Ngb-pt-0718-vol-08-text

Body

རྒྱ་གར་སྐད་དུ། སརྦ་པ྅་ཨ་མྲི་ཏ། བོད་སྐད་དུ། ཐམས་ཅད་བདུད་རྩི་ལྔའི་རང་བཞིན། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བཤད་པའི་དུས་གཅིག་སྟེ། བཅོམ་ལྡན་འདས་གསང་བ་མཆོག་གི་དཀྱིལ་འཁོར་ན། ཁེན་ཏུ་རྣལ་འབྱོར་དབང་ཕྱུག་ཚོགས། །སྐལ་ལྡན་རྣམས་དང་ཐབས་གཅིག་སྟེ། །མདོ་སྡེའི་བྱང་ཆུབ་སེམས་དཔའ་དང་། །དགྲ་བཅོམ་ཉན་ཐོས་རང་རྒྱལ་དང་། །ཐེག་དམན་མིང་ཡང་མེད་ནང་དུ། །གསང་སྔགས་གསང་བའི་སྙིང་པོ་འདི། །བདུད་རྩི་མཆོག་གི་ལྟ་བ་དང་། །སྤྱོད་པ་བསྒྲུབ་པ་འདི་གསུངས་སོ། །བསམ་གྱིས་མི་ཁྱབ་བསྟན་པ་དང་། །བརྒྱད་ཁྲི་བཞི་སྟོང་རྣམ་གྲངས་ཀྱང་། །ཐེག་པའི་སྒོ་ནི་གསུམ་དུ་གསུངས། །གསང་ཉིད་ཐིག་པར་བསྡུས་དང་བཞི། །ལྡེམ་པོར་དགོངས་པའི་མདོ་དོན་ཡང་། །ཀྲི་ཡའི་དོན་ཏེ་སངས་རྒྱས་ཡིན། །རྣ་བརྒྱུད་སྟོན་པས་ཐུགས་བརྟོལ་ཏོ། །ངེས་པའི་ལུང་ཡང་སངས་རྒྱས་ལ། །སངས་རྒྱས་མཉམ་དང་དབྱིངས་སུ་འགྲོ། །བྱང་ཆུབ་སེམས་དེ་ཀུན་ཏུ་དག །རྫོགས་པའི་ཡེ་ཤེས་དེ་བཞིན་ཉིད། །མ་རྟོག་སྦྱོང་བའི་ཡུལ་མ་ཡིན། །མ་ལུས་མཐའ་དག་ཉིད་ཀྱི་རྒྱ། །ཡེ་ནས་བྱ་མེད་བྱ་མི་དགོས། །རྒྱུ་དང་འབྲས་བུ་འཁྲུལ་བའི་སྒྲ། །བྱང་ཆུབ་ཉིད་དེ་ལྟུང་གནས་མེད། །བྷགཇིབཞིནབདེབརགནས། །རྒྱུད་དང་ལུང་དང་མན་ངག་དང་། །དམངས་དང་རྗེ་དང་རྒྱལ་པོའི་ཚུལ། །ཁྲུད་པར་རྩལ་འཕང་ཐག་རིང་ཡང་། །གཅིག་ལ་གཅིག་བརྟེན་གཅིག་གི་ངང་། །གཅིག་སྟེ་རྣམ་པ་ཡོངས་ཀྱིས་མེད། །དེ་བས་སྐུ་གསུང་ཐུགས་ཀྱི་བདག །སྐུ་དང་བརྒྱན་དང་འཁོར་ལོ་ཡང་། །ལུང་ཆེན་ཟབ་མོའི་ནང་ནས་གསལ། །ལྔ་བཞིན་ནང་དུ་འཁོར་བ་ཡང་། །ཡེ་ནས་སངས་རྒྱས་བདེ་ཆེན་ཉིད། །ལྟ་བ་འདི་ལ་གནས་པའི། །རྣལ་འབྱོར་འདི་ནི་སྐལ་བ་བཟང་། །ཅི་སྤྱད་བསྒོམས་ཤིང་ཅི་བསྒྲུབས་ཀྱང་། །བདུད་རྩི་ཉིད་དེ་སྨན་གྱི་མཆོག །བདེ་གཤེགས་ཀུན་གྱི་ཐུགས་དམ་ཉིད། །བྱིན་བརླབས་ངོ་མཚར་རྒྱ་ཆེར་འབྱུང་། །རྒྱལ་བ་རྒྱ་མཚོ་རྣམས་ཀྱི་གསོས། །སངས་རྒྱས་དེ་བཞིན་ཉིད་ལས་འབྱུང་། །མཐའ་ཡས་སེམས་ཅན་དོན་གྱི་ཕྱིར། །རང་ལ་མཆོད་ཅིང་རང་གིས་བཟའ། །བསྒྲུབ་པ་པོ་ནི་ནན་ཏན་བྱ། །བཅོམ་ལྡན་འདས་དང་གཉིས་མེད་ཕྱིར། །ལས་འདི་ལུང་