Ngb-pt-0155-vol-02-text
Front[edit]
Body[edit]
རྒྱ་གར་སྐད་དུ། མ་ཧྭ་སརྙི་ས་མརྙ་བྷ་དྲ་རྙོ་ན་པྲ་ཀྲུ་ཤ་ནི་རྡིགི་མནྟྲ་སུ་པ་ཐས་མུ་དྭ་ཡ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ། །གསང་སྔགས་ཀྱི་ལམ་མཆོག་འདུས་པའི་རྒྱུད་ཅེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་སྐུ་དབྱེར་མེད་ངང་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དཔལ་རྡོ་རྗེ་འཆང་གི་སངས་རྒྱས་དཔལ་ཀུན་ཏུ་བཟང་པོ་སྐུ་དང་ཡེ་ཤེས་དབྱེར་མེད་པ་ཉིད། ཆོས་ཉིད་ཡུམ་གྱི་བྷ་ག་ལ་བཞུགས་ཏེ། རིག་ལྔའི་སངས་རྒྱས་ལ་སོགས་ཏེ། འཁོར་རྣམས་དང་ཐབས་ཅིག་ཏུ། རིག་པ་སྟོང་གསལ་བདེ་བ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་སོ། །རྫོགས་པ་ཆེན་པོ་ཡེ་ཤེས་གསལ་བར་སྟོན་པ་གསང་སྔགས་ལམ་མཆོག་འདུས་པའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །།དེ་ནས་དཔལ་རྡོ་རྗེ་སེམས་དཔས་བཅོམ་ལྡན་འདས་ལ་གསོལ་པ། །ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྐུ་དང་ཡེ་ཤེས་ཐམས་ཅད་མཁྱེན། །གསང་སྔགས་རྫོགས་ཆེན་དོན་ཉིད་དེ། །བདག་ཅག་རྣམས་ལ་བཤད་དུ་གསོལ། །ཞེས་གསོལ་པས། བཅོམ་ལྡན་འདས་དཔལ་ཀུན་ཏུ་བཟང་པོས་བཀའ་སྩལ་པ། རྫོགས་པ་ཆེན་པོའི་དོན་ཉིད་ནི། །བལྟ་བ་ཕུལ་བྱུང་ངོ་མཚར་ཆེ། །ཐེག་པ་ཀུན་གྱི་དངོས་གཞིར་ཤར། །ཐེག་བརྒྱད་ལྷ་བ་མ་སྤངས་ན། །ཀུན་ཀྱང་མཐའ་ལ་ལྷུང་བ་ཉིད། །ཐེག་པ་ཀུན་གྱི་ལ་བཟླའ་ཡིན། །ཁྱད་པར་མ་ཧྭ་ཡོ་ག་དང་། །ཨ་ནུ་ཡོ་གར་གསུངས་པ་ཡི། །རྫོགས་པའི་རིམ་པར་བསྟན་པ་ཡིན། །ཞེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ་གསང་སྔགས་ལམ་མཆོག་འདུས་པའི་རྒྱུད་ལས། རྫོགས་པ་ཆེན་པོའི་དོན་ཉིད་བསྟན་པའི་ལེའུ་སྟེ་གཉིས་པའོ།། །།དེ་ནས་ཡང་དཔལ་རྡོ་རྗེ་སེམས་དཔས་གསོལ་པ། །ཀྱེ་ཀྱེ་ཀུན་བཟང་བཅོམ་ལྡན་འདས། །རྫོགས་པ་ཆེན་པོའི་རྣལ་འབྱོར་པས། །ལམ་གྱི་ཁྱད་པར་ཅི་ལྟ་བུས། །འབྲས་བུ་ཐོབ་ཚུལ་བཤད་དུ་གསོལ། །ཞེས་གསོལ་པས། དཔལ་ཀུན་ཏུ་བཟང་པོ་ཉིད་ཀྱིས་བཀའ་སྩལ་པ། །སྡེ་སྣོད་གསུམ་གྱིས་བསྐལ་པ་ནི། །གྲངས་མེད་འབད་ཀྱང་རྙེད་དཀའ་བ། །བཞི་པ་རྡོ་རྗེའི་སྡེ་སྣོད་འདིས། །བགྲོད་པ་མེད་པར་སངས་རྒྱས་ཐོབ། །གསང་སྔགས་རྡོ་རྗེའི་འབྲས་བུའི་ལམ། །ལམ་འབྲས་དབྱེར་མེད་འབྲས་བུའི་ལམ། །ཀྲི་ཡ་ཡོ་ག་ཨུ་པ་ཡང་། །ལྟ་བ་སྤྱོད་པ་ཕྱིར་གྱུར་ཏེ། །མཚན་ཉིད་གང་ལས་འཕགས་མ་ནུས། །ལྷ་དང་སྔགས་ཀྱིས་རེ་ཞིག་འཕགས། །ལྟ་སྤྱོད་ནང་དུ་གྱུར་པས་ན། །རྩ་རླུད་ཐིག་ལེ་དབང་ལ་རྫོགས། །གསང་སྔགས་ནང་པ་ཁྱད་པར་ཆེ། །མ་ཧྭ་ཡོ་ག་བསྐྱེད་པའི་ཚུལ། །ཨ་ནུ་ཡོ་ག་རྫོགས་པའི་ཚུལ། །ཨ་ཏི་ཡོ་ག་ལ་བཟླའི་ཚུལ། །ཚུལ་གསུམ་དབྱེར་མེད་གཅིག་གི་ངང་། །བསྐྱེད་དང་རྫོགས་པ་ཟུང་འཇུག་ཉིད། །བསྐྱེད་རིམ་བསོད་ནམས་ཚོགས་ཉིད་ལས། །འབྲས་བུ་གཟུགས་སྐུ་འབྱུང་བར་འགྱུར། །དེ་མེད་སྐུ་དང་ཞིང་ཁམས་སུ། །གདུལ་བྱའི་སྣང་བ་འབྱུང་མི་འགྱུར། །རྫོགས་རིམ་ཡེ་ཤེས་ཚོགས་ལས་ནི། །འབྲས་བུ་ཆོས་སྐུ་འབྱུང་བར་འགྱུར། །དེ་མེད་སངས་རྒྱས་དངོས་འཛིན་འགྱུར། །དེ་ལྟར་ཟུང་འཇུག་ལམ་མེད་ན། །མཐརཐུག་འབྲས་བུ་འབྱུང་མི་འགྱུར། །འབྱུང་ན་མི་སྲིད་གཞུང་དང་འགལ། །གཞན་དུ་རེ་ཞིག་ཕྱོགས་རེ་ལ། །སངས་རྒྱས་ཞེས་སུ་བརྟགས་པར་ཟད། །གསང་སྔགས་མཐའ་དྲུག་ལྡན་བྱས་ནས། །ཡོ་བྱད་གཉིས་ལ་ལོངས་སྤྱོད་པས། །རྣལ་འབྱོར་དབང་ཕྱུག་དམ་པ་དེ། །རྡོ་རྗེ་སེམས་དཔའི་གྲལ་དུ་ཕྱིན། །ཚེ་འདི་ཉིད་དམ་པར་མ་དོར། །སྐུ་དང་ཡེ་ཤེས་འཐོབ་པར་འགྱུར། །གལ་ཏེ་རྩོལ་ཞེན་མ་ཉམས་ན། །སྐྱེ་བ་ལན་གྲངས་འགའ་ཡིས་འཐོབ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ། གསང་སྔགས་ལམ་མཆོག་འདུས་པའི་རྒྱུད་ལས། རྡོ་རྗེ་ཐེག་པའི་ལམ་གྱི་ཁྱད་པར་གྱི་འབྲས་བུ་ཐོབ་པའི་ལེའུ་སྟེ་གསུམ་པའོ།། །།དེ་ནས་ཡང་དཔལ་རྡོ་རྗེ་སེམས་དཔས་གསོལ་པ། ཀྱེ་མ་བཅོམ་ལྡན་ཀུན་བཟང་པོ། །རྫོགས་པ་ཆེན་པོའི་རོལ་པ་ལ། །གསང་སྔགས་མཐའ་དྲུག་གསུངས་པ་དེ། །དོན་ཉིད་རིམ་པར་བཤད་དུ་གསོལ། །ཞེས་གསོལ་པས། ཀུན་ཏུ་བཟང་པོ་རྒྱལ་བས་བཀའ་སྩལ་པ། །གསང་སྔགས་མཐའ་དྲུག་གསུངས་པ་ནི། །དང་པོར་བསྐྱེད་པའི་ཚུལ་དབང་བསྐུར། །དེ་ནས་རིག་པའི་རྩལ་དབང་བསྐུར། །དབང་ཉིད་ཆགས་པར་བྱེད་པ་ལ། །གཞི་ཉིད་དམ་ཚིག་གཟུང་བར་བྱ། །ཐམས་ཅད་མཉམ་པ་ཆེན་པོར་བསྲུང་། དེ་ལ་ལྟ་བས་ཐག་བཅད་པས། །རང་བྱུང་ཡེ་ཤེས་རྩོལ་བྲལ་བ། །རིག་པ་སྟོང་གསལ་དོན་ལ་བརྟགས། །ཉམས་སུ་ཏིང་འཛིན་བླང་བ་ནི། །བསྐྱེད་པའི་རིམ་པའི་ཚུལ་བཟུང་ནས། །མཚན་བཅས་ལྷ་ཡི་འཁོར་ལོ་འདི། །ཡབ་ཡུམ་དཔའ་བོ་གཅིག་པར་བསྒོམས། །རིགས་འདུས་གཙོ་བོ་རྫོགས་རིམ་བརྟེན། །ལྷ་དང་སྟོང་པ་་ཟུང་འཇུག་ཉིད། །དེར་བརྟེན་ལུས་སེམས་བསྒྲིམས་བྱས་ལ། །སེམས་བཟུང་ལམ་དུ་བླང་བའམ། །ཡང་ན་ལུས་སེམས་གློད་པའམ། །སེམས་བཟུང་སྟོང་གསལ་ངང་དུ་བཞག །བྱིང་རྒོད་རྨུགས་ན་སྐྱོན་གསུམ་བཅོས། །ལ་ཉིད་སྤྱོད་པས་དོར་བ་ནི། །རང་གི་ཉམས་རྟོགས་དོན་དང་སྦྱར། །དེ་ལྟར་རིམ་པར་བླངས་པ་ཡིས། །གདམས་ངག་རིམ་པ་མ་གོལ་བས། །དོན་གྱི་འབྲས་བུ་བསྒྲུབ་པ་སྟེ། །བསྲེ་བ་ཐབས་གསུམ་སྒོ་ཉིད་གཏད། །རིག་པ་སྟོང་གསལ་བདེ་ཆེན་ཉིད། །གདགས་གཞི་གང་དུ་མ་གྲུབ་ལ། །གདགས་བྱ་གང་ཡང་མ་འགགས་ཤར། །རྟོགས་པའི་ཡེ་ཤེས་རྣམ་འབྲུལ་ལས། །ཐམས་ཅད་རོལ་པར་ཤེས་པར་བྱ། །གཞན་ཡང་ལམ་དུ་བླང་བ་ནི། །ལྟ་བ་གདེང་དང་བཅས་པ་དང་། །འཇུག་སྒོ་ལམ་དང་བཅས་པ་ཉིད། །སྤྱོད་པ་གྲོགས་དང་བཅས་པ་ལས། །འབྲས་བུ་ཡོན་ཏན་བཅས་པ་བྱུང་། །ཞེས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་གསང་སྔགས་ལམ་མཆོག་འདུས་པ་ཞེས་བྱ་བའི་རྒྱུད་ལས།གསང་སྔགས་མཐའ་དྲུག་ཡེ་ཤེས་རོལ་པར་བསྟན་པའི་ལེའུ་སྟེ་བཞི་པའོ།། །།དེ་ནས་ཡང་དཔལ་རྡོ་རྗེ་སེམས་དཔས་གསོལ་པ། ཀྱེ་བཅོམ་ལྡན་འདས་གསང་བའི་བདག་པོ། མ་ཧྭ་ཡོ་ག་དང་། །ཨ་ནུ་ཡོ་ག་དང་། ཨ་ཏི་ཡོ་ག་གསུམ་དབྱེར་མེད་པ་གཅིག་ཏུ་གསུངས་པའི་རྒྱུད་སྡེ་དེ་ཉིད་རྣམས་ནི། དཔལ་རྡོ་རྗེ་འཆང་གིས་བདག་ཅག་རྣམས་ལ་གསུངས་པ་ནི་ངོ་མཚར་ཆེའོ། །དེས་ན་རྒྱུད་འདི་གནས་ཤིང་སྤྱོད་པའི་དོན་བཤད་དུ་གསོལ། ཞེས་གསོལ་པས། བཅོམ་ལྡན་འདས་དཔལ་ཀུན་ཏུ་བཟང་པོ་ངོ་བོ་ཉིད་ཀྱི་སྐུ་དེས་བཀའ་སྩལ་པ། རྡོ་རྗེ་སེམས་དཔའ་ལ་སོགས་པ་རྣམས་ཉོན་ཅིག །ཨ་ཏི་ཡོ་གའི་རྒྱུད་འདི་ཉིད་ལ་སོགས་པ་རྣམས་ནི། འོག་མིན་གྱི་གནས་ཡུམ་གྱི་མཁའ་ཉིད་དུ། ང་ཉིད་ཀྱིས་ཁྱེད་འདུས་པའི་འཁོར་རྣམས་ལ་བཤད་དེ། སྡུད་པ་པོ་ནི་འཇམ་དཔལ་དང་། སྤྱན་རས་གཟིགས་དང་། ཕྱག་ན་རྡོ་རྗེས་བསྡུས་ཏེ། ལྷ་གནས་གསུམ་དུ་གྲགས་ཏེ། དེ་ནས་གསེར་གྱི་གླེགས་བམ་ལ། བིཌབྱ་ཞུན་མས་རང་ནན་དུ་བྲིས་ཏེ། འཛམ་བུའི་གླིང་དུ་ལྷོ་ཕྱོགས་སུ་སྤྲུལ་པའི་སངས་རྒྱས་འབྱོན་པའི་གནས། རྡོ་རྗེ་གདན་དུ་བབས་ནས་སྤྱོད་པར་འགྱུར་རོ། །དེ་ཡང་མ་ཧྭ་ཡོ་གའི་རྒྱུད་ཐམས་ཅད་ནི། རྒྱལ་པོ་ཛ་ཞེས་བྱབའི་ཁང་ཐོག་ཏུ་བབས་པར་འགྱུར་ལ། ཨ་ནུ་ཡོ་གའི་རྒྱུད་ཐམས་ཅད་ནི་སེང་ག་ལའི་ནགས་ཚལ་དུ་འབྱུང་བར་འགྱུར་ཏེ། ཨ་ཏི་ཡོ་ག་རྫོགས་པ་ཆེན་པོའི་རྒྱུད་འདི་ཉིད་ལ་སོགས་པ་ཐམས་ཅད་ནི། དྷ་ན་ཀོ་ཤའི་གླིངདུ་འབྱུང་ཞིང་དར་ནས་རྒྱས་ཤིང་སྤྱོདཔར་འགྱུརརོ། །གཞན་ཡང་གསང་སྔགས་ཀྱི་རྒྱུད་རྣམས་དཔལ་ཕྱག་ན་རྡོ་རྗེ་སོགས་པས། ཡེ་ཤེས་ཀྱི་མཁའ་འགྲོ་མ་ལགཏད་ནས། སླད་ནས་ཀྱང་འབྱུང་ཞིང་རྒྱས་པར་འགྱུར་རོ། །དེ་ཉིད་ཀྱི་དུས་སུ་སྔར་བྱུང་བའི་རྒྱུད་སྡེ་རྣམ་གསུམ་ནི། བྱང་ཕྱོགས་འཛམ་བུའི་གླིང་གི་དབུས་ཡིན་པས། དེར་ཁྱད་པར་དུ་དར་བར་འགྱུར་བ་ལ། རྡོ་རྗེ་གདན་གྱི་དྲུང་དུ་ནི་མི་སྤྱོད་པར་བྱང་ཆུབ་ཀྱི་ཤིང་དྲུང་དུ་གཏེར་དུ་སྦེད་པར་འགྱུར་རོ། །དེ་ཅིའི་ཕྱིར་ཞེ་ན། འདུལ་བའི་སྣོད་དུ་མ་གྱུར་པའི་ཕྱིར་རོ། །དེ་ཉིད་ཀྱི་དུས་སུ་ནི་སླད་ནས་འབྱུང་བ་རྣམས་དང་། བྱང་ཕྱོགས་ཀྱི་གནས་སུ་ནི་སྔར་བྱུང་བའི་རྒྱུད་སྡེ་རྣམ་པ་གསུམ་དང་། སླད་ནས་འབྱུང་བའི་རྒྱུད་རྣམས་དང་། གཉིས་ཀ་དར་ཞིང་རྒྱས་པར་འགྱུར་ཏེ། གཞུང་བཞིན་དུ་སྤྱད་པ་རྣམས་ནི་རྡོ་རྗེ་འཆང་གི་ཐོབ་པརའགྱུར་ལ། དེ་ལོག་པར་སྤྱད་ཅིང་དམ་ཉམས་པ་རྣམས་ནི་དེ་ལས་གཞན་དུའང་ཡིན་ནོ། །དེ་ཡང་རྒྱུད་འདི་ཉིད་ནི་རྟགས་ཙམ་འཛིན་པའི་དུས་འབྱུང་དུ་ཉེ་བ་ན། །རྣལ་འབྱོར་པ་སྐལ་བ་དང་ལྡན་ཞིང་ཚོགས་བསགས་པ་རྣམས་ཀྱི་སྤྱོད་ཅིང་དར་ནས། རིག་པ་སྟོང་གསལ་རྟོགས་ཏེ། སངས་རྒྱས་ཀྱི་ས་ལ་གནས་པར་འགྱུར་རོ། །ཞེས་བཀའ་སྩལ་པ་དང་། བཅོམ་ལྡན་འདས་དཔལ་ཀུན་ཏུ་བཟང་པོ་རྡོ་རྗེ་འཆང་ལ་འཁོར་རྣམས་ཀྱིས་བསྟོད་པ་ནི། །ཡེ་ཤེས་སྐུ་ཡིས་སྟོང་གསུམ་ཟིལ་གྱིས་གནོན། །འགག་མེད་གསུང་གིས་བསྟན་པ་རྒྱ་མཚོ་བསྒྲགས། །གཉིས་མེད་ཐུགས་ཀྱིས་ཐམས་ཅད་ས་ལེ་མཁྱེན། ཀུན་བཟང་རྡོ་རྗེ་འཆང་ཆེན་ཁྱོད་ལ་བསྟོད། །ཅེས་པས་བསྟོད་པར་གྱུར་ཏོ། །དེ་ནས་དཔལ་ཀུན་ཏུ་བཟང་པོས་ཡང་བཀའ་སྩལ་པ། ཨེ་མ་ཧོ་རྡོ་རྗེ་སེམས་དཔའི་ཚོགས། །གསང་སྔགས་ལམ་གྱི་དོན་འདུས་རྒྱུད། །ཀུན་གྱི་ཐུན་མོང་མ་ཡིན་ཏེ། །ཤིན་ཏུ་གསང་ལ་གཟུང་པར་བྱའོ། །ཞེས་བཀའ་སྩལ་པ་དང་། འཁོར་ཐམས་ཅད་བསྟི་གནས་ཀྱི་ས་ལ་གནས་པ་ལས། སྤྱིར་ཆིབས་པ་ལ་སངས་རྒྱས་པར་གྱུར་ཏོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ་གསང་སྔགས་ཐམས་ཅད་ཀྱི་ལམ་མཆོག་འདུས་པའི་རྒྱུད་ལས། གསང་སྔགས་ཇི་ལྟར་འབྱུང་བ་ལུང་བསྟན་པ་དང་། རྒྱུད་ཡོངས་སུ་བཟུང་ཞིང་གཏད་པའི་ལེའུ་སྟེ་ལྔ་པའོ།། །།རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ། གསང་སྔགས་ཐམས་ཅད་ཀྱི་ལམ་མཆོག་འདུས་པའི་རྒྱུད་ཅེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཤི་སིདྷ་དང་། རྡོ་རྗེ་ཡང་