Ngb-pt-0937-vol-10-text: Difference between revisions
No edit summary |
m (Move page script moved page PT-900-975/ngb-pt-0937-vol-10-text to Ngb-pt-0937-vol-10-text) |
| (One intermediate revision by the same user not shown) | |
(No difference)
| |
Latest revision as of 09:01, 20 March 2020
Front
Body
བཅོམ་ལྡན་འདས་རྡོ་རྗེ་བསྐལ་པའི་བདག་པོ་ལ་ཕྱག་འཚལ་ལོ། །སྲིད་པར་བཅས་པའི་འཇིག་རྟེན་དང་། །ཐུགས་རྗེར་བཅས་པའི་ཕོ་བྲང་ཀུན། །སྤྲུལ་པའི་འཁོར་ལོ་འོད་འབར་བའང་། །མངོན་སུམ་སངས་རྒྱས་མཁའ་ལ་ཤར། །ཕྱོགས་བཅུའི་འཇིག་རྟེན་མང་པོ་ནས། །སྤྱན་དྲངས་ལ་སོགས་རྩོལ་བའི་ནད། །བདེ་བ་གསལ་བའི་ཐིག་ལེ་ལས། །སངས་རྒྱས་གཞན་དུ་མི་རྩོལ་ལོ། །སེམས་དང་ཆོས་ལས་སངས་རྒྱས་གཞན་ན་མེད། །མཉམ་ཉིད་ནམ་མཁའ་ལྟ་བུའི་རང་བཞིནལས། །སྣུ་ཚོགས་མཚན་མ་རྡུལ་དུ་བརླག་པའི་ཕྱིར། །ཕྱག་རྒྱའི་ཚོགས་ཀྱང་བསྐལ་པའི་མེ་ལྟར་འབར། །ཡེ་ནས་ལྷུན་གྱིས་གྲུབ་པའི་རང་བཞིན་ལས། །རྩོལ་བའི་སྡུག་བསྔལ་རྒྱ་མཚོའི་རླབས་དང་འདྲ། །ཆོས་སོ་ཅོག་གི་ང་བོ་ཉིད། །མ་བཙལ་བཞག་པས་རྡུལ་དུ་བརླག །ཐམས་ཅད་བདག་ཉིད་རང་གི་ལྷ། །དཀྱིལ་འཁོར་ཀུན་ཏུ་ཞུགས་པ་ལ། །དུས་གསུམ་མཉམ་སྦྱོར་འབྱུང་འཇུག་མེད། །མ་བཙལ་ལྷུན་གྱིས་གྲུབ་པར་འགྱུར། །ཕྱི་ནང་སྤྱོད་ཡུལ་མ་ལུས་པ། །མཉམ་དག་ལྷུན་གྱིས་གྲུབ་པ་ལ། །དུས་གསུམ་མཉམ་པར་བཞག་པ་ནི།།བཅིང་དུ་མེད་པའི་ཕྱག་རྒྱ་ཡིན། །མི་ཕྱེད་་ག་ལེར་གཅིག་པ་ལ། །དུས་གསུམ་འབྱུང་འཇུག་མེད་པ་ནི། །སངས་རྒྱས་ཀུན་དང་མཉམ་པའི་ཕྱིར། །བསྲུང་དུ་མེད་པའི་དམ་ཚིག་མཆོག ཁམས་གསུམ་ངོ་བོ་རང་རག་དབྱིངས། །ཕྱོགས་བཅུ་རྒྱ་དང་བྲལ་བ་ཡི། །བཅོས་པ་མེད་པའི་འཁོར་ལོ་ལ། །མ་བཀོད་ཤར་བའི་དཀྱིལ་འཁོར་མཆོག །ཐམས་ཅད་མངོན་སུམ་ཤར་བ་ཡང་། །བྱིན་རླབས་མཐུ་ལ་མི་ལྟོས་པར། །ཡིད་བཞིན་ལྷུན་གྱིས་གྲུབ་པ་ནི། །བསྔོ་དང་བྲལ་བས་མཆོད་པའི་མཆོག །རྟོགས་པའི་རྒྱལ་མཚན་ཤར་བའི་ཕྱིར། །ཐམས་ཅད་ངོ་བོ་བདག་ཉིད་སྐུ། །དོན་ལ་རིམ་པས་མི་འགྲུབ་པས། །ཐོགས་པ་མེད་པ་དབང་གི་མཆོག །ཕྱོགས་བཅུའི་འཇིག་རྟེན་རབ་འབྱམས་ན། །གཡོ་ཞིང་བསྐྱོད་པའི་ཆོས་རྣམས་ཀུན། །རང་བྱུང་སྤྲུལ་པ་བསམ་ཡས་ཀྱིས། །བྱ་བྱེད་མེད་པའི་ཕྲིན་ལས་ཕུལ། །མི་དམིགས་བྱམས་པ་ཆེན་པོ་སྟེ། ། མཐའ་ཡས་ཐུགས་རྗེ་ཆེན་པོ་ཡིན། །རབ་འབྱམས་བདེ་ལ་དགའ་བ་སྟེ། །སྟོང་ཉིད་གསལ་བ་བཏང་སྙོམས་སོ། །གསང་སྔགས་ཆེན་པོའི་ཁྱད་པར་ནི། །རང་རིགས་རྒྱལ་བའི་ཐུགས་རྗེ་ཡིས། །བག་་གས་རྡུལ་དུ་བརློག་པ་དང་། །མཚན་མ་ཟིལ་གྱིས་གནོན་པ་ནི། ཁྱུང་ཆེན་མཁའ་ལ་ཐོགས་མེད་པས། །སྟེང་འོག་རིམ་གྱིས་མི་བགྲོད་དེ། །སྣང་བ་དུས་གཅིག་གསལ་བ་ནི། །སྐྱེ་འགྲོ་འདུལ་བའི་གཉེན་པོ་ཡིན། །སེང་གེའི་སྐད་ལ་འཇིགས་མེད་པས། །གཅན་གཟན་རིམ་གྱི་མི་འདུལ་ཏེ། །གཞན་གྱིས་རྩོལ་བས་མི་ཆུང་པས། །དུད་འགྲོ་འདུལ་བའི་གཉེན་པོ་ཡིན། །རང་བཞིན་གསལ་བའི་བྱང་ཆུབ་སེམས། །རྒྱུ་འབྲས་རིམ་གྱི་མི་བགྲོད་དེ། ། བདེ་ཆེན་མཁའ་ལ་ཐོགས་མེད་པས། །རྣམ་རྟོག་སྒྲོལ་བའི་གཉེན་པོ་ཡིན། །བྱང་ཆུབ་སེམས་མི་འགྱུར་བའི་རྡོ་རྗེ། །ཐུགས་རྗེ་ཆེན་པོའི་དོན། །གནམ་སྤར་འདེབས་རྫོགས་སོ།། །།བྱང་ཆུབ་སེམས་དཔའ་འཁོར་ལོ་རྡོ་རྗེ་ཞེས་བྱ་བའི་རྒྱུད་བཞྭགས་སོ། ། རྒྱ་གར་སྐད་དུ། བཛྲ་ཙཀྲ། བོད་སྐད་དུ། འཁོར་ལོ་རྡོ་རྗེ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་