལ་ཁྱོད་ཀྱིས་ཤེས་པ་གོལ། །དོན་དམ་བདེ་ཆེན་འགྱུར་མེད་བྱང་ཆུབ་སེམས། །ཡང་དག་ལྷུན་རྫོགས་སྨྲ་བསམ་ཡུལ་ལས་འདས། །དེ་ཉིད་དེ་བཞིན་ཡེ་ནས་གནས་པ་ལ། །བསྐལ་པར་སྟོང་དང་མི་སྟོང་ཁྱོད་ཀྱིས་ཤེས་པར་གོལ། །མི་འགྱུར་རང་བྱུང་དབྱིངས་ལ་རིག་པའི་ཉི་མ་ཤར། །ཡང་དག་དོན་དེ་ཇི་བཞིན་ཡེ་ནས་གསལ། །མི་དམིགས་མཁའ་བཞིན་ཡེ་ནས་གསལ། །སྟོང་པའི་སྒྲོ་སྐུར་བཟོད་པ་ཡོད་པས་གོས། །ཆོས་ཉིད་མི་འགྱུར་རིག་པ་ཡེ་ཤེས་ལ། །གཟུང་འཛིན་ཡུལ་ལས་འདས་པའི་བཅོམ་ལྡན་འདས། །མཐའ་དབུས་ཀུན་ལ་ཁྱབ་པའི་ཆེ་བའི་བཞི། །དུས་གསུམ་མི་འགྱུར་བའི་ཆོས་སྐུ་ལ། །ང་དང་བདག་ཏུ་ཁྱོད་ཀྱིས་བཟུང་བས་གོལ། །རིག་པ་འགྱུར་མེད་བདེ་ཆེན་བྱང་ཆུབ་འདི། །ང་དང་བདག་མེད་ཀུན་ལ་མཉམ་པ་ལ། །མཐའ་དང་དབུས་མེད་ནམ་མཁའི་ཀློང་ན་གནས། །ཕྱོགས་དང་རིས་མེད་ཀུན་ཏུ་བཟང་པོའི་སྐུ། །ཡིད་བཞིན་ནོར་ལྟར་རང་བཞིན་གནས་པ་ལ། །ས་ལམ་རྒྱུད་བགྲོད་སྐྱེ་མེད་རྩད་ནས་བཅད། །ཏིང་འཛིན་ཆེན་པོར་རིམ་པས་སྦྱོར་བས་གོལ། །སྣང་སྲིད་ཐམས་ཅད་ཡང་དག་སངས་རྒྱས་ལ། །འགྲོ་བའི་སྟོབས་ཀྱིས་བསྒྲལ་དུ་ཡེ་སངས་རྒྱས། །རང་བྱུང་ལྷུན་རྫོགས་གྲུབ་པའི་སངས་རྒྱས་ལ། །སྣང་སྲིད་སྟོབས་ཀྱིས་བསྒྲལ་བས་མཐོང་བས་གྲོལ། །ཨ་ཏི་ཡོ་གས་བདེ་ཆེན་བྱང་ཆུབ་འདི། །བརྗོད་ལས་འདས་པས་ཡང་དག་བསྟན་པའི་སྐུ། །སྟོན་ཆེན་ལ་སོགས་སྟོང་པའི་རླུད་གནས་པ། །འཇུག་སྒོ་ལྟ་སྤྱོད་ཁྱད་པར་ཆེ་སྟེ་འཕགས། །ལྟ་ཕུགས་སྒྲོག་པས་བྱེ་བྲག་མེད་ཀྱིས་ཀྱང་། །སོ་སོའི་བཞེད་གཞུང་རོལ་པའི་རྒྱན་གྱིས་འཕགས། །མཉམ་པ་ཆེན་པོ་མཉམ་པ་ཁྱོད་ལས་འཕགས། །ང་ནི་བྱང་ཅུབ་སྙིང་པོར་གནས་པའི་ཚེ། །བྱང་ཆུབ་