Ngb-pt-0777-vol-08-text

Body

རྒྱ་གར་སྐད་དུ། །ཤི་དེ་བི་སྲི་ཏ་ཀྭ་ལི་ཏན་ཏྲ་ནཱ་མ། །བོད་སྐད་དུ། །དཔལ་ལྷ་མོ་ཤན་པ་ནག་མོའི་རྒྱུད་ཅེས་བྱ་བ། །དཔལ་འཇིགས་བྱེད་ཀྱི་རྒྱལ་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ནི། །རི་རབ་ཀྱི་རྩེ་མོ་རྩུབ་འགྱུར་གྱི་ཚལ་ཆེན་པོ་ན་ལྷ་དང་ལྷ་མ་ཡིན་གཉིས་གཡུལ་འགྱེད་པའི་གནས། །གནོད་སྤྱིན་ཨུད་པ་ལའི་གདོང་ཁྲོས་པའི་དུར་ཁྲོད་སྲིན་མོ་ཀང་ཀ་ལ་ཟངས་ཀྱི་གཤོག་པ་མེ་ལྟར་འབར་བའི་ཁང་པ་མི་རོ་གསར་རྙིང་མང་པོ་ཡོད་པའི་ཀེང་རུས་དང་། །རྣག་ཁྲག་གི་རུལ་བྲོ་བ། ཁེན་ཏུ་འཇིགས་པ་རབ་ཏུ་སྐྱི་གཡའ་བའི་གནས་དེ་ན། །བཅོམ་ལྡན་འདས་དཔལ་དྲག་པོ་ཕྱག་ན་རྡོ་རྗེ་ག་་པོ་ལུས་བསྐལ་པའི་མེ་ཆེན་པོ་ལྟར་འབར་བ། །སྲིད་པ་གསུམ་ལས་རྣམ་པར་རྒྱལ་བ། །ཉི་མ་སྟོང་གི་གཟི་བརྗིད་དང་ལྡན་པ། །སངས་རྒྱས་སྟོང་རྩ་བརྒྱད་ཀྱིས་ལས་ཀྱི་ལྷར་དབང་བསྐུལ་ཏེ་ཁྲོ་བོ་ཆེན་པོའི་ཆ་བྱད་དུ་བྱས་ནས་བཞུགས་སོ། །དེའི་འཁོར་ནི་བརྒྱ་བྱིན་དང་། གཤིན་རྗེ་དང་། སྲིན་པོ་དང་། ཤ་ཟ་དང་། མ་མོ་ནག་མོ་དང་། །ལྟོ་འཕྱེ་དང་།གྲུལ་བུམ་དང་། དྲི་ཟ་དང་། མི་འམ་ཅི་དང་། རྣམ་ཐོས་ཀྱི་བུ་དང་། ལྷ་མ་ཡིན་དང་། ནམ་མཁའ་ལྡིང་དང་། འབྱུང་པོ་དང་། མ་མོ་དང་། སེང་གེ་དང་། སྟག་དང་། ཝ་དང་། ཁྱི་སྤྱང་དང་། དོམ་དང་།དྲེད་དང་། །གཟིག་དང་། །གུང་དང་། །ཁྱི་ལི་དང་། །དུར་བྱ་དང་། །ཀང་ཀ་དང་། །བྱ་རྒོད་དང་། །བཞད་པ་དང་། བྱ་རོག་དང་། །འུག་པ་དང་། །ཆུན་ལག་དང་། །ཁྲ་དང་། །སྦྲུལ་དང་། །རུས་སྦལ་དང་། །དེ་ལ་སོགས་པ་འཁོར་རྣམ་པ་མང་པོས་བསྐོར་ནས་བཞུགས་སོ། །དེའི་ཚེ་འཁོར་འདུས་པའི་ནང་ནས། །ལྷའི་དབང་པོ་བརྒྱ་བྱིན་སྟན་ལས་ལངས་ནས། །དཔལ་ཕྱག་ན་རྡོ་རྗེ་ལ་བསྐོར་བ་བྱས་ནས། །རྒྱན་དང་ལོངས་སྤྱོད་བསམ་གྱིས་མི་ཁྱབ་པའི་ཆར་ཕབ་ནས་མཆོད་དོ། །དེ་ནས་བརྒྱ་བྱིན་གྱིས་འདི་སྐད་ཅེས་གསོལ་ཏོ། །ཀྱེ་ཀྱེ་གསང་བདག་རྡོ་རྗེ་འཛིན། །དངོས་གྲུབ་ཚོགས་ལ་མངའ་བརྙེས་ཁྱོད། །ཐུགས་རྗེའི་བདག་པོ་ཡིན་པས་ན། །མ་འོངས་སེམས་ཅན་སྐལ་ལྡན་གྱིས། །རྡོ་རྗེ་མཁའ་འགྲོ་སྒྲུབ་པའི་ཐབས། །བདག་གི་ཡོངས་སུ་ཞུ་ལགས་ཀྱིས། །དེ་རིང་སྟོན་པས་སྐབས་དབྱེ་ཞུ། །དེ་སྐད་གསོལ་པ་དང་། །ངཔལ་ཧཱུཾ༷་མཛད་ཆེན་པོ་དེ་མེ་འབར་པའི་གདན་ལས་བཞེངས་ཏེ། །ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀྱེ་མ་དུས་མཐའི་སེམས་ཅན་རྣམས། །མི་ནུབ་ཆོས་ཀྱི་རྒྱལ་མཚན་དང་། །རྡོ་རྗེ་མཁའ་འགྲོ་གྲུབ་གྱུར་ནས། །བདག་གཞན་དོན་ལ་ཐོགས་པ་མེད། །ངས་བཤད་ཁྱོད་ཀྱིས་ཡིད་ལ་ཟུང་། །ཞེས་བཀའ་སྩལ་པ་དང་། །འཁོར་དེ་དག་དགའ་བ་དང་སྤྲོ་བ་སྐྱེས་ནས། །ལྷའི་མེ་ཏོག་མན་དྷ་ར་ལ་སོགས་པའི་རྒྱན་གྱི་ཆར་ཆེན་པོ་མངོན་པར་ཕབ་པོ། །དེ་ནས་དཔལ་ཕྱག་ན་རྡོ་རྗེ་ལ། །ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །དྲག་པོ་ཧཱུཾ༷་མཛད་རྡོ་རྗེ་འཛིན། །ད་ལྟ་འདོད་ཁམས་འདི་ཉིད་ནི། །ལྷ་མོ་ནག་མོ་ཞེས་བྱ་བ། །ག་་ཞིང་ཁྲོ་ལ་ལུས་ཀྱང་འཇིགས། །སྲིད་གསུམ་དྲེགས་པའི་ནུས་མཐུ་ཅན། །དངོས་གྲུབ་དམ་པའི་གཞི་འགྱུར་འདི། །དང་པོ་རྒྱུ་ནི་ཇི་ལྟ་བ། །ལྟ་བ་དཀྱིལ་འཁོར་རྫས་རྣམས་དང་། །ཏིང་འཛིན་སྔགས་དང་ཕྱག་རྒྱ་དང་། །དམ་ཚིག་དྲོད་ཚད་སྤོགས་དང་བསྟེན། །དེ་བཞིན་ལས་ཀྱི་རིམ་པ་རྣམས། །སྟོན་པས་བཀའ་སྩལ་བདག་ཉན་འཚལ། །དེ་སྐད་ཅེས་གསོལ་པ་དང་། དཔལ་ཕྱག་ན་རྡོ་རྗེས་བཀའ་སྩལ་པ། །བརྒྱ་བྱིན་ལ་སོགས་པའི་འཁོར་འདུས་པ་ཁྱེད་རྣམས་ཀྱིས་རྡོ་རྗེ་མཁའ་འགྲོའི་རྒྱུད་ཞུ་བ་ལེགས་སོ། །ཁྱེད་ཀྱང་རབ་ཏུ་ཉོན་ལ་ཡིད་ལ་ཟུང་ཞིག །ངས་རྣམ་པར་ཕྱེ་སྟེ་བསྟན་པར་བྱའོ། །སྔོན་འདོད་པའི་ཁམས་འདི་ཉིད་ན། །ལྷ་དབང་ཕྱུག་མཧྭ་དེ་བ་དང་། །ལྷ་མོ་ཨུ་ཝི་དེ་བྲི་གཉིས་ལ་བུ་ཚ་མིང་སྲིང་གཉིས་ཡོད་པ་ལ། །མིང་པོ་ནི་གཤིན་རྗེ་དམར་པོ་ཞེས་བྱ་བ་བཞུགས་སོ། །སྲང་མོ་ནི་ལྷ་མོ་དཀར་མོ་དུང་སྐྱོང་མ་ཞེས་བྱ་བ་ཡིན་པ་ལས། །ལྷ་མོ་དུང་སྐྱོང་མ་དེ་ནི་རི་རབ་རྩེ་ན་རྣམ་པར་རྒྱལ་བའི་ཁང་བཟངས་ཀྱི་བྱང་ཤར་གྱི་མཚམས་བྱང་ཆུབ་ཀྱི་ཤིང་དྲུང་རིན་པོ་ཆེའི་ཁང་པ་བདུན་བརྩེགས་པའི་གཞལ་ཡས་ཁང་ན་རིན་པོ་ཆེའི་སྟེང་ན་གསེར་དང་། །དངུལ་དང་། །བི་དུ་རུའི་དབུ་རྒྱན་དང་། །མགུར་ཆུས་བརྒྱན་ཏེ། །ལུས་འགྱིང་བག་ཏུ་བཞུགས་ཏེ། །ལྷའི་བུ་མོ་མང་པོས་རྒྱན་དང་། །ལོངས་སྤྱོད་དང་། །གླུ་དང་དབྱངས་དང་། །རོལ་མོ་བསམ་གྱིས་མི་ཁྱབ་པའི་མཆོད་པ་བྱེད་དོ། །བརྒྱ་བྱིན་ཉོན་ཅིག །དུས་དེ་ཙམ་ན་སྲིན་པོ་ཐམས་ཅད་ལ་ལྷས་བཀྱོན་ཕབ་ཡོ་བསད་པ་ལས། །སྲིན་པོ་ད་ཤ་གྲི་བ་དང་། །སྲིན་མོ་དང་ལ་སྣ་རྩེ་གཉིས་སུ་འདུས་སོ། །དེར་སྲིན་པོ་ད་ཤ་གྲོ་བས་ལྷ་དང་མི་འདུལ་འདོད་པའི་ཆེད་དུ། །སྲིན་མོ་དང་ལ་རྣ་རྩེ་ལྷ་མཧྭ་དེ་བ་ལ་བཙུན་མོར་ཕུལ་ལོ། །ལྷ་མཧྭ་དེ་བ་དང་། །སྲིན་མོ་དང་ལ་རྣ་རྩེ་གཉིས་ལ་བུ་མོ་གཅིག་ཡོད་དེ། །དེ་ན་སྲིན་མོ་མར་འདབ་ཕུར་པ་ལྷ་བྱང་བ་ཡིན་ནོ། །དེ་དུས་དེ་ཙམ་ན་སྲིན་པོ་ད་ཤ་གྲི་པ་ན་རེ། །ང་ལ་སྲིང་མོ་དང་ལ་རྣ་རྩེ་དང་ཚ་མོ་ཕུར་ལྷ་འདི་ཤིན་ཏུ་གཅེས་པ་ལ། །ཁྱེད་གཉིས་ལ་ང་གཅེས་རྒྱུ་མེད་པས། །བདག་ནི་རྒྱ་མཚོ་ནང་དུ་ཤིར་འགྲོ་ཟེར་བ་ལས། །དང་ལ་རྣ་རྩེ་མ་སྨད་གཉིས་ན་རེ། །ངེད་གཉིས་ལ་ཡག་ཁྱོད་ཤིན་ཏུ་གཅེས་པས་ཁྱོད་མ་ལྕེབ་པར་ཅི་ལ་ཅི་འདོད་སྨོས་ཤིག་ཟེར་བ་ལས། །སྲིན་པོ་ད་ཤ་གྲོ་བ་ན་རེ། །འོ་ན་ང་ལྷ་མོ་དུང་སྐྱོང་མ་འདོད་དོ་བྱས་པས། །སྲིན་མོ་དང་ལ་རྣ་རྩེ་ན་རེ། །འོ་ན་ང་ལ་ཐབས་ཡོད་མིང་པོ་དེ་སླ་ཡིས། །ངའི་བུ་མོ་དུ་ར་ཕུར་པ་ལྷ་འདི་ལྷ་མོ་དུང་སྐྱོང་མའི་ཁོལ་མོ་བྱེད་བཅུག་ལ་དེར་བསླུ་ཡིས་ཟེར་ནས། །དང་ལྷ་རྣ་རྩེ་དེས་བུ་མོ་ཕུར་པ་ལྷ་ཁྲིད་ནས་ལྷ་མོ་དུང་སྐྱོང་མ་ལ་གཡོག་མོར་ཕུལ་ལོ། །དེར་སྲིན་མོ་ཕུར་པ་ལྷ་དེས། །ལྷ་མོ་དུང་སྐྱོང་ལ་མ་འདི་སྐད་ཞུས་སོ། །ཆེ་ཞེ་ཆེན་མོ་རིགས་ཀྱི་ཡུམ། །བདག་ཉིད་ཆེན་མོ་གར་མཁན་མ། །དབུ་བརྒྱན་རིན་ཆེན་ཐོར་ཚུགས་ཅན། །བི་ཌ་ར་སྔོན་པོ་འོད་ལམ་འབར། །ཞལ་བཟངས་པདྨ་དཀྱིལ་འཁོར་དུ། །ཉིན་ཟླ་འཕྲུགས་པའི་རྒྱན་བཀོད་དེ། །ཚེམས་བཟངས་དུང་ལ་ལྗགས་བཟང་མེ། །ཁྱེད་འདྲ་འཇིག་རྟེན་ཁམས་ན་མེད། །བདག་ནི་ཁྱོད་རྟན་འབངས་སུ་བགྱིད། །ཁྱོད་ཀྱིས