Difference between revisions of "Ngb-pt-0586-vol-06-text"
m (Move page script moved page /home/ec2-user/Ngb/PT-500-599/ngb-pt-0586-text.docx.wiki to Ngb-pt-0586-vol-06-text) |
Latest revision as of 11:43, 20 March 2020
Front[edit]
Body[edit]
བྱེད། །ཐིག་ལེ་སྟོང་པའི་སྒྲོན་མ་ཡིས། །སྣ་ཚོགས་འོད་ལྔ་རང་གིས་མདངས། །རྩལ་རྫོགས་ཆོས་ཚིག་ཟད་པར་བྱེད། །དབྱིངས་འདི་རིག་པའི་ཡུལ་ཡིན་ནོ། །སྣང་བ་མི་འགག་ལྷུག་པར་འཆར། །འཁོར་འདས་ཤན་འབྱེད་རྣལ་དུ་དབབ། །དེ་ནས་དབྱིངས་རིག་སྣང་བ་བརྟག །འདི་ལ་གོམས་པའི་ཚད་རྙེད་ནས། །ཕྱི་རོལ་སྣང་བ་ཐམས་ཅད་ནི། །གོང་ནས་གོང་དུ་ཡར་མཆེད་ནས། །རིམས་ཀྱིས་གོམས་ནས་ཆོས་ཟད་དེ། །ཟག་བཅས་རང་དེངས་འཁོར་དོངས་སྤྲུགས། །ཅེས་གསུངས་ནས་འཇའ་འོད་དུ་ཡལ་ལོ། །སྔགས་ཀྱི་སྲུངས་མས་སྲུངས་ཅིག །པྱ་མྱ་ཡ། རྦ་སྦྱ་དྨ།། །། རྒྱ་གར་སྐད་དུ། བྷ་དྷ་ཨ་སྟེ་བ༷། བོད་སྐད་དུ། ཐེམས། ཚེ་ལོ་སུམ་བརྒྱ་པ་ཡི་དུས། །རྡོ་རྗེ་གདན་གྱི་འབྱུང་གནས་སུ། །ཡབ་ནི་བྲམ་ཟེ་མཚན་བཟང་དང་། །ཡུམ་ནི་དགེ་སློང་པདྨ་ལྕམ། །སྟོན་པ་རྡོ་རྗེ་འཆང་ཆེན་ང་། །མངོན་རྫོགས་རྒྱལ་པོ་བྱ་བར་འཁྲུངས། །འཁོར་ནི་རིགས་གསུམ་མགོན་པོ་ལ། །ཡང་དག་དོན་གྱི་ཆོས་རྣམས་བཤད། །དེ་ནས་མྱ་ངན་འདས་པའི་ཚེ། །གདུང་བ་བཅད་ཚིག་འདི་བབས་སོ ཨེ་མ་རིགས་གསུམ་སྤྲུལ་འཁོར་རྣམས། །གསང་སྔགས་ཀུན་གྱིས་ཡང་གསང་གནད། །ལུས་ངག་ཡིད་གསུམ་བྱ་བ་ནི། །དགུ་ཕྲུག་དག་ཏུ་གཏང་བར་བྱ། །ལུས་ངག་འདུག་སྟངས་བཅུ་གཅིག་གཟིར། །སྒོ་ས་གནད་ཕབས་ཟློག་ཟུར་གྱིས་