Ngb-pt-0480-vol-05-text
Front[edit]
Body[edit]
སྣང་བའི་ཕྱིར། །འཁྲུལ་སྣང་ཆེན་པོའི་རྒྱུད་ཆེན་ཅེས་ཀྱང་བྱའོ། །ཆོས་རྣམས་ཐམས་ཅད་མ་ལུས་འདུས་པའི་ཕྱིར། །རྫོགས་པ་ཆེན་པོའི་རྒྱུད་ཆེན་ཅེས་ཀྱང་བྱའོ། །ཇི་ལྟར་འདོད་པ་བཞིན་དུ་འབྱུང་བའི་ཕྱིར། །རིན་པོ་ཆེ་རྒྱས་པ་ཆེན་པོའི་མདོ་ཞེས་ཀྱང་བྱའོ། །བྱང་ཆུབ་སེམས་རིན་པོ་ཆེ་རྒྱས་པ་ཆེན་པོའི་མདོ་ལས། །རྒྱུད་དུ་མིང་བཏགས་པའི་ལེའུ་སྟེ་ང་གཅིག་པའོ།། །།བྱང་ཆུབ་ཀྱི་སེམས་རིན་པོ་ཆེ་རྒྱས་པ་ཆེན་པོའི་མདོ་ཞེས་བྱ་བ་རྫོགས་སོ།། །། སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། །གང་གིས་གང་ལ་དབང་བསྐུར་བྱིན་རླབས་དང་། །ཆོས་སྐུ་རང་བྱུང་ཡེ་ཤེས་དབྱེར་མེད་པའི། །ཞལ་བསྟན་འབྲས་བུ་ངེས་པ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །རང་བཞིན་ལྷུན་གྲུབ་རང་བྱུང་དབྱེར་མེད་པའི། །ཆོས་སྐུ་གསལ་གདངས་འགག་མེད་སྟོན་པ་དེས། །རང་བྱུང་ཟེར་གྱི་སྟོན་པ་ཀུན་བཟང་ལ། །རང་བཞིན་ལྷུན་གྲུབ་དབང་བསྐུར་བྱིན་རླབས་པ། ། གཉིས་མེད་ཐིག་ལེ་ཆེན་པོར་སངས་རྒྱས་པའོ། །ཡན་ལག་ཟེར་གྱི་སྟོན་པ་ཀུན་བཟང་དེས། །སྡུད་པའི་གསང་བདག་རྡོ་རྗེ་སེམས་དཔའ་ལ། །རངབཞིནདབངབསྐུར་གཉིས་མེད་བྱིན་རླབས་པ། །གཉིས་མེད་ཐིག་ལེ་ཆེན་པོར་སངས་རྒྱས་པའོ། །ཆོས་སྐུ་རང་བྱུང་ཡེ་ཤེས་ནམ་མཁའ་ལ། །ཀུན་ཏུ་བཟང་པོ་ངང་ཉིད་ནམ་མཁའ་འབྱུང་། །ང་ལས་འབྱུང་དང་ང་ཉིད་ནམ་མཁའ་ལ། །ང་ལས་ང་ཉིད་ནམ་མཁའ་ངས་བསྟན་པ། །ཆོས་སྐུ་རང་རིག་མེད་པའི་མཁའ་ཉིད་དང་། །རང་བྱུང་ཡེ་ཤེས་རང་རིག་མཁའ་ཉིད་གཉིས། །དབྱེར་མེད་གཅིག་སྟེ་ནམ་མཁའ་ཉིད་ཀྱི་ངང་། །གཅིག་དང་ཐ་དད་དག་ལས་གྲོལ་བའོ། །རང་བཞིན་དབང་བསྐུར་ལ་ཡང་རྣམ་གཉིས་ཏེ། །སྦྱི་ཡི་རང་བཞིན་ལྷུན་གྲུབ་དབང་བསྐུར་དང་། །ཁྱད་པར་རང་བཞིན་ལྷུན་གྲུབ་དབང་བསྐུར་བའོ། །སྤྱི་ཡི་ལྷུན་གྲུབ་དབང་བསྐུར་རྣམ་བཞི་སྟེ། །རང་བཞིན་ལྷུན་གྲུབ་བུམ་པའི་དབང་བསྐུར་དང་། །གསང་བའི་དབང་དང་ཤེས་རབ་ཡེ་ཤེས་དབང་། ། དབྱེར་མེད་མཚོན་པའི་དབང་སྟེ་བཞི་པའོ། །རང་བཞིན་ལྷུན་གྲུབ་བུམ་པའི་དབང་བསྐུར་བ། །ཆོས་སྐུ་རིག་མེད་ཕྱི་སྟེ་བུམ་ཉིད་དང་། །རང་བྱུང་ཡེ་ཤེས་ནང་སྟེ་བུམ་ཉིད་གཉིས། ། ཕྱི་ནང་གཉིས་སུ་མེད་པའི་བུམ་པའི་དབང་། །རྫོགས་ཆེན་དབང་པོ་ཡང་རབ་གྱུར་པ་ལ། ། རང་བཞིན་གཉིས་མེད་བུམ་པའི་དབང་བསྐུར་བས། །གཉིས་མེད་ཐིག་ལེ་ཆེན་པོར་སངས་རྒྱས་པའོ། །རང་བཞིན་ལྷུན་གྲུབ་གསང་བའི་དབང་བསྐུར་བ། །ཆོས་སྐུ་རིག་མེད་རང་གསལ་ཤེས་རབ་གསང་། །རང་བྱུང་ཡེ་ཤེས་རིག་པ་ཐབས་ཏེ་བ། །ཐབས་དང་ཤེས་རབ་གཉིས་མེད་གསང་བའི་དབང་། །རྫོགས་ཆེན་དབང་པོ་ཡང་རབ་གྱུར་པ་ལ། །རང་བཞིན་གཉིས་མེད་གསང་བའི་དབང་བསྐུར་བས། །གཉིས་མེད་ཐིག་ལེ་ཆེན་པོར་སངས་རྒྱས་པའོ། ཁོགོས་རབ་ཡེ་ཤེས་ལྷུན་གྲུབ་དབང་བསྐུར་བ། །ཆོས་སྐུ་རིག་མེད་སྟོང་པ་ཤེས་པ་རབ། ། རང་བྱུང་ཡེ་ཤེས་རང་རིག་ཡེ་ནས་ཤེས། །ཆོས་སྐུ་ཡེ་ཤེས་ཤེས་རབ་ཡེ་ཤེས་དབང་། ། རྫོགས་ཆེན་དབང་པོ་ཡང་རབ་གྱུར་པ་ལ། །ཤེས་རབ་ཡེ་ཤེས་གཉིས་མེད་དབང་བསྐུར་བས། །གཉིས་མེད་ཐིག་ལེ་ཆེན་པོར་སངས་རྒྱས་པའོ། །བཞི་པ་རང་བཞིན་ལྷུན་གྲུབ་དབང་བསྐུར་བ། །ཆོས་སྐུ་རིག་མེད་མིང་བྲལ་མཚོན་མེད་དང་། །རང་བྱུང་ཡེ་ཤེས་མིང་མེད་མཚོན་བྱེད་པ། །མཚོན་པ་གཉིས་མེད་མཚོན་པ་བརྡ་ཡི