་བདག་ལ་ཐུགས་རྩེར་དགོངས། །བདག་ཀྱང་བློ་བ་ཉེ་བར་བགྱིད། །དེ་སྐད་ཟེར་ནས་ལྷ་མོའི་གཡོག་མོར་བྱས་ཏེ། །སྲིན་མོ་ཕུར་པ་ལྷ་དེས་ལྷ་མོ་དུང་སྐྱོང་མ་ལ་བློ་བ་ཉེ་བར་བྱས་ནས། །ལྷ་མོ་ཡིད་ལ་ཅི་དགའ་བྱས་སོ། །དེར་ལྷ་མོ་དུང་སྐྱོང་མ་ཡང་ཁོལ་མོ་དེ་ལ་རབ་ཏུ་དགའ་བས་གཅེས་པར་བྱས་སོ། །དེའི་དུས་ལྷ་དང་ལྷ་མ་ཡིན་གཉིས་ཉིན་གཅིག་བཞུན་དུ་གཡུལ་འགྱེད་དུ་སོང་བ་ལས། །དེའི་ཉིན་པར་ལྷ་མོ་ཨུ་མ་དེ་བིས། །བུ་མོ་དུང་སྐྱོང་མ་ལ་འདི་སྐད་བསྒོའོ། །དེ་རིང་ཁྱོད་ཀྱི་གམ་དུ་སུ་འོངས་པས་ཁྱོད་བསླུ་བ་ཡིན་གྱི། །ཁྱོད་དེ་ལ་མ་ལྟ་ཞིག་ཅེ་བསྟན་ཙམ་ན། །ཁོལ་མོ་སྲིན་མོ་ཕུར་པ་ལྷ་དེས། །སྐབས་དེར་སྲིན་པོ་ད་ཤ་གྲི་བ་སྒྲན་ཏོ། །དེར་སྲིན་པོ་ད་ཤ་གྲོ་བ་དེས་སྲིན་གྱི་བོག་བུ་ག་དམར་དག་ཞོན་ཏེ། །ལྷ་མོ་དེའི་ཕོ་བྲང་གི་སྒོར་ཕྱིན་ཏེ། །སྲིན་པོ་ཁོ་བདག་ནི་མིའི་བྱད་ལ་ཤིན་ཏུ་གཟུགས་བཟང་ལ་མཛེས་པ་གཅིག་པ་གཅིག་ཏུ་སྤྲུལ། །བོང་བུ་ནི་རི་དགས་སྐྲུ་རིགས་ཅན་གཅིག་ཏུ་སྤྲུལ་ཏེ། །ལྷ་མོ་དུང་སྐྱོང་མའི་སྤྱན་སྔར་ཕྱིན་ནས་རོལ་མོ་དང་། །སིལ་སྙན་དང་། །གླུ་དབྱངས་སྣ་ཚོགས་བྱས་ནས་བསླུས་སོ། །ལྷ་མོ་རོལ་མོ་ལ་དགའ་བས་འཛུམ་གཅིག་ཤོར་རོ། །དེ་ནས་སྲིན་པོས་གླགས་རྙེད་ནས་ལྕགས་ཀྱི་ལྷམ་སྒྲོག་སྔོན་པོ་བཀྲོལ་ནས་བཟུང་སྟེ། །གླུ་འདི་སྐད་བླངས་ཏེ་ལྷ་མོ་ལ་ཕུལ་ལོ། །ཀྱེ་ཡོངས་འདུ་ཤིང་གི་གནས་མཆོག་ན། །རིན་ཆེན་མཛེས་པའི་ཕོ་བྲང་ན། །རིན་པོ་ཆེ་ཡི་གདན་སྟེང་ན། །འགྱིང་བག་ཚུལ་དུ་གར་མཛད་པ། །དབང་ཕྱུག་སྲས་མོ་མ་ལགས་སམ། །ལྷ་མོ་མང་པོའི་ཚོགས་ལ་རོལ། །དབུ་ཡི་རྒྱན་ཆ་གདུབ་འཁོར་ནི། །རིན་ཆེན་མཛེས་པས་ཀུན་ནས་སྤྲས། །སྤྱན་ནི་ཨུ་དཔལ་འདབ་མ་འདྲ། ་ངས་ནི་བིལ་བའི་འབྲས་བུ་འདྲ། །ཞལ་ནས་ཨུད་པ་ལ་ངད་ཀྱང་བགྲུང་། །སྐུ་ནི་ཞོབྲིལ་གཞོན་ལྡེམ་ཚུལ་ཅན། །གསུང་ནི་ཚངས་པའི་དབྱངས་སྙན་སྒྲོགས། །ནུ་འབུར་སྟོད་སྨད་ཕྱེད་པས་འགྱིང་། །ཁྱོད་འདྲའི་སྐུ་ནི་གཞན་ན་དཀོན། །ལྷ་མོའི་ལོངས་སྤྱོད་མཛེས་པས་མི་བྲེལ་ཡང་། །ཞབས་ཀྱི་ཆས་སུ་ལྕགས་སྒྲོག་འདི་འབུལ་བཞེས། །ཅི་མཛད་ཅི་སྡུག་ཅི་གསུང་ཅི་ཡང་སྙན། །ཁམས་གསུམ་དག་ན་ཁྱེད་འདྲ་ཤིན་ཏུ་དཀོན། །སེམས་ཅན་ཀུན་གྱི་ལྟ་བས་མི་ངོམས་ཁྱོད་། །བདག་གི་དབུལ་བ་འདི་བཞེས་གནང་བར་མཛད། །ཅེས་ཕུལ་བས། །ལྷ་མོས་ལྕགས་སྒྲོག་བླངས་ཏེ། །རང་གི་རྐང་པ་ལ་དཀྲིས་ཏེ་རྒྱན་བྱས་སོ། །དེ་ནས་སྲིན་མོ་ཕུར་པ་དེས། །ལྷ་མོ་དུང་སྐྱོང་མ་ལ་ཞུས་པ། །ཀྱེ་མ་ཧོ་དུང་སྐྱོང་མ་བདག་ལ་ཞུ་བ་གཅིག་མཆིས་ན་གནང་ངམ་བྱས་པ་ལས། །གཡོག་མོ་ཁྱོད་བློ་བ་ཉེ་བས་ཅི་ཞུས་པ་གནང་ངོ་ཟེར། །ལྷ་ལ་ནི་ངག་གི་བདེན་པའི་སྟོབས་ཡོད་པས། །ཇི་སྐད་སྨྲས་པ་བཞིན་བྱེད་དོ། །གཡོག་མོ་ཕུར་པ་ལྷ་ན་རེ། །ཀྱེ་ཇོ་མོ་དུང་སྐྱོང་མ། །ཁྱོད་འདྲ་བ་ནི་འཇིག་རྟེན་འདི་ན་དཀོན་པ་ལ། །འགྲོགས་པའི་ཟླ་མེད་པ། །དེ་རིང་འདིར་འོངས་ལྤགས་སྒྲོག་འབུལ་བའི་མི་དེ་དང་འགྲོགས་པར་ཞུ་ན་གནང་བར་མཛོད། །བདག་ཀྱང་དུས་རྟག་ཏུ་ཁྱོད་ཀྱི་བྲན་དུ་བགྱིའོ། །ཞེས་ཞུས་པ་ལས། །ལྷ་མོ་དེས་སྔར་ཁས་བླངས་པས་མི་བྱེད་པའི་དབང་མེད་པས། །ལྷ་མོ་དུང་སྐྱོང་མ་ན་རེ། །ཁོལ་མོ་ཁྱོད་ཟེར་དེ་མཉམ་གྱིས་བྱ་ཡིས། །མི་དེ་སུ་ཡིན་གང་ན་འདུག་བྱས་པ་ལས། །ཁོལ་མོ་ན་རེ། །མི་དེ་བདག་གི་ཞང་པོ་སྲིན་པོ་ད་ཤ་འགྲི་བ་ཡིན། །ཡུལ་ལང་ཀ་པུ་རངས་ན་འདུག་ཟེར་བ་དང་། །དེར་ལྷ་མོ་དུང་སྐྱོང་མ་དབང་མེད་དུ་སྲིན་པོའི་ཆུང་མར་སོང་ངོ། །དེར་ལྷ་མོ་ཨུ་མ་དེ་བས་བུ་མོ་དུང་སྐྱོང་མ་ལ་དམོད་པ་བོར་བ། །ངའི་བུ་མོ་ཁྱོད་ཀྱང་ངས་གཅེས་པར་བྱས་ཏེ། །ལྷའི་ལོངས་སྤྱོད་བསམ་གྱིས་མི་ཁྱབ་པ་ལ་སྲིན་པོའི་ཆུང་མར་སོང་བས། །ད་ཕྱིན་ཆད་དུང་སྐྱོང་མ་ཁྱོད་ཀྱང་སྲིན་པོ་དང་འགྲོགས། །མི་ལྤགས་ནི་གོན། །མི་ཤ་ནི་ཟ། །མི་ཁྲག་ནི་འཐུང་། །མི་གོས་ནི་གོན། །སྲོག་གཅོད་ནི་བྱེད། །བོང་བུ་ནི་ཞོན་པར་གྱུར་ཅིག །ལྷའི་ཁ་དོག་དཀར་པོ་ནི་ཉམས། །སྲིན་གྱི་ཁ་དོག་གནག་ལ་འཇིགས་པ་ཐོབ་པར་གྱུར་ཅིག །སྲིན་མོ་ཕུར་པ་ལྷ་ཁྱོད་ཀྱང་ངའི་བུ་མོའི་འདི་སྲིན་པོ་ལ་ཆུང་མར་བྱིན་པས། །ཁྱོད་ཀྱང་འཇིག་རྟེན་འདི་ན་མི་སྡུག་པ་ཅིག་ཁོ་ནར་གྱུར་ལ་སུས་ཀྱང་མི་འདོད་པ་ཚེ་རབས་སུ་ཁྱོད་མི་རྙན་པ་གཅིག་ཏུ་གྱུར་ཅིག །ཅེས་དམོད་པ་པོར་རོ། །དེར་ལྷ་མོ་དུང་སྐྱོང་མ་ཡང་མའི་དམོད་པ་སྡིག་པས་ལྷའི་ཁ་དོག་དང་ལོངས་སྒྲོད་ཉམས་ཏེ་མདོག་ཀྱང་མཐིང་ནག་ཏུ་གྱུར། །མི་ཤིན་ཟ། །མི་ལྤགས་ནི་གོན། །མི་ཁྲག་ནི་འཐུང་། །བོང་བུ་ནི་ཞོན། །གཅེར་བུར་ནི་བྱུང་ནས་ཁ་དོག་དང་ལོངས་སྤྱོད་ཉམས་ཏེ་སྲིན་ཕྲུག་ལྔ་བརྒྱ་སྐྱེས་ཙམ་ན་ཁྱོ་སྲིན་པོ་ད་ཤ་གྲི་བ་ཤིའོ། །དེར་ལྷ་མོ་དུང་སྐྱོང་མ་ཡུག་ས་མོའི་ཆ་བྱད་དུ་བྱས་ཏེ་སྐྲ་མདུན་དུ་རལ་པའི་ལན་བུ་གཅིག་ཏུ་བླངས་སོ། །བྲན་མོ་ཕུར་པ་ལྷ་ཤ་རུས་བསྐམས་ཏེ་སྲིན་གྱི་ཕག་རྫི་བྱེད་ཙམ་ན། །ཕག་རྫི་དུམ་བུར་བྱ་བས་མོ་ལ་དབང་མེད་ཆགས་པ་སྤྱད་དོ། །དེར་ཕུར་པ་ལྷ་ཡང་ནལ་བུ་སྦྲུམ་མོ། །དེར་དཔོན་གཡོག་གཉིས་ཀྱིས་སྲིན་པོའི་བོང་བུ་ག་པ་བཀུགས་ནས་ཞོན། །ད་ཤ་གྲོ་བའི་རལ་གྲི་སྡིག་པར་ཅན་བརྐུས་ནས་ལག་པ་གཡས་སུ་ཐོགས། །སྲིན་པོའི་ནོར་བུ་རིན་པོ་ཆེ་བརྐུས་ནས། །ནེའུ་ལེའི་རྐྱལ་པར་སྦས་ནས་ལག་པ་གཡོན་ཏུ་ཐོགས་ནས་བྲོས་སོ། །ཕྱི་ནས་སྲིན་པོའི་དམག་གིས་བདས་ཀྱི་དོགས་ནས་བོང་བུ་བསྐྱོད་ནས་ཁ་ཕྱིར་བལྟས་ཏེ་ཕྱི་ནས་སྲིན་པོའི་བྱ་ར་བྱེད་ཅིང་ཕྱིན་ནོ། །ཐ་མར་དུར་ཁྲོད་གཅིག་ནས་སྐྱེས་པ་གཡུལ་དུ་བསད་པའི་རོ་གཅིག་དང་ཕྲད། །དེར་ཁོང་གཉིས་ཤ་བསྲེགས་ཏེ་ཟ་བར་འདོད་པ་ལ་གཙུག་ཤིང་མེད་པས་རྒྱ་མཚོའི་འགྲམ་ན་རྡོ་སོལ་གྱི་རི་ལ་ཆར་བབ་ནས་མེ་འབར་བ་མཐོང་ནས་རྡོ་སོལ་གྱི་མེ་བླངས་ནས་ཤ་ཆེན་བསྲེགས་ནས་ཟོས་སོ། །ཕྱི་ནས་ཁྱི་དཀར་པོ་གཅིག་འབྲངས་པ་ཡང་ཟོས་ཏེ་པགས་པས་རྒྱལ་མཚན་བྱས་སོ། །དེར་ཁོལ་མོའི་ནལ་བུ་བྱུང་། ཁོང་གཉིས་ཀྱིས་ནལ་བུའི་ཤ་ཡང་ཟོས་སོ། །དེར་ཇོ་མོ་བོང་བུ་ལ་ཞོན། །ཁོལ་མོས་སྣ་ཁྲིད་རྒྱ་མཚོའི་ཁར་ཕྱིན་པ་ལས། །ལམ་ཀ་ན་བྱ་དེ་མོ་བདུན་ཁྲུས་བྱེད་པ་དང་ཕྲད་པ་ལས། །བྱ་དེ་མོ་ནག་མོ་གཅིག་བཟུང་ནས་ཐོགས་ནས་རྒྱ། མཚོའི་ཁར་ཕྱིན་ཏོ། །དེར་ལྷ་མོ་དེས་སྨོན་ལམ་བཏབ་པ། །ང་ཡང་ཚེ་འཕོས་མ་ཐག་ཏུ་གསང་སྔགས་ཀྱི་དངོས་གྲུབ་ཐོབ། །རྒྱལ་བའི་ཞལ་མཐོང་སྟེ། །འདོད་ཁམས་ཀྱི་དབང་ཕྱུག་མར་ཤོག་ཅིག །བྲན་མོ་ཕུར་པ་ལྷ་ཁྱོད་ངའི་འབངས་མར་ཤོག་ཅིག །བྱ་དེ་མོ་ནག་མོ་འདི་ཡང་ཚེ་རབས་ཐམས་ཅད་དུ་ངའི་ནོར་སྐལ་དུ་ཤོག་ཅིག །བོང་བུ་ཞོན་པར་ཤོག་ལ་རལ་གྲི་ལག་ཆར་ཤོག་ཅིག །དེ་སྐད་བྱས་ནས་རྒྱ་མཚོ་ས་སྐོར་ཙམ་ན་རླུད་འ་་མ་གཅིག་བྱུང་ནས། །དཔོན་གཡོག་གཉིས་བྱ་དེ་མོ་ནག་པོ་དང་བཅས་པ་རྒྱ་མཚོའི་ནང་དུ་བསྒྱུར་ཏེ་བཏང་ངོ། །དེར་ལྷ་མོ་དེ་སྐྱེ་བ་བླངས་ཏེ་མི་ཤ་ཟོས་པའི་མཐུ་དང་རང་གི་སྨོན་ལམ་གྱི་མཐུས་ལྷ་མོ་དུང་སྐྱོང་མ་དེ་ཡང་བདུན་མོ་ཆེན་མོ་ཁ་དོག་མདོག་མཐིང་ནག་འཇིགས་འཇིགས་འདྲ་བ་མཆེ་བ་ཟང་ཡག་ལ་རལ་པ་འཐིང་ཟུར་ཕུད་དུ་འདུག་པ་གཅིག་ཏུ་གྱུར་ཏོ། །ཁོལ་མོ་ཡང་ཀླུ་སྲིན་མོ་ཆུ་སྲིན་གྱི་མགོ་ཅན་གཅིག་ཏུ་གྱུར་ཏོ། །བོང་བུ་ཡང་ག་དམར་ལ་གཡུའི་རྣ་ཆ་ཅན། །རླུད་གི་གཤོག་པ་ཅན། །མགོ་འཇུག་མ་ན་ཡོད་པ་གཅིག་ཏུ་གྱུར་ཏོ། །དེ་ནས་ལྷ་མོ་དེ་ཤིན་ཏུ་མཐུ་རྩལ་ཆེ་བར་གྱུར་ནས། །འཇིག་རྟེན་གྱི་མ་མོ་དཀར་མོའི་ཚོགས་དང་། །སྔོན་མོའི་ཚོགས་དང་། །དམར་མོའི་ཚོགས་དང་། །སེར་མོའི་ཚོགས་དང་། །ནག་མོའི་ཚོགས་དང་། །ལྷ་མོ་དང་། །བདུད་མོ་དང་། །སྲིན་མོ་དང་། །བ་ལམ་དང་། །ཁྲི་སྨན་ལ་སོགས་པ་མ་མོ་བསམ་གྱིས་མི་ཁྱབ་པ་མང་པོ་ཡང་མ་མོ་དེའི་བྲན་བགྱིའོ། །ཞེས་ཟེར་ཞིང་འབངས་སུ་འོངས་སོ། །ལྷ་མོ་དེས་ཀྱང་འཇིག་རྟེན་གྱི་མ་མོ་རྣམས་བྲན་དུ་བྱས་ཤིང་སྐྱེ་བ་རྣམ་པ་བཞི་ཡོད་ཚད་དུ་ཐུགས་ཟོས་སོ། །དེ་ནས་ལྷ་མོ་དེ་ལ་སྔོན་གྱི་ལས་འཕྲོས་འབྲེལ་ཅིང་དགེ་བ་སྤྱད་པའི་ཤུགས་ཀྱིས་བྱང་ཆུབ་ཤིང་དྲུང་ན། །བདེ་བར་གཤེགས་པ་ཤཱཀྱ་ཐུབ་པ་བཞུགས་པའི་སྤྱན་སྔར་ཕྱིན་ནས། །ལྷ་མོ་དེས་བྱང་ཆུབ་མཆོག་ཏུ་སེམས་བསྐྱེད་དོ། །བཅོམ་ལྡན་འདས་ལ་ཕྱག་འཚལ་ནས། །རང་གི་སྙིང་པོ་འདི་ཕུལ་ལོ། །ཏབྱ་ཐུ། །ཨོ་རུ་རུ་བི་ཏིཛི་བ་ཧཱུཾ་སྙི། །རུ་རུ་རོ་སྲ །བི་ཏིཛི་བ་ཏོ་སྙི་ཙ་པ་འ་ཨ་ཤུག་མེ་ཧཱུཾ༷་སྨྱོ་ཧཱུཾ༷། །ཞེས་ཕུལ་ལོ། །དེ་ནས་བྱང་ཆུབ་མཆོག་ཏུ་སེམས་བསྐྱེད་ནས་ལྷ་མོ་དེས་རི་ཕུག་ཟབ་མོ་གཅིག་ཏུ་ཕྱིན་པ་ལས། །བྲམ་ཟར་མཆོག་སྲེད་སྒྲུབ་པ་བྱེད་པ་དང་ཕྲད་དོ། །ལྷ་མོ་ན་རེ་ཁྱོད་འདི་ན་ཅི་བྱེད་བྱས་པ་ལས། །སྔོན་ཡུལ་ཁམས་འདི་ཉིད་ན་དགེ་སློང་ཕ་མ་གཉིས་འདུལ་ཁྲིམས་ཉམས་པ་ལས་རྒྱལ་པོས་ཆད་པས་གཅད་པ་ལས། །བདུད་ལམ་ཀ་འགེའུ་རི་དང་རོ་ཤ་ཁ་དྷ་གཉིས་སུ་གྱུར་ཏེ། །ཡུལ་འདིའི་མི་ཟད་པར་ཟོས་ཏེ། །ད་ལྟར་ང་ལ་ཟ་རེས་བབ་པས། །ང་ནི་བདུད་འདུལ་པའི་ཕྱིར་ཡུམ་ཨེ་ཀ་ཛ་གི་སྒྲུབ་པོ་ཞེས་ཟེར་རོ། །དུང་སྐྱོང་མ་ན་རེ་འོ་ན་ངེད་དཔོན་གཡོག་ཀྱང་བསྒྲུབ་པ་བྱ་ན་ཡོན་ཏན་དེ་ལྟ་བུ་ཡོད་དམ་བྱས་ནས། །བྲམ་ཟེ་ན་རེ་ཁྱོད་དངོས་གྲུབ་ཅི་འདོད་པ་ཡིན་བྱས་པ་ལས། །ངེད་ནི་འདོད་ཁམས་ཀྱི་དབང་པོ་ཆེར་གྱུར་ནས། །སངས་རྒྱས་ཀྱི་བསྟན་པ་བགྲུང་པའི་དངོས་གྲུབ་འདོད་དོ། །བྱས་པ་ལས། །འོ་ན་སྒྲུབ་པ་བྱའོ་ཞེས་ནས་ལྷ་མོ་དུང་སྐྱོང་མ་དང་བྲམ་ཟེ་མཆོག་སྲེད་གཉིས་ཀྱིས་ཨེ་ཀ་ཛ་གིའི་བསྒྲུབ་པ་བྱས་པས། །ཨེ་ཀ་ཛ་གི་རལ་པ་གཅིག་མའི་ཞལ་མཐོང་ཞིང་གྲུབ་པ་ཐོབ་པོ། །ཡུམ་ཨེ་ཀ་ཛ་གིས་ལྷ་མོ་དུང་སྐྱོང་མའི་མིང་ནི་ལྷ་མོ་ནག་མོ་རེ་མ་ཏྲི་ཞེས་བྱ་བར་བཏགས་སོ། །འདོད་ཁམས་འདུལ་བའི་མཐུ་མོ་ཆེར་དབང་བསྐུར་བསྟན་པ་བསྲུང་བར་གཉེར་གཏད་དེ། །ལྷ་མོ་ནག་མོས་ཀྱང་བསྟན་པ་བགྲུང་བར་ཁས་བླངས་ཏེ། །རང་གི་སྙིང་པོ་འདི་ཨེ་ཀ་ཛ་གི་ལ་ཕུལ་ལོ། །ཨོ་རུ་རུ་བི་ཏིཛི་བ་ཏོ་སྙི་རུ་རུ་རོ་རུ་བི་ཏི་ཛི་བ་ཡོ་སྙི་ཙི་པི་ལ་ཨག་ཤུག་མེ་སྨྱོ་ཛ། །ཞེས་ཕུལ་ལོ། །དེར་བདུད་ལ༷་ཀ་འགེའུ་རི་དང་རོ་ཤ་ཁ་དྷ་ཡང་བསྒྲལ་ལོ། །བདུད་ཀྱི་ལག་ཆ་ཁྲམ་བམ་ནག་པོ་ཕྲོགས་ནས་བོང་བུའི་སྔ་ཤ་ལ་བཏགས་སོ། །དེར་ལྷ་མོ་རེ་མ་ཏིས་སྲིན་ཡུལ་དུ་དམག་དྲངས་ཏེ་སྲིན་པོ་ཡ་ཤ་ཁོ་རེ་བསྒྲལ་ཏེ། །སྲིན་པོ་ཞོན་པའི་བན་གླང་དམར་པོ་གཡང་གཞིར་བཤུས་ནས་སྨད་ཕྱེད་དཀྲིས། །སྲིན་པའི་གོས་རེ་ལྡེ་ནག་པོ་གྱོན་པ་བཤུས་ནས་མོ་རང་གི་སྨད་དཀྲིས། །སྲིན་པོའི་ཡ་མཁལ་ལ་སྔ་རུ་བགྱིས། །མ་མཁལ་ཕྱི་རུ་བགྱིས། ་།་མ་ལ་མཐུར་བགྱིས། །སྲིན་པོའི་སྐེ་རགས་སྐྲུལ་གྱི་ཞགས་པ་ཐོགས་ནས་གོང་རྨེད་བྱས་སོ། །བརྒྱ་བྱིན་ཉོན་ཅིག །དཔལ་ལྷ་མོ་ནག་མོ་འདིས་རི་མ་ལ་ཡའི་རྩེ་ན་ཕྱག་ན་རྡོ་རྗེ་ཉིད་བསྒྲུབ་པ་བྱས་པས་གྲུབ་པ་ཐོབ་སྟེ། །ཞལ་མཐོང་ནས་མིང་ཡང་ཨུ་རུ་རེ་མ་ཏིར་བཏགས་ཏེ། །སངས་རྒྱས་སྟོང་གིས་དབང་བསྐུར་ནས་ལས་ཀྱི་བྱིན་གྱིས་བརླབས་སོ། །ལྷ་མོ་ནག་མོས་ཀྱང་ཕྱག་ན་རྡོ་རྗེ་ལ་རང་གི་སྙིང་པོ་ཕུལ་བ། །ཨོ་རུ་རུ་བེ་ཏི་བ་སྟོ་སྙི། །རུ་རུ་རོ་རུ་བི་ཏི་སྟ་བ་ཏོ་སི་ཙ་པ་ལ་ཨ་ཤུགས་མེ་སྨྱོ་ཛ། །ཞེས་ཕུལ་ལོ། །ཆོས་སྐྱོང་བར་ཞལ་གྱིས་བཞེས་སོ། །དེ་ནས་ལྷ་མོ་འདིས་གསང་བའི་གནས་སུ་དུར་ཁྲོད་རོ་ཐང་ནག་པོ་དབུས་མ་རུ་རྩེའི་སྒོ་འགྲམ་དུ་དཔལ་ཁྲག་འཐུང་ཧེ་རུ་ཀའི་དངོས་གྲུབ་བསྒྲུབས་པའི་ཚེ། །དཔལ་ཆེན་པོ་ཧེ་རུ་ཀའི་ཞལ་མཐོང་སྟེ། །དཔལ་ཆེན་པོས་ལྷ་མོ་དེའི་སྤྱི་གཙུག་ཏུ། །རྟ་མགྲིན་གསང་བའི་དབང་བསྐུར། །ལུས་ངག་ཡིད་གསུམ་ལ་རྒྱལ་བ་རིགས་ལྔའི་དབང་བསྐུར། །སྐུ་སྟོད་ཀྱི་རྒྱན་དུ་འཕྲ་མེན་མ་བཅུ་དྲུག་གིས་དབང་བསྐུར། །བྱང་ཆུབ་སེམས་དཀར་དམར་གྱིས་ལྗགས་ལ་དབང་བསྐུར། །གནང་མདོ་ཆེན་པོ་དྲུག་ཏུ་ཚོམས་སུ་གསང་བའི་དབང་བསྐུར། །རྡོ་རྗེ་ཕོ་ཉ་མོ་དྲུག་ཅུ་རྩ་བཞིས་འཁོར་དུ་དབང་བསྐུར། །པདྨ་གར་དབང་ཕྱུག་གིས་སྒྲུལ་པ་ཡང་སྦྲུལ་དུ་དབང་བསྐུར། །དེའི་ཚེ་ན་འཇིག་རྟེན་འདི་ན་རྣམ་པ་དྲུག་ཏུ་གཡོས་སོ། །དཔལ་ཆེན་པོ་དེས་ལྷ་མོའི་མིང་ཡང་དཔལ་ལྷ་མོ་ནམ་མོ་རེ་མ་ཏི་དུར་ཁྲོད་ཀྱི་བདག་མོ་བྱ་བར་བཏགས་ཏེ། །སངས་རྒྱས་ཀྱི་བསྟན་པ་བགྲུང་བར་གཏད་དོ། །དཔལ་ཆེན་པོའི་སྤྱན་སྔར་ལྷ་མོ་རེ་མ་ཏིས་རང་གི་སྙིང་པོ་ཕུལ་ལོ། །ཨོ་རུ་རུ་བི་ཏི་སྟ་བ་སྟོ་སི། །རུ་རུ་རོ་རུ་བི་ཏི་སྟ་བ་ཏོ་སི་ཙ་པ་ལ་ཨ་ཤུགས་མེ་སྨྱོ་ཛ། །ཞེས་ཕུལ་ནས། །སངས་རྒྱས་བསྟན་པ་དུས་རྟག་ཏུ་བསྲུང་བར་ཁས་བླངས་སོ། །ལྷ་དང་ལྷ་མ་ཡིན་གཡུལ་འགྱེད་པའི་ཚེ་ན་ཡང་། །དྲང་སྲོང་མཧྭ་ཀྭ་ལའི་དཀའ་ཐུབ་བཟློག །ལྟེ་བ་ལྷ་དམག་བྱེ་བ་དུང་ཕྱུར་གྱི་རྫོང་བཅས་ནས་ལྷམ་ཡིནགྱི་གཡུལ་བཟློག་གོ། །དེ་ནས་ལྷ་མོ་ནག་མོ་དེ་མཐུ་དང་རྫུའཕྲུལ་བསམ་གྱིས་མི་ཁྱབ་པར་གྱུར་ཏོ། །འདོད་པ་ཁམས་ཀྱི་དབང་ཕྱུག་མར་གྱུར་པའི་ཚེ། །ལྷ་ཚངས་པས་རྨ་བྱའི་རྒྱལ་མཚན་ཕུལ་ལོ། །ཁྱབ་འཇུག་གིས་ཉི་མ་དང་ཟླ་བ་རྒྱན་དུ་ཕུལ་ལོ། །རྣམ་ཐོས་སྲས་ཀྱིས་སེང་གེའི་རྣ་ཆ་ཕུལ་ལོ། །ནམ་མཁའི་ལྷ་བྲན་གྱིས་དྲིལ་བུའི་རྒྱན་ཕུལ་ལོ། །སྲིན་མོ་དང་ཤ་ཟ་མོ་རྣམས་ཀྱིས་ཐོད་འཕྲེང་དང། །ཁྲག་དང་། །ཞག་གིས་རྒྱན་བྲིས་སོ། །ཀླུ་དགའ་པོས་སྐྲུལགྱི་གདེངས་ཀ་ཕུལལོ། །ལྷ་མོ་དེ་སྲིད་པ་གསུམ་ན་འགྲན་གྱི་ཟླ་མེད་པའི་མཐུ་རྩལ་ཅན་དུ་གྱུར་ཏོ། །དེ་ནས་བརྒྱ་བྱིན་གྱིས་གསོལ་པ། །ཀྱེ་བཅོམ་ལྡན་འདས་གསང་བའི་བདགཔོ། །འདོད་ཁམས་ཀྱི་དབངཕྱུག་མ་འདི། །དང་པོར་ལྷའི་བུ་མོར་གྱུར་པ་དང་། །བར་དུ་སྲིན་པོའི་ཆུང་མར་གྱུར་པ་དང་། །ད་ལྟ་འདོད་པའི་ཁམས་ཀྱི་དབང་ཕྱུག་མར་གྱུར་པ་འདི། །སྔོན་རྒྱུ་རྐྱེན་ཅི་ལས་གྱུར་པ་ལགས་ཞེས་ཞུས་པ་དང་། །དཔལ་ཕྱག་ན་རྡོ་རྗེས་བཀའ་སྩལ་པ། །བརྒྱ་བྱིན་ཉོན་ཅིག །ད་ལྟར་གྱི་ལྷ་མོ་ནག་མོ་འདི་སྔོན་གསོརཐུབ་ཀྱི་བསྟན་པ་ལ། །ལྷ་མོ་མོ་ལོང་གདོང་དུ་གྱུར་ནསདགེ་བཅུ་ཤ་སྟག་ཏུ་སྤྱདདེ། །དེ་ནས་སངས་རྒྱས་འོད་སྲུངས་ཀྱི་བསྟན་པ་ལ་ཤ་ཟམོ་རལ་པ་གཅིག །མར་གྱུར་ཏེ་ཞེ་སྡང་རང་མར་སྤྱད་དོ། །དེ་ནས་མར་མེ་མཛད་ཀྱི་བསྟན་པ་ནི་ལ་ལྷ་མོ་ཤ་བ་རིར་གྱུར་ཏེ། །དུས་དེ་ཙམ་ན་ཤཱཀྱ་ཐུབ་པ་འདི་ནི་དགེ་སློང་དབང་ཕྱུག་དཔའ་བོ་བྱ་བར་བཞུགས་སོ། ཁྲ་བ་རིས་མཆོད་པ་བྱས་ཤེང་སྡིག་པ་བཤགས་སོ། །སྨོན་ལམ་གཅིག་བཏབ། །བརྒྱ་བྱིན་ཉོན་ཅིག །ད་ལྟར་གྱི་ལྷ་མོ་ནག་མོ་འདི་ལ་སངས་རྒྱས་གསུམ་པོའི་རིང་ལ་རྣམ་པར་སྨིན་པ་ཤཱཀྱ་ཐུབ་པའི་བསྟན་པ་ལ་རྣམ་པར་དུས་གཅིག་ཏུ་སྨིན་ནོ། །ལྷ་མོ་འདི་དང་པོར་མ་ཧྭ་དེ་བའི་བུ་མོར་སྐྱེ་བ་ནི་དགེ་བཅུ་སྤྱད་པའི་མཐུའོ། །བར་དུ་སྲིན་པོའི་ཆུང་མར་གྱུར་ཅིང་རང་ལྕེབ་པ་ནི་ཞེ་སྡང་སྤྱད་པའོ། །ཐ་མ་ད་ལྟར་གྱི་འདོད་ཁམས་ཀྱི་དབང་ཕྱུག་མར་གྱུར་ནས། །སངས་རྒྱས་ཐམས་ཅད་ཀྱིས་དབང་བསྐུར་ནས་ཤཱཀྱ་ཐུབ་པའི་བསྟན་པ་བགྲུང་བ་ནི། །སྔོན་ཤཱཀྱ་ཐུབ་པ་ལ་སྡིག་པ་བཤགས་ཀྱིན་སྨོན་ལམ་བཏབ་པའོ། །དུས་ཕྱི་མ་ལ་ནི་བྱང་ཤར་གྱི་འཇིག་རྟེན་གྱི་ཁམས་མེ་ཏོག་གྱི་ཁམས་མེ་ཏོག་རྣམ་པར་རོལ་པ་ཞེས་བྱ་བར་སངས་རྒྱས་པཟློ་དམ་པའི་དཔལ་ཞེས་ལུང་བསྟན་ཏོ། །དཔལ་ལྷ་མོ་ནག་མོའི་རྒྱུད་ལས། །གླེང་གཞིའི་ལེའུ་སྟེ་དང་པོའི། །དེ་ནས་ལྷའི་དབང་པོ་བརྒྱ་བྱིན་གྱིས། །གསང་བའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས་མགོན་པོ་གསང་བའི་བདག་པོ། །མ་འོངས་ཕྱི་མའི་སེམས་ཅན་རྣམས། །མཁའ་འགྲོ་རྣལ་འབྱོར་རབ་བསྒྲུབ་ཕྱིར། །ལྟ་བ་དམ་པ་བདག་ཉན་འཚལ། །ཞེས་ཞུས་པའི་ཚེ། །རྡོ་རྗེ་ཅན་གྱིས་བཀའ་སྩལ་བ། །ལྷ་མོ་ནག་མོ་འདི་དང་བདག་གི་སེམས། །གཉིས་མེད་ཆོས་ཀྱི་དབྱིངས་སུ་དབྱེར་མེད་པའི། །གདོད་ནས་མ་སྐྱེས་གཟུང་འཛིན་ཡུལ་དང་བྲལ། །ཆོས་སྐུ་ནམ་མཁའི་ཆོས་ཉིད་ལས། །སྤྲུལ་པའི་ཆོ་འཕྲུལ་ལྷ་མོའི་སྐུར་སྟོན་པ། །མཁའ་ལ་འཇའ་འདྲ་རང་བཞིན་མེད་པ་སྟེ། །མདོར་ནས་སངས་རྒྱས་སྦྲུལ་པ་ཡིན་པར་ལྟ། །སྲིན་མོ་བདུད་མོ་དག་ཏུ་བལྟ་མི་བྱ། །དཔལ་ལྷ་མོ་ཤན་པའི་རྒྱུད་ལས། །ལྟ་བ་བསྟན་པའི་ལེའུ་སྟེ་གཉིས་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏེ། །ཀྱེ་གསང་བའི་བདག་པོ་ཡི་ནས་ཐུགས་རྗེ་ཅན། །རྡོ་རྗེ་མཁའ་འགྲོ་དངོས་གྲུབ་བསྒྲུབ་པའི་ཕྱིར། །གསང་བའི་དཀྱིལ་འཁོར་ཆེན་པོ་བདག་ཉན་འཚལ།། ཞེས་གསོལ་པ་དང་། །ཕྱག་ན་རྡོ་རྗེས་བཀའ་སྩལ་པ། །བརྒྱ་བྱིན་ལ་སྩོགས་འཁོར་རྣམས་རབ་ཏུ་ཉོན། །རང་བཞིན་དཀྱིལ་འཁོར་བྱང་ཤར་རི་རབ་རྩེ། །ཏིང་འཛིན་དཀྱིལ་འཁོར་རྣལ་འབྱོར་སེམས་ཀྱི་ཡུལ། །གཟུགས་བརྙན་དཀྱིལ་འཁོར་གནས་གཞི་ས་ལ་བྱ། །མཐིང་ནག་གྲུ་བཞི་དབུས་ནི་གྲུ་གསུམ་མོ། །དབུས་སུ་ལྷ་མོ་ཉིད་ཀྱི་ཕྱག་རྒྱ་བྲིས། །དེ་ཡི་མདུན་དུ་ཁོལ་མོ་ཆུ་སྲིན་མགོ། །དེ་ལ་འཁོར་རྣམས་བསྐོར་ཏེ་བྲི་བ་ནི། །དཀར་མོ་དམར་མོ་སྔོན་མོ་སེར་མོ་ནག་མོ་དང་། གནོད་སྤྱིན་མོ་བདུད་མོའི་ཚོགས་རྣམས་བྲི། །འཇིག་རྟེན་འདི་ན་གནས་པའི་མ་མོ་རྣམས། །ལྷ་མོ་འདི་ཡི་འཁོར་དུ་ཐམས་ཅད་གཏོགས། །གང་གིས་འཁོར་གྱིས་བསྐོར་ཀྱང་འགལ་བ་མེད། །བསྒྲུབ་པ་པོ་ཉིད་སེམས་དང་གང་འཐད་བྱ། །དཔལ་ཤན་པ་ནག་མོའི་རྒྱུད་ལས། །བསྒྲུབ་པའི་དཀྱིལ་འཁོར་གྱི་ལེའུ་སྟེ་གསུམ་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས། །དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་མགོན་པོ་འགྲོ་ཀུན་འདུལ་པའི་གཙོ། །རྡོ་རྗེ་ནག་མོ་གཏུམ་བྱེད་དམ་པ་ཡི། །དངོས་གྲུབ་བསྒྲུབ་པའི་རྫས་རྣམས་གང་ལགས་པ། ། གསང་བའི་བདག་པོས་བདག་ལ་བཤད་དུ་གསོལ། །ཞེས་ཞུས་པ་དང་། །ཕྱག་ན་རྡོ་རྗེས་བཀའ་སྩལ་པ། །རྡོ་རྗེ་མཁའ་འགྲོའི་དངོས་གྲུབ་ནི། །རྫས་རྣམས་མེད་ན་དངོས་གྲུབ་མི་ཐོབ་སྟེ། །དཔེ་ན་སྨོན་པ་དང་ནི་ས་བོན་འདྲ། །ཀུན་ཀ་ཚངས་པའི་མཐུ་ལས་བྱིན་རླབས་འབྱུང་། །ལྷ་མོ་ནག་མོ་ལ་རྫས་བཞི་སྟེ། །འབོད་པའི་རྫས་དང་མ་མོ་བརྟེན་པའི་རྗེས། །མཆོད་པའི་རྫས་དང་དམ་ཚིག་བསྲེ་པའི་རྫས། །བཞི་པོ་འདི་དག་ཚངས་ན་དངོས་གྲུབ་འབྱུང་། །བོད་པའི་རྫས་ནི་རྣམ་པ་ལྔ་རུ་བསྟན། །གཡབ་དར་དང་ནི་ཧ་སྟ་རྩེ་ལྔས་གཡབ། །ཚིལ་ཆེན་ཅོང་ཞི་སྤོས་ནི་རྣམ་ལྔ་བསྲེག །བརྟེན་པའི་རྫས་ནི་རྣམ་པ་དྲུག་ཏུ་བསྟན། །གཟུངས་མ་མཚན་དང་ལྡན་པ་དང་། །གཙོ་མོ་ལ་ནི་ཐོད་པ་ཕོ་མོ་གཉིས། །མཁར་དུ་དམིགས་ལ་ཐོད་དུ་ཁྲ་སྤྲད་པའོ། །གཡོག་མོ་ལ་ནི་ཚལ་བུ་རེ་རེའོ། །མི་བསད་མཚོན་གྱི་རལ་གྲི་སོར་བརྒྱད་པའོ། །ཡུ་བར་མ་བྲིས་དཀྱིལ་འཁོར་དབུས་སུའོ། །བྱ་ནག་སེང་གེ་གཡང་གཞི་གོས་ནག་པོ། །མཆོད་པའི་རྫས་ནི་རྣམ་པ་བཅུ་གཉིས་ཏེ། །ལམ་ཀ་འགེ་རི་ཤ་དང་རི་མོ་དང་། །སྲིན་མོ་ཕུར་པ་ལྷ་ཡི་བུ་ཤ་དང་། །གྲི་བོའི་ཤ་དང་དབང་པོ་རྣམ་པ་ལྔ། །གཡུལ་དུ་དབུགས་མ་ཆད་པའི་ཤ་ཁྲག་དང་། །སེང་གེ་དཀར་མོའི་སྙིང་དང་རུ་དྲ་ནག་པོའི་སྙིང་། ཁྲ་ཁྲག་སྣ་ཚོགས་བདུད་རྩི་ལྔ་དང་སྦྱར། །ཕྱེ་མ་ལྔ་དང་སྦྱར་བ་འདི། །གུར་ཀུམ་ཆུས་སྦྲུས་པདྨ་རག་ཏས་བསྐུ། །རྒྱུན་གཏོར་ཚོམ་བུ་དགུ་པ་རག་ཏས་བཀང་། །ཨ་མྲི་ཏ་དང་འཛའ་གད་ཤེལ་ནག་པོ། །བསྲེ་བའི་རྫས་ནི་མེ་ལོང་གཉིས་དབུས་སུ། །གཅིག་པུ་ཙན་ཏྲ་ལ་ཡི་བྱང་ཆུབ་སེམས། །གཅིག་ཏུ་སྙེ་ཏ་ཀུ་མ་རི་ཁྲག །དཀར་དམར་གཉིས་ལ་དམར་ཐིག་བདུན་བདུན་བྲི། །དེ་ལྟར་སྦྱིར་ན་རྫས་ནི་ཉི་ཤུ་ལྔ། །འདི་རྣམས་ཚང་ཞིང་མ་ཉམས་འཚོགས་གྱུར་ན། །དཔལ་ལྡན་ལྷ་མོ་ལ་སོགས་མཁའ་འགྲོ་མ། །བྱིས་པས་མེ་ཏོག་ཨུད་པལ་མཐོང་བ་ལྟར། །དགའ་བ་སྐྱེས་ནས་མི་ལ་དངོས་གྲུབ་སྟེར། །དེ་བས་ནན་ཏན་བསྐྱེད་ལ་རྩོལ་བ་བྱ། ཁྲ་ཁྲག་འདི་རྣམས་གདོད་ནས་འཚོལ་བའི་ཕྱིར། །རང་གི་སེམས་ཅན་སྲོག་ནི་གཅད་མི་བྱ། །རངབཞིནདགགིསཤིབའི་ལའོ།། །།དཔལ་ལྷ་མོ་ནག་མོའི་རྒྱུད་ལས། །རྫས་བསྟན་པའི་ལེའུ་སྟེ་བཞི་པའོ། །དེ་ནས་ལྷའི་དབང་པོ་བརྒྱ་བྱིན་གྱིས། །དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་རིག་སྔགས་ཚོགས་ལ་མངའ་བརྙེས་པའི། །གསང་སྔགས་བདག་པོ་གནོད་སྤྱིན་འདུལ་བའི་གཙོ། །བསྒྲུབ་པའི་རྟེན་གྱི་ལྷ་མོ་ནག་མོའི་སྐུ། །བདག་ལ་ཐུགས་རྗེ་ཅན་གྱིས་བཤད་དུ་གསོལ། །ཞེས་ཞུས་པ་དང་། །གསང་པའི་བདག་པོས་བཀའ་སྩལ་པ། །དམིགས་པའི་རྟེན་གྱི་གཟུགས་བརྙན་ནི། །མ་མོ་ཕྱུགས་པའི་དུར་ཁྲོད་འགྲོ། །འདྲི་མཁན་དམ་ཚིག་ཡོད་པ་ལ། །མོ་མའི་དབང་བསྐུར་སྐུ་གཟུགས་བྲི། །དུར་ཁྲོད་རོ་རས་ས་ལ་ནི། །དབུས་སུ་ལྷ་མོ་ནག་མོ་ནི། །དེ་ཡི་འོག་ཏུ་ཆུ་སྲིན་མགོ། །མ་མོ་འཁོར་ཡང་དག་འདོད་བྲི། །གཡས་སུ་བྲམ་ཟེ་མཆོག་སྲེད་བྲི། །མགྲིན་པ་སྨ་ར་དཀར་ལ་རིང་ ཁྲི་སྙའིསྟན་ལ་ལོང་ལུབྲེང་འཛིན། རྨ་བྱ་ནེའུ་ལོ་ཐོགས་པའོ། །དེ་ཡི་གསོན་དུ་བདག་ཉིད་ནི། ཁྲི་སྙའི་སྟན་ལ་ལོང་ལྒབྲེང་འཛིན། །རྨ་བྱ་ནེའུ་ལེ་ཐོགས་པའོ། །ལྷ་མོ། མོ་སྤྱནདབྱེ་མཆོད་པ་དབུལ། །དངོས་གྲུབ་གང་འདོད་པ་གདབ། །དཀྱིལ་འཁོར་དབུས་སུ་བཞུགས་སུ་གསོལ། །ལྷ་མོའི་སྐུ་ཡི་ཐུགས་ཀར་ནི། །སྲིན་ལག་ཁྲག་གིས་ཟླ་གམ་བྲི། །དེ་དབུས་ལྷ་མོའི་སྲོག་སྙིང་ཕྲི། །དེ་དབུས་རྒྱུས་ཆེན་གསུམ་སྒྲིལ་གདགས། །རྩེ་མོ་ནས་བཟུང་བཟླས་པ་བྱ། །ཡང་ན་ལུགས་མ་དག་ལ་བྱ། །དེ་ལྟར་བྱས་ན་དངོས་གྲུབ་རྒྱུ། །དཔལ་ལྷ་མོ་ཤན་པའི་རྒྱུད་ལས། །སྐུའི་གཟུགས་བརྙན་བསྟན་པའི་ལེའུ་སྟེ་ལྔ་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས། །གསང་བའི་བདག་པོ་ཕྱག་ན་རྡོ་རྗེ་ལ་འདི་སྐད་གསོལ་ཏོ། །ཀྱེ་གསང་པའི་བདག་པོ་རྡོ་རྗེ་འཛིན། །ཡེ་ཤེས་སྐུ་འཆང་བསྟན་པའོ། །དཔལ་ལྡན་ནག་མོ་རེ་མ་ཏིའི། །ཏིང་འཛིན་སྒོམ་ཐབས་བདག་ལ་ཤོད །ཅེས་གསོལ་པ་དང་། །དཔལ་ཕྱག་ན་རྡོ་རྗེས་བཀའ་སྩལ་པ། །ལྷའི་དབང་པོ་བརྒྱ་བྱིན་ཉོན་ཅིག །བདག་ཉིད་དེ་བཞིན་གཤེགས་པའི་སྐུའི་ཕྱག་རྒྱའོ། །ལྷ་མོ་ནི་སྐྱེ་བ་མེད་པའི་ངང་ལས་སྐྱེ་བའི་ཆོ་འཕྲུལ་དུ་བསྟན་པའོ། །མཧྭ་ཀྭ་ལའི་པ་ཡ་དཔའ་ར་ན་ཡང་། །དེ་ནི་རླུ་་གི་དཀྱིལ་འཁོར་བསྐྱེད་པའོ། །ཨོ་མཧྭ་ཀི་ལིང་ཨག་ནི་ཛུ་ལ་ར༷། །དེ་ནི་མེའི་དཀྱིལ་འཁོར་བསྐྱེད་པའོ། །དེའི་དབུས། །བྲུ༷་བྷ་ཤུརྙ། །ཀ་བཱ་ལ་ཧཱུཾ༷། །དེ་ནི་ཐོད་པའི་གཞལ་ཡས་ཁང་ངོ། །ག་ཏ་པ་ཧཱུཾ༷། །དེ་ནི་བོང་བུ་ག་དམར་ལ་མིག་མཇུག་མ་ན་ཡོད་པ་རླུད་གི་གཤོག་པ་ཅན་བསྐྱེད་པའོ། །སྟི་ར་བོང་བུའི་ཐིག་ཏུ་ཞོན་ཞིང་བསྣོལ་པའོ། །མ་སྲུ་རུ་མཎྜལ་ཨ། །ཉི་ཟླའི་གདན་ནི། །སྤྱོ། །ནག་མོ་སྤྲོ་ཞིང་བསྡུའོ། །ལྷ་མོ་རེ་མ་ཏིའི་ཏིང་ངེ་འཛིན་ནི། །ཨོ་དེ་བི་མ་ཧྭ་ཀྭ་ལི་རེ་མ་ཏི་ཧཱུཾ༷། །ཞེས་པ་ལས་ལྷ་མོ་ནག་མོ་ནི། །ཁ་དོག་མཐེང་ནག་ལ་རལ་པ་རྟིང་པ་ལ་ཟུར་ཕུད་དུ་འདུག་པ། །མིག་རྩ་དམར་བ། །ཁ་གདངས་པ། །མཆེ་བ་གཙིགས་པ། །ལུས་སྦྲུལ་ནག་དང་ཐོད་པས་བརྒྱན་པ། །ལག་པ་གཡས་ན་ནེའུ་ལེ་དང་རལ་གྲི་ཐོགས་པ། །ཐལ་བ་དང་། །ཁྲག་དང་། །ཞག་གི་ཚམ་བུ་མཚན་པ། །རྣ་བ་དྲིལ་བུ་དང་སེང་གེས་མཚན་པ། །ཉི་མ་དང་ཟླ་བ་ལུས་ལ་འཆར་བ། །སྐུ་སྨད་གླང་པོ་ཆེའི་ཀོ་རློན་ཀྲིས་པ། རྐང་པ་ལྕགས་སྒྲོག་གིས་རྒྱན་པའོ། །ཁོན་མོ་ཆུ་སྲིན་གྱི་མགོ་ཅན་ནོ། །འཁོར་ནི་མ་མོ་བསམ་གྱིས་མི་ཁྱབ་པའོ། །དཔལ་ཤན་པ་ནག་མོའི་རྒྱུད་ལས། །ཏིང་ངེ་འཛིན་བསྟན་པའི་ལེའུ་སྟེ་དྲུག་པའོ། །དེ་ནས་ལྷའི་དབང་པོ་བརྒྱ་བྱིན་གྱིས། །དཔལ་ཕྱག་རྡོ་རྗེ་ལ་འདི་སྐད་ཅེས་གསོལ་ཏོ། །མཉམ་ཉིད་རྡོ་རྗེ་གསང་བའི་སྐུ། །མཚན་མ་འཇོམས་པའི་དཔལ་ལྡན་དྲག་ཤུལ་ཅན། །ལྷ་མོ་ནག་མོ་སྲོག་གི་སྙིང་པོ་དང་། །སྒྲུབ་པ་སྔགས་ཀྱང་བརྡ་བཤད་འཚལ། །ཞེས་ཞུས་པ་ལས། །ཕྱག་ན་རྡོ་རྗེས་བཀའ་སྩལ་པ། །སྔགས་ཞེས་བྱ་བལྷ་མོ་ནག་མོའི་སྲོག་རྩ་ཡིན། །གྲངས་ཀྱང་མང་ལ་ཟུར་ཡང་མ་ཆག་སྟེ། །གུག་རྐྱེད་བརྩེགས་པར་གང་ཡང་མ་ཉམས་ན། །ལྷ་མོ་ནག་མོ་མངོན་དུ་འགུགས་པ་ཡིན། །ལྷ་མོ་རེ་མ་ཏིའི་གྲོག་སྙིང་ལ། །ཨོ་རུ་རུ་པོ་ཏི་སྟ་བ་སྟི་སོ། །རུ་རུ་རོ་རུ་བི་ཏི་སྟ་བ་ཏོ་སི། །ཙ་པ་ལ་ཨ་ཤུགས་མེ་སྨྱོ་ཛ། །འདི་སྲོག་ནས་འདྲེན་པའི་སྔགས། །ས་ཡ་བཟླས་ན་མངོན་དུ་མཐོང་། །བྱེ་བ་བཟླས་ན་ཕྱག་རྒྱ་སྟོན་པར་བྱེད། །འབུམ་ཕྲག་གཅིག་གིས་དངོས་གྲུབ་མཚན་མ་སྟེར། །ས་མ་ཡ་དུ་ལིང་རག་ཤ་སི། །ཧེ་རསྒ། །དུ་མ་རསྒ །མ་རསྒ་སི་སྨྱོ། །ལདེ་ནི་ཁོལ་མོ་ཆུ་སྲིན་གྱི་མགོ་ཅན་སྙིང་པོའི། །ཧཱུཾ༷་ཧཱུཾ༷་ཧཱུཾ༷ཧཱུཾ༷། །མ་མ་མ་མ། །རུ་ལུ་རུ་ལུ་རུ་ལུ་རུ་ལུ། །སྨྱོ་སྨྱོ་སྨྱོ་སྨྱོ། །སྨྱོ་སྨྱོ་སྨྱོ་སྨྱོ། །དེ་ནི་འཁོར་མ་མོ་སྤྱིའི་སྙིང་པོའོ། །ཨོ་མ་ཧྭ་ཀྭ་ལི་མཎྜལ་མ་དྷི་ཨ་གད་དྷ་ཡ། །པྲ་བེ་ཤ་ཡ། །པྲ་བེ་ཤ་ཡ། །ཏི་སྟ་ཏི་སྟ། །ཨ་ལོ་ཀ་ཡ་ཨ་ལོ་ཀ་ཡ་ཧཱུཾ་ཛ་ཡ། དེ་ནས་སྤྱན་དྲང་བའི་སྔགས་སོ། །ཨོ༷་མ་ཧྭ་ཀྭ་ལི། མ་མ་ས་མ་ཡ། ཏི་ཛི་ཏི་ཛི་སྟ༷། མ་ཧྭ་ཀྭ་ལི་ཨ་བར་ཤ་ཡ་ས་མ་ཡ་འབེབས། དེ་ནས་གནད་གདིངས་པའི་སྔགས་སོ། །མ་མ་དེ་བི་མ་ཧྭ་ཀྭ་ལི་རེ་མ་ཏི་བ་ལིང་ཁ་ཁ་ཁུ་ཧི་ཨ་མྲི་ཏ་པྱུ་ཙ་ཧོ། །དེ་ནི་གཏོར་མ་དབུལ་པའོ། །མ་མ་ས་མ་ཡ་མ་ཧྭ་ཀ་བཱ་ལ་ས་མ་ཡ། །མཧྭ་ཀྭ་ལི་ཀྭ་ཡ་ས་མ་ཡ། །མཧྭ་ཀྭ་ལི་བཱ་སྐ་ས་མ་ཡ། །མཧྭ་ཀྭ་ལི་ཙིཏི་ས་མ་ཡ། །མཧྭ་མུ་ཏྲ་ས་མ་ཡ་ཧཱུཾ༷། །དེ་ནི་དམ་ཚིག་བསྟན་པའི་སྔགས་སོ། །ཨོ་དེ་བི་མཧྭ་ཀྭ་ལི་རེ་མ་ཏི་ཀྭ་ཡ་བཱ་སྐ་ཙིརྟི་སིརྙི་ས་མ་ཡ ཕ་ལ་ཨ་བི་ཤ་ཡ། །དེ་ནི་དངོས་གྲུབ་བླང་པའི་སྔགས་སོ། །ཨོ་མཧྭ་ཀ་ལི་ཡེ་ཧཱུཾ༷་ཕཊ། །རུ་རུ་ཙ་པ་ལ་ཨ་ཤུག་མེ་ཧཱུཾ༷་མ་མ་ཀ་ནི་ཨ་སྟི་ཁེ྅་ཀ་པ་ལ་ཏྲི་མེ་མཧྭ་ཙྭ་ན་ཀྭ་ཡ། །བཱསྐ་ཙིསྟ་སརྙི་ཧཱུཾ། །དེས་ནི་དབང་བསྐུར་པའོ། །དཔལ་ཤན་པ་ནག་མོའི་རྒྱུད་ལས། །སྔགས་བསྟན་པའི་ལེའུ་སྟེ་བདུན་པའོ། །དེ་ནས་ལྷའི་དབང་པོ་བརྒྱ་བྱིན་གྱིས། །དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་མགོན་པོ་རྒྱལ་ཚབ་ལས་ཀྱི་ལྷ། །ཐུགས་རྗེ་ཡེ་ཤེས་ཚོགས་ལ་མངའ་བརྙེས་ཁྱོད། །རྡོ་རྗེ་མཁའ་འགྲོ་བ་རྣལ་འབྱོར་མའི། །གསང་བའི་ཕྱག་རྒྱ་བདག་ལ་བསྟན་པར་འཚལ། །ཞེས་གསོལ་པ་དང་། །ཕྱག་ན་རྡོ་རྗེས་བཀའ་སྩལ་བ། །རྣལ་འབྱོར་ཆེན་མོ་གསང་པའི་ཕྱག་རྒྱ་ནི། །སྤང་བར་མོ་བྱ་རྟག་ཏུ་བཅང་བར་བྱ། །རླུད་གིས་མེ་སྤར་བོང་ཤོན་དབང་ཕྱུག་མ། །ལྕགས་ཀྱུས་བོས་ནས་གཤོག་པས་ཟིལ་གྱིས་མནན། །བོང་བུའི་གདན་བཏིང་ཐོད་པའི་དབང་བསྐུར་ཏེ། །ཐོད་རློན་དམ་ཚིག་བསྟན་ཅིང་གཉིས་མེད་བསྒོམ། །དང་པོ་རླུད་ནག་འ་་མའི་ཕྱག་རྒྱ་ནི། །ལག་པ་ཐལ་སྦྱར་གུང་སྤྲད་བསྒྲེང་པ་དང་། །མཐེའུ་ཆུང་སྲིན་ལག་ཚིགས་བསྣོལ་གུང་བསྒྲད་བརྐྱང་། །མཐེ་བོང་གུང་སྤྲད་འཛུབ་མོ་གཉིས་བསྲེང་རྫོད། །རྩེ་མོ་དགུ་པ་རླུད་གི་ཕྱག་རྒྱའོ། །མེ་རི་སྨུག་ནག་འབར་བའི་ཕྱག་རྒྱ་ནི། །མཛུབ་མོ་གཉིས་ནི་སོ་སོར་དགུག་བྱས་ན། །མཐེ་བོང་བཀུག་ནས་སྲིན་ལག་དེ་གཏད། །གུང་མོ་མཐེའུ་ཆུང་བསྒྲེང་སྟེ་ཕྱར་བ་བྱའོ། །མ་མོ་འགུགས་པ་ལྕགས་ཀྱུའི་ཕྱག་རྒྱ་ནི། །ལག་པ་གཡས་གཡོན་ཁུ་ཚུར་བཅངས་པ་དང་། །མཐེབ་མཛུབ་བཞི་པོ་ལྕགས་སྒྲོག་ལྟ་བུ་སྦྲེལ། །ལག་གཉིས་ཐོད་རློན་དམ་ཚིག་ཕྱག་རྒྱ་ནི། །མཐེ་བོང་མཛུབ་མོ་བཀུག་ནས་བཟླུམ་བྱས་ཏེ། །བཀུག་ནས་སྲིན་ལག་གཉིས་བཅུག་མིག་འབྲས་འདྲ། །གུང་མོ་མཐེའུ་ཆུང་གཉིས་ནི་ཐོད་རློན་ཁ། །གཏོར་མ་བྱིན་ཞིང་གཉིས་སུ་མེད་པར་ལྟ། །དཔལ་ལྡན་ལྷ་མོ་ནག་མོའི་རྒྱུད་ལས། །ཕྱག་རྒྱའི་ལེའུ་སྟེ་བརྒྱད་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས་གསོལ་པ། །སྟོབས་པོ་ཆེ་ལ་གནོད་སྤྱིན་དྲེགས་པ་ཅན། །རིག་སྔགས་ཚོགས་ཀྱི་མངའ་བདག་གིས། །རྡོ་རྗེ་ནག་པོ་མཉེས་པར་བྱ་བའི་ཕྱིར། །མཆོད་པའི་རིམ་པ་བདག་ལ་བསྟན་དུ་གསོལ། །ཞེས་ཞུས་པ་དང་། །གསང་བའི་བདག་པོས་བཀའ་སྩལ་པ། །ལྟ་མོ་ནག་མོའི་དངོས་གྲུབ་ཐོད་འདོད་པས། །མཉེས་པར་བྱ་ཕྱིར་མཆོད་པ་རྟག་ཏུ་དབུལ། །དང་པོ་མཆོད་པ་རྫས་ཀྱི་གཏོར་མ་དབུལ། །གཉིས་པ་ལ་ནི་རཀྟའི་གཏོར་མ་སྟེ། །གསུམ་པ་ལ་ནི་བདུད་རྩི་ཨ་མྲི་ཏ་ཡིས་མཆོད། །བཞི་པ་ལ་ནི་གསང་བའི་མཆོད་པའོ། །མཆོད་པའི་རྫས་རྣམས་བྱིན་གྱིས་བརླབས་པ་ནི། །རླུད་གིས་མེ་སྤར་མེ་ཡིས་ཐོད་པ་བསྐོལ། །ཧཱུཾ༷་གིས་རྡོ་རྗེ་རབ་ཏུ་དཀྲུས་ནས་ཀྱང་། །ཨ་དཀར་འབར་བས་བདུད་རྩི་བྱིན་གྱིས་བརླབ། །དམ་ཚིག་ཕྱག་རྒྱས་གཏུག་ཅིང་གཏོར་མ་དབུལ། །དཔལ་ལྡན་ལྷ་མོ་ཤན་པ་ནག་མོའི་རྒྱུད་ལས། །མཆོད་པའི་རིམ་པ་བསྟན་པའི་ལེའུ་སྟེ་དགུ་པའོ།། །།དེ་ནས་ལྷའི་དབང་པོ་བརྒྱ་བྱིན་གྱིས། །གཙོ་བོ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཡེ་ཤེས་ཚོགས་འདུས་ཐུགས་རྗེ་འབྱུང་བའི་རྒྱུད། །དཔལ་ལྡན་རྡོ་རྗེ་སེམས་དཔའི་ངང་ཚུལ་ཅན། །དཔལ་ལྡན་ནག་མོ་རྡོ་རྗེ་རེ་མ་ཏི། །སྲོག་དང་འདྲ་བའི་དམ་ཚིག་བདག་ཉན་འཚལ། །ཞེས་གསོལ་པ་དང་། །དཔལ་ཕྱག་ན་རྡོ་རྗེས་བཀའ་སྩལ་པ། །ལྷ་མོ་འདིཡིདམཚིགནི། །རྣལའབྱོར་ཚོགས་ཀྱི་སྲོག་སྙིང་ཡིན། །འདི་ལས་འདས་ན་རང་སྲོག་འཆད། །མ་འདས་དངོས་གྲུབ་དམ་པའི་རྒྱུ། །ལྷ་མོ་སྤྱི་ཡི་དམ་ཚིག་དང་། །ལྷ་མོ་སྒོ་ཡི་དམ་ཚིག་གོ། །ལྷ་་མོ་སྤྱི་ཡི་དམ་ཚིག་ནི། །སྐུ་ཡི་ཕྱག་རྒྱ་མི་སྤང་ཞིང་། །རྡོ་རྗེ་སློབ་དཔོན་མཉེས་པར་བྱེད། །རྡོ་རྗེ་སྐྲུན་ལ་གདུང་བ་བསྐྱེད། །འདི་ནི་སྐུ་ཡི་དམ་ཚིག་གོ། །བཟླས་བརྗོད་སྙིང་པོ་རྒྱུན་མི་བཅད། །འདི་ནི་གསུང་གི་དམ་ཚིག་གོ། །གསང་བ་གཞན་ལ་མི་སྤེལ་ཏེ། །འདི་ནི་ཐུགས་ཀྱི་དམ་ཚིག་གོ། །སྟ་བྷན་དང་ནི་འབྲས་བུ་ལྔ། །སྤྱོད་པའི་དམ་ཚིག་ཡན་ལག་ལྔ། །ལྷ་མོའི་སྒོ་ཡི་དམ་ཚིག་ནི། །འཇིག་རྟེན་གང་དང་གང་དག་ནི། །ཡུགས་ས་རྒན་གཞོན་གང་གནས་ལ། །བྱམས་པར་བྱ་ཞིང་ཆགས་མི་སྦྱད། །ནལ་བུ་ཡོད་པའི་སྐྲུམ་མ་ལ། །མེ་ཏོག་གཏོར་ཞིང་བྱམས་པར་བྱ། །ཁ་ཟས་སྤྱིན་ཞིང་མངན་མི་བསྒྲང་། །བྱིས་པ་དག་ནི་ནལ་ཕྲུལ་ལ། །གོས་དང་ཁ་ཟས་སྤྱིན་པ་དང་། །རྟག་ཏུ་དེ་ལ་བྱམས་པར་བྱ། །ཀར་ཤ་པ་ནི་རྒྱན་དུ་སྦྱིན། །བོང་བུ་ལ་ནི་བྱམས་པར་བྱ། །ཁ་ར་མུ་ཏྲིས་གནན་པ་དང་། །བེར་དབྱུག་དག་གིས་མི་བརྡེག་གོ། །རྨ་བྱའི་མདོངས་ནི་རྟག་ཏུ་བཅད། །མ་མོ་ཟླ་མཚན་རྒྱུ་དུས་སུ། །གསང་བའི་མཆོད་པས་དམ་ཚིག་བསྲེ། །མེ་ཡི་དཀྱིལ་འཁོར་མཐོང་གྱུར་ན། །མེ་ཏོག་སྐྱེས་ལྟར་དགའ་བར་བྱ། །ནེའུ་ལ་མཐོང་ན་བསྟོད་པ་བྱ། །ཕྱག་རྒྱ་བསྟན་ཅིང་དད་པར་བྱ། །ཞིང་ལྤགས་རྫས་ཀྱི་སྣོད་དུ་བྱ། །རྡོ་ཡི་སོལ་བ་ཆུར་མི་བསྐུར། །རྡོ་སོལ་ཁུ་བས་མཚན་མ་བསྐུ། ཁེང་ལོ་སོར་བཞི་སྐྱེད་པར་བཅད། །པྱེད་ལ་ལྷ་མོའི་སྐུ་ཡང་བྲི། །ཕྱེད་ལ་དགྲ་ཡི་གཟུགས་བྲིས་ལ། །དེ་ནི་རྟག་ཏུ་བཅང་བར་བྱ། །ཚུབ་མ་དག་དང་ཕྲད་གྱུར་ན། །རྐེད་པར་མི་བཅད་རྒྱབ་མི་བསྟན། །དམ་ཚིག་ཡོད་པས་མི་རུང་སྟེ། །བདག་མ་ཡིན་པའི་རྣལ་འབྱོར་ལ། །རང་གི་ལྷ་དང་སྙིང་པོ་དང་། །རྫས་དང་ཕྱག་རྒྱ་མི་བསྟན་ནོ། །ཁ་འགྲོ་དག་ཀྱང་བསྲེ་བ་མེན། །འཕྲེང་བ་ལ་ཡང་རེག་པར་བསྲུང་། །ཚེས་གྲངས་ཤིས་དང་ནམ་གུང་ལ། །ཕྱག་རྒྱ་བསྟན་ཅིང་བསྟོད་པ་བྱ། །རྟག་ཏུ་ཡི་དམ་མི་འདའ་ཞིང་། ཞ་རེ་ཕྱག་རྒྱ་གཉིས་གཉིས་བསྟན། །སྲོག་གི་སྙིང་པོ་རྒྱུན་ཏུ་གྲང་། །ནུབ་རེ་གཏོར་མ་མི་འདའ་འོ། །བྱ་ནག་ལུག་ནག་རྟག་ཏུ་བཅང་། །བདག་གི་དགྲ་ལ་རྦད་བྱ་སྟེ། །ཕྱིས་ནི་དེ་ལ་བཅོས་མི་བྱ། །ཁས་བླངས་ཡོལ་དུ་མི་རུང་ངོ། །རྣལ་འབྱོར་དངོས་གྲུབ་ཐོབ་བྱའི་ཕྱིར། །དམ་ཚིག་ཉི་ཤུ་རྩ་གཅིག་བསྟན། །དཔལ་ཤན་པ་ནག་མོའི་རྒྱུད་ལས། །དམ་ཚིག་བསྟན་པའི་ལེའུ་སྟེ་བཅུ་པའོ། །དེ་ནས་ལྷའི་དབང་པོ་བརྒྱ་བྱིན་གྱིས། །བཅོམ་ལྡན་འདས་རྡོ་རྗེ་འཛིན་པ་ལ་འདི་སྐད་ཅེས་གསོལ་ཏོ། །ཧཱུཾ༷་མཛད་ཧཱུཾ༷་སྟེ་ཁྲོ་རྒྱལ་བདུད་བཞི་འདུལ། །མི་མཐུན་འཇོགས་པའི་གཉེན་པོ་ཡེ་ཤེས་ཀྱིས། །དཔལ་ལྡན་ནག་མོ་གྲུབ་པའི་རྟགས། །དྲོད་ཚད་བདག་ལ་ཞུ་སྟེ་གནང་བར་མཛོད། །ཅེས་གསོལ་བ་དང་། །ཕྱག་ན་རྡོ་རྗེས་བཀའ་སྩལ་བ། །སྐྱེས་བུ་བློ་ལྡན་མན་ངག་རྩལ་འཆང་གིས། །རྫས་དང་ཏིང་འཛིན་སྔགས་་དང་ཕྱག་རྒྱ་དང་། །མཆོད་དང་དམ་ཚིག་བསྲུང་བ་གཙོར་བྱས་ན། །རྡོ་རྗེ་ནག་མོའི་བསྒྲུབ་པའི་རྟགས་ལྟར་འབྱུང་། །གྲུབ་རྟགས་རབ་འབྲིང་ཐ་མ་གསུམ་དུ་འབྱུང་། །རབ་ནི་མ་མོ་ཉིད་ཀྱི་སྐུ་མཐོང་སྟེ། །བུད་མེད་དཀར་མོ་བཞད་ཅིང་བྱུང་བ་ན། །གསང་བའི་ཡེ་ཤེས་དངོས་གྲུབ་སྟེར་བ་ཡིན། །ནག་མོ་རལ་པ་ཅན་དུ་བྱུང་བ་ན། །འདོད་ཁམས་འདུལ་བའི་མཐུ་རྩལ་བདག་ལ་སྟེར། །དམར་མོ་བསེ་ཡི་རལ་པ་ཅན་དུ་བྱུང་བ་ན། །འཇིག་རྟེན་དབང་དུ་སྡུད་པའི་དངོས་གྲུབ་བདག་ལ་སྟེར། །་མ་མོ་གྲུབ་པའི་རྟགས་ཀྱང་འབྲིང་བོ་ནི། །མེ་ཏོག་ཆར་འབབ་འབྲུག་དང་རླུ་་དམར་དང་། །སྒོ་བརྡུང་ཁང་པ་འཚེགས་དང་རྔ་དྲིལ་སྒྲ། །རྫས་ལུད་མུན་པ་ཤིན་ཏུ་གནག །བུད་མེད་གཟུགས་དང་འཇའ་ཚོན་གཟུགས་ཀྱང་སྟོན། ཁུ།བ་རྟགས་ཐ་མ་དག་ཀྱང་སྟོན། །མ་དང་ཆུང་མ་ཁོལ་ལོ་རྨི། །དྲེའུ་བོང་བུ་བྱ་ནག་ཤ་བ་རྨི། །མ་མོ་གྲུབ་ནས་དབང་དུ་འདུས་པ་ན། །བུད་མེད་དག་གིས་བདག་ལ་ཕྱག་འཚལ་ལོ། །མ་མོ་གྲུབ་ཀྱང་བསྲེ་བ་མ་བྱས་ན། །མི་སྡུག་གཟུགས་སུ་སྟོན་ཅིང་མཛོ་མོར་རྫུ། །གཅན་གཟན་ཟར་འོད་མ་མོ་ཕྱག་སྒུགས་སོ། །དམ་ཚིག་ཉམས་ནས་མ་མོ་འཁྲུགས་གྱུར་ན། །མ་མོ་ནང་འཐབ་མཚོན་གྱི་ཆར་བ་འབབ། །བྱ་ནག་ནང་འཐབ་ཁྲག་གི་ན་བུན་འཁྲིགས། །ལྟས་་དེ་མཐོང་ན་བཀའ་ཆད་ཡོད་པ་ཡིན། །གལ་ཏེ་དམ་སྲིད་སྒྲུབ་པའི་བར་གཅོད་ན། །གྲལ་ལ་འཇིགས་ཤིང་ཁྱིམ་དུ་འགྲོ་སྙིང་མི་འདོད། །གཉིས་ཁྲོ་སྙིང་མི་དགའ་ལ་སྐྱོ་ཞིང་བགྲེས། །ཁ་དབྱུལ་དུ་སྙིང་འདོད་ལ་ཁྲོ་སྙིང་འདོད། །བུད་མེད་གཟུགས་མཐོང་རྐུབ་དང་མོ་མཚན་སྟོན། །གལ་ཏེ་གཏོར་མ་དུས་ལ་ཡོལ་གྱུར་ན། །མོ་མཚན་དང་ནི་སྔོན་གྱི་དབང་རྟགས་སྟོན། །དུད་པ་འཁྲིགས་དང་བུད་མེད་དབྱལ་བ་མཐོང་། །བུད་མེད་ངུ་བ་མཐོང་ན་ཉམས་པ་གནོད། །རྒོད་པ་མཐོང་ན་དགྲ་བགེགས་བསྒྲལ་པའི་རྟགས། །ཁྲོ་ན་བར་ཆོད་ཡོང་བས་སྤྲོན་པ་ཡིན། །སྦྱོར་བ་བྱེད་ན་དངོས་གྲུབ་སྟེར་བ་ཡིན། །རྒྱང་གླུ་ལེན་པ་མཐོང་ན་དངོས་གྲུབ་ཐག་རིང་། །གར་ཐབས་བྱེད་ཅིང་འགྱིང་བག་བྱུང་ན་ཅི་བསམ་འགྲུབ། །བྱ་དང་གཅན་གཟན་གཏོར་མ་ཟ་བ་མཐོང་ན་བཟང་། །མ་མོ་གྲུབ་པའི་རྟགས་རྣམས་གང་བྱུང་ཡང་། །དམ་ཚིག་ཕྱག་རྒྱ་བསྟན་ཅིང་དངོས་གྲུབ་བླངས། །ཁ་རོག་འདུལ་ན་སྙིང་པོ་ཕྱག་རྒྱ་ནོར། །འཛུབ་པ་མཐོང་ན་བདག་ཚེ་རིང་པའི་རྟགས། ་་བ་ཞོན་ན་ནོར་རྣམས་འཕེལ་བའི་རྟགས། །གལ་ཏེ་བདག་ནི་གཞན་དུ་དོན་གཉེར་ན། །བུད་མེད་ལག་ན་རྫས་གང་མཐོང་ན་བཟང་། །བྱ་དང་གཅན་གཟན་སྡོང་ནས་འགྲོ་ན་བཟང་། །དེ་ཡི་ཚེ་ན་དོན་ཡང་གཉེར་བར་བྱ། །སྣོད་སྟོང་ཐོགས་པ་མཐོང་ན་དོན་མི་གཉེར། ཁྲུབ་པའི་དྲོད་ཚད་རྣལ་འབྱོར་ལ་གཅེས། །དཔལ་ལྷ་མོ་བཀའ་སྩལ་པ། །མ་མོ་རྟག་ཏུ་བསྟེན་པའི་ཐབས། །གུད་ན་ཡོད་པ་མ་ཡིན་ཏེ། །དང་པོ་སྒྲུབ་པ་ཐོན་རྟིང་ལ། ཁུན་དུ་སྔགས་དང་ཕྱག་རྒྱ་དང་། །རྫས་དང་ཏིང་འཛིན་ཆོ་ག་དང་། །ཕྱག་རྒྱ་དག་དང་མི་འབྲལ་བ། །མ་མོ་བསྟེན་པ་ཡིན་པར་བཤད། །ཟས་ཀྱི་ཕུད་ཀྱང་བསམ་ལ་མཆོད། །གསང་བའི་དམ་ཚིག་བསྲུང་པའོ། །དེ་ལྟར་བྱས་ན་ཅི་བསམས་འགྲུབ། །དཔལ་ལྷ་མོ་ཤན་པ་ནག་མོའི་རྒྱུད་ལས། །མ་མོ་རྟག་ཏུ་བསྟེན་པའི་ལེའུ་སྟེ་བཅུ་གསུམ་པའོ། །དེ་ནས་ལྷའི་དབང་པོ་བརྒྱ་བྱིན་གྱིས། །བཅོམ་ལྡན་འདས་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །གནོད་སྨིན་བདག་པོ་ཉི་མ་འབུམ་གྱི་གཟི། །ཐུགས་རྗེ་རྩེ་གཅིག་ཡིད་འགྱུར་བཞུགས་པ་ལ། །མ་མོ་དབབ་ཅིང་སློབ་མ་དབང་བསྐུར་པའི། །པྲ་མཆོག་དབབ་པའི་ཆོ་ག་བདག་ཉན་འཚལ། །ཞེས་ཞུས་པའི་ཚེ། །དཔལ་ཕྱག་ན་རྡོ་རྗེས་བཀའ་སྩལ་པ། །སློབ་དཔོན་མཁའ་འགྲོ་གྲུབ་པ་དེས། །སློབ་མ་བདག་ལ་དབང་བསྐུར་བ། །རྒྱལ་རིགས་བུ་མོ་གཙང་མ་ནི། །ཁྲུས་བྱས་བདུད་རྩི་ཟས་བྱིན་ལ། །གོས་དང་མེ་ཏོག་གསེར་གྱིས་བརྒྱན། །བསྒྲུབ་པའང་དཀྱིལ་འཁོར་དབུས་སུ་བཞག །མཁའ་འགྲོའི་བསྒྲུབ་པ་ཞག་བདུན་པ། །དེ་ནས་མ་མོ་དབབ་པར་བྱ། །འདོད་པའི་དུད་པ་བསྲེགས་བྱས་ལ། །མ་མོ་དར་དང་གཡབ་མོས་གཡབ། །ཐོད་རྔ་རྡུང་ཞིང་མ་མོ་འབོད། །སྔགས་འདིས་ཛ་གད་ཁ་ཕྲུས་གདབ། །ཨ་དེ་བི་མཧྭ་ཀྭ་ལི་རེ་མ་ཏི་ཙ་པ་ལ་ཨ་ཤུག་མེ་ས་མ་ཡ་པྲ་ཐ། །རུ་རུ་རོ་རུ་ས་མ་ཡ་པྲ་ཐ །ཡོ་གེ་སིརྙ་ས་མ་ཡ་པྲ་ཐ། །ཨ་བེ་ཤ་ཨ། །ལན་བདུན་དག་གིས་མ་མོ་དབབ། །དེ་ནས་གཟུངས་མའི་རཀྟ་དང་། །རང་གི་བྱང་ཆུབ་སེམས་བསྲེས་ལ། །སྣ་ལ་དུས་གསུམ་རྒྱལ་བ་མཆོད། དེ་ནས་ལྷ་མོ་ཉིད་ལ་མཆེད། །དེ་ནས་རང་གི་ལྕེ་ལ་བཞག །བདག་དང་མ་མོ་དམ་ཚིག་བསྲེ། །དེ་ནས་སློབ་མའི་སྙིང་ལ་བཞག །དེ་ནས་གཟུངས་མའི་རཀྟ་དང་། །སློབ་མའི་ས་བོན་བསྲེས་ལ་ནི། །མ་མོ་མཆོད་ཅིང་དམ་ཚིག་བསྲེ། །གཟུངས་མ་ལྷ་མོ་ཡིན་པ་ལྟ། །གཟུངས་མས་རྩ་བའི་སྔགས་བཟླས་ཤིང་། །ཐོད་འཕྲེང་རྒྱའི་དབང་བསྐུར་རོ། །དེ་ནས་གཡང་གཞི་ཧ་སྟའི་དབང་། །རྔེའུ་ཆུང་ཕུངས་དཀར་མར་མེའི་དབང་། །ཕུར་བུ་ནེའུ་ལེ་རལ་གྲིའི་དབང་། །སྦྲུལ་དང་ཐོད་རློན་དབང་བསྐུར་རོ། །ལྷ་མོ་ནག་མོའི་གསང་དབང་འདི། །དབང་མ་བྱིན་པའི་སློབ་མ་ལ། །ཚིག་གིས་སྨྲས་ཀྱང་སློབ་དཔོན་ཉམས། །མྱུར་དུ་ཚེ་ཡི་འདུ་བྱེད་བསྐུལ། །དེ་བས་སློབ་མ་དབང་བསྐུར་ལ། །དེ་ནས་གསང་རྒྱུད་བསྟན་པར་བགྱིའོ། །དཔལ་ལྷ་མོ་ཤན་པ་ནག་མོའི་རྒྱུད་ལས། །དབང་བསྐུར་བའི་ལེའུ་སྟེ་བཅུ་བཞི་པའོ། །དེ་ནས་ལྷའི་དབང་པོ་བརྒྱ་བྱིན་གྱིས། །དཔལ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཀྱེ་མ་ཧོ་ཕྱག་ན་རྡོ་རྗེ་ཀྱེ། བྱིན་བརླབས་རྣམས་ཀྱི་མཆོག་ཡིན་ཏེ། །ལྷ་མོ་གྲུབ་པའི་རྣལ་འབྱོར་པས། །ལས་ཀྱི་རིམ་པ་བཤད་དུ་གསོལ། །ཞེས་ཞུས་པ་དང་། །གསང་བའི་བདག་པོས་བཀའ་སྩལ་པ། །བརྒྱ་བྱིན་ཉོན་ཅིག །ལྷ་མོ་རེ་མ་ཏི་འདི། །མ་མོ་མ་གྲུབ་ལས་མི་འགྲུབ། ཁུབ་པ་ཐོབ་པའི་མི་ཡིས་ནི། །ལས་ལ་ཆེད་དུ་མ་བརྩམས་ཀྱང་། །ཡིད་ལ་ཅི་འདོད་འགྲུབ་པའོ། །འོན་ཀྱང་ཆེད་དུ་སྒྲུབ་བྱེད་ན། ། ལས་ཀྱི་བྱེ་བྲག་ངས་བཤད་དོ། །ལས་འདི་རྣམས་ནི་མཁའ་འགྲོ་མ། ཁྲུབ་པའི་སྐྱེས་བུ་དག་གིས་བྱ། །མ་མོ་མ་གྲུབ་ལས་མི་འགྲུབ། །བརྒྱ་བྱིན་ཉོན་ཅིག །ཞི་བ་ལས་ཀྱི་ཁྱད་པར་ནི། །བུ་རམ་སྦྲང་རྩི་སྟི་ཝང་དང་། །གུ་གུལ་སྤོས་དང་འོ་མ་དང་། །མར་ཁུ་ཏིལ་དང་འབྲས་ཆང་། །ཨ་ཀ་རུ་དང་དུ་རུ་ཀ། །རི་ལུ་ཁྲི་ཚོ་གཅིག་བྱས་ལ། །ཞི་བའི་ཐབ་ཁུང་དབུས་ཉིད་དུ། །འོ་མ་ཡོད་པའི་ཞིང་ལ་བསྲེག །ཨོ་རུ་རུ་བི་ཏིཛི་བ་ཏོ་སི། །རུ་རུ་རོ་རུ་བི་ཏིཛི་བ་ཏོ་སི། །ཨ་མུ་ཀ་ཤན་ཏིང་ཀུ་རུ་གྲྭ་ཧྭ། །ཁྲི་ཚོ་བཟླས་ཏེ་བསྲེགས་གྱུར་ན། །སྡིག་དང་བགེགས་རྣམས་ཞི་བར་འགྱུར། །དགྲ་དང་ནད་ཡམ་ཞི་བར་བྱེད། །རྒྱས་པའི་ལས་སུ་བྱ་བ་ནི། །རྒུན་འབྲུམ་སྟར་ཀ་གུར་ཀུམ་དང་། །ཨུ་ཏཱལ་མར་ཁུ་ལྷི་ཝང་དང་། །སེང་ལྡེང་དུར་བ་ཀུ་ཤ་རྣམས། །རྒྱས་པའི་ཐབས་ཁུང་ཁྲི་ཚོ་གཉིས། །ཨོ་རུ་རུ་བི་ཏིཛི་བ་ཏོ་སི། །རུ་རུ་རོ་རུ་བི་ཏིཁྱི་བ་ཏོ་སྙི། །ཨ་མུ་ཀ་དུ་པུ་སྒྱི་ཀུ་རུ་གྲྭ་ཧྭ། །ཚེ་དང་རིགས་རྒྱུད་འཕེལ་བ་དང་། །ནོར་དང་ལོངས་སྤྱོད་རྒྱས་པར་བྱེད། །དབང་གི་ལས་ནི་བསྟན་པ་ནི། །ཙན་དན་དམར་དང་ཨུག་ཆོས་དང་། །ཡུངས་དང་སྙི་ཝང་ཅོང་ཞུན་དང་། །མར་ཁུ་ཉ་ཤ་སྦྲང་རྒོད་ཀྱིས། །ཁྲི་ཚོ་གསུམ་དུ་སྦྱིན་སྲེག་བྱ། །ཨོ་རུ་རུ་བེ་ཏིཛི་བ་ཏོ་སྙི། །རུ་རུ་རོ་རུ་པེ་ཏིཛི་ཤ་ཏོ་སྙི། །ཨ་མུ་ཀ་ཨ་ཀར་སྒ་ཡ་ཧྲི་ཛ། །འཁོར་ལོས་སྒྱུར་བའི་ཕྱག་རྒྱའོ། །རྟ་དང་གླང་པོ་ནོར་བུ་དང་། །འགྲོ་བ་བཟང་དང་བློན་པོ་དང་། །དམག་མི་དག་ནི་ལྷ་དང་མི། །ཀུན་ཀྱང་བདག་གི་དབང་དུ་འགྱུར། །དྲག་པོ་བསད་པའི་འཕྲིན་ལས་ནི། །རབས་ཆད་ནག་མོའི་ཤ་ཁྲག །བྱ་རོག་འུག་པའི་ཤ་ཚིལ་དང་། །སེང་གེ་སྟག་དང་བྱ་རྒོད་སྒྱུང་ཀའི་སྙིང་། །རྟ་ནག་ར་རོག་འཕར་བའི་སྙིང་། །སྤྱང་མོའི་སྙིང་དང་མི་གྲིར་ཤི། །ཅོང་ཞུན་དང་ནི་སྙི་ཝང་སྦྱར། །དུག་དང་ཁྲག་དང་བསྲེས་བྱས་ལ། །རིལ་བུ་ཁྲི་ཚོ་བཞི་བྱས་ལ། །མ་ཏྲི་ནག་མོ་ཞལ་བྱས་ལ། །མ་ཏྲམ་ཁོ་རུ་མེ་སྤར་ལ། །རིལ་བུ་རེ་དང་དགྲ་མིང་རེ། །བསྡེ་བ་ཅིག་སྲེག་པའི་ལས་བྱའོ། །རེ་མ་ཏོའི་དམོད་པ་ནི། །ཨོ་རུ་རུ་བི་ཏིཛི་བ་ཏོ་སྙི། །རུ་རུ་རོ་རུ་བི་ཏིཛི་བ་ཏོ་སྙི། །མ་མ་སརྦ་ཤཱ་ཏྲུ༷། །ཨ་མུ་ཀ་སེ། །དུ་ན་དུ་ན། །བྷན་དྷ་བྷན་དྷ། །མ་ཐ་མ་ཐ པྲ་མ་ཐ་པྲ་མ་ཐ། །རུ་ཛུ་རུ་ཛུ། །ཛ་རེ་ནམ། །བྱ་ཧ་དྲིམ། །རོ་ཀ་ནམ། །ཨེ་བེ་ཤ་ཡུ། །རྡོ་བང་ཧྲི་དྷ་ཡ། །ཙན་དན་དེ་པ་ཐྲི་ཀུ། མུ་ར་ཡ་ན་ཧཱུཾ༷་ཕཊ། །ཁྲག་ནད་དག་གིས་འཆི་པའོ། །དགྲ་ལ་ནད་རིམས་དབབ་པ་ནི། །བཅན་དུག་དང་ནིདུཀསྣཚོགས། །ཐོདཔ་མཚན་ངན་དག་ཏུ་བླུག །ཞིང་རས་དག་གིས་ཁ་བཅད་ལ། །སྔགས་འདི་ཁྲི་ཚོག་གཅུག་ཏུ་བཟླས། །ཨོ་རུ་རུ་བི་ཏིཛི་བ་ཏི་སྙི། །རུ་རུ་རོ་རུ་པི་ཏིཛི་བ་ཏོ་སྲི། །ཨ་མུ་ཀ༷། །བྱ་ཧ་དིམ། །ཧ་ར་ནམ། །ཨེ་བེ་ཤ་ཡ། །མ་ར་ན་ཕཊ། །རང་ཉིད་ཆ་ལུགས་ནག་པོར་བྱ། །བོང་བུ་ཞོན་ལ་གྲ་ཕྱོགས་གཏོར། །རིམས་ནད་དག་གིས་ཕུང་པར་བྱེད། །ཚ་བའི་ནད་ཀྱིས་གསད་པ་ནི། །རོ་ཆས་རས་ལ་ལིང་གི་བྲི། །ཚ་བ་གསུམ་གྱི་ཁུ་བས་བསྐུ། །བཟླས་པ་བྱ་ཞིང་གཏོར་མ་སྟབ། །ཨོ་དེ་བི་མ་ཧྭ་ཀྭ་ལི་རག་སྒ་རེ་མ་ཏི། །ཨ་མུ་ཀ༷་མ་ར་ཡ་ཕཊ། །ཁྲི་ཚོ་གཅིག་ཏུ་བཟླས་པ་བསྟབ། །ཞག་བདུན་ནས་ནི་ངེས་པར་གསོད། །ལྷ་མོ་ནག་མོའི་སྙིང་ཟེར་གཟེར་སྔགས་ལ། །སྙིང་གཟེར་ནད་ཀྱིས་དགྲ་གསད་ན། །ལྕགས་གསུམ་དུས་ཤིང་ཕུང་བུ་ལ། །སྤྱི་བོར་རྟ་མགྲིན་བསྒོམ་པར་བྱ། །རྐེད་པར་ལྷ་མོ་ནག་མོ་བསྒོམ། །རྩེ་མོ་ཆུ་སྲིན་མགོ་ཅན་བསྒོམ། །ལོགས་ལ་འཁོར་གྱི་མ་མོ་བསྒོམ། །ལུས་ལ་བཅངས་ལ་བསྙེན་པ་དབུལ། ཨོ་རུ་རུ་བེ་ཏིཛི་བ་ཏོ་སྙི །རུ་རུ་རོ་རུ་བེ་ཏིཛི་བ་ཏོ་སྙི། །ཙ་པ་ལ་ཨ་ཤུག་མེ་བཛྲ་ཀི་ལི་ཀི་ལི་ཡ་ཧཱུཾ༷་མ་ར་ཡ་ཕཊ། །རྟག་ཏུ་བསྙེན་པ་ཕུལ་བྱས་ནས། །དགྲ་བོའི་གཟུགས་ལ་བཏབ་པ་ན། །མྱུར་དུ་སྙིང་གཟེར་ནད་ཀྱིས་འཆི། །ལྷ་མོ་འཕྲུལ་གྱི་སྤྱིན་སྲེག་ལ། །རྨ་བྱའི་ཤ་ལ་སྤྱིན་སྲེག་བྱ། །བཙན་དུག་འཐུང་བའི་སྟོབས་དང་ལྡན། །ཉ་ཡི་ཤ་ལ་སྦྱིན་སྲེག་བྱ། །དེ་ཚེ་ཆུ་ཡི་སྟེ་དུ་འགྲོ། །ཁྲུང་ཁྲུང་ཤ་ལ་སྦྱིན་སྲེག་བྱ། །བདག་ནི་ནམ་མཁའ་དག་ལ་འཕུར། །ནེ་ཙོ་ཤ་ལ་སྦྱིན་སྲེག་བྱ། །སྐྱེ་བ་ལྔ་པ་དྲན་པར་འགྱུར། །སྤྲེའུ་ཤ་ལ་སྦྱིན་སྲེག་བྱ། །འགྲོ་བ་བཟང་མོ་འགག་པར་འགྱུར། །བྱི་བའི་ཤ་ལ་སྦྱིན་སྲེག་བྱ། །ལྷ་སྲིན་སྡེ་བརྒྱད་མཐོང་བར་འགྱུར། །རྔ་མོའི་ཤ་ལ་སྤྱིན་སྲེག་བྱ། །ཉིན་གཅིག་དཔག་ཚད་བརྒྱད་ཁྲིར་ཕྱིན། །ཁུ་ཏའི་ཤ་ལ་སྦྱིན་་སྲིག་བྱ། །བདག་ལུས་གཞན་གྱིས་མི་མཐོང་ངོ། །ངང་པའི་ཤ་ལ་སྦྱིན་སྲེག་བྱ། །བདག་གི་ལོ་འདི་སྟོང་ཐུབ་པའོ། །ནེའུ་ལེའི་ཤ་ལ་སྦྱིན་སྲེག་བྱ། །ནོར་གྱི་གཏེར་ལ་ལོངས་སྤྱོད་འགྱུར། །དཔལ་ལྷ་མོ་ཤན་པ་ནག་མོའི་རྒྱུད་ལས། །འཕྲིན་ལས་ཀྱི་ལེའུ་སྟེ་བཅྭ་ལྔ་པའོ། །དེ་ནས་ལྷའི་དབང་པོ་བརྒྱ་བྱིན་ལ་སོགས་པ་འཁོར་འདུས་པ་རྣམས་ཀྱིས། །དཔལ་ཕྱག་ན་རྡོ་རྗེ་ལ་བསྟོད་པ། །ཧཱུཾ༷་མཛད་ཧཱུཾ༷་སྟེ་ཙཎྜརོ་ཥ་ན། །བདེན་གཉིས་ཐུགས་ཆུད་ཆོས་ཀྱི་སྐུ་བརྙེས་པའི། །སྤྲུལ་པའི་སྐུ་སྟེ་ཕྱག་ན་རྡོ་རྗེ་ཆེ། །དུས་མཐའི་མེ་ལྟར་འབར་ལ་ཕྱག་འཚལ་བསྟོད། །དེ་ནས་བརྒྱ་བྱིན་ལ་སོགས་པའི་འཁོར་འདུས་པ་དེ་རྣམས་ཀྱིས་། །དཔལ་ལྡན་ལྷ་མོ་ནག་མོ་ལ་བསྟོད་པ། །དཔལ་ལྡན་ལྷ་མོ་རེ་མོ་ཏི། །ཆོས་སྐྱོང་རྒྱལ་མོ་ནག་མོ་ཆེ། །དབྱིངས་ཕྱུག་གསང་བའི་མཁའ་འགྲོ་མ། །བསྟན་པ་བསྲུང་ལ་ཕྱག་འཚལ་བསྟོད། །དཔལ་ལྡན་ནག་མོའི་རྒྱུད་ལས། །བསྟོད་པའི་ལེའུ་སྟེ་བཅུ་དྲུག་པའོ། །དེ་ནས་དཔལ་ཕྱག་ན་རྡོ་རྗེ་དེས་པདྨའི་གདན་ལས་སྐུ་བཞེས་ཏེ། །འདི་སྐད་ཅེས་བཀའ་སྩལ་ཏོ། །ཀྱེ་ངའི་འཁོར་དུ་གཏོགས་པ་རྣམས། །ངས་ནི་མཁའ་འགྲོ་མའི་རྒྱུད་ཆེན་པོའོ། །དངོས་གྲུབ་དམ་པའི་གཞིར་བཤད་ཟིན་ཏོ། །ཁྱོད་ལ་གཏད་དོ་ཟུང་ཞིག །རྒྱུད་འདི་ཐུན་མོང་མ་ཡིན་པའི་རང་བཞིན་ཏེ། །སྐྱེས་བུ་བློ་ལྡན་པ་འགས་བསྒྲུབ་པ། །དེ་ནི་མི་ནུབ་པའི་རྒྱལ་མཚན་ཐོབ་བོ། །དེ་ནི་ཆོས་ཀྱི་དབང་ཕྱུག་ཆེན་པོར་གོ་འཕང་ཐོབ་བོ། །དེ་ནི་དངོས་གྲུབ་ཐམས་ཅད་རང་ལས་ཤར་བས་འགྲུབ་བོ། །དེས་ནི་ཡིད་བཞིན་གྱི་ནོར་བུ་རིན་པོ་ཆེ་འབར་བ་རྙེད་པ་ཡིན་ནོ། །ཞེས་བཀའ་སྩལ་པ་བརྒྱ་བྱིན་གྱིས་སྤྱི་བོར་བླངས་སོ། །དཔལ་ལྷ་མོ་ཤན་པ་ནག་མོའི་རྒྱུད་ལས། །རྡོ་རྗེ་མཁའ་འགྲོ་མ་ལ་གཏད་པའི་ལེའུ་སྟེ་བཅུ་བདུན་པའོ། །དེ་ནས་འཁོར་དེ་རྣམས་དགའ་བ་སྐྱེས་ནས་ལྷའི་རོལ་མོ་བསམ་གྱི་མི་ཁྱབ་པས་ཕྱག་ན་རྡོ་རྗེ་ལ་མཆོད་ནས་རང་གི་ས་ལ་འཁོར་དོ། །དཔལ་ཤན་པ་ནག་མོའི་རྒྱུད་རྫོགས་སོ། །ཨོ་རྒྱན་གྱི་མཁན་པོ་པདྨ་སམ་བྷ་བ་དང་། །ལོསྣྲོ་བ་ཙན་ཏྲ་ཀུ་མ་རས་བསྒྱུར་པའོ། །ཁྲི་སྲོང་ལྡེ་བཙན་གྱི་བཙན་གྱི་ཐུགས་དམ་འཆིང་ཕུར་བསྒྱུར་པའོ། །ཨུ་རྒྱ་ཏི་ཀབ། །།