Ngb-pt-0220-vol-03-text
Front
Body
བླ་མ་དགོངས་པ་འདུས་པ་ལས་བླ་མ་ཡི་དམ་མཁའ་འགྲོ་ཐམས་ཅད་ཀྱི་དྲག་སྔགས་ཕྲིན་ལས་ཀྱི་རྒྱུད་སྐྲུ་གྲི་རེག་ཆོད་བཞུགས་སོ། །ཨུ་རྒྱན་གསང་བ་བརྡའི་སྐད་དུ། སྐྲུ་ཝབྱུ་་། རྒྱ་གར་སྐད་དུ། ལྷུ་རུ་དྷི་ཝ་ཌའསྐི་ནི། སརྦ་ཀརྨ་ཏནྟྲ་ཀྱུ་ར་སྤྲི་ཤ་སྣྲོ་ད་ན་ནཱ་མ། བོད་སྐད་དུ། བླ་མ་ཡི་དམ་མཁའ་འགྲོ་ཐམས་ཅད་ཀྱི་ཕྲིན་ལས་ཀྱི་རྒྱུད་སྤུ་གྲི་རེག་གཅོད་ཅེས་བྱ་བ། བཅོམ་ལྡན་འདས་དཔལ་ཆེན་རྔམ་པ་དྲག་པོ་ག་་རྔམ་རབ་ཏུ་ཁྲོས་པའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་རྒྱལ་པོ་ལ་ཕྱག་འཚལ་ལོ། །སྣང་སྲིད་རབ་ཏུ་གཡོས་ནས་ནི། །འབྱུང་བ་མེ་རླུ་་འཁྲུགས་པའི་ཀློང་། །བདུད་དང་རྭ་ཏྲ་རབ་བསྒྲལ་ནས། ཁྲ་ཁྲག་རྒྱ་མཚོར་འཁྱིལ་བའི་དབུས། །དྲག་སྔགས་མཚོན་ཆའི་གུར་ཁང་དུ། །དྲེགས་པ་ཁྱོ་ཤུག་བསྣོལ་བའི་སྟེང་། །བཅོམ་ལྡན་སྣང་བ་མཐའ་ཡས་སྐུ། །གཟི་བརྗིད་རབ་འབར་སྐུར་བཞེངས་ནས། །སྟོབས་ཀྱི་དཔའ་ཤུགས་རབ་བསྐྱེད་དེ། །སྐུ་གསུང་ཐུགས་ལས་འོད་ཀྱི་ཟེར། །ཚ་ཚྭས་སྣང་སྲིད་སྟོང་ཁམས་གང་། །མ་རུངས་པ་རྣམས་ཚར་གཅོད་ཅིང་། །སྤྲུལ་པ་དཔག་མེད་འགྱེད་པའི་ཚེ། །འཁོར་གྱི་གཙོ་མཆོག་དབང་ཆེན་རྒྱལ། །ཧ་ཡ་སྤྱི་ཝ་དགྲ་བགེགས་གཤེད། །རབ་ཏུ་ཁྲོས་པའི་སྟོབས་ཤུགས་ཅན། །སྐུ་ལ་དུར་ཁྲོད་ཆས་ཀྱིས་བརྒྱན། །སྤྱི་གཙུག་དབང་སྐད་རྟ་མཆོག་འཚེར། །སྤྲུལ་དང་ཡང་སྤྲུལ་དཔག་མེད་འགྱེད། །གསུང སརྔམ་པའི་ང་རོ་སྒྲོགས། །ཧུ༷་ཕཊ་སྒྲ་ཡིས་སྟོང་གསུམ་གཡོ། །ཧ་ཧའི་གད་མོ་ཆེར་འབྱིན་ཅིང་། །དགྱེས་པའི་གདངས་སྐད་འབྱུང་པོ་སྐྲག །སྒྲོལ་འགྱུར་མེད་པའི་ཐུགས་ཀློང་ནས། །ངང་གིས་ཡེ་ཤེས་རྩལ་འབྱིན་ཡང་། །མ་རུངས་པ་ལ་དུག་ཆར་འབེབས། །བརྩེ་བས་འགྲོ་ལ་རབ་དགོངས་ནས། །རྫུ་འཕྲུལ་ཤུགས་ཀྱིས་དྲག་པོར་སྤྲུལ། །འདུས་པའི་འཁོར་གྱི་གཙོ་མཆོག་གིས། །ཉིད་ཀྱི་རྫུ་འཕྲུལ་རྩལ་བཤིག་ནས། །བཅོམ་ལྡན་འདས་ལ་འདི་སྐད་གསོལ། །སྤྱི༷༷འབར་བའི་ཀློང་ནས་སྐུར་བཞེངས་པ། །ཡང་དག་དོན་ལྡན་བཅོམ་ལྡན་འདས། །སྤྲུལ་པ་ཕྱོགས་བཅུར་འགྱེད་པ་པོ། །བརྩེ་བས་བདག་ལ་དེང་འདིར་དགོངས། །གདུལ་བྱ་རེངས་པར་གྱུར་ནས་ནི། །མ་དག་ལོག་པའི་ལམ་ཞུགས་པའི། །ལུས་ངག་ཡིད་སྤྱོད་མ་རུངས་པ། །སྡང་ཞིང་གནོད་གདུག་རྩལ་ཕྱུང་ནས། །ཡོངས་ལ་འཚེ་བར་བྱེད་པ་རྣམས། །དེ་དག་འདུལ་བར་བྱེད་པའི་ཐབས། །དྲག་པོའི་ཤུགས་ཀྱིས་སྩལ་དུ་གསོལ། །བྱམས་པར་གྱུར་པའི་ཐུགས་མངའ་ཞིང་། །ཞི་བའི་ངང་ལས་མ་གཡོས་ཀྱང་། །ཐབས་ཀྱིས་གདུག་པ་འདུལ་སླད་དུ། །རབ་ཏུ་ཁྲོས་པའི་ཤུགས་ཕྱུང་ནས། །དྲག་རྦད་ལས་རྣམས་སྩལ་དུ་གསོལ། །ཞེས་སོགས་མྱུར་དུ་ཞུས་པའི་ཚེ། །བཅོམ་ལྡན་རྔམ་པའི་སྟངས་སྟབས་ཀྱིས། །ཕྱོགས་བཅུར་གཟིགས་ཤིང་གཟི་བརྗིད་ཀྱིས། །སྣང་སྲིད་མ་ལུས་རབ་ཏུ་གཡོས། །མ་རུངས་ཆོ་འཕྲུལ་བཀྱེས་ནས་ནི། །ལྗགས་ཟོར་རྔམ་པས་བཀའ་སྩལ་པ། །ཉོན་ཅིག་སྤྲུལ་པ་དབང་ཆེན་དཔལ། །གདུལ་བྱ་མ་རུངས་འདུལ་བའི་ལས། །ཐབས་ཀྱི་རྒྱལ་པོར་ངས་བཤད་ཀྱི། །ཐོག་མར་བརྣག་པའི་འདུན་པས་ཉོན། །བར་དུ་རབ་ཏུ་ཁྲོས་པས་ཉོན། །ཐ་མར་དྲག་ཤུལ་སྤྱོད་པས་ཉོན། །སྔོན་འགྲོ་དངོས་གཞི་རྗེས་རིམ་བཞིན། །གཏན་ལ་གང་ཕེབས་བརྣག་པར་བྱོས། །ལོག་པའི་ལམ་ཞུགས་གདུལ་བྱ་རྣམས། །ཐབས་ཀྱིས་འདུལ་བར་བྱ་བ་དང་། །བདུད་དང་དུ་ཏྲ་ལ་སོགས་པ། །ལམ་གྱི་འགལ་རྐྱེན་བྱེད་པའི་བགེགས། །དགྲ་སོགས་འཇོམས་པའི་ལས་རྣམས་ཀྱང་། །དྲག་ཤུལ་ལྡན་པས་ཡང་དག་བརྩམ། །འབར་ཞིང་རབ་ཏུ་རྔམ་པ་ཡིས། །ལེགས་བརྗོད་ལས་དང་ལས་ཀྱི་རིགས། །རབ་ཏུ་གསལ་དོན་ཡང་དག་བརྗོད། །བླ་མ་ཡི་དམ་མཁའ་འགྲོ་ཐམས་ཅད་ཀྱི་ཕྲིན་ལས་ཀྱི་རྒྱུད་སྤུ་གྲི་རེག་གཅོད་ལས། གླེང་གཞིའི་ལེའུ་སྟེ་དང་པོའོ།། ྅། །།དགྲ་བགེགས་ལོག་འདྲེན་འཇོམས་པའི་ལས། །སྔོན་དུ་འགྲོ་བའི་རིམ་པ་རྣམས། །བཅོམ་ལྡན་འདས་ཀྱིས་བཀའ་སྩལ་པ། །གནས་དང་དུས་དང་གང་ཟག་དང་། །དམིགས་བྱ་གང་ཡིན་ངོས་བཟུང་དང་། །དམིགས་བྱའི་དུ་པ་བྱ་བ་དང་། །ཐུན་རྫས་དང་ནི་བཅས་ཀ་སྟེ། །དྲག་སྔགས་བསྒྲུབ་པར་བྱེད་པའི་གནས། །སྤྱི་དང་བྱེ་བྲག་ཁྱད་པར་གསུམ། །སྤྱིར་ནི་རབ་འཇིགས་དུར་ཁྲོད་གནས། །ངམ་ནག་སྐྱི་གཡའ་ཧོམ་ཁུང་འདྲ། །ཆུ་རོང་བྲག་འདབ་འདྲེ་སྲིན་འཁྲུགས། །བྱ་གཅན་རྔམ་པ་མ་རུངས་རྒྱུ། །གནམ་ས་གྲུ་གསུམ་ངམ་ནག་ཅིང་། །དུག་དང་དུག་ཤིང་མང་པོ་སྐྱེས། །སྟེང་ནས་ལྷུང་ལ་ཁད་འདྲ་དང་། །འོག་ནས་གྱེན་དུ་གཟེངས་པ་འདྲ། །ས་རྡོ་རི་བྲག་ཁྲོས་འདྲའི་གནས། །བྱེ་བྲག་གནས་ནི་བསམ་མི་ཁྱབ། །ཡེ་ཤེས་ལྷ་ཡི་དྲག་སྔགས་གནས། །སྤྱི་བོའི་ཁྲོད་དུ་མ་ཡིན་ཞིང་། །རབ་ཏུ་དབེན་ལ་བག་ཕེབས་པ བས་མཐའ་ཡངས་པའི་ས་ཕྱོགས་སོ། །འཇིག་རྟེན་པ་ཡི་དྲག་སྔགས་གནས། །དུར་ཁྲོད་ལ་སོགས་འདྲེ་སྲིན་རྒྱུ། །རབ་གནས་མ་བྱས་ས་ཕྱོགས་ཏེ། །ངང་གིས་འཇིགས་པའི་གནས་སུ་བསྒྲུབ། །གཞན་ཡང་བྱེ་བྲག་སོ་སོའི་གནས། །གང་ལ་གང་རིགས་གནས་སུའོ། །ཁྱད་པར་དྲག་སྔགས་བསྒྲུབ་པའི་གནས། །རབ་ནི་ས་དོང་མུན་པ་སྟེ། །རིམ་པ་བདུན་གྱི་ས་འོག་ན། །ལས་ཀྱི་གཤིན་རྗེ་གནས་པའི་ཕྱིར། །སྟོངས་གྲོགས་མཐུ་དཔུང་བྱེད་པའོ། །འབྲིང་ནི་ས་ཁེབས་བྲག་ཕུག་སྟོང་། །ངམ་ནག་མུན་པ་རབ་ཏུ་འཁྲིགས། །དྲེགས་པ་སྡེ་བརྒྱད་གནས་པ་སྟེ། །བྱང་ཕྱོགས་ཁ་བལྟའི་ཕུག་པ་ཤིས། །ལས་རྣམས་མྱུར་དུ་འགྲུབ་པར་འགྱུར། །སྐུ་གསུང་ཐུགས་རྟེན་མི་བཞུགས་གནས། །ཡང་ན་རབ་ཏུ་གནས་ཞིག་ཅིང་། །འབྱུང་པོས་བདག་བྱས་གཙུག་ལག་ཁང་། །མདོར་ན་འཇིག་རྟེན་དྲེགས་པའི་ཚོགས། །རྒྱུ་ཞིང་གནས་པའི་སར་བསྒྲུབས་པས། །གཅིག་རྒྱབ་་གཅིག་གིས་བྱས་པ་ཡི། །གང་དང་གང་གིས་ལས་བྱས་པའི། །དེ་དང་དེ་དག་མྱུར་དུ་འགྲུབ། །ཐོགས་པ་མེད་པའི་མཐུ་ཐོབ་འགྱུར། །དེ་བཞིན་དྲག་སྔགས་བསྒྲུབ་པའི་དུས། །དུས་གཟའ་དྲག་པོ་རྒྱུ་བ་སྟེ། །ཕུང་གསུམ་བདུད་ཀྱི་ཉི་མ་དང་། །དྲེགས་པ་སྟོབས་ལྡན་རྒྱུ་བའི་དུས། །གཟའ་དང་སྐར་མ་རྩུབ་ལ་སོགས། །གང་དང་གང་གི་རིགས་རྣམས་ལ། །དེ་དང་དེ་ཡི་རིགས་བསྟུན་ནས། །ནམ་ཕྱེད་སྲོད་དང་མུན་པ་འཁྲིགས། །དུས་དེར་དྲག་པོའི་བསྙེན་སྒྲུབ་དང་། །ལས་ལ་སྦྱར་བ་རབ་ཏུ་ཤིས། །ཟླ་བ་མར་གྱི་ངོ་དག་ལ། །ལས་མཐའ་མནན་བསྲེག་ཟོར་ལས་བྱ། །ཡང་ནི་སྔགས་པའི་རྒྱུད་འཁྲུགས་ནས། །རྔམ་ཞིང་ངར་དང་ལྡན་པའི་དུས། །སྐད་ཅིག་ཉིད་དེར་ལས་སྦྱོར་བརྩམ། །གནམ་ལྕགས་ཐོག་དང་མཚུངས་པ་སྟེ། །ལས་གང་ཐོགས་པ་མེད་པར་འགྲུབ། །རབ་ཏུ་གཡོ་བའི་དུས་དང་ནི། །ཕྱི་ནང་འབྱུང་བ་འཁྲུགས་པ་དང་། །ཉི་ཟླ་སྒྲ་གཅན་འཛོམ་པའི་ཚེ། །མངོན་སྦྱོད་དྲག་པོའི་ལས་ལ་འཇུག །དེས་ནི་ལས་རྣམས་མྱུར་འགྲུབ་འགྱུར། །མངོན་སྤྱོད་བསྒྲུབ་པའི་གང་ཟག་ནི། །སེམས་རྒྱུད་རབ་ཏུ་ག་་པ་ལས། །བློ་སྟོབས་ཆེ་ཞིང་ཞུམ་པ་མེད། །ལུས་རྔམ་ཁྲོ་བོ་ཁྲོས་པ་འདྲ། །མིག་རྩ་དམར་ལ་སྐྲ་ལོ་གཟིང་། །སྤྱོད་ལམ་ཐུག་ཐུབ་རབ་ཏུ་ཆེ། །ངག་ཉུང་བཟླས་བརྗོད་སྔགས་ལ་བརྩོན། །ཤ་ཁྲག་དམར་ལ་རབ་ཏུ་དད། །དྲག་པོའི་༄༅ ལས་ལ་རབ་ཏུ་བརྩོན། །རྒྱུད་རྩུབ་ཁྲོ་གཏུམ་རབ་ཏུ་ཆེ། །ཞེ་ནག་འཛིན་ཤེས་གཏོང་མི་ཤེས། །བསྟན་ལ་བརྩེ་ཞིང་སྤྱི་སེམས་ཆེ། །བྱ་བ་གང་ཡང་མཐར་འབྱུང་བྱེད། །བརྩོན་འགྲུས་ལྡན་ཞིང་སྙིང་རུས་ཅན། །གར་ཡང་ཐོགས་མེད་འཇུག་པ་ཡི། །གང་ཟག་དེ་འདྲས་བསྒྲུབ་པ་ན། །མྱུར་འགྲུབ་དགྲ་བགེགས་ཐུལ་བར་འགྱུར། །དེ་ལས་ལོག་པའི་གང་ཟག་རིགས། །འཇམ་ལ་ཞི་དུལ་ལྡན་པ་ཡི། །བློ་སྣ་ཐུང་བའི་རིགས་ཅན་གྱིས། །བསྒྲུབས་ཀྱང་འགྲུབ་པར་མི་འགྱུར་རོ། །དམིགས་བྱ་ངོས་བཟུང་རྣམ་པ་གཉིས། །དགྲ་དང་བགེགས་ཏེ་དགྲ་བོ་ནི། །སྤྱི་དང་བྱེ་བྲག་རྣམ་པ་གཉིས། །སྤྱིར་ནི་སངས་རྒྱས་བསྟན་པ་ལ། །གནག་པའི་སེམས་འཆང་གདུབ་རྩུབ་ཅན། །དགེ་འདུན་སྤྱི་དགྲ་བྱེད་པ་དང་། །དཀོན་མཆོག་སྡེ་པའི་ནོར་རྣམས་འཇོམས། །དཀོར་ཆ་འཇོམས་ཤིང་དབེན་གནས་བཤིག །བྱང་ཆུབ་སེམས་དཔའི་ཐུགས་དཀྲུག་ཅིང་། །བསམ་གཏན་བསྒོམ་པའི་གེགས་བྱེད་པ། །བླ་མ་དམ་པའི་སྐུ་ལ་བསྡོས། །སེམས་ཅན་ཡོངས་ལ་འཚེ་བ་བྱེད། །རྟག་ཏུ་སྡིག་པའི་ལས་ལ་སྤྱོད། །དགེ་འདུན་དབྱེན་བྱེད་གནག་སེམས་བྱེད། །དཀོན་མཆོག་གསུམ་ལ་རྒྱབ་ཀྱིས་ཕྱོགས། །མདོར་ན་སངས་རྒྱ་བསྟན་པ་ཡི། །སྤྱི་དགྲ་བྱེད་ཅིང་འགྲོ་ལ་འཚེ། །དམིགས་བྱ་དེ་འདྲ་བསྒྲལ་བའི་ཡུལ། །བྱེ་བྲག་རང་ཉིད་མ་ཉེས་པར། །དོ་བསྡོ་ཕོད་བཙུག་བརྙས་པ་འཆང་། །རྐུན་སྣ་གཏད་ཅིང་ཇག་འདྲལ་བྱེད། །བརྡུང་བཙོག་འཕྲོག་བཅོམ་རྩུབ་འཁྲུག་སྟོན། །ལེན་ཉེས་མེད་པར་ཞེ་གཅོད་ཅིང་། །སྐུ་ལ་བསྡོ་ཞིང་རིགས་ལ་བསྙེགས། །གནག་པའི་མཐིལ་འཆའ་ཟ་ལམ་གཅོད། །མདོར་ན་རང་ལ་སྡང་བྱེད་ཅིང་། །ལུས་ངག་ཡིད་སོགས་དུ་མ་ཡིས། །གནོད་ཅིང་སྡང་བར་གང་བྱེད་པའི། །རྣལ་འབྱོར་སྒོས་དགྲ་ཡིན་པའི་ཕྱིར། །དེ་དག་མྱུར་དུ་བསྒྲལ་བའི་ཡུལ། །རང་གིས་མ་ཉེས་གཞན་གྱིས་བཙུག །དེ་དག་བསྒྲལ་བའི་ཡུལ་ཡིན་ནོ། །བགེགས་ནི་ལས་ཀྱི་མནར་བ་ཡི། །ལུས་སེམས་མ་རུངས་འབྱུང་པོའི་རིགས། །ངང་གིས་གཞན་ལ་གནོད་གྱུར་ཅིང་། །དཀར་པོ་དགེ་བའི་བར་ཆད་བྱེད། །ཚེ་ལ་རྐུ་ཞིང་སྲོག་ལ་འཇབཁ་རྗེ་དབང་ཐང་དག་ལ་གནོད། །མཐོ་རིས་ཐར་པའི་གེགས་བྱེད་ཅིང་། །འཁོར་བ་ངན་སོང་རྒྱུ་སོགས་པའི། །བདུད་དང་བདུད་ཀྱི་རིས་ཀྱི་ལྷ། །སྐབས་ཚོལ་གླགས་ལྟ་ལུས་སྲོག་འཇོམས། །བསྒྲུབ་ལ་བར་ཆད་སྣ་ཚོགས་བྱེད། །འདྲེ་བདུད་འབྱུང་པོ་གང་དང་གང་། །དགེ་བའི་ལས་དང་བསམ་པ་ལ། །བར་ཆད་བྱེད་པ་གང་ཡིན་པ། །མི་མིན་དེ་དག་བསྒྲལ་བའི་ཡུལ། །དེ་ལྟར་དམིགས་བྱ་ངོས་ཟིན་ནས། །དགྲ་བགེགས་རྭ་པ་བྱ་བ་ནི། །འབུར་དུ་དོད་དང་རིས་སུ་བྲིས། །མིང་བྱང་དག་ལ་གདགས་པའོ། །དང་པོ་འབུརདུབཏོདཔནི། །སོསོའིཟག་རྫས་རྗེས་ས་དང་། །དུར་ཁྲོད་དག་གི་ས་དང་ནི། །ཕུང་ཤུལ་འདྲེ་གནས་དག་གི་ས། །དུག་ཁྲག་རོ་སོལ་དུར་ཐལ་དང་། །དམེ་བ་རབས་ཆད་མཛེ་པོ་ཡི། །བསྡད་ཤུལ་འགྲིམ་ལམ་ཁང་ས་སྟེ། །མདོར་ན་ཤིན་ཏུ་བཀྲ་མི་ཤིས། །ངན་པ་ལས་བྱུང་རྫས་རྣམས་ལས། ཁམ་ས་གནག་ལྕི་བག་ཕྱེ་དང་། །འབྲུ་ནག་ཕྱེ་དང་དུར་ཐལ་དང་། །རང་རང་ལས་ཀྱི་ས་སྣ་སོགས། །གང་དང་གང་ལས་བྱུང་བ་ཡི། །དུ་པ་ཆེ་ཚད་ལུས་དང་མཉམ། །འབྲིང་པོ་དམིགས་བྱའི་ཁྲུ་གང་སྟེ། །ཐ་མ་དེ་ཡི་མཐོ་གང་ཚད། །གཟུགས་དང་དབང་པོ་སྐྱེ་མཆེད་དོད། །རིད་ལ་ཉམ་ཐག་སྟོབས་དང་བྲལ། །ཡི་མུག་ངུ་བའི་རྣམ་འགྱུར་ཅན། །ཡན་ལག་རེངས་སམ་འཁུམས་པའི་གཟུགས། ཁྲ་་།ར་རུས་པའི་མཁྲིག་མ་ཞིག །བགེགས་ལ་ཡི་དྭགས་རྣམ་པ་ཅན། །གསུས་པ་ཆེ་ལ་ཡན་ལག་རིད། །མཇིང་པ་ཕྲ་ཞིང་མགོ་བོ་རྒྱས། །མིག་ནི་གྱེན་ལ་ཨ་འབྲས་ལོག ཁ་བགྲད་ལྕེ་བརྐྱངས་མ་ནེ་འཕྱང་། །ཕོ་མོ་གང་ཡིན་དབང་པོ་དོད། །གང་ཡང་ལུས་ཀྱི་ཆ་ཚང་བར། །འོས་པའི་ཚོན་གྱིས་མདོག་བསྒྱུར་ཞིང་། །རྣམ་ཤེས་ཆགས་པའི་གཏའ་ཡིན་པས། །གཟུགས་དང་སྐྱེ་མཆེད་དོད་པར་བྱ། །རིས་སུ་བྲིས་པའི་ལིསྐོ་ནི། །གཞི་མ་རོ་རས་དུག་་་ག་དང་། །ལ་ལ་ཞིང་ལྤགས་དག་ལ་སྟེ། །གང་ཡིན་ཆེ་ཚད་མདའ་གང་ལ། །འབྲིང་པོ་ཁྲུ་གང་ཐ་མ་ཡང་། །མཐོ་གང་སོར་བཞི་དག་ལ་བྲི། །སྣག་ཚ་ཕལ་ཆེར་དུག་ཁྲག་སྟེ། །རང་རང་གང་རིགས་རྫས་ཀྱིས་བྲི། །དེ་ཡང་སྐྱེ་མཆེད་དོད་པ་ལ། །དབང་པོ་ཚང་ཞིང་ཡན་ལག་རྫོགས། ཁ་མིག་བགྲད་ཅིང་སྐྲ་ལོ་གཟིང་། །རྐང་ལག་ལྕགས་སྒྲོག་བྱད་དུ་གཞུག །རང་ལ་རང་གཤེད་བྱེད་པའི་ཚུལ། །དེ་ལྟར་བྲིས་དང་ལ་ལ་ནི། །དམིགས་བྱའི་འདྲ་འབག་གཟུགས་སུ་བམོད། །དེ་ངང་དེ་ལྟར་བྱེ་བྲག་རྣམས། །རྣམ་རིག་ཤེས་རབ་ཅན་དག་གིས། །གང་ལ་གང་འོས་བཀོད་པར་བྱ། །དེ་ལྟར་བྲིས་པའི་སྙིང་ག་སྲ །དགྲ་ལ་དྲི་དང་བགེགས་ལ་ཏྲི། །ཐ་མར་རང་རང་མིང་རུས་དང་། །ཛ༷༷ཧུ༷་བ༷་ཧོ་༷། མ་ར་ཡ་ཁུག་ཛ། ཡིག་མགོ་ནང་དུ་བསྟན་པ་བྲི། །དཔྲལ་བར་རུས་བྲི་ཁ་ལ་ནི། །དུང་དུང་ཛ་ཛ་བྲི་བར་བྱ། །བརླ་ལ་བླ་དགས་བྲི་བར་བྱ། །བྱིན་པ་གཉིས་ལ་དྲི་ཏྲི་བྲི། འདོམས་ལ་ཕཊ་དང་རྐང་ཞབས་ཡི། །ཡན་ལག་ཛ༷༷ཧུ༷་བ༷་ཧོ༷༷བཀོད། །སྤྱི་བོར་མྱ་ར་ཡ་ནན་བྲི། །གཡས་སུ་ཕ་རྒྱུད་རྩད་ཆོད་དང་། །གཡོན་དུ་མ་རྒྱུད་མངལ་ནས་སྐོམས། །མདུན་ནམ་ལྟོ་བར་སྲིད་པ་དཀྲུག །ཅེས་སོགས་དམོད་མོ་གང་ཤེས་བྲི། །ཐ་མར་ལས་སྔགས་གང་འོས་བཀོད། །དེའི་མཐར་ཛ༷༷དང་ཁྲམ་རིས་དང་། །སྦལ་སྦྲུལ་སྡིག་པ་འཛིངས་པས་བསྐོར། །ཐར་ལམ་བྲོས་ཁུང་མེད་པའི་ཚུལ། །འབྱུང་བ་འཁྲུགས་པའི་ཀློང་དུ་ཚུད། །གཞི་མ་ས་སྟེང་མེད་པ་ཅན། །རབ་ཏུ་གཏམས་པ་བྲི་བར་བྱ། །དེ་ལས་གཞན་ཡང་རང་རང་གིས། །ལས་མཐའ་དང་ནི་བསྟུན་ཏེ་བྲི། །དེ་ལྟར་བྲིས་པའི་རྭ་པ་ལ། །རང་རང་ཟག་པའི་རྫས་ཀྱིས་བྱུགས། །སྔགས་རྣམས་མི་བཀླག་རང་བབ་བཞག །མངའ་ཐང་ཉམས་པར་བྱ་བའི་ཕྱིར། །མགོ་རྟིང་བཟློག་ནས་ལྟེབ་པ་དང་། །བཞག་པའི་ལུགས་ཀྱང་དེ་བཞིན་བྱ། །དུག་ཁྲག་ལ་སོགས་རྫས་ངན་ཡང་། །གང་རིགས་ལས་ཀྱི་མཐའ་དང་བསྟུན། །མདོར་ན་བརྣག་པར་བྱེད་པ་ཡི། །དགྲ་བགེགས་དུ་པའི་ལིདྷ་ནི། །རང་གཟུགས་སྐྱེ་མཆེད་དོད་པ་ལ། །རབ་ཏུ་ཉམས་པའི་ཚུལ་ཅན་བྱ། །ཐུན་རྫས་སྐམ་རློན་རྣམ་པ་གཉིས། །སྐམ་ཐུན་རྫས་ངན་སྣ་ཚོགས་དང་། །ཀེ་ཙེ་ཤང་ཙེ་ཉུང་དཀར་དང་། །ཏིལ་དང་འབྲུ་ནག་སྣ་ཚོགས་དང་། །ཞ་ཉེ་ཟངས་ལྕགས་ཁྲོ་ཕྱེ་དང་། །རྩུབ་པའི་རྡོ་ཕྱེ་དཀར་ནག་དང་། །དུག་རིགས་སྣ་ཚོགས་འབྲས་བུ་དང་། །དུར་ཁྲོད་ལས་བྱུང་རྫས་རྣམས་དང་། །རང་རང་གཤེད་རྫས་སྣ་ཚོགས་སོ། །རློན་ཐུན་ཁྲག་ལ་གཞི་བླངས་པའི། །སྣ་ཚོགས་དུག་གི་ཁུ་བ་དང་། །ཡུགས་སའི་མངལ་ཁྲག་མཛོ་དྲེལ་ཆུ། །མཛ་ཕོའི་ཁྲག་རྣམས་གང་རྙེད་དང་། །མཚོ་ལྐུགས་ཆུ་མིག་ལྐུགས་པའི་ཆུ། །རབས་ཆད་ཕོ་མོའི་མཆིལ་སྣབས་དང་། །ལྐུགས་པའི་དྲི་ཆེན་དྲི་ཆུ་དང་། །དེ་སོགས་རྫས་ངན་སྣ་ཚོགས་པ། །ཕྱེ་མ་རིལ་བུ་སྤངས་པ་ལ། །དྲི་ངན་རབ་ཏུ་བཀུ་བ་ཅན། ་གོན་ཏུ་གདུག་པར་བྱས་པའོ། །དེ་ནས་བཅའ་གའི་རིམ་པ་ནི། ་གོན་ཏུ་ནག་པའི་གནས་ཁང་དུ། །བྱང་དུ་ཁ་བལྟས་བྲུབ་དོང་བཅས། །དུར་ཁྲོད་ལ་སོགས་ས་རྫས་ཀྱིས། །སྟེགས་བུ་མདའ་གང་གྲུ་བཞིའམ། །འདོམ་གང་གྲུ་བཞི་ལ་སོགས་པའི། །རིགས་དང་རིགས་ལས་བྱུང་བ་བྱ། །དཔངས་སུ་ཁྲུ་གང་བྱས་པ་ལ། །དབུས་སུ་བྲུབ་དོང་གྲུ་གསུམ་བྱ། །ཡངས་དོག་ཐོད་པ་ཁ་སྦྱོར་ཤོང་། །དེ་ལས་གཞན་ཡང་གང་རིགས་བྱ། །ཕྱི་ནང་མེད་པར་དུག་ཁྲག་དང་། །དུར་ཐལ་རོ་སོལ་དག་གིས་བྱུགས། །རྫས་ངན་རྣམ་པ་དུ་མ་ཡིས། །དཀྱིལ་འཁོར་བྲུབ་དང་ཁྱབ་པར་བྱུགས། ཁ་བད་བང་རིམ་ལྕགས་རི་སོགས། །ཐ་མ་དྲག་པོའི་རྩང་གིས་བསྐོར། །རིགས་དང་རིགས་མཐུན་ལྡན་པའོ། །མཁས་པས་གང་ལ་གང་རིགས་བྱ། །མདོར་ན་འཇིགས་ལ་རྔམ་པ་ཅན། །ལས་ཀྱི་གཤིན་རྗེའི་ཕོ་བྲང་ལྟར། །ཞིང་ལྤགས་མི་མགོའི་དྲ་ཕྱེད་དང་། །རྒྱུ་མའི་ལྡ་ལྡི་རོ་རས་ཀྱི། །འཕན་གདུགས་ལ་སོགས་དུར་ཁྲོད་ཀྱི། །ཕོ་བྲང་རབ་ཏུ་འཇིགས་པར་བྱ། །དེ་ལས་གཞན་ཡང་བཅས་ཀྱི་རིགས། །གང་ལ་གང་དང་དེ་ལ་དེའི། །བྱེ་བྲག་རྣམ་པ་མང་པོ་དག །མཁས་པ་རྣམས་ཀྱིས་དཔྱད་དེ་བྱ། ཁྲོ་རྒྱལ་གཏུམ་པོའི་ཕོ་བྲང་ལས། །དྲེགས་པ་སྡེ་བརྒྱད་འདུ་བའི་གནས། །འདྲེ་སྲིན་འབྱུང་པོ་འཚོགས་པའི་ས། །དྲག་པོ་ལས་ཀྱི་ཧོམ་ཡིན་པས། །འཇིགས་ལ་ཡ་ངའི་ཚུལ་ཅན་བྱ། །དེ་ལྟར་བྱས་པའི་ཧོམ་ཁུང་དུ། །དགྲ་བགེགས་དམིགས་བྱའི་རྭ་པ་གཞུག །ཐོད་པ་ཁ་སྦྱོར་ལ་སོགས་པའི། །ལིང་སྣོད་རྫས་ངན་གང་རིགས་ཀྱི། །ནང་དུ་གཞུག་པར་བྱེད་པའོ། །མིང་བྱང་དག་ལ་འདི་ལྟར་གདབ། །དྲག་པོ་དག་ནི་དུག་རིགས་ཀྱི། །ཤིང་ལས་བྱས་པའི་བྱང་བུ་ལ། །དུག་ཁྲག་རྫས་ངན་སྣ་ཚོགས་ཀྱིས། །དགྲ་བོའི་མིང་རུས་མཁན་གསུམ་བཀོད། །སྒོ་ཁྱི་ཡུལ་འབྲོག་ས་ཞིང་དང་། །བང་མཁར་མི་ནོར་འཁོར་བཅས་ཀྱི། །ནོར་འཁྲུལ་མེད་པའི་མིང་བཀོད་དེ། །བྲུབ་དོང་ཕྱི་ནང་བར་ཁྱམས་སུ། །རྣམ་པ་མང་དུ་བྱས་ལ་བཀོད། །གཟུགས་དང་བཀྲམ་པ་གང་རིགས་བྱ། །དེ་ནས་སྣང་སྲིད་ལྷ་འདྲེ་ལ། །གཏོར་མ་གསེར་སྐྱེམས་བཏང་ནས་ཀྱང་། །བཀའ་བསྒོ་བདེན་སྟོབས་དྲག་ཏུ་བརྗོད། །ཡེ་ཤེས་ལྷ་ལ་མཁྱེན་གསོལ་བྱ། །འཇིག་རྟེན་ལྷ་ལ་ཉེས་པ་བསྒྲག །རང་གིས་མ་ཉེས་བདེན་པ་བརྗོད། ཁོ་ཡིས་ཉེས་པ་ཕྲ་མ་གཞུག །རང་ཉིད་ལྷ་ཡི་ང་རྒྱལ་བསྐྱེད། །བལྟ་བ་གནད་དུ་ཚུད་པ་དང་། །ཡེ་ཤེས་ལྷ་ཡི་སྔགས་ཚད་བགྲང་། །རང་རང་གཉེན་པོ་སྟོབས་ཀྱི་ལྷ། །གང་ལ་གང་རིགས་ལྡན་པ་གཅེས། །བླ་མ་ཡི་དམ་མཁའ་འགྲོ་ཐམས་ཅད་ཀྱི་ཕྲིན་ལས་ཀྱི་རྒྱུད་སྤུ་གྲི་རེག་གཅོད་ལས། སྔོན་དུ་འགྲོ་བའི་ལས་རིམ་བསྟན་པའི་ལེའུ་སྟེ་གཉིས་པའོ།། སྙི། །།བཅོམ་ལྡན་དཔག་མེད་ཧེ་རུ་ཀས། །དབང་ཆེན་འབར་བ་ལ་སོགས་པའི། །དྲག་པོ་འདུས་པའི་འཁོར་རྣམས་ལ། །དྲག་སྔགས་དངོས་གཞིའི་ལས་གསུངས་པ། །བསྙེན་དང་སྒྲུབ་པ་ལས་སྦྱོར་ཏེ། །བསྙེན་པ་ལ་ཡང་རྣམ་པ་གཉིས། །ཡེ་ཤེས་ལྷ་ཡི་བསྙེན་པ་དང་། །འཇིག་རྟེན་དྲེགས་པའི་བསྙེན་པའོ། །ཡེ་ཤེས་ལྷ་ཡི་བསྙེན་པ་ལ། །དཀྱིལ་འཁོར་རྣམ་པ་གསུམ་ལྡན་པའི། །གྲངས་རྟགས་དུས་ཚད་གཏན་ལ་དབབ། །འཇིག་རྟེན་དྲེགས་པའི་བསྙེན་པ་ལ། །བདག་ཉིད་ལྷ་ཡི་ང་རྒྱལ་གྱིས། །གནད་ལ་དབབ་པའི་ཚུལ་གྱིས་ནི། །ལྷ་སྲིན་དྲེགས་པ་གང་ཡིན་པ། །སྲོག་སྔགས་གཡེལ་མེད་མྱུར་དུ་འབད། །མངོན་སུམ་རྟགས་ཀྱིས་གཏན་ལ་དབབ། །རྣལ་འབྱོར་གཡོ་མེད་ངང་དུ་བཞག །དེ་སོགས་བསྙེན་པའི་རིམ་པ་རྣམས། །གོང་གནོན་ཡིན་པས་ཚགས་སུ་གཞུག །དེ་ནས་སྒྲུབ་པ་བྱེད་པ་ནི། །དང་པོ་འབོད་པའི་བསྒྲུབ་པ་དང་། །བར་དུ་རྦད་པའི་བསྒྲུབ་པ་དང་། །ཐ་མར་བསད་པའི་ལས་རིམ་སྟེ། །སྤྱི་དྲིལ་རྣམས་ལ་ངེས་པ་མེད། །མན་ངག་རང་རང་གཞུད་དུ་བྱ། །དང་པོ་འབོད་པ་རྣམ་པ་གཉིས། །ཏིང་འཛིན་སྔགས་དང་རྫས་བཅས་ལ། །བརྟེན་ནས་ཡེ་ཤེས་ལྷ་འབོད་བསྒྲུབ། །གྲུབ་ནས་གང་འདོད་ཕྲིན་ལས་སྦྱར། །དམིགས་རྟེན་རྫས་དང་དཀྱིལ་འཁོར་དང་། །སྐོང་རྫས་གཏོར་ཚོགས་རང་རང་གི །དགྱེས་པའི་རྫས་དང་དམིགས་པ་དང་། །དྲག་པོའི་སྔགས་ཀྱི་རིམ་པ་ལ། །བརྟེན་ནས་འཇིག་རྟེན་ལྷ་འདྲེ་འབོད། །བདག་བསྐྱེད་ཡེ་ཤེས་ལྷ་གསལ་གདབ། །ཆེ་བའི་ང་རྒྱལ་དྲག་ཏུ་བསྐྱེད། །འཇིག་རྟེན་ལྷ་འདྲེ་མདུན་དུ་དམིགས། །བྲན་དང་བཀའ་ཉན་ཚུལ་དུ་བྱ། །མདོར་ན་རྗེ་དང་འབངས་ཀྱི་ཚུལ། །དེ་ལྟ་བུ་ཡི་ཚུལ་དུ་འབོད། །རྦད་དང་བསད་པའི་བསྒྲུབ་པ་ནི། །ཟུང་འཇུག་ཡིན་པས་འདི་ལྟ་སྟེ། །དམིགས་བྱ་བསྐྱེད་དང་དགུག་པ་དང་། །ལྷ་དབྱེ་སྲོག་དང་ཕྲལ་བ་དང་། །གཟུགས་ལ་དབབ་དང་བྱད་དུ་གཞུག །ཐུན་གྱིས་བྲབ་དང་སྲོག་འཕྲོག་ལས། །གཟུགས་ཕུང་ལྷ་ལ་དབུལ་བ་དང་། །རྣམ་ཤེས་སྤར་དང་ཚེ་ལུང་དང་།ཁྲུས་ལུང་དག་གིས་ལས་ལ་སྦྱར། །དང་པོ་དམིགས་བྱ་བསྐྱེད་པ་ནི། །བདག་ཉིད་ལྷ་ཡི་ང་རྒྱལ་གྱིས། །མདུན་དུ་ལས་ཀྱི་གཤིན་རྗེ་ཡི། །ཕོ་བྲང་དྲག་ཤུལ་འཇིགས་པའི་གནས། །གཏི་མུག་མུན་པ་ནག་པོའི་ནང་། །ཞེ་སྡང་རླུད་ནག་འཅོ་པའི་དཀྱིལ། །འདོད་ཆགས་མེ་དཔུང་འབར་བའི་དབུས། །ལས་ཀྱི་བཤན་པ་རྒྱུ་བའི་ས། །ཁྲོ་རྒྱལ་དམག་དཔུང་འདུས་པ་དེར། །དམིགས་རྟེན་རྭ་པ་དེ་ཉིད་ཀྱི། །དགྲ་བགེགས་གང་ཡིན་ས་བོན་ལས། །མངོན་སུམ་ལམ་མེར་སྣང་བའི་གཟུགས། ཁེན་ཏུ་རིད་ལ་ཉམ་ཐག་པ། །ལག་པ་མྱ་ངན་ཕྱག་རྒྱ་བཅའ། །སྐྲ་གཟིང་མིག་ནས་མཆི་མ་འབབ། །སོ་གཙིགས་ལྕེ་བརྐྱངས་མ་ནེ་འཕྱང་། །ཡི་མུག་ཚུལ་དུ་གནས་པའམ། །ཡང་ན་དགྲ་བགེགས་གང་ཡིན་ཀྱང་། །རང་གཟུགས་རྣམ་འགྱུར་ཆ་ལུགས་ཅན། ཁེན་ཏུ་རྒུད་པའི་རྣམ་པར་གསལ། །དེ་ལྟར་བརྟེན་ལ་བསྐྱེད་ནས་ཀྱང་། །རྣམ་ཤེས་རྟེན་ལ་དགུག་པ་ནི། །རང་ཉིད་དབང་ཆེན་འབར་བའམ། །མོས་པའི་ཁྲོ་བོར་བསྐྱེད་བྱ་སྟེ། །ཆེ་བའི་ང་རྒྱལ་ལྡན་པའི་ངང་། །ཐུགས་ཀ་ལ་སོགས་གནས་རྣམས་ནས། །ཕོ་ཉ་སྤྲུལ་པའི་ལས་མཁན་ནི། །ལྕགས་ཀྱུ་ཞགས་པ་ལྕགས་སྒྲོག་དྲིལ། །དཔག་ཏུ་མེད་པའི་སྤྲོ་བསྡུ་ཡི། །དགྲ་བོ་ཟས་ལ་ཡེངས་པའམ། །གཉིད་ཀྱིས་ནོན་པའི་དུས་སུ་དགུག །ལག་པ་ལྕགས་ཀྱུའི་ཕྱག་རྒྱ་བཅའ། །དཀོན་མཆོག་བདེན་པའི་སྟོབས་བརྗོད་དེ། །ད་་་ས་བྱ་དགྲ་བོ་གང་ཡིན་གྱི། །རྣམ་ཤེས་ཡི་གེ་དྲོ་ཡི་ཚུལ། །རང་དབང་མེད་པར་བཀུག་ནས་ཀྱང་། །དམིགས་རྟེན་དུ་པ་དག་ལ་བསྟིམ། །གཞན་ཡང་དབང་པོ་གཟུགས་ཕུང་བཅས། །དྲག་ཏུ་བཀུག་ལ་གཟུགས་ལ་བསྟིམ། །ལུས་འདར་ངག་དངངས་སེམས་མྱོས་ནས། །མངོན་སུམ་མདུན་དུ་ཁུགས་པར་བསམ། །བགེགས་ཀྱི་ས་བོན་ཏྲི་ལས་བསྐྱེད། །དགུག་གཞུག་སྔར་དང་འདྲ་བ་ལས། ཁྱད་པར་ནམ་ཕྱེད་ཉིན་བྱེད་དགུག །རྣམ་ཤེས་ཏྲི་ཡི་རྣམ་པ་ཅན། །དམིགས་རྟེན་རང་གཟུགས་དག་ལ་བསྟིམ། །གཞན་ཡང་དགྲ་བགེགས་འགུགས་པ་ཡི། །སྦྱོར་བའི་རྣམ་གྲངས་དཔག་མེད་བྱ། །ལྷ་དབྱེ་གྲོགས་ངང་ཕྲལ་བ་ནི། །རྫས་ངར་དུད་པས་དུ་པ་བདུག །དབྱེ་བའི་ཕྱག་རྒྱ་དམོད་མོ་དང་། །སྔགས་རྣམས་བརྗོད་ཅིང་དམིགས་པ་གཏད། །ཕོ་ལྷ་དགྲ་ལྷ་མ་ལྷ་དང་། །ཞང་ལྷ་སྲོག་ལྷ་ལེའུའི་ལྷ། །ཡུལ་གྱི་རྩེ་ལྷ་ལ་སོགས་པའི། །མགོན་སྐྱབས་དཔུང་གྲོགས་བྱེད་པ་ཡི། །རྒྱབ་བརྟེན་དག་དང་ཕྲལ་བར་བྱ། །གྲོགས་མེད་རྟེན་དང་བྲལ་ནས་ཀྱང་། །མགོན་སྐྱབས་དཔུང་རོགས་མེད་པར་བསམ། །དེ་ནས་གཟུགས་ལ་དབབ་པ་ནི། །ལུས་ལ་ལུས་དང་ངག་ལ་ངག །རྣམ་པར་ཤེས་པ་རྟེན་ལ་བསྟིམ། །དེ་ཡང་བྱེ་མ་ཚན་མོ་ལ། །མར་ཐིམ་ལྟ་བུར་གྱུར་ནས་ཀྱང་། །ལུས་ངག་ཡིད་གསུམ་གཅིག་ཏུ་འདྲེས། །དེ་ཡང་ལུས་ངག་ཡིད་གསུམ་པོ། །རྣམ་པར་ཉམས་ནས་རབ་ཏུ་མྱོས། །བཀྲག་དང་གཟི་མདངས་ཡལ་ནས་ནི། །སྔོ་ལ་ཧམ་པ་ཐལ་བའི་མདོག །དབང་པོའི་སྟོབས་བཅུད་ཉམས་པར་དམིགས། །དེ་ནས་བྱད་དུ་བཅུག་པ་ནི། །དབང་པོ་ཡན་ལག་བྱད་དུ་གཞུག །རྣམ་ཤེས་གྲུ་གུ་ལྟ་བུར་བསྒྲིལ། །ཕྱག་རྒྱས་ཡན་ལག་བཀྱིག་པ་དང་། །འཁྱོག་འགུལ་མེད་པར་བསྡམ་པའི་ཚུལ། །ཚོན་སྐུད་སྣ་ལྔ་ལ་སོགས་པ། །བྱད་ཐག་རྣམས་ཀྱིས་རྭ་པ་དེ། །འགུལ་དབང་མེད་པའི་ཚུལ་གྱིས་ནི། །རྒྱ་གྲམ་སྐོར་བུ་རིས་སུ་བསྡམ། །སྟོབས་དང་གཟི་མདངས་ཉམས་ནས་ནི། །མཁའ་ལྡིང་གདོས་ཀྱི་ནོན་པ་ལྟར། །གཡོ་འགུལ་མེད་པར་གྱུར་བསམ་མོ། །དེ་ནས་ཐུན་གྱིས་བྲབ་བྱ་སྟེ། །སྐམ་ཐུན་རློན་ཐུན་གང་ཡིན་ཀྱང་། །བསད་སྔགས་ལས་ཀྱིས་ངར་བླུད་དེ། །ཐུན་རྣམས་སྤྲུལ་པ་ལས་ཀྱི་མཚོན། །གནམ་ལྕགས་འབར་བའི་ཐོག་ཆེན་དང་། །དུག་དང་ནད་ཀྱི་སྐྱི་འདང་ཆར། །རྣོ་ངར་ལྡན་པའི་མཚོན་ཆར་དམིགས། །རིག་པའི་ངར་བསྐྱེད་ཏིང་འཛིན་བསར། །ལས་སྔགས་དྲག་པོ་འབྲུག་ལྟར་བཟླས། །ཐུན་ཆར་དྲག་པོ་ཐོག་ལྷར་དབབ། །ཏིང་འཛིན་མྱུར་མགྱོགས་གློག་ལྟར་བསྐུལ། །དམོད་མོ་ངན་པ་མདའ་ལྟར་འཕེན། །བརྣག་སེམས་ཞེ་སྡང་མུན་ལྟར་གཏིབས། །སྲོག་གི་ཤན་པ་རྦབ་ལྟར་བསྒྲིལ། །དུས་གསུམ་དུས་དྲུག་ཐུན་ལམ་བླངས། །དེ་ནས་ཕོ་ཉའི་དམག་དྲངས་ལ། །སྲོག་འཕྲོག་བསད་པའི་ལས་ལ་འཇུག །ཕོ་ཉ་རྦད་ཅིང་ཕྲིན་ལས་བསྐུལ། །ལས་ཀྱི་ཤན་པ་མ་རུངས་པ། །སྤྲུལ་པ་ཡང་སྤྲུལ་བཅས་རྣམས་ཀྱིས། །དམིགས་བྱ་དགྲ་བགེགས་གང་ཡིན་པ། །སྲོག་བཅད་དབུགས་འགག་ལུས་པོ་ག་ས། ཁྲ་ཟོས་ཁྲག་འཐུང་རུས་པ་བཅོམ། །ལྷག་རོལ་ཙམ་ཡང་མེད་པར་བསམ། །རུལ་མྱགས་ཐལ་བ་རྡུལ་དུ་བརླག །བསད་པ་ལས་ཀྱི་སྐྲུ་གྲིའི་ངར། །རབ་ཏུ་འབར་བའི་ལས་བྱས་བསམ། །དེ་ལྟར་རྣམ་ཤེས་རྟེན་དང་ཕྲལ། །སྲོག་དང་བྲལ་བའི་གཟུགས་ཕུང་དེ། །ཡེ་ཤེས་ལས་ལས་གྲུབ་པ་ཡི། །ལྷ་དང་སྲུང་མ་ཐམས་ཅད་ཀྱི། །ཞལ་དུ་དབུལ་ཞིང་བསྟབ་པར་བྱ། །འདོད་ཆགས་ཁྲག་ལ་ཧུབ་ཀྱིས་བཏབ། །ཞེ་སྡང་རུས་ལ་ཆེམ་གྱིས་བཟས། །གཏི་མུག་ཤ་ལ་ཧབ་ཀྱིས་རྔམ། །དུག་གསུམ་ཤ་ཁྲག་རུས་པའི་ཚོགས། །ལྷ་དང་སྲུང་མའི་ཞལ་དུ་བསྟབ། །རྡུལ་ཆ་ཕྲ་མོ་ཙམ་ཞིག་ཀྱང་། །མ་ལུས་ཞལ་དུ་ཐིམ་པར་དམིགས། །དེ་ལྟར་གཟུགས་ཕུང་ལྷ་ལ་འབུལ། །ལས་ཀྱི་ལྷག་མ་བསྡུ་བར་བྱ། །དེ་ནས་རྣམ་ཤེས་སྤར་བ་ནི། །བདག་ཉིད་ལྷ་ཡི་ཐུགས་ཀ་ནས། །ཡེ་ཤེས་སེམསདཔའཚོན གངབ། །རྒྱངས་ཀྱིས་ཐོན་ནས་དམིགས་བྱ་ཡི། །རྣམ་པར་ཤེས་པའི་ངོ་བོ་ནི། ཁབ་ལེན་རྡོ་ཡིས་ལྕགས་བླང་བཞིན། །ཡེ་ཤེས་སེམས་དཔའི་ཐུགས་ཀར་ཐིམ། །ཡེ་ཤེས་སེམས་དཔའ་རང་ཉིད་ཀྱི། །ཐུགས་ཀར་ཐིམ་ནས་གཉིས་མེད་ཀྱི། །རང་ཉིད་ཆོས་ཀྱི་དབྱིངས་སུ་གཤེགས། །ཡང་ན་ཡེ་ཤེས་སེམས་དཔའ་དེ། །དཔག་ཆེན་གནམ་མདའ་འཕང་བ་བཞིན། །ཆོས་ཀྱི་དབྱིངས་སུ་གཤེགས་པར་དམིགས། །ཚེ་ལུང་བདག་གི་ཐུགས་ཀ་ནས། །ཡི་གེ་ཨ་དཀར་འཕྲོས་པ་ཡིས། །ཁོ་ཡི་ཚེ་སྲོག་བཀུག་ནས་ཀྱང་། །རང་གི་སྙིང་གར་བསྟིམ་པ་ཡིས། །རང་གི་ཚེ་སྲོག་བསྣོན་པར་དམིགས། ཁྲུས་ལུང་རང་གི་གནས་གསུམ་ནས། །ཡི་གེ་འབྲུ་གསུམ་འཕྲོས་པ་ལས། །ཡེ་ཤེས་བདུད་རྩིའི་ཆུ་རྒྱུན་བབས། །དམིགས་བྱའི་ལུས་ངག་ཡིད་ལ་ཕོག །དེ་ཡི་ཉོན་མོངས་སྡིག་སྒྲིབ་རྣམས། །རྣམ་པར་བྱང་དེ་སྒྲིབ་བྲལ་ནས། །ཡེ་ཤེས་ཆེན་པོར་གྱུར་པར་དམིགས། །དེ་ལྟར་གནས་སྤར་ཚེ་ལུང་ཁྲུས། །སྒྲིབ་སྦྱང་ལས་སྦྱོར་གང་བྱེད་ཀྱང་། །ཡེ་ཤེས་ལྷ་ཡི་ང་རྒྱལ་བསྐྱེད། །སྙིང་རྗེ་བྱང་སེམས་རྒྱུད་ལ་བྱ། །ཡེ་ཤེས་དག་པའི་དགོངས་པས་སྤར། །སྒྲིབ་པ་དག་ནས་ལས་རྣམས་འགྲུབ། །བྱང་ཆུབ་ལམ་གྱི་གྲོགས་སུ་འགྱུར། །དེ་ལྟར་མངོན་སྤྱོད་དངོས་ཀྱི་ལས། །སྟོབས་ཆེན་རྒྱལ་པོས་བརྩམ་པ་ན། །གནོད་བྱེད་དགྲ་བགེགས་བརླག་པར་འགྱུར། །ཡང་དག་ལས་ཀྱི་མཐར་ཐུག་སྟེ། །གདུལ་བྱ་ལོག་སྲེད་གྱུར་པ་རྣམས། །བསྒྲལ་ནས་འདྲེན་པའི་ཐབས་མཆོག་གོ །བླ་མ་ཡི་དམ་མཁའ་འགྲོ་ཐམས་ཅད་ཀྱི་ཕྲིན་ལས་ཀྱི་རྒྱུད་སྐྲུ་གྲི་རེག་གཅོད་ལས། དངོས་གཞིའི་ལས་རིམ་བསྟན་པའི་ལེའུ་སྟེ་གསུམ་པའོ།། སྣྲི། །།གཟི་བརྗིད་མཐའ་ཡས་བཅོམ་ལྡན་འདས། །སྟོན་པ་དབང་མཆོག་རྒྱལ་པོ་ལ། །འདུས་པའི་འཁོར་གྱི་གཙོར་གྱུར་པ། །དབང་ཆེན་འབར་བས་ཡང་ཞུས་པ། །དྲག་པོའི་ལས་ཀྱི་མཐའ་སྡུད་རྣམས། །གདུལ་བྱའི་འཁོར་ལ་སྩལ་དུ་གསོལ། །ཞེས་པ་སྟོབས་ཀྱིས་ཞུསླ་པ་ཡིས། །སྟོན་པ་གཟི་བརྗིད་དཔལ་འབར་བས། །དྲག་པོའི་ལས་རྗེས་བཀའ་སྩལ་པ། །མ་ཡེངས་འདུས་པའི་འཁོར་རྣམས་ཉོན། །གནོད་བྱེད་དགྲ་བགེགས་བསྒྲལ་ལ་སོགས། །དྲག་སྔགས་ལས་ཀྱི་རྗེས་རྣམས་ནི། །རང་ཉིད་མ་ཉེས་དཔང་གཟུག་དང་། །ཁོ་ཡི་ཉེས་པ་བསྒྲག་པ་དང་། །བཞེས་དྲངས་ཟ་ལམ་གཏད་པ་དང་། །ཕྲིན་བརྫང་མནན་བསྲེག་འཕེན་པའོ། །རང་ཉིད་མ་ཉེས་དཔང་གཟུག་པ། །ཡེ་ཤེས་ལྷ་དང་སྲུང་མ་དང་། །སྣང་སྲིད་ལྷ་འདྲེ་རྣམས་དང་ནི། །ཡུལ་ལྷ་གཞི་བདག་ལ་སོགས་ལ། །གཏོར་མ་གསེར་སྐྱེམས་གསོལ་མཆོད་བྱ། །བདག་ཉིད་ལྷ་ཡི་ང་རྒྱལ་བསྐྱེད། །ཧོ་ཕྱོགས་བ་་རྒྱལ་བ་སྲས་བཅས་དང་། །བླ་མ་ཡི་དམ་མཁའ་འགྲོའི་ཚོགས། །དམ་ཅན་ཆོས་སྐྱོང་སྲུང་མ་དང་། །ཡེ་ཤེས་དབྱིངས་ཀྱི་ལྷ་ཚོགས་རྣམས། །བདག་ལ་གསན་ཅིང་དགོངས་སུ་གསོལ། །ལྷ་ཀླུ་གནོད་སྦྱིན་ལ་སོགས་པའི། །སྣང་ཞིང་སྲིད་པའི་ལྷ་འདྲེ་རྣམས། །འཇིག་རྟེན་༄༅ ལས་ལས་གྲུབ་པ་ཡི། །སྤྲུལ་པ་ཡང་སྤྲུལ་བཅས་པ་སྟེ། །འཇིག་རྟེན་སྲུང་མ་འཁོར་བཅས་རྣམས། །བདག་ལ་གསན་ཅིང་དགོངས་སུ་གསོལ། །ཕྱོགས་མཚམས་སྟེང་འོག་ལ་གནས་པའི། །ཡུལ་གྱི་ས་བདག་གཞི་བདག་དང་། །རྩི་ཤིང་ནགས་ཚལ་རི་བྲག་ལ། །གནས་ཤིང་རྟེན་བཅས་མི་མ་ཡིན། །སྣང་སྲིད་ལྷ་འདྲེ་མ་ལུས་རྣམས། །བདག་ལ་གསན་ཅིང་དགོངས་སུ་གསོལ། །རྒྱལ་པོ་བློན་པོ་བཙུན་མོ་སྟེ། །མགོ་ནག་སྟོང་སྡེ་སྲིད་པའི་བདག །ཕོ་མོ་འགྲོ་བ་མ་ལུས་པ། །བདག་ལ་གསན་ཅིང་དགོངས་སུ་གསོལ། །ལེགས་ཉེས་གཉིས་ཀྱི་སྟངས་གཅོད་ཅིང་། །བཟང་ངན་གཉིས་ཀྱི་ཤན་འབྱེད་པའི། །མཁྱེན་ལྡན་རྣམས་ཀྱིས་གཟུ་དཔང་མཇོད། །བདག་ནི་མ་ཉེས་གཡོ་མེད་དེ། །ཐོག་མ་མེད་ནས་ད་ལྟའི་བར། །བླ་མེད་བྱང་ཆུབ་ཆོས་སྤྱོད་པས། །འདིར་ཡང་ཐེག་མཆོག་ཆོས་དང་མཇལ། །སྐྱེས་ནས་ད་ལྟའི་བར་དག་ཏུ། །མི་དགེ་སྤངས་ནས་དགེ་བ་སྤྱད། །ལུས་ངག་ཡིད་གསུམ་ཆོས་ལ་སྤྱོད། །ལས་ཀྱི་རྒྱུ་འབྲས་ཁྱད་མ་བསད། །དཀོན་མཆོག་གསུམ་པོ་ཐོད་བཞིན་ཁུར། །དམ་ཅན་ཆོས་སྐྱོང་རྟག་ཏུ་མཆོད། །སྣང་སྲིད་ལྷ་འདྲེའི་ཡི་མ་བཅད། །རིགས་དྲུག་ཕ་མ་སུན་མ་ཕྱུང་། །ཚེ་གཅིག་བྱང་ཆུབ་བསྒྲུབས་ལགས་ཀྱང་། །ལས་ཀྱི་དཀར་ནག་བདེན་པ་རྣམས། །བདེན་བརྫུན་དབྱེ་བ་ཁྱེད་རྣམས་ཀྱིས། །བདེན་རྫུན་ཤན་འབྱེད་མཛད་དུ་གསོལ། །བདག་ལ་ཉེས་པ་ཅུང་ཟད་མེད། །དེ་ཕྱིར་དེང་འདིར་གཟུ་དཔང་མཛོད། །བདེན་པ་ཅན་ལ་མཐུ་དཔུང་བསྐྱེད། །མི་བདེན་པ་ལ་བཀའ་ཆད་ཕོབ། །ཅེས་སོགས་གང་དང་གང་རིགས་པའི། །མ་ཉེས་དཔང་གཟུག་གང་ཤེས་བརྗོད། །དེ་ནས་ཁོ་ཡི་ཉེས་པ་བསྒྲག །གནོད་བྱེད་དགྲ་བགེགས་ཆེ་གེ་མོ། །ཡར་གྱི་ལྷ་ལ་དོ་བསྡོས་ཤིང་། །མར་གྱི་འདྲེ་ལ་བརྙས་པ་བཙུག །བར་གྱི་གྲོགས་ལ་འགྲན་སེམས་བཅས། །སངས་རྒྱས་བསྟན་པའི་སྤྱི་དགྲ་བྱས། །དཀོན་མཆོག་གསུམ་གྱི་དབུ་འཕང་སྨད། །བླ་མ་དམ་པའི་སྐུ་ལ་བསྡོས། །གསང་སྔགས་གཉན་གྱི་དམ་ཚིག་བཀྲལ། །ཆོས་འཁོར་གཙུག་ལག་དཀོར་ནོར་བཅོམ། །འགྲོ་བ་ཡོངས་ལ་གནོད་པ་བསྐྱལ། །སྡིག་པ་མི་དགེ་སྣ་ཚོགས་སྤྱད། །ལས་འབྲས་དཀར་པོ་ཁྱད་དུ་བསད། །བསྟན་པ་ཡོངས་ཀྱི་རིགས་ལ་བསྙེག །རྣལ་འབྱོར་སྔགས་འཆང་བདག་ཅག་ལ། །དོ་བརྡོས་ཕོད་བཙུག་གནོད་པ་བསྐྱལ། །དཀོན་མཆོག་སྐྱབས་གནས་མི་བདེན་ཟེར། །འདི་ཡིས་ལས་ངན་སྣ་ཚོགས་སྤྱད། །འདི་ལ་བསྒྲལ་བའི་ཞིང་བཅུ་ཚང་། །ཉེས་པ་ཅན་གྱི་ཆེ་གེ་འདིས། །རང་གིས་ལས་བྱས་རང་ལ་སྨིན། །འདི་ལ་བཀའ་ཆད་དབབ་ཏུ་གསོལ། །ཞེསསོགས་ཉེས་པ་དུ་མ་བསྒྲག །དགྲ་དང་བགེགས་གཉིས་སོ་སོ་ཡི། །ཉེས་པ་བསྒྲག་ཚུལ་ཤེས་པར་བྱ། །དེ་ནས་བཞེས་དྲངས་གཏོར་མ་བསྐྱལ། །ཟོར་ལ་སོགས་པ་གང་དང་གང་། །འོས་པའི་ལས་སྦྱར་སྐབས་རྣམས་སུ། །འདི་ལྟར་དམོད་བཅོལ་ལས་རྣམས་བྱ། །ཧོ་དགྲ་བོ་དམ་ཉམས་བསྒྲལ་བའི་ཞིང་བཅུར་གྱུར་པའི་ཆེ་གེ་མོ་འདི་ལ་བསད་པ་དང་བསྒྲལ་བའི་ལས་ཚང་བས། ཆེ་གེ་མོ་འདི་ལས་ཀྱི་རླུད་དམར་གྱིས་རྒྱབ་ནས་བསྐྱོད་དུ་ཆུག་ཅིག །གཏི་མུག་འཇིགས་པའི་མུན་ནག་གིས་མདུན་ནས་གཏིབ་ཅིག །འདོད་ཆགས་རྔམ་པའི་མེ་དཔུང་གི་ཚ་བའི་དབལ་གྱིས་གཞོབ་དུ་སྲེག་གཅིག །ཞེ་སྡང་དྲག་པོའི་རི་རྒྱལ་ལྷུན་པོའ་འོག་ཏུ་ནོན་ཅིག །ཕྲག་དོག་རྔམ་པའི་ཆུ་སྲིན་གདུག་པ་ཅན་གྱི་གྲེ་བར་སྟིམ་ཞིང་། ང་རྒྱལ་རྩུབ་འགྱུར་གྱི་འཁོར་ལོ་སྟོབས་ཆེན་གྱི་རྩིབས་ལ་སྐྱོན་ཅིག །ཤན་འབྱེད་ལས་ཀྱི་གཤིན་རྗེས་ཁྲམ་ལ་ཐོབ་ཅིག །ཕོ་ཉ་ལས་བྱེད་འཇིགས་པའི་ཤ་ཟན་གྱི་ཁར་ཆུག་ཅིག །ཉོན་མོངས་ལས་ཀྱི་རྒྱ་མཚོ་གཏིང་མེད་ཀྱི་གཏིང་དུ་སྒྱུར་ཅིག །མི་བཟད་འབར་བའི་བྱད་ཐག་ལྕགས་སྒྲོག་གིས་བྱད་དུ་ཆུག་ཅིག །ཁྲོ་རྒྱལ་འབར་བའི་ཕྱག་མཚན་ལས་ཀྱི་མཚོན་ཆའི་ཆར་ཕོབ་ཅིག །ལན་ཆགས་ལས་ཀྱི་གཟུགས་ཕུང་འབྱུང་པོ་འདྲེ་སྲིན་འཚོགས་པའི་བཙོན་དོང་དུ་སྒྱུར་ཅིག །ལྟན་ཅིག་སྐྱེས་པའི་ལྷ་བདུད་དུ་ཕོབ་ཅིག །མཉམ་པར་འོང་བའི་བདུད་ཀྱིས་བསྐོས་ལ་ཐོབ་ཅིག །གནམ་གྱི་འཇུ་ཐག་དཀར་པོ་གྱེན་དུ་ཆོད་ཅིག །རྟེན་པ་སའི་རྟོད་ཕུར་དྲུངས་ནས་ཕྱུང་ཞིག །ཆེ་གེ་མོ་འདི་ཡར་གྱི་ཆེ་གསུམ་དང་ཕྲོལ་ཅིག །མར་གྱི་ཆུང་གསུམ་དང་ཕྲོལ་ཅིག །དཀོན་པའི་ཚེ་སྲོག་སྟུང་ཞིག །ལྟ་བའི་མིག་དང་ཕྲོལ་ཅིག །བསམ་པའི་སྙིང་དང་ཕྲོལ་ཅིག །རྒྱབ་བརྟེན་དཔུང་རོགས་དང་ཕྲོལ་ཅིག །འགོ་བའི་ལྷ་དང་ཕྲོལ་ཅིག །སྐྱོབས་པའི་དབོན་དང་ཕྲོལ་ཅིག །བསྟེན་པའི་རྗེ་དང་ཕྲོལ་ཅིབ །བ་ས་པའི་ཡུལ་དང་ཕྲོལ་ཅིག །མཛའ་བའི་གྲོགས་དང་ཕྲོལ་ཅིག །བསགས་པའི་ནོར་དང་ཕྲོལ་ཅིག །ཕུང་གསུམ་བདུད་དང་སྤྲོད་ཅིག །གཉའ་ནོན་བྱུར་དང་སྤྲོད་ཅིག །སྡང་བའི་དགྲ་དང་སྤྲོད་ཅིག །གནོད་པའི་བགེགས་དང་སྤྲོད་ཅིག །འདུ་བའི་ནད་དང་སྤྲོད་ཅིག །འཆི་བའི་རྐྱེན་དང་སྤྲོད་ཅིག །ཕོ་བདུད་མོ་ལ་ཕོབ་ཅིག །མོ་བདུད་ཕོ་ལ་ཕོབ་ཅིག །རྒྱབ་ཀྱི་གོས་དང་ཕྲོལ་ཅིག ཁའི་ཟས་དང་ཕྲོལ་ཅིག །སྤོའི་ཆུང་མ་དང་ཕྲོལ་ཅིག །མཆན་གྱི་བུ་དང་ཕྲོལ་ཅིག །ལག་གི་ནོར་དང་ཕྲོལ་ཅིག །བླ་མཆོད་བདུད་དུ་ཕོབ་ཅིག །ཉེ་བ་དགྲ་རུ་སློང་ཞིག །ལྷ་གཤེད་བདུད་དུ་ཐོབ་ཅིག །ཕོ་རྒྱུད་རྩད་ནས་ཆོད་ཅིག །མོ་རྒྱུད་མངལ་ནང་་སྐོམས་ཤིག །ཆུང་རྒྱུད་དྲུངས་ནས་ཕྱུང་ཞིག །ཡར་གྱི་ཆེ་གསུམ་ལ་བབ་ན་སེང་ཆེན་གྱི་ཁོག་པ་འབུས་གཡེང་བ་བཞིན་དུ་ཐོང་ཞིག །མར་གྱི་ཆུང་གསུམ་ལ་བབ་ན་ལྕུག་ཕྲན་ཟོར་བས་བརྔས་པ་བཞིན་དུ་ཐོང་ཞིག །ཕ་སྐྲུན་ནང་ཚན་ལ་བབ་ན་ལུག་ཁྱུ་ལ་འཕར་སྦྱང་བརྒྱབ་པ་བཞིན་དུ་ཐོང་ཞིག །ཕ་ཁུ་རྒན་རིམ་ལ་བབ་ན་སྡོང་རྒན་རྩ་བ་ནས་འགྱེལ་བ་བཞིན་དུ་ཐོང་ཞིག །གཞོན་ནུ་དར་མ་ལ་བབ་ན་སྒོ་ང་བྲག་ལ་བརྒྱབ་པ་བཞིན་དུ་ཐོང་ཞིག །མོ་བཙུན་མཛངས་མ་ལ་བབ་ན་མེ་ཏོག་སད་ཀྱིས་ཁྱེར་བ་བཞིན་དུ་ཐོང་ཞིག །ཟས་ནོར་ལོངས་སྤྱོད་ལ་བབ་ན་མེ་རྡུལ་རླུད་གི་བསྐྱོད་པ་ལྟར་ཐོང་ཞིག །གཡོ་བའི་ལུས་ལ་བབ་ན་དྲག་ཆེན་ལ་ཐོག་ཕོག་པ་ལྟར་ཐོང་ཞིག །སྨྲ་བའི་ལྕེ་ལ་བབ་ན་བུང་བ་ཐེབ་ཀྱིས་མནན་པ་ལྟར་ཐོང་ཞིག །བསམ་པའི་སྙིང་ལ་བབ་ན་སྨྱོ་འབོག་ཅན་བརྒྱལ་ནད་ཀྱིས་ཐེབས་པ་ལྟར་ཐོང་ཞིག །བྱ་བའི་ལས་ལ་བབ་ན་ཤོག་སྐྱ་རླུད་གིས་བསྐྱོད་པ་ལྟར་ཐོང་ཞིག །སྟོད་ལ་ཚ་བའི་ནད་ཀྱིས་གཟིར་ཞིག །སྨད་ལ་གྲང་བའི་ནད་ཀྱིས་གདུངས་ཤིག །བར་དུ་འདུས་པའི་ནད་ཀྱིས་དཀྲུག་ཅིག །ཀླད་ཁྲག་ཞོ་ལྟར་དཀྲུག་ཅིག །ལུས་སེམས་བལ་ལྟར་གཡེང་ཞིག །གཞོགས་གཡས་པ་སྐམ་དུ་ཆུག་ཅིག །གཡོན་པ་རུལ་དུ་ཆུག་ཅིག །ཆུ་དང་གྲམ་ཐང་སྐྱ་མོའི་བར་དུ་ཡ་ཐོད་ཉི་མ་འདེ་རུ་ཆུག་ཅིག །མ་ཐོད་བྱེ་མ་འགམ་དུ་ཆུག་ཅིག །ཆེ་གེ་མོ་འདི་ལ་མི་རུང་བའི་ལྷས་ངན་ཆོ་འཕྲུལ་སྣ་ཚོགས་ཐོང་ཞིག །ལུས་སྲོག་དབང་ཐང་དང་བཅས་པ་ལྷག་མ་མེད་པར་མྱུར་དུ་བཞེས་ཤིག །མི་ཚེ་རིང་པོ་ལ་དུས་མ་འདེབས་པར་བཞེས་ཤིག །བར་སྣང་སྟོང་པ་ལ་ཚད་མ་འཛུགས་པར་བཞེས་ཤིག །སྐྱེ་རྒ་ན་འཚི་ལ་ཁུངས་མ་འབྱིན་པར་བཞེས་ཞིག །ཅེས་པ་ལ་སོགས་བཞེས་དྲངས་ཤིང་། དམོད་མོ་སྣ་ཚོགས་རིགས་མཐུན་བརྗོད། །དེ་ནས་ཟ་ལམ་གཏད་པ་ནི། །དམིགས་བྱའི་དུ་པ་ཁྲག་རིས་ཅན། །སྲུང་མའི་གཏོར་མ་བཅས་པ་འབུལ། །ཕྲིན་ལས་མྱུར་མགྱོགས་བྲག་ཏུ་བསྐུལ། །དུལ་མོ་བརྟུལ་ཞིང་ལས་ལ་རྦད། །དེ་ནས་དྲག་ཏུ་འདི་སྐད་བརྗོད། །ཧོ། ཡེ་ཤེས་དང་ལས་ལས་གྲུབ་པའི་སྲུང་རངརངགིགྲུངམའིམིངནསབརྗོདདོ།།མ་ཐུགས་དམ་ཅན་ཁྱེད་རྣམས་ལ། དགྲ་བོ་ཆེ་གེ་མོ་འདིའི་ལུས་སྲོག་དབང་ཐང་ཆུས་སྲིད་དང་བཅས་པ་ཟས་སྐལ་དུ་གཏད་པ་ཡིན་པས། འདིའི་ཤ་ཟོ། ཁྲག་འཐུང་། སྲོག་ཆོད། དབུགས་ལོངས།ལས་ཀྱི་མཐའ་བསྡུས་ལ། ལོ་དང་ཟླ་བར་མ་བཞག །ཞག་དང་ཟ་མར་མ་ཤོར་བར་མྱུར་དུ་སྒྲོལ་ཅིག །ཆེ་གེ་མོ་འདིའི་ལུས་སྲོག་ལ་སྟེང་ལྷའི་ཟ་ལམ་གཏོད་ཅིག །འོག་ཀླུའི་ཟ་ལམ་གཏོད་ཅིག །དྲང་སྲོང་གཟའི་ཟ་ལམ་གཏོད་ཅིག །ཅེས་སོགས་སྲུང་མ་མང་པོ་དང་། །སྣང་སྲིད་ལྷ་འདྲེ་མང་པོ་ཡི། །མིང་ནས་བོས་ཏེ་ཟ་ལམ་གཏད། །རིགས་དང་རིགས་མཐུན་བདུད་དུ་དབབ། །དེ་བཞིན་རང་གཤེད་རང་དབབ་ཀྱི། །ཟ་ལམ་གཏད་པའི་རིམ་པ་རྣམས། །ལས་མཐུན་སྤྲད་པའི་དྲག་སྔགས་བརྗོད། །དྲང་སྲོང་རྣམས་ཀྱི་དམོད་པ་འདོར། །བགེགས་ཆེན་དག་ཀྱང་གཤེད་དུ་དབབ། །ལས་ཀྱི་རིམ་པ་དྲག་མྱུར་འབད། །དེ་ནས་ནང་རྟགས་ཆོ་འཕྲུལ་དང་། །རྩུབ་འགྱུར་སྣ་ཚོགས་འབྱུང་བ་དང་། །སྲུང་མ་ཐམས་ཅད་དྲག་ཏུ་རྦད། །ཕྲིན་ལས་བསྐུལ་ཞིང་གཉེར་གཏད་བྱ། །དགྲ་ལ་འཁུ་འཕྲིག་སློང་བ་ཡི། །ལྟས་ངན་ཕྲིན་བསྐྱེལ་གཏང་བར་བྱ། །སྣ་སེལ་ལས་ཀྱི་གཏོར་མ་བཏང་། །དམ་ཅན་ཆོས་སྐྱོང་ལ་སོགས་པ། །སྲུང་མ་གནད་ལ་དབབ་བྱ་ཞིང་། ཁོ་ལ་ཆོ་འཕྲུལ་འབྱུང་ཚུལ་རྣམས། །དུག་ཤོག་རོ་རས་ནག་པོ་ལ། །ཕྲིན་རྫོང་ཡི་གེ་བྲིས་ནས་ཀྱང་། །གཤེད་དང་སྤྲད་ལ་གནས་སུ་བསྐྱལ། །གང་ལ་གང་རིགས་གནད་དང་བསྟུན། །འབྱུང་བ་འཁྲུགས་པའི་ལས་སྦྱོར་རྣམས། །བསྐྲད་དང་དབྱེ་དང་གཟིར་ལ་སོགས། །ལས་མཐའ་མངོན་སྤྱོད་དྲག་ཏུ་གཟིར། །རྣམ་པར་ཉམས་པར་བྱེད་པའི་ལས། །དྲག་ཤུལ་འཇིགས་པའི་སྦྱོར་བ་བརྩམ། །ལས་རྗེས་དགྲ་བགེགས་ལིང་རོ་རྣམས། །མཛེ་ཕོ་རབས་ཆད་ནག་པོ་དང་། །ཀློ་མོན་མཐའ་མིའི་ཐོད་པ་དང་། །གཅན་གཟན་དར་མའི་ཐོད་པ་སྟེ། །གང་ལ་གང་རིགས་ནང་དུ་བྲུབ། །ཐུན་དང་ཐལ་འདམ་ནག་པོས་བཅད། །རོ་ཆིང་རོ་རས་ཡུགས་ས་ཡི། །དོར་མས་གྲིལ་ནས་ཚོན་སྐུད་ཀྱིས། །བྱད་དུ་གཞུག་སོགས་དམ་པར་བྱ། །དུས་གཟའ་ཕུད་གསུམ་དག་དང་སྤྲད། །ལ་གཉན་ལུང་གཉན་ཆུ་མདོ་དང་། ཁྲིམས་ལམ་བཞི་མདོ་ལ་སོགས་པའི། །ལྷ་འདྲེ་མ་རུངས་གནས་པའི་ས། །ཆུ་བྲག་གཙུག་ལག་མཆོད་རྟེན་ཞབས། །གང་འོས་ས་རུ་གནན་གཏད་བྱ། །སྟེང་ནས་འབྱུང་བ་མེ་ཆུ་དང་། །རོ་གཡམ་རང་ཐག་ཆག་པོ་ལ། །རི་རབ་རྡོ་རྗེ་རྒྱ་གྲམ་བྲི། །མནན་གཟིར་དམོད་བཅོལ་བཅས་པས་མནན། །མནན་པ་ལས་ཀྱི་མཐའ་སྡུད་ཀྱི། །ལས་སྦྱོར་གནད་ལ་དབབ་པར་བྱ། །དགྲ་དཔུང་མནན་དང་བགེགས་དཔུང་བཤིག །སྨྱོ་བྱེད་ལས་ཀྱི་སྦྱོར་བ་བྱ། །ཡང་ནི་ལས་རྗེས་བསྲེག་པ་སྟེ། །ཕུང་གསུམ་བདུད་ཀྱི་ཉི་མ་ལ། །དྲག་པོའི་ཤིང་གིས་ཧོམ་ཁུང་བརྩེག །དུག་ཁྲག་ཏིལ་ནག་འབྲུ་ནག་སོགས། །ཐུན་རྫས་རྣམ་པ་སྣ་ཚོགས་དང་། །དམིགས་བྱའི་རྭ་པ་གཏོར་མ་དང་། ཁྲ་ཁྲག་ལ་སོགས་བསྲེག་རྫས་བཅས། །མཚོན་གྱིས་ག་ས་ལ་རིམ་བཞིན་འབུལ། །མེ་སྤར་ལྷ་བསྐྱེད་ལས་རྣམས་བྱ། །མེ་ནང་དྲག་པོའི་སྲུང་མ་དང་། །ཕོ་ཉ་ལས་མཁན་རྔམས་པ་བསྐྱེད། ཁ་གདངས་ནང་དུ་དམིགས་ཏེ་ཕུལ། །རང་རང་ལས་སྦྱོར་སྔགས་དང་བཅས། །དམོད་པའི་ཚིག་གིས་དྲག་མྱུར་བསྲེག །བར་མཚམས་ལེ་ལོ་མ་ཞུགས་ཤིང་། །ཏིང་འཛིན་ཐང་ལྷོད་མེད་པར་བྱ། །དམིགས་བྱ་ལྷག་མེད་བཞེས་ཤིང་བསྲེག །རོ་མ་ཐལ་སོལ་རླུད་ལ་འཕྱར། །ཡང་ན་ཁྲིམས་ལམ་དོང་དུ་མནན། །འཕེན་པ་ཟོར་གྱི་ལས་རྣམས་ནི། །དྲག་སྔགས་ལས་ཀྱི་གཏོར་མ་དེ། །སྡེ་བརྒྱད་དྲེགས་པ་འགྱུ་དུས་དང་། །ཕྱོགས་སྦྲད་དམིགས་པའི་ངར་དང་བཅས། །དུག་ཁྲག་མཚོན་ཆའི་ཆར་ཕབ་ནས། །དམིགས་བྱ་དགྲ་དང་བགེགས་ཀྱི་སྟེང་། །གནམ་ལྕགས་སྐྱི་འདོང་འབབ་པ་ལྟར། །རྡུལ་ཕྲན་ལྟ་བུར་བརླག་དམིགས་ཏེ། །ལས་ཀྱི་སྔགས་དང་དམོད་མོའི་ཚིག །ཟོར་གྱི་ལས་སུ་བརྡེག་པར་བྱ། །རྣལ་འབྱོར་ཁྲོ་བོའི་ང་རྒྱལ་གྱིས། །ལུས་ཀྱིས་དཔའ་ཤུགས་གཟི་བརྗིད་བསྐྱེད། །ངག་ཏུ་ཟོར་ལས་དམོད་པ་གྱེར། །ཡིད་ཀྱིས་ཞེ་སྡང་བརྣག་སེམས་བཅས། །རྣམ་འགྱུར་ཚོམ་རྔམས་འཇིགས་གཟུགས་བསྟན། །དུལ་མོ་བརྟུལ་ཞིང་ཐལ་མོ་བརྡབ། །མཆི་མ་ཕྱུང་ཞིང་འོ་དོད་འབོད། །དམོད་བཅོལ་ལས་ཀྱི་སྐྲུ་གྲི་གདགས། །དར་ཆེན་བསྐྱེད་པའི་རོལ་མོ་བསྒྲག །མི་རུང་ཆོ་འཕྲུལ་འགྱེད་པའི་ཕྱིར། །རོ་མགོ་བསྒྲིལ་ཞིང་རོ་ལག་གཡབ། །ཞིང་ལྤགས་དག་ཀྱང་དྲག་ཏུ་བརྡབ། །འབྱུང་བ་མེ་ཆུ་ལ་སོགས་གཏོར། །དེ་ལྟར་དྲག་པོའི་ལས་ཀྱི་མཐའ། །རྦད་བསྐུལ་མནན་བསྲེག་འཕེན་པ་སོགས། །གང་དང་གང་དག་ལས་སྦྱོར་རྣམས། །གནས་སྐབས་ཚུལ་དང་ཚུལ་མིན་པར། །བྱེ་བྲག་རིམ་པ་ཕྱེས་ལ་བརྩམ། །ལས་བྱས་གནད་དུ་སོང་བ་དང་། །མ་སོང་རང་ལ་ལོག་པ་དང་། །མ་ལོག་ཉེས་མེད་གཞན་ལ་འབྱམས། །དེ་དང་དེ་ཡི་ལ་ཉེ་བརྟག །བཟློག་པ་བྱད་མ་གནད་ལ་དབབ། །རྡུགས་པ་དག་ལ་ཡང་ཡང་བསྐྱར། །འབྱམས་ལ་དམིགས་བསྒྱུར་གསལ་ཤིང་བཙུག །རང་དང་ཕ་རོལ་དམིགས་བྱ་ཡི། །ལྷ་དང་སྲུང་མ་ཁམས་རིགས་བསྟུན། །འགྱངས་ན་ལས་ཀྱི་སྤོག་ཆོག་བྱ། །མཐུན་ལ་བཟུར་ཞིང་མི་མཐུན་སྤྲད། །གཞན་ཡང་དུས་དང་གནས་སྐབས་དང་། །ཡུལ་དང་ཡུལ་ཅན་གང་ཡིན་པ། །རིགས་དང་མི་རིགས་ཤེས་པར་བྱ། །བླ་མ་ཡི་དམ་མཁའ་འགྲོ་ཐམས་ཅད་ཀྱི་ཕྲིན་ལས་ཀྱི་རྒྱུད་སྤུ་གྲི་རེག་གཅོད་ལས་རྗེས་ཀྱི་ལས་རིམ་བསྟན་པའི་ལེའུ་སྟེ་བཞི་པའོ།། སྒྲི། །།གསུང་གི་དབང་ཕྱུག་དཔལ་འབར་བ། །སྟོན་པ་དཔག་མེད་རྒྱལ་པོ་ཡིས། །དེ་སྐད་འདུས་པའི་འཁོར་རྣམས་ལ། །མངོན་སྦྱོད་དྲག་སྔགས་ལས་རྣམས་ཀུན། །ཐོག་མ་བར་དང་མཐའ་རིམ་བཞིན། །བསྟན་པའི་དོན་དུ་ལེགས་པར་གསུངས། །དེ་ནས་དབང་ཆེན་འབར་བ་སོགས། །དྲག་པོ་ལས་ཀྱི་འཁོར་རྣམས་ཀྱིས། །རང་རང་དཔའ་བའི་རྩལ་ཕྱུང་ཞིང་། །སྤྲུལ་པ་རང་གཟུགས་བཅས་པ་བསྟན། །གདངས་སྐད་སྙན་པའི་ཤུགས་དག་གིས། །མགྲིན་གཅིག་ཏུ་ནི་མངོན་པར་བསྟོད། །སྙི༷༷ དུས་གསུམ་སངས་རྒྱས་ཐམས་ཅད་ཀྱི། །གསུང་གི་དབང་ཕྱུག་མཐའ་ཡས་སྐུ། །འོད་དང་གཟི་བརྗིད་དཔལ་འབར་ཤིང་། །མཐུ་དང་རྫུ་འཕྲུལ་སྟོབས་མངའ་བ ཡངས་པའི་དཀྱིལ་འཁོར་རྒྱས་པའི་སྤྱན། །ལེ་བརྒན་ལྗགས་ཀྱི་དབང་པོ་ལ། །ཚངས་པའི་དབྱངས་ཀྱི་འབྲུ་བཀོད་དེ། །གདུལ་བྱ་དག་དང་མ་དག་པ། །གཉིས་མཉམ་ཆེན་པོའི་ངང་དུ་བསྟིམ། །བརྗོད་པ་འི་ཚིག་ལ་འབྲས་བུའི་དོན། །རྨད་དུ་བྱུང་བ་ཨེ་མ་ཧོ། ཁྱོད་སྐུ་སྣང་བའི་གཟི་བརྗིད་ཀྱིས། །རབ་ཏུ་རྒྱས་ཤིང་གཡོས་པ་ལས། །འགྲོ་བའི་མ་རིག་མུན་སེལ་བ། །སྣང་བའི་ཡེ་ཤེས་སྒྲོན་མེ་སྤར། །ངོ་མཚར་འདི་དག་དཔལ་དུ་ཆེ། །གང་ལ་གང་འདུལ་ཕྲིན་ལས་ཀྱིས། །དེ་དང་དེར་སྟོན་རྣམ་པར་མཛད། །དཔག་ཏུ་མེད་པའི་སྤྲུལ་པ་ཡིས། །སྣང་སྲིད་འཁོར་འདས་ཡོངས་ལ་ཁྱབ། །དཔལ་འབར་ཆེན་པོའི་སྐུ་ལ་བསྟོད། །ཨེ་མ་ཁྱོད་གསུང་སྙན་པ་ཡིས། །སྒྲ་དབྱངས་ཕྱོགས་རྣམས་ཡོངས་ལ་ཁྱབ། །འདུལ་བྱ་རྣམ་པ་དུ་མ་ལ། །རང་རང་སྐད་ཀྱིས་གསུང་རྡོལ་བས། །དོན་ལ་མ་གཡོས་སྒྲ་ཚིག་གསུང་། །ལོག་པའི་ལམ་དུ་གང་འཁྱམས་པ། །ལེགས་པའི་ལམ་ལ་ཡང་དག་བཀོད། །དབྱངས་ཀྱི་སྤྲུལ་པ་ཡང་སྤྲུལ་ལས། །དོན་དང་བཅས་པའི་སྒྲ་ཚིག་གིས། །འདོད་འབྱུང་ཡིད་བཞིན་ཆར་ཆེན་ཕབ། །མ་དག་ལོག་སྤྱོད་གནས་སུ་བསྒྱུར། །ཡང་དག་མཛད་པ་མཐར་ཕྱིན་མཛད། །འགག་པ་མེད་པའི་གསུང་ལས་ཀྱང་། །རྒྱུན་ཆད་མེད་པའི་ཆོས་ཆར་གྱིས། །ཉོན་མོངས་མེ་ཡིས་གདུངས་པ་ལ། །ཡེ་ཤེས་བསིལ་བའི་སྤྲུལ་པ་བསྟན། །འབྲུག་སྟོང་ལྡིར་འདྲའི་ང་རོ་ཡིས། །མུ་སྟེགས་ལྟ་ངན་ཕམ་པར་མཛད། །སྟོན་པ་དབང་ཕྱུག་གསུང་ལ་བསྟོད། །ཨེ་མ་ཁྱོད་ཐུགས་ཡངས་པའི་ཀློང་། །མཁའ་ལྟར་དག་པའི་བཅོམ་ལྡན་འདས། །ཉི་མ་སྤྲིན་བྲལ་འབུམ་གྱི་གཟི། །ཐུགས་རྗེ་བརྩེ་བའི་འོད་ཟེར་གྱིས། །དྲ་བས་ཉེ་རིང་མེད་པར་གསལ། །བརྩེ་ཆེན་ཡེ་ཤེས་རྣམ་དག་པ། །གཅིག་དང་དུ་མ་དང་བྲལ་བས། །གྲངས་ལས་འདས་པའི་སྣང་བ་འགྱེད། །འདི་དག་རྒྱལ་དང་རྒྱལ་རྣམས་ཀྱིས། ཁ་ལོ་བསྒྱུར་མཛད་མངོན་འཕགས་པ། །བསམ་གྱིས་མི་ཁྱབ་གདུལ་བྱ་ཡི། །བསམ་པ་ཉིད་ཀྱི་དགོངས་པ་ལས། །དཀྱིལ་འཁོར་རྒྱས་པའི་འཕྲོ་འདུ་ཤར། །བརྩེ་དང་མི་བརྩེ་གཉིས་བྲལ་ཞིང་། །དེ་བཞིན་མཁྱེན་དང་མི་མཁྱེན་པའི། །ཕྱོགས་སུ་མ་ལྷུང་རིས་མ་ཆད། །ཟུང་དུ་མ་འབྲེལ་ཡ་མ་ཆད། ཁད་མཉམ་ཡངས་པའི་ཕོ་བྲང་དུ། །ཐུགས་ཀྱི་སྣང་བ་རྣམ་པར་སྣང་། །རྣམ་པར་བཀྲ་ཞིང་རྣམ་་་་་ར་འཕྲོ། །དོན་རྣམས་ཀུན་དང་ཡང་དག་པ། །འཁོར་འདས་གཉིས་མེད་གཅིག་ཏུ་གདལ། །ཐུག་པ་མེད་པའི་དཀྱིལ་འཁོར་ནས། །ཟག་པ་མེད་པའི་འོད་ཟེར་གྱིས། །མཐའ་མེད་འགྲོ་བ་རེ་རེ་ཞིང་། །སྣང་བའི་དཀྱིལ་འཁོར་རྫོགས་མཛད་དེ། །ཡང་དག་འཁོར་ལོ་དེ་སྙེད་ཀྱང་། །དུས་མཐའ་མེད་པར་རབ་ཏུ་བསྐོར། །དེ་དག་ཁྱེད་ཀྱི་ཐུགས་མཐའ་ཡས། །སྐུ་མཐའ་ཡས་དང་གསུང་མཐའ་ཡས། །ཡོན་ཏན་ཕྲིན་ལས་མཐའ་ཡས་དཔལ། །གཡོ་མེད་དགོངས་ཀློང་མཐའ་ཡས་པའི། །ཐུགས་རྗེ་ཡེ་ཤེས་ཁྱོད་ལ་བསྟོད། །ཨེ་མ་ཧོ། དཔལ་དང་ལྡན་པའི་བཅོམ་ལྡན་འདས། ཁྱོད་ཀྱི་སྐུ་གསུང་ཐུགས་དཀྱིལ་ནས། ཁྲར་ཞིང་སྤྲུལ་པའི་མི་ ་གེ་དག །ཚིག་དོན་གསལ་བར་མངོན་ཕྱུང་བ། །བདག་སོགས་གདུལ་བྱ་གྲོལ་བའི་མགོན། །ཐོགས་མེད་རྒྱལ་པོས་བཀའ་སྩལ་པ། །སྙིང་དང་སྤྱི་བོར་ཡང་དག་འཆང་། །ངོ་མཚར་ཐོད་དུ་འདི་ཁུར་རོ། །བཀོད་པ་མཐའ་ཡས་གསུང་ཚིག་ལ། །འདི་ཀུན་མངོན་པར་སྤྱོད་པའི་རྩལ། །མ་རིག་གཉིད་ལས་སློང་བའི་སྒྲ། །བདག་འཛིན་ཞེན་པ་གཅོད་པའི་གྲི། །ཉོན་མོངས་གཅོང་ནད་འབྱིན་པའི་སྨན། །འཁོར་བའི་རྒྱ་མཚོ་སྒྲོལ་བའི་གྲུ། །ཐར་པའི་ས་ཆེན་བགྲོད་པའི་སྐས། །དགྲ་བགེགས་ལོག་འདྲེན་འདུལ་བའི་མཐུ། །ཉེས་པ་ཀུན་ལས་རྣམ་གྲོལ་བ། །རྫུ་འབྲུལ་ཡེ་ཤེས་རྩལ་མཆོག་སྟེ། །མཆོག་དང་ཐུན་མོང་འབྱུང་བ་འདི། །བདག་ཅག་ཡང་དག་སྤྱི་བོས་ལེན། །དགོངས་པ་བཀྲོལ་ལ་རྗེས་ཡི་རང་། ཁྲོ་རྒྱལ་དབང་ཆེན་དཔལ་འབར་དང་། །བདག་ཅག་ཡང་དག་འདུས་པའི་འཁོར། །ལྷ་དང་མི་དང་ལྷ་མ་ཡིན། །ཀླུ་དང་རིག་སྔགས་འཆང་རྣམས་དང་། །དྲང་སྲོང་བྲམ་ཟེ་མིའམ་ཅི། །དྲི་ཟ་གྲུལ་བུམ་ལ་སོགས་ཏེ། །བདག་ཅག་རྗེས་སུ་ཡི་རངས་ཤིང་། །བཅོམ་ལྡན་འདས་ལ་མངོན་པར་བསྟོད། །ཇ་མ་ཡི་དམ་མཁའ་འགྲོ་ཐམས་ཅད་ཀྱི་ཕྲིན་ལས་ཀྱི་རྒྱུད་སྤུ་གྲི་རེག་གཅོད་ལས། རྗེས་སུ་ཡི་རངས་ཤིང་མངོན་པར་བསྟོད་པའི་ལེའུ་སྟེ་ལྔ་པའོ།། སྙི། །།ཕྲིན་ལས་དྲག་པོས་དགྲ་བགེགས་བདུད་དང་ལོག་སྲེད་ཅན་གྱི་གདུལ་བྱ་འདུལ་བའི་རྒྱུད་ཀྱི་རྒྱལ་པོ་སྐྲུ་གྲི་རེག་གཅོད་ཅེས་བྱ་བ། བདག་འདྲ་པདྨ་འབྱུང་གནས་ཀྱིས་དུར་ཁྲོད་ཆེན་པོ་བསིལ་བའི་ཚལ་དུ་བསྒྱུར་བ་རྫོགས་སོ། །ས་མ་ཡ། རྒྱ་རྒྱ་རྒྱ། ཁ་ཐམ། དྷ་ཐི༷། རྟ་ནག་དྲེགས་པ་སྡེ་བརྒྱད་ཚོགས་ཀྱིས་བཀའ་འདི་བསྲུངས། །གཏེར་རྐུན་དམ་ཉམས་ལོག་ལྟ་བཀའ་ལ་རས་གཅོད་བྱེད། །རྣལ་འབྱོར་ཆོས་ལ་གནས་དང་རྗེས་འཇུག་རྣམས་ལ་གནོད། །བསྟན་ལ་འཚེ་བྱེད་བདུད་རིགས་གདུག་པ་ཅན་རྣམས་ཀྱི། །ལུས་ངག་ཡངད་གསུམ་སྟོབས་དང་རྫུ་འཕྲུལ་དབང་པོ་ཉམས་པར་གྱངས། ཁྲ་ཁྲག་ཞལ་དུ་སྟོབ་ཅངང་ལྷག་མ་མེད་པར་མཛོད། །བཀའ་འདིའི་བདག་པོ་ཨུ་རྒྱན་གསུང་སྲས་རྗེས་འཇུག་གང །དམ་ཅན་རྒྱ་མཚོ་རྣམས་ཀྱངས་རྟག་ཏུ་