མཆོད་འབུལ་གྱི་ཆོ་ག་བཞུགས་སོ། །

༄༅། །མཆོད་འབུལ་གྱི་ཆོ་ག་བཞུགས་སོ། །

ན་མོ་ཨཱརྻ་མཉྫུ་ཤྲི་ཡེ། འདིར་དངོས་པོ་དང་ཞིང་གང་ལའང་ཁ་བསྒྱུར་ཆོག་པའི་མཆོད་འབུལ་མདོར་བསྡུས་ནི། མདུན་དུ་འཇམ་པའི་དབྱངས་ལ་སོགས་པའི་སྐུ་རྟེན་བཀྲམ་པའི་སྤྱན་སྔར་མཆོད་པ་གཙང་ཞིང་གྱ་ནོམ་པ་བཤམ་ལ། ཨོཾ་སྭ་བྷཱ་ཝ་སོགས། ཆོས་ཐམས་ཅད་ངོ་བོ་ཀ་ནས་དག་པའི་སྟོང་པ་ཉིད་ཀྱི་ཀློང་ལས་རང་བཞིན་ལྷུན་གྱིས་གྲུབ་པའི་རྩལ་རྟེན་འབྱུང་འགགས་པ་མེད་པའི་སྣང་ཆར་གནས་འདི་ཉིད་འོག་མིན་སྟུག་པོ་བཀོད་པའི་ཞིང་ཁམས་གཞི་དང་རྒྱན་དང་དབྱིབས་དང་བཀོད་པ་ཚད་མེད་པས་མངོན་པར་འཕགས་པའི་ཕྱོགས་ཀུན་ཏུ་ཡེ་ཤེས་རིན་པོ་ཆེ་འབར་བའི་སྣོད་ཕུན་སུམ་ཚོགས་པར་མེ་ཏོག་དངོས་པོའི་ཁ་བསྒྱུར་ལ་སོགས་པའི་མཆོད་པ་འདི་དག་ངོ་བོ་ཡེ་ཤེས་ཀྱི་རང་བཞིན། རྣམ་པ་འདོད་རྒུ་མ་ལུས་པའི་རོལ་མོ། བྱེད་ལས་མཆོད་ཡུལ་རྣམས་ལ་ཟག་པ་མེད་པའི་དགའ་བ་ཁྱད་པར་ཅན་སྐྱེད་པ། དུས་ཇི་སྲིད་འཁོར་བ་མ་སྟོང་གི་བར་དུ་རྒྱུན་མི་ཆད་པ། རྒྱ་ཁྱོན་ཆོས་ཀྱི་དབྱིངས་ཀུན་ཏུ་རྒྱས་པར་འགེངས་པ། དེ་བཞིན་གཤེགས་པ་དང་འཕགས་པ་ཀུན་ཏུ་བཟང་པོའི་ཡེ་ཤེས་ལས་བྱུང་བའི་མཆོད་པའི་སྤྲིན་ཆེན་པོར་གྱུར། ནམ་མཁའ་མཛོད་ཀྱི་སྔགས་རྒྱ་དང་རྟེན་སྙིང་མཆོད་གཟུངས་སོགས་བཟླ། དེ་ནས་སྐྱབས་ཡུལ་སྤྱན་འདྲེན་པ་ལ། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གི་སྨོན་ལམ་ཅི་བཏབ་པ། །དེ་འདྲའི་འབྲས་བུ་ཐོབ་པར་འགྱུར། །གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་བྱེད་ཅིང༌། །ཉེས་པ་ཀུན་ལས་རྣམ་པར་གྲོལ། །མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ༴ དངོས་རྣམས༴ འཇམ་དབྱངས་སོགས་ཚོགས་ཞིང་སོ་སོར་ཁ་བསྒྱུར། འཁོར་བཅས་གནས་འདིར་གཤེགས་སུ་གསོལ། ཨོཾ་སརྦ་ཏ་ཐཱ་ག་ཏ་ཨཱརྻ་མཉྫུ་ཤྲཱི་ལྷ་སོ་སོའི་མཚན་སྔགས་བསྒྱུར། ས་པ་རི་ཝཱ་ར་བཛྲ་ས་མཱ་ཛ༔ ཞེས་རྡོ་རྗེ་བསྡུ་བའི་ཕྱག་རྒྱ་བྱ། དཀྱིལ་འཁོར་གྱི་གཙོ་བོ་ལ་རབ་འབྱམས་སྐྱབས་ཡུལ་རྒྱ་མཚོ་་མ་ཚང་པ་མེད་པས་བསྐོར་བ་མདུན་གྱི་ནམ་མཁར་བྱོན་པར་མོས་ལ། པདྨ་ཀ་མ་ལཱ་ཡ་སྟཾ། ཞེས་གདན་ཕུལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི༴ ཇི་སྲིད༴ དེ་སྲིད༴ ཞེས་བཞུགས་སུ་གསོལ་ནས་སྐྱབས་སེམས་ནི། ཁྱབ་བདག་འཇམ་དཔལ་རྡོ་རྗེ་སོགས་ཁ་བསྒྱུར། ཕྱོགས་དུས་རྒྱལ་བ་སྲས་དང་བཅས་པས་བསྐོར་བ་ཏིལ་གྱི་གོང་བུ་ཁ་ཕྱེ་བ་ལྟ་བུའི་དཀྱིལ་འཁོར་གྱི་ལྷ་ཚོགས་རྣམས་ལ་གུས་པས་ཕྱག་འཚལ་ཞིང་བྱང་ཆུབ་སྙིང་པོའི་བར་དུ་སྐྱབས་སུ་མཆིའོ། །ལན་གསུམ། མ་སེམས་ཅན་ཐམས་ཅད་ཀྱི་དོན་དུ་བདག་གིས་རྗེ་བཙུན་འཇམ་པའི་དབྱངས་ཀྱི་སོགས་ཁ་བསྒྱུར། ཡེ་ཤེས་ཀྱི་སྐུ་འགྲུབ་པར་བྱ། དེའི་ཆེད་དུ་མཆོད་པ་འབུལ་བ་ལ་སོགས་པའི་བསོད་ནམས་ལ་འཇུག་པར་བགྱིའོ། །ལན་གསུམ། དེ་ནས་སྐྱབས་ཡུལ་རྣམས་ཐུགས་བརྩེ་བས་བདག་ལ་དགོངས་ཤིང་མཆོད་པ་རྣམས་བཞེས་པར་བསམ་ལ། དྲི་མེད་ཡིད་འོང་ལྷ་རྫས་ལས་བྱུང་བའི། །མཆོད་ཡོན་ཞབས་བསིལ་མེ་ཏོག་བདུག་སྤོས་དང༌། །མར་མེ་དྲི་ཆབ་ཞལ་ཟས་རོལ་མོ་སོགས། །ཀུན་བཟང་མཆོད་སྤྲིན་རྒྱ་མཚོས་མཆོད་པར་བགྱི། །ཨོཾ་སརྦ་ཏ་ཐཱ་ག་ཏ་ཨཱརྻ་མཉྫུ་ཤྲཱི་མཚན་སྔགས་བསྒྱུར། ས་པ་རི་ཝཱ་ར་ཨརྒྷཾ་སོགས། རཱུ་པ༴ དྷཱརྨ་དྷཱ་ཏུ་སརྦ་མ་ཧཱ་སུ་ཁ་པུ་ཛ་ས་མ་ཡ་ཧོ༔ གཞན་ཡང་སྤྲོ་ན་འདིར་མཆོད་ཕྲེང་ཅི་རིགས་སྦྱར། སྐྱབས་གནས་ཀུན་འདུས་འཕགས་མཆོག་ལྷག་པའི་ལྷར། །མི་ཕྱེད་དད་པའི་གདུང་ཤུགས་དྲག་པོ་ཡིས། །བདག་གཞན་སྒོ་གསུམ་དགེ་ཚོགས་ལོངས་སྤྱོད་བཅས། །མ་ལུས་གཅིག་ཏུ་བློ་ཡིས་ཡོངས་བསྡོམས་ནས། །བླ་མེད་ཀུན་ཏུ་བཟང་པོའི་མཆོད་པའི་སྤྲིན། །འཇིག་རྟེན་འཇིག་རྟེན་འདས་པའི་དཔལ་ཡོན་ཀུན། །མ་ཚང་མེད་པ་ལྷུན་གྱིས་གྲུབ་པ་ཡིས། །ཆོས་ཀྱི་དབྱིངས་ཀུན་ཁྱབ་པར་རྟགས་གནས་པ། །ཡེ་ཤེས་འདོད་རྒུའི་རང་བཞིན་བདེ་བ་ཆེར། །དམིགས་ཤིང་ཕུལ་བའི་མཆོད་པ་འདི་དག་ཀུན། །བཞེས་ཤིག་མཁྱེན་བརྩེ་ནུས་མངའ་རྡོ་རྗེའི་སྐུ། །འདུ་འབྲལ་མེད་པའི་ཐུགས་རྗེས་བདག་གཟུང་མཛོད། །མ་ལུས་འགྲོ་བ་ཀུན་ལ་ཕན་སླད་དུ། །ཕྱོགས་དུས་སྲས་བཅས་རྒྱལ་བའི་རྣམ་ཐར་ཀུན། །བདག་གིས་ཡོངས་སུ་རྫོགས་པར་བསྒྲུབས་པ་ཡི། །རྣམ་ཐར་རྒྱ་མཚོས་ཆོས་ཀྱི་དབྱིངས་གཏམས་པའི། །སྨོན་ལམ་འདི་ལ་མགོན་པོས་དབང་མཛད་ནས། །ཕྱོགས་དུས་མཉམ་པ་ཉིད་བརྙེས་ཡེ་ཤེས་སྐུ། །རྡོ་རྗེའི་སྟོབས་མཆོག་མཚུངས་པ་མེད་པ་ཡིས། །བྱིན་གྱིས་རློབས་ཤིག་དེ་བཞིན་གྲུབ་པར་མཛོད། །ཅེས་རྩེ་གཅིག་ཡིད་ཀྱིས་འབུལ་ཞིང་སླར་ཡང་བདེན་པའི་སྟོབས་བརྗོད་པ་ནི། དཀོན་མཆོག་གསུམ་གྱིས་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང༌། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང༌། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་མེ་ཏོག་ཁ་བསྒྱུར་དང༌། ལ་སོགས་པའི་མཆོད་པ་འདི་དག་ངོ་བོ་ཡེ་ཤེས་ཀྱི་རང་བཞིན། རྣམ་པ་འདོད་རྒུ་མ་ལུས་པའི་རོལ་མོ། བྱེད་ལས་མཆོད་ཡུལ་རྣམས་ལ་ཟག་པ་མེད་པའི་དགའ་བ་ཁྱད་པར་ཅན་སྐྱེད་པ། དུས་ཇི་སྲིད་འཁོར་བ་མ་སྟོང་གི་བར་དུ་རྒྱུན་མི་འཆད་པ། རྒྱ་ཁྱོན་ཆོས་ཀྱི་དབྱིངས་ཀུན་དུ་རྒྱས་པར་འགེངས་པ། དེ་བཞིན་གཤེགས་པ་དང་འཕགས་པ་ཀུན་ཏུ་བཟང་པོའི་ཡེ་ཤེས་ལས་བྱུང་བའི་མཆོད་པའི་སྤྲིན་ཆེན་པོར་གྱུར་ནས། ཁྱབ་བདག་འཇམ་དཔལ་རྡོ་རྗེ་དང༌། ཁ་བསྒྱུར་ཕྱོགས་བཅུ་དུས་གསུམ་གྱི་སངས་རྒྱས་ཀྱི་ཞིང་ཁམས་མཐའ་ཡས་ཤིང་མུ་མེད་པར་རྟག་ཁྱབ་ལྷུན་གྱིས་གྲུབ་པའི་ཚུལ་དུ་འབྱུང་ཞིང་ཐུགས་ཀྱི་དགྱེས་པ་ཡོངས་སུ་བསྐང་བར་གྱུར་ཅིག །རོལ་མོ་བཅས་མཆོད་གཟུངས་བདུན་ལ་སོགས་པར་བཟླའོ། །དེ་ནས་ཐལ་མོ་སྦྱར་ལ། ཁྱབ་བདག་འཇམ་དཔལ་རྡོ་རྗེ་གང་འདོད་ཁ་བསྒྱུར་ཕྱོགས་དུས་རྒྱལ་བ་སྲས་དང་བཅས་པས་བསྐོར་བ་ཏིལ་གྱི་གོང་བུ་ཁ་ཕྱེ་བ་ལྟ་བུའི་དཀྱིལ་འཁོར་གྱི་ལྷ་ཚོགས་རྣམས་ཀྱིས་བདག་ལ་ཐུགས་བརྩེ་བ་ཆེན་པོས་དགོངས་ནས་བདག་གིས་མེ་ཏོག་ཁ་བསྒྱུར་ཏེ་ལ་སོགས་པའི་མཆོད་པ་འབུལ་བ་འདི་དག་བཞེས་ནས་བདག་དང་སེམས་ཅན་ཐམས་ཅད་ལ་ཡེ་ཤེས་ཀྱི་ཐུགས་རྗེ་ཆེན་པོས་རྟག་ཏུ་འདུ་འབྲལ་མེད་པར་བྱིན་གྱིས་རློབས་ཤིག །གཞན་ཡང་སྨོན་ལམ་ཇི་ལྟར་འདོད་པ་བཏབ་ལ། རོལ་མོ་བཅས་མཆོད་གཟུངས་སོགས་བཟླའོ། །དེ་ནས་གང་བློ་མ་ལྟ་བུ་སོགས་ལྷ་དེ་ཉིད་ཀྱི་བསྟོད་པ་དབྱངས་སྙན་པོས་བསྟོད། དེ་ནས། གཞན་ཡང་ཇི་སྙེད་སུ་དག་སོགས་ཚོགས་བསགས་ཅི་རིགས་བྱ་ཞིང༌། བཟང་པོ་སྤྱོད་པ་སོགས་སྨོན་ལམ་གང་ལྕོགས་གདབ། མཐར་སྐྱབས་ཡུལ་རང་ལ་བསྟིམས་ནས་དགེ་བ་བསྔོ་ཤིས་བརྗོད་བྱའོ། །འདི་ཡང་རབ་ཚེས་ཞི་བ་ས་ཁྱི་ཧོར་ཟླ་དྲུག་པའི་ཚེས་ལ་འཇམ་དཔལ་མེ་ཏོག་མཆོད་པའི་དུས་སུ། མི་ཕམ་པས་བྲིས་པ་འགྲོ་ཀུན་གྱི་ཚོགས་གཉིས་ཡོངས་སུ་རྫོགས་ཤིང་རྒྱལ་བསྟན་རིན་ཆེན་ཕྱོགས་ཐམས་ཅད་ནས་རྒྱས་པའི་རྒྱུར་གྱུར་ཅིག །