https://rywikitexts.tsadra.org/index.php?action=history&feed=atom&title=Klong_chen_rab_byams_gsung_%27bum%2Fvolume_025_565
Klong chen rab byams gsung 'bum/volume 025 565 - Revision history
2026-10-17T22:09:25Z
Revision history for this page on the wiki
MediaWiki 1.43.9
https://rywikitexts.tsadra.org/index.php?title=Klong_chen_rab_byams_gsung_%27bum/volume_025_565&diff=11035&oldid=prev
Maintenance script at 16:03, 22 March 2020
2020-03-22T16:03:09Z
<p></p>
<p><b>New page</b></p><div>__TOC__<br />
<br />
༈ བར་དོའི་སྨོན་ལམ་ངོ་སྤྲོད་བཞུགས་སོ། ། ཨོཾ་ཨཱཿཧཱུྃ། ཕྱོགས་དུས་རྒྱལ་བ་མ་ལུས་དགོངས་སུ་གསོལ། །བདག་གི་ཐོག་མེད་དུས་ནས་ད་ལྟའི་བར། །དུས་གསུམ་བསགས་དང་ཡོད་པའི་དགེ་བ་དེས། །བདག་གཞན་མ་ལུས་བྱང་ཆུབ་ཐོབ་པར་ཤོག །དེ་མ་ཐོབ་ཀྱི་ཚེ་རབས་ཀུན་ཏུ་ཡང༌། །ལམ་ཟབ་རྫོགས་ཆེན་སྙིང་པོའི་དོན་རྟོགས་ནས། །ཆོས་ཉིད་མངོན་སུམ་གོང་འཕེལ་ཚད་ཕེབས་ཤིང༌། །ཟག་བཅས་ཕུང་པོ་འོད་སྐུར་གྲོལ་བར་ཤོག །གནད་གཅོད་དྲག་པོའི་སྡུག་བསྔལ་མི་འབྱུང་ཞིང༌། །བླ་མ་ཡི་དམ་དཔའ་བོ་མཁའ་འགྲོའི་ཚོགས། །མིག་གི་དབང་པོར་མངོན་སུམ་བྱོན་ནས་ ནི། །དབང་བསྐུར་ལུང་སྟོན་མཁའ་སྤྱོད་འཁྲིད་པར་ཤོག །འདུས་བྱས་མི་རྟག་འཆི་བ་བྱུང་ཙ་ན། །འགྱུ་བའི་དབུགས་ཆད་བེམས་རིག་བྲལ་བའི་ཚེ། ། ཞེན་ཆགས་འཁྲུལ་པའི་སྣང་བ་མི་འཆར་བར། །གནས་ལུགས་ཆོས་སྐུའི་ངང་ལ་གནས་པར་ཤོག །སྒྱུ་ལུས་གདོས་བཅས་འཇོག་པ་དུས་བབས་ན། །སྣང་ཕུང་ཕྲ་རགས་རྟོག་པ་འགག་པའི་ཚེ། །འཁྲུལ་མེད་ཁྱབ་གདལ་གདོད་མའི་དབྱིངས་ཆེན་ལ། །བེམས་རིག་བྲལ་མ་ཐག་ཏུ་གྲོལ་བར་ཤོག །མ་དག་འབྱུང་བ་སོ་སོར་དེངས་པའི་ཚེ། །དག་པའི་འོད་ལྔ་མ་འདྲེས་འོད་གསལ་དང༌། །རྟོག་མེད་འོད་ལྔ་རྡོ་རྗེ་ལུ་གུ་རྒྱུད། །དབྱེར་མེད་གཅིག་འདྲེས་ཆོས་ཉིད་མཐར་ཕྱིན་ཤོག །ཧཱུྃ་ཆེན་ཁྲོས་པའི་སྲིན་པོའི་གཟུགས་ལ་སོགས། །ཧཱུྃ་སྒྲས་སྟོང་གསུམ་མ་ལུས་གང་ཙ་ན། །རིག་སྟོང་ཧཱུྃ་སྒྲའི་གནད་དུ་ངོ་ཤེས་ནས། །གྲགས་སྟོང་བྲག་ཅ་ལྟ་བུར་རྟོགས་པར་ཤོག །གཤིན་རྗེའི་གཤེད་མའི་ཚོགས་ཀྱིས་བསྐོར་ཙ་ ན། །རྒྱོབ་སོད་འབྲོས་འདེད་འཁྲུལ་བ་དབྱིངས་དག་ནས། །བྲེད་སྔངས་འཁྲུལ་བའི་སྣང་བ་མི་འཆར་བར། །ཡིད་དམ་ཞི་ཁྲོའི་སྐུ་རུ་ཤེས་པར་ཤོག །དུང་ཁང་འབར་བའི་བདེ་ཆེན་གཞལ་ཡས་ནས། ཁྲག་འཐུང་ཁྲོ་བོའི་ཚོགས་རྣམས་གྱེས་པའི་ཚེ། །འཇིགས་གཟུགས་སྲིན་པོའི་སྐུ་རུུ་མི་འཆར་བར། །མན་ངག་སྙིང་ཏིག་དགོངས་པའི་དོན་རྟོགས་ཤོག །ཙིཏྟ་རིན་ཆེན་གུར་ཁང་གཞལ་ཡས་ ནས། །ཞི་བའི་ཚོགས་རྣམས་དབྱིངས་སུ་ཡལ་བའི་ཚེ། །སྣང་བ་རུ་ལོག་འོད་སྐུར་ཤར་བའི་དུས། །རིག་པ་འོད་ཀྱི་ཀློང་དུ་ཐིམ་པར་ཤོག །མགྲིན་ མགུལ་རྩ་ཡི་འཁོར་ལོ་དྲལ་བའི་ཚེ། །འཇིགས་པའི་གད་རྒྱང་འབྲུག་སྟོང་ལྡིར་ཙ་ ན། །ཨཱཿ་ཧཱུྃ་ཞི་ཁྲོའི་གདངས་སུ་ངོ་ཤེས་ནས། །རིག་སྟོང་སྐྱེ་མེད་སྒྲ་རུ་གྲོལ་བར་ཤོག །གསང་གནས་བདེ་སྐྱོང་འཁོར་ལོའི་གཞལ་ཡས་ནས། །ཐབས་ཤེས་དཀར་དམར་སྙིང་གར་ཕྲད་ཙ་ན། །བདེ་སྟོང་ཟག་པ་མེད་པའི་གནས་ལུགས་དེ། །རླུང་རིག་དབུ་མའི་ནང་དུ་ཚུད་པར་ཤོག །ཆོས་ཉིད་བར་དོའི་ངང་ལ་གནས་པའི་ཚེ། །ཤེས་རིག་ལུང་མ་བསྟན་དུ་མ་སོང་བར། །རང་གྲོལ་ཀ་དག་ཆེན་པོའི་དོན་རྟོགས་ཏེ། །གཞན་སྟོང་ཆོས་ཟད་ངང་ལ་གནས་པར་ ཤོག །ཆོས་ཉིད་མངོན་སུམ་བདེན་པ་མཐོང་བའི་ཚེ། །གཉེན་པོ་དྲན་འཛིན་སྒོམ་པའི་བློ་བྲལ་ནས། །ཀ་དག་ཟད་སར་འཁྱོལ་བའི་དོན་རྟོགས་ཏེ། །རྟོག་མེད་སྤྲོས་བྲལ་ངང་ལ་གནས་པར་ཤོག །འཇའ་ཚོན་སྣ་ལྔ་འདྲེས་པའི་གཞལ་ཡས་ནས། །ཡེ་ཤེས་ལྔ་ཡི་གུར་ཁང་སྒོ་ཕྱེ་སྟེ། །སྐུ་དང་ཐིག་ལེས་ཞིང་ཁམས་གང་བའི་ཚེ། །སྐུ་ལྔ་ཡེ་ཤེས་ལྔ་དང་མཇལ་བར་ཤོག །ཐིག་ལེ་སྟོང་སྒྲོན་འོད་གསལ་གཞལ་ཡས་སུ། །ལྷུན་གྲུབ་སྦུབས་ལ་བརྟན་པ་མཐར་ཕྱིན་ནས། ། དབྱིངས་རིག་ནམ་མཁའི་ངང་དུ་འཕོ་བར་ཤོག །ཆོས་སྐུ་སྟོང་གསལ་སྒྲོན་མེ་འབར་བར་ཤོག །སྟོང་ཉིད་རིག་པའི་ཆོས་སྐུ་ཐོབ་པར་ཤོག །འགག་མེད་གཉིས་སྣང་ལོངས་སྐུ་ཐོབ་པར་ཤོག །རང་རིག་མཐར་ཕྱིན་སྤྲུལ་སྐུ་ཐོབ་པར་ཤོག །སྐུ་གསུམ་ཐོབ་ནས་གཞན་དོན་བྱེད་པར་ཤོག །ཅེས་འཆི་ཁ་བར་དོ་དང་ཆོས་ཉིད་བར་དོའི་སྨོན་ལམ་ཐོས་པས་གྲོལ་བ་ཀུན་མཁྱེན་ཀློང་ཆེན་རབ་འབྱམས་ཀྱིས་མཛད་པ་རྫོགས་སོ།། །། ཨྠིྀཿ ཀྱེ་མ་རིགས་ཀྱི་བུ་ཁྱོད་ལེགས་པར་ཉོན། ཁྱོད་ལུས་གདོས་བཅས་ཕུང་པོ་ཤུལ་དུ་བོར། །ད་ལྟ་རྣམ་ཤེས་རྟེན་མེད་བར་དོར་འཁྱམས།།འདི་དུས་དཀོན་མཆོག་མིན་པ་སྐྱབས་གནས་མེད། །ད་ནི་ཤུལ་གྱིས་ཟས་ནོར་ཉེ་དུ་སོགས། །སྐད་ཅིད་ཙམ་ཡང་ཡིད་ལ་མ་བྱེད་པར། །བར་དོའི་དུས་འདིར་བར་དོར་ཤེས་པར་གྱིས། །རང་གི་ཡིད་ལུས་ཡི་དམ་ལྷ་རུ་སྒོམས། །ཅིར་སྣང་མི་བདེན་རྨི་ལམ་སྒྱུ་མར་ལྟོས། །ཕན་གནོད་ལྷ་འདྲེའི་གཟུགས་དང་མི་སྙན་སྒྲ། །ས་གཡོ་རི་འགུལ་ཤིང་འདེགས་མཚོ་འཁྲུག་དང༌། །མུན་ནག་སྲོས་དང་གནམ་གྲུམ་སྒྲ་ཆེན་སོགས། །འཇིགས་འཇིགས་འདྲ་བའི་འཁྲུལ་སྣང་མཐོང་བའི་ཚེ། །རྨི་ལམ་སྣང་བ་ཅི་འདྲར་ཤེས་པར་གྱིས། །ནམ་མཁའ་ཅིས་ཀྱང་གཞིག་པར་མི་ནུས་ལྟར། ཁྱོད་ཀྱིས་ཡིད་ལུས་སྟོང་པ་དེ་ལ་ནི། །སྲིད་གསུམ་དགྲ་རུ་ལངས་ཀྱང་ཅི་བྱར་ཡོད། །རང་གིས་རང་ལ་འཁྲུལ་པར་མ་བྱེད་པར། །གཟུགས་སྣང་ཐམས་ཅད་ལྷ་སྐུ་སྒྱུ་མར་ལྟོས། །སྒྲ་ཚོགས་ཅི་གྲགས་ཡི་དམ་ལྷ་ཡི་སྔགས། །རང་སེམས་སྟོང་པ་སྐྱེ་མེད་ཆོས་སྐུར་ཞོག །སྤྱི་བོའི་གཙུག་ཏུ་རྩ་བའི་བླ་མ་སྒོམས། །མི་འབྲལ་གུས་པས་གདུང་ཤུགས་གསོལ་བ་ཐོབ། །སྣོད་བཅུད་རང་གཞན་བཅས་པ་འདི་ཀུན་ཀྱང༌། །བརྡར་བཏགས་ཙམ་སྟེ་གཅིག་དང་ཐ་དད་མེད། །ཐམས་ཅད་རང་སེམས་སྙིང་པོ་གཅིག་ཏུ་དྲིལ། ། ཨ་ཡིག་དཀར་པོ་འོད་ཟེར་འབར་བ་ཡིས། །ནུབ་ཕྱོགས་བདེ་བ་ཅན་གྱི་འཇིག་རྟེན་ཁམས། །རྣམ་དག་ཡོན་ཏན་བགྲང་ལས་འདས་པ་དེ། །མིག་གི་དྲུང་ན་འདུག་པ་ལྟ་བུར་ལྟོས། །སངས་རྒྱས་སྣང་བ་མཐའ་ཡས་ཚེ་དཔག་མེད། །འོད་ཟེར་ཉི་མ་འབུམ་གྱི་གཟི་ལྡན་པ། །མཚན་དཔེ་དཔག་ཡས་བལྟར་མི་ངོམས་པ་དེའི། །ཐུགས་ཀའི་དབུས་སུ་རང་སེམས་དབྱེར་མེད་བསྲེས། །ཟབ་མོ་ཆོས་ཀྱི་དབྱིངས་སུ་མཉམ་བཞག་གོ །ཞེས་རང་གཞན་གྱི་ཡིད་དང་རྣ་བར་ངེས་པར་བྱས་ན་སྲིད་པ་བར་དོར་གྲོལ་བ་ཐོབ་པའི་རྟེན་འབྲེལ་ཡོད་པས་དོ་གལ་གྱིས་ཆེད་དུ་འབད་པར་གྱིས་ཤིག །།«མེས་པོའི་ཤུལ་བཞག་ལས། ཀློང་ཆེན་རབ་འབྱམས་ཀྱི་གསུང་འབུམ། ༼༢༥༽ བར་དོའི་སྨོན་ལམ་ངོ་སྤྲོད།<br />
<br />
»-PAGE 464--PAGE 465--PAGE 462-<br />
<br />
<br />
<br />
[[Category:Longchenpa]] [[Category:klong chen gsung 'bum]] [[Category:klong chen gsung 'bum Vol 25]]</div>
Maintenance script