ལྕེ་བཙུན་ཆེན་པོའི་བི་མ་ལའི་ཟབ་ཏིག་གི་ཉེ་བརྒྱུད་སྐོང་བ་་་

From Rangjung Yeshe Wiki Texts
Jump to navigationJump to search

༄༅། །ལྕེ་བཙུན་ཆེན་པོའི་བི་མ་ལའི་ཟབ་ཏིག་གི་ཉེ་བརྒྱུད་སྐོང་བ་དད་པའི་གདུང་དབྱངས་ཞེས་བྱ་བ་བཞུགས་སོ།[1]

།ན་མོ་གུ་རུ་བིདྱཱ་དྷ་ར་ཡེ། འདིར་རིག་འཛིན་བརྒྱུད་བསྐང་བྱ་བར་འདོད་པ་དག་གིས། ཚོགས་རྫས་ནམ་མཁའ་མཛོད་ཀྱི་སྔགས་རྒྱས་ལན་གསུམ་སྤེལ་ལ། དབྱངས་སྙན་པོས། ཧཱུྃ་ཧྲཱིཿ ཀུན་བཟང་གདོད་ནས་རྣམ་དག་སྤྲོས་དང་བྲལ། །ཀུན་ལ་ཡེ་ནས་རྟག་ཁྱབ་ཚུལ་གྱིས་བརྡལ། །ཀུན་བྱེད་སྒྱུ་འཕྲུལ་དྲྭ་བའི་སྤྱི་དཔལ་ཆེ། །ཀུན་བཟང་རྡོ་རྗེ་སེམས་པའི་ཐུགས་དམ་བསྐང་། །དགའ་ཆེན་མི་འགྱུར་ཡེ་ཤེས་ལྔ་ཡི་བདག །དགའ་མཆོག་ཁ་སྦྱོར་བདུན་ལ་དགྱེས་རོལ་ཞིང་། །དགའ་བའི་མཚན་དཔེ་ངེས་གསང་སྟོན་པའི་ཚུལ། །དགའ་རབ་རྡོ་རྗེ་རྩལ་གྱི་ཐུགས་དམ་བསྐང་། །མཚན་ཉིད་ཆོས་ཀྱི་སྒྲོ་འདོགས་ཡོངས་བཅད་དེ། །མཚན་མའི་རྟོག་པ་གདོད་མའི་དབྱིངས་སུ་དེངས། །མཚན་ཙམ་ཐོས་པས་ཐེ་ཚོམ་དྲྭ་བ་གཅོད། །མཚན་ལྡན་འཇམ་དཔལ་བཤེས་གཉེན་ཐུགས་དམ་བསྐང་། །རིག་པའི་གནས་ལ་སྦྱང་པ་ཕ་མཐར་སོན། །རིག་འཛིན་གསང་ལམ་འོད་གསལ་རྫོགས་ཆེན་དོན། །རིག་པ་དྲལ་ཏེ་ལམ་བཟང་སྲོལ་འབྱེད་པ། །རིག་འཛིན་ཤྲཱི་སིང་ཧའི་ཐུགས་དམ་བསྐང་། །རང་འཁྲུལ་རྟོག་ཚོགས་འོད་གསལ་དབྱིངས་སུ་དག །རང་སྣང་མཚན་འཛིན་སྐུ་དང་ཐིག་ལེར་སྨིན། །རང་བཞིན་ཆོས་ཀུན་སྐུ་གསུམ་འབྲས་བུར་རྫོགས། །རང་གྲོལ་དྲི་མེད་བཤེས་གཉེན་ཐུགས་དམ་བསྐང་། །གསང་ཆེན་ཐེག་རྩེ་འོད་གསལ་སྙིང་པོའི་དོན། །གསང་ཚུལ་བགྲང་བྱ་བདུན་དུ་ཉམས་བཞེས་ཚེ། །གསང་ལམ་སྣང་བཞི་མཐར་ཕྱིན་འཇའ་སྐུར་གྲུབ། །གསང་བདག་སིཾ་ཧེ་ཤྭ་རའི་ཐུགས་དམ་བསྐང་། །འོད་གསལ་བདེ་བ་ཆེན་པོའི་སྒྱུ་འཕྲུལ་གར། །འོད་གསལ་དབྱིངས་ལས་དགོངས་པའི་རྩལ་ཆེན་རྫོགས། །འོད་གསལ་སྙིང་པོའི་གསལ་བྱེད་འཁོར་ལོས་སྒྱུར། །འོད་གསལ་སྤྲུལ་པའི་རྡོ་རྗེའི་ཐུགས་དམ་བསྐང་། །བཀའ་བཞིན་བསྒྲུབས་པས་ཕན་བདེ་ལག་རྩེར་སྦྱིན། །བཀའ་གསང་གཉན་པོའི་སྨིན་གྲོལ་བདུད་རྩི་ཡིས། །བཀའ་བབས་སྐལ་ལྡན་འགྲོ་བ་རྗེས་སུ་འཛིན། །བཀའ་དྲིན་འཁོར་མེད་བླ་མའི་ཐུགས་དམ་བསྐང་། །མདོར་ན་དུས་གསུམ་གཤེགས་བཞུགས་འབྱོན་འགྱུར་བའི། །སངས་རྒྱས་བྱང་སེམས་རྩ་གསུམ་དམ་ཅན་དང་། །འཁོར་འདས་མཉམ་ཉིད་མགྲོན་རིགས་ཐམས་ཅད་ཀྱི། །ཐུགས་དམ་བསྐང་བའི་དམ་རྫས་མཆོད་པ་ནི། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་རོལ་བའི་ལྷ་མོར་བཅས། །འདོད་ཡོན་ཕྱི་ཡི་མཆོད་པས་ཐུགས་དམ་བསྐང་། །རང་བྱུང་ནང་གི་མཆོད་པས་ཐུགས་དམ་བསྐང་། །སྦྱོར་སྒྲོལ་གསང་བའི་མཆོད་པས་ཐུགས་དམ་བསྐང་། །བདེ་ཆེན་ཕྱག་རྒྱའི་མཆོད་པས་ཐུགས་དམ་བསྐང་། །ཟུང་འཇུག་བླ་མེད་མཆོད་པས་ཐུགས་དམ་བསྐང་། །བསྐང་དུ་མེད་དེ་ཡེ་གྲོལ་ཆེན་པོར་བསྐང་། །སྦྱོར་དུ་མེད་དེ་ཟུང་འཇུག་ཆེན་པོར་སྦྱོར། །བསྒྲལ་དུ་མེད་དེ་མཉམ་ཉིད་དབྱིངས་སུ་སྒྲོལ། །ཡེ་བསྐངས་ཡེ་སྦྱོར་ཡེ་སྒྲོལ་ཆེན་པོར་བསྐང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། ཨ། དེ་ལྟར་འཁོར་གསུམ་མཚན་མའི་རྟོག་ཚོགས་ཀུན། །རང་བྱུང་རང་སྣང་རང་ཤར་རང་གྲོལ་དུ། །འོད་གསལ་འདུས་མ་ཡེ་བྱས་བརྗོད་བྲལ་དབྱིངས། །འུབ་ཆུབ་བློ་འདས་ཆེན་པོར་ཨེ་མ་ཧོ། །ཚིག་སྙན་འཇའ་རིས་བཀྲ་མིན་ཡང་། །དོན་བཟང་རིག་འཛིན་བརྒྱུད་པ་ལ། །དད་པའི་ཤུགས་ཀྱིས་ཉེར་དྲངས་པས། །འདི་ལ་ནོངས་པ་མེད་དོ་སྙམ། །ལྷག་བསམ་འོད་དཀར་བདུད་རྩིའི་ཟིལ་དངར་གྱིས། །ཡིད་ཅན་ལྟུང་བའི་དྲི་ཚོགས་ཡོངས་སྦྱངས་ཏེ། །འགྲོ་རྒྱུད་འདའ་དཀའི་སྨན་མཆོག་བཟང་པོས་གཏམས། །དུཿཁའི་གཅོང་ནད་དྲུང་ནས་འབྱིན་གྱུར་ཅིག །ཅེས་དད་མོས་ཀྱི་སྒོ་ནས་ཉེ་བརྒྱུད་ཀྱི་དོན་བསྐང་འདི་ཉིད་རིག་འཛིན་སྣ་ཚོགས་རང་གྲོལ་དུ་འབོད་པའི་གདོལ་སྤྱོད་པ་དེས་ཤར་མར་བྲིས་པས་དུས་གསུམ་རིག་འཛིན་རྒྱ་མཚོས་རྗེས་སུ་འཛིན་པའི་རྒྱུར་གྱུར་ཅིག། ༈ །།གསང་བ་དོན་ཕྲིན་གྱི་སྐོང་བཤགས་མཁའ་འགྲོའི་ཐོལ་གླུ་བཞུགས་སོ། །ན་མོ་གུ་རུ་ཡེ། ངེས་དོན་འོད་གསལ་བི་མའི་ཟབ་ཏིག་སྲོལ། །སླར་ཡང་གསལ་བྱེད་སྤྲུལ་པའི་རོལ་གར་ཅན། །བརྒྱུད་ལྡན་རྡོ་རྗེའི་རིག་འཛིན་མཁའ་འགྲོ་མར། །འདུད་དོ་གྲུབ་གཉིས་ཤིས་པ་སྩོལ་མཛོད་ཀྱེ། །འདིར་གསང་བ་དོན་ཕྲིན་གྱི་བསྐང་བཤགས་སྤྲོ་ན། མཆོད་རྫས་ནམ་མཁའ་མཛོད་ཀྱི་སྔགས་རྒྱས་སྤེལ་ཏེ། ཨ། ཆོས་ཉིད་དྲི་མེད་ཀ་དག་དབྱིངས། །དགོངས་ཀློང་འདུ་འབྲལ་མེད་པའི་ངང་། །སྙིང་པོའི་དཀྱིལ་འཁོར་བླ་ན་མེད། །དགོངས་བརྒྱུད་བླ་མའི་ཐུགས་དམ་བསྐང་། །ངེས་གསང་ཟབ་ཏིག་བདུད་རྩིའི་ཐིག །བཀྲལ་སྡུད་སྣང་མཛད་གདམས་པའི་མཛོད། །རྟོགས་གྲོལ་དུས་མཉམ་རིག་པ་འཛིན། །བརྡ་བརྒྱུད་བླ་མའི་ཐུགས་དམ་བསྐང་། །རིག་འཛིན་གསང་ལམ་རྨད་པོ་ཆེ། །མཁའ་འགྲོའི་ཞལ་རླངས་ཐོལ་ལེ་བ། །ཕུལ་བྱུང་གདམས་པའི་བཅུད་མངའ་བའི། །སྙན་བརྒྱུད་བླ་མའི་ཐུགས་དམ་བསྐང་། །མདོ་སྔགས་རྒྱུད་སྡེའི་མཛོད་མངའ་ཞིང་། །འོད་གསལ་སྙིང་པོའི་ཤིང་རྟ་ཆེ། །འཁོར་ལོའི་དབང་ཕྱུག་རྡོ་རྗེ་འཛིན། །དཔལ་མགོན་བླ་མའི་ཐུགས་དམ་བསྐང་། །རྒྱུད་བཞི་སྡེ་གསུམ་ཐེག་པ་ཡི། །དངོས་གྲུབ་རྒྱ་མཚོའི་དཔལ་མངའ་བ། །སྒྱུ་འཕྲུལ་དྲྭ་བའི་རོལ་གར་ཅན། །ཡི་དམ་ལྷ་ཚོགས་ཐུགས་དམ་བསྐང་། །ཕྱི་ནང་གསང་བའི་གནས་ཡུལ་བདག །བསྒྲུབ་པའི་དྲོད་ཉུལ་ལེགས་ཉེས་མཁན། །བར་ཆད་སེལ་བའི་གཡར་དམ་ཅན། །མ་ཚོགས་མཁའ་འགྲོའི་ཐུགས་དམ་བསྐང་། །ཆོས་བཞིན་བསྒྲུབ་པའི་རྣལ་འབྱོར་ལ། །མོས་པ་རྣམ་བཞིའི་ཕྲིན་ལས་ཅན། །སྙིང་པོའི་དྲོད་འཛིན་ཐ་ཚིག་གཉན། །དམ་ཅན་རྒྱ་མཚོའི་ཐུགས་དམ་བསྐང་། ཨ། ཡེ་བསྐངས་ཡེ་སྦྱོར་ཡེ་སྒྲོལ་བདེ་ཆེན་ངང་། །ཕྱི་ནང་གསང་བ་ཡང་གསང་བླ་མེད་ཀྱི། །རབ་འབྱམས་ཟག་མེད་མཆོད་སྤྲིན་རྒྱ་མཚོས་བསྐང་། །ལས་བཞི་ལྷུན་གྲུབ་དོན་གཉིས་དངོས་གྲུབ་སྩོལ། །གཟུང་འཛིན་སྒྲིབ་ཚོགས་ཀ་དག་དབྱིངས་སུ་བཤགས། །དམིགས་མེད་དོན་གྱི་ཚངས་པ་བསྩལ་དུ་གསོལ། །ཡི་གེ་བརྒྱ་པ་བརྗོད། ཞེས་གཏེར་ཆེན་རྡོ་རྗེ་འཆང་གི་ཞལ་སྔ་ནས། ཉེར་མཁོའི་ཆེད་དུ་འདི་ལྟར་གྱིས་ཤིག་བཀའ་བསྩལ་སྤྱི་བོར་མཆོད་དེ། བག་མེད་ལྷོད་པོ་སྣ་ཚོགས་རང་གྲོལ་པས་དབེན་རི་དུང་དཀར་སྒང་གི་རི་ངོགས་སུ་བྲིས་པ་དགེའོ། །དགེའོ། །དགེའོ།། །།

View PDF Chetsun 8

Notes

  1. Sechen