གིས་བསྒྲུབ་བྱས་ན། །མི་སྤང་བ་དང་དང་དུ་ལེན། །སྤྱད་པའི་དམ་ཚིག་བཅོ་ལྔ་བསྡུ། །དེ་ཡང་མ་ཧྭ་ས་མ་ཡ། །བཞི་པ་རྫོགས་ནས་ཀུན་ཏུ་བཟང་། །ཞི་རྒྱས་དབང་དང་མངོན་སྤྱོད་དང་། །གནན་བཟློག་དྲུག་ནི་གཅིག་ཏུའོ། །སྟ་ན་བྷ་ནའི་ལུང་བཤད་དེ། །བཅོམ་ལྡན་འདས་ནི་ཉིད་ཀྱི་བཀའ། །ལྷ་ཡི་བདུད་དང་ཕུང་པོའི་བདུད། །ཉོན་མོངས་བདུད་དང་འཆི་བདག་བཅོམ། །ཕྱག་རྒྱ་ཆེན་པོ་བཞི་དང་ལྡན། །བྱང་ཆུབ་འཁོར་བ་མྱ་ངན་འདས། །སངས་རྒྱས་སེམས་ཅན་ཐམས་ཅད་དང་། །མཚན་མར་བརྟགས་པ་ཐམས་ཅད་ཀུན། །དེ་བཞིན་ཉིད་ལས་གཞན་མ་ཡིན། །དེ་བཞིན་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་མཁྱེན་ནོ། །ཕྱི་ནང་མ་ལུས་སྣོད་བཅུད་ཀྱང་ ཡབ་ཡུམ་བདེ་བའི་ངང་དུ་གསལ། །འདི་ནི་སྙིང་པོ་བྱང་ཆུབ་ལུང་། །ཡང་དག་མ་རིག་འ་་འགྱུར་བ། །ཁམས་གསུམ་ཐམས་ཅད་བསྒྲལ་བའི་ཞིང་། །མ་སྐྱེས་བས་ན་འཇིག་པ་མེད། །བདག་དང་གཉིས་མེད་མཉམ་པའི། །ཐུགས་རྗེ་ཆེན་པོ་ཅིར་མི་མཛད། །ཡང་དག་ཉིད་ལ་ཡང་དག་སྒྲོལ། །ཡང་དག་བསྒྲལ་ན་བདེ་བ་ཐོབ། །སྟོང་གསུམ་མ་ལུས་བསྐྱབ་པ་བས། །སྐྱེས་བུ་ཆེན་པོ་རྣལ་འབྱོར་གྱིས། །བསྒྲལ་བ་འབའ་ཞིག་སྙིང་རྗེའི་མཆོག །མི་ལྡོག་དབྱིངས་སུ་ཡང་དག་ཉིད། །ཐིག་ལེ་ཆེན་པོས་དབང་བསྐུར་ཏེ། །ཟླ་གསང་དབུས་ན་བྱང་ཆུབ་སེམས། །རྫོགས་སངས་རྒྱས་ལ་སོམ་ཉི་མེད། །རྣམ་དག་དྲི་ཆེན་སྣང་བའི་མཆོག །མི་བསྐྱོད་བྱང་ཆུབ་སེམས་ཉིད་དེ། །རིན་ཆེན་མང་བ་འབྱུང་ལྡན་གཙོ། །སྣང་བ་མཐའ་ཡས་རཀྟའི་ཐུགས། །དོན་ཡོད་དྲི་ཆུ་ལས་གྲུབ་པས། །ཐམས་ཅད་མ་ལུས་སངས་རྒྱས་ལྔ། །ལུས་པ་མེད་པས་ཡེ་ཤེས་དང་། །མ་བཅོས་ཡེ་ནས་འདི་ཉིད་དོ། །དེ་ཕྱིར་སྨན་ཆེན་དངོས་གྲུབ་མཆོག །བདུད་རྩི་ཞེས་ནི་འདི་ལ་བྱ། །རྟོག་པའི་ཀློང་དུ་སུ་འདྲིས་པ། །མི་ཞེས་མི་བྱ་སངས་རྒྱས་ཡིན། །བཅོམ་ལྡན་འདས་ནི་གུད་ན་མེད། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །བྱིན་བརླབས་མཚམས་བཅད་བསྟན་པར་བྱ། །ཡིད་འོང་གནས་སུ་འདུག་ནས་ནི། །བྱ་བ་མེད་པའི་ལས་འདི་བསྒྲུབ། །མཎྜལ་བརྒྱད་པ་གཞུང་བཞིན་དུ། །དཔལ་དང་ལྡན་པའི་སྣོད་བཞག་སྟེ། །སྟོང་ལས་འབྱོར་བས་ཡེ་ནས་དག །བཅལ་དང་བཙག་དང་བཏག་པ་ཡིས། །ཉི་ཟླ་གསལ་བའི་དཀྱིལ་འཁོར་དུ། །འབྲུ་ལྔ་ཡེ་ཤེས་འཕྲོ་འདུ་ལས། །སྟོང་ཁམས་ཁྱབ་པར་དོན་བྱས་ཏེ། །བཅུད་ཀྱི་དམ་པ་ཀུན་བསྡུས་ནས། དུང་གསུམསངས་རྒྱས་མཆོད་པའི་ཕྱིར། །མུ་ཏིག་དཀར་པོ་དྲི་མེད་ལྟར། །བསྒྲུབ་པ་པོས་ནི་ནན་ཏན་བྱ། །གུ་རྒྱ་ལག་པའི་ཕྱག་རྒྱ་ཡིས། །གཞུང་བཞིན་བསྟན་ནས་འཕྲོ་འདུ་བྱ། །དེ་དབུས་ཀླུ་བདག་ས་བོན་གྱིས། །དངོས་གྲུབ་དམ་པ་བླང་བར་བྱ། །དགུ་པའི་སྔགས་ཀྱིས་བཏབ་ནས་ནི། །ལེ་ལོ་མེད་པའི་བརྩོན་འགྲུས་ཀྱིས། །བར་ཆད་མེད་པའི་འཕྲོ་འདུ་བྱ། །གསལ་བ་འབྱུང་འཇུག་ལྷན་ནེ་སེང་། །རྟགས་དང་མཚན་མ་བདུན་གྱིས་འབྱུང་། །འོད་དང་དུ་བ་དྲི་དང་སྒྲ། །ལྷ་མོའི་གཟུགས་ཀྱང་སྟོན་པར་འགྱུར། །མང་དུ་འཕེལ་ན་གྲུབ་རྫས་ཡིན། །དེ་ལ་ཡ་མཚན་བསྐྱེད་མི་བྱ། །མཚན་མ་འདི་དག་མ་བྱུང་ན། །བསྐང་གསོའི་ཆོ་ག་རྒྱ་ཆེར་བྱ། །སྤོགས་ཐབས་བསྐྱར་ཞིང་རྩལ་ཤུགས་དབྱུང་། །རྫས་རྣམས་ཀྱང་ནི་གསར་བར་བྱ། །དེ་ནས་མཆོད་ཅིང་དངོས་གྲུབ་བླང་། །སློབ་མ་ལ་ཡང་དབང་བསྐུར་རོ། །ཚེ་དང་བསྐོང་དང་ཡིད་དུ་འོང་། །ནད་མེད་བྲན་དང་ཅི་འདོད་པའི། །བགེགས་རྣམས་ཞི་བ་ལ་སོགས་པའི། །ཡོན་ཏན་རྩ་བརྒྱད་འདི་ཡིས་འཐོབ། །སྙིང་པོ་ཚིམ་བྱེད་བཅུད་ཀྱི་མཆོག །གཙོ་བོ་ལྔ་དང་འབྲས་བུ་ལྔ། །འདི་དག་རབ་ཏུ་བསྐྱབ་པའི་ཕྱིར། །དྲི་ཞིམ་བཅུད་ལྡན་ཐམས་ཅད་ཀུན། །མང་པོ་འདུས་པ་མཐུ་བྱིན་ཆེ། །ཡངས་ཤིང་རྒྱུད་ལ་གོམས་པ་དང་། །སློབ་མ་དཔའ་བརྟུལ་གཙང་སྦྲ་ཅན། །ཟླ་གསང་དཀར་དམར་རླུད་ཀར་ལྕི། །ཉུངས་ཡང་པརྩི་ཡན་ཆད་ཀྱིས། །མི་ཕྱེད་པས་ནི་བདུད་གནས་པའོ། །ཐུགས་ཀྱི་དངོས་གྲུབ་དམ་པ་འདི། །རེ་བ་མེད་པས་གྲུབ་པ་བླངས། །འདི་ཚེ་འབྲུ་ནི་བརྟག་པར་བྱ། །མ་དག་པ་ནི་མཚམས་གཅད་དོ། །ལས་ཀྱི་གཙོར་ནི་བསྐང་བ་དང་། །དབྱངས་དང་བསྟོ2ད་དང་མཆོད་པ་ཡི། །ནན་ཏན་གྱིས་ནི་བརྩོན་འགྲུས་བྱ། །ཐེ་ཚོམ་མེད་ན་ངེས་པར་འགྲུབ། །ཅེས་བཀའ་སྩལ་ནས་ཤིན་ཏུ་རྣལ་འབྱོར་གྱིས་དབང་ཕྱུག་ཀུན་ཡི་རངས་ཏེ། །བཅོམ་ལྡན་འདས་ཀྱིས་གསུངས་པ་་་་མངོན་་་་ར་བསྟོད་དོ། །ཨེ་མ་གསང་བ་ལས་བྱུང་བ། བྱང་ཆུབ་བདེ་ཆེན་ཉིད་ལ་རྫོགས། །མ་རིག་མུན་སེལ་ཡེ་ཤེས་སྒྲོན། །དཔའ་བོ་ཁྱོད་ལ་སྐྱབས་སུ་མཆི། །བདུད་རྩི་མཆོག་གི་ལུང་རྫོགས་སོ།། །།