Ngb-pt-0389-vol-04-text
Front[edit]
Body[edit]
རྒྱ་གར་སྐད་དུ། ཨེ་ཀ་ཛ་ཏི་མ་ཧྭ་ཡོ་གི་ཤྭ་རྡི་ཏནྟྲ། བོད་སྐད་དུ། རྣལ་འབྱོར་དབང་ཕྱུག་ཆེན་མོ་རལ་གཅིག་མའི་རྒྱུད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་རང་བཞིན་གྱི་གནས། ཡུམ་གྱི་བྷ་ག་རྣམ་པར་དག་པའི་དབྱིངས་ན་བཞུགས་སོ། །ཉིད་ལས་མི་གཞན་པའི་དེ་བཞིན་གཤེགས་པ་དང་། མཛེས་པའི་མ་མོ་ཆེན་པོ་ཀོ་རྡི་དང་། ཙོ་རྡི་དང་། པྲ་མོ་དང་། བེ་ཏ་སྙི་དང་། པུསྐ་སྙི་དང་། བྷསྨ་རྡི་དང་། སྨ་ཤི་ནི་དང་། ཙཎྜསྙི་ལ་སོགས་པ་དང་། གཞན་ཡང་སེང་གེའི་མགོ་ཅན་དང་། དེ་བཞིན་དུ་སྟག་དང་། ཝ་དང་། སྤྱང་ཀི་དང་། བྱ་རྒོད་དང་། ཀང་ཀའི་མགོ་དང་། བྱ་རོག་གི་མགོ་དང་། འུག་པའི་མགོ་ཅན་ལ་སོགས་པའོ། གཞན་ཡང་ལྕགས་ཀྱུ་ཅན་དང་། ཞགས་པ་དང་། ལྕགས་སྒྲོག་དང་། དྲིལ་བུ་ཅན་ལ་སོགས་པ་དང་ལྡན་པར་གྱུར་ཏོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བའི་བདག་པོ་ལག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་དང་ཐབས་ཅིག་ཏུ་བཞུགས་སོ། །དེའི་ཚེ་དེའི་དུས་ན་འདི་ཉིད་ལྟར་རང་བཞིན་གྱི་དཀྱིལ་འཁོར་གྱི་ཡབ་ཡུམ་གྱི་བྷ་ག་རྣམ་པར་དག་པ་མ་མཐོང་བ་རྣམས་ནི། །གནོད་སྤྱིན་དང་། གནོད་སྤྱིན་མོ་དང་། སྲིན་པོ་དང་སྲིན་པོ་དང་། མ་མོ་དང་།མཁའ་འགྲོ་མ་ལ་སོགས་པ་ནི། ཁྲག་འཐུང་བ་དང་རུས་པ་ལ་སོགས་པ་འཆའ་ཞིང་། སྲོག་འཕྲོག་པར་བྱེད་པ་དང་། རྣམ་པར་འཚེ་སྟེ། གཞན་གྱིས་ནི་འདུལ་བའི་དུས་ལ་བབ་པར་མ་གྱུར་པ་དང་། །དེའི་ཚེ་དེའི་དུས་ན་གསང་བའི་བདག་པོ་ལག་ན་རྡོ་རྗེས། བཅོམ་ལྡན་འདས་རྡོ་རྗེ་ཧེ་རུ་ཀ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་བྱིན་གྱིས་བརླབ་ཏུ་གསོལ། །སེམས་ཅན་གྱིས་དོན་དུ་དབང་བསྐུར་བ་དང་།དཀྱིལ་འཁོར་བསྟན་པ་དང་། སྦྱིན་བསྲེག་དང་། དམ་ཚིག་འབོག་པ་དང་། མཆོད་པ་བྱ་བ་དང་། མངོན་པར་བྱང་ཆུབ་བསྟན་པ་དང་། སེམས་དཔའ་གསུམ་གྱི་ཁྱད་པར་བསྟན་པ་དང་། བསོད་ནམས་དང་ཡེ་ཤེས་ཀྱི་ཚོགས་བསྟན་པ་དང་། ལྟ་བ་བསྟན་པ་དང་། སྤྱོད་པ་བསྟན་པ་དང་། གསང་སྔགས་བསྟན་པ་དང་། དངོས་གྲུབ་ཐོབ་པའི་ཚུལ་བསྟན་པ་དང་། ལས་ཕྲ་མོ་རྣམས་བསྒྲུབ་པ་ཐོབ་པར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་འདི་སྐད་ཅེས་གསུངས་སོ། ཕྱག་ན་རྡོ་རྗེ་དུས་ལ་བབ་པར་ཤེས་ན། ཁྱོད་སྦྱོར་བ་གཉིས་དང་ལྡན་པ་སྲ རྒྱུད་ཡོངས་སུ་གཟུང་བའི་སྦྱོར་བ་དང་། དཀྱིལ་འཁོར་རྣམ་པར་འཛིན་པའི་བདག་པོ་བྱོས་ཤིག །དེ་ནས་གསང་བའི་བདག་པོས་ཚུལ་གཉིས་ལ་སྙོམས་པར་ཞུགས་ཏེ། གཅིག་ལ་ནིདེབཞིནགཤེགསཔའིཐད་དུ་ཐལ་མོ་སྦྱར་སྲིན་མོའི་ཚུལ་དུ་སྦྱོར་དབང་ནོད་པར་གྱུར་ཏོ། །གཉིས་པས་ནི་སྟོན་པ་ལ་རྒྱུད་ཀྱི་དོན་དག་པར་དྲི་བར་གྱུར་ཏོ། །དེ་ནས་དེ་བཞིན་གཤེགས་པས་ཉི་ཟླའི་སྟེང་ལྷ་མོ་བཅུ་དྲུག་བཞུགས་ནས་ཧ་དང་ཧེར་གྱུར་པ་རྣམས་ཡིག་འབྲུ་རྣམ་བཟུང་སྟེ་སྨི་བོར་བཞག་པ་དང་། སྐུ་དང་དབུ་དང་ཕྱག་མཚན་རྣམས་རིམ་པར་རྫོགས་ཏེ། འུག་པའི་མགོ་ལ་ཐུག་པ་རྣམས་གསང་སྔགས་འདིས་བྱིན་གྱིས་བརླབས་སོ། །བཛྲ་ཀོ་རྡི་ཙོ་རྡི་པྲ་མོ་ཧ་བེ་ཏ་སྙི་པུསྐ་སྙི་བྷ་སྨ་རྡི་སྨ་ཤ་ནི་ཙཎྜ་སྙི། སིདྷི་མུ་ཁྲི། བྱུ་སྨྲ་མུ་ཁྲི།སྲི་ལ་མུ་ཁྲི། ཤྭ་ན་མུ་ཁྲི། གྲི་རྟེ་མུ་ཁྲི། ཀརྐོ་མུ་ཁྲི། ཀྭ་ཀ་མུ་ཁྲི། ཨུ་ལྕུ་ཀ་མུ་ཁྲི། ཨ་སྟི་ཁི྅་ཧུ༷། ཞེས་གསུངས་པ་དང་། །དམ་ཚིག་གི་ལྷ་མོ་དབུ་ཅུ་བདུན་ཕྱག་སུམ་བཅུ་རྩ་གཉིས་དང་ལྡན་པར་གྱུར་ཏོ། །གསང་བ་ལས་གྱུར་འདི་ཉིད་ལ། །ཡེ་ཤེས་རྣམས་ཀྱིས་དབང་བསྐུར་བ། རྫོགས་པའི་ཚུལ་གྱིས་ཕྱག་རྒྱ་ཆེ། །བྱིན་བརླབ་གཉིས་མེད་ཐོབ་པར་ཤོག །དེ་ནས་ཕྱག་ན་རྡོ་རྗེས་གསོལ་པ། །བཅོམ་ལྡན་འདས་དེའི་དཀྱིལ་འཁོར་བསྟན་དུ་གསོལ། བཅོམ་ལྡན་འདས་ཀྱིས་གསུངས་པ། ལྟེ་བ་མུ་ཁྱུད་དང་བཅས་པ། །རྣམ་པར་དག་པ་དག་ཉིད་ཀྱིས། །དཀྱིལ་འཁོར་ལྷ་ཡང་བྱིན་གྱིས་བརླབ། །ཡེ་ཤེས་འབར་བའི་འཁོར་ལོ་བཞི། །དཀྱིལ་འཁོར་རྣམ་པར་དག་པའི་གནས། །གཞལ་ཡས་ཁང་གི་བར་ཁྱམས་ནི། །གྲུ་ཆད་རྩིབས་མཚམས་བཅས་པ་ལ། །ཡུལ་དང་ཤེས་པ་རྣམ་པར་དག །དཀྱིལ་འཁོར་ལྷ་ནི་སྒོ་བཞིའོ། འདི་ལྟ་སྟེ། དཀྱིལ་འཁོར་གྱི་ལྟེ་བ་དང་།འཁོར་ལོ་དང་། བར་ཁྱམས་དང་། སྒོ་ཁྱུད་དང་། ལྕགས་རི་དང་། རྡོ་རྗེའི་ཕྲེང་བ་དང་། མེའི་ཕྲེང་བ་དང་། དྲ་བ་དང་། དྲ་བ་ཕྱེད་པ་དང་། མཚོ་དང་། བྱ་དང་། ཤིང་དང་། གཅན་གཟན་དང་། དུར་ཁྲོད་ལ་སོགས་པས་ཕྱི་རོལ་བརྒྱན་པའི་ནང་ན། མ་མོ་དང་། མཁའ་འགྲོ་དང་། སྲིན་པོ་དང་། སྲིན་མོ་ལ་སོགས་པ་རྣམ་པར་དག་པ་ཅན་མ་ཡིན་པ། དཀྱིལ་འཁོར་གྱི་ལྷར་མི་རྟོགས་པ་རྣམས་ཀྱིས་བསྐོར་བའོ། །དེའི་དབུས་ན་དཔལ་རལ་པ་གཅིག་མ་དབུས་ཀྱི་ལྷགས་རླུད་འ་་མའི་ནང་ན། དྲེའུ་རྐང་གསུམ་ཞོན་པ། མཆེ་བ་རྣམ་པར་གཙིགས་པར་གྱུར། ཁམ་ནག་རལ་པ་གཅིག་ཏུ་དྲིལ་བ་རེ་ལྡེ་དང་གླང་གི་ཀོ་བའི་ཤམ་ཐབས་བྱས་པ།སྦྲུལ་གྱི་རྣ་ཆ་དང་། སེང་གེས་བརྒྱན་པ། །ལྟེ་བའི་སྟེང་དུ་ཉི་མ་དང་། སྤྱི་བོའི་གཙུག་ནས་ཟླ་བ་འཆར་ལ། སྤྱན་གསུམ་དང་ལྡན་པ། ལག་པ་གཡས་པ་རླུང་ནག་གི་ནང་ནས་རལ་གྲི་འབྱིན་པ། ལག་པ་གཡོན་པ་རིན་པོ་ཆེའི་ནེའུ་ལེ་འཛིན་པ། གཞན་ཡང་དུར་ཁྲོད་གྱི་ཚངས་པ། མིའི་རྒྱུ་མ་ལུགས་ཀྱིས་བཀང་བ་ཞལ་དུ་གསོལ་བ། གཞན་ཡང་སྒེག་པ་དང་། དཔའ་བ་དང་། སྨྱོ་བ་དང་། རྒོད་པ་དང་། ཁྲོ་བ་དང་། འཇིགས་སུ་རུང་བ་དང་། རྨད་དུ་བྱུང་བ་དང་། སྙིང་རྗེ་ཆེ་བ་དང་། ཞི་བ་ལ་སོགས་པ་དང་ལྡན་པར་གྱུར་ཏོ། དེ་ནི་འདི་ལྟ་སྟེ། མཐིངནགཞལགཅིགཕྱགགཉིས་པ། །རལ་གྲི་ནེ་ལེ་ཡང་དག་འཛིན། །མཐིང་ནག་ཀོ་རྡི་དབྱུག་པ་ཁྲག །ཙོ་རྡི་འབྲེལ་བ་མདའ་གཞུ་འགེངས། །ཕྲ་མོ་གཡས་ན་ཆུ་སྲིན་འཕྱར། །བེ་ཏ་ནག་མོ་རྡོ་རྗེ་འཕྱར། །པྲསྐ་ལག་ན་རྒྱུ་ཞགས་འདྲེན། །བྷསྨ་ཁྲག་ཆེན་འཐུང་ཞིང་དཀྲུག །སྨ་ཤ་ལོག་རྟོག་བྱི་སྙིང་ཟ། །ཙཎྜའཁོར་བའི་མགོ་ལུས་འབྲལ། །སེང་གེ་སྟག་གིས་ཕྱག་བསྣོལ་ཏེ། །ཁུ་ཡི་ཕྱག་གིས་དགྲ་སྙིང་ལྡག །སྦྱང་ཀིའི་མགོ་ཡིས་སྙིང་ལ་འབྲད། །བྱ་རྒོད་སྐྲུ་གྲི་བྷརྙ་འཛིན། །ཀདྷ་མགོ་ཡི་ཞིང་ཕྲག་གཟར། །བྱ་རོག་མགོ་ཡིས་གྲི་ཐོད་འཛིན། །འུག་པའི་མགོ་ཡི་ལྕགས་ཀྱུ་ཁྲག །སྨོས་པའི་ཕྱག་ན་ཕྱག་མཚན་ཅན། །གཞན་ནི་བཏང་སྙོམས་མཛད་པ་དང་། །གཉིས་ཀ་གང་སྨོས་རྫོགས་པའི་ཕྱག །སྐུ་ནི་ཐམ་ཅད་དབྱིངས་སུ་གཅིག །དཀྱིལ་འཁོར་འདི་ཡིས་ལས་རྣམས་བྱེད། །རྣལ་འབྱོརདབང་ཕྱུག་ཆེན་པོ་རལ་གཅིག་མའི་རྒྱུད་ལས། དབང་བསྐུར་བ་དང་། དཀྱིལ་འཁོར་བསྟན་པའི་ལེའུ་སྟེ་དང་པོའོ།། །།དེ་ནས་གསང་བའི་བདག་པོས་གསོལ་པ། བཅོམ་ལྡན་འདས་སྤྱིན་སྲེག་གི་ལས་ཀྱི་སྦྱོར་བ་ཇི་ལྟ་བུ་གྲུབ་པ་བསྟན་དུ་གསོལ། བཅོམ་ལྡན་འདས་ཀྱིས་གསུངས་པ། །གསང་བའི་བདག་པོ་འདི་ལྟ་སྟེ། །དཀྱིལ་འཁོར་ཆེན་པོའི་ཤར་ལྷོའམ། །ཡང་ན་བྱང་ཤར་ཉིད་ཀྱང་རུང། །དེབཞིནལྷོདངནུབཏུ་ཡང་། །གཟུང་འཛིན་བདག་པོ་ཞལ་བྲི་སྟེ། །མདོག་ངན་ཁམ་ནག་རལ་པ་ཅན། ཁྲེལ་མིག་ཁྲོ་གཉེར་ཁ་ཟུར་གསུམ། །ཚེར་མ་ཅན་གྱི་ཤིང་དག་ལ། །དུག་ཤིང་བརྩེགས་པས་ཡམ་ཤིང་བྱས། །གནོད་པའི་མིང་རུས་དུ་མ་རྣམས། །རེ་རེའི་སྔོན་དུ་གསང་སྔགས་ལྡན། །བདག་ཉིད་འདོད་ལྷའི་ང་རྒྱལ་གྱིས། །རང་བཞིན་གནས་ནས་དགུག་དང་གཞུག །གཞན་ཡང་བྱས་ཏེ་རྟེན་འབྲེལ་ནི། །གླང་ཆེན་ཀླད་པ་མི་དབང་ཤ །བྱ་རོག་འུག་པ་ཤ་ཚིལ་དང་། ཤ་ཁྲག་རོ་ཡི་དུར་ཁྲག་སོགས། །སྦྱར་ནས་བཏབ་པའི་སྔགས་འདི་ཡིན། །ཨོ་ཙ་པ་ལ་ཨ་ཤུག་མེ། །སརྦ་ཤ་ཏྲུ༷་ཨ་མུ་ཀ༷་ད་ཧ་ད་ཧ། པ་ཙ་པ་ཙ། བྷ་སྨི་ཀུ་རུ་ཀུ་རུ་ཧུ༷་ཕཊ། མེ་ནི་སྔོ་ནག་དམར་བ་ཡིན། །ལྗང་ནག་དུད་ཁ་གཙུག་ཏུ་འཁྱིལ། །ཁམ་པའི་ཚུབ་མ་ལུ་བྱེད་འདྲ། །ཚུབ་མ་ཚ་ཞིང་ཚ་ཚ་འཕྲོ། །བབ་པའི་མེ་ལྕེ་ལྟ་བུ་ནི། །དྲག་པོའི་སྦྱིན་བསྲེག་ལྟ་བུ་ཡིན། །དྲག་པོ་ཕྱི་ཡི་ཞི་གནས་ལ། །བརྟེན་ན་གང་གི་སྤྱིན་བསྲེག་འགྲུབ། །རྣལ་འབྱོར་དབང་ཕྱུག་ཆེན་མོ་རལ་པ་གཅིག་མའི་རྒྱུད་ལས། སྒྱིན་བསྲེག་གི་ལེའུ་སྟེ་གཉིས་པའོ།། །།ཕྱག་ན་རྡོ་རྗེས་གསོལ་པ། བཅོམ་ལྡན་འདས་རྣལ་འབྱོར་ཆེན་མོ་རལ་གཅིག་མའི་དམ་ཚིག་ཇི་ལྟ་བུ་ལགས། བཅོམ་ལྡན་འདས་ཀྱིས་གསུངས་པ། གསང་བའི་བདག་པོ་རལ་པ་གཅིག་པའི་དམ་ཚིག་ནི་འདི་ལྟ་སྟེ། བདེན་པ་ལ་ཐེ་ཚོམ་མི་ཟ་བ་དང་། ཆོས་ཉིད་ལ་ཐེ་ཚོམ་མི་ཟ་བ་དང་། མངོན་པར་དགའ་བ་དང་། སྲིད་པ་ལ་མངོན་པར་ཆགས་པ་དང་། བླ་ན་མེད་པའི་དཀོན་མཆོག་གསུམ་ལ་བླང་དོར་མི་བྱེད་པ་དང་། གསང་སྔགས་ཀྱི་སྒྲ་མི་གཅོད་པ་དང་། གསང་སྔགས་ཀྱི་ལྟ་སྤྱོད་དམན་པ་ལ་མི་བརྗོད་པ་དང་། དཀོན་མཆོག་གི་སྐྱབས་ན་འདུག་པ་ལ་བྱམས་པ་དང་། གསང་བའི་དམ་ཆོས་དང་མ་བྲལ་བ་དང་། བླ་མ་སློབ་དཔོན་ཀྱི་ཐུགས་འཛིན་པ་ལ་གུས་པ་དང་། དམ་ཚིག་གིས་འདྲེས་པ་རྣམས་ལ་གསང་བའི་མཚངས་མི་འབྲུ་བ་དང་། ཐུན་མོང་གི་དངོས་གྲུབ་ཀྱིས་མི་གདུང་པ་དང་། གཞན་དད་པའི་ཚོགས་མི་གཅོག་པ་དང་། སྡིག་པ་ཅན་དང་མཛའ་བར་མི་བྱེད་པ་དང་། བུད་མེད་ཐམས་ཅད་དང་། སེམས་ཅན་ལ་ལྷག་པར་འཛིན་པ་དང་། ཕྱག་ན་རྡོ་རྗེ་ལ་ཁྱད་པར་ཅན་གྱི་ལྷར་མི་བྱེད་པ་དང་། ཕྱག་ན་རྡོ་རྗེའི་མེའི་མཚན་འཛིན་མི་བྱེད་པ་དང་། ཕྱག་ན་རྡོ་རྗེའི་ཙཀ་ལི་ཁམས་ལ་འདེབས་པ་དང་། ས་མ་ནོན་པར་ལུས་ངག་གི་དགེ་བ་མི་སྤང་བ་དང་། དམ་ཆོས་ཚོགས་པར་མཁའ་འགྲོ་འབོད་པ་དང་། ལྷ་དང་དེ་བཞིན་གཤེགས་པ་ལ་བཟང་ངན་དུ་འདུ་ཤེས་མེད་པ་དང་། སྙིང་རྗེའི་སེམས་ཡོད་པ་དང། དམ་བཅས་པའི་དགེ་བ་ཡོད་པ་དང་། འདི་ལྟར་དམ་ཚིག་ཉི་ཤུ་རྩ་དྲུག་མ་ཡིན་པ་དོར་ཏེ། ཡང་དག་པར་བླང་བ་དག་བླངས་ན། དཀོན་མཆོག་གསུམ་གྱི་ཕྱག་རྒྱ་དཔལ་རལ་པ་གཅིག་མ་མཉེས་ནས། དངོས་གྲུབ་ཐམས་ཅད་དུས་འདིར་འགྲུབ་པར་འགྱུར་རོ། ཕྱག་ན་རྡོ་རྗེས་གསོལ་པ། བཅོམ་ལྡན་འདས་དམ་ཚིག་ཉི་ཤུ་རྩ་དྲུག་མཉམ་པར་བྱེད་པའི་གང་ཟག་དེའི་ཕོ་ཉ་བདག་གིས་བགྱིས་ཏེ།ཇི་ལྟར་བདག་གིས་མ་བགྱིས་ན། བདག་ཀྱང་མགོ་ཨརྫ་ཀ་ཡི་དོག་པ་བཞིན་དུ། །ཚལ་པ་བདུན་དུ་འགས་པ་དང་། མནར་མེད་པའི་དམྱལ་བ་ཆེན་པོར་རྟག་ཏུ་འགྱུར་ཏེ། སངས་རྒྱས་ཐམས་ཅད་བདག་གིས་བསླུས་པ་ལགས་སོ། རྣལ་འབྱོར་དབང་ཕྱུག་ཆེན་མོ་རལ་པ་གཅིག་པའི་རྒྱུད་ལས། དམ་ཚིག་བསྟན་པའི་ལེའུ་སྟེ་གསུམ་པའོ།། །།དེ་ནས་ཕྱག་ན་རྡོ་རྗེས་གསོལ་པ། །བཅོམ་ལྡན་འདས་རྣལ་འབྱོར་ཆེན་མོ་རལ་གཅིག་མ་ལ། མཆོད་པ་དབུལ་བའི་ཐབས་དག་བསྟན་དུ་གསོལ། བཅོམ་ལྡན་འདས་ཀྱིས་གསུངས་པ། གསང་བའི་བདག་པོ་འདི་དག་ནི་ཕྱག་ན་རྡོ་རྗེ་ཉིད་ཀྱི་ཁྱད་པར་ཏེ། བྱང་ཤར་གྱི་རི་རབ་ཀྱི་སྟེང་ཡོངས་འདུའི་ཤིང་ལ་གནས་པ། གནོད་སྤྱིན་མོ་དམ་ཅན་གྱི་ཚུལ་དུ་གནས་པའི་བྱང་ཆུབ་སེམས་དཔའ་ཞེས་བྱ་བ་འཁོར་མང་པོ་མཐུ་ཆེ་བ། དེ་རང་བཞིན་གྱི་གནས་ནས་བཀུག་ལ་བསྟིམ་པ་དང་། གཉིས་སུ་མེད་པར་བྱ་བ་སྟེ་མཆོད་པ་ནི། སྤྱན་དྲངས་ཏེ་མཆོད་པ་དང་། འདིར་གཤེགས་མཆོད་པ་དམ་པ་བཞེས། །སྐུ་མདོག་སྔོ་ནག་རལ་པ་ཅན། །རལ་པ་བསིགས་པས་སྟོང་ཁམས་གཡོ། །སྐུ་ཡི་རྒྱན་ཏེ་གནས་ཀྱི་མཆོག །ཐུགས་དྲངས་ཁྱབ་འགྲོ་གློག་གི་བང་། ཡུད་ཙམ་བསམ་པས་གནས་སུ་ཕྱིན། །དབུ་ཡི་གཙུག་ནས་ཟླ་གསལ་རྒྱས། །མ་རིག་མུན་པ་སེལ་བའི་རྟགས། ལྟེ་བའི་དཀྱིལ་ནས་ཉི་ཤར་བས། ཁྲེས་རབ་ཉི་མས་སྡུག་བསྔལ་རྒྱ་མཚོ་སྐེམས། །སྤྱན་ནི་སྐར་ཆེན་ཤར་བ་འདྲ། །སྤྱན་རྩ་དམར་ལ་སྡང་མིག་ཅན། ཕྱག་གཡས་ཚུབ་མ་བསྣམས་པ་ནི། རླུད་དམར་ནང་ནས་རལ་གྲི་འབྱིན། །མྱུར་མགྱོགས་རྫུ་འཕྲུལ་འགྲོ་བའི་རྟགས། །གཡོན་པའི་ནེའུ་ལེ་བསྣམས་པ་ནི། མི་མགོ་བཅད་ནས་སྦེད་པའི་སྣོད། །ཡན་ལག་བཞི་ནི་བསྒུམ་པའི་ཚུལ། །མ་གཅིག་ཐུགས་དམ་ཞལ་ཟས་སྣོད། །མ་ལ་བྷརྙ་བཅུད་ཡངས་པའི། །འཁོར་ཡུག་བཅས་པའི་འཇིག་རྟེན་ནི། །གསོལ་ལོ་རོལ་ཅིག་དགྱེས་པར་མཛོད། །མ་གཅིག་ཐུགས་དམ་ཞལ་ཟས་འདི། །བསད་པའི་ཤ་དང་མྱོས་པའི་ཆང་ བཙོས་པའི་ཤ་དང་ཁུ་བ་ཁྲག །བསྲེགས་པའི་གསུར་དང་རློན་པའི་ཤ །གློ་སྙིང་ནང་རོལ་མཁལ་མར་བཅས། ཁུ་མ་རྐང་དང་རུས་པ་དང་། །དམར་གྱི་ཨསྙེ༷་རྒྱ་མཚོ་བསྐྱིལ། །གསོལ་ལོ་རོལ་ལོ་དགྱེས་པར་མཛོད། རུ་རུ་རོ་རུ་ཙ་བ་ལ་ཨ་ཤུག་མེ། །སརྦ་ཤ་ཏྲུ༷་མུ༷་ས་ཙིསྟ་གོ་རོ་ཙ་ན་ཁ་རི་ཁུ་ཧི། མི་དབང་འབྲས་བུ་སྨིན་པའི་ཤ་ཆེན་དང་། ཤི་ཀའི་མཚལ་ཏིག་དམར་པོ་དང་། ཤིང་ལོ་རླུད་ཁྱེར་ས་ལ་མ་རེག་དང་། ན་ཆུང་གཞོན་པའི་བྱུང་ཚད་ཁྲག །མཐུན་པའི་མཆོད་པ་བཞེས་པར་མཛོད། །དེ་ནས་གཏོར་མ་བཏང་བར་འདོད་ན། རྩ་བའི་ཡི་གེ་ལས་སྐུར་བསྐྱེད་ནས། །སྐུ་གསུང་ཐུགས་སུ་བྱིན་གྱིས་བརླབས་ནས། ཡ༷་ལས་རླུད་དང་། ར༷་ལས་མེ་དང་། ཨ་ལས་ཐོད་པའི་ནང་དུ། དམཚིགགིརྫསཀྱིསབཀང་ནས། དེ་ཉིད་ཀྱིས་སྦྱངས་ཏེ། གཉིས་སུ་མེད་པའི་མཆོད་པ་རོལ་པ་ཆེན་པོའི་ཚུལ་གྱིས་དབུལ་བར་བྱའོ། མེ་ཏོག་གི་རྣམ་པ་དང་། ཤིང་ཐོག་གི་རྣམ་པ་དང་། ཁུར་བའི་རྣམ་པ་དང་། ལ་དུའི་རྣམ་པ་དང་། བདུག་པའི་རྣམ་པ་དང་། ཤ་ཡི་རྣམ་གྲངས་དང་། ཆེན་པོའི་རྣམ་གྲངས་དང་། ཁྲག་ཆེན་པོའི་རྣམ་པ་དང་། འོ་མ་དང་ཞོ་ཡི་རྣམ་གྲངས་དང་། དེ་ལ་སོགས་པ་དག་དུས་བཞིའི་རྒྱུན་དུ་བརྩོན་པར་བྱའོ། །གདུལ་བར་བྱ་བ་གནོད་སྤྱིན་མོ་དམ་ཅན་མཐུ་མོ་ཡང་དག་པར་བྱེད་ཅིང་། །དེའི་འཁོར་ཡང་ཤིན་དུ་འདུལ་བའི་ལས་བྱེད་པ་དང་། རྣལ་འབྱོར་མ་གཅིག་པུར་གྲུབ་པ་ཡང་མཉེས་པར་འགྱུར་རོ། དེ་ནས་བསྒྲུབ་པའོ། །མཆོད་པ་དང་གཏོར་མས་དངོས་གྲུབ་སྟེར་བར་བྱེད་དོ། །རྣལ་འབྱོར་མ་གཅིག་པུ་གྲུབ་པའི་རྒྱུད་ལས། མཆོད་པ་དང་གཏོར་མ་བཏང་བའི་ལེའུ་སྟེ་བཞི་པའོ།། །།དེ་ནས་ཕྱག་ན་རྡོ་རྗེས་གསོལ་པ། བཅོམ་ལྡན་འདས་མངོན་པར་བྱང་ཆུབ་པའི་ཚུལ་གྱིས་ལྷའི་དཀྱིལ་འཁོར་བསྐྱེད་པར་བགྱི་བ་ནི་གང་ལགས། བཅོམ་ལྡན་འདས་ཀྱིས་གསུངས་པ། ཐམས་ཅད་ཆོས་ཉིད་གཉིས་མེད་སྟོང་། །དེ་བས་སྟོང་པའི་བྱང་ཆུབ་ནི། །ཀུན་རྫོབ་རྣམས་ཀྱི་སྔོན་དུ་འགྲོ། །གཟུགས་སྐུས་འགྲོ་དོན་བྱ་བའི་ཕྱིར། །སེམས་ཉིད་ཟླ་བ་ལྟར་བསྐྱེད་པ། །གདན་དེ་གཞི་ལས་བྱང་ཆུབ་ཡིན། །གང་དག་གསུང་གི་གདུལ་བྱའི་ཕྱིར། །ས་བོན་རྒྱུ་ལྟར་བརྟག་པ་ནི། །མངོན་པར་བྱང་ཆུབ་ཡི་གེ་ཡིན། །དབང་པོ་རྣོན་པོ་གདུག་པ་ཡི། །ཐུགས་ཀྱི་ཡང་དག་དེ་སྦྱོར་བས། །སོ་སོའི་ཕྱག་མཚན་དེ་ལས་འབྱུང་། །ལུས་ངག་ཡིད་གསུམ་གདུལ་ཕྱིར་ན། །སྐུ་གསུང་ཐུགས་སུ་རྫོགས་པའི་ཕྱག་རྒྱ་ནི། །ཞི་གནས་སྒྲུབ་ཕྱིརཔ་བསྟན་པ་ཡིན། །དེ་ནས་ཕྱག་ན་རྡོ་རྗེས་གསོལ་པ། །བཅོམ་ལྡན་འདས་སེམས་དཔའ་གསུམ་གྱི་ཚུལ་དུ་བསྒྲུབ་པ་ནི་གང་ལགས། བཅོམ་ལྡན་འདས་ཀྱིས་གསུངས་པ། མངོན་པར་བྱང་ཆུབ་རྣམ་ལྔ་ཡིས། །གང་གིས་སྐུ་གཅིག་རྫོགས་པ་ནི། །དམ་ཚིག་ཉིད་ལ་སེམས་དཔའ་ཡིན། །དེ་གྲུབ་གནས་ནས་དེ་འདྲ་བ། །སྤྱན་དྲངས་ཐུགས་ཀར་ཞུགས་པ་ནི། །ཡེ་ཤེས་དེ་ལ་སེམས་དཔའ་ཡིན། །དེ་ཡི་ཐུགས་ཀར་ཏིང་འཛིན་ནི། །སྐུ་གསུང་ཐུགས་ཀྱི་གདན་སྟེང་དུ། །སྐུ་གསུང་ཐུགས་ཀྱི་རྒྱལ་བ་ནི། །གསུང་གི་འཁོར་ལོ་ཏིང་འཛིན་སེམས། །རྣལ་འབྱོར་དབང་ཕྱུག་ཆེན་མོ་རལ་གཅིག་མའི་རྒྱུད་ལས། བརྟག་པའི་བསྐྱེད་རིམ་བསྟན་པའི་ལེའུ་སྟེ་ལྔ་པའོ།། །།དེ་ནས་ཕྱག་ན་རྡོ་རྗེས་གསོལ་པ། བཅོམ་ལྡན་འདས་བསོད་ནམས་མེད་པས། དེ་ལྟ་བུའི་དཀྱིལ་འཁོར་མཐོང་བར་དཀའ་བ་ལགས་ན། དེ་དག་གི་དོན་དུ་བསོད་ནམས་ཀྱི་ཚོགས་བསག་པ་བསྟན་དུ་གསོལ། བཅོམ་ལྡན་འདས་ཀྱིས་གསུངས་པ། གསང་བའི་བདག་པོ་འདི་ལྟ་སྟེ། །ཏིང་ངེ་འཛིན་གྱི་འོད་ཟེར་ལས། །འཕྲོས་ནས་དག་པ་གཉིས་བྱས་བཀུག །བསོད་ནམས་ཀུན་གྱི་སྣ་ལ་འགྲོ། །ཏིང་ངེ་འཛིན་ལ་ཕྱག་འཚལ་བ། །འདི་ནི་བསོད་ནམས་དང་པོ་ཡིན། །ཡེ་ཤེས་འཁོར་ལོ་དེ་ཉིད་ལ། །ཏིང་འཛིན་མཆོད་པ་ཡན་ལག་གཉིས། །བདག་གཞན་སྡིག་དེར་བཤགས་པ་ནི། །བསོད་ནམས་དེ་ནི་གསུམ་པ་ཡིན། །གཞན་གྱི་དགེ་ལ་ཕྲག་དོག་མེད། །རྗེས་སུ་ཡི་རང་དགེ་བའོ། །དམ་ཚིག་དེ་རྣམས་ཡང་དག་ལ། །དགེ་བ་བསྐུལ་བ་བསོད་ནམས་ཡིན། །མྱ་ངན་མི་འདའ་གསོལ་བ་ནི། །བསྐལ་པ་བཟང་པོའི་སྨོན་ལམ་ཡིན། །དེ་དག་དགེ་བ་གང་བྱུང་ཡང་། །མ་རིག་པ་ལ་བསྔོས་པ་ནི། །ཡན་ལག་བདུན་པ་རྫོགས་པ་ཡིན། །བསོད་ནམས་ཚོགས་ཀྱི་ཡན་ལག་ནི། །སློབ་དཔོན་བླ་མ་དག་ལ་བསླབ། །དེ་བས་ཐེག་པ་ཆེན་པོར་འགྱུར། །ཆོས་རྣམས་ཐམས་ཅད་སེམས་པ་ཡིན། །སེམས་ཀྱི་བྱེད་པ་མེད་ཕྱིར་ཐབས་ཀྱི་རྒྱ། །ཕྱག་ན་རྡོ་རྗེས་གསོལ་པ། བཅོམ་ལྡན་འདས། བསོད་ནམས་དེ་བསགས་པས། ཡེ་ཤེས་ཐོབ་པ་བསྟན་དུ་གསོལ།བཅོམ་ལྡན་འདས་ཀྱིས་གསུངས་པ། །གསང་བའི་བདག་པོ་འདི་ལྟ་སྟེ། ཕྱག་འཚལ་བས་ཡེ་ཤེས་ནི། །མེ་ལོང་ལྟ་བུ་ཐོབ་པར་འགྱུར། །མཆོད་པའི་བསོད་ནམས་རྒྱུ་ལས་ན། །འབྲས་བུ་མཉམ་ཉིད་ཡེ་ཤེས་སྐྱེད། །བཤགས་པས་སྟོང་ཉིད་སྟོང་པ་ཡི། །སྟོང་ཉིད་ཡེ་ཤེས་ཐོབ་པར་འགྱུར། །རྗེས་སུ་ཡི་རང་བསྐུལ་དང་གསོལ། །བྱ་བ་ལ་ཡང་ནན་ཏན་གྱི། །ཡེ་ཤེས་ཐོབ་པར་འགྱུར་བ་ཡིན། །གསོལ་བ་བཏབ་པའི་ཁྱད་པར་གྱིས། །ཆོས་ཀྱི་རྒྱལ་པོར་བདག་འགྱུར་ནས། །འཇིག་རྟེན་འགྲོ་བ་འདུལ་བའི་ཞིང་། །རྣལ་འབྱོར་དབང་ཕྱུག་ཆེན་པོ་རལ་པ་གཅིག་པའི་རྒྱུད་ལས། །བསོད་ནམས་དང་ཡེ་ཤེས་ཀྱི་བསྒྲུབ་པ། རྒྱུ་དང་འབྲས་བུ་བསྟན་པའི་ལེའུ་སྟེ་དྲུག་པའོ།། །།ཕྱག་ན་རྡོ་རྗེས་གསོལ་པ། བཅོམ་ལྡན་འདས་རྒྱུད་འདིའི་ཐེག་པ་ལ་བརྟེན་ནས། ལྟ་བ་ནི་གང་ལགས། བཅོམ་ལྡན་འདས་ཀྱིས་གསུངས་པ། གསང་བའི་བདག་པོ་འདི་ལྟ་སྟེ། །ཕྱི་རོལ་གྱི་ཡུལ་ནི་འབྱུང་བ་དང་། །འབྱུང་ལས་གྱུར་པར་མི་བལྟ་བ་དང་། དབྱིངས་རྣམ་པར་དག་པར་བལྟ་བ་དང་། རང་བཞིན་སྐྱེ་བ་མེད་པ་ལ་བརྟེན་ནས་སྒྱུ་མ་ཙམ་དུ་ཡང་སྐྱེ་བ་མེད་པར་མི་བལྟ་བ་དང་། ཚིག་ཙམ་དུ་ཡོད་ཀྱང་རྟག་པ་མ་ཡིན་པར་ཤེས་པ་དང་། བདག་ཉིད་ཀྱི་ཕུང་པོ་མི་གཙང་བ་དང་། དམན་པར་མི་བལྟ་བ་དང་། བུད་མེད་ཤེས་རབ་ཀྱི་རང་བཞིན་དུ་བལྟ་བ་དང་། སེམས་ཅན་རྣམས་སེམས་ཅན་དུ་མི་བལྟ་བ་དང་། སེམས་ཅན་རྣམས་མ་འོངས་པའི་སངས་རྒྱས་སུ་བལྟ་བ་དང་། ཐེག་པ་འོག་མ་དང་། དམན་པ་རྣམས་ལ་མི་གཤེ་བ་དང་། ཐེག་པ་འོག་མ་དང་། དམན་པ་རྣམས་ལ་སྙིང་རྗེ་བར་བལྟ་བ་དང་། སངས་རྒྱས་རྣམས་གཟུགས་ཅན་དུ་མི་བལྟ་བ་དང་། སྒྱུ་མ་ཙམ་དུ་རང་གི་སེམས་རྟགས་ཀྱི་ཕྱག་རྒྱར་བལྟ་བ་དང་། གཉིས་སུ་བརྟགས་པ་རྣམས་སེམས་ཅན་མ་ཟད་ཀྱི་བར་དུ། སྒྱུ་མ་ཙམ་དུ་ཡོད་པར་བལྟ་བ་དང་། སེམས་ཅན་གྱི་དུག་རྣམ་པར་དག་ཙམ་ནས། ཐ་སྙད་ཀྱང་མི་གནས་པར་བལྟ་བ་ནི། ཐུན་མོང་གི་ལྟ་བའོ། །གསང་བའི་བདག་པོ་འདིའི་ཁྱད་པར་གྱི་བལྟ་བ་ནི། དཔལ་རལ་པ་གཅིག་པ་རྣམས་གནོད་སྦྱིན་མོར་མི་བལྟ་བ་དང་། དཔལ་རལ་གཅིག་མ་གསང་བའི་བདག་པོ་ཕྱག་ན་རྡོ་རྗེས་བལྟ་བ་དང་། གསང་བའི་བདག་པོ་ལས་དཔལ་རལ་པ་གཅིག་མ་གུད་ན་ཡོད་པར་མི་བལྟ་བ་དང་། དཔལ་རལ་པ་གཅིག་མ་རང་གི་སེམས་དེ་ལྟར་བྱིན་གྱིས་བརླབ་པར་བལྟ་བ་དང་། དཔལ་རལ་པ་གཅིག་མའི་གདུལ་བྱ་དཔལ་ལྡན་བོང་ཞོན་མ་གནོད་སྤྱིན་མོར་མི་བལྟ་བ་དང་། དཔལ་ལྡན་བོང་ཞོན་མ་ས་བརྒྱད་པའི་བྱང་ཆུབ་སེམས་དཔར་བལྟ་བ་དང་། དཔལ་ལྡན་བོང་ཞོན་མའི་འཁོར་དྲེགས་པ་བསོད་ནམས་ཅན་དུ་བལྟ་བ་དང་། དཔལ་ལྡན་རལ་པ་གཅིག་མ་ལ་བརྟེན་ནས་དེ་བཞིན་གཤེགས་པའི་གོ་འཕང་ཐོབ་པར་མི་བལྟ་བ་མིན་པ་དང་། དཔལ་རལ་གཅིག་མ་ལ་བརྟེན་ནས་དེ་བཞིན་གཤེགས་པའི་གོ་འཕང་དུ་བལྟ་བ་དང་། དམ་རྫས་མེད་ཀྱང་དམ་ཚིག་མ་ཉམས་ལ། སྔགས་དང་ཏིང་འཛིན་ཡོད་པས་བདག་གིས་གྲུབ་པ་ཐོབ་པར་འགྱུར་བར་མི་བལྟ་བ་དང་།ཏིང་ངེ་འཛིན་དང་། སྔགས་དང་དམ་ཚིག་མ་ཉམས་ཀྱང་དམ་རྫས་མེད་ན་དཔལ་རལ་གཅིག་མའི་གདུལ་བྱ། བྱང་ཤར་གྱི་འཕགས་མ་བོང་ཞོན་གྱི་འཁོར་གདུག་པ་ཅན་བསོད་ནམས་ལས་གྲུབ་པ་རྣམས་བདག་ལ་མི་དགའ་བས་ཐུན་མོང་གི་དངོས་གྲུབ་མྱུར་དུ་མི་འོང་བར་བལྟ་བ་དང་། ཆོད་འདི་ལྟ་བུ་སྣོད་རིགས་ཀྱི་མཆོག །བྲམ་ཟེའི་རིགས་ཡིན་པར་མི་བལྟ་བ་དང་། གསང་བའི་བདག་པོ་ནི་སངས་རྒྱས་ཐམས་ཅད་ཀྱི་མཐུ་ཕུན་སུམ་ཚོགས་པར་བལྟ་བ་དང་། མཐུས་ནི་ཉོན་མོངས་པ་གསོད་པར་བལྟ་བ་དང་། ཉོན་མོངས་པ་ཆུང་ན་ནི་ཐུན་མོང་གི་མཐུས་ནམ་མཁའ་ལ་འགྲོ་བ་དང་། ཆུ་ལ་མི་བྱིང་བ་དང་། གཞན་གྱི་སེམས་ཤེས་པ་དང་། རྒན་པོ་ལས་གཞོན་པ་ནུས་པ་དང་། གཞོན་པ་ཉིད་མི་འགྱུར་བ་དང་། ཚེ་རིང་བ་དང་། མི་ལ་སོགས་པའི་སེམས་ཅན་གསོད་པར་འགྱུར་བ་དང་། མི་ལ་སོགས་པའི་སེམས་ཅན་སོས་པར་འགྱུར་བ་དང་། ཆར་པ་དབབ་པར་ནུས་པ་དང་། ཆར་ལ་སོགས་པ་གཅང་བར་ནུས་པ་དང་། གཞན་ཡང་སྐྲ་དཀར་མེད་པ་དང་། གཉེར་མ་ཡང་ནུབ་སྟེ་སྣུམ་པ་དང་། ཤེས་པ་རྣོ་བ་དང་། གཞན་གྱིས་དབང་བྱས་པའི་རྫས་མཐོང་བ་དང་། སེམས་ཅན་མཐུ་བོ་ཆེ་རྣམས་དང་འདྲིལ་ཡང་མཉམ་པ་ལས་ལྷག་པའི་ཚུལ་སྟོན་པར་ནུས་པ་ལ་སོགས་པ་ཡང་གང་ཟག་ཅིག་ཉོན་མོངས་པ་ཆུང་བའི་མཐུའི་ཤུགས་ཀྱིས་སོང་བར་གྱུར་ཏེ། འདི་ལྟར་བལྟ་བར་བྱའོ། རྣལ་འབྱོར་ཆེན་མོ་རལ་པ་གཅིག་མའི་རྒྱུད་ལས། ཐུན་མོང་དང་ཁྱད་པར་གྱི་ལྟ་བ་བསྟན་པ་སྟེ་ལེའུ་བདུན་པའོ།། །།དེ་ནས་ཕྱག་ན་རྡོ་རྗེས་གསོལ་པ། བཅོམ་ལྡན་འདས་ཐེག་པ་འདིའི་རྣལ་འབྱོར་གྱི་སྤྱོད་པ་ནི། ཇི་ལྟར་སྤྱད་པར་བགྱི། བཅོམ་ལྡན་འདས་ཀྱིས་གསུངས་པ། གསང་བའི་བདག་པོ་སྤྱོད་པ་ནི་འདི་ལྟ་སྟེ། དམ་ཆོས་ལྔ་ལ་རྫ་ལྔཡངནནམཐོགས་པ་མེད་པར་སྤྱོད་པ་དང་། འཇིགས་པ་མེད་པ་དང་། དགའ་བ་དང་། རྒོད་པ་དང་། རྒོད་པ་ཆེན་པོ་དང་། ཤ་ལྔ་ལ་ལོངས་སྤྱོད་པ་དང་། ཕྱག་ལ་མཁས་པ་དང་། འཇིགས་པའི་སྟབས་ཀྱིས་སྟབས་ལ་མཁས་པ་དང་། དཀྱིལ་འཁོར་གྱི་ལས་ལ་མཁས་པ་དང་། ཐབས་དང་ཤེས་རབ་ཀྱི་སྤྱོད་པ་ལ་མཁས་པ་དང་། བྲོ་གར་ལ་མཁས་པ་དང་། འདུ་འཕྲོ་ལ་མཁས་པ་དང་། གླུ་ལ་མཁས་པ་དང་། གར་ལ་མཁས་པ་དང་། མཆོད་པ་ལ་གོམས་པ་ནི་ཐུན་མོང་གི་སྤྱོད་ལམ་མོ།ཁྱད་པར་གྱི་སྤྱོད་ལམ་ནི། དུར་ཁྲོད་ན་འདུག་པ་དང་། ཤ་ཆེན་ཟ་བ་དང་། བོང་བུ་ལ་ཕྱིན་ཕྱོགས་ཞོན་ནུས་པ་དང་། རེ་བགྱོན་པ་དང་། གཅེར་བུར་བྱུང་བ་དང་། ས་མ་ཡ་ཡི་སྒྲ་ལ་མཁས་པ་དང་། མི་དབང་མེ་མར་དུ་བལྟམ་ཏེ་འགྲོ་བ་དང་། འདུག་པ་དང་། བསྐོར་བ་དང་ཞིང་གི་པགས་པ་གྱོན་པ་དང་། རྨ་བྱའི་རྒྱལ་མཚན་དང་ལྡན་པ་དང་། དུང་ཆེན་འབུད་པ་དང་། རུས་པའི་ཕྲེང་བ་འདྲེན་པ་དང་། དཔལ་རལ་པ་གཅིག་མ་དང་། འཕགས་མ་བོང་ཞོན་མ་གཉིས་སུ་མེད་པས་མཆོད་པ་ལ་བརྩོན་པ་དང་། ཁྲོ་བོའི་ཏིང་ངེ་འཛིན་ལ་མཁས་པའི་འཁོར་འདུལ་ལ་མཁས་པ་དང། ཚིལཆེནགྱིམེདམརའབུལ་བ་དང་། ཤ་ཆེན་གྱི་ལྷ་བཤོས་འབུལ་བ་དང་། ཁྲག་ཆེན་པོའི་ཨསྙེ་འབུལ་བ་དང་། བདུད་རྩིའི་དྲི་ཆབ་འབུལ་བ་དང་། ཤ་ཆེན་པོའི་བདུག་པ་འབུལ་བ་དང་། དབང་པོ་རྣམས་ཀྱི་མེ་ཏོག་འབུལ་བ་དང་། ཞི་བ་ལ་ཞི་བའི་སྤྱོད་ལམ་ཤེས་པ་དང་། རྒྱས་པ་ལ་རྒྱས་པའི་སྤྱོད་ལམ་ཤེས་པ་དང་། དབང་ལ་དབང་གི་སྤྱོད་ལམ་ཤེས་པ་དང་། འདུག་པའི་སྤྱོད་ལམ་ཤེས་པ་དང་། ཉལ་བའི་སྤྱོད་ལམ་ཤེས་པ་དང་། འགྲོ་བའི་སྤྱོད་ལམ་ཤེས་པ་དང་།ངལ་གསོ་བའི་སྤྱོད་ལམ་ཤེསཔ་དང་། གཤང་གཅི་བའི་སྤྱོད་ལམ་ཤེས་པ་དང་། བཏང་བའི་སྤྱོད་ལམ་ལ་སོགས་པ་ནི། ཁྱད་པར་གྱི་སྤྱོདལམ་དེ་ཐམས་ཅད་ལྷའི་རང་བཞིན་དུ་གྱུར་པ་དང་། སེམས་དཔའ་གསུམ་གྱི་ཚུལ་གྱིས་བསྒྲུབ་པར་བྱའོ། རྣལ་འབྱོར་མ་དབང་ཕྱུག་ཆེན་མོ་རལ་གཅིག་པའི་རྒྱུད་ལས། སྤྱོད་ལམ་བསྟན་པའི་ལེའུ་སྟེ་བརྒྱད་པའོ།། །།བཅོམ་ལྡན་འདས་དངོས་གྲུབ་ཐམས་ཅད་འབྱུང་བ་མང་པོ་དང་ལྡན་པའི་དེ་བཞིན་གཤེགས་པས་བྱིན་གྱིས་བརླབས་པས། སྔགས་འཆང་དང་རིག་འཛིན་རྣམས་ཀྱི་སྐྱབས་དང་རྟེན་དུ་གྱུར་ལ། བྱང་ཆུབ་སེམས་དཔའ་འདས་པའི་ལམ་དུ་བསྒྲུབ། བདུད་དང་སྲིན་པོ་ལ་སོགས་པ་སྲེག་པར་བྱེད་པ། རང་གིས་སེམས་ཞི་བར་ནུས་པ་དང་ལྡན་པར་འགྱུར་ལ། མཐུ་ཐམས་ཅད་འབྱུང་བའིགསངསྔགས་ཀྱི་ཚིག་རྣམས་བསྟན་དུ་གསོལ། བཅོམ་ལྡན་འདས་ཀྱིས་གསུངས་པ། གསང་བའི་བདག་པོ་འདི་ནི་ཟབ་པ། རྒྱ་ཆེ་བ། འཇིགས་པ། སྐྲག་པ། མི་སྡུག་པར་བལྟ་བའི་མིག་འབྲུལ་བར་བྱེད་པ། མི་གདུང་བར་ཉན་པར་བྱེད་པའི་རྣ་བ་གཅོད་པར་བྱེད་པ། མི་དགའ་བར་བྱེད་པའི་སྣ་སུབས་པར་བྱེད་པ། མི་སྡུག་པར་བྱེད་པའི་ལུས་རེངས་པར་བྱེད་པ། མི་འོས་པ་བརྗོད་པའི་ལྕེ་ཆད་པར་བྱེད་པ། །ལོག་པར་སེམས་པའི་སྙིང་འགས་པར་བྱེད་པ། །བར་དུ་གཅོད་པ་ཐམས་ཅད་ཐག་རིང་དུ་བསྐྱོད་པ། །བསོད་ནམས་གསོ་བར་བྱེད་པ།སྨྱོན་པ་རྣམས་དྲན་པ་རྙེད་པར་བྱེད་པའི་མཐུ་ཆེན་པོ། །ཉོན་ཅིག་རབ་ཏུ་ཉོན་ཅིག་ཡང་དག་པར་ཉོན་ཅིག ་རྒོན་ཏུ་ཡང་དག་པར་ཉོན་ཅིག །ཨོ་རུ་རུ་རོ་རུ་ཙ་བ་ལ་ཨ་ཤུག་མེ་ཧུ༷་སྨྱོ་ཛ་ཛ༷༷། ཡེ་ཤེས་ལྔ་དང་ཡང་དག་ལྡན། །ཀོ་རྡི་ལ་སོགས་བརྒྱད་དང་ལྡན། དེ་ཡི་སྟོབས་ནི། །ས་བརྒྱད་ཕྱག་རྒྱ་དཔལ་ལྡན་ཡིན། །མ་བདུན་ཨ་ཤུག་མེད་དང་ལྡན། །དཀྱིལ་འཁོར་སྒོ་ལ་ཡང་དག་ཚང་། །དབང་ཕྱུག་ཉི་ཤུ་བརྒྱད་དང་ལྡན། །དང་པོས་ལྷ་རྣམས་སྦྱན་དྲངས་ཏེ། །གཉིས་པས་བསྒྲུབ་བྱ་དགུག་པ་ཡིན། །བཅོ་ལྔ་སྔགས་ཀྱི་ཕྲེང་བ་ཡིན། །མིང་ཆེན་དང་པོ་ཡེ་ཤེས་དང་། །མགོ་ལ་ཡོད་པས་མགོ་ཅན་ཡིན། །རྣམ་པར་སྣང་མཛད་ཧུ༷་དང་ལྡན། །རུ་རུ་སྲིན་མོའི་ཚུལ་གྱིས་འཇོམས། །རུ་རུ་རྨེན་མོ་ཁྱད་པར་ནི། །ཙ་པ་ལ་ཞེས་བསྒྲུབ་བྱའི་མིང་། །ཨ་ཤུག་མེ་ནི་མ་བདུན་དང་། །ཧུ༷་ནི་དཀྱིལ་འཁོར་བསྡུ་ཕྱིར་བསྒོ། །སྨྱོ་ཞེས་དབང་མོ་ལས་ལ་བསྐུལ། །དེ་ནས་ཛ་ཡིས་ཡང་དག་འགུགས། །དེ་ནས་ཛ༷༷ཡིས་བསྒྲུབ་བྱ་དགུག །བཅོ་ལྔ་སྔགས་ཀྱི་ཕྲེང་བ་ནི། །རྒྱལ་བ་རྣམས་ཀྱིས་བྱིན་གྱིས་བརླབས། འདིས་ནི་ཞི་གནས་ཐོབ་པར་བྱེད། །དེ་བཞིན་ལྷག་མཐོང་སྐྱེ་བར་ནུས། །འདིས་ནི་བསོད་ནམས་འཕེལ་བར་བྱེད། །དེ་ལ་ཡེ་ཤེས་རྣམས་ཀྱང་ཚང་། །འདི་ནི་དེ་བཞིན་རྒྱུ་ཞེས་བྱ། །གང་ཞིག་འདི་ལ་འབྲས་བུ་འདོད། །དེ་ཕྱིར་དེ་ནི་འབྲས་བུའོ། །མེ་ལ་བརྟེན་ན་ལས་ཀྱང་འགྲུབ། །ཕྱག་ན་རྡོ་རྗེས་གསོལ་པ། །བཅོམ་ལྡན་འདས་གསང་སྔགས་འདི་བཟླས་པའི་ཐབས་ཀྱི་སེམས་དཔའ་གང་ལགས། བཅོམ་ལྡན་འདས་ཀྱིས་གསུངས་པ། བདག་ཉིད་དམ་ཚིག་རྫོགས་པའི་སྐུ། །ཐབས་དང་ཤེས་རབ་ལྡན་བྱས་ལ། །དབུ་ཡི་གྲངས་ནི་བཅུ་བདུན་ནས། །ཡང་ན་དབུ་གསུམ་ཕྱག་དྲུག་གམ། །ཞལ་གཅིག་ཕྱག་གཉིས་རབ་ཏུ་ཤིས། །རང་བཞིན་གནས་ནས་དགུག་དང་གཞུག །གཉིས་མེད་འདྲ་ཡང་སྤངས་ནས་ཀྱང་། །ཟླ་དཀྱིལ་སྟེང་ན་ཀོ་རྡི་མ། །ཉི་མའི་སྟེང་ན་རལ་གྲི་འབར། །མཐའ་མ་སྔགས་ཀྱིས་བསྐོར་བའོ། །བཞི་འབུམ་བཏོན་ན་ལས་རྣམས་བྱེད། །ཁྲི་ཕྲག་ལས་ནི་དངོས་གྲུབ་འབྱུང་། །བྱེ་བ་དག་གིས་ཚད་དང་ལྡན། །མན་ངག་ཅན་གྱི་ས་ཡང་སྟོན། །མངོན་ཀྱང་སྔོན་དུ་སྟོན་དང་ལུས་སྟོན་འགྱུར། །གང་ཞིག་དུང་ཕྱུར་རྫོགས་པ་ནི། །ཕྲིན་ལས་རྣམ་བཞི་ལྷུན་གྲུབ་སྟེ། །ཟབ་མོ་སྦྱོར་བ་རྫོགས་ནས་ཀྱང། །རིན་ཆེན་ཞིང་དེར་སོང་བ་ཡིན། །རྣལ་འབྱོར་དབང་ཕྱུག་ཆེན་མོ་རལ་གཅིག་མའི་རྒྱུད་ལས། །གསང་སྔགས་དངོས་གྲུབ་ཀུན་གྱི་འཁོར་ལོ་བསྟན་པ་སྟེ་ལེའུ་དགུ་པའོ།། །།བཅོམ་ལྡན་འདས་ཇི་ལྟར་ན་སྔགས་ཀྱི་ཚུལ་གྱིས་དངོས་གྲུབ་ཐོབ་པ་དང་ནི་མི་ཐོབ་པ་ལགས། །བཅོམ་ལྡན་འདས་ཀྱི་གསུངས་པ། །གསང་བའི་བདག་པོ་དངོས་གྲུབ་ཐོབ་པའི་ཚུལ་ནི། འདི་ལྟ་སྟེ། དེ་བཞིན་གཤེགས་པའི་བཀའི་ཁུངས་བྱུང་བ་དང་། སློབ་དཔོན་མན་ངག་ཅན་གྱི་གདམས་ངག་ནོད་པ་དང་། དམ་ཚིག་བསྲུང་མཚམས་ཡལ་བར་མི་དོར་བ་དང་། ཡིད་ཆེས་པའི་དད་པ་ཡོད་པ་དང་། བརྩོན་འགྲུས་ཆེ་བ་དང་། གཏོང་ཕོད་པ་དང་། ཟབ་མོའི་ལྟ་བ་ཤེས་པ་དང་། རྒྱ་ཆེ་བའི་སྤྱོད་པ་ཤེས་པ་དང་། མཐུན་པའི་དམ་རྫས་སམ་ཆོས་དང་མི་འབྲལ་བ་དང་། སྔོན་དུ་འགྲོ་བའི་ཆོ་ག་རྫོགས་པ་དང་། ཡིད་དམ་གྱི་ལྷ་མི་སྤོང་བ་དང་། སྙིང་རྗེའི་སེམས་ཡོད་པ་དང་། སྤྱོད་ལམ་གྱི་ཏིང་ངེ་འཛིན་མི་བརྗེད་པ་དང་། དགོན་པ་ལ་བརྟེན་པ་དང་། སེམས་པ་དང་། གསང་ཐུབ་པ་དང་། ཆོ་ག་ཤེས་པ་དང་། སེམས་ཅན་གྱི་སྲོག་མི་གཅོད་པ་དང་། འདུག་པ་ལ་དགའ་བ་དང་། འཇིགས་པ་མེད་པ་དང་། སངས་རྒྱས་ལ་ཆེ་ཆུང་མི་འཛིན་པ་ལ་སོགས་པ་དང་ལྡན་ན། ནམ་ཡང་དངོས་གྲུབ་ཐོབ་ཟིན་པ་ཡིན་ནོ། དེ་དག་དང་མི་ལྡན་ན་ནམ་ཡང་དངོས་གྲུབ་ཐམས་ཅད་མི་ཐོབ་བོ། །རྣལ་འབྱོར་དབང་ཕྱུག་ཆེན་མོརལགཅིག་མའི་རྒྱུད་ལས། དངོས་གྲུབ་ཐོབ་པའི་ཚུལ་བསྟན་པ་སྟེ་ལེའུ་བཅུ་པའོ།། །།དེ་ནས་ཕྱག་ན་རྡོ་རྗེས། དཔལ་རལ་གཅིག་མའི་ཕྱག་རྒྱ་ནམ་གྲུ་མ་ལ་མངོན་པར་བསྟན་པ། ནམ་གྲུ་ཁྱོད་ཀྱི་མཚན་ཉིད་ནི། །ཆོ་འབྲང་བདག་གིས་བཤད་པར་བྱ། །ནོར་བུའི་རང་བཞིན་ཁྱོད་ཀྱི་ལུས། །རྒྱབ་ནི་འཛམ་བུའི་ཆུ་བོའི་གསེར། །ཁྱོད་ཀྱི་གདོང་ནི་དངུལ་ཡིན་ཏེ། །ལྟོ་བའི་ཕྱོགས་ནི་རྡོ་རྗེར་འཁྲེགས། །མིང་པོ་མཛད་དང་མཛོད་གསུངས་གཉིས། །ཁྱོད་ཀྱི་ཕ་ནི་རླུད་ཞེས་བྱ། །ཁྱོད་ཀྱི་མ་ནི་ཀུན་སྒྲོལ་མ། །སྐལ་ལྡན་ཤིང་རྟ་ཁྱོད་ཀྱི་ལུས། །བ་ར་ཧི་སྟི་ཁྱོད་ཀྱི་ལུས། །ལྷ་ཡུལ་དག་ཏུ་གྲགས་པ་ཡིན། །ན་མོ༷༷། བཛྲ་ནི་སྙི། ཛི་ལི་ཛི་ལི། བིརྙ་བིརྙ།མུརྫི་མུལྤ ཧི་བྷ་ལ། ཤ་ན་གྲྭ་ཧྭ། དེ་ནས་ཕྱག་ན་རྡོ་རྗེས་གསོལ་པ། གསང་བའི་སྔགས་འདི་ལ་བརྟེན་ནས་ལས་ཕྲ་མོའི་དངོས་གྲུབ་ཐོབ་པའི་ཐབས་ཅི་ལགས། བཅོམ་ལྡན་འདས་ཀྱིས་གསུངས་པ། ཕྱག་ན་རྡོ་རྗེ་འདི་ལྟ་སྟེ། གསང་སྔགས་འདིས་ཞི་བའི་ལས་འགྲུབ་པར་འདོན་ན། མཎྜལ་དཀར་ལ་ཟླུམ་པར་བྱ་སྟེ། མེ་ཏོག་དཀར་པོ་ལ་སོགས་པས་མཆོད་ཅིང་། ལྷ་ཡང་དཀར་མོ་སྤྲུལ་པའི་ཕོ་ཉ། ཞི་བའི་རྒྱན་གྱིས་བརྒྱན་པར་བསྒོམ་ན། ལས་ཐམས་ཅད་ཞི་བར་འགྱུར་ཞིང་། ཞི་བའི་ལས་ཕྲ་མོ་འགྲུབ་པར་འགྱུར་རོ། །རྒྱས་པའི་ལས་འགྲུབ་པར་འདོད་ན། མཎྜལ་སེར་པོ་གྲུ་བཞི་བྱ་བ་སྟེ། མེ་ཏོག་སེར་པོ་ལ་སོགས་པས་མཆོད་ཅིང་། ལྷ་ཡང་སེར་མོ་ཆེན་མོ་མཁའ་ལ་བཞད་པ། རྒྱས་པའི་རྒྱན་གྱིས་བརྒྱན་པར་བསྒོམ་ན། །ལས་ཐམས་ཅད་རྒྱས་པར་འཀྱུར་ཞིང་། རྒྱས་པའི་ཕྲིན་ལས་ཐམས་ཅད་འགྲུབ་པར་འགྱུར་རོ། དབང་གི་ལས་ཐམས་ཅད་འགྲུབ་པར་འདོད་ན། མཎྜལ་ཟླ་གམ་དམར་པོར་བྱ་སྟེ། མེ་ཏོག་དམར་པོ་ལ་སོགས་པས་མཆོད་ཅིང་། ལྷ་ཡང་དམར་པོ་ཆེན་མོ་དབང་ཆེན་གཏུམ་པ་མོ། དབང་གི་རྒྱན་གྱིས་བརྒྱན་པར་བསྒོམ་ན། ལས་ཐམས་ཅད་དབང་དུ་འགྱུར་ཞིང་། དབང་གི་ལས་ཕྲ་མོ་འགྲུབ་པར་འགྱུར་རོ། དྲག་པོའི་ལས་ཕྲ་མོ་འགྲུབ་པར་འདོད་ན། མཎྜལ་ནག་པོ་ཟུར་གསུམ་པའི་འོག་ཏུ་ཐོད་པ་གསུམ་དང་ལྡན་པར་འགྱུར་ཏེ། མེ་ཏོག་ནག་པོ་ལ་སོགས་པས་མཆོད་ཅིང་། ལྟ་ཡང་ནག་མོ་ཆེན་མོ་རལ་གཅིག་མ་དྲག་པོའི་རྒྱན་གྱིས་བརྒྱན་པར་བསྒོམ་ན། ལས་ཐམས་ཅད་དྲག་པོར་འགྱུར་ཞིང་། དྲག་པོའི་ལས་ཕྲ་མོ་འགྲུབ་པར་འགྱུར་རོ། དེ་དག་གི་སྔགས་ཀྱི་ཤམ་བུ་ནི།ཤཱསྟི་ཀུ་སྲ ཚུསྤྱོ་ཀུ་སྲ པ་ཤ༷་ཀུ་སྲ མུ་ར་ཡ། ཞེས་བརྗོད་པས་གཞན་གྱི་ཐུན་མོང་གི་ལས་སུ་བྱའོ། གཞན་ཡང་དགུག་པར་འདོད་པས། ཆེ་གེ་མོ་ཨུ་ཀརྙ་ཡ་ཧུ༷། ཞེས་བར་དུ་བཅུག་སྟེ། དབང་དུ་འགྱུར་བའི་ཡན་ལག་གོ །བསྐྲད་པར་འདོད་ན་རླུད་གི་རྔ་མོ་དུད་ཁའི་སྟེང་དུ་བསྒྲུབ་བྱ་བསྐྱོན་ནས། ཆེ་གེ་མོ་ཛ་ཛ་ཞེས་བརྗོད་པར་བྱའོ། གནན་པ་བྱ་བར་འདོད་ན། རྡོ་ལེབ་ལ་རི་རབ་ཀྱི་གཟུགས་བྲིས་ཏེ། འོག་ཏུ་བསྒྲུབ་བྱའི་མིང་རུས་གཟུགས་དང་ལྡན་པ། གསེར་གྱི་ས་གཞི་སྟེང་ན་བཞག་ནས། ཆེ་གེ་མོ་ཡ༷་ནན། ཞེས་བསྒྲུབ་པར་བྱའོ། སྤྱིན་བསྲེག་བྱ་བར་འདོད་ན། དྲག་པོའི་རྫས་ལ་སྔགས་དང་མི་བྱང་རེ་རེ་ལྡན་པར་བྱ་སྟེ།མེར་པོར་བ་དང་། ཆེ་གེ་མོ་མྱ་ར་ཡ་ཁུ་ཧི། ཞེས་བརྗོད་པར་བྱའོ། དབྱེ་བར་འདོད་ན། འུག་པ་དང་བྱ་རོག་གི་ཁྲག་གིས་བསྒྲུབ་བྱའི་གཟུགས་བྱས་ལ། སྒྲོ་གཉིས་ལ་སྔགས་བཟླས་ལ། མྱ་ར་ཡ་མྱ་ར་ཡ་ཕཊ། ཅེས་བྱ་བའི་སྔགས་ཀྱི་ཤམ་བུ་དང་ལྡན་པར་བྱས་ཏེ། སྒྲོ་བརྡབ་པས་ཉེ་བ་མཁོན་ཅིང་མྱུར་དུ་དབྱེ་བར་འགྱུར་ཏེ། ཡུལ་གཞན་དུ་ཡང་འཁྱམ་པ་ར་འགྱུར་རོ། སྨྱོ་འདུལ་བར་འདོད་ན། གང་གདོན་གྱིས་ཟིན་པའི་སྐེལ།སྔགས་ཀྱི་མདུད་པས་བཏགས་ཏེ་བཟུང་ལ་སྔགས་པར་མི་གཅོད་པར་སྦྱོར་བ་འདི་ལྟ་བུ་དང་ལྡན་པར་གཏོར་ན་ཆེན་པོ་ཡང་དུ་བརྟན་པར་བྱའོ། ཐོག་གཅད་པར་འདོད་ན། ཡུལ་གང་ཙམ་བསྲུང་བར་འདོད་པའི་ཐད་ནས། ཤིང་དང་མེ་ཏོག་བླངས་ཏེ། ཡང་དང་ཡང་དུ་སྤྱིན་བསྲེག་བྱས་ན། སྤྱིན་བསྲེག་གི་རྫས་གང་ནས་འདུས་པ་རྣམས་སུ་ཇི་སྲིད་དུ་ཐོག་འབྱུང་བར་མི་འགྱུར་རོ། །རྣལ་འབྱོར་དབང་ཕྱུག་ཆེན་མོ་རལ་གཅིག་མའི་རྒྱུད་ལས། ལས་ཕྲ་མོ་འགྲུབ་པར་བྱ་བའི་ལེའུ་སྟེ་བཅུ་གཅིག་པའོ།། །།དེ་ནས་ཕྱག་ན་རྡོ་རྗེས་གསོལ་པ། བཅོམ་ལྡན་འདས་ལུས་ངག་སེམས་བདེན་པའི་ཐབས་དང་། རླུད་ནི་གང་ལགས། གསང་བའི་བདག་པོ་འདི་ལྟ་སྟེ། ཨོ་ཞེས་བྱ་བ་འཇུག་པའི་རླུད་། ཨུཿཞེས་བྱ་བ་གནས་པའི་རླུད་། ཧུ༷་ཞེས་བྱ་བ་འབྱུང་བའི་རླུད་། འཇུག་པ་དེ་ནི་གང་དུའོ། དེ་ནས་གནས་པ་ནང་དུ་གནས། །དེ་ནས་འབྱུང་བ་ཕྱིར་ཡང་འབྱུང་། །ནང་གི་སྙིང་གའི་དཀྱིལ་ན་ཡོད། །གནས་པ་དེ་ཉིད་ནམ་མཁའ་རྒྱང་། ཡུལ་འཕྲོ་བ་ནི་ཕྱི་རོལ་ཡིན། །ཨོ་ཞེས་བྱ་བ་སེར་པོ་སྟེ། །ཨུ༷༷ནི་དམར་པོར་བཤད་པ་ཡིན། །ཧུ༷་ནི་དཀར་པོར་གྱུར་པའོ། །ཨུཿནི་ཉོན་མོངས་གྱུར་པ་ཡིན། །དེ་ནི་ཧུ༷་གི་མཚན་མར་གནས། །ཨོ་ནི་དེ་ལ་ཚང་བ་ཡིན། །སེར་པོ་རྣམ་པར་སྣང་མཛད་དང་། །དམར་པོ་སྣང་བ་མཐའ་ཡས་ལྡན། །དཀར་པོ་མི་བསྐྱོད་ཡང་དག་ཡིན། །དམར་པོ་དེ་འདྲ་ཤེས་རབ་སྟེ། །དཀར་པོ་ཡང་ནི་ཐབས་ཀྱི་རྒྱ། །གཡས་ཀྱི་རྩ་ནི་ལ་ལ་ནཱ། །གཡོན་གྱི་གནས་པ་ར་ས་ནཱ། །ཨ་ཝ་རྙུ་ཏི་དབུས་ན་ཡོད། །སྣང་མཛད་བདག་གི་ལུས་ཀྱི་རྒྱ། །སྣང་བ་མཐའ་ཡས་ངག་གི་རྒྱ། །མི་སྐྱོད་དེ་ནི་སེམས་ཀྱི་རྒྱ། །སྐུ་གསུང་ཐུགས་ཀྱི་རྒྱ་ཡིན་པས། །སྒྱུ་མ་ཙམ་དུ་ཅིར་ཡང་སྣང་། །གདོན་བྱས་རྣམ་རྟོག་མ་ཡིན་ཏེ། །ཡེ་ནས་གནས་པ་ཤེས་བྱ་ཡི། །དབུགས་དང་རྩ་ཡི་སྦྱོར་བ་ལས། །ཕྲ་ལ་ཞི་བར་རྣམ་སྦྱངས་ནས། །རྫོགས་པ་འདོད་ཕྱིར་བསྐྱེད་པ་སྟེ། །རྣལ་འབྱོར་ཆོ་ག་གསུམ་པ་ཡིན། །རྣལ་འབྱོར་དབངཕྱུགཆེནམོརལགཅིག་མའི་རྒྱུད་ལས། རྫོགས་པའི་རིམ་པ་བསྐྱེད་པའི་ལེའུ་སྟེ་བཅུ་གཉིས་པའོ།། །།དེ་ནས་ཕྱག་ན་རྡོ་རྗེས་གསོལ་པ། །བཅོམ་ལྡན་འདས་དབང་པོ་རྣོན་པོ་རྣམས་ཀྱི་དོན་དུ་རྫོགས་པའི་རིམ་པ་བསྟན་དུ་གསོལ། །བཅོམ་ལྡན་འདས་ཀྱི་གསུངས་པ། གསང་བའི་བདག་པོ་འདི་ལྟ་སྟེ། །གང་ཞིག་ཆོས་ནི་གང་ནས་བཙལ། །དེ་ལ་བཙལ་བ་རྡུལ་ཙམ་མེད། །ཅི་ཕྱིར་འཁྲུལ་པས་གཉིས་སུ་སྣང་། །དོན་དམ་ཅན་ལ་སྣང་བ་མེད། །གང་དུ་རྫོགས་པ་བསྐྱེད་པ་དང་། །བསྐྱེད་པ་ལ་སོགས་བསྟན་པ་ནི། །དབང་པོ་རྟུལ་བ་གདུལ་ཕྱིར་དུ། །དྲང་བའི་དོན་གྱི་ཞི་གནས་ཡིན། །འོད་གསལ་སྙིང་གའི་དཀྱིལ་འཁོར་ནི། །འགྱུར་བ་མེད་ཅིང་ཉེས་པ་སྤངས། །དྷར་མོ་ད་ལ་ཞེས་གྲགས་པ། །ནམ་མཁའི་དེ་ཉིད་རང་ལ་ཡོད། །འདི་ལྟར་ཁྱབ་བྱེད་ཨ༷༷ཞེས་བྱ། །ཡི་གེ་ཁ་དོག་གཟུགས་ཅན་མིན། །ཡེ་ཤེས་ཡང་དག་བཞི་ལ་ཕྲ། །ཟབ་མོ་གཅིག་མིན་དུ་མ་མིན། །སྟོང་ཉིད་མཚན་མེད་སྨོན་པ་མིན། །ཆོས་རྣམས་ཙམ་དུ་སྣང་བ་ཡིན། །འདིར་བསམ་འདི་ཡིན་འདི་ལ་གནས། །འོད་གསལ་འདིར་དེ་ཉིད