Ngb-pt-0117-vol-02-text

Body

རྒྱ་གར་སྐད་དུ། སརྦ་དྷརྨུ་མ་ཧྭ་སརྙི་བོ་དྷི་ཙིཀྟ་ས༷་ས་ར་མྱུ་ལསྣྲོ་ད་ཨུ་ཀ་ཤ་ས་ཤཱ་ན་ཀྟ་ར་ཏནྟྲ། བོད་སྐད་དུ། ཆོས་ཐམས་ཅད་བྱང་ཆུབ་ཀྱི་སེམས་རྫོགས་པ་ཆེན་པོ་འཁོར་བ་རྩད་ནས་གཅོད་པ་ནམ་མཁའ་དང་མཉམ་པའི་ཡི་གེ་མེད་པའི་རྒྱུད། བཅོམ་ལྡན་འདས་ཀུན་རིག་རྒྱལ་པོ་ལ་ཕྱག་འཚལ་ལོ། །འདི་སྐད་རྟོགས་པའི་དུས་གཅིག་ན། །མཁའ་ཀློང་རྣམ་དག་ཆོས་ཀྱི་དབྱིངས། །ཀུན་བཟང་ཡངས་པ་སྐྱེ་མེད་ཀློང་། །ཡེ་ཤེས་ལྔ་རྫོགས་འོད་ཟེར་འཕྲོ། །རྡོ་རྗེ་སེམས་དཔའ་འདུས་མ་བྱས། །ཨེ་མ་ངོ་མཚར་རྨད་བྱུང་གཙུག །དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་འདས་ལ་འདི་སྐད་གསོལ། །ཀུན་གཞི་རྩད་ནས་ཅི་ལྟར་གཅད། ཁྲེས་བྱའི་གྲས་ཐག་གཅད་པ་ཅི། །རིག་པའི་གནད་ནི་གང་དུ་བསྡུ། །བཅོམ་ལྡན་འདས་ཀྱིས་བཀའ་སྩལ་པ། །གདོད་ནས་མ་སྐྱེས་སྙིང་པོ་ཨ། །འགྲོ་བ་ཀུན་ལ་རང་བཞིན་གནས། །མ་རིག་ལས་དང་རླུད་གིས་འཁོར། །རྟོགས་ན་རྫོགས་སངས་རྒྱས་སུ་ངེས། །ཨེ་མ་རྡོ་རྗེ་སེམས་དཔའ་ཉོན། །བལྟ་བས་ཕྱི་རྒྱ་རླབས་ཀྱིས་གཅད། །ཏིང་ངེ་འཛིན་ལ་འབྱུང་འཇུག་མེད། །གཉིས་མེད་རྗོང་ན་ཡངས་པའི་རྒྱ། །ཀུན་ཏུ་བཟང་པོ་བདེ་ཆེན་ས། །ཨེ་མ་སེམས་དཔའ་རྡོ་རྗེ་ཆེ། །ཐམས་ཅད་རང་རིག་བྱང་ཆུབ་སེམས། །ནམ་མཁའ་བཞིན་དུ་སྤྲོས་དང་བྲལ། །སྣ་ཚོགསརངབཞིན མི གཉིསཚེ། །ཐིག་ལེར་རྫོགསཔསམཚོནདུམེད། །ཨེ་མ་ཀུན་བཟང་བཅོམ་ལྡན་ཆེ། །སྐྱེ་བ་མེད་པའི་ཆོས་ཉིད་ལ། །སྐྱེ་བའི་ཆོ་འཕྲུལ་ཅི་སྟེ་འོང་། །ཀུན་ལ་དེ་བཞིན་ཉིད་ཡོད་ན། །འབད་པ་མེད་པར་གྲོལ་བར་རིགས། །འཁྲུལ་པས་འཁོར་བ་ཇི་ལྟ་བུ། །རྟོགས་པའི་ཐབས་སུ་གང་ཆེ་ལགས། །ལྟ་བསྒོམ་སྤྱོད་འབྲས་བྱེ་བྲག་གང་། །ཐམས་ཅད་སེམས་ཉིད་ཤར་བ་ལ། །བར་དོ་ཞེས་པ་ཡོད་དམ་མེད། །རིག་པ་སྤྲོས་དང་བྲལ་བ་ལ། །བསྒོམ་དུ་ཡོད་པ་ཡིན་ནམ་མིན། །སྣ་ཚོགས་རང་བཞིན་གཉིས་མེད་ལ། །འབྲས་བུ་ཐོབ་ཏུ་ཡོད་དམ་མེད། །མཚོན་མེད་ཐིག་ལེའི་ཡེ་ཤེས་ལ། །ཐུགས་རྗེ་འབྱུང་ངམ་མི་འབྱུང་ལགས། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས།གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་བཀའ་སྩལ་པ། །སྐྱེ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ན་ངོ་བོས་སྟོང་། །དེ་ཉིད་སྐྱེ་མེད་སྙིང་པོ་ཡིན། །གདོད་ནས་མ་སྐྱེས་ཚིག་ལས་འདས། །སྤྲོས་བྲལ་བརྗོད་མེད་ཁོ་ན་ཉིད། །མཐའ་བྲལ་གཉིས་མེད་དོན་དམ་ཀློང་། །དགག་བྱ་བསྒྲུབ་བྱ་རྣམ་པར་དག །མ་སྐྱེས་རྡོ་རྗེ་གཉིས་མེད་དང་། །ཡིད་ལ་མི་བྱེད་བྱ་བཙལ་བྲལ། །མ་བཅོས་སྤྲོས་མེད་ཆོས་ཉིད་དབྱིངས། །མཐའ་བྲལ་མི་དམིགས་རང་བཞིན་དག །བགྲོད་མེད་ལྷུན་གྲུབ་ཡངས་པ་ཆེ། །ཀུན་གྲོལ་ཉག་གཅིག་བདེ་བ་ཆེ། །དམིགས་མེད་ཡེ་ཤེས་རང་སྣང་དང་། །བརྡལ་ཁྱབ་མཁའ་གསལ་དག་པའི་ཆོས། །སྤྲོས་མེད་བྱང་ཆུབ་སྙིང་པོའི་རྫོང་། །བསམ་འདས་བརྗོད་མེད་རང་སར་གྲོལ། །མི་འགྱུར་མཉམ་ཉིད་དཔེ་དང་བྲལ། །དཔེ་བྲལ་ཡེ་ཤེས་མཚོན་དུ་མེད། །གཉིས་མེད་རྫོགས་པས་མཐའ་བྲལ་རྫོང་། །མི་སྐྱེ་མི་འགག་ཅིར་མི་དགོངས། །འགག་མེད་ཨུ་ལི་ཀྭ་ལིར་རོལ། །དགག་བསྒྲུབ་མེད་པའི་ཡེ་ཤེས་ནི། ཁུ།་ཡིས་མ་བསྐྱེད་རྐྱེན་དང་བྲལ། །སྟོང་གསལ་དབྱེར་མེད་ཡེ་ཤེས་ཅན། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། སྐྱེ་མེད་རྣམ་པར་དག་པའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་བཀའ་སྩལ་པ། །རྣམ་པར་མི་རྟོག་སྙིངཔོ་འདི། །ཡོངས་ཀྱི་རྒྱུད་ལ་སྦས་པ་མེད། །དོན་དམ་ཆོས་ཉིད་སྙིང་པོ་འདི། །ཀུན་ལ་ཏིལ་མར་བཞིན་དུ་ཁྱབ། །ཟ་མ་ཏོག་གི་ནོར་བུ་བཞིན། །ལྷུན་གྱིས་གྲུབ་ཅིང་ཚང་བའོ། །མི་འགྱུར་ཀུན་རྫོགས་ནམ་མཁའ་ཆེ། །ཁྱབ་གདལ་འུབ་ཆུབ་ཐིག་ལེ་གཅིག །བརྗོད་བྲལ་རང་གྲོལ་གནས་སུ་དག །རྒྱལ་བ་རྣམས་ཀྱི་ཐུགས་དང་ནི། །སེམས་ཅན་རྣམས་ཀྱི་རྒྱུད་ལ་ཡང་། །སྙིང་པོ་ཡེ་ཤེས་ཡོངས་ལ་ཁྱབ། །མ་ལུས་ཡེ་ཤེས་ཆེན་པོར་གནས། །ཡེ་ཤེས་ཆེན་པོར་གང་འདོད་པ། །རང་གི་སེམས་ལ་བཙལ་བར་བགྱི། །སེམས་ཀྱི་ཆོས་ཉིད་སྐྱེ་བ་མེད། །ཆོས་ཅན་ཐམས་ཅད་ངོ་བོས་སྟོང་། །མ་རྟོགས་བར་དུ་ཤེས་མི་འགྱུར། །ཡང་དག་བདེན་པའི་སྙིང་པོ་འདི། །རྟོགས་ལྡན་འགའ་ཡི་སྤྱོད་ཡུལ་མིན། །སེམས་ཉིད་ཡེ་ནས་རྣམ་པར་དག །ཨེ་མ་རང་ལ་གནས་བཞིན་དུ། །གཞན་ནས་ཐོབ་འདོད་ནོར་བའི་ལམ། །རྟོགས་པར་གྱུར་ན་དེ་བཞིན་ཉིད། །མ་རྟོགས་མུན་པའི་མཚོ་ལ་སྤྱོད། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། ཀུན་ཁྱབ་ཡངས་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་བཀའ་སྩལ་པ། །འཁོར་བ་ཐོག་མཐའ་མེད་པ་ནས། །ལྷན་ཅིག་སྐྱེས་པའི་མ་རིག་པས། །ཀུན་ནས་སློང་བའི་ས་བོན་བྱས། །ལས་དང་ཉོན་མོངས་རྐྱེན་བྱས་ནས། །ཀུན་བརྟགས་མ་རིག་པ་ཡིས་འཁོར། །གྲིབ་མ་གཟུགས་ཀྱི་དཔེ་བཞིན་ནོ། །སྐྱོད་བྱེད་ལས་ཀྱི་རླུད་གིས་བརླབས། །ཞེ་སྡང་དམྱལ་བའི་ཚ་གྲང་འཁོར། །སེར་སྣ་བཀྲེས་སྐོམ་ཡི་དགས་འཁོར། །གཏི་མུག་གླེན་ལྐུགས་བྱོལ་སོང་འཁོར། །ཕྲག་དོག་འགྱུར་བ་མི་རུ་འཁོར། །ང་རྒྱལ་འཐབ་རྩོད་ལྷ་མིན་འཁོར། །འདོད་ཆགས་ལྟུང་བ་ལྷ་རུ་འཁོར། །འཁོར་བ་ཟོ་ཆུའི་ཁྱུད་མོ་འདྲ། །ལྷ་མི་གཙང་མའི་ལུས་ཐོབ་ཀྱང་། །མ་རྟོགས་བར་དུ་འཁོར་བར་འ་ས། །ཐོག་མཐའ་མེད་ཀྱང་རྟོགས་ན་ཡོད། །ཨེ་མ་ཀུན་བཟང་བདེ་བ་ཆེ། །གཞི་དང་འཁྲུལ་པ་གང་ལས་བྱུང་། །གཅིག་པ་ཡིན་ནམ་ཐ་དད་ཡིན། །སངས་རྒྱས་སེམས་ཅན་གང་སྔ་ལགས། །ཀུན་རིག་རྒྱལ་པོས་བཀའ་སྩལ་པ། །རྐྱེན་སྣང་ག་པུར་སྨན་དུག་ཚུལ། །གསེར་གྱི་ཉ་མོ་བག་ལ་ཉལ། །ནམ་མཁའ་སྤྲིན་གྱི་དཔེ་ཡིས་མཚོན། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། འཁྲུལ་ཚུལ་གནད་ཀྱི་ལེའུ་སྟེ་བཞི་པའོ།། །།དེ་ནས་བཅོམ་ལྡན་བཀའ་སྩལ་པ། །ཆོས་ཉིད་རྣམ་པར་དག་པ་ལ། །མ་རིག་འཁྲུལ་པའི་གྲིབ་མས་བསྒྲིབས། །བསྒྲིབས་ཀྱང་ཆོས་ཉིད་སྤྲོས་དང་བྲལ། །ཁྱབ་གདལ་དོན་འདི་སུས་རྟོགས་པ། །རྒྱལ་སྲས་བཞིན་དུ་དབུལ་བ་སངས། །འདུ་འབྲལ་གཉིས་མེད་ཀུན་ཏུ་བཟང་། །མཚན་མ་མ་སྤངས་རང་སར་གྲོལ། །འཁོར་བ་མ་བཀག་གནས་སུ་དག །འཁྲུལ་པ་མ་བསལ་རྩད་ནས་ཆོད། །དུག་ལྔ་མ་བསྒྱུར་ཆོས་ཉིད་ཀློང་། །རྩོལ་བསྒྲུབ་མེད་པར་ཡེ་སངས་རྒྱས། །ཡིན་པའི་དོན་ལ་ཡིན་པར་ཤེས། །དཔེར་ན་གསེར་ལ་གསེར་མཐོང་བཞིན། །ཡིད་ཀྱི་རྣམ་རྟོག་ཟད་པའོ། །ནམ་མཁའ་ཆེན་པོའི་ཀློང་ཆེན་བཞིན། །ཁྱབ་གདལ་མི་འགྱུར་ཀུན་རྫོགས་གྲོལ། །ཉི་མ་སྤྲིན་མེད་སྙིང་པོ་བཞིན། །དུས་གསུམ་སྒྲིབ་མེད་དེ་བཞིན་ཉིད། །བརྒྱ་བྱིན་གཙུག་གི་ནོར་བུ་བཞིན། །འདོད་དགུ་འབྱུང་ལ་འགྲན་ཟླ་མེད། །མ་གི་ཏ་ཡི་སྨན་བཞིན་དུ། །གང་ལ་རེག་པ་སྨན་དུ་འགྱུར། །དགྲ་བཅོམ་རྒྱལ་སྲས་མི་ལུས་མཆོག །རྟོགས་ན་ཁྱད་པར་ཡོད་པའོ། །རྟོགས་པའི་ཐབས་སུ་ཐམས་ཅད་ཤར། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། རྟོགས་ལྡན་མཆོག་གི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་བཀའ་སྩལ་པ། །ཆོས་ཉིད་རང་བཞིན་འོད་གསལ་བ། །སྒྲོ་སྐུར་ལྟ་བ་ཀུན་དང་བྲལ། །ཐམས་ཅད་གཅིག་གི་རང་བཞིན་ལ། །སྤང་འགེགས་བྱིན་པས་བསླད་པ་མེད། །དབྱེར་མེད་ཡེ་ཤེས་ལྔ་ལྡན་ལ། །སྦྱང་བགྲོད་གཉིས་བལྟ་རང་སར་གྲོལ། །སྐྱེ་འགག་གཉིས་སུ་མེད་པ་ལ། །བསྒྱུར་དང་སྤྱོད་ལྔ་རྣམ་པར་དག །དག་པའི་ཀློང་ནབསྲུང་མཚམས་མེད། །མཉམ་པས་རིམ་པར་བཀོད་པ་མེད། །རྟོགས་པས་བལྟ་བའི་ཡུལ་ལས་འདས། །གསལ་བས་བསམ་གཏན་སྤྲོས་དང་བྲལ། །ཡུལ་ལས་འདས་པས་སྤྱོད་དུ་མེད། །ལྷུན་གྱིས་གྲུབ་པས་རྩོལ་བསྒྲུབ་མེད། །མ་ཡེངས་དྲན་པས་སྤྲོས་དང་བྲལ། །སྔགས་དང་ཕྱག་རྒྱ་རྣམ་པར་དག །སྟོང་ཉིད་ངང་ལ་མཆོད་བཤགས་མེད། །འཁོར་འདས་ཁྱབ་གདལ་ཆེན་པོ་ལ། །ཕྲིན་ལས་རྣམ་བཞི་གདོད་ནས་རྫོགས། །འགྲོ་བ་མུ་སྟེགས་རིམ་དགུ་རྫོགས། །ལམ་ལྔ་ཕ་རོལ་ཕྱིན་བཅུ་་རྫོགས། །འཁོར་འདས་བྱང་ཆུབ་སེམས་སུ་རྫོགས། །སྣང་སྲིད་ཐིག་ལེ་གཅིག་ཏུ་རྫོགས། །དྲན་པ་གཞི་བཞེངས་ཡོངས་སུ་རྫོགས། །རྒྱ་ཆད་ཕྱོགས་ལྷུང་མེད་པའོ། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། ནམ་མཁའ་མཛོད་ཀྱི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་བཀའ་སྩལ་པ། །རང་རིག་བདེ་བ་ཆེན་པོ་ལ། །བསྒོམ་ཡོད་བསྒོམ་མེད་གཉིས་སུ་མེད། །ཚིག་ཙམ་དོན་དམ་བདེ་ཆེན་དང་། །མ་བཅོས་མ་ཡངས་རང་སར་གྲོལ། །དྲན་པ་རང་གྲོལ་བདེ་ཆེན་ཀློང་། །སོ་མ་ལྷུག་པ་གྱིན་འདའ་ཙམ། །མིག་ཙམ་བསྒོམ་ཞེས་དེ་ལ་བྱ། །དྲན་རིག་ཤེས་པ་མ་འགགས་ལ། །འཛིན་རིག་ཡུལ་ལས་རྣམ་པར་གྲོལ། །མ་བྱུང་མ་སྐྱེས་གཡོས་པ་མེད། །སྤྲོས་བྲལ་བསམ་འདས་བརྗོད་མེད་རྫོང་། །མཉམ་ཉིད་རྣམ་དག་བརྡལ་བའི་ཀློང་། །མཁའ་འདྲ་ཡེ་ཤེས་ལྷུན་གྱིས་གྲུབ། །མ་བཙལ་རང་བཞག་རྙོག་པ་མེད། །ལྷུན་གྲུབ་རྟོག་པས་བྱ་བཙལ་བྲལ། །ཡེ་ནས་རང་བྱུངཡེ་ཤེས་ལ། །འཁྲུལ་དང་མ་འཁྲུལ་རྟོག་ལས་འདས། །རྟོག་འདས་དོན་གྱི་ཡེ་ཤེས་ལ། །བསྒོམ་བྱ་ཆོས་ཉིད་གུད་ན་མེད། །བསྒོམ་པ་མིང་དུ་བཏགས་པས་ནོར། །ཅི་སྟེ་སྨྲ་བསམ་བརྗོད་ལས་འདས། །རྣམ་རྟོག་གཉེན་པོར་མི་རྟོག་བསྒོམ། །དེ་ཀ་རྟོག་པ་ཆེན་པོ་ཡིན། །མཐོང་ཚོར་དེ་ཉིད་ཀློང་དུ་ཤར། །ཡིད་ལ་མི་བྱེད་བདེ་བ་ཆེ། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། བདེ་ཆེན་གསལ་བའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་བཀའ་སྩལ་པ། །བླང་དོར་མེད་པའི་ཡེ་ཤེས་ནི། །སྐྱེ་མེད་འགག་མེད་ཆོས་ཉིད་ཀློང་། །བྱ་བྲལ་ལྷུན་རྫོགས་བློ་ལས་འདས། །ཨེ་མ་རང་ལ་གནས་བཞིན་དུ། །སྤྱད་པས་ཐོབ་འདོད་ཨེ་མ་འཁྲུལ། །སྤྱོད་བྱེད་བྲལ་བའི་ཡེ་ཤེས་ལ། །སངས་རྒྱས་སེམས་ཅན་གཉིས་མེད་དེ། །ལམ་གྱིས་བཅོས་སུ་ག་ལ་ཡོད། །ཅི་ཕྱིར་དགག་བསྒྲུབ་མེད་པ་ལ། །རྩལ་སྤྲུག་སྨོན་ཆགས་རེ་དོགས་མེད། །ངོ་མཚར་རྨད་བྱུང་རོལ་པ་འདི། །རྟག་ན་བདེ་བ་ཆེན་པོར་རྟག །ཆད་ན་འཁོར་བ་རྩད་ནས་ཆད། །བྱིང་ན་ཆོས་ཉིད་དབྱིངས་སུ་བྱིང་། །རྒོད་ན་ཡེ་ཤེས་རོལ་པར་རྒོད། །མཉམ་ན་མི་མཉམ་མཉམ་ཉིད་ཀློང་། །ཐིམ་ན་འཁྲུལ་སྣང་ཆོས་ཉིད་ཐིམ། །སྐྱེ་མེད་དོན་ཏེ་ཡི་གེ་གཅིག །བྱ་བྲལ་མཁའ་ལྟར་ཡི་གེ་མེད། །ཡི་གེ་མེད་པ་རྒྱུད་ཀུན་མཆོག །ཨེ་མ་རྣམ་དག་བྱ་བཙལ་བྲལ། །བྱ་བྲལ་ངང་ལས་རྣམ་པར་རོལ། །ཅི་སྤྱོད་དོན་ལས་མ་གཡོས་ཤིང་། །ཐུག་ཕྲད་རང་གྲོལ་རྩིས་ཟིན་ན། །མིང་ཙམ་སྤྱོད་ཅས་དེ་ལ་བྱ། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། རྣམ་རྟོག་ཡེ་ཤེས་སུ་འབར་བའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་བཀའ་སྩལ་པ། །གདོད་ནས་མ་སྐྱེས་དོན་གྱི་ས། །ཐོབ་བསྒྲུབ་ཀུན་གྱི་ཡུལ་ལས་འདས། །རེ་དོག་བློ་ལས་རྣམ་པར་གྲོལ། །གོ་བའི་ཡུལ་ནི་བདེ་བ་ཆེ། །ངང་དངས་རང་བཞིན་བདག་ཉིད་ཀློང་། །རང་བཞིན་རྣམ་པར་དག་པ་ལ། །རོལ་པ་འགག་པ་མེད་པར་ཤར། །མཚན་ཉིད་དབྱེར་མེད་ཆེན་པོ་ལ། །བློ་རྟོག་ཆོས་ཉིད་དབྱིངས་སུ་གྲོལ། །རྟོག་མེད་མཉམ་ཉིད་ཆོས་ཀྱི་སྐུ། །བདེ་བ་ཆེན་པོ་ལོངས་སྤྱོད་སྐུ། །རྩལ་དུ་ཤར་བ་སྤྲུལ་པའི་སྐུ། །འདུ་འབྲལ་མེད་པ་རྡོ་རྗེའི་སྐུ། །ཚིག་གི་ཐ་སྙད་མ་ལགས་སམ། །གདོད་ནས་སྙིང་པོ་བྱང་ཆུབ་ལ བཙལ་བའི་བསམ་པས་དབྱིངས་མི་བསྐྱོད། །སྐུ་དང་ཡེ་ཤེས་ཚིག་ལས་གྲོལ། །གྲོལ་ནས་གྲོལ་བའི་ལམ་ཡང་སྟོན། །སྙིང་པོ་ཀློང་ནས་གྲོལ་བ་ལ། །མངོན་སུམ་རྗེས་དཔག་ལོག་པར་རྟོག །རྟོག་གེའི་སྤྱོད་ཡུལ་མ་ཡིན་ནོ། །ཅི་སྟེ་བྱ་བཙལ་བྲལ་བའི་ཕྱིར། །སྐྱེས་པ་སྐྱེ་མེད་བློ་ལས་འདས། །སྒྲ་དང་ཚིག་གི་མཐའ་ལས་གྲོལ། །སྟོང་པ་ཡེ་ཤེས་སྙིང་པོར་ཤར། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། དེ་ཁོ་ན་ཉིད་ཀྱི་ལེའུ་སྟེ་དགུ་པའོ།། །།དེ་ནས་བཅོམ་ལྡན་བཀའ་སྩལ་པ། །ཐམས་ཅདབྱང་ཆུབ་སེམས་ཡིན་ཏེ། །འཛིན་པའི་ཤེས་པ་ཡོད་པའི་ཕྱིར། །ཚོར་བ་ཉམས་སུ་མྱོང་བའོ། །སྣང་བ་སེམས་ཉིད་རྒྱན་ཤར་བས། །སྣང་བའི་བར་དོ་སྟོང་རྒྱ་ཐེབ། །བསམ་གཏན་གཉིད་གཉིས་རོ་མཉམ་ཕྱིར། །རྨི་ལམ་བར་དོ་རྣམ་པར་དག །སྐྱེ་ཤི་མེད་པའི་དོན་རྟོགས་པས། །འཆི་ཀ་བར་དོ་བདེ་ཆེན་ཀློང་། །ཕྱི་མ་བདེ་བ་མཆོག་ཐོབ་པས། །སྲིད་པའི་བར་དོར་ལུས་མི་ལེན། །ལུས་མེད་ལུས་ཏེ་ལུས་ཀྱི་མཆོག །སྤྲུལ་པའི་སྐུ་སྟེ་རྣམ་པར་དག །མ་རྟོགས་མོས་པའི་རྣལ་འབྱོར་ཀྱང་། །ཅི་སྟེ་ལས་ཀྱི་དབང་གྱུར་ན། །བདེ་བ་མཆོག་གི་ལས་འཕྲོ་མཐུད། །ལས་ལས་གྲོལ་ན་ཐར་བའི་མཆོག །ཇི་ཙམ་པ་ཡི་ཚིག་བརྗོད་ཀྱང་། །སེམས་ལས་གུད་ན་ཡོད་མ་ཡིན། །ཕོ་མོ་མ་ཡིན་མ་ནིང་མིན། །ཁ་དོག་དབྱིབས་དང་མཚན་མ་མེད། །འདས་དང་མ་འོངས་ད་ལྟར་མེད། །གཅིག་དང་ཐ་དད་ལས་གྲོལ་བ། །དྲན་པ་དངོས་མེད་རིག་པའི་རྒྱུན། །རླུ་་ལས་བརྟེན་ཅིང་རྒྱུན་མི་ཆད། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། བྱང་ཆུབ་སེམས་ཀྱི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་བཀའ་སྩལ་པ། །ཆོས་རྣམས་ཐམས་ཅད་སྟོང་པ་ཉིད། །གཞིག་ཀྱང་རང་བཞིན་རྣམ་པར་དག །རྣམ་པར་མི་རྟོག་སྤྲོས་བྲལ་མཁའ། །ངོ་བོ་གཟུགས་མེད་ཚོར་བ་མེད། །འདུ་ཤེས་འདུ་བྱེད་རྣམ་ཤེས་སྟོང་། །དབང་པོ་ལྔ་དང་ཡུལ་ཡང་སྟོང་། །སྐྱེ་མཆེད་ཁམས་དང་རྟེན་འབྲེལ་སྟོང། །བདེན་བཞི་བསལ་གསལ་དང་སྤྲོས་བྲལ་སྟོང་། །ལྷ་དང་ཕྱག་རྒྱ་སྔགས་ཀྱང་མེད། །ཐབས་དང་ཤེས་རབ་བདེ་བ་སྟོང་། །དབུས་མཐའ་གཉིས་མེད་ཚིག་ཀྱང་མེད། །མེད་དེ་མེད་པའི་སྙིང་པོ་ཅན། །ཡོད་དེ་རྟོག་པའི་མཐའ་ལས་འདས། །མཐའ་བྲལ་དོན་གྱི་ཆོས་སྐུ་འདི། །ཕྱོགས་མེད་རྐྱེན་རྣམས་ཀུན་དང་བྲལ། །རང་སྣང་ཐབས་ཀྱི་ཡེ་ཤེས་རོལ། ཁེས་པ་ཤེས་བྱར་རྣམ་པར་དག །སྤྲོས་བྲལ་བསམ་འདས་སྨྲ་རུ་མེད། །མཐའ་བྲལ་ཚིག་གིས་མི་ཕེབས་ལ། །བསྒོམ་ཡོད་བློ་ཡི་རྟོག་པ་ཡིན། །བསྒོམ་མེད་སྐུར་འདེབས་བལྟ་བ་ལ། །དེས་ན་གཉིས་མེད་བདེ་ཆེན་ཀློང་། །སྤང་བྱ་བླང་བྱ་གཉིས་མེད་རྫོང་། །བཏང་སྙོམས་མངོན་གྱུར་མེད་པ་ཉིད། །མི་རྟོག་ནམ་མཁའི་མཐའ་ལྟར་ཡངས། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། ཆོས་ཉིད་སྟོང་པ་ཉིད་ཀྱི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་བཀའ་སྩལ་པ། །ཆོས་རྣམས་འོད་གསལ་གཉིས་མེད་ལ། །བདག་ཏུ་མི་རྟོག་གཞན་མི་རྟོག །མི་རྟོག་རྟོག་ལས་རྣམ་པར་གྲོལ། །གཉིས་མེད་བདེ་བ་ཆེན་པོ་ལ། །དཔེར་ན་གླང་ཆེན་ལྕགས་ཀྱུ་བཞིན། །མ་ཡེངས་དྲན་པས་རང་སར་གྲོལ། །གསེར་བུམ་ཏིལ་གྱི་སྒྲོན་མ་བཞིན། །འགྱུར་མེད་རིག་པ་ནང་ན་གསལ། །རྫོགས་ཆེན་རྟོག་པའི་རྣལ་འབྱོར་ནི། །གསེར་གླིང་བརྡལ་བའི་ཀླུང་ཆེན་བཞིན། །གང་བལྟས་རྫོགས་པ་ཆེན་པོའི་ཀློང་། །དུག་སྦྲུལ་འབར་བའི་མདུད་པ་བཞིན། །རྩོལ་བསྒྲུབ་མེད་པར་རང་སར་གྲོལ། །གཉིས་མེད་གཉིས་སུ་མེད་པའི་ཕྱིར། །སྐུ་གསུང་ཐུགས་ལ་རྟེན་མི་འཆའ། །འབྱུང་བ་ལྔ་ལ་རག་མ་ལུས། །སྲིད་གསུམ་ཡེ་ནས་རྣམ་པར་དག །འདོད་ཡོན་ཡེ་ཤེས་ལྔ་རུ་རོལ། །དུག་ལྔ་སྐུ་ལྔའི་ངང་དུ་ཐིམ། །སྡུག་བསྔལ་ཆོས་ཉིད་དབྱིངས་ཀྱི་རྒྱན། །རྣམ་རྟོག་ཡེ་ཤེས་ཆེན་པོར་འབར། །འཁྲུལ་པའི་འགྲོ་འོང་ཟད་པ་དང་། །འབྲས་བུ་ཐོབ་ཅེས་རེ་བ་མེད། །མེད་ནས་དོན་མེད་མ་ཡིན་ཏེ། །ལོངས་སྐུ་གཉིས་མེད་ཐམས་ཅད་རྫོགས། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། འོད་གསལ་གཉིས་མེད་ཀྱི་ལེའུ་སྟེ་བཅུ་གཉིས་པའོ།། །།དེ་ནས་བཅོམ་ལྡན་བཀའ་སྩལ་པ། །མིང་ཚིག་སྒྲ་ལས་འདས་པ་ཆེ། །མ་བསླབས་ཀུན་ལས་གྲོལ་ན་མཁས། །མ་བསམས་སྐྱེ་བ་མེད་པས་ཨ། །མ་བསྒོམས་དབྱིངས་སུ་ཐིམ་པས་ཏི། །ཡོ་ག་རྫོགས་ཆེན་ཆོས་ཀྱི་རྩེ། །ཤིན་ཏུ་རྣལ་འབྱོར་ལྷ་ཡི་ལྷ། །རྫོང་བཞི་གཉིས་མེད་ཚིག་གཅིག་ལྷ། །འཕྲང་བཞི་དབྱེར་མེད་ཆིག་ཆོད་ལྷ། །ཀློང་བཞི་ཟུང་འཇུག་འདའ་ཁའི་ལྷ། །དབུལ་མོ་གཏེར་ཕྲད་སྐུ་བཞིའི་གདེང་། །རྫོགས་པ་ཆེན་པོ་ས་གཅིག་པ། །གང་གིས་དེ་རྟོགས་དེ་ཡིས་ས། །ཡོངས་སུ་རྫོགས་པས་ཆོས་ཀྱི་རྩི། །བདེ་བ་ཆེ་ལས་གཞན་མེད་དོ། །སྨྲ་བསམ་བརྗོད་མེད་ཆོས་ཀྱི་སྐུ། །གཉིས་མེད་བདེ་བ་ཆེན་པོའི་ཀློང་། །སྤྲུལ་པ་རྒྱན་དང་རོལ་པར་ཤར། །སྐུ་ལྔ་ཡེ་ཤེས་ཐིག་ལེར་རྫོགས། །མ་སྐྱེས་པ་ཡི་དབྱིངས་ཉིད་དུ། །མ་གཡོས་པ་རུ་ཡིད་གནས་པས། །མ་བསྒྲུབས་པ་ཡི་འབྲས་བུ་སྟེར། །མ་བསམས་པ་རུ་རེ་བ་བསྐང་། །ཡེ་ཤེས་ཆེན་པོའི་རོས་གང་བས། །མཚོན་དུ་ཡོད་པ་མ་ཡིན་ཏེ། །ཡེ་ཤེས་རོལ་པས་འགྲོ་དོན་རྫོགས། །ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། སྐུ་གསུམ་ཐིག་ལེར་རྫོགས་པའི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདི་སྐད་གསུངས། །ཅིར་སྣང་དེ་བཞིན་ཉིད་དུ་གཅིག །འདི་ལ་བཅོས་བསླད་མ་བྱེད་ཅིག །མ་བཅོས་མཉམ་པའང་རྒྱལ་པོ་དེ། །མི་རྟོག་ཆོས་སྐུའི་དགོངས་པར་གནས། །སྐྱེ་མེད་ལྟ་བ་སྟོང་པ་ཉིད། །ཀུན་ཁྱབ་སྒོམ་པ་གཉིས་སུ་མེད། །ཞབྲུལ་སྤྱོད་སེམས་ཀྱི་རྒྱན་དུ་རོལ། །རྟོགས་པའི་འབྲས་བུ་ཐིག་ལེར་གཅིག །དུས་གསུམ་གཅིག་སྟེ་ཁྱད་པར་མེད། །གཏན་ཚིགས་བཞི་རུ་གཅིག་པའི་ཕྱིར། །ང་ལས་བྱུང་ཞིང་ང་རུ་ཐིམ། །ང་ཡིརངབཞིནའོདགསལལོ། །ཨེ་མ་སེམས་དཔའ་རྡོ་རྗེ་ཆེ། །ནམ་མཁའི་མཐའ་ལྟར་ལོངས་སྤྱོད་པས། །ཆོས་དབྱིངས་རྒྱ་མཚོ་ཟད་མི་ཤེས། །བདུད་རྩིའི་ཐིགས་པ་ལྕེ་ལ་ཞོག །རྒྱལ་པོ་བཙོན་དུ་བཟུང་བ་དང་། །གངས་རི་རྩེ་ནས་བསྙིལ་བ་སྟེ། ཁེང་རྟའི་གཟེར་མགོ་གཅད་པར་བྱ། །མཁའ་ལྟརཡིགེ་མེད་པའི་རྒྱུད། །རང་རིག་སེམས་ཀྱི་དཀྱིལ་དུ་ཆོང་། །ཐུགས་རྗེ་ཡེ་ཤེས་རོལ་པར་འཆར། །ཨེ་མ་ཀུན་བཟང་རྒྱལ་བའི་ཡབ། །མ་འདྲེས་ཡོངས་རྫོགས་ཟབ་ཅིང་ཡངས། །ནམ་མཁའ་ལྟ་བུའི་རྒྱུད་བསྟན་པ། །མིང་ཚིག་ཡི་གེ་མེད་པ་ལ། །བསྟན་དུ་འོང་བ་ཅི་ཡི་ཕྱིར། །བཅོམ་ལྡན་ཀུན་བཟང་བཀའ་སྩལ་པ། །མཚོན་དུ་མེད་པའི་ཆོས་ཉིད་ལ། །མཚོན་དུ་མེད་པའི་ཚིག་བརྗོད་ནས། །མཚོན་པའི་ཚིག་ལས་རྣམ་པར་གྲོལ། །ལེགས་སོ་སེམས་དཔའ་རྡོ་རྗེ་ཆེ། །དོན་དམ་ཡི་གེ་མེད་པའི་རྒྱུད། །ཁྱོད་ལ་གཏད་དོ་བདེ་བ་ཆེ། །རང་བྱུང་ཡེ་ཤེས་རྒྱས་ཐོབ་ལ། །ཐིག་ལེ་ཉག་གཅིག་ངང་ལ་ཞོག །ཀུན་ཏུ་བཟང་པོ་བདེ་བ་ཆེ། །ཐིག་ལེ་ཆེན་པོ་ཡི་གེ་མེད། །བྱ་བ་མེད་པས་རྣམ་པར་གྲོལ། །གྲོལ་ནས་གྲོལ་བའི་ལམ་ཡང་ཤར། །ཀུན་རིག་སེམས་ལ་མངོན་པར་བསྟོད། །ནམ་མཁའ་དང་མཉམ་པ་ཡི་གེ་མེད་པའི་རྒྱུད། བཅོམ་ལྡན་འདས་ཀུན་རིག་རྒྱལ་པོས་གསུངས་པ་རྫོགས་སོ།། །།རྒྱ་གར་གྱི་མཁན་པོ་ཕྲི་སིང་ཧ་དང་། བོད་ཀྱི་ལོ་ཙྭ་བ་བི་རོ་ཙ་ནས་བསྒྱུར་བའོ།། །།