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །རང་བཞིན་གཉིས་མེད་བརྡ་ཡི་དབང་བསྐུར་བས། །གཉིས་མེད་ཐིག་ལེ་ཆེན་པོར་སངས་རྒྱས་སོ། །ཁྱད་པར་ལྷུན་གྲུབ་དབང་བསྐུར་ལ་ཡང་བཞི། །རང་བཞིན་བུམ་པའི་དབང་དང་གསང་བའི་དབང་། ཁོ༑ས་རབ་ཡེ་ཤེས་དབང་དང་མཚོན་པ་བཞིའོ། །རང་བཞིན་ལྷུན་གྲུབ་བུམ་པ་ལ་ཡང་བཞི། །ཆོས་སྐུ་རང་བྱུང་ཡེ་ཤེས་དབྱེར་མེད་དང་། །དབྱེར་མེད་མིང་མེད་མཚོན་པའི་བཞི་པའོ། །ཆོས་སྐུའི་དབང་བསྐུར་བྱིན་རླབས་ནི། །སྐྱེ་མེད་རང་གསལ་འགྱུར་མེད་ཡེ་ཉིད་བུམ། །བཅོས་པ་མེད་པའི་རང་བཞིན་རང་གསལ་བ། །སྐྱེ་མེད་བཅོས་པ་མེད་པའི་བུམ་པའི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །ཆོས་སྐུ་རང་གསལ་བུམ་པས་དབང་བསྐུར་བས། །ཆོས་སྐུ་འགྱུར་བ་མེད་པར་བྱིན་རླབས་ཏེ། ། སངས་རྒྱས་ཆོས་སྐུའི་དབང་བསྐུར་རོ། །མ་སྐྱེས་རང་བྱུང་ཡེ་ཤེས་དབང་བསྐུར་བྱིན་རླབས་ནི། །མ་སྐྱེས་མི་འགྱུར་ཡེ་ཤེསཡེ་ཉིད་བུམ། །མ་བཅོས་པ་ཡི་རང་བཞིན་ཡེ་ཤེས་ཡེ་ཉིད་པ། །མ་སྐྱེས་མི་འགྱུར་ཡེ་ཤེས་བུམ་པའི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། ། རང་བྱུང་ཡེ་ཤེས་བུམ་པའི་དབང་བསྐུར་བས། །རང་བྱུང་ཡེ་ཤེས་མི་འགྱུར་བྱིན་རླབས་ཏེ། ། སྐུ་ཡི་ཡེ་ཤེས་གསུང་གི་དབང་བསྐུར་བའོ། །ཆོས་སྐུ་ཡེ་ཤེས་གཉིས་མེད་བུམ་དབང་ནི། ། སྐྱེ་མེད་མ་སྐྱེས་གཉིས་མེད་ཡེ་ཤེས་ཡེ་ཉིད་བུམ། །བཅོས་མེད་མ་བཅོས་གཉིས་མེད་རང་གསལ་བ། །ཆོས་སྐུ་ཡེ་ཤེས་གཉིས་མེད་བུམ་པའི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །སྐྱེ་མེད་མ་སྐྱེས་གཉིས་མེད་དབང་བསྐུར་བས། །གཉིས་མེད་ཐིག་ལེ་ཆེན་པོར་བྱིན་རླབས་ཏེ། །སྐུ་ཡི་ཐུགས་ཀྱི་གཉིས་མེད་དབང་བསྐུར་བའོ། །མིང་མེད་གསུམ་མཚོན་བུམ་དབང་བྱིན་རླབས་ནི། །ཆོས་སྐུ་ཡེ་ཤེས་གཉིས་མེད་མིང་མེད་བརྡ། །སྐུ་གསུང་ཐུགས་ཀྱི་དབྱེར་མེད་མིང་མེད་བརྡ། །མིང་མེད་གསུམ་ལ་མཚོན་པ་བརྡ་ཡི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །མིང་མེད་གསུམ་མཚོན་བརྡ་ཡིས་དབང་བསྐུར་བས། །མིང་མེད་གསུམ་གྱི་ངང་དུ་བྱིན་རླབས་ཏེ། །མིང་མེད་ལྷུན་གྲུབ་བརྡ་ཡི་དབང་བསྐུར་༄༅ །བའོ། །རང་བཞིན་ལྷུན་གྲུབ་གསང་བའི་དབང་ལ་རྣམ་བཞི་སྟེ། །ཆོས་སྐུ་གསང་བའི་དབང་བསྐུར་བྱིན་རླབས་ནི། །སྤྲོས་མེད་རང་གསལ་བརྗོད་མེད་ཡེ་ཤེས་ཡེ་ཉིད་གསང་། །བརྗོད་དུ་མེད་པའི་རང་བཞིན་རང་གསལ་བ། །སྤྲོས་མེད་བརྗོད་དུ་མེད་པའི་གསང་བ་ཉིད། །རང་བཞིན་ཆོས་སྐུ་ལྷུན་གྲུབ་གསང་བའི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །ཆོས་སྐུ་རང་གསལ་གསང་བའི་དབང་བསྐུར་བས། །ཆོས་སྐུ་སྤྲོས་པ་མེད་པར་བྱིན་རླབས་ཏེ། ཆོས་སྐུ་གསང་དབང་ཆོས་སྐུའི་དབང་བསྐུར་བའོ། །རང་བྱུང་ཡེ་ཤེས་གསང་བའི་དབང་བསྐུར་ནི། །མ་སྤྲོས་རང་གསལ་ཡེ་ཤེས་ཡེ་ཉིད་གསང་། །མ་བརྗོད་རང་བཞིན་རང་གསལ་ཡེ་ཤེས་པ། །མ་སྤྲོས་མ་བརྗོད་ཡེ་ཤེས་གསང་བ་ཉིད། །རང་བཞིན་ལྷུན་གྲུབ་ཡེ་ཤེས་གསང་བའི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །རང་བྱུང་ཡེ་ཤེས་གསང་བའི་དབང་བསྐུར་བས། །མ་སྤྲོས་ཡེ་ཤེས་ཆེན་པོར་བྱིན་རླབས་ཏེ། །རང་བྱུང་ཡེ་ཤེས་གསང་བའི་དབང་བསྐུར་བའོ། །ཆོས་སྐུ་ཡེ་ཤེས་གཉིས་མེད་གསང་དབང་ནི། །སྤྲོས་མེད་མ་སྤྲོས་གཉིས་མེད་ཡེ་ཤེས་ཡེ་ཉིད་གསང་། །བརྗོད་མེད་མ་བརྗོད་དབྱེར་མེད་རང་གསལ་བ། ། ཆོས་སྐུ་ཡེ་ཤེས་གཉིས་མེད་གསང་བ་ཉིད། །རང་བཞིན་ལྷུན་གྲུབ་ཡེ་ཤེས་གཉིས་མེད་གསང་བའི་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །ཆོས་སྐུ་ཡེ་ཤེས་དབྱེར་མེད་དབང་བསྐུར་བས། །སྤྲོས་མེད་མ་སྤྲོས་གཉིས་མེད་བྱིན་རླབས་ཏེ། །གཉིས་མེད་གསང་བའི་དབང་བསྐུར་བའོ། །མིང་མེད་གསུམ་མཚོན་གསང་དབང་བསྐུར་བ་ནི། །ཆོས་སྐུ་མིང་མེད་གསང་དབང་མཚོན་པ་དང་། །ཡེ་ཤེས་མིང་མེད་གསང་དབང་མཚོན་པ་དང་། །གཉིས་མེད་མིང་མེད་གསང་དབང་མཚོན་པ་ཡི། །མིང་མེད་རྣམ་གསུམ་གསང་དབང་མཚོན་པའི་དབང་། །རྫོགས་ཆེན་དབང་པོ་ཡང་རབ་གྱུར་པ་ལ། །མིང་མེད་གསང་དབང་མཚོན་པའི་དབང་བསྐུར་བས། །མིང་མེད་གསུམ་གྱི་ངང་དུ་བྱིན་རླབས་ཏེ། །མིང་གསུམ་མེད་པའི་བརྡ་ཡིས་དབང་བསྐུར་བའོ། །ཤེས་རབ་ཡེ་ཤེས་ལྷུན་གྲུབ་དབང་ལ་བཞི། །གཡོ་མེད་གསལ་སྐྱེ་མེད་པ་ཤེས་རབ་ཉིད། །འགྱུར་བ་མེད་པའི་རང་བཞིན་རང་གསལ་ཡེ། །བཅོས་པ་མེད་པའི་ཆོས་ཉིད་བདེ་བ་ཤེས། །སྐྱེ་བ་མེད་པའི་ཤེས་རབ་ཡེ་ཤེས་ཉིད། །ཆོས་སྐུ་ལྷུན་གྲུབ་ཤེས་རབ་ཡེ་ཤེས་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །ཆོས་སྐུ་ཤེས་རབ་ཡེ་ཤེས་དབང་བསྐུར་བས། །ཆོས་སྐུ་འགྱུར་བ་མེད་པའི་བྱིན་རླབས་ཏེ། །ཆོས་སྐུ་བདེ་བ་ཆེན་པོས་དབང་བསྐུར་བའོ། །མ་གཡོས་རང་གསལ་ཡེ་ཤེས་ཤེས་རབ་ཉིད། །མི་འགྱུར་བ་ཡི་རང་གསལ་ཡེ། །མ་བཅོས་ཡེ་ཤེས་བདེ་བ་ཤེས། །མ་སྐྱེས་པ་ཡི་ཤེས་རབ་ཡེ་ཤེས་ཉིད། ། ཡེ་ཤེས་ལྷུན་གྲུབ་ཤེས་རབ་ཡེ་ཤེས་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། ། ལྷུན་གྲུབ་ཤེས་རབ་ཡེ་ཤེས་དབང་བསྐུར་བས། །ཡེ་ཤེས་མི་འགྱུར་ངང་དུ་བྱིན་རླབས་ཏེ། །རང་བྱུང་ཡེ་ཤེས་བདེ་བའི་དབང་བསྐུར་བའོ། །གཡོ་མེད་མི་གཡོ་གཉིས་མེད་ཤེས་རབ་ཉིད། །འགྱུར་མེད་མི་འགྱུར་གཉིས་མེད་རང་བྱུང་ཡེ། །བཅོས་མེད་མ་བཅོས་དབྱེར་མེད་ལྷུན་གྲུབ་ཤེས། །གཉིས་མེད་ལྷུན་གྲུབ་ཤེས་རབ་ཡེ་ཤེས་དབང་། །རྫོགས་ཆེན་དབང་པོ་རབ་ཏུ་གྱུར་པ་ལ། །གཉིས་མེད་ཤེས་རབ་ཡེ་ཤེས་དབང་བསྐུར་བས། །གཡོ་མེད་མི་གཡོ་གཉིས་མེད་བྱིན་རླབས་ཏེ། །གཉིས་མེད་ཤེས་རབ་ཡེ་ཤེས་དབང་བསྐུར་བའོ། །མིང་མེད་གསུམ་མཚོན་ཤེས་རབ་ཡེ་ཤེས་དབང་། །རྫོགས་ཆེན་དབང་པོ་ཡ་རབ་གྱུར་པ་ལ། ། མིང་མེད་གསུམ་གྱི་བརྡ་ཡིས་དབང་བསྐུར་བའོ། །མིང་མེད་གསུམ་གྱི་ངང་དུ་བྱིན་རླབས་ཏེ། །མིང་གསུམ་མེད་པའི་དབང་བསྐུར་བའོ། །བརྡ་ཡི་དབང་བསྐུར་ལ་ཡང་རྣམ་བཞི་སྟེ། ། ཆོས་སྐུ་མིང་མེད་ཆོས་སྐུ་མཚོན་དབང་དང་། །ཡེ་ཤེས་མིང་མེད་ཆོས་སྐུ་མཚོན་དབང་དང་། །ཡེ་ཤེས་མིང་མེད་ཡེ་ཤེས་བརྡ་དབང་དང་། །དབྱེར་མེད་མིང་མེད་གཉིས་མེད་བརྡ་དབང་དང་། །མིང་མེད་གསུམ་ལ་མཚོན་པའི་དབང་བསྐུར་བས། །མིང་མེད་མཚོན་པ་མེད་པར་བྱིན་རླབས་ཏེ། །ནམ་མཁའ་མིང་མེད་བརྡ་ཡིས་དབང་བསྐུར་བའོ། །ཞལ་བསྟན་འབྲས་བུ་ངེས་པ་ལ་ཡང་གཉིས། །སྤྱི་དང་ཁྱད་པར་གཉིས་ཀྱི་ཞལ་བསྟན་པའོ། །སྤྱི་ཡི་རང་བྱུང་ཆོས་སྐུའི་ཞལ་བསྟན་པ། །ནམ་མཁའ་མིང་དུ་མ་བཏགས་ནམ་མཁའ་ཡི། །ནམ་མཁའ་སྙིང་པོར་ནམ་མཁའ་བལྟས་བྱས་ནས། །དེ་ཚེ་ནམ་མཁའ་ཉིད་དུ་གྱུར་པ་ཡི། །འབྲས་བུ་སངས་རྒྱས་ཉིད་དུ་ངེས་ཐོབ་པའོ། །ཁྱད་པར་ཞལ་བསྟན་ལ་ཡང་རྣམ་གསུམ་སྟེ། །རང་བཞིན་ལྷུན་གྲུབ་ཆོས་སྐུའི་ཞལ་བསྟན་པ། །ནམ་ནི་རིག་མེད་ཆོས་སྐུའི་རང་བཞིན་ལས། །ཆོས་སྐུ་རིག་མེད་ནམ་མཁའི་རང་བཞིན