་ཁོ་ནའོ། །རྣལ་འབྱོར་དབང་ཕྱུག་ཆེན་མོ་རལ་གཅིག་མའི་རྒྱུད་ལས། རྫོགས་པའི་རིམ་པའི་རྣལ་འབྱོར་དབང་ཕྱུག་ཆེན་མོའི་རྗེས་སུ་རྣལ་འབྱོར་གྱི་སྤྱོད་ཡུལ་དུ་མ་གྱུར་པ། རྫོགས་པ་ཆེན་པོའི་རྣལ་འབྱོར་གྱི་ཚད་བསྟན་པ་སྟེ་ལེའུ་བཅུ་གསུམ་པའོ།། །།ཨེ་ཀ་ཙ་ཏི་རལ་གཅིག་མའི་རྒྱུད་ལས་རྩ་བའིརྒྱུདཆེནམོརྫོགསསོ། །དེ་ནས་ཕྱག་ན་རྡོ་རྗེས་གསོལ་པ། །བཅོམ་ལྡན་འདས་འོད་གསལ་ཉིད་ཇི་ལྟར་ལགས། །སྙིང་རྗེ་ཞེས་བྱ་བ་ཇི་ལྟར་ལགས། །དེ་ཡི་དཀྱིལ་འཁོར་ཇི་ལྟར་ལགས། །མི་འགྱུར་བ་ཉིད་ཇི་ལྟར་ལགས། །ཉེས་པ་མེད་པ་ཅི་ཡི་ཕྱིར། །དྷར་མོ་ད་མ་ཇི་ལྟར་ལགས། །ནམ་མཁའ་ཞེས་བགྱི་ཇི་ལྟར་ལགས། །ཁྱབ་མེད་ཨ་ཡང་ཇི་ལྟར་ལགས། །ཡི་གེ་མེད་པ་ཅི་ཡི་དོན། །ཡེ་ཤེས་བགྱི་བ་ཅི་ཡི་དོན་ལགས། །ཡང་དག་ཉིད་ཀྱང་ཇི་ལྟར་ལགས། །ཞི་བར་མ་གྱུར་ཇི་ལྟར་ལགས། །ཕྲ་མོ་ཡང་ནི་ཇི་ལྟར་ལགས། །ཇི་ལྟར་ཟབ་མོར་གསུངས་པ་ལགས། །གཅིག་དང་དུ་མ་ཇི་ལྟར་ལགས། །སྟོང་པ་ཉིད་ནི་ཇི་ལྟར་ལགས། །མཚན་མ་མེད་པ་ཇི་ལྟར་ལགས། །སྨོན་པ་མེད་པ་ཇི་ལྟར་ལགས། །ཆོས་རྟག་བགྱི་བ་ཇི་ལྟར་ལགས། །འདིར་བསམ་འདི་ཉིད་གང་གི་ལགས། །འདི་ཡིན་གསུང་པ་ཇི་ལྟར་ལགས། །འདི་ན་གནས་པ་གང་དང་གང་། །འོད་གསལ་བ་ནི་ཇི་ལྟར་ལགས། །དེ་ཉིད་གསུངས་པ་ཇི་ལྟར་ལགས། །དེ་ཁོ་ན་ཡང་ཇི་ལྟར་ལགས། །དེ་ནས་བཅོམ་ལྡན་འདས་དཔལ་རྡོ་རྗེ་ཧེ་རུ་ཀས་གསང་བའི་བདག་པོ་ལ་འདི་སྐད་ཅེས་གསུངས་སོ། །རྩོལ་བ་མེད་པའི་ཡི་གེ་ནི། །རང་ལ་སྣང་བས་འོད་གསལ་ཡིན། །ཆོས་རྣམས་བརྟེན་པའི་དྲན་པ་ནི། །སྙིང་རྗེ་ཞེས་བྱ་ཡིན་པར་བཤད། །དེ་ཡི་དབུས་ནརངབཞིནསྟོངཔནི། །འགྲོ་བ་རྣམས་ཀྱིས་མི་ཤེས་པ། །ཅི་ཡང་མེད་པའི་དཀྱིལ་འཁོར་ཡིན། །དེ་ནི་ཐོག་མ་ཐ་མའི་བར། །མི་འགྱུར་གནས་པས་འགྱུར་བ་མེད། །དེ་ལ་ཆོས་ཅན་རྣམ་རྟོག་གིས། །བསླད་ནི་ཉེས་པ་མེད་པ་ནི། །དེ་ཉིད་ཉེས་པ་མེད་པ་ཡིན། །ཆོས་ཅན་འབྱུང་བའི་གནས་ཡིན་པས། །དྷ་རྨོ་ ད་ཡ་དབྱིངས་ཀྱི་དོན། །དེ་ཉིད་ངོ་བོ་ནམ་མཁའ་ཡིན། །བརྗོད་པ་རྣམས་ལ་གནས་པ་ཡིན། །བརྗོད་མེད་ཁྱབ་བྱེད་ཨ་ནི་གཟུགས་དང་མདོག །ཡི་གེ་རྣམས་དང་བྲལ་བ་ནི། །དོན་ནི་སྐྱེ་མེད་སྟོང་པ་ཡིན། །དེ་ནི་ཡེ་ནས་གནས་པ་ཡི། །དོན་དེ་ཤེས་པས་ཡེ་ཤེས་ཡིན། །དེ་ཕྱིར་དེ་ཤེས་ཤེས་པ་ལ། །ཡང་དག་པ་ཞེས་བཏགས་པ་ཡིན། །ཡང་དག་དེ་ཡི་ངོ་བོ་ནི། །ཀུན་ཏུ་ཞི་བར་གྱུར་པ་ཡིན། །དོན་དེ་བརྟག་པར་དཀའ་ཕྱིར་དང་། །ཕྲ་མོ་གྱུར་པས་ཕྲ་བ་ཡིན། །དེ་ཕྱིར་དེ་ལ་ཟབ་ཅེས་བྱ། །སེམས་་ཀྱི་སྤྱོད་ཡུལ་ཡིན་ཕྱིར་རོ། །སེམས་ལ་གཅིག་དང་དུ་མ་མེད། །དེ་ཡི་ཕྱིར་ན་གྲངས་ལས་འདས། །གཅིག་དང་དུ་མ་སྤངས་པ་ཡིས། །གཅིག་དང་དུ་མ་རྣམས་སྤངས་པ། །སྟོང་པ་ཉིད་ཅེས་དེ་ལ་བྱ། །དེ་ལ་དངོས་པོའི་ཆོས་མེད་པ། །དེ་ཕྱིར་མཚན་མ་མེད་པ་ཡིན། །མཚན་མ་མེད་པ་དེ་ཉིད་ལ། །སྨོན་པ་མི་དགོས་རང་ལ་ཡོད། །དེ་ཕྱིར་སྨོན་པ་མེད་པ་ཡིན། །དེ་ནི་གྲུ་གསུམ་རང་བཞིན་ཏེ། །རྣམ་པར་ཐར་པ་གསུམ་པ་ཡིན། །ཆོསདེམཚོནཔའིརྟགསལ་ནི། །དེ་ཕྱིར་ཆོས་རྟགས་ཕྱག་རྒྱ་ཡིན། །དུས་གསུམ་དྷརྨ་དེ་དབུས་ལ། །འདིར་བསམ་པས་ན་བསམ་པ་ཆེ བསམ་པ་མེད་པའི་ཕྱག་རྒྱ་ཡིན། །དེ་ལྟར་བསམ་པ་དེ་ཉིད་ནི། །སྤྲོས་དང་བྲལ་བས་དེ་ཉིད་ཡིན། །སྤྲོས་དང་བྲལ་བ་དེ་ལ་ནི། །གནས་པ་ནམ་མཁའི་མཚན་ཉིད་དེ། །དེ་བས་འོད་གསལ་ཞེས་བརྗོད་དེ། །འགྲོ་བ་ཀུན་གྱི་རང་བཞིན་གནས། །ཕྱིན་ཅི་ལོག་ཏུ་རྣམ་བརྟག་ཀྱང་། །འགྲོ་བའི་རང་བཞིན་དེ་ལས་ཡིན། །དེ་ཡི་ཕྱིར་ན་རྒྱལ་བ་དང་། །འཁྲུལ་པ་མཉམ་པར་དེ་ཉིད་གཅིག །དེ་ལ་གང་ཞིག་མཁས་ལྡན་པའི། །སོ་སོ་རང་རིག་ཏིང་འཛིན་གྱིས། །ནམ་མཁའི་དཀྱིལ་ལྟར་ཆོས་མཐོང་སྟེ། །གཉིས་སུ་མེད་པ་དེ་ཁོ་ན། །རྫོགས་པའི་རྫོགས་པ་མཁས་པའི་རྒྱ། །རྫོགས་པ་ཆེན་པོ་དཔལ་དང་ལྡན། །སྙིང་གི་ནམ་མཁའ་རང་ལ་ཡོད། །དེ་ནས་ཕྱག་ན་རྡོ་རྗེས་གསོལ་པ། །བཅོམ་ལྡན་འདས་ཆོས་ཟབ་མོ་ཡང་དག་པའི་དོན། །ཐུན་མོང་མ་ཡིན་པ་བདག་ལ་བསྟན་པ་ངོ་མཚར་ཏོ། །བདག་གིས་ཀྱང་མ་འོངས་པ་ན། །ཐུན་མོངས་མ་ཡིན་པ་རྣམས་ལ་བསྟན་པར་བགྱིའོ། །བཅོམ་ལྡན་འདས་ཀྱིས་གསུངས་པ། །གསང་བའི་བདག་པོ། ཆོས་ཆེན་པོ་འདི་འཛམ་བུ་གླིང་དུ་སྐྱེས་པ། །མཁའ་འགྲོ་མའི་ཕྱག་རྒྱ་ཡོད་པ། །ཚེ་ལ་དབང་བའི་རིག་འཛིན་ཐོབ་སྟེ། །བྲམ་ཟེ་མཆོག་སྲེད་ཅེས་བྱ་མ། ལྷུན་གྱིས་གྲུབ་པའི་ས་ལ་འགྲོ་བ། དེའི་ལག་ཏུ་འབྱུང་བར་འགྱུར་ཏེ། ཁྱོད་ཀྱིས་ཟུང་ལ་ཆོངས་ཤིག །སྣོད་མ་དག་པ་རྣམས་ཀྱི་རྒྱུད་བྱང་བར་གྱིས་ཤིག །རྣལ་འབྱོར་དབང་ཕྱུགཆེནམོརལ་གཅིག་མའི་རྒྱུད་ལས། རྫོགས་པའི་རིམ་པ་ཕྱི་མ་སྟེ་ལེའུ་བཅུ་བཞི་པའོ།། །།རྫོགས་སོ། །རྒྱ་གར་སྐད་དུ། ལོ་ཀ་དུ་ཏ་ཏནྟྲ་པྲ་བ་སད་ནཱ་མ། བོད་སྐད་དུ། སྲིད་པའི་བེམ་ཞེས་བྱ་བ། རྒྱ་ནག་སྐད་དུ། བདེ་རོད་དར་མུད་ཁ་ཕྱེད། བོད་སྐད་དུ། སྲིད་པའི་སྐོས་ཆེན་པོ་ཞེས་བྱ། ཞང་ཞུང་སྐད་དུ། མུ་