ཆོས་ལ་བྱང་ཆུབ་བསྒྲུབ་མེད་མི་གནས་སོ། །དེ་བཞིན་གཤེགས་པ་རྣམས་ཀྱི་ཡེ་ཤེས་ལ། །སེམས་ཅན་དག་གི་ཆོས་མེད་མི་གནས་པ། །ཨ་ཏི་ཡོ་ག་བྱ་བཙལ་འདས་པ་ལ། །བཟང་ངན་ཆེ་ཆུང་མི་གནས་སོ། །ལུང་ལས་འདས་པའི་ཆོས་ཉིད་ཡིན། །སེམས་ལས་འདས་པའི་སངས་རྒྱས་ལ། །ཀུན་གཞི་ལས་འདས་ཆོས་སྐུ་ཡིན། །ལྟ་བ་རླབས་ཀྱིས་སྤྱོད་པའི་དགོངས་པའོ། །འཕགས་པ་གསང་སྔགས་བསམ་གྱིས་མི་ཁྱབ་པའི་མདོ་ལས། །ཁྱུང་ཆེན་གཤོག་རྫོགས་ཀྱི་དགོངས་པ་བསྟན་པའི་ལེའུ་སྟེ་གཉིས་པའོ། །བཅོམ་ལྡན་འདས་ནམ་མཁའ་རྣམ་པར་དག་པས་ཏིང་ངེ་འཛིན་ལ་སྙོམས་པར་ཞུགས་ནས། བཀའ་སྩལ་པ། རྡོ་རྗེ་འདུས་པ་ཡེ་ཤེས་སྐུ། །ཚིག་ཅིག་མཚོན་པས་དོན་ཆེན་གསུང་རྣམ་པར་དག་པས་ལམ་ཆེན་པོ། །སངས་རྒྱས་ཉིད་ཀྱིས་ཡོངས་མ་གསུངས། །བགྲོད་མེད་ལམ་ལ་རབ་གནས་པ། །ཡེ་ཤེས་ལུས་ཅན་དྲི་མ་མེད། །མ་སྐྱེས་གསང་བའི་དཀྱིལ་འཁོར་རྫོགས། །རྣམ་དག་ལམ་ལ་རབ་གནས་པ། །མགོན་པོ་ཤེས་རབ་ཕ་རོལ་ཕྱིན། །སངས་རྒྱས་ཉིད་ཀྱི་དགོངས་པ་འདི། །ཀུན་གྱིས་རིག་པ་མ་ཡིན་ཏེ། །ལྷ་ལས་རྫོགས་ཏེ་འགྲོ་བ་རྣམས། །བྱང་ཆུབ་སེམས་དཔའ་མི་རིག་སྟེ། །ཆོས་པ་རྣམས་ཀྱི་དོན་མི་རྙེད། །སངས་རྒྱས་ལམ་ལ་མི་གནས་ཏེ། །ལམ་ལ་བགྲོད་པ་རྩོལ་བའི་གནད། །སངས་རྒྱས་ཉིད་ལས་འབྲས་བུ་མེད། །འབྲས་བུ་བསྒྲུབ་པའི་བྱང་སེམས་དོན་མི་རྙེད། །དེ་ཕྱིན་མགོན་པོ་དྲི་མེད་ངས། །ཐུགས་ཀྱི་དཀྱིལ་འཁོར་རང་བྱུང་བ། །ཡེ་ཤེས་ལྷུན་རྫོགས་མེ་ལོང་བཞིན། །སངས་རྒྱས་ཀུན་གྱི་ཡེ་ཤེས་སྐུ། །དྲི་མེད་རང་བྱུང་འོད་གསལ་བས། །དུས་གསུམ་གཅིག་སྟེ་རྟག་པར་བཞུགས། །རང་ལས་བྱུང་བའི་ཡེ་ཤེས་ལྔ། །གསང་བའི་དཀྱིལ་འཁོར་ཐུགས་ཀྱི་མཆོ་ག །མཚན་ཉིད་མེ་ཆུ་ས་རླུད་ལྔ། །རང་ལས་བྱུང་བའི་ཆོས་ཉིད་ལྔ། །ལས་ལ་མ་རྨོངས་ཐབས་ཀྱི་ཞིང་། །བྱེད་པ་པོ་ཉིད་རྡོ་རྗེས་ཏེ། །སྐྱེ་འགག་མེད་པའི་ཡེ་ཤེས་ཡིན། །བྱེ་པ་པོ་ཉིད་རང་བཞིན་གྱིས། །རྣམ་པར་དག་ནས་སངས་རྒྱས་པས། །འདུས་བྱས་ཆོས་ནི་ཡེ་ནས་མེད། །ང་ཡི་ཤེས་རབ་རང་བཞིན་གྱིས། །རྣམ་པར་དག་པ་ང་ཡིས་ཆོས། །ཐམས་ཅད་རྣམ་པར་མི་རྟོག་ཡིན། །དེ་ནས་བཅོམ་ལྡན་རྡོ་རྗེ་འཆང་། །ནམ་མཁའ་ལ་ནི་སྤྲིན་བཞིན་དུ། །སྣ་ཚོགས་སྣང་བ་ཡེ་ཤེས་སྐུ། །སྤྲོས་དང་བྲལ་བའི་ཆོས་ཉིད་ལ། །ཡེ་ཤེས་ཀུན་གྱི་རྒྱན་སྣང་བ། །ནམ་མཁའི་སྤྲིན་དང་ཆར་གྱི་ཚུལ། །ཨེ་མ་བདེ་གཤེགས་བཅོམ་ལྡན་འདས། །སངས་རྒྱས་ཀུན་གྱི་ཡེ་ཤེས་སྐུ། །རྟག་པར་དཀའ་བ་སྙིང་པོའི་དོན། །རབ་ཏུ་མི་རྟོག་གནས་མེད་པའོ། །ཨེ་མ་གཟུང་འཛིན་རྣམས་ཡངས་པ། །ཚིག་དང་ཡི་གེའི་སྤྱོད་ཡུལ་མིན། །ཆོས་བདག་མེད་པའི་མཉམ་པ་ཉིད། །རང་རིག་གཟོད་ནས་མ་སྐྱེས་པའོ། །ཨེ་མ་རང་རིག་མཉམ་པ་ཉིད་ཀྱི་ཀློང་། །མིང་དུ་བཏགས་པའི་ཆོས་རྣམས་ཀུན། །མཉམ་ཉིད་རྟོགས་ལས་གཞན་མེད་དོ། །ཨེ་མ་ཆོས་ཀུན་རང་རིག་ཡེ་ཤེས་ཏེ། །ངེས་པ་མེད་དེ་དངོས་རྟོགས་བྲལ། །དེ་ཉིད་དག་པའི་རང་བཞིན་པས། །མཁས་པ་ཅི་དགར་སྒོམ་པས་འགྲུབ། །ཨེ་མ་ཆོས་ཀུན་སྣང་བ་ཀུན། །རང་རིག་ངོ་བོ་བརྗོད་དུ་མེད། །དེ་ཉིད་རང་རིག་ཡེ་ཤེས་ནི། །མཁས་པས་རྟོགས་པས་སྒོམ་པར་འགྱུར། །ཨེ་མ་ཆོས་ཀུན་སྟོང་པའི་བདག །རང་གི་ངོ་བོ་བརྗོད་དུ་མེད། །བརྗོད་མེད་དེ་ཉིད་སྣ་ཚོགས་པས། །ཆོས་རྣམས་ཀུན་ལ་ཁྱབ་པར་གནས། །ཨེ་མ་ཧོ། མི་གནས་ཡེ་ཤེས་དངོས་པོའི་མཐའ་དང་བྲལ། །སྐུ་དང་ཡེ་ཤེས་རོལ་པའི་མཛད་སྤྱོད་ཀུན། །ནམ་མཁའ་དག་པར་ཀློང་ནས་ཅི་ཡང་སྣང་། །ཞེས་གསུངས་སོ། །འཕགས་པ་བསམ་གྱིས་མི་ཁྱབ་པའི་མདོ་ཆེན་པོ་ལས། །ནམ་མཁའ་རྣམ་པར་དག་པའི་དགོངས་པ་བསྟན་པའི་ལེའུ་སྟེ་གསུམ་པའོ། །བཅོམ་ལྡན་འདས་ཉི་ཟླ་ཁ་སྦྱོར་གྱི་ཏིང་ངེ་འཛིན་ལ་སྙོམས་པར་བཞུགས་ནས། ཆོས་ཐམས་ཅད་འགག་པ་མེད་པའི་དེ་བཞིན་ཉིད་དུ་ངས་བསྟན་ཏོ། །དེ་ནས་བཅོམ་ལྡན་འདས་ཀྱིས་དེ་ཁོན་ཉིད་ཀྱི་ཏིང་ངེ་འཛིན་ལ་བཞེངས་ཏེ་བཀའ་སྩལ་པ། ཤེས་རབ་ལྡན་པ་མཁའ་ལ་ཁྱུང་ཆེན་བཞིན། །རང་གི་ངོ་བོ་བརྗོད་དུ་མེད། །མི་གནས་མྱ་ངན་འདས་པའོ། །རྫུ་འཕྲུལ་ལྡན་པ་རྒྱ་མཚོའི་ལྟོ་འགྲོ་བཞིན། །གངས་ལ་ཉི་མ་ཤར་བ་འདྲ། །མེ་ལོང་མན་ཤེལ་བཞིན་ཏེ་སྙིང་པོ་མེད། །རྒྱལ་བ་མྱ་ངན་འདས་པའི་དགོངས་པ་ཡིན། །བྱང་ཆུབ་སེམས་དཔའ་མི་དམིགས་བྱང་ཆུབ་སེམས་མི་དམིགས། །རང་བྱུང་ཡེ་ཤེས་རབ་ཀྱིས་གྲོལ་བ་ནི། །སྤྲུལ་གྱི་སྙིང་པོ་བཞིན་ཏེ་གཞན་གྱི་སྤྱོད་ཡུལ་མིན། །རང་བྱུང་དབྱིངས་ནས་རིག་པ་གསལ་ཤར་བ། །ཐབས་དང་ཤེས་རབ་གསལ་བ་ཉི་ཟླ་ཁ་སྦྱོར། །ནམ་མཁའི་སྤྲིན་དང་ཆར་གྱི་ཚུལ། །བྱས་པའི་ཆོས་མིན་མེ་ལོང་ཡེ་ནས་གནས། །ཐུགས་རྗེ་རྩེ་གཅིག་ཡེ་ནས་རྣམ་པར་དག །རུས་སྦལ་མིག་གིས་ཉི་མ་མི་མཐོང་ལྟར། །ཆོས་རྣམས་ཀུན་གྱི་དེ་ཉིད་མཐོང་བ་མེད། །རྟགས་ཀྱི་ཡེ་ཤེས་ཚོན་གང་བ། །རྟོག་པའི་ཀླུངས་སུ་སུ་འདྲིས་པ། །ཡེ་ཤེས་དྲི་མ་མེད་པ་ཡིན། །ལུང་དུ་བསྟན་པ་བདེ་གནས་པ། །གོལ་སྒྲིབ་པ་དར་ཤ་ཆོད་པ་ཡི། །ཆོས་ལ་བློ་ནི་མི་གནས་ན། །རྟག་ཆད་ཚིག་ལས་འདས་པ་་ཡིན། །མ་བྱུང་མ་སྐྱེས་འོད་ཀྱི་སྙིང་པོ་ལ། །བཀོད་པ་ལྷ་ཡི་དཀྱིལ་འཁོར་རྩལ་མི་དགོས། །རང་སྣང་བཞིན་རྣམ་པར་དག་པའི་ཆོས་སྐུ་ལ། །ཁྲུས་དང་གཙང་སྦྲ་མེ་ཏོག་བྱུག་མི་འཚལ། །མཁའ་ལ་ཉི་མའི་དཀྱིལ་འཁོར་གསལ་བ་ལས། །འོད་དང་སྣང་བ་གཞན་ནས་བཙལ་མི་འཚལ། ཁོ།ས་རབ་རིག་པ་བཞི་ནས་ཤར་བ་ལ། །རྣ་བས་ཉན་ཅིང་ཚིག་ཕྱིར་འབྲང་མི་འཚལ། །ནོར་བུ་རིན་ཆེན་རང་ལ་ཡོད་བཞིན་དུ། །གཞན་ལ་བརྟེན་ནས་བཙལ་བས་དོན་མི་རྙེད། །དྲི་མ་མེད་པའི་ཆོས་སྐུ་ལ། །བཀྲུས་པས་མི་འདག་ནས་མཁའ་འདྲ། །རྐྱེན་དང་བྲལ་བའི་སྙིང་པོ་ལ། །བྱང་ཆུབ་སྙིང་པོ་ཡོངས་ཀྱིས་མེད། །རྡོ་རྗེ་སེམས་དཔའི་བྱང་ཆུབ་ནི། །རང་གི་རིག་པ་ཆེན་པོ་མཁྱེན། །རང་རིག་ཉིད་མའི་སྙིང་པོ་བཞིན། །དུས་གསུམ་གཅིག་སྟེ་བསྟན་པར་ཞུགས། །བྱང་ཆུབ་སེམས་དཔའ་སེམས་དཔའ་ཆེན་པོ་སྣང་ལ་མི་གནས་པ་རྣམས་ནི། ཡེ་ཤེས་ཀྱི་སྐུ་དྲི་མ་མེད་པའོ། །བཀོད་པ་མེད་པར་སྣང་བ་ཅན། སངས་རྒྱས་ཀྱི་སྐུ་དྲི་མ་མེད་པ་ཐབས་ཤེས་རབ་ཟུང་དུ་འབྲེལ་བའོ། །མ་བཀོད་པར་མཐའ་དང་དབུས་མེད། ཕྱོགས་དང་རིས་མེད། མཐོ་དམན་དང་ཡངས་དོག་མེད་པར་སྣང་བ་ནི། སྤྲོས་དང་བྲལ་བའི་ཆོས་ཉིད་ཀློང་ཡོངས་སུ་དག་པའོ། །འདོད་པའི་མཐའ་ཐམས་ཅད་དང་བྲལ་བས་ནི་ཏིང་འཛིན་གྱིས་རྩེ་གཅིག་པའི་ཟས་སོ། །ཡེ་ཤེས་ཀྱི་སྐུ་དྲི་མ་མེད་པ་དང་།ཀློང་ཀུན་ཏུ་བཟང་པོ་འདུ་འབྲལ་མེད་པར་བརྟག་པར་བཞུགས་པ་ནི་གྲོགས། ཁྱད་པར་ཅན་ནོ། །དགོས་པའི་འདུ་ཤེས་ཐམས་ཅད་དང་བྲལ་བ་ནི་དགོངས་པ་ཉག་གཅིག །རྡོ་རྗེའི་ཚིག་གཅིག་གིས་ཐག་ཆོད་ནས་དགོངས་པ་ལ་དོར། །དོན་ཀློང་དུ་དྲིལ་བདག་ཉིད་ཆེན་པོ་ཁོ་ན་ཉིད་དོ། །འཕགས་པ་གསང་སྔགས་ཆེན་པོ་བསམ་གྱིས་མི་ཁྱབ་པའི་མདོ་ལས། ཉི་ཟླ་ཁ་སྦྱོར་གྱི་དགོངས་པ་་མཐའ་གཏུགས་པའི་ལེའུ་སྟེ་བཞི་པའོ། །བཅོམ་ལྡན་འདས་རིན་པོ་ཆེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་ནས། རང་བྱུང་གི་ཡེ་ཤེས་ལ་ཡོན་ཏན་ཐམས་ཅད་འབྱུང་བ་ནི། ཟད་མད་རིན་ཆེན་གཏེར་གྱི་དབྱིག །སྐྱེ་མེད་ཀློང་ན་འོད་གསལ་བ། །ནམ་མཁའི་མཐོངས་ནས་ཉི་ཤར་འདྲ། །དངོས་མེད་གསལ་བ་ཆུ་ཟླ་བཞིན། །བདག་དང་བདག་ཉིད་ཆེན་པོའི་ཐུགས། །སྣང་ལ་མི་མངོན་འཇའ་ཚོན་འདྲ། །སྐུ་གསུང་ཐུགས་ཀྱི་རྡོ་རྗེའི་བདག །ཙུ་ཏའི་ཤིང་དང་གེལ་བའི་ཤིང་། །ལོ་མ་མེ་ཏོག་འབྲས་བུར་བཅས། །ཡོན་ཏན་སོ་སོའི་དོན་བྱེད་པ། །ནད་རྣམས་ཀུན་གྱི་གསོས་སུ་ཆེ། །གཉེན་པོ་གཉེན་པོ་འཇོམས་པ་ཡིས། །ཉོན་མོངས་ལྔ་དང་མཚམས་མེད་ལྔ། །དེ་ཡིས་གཉེན་པོ་དེ་ཡིས་འཇོམས། །དེ་ཉིད་རྣམ་པར་གྲོལ་བའི་ལམ། །སངས་རྒྱས་ཐོག་མཐའ་བདག་མེད་པས། །གཟུང་འཛིན་གཉིས་མེད་མྱ་ངན་འདས། །ཕྱི་ནང་སྣོད་བཅུད་རང་གྲོལ་བ། །གཞན་ལ་ལྟོས་འགྱུར་ཆོས་མ་ཡིན། །གླང་ཆེན་འདམ་དུ་བྱིང་བ་ལ། །སྐྱེས་བུ་རང་གིས་བཅིངས་པ་གཉིས། །གཞན་གྱིས་ཡང་དགག་ལ་འགྱུར། །བདེ་བ་ཆེན་པོ་བདེ་ལ་རྟག་སྤྱོད་པ། །རྣམ་པར་སྣང་མཛད་རྟག་པ་ཀུན་ཏུ་བཟང་། །ཇི་ལྟར་བརྗོད་པ་ཐ་སྙད་རྩོལ་བའི་གནད། །ཆོས་ཀྱི་ཡང་དག་དོན་དེ་བརྗོད་ནུས་ཀྱང་། །ཆོས་ཀྱི་ཡང་དག་དོན་ལ་གནས་མི་ནུས། །དེ་ཕྱིར་ཆོས་སྤྱོད་སངས་རྒྱས་དོན་ལ་སྒྲིབ། །ཆོས་ཀྱི་བློ་ཡིས་ཐེ་ཚོམ་ཀུན་གསལ་བས། །ཆོས་ལ་མི་གནས་ཐ་མལ་ཤེས་པར་བཞག །ཐ་མལ་ཤེས་པ་བློ་ཡིས་བཅོས་པ་མིན། །བདེ་དང་སྡུག་བསྔལ་བློ་ལ་རྟོག་པ་མེད། །མགོན་པོ་དྲི་མེད་སྐུ་ནི་དེ་བཞིན་ནོ། །རྣམ་པར་དག་པའི་སྐུ་བདེ་བ་ཆེན་པོ་ལ་ཡེ་ཤེས་ཀྱི་གྲོགས་བྱར་མེད་དོ། །ཀ་དག་པའི་ཡེ་ཤེས་རང་རང་སྣང་བ་ལ་བསླད་པར་བྱ་བའི་ཆོས་མེད་དོ། །ཐབས་ཀྱི་རྒྱལ་པོར་སྟོབས་ཀྱི་རིག་པ་ཤར་བས་ཆེ་བའི་ཡོན་ཏན་གཞན་གྱིས་དཔག་ཏུ་མེད་དོ། །ཤེས་རབ་ཟབ་མོ་ཆུ་བོ་གདྷའི་རྒྱུན་བཞིན་མི་འཆད་པས་ཐུགས་རྗེ་ལ་འབྲི་བཀོལ་མེད་དོ། །ཡང་དག་པར་རྫོགས་པའི་སངས་རྒྱས་ལ་སྒྲིབ་པ་སྦྱང་དུ་མེད་དོ། །ཅིས་ཏེ་ངན་སོང་གི་མཐའ་ལས་གྲོལ་བའོ། །ཡང་དག་པར་རྫོགས་པའི་སངས་རྒྱས་ལ་ལམ་མེད་དོ། །ཅིས་ཏེ་བགྲོད་པར་བྱ་བའི་ལམ་ལས་འདས་པའོ། །ཡང་དག་པར་རྫོགས་པའི་སངས་རྒྱས་ལ་ཚོགས་བསག་ཏུ་མེད་དོ། །ཅིས་ཏེ་ན་དངོས་པོའི་མཚན་མ་གང་ལ་ཡང་མི་གནས་པའོ། །ཡང་དག་པར་རྫོགས་པའི་སངས་རྒྱས་ལ་སྒྲིབ་པ་སྦྱང་དུ་མེད་དོ། །ཅིས་ཏེ་ཉི་མའི་སྙིང་པོ་ལ་མུན་པའི་གནས་མེད་དོ། །དེའི་ཕྱིར་ལྷག་མཐོང་རིག་པའི་ཡེ་ཤེས་ཀྱིས། །མ་རིག་པ་བདར་ཤ་བཅད། །ཆོས་སྤྱང་དང་རང་གི་མཚན་ཉིད་ཀྱིས་ཐེ་ཚོམ་གྱི་བདར་ཤ་བཅད། །ལམ་གྱི་ཡེ་ཤེས་ཀྱིས་ལམ་གྱི་བདར་ཤ་བཅད། །ཅེས་པའོ། །འཕགས་པ་གསང་སྔགས་བསམ་གྱིས་མི་ཁྱབ་པའི་མདོ་ལས། །ཡིད་བཞིན་ནོར་བུ་རིན་པོ་ཆེའི་དགོངས་པ་མཐར་ཕྱིན་པའི་ལེའུ་སྟེ་ལྔ་པའོ། །བཅོམ་ལྡན་འདས་རྒྱ་མཚོ་གདངས་པའི་ཏིང་ངེ་འཛིན་ལ་སྙོམས་པར་བཞུགས་པའི་དུས་སུ། ཆོས་ཐམས་ཅད་ཐིག་ལེ་ཆེན་པོའི་ཀློང་དུ་སངས་རྒྱས་ཏེ། རྒྱ་མཚོ་ལ་གཟའ་སྐར་བཀྲ་བའི་ཚུལ་དུ་བཤད་དེ། ཇི་ལྟར་རྒྱ་མཚོ་དྭངས་བ་ལ། །ཉི་ཟླ་གཟའ་སྐར་ཤར་བ་ཡང་། །རང་གི་ངོ་བོ་མ་འདྲེས་སོ་སོར་གསལ། །དེ་བཞིན་ཆོས་ཉིད་རྣམ་དག་སྤྲོས་དང་བྲལ་བ་ལ། །རིག་པ་ཡེ་ཤེས་ཆོས་རྣམས་ཀུན་གྱི་བདག །སྐྱེ་མེད་ཀློང་ན་མ་འདྲེས་སོ་སོར་གསལ། །སྐུ་གསུམ་རྒྱལ་བའི་དགོངས་པ་མཐར་ཕྱིན་པ། །ཨ་ཏིའི་ཀློང་ནས་རང་བཞིན་རྣམ་པར་དག །ཨ་ཏི་ཡོ་ག་བདེ་ཆེན་བྱང་ཆུབ་མཆོག །ཡེ་ཤེས་ལུས་ལ་སྤྲུལ་པའི་སྐུར་བསྟན་པ། །རྡོ་རྗེ་སེམས་དཔའ་སངས་རྒྱས་ཀུན་གྱི་དངོས། །རིག་པ་ཡེ་ཤེས་རང་བྱུང་དབྱིངས་གསལ་ཏེ། །སྐད་ཅིག་གཅིག་ལ་བདག་ཉིད་སངས་རྒྱས་ཏེ། །དེ་ཕྱིར་སངས་རྒྱས་ཆོས་ལ་མི་གནས་སོ། །ཆོས་ནི་སེམས་ཅན་རྣམས་ཀྱི་ལྟ་བ་ཡིན། །མཚོན་པའི་བྱང་ཆུབ་ཆོས་ཡིན་ཀྱང་། །རྫོགས་པའི་ལྟ་བ་ཆོས་མ་ཡིན། །ཐོག་མའི་མགོན་པོ་དྲི་མེད་ཀྱང་། །ཆོས་ལ་བརྟེན་པས་མ་ཡིན་ཏེ། །མི་བསྐྱོད་དབྱིངས་ནས་རང་བྱུང་བའོ། །དེ་ཕྱིར་ཆོས་ཀྱི་སངས་མི་རྒྱ། །ཆོས་ནི་ཚིག་ཕྱིར་འབྲང་ཞིང་དོན་ལ་གཡེལ། །རང་བྱུང་ཡེ་ཤེས་ཉིད་ནི་ཚིག་གི་མཐའ་དང་བྲལ། །དེ་ཕྱིར་ཡང་དག་དོན་ལ་ཚིག་མེད་ཡི་གེ་མེད། །སེམས་ཅན་རྣམས་ནི་ཐོག་མའི་ཆོས་ལ་རབ་བརྟེན་ལ། །ཆོས་རྣམས་ཀུན་གྱི་མ་བཅིངས་མ་བཀྲོལ་བའི། །ཡེ་ཤེས་རྒྱལ་པོ་ཚིག་ལས་འདས་པ་སྟེ། །སྨྲ་བའི་ཁྱུ་མཆོག་གཞན་གྱི་དྲིང་མི་འཇོག །རང་རིག་རྒྱལ་པོ་ཚིག་ལས་འདས་རྟོགས་ན། །ཕྱི་ནང་སྣོད་བཅུད་བདག་ཉིད་ཆེན་པོར་ལྡོག །ང་དྲི་མ་མེད་པ་ཡེ་ཤེས་ཀྱི་སྐུ་ལ། །དགེ་བ་དང་སྡིག་པ་གཉིས་མེད་དོ། །ང་གདོད་ནས་སྙིང་པོ་བྱང་ཆུབ་ཏུ་གནས་པ་ལ། །འབྲས་བུ་ཐོབ་པ་དང་མ་ཐོབ་པ་གཉིས་མེད་དོ། །ང་བསྟོད་པ་ཆེན་པོ་ཡེ་ཤེས་ཀྱི་སྙིང་པོ་སྤྱན་དུ་གནས་པ་ལ། །བདེ་བ་དང་སྡུག་བསྔལ་བ་གཉིས་མེད་དོ། །ང་རང་རིག་པའི་ཡེ་ཤེས་ཆོས་ཉིད་སྐྱེ་བ་མེད་པའི་དབྱིངས་ན། །དུས་གསུམ་འདུ་འབྲལ་མེད་པར་བཞུགས་པ་ལ། །གནས་དབྱེན་པ་དང་མི་དབྱེན་པ་གཉིས་སུ་མེད། །ཆོས་ཀྱི་སྐུ་བདེ་བ་ཆེན་པོའི་ངང་ནས། །ཡེ་ཤེས་ཀྱི་རྩལ་མ་འདྲེས་པས་སོ་སོར་གསལ་བས་