་ཏེ། །ལྷུན་གྲུབ་ཆོས་སྐུ་ནམ་མཁའ་བལྟ་བྱས་ནས། །དེ་ཚེ་ཆོས་སྐུ་ནམ་དང་གཉིས་མེད་པས། །འབྲས་བུ་སངས་རྒྱས་ཆོས་སྐུ་ངེས་ཐོབ་པའོ། །ལྷུན་གྲུབ་རང་བྱུང་ཡེ་ཤེས་ཞལ་བསྟན་པ། །མཁའ་ནི་རང་བྱུང་ཡེ་ཤེས་ལ། །རང་བྱུང་ཡེ་ཤེས་ནམ་མཁའི་རང་བཞིན་ཏེ། །ལྷུན་གྲུབ་རང་བྱུང་མཁའ་ལ་བལྟས་བྱས་ན། །དེ་ཚེ་རང་བྱུང་ཡེ་ཤེས་ཉིད་དང་གཉིས་མེད་པའི། །འབྲས་བུ་རང་བྱུང་ཡེ་ཤེས་ངེས་ཐོབ་པའོ། །ཆོས་སྐུ་ཡེ་ཤེས་དབྱེར་མེད་ཞལ་བསྟན་པ། །ནམ་ནི་རིག་མེད་ཆོས་སྐུའི་རང་བཞིན་དང་། །མཁའ་ནི་རང་བྱུང་ཡེ་ཤེས་རང་བཞིན་གཉིས། །གཅིག་དང་ཐ་དད་དག་ལས་གྲོལ་གནས་ཏེ། ། གཉིས་མེད་མིང་བྲལ་ངང་དུ་བལྟས་བྱས་ན། །དེ་ཚེ་དབྱེར་མེད་གཉིས་སུ་མེད་པར་འགྱུར། །ཆོས་སྐུ་ཡེ་ཤེས་དབྱེར་མེད་ངེས་པའོ། །རིན་པོ་ཆེ་རྒྱས་པ་ཆེན་པོའི་མདོ་ལས། དབང་བསྐུར་བ་རྣམ་བཞིས་འབྲས་བུ་སངས་རྒྱས་པའི་ཞལ་བསྟན་པའི་ལེའུ་སྟེ་དང་པོའོ།། །། སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། ། ལྷ་སྤྱོད་སྒོམ་པའི་འབྲས་བུ་དབྱེར་མེད་པའི། །སྤྱི་ཡི་མིང་བཏགས་ངེས་པ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །ཆོས་རྣམས་ཐམས་ཅད་འབྱུང་བའི་གཞིར་གྱུར་པ། །རང་རིག་རིག་མེད་སྟོང་པའི་རང་བཞིན་ཅན། །མཐའ་དང་དབུས་མེད་དོན་དམ་སྙིང་པོའི་ངང་། །བརྗོད་དུ་མེད་པའི་རང་བཞིན་ཡུལ་ལས་འདས། །དངོས་པོ་མཚན་མ་མེད་པའི་བདག་ཆེན་པོ། །འགྱུར་བ་མེད་པ་མ་བཅོས་ཀུན་གྱི་ལས། །ཐ་སྙད་ཀུན་དངབྲལ་བ་ཐིག་ལེའི་ཀློང་། །སྒྲོ་སྐུར་ཀུན་བྲལ་ཚིག་གིས་མཚོན་དུ་མེད། །ཡོད་མེད་སྟོང་དང་མི་སྟོང་གཞལ་དུ་མེད། །རྒྱུ་རྐྱེན་མ་བསྐྱེད་ཟག་པ་མེད་པའི་སྐུ། །ཀུན་ལ་ཁྱབ་པའི་རྒྱ་ཡོངས་མ་ཆད་པ། །ཟད་མེད་རིན་ཆེན་གཏེར་གྱི་མཛོད་གྱུར་པ། །ཚོགས་བརྒྱད་ཡུལ་དུ་མ་གྱུར་རྨད་དུ་བྱུང་། །རྨད་བྱུང་བྱང་ཆུབ་སེམས་ཀྱི་རང་བཞིན་འདི། །གཅོད་མེད་མི་གཅོད་དབྱེར་མེད་ཤེས་རྒྱུས་འདྲ། །སྣང་བ་འདི་ཉིད་ཡིན་ཏེ་མཐོང་བ་མེད། །མཐོང་མེད་མཐོང་བ་ལྟ་བའི་མཆོག་ཏུ་ཡིན། །རང་བྱུང་ཡེ་ཤེས་རྩལ་གྱི་ཡན་ལག་སྣང་བ་རྣམས། །ལྟ་བའི་ངང་དུ་དབྱེར་མེད་སྤྱོད་སྣང་བ། །རིག་མེད་རང་གསལ་སྟོང་པའི་ངང་དུ་སྤྱོད། །རང་རིག་རང་གསལ་མཐའ་དབུས་མེད་ལ་སྤྱོད། །བརྗོད་མེད་རང་བཞིན་རྟོག་མེད་ཡུལ་ལ་སྦྱོད། །དངོས་པོ་མཚན་མེད་དབྱིངས་ཀྱི་དོན་ལ་སྤྱོད། །འགྱུར་མེད་མ་བཅོས་ཀུན་གྱི་ལམ་དུ་སྤྱོད། །ཐ་སྙད་ཀུན་བྲལ་ཐིག་ལེ་ཆེན་པོར་སྤྱོད། །སྒྲོ་སྐུར་བྲལ་བ་དབྱིངས་ཀྱི་ངང་དུ་སྤྱོད། །གཞལ་དུ་མེད་པའི་སྟོང་པའི་དབྱིངས་སུ་སྤྱོད། །རྒྱུ་རྐྱེན་མ་བསྐྱེད་ཟག་མེད་སྐུ་རུ་སྤྱོད། །ཀུན་ཀྱང་རྒྱ་ཡོངས་མ་ཆད་པ་རུ་སྤྱོད། །ཟག་པ་མེད་པའི་རིན་ཆེན་གཏེར་དུ་སྤྱོད། །རྨད་བྱུང་བྱང་ཆུབ་སེམས་ཀྱི་རང་བཞིན་འདི། །སྤྱོད་པ་མེད་པའི་ངང་དུ་སྤྱོད་པ་སྟེ། །སྤྱོད་མེད་སྤྱོད་པ་སྤྱོད་པའི་སྤྱོད་མཆོག་ཡིན། །རྩལ་གྱི་ཡན་ལག་ཆོས་རྣམས་ཀུན། །བཅོས་མེད་མ་བཅོས་ཇི་བཞིན་ངང་ལ་བཞག །རིག་པ་མ་བཅོས་ཇི་བཞིན་ཉིད་དུ་གཞག །བཅོས་མེད་མ་བཅོས་གསལ་བའི་ངང་ལ་གཞག །གཞག་ཏུ་དངོས་མེད་དམིགས་པའི་ངོ་བོ་མེད། །དངོས་པོ་མེད་པའི་རང་བཞིན་གཞག་པ་མེད། །གཞག་ས་མེད་པའི་གཞག་པ་ནི། །བསྒོམ་དུ་མེད་པའི་སྒོམ་པ་ཆེན་པོ་སྟེ། །བསྒོམ་དུ་མེད་པའི་སྒོམ་པ་ཆེན་པོ་ནི། །སྒོམ་པ་ཀུན་གྱི་ནང་ན་བསྔགས་པ་ཡིན། །ཡན་ལག་རྩལ་གྱི་ཆོས་ཀྱི་སྙིང་པོ་ཉིད། ། བསྒྲུབ་པ་མེད་པའི་ལྷུན་གྱིས་གྲུབ་པ་རྣམས། །ལྷུན་གྲུབ་སྤངས་ཐོབ་མེད་པའི་འབྲས་བུ་ཡིན། །སྤངས་ཐོབ་མེད་པའི་འབྲས་བུ་ཆེན་པོའི་འབྲས་བུ་ཡང་། །འབྲས་བུའི་ནང་ན་འབྲས་བུ་མཆོག་ཆེན་ཡིན། །ལྟ་བའི་ལྟ་བ་ལྟར་མེད་ལྷུན་རྫོགས་ཡིན། །ལྟ་བའི་སྤྱོད་པ་རང་བཞིན་ཡོངས་རྫོགས་ཡིན། །ལྟ་བའི་བསྒོམ་པ་དམིགས་སུ་མེད་པ་ཡིན། །ལྟ་བའི་འབྲས་བུ་ཐོབ་པ་ཡིན། །སྤྱོད་པའི་ལྟ་བ་རང་བཞིན་ཡོངས་རྫོགས་ཡིན། །སྤྱོད་པའི་སྤྱོད་པ་མཚན་མ་ཡོངས་རྫོགས་ཡིན། །སྤྱོད་པའི་བསྒོམ་པ་རང་བཞིན་རྣམ་དག་ཡིན། །སྤྱོད་པའི་འབྲས་བུ་བླང་དོར་མེད་པ་ཡིན། །སྒོམ་པའི་ལྟ་བ་དམིགས་སུ་མེད་པ་ཡིན། །སྒོམ་པའི་སྤྱོད་པ་རང་བཞིན་རྣམ་དག་ཡིན། །སྒོམ་པའི་བསྒོམ་པ་ཡེངས་སུ་མེད་པ་ཡིན། །སྒོམ་པའི་འབྲས་བུ་སྤང་ཐོབ་མེད་པ་ཡིན། །འབྲས་བུའི་ལྟ་བ་བལྟར་མེད་ལྷུན་གྲུབ་ཡིན། །འབྲས་བུའི་སྤྱོད་པ་སྤྱད་དུ་མེད་པ་ཡིན། །འབྲས་བུའི་བསྒོམ་པ་བསྒོམ་དུ་མེད་པ་ཡིན། །འབྲས་བུའི་འབྲས་བུ་ཐོབ་པ་མེད་པ་ཡིན། །ལྟ་སྤྱོད་གྲངས་སུ་བསྟན་པ་དབྱེར་མེད་གཅིག །དབྱེར་མེད་མིང་དང་བྲལ་བ་ནམ་མཁའ་ཡིན། །རིན་པོ་ཆེ་རྒྱས་པ་ཆེན་པོའི་མདོ་ལས། ལྟ་སྤྱོད་སྤྱིའི་དབྱེར་མེད་ཀྱི་ལེའུ་སྟེ་གཉིས་པའོ།། །།སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། །ཁྱད་པར་ལྟ་སྦྱོད་སྒོམ་དང་འབྲས་བུ་ཡི། །དབྱེར་མེད་མིང་བཏགས་ངེས་པ་ཇི་ལྟར་ལགས། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །ཁྱད་པར་མིང་བཏགས་ལ་ཡང་རྣམ་པ་གཉིས། །རང་བཞིན་ལྷུན་གྲུབ་ཉིད་ལ་མིང་བཏགས་དང་། །རྩལ་གྱི་ཡན་ལག་དག་ལ་མིང་བཏགས་པའོ། །ལྷུན་གྲུབ་ཉིད་ལ་མིང་བཏགས་རྣམ་གསུམ་སྟེ། །ཆོས་སྐུ་མིང་དང་རང་བྱུང་ཡེ་ཤེས་དང་། །ཆོས་སྐུ་རང་བྱུང་ཡེ་ཤེས་དབྱེར་མེད་པའོ། །རང་བྱུང་ཆོས་ཀྱི་སྐུ་ལ་མིང་བཏགས་པ། །རང་གསལ་འགྱུར་བ་མེད་པ་ལྟ། །སྐྱེ་བ་མེད་པའི་རྟོག་མེད་ངང་དུ་སྤྱོད། །ཡེངས་པ་མེད་པའི་རྟོག་མེད་ཆོས་སྐུ་སྒོམ། །ཐོབ་པ་མེད་པའི་འབྲས་བུ་ལྷུན་གྲུབ་ཐོབ། །རང་བྱུང་ཡེ་ཤེས་ཉིད་ལ་མིང་བཏགས་པ། །རང་རིག་རང་གསལ་མི་འགྱུར་ལྟ་བ་ལྟ། །མ་སྐྱེས་པ་ཡི་མིང་རྟོག་ངང་ལས་སྤྱོད། །མ་ཡེངས་མི་དམིགས་རང་གསལ་སྒོམ། །འབྲས་བུ་རང་བྱུང་ཡེ་ཤེས་ལྷུན་གྲུབ་ཐོབ། །ཆོས་སྐུ་རང་བྱུང་ཡེ་ཤེས་དབྱེར་མེད་ལ། །ལྟ་སྤྱོད་སྒོམ་དང་འབྲས་བུའི་མིང་བཏགས་པ། །ཆོས་སྐུ་རིག་མེད་རང་གསལ་འབྲས་བུ་དང་། །རང་བྱུང་ཡེ་ཤེས་རང་རིག་མི་འགྱུར་གཉིས། །གཅིག་དང་ཐ་དད་དག་ལས་གྲོལ་བ་ཡི། །འགྱུར་མེད་མི་འགྱུར་དབྱེར་མེད་ཆེན་པོ་སྟེ། ། ཆོས་སྐུ་རིག་མེད་རང་གསལ་སྐྱེ་མེད་དང་། །རང་བྱུང་ཡེ་ཀེས་རང་རིག་མ་སྐྱེས་གཉིས། །གཅིག་དང་ཐ་དད་དག་ལས་གྲོལ་བ་ཡི། །སྐྱེ་མེད་མ་སྐྱེས་དབྱེར་མེད་ཆེན་པོར་སྤྱོད། །ཆོས་སྐུ་རིག་མེད་རང་གསལ་ཡེངས་མེད་དང་། །རང་བྱུང་ཡེ་ཤེས་རང་རིག་མ་ཡེངས་གཉིས། །གཅིག་དང་ཐ་དད་དག་ལས་གྲོལ་བ་ཡི། །ཡེངས་མེད་མི་ཡེངས་གཉིས་མེད་ཆེན་པོར་བསྒོམ། །ཆོས་སྐུ་རིག་མེད་གསལ་ཐོབ་མེད་པ་དང་། །རང་བྱུང་ཡེ་ཤེས་རང་གསལ་མ་ཐོབ་གཉིས། །གཅིག་དང་ཐ་དད་དག་ལས་གྲོལ་བའོ། །ཐོབ་མེད་མ་ཐོབ་དབྱེར་མེད་འབྲས་བུ་ཐོབ། །རྩལ་གྱི་མིང་བཏགས་ལ་ཡང་རྣམ་གཉིས་ཏེ། །ཡན་ལག་སྙིང་པོ་ཉིད་ལ་མིང་བཏགས་དང་། །ཐེག་དམན་སོ་སོ་རྣམས་ཀྱི་མིང་བཏགས་པའོ། །ཡན་ལག་སྙིང་པོ་ཉིད་ལ་མིང་བཏགས་གསུམ། །ཡན་ལག་ཆོས་ཀྱི་སྐུ་ལ་མིང་བཏགས་པ། །རིག་མེད་སྤྲོས་གསལ་སྤྲོས་པ་མེད་པ་ལྟ། །རིག་མེད་རང་གསལ་སྐྱེ་བ་མེད་པ་སྤྱོད། །རིག་མེད་རང་གསལ་རྟོག་པ་མེད་པ་སྒོམ། །རིག་མེད་རང་གསལ་འབྲས་བུ་ཆོས་སྐུ་ཐོབ། །ཡན་ལག་རང་བྱུང་ཡེ་ཤེས་མིང་བཏགས་པ། །ཡེ་ཤེས་རང་གསལ་རང་རིག་མ་སྤྲོས་ལྟ། །ཡེ་ཤེས་རང་གསལ་རང་རིག་མ་སྐྱེས་སྤྱོད། །ཡེ་ཤེས་རང་གསལ་རང་རིག་མི་ཡེངས་སྒོམ། །ཡེ་ཤེས་རང་གསལ་རང་རིག་འབྲས་བུ་ཐོབ། །སྤྲོས་མེད་མ་སྤྲོས་གཉིས་སུ་མེད་པ་ལྟ། །སྐྱེ་མེད་མ་སྐྱེས་གཉིས་སུ་མེད་པ་སྤྱོད། །རྟོག་མེད་མི་རྟོག་གཉིས་སུ་མེད་པ་སྒོམ། །ཆོས་སྐུ་ཡེ་ཤེས་གཉིས་སུ་མེད་པ་ཐོབ། །སོ་སོར་མིང་བཏགས་བྱེ་བྲག་གཅིག་གི་ངང་། །ཐེག་དམན་རྣམས་ཀྱི་སོ་སོར་མིང་བཏགས་པ། །ལྟ་སྤྱོད་སྒོམ་དང་འབྲས་བུ་སོ་སོ་ཡི། །སོ་སོ་རང་རང་རྟོགས་པའི་མིང་བཏགས་པའོ། །རིན་པོ་ཆེ་རྒྱས་པ་ཆེན་པོའི་མདོ་ལས། ཁྱད་པར་ལྟ་སྤྱོད་སྒོམ་པའི་མིང་བཏགས་པའི་ལེའུ་སྟེ་གསུམ་པའོ།། །།སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། །ཀུན་གྱི་གཞི་མ་ལྷུན་གྲུབ་མིང་མེད་ལ། །ས་ཆུ་མེ་རླུད་ནམ་མཁའ་འབྱུང་ལྔ་ལ། །ཆོས་ཀྱི་སྐུ་ནི་རང་བྱུང་ཡེ་ཤེས་ཀྱི། །དབྱེར་མེད་མིང་བཏགས་སྣང་བ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །ཆོས་སྐུ་འགྱུར་མེད་འདེགས་པ་སྲ་བས་ས། །ཆོས་སྐུ་འགྱུར་མེད་སྡུད་པ་ལྟེམས་པས་ཆུ། །ཆོས་སྐུ་རྒྱ་ཆད་མེད་པ་སྨིན་བྱེད་དྲོ་བ་མེ། །ཆོས་སྐུ་འགག་མེད་བསྐྱོད་མེད་ཡང་བས་རླུད་། །ཆོས་སྐུ་རང་གསལ་འབྱེད་མེད་སྟོང་པའི་མཁའ། །ཡེ་ཤེས་མི་འགྱུར་འདེགས་པས་སྲ་བས་ས། །ཡེ་ཤེས་མི་གཡོ་སྡུད་པས་ལྟེམས་པས་ཆུ། །ཡེ་ཤེས་རྒྱ་མ་ཆད་པ་སྨིན་བྱེད་དྲོ་བས་མེ། །ཡེ་ཤེས་མ་འགགས་མ་བསྐྱོད་ཡང་བས་རླུད་། །ཡེ་ཤེས་རང་གསལ་མི་འབྱེད་སྟོང་བས་མཁའ། །ཆོས་སྐུ་འགྱུར་མེད་འདེགས་པའི་ས་ཉིད་དང་། །ཡེ་ཤེས་མི་འགྱུར་འདེགས་པའི་ས་ཉིད་གཉིས། །གཅིག་དང་ཐ་དད་དག་ལས་གྲོལ་བའི་ས། །ཆོས་སྐུ་གཡོ་བ་མེད་པ་སྡུད་པའི་ཆུ་དང་ནི། །ཡེ་ཤེས་མི་གཡོ་སྡུད་པའི་ཆུ་ཉིད་གཉིས། །ཆོས་སྐུ་ཡེ་ཤེས་དབྱེར་མེད་གྲོལ་བའི་ཆུ། །ཆོས་སྐུ་རྒྱ་ཆད་མེད་པའི་སྨིན་མེ་དང་། །ཡེ་ཤེས་རྒྱ་མ་ཆད་པའི་སྨིན་མེ་གཉིས། །གཅིག་དང་ཐ་དད་དག་ལས་གྲོལ་བའི་མེ། །ཆོས་སྐུ་འགག་མེད་བསྐྱོད་མེད་ཡང་རླུད་དང་། །ཡེ་ཤེས་མ་འགགས་མ་བསྐྱོད་ཡང་རླུད་གཉིས། །གཅིག་དང་ཐ་དད་དག་ལས་གྲོལ་བའི་རླུད་། །ཆོས་སྐུ་དབྱེར་མེད་སྟོང་པ་ནམ་ཉིད་དང་། ། ཡེ་ཤེས་མི་འབྱེད་སྟོང་པ་མཁའ་ཉིད་གཉིས། །གཅིག་དང་ཐ་དད་དག་ལས་གྲོལ་བ་ནམ་མཁའ་འོ། །རིན་པོ་ཆེ་རྒྱས་པ་ཆེན་པོའི་མདོ་ལས། འབྱུང་བ་ལྔ་ལ་ཆོས་སྐུ་ཡེ་ཤེས་དང་དབྱེར་མེད་པའི་མིང་བཏགས་པའི་ལེའུ་སྟེ་བཞི་པའོ།། །།སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། །ཆོས་རྣམས་ཐམས་ཅད་བསྡུ་ན་དུ་རུ་འདུས། །ཡན་ལག་རྩལ་གྱི་བྱིན་རླབས་འབྲས་བུ་དང་། །རང་ལ་ཡེ་ཤེས་ཅི་ཡི་འཆར་བ་དང་། ཁྲར་ནས་བྱིན་རླབས་འབྲས་བུ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །བྱང་ཆུབ་སེམས་ཀྱི་ཀུན་གཞི་ལྷུན་གྲུབ་འདི། །ཀུན་ལ་ཁྱབ་ཀྱང་ཐིག་ལེ་གཅིག་པའི་ཕྱིར། །ཆོས་རྣམས་ཐམས་ཅད་གཉིས་སུ་འདུས། །གཉིས་འདུས་གཉིས་ཀྱི་མིང་བཏགས་སྣང་བ་ནི། །རང་བྱུང་སྙིང་པོ་ཡན་ལག་སྙིང་པོ་གཉིས། །འཁོར་