Ngb-pt-0468-vol-05-text

Body

གསང་ལུང་དུ་གནང་བའོ།། །། རྒྱ་གར་སྐད་དུ། བར་དོ་སྟུ་གྱེ་ཏནྟྲ་ནཱ་མ། བོད་སྐད་་་དུ། བར་དོ་གསང་བ་ཕྱི་མའི་རྒྱུད་ཅེས་བྱ་བ། དཔལ་རྡོ་རྗེ་སེམས་དཔའ་ཕྱག་འཚལ་ལོ དེ་ནས་བཅོམ་ལྡན་དཔལ་ཀུན་ཏུ་བཟང་པོ་ལ། རྡོ་རྗེ་སེམས་དཔས་གསོལ་བ། བཅོམ་ལྡན་འདས་རྡོ་རྗེ་ཀུན་ཏུ་བཟང་། །བར་དོ་ལ་སོགས་གསུངས་པ་ཡིས། །རྣལ་འབྱོར་པ་ཉིད་སངས་རྒྱས་པའི། །དུས་སའི་རིམ་པ་བཤད་དུ་གསོལ། །ཞེས་ཞུས་པས། རྒྱལ་བ་ཀུན་ཏུ་བཟང་པོས་བཀའ་སྩལ་པ། རྡོ་རྗེ་སེམས་དཔའ་ཉོན་ཅིག །སྤྱིར་གང་ཟག་རྣལ་འབྱོར་པ་ཉིད་སངས་རྒྱ་བ་ལ་དུས་རྣམ་པ་གསུམ་སྟེ། ཚེ་འདི་ལ་སངས་རྒྱ་བ་ལ་ལུས་སྦྱང་བ་གནད་ཆེ་པས། ལུས་སྦྱང་བ་ལ་བཅུད་ལེན་གྱི་གདམས་ངག་བསྟན་པ་དང་། བར་དོར་སངས་རྒྱ་བ་ལ་བླ་མའི་གདམས་ངག་དྲན་པ་གནད་ཆེ་བས་འཕོ་བའི་གདམས་ངག་བསྟན་པ་དང་། ལན་གྲངས་བརྒྱུད་ནས་སངས་རྒྱ་བ་ལ་དམ་ཚིག་དང་ལྡན་པ་གལ་ཆེ་བས། དམ་ཚིག་དང་། སྡོམ་པ་དང་། བསམ་པ་བཟང་པོ་ལ་གནས་པར་བྱའོ། །ཞེས་བཀའ་སྩལ་པས། རྡོ་རྗེ་སེམས་དཔས་ཡང་གསོལ་པ། བཅོམ་ལྡན་རྡོ་རྗེ་འཆང་ཆེན་ཉིད། །བཅུད་ལེན་གདམས་ངག་བཤད་དུ་གསོལ། །ཞེས་གསོལ་བས། བཅོམ་ལྡན་འདས་དཔལ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། བ་་ལེན་གདམས་ངག་བསྙན་པ་ནི། །དངས་མ་ལྔ་ཡི་ཚེ་སྒྲུབ་སྟེ། །ས་ཡི་དངས་མ་ཤ་ཡིས་གསོས། །རྡོ་ཡི་དངས་མ་རུས་པའི་གསོས། ཁེང་གི་དངས་མ་སྟོབས་ཀྱི་གསོས། །རྩི་ཡི་དངས་མ་བབ་ཀྱི་གསོས། །མེ་ཏོག་དངས་མ་བཀྲག་གིས་གསོས། །དགུན་ཡང་མི་སྐམ་བདུད་རྩི་བཞི། །འདི་དགུ་ལྡན་པར་གསོགས་བྱས་ལ། །རིགས་ལྔ་དག་གི་བརྒྱ་ཡིས་གདབ། །ཨོ་བཛྲ་ས་ཏྭ་ཧུ༷། བི་རོ་ཙ་ན་ཨོ། རད་ན་སྭ་བྷ་བ་ཏྲ༷། ཨ་མི་དེ་བ་ཧྲི། ཀརྨ་བཛྲ་ཨ། ཨ་ཡུ་་་། །ཕ་ལ་སི་དྷི་སྒྱུ༷། བྱང་ཆུབ་ཀྱི་སེམས་སྤྲོ་བསྡུ་བྱ། འདི་ཟོས་ཡོན་ཏན་བརྗོད་མི་ལང་། །བཅུ་ཐུབ་པ་ཡངས་བརྒྱ་ཚེ་འགྱུར། །འཆི་བ་དྲུག་ནི་བསླུ་བར་བྱེད། །བརྒྱད་ཅུ་ལོན་པ་དྲུག་ཅུ་ལྟར། །སེང་གེ་གླང་ན་རྨ་བྱ་ཁྱུང་། །བཀྲག་མདངས་མེ་ཏོག་པདྨ་བཞིན། །སྔགས་འཆང་རིགས་འཛིན་ཀུན་གྱིས་རློབས། །མ་མོ་མཁའ་འགྲོས་སྡོངས་གྲོགས་བྱེད། །བདུད་རྩི་འདི་ཡོན་ཏན་གྱིས། །ཚེ་ལ་དབང་བའི་རིགས་འཛིན་བ། །ཅེས་གསུངས་སོ། །བཅུད་ལེན་བསྟན་པའི་ལེའུ་སྟེ་དང་པོའི་སྐབས་སོ།། །།དེ་ནས་གཞན་ཡང་བཀའ་སྩལ་པ། །འཕོ་བའི་རྒྱུད་དག་རྒྱུད་ལྔར་བསྟན། །དྲན་པས་སངས་རྒྱའི་གདམ་ངག་ནི། །རྩོལ་ད་འཕོ་བའི་དོན་བསྟན་པ། །འགྲོ་བ་རིགས་དྲུག་སེམས་ཅན་ལ། །ཡེ་ཤེས་རེ་རེའི་ཆ་ཡོད་དེ། །འགྲོ་བ་མི་ལ་ཡེ་ཤེས་ལྔ། །འདུས་པའི་ཆ་ནི་ཡོད་པས་ན། །འཛམ་གླིང་ལས་ཀྱི་ས་པ་ཡིན། །དེ་ལ་སངས་རྒྱས་སྟན་ཚང་བས། །དྲན་པ་སངས་རྒྱའི་གདམས་ངག་དོན། །འཆི་ཁར་དྲན་པས་སྐྱེལ་མའི་ཚུལ། །དབུགས་ཆད་ཡེ་ཤེས་འབྱུང་བ་ནི། བསུ་མའི་ཚུལ་དུ་ཕྲད་པ་ཡིན། །ཐ་མ་ཞིང་ཁམས་འཕོ་བ་ལ། །དམ་ཚིག་སྡོམ་པ་ན་པར་བྱ། །དེ་ཡི་ངང་ལ་བསམ་པ་ནི། །བཟང་པོའི་ངང་དུ་འགྲོ་བར་བྱ། །ཞེས་བཀའ་སྩལ་པ་དང་། རྡོ་རྗེ་སེམས་དཔའ་ལ་ཡང་བོས་ནས་བཀའ་སྩལ་པ། རྡོ་རྗེ་སེམས་དཔའ་རྒྱུད་འདི་ནི་ཤིན་ཏུ་གསང་བའི་རྒྱུད་ཅེས་བྱ་བ་ཡིན་ཏེ། བར་དོ་གསང་བའི་རྒྱུད་ཕྱི་མ་ཞེས་བྱ་བར་ཟུང་ཤིག །ཅེས་གསུངས་སོ། །རྒྱུད་གཟུང་བའི་ལེའུ་ཡི་སྐབས་ཏེ་གཉིས་པའོ།། །།བར་དོ་གསང་བའི་རྒྱུད་ཕྱི་མ་ཞེས་བྱ་བ་རྫོགས་སོ།། །།རྒྱ་གར་སྐད་དུ། སན་ཏི་མ་ཧྭ་བོ་དྷི་ཙི་ཏ་རད་ན་ཨུ་བ་དྷི་ཤ་གུ་རྒྱ་ནཱ་མ་ཏནྟྲ། བོད་སྐད་དུ། རྫོགས་པ་ཆེན་པོ་བྱང་ཆུབ་ཀྱི་སེམས་རིན་པོ་ཆེ་སྐྲུངས་པ་གསང་བ་མན་ངག་གི་རྒྱུད་ཅེསབྱ་བ། བཅོམ་ལྡན