ལོ་ཙཱ་བ་ཆེན་པོ་བཻ་རོ་ཙ་ནའི་རྣམ་ཐར་ ལེའུ་གཉིས་པ

༈ ལེའུ་གཉིས་པ་རྒྱུ་འབྲས་ཀྱི་ཐེག་པ་མིའི་ཡུལ་དུ་བབས་ཚུལ།

གཉིས་པ་འདི་ཉིད་གོ་རྟོགས་ཀྱི་སྐལ་བ་དང་མི་ལྡན་པ་རྣམས་ལ༔ ལམ་སྟེགས་ཀྱི་ཐེག་པ་གཞན་བཤད་དུ་གསོལ༔ ཞེས་གསོལ་བ་བཏབ་པའི་དོན་ནི༔ སྤྱིར་འཇིག་རྟེན་གྱི་ཁམས་མཐའ་ཡས་པ་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་བར་སྟོན་པ་སྤྲུལ་པའི་སྐུ་ཐུབ་པ་དྲུག་ལ་སོགས་པ་མཐའ་ཡས་མུ་མེད་བསམ་གྱིས་མི་ཁྱབ་བརྗོད་ཀྱིས་མི་ལང་བར་སྣང་ནས༔ བསྟན་པ་སྡེ་སྣོད་གསུམ་ལ་སོགས་པ་བསམ་གྱིས་མི་ཁྱབ་པ་གང་ལ་གང་འདུལ་དུ་དོན་མཛད༔ ཁྱད་པར་མི་མཇེད་འཇིག་རྟེན་གྱི་ཞིང་ཁམས་འདིར༔ སྟོན་པ་ཤཱཀྱ་ཐུབ་པ་ལ་སོགས་པ་ཐུབ་པ་དྲུག་ཏུ་སྣང་ཞིང་གང་ལ་གང་འདུལ་དུ་དོན་མཛད་པའོ༔ སྤྱི་དོན་གཉིས་པ་ལྷ་དང་མིའི་ཡུལ་དུ་བསྟན་པ་བྱུང་ཚུལ་གྱི་ལོ་རྒྱུས་ནི༔ རྒྱུ་མཚན་ཉིད་ཀྱི་བསྟན་པ་བྱུང་ཚུལ་དང་༔ འབྲས་བུ་གསང་སྔགས་ཀྱི་བསྟན་པ་བྱུང་ཚུལ་ལོ༔ དང་པོ་རྒྱུ་མཚན་ཉིད་ཀྱི་བསྟན་པ་བྱུང་ཚུལ་ནི༔ ཞིང་ཁམས་སྟོང་གསུམ་གྱི་སྟོང་ཆེན་པོ་མི་མཇེད་འཇིག་རྟེན་གྱི་ཁམས་ལ༔ བྱེ་བྲག་ཏུ་འཛམ་བུའི་གླིང་འདི་ཉིད་དུ་གནས་ཝཱ་རཱ་ཎ་སཱི་དང་༔ རྡོ་རྗེ་གདན་དང་༔ བྱ་རྒོད་ཕུང་པོའི་རི་ལ་སོགས་པར༔ སྟོན་པ་སྤྲུལ་པའི་སྐུ་རྒྱལ་བ་ཤཱཀྱ་ཐུབ་པ་དགའ་ལྡན་གྱི་གནས་ནས་འཕོ་བ་ལ་སོགས་པ་མཛད་པ་བཅུ་གཉིས་ཀྱི་ཚུལ་དུ་དོན་མཛད་ཅིང་༔ འཁོར་ནི་ཉིད་ལས་མི་གཞན་པའི་ལྷན་ཅིག་པ་དང་༔ གོ་ཕྱེ་བའི་འཁོར༔ དང་པོ་ནི་འཇམ་དཔལ་དང་༔ ཐུགས་རྗེ་ཆེན་པོ་དང་༔ ཕྱག་ན་རྡོ་རྗེ་ལ་སོགས་པ་སྔར་སངས་རྒྱས་ནས་འདིར་འཁོར་ལྟར་དུ་སྣང་སྟེ་བསྟན་པའི་བྱ་བ་བྱེད་པ་རྣམས་སོ༔ གཉིས་པ་ནི་འཁོར་རྣམ་བཞི་ལ་སོགས་སྟོན་པ་བཞུགས་པའི་ཚེ༔ ཞལ་མཐོང་གསུང་ཐོས་ཏེ་དངོས་སུ་བཀའ་ལ་གནས་པ་རྣམས་སོ༔ གསུམ་པ་ནི་སྟོན་པ་སྐུ་མྱ་ངན་ལས་འདས་ནས་སྟོན་པའི་བསྟན་པ་ལ་ཞུགས་ཏེ༔ བཀའ་རྗེས་སུ་བསྒྲུབ་ཅིང་གསུང་དང་དུ་ལེན་པ་རྣམས་སོ༔ དུས་ནི་སྤྱིར་སྒྲོན་མ་བཀོད་པའི་དུས་ལས༔ ཁྱད་པར་དུ་ཚེ་ལོ་བརྒྱ་པའི་དུས་སུ་སྟོན་པ་ཤཱཀྱ་ཐུབ་པས་ཚིག་གི་སྒོ་ནས་བསྟན་པ་སྡེ་སྣོད་རྣམ་པ་གསུམ་གསུངས་ཏེ༔ བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་ཏེ༔ འདུལ་བ་ལུང་སྡེ་བཞི་ལ་སོགས་པ་ཉན་ཐོས་དང་མཐུན་པའི་སྡེ་སྣོད་རྣམས་གསུངས༔ བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར༔ ཕ་རོལ་ཏུ་ཕྱིན་པའི་ཕྱོགས་ཙམ་དང་༔ མདོ་སྡེ་མངོན་པ་ལ་སོགས་པ་གསུངས་སོ༔ བཀའ་ཐ་མ་ངེས་པ་དོན་གྱི་ཆོས་ཀྱི་འཁོར་ལོ་བསྐོར་ནས༔ ངེས་པ་དོན་གྱི་མདོ་སྡེ་དང་༔ སྡེ་སྣོད་གསུམ་ཆ་མཉམ་པ་གསུངས་སོ༔ དེའི་ཚེ་སྡུད་པ་པོ་ཀུན་དགའ་བོ་ལ་སོགས་པས༔ བསྟན་པ་སྡེ་སྣོད་རྣམ་པ་གསུམ་དུ་ཚིག་དང་ཡི་གེར་བསྡུས་པའོ༔ འཁོར་ཐུན་མོང་མ་ཡིན་པ་ལ་གསང་སྔགས་ཀྱང་འགའ་ཙམ་གསུངས་ཏེ༔ དེ་ཡང་ཤཱཀྱ་ཐུབ་པས་སྔགས་ཀྲི་ཡ་ནི་ཆུ་བོ་ནཻ་རཉྫ་ན་དང་དུར་ཁྲོད་ཆེན་པོ་སིངྒ་ལའི་ནགས་ཚལ་དུ་གསུངས༔ ཨུ་པ་དཔུང་བཟང་ཙནྡན་གྱི་ཚལ་ལ་སོགས་པར་གསུངས༔ ཡོ་ག་ནི་མེ་རི་འབར་བའི་དུར་ཁྲོད་ལ་སོགས་པར་གསུངས་སོ༔ ཀྲི་ཡོག་ལྷ་ཡུལ་དུ་གསུངས་པ་ནི༔ ཀྲི་ཡ་ལྷའི་གནས་ཆོས་བཟང་ལྷའི་འདུན་སར་སྟོན་པ་ཉིད་རིགས་ཀྱི་གཙོ་བོ་རྣམ་པར་སྣང་མཛད་ལ་སོགས་པའི་རྒྱལ་བ་རིགས་ལྔ༔ བྱང་ཆུབ་སེམས་དཔའ་རིགས་གསུམ་དང་༔ ལྷའི་དབང་པོ་བརྒྱ་བྱིན་ལ་སོགས་པ་རྣམས་ལ་གསུངས་སོ༔ ཡོ་ག་ནི་ལྷའི་གནས་རི་རབ་ཀྱི་རྩེ་མོ་རྣམ་པར་རྒྱལ་བའི་ཁང་བཟང་དུ་འཁོར་ཉེ་བའི་སྲས་བརྒྱད་ལ་སོགས་པ་ལ་གསུངས་སོ༔ གསང་སྔགས་འབྲས་བུའི་བསྟན་པ་བྱུང་ཚུལ་ནི༔ ཕྱི་ཐུབ་པ་རྒྱུད་ཀྱི་ཐེག་པ་དང་༔ ནང་དབང་བསྒྱུར་ཐབས་ཀྱི་ཐེག་པའི་བསྟན་པ་བྱུང་ཚུལ་ལོ༔ སྔ་མ་ཕྱི་རྒྱུད་ནི་གོང་དུ་ལྷ་དང་མིའི་ཡུལ་དུ་ཇི་ལྟར་གསུངས་པའི་ཚུལ་ལོ༔ ཕྱི་མ་ནང་པ་དབང་བསྒྱུར་ཐབས་ཀྱི་ཐེག་པ་ནི༔ བཅོམ་ལྡན་འདས་སྤྲུལ་པའི་སྐུ་ཤཱཀྱ་ཐུབ་པ་མྱ་ངན་འདས་ཁར༔ གསང་སྔགས་ཀྱི་བསྟན་པ་ཕྱིས་འབྱུང་བར་ལུང་བསྟན་ཏེ༔ ང་ནི་འདི་ནས་མི་སྣང་ནས༔ ལོ་ནི་བརྒྱད་དང་ཉི་ཤུ་ན༔ ལྷ་གནས་གསུམ་དུ་གྲགས་པ་ཡི༔ བསྟན་པའི་སྙིང་པོ་དམ་པ་ཞིག༔ འཛམ་གླིང་ཤར་ལྷོའི་ཕྱོགས་མཚམས་སུ༔ མི་ལས་སྐལ་ལྡན་རིགས་ཅན་ཏེ༔ རྒྱལ་པོ་ཛ་ཞེས་བྱ་བ་ལ༔ སྔོན་དུ་ལྟས་རྣམས་སྣང་བར་འགྱུར༔ དྲག་ཤུལ་ཅན་ཞེས་བྱ་བའི་རྩེར༔ གྲོགས་ཀྱི་སེམས་ཅན་དམན་པའི་ལུས༔ ལངྐའི་བདག་པོ་ལ་སོགས་པ༔ ལག་ན་རྡོ་རྗེས་སྟོན་པར་འགྱུར༔ ཞེས་ལུང་བསྟན་ཏོ༔ དེ་ནས་བཅོམ་ལྡན་འདས་སྐུ་ཡོངས་སུ་མྱ་ངན་འདས་ནས༔ བསྟན་པ་བསྐྱེད་རྫོགས་གསུམ་བྱུང་བ་ཡིན་ཏེ༔ རྒྱུད་མཧཱ་ཡོ་གའི་ཆོས་རྣམས་ནི༔ སྤྲུལ་སྐུ་འདས་ནས་ལོ་ཉི་ཤུ་རྩ་བརྒྱད་ན༔ རྒྱལ་པོ་ཛ་ལ་རྨིས་ལྟས་བདུན་བྱུང་སྟེ༔ བཀའ་བབས་ནས་ཕྱག་ན་རྡོ་རྗེས་གསུངས་སོ༔ དེ་ཡང་རི་མ་ལ་ཡའི་ཤར་ལྷོ་ན༔ ཨ་སུ་རའི་བྲག་ཕུག་དང་༔ རྒྱལ་པོ་ཛའི་ཕོ་བྲང་ཡོད་དོ༔ རི་མ་ལ་ཡ་ནི་སངས་རྒྱས་ཐམས་ཅད་ཀྱི་གསང་སྔགས་སྟོན་པའི་གནས་ཡིན་ཏེ༔ རི་དེ་ནི་ཤིན་ཏུ་བཀྲ་ཤིས་ཤིང་བྱིན་ཆེ་བའི་མཐོང་སྣང་དུ་མ་ཡོད་དེ༔ དེ་ཡང་ལས་དག་པ་ལ་ལས་ནི་རིན་པོ་ཆེ་སྣ་ཚོགས་ལས་གྲུབ་པར་སྣང་༔ ལ་ལས་ནི་བྲག་རི་ཤིན་ཏུ་རྣོ་ཞིང་བཟེད་ལ་མཐོང་བར་སྣང་བ་དང་༔ ལ་ལས་ནི་གནམ་ལྕགས་འབར་བ་གང་གིས་ཀྱང་བསྒྲོད་པར་མི་ནུས་པར་སྣང་ངོ་༔ ངོས་ལ་ཙནྡན་གྱི་སྡོང་པོའི་རྩ་བ་ན་གཅན་གཟན་གྱི་རྒྱལ་པོ་སེང་གེ་གནས་པ༔ ལོགས་ལ་བྲག་དཀར་པོ་སེང་གེ་འདྲ་བ་ལ་འདབ་ཆགས་ཀྱི་རྒྱལ་པོ་བྱ་རྒོད་ཀྱི་ཚང་བཅས་པ༔ རྩ་བ་ན་ཙནྡན་གྱི་ནགས་ལ་སྟག་གི་འཁྲས་ས་ཡོད་པ༔ རི་དེའི་རྩེ་མོ་འཁོར་ལོ་རྩིབས་བརྒྱད་དུ་ཡོད་པ༔ དེ་ན་དཔལ་ཕྱག་ན་རྡོ་རྗེའི་ཕོ་བྲང་ཡོད་དེ༔ དེར་སྐལ་མེད་རྣམས་ཀྱིས་མི་བསྒྲོད་ཅིང་སྐལ་ལྡན་རྣམས་འདུ་ཞིང་གསང་སྔགས་སྤྱོད་པའོ༔ རི་དེའི་ཤར་ལྷོ་ན་ཨ་སུ་ར་གསང་བའི་བྲག་ཕུག་ཡོད་པ༔ བྲག་ཕུག་དེའི་སྒོ་ཟླ་གམ་རང་བྱུང་དུ་ཡོད་པའི་ནང་ན་བཀྲ་ཤིས་ཀྱི་རྟགས་རིན་པོ་ཆེ་ཟུར་བརྒྱད་ལ་ཉི་ཟླ་གཉིས་ཀྱིས་བརྒྱན་པའོ༔ ལོགས་ལ་བྱ་ཀ་ལན་ཏ་ཀའི་ཚང་བཅས་པའོ༔ དེར་རྒྱལ་པོ་ཛ་ལ་རྨིས་ལྟས་བདུན་བྱུང་སྟེ༔ སྐུ་གསུང་ཐུགས་རྟགས་ཐིམ་པ་དང་༔ རིན་པོ་ཆེའི་གླེགས་བམ་བབས་པ་དང་༔ ཆོས་ཀྱི་བགྲོ་གླེང་བྱེད་པ་དང་༔ ཀུན་གྱི་དམ་པར་བསྒྲགས་པ་དང་༔ མཆོད་པ་ཆེན་པོ་བྱེད་པ་དང་༔ རིན་ཆེན་ཆར་དུ་འབབ་པ་དང་༔ སངས་རྒྱས་ས་ལ་ལུང་བསྟན་པའོ༔ ཞེས་གསུངས་སོ༔ དང་པོ་ནི་རི་མ་ལ་ཡའི་རྩེ་མོར་སངས་རྒྱས་ཀུན་འདུས་ཏེ༔ སངས་རྒྱས་དང་ཕྱག་རྡོར་གྱི་སྐུ་ལས་འོད་ཟེར་སྣ་ཚོགས་འཕྲོས་ཏེ༔ འཇིག་རྟེན་ཀུན་བསྲེགས་དག་པར་བྱས་ནས༔ ཚུར་འདུས་ཉི་འོད་འབར་བ་ཨོཾ་གྱིས་མཚན་པས་མུན་པ་བསལ་ནས་སྤྱི་བོར་ཐིམ༔ ཡང་གསུང་ལས་འོད་ཟེར་འཕྲོས་ཐེག་པ་ཆེན་པོའི་ཆོས་ཀྱི་སྒྲ་འབྲུག་སྟོང་ལྡིར་བ་ཙམ་སྟོང་གསུམ་དུ་གྲགས་ནས༔ ཚུར་འདུས་ཟླ་བ་འོད་འབར་བ་ཨཱཿས་མཚན་པར་གྱུར་ཏེ༔ རྐང་མཐིལ་དང་མགྲིན་པར་ཐིམ༔ ཡང་ཐུགས་ལས་ཡེ་ཤེས་ཀྱི་འོད་ཟེར་བྱུང་༔ སྣང་སྲིད་ཐམས་ཅད་གསལ་བར་བྱས་ནས་ཚུར་འདུས་ཏེ༔ རྡོ་རྗེ་འོད་འབར་བ་ཞིག་ཏུ་གྱུར་ནས་ཐུགས་ཁར་ཐིམ་པ་རྨིས་སོ༔ དེ་ནས་སྣང་སྲིད་ཐམས་ཅད་ལྟོ་རུ་ཟོས་ཏེ་སྣང་སྲིད་ལྟོ་བ་ན་འཕྱོ་བ་ཞིག་རྨིས་ཏེ་དང་པོའོ༔ དེ་ནས་ཡང་ཐུན་གཅིག་གི་རྨི་ལམ་ན༔ ནམ་མཁའ་ལ་སྤྲིན་རིན་པོ་ཆེ་གསེར་གྱི་ཁ་དོག་ལ་ཉི་ཟླའི་འོད་ལྟར་ཤར་ནས༔ དེའི་གསེབ་ནས་རིན་པོ་ཆེའི་སྒྲོམ་བུ་ཆེན་པོ་ནས༔ རིན་ཆེན་གསེར་གྱི་གླེགས་བམ་ལ་བཻཌཱུརྻ་ཞུན་མས་བྲིས་པ༔ རྩ་བ་རང་ནན་དུ་བྱས་པ་སྐར་མདའ་ལྷགས་པ་བཞིན་བྱུང་ནས་ཁང་སྟེང་ཁྲིག་གིས་གང་བ་རྨིས་ཏེ་གཉིས་པའོ༔ ཡང་ཐུན་གཅིག་གི་རྨི་ལམ་ན༔ སངས་རྒྱས་ཐམས་ཅད་ལ་ལ་ཉི་ཟླ་ལ་བཞོན་ནས་བྱོན༔ ལ་ལ་ཆོས་ཀྱི་འཁོར་ལོ་བསྐོར་བའི་རྟགས་སུ་གསེར་གྱི་འཁོར་ལོ་རྩིབས་སྟོང་དང་ལྡན་པ་བསྣམས་ནས་བྱོན་ཏེ༔ སྲིད་པ་གསུམ་གྱི་ཁ་ལོ་གྱེན་ལ་བསྒྱུར་ཞིང་རྒྱལ་པོ་ཛའི་ཁང་སྟེང་ན་ཐེག་པ་ཆེན་པོ་གསང་སྔགས་ཀྱི་བགྲོ་གླེང་དི་རི་རི་བྱེད་པ་རྨིས་ཏེ་གསུམ་པའོ༔ ཡང་ཐུན་གཅིག་གི་རྨི་ལམ་ན༔ སངས་རྒྱས་དང་རིག་འཛིན་ཐམས་ཅད་ཀྱིས་རྒྱལ་པོ་ཛ་ལ་དམ་པར་བསྟོད་ཅིང་སྒྲོག་པ་རྨིས་ཏེ༔ ནམ་མཁའ་ལ་སྒྲ་ཡང་འདི་སྐད་བསྒྲག་གོ༔ ལས་དང་སྐལ་བར་ལྡན་པ་ཡི༔ སྔོན་དུས་ལུང་བསྟན་རྒྱལ་པོ་ཛ༔ བསོད་ནམས་ལྡན་པའི་དྲྭ་མ་ཁྱོད༔ སྤྲུལ་པས་ཇི་ལྟར་ལུང་བསྟན་བཞིན༔ ད་ལྟའི་དུས་འདིར་མངོན་ཤར་གྱི༔ འཁོར་བའི་སྙིང་པོ་རྟོགས་བྱའི་ཕྱིར༔ ང་ཡི་ཆོ་འཕྲུལ་བྱིན་རླབས་ཀྱིས༔ བསྟན་པའི་སྙིང་པོ་དམ་པ་ཞིག༔ ཀུན་གྱི་མཆོག་གྱུར་གསང་སྔགས་རིགས༔ སྐལ་ལྡན་ཁྱོད་ལ་གཏད་པར་བྱ༔ ཞེས་སྒྲོག་པ་རྨིས་ཏེ་བཞི་པའོ༔ ཡང་ཐུན་གཅིག་གི་རྨི་ལམ་ན༔ རིན་པོ་ཆེའི་གླེགས་བམ་དེ་དག་ལ་རིག་འཛིན་བྱང་ཆུབ་སེམས་དཔའ་དང་༔ ལྷའི་ཚོགས་མང་པོ་དང་༔ གནོད་སྦྱིན་གྱི་ཚོགས་མང་པོས་ཀྱང་མཆོད་པ་དཔག་ཏུ་མེད་པ་དང་༔ སྐོར་བ་བྱེད་ཅིང་བསྟོད་པའི་ཚིགས་བཅད་མང་པོ་བྱེད་པ་རྨིས་ཏེ་ལྔ་པའོ༔ ཡང་ཐུན་གཅིག་གི་རྨི་ལམ་ན༔ ནམ་མཁའ་ལ་རིན་པོ་ཆེ་སྣ་ཚོགས་པ་སྤྲིན་ལྟར་གཏིབས༔ ཆོ་འཕྲུལ་གྱི་འབྲུག་སྒྲ་ཆེན་པོ་སྒྲོག༔ རིན་པོ་ཆེ་དེ་དག་ལས་སྣང་སྲིད་གསལ་བའི་འོད་གློག་སྟོང་འཁྱུག་པ་ལྟ་བུ་འབྱུང་ཞིང་༔ རིན་པོ་ཆེའི་ཆར་སྣང་སྲིད་ཁྱབ་པར་བབས་ཏེ༔ རིན་པོ་ཆེའི་མེ་ཏོག་སྣ་ཚོགས་པ་བཏུས་ཤིང་༔ རང་གཞན་ཐམས་ཅད་མཛེས་པར་བྱས་པ་རྨིས་ཏེ་དྲུག་པའོ༔ ཡང་ཐུན་གཅིག་གི་རྨི་ལམ་ན༔ རིན་པོ་ཆེའི་སྒྲོན་མེས་མུན་པ་ཐམས་ཅད་ནི་སེལ༔ བདུད་རྩི་སྨན་གྱིས་འགྲོ་བའི་གཅོང་ནད་ཐམས་ཅད་ནི་སྦྱངས༔ འགྲོ་བ་ཀུན་ཀྱང་རྡོ་རྗེ་རྣལ་འབྱོར་ཞེས་པའི་སྒྲ་ནི་ཕྱོགས་བཅུར་བསྒྲགས༔ སངས་རྒྱས་ཐམས་ཅད་ཀྱིས་ལུང་བསྟན་པ༔ བསོད་ནམས་ཆེན་པོའི་སྐལ་ལྡན་གྱི༔ རྒྱལ་པོ་ཛ་ཞེས་བྱ་བ་ཁྱོད༔ ཇི་ལྟར་སངས་རྒྱས་ལུང་བསྟན་བཞིན༔ བསྟན་པའི་སྙིང་པོ་གསང་སྔགས་དོན༔ མངོན་སུམ་གསལ་བར་རྟོགས་གྱུར་ནས༔ སངས་རྒྱས་ཉིད་དང་སྐལ་བ་མཉམ༔ བདེ་བ་ཅན་གྱི་ཞིང་ཁམས་སུ༔ ཁྱོད་ནི་མངོན་སུམ་འཚང་རྒྱའོ༔ ཞེས་པ་དང་༔ ཡང་དུས་གསུམ་སངས་རྒྱས་ཐམས་ཅད་ཀྱི༔ རྡོ་རྗེ་གསང་ཆེན་གསང་བ་ཡིས༔ དམ་པའི་མཛོད་གསུམ་གླེགས་བམ་དུ༔ རྫོགས་པར་བྲིས་པ་ཁྱོད་ལྟོས་ལ༔ ལྷ་དང་མི་ཡི་རིག་འཛིན་ལ༔ རིམ་པར་བརྒྱུད་དེ་བསྒྲག་པར་གྱིས༔ ཞེས་རྨིས་ཏེ་བདུན་པའོ༔ ནངས་པར་མནལ་སད་དེ་འཁོར་བསྡུས་ནས་རྨི་ལམ་བཟླས་པ༔ མདང་གསུམ་བདག་ལ་རྨི་ལམ་འདི་ལྟར་རྨིས༔ མ་ལ་ཡ་ཡི་རྩེ་མོ་ན༔ ཕྱག་ན་རྡོ་རྗེའི་ཕོ་བྲང་བཞུགས༔ སྐུ་ལས་འོད་འཕྲོས་ཐམས་ཅད་བསྲེགས༔ གསུང་སྒྲ་འབྲུག་ལྟར་སྟོང་གསུམ་སྒྲོག༔ ཐུགས་ལས་འོད་བྱུང་སྣང་སྲིད་གསལ༔ སྐུ་ལས་ཉི་འོད་སྤྱི་བོར་ཐིམ༔ གསུང་ལས་ཟླ་འོད་རྐང་མཐིལ་ཐིམ༔ རྡོ་རྗེ་འོད་འབར་ཐུགས་ཀར་ཐིམ༔ འབྲུ་གསུམ་ཡི་གེ་གནས་གསུམ་ཐིམ༔ སྣང་སྲིད་ལྟོ་རུ་ཟོས་པ་རྨིས༔ མཁའ་ལ་རིན་ཆེན་སྤྲིན་ལྟར་གཏིབས༔ རིན་ཆེན་ཉི་འོད་འབར་བ་ལ༔ རིན་ཆེན་སྨུག་པོའི་སྒྲོམ་ཆེན་ནས༔ རིན་ཆེན་གསེར་གྱི་གླེགས་བམ་ལ༔ བཻ་ཌཱུར་ཞུན་མའི་རྩི་ཡིས་བྲིས༔ སྐར་མདའ་བཞིན་དུ་བབས་པ་རྨིས༔ སངས་རྒྱས་བྱང་ཆུབ་སེམས་དཔའ་རྣམས༔ ཉི་ཟླ་བཞོན་ནས་མཁའ་ལ་བྱོན༔ གསེར་གྱི་འཁོར་ལོ་ཕྱག་ན་ཐོགས༔ སྲིད་གསུམ་ཁ་ལོ་གྱེན་ལ་བསྒྱུར༔ གསང་སྔགས་བགྲོ་གླེང་མཛད་པ་རྨིས༔ སངས་རྒྱས་ཀུན་དང་རིག་འཛིན་གྱིས༔ ཀུན་གྱི་དམ་པར་བདག་སྒྲོག་རྨིས༔ གླེགས་བམ་ཆེན་པོ་དེ་དག་ལ༔ སངས་རྒྱས་བྱང་ཆུབ་རིག་པ་འཛིན༔ མཁའ་འགྲོ་ལྷ་དང་གནོད་སྦྱིན་སོགས༔ ཀུན་ཀྱང་ཕྱག་དང་སྐོར་བ་བྱེད༔ མཆོད་ཅིང་བསྟོད་པ་བྱེད་པ་རྨིས༔ མཁའ་ལ་རིན་ཆེན་སྤྲིན་ལྟར་གཏིབས༔ ཆོ་འཕྲུལ་འབྲུག་སྒྲ་གློག་སྟོང་འཁྱུག༔ རིན་ཆེན་སྣ་ཚོགས་ཆར་བཞིན་འབབ༔ རིན་ཆེན་མེ་ཏོག་བཏུས་པ་རྨིས༔ སངས་རྒྱས་གསུང་གི་འོད་ཟེར་ལས༔ སངས་རྒྱས་ས་ལ་ལུང་བསྟན་རྨིས༔ དེ་སྐད་རྨི་ལམ་བཟླས་པ་ཡིས༔ འདུས་པ་ཐམས་ཅད་ངོ་མཚར་ཏེ་བལྟས་པས༔ ཁང་སྟེང་ན་རིན་པོ་ཆེ་གསེར་གྱི་གླེགས་བམ་ལ་བཻ་ཌཱུརྻ་ཞུན་མའི་ཡི་གེ་བྲིས་པ༔ རྩ་བ་རང་ནན་དུ་བཅས་པའི་གསང་སྔགས་ཀྱི་རྒྱུད་སྡེ་པོ་ཏི་མང་པོ་དང་༔ ཕྱག་རྡོར་གྱི་སྐུ་ཁྲུ་གང་པ་གཅིག་འདུག་ནས༔ རྒྱལ་པོས་འདི་སྐད་གསོལ་པ༔ སྔོན་ཚེ་གོང་ནས་སྒྲུབ་པ་ཡི༔ ལས་ཀྱིས་མཇལ་བའི་ས་ཕྱོགས་སུ༔ བསྟན་པའི་སྙིང་པོ་དམ་པ་འདི༔ ནམ་ཞིག་གཏན་དུ་མི་གཏང་ངོ་༔ ངོ་མཚར་ཡ་མཚན་རྨད་ཀྱི་སྐུ༔ འདྲེན་པ་མཆོག་གི་དཔལ་ཡང་གྲགས༔ ལས་ཀྱིས་འབྲེལ་བའི་ལྷ་མཆོག་ཁྱོད༔ མོས་པའི་གཟུངས་སུ་ལྷ་མཆོག་འཛིན༔ ཨ་ཏི་བླ་མེད་ཐེག་པ་མཆོག༔ ཅེས་གསུངས་སོ༔ དེ་ནས་པོ་ཏི་རྣམས་ལ་བལྟས་པས་བརྡའ་མ་མཇལ་ཏེ༔ རྒྱལ་པོ་མ་དགྱེས་ཤིང་བཤུམས་ནས་ཐུགས་དགོངས་ལ༔ མཁས་པ་གཞན་ལ་ལྟར་གཞུག་པར་དགོངས་ཏེ༔ པཎྜི་ཏ་མཁས་པ་སྤྱན་འདྲེན་དུ་བཏང་བས༔ པཎྜི་ཏ་རྣམས་ཀྱི་ཐུགས་ལ༔ པཎྜི་ཏ་ཀུན་མཐུན་པར་ཤེས་ན་ལེགས་ཏེ༔ མ་ཤེས་ན་སྐྱེངས་ཀྱིས་དོགས་ནས་འདིར་མ་བྱོན་པར་འདིར་ཁྱེར་ཤོག་གསུངས་སོ༔ དེར་གླང་པོ་ཆེ་ལ་བཀལ་ཏེ་པོ་ཏི་རྣམས་སྤྱན་སྔར་འགྲིམས་པས༔ པཎྜི་ཏ་རྣམས་ཀྱིས་མ་མཁྱེན་ནས༔ སླར་རྒྱལ་པོའི་ཕྱག་ཏུ་ཕུལ་བས་རྒྱལ་པོ་ཐུགས་མུག་སྟེ་བཤུམས་སོ༔ ཡང་རྒྱལ་པོའི་ཐུགས་དགོངས་ལ༔ ངའི་སྒྲིབ་པ་མ་དག་ཅིང་ཚོགས་མ་རྫོགས་པས་ལན་པ་ཡིན་སྙམ་ནས༔ རྡོ་རྗེ་སེམས་དཔའི་སྐུའི་རྒྱུད་ཀྱི་པོ་ཏི་རྣམས་ལ་གསོལ་བ་བཏབ་ཅིང་བསྒྲུབས་པས་སྒྲིབ་པ་དག༔ དངོས་གྲུབ་ཕྲ་མོ་ཐོབ་སྟེ་གླེགས་བམ་ལ་བལྟས་པས༔ སྒྱུ་འཕྲུལ་རྡོ་རྗེ་སོགས་ཐུགས་ཀྱི་སྒྲུབ་པ་དང་༔ ཞལ་མཐོང་གི་ལེའུ་གཉིས་ཤེས་སོ༔ དེ་ནས་ཕྱག་རྡོར་གྱི་སྐུ་ལ་བརྟེན་ནས་ཐུགས་ཀྱི་སྒྲུབ་པ་བསྒྲུབས་པས༔ ཟླ་བ་དྲུག་ན་རྡོ་རྗེ་སེམས་དཔའི་ཞལ་དངོས་སུ་མཇལ་ཏེ༔ དངོས་གྲུབ་ཅི་འདོད་གསུངས་པ་ལ༔ བདག་ནི་གླེགས་བམ་འདི་རྣམས་རྟོགས་པར་འཚལ་ལོ༔ ཞེས་ཞུས་པས༔ ཕྱག་ཤིང་དང་རིན་པོ་ཆེའི་འཁོར་ལོ་ལག་ཏུ་གཏད་དེ༔ དབང་བསྐུར་གནང་བ་བྱིན་ནས་དོན་གྱི་མདོ་ཙམ་གསུངས་ནས་མི་སྣང་བར་གྱུར་ཏོ༔ དེར་རྒྱལ་པོས་གླེགས་བམ་རྣམས་ལ་གཟིགས་པས་ཡི་གེ་འབྲུ་གཅིག་ཀྱང་མ་ལུས་པར་མཁྱེན་ཏེ༔ དེ་ཉིད་དུ་དགྱེས་པ་ཆེན་པོ་སྐྱེས་སོ༔ དེ་ནི་འོག་མིན་དུ་ལོངས་སྐུས་གསུངས་པའི་ཐེག་པ་ཉིད་མི་ཡུལ་དུ་རྡོ་རྗེ་སེམས་དཔས་རྒྱལ་པོ་ཛ་ལ་གསུངས་ནས༔ ཏནྟྲ་སྡེ་ཆེན་པོ་བཅོ་བརྒྱད་ལ་སོགས་པར་ཕྱེ་ནས་རིམ་པར་བརྒྱུད་ཚུལ་ལོ༔ ལུང་ཨ་ནུ་ཡོ་གའི་བརྒྱུད་ཚུལ་ནི༔ བཅོམ་ལྡན་འདས་མྱ་ངན་ལས་འདས་ནས༔ ལོ་ཉེར་བརྒྱད་ན་དམ་པའི་རིགས་ཅན་ལྔས༔ རི་མ་ལ་ཡའི་རྩེ་མོ་ན་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཡིད་ལ་བྱས་ནས༔ ཀྱེ་མ་ཀྱི་ཧུད་ཀྱེ་མ་ཀློང་༔ སྟོན་པའི་སྒྲོན་མེའི་འོད་ནུབ་ནས༔ འཇིག་རྟེན་མུན་པ་གང་གིས་སེལ༔ ཞེས་པ་ལ་སོགས་པའི་གདུང་ཚིག་ཉེར་ལྔ་བཏོན་པས༔ དེ་བཞིན་གཤེགས་པ་ཐམས་ཅད་ཀྱིས་གསང་བའི་བདག་པོ་ལ་བསྐུལ་ཏེ༔ གསང་བའི་བདག་པོ་ཁྱོད་ཉོན་ཅིག༔ སྔོན་གྱི་གོ་ཆ་ཡལ་ལམ་ཅི༔ འཇིག་རྟེན་སྡུག་བསྔལ་མི་ཤེས་སམ༔ སྙིང་རྗེས་ས་ལ་བབས་ནས་ཀྱང་༔ འཇིག་རྟེན་གདུང་བ་སེལ་བར་རིགས༔ ཞེས་བསྐུལ་བས༔ གསང་བདག་གི་གསུང་བར་ཞལ་གྱིས་བཞེས་ཏེ༔ ཐོག་མ་མཐའ་མ་མེད་པ་རུ༔ བསྐུལ་བའི་དུས་ནི་གང་བྱུང་བར༔ བདག་ཀྱང་དེ་བཞིན་ཆོ་འཕྲུལ་སྣང་༔ ཞེས་གསུངས་ནས་རི་མ་ལ་ཡའི་རྩེར་དམ་པའི་རིགས་ཅན་ལྔ་ལ་མདོ་དགོངས་འདུས་ལ་སོགས་པ་གསུང་ཚུལ་དང་༔ ནུབ་ཕྱོགས་ཨུ་རྒྱན་གྱི་ཡུལ་དྷ་ན་ཀོ་ཤའི་གླིང་དུ་གསང་བའི་བདག་པོ་ཕྱག་ན་རྡོ་རྗེས༔ སྤྲུལ་པའི་སྐུ་དགའ་རབ་རྡོ་རྗེ་ནས་མར་ལ་དཔལ་ཡང་དག་གི་རྒྱུད་དང་༔ མན་ངག་ལ་སོགས་པ་གསུང་ཚུལ་དང་༔ གཞན་ཡང་ཕུར་པ་དང་མ་མོ་ལ་སོགས་པ་ཇི་ལྟར་བབས་པའི་ཚུལ་རྒྱས་པར་གསུངས་སོ༔

བཻ་རོ་ཙ་ནའི་རྣམ་ཐར་འདྲ་འབག་ཆེན་མོ་ལས༔ རྒྱུ་འབྲས་ཀྱི་ཐེག་པ་མི་ཡུལ་དུ་བབས་པའི་སྐབས་ཏེ་ལེའུ་གཉིས་པའོ༔

ས་མ་ཡ༔ རྒྱ་རྒྱ་རྒྱ༔