བའི་ཆོས་དང་མྱ་ངན་འདས་ཆོས་གཉིས། །མ་འདྲེས་པ་དང་ཡོངས་སུ་རྫོགས་པ་གཉིས། །འཁྲུལ་པར་སྣང་དང་མ་འཁྲུལ་སྣང་བ་གཉིས། །དངོས་དབང་བསམ་དབང་གཉིས་དང་སྣོད་བཅུད་གཉིས། །ཕྱི་ནང་གཟུང་འཛིན་གཉིས་སུ་སྣང་བ་ལ། ། མིང་བཏགས་གཉིས་སུ་འདུས་པའོ། །ནམ་མཁའི་རང་བཞིན་ཀུན་ཁྱབ་མིང་མེད་འདི། ། མིང་གསུམ་མེད་པའི་མིང་གསུམ་བཏགས་པ་སྟེ། །མིང་གསུམ་བཏགས་པའི་མིང་ལ་གསུམ་འདུས་པ། །ཆོས་སྐུ་རང་བྱུང་ཡེ་ཤེས་དབྱེར་མེད་གསུམ། །ལྷུན་གྲུབ་ཐམས་ཅད་ལྟ་བ་ཡིན་པར་འདུས། །འཁྲུལ་སྣང་ཐམས་ཅད་སྤྱོད་པ་ཡིན་པར་འདུས། །གཉིས་མེད་ཐམས་ཅད་སྒོམ་པ་ཡིན་པར་འདུས། །ཡི་གེ་མེད་པའི་རྒྱུ་དང་རྟེན་མེད་ལུང་། །ངེས་པ་མེད་པའི་མན་ངག་གསུམ་དུ་འདུས། །ཆོས་སྐུ་མཚན་ཉིད་ཡོངས་རྫོགས་རྣམ་དག་ཡོངས་རྫོགས་དང་། ། རྣམ་རྟོག་ཡོངས་རྫོགས་རྫོགས་པ་གསུམ་དུ་འདུས། ཁུ་དང་ལམ་དང་འབྲས་བུ་གསུམ་དུ་འདུས། །སངས་རྒྱས་ཆོས་དང་དགེ་འདུན་གསུམ་དུ་འདུས། །ཆོས་སྐུ་ཡེ་ཤེས་སེམས་དང་གསུམ་དུ་འདུས། །ལྟ་སྒོམ་སྤྱོད་གསུམ་སྒོམ་ཐུགས་གསུམ་དུ་འདུས། །ལྟ་བ་ཆོས་སྐུ་སྒོམ་པ་ལོངས་སྐུ་དང་། །སྤྱོད་པ་སྤྲུལ་པའི་སྐུ་སྟེ་གསུམ་དུ་འདུས། །ལྟ་བ་ཤེས་པ་རབ་སྟེ་སྤྱོད་པ་ཐབས། །སྒོམ་པ་གཉིས་མེད་གསུམ་དུ་འདུས། །ལྟ་བ་ཞི་གནས་སྤྱོད་པ་ལྷག་མཐོང་དང་། ། སྒོམ་པ་ཟུང་དུ་འབྲེལ་བ་གསུམ་དུ་འདུས། །ལྟ་བ་ཀུན་ཏུ་བཟང་མོ་སྤྱོད་པ་ཀུན་ཏུ་བཟང་པོ་གཉིས། །སྒོམ་པ་གཉིས་མེད་ཡིན་པ་གསུམ་དུ་འདུས། །ལྷ་བ་བཀའ་ལ་སྤྱོད་པ་བསྟན་བཅོས་དང་། །སྒོམ་པ་མན་ངག་གསུམ་དུ་འདུས། །ལྟ་བ་སྟོན་པ་སྤྱོད་པ་བསྟན་པ་དང་། ། སྒོམ་པ་སྡུད་པ་ཕུན་སུམ་ཚོགས་པའོ། །བཞི་མེད་བཞི་རུ་ཆོས་རྣམས་འདུས་པ་ཡང་། །ཆོས་ཀྱི་སྐུ་དང་རང་བྱུང་ཡེ་ཤེས་དང་། །སེམས་དང་བག་ཆགས་བཞི་རུ་འདུས་པའོ། །ལྔ་མེད་ལྔ་རུ་ཆོས་ཀུན་འདུས་པ་ཡང་ རང་བཞིན་ངོ་བོ་ལྔ་རུ་འདུས་པའི་ཕྱིར། །རིགས་ལྔ་ལྔ་རུ་ཆོས་རྣམས་འདུས་པའོ། །རང་བྱུང་ཡེ་ཤེས་ཡན་ལག་བྱིན་རླབས་ལས། །དངོས་པོ་འཁོར་བར་སྣང་བའི་འབྲས་བུ་དང་། །མཚན་མ་ཐེག་པར་སྣང་བའི་འབྲས་བུ་དང་། །རང་ལ་ཡེ་ཤེས་ཅི་ཡིས་འཆར་བ་ནི། །འཁྲུལ་བའི་ཆོས་སུ་སྣང་བ་ཐམས་ཅད་ཀུན། །འཁྲུལ་པའི་རྩ་གཅད་རྩ་བ་ཆོད་པ་ཡིས། །རང་བྱུང་ཡེ་ཤེས་རང་རིག་གྲངས་མེད་དང་། །རང་ལ་ཡེ་ཤེས་རིག་པ་གྲངས་མེད་སྐྱེ། །སྐྱེས་པའི་བྱིན་རླབས་འབྲས་བུ་ནི། །ཆོས་རྣམས་མ་བསགས་ཐུགས་སུ་ཆུད་པ་དང་། །ཆོས་རྣམས་མ་མཉན་སྟོན་པ་འབྱུང་བ་དང་། །མ་བསྒོམས་པ་རུ་ཡེ་སངས་རྒྱས་ཤེས་པས། །སྔོན་མ་མཐོང་བའི་ཆོས་སྐུ་འབྲས་བུ་མཐོང་། །མཐོང་བའི་བྱིན་རླབས་འབྲས་བུ་སངས་རྒྱས་པའོ། །རིན་པོ་ཆེ་རྒྱས་པ་ཆེན་པོའི་མདོ་ལས། བྱིན་རླབས་ཀྱི་འབྲས་བུ་འབྱུང་བའི་ལེའུ་སྟེ་ལྔ་པའོ།། །།སྡུད་པའི་གསང་བདག་རྡོ་རྗེ་སེམས་དཔའ་ཡིས། ། སྟོན་པའི་སྟོན་པ་ཀུན་ཏུ་བཟང་པོ་ལ། །འཁྲུལ་པའི་རྩ་གཅད་རྩ་ཆོད་དོན་མཐོང་ན། ། རྟགས་དང་མངོན་ཤེས་འབྱུང་བ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །དང་པོ་རྟགས་ནི་འདི་རྣམས་འབྱུང་བ་སྟེ། ། འཁོར་བའི་ཆོས་ལ་སྐྱོ་སེམས་སྐྱེ་བ་འབྱུང་། །སེམས་ཅན་རྣམས་ལ་སྙིང་རྗེ་སྐྱེ་བ་དང་། ། རང་གི་ཡུལ་དང་གནས་ལ་མི་ཆགས་ཤིང་། །ཐག་རིང་གཞན་དུ་འགྲོ་བར་འདོད་པ་འབྱུང་། །གཉིས་པ་ལ་ཡང་རྟགས་རྣམས་འབྱུང་བ་ཡང་། །གོས་དང་ཟས་ཀྱི་འདུ་ཤེས་ཆུང་བ་དང་། ། ཉོན་མོངས་ལ་སོགས་