Ngb-pt-0233-vol-03-text
Front
Body
རྒྱ་གར་སྐད་དུ། ཡ་མུརྙ་ཀ་ས་མུ་དྭ་ཡ་མྱུ་ལ་ཏན་ཏྲ་ནཱ་མ། བོད་སྐད་དུ། གཤིན་རྗེ་གཤེད་རབ་ཏུ་འདུས་པ་རྩ་བའི་རྒྱུད་ཅེས་བྱ་བ། བཅོམ་ལྡན་འདས་དེ་བཞིན་གཤེགས་པ་འཇིགས་བྱེད་ཁྲོ་བོའི་རྒྱལ་པོ་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་གཤིན་རྗེ་ཐམས་ཅད་ཀྱི་གཤེད། སྐུ་འཇིགས་བྱེད་ཀྱི་རྒྱལ་པོ་ཆེན་པོ་དེ། འོག་མིན་གྱི་གནས་རི་རབ་ཆེན་པོའི་ཁང་བཟངས་དམ་པ་ཡངས་ཤིང་རྒྱ་ཆེ་བ། ནམ་མཁའི་མཐའ་དང་མཉམ་པ་ན། སྐུ་གསུང་ཐུགས་ཀྱི་རོལ་པ་ཆེན་པོ་བསམ་གྱིས་མི་ཁྱབ་པས་བཞུགས་པའི་དུས་ཀྱི་ཚེ། འཁོར་འདུས་པ་ནི། སྐུ་གསུང་ཐུགས་ཀྱི་སྲས་དམ་པའི་མཆོག་ཏུ་གྱུར་པ་གཤིན་རྗེ་གཤེད་ཀྱི་རྒྱལ་པོ་ཞེས་བྱ་བ་དང་། མྱོས་བྱེད་འབར་བ་ཞེས་བྱ་བ་དང་། འཕགས་པ་དམར་པོ་ཞེས་བྱ་བ་དང་། རལ་པ་དགུ་པ་ཞེས་བྱ་བ་དང་། རིགས་ཀྱི་སྲས་ཆེན་པོ་དེ་དག་གི་སྐུ་ལ་དགྱེས་པར་སྦྱོར་བའི་ཡུམ། རལ་པ་གཅིག་མ་ཞེས་བྱ་བ་དང་། གཏུམ་མོ་ཆེན་མོ་ཞེས་བྱ་བ་དང་། འོད་ཟེར་ཅན་མ་ཞེས་བྱ་བ་དང་། དཔལ་ཆེན་མོ་ཞེས་བྱ་བ་དང་། དེ་དག་གི་ཕྲིན་ལས་རྫོགས་པར་བྱེད་པ། སྒྲོལ་བའི་ཡུམནགམོཆེནམོཞེསབྱབདང་། འདོད་ཆགས་ཁྲག་གི་བདག་མོ་ཞེས་བྱ་བ་དང་། གླིང་བཞི་རབ་ཏུ་འབྱམས་མ་ཞེས་བྱ་བ་དང་། སྲིན་མོ་མགོ་འཕྱངས་མ་ཞེས་བྱ་བ་དང་། གཞན་ཡང་གཤིན་རྗེའི་གཙོ་བོ་ཆེན་པོ་ནག་པོའི་ཚོགས་འཇོམས་ཞེས་བྱ་བ་དང་། དབང་ཕྱུག་རྫོགས་པ་ཞེས་བྱ་བ་དང་། སྲིད་པ་འཇོམས་པ་ཞེས་བྱ་བ་དང་། དོམ་གྱི་གླང་མགོ་ཅན་ཞེས་བྱ་བ་དང་། ཡ་བ་ཏི་ཞེས་བྱ་བ་དང་། མིག་དམར་ཞེས་བྱ་བ་དང་། རབ་ཏུ་དམིགས་པ་ཞེས་བྱ་བ་དང་། ་རྒོན་ཏུ་ཏེལ་ཚ་རྟིལ་པ་ཞེས་བྱ་བ་དང་། བདུད་འཇོམས་པ་ཞེས་བྱ་བ་དང་། ཆོས་ཀྱི་རྒྱལ་པོ་ཞེས་བྱ་བ་དང་། འབར་བ་དམར་པོ་ཞེས་བྱ་བ་དང་། ཐོད་དབྱུག་ཅན་ཞེས་བྱ་བ་དང་། དེ་དག་གི་སྐུ་ལ་རབ་ཏུ་སྦྱོར་བའི་ཡུམ་ནག་མོ་རལ་གཅིག་མ་ཞེས་བྱ་བ་དང་། ཤེལ་གྱི་གདོང་དགུ་མ་ཞེས་བྱ་བ་དང་། །ཁྲོ་མོ་ཤེལ་མིག་མ་ཞེས་བྱ་བ་དང་། དཀར་སྐྱ་མཆེ་གཙིགས་མ་ཞེས་བྱ་བ་དང་། དྲེད་ཀྱི་ཨག་ཤམ་ཅན་ཞེས་བྱ་བ་དང་། ཁྲག་གི་རལ་གཅིག་མ་ཞེས་བྱ་བ་དང་། ཀླུ་མོ་བུས་འགྲོ་མ་ཞེས་བྱ་བ་དང་། སྤྱན་གསུམ་མཆེ་གཙིགས་མ་ཞེས་བྱ་བ་དང་། སྨུག་ནག་རལ་གཅིག་མ་ཞེས་བྱ་བ་དང་། རྡོ་རྗེའི་རལ་པ་ཅན་ཞེས་བྱ་བ་དང་། དམར་མོ་མགོ་དགུ་མ་ཞེས་བྱ་བ་དང་། །ནག་མོ་ཕག་མགོ་ཅན་ཞེས་བྱ་བ་དང་། གཤིན་རྗེ་བྱ་རྒོད་ཀྱི་མགོ་ཅན་ཞེས་བྱ་བ་དང་། སྟག་གི་མགོ་ཅན་ཞེས་བྱ་བ་དང་། ཀང་ཀའི་མགོ་ཅན་ཞེས་བྱ་བ་དང་། སྤྱང་ཀིའི་མགོ་ཅན་ཞེས་བྱ་བ་དང་། གཞན་ཡང་གསོད་པར་བྱེད་པའི་ཕོ་ཉ་བཞི་དང་། གསོད་པར་བྱེད་པའི་བདུད་བཞི་དང་། ཁྲམ་ལ་འདེབས་པའི་རྩིས་པ་བཞི་དང་། །སྲོག་ལ་དབང་བའི་བཤན་པ་བཞི་དང་། །གཞན་ཡང་འཇིག་རྟེན་གྱི་དྲེགས་པ་ཅན་ཕོ་དང་མོའི་རྣམ་པ་དང་། རྗེ་དང་བྲན་གྱི་རྣམ་པ་དང་། འཁོར་དང་གཡོག་གི་རྣམ་པ་དང་། བུ་དང་བུ་མོའི་རྣམ་པ་དང་། གཞན་ཡང་ལྷའི་གཟུགས་དང་། ལྷ་མ་ཡིན་གྱི་གཟུགས་དང་། ནམ་མཁའ་ལྡིང་གི་གཟུགས་དང་། །ཀླུའི་གཟུགས་དང་། གནོད་སྤྱིན་གྱི་གཟུགས་དང་། སྲུལ་པོའི་གཟུགས་དང་། ལུས་སྲུལ་པོའི་གཟུགས་དང་། ཡི་དྭགས་ཀྱི་གཟུགས་དང་། ཤ་ཟའི་གཟུགས་དང་། གྲུལ་བུམ་གྱི་གཟུགས་དང་། ལྟོ་འཕྱེ་ཆེན་པོའི་གཟུགས་དང་། དྲི་ཟའི་གཟུགས་དང་། སྲིན་པོའི་གཟུགས་དང་། དུད་འགྲོའི་གཟུགས་དང་། བྱོལ་སོང་གི་གཟུགས་དང་། དམྱལ་བའི་གཟུགས་དང་། སྐུའི་སྤྲུལ་པ་དང་། གསུང་གི་སྤྲུལ་པ་དང་། ཐུགས་ཀྱི་སྤྲུལ་པ་དང་། ཡོན་ཏན་གྱི་སྤྲུལ་པ་དང་། ཕྲིན་ལས་ཀྱི་སྤྲུལ་པ་དང་། རྣམ་པར་སྨིན་པའི་སྤྲུལ་པ་དང་། དེ་ལ་སོགས་ཏེ་ཐུགས་ཞི་བ་ཆོས་ཉིད་རྣམ་པར་དག་པའི་ཆོས་ཀྱི་དབྱིངས་ཀྱིས་ངང་ལས་མ་གཡོས་ཀྱང་། སྐུ་དང་གསུང་གི་ཆ་ལུགས་དང་། ང་རོའི་སྒྲ་དྲག་པོ་དང་། གཏུམ་པོ་དང་། འཇིགས་པའི་སྒྲ་དང་། གདུག་པའི་གཟུགས་དང་། མཚོན་ཆ་སྣ་ཚོགས་འཆང་བ་དང་། མ་རུངས་པའི་འཁོར་དང་ལྡན་པ་རྣམས་དང་། ཐབས་ཅིག་ཏུ་བཞུགས་ཏེ། ཐམས་ཅད་ཀྱང་འགྲོ་བ་མ་ལུས་པའི་དོན་རྗེས་སུ་བསྒྲུབ་པར་འདོད་པའི་ཕྲིན་ལས་ཀྱི་ལས་བྱུང་བ། །ཇི་བཞིན་མ་ལུས་སྣ་ཚོགས་པའི། །མཁྱེན་པ་དང་ནི་ཡེ་ཤེས་བདག །རང་དང་གཞན་དང་ཕྱི་རོལ་བ། །འཇིག་རྟེན་འཇིག་རྟེན་འདས་པ་ལ། །ཆེ་ཆུང་ཚད་མའི་སྐུར་སྟོན་པ། །གང་ལ་དགེས་པ་དེར་སྣང་ཞིང་། །ཇི་ལྷར་འདོད་པའི་གནས་སྤྱིན་པ། །ཡང་དག་པ་དང་ངེས་པ་དང་། །བྲང་བའི་གནས་དང་ལམ་ཚོལ་དང་། །ཇི་བཞིན་མ་ཡིན་དགོངས་པ་དང་། །ལྡེམ་པོ་དང་ནི་སྤྱོད་པ་དང་། །སར་གནས་པ་དང་རྫོགས་པ་དང་། །རང་བྱུང་བ་དང་རྩོལ་བ་དང་། །རྒྱུ་དང་རྐྱེན་དང་བྱེད་པ་དང་། །གཞི་དང་ཁམས་དང་བསམ་པ་དང་། །ལས་དང་རིགས་དང་གནས་ལ་སོགས། །མ་ལུས་རྟོགས་པའི་བདག་ཉིད་ཅན། །ཐུགས་རྗེ་ཆེ་ལ་ཐབས་མཁས་པའི། །འཇིག་རྟེན་ཀུན་གྱི་དབང་ཕྱུག་པོ། །མཐུ་སྟོབས་འཆང་བའི་དྲེགས་པ་ཅན། །ཡི་དྭགས་གཤིན་རྗེ་ཀུན་གྱི་གཤེད། །འཇམ་པའི་དཔལ་ལས་བྱུང་བ་ཡིས། །འཇིགས་བྱེད་ཆེན་པོ་སྐུ་བཞེངས་ལ། །ཁྱོད་ཀྱི་ཞིང་ཁམས་གཞལ་ཡས་ཁང་། །བསྒྲུབ་པ་ཉེ་བའི་སྒྲུབ་པ་དང་། །མངག་པའི་ལས་དང་ཡོན་ཏན་རིགས། །རང་ངོ་གཏན་ཚིགས་བྱེ་བྲག་དང་། །ཁྱད་པར་དེ་ཡི་དགོས་པ་དང་། །གནས་སྦྱོར་བ་དང་ཚོགས་ཆེན་དང་། །འགྱུར་བའི་གནས་དང་རང་གི་མཐའ། །ཕྲིན་ལས་དང་ནི་མཐར་ཐུག་པ། །གསལ་བྱ་རྗེས་བཟུང་ལོངས་སྤྱོད་དང་། །དམིགས་པའི་ཆེད་དུ་བྱ་བ་དག །རང་གི་འཁོར་ལོ་ལེགས་པར་སྟོན། །གདུལ་བྱ་ཡོངས་སུ་མིན་མརྫོད་ཅིག །འདི་ནི་སངས་རྒྱས་ཐམས་ཅད་ཀྱི། །སྔོན་གྱི་ཕྲིན་ལས་དམ་པའོ། །ཞེས་བསྐུལ་ཏེ། །སྐད་ཅིག་དེ་ཉིད་ལ་རང་རང་གི་སངས་རྒྱས་ཀྱི་ཞིང་དུ་གཤེགས་པར་གྱུར་ཏོ། །གཤིན་རྗེ་གཤེད་འདུས་རྩ་བའི་རྒྱུད་ལས། །གླེང་གཞིའི་ལེའུ་སྟེ་དང་པོའོ།། །།དེ་ནས་རྒྱལ་པོ་རྡོ་རྗེ་འཛིན། །གཤིན་རྗེའི་ཁྲོ་བོ་ཀུན་གྱི་གཤེད། །སྐུ་གསུང་ཐུགས་ཀྱི་རོལ་པ་ཆེ། །རབ་ཏུ་བསྟན་ནས་འདི་སྐད་གསུངས། །ཉོན་ཅིག་འཇིགས་བྱེད་ཆེན་པོའི་འཁོར། །ང་ནི་ཐོག་མ་མེད་པ་ནས། །ངང་གིས་གནས་ཏེ་ཤིན་ཏུ་བགྲོས། །རང་རིག་བྱང་ཆུབ་སེམས་ཀྱི་གཞི། །སྤྲོས་མེད་བརྗོད་པའི་མཐའ་ལས་འདས། །ཉོན་མོངས་སེམས་ཅན་ལས་ཀྱི་མནར། །སྐྱེ་འཆི་འཁོར་བའི་གཤིན་ཚོགས་ལ། །འདུལ་ཞིང་སྒྲོལ་བའི་གཤེད་ཡིན་པས། །དེ་དག་ཉིད་ཀྱང་སྐྱོབ་པའི་རྗེས། །རང་བཞིན་དང་ནི་བགྲོད་པ་དང་། །གྲུབ་པ་དག་ནི་ལས་རྣམས་ཀྱི། །གཞི་དང་ཐབས་དང་འབྲས་བུ་སྟེ། །གདུལ་བྱ་སྣ་ཚོགས་སྣང་བ་ཡིས། །ལས་ཀྱི་སྡེ་དང་ཞི་གནས་དང་། །རང་སངས་རྒྱས་དང་འགོག་པ་དང་། །སྦྱང་བགྲོད་རབ་ཏུ་དཀའ་སྤྱད་དང་། །འགྱུར་བ་འགོག་དང་བཟང་ངན་བལྟ། །དག་པའི་ཆོ་ག་གཙོར་སྤྱོད་ལས། །བརྟག་ཤེས་མཐོང་བས་ཁྱད་པར་ཡིན། །བློ་དང་དབང་པོ་བསམ་པ་ཡིས། །མྱུང་འགྲོ་རྫོགས་པའི་དོན་དུ་བསྟན། །ལས་ཀྱི་འཁྲུལའཁོརགཤིན རྗེའིཚོགས། །གནས་ངན་ལེན་ཚོགས་དེ་ཡིས་སྦྱོངས། །ཐུན་མོང་བ་དང་ཁྱད་པར་གྱིས། །ཕུང་པོ་མ་ཡིན་ལས་ལས་ལྡོག །འབྱུང་མ་ཕུང་པོ་ཁམས་དང་ནི། །སྐྱེ་མཆེད་རྟེན་ཅིང་འབྲེལ་ལ་སོགས། །རྣམ་པར་དག་པའི་ཏིང་ངེ་འཛིན། །རྒྱུ་སྟོབས་ལྡན་པར་འགྱུར་བྱེད་དོ། །གནས་དག་གཅིག་གཉིས་གསུམ་བཞི་དང་། །ལྔ་དང་དྲུག་གི་ཡོན་ཏན་ཚོགས། །ཇི་སྙེད་ཇི་བཞིན་མ་ལུས་པའི། ཁྲེས་བྱ་དང་ནི་སྦྱང་བྱ་དག །ཐོགས་མེད་མཁྱེན་པ་གྲུབ་པའི་མཐའ། །མི་འདོད་པ་དང་དབང་མེད་དང་། །གནོད་པ་ཞི་དང་སྦྱོར་བ་དང་། །རང་དབང་ཐོབ་དང་ཚར་གཅོད་པ། །དེ་ཡི་ཕྲིན་ལས་རྫོགས་པ་ཡིན། །གསལ་བྱ་རང་བཞིན་རྟགས་དང་ནི། །ཐབས་དང་འབྲས་བུ་ངེས་པར་བྱ། །རང་བཞིན་བདེ་བ་ཆེན་པོ་ཡི། །མཚན་ཉིད་བཞི་དང་མཚན་ཉིད་དངོས། །འཁོར་བ་དང་ནི་མྱ་ངན་འདས། །ཐམས་ཅད་དེ་ཉིད་ཁོ་ནའོ། །འཁོར་བའི་གནས་ལུགས་ཤི་བའི་གཤིན། །ཀུན་གཞིའི་རྣམ་ཤེས་དེ་ཡི་རྗེ། །དེ་དག་འདུལ་སྦྱོང་གཤེད་དུ་འགྱུར། །རྟགས་ནི་མ་ལུས་གཟུགས་ཀྱི་སྐུ། །རང་གི་གདུལ་བྱ་གཉེན་པོས་འདུལ། །སྒྲུབ་བྱེད་རྣམས་ཀྱི་སྐུ་གསུང་ཐུགས། །གནས་གསུམ་ཤེས་པ་ཐབས་ཡིན་ནོ། །མི་གནས་གྲོལ་བའི་སྐུ་གསུམ་གྱིས། །དག་པ་གསུམ་གྱི་བདག་ཉིད་ལྡན། །གཞི་དང་ལམ་གྱི་རྟོག་པ་འཇོམས། །ཁམས་གསུམ་འགྲོ་བ་རིགས་དྲུག་དང་། །ཁྱད་པར་གདུག་པ་ཅན་གྱི་རིགས། །གནས་ངན་ལེན་པ་ཆེ་ལ་སོགས། །ཐམས་ཅད་མ་ལུས་གཟུང་བྱའོ། །གནས་སྲིད་སྤྲུལ་པས་ཡོངས་སུ་གཅོད། །དུས་གསུམ་བདེ་གཤེགས་ཐམས་ཅད་ཀྱི། །སྐུ་ཡི་བསྒྲུབ་པ་དམིགས་པའི་ཆེད། །འདི་དག་རིགས་ཀྱི་བདག་པོའོ། །དེ་ཡི་གསུང་དུ་སྣང་བ་ཡང་། །ཨ་ཞེས་བྱ་བ་ཆོས་ཀྱི་སྒོ། །མ་སྐྱེས་ཐབས་ཀྱིས་རྫོགས་པའོ། །ཀྲོ་ཞེས་བྱ་བ་དེ་ཉིད་ལས། །མ་འགགས་སྣང་བའི་བདག་ཉིད་ཡིན། །ཏེ་ནི་གཉིས་མེད་རང་བྱུང་སྟེ། །ཟུང་འཇུག་མཐུན་པར་སྟོན་པའོ། །ཀ་ནི་སྐུ་སྟེ་སྣ་ཚོགས་སྣང་། །རང་གི་གདུལ་བྱ་རྟོགས་པའོ། །ཡ་ནི་གསུང་སྟེ་སྟོང་ཉིད་སྒྲ། །གྲག་པ་མེད་པར་བརྗོད་པའོ། །མྱན་ནི་ཐུགས་ཀྱི་ངོ་བོ་སྟེ། །མ་ལུས་འདུལ་བའི་བདག་ཉིད་ཅན། །ཏ་ནི་ཡོན་ཏན་རྫོགས་པ་ཏེ། །སྲིད་ཞི་མཐར་ཐུག་རྟོགས་པའོ། །ཀ་ནི་ཐུགས་རྗེ་ཤུགས་ཀྱི་རྩལ། །འཇིག་རྟེན་ཆོས་ལ་སྣང་བའོ། །ཧ་ནི་ཕྲིན་ལས་གྲུབ་པ་སྟེ། །རང་གི་དམིགས་པ་ཆེད་དུ་བྱེད། །ན་ནི་མིང་གི་སྒྲོ་འདོགས་ཏེ། །སྣ་ཚོགས་བཏགས་པ་མ་འགགས་ཆོས། །མ་ནི་ཡི་ཀྱི་རྣམ་རྟོག་ལ། །མ་ལུས་སྐྱོབ་བྱེད་རབ་ཏུ་བརྟགས། །ཐ་ནི་འགྲོ་བའི་དེད་དཔོན་རྗེ། །གནས་བརྟན་རྒན་པོ་སྐྱེ་དགུའི་བདག །བྷན་ནི་འཆིང་བྱེད་རྒྱ་ལས་གྲོལ། །འཁོར་བའི་འབྲེལ་ཐག་བཅད་པའོ། །ཛ༷༷ནི་བདུད་ལས་རྒྱལ་བ་སྟེ། །བྱང་ཆུབ་སེམས་ཀྱི་ཁྱད་པར་རོ། །ཨཱོཾ་ནི་རིགས་ཀྱི་གཙོ་བོ་སྟེ། །ཧུ༷་གིས་རབ་ཏུ་བརྟགས་པས་སྡུད། །ཕཊ་ཀྱིས་ལས་ཀྱི་ཕུང་པོ་གཏོར། །གསུང་གི་དབང་ཕྱུག་སྨྲ་བ་ཆེ། །མ་འགགས་རྩལ་གྱིས་ལོངས་སྤྱོད་བྱེད། །ཐུགས་ནི་རང་བཞིན་མཉམ་པ་ཉིད། །རབ་ཏུ་སྤྲོས་པ་མ་གཡོས་ཆོས། །གནས་པའི་འཁོར་ལོ་གཡོ་བ་མེད། །སྲིད་པའི་འཁོར་ལོ་ལོངས་སྤྱོད་ཆེ། །སྤྲུལ་པའི་འཁོར་ལོ་འགྲོ་དོན་རྫོགས། །སྦྱོད་པའི་འཁོར་ལོ་དྲག་ཤུལ་སྤྱོད། །འདི་ནི་རིགས་ཀྱི་འཁོར་དུ་ཤེས། །ཞེས་བཀའ་སྩལ་ཏོ། །གཤིན་རྗེ་གཤེད་འདུས་པ་རྩ་བའི་རྒྱུད་ལས། །སྐུ་གསུང་ཐུགས་ཀྱི་རང་བཞིན་རྣམ་པར་དག་པ་བསྟན་པའི་ལེའུ་སྟེ་གཉིས་པའོ།། །།དེ་ནས་རྒྱལ་པོ་རྡོ་རྗེ་འཛིན། །སྐུ་གསུང་ཐུགས་ཀྱི་འཁོར་ལོ་བཞི། །ལྟ་བ་དང་ནི་ལོངས་སྤྱོད་དང་། །ཆོ་འཕྲུལ་ཕྲིན་ལས་སྟོན་མཛད་ཕྱིར། །ཁྲོ་བོ་ཁྲོ་མོའི་ཚོགས་ཆེན་ལ། །དགྱེས་པའི་མདངས་ཀྱིས་བཀའ་སྩལ་པ། །ཨེ་མ་ང་ནི་ཡོན་ཏན་ཚོགས། །མ་ལུས་ཀུན་གྱི་ངོ་བོར་སྣང་། །ཡིད་བཞིན་ནོར་བུ་ཇི་ལྟ་བར། །ཡང་དག་ཐུགས་ཀྱི་ཡེ་ཤེས་དེ། །རབ་ཏུ་མཆོད་ཅིང་བསྟོད་པར་བྱ། ཁྲེས་བྱའི་ཡུལ་དང་ཤེས་བྱེད་གཞི། །སྣ་ཚོགས་ང་ཡི་ཐུགས་ལ་གནས། །བསམ་ཞིང་འདོད་པ་འདི་ལས་བྱུང་། །རང་གི་བྱང་ཆུབ་སེམས་ཉིད་འདི། །ཐམས་ཅད་འདུས་པའི་བདག་ཉིད་དེ། །སྐུ་གསུམ་རྫོགས་པར་རང་ལ་གནས། །རིག་པའི་རྒྱལ་པོས་དབང་བསྒྱུར་དུས། །ཕྱི་དང་ནང་དང་བར་མ་དང་། །སྣང་དང་སྲིད་དང་རྟོག་པ་དང་། །བསྡུས་པ་དང་སྤྲོས་དང་འཚམ་པ་དང་། །ཐམས་ཅད་རང་རིག་སེམས་ལས་བྱུང་། །དེ་ཉིད་གནས་སུ་གྱུར་པ་ཡིས། །གཞི་དང་ངོ་བོ་རང་བཞིན་དག །མ་བཅོས་མ་བྱས་གྲུབ་པ་ནི། །སྤྲོས་བྲལ་ཆོས་ཀྱི་སྐུ་ཡི་གནས། །དེ་ཉིད་གཟུགས་སུ་བསྟན་པ་ནི། །འདོད་པའི་ཡོན་ཏན་མ་བཀག་ཆོས། །ཇི་ལྟར་འདོད་པ་ངང་གིས་རྫོགས། །ལོངས་སྤྱོད་མི་ཟད་འཁོར་ལོ་ལས། །བྱ་དང་བྱེད་པ་སྣང་བའི་དུས། །གནས་འགྱུར་རུང་བ་སྤྱོད་དུས་ན། །ཐོགས་མེད་འདོད་པ་ཡིད་ལས་སྐྱེས། །དོན་རིགས་སྣང་བ་སྤྲུལ་སྐུའི་གནས། །ཡེ་ཤེས་ཐུགས་ནི་ནམ་མཁའ་བཞིན། །སྟོང་ཞིང་སྣང་བའི་མཚན་ཉིད་ཅན། །འབའ་ཞིག་སྣང་བ་སྐྱེ་མེད་པ། །ཆོས་དབྱིངས་ཡེ་ཤེས་གནས་པའོ། །སྤྲོ་དང་བསྡུ་བ་ཕྱག་རྒྱའི་ལས། །འདོད་པའི་དངོས་པོ་མ་ལུས་པའི། །མེ་ལོང་ཆུ་ཟླ་ལ་སོགས་པའི། །གཟུགས་བརྙན་སྣང་བ་དང་འདྲ་ཞིང་། །ཤེས་དང་ཤེས་བྱ་མ་ལུས་གསལ། །སྣ་ཚོགས་སྣང་བ་དངོས་པོ་དེ། །མ་གྲུབ་རང་གི་ངང་དུ་གསལ། །གསལ་བའི་ཡེ་ཤེས་གནས་པའོ། །རང་རིག་ཐུགས་ལ་བཀོད་པ་ཡི། །ཕུང་པོ་ལྔ་དང་འབྱུང་བ་ལྔ། །དབང་པོ་ལྔ་དང་རྣམ་པར་ཤེས། །ཡུལ་ལྔ་ཁ་དོག་བྱེད་པ་ལྔ། །ཡབ་ཡུམ་རིགས་དང་ཕྲིན་ལས་ལྔ། །མ་ལུས་རྣམ་དག་ཡེ་ནས་གནས། །སོ་སོར་རྟོག་པའི་ཡེ་ཤེས་གནས། །དེ་དག་ཀུན་གྱི་གཞི་དང་ཡུལ། །ཁམས་ཀྱིས་བསྡུས་པའི་སྣ་ཚོགས་ལུས། །མ་ལུས་དབྱིངས་སུ་རིམ་གྱིས་མཉམ། །མཉམ་ཉིད་ཡེ་ཤེས་རང་རིག་གནས། །ཀུན་གྱི་རང་རིག་བྱང་ཆུབ་སེམས། །དེ་ལས་བྱུང་བའི་ཕྲིན་ལས་ནི། །ནན་ཏན་སྤྱོད་པས་ཀུན་ལ་ཁྱབ། །ཡེ་ཤེས་བཞིན་དུ་གནས་པའོ། །སེམས་ཉིད་མེ་ལོང་བརྟགས་པས་ནི། །སྔར་བྱས་བྱང་ཆུབ་དེ་ཉིད་དོ། །འཇིག་རྟེན་གསུམ་ཡང་རང་གི་དངོས། །མི་གནས་མྱ་ངན་འདས་པ་ཡང་ སེམས་ལས་མ་གཏོགས་ཆོས་གཞན་མེད། །དེ་ཉིད་འཁོར་བ་ལས་ཀྱི་ས། །མྱ་ངན་འདས་པ་ལྟར་སྣང་ཞེས། །རང་གི་ཐུགས་ལ་དེ་ཉིད་གནས། །དོན་དམ་སྙིང་པོ་བྱང་ཆུབ་སེམས། །ཐམས་ཅད་བདེན་པའི་ཆོས་ཉིད་དོ། །བརྟགས་ཤིང་དཔྱད་པས་ཤེས་མིན་ཏེ། །ནམ་མཁའ་ལྟ་བུར་སྤྲོས་དང་བྲལ། །ཀུན་རྫོབ་སྣང་དང་སྲིད་པས་བསྡུས། །ལོག་པ་དང་ནི་ཡང་དག་སྟེ། །རྟོག་པ་ཕྱིར་འགྱུར་མེད་བཞིན་སྣང་། །མ་འབྲེས་བརྟགས་བཟོད་གཉིས་སུ་གནས། །དོན་གྱི་གནས་ལུགས་བལྟ་བ་ནི། །མིག་གི་དབང་པོ་ཇི་བཞིན་དུ། །མཐར་ཐུག་རྫོགས་པར་མཐོང་བ་ཡིས། །སྤང་བླང་སྐྱོན་ཡོན་སྦྱང་ཐོབ་དང་། །ཤེས་བགྲོད་ཡུལ་དང་གཉེན་པོའི་ཚོགས། །མ་ལུས་རྟོག་པར་ཉམས་སུ་མྱོང་། །ཡན་ལག་ཉིང་ལག་བྱ་བ་བཞིན། །འགྲོ་འཆག་ཉལ་འདུག་སྤྱོད་ལམ་གྱིས། །གནས་དུས་ཡུལ་གྱི་བྱེ་བྲག་ལ། །བྱས་ཤིང་སྤྱོད་པ་ཆུད་མ་ཟོས། །རང་གཞན་གནས་ཀྱི་དོན་སྤྱོད་ཅིང་། །ཡིད་ལ་འདོད་རྫོགས་སྤོང་བའི་གནས། །ཐུན་མོང་པ་དང་ཁྱད་པར་གྱིས། །ཕྱི་ནང་རྩོལ་བ་མ་འགགས་པ། །སྣ་ཚོགས་པ་དང་ཁོ་ན་ཡིས། །ངེས་པར་སྤྱོད་པ་ཐབས་ཀྱི་གནས། །ཤེས་རབ་ཀྱིས་ནི་བློ་ཕྱེ་ནས། །དེ་བཞིན་ཉིད་དུ་ཡང་དག་མཐའ། །གནས་ཉིད་སྐྱོན་མེད་ཕྱོགས་ཀུན་རྟོགས། །མངོན་པར་བྱང་ཆུབ་ཤེས་པའོ། །ཏིང་ངེ་འཛིན་གྱི་སེམས་ཞི་ནས། །དེ་ཉིད་ངང་ལ་མ་བཅོས་གནས། །སྟོབས་ཀྱི་ཡེ་ཤེས་ལྷག་པར་མཐོང་། །ཕྱིན་ཅི་མ་ལོག་སྤྱོད་པའི་གནས། །རླབས་ཆེན་རྣམ་པར་དག་པར་སྦྱང་། །སེམས་ལས་རུང་བའི་ཏིང་འཛིན་གྱིས། །དྲི་མ་མེད་པའི་ཤེས་རབ་ཀྱིས། །སྐུ་གསུམ་མངོན་དུ་གསལ་བར་རྫོགས། །ཡང་དག་ཡེ་ཤེས་ཐུགས་ཀྱི་དངོས། །ངེས་པ་ཡིས་ནི་བཀག་པ་དང་། །བསྒྲུབ་པ་མེད་པའི་ཆོས་ཐམས་ཅད། །འཁྲུལ་གཞི་འཁོར་བའི་འཁོར་ལེའོ། །ལས་ཀྱིས་མ་ལུས་གཅོད་པ་སྟེ། །འདོད་ཆགས་ཞེ་སྡང་གཏི་མུག་དག །ཡེ་ཤེས་རིག་པའི་མཚོན་ཆ་ཡིས། །མཉམ་ཉིད་དབྱིངས་ཀྱི་ངང་དུ་གཅོད། །འཁོར་བའི་བག་ཆགས་གནས་ངན་ལེན། །ཐབས་དང་ཤེས་རབ་གཉིས་སུ་མེད། །རབ་ཏུ་འབྲེལ་བའི་ཡེ་ཤེས་ཀྱིས། །ཉོན་མོངས་བག་ཉལ་ལེན་ཅིང་བསྲེག །བརྩེ་བ་གསུམ་དང་སྙིང་རྗེ་ལས། །དོན་དམ་ཀུན་རྫོབ་གཉིས་མེད་པའི། །བྱང་ཆུབ་སེམས་ཀྱི་འོད་ཟེར་ལས། །ཆོ་འབྲུལ་སྣ་ཚོགས་སྣང་བ་ཡིས། །འཁོར་བའི་མུན་ཁང་ཐིབ་པོ་འཇོམས། །དབྱིངས་དང་ཡེ་ཤེས་གཉིས་མེད་པའི། །དོན་དམ་མ་བཅོས་རང་བྱུང་མེ། །འཁོར་བའི་ཉོན་མོངས་སྦུར་མ་དང་། །མི་གཙང་ལྗན་ལྡིན་མ་ལུས་སྐེམ། །གཉིས་མེད་ཐུགས་ཀྱི་འཁོར་ལོ་དག །ཕྲིན་ལས་ཐུགས་ཀྱི་འཕྲོ་འདུ་ཡིས། །རབ་བསྐོར་སྲིད་པའི་གསུམ་གྱི་དངོས། །མི་ཤེས་རྨོངས་པ་རབ་ཏུ་གཅོད། །རྟོགས་པ་དང་ནི་ཐུགས་རྗེ་ཡིས། །བདག་དང་གཞན་དུ་སྣང་བ་ལས། །སྲིད་པ་སྒོ་ང་མངལ་དང་དྲོད། །དེ་མ་ཐག་ཏུ་བརྫུས་ཏེ་སྐྱེ། །གནས་གཞི་རྩ་བ་ཡོངས་གཅོད་ཅིང་། །བསྲེག་འཇོམས་གཅོད་དང་སྐེམ་པ་ཡིན། །ཐུགས་ལས་བྱུང་བའི་ཉི་མ་བཞིས། །དུས་གསུམ་སངས་རྒྱས་མ་ལུས་པའི། །དགོངས་པ་དང་ནི་ཡེ་ཤེས་ཚོགས། །ཁམས་གསུམ་འགྲོ་བ་ཐམས་ཅད་ཀྱི། །ལས་དང་སྡུག་བསྔལ་རྒྱུ་འབྲས་དག །གསལ་བར་སྨིན་རྒྱུ་གཞན་དག་ལས། །མ་ལྟོས་པ་དང་རང་ལ་རྫོགས། །ཐུགས་ཀྱི་ཉི་མ་བཞི་ཡིན་ཏེ། །གནས་པ་ལྟེ་བའི་འཁོར་ལོ་སྟེ། །མ་ལུས་ཡོངས་སུ་རྫོགས་པའོ། །སྲིད་པའི་འཁོར་ལོ་ཞེས་བྱ་བ། །ཀུན་གྱི་ལྟོ་ཕལ་གནས་པ་སྟེ། །གནས་ནི་འཇིག་པའི་མཁར་ལྟ་བུ། །དབང་གལ་གནད་བཅུད་རྫོགས་པ་སྟེ། །དེ་བཞིན་འཇམ་དཔལ་མཁའ་ལས་བྱུང་། །གཤིན་རྗེ་ཀུན་གྱི་གཤེད་གྱུར་པ། །གཉིས་མེད་ཐུགས་ཀྱི་ཡེ་ཤེས་འཆང་། །འདོད་ཁམས་གཟུགས་ཁམས་གཟུགས་མེད་ཁམས། །ལྷ་ཀླུ་མི་ཡི་སྲིད་པ་དང་། །འདོད་ཆགས་ཞེ་སྡང་གཏི་མུག་གསུམ། །དབང་པོ་ལུས་ངག་ཡིད་གསུམ་དང་། །ཐིག་ལེ་གནས་དང་ལོངས་སྤྱོད་གསུམ། །རྟག་ཆད་དབུ་མ་མཐའ་དང་བཅས། །སྐྱེ་འཇིག་གནས་པ་རང་གི་གཞི། །མ་ལུས་སྐུ་གསུམ་འདུ་ཞིང་རྫོགས། །རང་གིས་དབང་བསྒྱུར་སྤྱོད་པས་ན། །གསང་གལདབང་རྫོགས་པའི་སྤྱོད་པའོ། །མངལ་སྐྱེས་སྲིད་པ་དང་པོ་ཡི། །ལྟེ་བའི་གནས་ན་བརྩམ་པ་སྟེ། །བཙན་ཁང་ཁྲི་མོན་བཅུག་པ་ཡིས། །སྟེང་འོག་བར་གསུམ་ཟོ་ཁྱུའི་ཁྱུད། །ལས་ཀྱི་ཤུགས་ཀྱིས་འཁོར་ཞིང་ཆགས། །སྟོབས་གཞན་གྱིས་ནི་བསྐྱོད་མི་ནུས། །འཇིགས་བྱེད་ཆེན་པོ་བདག་ཉིད་ཀྱིས། །ལས་ཀྱི་གཤིན་རྗེ་གཟིར་བ་ཡིས། །ལྟོ་ན་སྲིད་པ་གསུམ་གནས་ཤིང་། །འཁོར་བའི་སེམས་ཅན་ཐམས་ཅད་ཀྱི། །རྣམ་པར་ཤེས་པའི་རྟེན་འཕོས་ཚེ །དེ་ཉིད་ལས་ཀྱི་རྒྱལ་པོ་ཡིས། །ཕྱག་གི་འདུ་བྱེད་བྱས་པ་ཡིས། །ལས་ཀྱི་འཕེན་པ་གནས་མཐུད་ཅིང་། །ཉིང་མཚམས་ཕུང་པོ་ཉེར་ལེན་པས། །སྲིད་པའི་འཁོར་ལོ་ཞེས་ཀྱང་བྱ། །ཀུན་གྱི་མ་རིག་འཁྲུལ་པ་ལས། །གཟུང་དང་འཛིན་པའི་རྟོག་པ་ཡིས། །ཆགས་དང་ཞེན་པ་རབ་ཏུ་བརྟག །སྲིད་པའི་རྩེ་མོ་མན་ཆད་ནས། །ལས་ཀྱི་མནར་མེད་ཡན་ཆད་དུ། །ལས་ཀྱི་དབང་གིས་འཁོར་བས་ན། །འཁྲུལ་པའི་སྣང་ངོ་ཟད་མི་ཤེས། །ལས་ཀྱི་འཁྲུལ་འཁོར་དེ་ཉིད་ལས། །རྩ་བ་ཡན་ལག་སྣ་ཚོགས་ཀྱི། །ཉོན་མོངས་ཕྲ་རགས་མ་ལུས་པ། །རང་བྱུང་ཤུགས་ཀྱི་ཡེ་ཤེས་ཀྱིས། །མ་ལུས་མཐར་ཐུག་གཅོད་པར་བྱེད། །ཤེས་པའི་སྲིད་པ་གནས་མ་ཡིན། །ཞི་ལ་མི་གནས་སྙིང་རྗེ་དག །ཚོགས་གཉིས་ལམ་གྱི་ཡོན་ཏན་གྱིས། །མ་ལུས་གཅོད་པའི་འཁོར་ལོའོ། །དེ་ལས་ཡོན་ཏན་སྤྲུལ་པ་ཡིས། །འཁོར་ལོ་ཆོ་འཕྲུལ་འབྱུང་བ་ནི། །སེམས་དཔའ་གཉིས་གྱི་ཞབས་འོག་གནས། །རྨི་ལམ་སྒྱུ་མའི་སྐྱེས་བུ་བཞིན། །ཅི་དྲན་ཅིར་སྣང་ཅིར་སྤྱོད་པའི། །ལས་ཀྱི་རྣམ་པ་སྣ་ཚོགས་དག །གཤིན་རྗེ་རྒྱལ་པོ་བརྗིད་པའི་ཞབས། །འབར་བའི་སྟོབས་ཀྱིས་གནོན་པ་ནི། །རྩ་བའི་ཉོན་མོངས་དྲུག་ལས་བྱུང་། །ཉོན་མོངས་གཞི་བཅས་འགྲོ་བ་དྲུག །སྣང་བ་ཡུལ་གྱི་ཚོགས་དྲུག་དང་། །སྒོ་ལྔ་ལམ་གྱི་རྒྱུད་དྲུག་དང་། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་ཆོས་དང་གསུམ། །ལས་དང་ཉོན་མོངས་སྤྲུལ་པདྲུག །རང་གནས་ལས་ཀྱི་འཁོར་ལོ་དྲུག །འགྱུར་མེད་རང་གི་སར་གནོན་ཅིང་། །ཐུགས་རྗེ་ཐབས་ཀྱི་སྤྲུལ་པ་དྲུག །རིགས་དང་ཁམས་དང་བྱེད་པ་དྲུག །ལས་དང་དབང་པོ་བསམ་པ་དག །མཐུན་འཇུག་བློ་ཡིས་དོན་མཛད་ཅིང་། །ཐ་དད་སྣང་བ་སྤྲུལ་པ་སྟེ། །སོ་སོའི་ལས་ཀྱི་རྣམ་སྨིན་གྱིས། །གཅིག་ནས་གཅིག་ཏུ་ཁ་བརྒྱུད་ཅིང་། །འཁྲུལ་ཞིང་འཁོར་བས་འཁོར་ལོ་སྟེ། །ཉོན་མོངས་དྲུག་པོ་གཅོད་བྱེད་ལས། །སྣ་ཚོགས་འབྱུང་བའི་ཆོ་འཕྲུལ་ཏེ། །དོན་ལ་མ་ངེས་སྣང་བའོ། །ཕྲིན་ལས་གཅོད་པའི་འཁོར་ལོ་ནི། །གདུགབྱེདམཚོནཆརྣོནཔོབཞིན། །ཕྱགམཚནའཛིན་པའི་ཚུལ་གནས་ཤིང་། །གང་ལ་དམིགས་པ་ཐོགས་མེད་གཅོད། །བཅོམ་ལྡན་རྡོ་རྗེ་འཛིན་རྒྱལ་གྱི། །ཕྱག་མཚན་འཁོར་ལོ་རྣམ་པ་བཞི། །ཞི་བར་བྱ་དང་རྒྱས་པར་སྤེལ། །དབང་དུ་བསྡུ་དང་ཚར་གཅོད་པའི། །ལས་ཀྱི་རྣམ་བཞིས་དངོས་པོ་གཅོད། །ཞི་བས་འཇིགས་པ་བརྒྱད་ལས་སྐྱོབ། །སྐྱོབ་པའི་བར་གཅོད་དེ་ཡིས་གཅོད། །རྒྱས་པས་འབྱོར་པ་དྲུག་ལྡན་ཞིང་། །འབྱོར་པའི་བར་ཆོད་གཅོད་ཅིང་སེལ། །དབང་གིས་མོས་པ་རྣམ་བཞི་འདུ། །གང་གིས་མི་འདུལ་ཕྱོགས་ཀུན་གཅོད། །དྲག་པོས་དགྲ་བགེགས་ཚར་གཅོད་ཅིང་། །མི་འདུལ་བར་གཅོད་འཁོར་ལོས་གཅོད། །ཕྲིན་ལས་བཞི་ཡིས་གང་དམིགས་གཅོད། །གཅོད་པའི་འཁོར་ལོ་ཕྲིན་ལས་མཆོག །རྩོལ་མེད་རང་བྱུང་ཤུགས་ལས་འབྱུང་། །རབ་ཏུ་འཁོར་བས་འཁོར་ལོར་བརྗོད། །གནས་པ་གཞི་ཡི་འཁོར་ལོ་ནི། །མ་ལུས་སེམས་ལ་འདུས་པ་ལས། །བཅོས་མེད་སྙིང་པོའི་དོན་དང་ལྡན། །ཆོས་ཀྱི་སྐུ་ཞེས་བྱ་བར་མཛད། །བསམ་བྱུང་སྲིད་པའི་འཁོར་ལོ་ནི། །རྟེན་པ་ལུས་ཀྱི་ངོ་བོ་སྟེ། །སྣང་བ་རྣམ་དག་ཏིང་ངེ་འཛིན། །རྫོགས་པར་ལོངས་སྤྱོད་སྐུ་ཡི་མཆོག །འདུལ་ངོ་སྤྲུལ་པའི་འཁོར་ལོ་ནི། །བརྗིད་གནོན་ཞབས་ཀྱི་སྟོབས་བྱུངསྟེཡངབཅུ་སྟེ། །རིགས་དྲུག་སར་གནས་ཆོས་ཀྱི་ལས། །ངེས་འབྱུང་སྤྲུལ་པའི་འཁོར་ལོའི་སྐུ། །གཅོད་པའི་འཁོར་ལོ་ཚོགས་ཀྱི་ལས། །བརྒྱད་དང་དྲུག་དང་བཞི་གཉིས་ཀྱི། །ཡན་ལག་ལས་ཀྱི་འཕྲོ་འདུ་བྱེད། སྣ་ཚོགས་མངོན་པར་བྱང་ཆུབ་སྐུ། །དང་པོ་དོན་གྱི་འཁོར་ལོ་སྟེ། །ལྷག་མ་གསུམ་གྱི་རྟགས་འཁོར་ལོ། །ལྟ་བ་ཕྲིན་ལས་གཉིས་སུ་འགྱུར། །ལྟ་སྤྱོད་སོ་སོར་མ་གྱུར་ན། །དོན་དང་ལྡན་ཞིང་དེ་མིན་པས། །གསང་བའི་སྔགས་དང་སྤྱོད་པ་དང་། །ལྟ་བ་ཚིག་ཏུ་ཙམ་བརྗོད་ཀྱང་། །མཐའ་དྲུག་རྫོགས་པར་མི་ནུས་ན། །ལྟ་སྤྱོད་ཡ་བྲལ་གྱུར་པའོ། །ཆོ་འཕྲུལ་ངེས་དོན་ལྡན་པ་ཡང་། །ཕྱི་ནང་འབྱུང་བའི་ནུས་པ་དང་། །ཡུལ་སེམས་འཕྲད་པའི་རྟོགས་པ་ཡིས། །སྣང་བ་སྟོང་པ་ཐ་མི་དད། །དེ་ཉིད་ཀྱིས་ནི་རྣམ་པར་འཕྲུལ། །ཕྲིན་ལས་གཅོད་པའི་འཁོར་ལོ་ཡང་། །འབྱུང་བ་འདུས་པའི་དངོས་པོ་ཡིས། །མྱུར་མགྱོགས་རྩལ་གྱི་དྲག་ཤུལ་ཅན། །རྫས་ཀྱི་ནུས་པ་ཤུགས་འབྱིན་དུ། །གང་ལ་ཕོག་པར་འཇོམས་ཤིང་གཅོད། །གཅིག་གིས་ལས་ཀུན་བསྒྲུབ་པར་བྱེད། །མ་གྲུབ་སྲིད་དུ་མངགས་པ་ཡང་། །རྡོ་རྗེའི་འཁྲུལ་འཁོར་ཤུགས་བཞིན་ནོ། །གཅོད་བྱེད་འདྲ་བའི་འཁོར་ལོ་ནི། །ཉི་མ་བཞི་ཡི་སོ་སོར་བསྐོར། །ཕྱི་ནང་གསང་བའི་རྣམ་གྲངས་ཀྱིས། །དགུ་དང་དྲུག་དང་གསུམ་དག་ཏུ། །ཆེན་པོ་ཆུང་ངུ་བར་མ་ཡིས། །རྣམ་གྲངས་དགུ་དང་འོད་ཟེར་བརྒྱད། །ཕོ་མོ་སྦྱར་བ་བཟླས་ལུགས་བཅུ། །རུ་བཞི་བསྡོམ་པ་བརྒྱད་ཉིད་དང་། །ཨ་ལོན་དོན་དུ་བསྐོར་བ་དང་། །གསལ་བྱེད་མཚོ་སྡེབས་དམིགས་སེལ་དང་། །འབྱེད་པར་བྱེད་པ་གང་ཡིན་ཡང་། །ཆེ་དང་ཆུང་བས་གཞུང་བསྲངས་ཏེ། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་རྣམས་ཀྱི་བསྒྲུབ་པར་བྱ། །རང་ཉིད་དམིགས་པའི་རྩ་བ་གསུམ། །གསལ་བྱེད་མཚོ་སྡེབས་དམིགས་ཕྱེད་བཞི། །རྩ་བ་དེ་ནི་ཡན་ལག་གི །ཁ་བསྐང་བ་དང་བསྡུས་པ་དང་། །མཐར་ཐུག་གི་ནི་གནད་ལ་དབབ། །གཞན་ཡང་ལྟ་བ་སྤྱོད་པ་ཡིས། །དོན་དང་རྟགས་ཀྱི་ཁྱད་པར་ལས། །སྙིང་པོ་རིག་པའི་བྱང་ཆུབ་སེམས། །འཁྲུལ་འཁོར་འཁྲུལ་དམིགས་དམིགས་སེལ་དང་། །གསལ་བྱེད་རྣམས་སུ་དོན་གྱིས་གནས། །དམ་ཚིག་བསྲུང་བའི་སྲོག་འཁྲུལ་དང་། །དགེ་སྡིག་ལས་ཀྱི་འཁྲུལ་པ་ལས། །སྲོག་དང་སྲོག་གི་སྙིང་པོ་ལས། །ངོ་བོ་རང་བཞིན་ཡོན་ཏན་ནོ། །དགེ་སྡིག་གིས་ནི་གསོད་པ་དང་། །གསོ་བའི་ཕྲིན་ལས་གྲུབ་པའོ། །མི་སྡུག་ལྟས་དང་དྲག་པོ་གཉིས། །ཡན་ལག་ཞི་བ་རྒྱས་པ་དང་། །ཞི་བར་གནས་དང་རྒྱས་པར་སྒྲོ། །དབང་དུ་སྡུད་དང་བསད་པ་དང་། །དགུག་དང་དབྱེ་བ་བསྐྲད་པ་དང་། །སྨྱོ་འབོག་ལྐུགས་དང་གནན་པ་དག །ཟླ་བའི་དཀྱིལ་འཁོར་ཆོས་མཐུན་ཞིང་། །གསལ་ཞིང་བསིལ་དང་དངོས་པོ་ཆུ། །ཐེ་ཚོམ་མེད་པར་འགྲུབ་པའོ། །གླང་པོ་ཆེན་པོ་ཆེ་བའི་ཚུལ། །ཡེ་ཤེས་བྱིན་རླབས་འཇིག་རྟེན་པ། །ཐ་མལ་པ་ཡི་ཡོན་ཏན་གྱིས། །རྒྱས་པ་རབ་ཏུ་འགྲུབ་པའོ། །དབང་དུ་བསྡུ་བ་བྷ་ག་སྟེ། །བསད་པ་གཤིན་རྗེའི་ལྟོ་བར་རོ། །སེང་གེའི་སྙིང་ལ་དགུག་པར་རོ། །དབྱེ་བ་རྟ་དང་མ་ཧེའི་བར། །བསྐྲད་པ་རྔ་མོའི་གསང་སྒོ་སྟེ། །སྨྱོ་འབོག་རི་དྭགས་རྒྱབ་ཏུའོ། །ལྐུགས་པ་ལུག་གི་ཁོག་པ་སྟེ། །གནན་པ་རི་རབ་རྨང་དུ་བསྐོར། །རང་གི་ཡོན་ཏན་ཆོས་མཐུན་གྱིས། །དབང་དུ་བསྡུ་དང་དྲག་པོ་འགྲུབ། །མེ་ཆུ་དུག་དང་མཚོན་དང་ནི། །ཕ་རོལ་དམག་དང་མུ་གེ་དང་། །དགྲ་དང་དུས་མིན་པར་འཆི་བའི། །འཇིགས་པ་རྣམས་ལ་ཞི་བས་སྐྱོབས། །ཚེ་རིང་བ་དང་དབང་ཆེད་དང་། །བཀྲ་ཤིས་པ་དང་གཟི་མདངས་ཆེ། །འཁོར་དང་ལོངས་སྤྱོད་རྒྱས་པས་སྤེལ། །ཕ་མ་མཁན་པོ་སློབ་དཔོན་དང་། །རྒྱལ་པོ་རྗེ་དཔོན་ཚུལ་དག་གི །མོས་པར་བཅས་ཏེ་དབང་དུ་བསྡུ། །དགུག་དང་བསྐྲད་དང་དབྱེ་དང་ལྐུགས། །མྱོས་དང་གསད་དང་གནོན་པ་ཡིས། །དྲག་ཤུལ་སྤྱོད་པས་ཕྲིན་ལས་འཇོམས། །ཆགས་པའི་ཚུལ་གྱིས་དབང་སྡུད་ཅིང་། །དྲག་ཤུལ་ཁྲོས་པས་སྒྲོལ་བ་དང་། །མྱུར་བའི་ཤུགས་ཀྱིས་སྡུད་ཅིང་དགུག །མི་མཐུན་ཕྱོགས་ཀྱི་སོ་སོར་འབྱེད། །ལྐོག་གྱུར་ཆགས་པ་གཞན་སྒྲོད་བསྐྱོད། །གཙང་སྦྲ་ལུས་ཀྱིས་མྱོས་པ་དང་། །རྨུགས་པའི་ནུས་པས་ལྐུགས་བྱེད་ཅིང་། །རི་རབ་བརྗིད་པ་ཡིས་ནི་གནོན། །ཉི་མ་བཞི་ཡི་གོ་མཚམས་བཞི། །ཕྱི་ནང་གསང་བ་སོ་སོར་དྲུག །རུས་འགྲོ་མི་རེག་གླང་པོ་འགྲོས། །མཐའ་དང་དབུས་མེད་དབུས་ནས་མཐའ། །མཐའ་ནས་དབུས་སུ་སོ་སོར་བསྐོར། །ཚོགས་བསག་པ་དང་བསྲུང་བ་དང་། །བསྐྱེད་དང་སྤྱན་དྲང་བཞུགས་པ་དང་། །ཕྱག་འཚལ་བ་དང་མཆོད་ཅིང་བཤགས། །བསྟོད་དང་བསྐུལ་དང་གསོལ་བ་དང་། །བསྙེན་པ་ཉེ་བསྙེན་བསྒྲུབ་པ་དང་། །བསྒྲུབ་པ་ཆེན་པོའི་ཕྲིན་ལས་ཀྱིས། །ཉེ་དང་བརྟན་པ་ཐོབ་པ་དང་། །མྱུར་མགྱོགས་རྡོ་རྗེའི་ལས་ལ་སྦྱར། །གདུག་པ་ཅན་གྱི་མཐའ་བསྡུ་ཞིང་། །ཕྱི་ནང་གསང་དང་རབ་ཏུ་གསང་། །མཚམས་སྦྱོར་བ་དང་བསྡམ་པ་དང་། །གཞུག་དང་གདགས་དང་དབྱུང་བ་དང་། །ཡོན་ཏན་མཐར་ཐུག་བསམ་མི་ཁྱབ། །རྫོགས་པའི་རིམ་པ་བསྒྲུབ་པ་ཡིས། ཁྲེས་བྱ་དོན་གྱི་གནས་ལུགས་ཏེ། །ངེས་པ་དོན་གྱི་ལམ་མཆོག་ཀྱང་། །རྟེན་ལུས་རྩ་དང་རླུད་དང་དབུགས། །ཐིག་ལེ་བྱང་ཆུབ་སེམས་ཀྱི་ངང་། །ཆོས་ཉིད་བྱང་ཆུབ་རྫོགས་པའི་དངོས། །ཁྱད་པར་གཞི་དང་ལམ་འབྲས་བུ། །སྣང་བ་གཞི་དང་གཙོ་བོ་སེམས སེམས་ལས་བྱུང་བ་དེ་ཡི་འཁོར། །ཆོས་དང་ཆོས་ཉིད་འདུས་མ་བྱས། །འདུས་བྱས་སྟོན་པས་གཞི་རུ་འགྱུར། །ཚོགས་བརྒྱད་ཡུལ་ལ་ཀུན་ནས་ལྡང་། །ཐེག་པ་དགུ་དང་གནས་པ་གསུམ། །སྦྱོར་བ་བཞི་ལ་སོགས་རྣམས་ཀྱིས། །ལམ་གྱི་རྟོགས་པ་སྣ་ཚོགས་སྐྱེ། །རབ་འབྲིང་ཐ་མའི་བློ་ཁྱད་ཀྱིས། །གོང་ནས་གོང་དུ་རབ་བགྲོད་ཅིང་། །འཇིག་རྟེན་འཇུག་དང་རྣལ་འབྱོར་སྤྱོད། །གོང་མ་དག་གིས་སུན་འབྱིན་ཞིང་། །འོག་ཏུ་གྱུར་པ་དེ་ཡི་རྟེན། །ཐམས་ཅད་རྫོགས་པའི་རིམ་པ་ལས། །ཉམས་ཐོས་རང་སངས་རྒྱས་པ་དང་། །བླ་མེད་ས་ལ་རྒྱུ་གསུམ་གྱིས། །འབྲས་བུ་གསུམ་གྱི་ངོ་བོར་གནས། །དག་དང་མ་དག་རྣམ་པར་དག །ཡུལ་ལ་ངེས་པ་རབ་ཏུ་སྟོན། །གཤིན་རྗེ་གཤེད་འདུས་པ་རྩ་བའི་རྒྱུད་ལས། འཁོར་ལོ་བཞིའི་རིམ་པ་བསྟན་པའི་ལེའུ་སྟེ་གསུམ་པའོ།། །།དེ་ནས་རྒྱལ་པོ་རྡོ་རྗེ་འཛིན། །འདིར་བཤད་འཁོར་ལོ་འགྲུབ་བྱེད་པའི། །རྩ་བ་བསྒྲུབ་པ་སྐུ་གསུང་ཐུགས། །ཡོངས་སུ་རྫོགས་པ་བཀའ་སྩལ་པ། །ཐོག་མར་མཚན་ཉིད་ལྡན་པ་ཡི། །རྡོ་རྗེ་སློབ་དཔོན་སློབ་མ་དག །འདི་ཉིད་སྐུ་གསུང་ཐུགས་རྫོགས་ཤིང་། །ཡོན་ཏན་ལྡན་པས་ཕྲིན་ལས་ཚོགས། །བསྒྲུབ་འདོད་བསྒྲུབ་རུང་སྨིན་གྱུར་པས། །ང་ཡི་རིགས་དང་ཚུལ་མཐུན་ཞིང་། །མཚན་ཉིད་རྫོགས་པའི་གནས་དེ་མྲ །བརྟེན་པའི་གཞི་ཉིད་རབ་བརྟགས་ཏེ། །བསླང་དང་བསྲུང་བས་བདག་གིར་བྱས། །བྱ་ཆེན་ཤ་ཟ་མང་པོའི་འཁོར། །ཆོ་ག་བརྟན་པས་རབ་སྦྱངས་ཏེ། །དུར་ཁྲོད་རྫས་དང་བདུད་རྩི་ལྔས། །གནས་ལ་དམིགས་པའི་ཕོ་བྲང་བཞེངས། །བཞི་དང་བཅུ་གཉིས་པ་དག་གི །འཁོར་ལོ་རྫོགས་པའི་དབྱིབས་སུ་བྱ། །རྒྱས་དང་བསྡུས་པའི་ཁྱད་པར་གྱིས། །རིགས་ལྔ་རིགས་བཞིའི་དབྱེ་བ་དང་། །གསུམ་དང་གཅིག་གི་དབྱེ་བ་ཡིས། །དཀར་སེར་དམར་ནག་མཐིང་གའི་མདོག །ཇི་ལྟར་རིགས་དང་སྔགས་པ་ཡིས། །བཤད་པའི་རྒྱན་རྟགས་མ་ལུས་ལྡན། །དམིགས་རྟེན་རྫས་ཀྱི་མཛེས་པར་བྱ། །ཡུལ་གསུམ་གསལ་ཞིང་བརྟན་པ་དག །ཞི་གནས་ལྷག་མཐོང་ཏིང་ངེ་འཛིན། །གཟུགས་བརྙན་ས་ཡི་སྦྱོར་བ་ཡིས། །བསྙེན་པའི་སྦྱོར་བ་བརྩམ་པར་བྱ། །གཟུགས་དང་སྒྲ་དང་ཆོས་རྣམས་ནི། །དབང་པོ་གསུམ་གྱི་ཡུལ་དུ་འགྱུར། །རིན་པོ་ཆེ་དང་འབྲུ་མཆོག་དང་། །ས་སྣ་ལྔ་ཡི་ཡོ་བྱད་ནི། །རབ་འབྲིང་ཐ་མའི་འབྱོར་པ་སྟེ། །གང་གིས་བརྩམ་པར་གྱུར་པ་དེས། །ཕྱི་ནང་གསང་བའི་ཡོ་བྱད་ཀྱིས། །ཕངས་པ་མེད་པའི་འབད་པ་དག །མཆོད་ཅིང་བསྟབ་པའི་ལོངས་སྤྱོད་ཀྱིས། །ཡོངས་རྫོགས་མཉེས་པར་བྱ་ཕྱིར་རྩོལ། །དེ་ནས་རབ་ཏུ་བསྲུང་བྱ་ཞིང་། །མངོན་དུ་སྣང་དང་མི་སྣང་ལས། །བཀའ་བསྒོ་དབང་བསྡུ་མཚམས་བཅད་དེ། །སྦྱང་དང་བསྲེག་དང་གཏོར་བ་དང་། །བསྐྲད་དང་བཅིང་དང་མནན་པ་ཡིས། །མ་ལུས་ཚར་གཅད་རྫོགས་པར་བྱ། །དེ་ནས་ཐ་མལ་རྟོག་སྦྱང་ཕྱིར། །དག་པའི་དཀྱིལ་འཁོར་མཁའ་ལས་སྤྲུལ། །ཕྱོགས་བཞི་སྒོ་བཞིར་གསོལ་གདབ་ཅིང་། །གཞལ་ཡས་བལྟ་བའི་སྨོན་པ་བྱ། །ལུས་ངག་ཡིད་ཀྱི་བྱ་བ་ཡིས། །ཕྱག་འཚལ་གསོལ་བ་གདབ་པ་དང་། །རྐྱེན་གྱུར་ཕྱི་ནང་གསང་བ་ཡི། །མཆོད་པའི་ཁྱད་པར་རིམ་པ་ཡིས། །མཆོག་གི་སྐུ་གསུང་ཐུགས་མཉེས་བྱ། །དེ་ནས་བསྒྲུབ་པའི་དམ་བཅའ་ཞིང་། །ལྷག་པའི་ཡེ་ཤེས་བྱིན་རླབས་བླང་། །ཉེས་པ་བཤགས་ཤིང་ཚངས་པར་སྤྱད། རང་གི་བྱིན་རླབས་ཡོངས་རྫོགས་པས། །གནས་སྦྱངས་རྒྱུད་སྨིན་སྣོད་བཟང་འགྱུར། །ལྷག་པའི་ལྷ་ཡི་ཉེ་བར་བསྙེན། །དེ་ནས་རབ་ཏུ་བསྒྲུབ་པའི་ཕྱིར། །དངོས་དང་དངོས་མིན་ཆོས་དང་རྟེན། །མ་ལུས་རང་གི་མཐའ་ལ་བལྟ། དེ་ཉིད་མ་རྟོགས་སྙིང་རྗེའི་ཡུལ། །རྒྱུ་བ་ཀུན་ལ་དམིགས་པ་བསམ། །རང་གི་སྙིང་པོ་དེ་ཉིད་ནི། །དམིགས་པ་གསལ་རྫོགས་རྒྱུ་རུ་བསྒོམ། །དེ་ལ་སྤྲོ་དང་བསྡུ་བ་ཡིས། །སྦྱང་དང་མཉེས་པའི་ལས་རྣམས་བྱ། །ཐོག་མའི་གཟུགས་ལ་ཐིམ་བསམ་ནས། །རང་བཞིན་གནས་དང་གྲུབ་པ་ཡིས། །དག་དང་མ་དག་གནས་གྱུར་པ། །ཡེ་ཤེས་འབྱུང་བ་ལྔ་ཉིད་ཀྱིས། །རང་གི་ས་བོན་རྣམ་པར་བསམ། །ཨེ༷༷ཡ༷༷༷ར༷༷སུ༷༷༷ར༷་ཀེ༷༷ །མཐིང་ནག་ལྗང་སེར་དམར་དང་དཀར། །གཟུགས་བྲལ་ཟླ་གམ་གཞུ་འདྲ་ཞིང་། །གྲུ་གསུམ་གྲུ་བཞིར་རབ་ཏུ་བརྩེགས། །རང་གནས་དེ་ཉིད་ཡེ་ཤེས་དང་། །འཕྲོ་འདུ་ལས་ཀྱི་སྦྱོར་བ་ཡིན། །བདག་མེད་སྟོང་པའི་ངོ་བོར་བྱ། །ཀུན་རྫོབ་ནུས་པ་རྫོགས་ལྡན་ཞིང་། །རང་གི་མཚན་ཉིད་སོ་སོར་འཛིན། །འཇའ་ཚོན་སྒྱུ་མའི་ཚུལ་ལྟར་སྣང་། །དེ་ཡི་སྟེང་དུ་བསམ་པ་ནི། །དུར་ཁྲོད་ཆེན་པོའི་གཞལ་ཡས་ཁང་། །གཟུགས་བརྙན་མཚན་ཉིད་ལྡན་པ་ལ། །རྒྱུ་ནི་འཇིགས་བྱེད་རྣམ་པར་སྣང་། །རང་གི་ཁམས་དང་བྱེད་པ་དང་། །གདུལ་བྱ་དང་ནི་འདུལ་བར་བྱེད། །གང་ལ་བསྔགས་པ་དེར་སྣང་ཞིང་། །ཚད་མེད་རྫོགས་པ་ཉིད་ཀྱིས་གསལ། །མ་བསྒྲིབས་མཉམ་ཉིད་ལྡན་པར་བསྒོམ། །རང་སྔགས་སྙིང་པོ་ལས་ཀྱི་གཞི། །བྱིན་རླབས་ཆོ་འཕྲུལ་བྱུང་བ་ནི། །ཨ་དང་མ༷་དང་པ༷་དག་ལས། །གསལ་བྱེད་སྙིང་པོ་བསིལ་བྱེད་ཅན། །དག་པ་གསུམ་ལ་སྦྱད་པས་མཉེས། །མ་ཧེ་ཆུ་གླང་བརྗིད་པ་ནི། །ཧ་ཡི་ཧ༷་གྱིཡང་རྣམ་པར་སྤྲོས་ལས་བྱུང་། །དེ་དག་སྟེང་དུ་བསྒོམ་པ་ནི། །ཧུ༷་ཆེན་འབར་བའི་འོད་འཕྲོས་པས། །འཇམ་དཔལ་མཁའ་ལས་བྱུང་བ་ནི། །གཤིན་རྗེ་ཀུན་གྱི་གཤེད་གྱུར་པ། །ཆོས་ཀྱི་དབྱིངས་ལས་འགྱུར་མེད་པས། །མཐིང་ནག་འབར་བའི་འོད་མདོག་ཅན། །ཞལ་གཡས་དཀར་བ་ཞི་བའི་ངང་། །ཕྲིན་ལས་དྲག་པོ་གཙོར་སྦྱོད་པས། །གཡོན་ཞལ་དམར་ནག་གཙིགས་པའོ། །ས་དགུ་རྫོགས་ཤིང་གནོན་པ་ཡིས། །སྤྱན་དགུ་སྡང་མིག་རབ་ཏུ་བལྟ། །ཆགས་པའི་ཐུགས་རྗེ་དང་ལྡན་པས། །སྤྱན་རྩ་དམར་ཞིང་ཕྱོགས་བཅུར་འཕྲུལ། །སྐྱེ་ཤི་རྩ་བ་གཅོད་པ་ཡིས། །མཆེ་བ་བཞི་ནི་རབ་ཏུ་གཙིགས། །སྒྲིབ་པའི་བག་ཆགས་གཏོར་བ་ཡིས། ཁྲངས་ནས་ཡེ་ཤེས་འཐོང་རླུད་མཛད། །ཨག་ཚོམ་དམར་པོ་མེར་འབར་བས། །གདུག་པའི་ཚོགས་ཀུན་ཟིལ་གྱིས་གནོན། །དྲེགས་པ་དབང་དུ་སྡུད་མཛད་པས། །ཞལ་ནས་ཧུ༷་སྒྲ་དྲག་པོ་སྒྲོགས །རྒྱུད་དྲུག་དབྱིངས་སུ་སྒྲོལ་བ་ཡིས། །ཕྱག་དྲུག་མཚོན་ཆ་རང་རྟགས་འཛིན། །གཡས་པའི་དང་པོ་དུག་ལྔའི་ཚོགས། །གཏན་ནས་འཇོམས་མཛད་བེ་ཅོན་བསྣམས། །བར་མ་རལ་གྲི་འཛིན་པ་ཡིས། །སྐྱེ་ཤིའི་འཇིགས་པ་རྩ་བ་གཅོད། །འོག་མ་དགྲ་སྟུ་འཛིན་པ་ཡིས། །སྟོབས་ཀྱི་དུག་ཞི་གནས་བཞི་འཇོམས། །གཡོན་གྱི་དང་པོ་སྡིགས་མཛུབ་ཀྱིས། །གདུག་བྱེད་ཟིལ་གནོན་འབིགས་པའི་བརྡའ། །བར་མ་ཐུགས་ཀྱི་ཡེ་ཤེས་ཀྱིས། །འཁོར་བའི་གཏིང་འབྱིན་མདུང་རིང་བསྣམས། །ཐ་མ་དབང་སྡུད་ཐོད་ཁྲག་འཛིན། །ཞབས་བཞི་གྱད་ཀྱི་དོར་སྟབས་ཀྱིས། །དྲེགས་པ་མང་པོ་དབང་དུ་སྡུད། །སྐུ་གསུམ་རང་བཞིན་ལྷུན་གྲུབ་པས། །ཐོད་པ་གསུམ་གྱི་ཕྲེང་བས་བརྒྱན། །གདུག་པ་ཀླུ་ཡི་དུག་འཇོམས་པས། །རིགས་ལྔའི་སྦྲུལ་གྱིས་ལྷུ་ཚིགས་བསྡམས། །བློ་ཡི་ཐེག་པ་སྣ་ཚོགས་རྫོགས། །ཕྲིན་ལས་བཞི་ཡི་ཆོ་འཕྲུལ་སྟོན། །དུ་ཏྲ་གདུག་པ་སྒྲོལ་མཛད་པས། །གླང་ཆེན་སྟག་དང་མི་དབང་པོ། །ལྤགས་པ་སྐུ་ཡི་ན་བཟར་གསོལ། །དུག་གསུམ་གཏན་ནས་འཇོམས་འདུལ་བས། །རཀྟ་ཐལ་ཆེན་ཁུ་བ་ཡིས། །ཐིག་ལེའི་ཚོམ་བུ་རི་མོར་བྱས། །མཐའ་གཉིས་སྤངས་ཤིང་ཁྱབ་པ་ཡིས། །རྡོ་རྗེ་རིན་ཆེན་གཤོག་པ་གདེངས། །ཉོན་མོངས་རྩ་བ་ཡན་ལག་ཚོགས། །བསྲེག་མཛད་བསྐལ་པའི་མེ་དཔུང་འབར། །གཏི་མུག་མ་སྤངས་དོན་མཛད་པས། །མ་ཧེ་ཆུ་གླང་ཞབས་ཀྱིས་གནོན། །སྐྱོན་མེད་གསལ་བའི་ཡེ་ཤེས་ལྡན། །ཉི་ཟླ་པདྨའི་གདན་ལ་བཞུགས། །ཆོས་དབྱིངས་ཡེ་ཤེས་དོན་རྟོགས་པས། །གཡོན་ཕྱོགས་ཁྲོ་མོ་བེ་ཏྭ་སྙི། །ནག་མོ་གཏུམ་ཆེན་དབྱིངས་ཀྱི་ཡུམ། །སྐུ་གསུམ་རྫོགས་པའི་སྤྱན་གསུམ་ལྡན། །ཁྲོ་གཉེར་རླབས་ཀྱིས་རབ་ཏུ་བསྐྱོད། །འཁོར་བ་མ་ལུས་གནས་ནས་འདྲེན། །དབུ་སྐྲ་ཁམ་ནག་རབ་ཏུ་འཚེར། །སྐུ་ཡི་ཆ་ལུགས་གདུག་པ་འདུལ། །ཟ་བྱེད་རྔམ་པའི་རོལ་པའི་སྟབས། །ཞལ་གདངས་ཚེམས་གཙིགས་ལྗགས་འདྲིལ་ཞིང་། །མེ་དཔུང་འབར་བའི་ནང་དུ་བཞུགས། །དུག་གསུམ་རྩད་གཅོད་དགྲ་སྟ་གཡས། །གཡོན་ན་བྷནྟྲ་ཁྲག་གིས་བཀང་། །སྤྲོས་བྲལ་ཉོན་མོངས་ཞལ་དུ་རྔུབས། །སྒྲོལ་མཛད་རལ་པ་གཅིག་མ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །དབུ་ཡི་ཐོར་ཚུགས་གཅིག་ཏུ་འཁྱིལ། །ཆོས་ཉིད་ཡང་དག་ཡེ་ཤེས་དབྱིངས། །མ་ལུས་རྟོགས་པའི་རྟགས་ཡིན་ཏེ །གཡས་ཀྱི་ཏྲེ་ཤཱལ་རྩེ་གསུམ་འཛིན། །དུག་གསུམ་འཛིན་པ་རྩད་ནས་གཅོད། །གཡང་གཞི་པགས་པའི་རུ་མཚོན་གྱིས། །བདུད་བཞིའི་རྟོག་པ་ཟིལ་གྱིས་གནོན། །གཡོན་ན་ཐོད་པ་ཁྲག་གིས་བཀང་། །འཁོར་བའི་ཉོན་མོངས་དབང་དུ་སྡུད། །འགྲོ་དྲུག་དབྱིངས་སུ་སྒྲོལ་བ་ཡིས། །ཁྲོ་གཉེར་དྲུག་གིས་རབ་ཏུ་འབར། །གཙོ་ཆེན་དགྱེས་པའི་རོལ་པ་སྟོབ། །ཧ་ཧི་གསང་བའི་ང་རོ་ཡིས། །རང་སྔགས་གསང་བའི་སྒྲ་སྒྲོགས་ཤིང་། །རྡོ་རྗེ་པདྨ་མཉམ་སྦྱོར་བས། །བྱང་ཆུབ་སེམས་ཀྱི་འོད་ཟེར་འཕྲོས། །ཡིག་འབྲུའི་རྣམ་པ་ཆོ་འཕྲུལ་གྱིས། །འདུལ་བྱེད་རང་གི་སྤྲུལ་པ་དག །ཇིབཞིན པཡིསྣངབལས། །རིགས་ཀྱི་སྲས་མཆོག་བྱུང་བ་ནི། །ཧུ༷་ཞེས་བྱ་བ་ཡི་གེའི་གཟུགས། །མཐིང་ག་འོད་དང་ལྡན་པ་དག །རང་གི་གནས་སུ་བསྐྱེད་པ་ལས། །འཁོར་ལོ་འབར་བའི་ཤར་ཕྱོགས་སུ། །ཡ་མ་རྭ་ཛ་ཞེས་བྱའི་སྲས། །མཐིང་ནག་ཞལ་གསུམ་ཕྱག་དྲུག་པ། །གཡས་དཀར་གཡོན་དམར་དབུས་མཐིང་ཞལ། །འཁོར་ལོ་རལ་གྲི་ལྕགས་ཀྱུ་གཡས། །ཁ་ཊ༷་དགྲ་སྟུ་རྒྱུ་ཞགས་གཡོན། །སྦྱོར་ཡུམ་ནག་མོ་རལ་གཅིག་མ། །གཙོ་ལ་འཁྱུད་ཅིང་དུང་དམར་སྟོབ། །སྒྲོལ་ཡུམ་ནག་མོ་ནམ་གྲུཡང། རེ་མ་ཏི། །གཡས་གཡོན་རལ་གྲི་ནེའུ་ལེ་འཛིན། །ལྷོ་ཕྱོགས་སུ་ནི་མྱོས་བྱེད་འབར། །སེར་ནག་ཞལ་གསུམ་ཕྱག་དྲུག་པ། གཡས་སྔོ་གཡོན་དམར་དབུས་སེར་ཞལ། །བེ་ཅོན་རལ་གྲི་དགྲ་སྟུ་གཡས། །བྷན་དྷ་འཁོར་ལོ་རྒྱུ་ཞགས་གཡོན། །ག་་མོ་སེར་ནག་སྦྱོར་མཛད་མ། །གཙོ་ལ་འཁྱུད་ཅིང་དུང་ཁྲག་སྟོབ། །སེར་ནག་ཁྲག་གི་བདག་མོ་ནི། །གཡས་ན་སྐྲུ་གྲི་སྙིང་ཞགས་གཡོན། །ནུབ་ཕྱོགས་འཕགས་པ་མ་རུ་ཙེ། །དམར་ནག་དབུ་གསུམ་ཕྱག་དྲུག་ལྡན། །གཡས་དཀར་གཡོན་སྔོ་དབུས་དམར་ནག །བེ་ཅོན་དབྱུག་ཏོ་ཁ་ཊ༷་གཡས། །ཐོག་ཁྲག་འཁོར་ལོ་རྒྱུ་ཞགས་གཡོན། །རསྨི་ཅན་ནི་གཉིས་མེད་སྦྱོར། །གཙོ་ལ་འཁྱུད་ཅིང་དུང་ཁྲག་སྟོབ། །གླིང་བཞི་འཇོམས་མཛད་ཁྲོས་མ་ནི། །དམར་མོ་མི་སྙིང་ཐོད་ཁྲག་འཛིན། །བྱང་ཕྱོགས་རལ་པ་ཚར་དགུ་ནི། །ལྗང་ནག་དབུ་གསུམ་ཕྱག་དྲུག་པ། །གཡས་དཀར་གཡོན་དམར་དབུས་ལྗང་ནག །བེ་ཅོན་གཏུན་ཤིང་རྒྱ་གྲམ་གཡས། །དུང་ཁྲག་འཁོར་ལོ་རྒྱུ་ཞགས་གཡོན། །རེ་མ་ཏི་ནི་སྦྱོར་བའི་ཚུལ། །སྲིན་མོ་ལྗང་ནག་མགོ་འཕྱངས་མ། །དགྲ་སྟུ་འཕྱར་ཞིང་དུང་དམར་སྟོབ། །སྲས་མཆོག་ཡབ་ཡུམ་འཁོར་རྣམས་ནི། །སོ་སོའི་རིགས་ཀྱི་སྐུ་མདོག་དང་། །རྒྱན་བཅས་གཙོ་བོ་ཡབ་ཡུམ་གྱི། །ཚུལ་ལྡན་རབ་ཏུ་རྫོགས་པའོ། །ཕྱི་རོལ་ཁྱམས་སམ་འཁོར་ལོ་ལ། །གདུལ་བྱའི་གཤིན་རྗེ་བསྐྱེད་པ་ནི། །སྟེང་ཕྱོགས་གནས་པའི་གཤིན་རྗེ་ནི། །ནག་པོའི་ཕྱོགས་འཇོམས་ཞེས་བྱ་བ། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་རྡོ་རྗེ་གཡོན་དགྲ་སྟུ། །ནག་མོ་རལ་གཅིག་ཡུམ་དང་བཅས། །དབང་ཕྱུག་རྫོགས་པ་སྐུ་དཀར་སེར། །ཚེ་བུམ་ཐོང་གཤོལ་ཕྱག་གིས་འཛིན། །གདོང་དགུ་མ་ནི་སྦྱོར་བའི་ཡུམ། །བྲག་འཇོམས་མདོག་དཀར་གཡས་རྡོ་རྗེ། །ཕྱག་གཡོན་གྱིས་ནི་འཁོར་ལོ་འཛིན། །ཁྲོ་མོ་ཤེལ་མིག་མ་དང་བཅས། །སྨུག་ནག་ཆེན་པོ་གླང་མགོ་ཅན། །ཕྱག་གཡས་ཁ་ཊ༷་གཡོན་ལྕགས་ཀྱུ། །མཆེ་གཙིགས་མ་དང་གཉིས་སུ་མེད། །སྔོ་ནག་ཡ་བ་ཏི་ཞེས་པ། །གཡས་པ་རལ་གྲི་གཡོན་ལྕགས་ཀྱུ། །ཨབ་ཤམ་ཅན་ཞེས་ཡུམ་དང་བཅས། །མིག་དམར་སྨུག་ནག་གཡས་རལ་གྲི། །གཡོན་གྱིས་ཏི་རའི་དབྱུག་པ་འཕྱར། །དམར་མོ་རལ་གཅིག་ཡུམ་དང་བཅས། །རབ་ཏུ་དམིགས་པའི་དུད་ཁའི་མདོག །ཐོག་ཕྲེང་གཡས་ཏེ་ལྕགས་སྒྲོག་གཡོན། །ཀླུ་མོ་པུས་འགྲོ་ཡུམ་དང་བཅས། །གཤིན་རྗེ་ཏེལ་པ་སྔོ་ནག་མདོག །གཡས་པ་སྤུ་གྲི་ཐོད་ཁྲག་གཡོན། །སྦྱོར་ཡུམ་སྤྱན་གསུམ་མ་དང་བཅས། །བདུད་འཇོམས་སྨུག་ནག་ཕྱག་གཡས་ན། །ཐོ་བ་གཡོན་ན་བྷརྙ་རྒྱ་གྲམ་ཡང་། འཛིན། །སྨུག་ནག་རལ་གཅིག་མ་དང་སྦྱོར། །ཆོས་ཀྱི་རྒྱལ་པོ་ཞེས་བྱ་བ། །དཀར་སེར་རྡོ་རྗེ་ཁྲམ་ཤིང་འཛིན། །རྡོ་རྗེ་རལ་པ་ཅན་དང་སྦྱོར། །འབར་བ་དམར་པོ་གཡས་ཀྱིས་ནི། །རྩིས་བྱང་གཡོན་ན་ག་་ཤིང་ཐོགས། །དམར་མོ་མགོ་དགུ་ཡུམ་དང་འཁྲིལ། །ཐོད་དབྱུག་ཅན་ནི་མཐིང་ནག་མདོག །གཡོན་ན་ཤོ་རྡེ་གཡས་ཏི་ར། །ནག་མོ་ཕག་མགོ་ཅན་དང་སྦྱོར། །ཕྱོགས་ཀུན་སྐྱོང་བའི་གཤིན་རྗེ་སྟེ། །ཁྲོ་བོ་གར་དགུའི་ཚུལ་དང་ལྡན། །ཞལ་གཅིག་ཕྱག་གཉིས་འཇིགས་པའི་གཟུགས། །རབ་ཏུ་མཚུངས་པའི་ཡུམ་ཆེན་ཡང་། །ཁ་ཊ༷་ཤེལ་གྱི་ལྕགས་ཀྱུ་དང་། །སྐར་མདའ་ཁྲམ་ཤིང་ཙིསྟ་མདུང་། །ཐོད་རློན་རལ་གྲི་ཉི་ཟེར་དང་། །ཏྲི་ཤཱལ་རྡོ་རྗེ་ཞགས་པ་དག །རིམ་པར་གཡས་པའི་ཕྱག་གི་འཛིན། །གཡོན་པས་དུང་དམར་ཡབ་ལ་སྟོབ། །རང་གི་ཕྱོགས་ནས་བརྗིད་པའི་ཚུལ། །སྒོ་བཞི་ཤར་ལྷོ་ནུབ་བྱང་དུ། །ཁྲོ་ཆེན་དཀར་མཐིང་དམར་ལྗང་གདོང་། །ཕྲ་མེན་ལྟ་བུ་བྱ་རྒོད་དང་། །སྟག་དང་ཀང་ཀ་སྤྱང་ཀིའི་མགོ །རྡོ་རྗེ་རིན་ཆེན་པདྨ་དང་། །རྒྱ་གྲམ་རིམ་བཞིན་གཡས་ཀྱིས་འཛིན། །ལྕགས་ཀྱུ་ཞགས་པ་ལྕགས་སྒྲོག་དང་། །ཤེལ་གྱི་དྲིལ་བུ་གཡོན་ན་བསྣམས། །ཁྲོ་བོའི་གར་དང་ལྡན་པ་དག །རང་སྔགས་གསང་བའི་དོན་གྱིས་དབྱུང་། །ཁྲོ་བོ་ཁྲོ་མོའི་ཚོགས་ཆེན་དག །ང་དང་གཉིས་མེད་དུས་གསུམ་གྱི། །སངས་རྒྱས་རྣམས་ཀྱི་བྱིན་རླབས་ཀྱིས། །སྐུ་གསུང་ཐུགས་སུ་བྱིན་བརླབས་ཤིང་། །ཆོས་དབྱིངས་མཉམ་ཉིད་མེ་ལོང་དང་། །སོ་སོར་རྟོག་དང་ནན་ཏན་གྱི། །རང་གི་ཡེ་ཤེས་ལྡན་པར་བྱས། །རྣལ་འབྱོར་དབང་ཕྱུག་སྒྲུབ་པ་ཡིས། །ལུས་ངག་ཡིད་ཀྱི་ནུས་པ་ཡིས། །ཡུལ་གསུམ་གསལ་བར་རབ་ཏུ་བསྒོམ། །དེ་ལ་བརྟན་པར་གནས་པ་དང་། །གཉིས་མེད་ཡེ་ཤེས་དཀྱིལ་འཁོར་ཆེ། །རང་བཞིན་གྲུབ་པའི་ཕོ་བྲང་ན། །ཁྱད་པར་ང་རྒྱལ་སྙིང་པོ་ཉིད། །ལྷག་པའི་གནས་སུ་སྦྱོང་བྱེད་པ། །མཉམ་ཉིད་རྫོགས་པའི་རང་བཞིན་ཅན། །དགུག་ཅིང་བསྟིམ་དང་དབབ་པ་དང་། །མཉེས་དང་མཆོད་པ་བསྟབ་པ་དང་། །རབ་ཏུ་བསྙེན་དང་ཤིན་ཏུ་བསྙེན། །འཕྲོ་འདུ་ལས་ཀྱི་སྦྱོར་བ་དང་། །ཞི་བར་བྱ་དང་རྒྱས་པར་སྤེལ། །དབང་དུ་བསྡུ་དང་དྲག་པོས་འདུལ། །འཁོར་ལོ་བཞི་ཡི་ལོངས་སྤྱོད་ཀྱིས། །ལས་ཀྱི་མཐའ་དང་བཅས་པ་དག །མངོན་སུམ་ནུས་པར་རབ་ཏུ་བཤད། །ཅེས་བཀའ་སྩལ་ཏོ། །གཤིན་རྗེ་གཤེད་འདུས་པ་རྩ་བའི་རྒྱུད་ལས། སྐུའི་འཁོར་ལོ་རྒྱས་པར་སྒྲུབ་པའི་ལེའུ་སྟེ་བཞི་པའོ།། །།དེ་ནས་རྒྱལ་པོ་རྡོ་རྗེ་འཛིན། །བྱང་ཆུབ་ཚུལ་གྱིས་སྦྱོར་བ་དག །གསུང་གི་སྙིང་པོ་གསང་བ་དག །འདུས་པའི་འཁོར་ལ་རབ་ཏུ་བསྟན། །ལྟ་བ་སྤྱོད་པ་ཆོ་འཕྲུལ་དང་། །ཕྲིན་ལས་རིགས་ཀྱི་ཁྱད་པར་གྱིས། །ང་རྒྱལ་གཏི་མུག་འདོད་ཆགས་དང་། །ཞེ་སྡང་ཕྲག་དོག་སྣང་བ་ཡིས། །ཐུགས་ཀྱི་སྙིང་པོ་འདི་ཉིད་ནི། །བློ་ཆེན་རྣམས་ལ་ངེས་སྣང་བ། །མཉམ་པ་ཉིད་དང་ཆོས་ཀྱི་དབྱིངས། །སོ་སོར་རྟོག་པའི་ཤེས་རབ་དང་། །ཀུན་ཏུ་གསལ་དང་ནན་ཏན་སྤྱོད། །གཅིག་ལ་ཀུན་རྫོགས་གཅིག་གི་ངང་། །གཅིག་ལས་སྤྲོས་དང་གཅིག་ཏུ་བསྡུ། །སྣང་ཞིང་རྟོག་པ་ཇི་སྙེད་པ། །དོན་གྱི་ངོ་བོ་དེ་ཉིད་ལས། །མཐོང་བའི་ཡུལ་ཚུལ་བལྟ་བ་ལས། །ཡང་དག་ཉིད་ལ་ཡང་དག་བལྟ། །འཇིག་རྟེན་པ་དང་དེ་ལས་འདས། །གང་ཟག་དང་ནི་ཆོས་ཀྱིས་བརྟག །ཚུ་རོལ་དང་ནི་ཕ་རོལ་ཏུ། །སྲིད་པ་དང་ནི་ཞི་བའི་ཆོས། །མཉམ་པ་ཉིད་ཀྱིས་གང་བསྒོམ་པ། །མཚན་མར་སྣང་དང་མཚན་མ་མེད། །རྒྱུ་འབྲས་སྟོང་པ་ཉིད་ལ་གནས། །གང་ལ་གནས་པ་དེ་བསྒོམ་པའོ། །འགྲོ་དང་འཆག་དང་འདུག་པ་དང་། །ཟ་དང་འཐུང་དང་ཉལ་བ་དང་། །བྱ་དང་བྱེད་དང་གནས་པ་དང་། །གནས་འགྱུར་རྟོག་པའི་ཁྱད་པར་སྤྱོད། །ཇི་ལྟར་གང་ལ་ཅིར་སྤྱོད་པ། །འཇིགས་བྱེད་གཤེད་ཀྱི་བརྟུལ་ཞུགས་ཏེ། །དང་པོ་བ་དང་མཉམ་གཞག་དང། །བདེབརགཤེགསཔཀུན་སྤྱོད་དོ། །དེ་དག་ཀུན་གྱི་ཕྲིན་ལས་ཚོགས། །མ་ལུས་སྒྲུབ་བྱེད་ནུས་པ་ནི། །དམིགས་པའི་ཡུལ་གྱི་བྱ་བ་དང་། །ལམ་དང་གང་ཟག་འབྲས་བུ་རྣམས། །འཐོབ་བྱེད་གསང་སྔགས་འདི་དག་གོ །ཨཱོཾ༷་ཨ་ཀྲོ་ཏེ་ཀ་ཡ་མྱནྟྲ་ཀ་ཧ་ན་མ་ཐ་བྷརྫི་ཧུ༷་ཕཊ། །རྩ་བའི་ཉེ་བའི་སྙིང་པོའོ། །ཨཱོཾ༷་ཀྭ་ལ་དུ་པ་ཧུ༷་ཕཊ། སྐུའི་སྙིང་པོའོ། །ཨཱོཾ༷་ཡ་ཤཱརྙ་ཀ་ཧུ༷་ཕཊ། །གསུང་གི་སྙིང་པོའོ། །ཨཱོཾ༷་སྙི༷༷ལྗོ༷༷བི་ཀྲི༷་ཏྭ་ནན་ཧུ༷་ཕཊ། །ཐུགས་ཀྱི་སྙིང༷ ་པོའོ། །ཨཱོཾ་ཡ་མ་རྭ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་སྟེ་ཡ། ཡཁྲེ་ཡསྣྲོ་ནི་རྭ་མ་ཡ་ཧུ༷་ཕཊ། རབ་ཏུ་གསང་བའི་སྙིང་པོའོ། །ཨཱོཾ༷་ཨ་སྔག་སོར་་ཀྲོ་ཏེ་ཀ་ཧུ༷་ཕཊ།ཨཱོཾ་སྙེ་ཏྭ་ལི་རསྒ་མ་ན་ཧུ༷་ཕཊ། ཨཱོཾ་ཨེ་ཀ་ཛ་རྟི་ཏྲག་རསྒ༷་མུ་ཏྲ་སྙིང་ཁ་རག་མ་རུ་ལུ་རུ་ལུ་སྨྱོ་ཧུ༷་ཕཊ༷། ཨཱོཾ༷་ཡ་མ་རྭ་ཛ་ཏི་ཏ་ཐ་ཐོ་ལ་ཡ་ཧུ༷་ཕཊ།༷ཨཱོཾ༷་ཡ་མ་རྭ་ཛ་པྲེ་ཏ་སྟི་ཏྲི་ཏི་མ་ར་ཏ་ཀ་ཧུ༷་ཕཊ། ཨཱོཾ༷་ཡ་མ་རྭ་ཛ་པྲེ་ཏེ་ཛ་ལ་ཧུ༷་ཕཊ། ཨཱོཾ༷ ་ཡ་མ་རྭ་ཛ་ཀ་ལ༷་སྟེ་པྲེ་ཏོད་ཀ་ཏ་སྤྱི༷་ཕཊ། ཨཱོཾ་རག་མོ༷་རག་མོ་སྙིང་རྩ་ལ་ཤ༷ ་ལ་སྨྱོ། །ཨཱོཾ་རག་མོ་རག་མོ་ཁྲག༷ ་ལ་མུ་ཤམ་སྨྱོ། །ཨཱོཾ་རག་མོ་རག་མོ་ཏི་ས་མ་མ་མ༷་སྨྱོ། །ཨཱོཾ་རག་མོ་རག་མོ་ཏིང་ཏིང་ཀ་ལ་མ་སྨྱོ། །ཨཱོཾ༷་ཧེ་མ་དེ་སྨྱོ་ཧུ༷། ཨཱོཾ་ཡ་མ་དེ་༷སྨྱོ་ཧུ༷། ཨཱོཾ་ན་ག་དེ་སྨྱོ་ཧུ༷། ཨཱོཾ༷་ཁ་རག་དེ་སྨྱོ་ཧུ༷། ཨཱོཾ་བཛྲ་ཡ༷་མ་རཀྟ་ཀྲོ་ཏ་ཧུ༷་ཕཊ། ཨཱོཾ་༷ཡ་མ་ཧྲི་ཏི་ཧཱུཾ་ཕཊ། ཨཱོཾ་ཡ་མ༷་མ་ཧྭ་པ་ཏ་ཧུ༷་ཕཊ། ཨཱོཾ་ཡ༷་མ་ཧྲི་ཀུ་རུ་ཧུ༷་ཕཊ། ཨཱོཾ་ཡ༷་མ་ཡ་བ་ཏི་ཧུ༷་ཕཊ། ཨཱོཾ་ཡ་མ་ཨབྱ་ད་ར་ཧུ༷་ཕཊ། ཨཱོཾ་ཡ་མ་རསྒ་ཙ་ལི་ཧུ༷་ཕཊ། ཨཱོཾ་ཡ་མ་སརྦ་པ་ཏ་ཧུ༷་ཕཊ། ཨཱོཾ་ཡ་མ་ཨ་མྲི་བ༷་ཧུ༷་ཕཊ། ཨཱོཾ་ཡ་མ་དྷརྨ་རྭ་ཛ་ཧུ༷་ཕཊ། ཨཱོཾ་ཡ་མ་ཛ་ལ་ར༷་ཧུ༷་ཕཊ། ཨཱོཾ་ཡ་མ་ཧྲི་ཏི་བ༷་ཧུ༷་ཕཊ། ཨཱོཾ་མ་མ་རག་མོ་རུ་ལུ་སྨྱོ། ཨཱོཾ༷་རག་མོ་ར༷ཀྟ་རུ་ལུ་སྨྱོ། ཨཱོཾ༷་མ་མ་ཡག་མོ་༷རུ་ལུ་སྨྱོ། ཨཱོཾ༷་མ་མ་རག་ཤ་ཧྲི༷་ཏི་སྙིང་རུ་ལུ་སྨྱོ། ཨཱོཾ༷་མ་མ་༷རསྒ་མ་ཏི་རུ་ལུ་སྨྱོ། ཨཱོཾ་༷རག་མོ་སྟ་ན་རུ་ལུ་༷སྨྱོ། ཨཱོཾ༷་མ་མ་ན་ག་རུ༷་ལུ་སྨྱོ། ཨཱོཾ༷་བ་ཡ་དྷི་བ་རུ་ལུ་སྨྱོ། ཨཱོཾ༷་ཡག་མོ་ཡག་མོ༷ ་རུ་ལུ་སྨྱོ། ཨཱོཾ་མ་མ་བཛྲ་ཨེ་ཀ་རུ་ལུ་ཧུ༷། ཨཱོཾ་མ་མ་ཡག་མོ་རུ་ལུ་སྨྱོ། ཨཱོཾ་ཀ་ལ་རག་མོ་རུ་ལུ་སྨྱོ། ཨཱོཾ་ཡ་མ་ཨ༷་གུ་ཤ་ཛ༷༷། ཨཱོཾ་ཡ་མ་པ་ཤ་ཧུ༷། ཨཱོཾ་ཡ་མ་སྤྲོ་ཊ་བ༷། ཨཱོཾ་ཡ་མ་བྷརྙེ་ཧོ༷༷། རབ་ཏུ་བསྐྱེད་པའི་སྙིང་པོའོ། །ཨཱོཾ་སམནཡམསྣྲུ་ཤིམུ་ཏྲ་ཡུ་མན་ཏ་ཀ་པ་ཙ་ཏེ་རོ་ནི་ཧུ༷་ཛ། མ་མ་ཨེ་ཀ་ཛ༷༷ཏི་སྒག་རསྒ་ཁ་མུནྟྲ། མུ་ཏྲ་མ་མ་སྙིང་ཁ་རགླ་སྨྱོ། རག་མོ་ཏེ། ཀེ་ཙ་ཚ་ཁ་ལ་མ་ཧི་སྨྱོ། ཡ་ཡ་ལོ་ན་ཙིརྙན་མ་མ་སྨྱོ་ཛ། སྙིང་ཁ་རག་སྲོག་ལ་སྨྱོ་སྨྱོ། བསྒྲུབ་པ་བྱ་བའི་སྙིང་པོའོ། །ཤེ་མ་མ་ཏེ་ཁྲེ་ར་ཙ་ས་ཏྭ་རུ་ན་ཡོ་ནི་ར་ཡ་ཙ་ནི་ཧུ༷་ཕཊ། ཡ་མ་ར་ཙ་ས་ཏྭ་མེ་ཡ། ཨ་མུ་ཀ་པྲ་མ་ཡ་ནི་ཤ་ཀུ་རུ་ནི་ཧུ༷་ཕཊ། །ཡ་མེ་ཏོ་རུ་ན་ཡོ་ཏ་ཡ། ཨ་མུ་ཀ་རག་ཏ་ར་ཙ་ཡ་ནི་ཤ་ཀུ་རུ་ཧུ༷་ཕཊ། ཡ་ཏ་ཡོ་ནི་ར་ཡ་ཁྲེ་ཡ། །སྲོག་རྩ་ཨ་མུ་ཀ༷་ནི་ཤ་ཀུ་རུ་ནི་ཧུ༷་ཕཊ། །ཡ་སྟེ་ཡ་ཙ་ནི་ར་མ་ཡ། ཨ་མུ་ཀ༷་མ་ར་ཡ་ནི་ཤ་ཀུ་རུ་ཧུ༷་ཕཊ། ཕྲིན་ལས་ཀྱི་སྙིང་པོའོ། །གཤེད་ཆེན་ལྟོ་བ་དཀྲུགས་པ་ཡི། །སྲིད་སྦྱར་ཡབ་ཡུམ་འཁོར་ལོ་བསྐོར། །བྲབ་དང་འཕངས་དང་ལས་ཀྱི་མཆོག །བཟློག་དང་གཟིར་དང་དཀྲུགས་པར་བྱ། །ཞེས་གསུངས་སོ། །དཔལགཤིནརྗེགཤེདརབཏུའདུས་པ་རྩ་བའི་རྒྱུད་ལས། གསང་བའི་སྙིང་པོའི་ལེའུ་སྟེ་ལྔ་པའོ།། །།དེ་ནས་རྒྱལ་པོ་རྡོ་རྗེ་འཛིན། །སྔོན་གྱི་ཕྲིན་ལས་དགོངས་མཛད་དེ། །གང་གིས་བཏུལ་བའི་གདུལ་བྱ་དེ། ། ཕྱི་མའི་དུས་ན་དགོངས་མཛད་དེ། །མངོན་དུ་སྤྱོད་པ་བཀའ་སྩལ་པ། །ང་ཡིས་སྔར་བཤད་གནས་དག་ཏུ། །གསུམ་དང་གཅིག་གི་ཁྲུ་ཚད་ཀྱིས། །ཕོ་བྲང་དཀྱིལ་འཁོར་མཛེས་པར་བརྩིགས། །དུར་ཁྲོད་རྫས་ཀྱིས་རབ་ཏུ་བསྟར། །དབུས་ལ་གྲུ་གསུམ་སྒོ་བཞེངས་བྱ། །འཁོར་ལོ་མུ་ཁྱུད་ལྡན་པར་བྱེད། །གཙོ་ཆེན་སྐུ་གསུང་ཐུགས་ཀྱི་གནས། །ཇི་ལྟར་རིགས་པ་བསམ་བཞིན་དགོད། །གླ་གློ་ཨ་བ་བྷ༷་ཤི་ཏ། རང་སྐད་སྨྲ་བ་དེ་དག་གི །མཚན་ངན་སྣོད་དུ་དྲག་པོའི་རྫས། །མྱོས་འཐིབ་གསོད་པར་ནུས་པ་དང་། །དྲན་པའི་རྟེན་དང་འཁོར་བའི་རྒྱུད། །མཛེས་ཤིང་མཉེས་པར་བྱ་ཕྱིར་དགོད། །མི་རྟ་རྒྱུ་མཆོག་གླང་པོ་ཆེ། །ཆུ་གླང་མ་ཧེ་དྲན་དབང་རྟེན། །གསེར་དངུལ་ཟངས་ལྕགས་འཁོར་ལོ་དང་། །སྤུ་གྲི་གྲི་གུག་བཤན་གྲི་དང་། །མཚོན་ལྕགས་ཕུར་པ་དུག་ཤིང་ཁྲམ། ཁྲ་རྡེ་དཀར་ནག་དམར་དང་སྔོ། །བཞི་པའམ་བདུན་ནམ་ཉི་ཤུ་གཅིག །སོ་སོའི་གྲངས་དང་མཐུན་པར་དགོད། །གཞན་ཡང་གིང་བདུད་བཤན་པ་དང་། །རྩིས་པ་རང་གི་གཟུགས་བརྙན་རྣམས། །དུས་གཞན་དག་ཏུ་ངས་བཤད་བཞིན། །སྐུ་གསུང་ཐུགས་ཀྱི་རྟེན་དུ་དགོད། །མཆོད་པས་མཉེས་གྱུར་དམ་ཚིག་རྫས། །བཟའ་དང་བཏུང་དང་མྱང་དང་ལྡག །བྲབ་དང་བདུག་པ་བརྡེག་པ་དང་། བསྐྲད་དང་བཅིངས་དང་མནན་པ་དང་། །གཏོར་དང་སྤར་བའི་རྫས་ཀྱིས་བསྟར། །ཏིང་ངེ་འཛིན་གྱི་དམིགས་པ་དང་། །ལས་ཀྱི་རིམ་པ་བྱ་བ་དག །གཙོ་དང་འཁོར་གྱིས་གནས་བསྒྱུར་ཏེ། །མ༷་ལས་མ་ཧེ་བསྣོལ་བའི་སྟེང་། །ཉི་ཟླ་འཁོར་ལོ་གསལ་བའི་སྟེང་། །ཡ་ཧུ༷་རྣམ་པའི་འཕྲོ་འདུ་ལས། །གཤེད་ཆེན་འཇིགས་བྱེད་བསྐྱེད་པར་བྱ། །དམར་ནག་གསེར་ལྗང་ལས་ཀྱི་མཐའ། །གང་གི་དམིགས་པ་དེ་དག་གི །ཟླ་གམ་ཡུམ་གཉིས་སྲས་དང་གསུམ། །གྲི་ཐོགས་བཞི་དང་ཁྲམ་ཐོགས་བཞི། །རྩིས་པ་བཞི་དང་བཤན་པ་བཞི། །བཞིའམ་བརྒྱད་དམ་བཅུ་དྲུག་གི །གིང་བདུད་གནོད་སྤྱིན་སྲིན་པོ་རྣམས། །སོ་སོའི་གཙོ་དང་འཁོར་དུ་བཅས། །ལུས་དང་ལོངས་སྤྱོད་ལྡན་པར་བསྒོམ། །རང་རྒྱུད་གནས་པའི་ཏིང་འཛིན་གྱིས། །དམིགས་པར་ལྡན་པས་བོས་ཤིང་བསྟིམ། །གནས་ནས་དྲངས་ཤིང་བོས་དང་བསྐུལ། །འཇིགས་བྱེད་ངང་གིས་བཟླས་པར་བྱ། །ཡ་མ་རྭ་ཛ་ས་དོ་མི་ཡ། ཡ་མེ་དོ་རུ་ཎ་ཡོ་ད་ཡ། ཡ་ཏ་ཡོ་ནི་ར་ཡསྟེ་ཡ། ཡསྣེ་ཡསྣྲོ་ནི་རྭ་མ་ཡ། ཉི་མ་བཞི་པའི་ཕྲིན་ལས་སྤྱད། གིང་ཀ་ར་གིང་ཀ་ར། ཀརྨ་རསྒ་ཧྲི།ཏྲེ་ཀུ་རུ་རསྒ་ཁའ་ཧི། སྟ་ཤ་དུ་ཏྲ་མྱ་ཡ། དུ་ཏྲ་ཐུ་ན་ཡ། དུ་ཏྲ་ཐུ་ན་ཡ། རཀྟ་ཐུན་རྦད། རཀྟ་ཐུན་རྦད། བདུད་ཏྲི་ནི་ར་ཟུང་། ཡ་ཏྲི་ནི་ར་ཟུང་། ཏྲི་ཙ་པ་ལ་ནི་ར་ཟུང་། ཆུ་མ་ཤིག་ཡང་ཏྲི་ནི་ར་ཟུང་། དུན་ཏྲི་བ་ཏྲི་ད་ན་ཏྲི་་།་མ་ཏྲི་ཐུན་ཛ། མ་ར་ཏྲི་ཛ་ཛ། ཡ་ཡུ། ཐིང་ཐི། ཀྲོ་ཏ་ནི་ཀྲོ་ཏ་ནི། པ་ཏྲ་པ་ཏྲ། ག་ཤུ་ལ་ག་ཤུ་ལ། དྷ་ཤ་སྒྲི་ཝ་དྷ་ཤ་སྒྲི་ཝ། ཡག་ཤ་སྒྲི་བ་ཡག་ཤ་སྒྲི་བ་ཧུ༷་ཕཊ། བཛྲ་བཛྲ་ད་ར་ལིབས། ཁ་ལ་མུ་ཏིང་སྙིང་གང་ཆོད། མུ་ལ་དུན་ཏིང་མྱ་ར་ཡ་རྦད། བཛྲ་ཏིཀྟ་རྦད། ཙཀྲ་དུ་ཏྲི་རྦད། བཛྲ་ཤུ་ཏྲི་ད་ར་ཏྲི་ཡ་རྦད་སུ་རྦད་སུ། རྦད་དུ་རྦད་དུ། ད་རཀ་ཤ་ཏ་ས་མ་ཡ། མདངས་དང་ལྡན་པས་བོད་པར་བྱ། །ཉེ་དང་བསྙེན་པའི་རྟགས་མཐོང་ནས། །ལས་ལ་སྦྱར་བ་འདི་དག་གོ །གིང་ཀ་ར་གིང་ཀ་ར་སྲོག་ལ་རྦད་སུ་རྦད་སུ། ཤ་ལ་ཧ་བ་ཧ་བ། རུས་ལ་ཆེམ་ཆེམ། རྩ་ལ་མྱག་མྱག །ཁྲག་ལ་ཧུབ་ཧུབ། རྦད་རྦད་རྟུབ་རྟུབ། ཨ་མུ་ཀ་ཙིརྟི་མུགས། ར་མ་མྱ་ར་ཡ་ཁུག་ལིང་། སྙིང་ཁྲག་ཏི་མ་ཙ་ཏི་རྦད་ཐུན་རྨུགས་ཁྲམ་ཧོར་རྦད། ཨ་མུ་ཀ་མྱ་ར་ཡ་མ་ཏྲིག་ན་གུག་ལིང་རྦད། བདུད་ཏྲི་རྦད་ཐུམ་རི་ལི་ལི། ཨ་མུ་ཀ་ཤིག་ཁ་ལ་ཀུ་མྲ ཨ་མུ་ཀ་མུ་ཏྲི་ཧྲི་མ་དུ་ན་ཏྲི་ཕོབ་ཡ། ཡ་ཏྲི་རྦད་ཐུམ་རི་ལི་ལི། རྦད་རྦད། དྷ་ཤ་སྒྲི་བ་རྦད། ཐུམ་རི་ལི་ལི། ཡསྒ་སྒྲི་ཝ་རྦད་བུ་ཐུམ་རི་ལི་ལི། ཡསྒ་ཙཀྲ་ཙིསྟ་མུ་ར་ཡ་སྨྱོ། ས་མ་ཡ་ད་མ་ཛ་ཛ། ཏ༷་ཏི་དུ་ན་རྦད། སུ་ད་ར་བྲེང་བྲེང་རྦད། རཏྣ་ཙཀྲ་ཨ་མུ་ཀ་ཧ་རི་ནི་སྨྱོ། ཡ་མ་མུན་ཏིང་ཤ་ལིང་ཏྲི་ཙ་ར་དྲི་ཏྲི་བ་ར་ཏྲི་རྦད་རྦད། གིང་ཀ་ར་ཙ་དྷ་མ་རུ་ཙེ་ལས་ལ་ཡམ་ཡམ་རྩ་ལ་རྒྱུག་དབུགས་ལ་ཧུར་ཐུམ། སྲོག་ལ་དུན་ཛ། ཤ་ལ་གུག་ཐུན། །སྔགས་འདི་རྫས་ལ་བཟླས་ཤིང་གདབ། །བྱུང་དང་བརྟན་དང་ལས་བྱེད་དང་། །གྲུབ་དང་མཐར་ཕྱིན་རྟགས་དང་སྦྱར། །དང་པོས་འབོད་ཅིང་གཟུགས་ལ་དབབ། །གཉིས་པས་དཔུང་དང་དབྲལ་བར་བྱ། །གསུམ་པས་གནས་སུ་དགུག་ཅིང་བཅིངས། །བཞི་པས་བསད་དང་བརྡེགས་པ་སྟེ། །ཉི་མ་བཞི་པའི་འཁོར་ལོ་ཡིས། །གཡས་གཅོད་གཡོན་གཅོད་གོ་རིམ་གྱིས། །འཕང་དང་བསྲེག་དང་གནན་པ་དང་། །ལས་ཀྱི་མཐའ་མ་རྫོགས་པ་ཡིས། །གཅོད་པའི་འཁོར་ལོ་ཆོ་འཕྲུལ་ཡིན། །གཟུགས་མེད་གཟུགས་ཅན་འདོད་པའི་ཁམས། །མ་ལུས་ངོ་བོ་ཉིད་ཀྱིས་བདེ། །འཁྲུལ་པའི་ལས་ཀྱིས་འཁོར་ལོ་རྫོགས། །གནས་ནས་འཕོ་ཞིང་སྡུག་བསྔལ་གྱི། །ངང་གིས་བདེ་ལ་སྒྲིབ་ཅིང་གཅོད། །དེ་ལས་བཟློག་པ་དེ་ཉིད་དེ། །འཁོར་ཞིང་འཕོ་དང་གཅོད་པས་སོ། །བྱང་ཆུབ་ལམ་དང་སྲིད་པའི་གནས། །རྟེན་འབྲེལ་ཕྱོགས་ཆོས་རྗེས་འགྲོ་ཞིང་། །བཟློག་པ་མ་ལུས་ཀུན་ཏུ་བརྟག །དེ་ནས་གཞན་དབང་བསམ་པའང་འབྱུང་། །ཡོངས་སུ་གྲུབ་པ་རྗེས་ཡིན་ནོ། །དུས་བཞི་སྐྱེ་བའི་གནས་བཞི་དང་། །སྡུག་བསྔལ་བཞི་དང་འགྱུར་བ་བཞི། །ཡུལ་བཞི་ཁམས་དང་བྱེད་པ་བཞི། །ལམ་བཞི་ས་བཞི་ཡེ་ཤེས་བཞི། །སྐུ་བཞི་རྫོགས་པའི་ལྟ་བ་བཞི། །མ་ལུས་འཕོ་དང་གཅོད་པ་དང་། །འགྲོ་ཞིང་ལྡོག་པའི་འཁོར་ལོ་སྟེ། །བཞི་དང་བརྒྱད་དང་བཅུ་གཉིས་དང་། །བཅུ་དྲུག་བར་གྱི་གནསཡུལམཚོན། །ཕྱིནངཡུལདང་དངོས་ཐམས་ཅད། །གཞི་དང་གཉེན་པོ་འབྱུང་བ་དང་། །རྒྱུ་དང་འབྲས་བུ་བྱེད་པའི་རྐྱེན། །འཇིག་དང་གནས་པའི་རྟེན་འབྲེལ་འབྱུང་། །བརྟན་གཡོ་དབང་པོ་དྲུག་གི་ཡུལ། །རང་གི་ནུས་པར་བཅས་པ་དག །རང་བཞིན་ངང་དྭངས་བདག་ཉིད་ཀྱིས། །བྱ་དང་བྱེད་དང་ཆགས་སྡང་དང་། །བག་ལ་ཉལ་དང་ཀུན་ནས་སྡང་། །འབྱུང་དང་ལྡོག་པའི་རྟེན་འབྲེལ་གྱིས། །བག་ཆགས་ལས་དང་ཉོན་མོངས་དང་། ཁྲེས་བྱ་ཙམ་གྱིས་སྒྲིབ་པར་འགྱུར། །བཅུ་གསུམ་པ་དང་ཡན་ལག་དང་། །སྦྱོར་དང་མཉམ་ཉིད་རིག་པ་ཡིས། ཁུ་མཐུན་དབང་དང་རྣམ་སྨིན་གྱིས། །དགེ་དང་མི་དགེའི་འབྲས་བུ་བསྐྱེད། །ང་ནི་ཐོག་མ་མེད་པ་ནས། །དུས་གསུམ་སྤྲོས་བྲལ་ཆོས་སྐུར་གྱུར། །ཆོས་མཐུན་ལོངས་སྤྱོད་རྫོགས་པར་བསྟན། །ཆོ་འཕྲུལ་བྱིན་རླབས་འཁོར་ལོ་བཞིས། །མ་འགགས་ཐབས་ལས་སྦྲུལ་པའི་སྐུ། །དག་པ་རང་གི་ངོ་བོ་ཉིད། །ཕྲིན་ལས་སྣ་ཚོགས་འབྱུང་བ་ལས། །སོམ་ཉི་ཟ་བར་མ་བྱེད་ཅིག །ཅེས་བཀའ་སྩལ་ཏོ། །གཤིན་རྗེ་གཤེད་རབ་ཏུ་འདུས་པ་རྩ་བའི་རྒྱུད་ལས། །གཅོད་པའི་འཁོར་ལོའི་ཁྱད་པར་གྱི་ལས་བཤད་པའི་ལེའུ་སྟེ་དྲུག་པའོ།། །།དེ་ནས་རྒྱལ་པོ་རྡོ་རྗེ་འཛིན། །དུས་གསུམ་སངས་རྒྱས་ཐམས་ཅད་ཀྱི། །ཁྱད་པར་སྐུ་ཡི་ངོ་བོ་བདག །བསྡུས་པའི་ཡོན་ཏན་འདི་གསུངས སོ། །ཧུ༷ ཆེན འབར་བའི་འཕྲོ་འདུ་དང་། །རྡོ་རྗེ་རྩེ་ལྔའི་བྱིན་རླབས་ཀྱིས། །འཇམ་དཔལ་མཁའ་ལས་བྱུང་བའི་སྐུ། །བཅོམ་ལྡན་གཤིན་རྗེ་ཀུན་གྱི་གཤེད། །གཉིས་མེད་ཀུན་ལ་ཁྱབ་པའི་སྐུ། །ཆོས་ཀྱི་དབྱིངས་ལས་མ་གཡོས་ཀྱང་། །ཡེ་ཤེས་སྒྱུ་མའི་སྐུར་སྣང་བ། །འགྱུར་མེད་རྡོ་རྗེ་སྐུ་ཡི་མཆོག །ཞལ་གསུམ་ཕྱག་དྲུག་ཞབས་བཞིར་བགྲད། །ཆོས་ཉིད་མི་འགྱུར་སྐུ་མདོག་མཐིང་། །སྐུ་གསུམ་རྫོགས་པའི་དབུ་གསུམ་གསལ། ཁུད་དྲུག་སྒྲོལ་བའི་ཕྱག་དྲུག་ནི། །དུག་ལྔ་འཇོམས་མཛད་བེ་ཅོན་འབྱར། །སྐྱེ་ཤི་རྩད་གཅོད་རལ་གྲི་གདེངས། །བདུད་བཞི་འདུལ་བའི་དགྲ་སྟ་འཛིན། །གདུག་བྱེད་འབིགས་བའི་སྡིགས་མཛུབ་མཛད། །འཁོར་བའི་གཏིང་འབྱིན་མདུང་ཐུང་བསོར། །མ་ལུས་དབང་སྡུད་ཐོད་ཁྲག་སྟོབ། །སྲིད་ཞི་མཉམ་ཉིད་ཞལ་མདོག་ཅན། །བདེ་གཤེགས་ཀུན་གྱི་ཡེ་ཤེས་ཀྱིས། །རྣམ་དག་སྐུ་ཡི་རྒྱས་གདབ་ཅིང་། །དབུ་སྐྲ་རལ་པ་སྲིད་རྩེར་འབར། །ས་དགུ་རྫོགས་པའི་སྤྱན་དགུ་གཟིགས། །ཉོན་མོངས་བག་ཆགས་སྒྲིབ་པའི་ཚོགས། ཁྲངས་ཀྱི་ཡེ་ཤེས་རླུད་གིས་གཏོར། །སྨ་ར་མེ་འབར་སྲིད་གསུམ་བསྲེག །ཞལ་ནས་ཧུ༷་ཆེན་ཆོས་སྒྲ་སྒྲོགས། །ལྗགས་ཀྱི་ཀློག་འོད་ཁམས་གསུམ་གསལ། །མཆེ་བ་གཙིགས་པས་སྐྱེ་བཞི་སྒྲོལ། །ཁྲོ་གཉེར་བརྗིད་པས་དབང་དུ་སྡུད། །སྐུ་གསུམ་རྫོགས་པའི་ཐོད་ཕྲེང་བརྒྱན། །གདུག་པ་འཇོམས་མཛད་སྤྲུལ་གྱིས་དཀྲིས། །ཐེག་པ་རིམ་པ་དགུ་རྫོགས་པས། །གླང་ཀོ་རློན་པ་ན་བཟར་གསོལ། །ཕྲིན་ལས་རྣམ་བཞི་རབ་རྫོགས་པས། །སྟག་གི་པགས་པའི་ཤམ་ཐབས་གསོལ་དཀྲངས། །དྲེགས་པ་དུ་ཏྲ་འདུལ་མཛད་པས། །མི་དབང་ལྤགས་པ་སྐུ་ལ་གསོལ། །རཀྟའི་ཐིག་ལེས་འདོད་ཆགས་འཇོམས ཐལ་ཆེན་མཚན་མས་གཏི་མུག་སེལ། །ཞག་གི་ཟོ་རིས་ཞེ་སྡང་སྤོང་། །རྡོ་རྗེའི་གཤོག་པ་ནམ་མཁར་གདེངས། །རིན་ཆེན་གཤོག་པས་འགྲོ་དོན་རྫོགས། །མཐའ་གཉིས་མ་སྤངས་ཀུན་ལ་ཁྱབ། །བསྐལ་པའི་མེ་དཔུང་ཀློང་ན་བཞུགས། །བག་ཆགས་རྟོགས་པ་མ་ལུས་བསྲེག །དུག་གསུམ་ས་གསུམ་རབ་སྦྱོར་བས། །ཡི་དྭགས་མ་ཧེ་ཆུ་གླང་གནོན། །ཡེ་ཤེས་གསུམ་གྱིས་དོན་མཛད་པས། །ཉི་ཟླ་པདྨའི་གདན་ལ་བཞུགས། །སྙོམས་མཛད་རྒྱལ་བ་ཀུན་གྱི་ཡབ། །སྐུ་མཆོག་གཙོ་ལ་ཕྱག་འཚལ་བསྟོད། །ཆོས་དབྱིངས་གཉིས་མེད་སྦྱོར་བ་ཡི། །ཡུམ་ཆེན་ཁྲོ་མོ་བེ་ཏྭ་སྙི། །གཏུམ་ཆེན་དབྱིངས་ཀྱི་ཡུམ་གཅིག་མ། །མཐིང་ནག་འབར་བའི་སྐུ་མདོག་ཅན། །ཞལ་གཅིག་ཕྱག་གཉིས་ཁྲོ་གཉེར་མ། །དུག་གསུམ་རྩད་གཅོད་དགྲ་སྟ་གཡས། །ཉོན་མོངས་རྔུབ་མཛད་ཐོད་ཁྲག་སྟོབ། །དཔལ་ཆེན་སྐུ་དང་གཉིས་སུ་མེད། །ཆོས་ཉིད་དབྱིངས་སུ་ཡང་དག་སྦྱོར། །སྒྲོལ་མཛད་ཡུམ་ཆེན་རལ་གཅིག་མ། །བི་ཌར་སྔོན་པོའི་མདོག་འཛིན་མ། །གཡུ་ཡི་རལ་གཅིག་གཙུག་ཏུ་འཁྱིལ། །ཞལ་གཅིག་ཕྱག་གཉིས་ཁྲོ་མོ་ཆེ། །དཔལ་འབར་ཁྲོ་མོ་མི་ཐུང་མ། །གཡས་ཀྱི་ཏྲི་ཤཱལ་རྩེ་གསུམ་འཛིན། །དུག་གསུམ་རྩད་ནས་གཅོད་ཅིང་སྒྲོལ། །གཡོན་ན་ཞིང་ལྗགས་རྒྱལ་མཚན་ཕྱར། །བདུད་བཞིའི་རྟོག་པ་འདུལ་བར་མཛད། །གཙོ་ཆེན་ཕྲིན་ལས་མྱུར་བསྒྲུབ་མ། །སྦྱོར་དང་སྒྲོལ་བའི་བདག་ཉིད་ཀྱིས། །འགྲོ་དོན་རྫོགས་མཛད་དཔལ་འབར་མ། །ཆོས་དབྱིངས་རྒྱལ་བ་ཀུན་གྱི་ཡུམ། །འདུལ་མཛད་ཡུམ་ལ་ཕྱག་འཚལ་བསྟོད། །གཉིས་མེད་ཐུགས་ཀྱི་སྤྲུལ་པ་ལས། །ཕྱོགས་བཞི་འདུལ་བའི་གཤེད་ཆེན་བཞི། །ཞེ་སྡང་ཡེ་ཤེས་གཤིན་རྗེའི་གཤེད། །གཏི་མུག་ཡེ་ཤེས་གཤིན་རྗེའི་གཤེད། །འདོད་ཆགས་ཡེ་ཤེས་གཤིན་རྗེའི་གཤེད། །ཕྲག་དོག་ཡེ་ཤེས་གཤིན་རྗེའི་གཤེད། །འཇིགས་བྱེད་ཆེན་པོའི་སྐུར་བསྟན་པ། །གསུང་གི་དབང་ཕྱུག་འཇམ་པའི་དཔལ། །ཐུགས་མཆོག་རྣམ་དག་ཆོས་ཀུན་གསལ། །ཡོན་ཏན་མཉམ་ཉིད་མ་ལུས་རྫོགས། །ཕྲིན་ལས་མི་བཟད་གདུག་པ་འདུལ། །སྦྱོར་དང་སྒྲོལ་མཛད་ཡུམ་དང་བཅས། །བྱང་ཆུབ་སེམས་ཀྱི་ཕྲིན་ལས་ཀྱིས། །སྲིད་པའི་འཁོར་ལོ་གནས་ནས་སྦྱོངས། །ཡེ་ཤེས་སེམས་དཔའ་རྒྱལ་བའི་སྲས། །འཁོར་ལོ་བཞི་ཡི་བདག་ཉིད་རྫོགས། །གཤེད་ཆེན་ཚོགས་ལ་ཕྱག་འཚལ་བསྟོད། །བཅོམ་ལྡན་སྔོན་གྱི་ཕྲིན་ལས་ལས། །བདུད་འདུལ་ཕོ་ཉའི་ལསམཛདཔ། །གཤིནརྗེམམོམཁའ་འགྲོར་བཅས། །ཕྱོགས་མཚམས་སྟེང་འོག་མ་ལུས་པའི། །ཕྱི་ནང་སྐྱོང་བའི་དམ་ཚིག་ཅན། །ཉི་མ་བཞི་༄༅ པའི་ལས་མཛད་ཅིང་། །ལྷ་དང་བཅས་པའི་འཇིག་རྟེན་འདུལ། །འཁོར་དང་བཅས་ལ་ཕྱག་འཚལ་བསྟོད། །ཅེས་བཀའ་སྩལ་ནས། །ཉིད་ཀྱི་སྐུ་གསུང་ཐུགས་ཀྱི་དཀྱིལ་འཁོར་ཕྱོགས་བཅུ་ནམ་མཁའི་ཁམས་ཐམས་ཅད་མ་ལུས་པར་ཁྱབ་པར་མཛད་ནས། སེམས་ཅན་གྱི་ཁམས་སྣང་བ་ཐམས་ཅད། རང་རང་གི་མདུན་ན་དེ་བཞིན་གཤེགས་པ་རང་རང་གི་རིགས་དང་ཁམས་བྱེད་པ་དང་། །ལས་ཀྱི་ཁྱད་པར་དང་རབ་ཏུ་མཐུན་པའི་ཆོས་སྟོན་ཅིང་གནས་པ་དང་། སྲིད་པ་དང་། སྤྲུལ་པ་དང་། གཅོད་པའི་སྒོ་ནས། སངས་རྒྱས་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ཀྱི་གཟུགས་དང་། ཚངས་པ་དང་། བརྒྱ་བྱིན་དང་། དབང་ཕྱུག་ཆེན་པོ་གཞོན་ནུ་དང་། ལྷ་དང་། ཀླུ་དང་། བྲམ་ཟེ་དང་། གླང་པོ་དང་། ཅང་ཤེས་དང་། ངང་པའི་རྒྱལ་པོ་དང་། རུ་རུ་དང་ཤིང་རྟ་མོ་དང་། སྡིག་པ་དང་ཉ་དང་སྲིན་བུ་ལ་སོགས་པ་སེམས་ཅན་གྱི་གཟུགས་སྣ་ཚོགས་བདག་གིས། ཁ་ཅིག་ལ་ནི་ཞི་བ་དང་། ཁ་ཅིག་ལ་ནི་རྒྱས་པ་དང་། ཁ་ཅིག་ལ་ནི་དབང་དུ་བསྡུ་བ་དང་། ཁ་ཅིག་ལ་ནི་ཚར་གཅད་པ་དང་། ཁ་ཅིག་ལ་ནི་བསྐྲད་པ་དང་། བཅིང་བ་དང་།དགུག་པ་དང་གནན་པ་ལ་སོགས་པ་གང་གིས་གཉེན་པོར་གང་འགྱུར་བ་དེ་བཞིན་དུ་བསྟན་ཏེ། ཐམས་ཅད་ཀྱང་མཉམ་པ་ཉིད་ཀྱི་བཀོད་པའི་ཞིང་ཁམས་སུ་སྣང་བརམཛདདོ། །གཤིནརྗེགཤེད་རབ་ཏུ་འདུས་པ་རྩ་བའི་རྒྱུད་ལས། སྐུ་གསུང་ཐུགས་ཀྱི་འཁོར་ལོའི་ཡོན་ཏན་རྫོགས་པར་སྣང་བའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་དེ་ཉིད་ཀྱིས་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་དེ་ཁོ་ན་ཉིད་གསང་བ་བས་ཀྱང་ཆེས་གསང་བ་རྨད་དུ་བྱུང་བའི་རོལ་པའི་ཕྲིན་ལས་དེ་དག་མ་འོངས་པའི་དུས་སུ་སྙིགས་མ་ལྔར་གྱུར་པའི་སེམས་ཅན་ལ་ཕན་གདགས་པའི་ཕྱིར། །བྱང་ཆུབ་སེམས་དཔའ་རྡོ་རྗེ་འཆང་ལ་གདམས་ཏེ་ཡོངས་སུ་གཏད་ནས། སྨོན་ལམ་གྱི་དབང་གིས་མི་འགྱུར་བར་མཛད་དེ། །ཉིད་ཀྱི་ཐུགས་ཁྱད་པར་དུ་དཀའ་ཐུབ་ཀྱི་ལུས་རྣམ་པར་དག་པའི་ཕུང་པོ་ལས་བཞེངས་ནས་དགེ་སྦྱོང་དུ་སྤྲུལ་ཏེ། དེ་དག་དང་མཐུན་པའི་ཆོས་བསྟན་པ་སྣ་ཚོགས་ཀྱི་ཐུན་མོང་བ་དང་། དྲང་བའི་དོན་དང་སྒྲ་ཇི་བཞིན་པ་དང་། དགོངས་པ་མ་ཡིན་པ་དང་། སྤྱིའི་དོན་དང་ཡི་གེའི་དོན་དག་གིས་རྗེས་སུ་བཟུང་སྟེ་ཐམས་ཅད་མྱ་ངན་ལས་འདས་པའི་ས་ལ་མྱུར་དུ་འགོད་པར་དགོངས་སོ། །བཅོམ་ལྡན་འདས་དཔལ་གཤིན་རྗེ་གཤེད་རབ་ཏུ་འདུས་པ་རྩ་བའི་རྒྱུད་ཅེས་བྱ་བ་རྫོགས་སོ།། །།རྒྱ་གར་གྱི་མཁན་པོ་སློབ་དཔོན་ཆེན་པོ་པདྨ་འབྱུང་གནས་དང་། བོད་ཀྱི་ལོསྣྲོ་བ་བི་རོ་ཙ་ན་བདག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །རྒྱ་པོའི་བླ་དཔེ། གཏེར་རྒྱ། སྦས་རྒྱ། གཏད་རྒྱ། རྒྱ་རྒྱ་རྒྱ།། །།