ལོ་ཙཱ་བ་ཆེན་པོ་བཻ་རོ་ཙ་ནའི་རྣམ་ཐར་ ལེའུ་བདུན་པ

༈ ཨུ་རྒྱན་གྱིས་བོད་ཀྱི་ལྷ་འདྲེ་བཏུལ་བ།

དེ་ནས་སློབ་དཔོན་དཔོན་གཡོག་ཚོས་ཡར་བྱོན༔ མང་ཡུལ་སྟོན་ལ་ཁར་དུ་བྱོན་པས༔ ཞང་ཞུང་དགྲ་ཛ་མུན་གྱིས་སློབ་དཔོན་དཔོན་གཡོག་རི་བྲག་གཉིས་ཀྱི་བར་དུ་བཅར་བས༔ སློབ་དཔོན་གྱིས་བྲག་ལ་ཕྱག་འཁར་བཙུགས་ལམ་བཏོད༔ བྲག་གི་ཁ་ལ་བྱོན་པས༔ མོ་སྔངས་ཏེ་བྲེད་ནས་སྲོག་སྙིང་ཕུལ༔ གསང་མཚན་རྡོ་རྗེ་གཡུ་བུན་མར་བཏགས་སོ༔ དེ་ནས་བྱང་གནམ་ཐང་མཁར་ནག་ལ་བར་བྱོན་པས༔ གནམ་སྨན་དཀར་མོས་སློབ་དཔོན་ལ་ཐོག་ཕབ་པར་བྱས་ཙ་ན༔ སློབ་དཔོན་གྱིས་ཕྱག་གཡོན་པའི་མཐིལ་དུ་ཆུ་མེ་ལོང་གང་ཙམ་བཞག་པས༔ སྭོ་ཟེར་ཙ་ན་ཐོག་རྣམས་ཁྲག་སྐམ་སྲན་མའི་དོག་པོ་བདུན་ཙམ་དུ་སོང་འདུག་གོ༔ མོ་བྲེད་ནས་དཔལ་མོ་དཔལ་མཚོར་བྲོས༔ སློབ་དཔོན་གྱིས་མཚོ་མེ་དཔུང་དུ་བསྒོམས་པས་མཚོ་འཁོལ་མོའི་ཤ་རུས་བྱེ༔ མོས་བྲོས་པས་སློབ་དཔོན་གྱིས་རྡོ་རྗེ་བརྒྱབ་པས་མིག་གཡས་པ་བཅར༔ དེར་སྤྱན་སྔར་ཡོང་སྟེ་ཞུ་བ་གསོལ་པ༔ སྟོན་པའི་ཞལ་སྐྱིན་རྡོ་རྗེ་ཐོད་ཕྲེང་རྩལ༔ བར་ཆད་མི་བགྱི་ཐུགས་དམ་དགོངས་པ་གློད༔ ཅི་བགྱི་བཀའ་ཉན་སློབ་དཔོན་འབངས་སུ་མཆི༔ ཞེས་ཟེར་ཞིང་སྲོག་སྙིང་ཕུལ་དམ་ལ་བཏགས༔ གསང་མཚན་ཤ་མེད་རྡོ་རྗེ་གཡུ་སྒྲོན་མར་བཏགས༔ གཏེར་ཁ་ཆེན་པོ་གཅིག་གི་གཉེར་གཏད་དོ༔ དེ་ནས་འུ་ཡུག་ཏུ་བྱོན་བརྟན་མ་བཅུ་གཉིས་ཀྱིས་ཐོག་མདའ་བཅུ་གཉིས་ཕབ༔ རིའི་བར་དུ་བཙིར་བས་སློབ་དཔོན་གྱིས་རི་བྲག་ཐམས་ཅད་ཕྱག་འཁར་གྱིས་བོར༔ བརྟན་མའི་གནས་ཐམས་ཅད་བཤགས་པས་ཐོག་ཐམས་ཅད་སོལ་དུམ་དུ་གྱུར༔ དེར་བརྟན་མ་བཅུ་གཉིས་སྐྱོང་མ་བཅུ་གཉིས་ཡ་མ་བཅུ་གཉིས་ཀྱིས་སྲོག་སྙིང་ཕུལ་ནས་དམ་ལ་བཏགས༔ གཏེར་ཁ་རེ་རེའི་གཉེར་གཏད་དོ༔ དེ་ནས་འུ་ཡུག་བྱེ་ཚང་རྫོང་ཁར་ཕེབས་དུས༔ དགེ་བསྙེན་རྡོ་རྗེ་ལེགས་པ་མཆེད་འཁོར་སུམ་བརྒྱ་དྲུག་ཅུས་བསུ་བ་བྱས༔ དམ་ལ་བཏགས་ནས་གཏེར་གྱི་གཉེར་གཏད༔ དེ་ནས་ཤམ་པོ་ལུང་དུ་བྱོན་ཙ་ན༔ ཡར་ལ་ཤམ་པོས་གཡག་དཀར་པོ་རི་ལོགས་ཙམ་དུ་སྤྲུལ་ཏེ༔ ཁ་རླངས་དང་སྣ་རླངས་སྤྲིན་དུ་འཐིབས༔ ཁ་ཆུ་སྣ་ཆུ་ཁ་བ་བུ་ཡུག་ཏུ་ཕབ་ནས་བར་ཆད་བརྩམས༔ སློབ་དཔོན་གྱིས་ལྕགས་ཀྱུའི་ཕྱག་རྒྱས་སྣ་ནས་བཟུང་༔ ཞགས་པའི་ཕྱག་རྒྱས་བཅིངས༔ ལྕགས་སྒྲོག་གི་ཕྱག་རྒྱས་བསྡམས༔ དྲིལ་བུའི་ཕྱག་རྒྱས་བརྡུངས་པས༔ ཁྱེའུ་དར་དཀར་གྱི་རལ་ཁ་ཅན་ཅིག་ཏུ་སོང་སྟེ༔ སྲོག་སྙིང་ཕུལ་དམ་ལ་བཏགས་གཏེར་གྱི་གཉེར་གཏད་དོ༔ དེ་ནས་གཉན་ཆེན་ཐང་ལྷའི་རྩར་བྱོན་པས་ཐང་ལྷས་གནོད་སྦྱིན་ཆེན་པོ་ཅིག་ཏུ་སྤྲུལ་ཏེ༔ མགོ་བོ་གྲུ་གུའི་ཡུལ་དུ་སླེབ་པ༔ གཞུག་མ་ཁམས་ཀྱི་གཡར་མོ་ཐང་དུ་སླེབ་པའི་སྦྲུལ་དཀར་གཅིག་གིས་ལམ་འཕྲང་བཅད་པས༔ སློབ་དཔོན་གྱིས་སྦྲུལ་གྱི་སྐེད་པར་ཕྱག་འཁར་བཙུགས་ནས༔ ཀླུའི་རྒྱལ་པོ་མེ་ལེ་ཐོད་དཀར་ཁྱོད༔ དྲི་ཟའི་རྒྱལ་པོ་ཟུར་ཕུད་ལྔ་པ་ཁྱོད་ཕར་སོང་ལ་ཚོགས་འཁོར་གཤོམ་དང་གསུངས༔ ཐང་ལྷས་གངས་ལ་བྲོས་པས༔ སློབ་དཔོན་གྱིས་གངས་བཞུ་ནས་གཡའ་སྔོ་ཉིལ་གྱིས་བྱུང་༔ མ་བཟོད་པར་བྱིས་པ་གཡུའི་ཟུར་ཕུད་ཅན་དར་དཀར་རལ་དཀར་གོན་པ་ཅིག་ཏུ་གྱུར་ནས༔ ཞལ་ཟས་སྣ་ཚོགས་ཚོགས་འཁོར་དུ་དྲངས༔ ཕྱག་དང་བསྐོར་བ་བྱས་སྲོག་སྙིང་ཕུལ༔ གསང་མཚན་རྡོ་རྗེ་མཆོག་རབ་རྩལ་དུ་བཏགས༔ གཏེར་གྱི་གཉེར་གཏད་དོ༔ དེ་ནས་བྱང་འཕན་ཡུལ་ཡུ་མོ་ཐང་ལ་བྱོན༔ བྱང་གི་ཏིང་ཏིང་ཏིང་ལོ་སྨན་དང་༔ རྟག་སྨན་གྱི་དོང་དང་༔ བྱང་ཕུག་མ་རྣམས་ཀྱིས་བྱང་གི་ལྷགས་པ་ཐམས་ཅད་དུས་གཅིག་ལ་བསྡུས་ནས༔ སློབ་དཔོན་འཁོར་བཅས་ལ་བརྒྱབ་པས་འཁོར་རྣམས་སྒྲིབ་ལ་ཁད༔ སློབ་དཔོན་ཡང་བསིལ་ལ་ཁད་བྱུང་ཙམ་ན༔ སློབ་དཔོན་གྱིས་མེ་རླུང་མནན་པས་གནོད་སྦྱིན་གྱེན་ནས་ཐམས་ཅད་མར་ལ་ཉི་མ་སོང་བའམ༔ རྡོ་ཚན་ལ་ཁ་བ་འབབ་པ་ལྟར་སོང་ནས༔ ཏིང་ལོ་སྨན་དང་གནོད་སྦྱིན་ཕོ་མོ་ཐམས་ཅད་དམ་ལ་བཏགས་སྲོག་སྙིང་ཕུལ༔ གཏེར་གྱི་གཉེར་གཏད་དོ༔ དེ་ནས་གནམ་གྱི་ཤུ་སྡོང་གླང་སྒྲོམ་དུ་བྱོན༔ བླ་མེད་དོན་རྫོགས་ཀྱི་ཕོ་བྲང་ཞལ་ཕྱེ༔ སྒྲུབ་པ་ཞག་བདུན་མཛད༔ ཞག་ཐ་མའི་ནམ་དགུང་ལ་ཐུགས་སྔངས་ཡེད་ཀྱིས་བྱུང་བས༔ བདུད་ཀྱི་དམག་དཔོན་རྣམས་རུ་དར་རེ་རེ་ཕྱར༔ སློབ་དཔོན་ཐུགས་སྔངས་པ་བཟོད་པར་གསོལ་ཅེས་སྲོག་སྙིང་ཕུལ་དམ་ལ་བཏགས་གཏེར་གཅིག་གཏད་དོ༔ དེ་ནས་ཁམས་ཀྱི་བླ་བ་རྐང་གཅིག་ཏུ་བྱོན༔ ཐེ་བྲང་ཐམས་ཅད་དམ་ལ་བཏགས་སོ༔ དེ་ནས་ཁམས་ཀྱི་སེང་གེ་བྲག་ཏུ་བཞུགས་པས༔ མ་སངས་གཡའ་སྤང་སྐྱེ་གཅིག་རྒད་པོ་བྱ་ཡུའི་ཞྭ་གྱོན་ནས༔ མགོ་བོ་སློབ་དཔོན་གྱི་པང་དུ་བཞག༔ རྐང་པ་ཁམས་ཀྱི་གཡར་མོ་ཐང་ལ་བསྐྱལ༔ ལག་པ་གངས་དཀར་ཏི་སེའི་མཚོ་ལ་འཕང་དུ་བརྐྱང་༔ མི་མ་ཡིན་བསམ་གྱིས་མི་ཁྱབ་པ་ལྷགས་ནས་མཚོན་གྱི་ཆར་ཕབ༔ དེར་སློབ་དཔོན་གྱིས་གུ་རུ་དྲག་པོ་རིགས་ལྔར་སྤྲུལ༔ གཡའ་སྤང་དང་ལྷ་འདྲེ་ཐམས་ཅད་བཏུལ༔ ཆུ་བོ་རི་དང་ཁ་རག་ཏུ་མ་མོ་སྲིན་མོ་ཐམས་ཅད་དམ་ལ་བཏགས༔ དེ་ནས་གཙང་གི་སིལ་མ་ལ་ཁར་བྱོན༔ སྨན་མོ་ལྷ་སྨན་ཐམས་ཅད་དམ་ལ་བཏགས༔ ལྷོ་ཧ་ལུང་པ་ཁྲ་མོར་བྱོན་མ་ཡམ་བཏུལ༔ རུ་འདོད་ནག་པོར་སྲིན་པོ་ཐམས་ཅད་བཏུལ༔ མལ་དྲོའི་ནང་དུ་ཀླུ་རིགས་ཐམས་ཅད་བཏུལ༔ སྤ་གྲོ་ཅལ་དུ་བྱོན་བཙན་ཐམས་ཅད་དམ་ལ་བཏགས༔ སྟག་ཚང་སེང་གེར་ཀླུ་བདུད་ཐམས་ཅད་དམ་ལ་བཏགས༔ གཡུ་འཛིན་ཕུག་མོར་ཕོ་རྒྱུད་ཐམས་ཅད་བཏུལ༔ དུག་མདོག་བྲག་དམར་དུ་དྲི་ཟ་ཐམས་ཅད་བཏུལ༔ གན་ས་ཆུ་མིག་ཏུ་དགེ་བསྙེན་ཐམས་ཅད་བཏུལ༔ བྱེ་མ་རབ་ཁར་ལྷ་སྲིན་ཐམས་ཅད་བཏུལ༔ གངས་དཀར་ཏི་སེར་རྒྱུ་སྐར་ཉེར་བརྒྱད་བཏུལ༔ གླང་ཆེན་སྦས་ཕུག་ཏུ་གཏེར་གཅིག་སྦས༔ ལྷ་རྒོད་གངས་སུ་གཟའ་ཆེན་བརྒྱད་བཏུལ༔ གཏེར་ཁ་གཉེར་གཅིག་སྦས༔ བུལ་ལེ་གངས་སུ་ལྷ་འདྲེས་ཚོགས་འཁོར་བཤམས༔ འཇིག་རྟེན་གྱི་ཟས་ནོར་ཐམས་ཅད་ཕུལ༔ བུལ་ལེ་གངས་དང་ལྷ་རྒོད་གངས་སུ་གཏེར་རེ་རེ་སྦས༔ གློ་བོར་དུ་བརྟན་མ་སྤུན་དགུ་དམ་ལ་བཏགས༔ ཕོ་མོ་གངས་སུ་ཇོ་བོས་གདན་དྲངས་དམ་ལ་བཏགས༔ རྩེ་ལྷ་གངས་སུ་གདན་དྲངས་དམ་ལ་བཏགས༔ མཁའ་རི་བཙན་གྱིས་གདན་དྲངས་དམ་ལ་བཏགས༔ དེ་དག་ཀུན་ལ་གཏེར་རེ་རེ་གཏད་དོ༔ དེ་ནས་ཟབ་བུ་ལུང་དུ་བྱོན་བདུད་ཐམས་ཅད་དམ་ལ་བཏགས༔ དེ་ནས་གཡའ་རི་གོང་དུ་བྱོན་རྒྱལ་པོ་དང་འགོང་པོ་ཐམས་ཅད་དམ་ལ་བཏགས༔ དེ་ནས་ཡང་རྒྱལ་པོའི་བསྐྱར་ཆོག་པ་བྱུང་ནས༔ སྟོད་ལུང་འགྲམ་བུ་ཚལ་དུ་འཛོམས་དུས་བཏབ༔ རྒྱལ་པོ་ཁེངས་དྲེགས་ཀྱིས་ཕོ་ཉ་བ་བཏང་ཡང་མ་བྱོན་པས༔ ལ་ལ་བྲག་རིར་དགུན་གཅིག་ངང་ཡོལ་ལ་བཞུགས༔ ཇོ་རང་འགོང་པོ་དང་༔ སོ་ཤ་དམ་སྲི་བཏུལ་ལོ༔

བཻ་རོ་ཙ་ནའི་རྣམ་ཐར་འདྲ་འབག་ཆེན་མོ་ལས༔ ཨུ་རྒྱན་གྱིས་བོད་ཀྱི་ལྷ་འདྲེ་བཏུལ་བའི་སྐབས་ཏེ་བདུན་པའོ༔