ཆགས་སྡང་ཆུང་བ་དང་། །སྙིང་རྗེ་ཕན་སེམས་རབ་ཏུ་ཆེ་བ་དང་། །རྨི་ལམ་རྟགས་ནི་མང་དུ་འབྱུང་བ་སྟེ། །གསུམ་པ་ལ་ཡང་འདི་ལྟར་འབྱུང་བ་ཡིན། །ཡོ་བྱད་ལོངས་སྤྱོད་ཐམས་ཅད་འགོག་པ་དང་། །དགེ་མི་དགེ་ལ་རྣམ་པར་རྟོག་པ་མེད། །ཉོན་མོངས་སྒྲིབ་པ་རྣམ་པར་དགེ་བ་དང་། །རྨི་ལམ་རྟགས་རྣམས་སྣ་ཚོགས་འབྱུང་བ་དང་། ། རང་རྟགས་མངོན་ཤེས་ཆོ་འཕྲུལ་སྣ་ཚོགས་འབྱུང་། །དབང་པོ་རབ་འབྲིང་མ་རྩལ་གྱི་འབྱུང་། །བྱུང་ཡང་རང་བྱུང་རྩལ་སྣང་བྱུང་བ་ཡིན། །རེ་དང་དོགས་པ་ཀུན་སྤངས་ཆོས་ཉིད་དང་། །དེ་དག་ཆོས་ཉིད་ངང་དུ་སྤྱད་བྱའོ། །རིན་པོ་ཆེ་རྒྱས་པ་ཆེན་པོའི་མདོ་ལས། རྟགས་དང་ཆོ་འཕྲུལ་འབྱུང་བའི་ལེའུ་སྟེ་དྲུག་པའོ།། །།སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། །རང་བཞིན་དོན་མཚོན་བརྡ་ཡིས་བསྟན་པ་འདི། །སུ་ལ་བསྟན་ཅིང་གཏད་པ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །ཐེག་ཆེན་སྒོར་ཞུགས་བློ་འཕང་མཐོང་བ་དང་། །ངང་དགེ་སྤྲོ་ཞིང་སྙིང་རྗེ་ཕན་སེམས་ཆེ། །ང་རྒྱལ་ཁེངས་སེམས་ཆུང་ལ་དད་པ་ཆེ། །དམ་ཚིག་སྲུང་ཞིང་ཕ་རོལ་སྤྱོད་དང་བསྟུན། །དགྲ་ལ་འཛུར་ཞིང་བླ་མ་ཐབས་ཀྱིས་ཚོལ། །བླ་མའི་དོན་ལ་ཡིད་ཆེས་ངེས་པར་འཇོག །བླ་མ་ཁུར་ཞིང་བླ་མ་ངེས་མཆོད་དེ། །ངེས་མཆོད་རྟག་ཏུ་སེར་སྣ་མེད་པ་འབྱུང་། །བྱུང་བའི་རྟགས་སུ་གཏོང་ཕོད་ཆེ་བ་སྟེ། ། ཡུལ་མཁར་ཁྱིམ་དང་བང་མཛོད་འབྲུ་རྣམས་དང་། །གསེར་དངུལ་ཟངས་ལྕགས་མུ་ཏིག་གཡུ་ལ་སོགས། །ཡོ་བྱད་རྣམས་ལ་ཆགས་སེམས་མེད་པར་གཏོང་། །ལུས་སྲོག་བུ་སྨད་གཡོག་འཁོར་བཅས་པ་ཡང་། །བླ་མ་མཉེས་པར་བྱ་ཕྱིར་འབུལ་བར་བྱེད། །དེ་ལྟ་བུ་ཡི་སྣོད་ལྡན་བཟང་ལ་བསྟན། །སྐྱོ་དུབ་མེད་པའི་དད་པ་བརྟན་ལ་བསྟན། །གྱོང་སེམས་མེད་པའི་མཉེན་ལྕུག་དྲང་ལ་བསྟན། །རྨོངས་པ་མེད་པའི་ཤེས་རབ་ཆེ་ལ་བསྟན། །གསང་ཚིག་ཐུབ་པའི་སྐྱེས་བུ་ཆེན་པོ་ལ། །རང་བཞིན་དོན་མཚོན་བརྡ་ཡི་རྒྱུད་འདི་གཏད། །གདམས་ངག་འཚོ་ཤེས་རྣལ་འབྱོར་ཆེན་པོ་ལ། །སངས་རྒྱས་མཚོན་པའི་བསྟན་པའི་རྒྱུད་འདི་གཏད། །རང་བཞིན་ལྷུན་གྲུབ་ཀུན་ཏུ་བཟང་པོ་དང་། །རང་བྱུང་ཡན་ལག་རྡོ་རྗེ་སེམས་དཔའ་གཉིས། །ཐ་དད་མེད་དེ་དབྱེར་མེད་གཅིག་གི་ངང་། །གཅིག་ལ་བསྟན་ཅིང་བརྟན་པ་མེད་པར་གཏད། །རིན་པོ་ཆེ་རྒྱས་པ་ཆེན་པོའི་མདོ་ལས། གཏད་རྒྱ་བསྟན་པའི་ལེའུ་སྟེ་བདུན་པའོ།། །།སྡུད་པའི་གསང་བདག་རྡོ་རྗེ་སེམས་དཔའ་ཡིས། །སྟོན་པའི་སྟོན་པ་ཀུན་ཏུ་བཟང་པོ་ལ། །འདི་ལ་མིང་བཏགས་ངེས་པ་ཇི་ལྟ་བུ། །སྟོན་པའི་སྟོན་པ་ཀུན་ཏུ་བཟང་པོ་ཡིས། །སྡུད་པའི་གསང་བདག་རྡོ་རྗེ་སེམས་དཔའ་ལ། །ཆོས་རྣམས་ཐམས་ཅད་འདི་ལས་བྱུང་བའི་ཕྱིར། །བྱུང་བའི་བྱུང་ཁུངས་ཆེན་པོ་ཞེས་ཀྱང་བྱའོ། །ལམ་མེད་ལམ་དུ་ཁྲིད་ནས་སྟོན་པའི་ཕྱིར། །ལམ་རྒྱུས་ལམ་མཁན་ཆེན་པོ་ཞེས་ཀྱང་བྱའོ། །ཆོས་རྣམས་ཐམས་ཅད་འཁྲུལ་ནས་སྣང་བའི་ཕྱིར། །འཁྲུལ་སྣང་ཆེན་པོའི་རྒྱུད་ཆེན་ཞེས་ཀྱང་བྱའོ། །ཆོས་རྣམས་ཐམས་ཅད་མ་ལུས་འདུས་པའི་ཕྱིར། །རྫོགས་ཆེ་འིཆེནཞེཇི་ཞིནངངང་ཆེཆེན་ཞེསེང་ཆེཆེ་འི་མིའལེསྟེཔ་ ན་པ ་རྒྱུད་ ་ ས་ཀྱང་བྱ། ། ་ལྟར་འདད་པ་བ ་དུ་འབྱུང་བའ་ཕྱར། །རན་པ་ ་རྒྱས་པ་ ་པ་ ས་ཀྱང་བྱ། །བྱང་ཆུབ་ མས་རན་པ་ ་རྒྱས་པ་ ན་པ ་མད་ལས། ང་བཏགས་པའ་ འུ་ ་བརྒྱད་པའོ།། །།བྱང་ཆུབ་ཀྱི་སེམས་རིན་པོ་ཆེའི་རྒྱུད་རྒྱས་པ་ཆེན་པོའི་མདོ་ཞེས་བྱ་བ་རྫོགས་སོ།། །།