Ngb-pt-0010-vol-01-text
Front[edit]
Body[edit]
འདོད་པ་ནི། །དེ་ནི་ས་ཡི་གོལ་ས་ཡིན། །རིག་པ་རང་བྱུང་ཡེ་ཤེས་ལ། །རྒན་པོ་མཁར་ཐོགས་བསྒོམ་པ་དང་། །རྒན་མོ་མཛུབ་ཚུགས་བསྒོམ་པ་དང་། །གཤོན་པ་བདེ་བ་བསྒོམ་པ་ནི། །ཉམས་མྱོང་རེ་ལ་ཕྱོགས་ལྟོས་མེད། །ཉམས་མྱོང་རྐྱེན་གྱིས་བསྒྱུར་བའི་ཕྱིར། །ཡེ་ཤེས་སྐྱེ་བ་རྐྱེན་ཁར་ཐལ། །ཕྱོགས་ལ་ལྟོས་ནས་རྟེན་འཆའ་བས། །དེ་ནི་ཉམས་མྱོང་གོལ་ས་ཡིན། །རྫོགས་ཆེན་ཡང་ཏི་ནག་པོ་ལས། །ཕྱོགས་འཛིན་མི་སྤང་མི་འགེག་ལ། །ཆེད་དུ་གང་ཡང་མི་བསྒྲུབ་པས། །དེས་ན་ལྟོས་པའི་ཆོས་མེད་དེ། །དེ་ཡི་མིང་ནི་ལྷུན་གྲུབ་ཡིན། །དེ་ཡིས་མཚན་ནི་རྫོགས་ཆེན་ཡིན། །གསང་མཚན་ཡང་ཏི་འབྲུ་གཅིག་ཡིན། །ཡང་གསང་ལྟ་བ་ལ་ཐལ་གྱི་རྒྱུད། ཀུན་ཏུ་བཟང་པོའི་སྲོག་གི་སྐྲུ་གྲི། རྡོ་རྗེ་སེམས་དཔའི་ཐུགས་ཀྱི་རེག་ཆོད་རོ་ལངས་བདེ་བའི་ཐུགས་ཀྱི་སྲོག་གི་ཐིགས་པ། བརྒྱུད་པ་གསུམ་པ། ལྟ་བ་ལ་ཐལ་གྱི་རྒྱུད་རྫོགས་སོ།། །།ཐིག་ལེ་ཉག་གཅིག་སྐུ་ལ་ཕྱག་ཚལ་ནས། །བཅོམ་ལྡན་ཀུན་ཏུ་བཟང་པོ་ཡིས། །ཆོས་ཉིད་བརྡལ་བའི་ཕོ་བྲང་དུ། །འཁོར་གྱི་རྡོ་རྗེ་སེམས་དཔའ་ལ། །རིག་པ་གྱི་ནང་མེད་པའི་དུས། །ཐབས་དང་ཤེས་རབ་བསྟན་པ་ཤར། །ཞེས་གསུངས་སོ། །ཐིག་ལེའི་ངང་དང་བྱིན་རླབས་ལས། །སྤྱོད་པ་གཏན་ལ་ཕེབ་པ་ཡིས། །ཐབས་དང་ཤེས་རབ་རྒྱུད་ཆེན་འདི། །བྱིན་གྱི་རླབས་ཀྱིས་ཤར་བའོ། །སྤྱོད་པའི་དོན་གཉིས་རྣམ་གསུམ་ཏེ། །སེམས་ལས་བྱས་པའི་སྤྱོད་པ་དང། །ཆོས་ལས་བྱས་པའི་སྤྱོད་པ་དང་། །ཡང་ཏི་ནག་པོའི་སྤྱོད་པའོ། །སེམས་ཀྱི་སྤྱོད་པ་རྣམ་གསུམ་ཏེ། །མདོ་སྡེ་འདུལ་བ་མངོན་པ་གསུམ། །དེ་ཡང་སེམས་ཀྱི་སྤྱོད་པ་ཡིན། །མ་ཧྭ་ཨ་ནུ་སེམས་ཕྱོགས་གསུམ། །དེ་ཡང་སེམས་ཀྱི་སྤྱོད་པ་གསུམ། །ཆོས་ཀྱི་སྤྱོད་པ་རྣམ་པ་གཉིས། །ལྟ་བ་སྒོམ་པ་སྤྱོད་པ་ཡང་། །དེ་ཡང་ཆོས་ཀྱི་སྤྱོད་པ་ཡིན། །ཐོས་དང་བསམ་དང་བསྒོམ་པ་ཡང་ དེ་ཡང་ཆོས་ཀྱི་སྤྱོད་པ་ཡིན་། །ཞེས་གསུངས་སོ། །ཡང་ཏི་ནག་པོའི་སྤྱོད་པ་ནི། ཁྲེས་རབ་ཆེན་པོར་འདོད་པ་སྟེ། །སྣང་བ་མི་འགེགས་ཐུག་ཕྲད་ཁྱེར། །འོད་གསལ་འཁོར་ལོ་རྒྱས་འདེབས་སྤྱོད། །འཛིན་པ་རིག་པ་རང་གྲོལ་བས། །ཡིད་ཀྱི་འཛིན་པའི་རྒྱས་འདེབས་སྤྱོད། །ཡུལ་དང་ཡུལ་ཅན་གཉིས་མེད་པས། །དབྱེར་མེད་ཆོས་སྐུ་རྒྱས་འདེབས་སྤྱོད། །དེ་ནི་ཡང་ཏི་ཕྱིར་སྤྱོད་དོ། །ཡང་ཏི་ནང་སྤྱོད་བསྟན་པ་ན། །རང་ལུས་འབྱུང་བའི་ཡིད་ཕུང་ལ། །དབྱེར་མེད་ཆོས་སྐུའི་རྒྱས་འདེབས་སྤྱོད། །འོད་གསལ་འཁོར་ལོ་བསྐོར་བ་ཡིས། །ཆོས་སྐུ་ཤེས་རབ་ངང་དུ་འཆར། །གཟུང་འཛིན་རིག་པའི་ཀློང་དུ་དག །དེ་ནི་ནང་གི་སྤྱོད་པའོ། །ཡང་ཏི་གསང་སྤྱོད་བསྟན་པ་ནི། །རིག་པ་བཀག་པས་མི་ཁེགས་ཏེ། །རང་ཤར་དགག་བསྒྲུབ་མེད་པར་ཐོང་། །རིག་པ་གཅེར་བུར་སྤུར་གྱིས་ཕྱུངས། །སྣང་བ་བསྒོམ་པ་སྤུན་པོར་་།ར། །ཐིག་ལེའི་ངང་དུ་ལྷངས་ཀྱིས་པ། །ཡེ་བཞེངས་ཆེན་པོ་ཞེས་ཀྱང་བྱ། །གཞི་བཞག་ཆེན་པོ་ཞེས་ཀྱང་བྱ། །ཡེ་གྲོལ་ཆེན་པོ་ཞེས་ཀྱང་བྱ། །ཡང་ཏི་ནག་པོ་ཞེས་ཀྱང་བྱ། །གསེར་གྱི་འབྲུ་གཅིག་ཞེས་ཀྱང་བྱ། །ཐིག་ལེའི་ངང་དུ་ཤར་བ་